عادتهم ولا هيشتروها

على فكره انا عملت خطه وهجيب كلب شبه الكلب اللى موجود ده بس ادعولى بقى عااااااااا اصل اصحابه ناس صعبه شويه




خروفى البمبى :- تعالى اقولك حاجه بسرعه يا جنونه هانم


ابى :- يا صباح قله ادب يا بنى مش قولنا نتلم علشان العيد قرب والناس عينهم اصلام اصلام عليكوا

ثم انا كنت ربطاك فى الكنبه وقفله بقك بقالى فتره ايه اللى طلعك بقى انت محرمتش من المره الاولى



خروفى البمبى :- استنى بس لما روحتى بؤجه الخير ورجعتى كنت اطلعت على الاخبار وشوفت خبر وفاه بنت ليلى غفران وصحبتها وشفت حاجت ياااا يعععععععع جابت ليه هرش وبقيت عاوز انطح انتى شوفتى الخبر شوفتى مرتزقى الصحافه والدلاديل بتوعهم




ابى :- والله عال خروف مثقف صحيح ادي اخره دلعي فيكم ايوه شوفت وجابت ليه ترجيع بعيد عنك ايه الخرف ده اللى بيكتبوا هما مالهم يا خويا ومال بتعمل سهره ولا بتشرب هما ليه بيخوضوا فى اعراض ميتين بدل ما يعاقبوا الجانى هيعلقوا البنات ويبقى بدل ما نقول البقاء لله نقول احسن يستاهلوا ده اللى عاوزينه




خروفى البمبى :- خرف خرف انتى بتشتمي تفكيري طيب مش هكلمك ولا اقولك لا علشان انا متغاظ من الصحافه دي ومن الناس المهبلتيه دي يعنى زي ما قولنا قبل كده مقياس الصح والغلط فى كل طبقه له اوضاعه ليه بنقيم الناس ونقول ابوها بيبعت لها وامها سيباها




ابى "- طيب طيب سد سد افصل فيه ايه بطل انا اسفه مهبلتيه اسمها مهللتيه يا منيل على قرونك دي وبعدين طبقات ايه واستك ايه استنى بس هى القضيه مش كده زي ما قولت لناس انها فكره نفسنه على الاقل ورخامه على الاعلى اولا البنت مش ذنبها ان اهلها اغنياء ولا ذنبها ان امها مشهوره والتانيه اهلها بره اهلها غلطوا انهم سابوها علشان القرش بس ميديش الحق لحد يخوض فى اعراض وعلى فكره الظباط اللى بيعينوا اول ناس بتدور على فضايح علشان يريحوا دماغهم ويقلك دي مشبوه




خروفى البمبى ":- ايوه صح كده يا لهوي لو كنتي بقيتى وكيل نيابه ولا ظابط يا ساتر عليكي ااااي من غير ضرب استنى زي ما خلاص اتفقنا قبل كده ان الحقايق بتختلف من مكان لمكان ومن شخص لشخص العيب بقى فى اللى بيقعدوا يجيبوا سيره الناس بالبطال والوحش والكويس اصلا ليه مش كل واحد يحط خيبته فى جيبه ويقعد يتفرج عليها ولا يصلحها




ابى :- يا لهوي انت عاوز الناس متتغلش بالاوشعات وتصدقها تبقى عبيط ولا حد يشخصن الموضوع ويطلع عقده على الاغنياء ولا ينفسن على الفقراء ولا يتنطط على نفس طبقته تبقى لسه معرفتش يا خويا نفوس البشر عااااااااا




خروفى البمبى :- طيب سد سد احنا هنقضيها عياط هتعملى ايه قولى اللى جواكي وسيبى اللى عاوز ياكل نظريه المؤامرة والشخصنه فى سندونشات هو حر واللى عاوز يشغل بلوتوث مخه يبقى اهلا وسهلا واللى يقفله يبقى هو الجانى على نفسه




ابى :- اسم الله عليك ايه النبهاهه دي جاتلك منين على العيد يا كميله انتى عموما المجتمع على راى بنت القمر الواحده تبقى متلخفنه فى هدومها بس فى النهايه لو رجعت متاخر شويه لاي ظرف ياكل فى لحمها اي حد




