حكم وامثال


من حبى الشديد للحكم والامثال الشعبيه او الاجنبيه ودى الحاجه اللى بتشدنى جدا مش مجرد قراءه او مجرد معرفه بس فعلا انا بعمل بأغلبيتها فقولت اتحفكم بكام واحد كده يمكن تستفيدوا منهم
وعلى فكره انا من كتر ما بحب انى اقراها بقيت بعرف اقول امثال وحكم من دماغي

هقول لكم جزء منقول وجزء من تاليفى

المنقول

الإفراط في التواضع يجلب المذلة

بنفسي فَخَرْتُ لا بجدودي

إذا الشعب يوما أراد الحياة فلا بد أن يستجيب القدر

العبد يقرع بالعصا والحر تكفيه الإشارة

إذا سمعت الرجل يقول فيك من الخير ما ليس فيك فلا تأمن أن يقول فيك من الشر ما ليس فيك

أقل الناس سروراً الحسود

شر الناس من لا يبالي أن يراه الناس مسيئا
يبني قصراً ويهدم مصراًقد يخرج من الصدفة غير الدُّرَّة

ظلم الأقارب أشد وقعا من السيف

عندما تكون في روما تصرف كما يتصرف الرومان

تاليفى انا بقى


لما الدنيا تبقى سلاطه يبقى لازم انت تبقى خياره


وما الحياه الا شويه خوازيق فوق بعض

لو كان الكسل والانتخه بطه لنتفت ريشها وهى صاحيه


اللى كان قبلك انت وانت مش جنبى .... كانت ايام ماشيه بقفاه


من السهل انك تكون قليل الادب لكن من الصعب انك تبقى مؤدب فى الزمن ده


اللى ما لوش شغلة تشغله يفتح الباب و يقفله


الاعلانات المصريه اقوي سائل لزج لصدأ العقول فى مصر


الاب ديت الجديد للمستحيلات الاربعه 1 - المرتب يكفى ليوم 15 فى الشهر 2- الريس يتغير 3- الشعب المصري يرجع هادي ومبتسم زي زمان 4 -الاسعار ترجع رخيصه


يا واخد الغزال على خفه دمه بكره تروح خفه الدم ويقعد الغزال بتقل دمه


البحر بيضحك ليه ... قال ايه علشان حد بيزغزغه وعجبى


احذر عدوك مرة وصديقك ألف مرة فإن انقلب الصديق فهو أعلم بالمضرة


البروفايل اللى يجيلك منه ريح اعمله اجنور واستريح وخليه يخبط دماغه فى اقرب ووول


الكلب السعيد يهز ديله والمنافق يهز لسانه


ان تكون دبشه فهذا مقبول ...وان تعشق شخصيه دبشيه بحته من الممكن ان تكون مصيبه ....اما الكارثه فانك اكيد هتخلف اطفال ماركه صخر


ومن الجيران ما قتل وراقب وكدب وفطس

اللى ملوش كبير يقعد يعمل غفير

اللى يفتح قلبه للحب هيفرح واللى يفتح ودانه لكلام الناس هيعيش طول عمره شبه عبده محتاس

سكران يضرب في ميت لا الاول داري ولا الثاني حاسس به .....ده حالنا مع حكومتنا

النصب بقى مفتاح الفرج

ليه اللى على راسه بطحه بيحط ايده عليها مع انه ممكن يلوثها بغبائه؟

اللى يمشى ورا الدكاتره ميخلاش من الحقن

ولا محصله كلب البحر ولا خيار البحر

اللى بيضغط على الالم بيوجع اللى قدامه ونفسه

دائما تاتى الرياح بما لا تشتهيه الشجر

اطبخي امسحي نضفى اوعي تهفلطي او تتأنزحي ... هو ده المطلوب من الست

لا تفكر في المفقود حتى لا تفقد الموجوديا عبد الموجود

انتي حدوته ونهايتها مش مقفوله يا بلد كل حاجه فيكي ملتوته

اعترض من اجل الاعتراض اعترض من اجل فرسه وفقع مرارة الاخر اعترض وخد لك كرسى فى البرطمان هديه اعترض من اجل تخليص روحك وسموها وارتفاعها وعرضها من العقد اعترض وخد ربع جنيه مخروم


