الطفوله المشرده المتشرده

يا صباااااااااح الخير عليكوا انا قولت ارحمكم شويه من الرغى بتاعى وانزل موضوعين فى الاسبوع وبينى وبينكم هو افلاس فكرى (هو مين افلاس فكرى ده) او يعنى مواضيع متلخبطه فى دماغى ومش عارفه اجمع والبوست ده مفيهوش سوياسه ولا باميا اتفقنا.

المهم بقى الموضع ده تاعبنى جدا بتاع الاطفال وخاصه اطفال الشوارع اللى بقوا مالين الدنيا وعملوا مجتمع ما بينهم يعنى بيكونوا صغيرين فى السن وفيهم بنات بتكون حامل وطبعا دول مشردين ولا ليهم اهل ولا مأوى حتى الاماكن اللى الدوله خصصتها لهم زى قريه الوفاء والامل مثلا واللى كان فيها مشكله كبيرة قريب نتيجه انهم عاوزين يطردوا الناس اللى كبرت بره المكان والاولاد معترضين علشان ملهومش مكان تانى وداخل فى الموضوع كالمعتاد ناس كبيرة وسرقه ونهب وده اللى بقينا متعودين عليه (طبعا مش فى بلدنا دا احنا بلدنا كميله ههههههههههههه)
نيجى بقى ليه اصلا المشكله دى موجود بعض الحالات بيكون الاب والام منفصلين عن بعض ودى نسبه كبيرة ونلاقى البنت او الولد مش عارف يقعد فين مع امه ولا ابوه وفى النهايه ممكن الاتنين يكونوا اغبى من بعض ويكرهوا الاولاد فيهم او الاب يكرهه اولاده فى امهم او العكس طبعا .

وده نتيجه الغل اللى مستوطن والغباء اللى معشش فى دماغهم ومش بيهمهم غير نفسهم وبس وتمثيل فيلم الانتقام من الاخر بس فى الاولاد وبالتالى اللى بيضيع فى النهايه الاطفال .
ومن غبائهم الاكبر اللى هما ميعرفهوش بما انهم معندهمش دم ولا احساس ان الطفل ده اصلا بيبدأ يكرهه الاب او الام اللى هو مقيم معاه من كتر محاوله انه يكرهه فى الاخر ففى النهايه اللى بيدمر الطفل.

الطلاق حق ربنا اداه لينا بس فيه ناس بتستخدمه غلط وخاصه ان انا شايفه ان امهاتنا غيرنا خالص او الجيل القديم كانوا عندهم صبر وحكمه وحب للبيت والاسرة اكتر من الجيل المتنيل بتاعنا ده اللى كله ماشى حاطط كرامته على مناخيرة وبيبص لها فبيجيله حول فى عنيه وينسى اى حاجه فى الدنيا وزاد الطين بله قانون الخلع على الرغم من ان له مميزاته بس له عيوبه وده هتكلم فيه فى موضوع منفصل واقولكم وجهه جزرى فيه ومش هنتناقش دلوقتى انا قولت اهو اجلم خناقوا معايا لبعدين اكون اشتريت قلل للكوكب هههههههههه

انا بنادى من قلبى كل اب وام سواء مطلقين او غير او ام ارمله ومتزوجه شخص اخر او العكس يا ريت تبصوا للنعمه اللى ربنا اداها لكوا وتحافظوا عليها ووتحتوا اولادكم ومش علشان انتقام غبى جواكم تشوهوا صورة بعض قدام الاولاد ده هيجى بالعكس عليكوا وكمان بلاش خناقات قدام الاطفال والله بيحسوا جدا وبياثر على مذكرتهم وطريقه تعاملهم مع الاخرين.

حافظوا على اولادكم علشان مش بعد يوم او اتنين تلاقوهم فى الشارع ومش عاوزين يرجعوا تانى البيت وبيعملوا مصايب.
كمان الاباء حاول تصاحب ابنك وبلاش لو اتعصبت عليه او غلط تعالج الغلط بغلط اكبر وتقوم تطرده من البيت لانك متعرفش هو هيروح فين ولا مين هيقابله ولا ممكن يحصل ايه هتقول بأدبه لا غلط كبير لان بره بيته ممكن يلاقى مخدرات وسرقه والناس الوحشين بقوا كتير .

كمان الامهات راعوا بناتكم شويه وصحبوهم من وهما صغيرين علشان مشاكل البنات مش بتنتهى خالص وبتحتاج لحضن امها .
واياكم والدلع الزايد وده ولد يعمل براحتوة ويجى وقت ما يحب لا ااااااااااااااا لازم يبقى فيه رقابه.

ويا ريت اللى يقدر يساعد الاطفال دى بجد بأى شكل يحاول يعنى اللى بيكون فى منطقته اطفال من دول يحاول يحتويهم اوجهوهم للجوامع
للصلاة للدروس للنصح كل واحد يحاول يعلمهم او لو يقدر يرجعهم بيوته
الحكومه مش هتقدر تعمل كل حاجه لوحدها بما انها مش فاضيه وراها غسيل جيوبنا (((يا دى النيله عليك دبور مش قولنا مش هنتكلم المرة دى فى السياسه).

ملحوسه من واحده مفروسه :- اقسم بالله العظيم اللى هيدخل مخفى الاسم ولا مخفيه الاسم ويقل ادبه فى اى كلام ما حد هيرحمه من ايدى ولا لسانى وفيه اختراع كده اسمه الاى بى هعرف عن طريقه وساعتها بقى يقول على نفسه البقاء لله لانى ولا بقول حاجه غلط ولا حاجه عيب فى الكوكب مش عاوزة طوله لسان من ناس تافهه وهايفه. وقد بعتر من فنجر وعنذر


كان معكم مدير عام الشئون الاجتماعيه فى بلد التقليه والملوخيه نقيب رقيب فقيد مشرد دكتور نفساوى آبى هانم بتنجانى