خروفى البمبى :- النبى ما انتى عارفه قيمتى دا انا قيمه وتنيه ههههههه بس عارفه اللى عايش عنده لسان يرد انما اللى مات ده ملهوش حد يرد عموما انتى عامله ايه دلوقتى هتجيبى الكلب ولا هتستكفى بيه




ابى :- هههههههه قول كده اه هجيب لا تكلك مش هيعمل فيك حاجه وعلى فكره اللى قالوا دول مدمنين عاوزه اقولهم انتم مكنتوش معاهم ويا ريت برضه كمسلمين ومسحيين واي حاجه نراعي ان الموت له حرمه وربنا على الظالم والايام بتلف ولازم كل واحد يطلع فيه القطط الفاطسه والادمان مرض يا ريت ندعي ان الناس تخف منه منعايرهمش علشان الايام بتلف والكره الارضيه بتلف والشتسمه بتلف وكل حاجه بتلفه وتلزق فى وش اللى قالها




اما عنى انا كويسه جدا وقيمت حاجات كتير فى حياتى اوي وعدلتها متقلقش انت عارف انى مش بتهد يا ابو لسان طويل يالا قوم فذ من هنا بدل ما اصدرك لحد محتاجك






خروفى البمبى :- بكره تندم يا جميل نيهاهاهاهاهاا


ابى :- طيب خد لك ساتر سامعه بوحه بينادي على خروف تايهه ههههههههههههه



فى النهايه انا وهو عندنا حق ولا بنهيس




شكر واجب :- لكل الناس اللى حضرت بؤجه الخير وساهموا وجم من سفر ماما اموله مبسوطه اوي انى شفتك وفخوره بيكي بابا ابو خالد مبسوطه انى سمعت صوتك ايناس وبتوع بورسعيد اللى بعتوا واللى جم شكرا شكرا خيخه موتنى من الضحك حرام عليكى دوللى تعيشيى وتاخدي غيرها ههههه مونى ربنا يخلى لكي ولادك احمد اللى جه من الغردقه اثبت ان الصعايده طول عمرهم رجاله بجد كل اللى شارك سواء بعت او جه بشكركم اوي ربنا يجعله فى ميزان حسانتكم يا رب سنكره معلش تعباك انا وبطوط معايا




حكمه الامبراطوره



اصحاب العقول فى العباسيه حد جااااي

قصه الامس



قصه الامس قصتى واغنيه ام كلثوم من صغري اوي وانا بحب ام كلثوم ومياده ونجاه وورده مش عارفه ليه حتى لما بغني صوتى مبيجبش


السبع طبقات واستك اللى طالعين دلوقتى

بعرف اغنى لدول وبس اليومين دول فى عز البرد فى القاهره الجديده حسيت انى نفسي اطلع فى البلكونه والبس شال على كتفى والدنيا تمطر وانا ماسكه مج شاي فى ايدي بس مج زجاج واسمع اغنيه قصه الامس بتاعت ام كلثوم ولما حاولت اعملها بالليل متأخر معرفتش مش عارفه ليه
وده كان امبارح تحديدا بالرغم من انى متعوده على ده بس الهوا امبارح كان فيه لسعه برد وانا قاعده فى الانتريه وفاتحه البلكونه جه فى بالى وحنيت انى اعمل كده ولانى معملتهاش من فتره طويله اوي اوي

زمان كان عندي كلب اسمه جاك كنت دايما بحب العب معاه وكان شرس جدا وبيحبنى جدا وكنت بركب العجله وامشى وهو يجري جنبى

كنت اروح النادي فى البلد واجري وهو يجري معايا وكنت مبلطجه لان ممنوع بس بما انى معروفه او بابا فكان عادي طالما بضمن ان مش هيعمل حاجه فى حد

من فتره حاولت اجيب كلب واربيه برضه معرفتش يمكن للظروف الاقتصاديه هيبقى هو وبطوط او يمكن لانه محتاج رعايه نفسيه وده صعب لانى مشغوله اوي فى شغلى