كلام الناس لا بيطول ولا يقصر كلام الناس شماته وغيره مش اكتر


المدون الاومليت ما زال يلقى بالمجاملات هنا وهناك وكرهنى فى الاومليت وما زال يتوغل وينتشر ويتطور من جوافه لاومليت

آخر ما يموت في الرجل قلبه وفى المرأة لسانها فاحذر لسان المرآه اذا غضبت

سأل الممكن المستحيل : أين تقيم ؟ فأجابه في أحلام العاجزوالفاشل

القلب الذي لا يؤمن بالحب قلب بارد .. وانا قلبى الوكيل الوحيد للتلج فى العالم

وراء كل إمرأة عظيمة حب فاشل ..

الحياء سنه ومسح الجوخ فرض على الدلاديل

الناس بتتغير والشخصيات بتتغير والحياه ياما بتعلم

بين الحب والكرهه شعره وبينى قربى منك وبعدى عنك شعره وانا بأقر واعترف ان انا قرعه

كفايه عليكوا كده ذاكروا بقى

كان معكم ابى هانم كعب الغزال من امام محطه الامثال الشعبيه المصريه


تلاقيح جتت


لما واحده جوزها يطلقها ويرميها زى الكلبه لانه مش طايقها وهى تفضل لازقه فيه وعاوزاه وبتجرى وراه ومتسبهوش فى حاله لو فكر يتجوز هو او اللى هيتجوزها يبقى اسمها معندهاش دم ومش لاقيه حد يلمها وبايره وفيها عيب وشبه لامؤخذه البو بو بتاعت القرد

وانا بعتبر دى بالزبط زيها زى فاروق حسنى لما ملقوش حاجه يداروا بيها خيبته القويه قالك اسرائيل عملت مخطط علشان يخسر طيب انا هوافق على القصه دى بس بشرط نخلى عندنا دم بقى ونبعد عن اسرائيل ومنقعدش نمسح لهم جوخ ومش كل يوم والتانى واحد يتنش من على الحدود ونطلع نقول نيران صديقه مش كل يوم نبيع غاز ونبيع فى نفسنا ونقول اتفاقيه يعنى فوقوا بقى ما قالوا اهو الموساد كان مدخل عشره فى الموضوع علشان يبوظوه يعنى يا عم حسنى حتى بعد ما مسحت لهم جوخ زيك برضه زى الاخت المطلقه اللى جوزها رماها وراحت برضه تقوله هسامحك واعيش معاك وحبنى وكأن الحب يعنى بالعافيه وفى الاخر قالها يا جبله ياللى معندكيش دم مش عاوزك اسرائيل عملت فيك كده يبقى المطلوب بقى تشم على دمك وتستقيل بالمرة على فره انا مكنتش هتكلم عن فاروق حسنى بس حاصل موقف مشابهه ومعرفش ليه القصتين دخلوا فى بعض المطلقه اللى بتلقح جتتها اللى مش عاوزه تلم نفسها عن طليقها وفى نفس الوقت اللى عمله فاروق حسنى الاتنين دول اكتر اتنين معندهمش دم وخساره فيهم الحياه بجد


يالا اقعدوا بالعافيه

كان معكم ابى هانم كايده الاغبياء انا من يومى

حكمه الامبراطورة

ال... تلهيك واللى فيها تجيبه فيك
و
انتم كملوا النقط بقى

هناك فرق

الميل ده برضه تحفتنى بيه بنت خالتى وشوفت بجد قد ايه المراره على الرغم من انه مضحك جدا بس زعلت على نون النسوه فى مصر ودى حقيقه عاريه شمتوا الرجاله فينا
اتفرجوا وقولوا رايكوا
وتحذير يا ريت الرجاله تغض البصر علشان عيب
وعلشان برضه تجنب لاننا نشوف شلالات دم فى البيوت بسبب الصور دى
والمحاكم تزدحم بسبب الطلاق اتفرجوا بقى واقروا وشوفوا فعلا الفرق




الروسية بتوع العسل الأبيض
الشرطة النسائية القبرصية بتوع العنب والخروب
الاندونيسية بتوع الأرز والجمبري
الايطالية بتوع المكرونة والبيتزا
الأوكرانية برضه بتوع العسل الأبيض
اليابانية بتوع الأدب والطاعة
اليونانية بتوع الزيتون الكلاماته
الأمريكية بتوع كله والتفاح الامريكانى
الصينية بتوع الشاي الأخضر
الهولندية بتوع السمنه والجبنة

