الاختلاف فى البتنجان افسد للمسقعه الصنيه

وسلم ليه على المهلبيه ايون هو ده باقى العنوان ومش بهزر
ندخل فى الموضوع وسعوا شويه والبنات فى مكان والاولاد فى مكان مش عاوزة انخلاطات انا بقول وبحنذر.....
اليومين دول بجد بشوف حركات غريبه ومريبه بينا احنا المدونين والناس فى الشارع يعنى ممكن الواحد يقول رأيه فى موضوع بكل صراحه وبأدب جدا والتانى يرد بنفس الطريقه ودول بيبقوا ناس محترمه جدا . او واحد بيسال ويستفسر والتانى يفهم كلامه غلط على انه هجوم او مع او ضد الموضوع ودول بقى بيجيبوا ليه حساسيه والتهاب فى المرارة اللى اتفقعت من بدرى وببقى عامله زى اللى لبسه فرده شراب فى دماغها هو انا لما اتناقش مع واحد فكرة واتجاهه غيرى يبقى انا معاه او ضده هو مينفعش نفهم بعض مينفعش نقرب وجهات النظر لا ازاى لازم يا ابقى معاهم يا عليهم بزمتكوا ده ينفع بزمتوكوا احنا شعب مجهز للديمقراطيه .
بجد احناا بقينا فى المهلبيه يا عطيه وبقينا عاملين زى المجانين سيبين الحكومه والهم اللى احنا فيه وبنتفكك داخليا ونهاجم بعض وكل واحد ماسك قله فى ايده وبيخبط التانى بيها وما بيصدق يمسك له غلطه طيب احنا سيبنا مشاكلنا مع البلد وحالنا اللى اتعوج وبقى زى الفيل ابو زلومه مايله ومسكنا فى خناق بعض طيب امتى هتتفرغوا للبلد يا اللى عاملين مثقفين وعاوزين حالها يتصلح اذا كان مش قادرين تقفوا مع بعض لغايه لما تقضوا على الفساد اللى بره لووووووووووووووووووووولى والله ساعات بقيت احسن اننا مينفعش لينا غير حكومتنا الغبيه دى.

حاجه تانيه لو فيه علاقه بين اتنين مثلا وسألها او سأتله عن احساسها او هو بيمثل لها ايه بترد بكل صراحه فيه ناس بتتقبل وفيه ناس لا تتقبل ايه ازاى وليه واشمعنى انا وليه متوافقيش حتى فى الجواز الله طيب يا سيدى ما هى قالت لك الحقيقه اللى جواها او قالك اللى جواه . نقوم نلاقى ايه بقى الديك الرومى نفش والغباء طفح ولسانهم دلدل ونطر عرق الهطل على الاستعباط على البجاحه ويبدأ يشهر بالبنت او البنت تبدأ تضايق فى الولد عن طريق اى حاجه معاكسات تلفيق اى مواضيع تشهير فى النت تركيب صور ودى بقت موضه بين الناس وبقيت مصيبه طيب ايه عاوزين يضحك عليكوا .
سؤال كده من النحله والدبور هو احنا ليه بنستخدم التكنولوبيا فى المصايب وبنسيب استخدامها الصح .اممممممممممم بما اننا عندنا غل صح ومش بنعرف نستمع لبعض ولا نحترم آراء بعض ودماغتنا مزنوقه فى كعوب الشوز بتاعتنا .
حاجه تانيه اتنين اتناقشوا فى موضوع مثلا واختلفوا تلاقى ده راح غلط فى ده يا نهار طيب ليه يا جماعه ما هو ربنا خلقنا مختلفين فى البتنجان خالص يعنى كل واحد عنده بتنجانته اللى فى دماغه وعجباه طيب بنخنق على بعض ليه ولا الاقى واحد شاغل نفسه بحياة غيرة يا سحالى ويا تماسيح ما تشغلوا نفسكم بحياتكم مش بحيات غيركم هو الفضول بيأكل فى قفاكم ولا ايه ما تسيبوا الناس فى حالها . والله كل واحد لواتلفت لنفسه لهتبقى الدنيا حلوة انما ايه المصريين والفضول بقت سمه عندنا زى كان زمان المصريين والفول دلوقتى اتغير والفضول.
نيجى للبجاحه بقى تلاقى الناس عارفه انها غلطانه لا وتلاقيها بجحه تعاند فى الغلط ودول بصراحه بيكون نفسى اجيب النمل الكبير الرخم اللى بيطلع من الشجر ده واسيبه عليهم يقرقص فيهم ويعذبهم واقطع عليهم الميه علشان يجلهم حساسيه واخلص منهم او تلاقى حد اخد حاجه مش من حقه وبرضه يبقى بجح ويطلب اكتر مفبيش عندنا بتاع من الاحمر ده ولا خلص من السوق خلاص الكرات البيضاء والحمراء دول خلاص

نيجى للصفه التالته الاستعباط بقى هو ايه والناس اللى واكله مستعبطه ومستهبله هو الخبر اللى جاى ده واللى اخدته من المصرى اليوم.
109استقالات جديدة من «الوطني» في الجيزة والشرقية.. وتوقيعات بتقديم استقالة جماعية في السويس بسبب ترشيحات المحليات.
ههههههههه وايه السبب بقى حبوا يأخدوا كل واحد حته من التورته منفعش بمعنى ايه طبعا الحزن المستوطن بتاعنا بيوزع التورته اللى هى المحنيات بمزاجه وطبعا بقيت المعازيم عاوزين فمش عجابهم الطريقه لان فيها محسوبيات فيعملوا ايه يهددوا بالاستقاله يعنى وقعوا فى بعض اخيرا وبانت حياتهم بصراحه يعنى المفروض الاحزان التانيه متزعلش ما حتى بتوع الوطنى مكوسين ما بينهم وعاملين خرفان فدا ههههههههههه مش خرفانى بعينهم طبعا انا خرفان تتيقراطيين ملهوش فى الانتخابات طبعا.
ومن هنا يبان الاستعباط بتاع الحزن المستوطن على قلوبنا ويبان الاستعباط اللى احنا بقينا فيه واننا الحمد لله رب العالمين هنفضل سلبيين وسيبين حياتنا فى ايدين شويه ناس واكلين مهلبيه ومولوخيه بالتقليه وريحتها طلعت علينا واحنا برضه نايمين ومستعبطين وقفلين مراخيرنا وودانا اللى بقت زى ودان الفيل .
ومن هنا احى الشعب المصرى الايجابى اللى مش احنا طبعا على الحركه اللى يا رب تحصل فعلا يوم سته ابريل وهى الاضراب العام محدش يروح شغله ولا مدرسه ولا يفتح محل يمكن الناس التانيه تحس على دمها وتعرف اننا مش عاوزينهم ونبطل بجاحه ونقول الحكومه هى السبب اذا كانت الحكومه عندها نسبه فاحنا عندنا النسبه الاكبر ونصارح نفسنا بالحقيقه اننا بقينا زى الدببه ورجعنا اطفال بالببرونه تانى عاوزين كل يوم الرضعه ونسيب الدنيا تمشى برحتها وبقينا موكوسين وكسه كحك العيد ومحدش يسال يعنى ايه وسلم لى على البتنجان

كان معكم مهندس استاذ دكتور / سعاده الشيف آبى هانم بتنجانى