فى المدرسه كنت شقيه اوي اوي وفى نفس الوقت مؤدبه مدرسيني بيحبونى وبجد انا بستغرب على مدرسين اليومين دول ليه بيعملوا كده دا من ضمن مصايبى مره عملت ساندوتش مسقعه اه والله واكلته فى حصه التربيه الوطنيه وكانت اخر حصه اكلته تحت الديسك وطلعت مبهدله وشى منها والمدرسه شافتنى وقعدت تضحك وقالت ليه ليه مقولتش انك جعانه وانا كنت خليتك طلعتى اكلتى بره

من ضمن مصايبى عمري ما احفظ نص فى اللغه العربيه وكنت على طول طالعه بره الكلاس علشان مش بحفظ المدرسه عمرها ما ضربتنى كان اسمها ابله عايده

الناس كانت حلوه اوي اوي حتى المدرسين كنت بحسهم هادين اوي

ماما فى مره جابت ليه شريط ام كلثوم بتاع اراك عصي الدمع علشان تحفظنى النص لانه كان علينا فى المدرسه الغريبه ان دي المره الوحيده اللى مطلعتش بره الكلاس والمدرسه استغربت وقولت لها فضحكت

دلوقتى مبقتش عارفه اعمل حاجه من اللى كنت بعملها

وانا فى المدرسه لما كانوا البنات يزعلوا مع بعض يقولوا لبعض دلوقتى كله بيتكلم من وراه كله بس انا زي ما انا متغيرتش فى دي


انا لما المطر ينزل على الشجر والزرع بيعمل له ريحه حلوه اوي اوي بحبها اشمها ولما حد يقولى ادخلى هتبردي اقولهم انا بعمل داماغ شجر يضحكوا كل اصحابى عارفين عنى العاده دي

الشتا ده كئيب انا اساسا مش من محبى الشتا يمكن لعدم وجود ناس كانوا اصحابى فيه لبعدهم او انشغالهم او جوازهم بس حساه كئيب

نفسي الحياه تبقى هاديه تانى واعرف اسمع قصه الامس واغنيه ذكريات واغنيه الف ليله وليله

مبقتش عارفه كنت فاكره الشتا ده هيعيد ليه حياتى الطبيعيه اللى فاتت والطقوس بتاعته بسسسسس

اكتشفت انه لا لان فيه ناس غاليه عندي مش حوليه ولا معايا مش عارفه ليه

هو ليه الزمن مبقاش زي ما كان ليه الناس مبقتش عارفه تفرح ولا تبقى هاديه

ولا انا .... انا نفسي اجيب كلب واجري بيه فى الشارع واركب عجله واقف فى البلكونه فى المطر مع انى مش رومانسيه بس كنت برتاح ومبحسش بالبرد

نفسي اللى بعيد يرجع تاني ويقولى يا استنجلينا برتبه عميد انتى مجنونه
نفسي المدرسين يرجعوا كويسين هى ليه بلدنا مبقتش حلوه زي ما كنت شايفاه
ليه بقيت انا قاسيه ومبقتش رومانسيه

ليه مبقتش احس طعم الاغاني

هو انا ليه متحمله فوق طاقتى

انا عاوزززززه كلب يا جدعان عاوزه اسمع الاغنيه والبس الشال اللى ماما جابته ليه
واتكلم مع اللى بحبه طول الليل واكتب له تاني وينكش فيه تاني

نفس ارجع اسمع صوت كل اللى بحبهم تاني ويرجعوا يقولوا انا هنا علشانك ودايما معاكي بدور عليهم مش لاقيهم