وأخيرا الشرطة النسائية المصرية


بتوع الكشري


وبتوع الفول المدمس


والفول الحيراتى

والترمس


والطعمية

و المحشى الكرنب


والمومبار


والكرشة

والكوارع

وأم على

وأم فتحى

وأم أربعة وأربعين



علما بأن الشرطة النسائية المصرية لا تتواجد فقط


في الأماكن العامة بل موجودة في كل منزل مصري


وهى لا تستخدم المسدس أبدا


ليه........و هى المقشة راحت فين


ولا تحتاج إلى المدفع الرشاش

ليه ..........ماهو لسانها موجود

هذا وقد أصدر وزير الداخلية قرارا بتعديل الاسم
الى الشرطة النسوانية المصرية
نظرا للصفات النادرة للشرطية المصرية
والغير موجودة لدى الشرطة النسائية حول العالم


شوفتوا الفرق بقى فى الاشكال والاجسام والاحجام
جتها خيبه اللى عاوزه كده
الا صحيح هما ليه لغوا كليه الشوربه للبنات طيب مش بالذمه كان هيبقى قلبنا حنين على المجرمين بدل ما نعذبهم وحموم الانسان تقعد تحط مناخيرها فى كل حاجه
انا لو فتحها تانى هروح ولا تيجوا نعمل جروب نطالب فيه وزير الملابس الداخليه بده
انا مستعده اتزعم الحركه


كان معكم لواء شرطه قسم الطافى والحرايق وانابيب البوتاجاز ابى هانم



حكمه الامبراطوره


العتبه يا ناس هينقلوها الوايلى واللى مروح يا ناس ابص الاقيه جايلى

فوفا خسر والمصرى برضه خسر


اليومين دول كانت الانتخابات بتاعت اليونسكو وعلى الرغم من خساره فوفا حسنى واللى الطبيعى اننا نزعل مش علشان فوفا لا قدر الله ولكن علشان دى حاجه كانت لمصر لقيت كل البشر بما فيهم انا فرحانه ونفسى ينفذ كلمته ويستقيل ويبقى كده اول وزير محترم لو يعنى طلع قد كلمته مع انى اشك شكه الملوخيه ساعات حططان التقليه

السؤال بقى هو احنا كمصرين بقينا بنكرهه مصر للدرجه دى ولا مش معترفين بالناس دى للدرجه دى ولا ايه التتغير اللى حصل فى شخصياتنا


ملحوظه اتنين

الناس كلها دلوقتى بتعارض انا بقرأ مدونات كتير وجرايد واخبار كله بيعارض طيب انا عاوزه اسال اللى بيعارضوا انتم بتعرضوا على اى اساس يعنى عندكم خطط بديله سواء المعارضه للحكومه او حتى لفكر شخص سواء كان مسلم مسيحى رجل دين رجل مجارى رجل كباريهات اى رجل واى كلام احنا بقينا بنعارض علشان نعارض وبس يعنى واحده مثلا لبست شوز حمرا هتلاقى الدنيا قامت وقعدت ليه معرفش علشان الاحمر وحش ولو ان لا مؤاخذه هنلاقى اغلبيه اللى اعترضوا عندهم اللون الاحمر ده بس فى حته تانيه ومحدش يفهمنى صح بجد
انا بقيت بتنقط انا لما بعترض على اى تصرف لاى حد بكون واضعه لاعتراضى اساسيات
يعنى مينفعش مثلا ابو رجل مسلوخه جاى يزور حاجه عندنا هووووووووب نقول لا ابو رجل مسلوخه ميدخلش ونعمل مظاهرة
مينفعش مثلا نقول هنعمل تجمع فى مكان وفجأه تلاقى الاعلام وكام شحط طالعين يقولك الامن فطسنا والامن كان حوالينا ما ده طبيعى ده تجمع وتجمهر ومش عارفين هيحصل فيه ايه احنا هنعترض ليه سواء بقى الامن بيحمينا ولا حتى بيعمل حاجات وحشه فى البنات طالما انا ارتضيت يبقى خلاص اسكت

مينفعش يبقى فيه تواجد مكثف للناس فى اماكن واعترض انهم بيلغوا مولد او بيلغوا حاجات مقفوله وعندنا وباء انا عاوزه اعرف الناس المعترضه بتعترض ليه ايه هى اساسيتها يعنى

مينفعش اعترض على النقاب علشان امشى فى موضه مينفعش انتقد الحجاب علشان يتقال عليا متحررة
مينفعش برضه واحد تعترض على غير محجبه علشان يتقال عليها ملتزمه انا نفسى اللى يعترض يقول مبرر صح واحد بس

وابوس ايديكوا لما تعترضوا على كلامى برضه قولوا ليه مبرر قولوا ليه

برضه المدونات كترت ليه اوى كده ما شاء الله مبقتش ملاحقه
يعنى اللى بقى بيدخل التدوين ده جديد ليه علشان ايه الهدف مدونه تفتح شهر وتقفل ولا شهرين وتقفل

اصلا انا عاوزه حد يقولى انا ايه مصبرنى عليكوا وعلى البلد دى وعلى انى اقرأ واكتب كل ده منك لله يا اللى فى بالى

وكل الحاجات اللى متنيله فوق دى مكتوبه نطلع منها بايه على راى خيخه
ان ليكم الجنه انكم متحملين واحده زى كده بجد كل سنه وانتم طيبين ومعترضين بالعقل

كان معكم لواء اركان حرب قائد جناح الطابيه اليمين ابى هانم


حكمه الامبراطورة

يغور القاعود اللى يجى من ناقة جربة

كل سنه وانتم طيبين


عيد سعيد عليكم يا رب وعلى اسره كل حد فيكم
ومحدش يجيب ليه كحك بحب الغريبه

بالمره روحوا عند البت الخيخه علشان عامله تجمع حريمى لنون النسوه بعد العيد التفاصيل عندها فى مدونتها الخيخه

لتغيير حياتك


الايميل ده جالى وقريته حسيت انه مفيد بجد هو كتير بس اعتقد مفيد وفيه حاجات انا عن نفسى احاول اعمل بيها حتى لو عملت النهارده اتنين وبكره اتنين وكل يوم على قد ما اقدر بس اعتقد اننا محتاجين للتغير شويه
قولت انقله يمكن ينفع حد كمان

خصص من وقتك 10 إلى 30 دقيقه للمشــي . . و أنت مبتسم

2- أجلس صامتاُ لــمدة 10 دقائـــق يـــومياُ

3- خصص لنومك 7 ساعات يوميا

4- عش حياتك بــثلاث أشياء : (( الطاقة + الحماس + العاطفة ))

5- العب ألعاب مسلية يوميا

6- أقرأ كتب أكثر من التي قرأتها سنة 2008

7- خصص وقتا للغذاء الروحي : (( صـــلاة ,, تسبيــح , , , , ))

8- اقض بعض الوقت مع أشخاص أعمارهم تجاوزت الـ 70 سبعين عام ,, و آخرين أعمارهم أقل من 6 أعوام

9- أحلم أكثر خــلال يقظتك

10- أكــــثر من تناول الأغذية الطبيعية ,, و أقتصد من الأغذية المعلبة
11- أشرب كميات كبيرهـ من الماء

12- حاول أن تجعل 3 أشخاص يبتسمون يوميا

13- لا تضيع وقتك الثمين في الثرثرة

14- أنسى المواضيع ,, ولا تذكر شريكة\شريك حياتك بأخطاء قد مضت لأنها سوف تسئ للحظات الحالية

15- لا تجعل الأفكار السلبية تسيـــطر عليك .. و وفر طاقتك للأمور الإيجابية

16- أعلم بأن الحياة مدرســـه .. و أنت طالب فيــها .. والمشاكل عبارة عن مسائل رياضية يمكن حــلـــها

17- كل إفطارك كــالـملـك ... و غدائــك كـالأميـــــر .. و عشـــائك كـالفقيــــــر..