يا بشررررر ارجعوا زي ما كنتوا بقى

يا مبارك امشى او هات البسمه اللى سرقتها من قلوبنا وحياتنا

يااااا رب رجع ليه اللى افتقدتهم


ماحوسه فونتوسه : انا كويسه بس صوتى ضاع من كتر فى الصريخ فى الناس وانى اقولهم ارجعوا زي ما كنتم حبيت اقول اللى جوايا وبس يمكن ارتاح ويمكن ربنا يسمع منى واعمل اللى بحبه واللى عاوزاه وبعدين لازم انكد عليكوا يعنى عادي
بخصوص المدودريشن لان فيه واحد متخلف عامل اكونت اسمه افواه وارانب مدونه فاضيه واسمه الحقيقى محمد الشريف لانه بغبائه ضافنى على الفيس بوك بيشتم شتيمه قذره مع انى معرفوش بس هو مواليد 85 ومقيم فى الكويت وتقريبا مريض نفسيا فبس شويه كده لغايه ما يقبضوا عليه ويرجع العباسيه سالما تانى هفتح المودريشن انا بنزل كل التعليقات حتى المختلفه معايا انتم عارفين مبدئ بس علشان الناس متشوفش المرضى اللى مرمين على النت وعموما هو كان عامل مدونه قديمه وانا عرفتها بس مسحها
شيري ربنا يشفيك يا بنى من بروفيلك على الفيس بوك واضح ان اتعمل فيك حاجات وحشه كتير فى صغرك عقدتك من البنات ربنا يشفى يا رب روح اتعالج بقى



كان معكم ابى هانم ام الخلول من امام بلكونه البيت اللى مش عارفه تقعد فيها


حكمه الامبراطوره


عاوزنا نرجع زي زمان قول للزمان ارجع يا زمان

العميد ميت





اولا ميعاد بؤجه الخير الشتوى قرب ادخلو على اللينك علشان اللى عاوز يشارك انطح يا ريس

من ساعه ما دخلت عالم التدوين وعرفت مكان البورصه وربنا وعدنى بناس شوزات متتقلعش من الرجلين وناس بتتلزق وناس بتترسم وناس منافقه وناس واطيه وكدابه والمثل اللى فى الجنب لهم

وناس كويسه اوى ورجاله اوى وجدعه اوى بنات وولاد من ضمن الناس ربنا وعدنى بعبد الرحمن فارس اللى يا ربى مفيش مرة واحده يطلبنى يقولى على خبر كويس مرة يصحينى على خبر اعتقال مره على حريقه مره على مظاهرة وعلشان اسكته بقى من اول المكالمه اقوله قول المصايب بس ورا بعض
من كام يوم كلمنى وقالى العميد ميت مختفى او محمد عادل (واللى ميعرفهوش هو مدون ) اتخضيت قولت له يعنى ايه قالى قمل الدوله راحت فتشت بيته بالليل ومسالتش عليه وملقتش اساسا حاجه

قولت له يمكن مستخبى فى مكان قالى كانوا سالوا دول داخلين يدوروا على اى حاجه وبس وطبعا الشباب مسكتوش وراحوا عملوا مظاهرة عند مكتب النائب العام وقدموا مذكرة علشان يعرفوا مكانه والراجل مشكور قالهم بعد 24 ساعه وفعلا رد ويا ريته ما رد لانه قالهم انه فى لازوغلى ربنا يجعل كلامى خفيف على قلوبهم وعقولهم

طبعا من واقع معرفتى شخصيا بمحمد عادل ولقائى معاه بالصدفه البحته اكتر من مرة عارفه ومتأكده انهم لو هدوا بيتهم وسالوا كل نمل البيت حتى مش هيلاقوا حاجه .
ليه بقى لان محمد عادل او العميد ميت ولا بتاع منشورات ولا بتاع جعورات ولا يافطات بيعلقها على قفاه ولا عنده كتب تكفير ولا بتنجان ولا حتى عن فيجتار لانه شاب معتدل جدا وعاقل جدا رغم صغر سنه اوى
محمد عادل بالرغم من اختلافى كتير معاه فى آراء الا انا عن نفسى شايفه فيه الشاب المحترم الجدع اللى فعلا بيعمل الكتير وفعل مش اقوال
محمد عادل كل تهمته انه بيساعد الفلسطنين كل تهمته انه بيزورهم كتير فى المستشفيات تهمته مش زى ما اشاع البعض انه علشان اخوان على الرغم من انه اخوان بس الحقيقه ان مش دى التهمه بتاعته
التهمه الحقيقيه انه بيأخد ادويه وبطاطين ولبس ويعديهم رفح ومجهود فردى هو وخمسه او عشره بيروحوا مواصلات يعنى ولا قوافل غاويه فرقعه اعلاميه ولا بيكون بيعدى وشايل يافطه على صدرة علشان حد يقبض عليه ويروح يقول للاسد انه اهو