18- أبتسم .. و أضحك أكــــثــــر

19- الحياة قصيرة جــــدا .. فـــلا تقضـــها في كـــــرهـ الآخرين

20- لا تأخذ (( جـمـيـع )) الأمور بجــديــه .. { كــن سـلـسـا و عـقـلانـيـا }

21- ليــس من الضروري الفوز بجميع المناقشات والمجادلات .. (( حاول أن توافق على الخطــأ ))

22- أنسى الماضي بسلبياته ,, حتى لا يفسد مـــســـتــقــبــلك

23- لا تقارن حيــاتك بغـــيرك .. ولا شريكة\شريك حياتك بالآخرين ..

24- الوحيـــــد المسئول عن سعـــادتك (( هو أنــــــت !! ))

25- سامح الجميع بدون استثناء

26- ما يعتقده الآخرين عنـــك .. لا عــــلاقة لك بـــه

27- أحــســن الــظــن بالله .

28- مهما كانت الأحوال .. (( جيــدهـ أو سيئة )) ثق بأنها ستتغـــــير

29- عملك لن يعتني بك في وقت مرضك .. بل أصدقائــك.. لذلك أعتـــنــي بــهــم

30- تخلص من جميع الأشياء التي ليس لها متعة أو منفعة أو جمـــال

31- الحســد هو مضيعة للوقت (( أنت تملك جميــــع احتياجاتك ))

32- الأفـــضــــل قادم لا محالة

33- مهما كان شعورك .. فلا تضعف .. بل أستيقظ .. و أنطلق ...

34- أعمل الشي الــصح دائماٌ

35- أتصل بوالديك .. وعائلتك دائـــماُ

36- كن متفائــــلاٌ .. وســـعـــيدا..

37- أعطي كل يوم .. شيئا مميزاٌ وجيـــداٌ للآخرين ..

38- أحــــــفـــــظ حــــــدودك ..

39- عندمـــا تستيــــقظ في الصبــــاح .. و أنت على قــيد الحياة .. فأحمد الله على ذلك ..

يالا اقعدوا ذاكروا بقى وسيبكوا من تنضيف البيت وتطليع المراتب والسجاد فى الشمس بلا وجع دماغ بحس الناس فى دخله العيد كأنها مبتنضفش طول السنه وبتستنى العيد
سؤال على الامش هما ليه الاجانب مفيش عندهم سجاد كتير فى الارض زينا ولا عندهم عفش كتير مع انهم اغنى
انا عارفه الاجابه بس بلفت نظركوا ليها
يالا اقعدوا بالعواف عليكوا

كان معكم من امام البلكونه المطله على الجنينه اللى بيتفرقع فيها بمب وصواريخ ابى هانم كعب الغزال

حكمه الامبراطورة

عندما يكون الكلب سعيدا يهز ديله واذا تحدث المنافق فيهز لسانه

نداء بتنجانى خيخى


بما ان البت خيخه دى صحبتى يا عينى وام شريف حبيبى فقولت ارفق بحالها وبما ان يا عينى هى الوحيده اللى كل التعليقات المجهوله بتروح لها عنى قررنا شفقه بيها انى افتح تعليقات المجهول وبرضه يا حرام مفيش فايده كل يوم والتانى تبلغنى تعليق واحنا بطننا وجعتنا من كتر الضحك على التعليقات وعلى صاحبها او صاحبتها اللى مش فاهمين هما عاوزين ايه وايه الخزعبلات اللى بيكتبها
تقريبا بيكتب بطريقه هيروغلوفيه مش بنفهمها بس اكتر حاجه بتعجبنى اننا بنقعد نضحك وبيتقلب معانا هسترية جامد اوى

وطلبت منها امبارح تكتب تنويه انى فتحت الباب للمجاهيل المهاويس علشان يطلعوا عقدهم عندى وبعدين لما اشوفها هبقى اقولها ونبقى برضه نضحك على كلامهم
فكتبت التنويه ده وعلشان الاتحاد الخيخى البتنجانى هنشره عندى يمكن المجهول يحس على دمه اللى عندها وعندى

ابي

حوشي صاحبك عني

ابى

صاحبك مجهول

ابي

مجهولك جنني

ابى

ده قرب يجيب اجلى



لو كان مجهولك

زى مجهولي

انا كنت نسيت وخلاص


انا مجهولي بيهزئني

وبيقولى يا خيخة هاجبيلك كيلو خيار

انما مجهولك

واحد مفروس وشكله كان عاشق محتار



ابي

لمي مجاهيلك

ابى

انا بت خيخية

ابى

مجهولك مش ليا

ابي

قوليله يكتب عندك



ابى

مجهولك اهوه جانى

ابى

كلامه علشانك

ابى

مجهولك بيباركلك

ابى

ده بيقول انك نحلة

وعريسك دبور

ابى

اه يانا يا غلبي



لا سلام لا كلام

ده كلامه ده كان

مجرد تهيس مجهول


انا كنت هانام

لكن قلت حرام

اسيبه يهيس علطول


كان لازم اقول

انك يا ريحاب

فتحتى الباب للمجهول


لو عايز يباركلك

او حتى يعاتبك

اهوه عنده الباب مفتوح



ابى

يا عزيزى المجهول

ابى

فتحتلك بابها

ابى

روح اكتب عنها

ابى

فى صفحة تعليقاتها

ابى

وماتجيش هنا تانى



ابى

حوشي صاحبك عنى




بس خلاص



تنويه بتنجاني خيخي


نحيط سيادتكم علما

بان ابى هانم بتنجانى

تواضعت وتنازلت وتعاطفت وتكرمت

وفتحت باب التعليقات لكل من هب ودب

وعلى من يريد ابلاغها اى رسالة

فليتفضل عندها فى صفحة التعليقات

ومايجيش هنا تانى




انتهى

بت خيخة وأى كلام

بصراحه البنت عداها العيب واتأنزح هههههههههههههههههه يعنى يا عم المجهول هو انت جوزتنى وانا مش واخده بالى طيب مش كنت تقول على الاقل كنت اتعزمت فى فرحى مكنتش سبت العريس لوحده يبقى منظره ايه يعنى قدام الناس
يا ابنى يا مجهول يا طبيب جراح لم نفسك بقى علشان انا مش فاهمه الخزعبلات دى فى دماغك من ايه
لما احب اتجوز ولا ارتبط ولا اعمل اى حاجه فدى متخصش حد متخصش غير اصحابى وانا وبس واصحابى عارفين انى قاعده اهو زى الدبشه
انا بقيت احس انى بقيت فنانه مشهورى اووووووووه على راى منى زكى
النهارده اتجوز بكره اطلق بعده يبقى معايا عيل ايه الخيبه دى يا ربى

النا س متزعلش بقى علشان المجهول بيبارك ليه علشان انا معزمتش حد لانى تقريبا نسيت الفرح نيهاهاهاهاا


كان معكم ابى هانم كايده العزال انا من يومى


حكمه الامبراطورة

يستطيع الشيطان أن يكون ملاكاً . . والقزم عملاقاً . . والخفاش نسراً
والظلمات نوراً . . لكن أمام الحمقى والسذج فقط .

فلسفه جواز البرطمانات


عندي فوكيره نطت فى عقل بالى الصغنن ده ايه هى بقى دايما الجدل بينى وبين اصحابى والقريبين ليه فى موضوع الجواز انه ايهما افضل جواز الصالونات والانتريهات والتلاجات نسبه ان العريس رايح يتفرج على تلاجه يا تعجبه يا لا وعلى فكره النسبه الاكبر فى الرفض بتكون فى ايد العريس لان فى وجهه نظري التانيه وافقت انها تبقى فرجه وتلاجه للعرض وطبعا فيه ناس هتعارض كلامى وناس هتقول امال البنت تمشى على حل شعرها انا مقصدتش دي خالص بس فيه طرق كتير اوي غير عرض الفاترينات وعلى غرار ده بجد هحكى لكم حكايه يوميات عريس غاوي برطمان وهبقى اشرح لكم ايه السبب انى اطلقت عليه ده وهحكى لكم حكاياته كلها نيجى للمهم علشان منلوكش كتير علشان انا عارفه انى لوكلوك

السؤال ومربط وحدوه الفرس
ايهما تفضل او تفضلى جواز الصالونات والانتريهات ولا جواز الزماله والمعرفه او اي نوع تانى واللى مر بتجربه يا ريت يحكيها وتقولوا وجهه نظركم بس خلاويص كله يدخل يلوك براحته

ملحوظه انا ساعات مبردش على التعليقات لانى مش بلاقى رد على الكلام او مش بلاقى وقت وغالبا بكون موافقه فمحدش يزعل اللهي يخليكوا ليه