محمد عادل كل هدفه من جواه مساعده الناس ممسكش بندقيه ولا رشاش ولا بيخل ويخلخل بالامن القومى زى ما بعض المتخلفين المجعرتيه قالوا

محمد عادل لما عاتبته مرة على انه مجاش معانا بؤجه الخير وقولت له انت زى القرع تمد لبره قالى والله ما كنت اعرف قولى ليه سيبى ليه خبر وكان هيجى معانا البؤجه دى الجايه
تانى مرة لما قولت له على موضوع الدويقه وبزعق معاه اكتشفت انه راح وساعد ناس كتير وكان لسه راجع من غزة اتكسفت انى معرفتش وقولت له ليه مقولتش قالى مش لازم امسك يافطه واقول انا عملت ايه انا بعمل لربنا

على الرغم من كونه اخوان لا يوم سمعته قالى اتحجبى ولا اعملى ولا رفض النقاش معايا بيسمع ليه وبيتناقش باحترام وبيقبل النقض ولما بيكون غلطان بيقول
فى مرة طلب منى حاجه وكنت هعملها بس الظروف بقى ساعدته انه يعمل ده لوحده بس وعدنى المره الجايه انا اللى اعملها بقوله والله هتحبسنى وهعترف واقول انا اخوان بس الاب ديت الجديد بتاعهم اللى من غير حجاب وبجينز قعد يضحك
محمد عادل زيه زى زى الف شاب فعلا بيعملوا مش رغبه فى منصب ولا رغبه فى فرقعه اعلاميه ولا فى جايزه ماليه ولا معنويه
علشان كده قولت ابسط حقوقه انى اتكلم عنه
قبل ما يتقبض عليه بكام يوم كان كاتب استات على الجايكو قبل ما طفاطيفو منه لله منه لله منه لله بركاته تعود عليه والاكونت انسى الباس وورد او يتنيل ومش عارفه افتحه واضطريت اعمل واحد تانى
انه حاسس انه ميعاده فى امن الدوله قرب دخلت سالته ليه قالى قبضوا على واحد زميلنا واللاب توب بتاعه عليه صور لينا قولت له وايه يعنى هو انتم كنتم ماسكين دبابه ولا صاروخ ولا ايه
قالى والله صور عاديه ولا فيها نمله حتى واقفه ما انتى عارفه بنقعد نهزر ازاى
قولت له ربنا هيستر ان شاء الله
مكنش خايف من اعتقاله لحاجه الا انه هيعطله على انه يساعد ناس كتير فى فلسطين وفى مصر برضه
انا عرفت محمد عادل الانسان بصرف النظر عن كونه اخوان او حتى تبع حركه احم احم ولا وتنى لا لو وتنى مش هدافع عنه هقوله احسن تستاهل لان دول معمول لهم غسيل مخ
بجد محمد يا عادل برغم اختلافى معاك ان شاء الله هتطلع وانت راجل وجدع ومحترم فى زمن قلت فيه اوى الحاجات دى
محمد اتعمل له امر اعتقال ومش هيتعرض غير بعد 40يومين على النيابه ربنا يستر وميقعدوش يرتبوا ليه فى دولاب اتهامات
او يقولوا بيعمل عمليه انتحاريه فى مناخيرة ولا بيهدد امن اصحابهم وحبايبهم اسرائيل ومطير النوم من عنيهم ولا منتمى للقسام ولا لاى حاجه تانيه لانه فعلا مش كده

ادعو ليه وكل اللى زيه

ملحوظه كلبوظه :- انا مليش دعوة ببعض تعالب الاخوان انا قابلت شباب صغيرين منتميين للاخوان بس قولت لهم كلمه واحده لو كل الاخوان زيكم كان زمان مصر كلها حبتكم بس للاسف وسطهم الكتير اللى مش كويس واللى غلب عليه مصالحه الشخصيه
غير كده للتوضيح محمد متقبضش عليه علشان مدون لا علشان بيساعد فلسطنين ولو هنقول علشان اخوان فكان زمان اتقبض عليه من زمان بس علشان هو ناشط الفتره اللى فاتت فى انه يروح ينقل حاجات ومساعدات للفلسطنين وزى ما قولت مجهود هو وكام واحد فردى يعنى مش قوافل