كان معكم عروسه من خارج البرطمان ابى هانم بتنجانى


حكمه الامبراطوره

دلل حماتك واكسب ودها أحسن ماتفتحلك نار ماتقدر تسدها

زيارة اطفال معهد الاورام


الموضوع ده مش احنا اللى عاملينه اللى عاملاه بوسبوس صاحبه مدونه روح بسبوس للى يحب يشارك وربنا يجازيكم خير
دخلنا على النصف الثانى من رمضان واحنا لسه حاسين اننا معملناش حاجة!!يمكن لاننا شايفين ان الفرص كتير ويمكن تعوضها

بفضل الله الخير بيزيد فى رمضان وناس كتير بتزور المرضى وتفطر معاهم وتخفف عنهم الآلم وبعد رمضان قل ما تذكرنهم

طيب ايه رأيكوا لو نعمل الخير فى رمضان ويستمر كمان بعد رمضان؟؟؟
كمل بس وانت تعرف هنعمل ده ازاى

المعهد فيه 100 طفل فكرنا نجيب لهم حاجات تفيدهم مش وجبات ولا أي حاجه تانيه لازم يحسوا أنهم مش ناقصهم حاجه علشان كده وبمناسبه قرب العام الدراسي هنوزع عليهم شنطه مدرسيه فيها


-شنطة مدرسية فيها أداوات مدرسية


نص كيلو عسل نحل لانه علاج ليهم


عدد 2 لعبه أطفال


عدد 2علبه عصير


----------------------------------


طرق المشاركة..مش شرط مشاركة مادية


-----------------------------------


هنتقابل عند معهد الاورام القديم يوم الاربع الساعه 3.30وندخل نوزع الحاجات اللي هتكون جاهزة معانا بالفعل المشاركات مش شرط مادية انت ممكن تشارك معانا بالزيارة وتوزيع الشنط على الأطفال وتحسسهم ان فى حد مهتم بيهم


ولو تحب تساهم ماديا سعر الشنطة الواحدة 40جنيه بمحتوياتها


لو مصمم انك تتبرع ماديا


ممكن تتصل برقم الموبيل المكتوب وتتفق على الميعاد والمكان اللى يناسبك علشان تديله الفلوس



0111600295


او "لو مش معاك رصيد" ممكن تبعت لمحمد مفيد رسالة على الفيس بوك وتعرفنا هتشارك بكام شنطة ويوم الزياره تجيب معاك التبرع وتشوف فرحة الاطفال بزيارتك بنفسك

وده الأيفنت اللى ممكن تبعت منه لمحمد مفيد

http://www.facebook.com/event.php?eid=157794283297


الخيييييييييييييير جاى لحد عندك...فى رمضان...حرام الفرصة دى تضيع ومتنساش ((ما زار مسلم أخاه المسلم في الله ولله إلا ناداه الله عز وجل أيها الزائر طبت وطابت لك الجنة))


غير انك هتشوف ناس يهمها تسعد الاطفال دى وممكن بعد كدة نفطر مع بعض في أي مكان أو اللي حابب يفطر فى بيته يفطر


------------------------


هاتجلنا المعهد ازاى


معهد الاورام القديم بجوار القصر العيني علي الكورنيش


طريق الوصول للمعهد أقرب محطه مترو هي محطه مترو السيده زينب بعد الخروج من المحطه تمشي في الشارع المقابل للمحطه للاخر حوالي 3 دقايق هتلاقي القصر العيني . المعهد بجواره


اوالقادم من التحرير ممكن يركب اي ميكروباص رايح حلوان او المعادي من موقف عبدالمنعم رياض ويقوله انزل عند المعهدحوالي 3دقايق برضه من التحرير


------------------------------


يالا يا شباب مستنينكم يوم الاربعاء ان شاء الله مش مهم تكون متبرع المهم تحاول ترسم بسمه علي وجه طفل بجد محتاح يحس أنه عايش معانا


-----------------------------


وربنا يجعله سبب فى عتقنا من النار هذا العام


-----------------------------


اضعف الايمان تعمل انفيت لاصحابك علشان يعرفوا بالايفنت ده وده لينك الأينفت


http://www.facebook.com/event.php?eid=157676859837&ref=mf


وممكن تنقل الموضوع فى مدونتك

Share |