عبد الرحمن يا فارس الهى يسترك نفسى مره تجيب ليه خبر عدل يا اخى بدل ما اولع فى الموبيل وفيك زهقتنى

كان معكم ابى هانم بتنجانى لواء اركان حرب محابس قمل الدوله للفتره القادمه

حكمه الامبراطورة

ياللى بتدور ورايا على اى ملوخيه اتبطوا بقى يا حسدوتيه


واللى بيته من زجاج يقلع فى البلكونه لانه مكشوف ومش هيستخبى كتير



انا اللى بجيبه لنفسى



من عاداتى السيئه جدا انى لما يكون النحله والدبور بيزنوا فى دماغى وعاوزة اتناقش مع بابا اقوم الصبح قبل ما يصحى وافوق واهز دماغى علشان تركز واعمل له وليه كوبيتين شاى واقعد فى البلكونه فى الشمس فأصعب عليه ويقولى قاعده لوحدك ليه فيلاقى الشاى يعرف انى هقعد على ودنه ارغى فيها ودى عاده سيئه وبابا عارفها لانى مش بفرق فى الوقت يعنى هل مناسب ولا لا هو اللى فى دماغى وبس
وفى عز الفرح يعنى يوم الحنه بتاعت اختى مرحمتوش الصبح
صحيت من النوم وقولت ليه لا ما هو بابا اللى هينكشنى فى الكلام وانا فى دماغى حاجات ومضايقانى
عملت العمله اللى بابا بقى حافظها ظهرا عن بطن واول ما شافنى قالى نبدأ من الاول وتعالى من الشمس
قولت له بس بفكر وبنظره كلها خبث لانه فاهم طيب عملتى الشاى قولت له ايون فرد بكل ثقه واحد ولا اتنين قولت له اتنين
رد وقالى اشربيهم يا حبيبتى بالهنا والشفا عاااااااااا
طبعا دلدلت ودانى زى الخروف وسكت ..اذا فجأم اصعب عليه ويجى يقعد معايا وساعتها انشكحت الاسارير بتاعتى
بابا مؤخرا بدأ يقرأ المصايب اللى بكتبها وطبعا هو لو قعد من هنا لميه سنه قدام يحرك فى فرده الشوز اللى فى دماغى انى ابطل او الم كتاكيتى شويه عارف انى هعلن العصيان والنطح والزن فى البيت كله

قالى مالك ودار الحوار كالتالى
انا وبمصاحبه النحله والدبور:- اتخنقت من البلد واللى فيها زحمه ودوشه وناس معندهاش ذوق وعيال تافهه بتقل أدبها وناس كبيره اتهطلت كله حاقد وبيكره بعضه

بابا :- بكل عقل من غير ضحك طيب وتفتكرى ايه الحل يعنى هتمسكى عصايا وتمشى تقولى للناس كخ كده
الناس اتخنقت يا مهفوفه فى عقلك من اللى بيحصل لها ولاهتجيبى مفتاح 20 وتظبطى الصواميل بتاعتهم

النحله والدبور :- ايون بس مش يطلعوا زهنتقهم على بعض ويبقوا عاملين زى انابيب الغاز المنفسه واول ما تشيل الغطاء ينفجر ليه بينفجروا ويطلعوا عقدهم على بعض

بابا:- علشان هو الضعيف مش بيقدر غير على الضعيف اللى زيه

النحله والدبور:- ايه مين فين ليه هو انا ولا انت ضعفاء ولا الناس الاغنياء ولا اللى معاهم شهادات

بابا :- شوفتى بنت تيييييييييت بتفكرى تحت رجليك (ده راى بابا محدش يصدقه هو بيحبطنى بس)
واقولك ليه يا عبيطه (بابا بيحب يدلعنى عادى يعنى )

الناس مش قادره على الحكومه ولا الشرطه ولا متقال زى ما انتى مسمياه يبقى ايه الحل تنفسن على بعض
او الشباب يغيب عن الوعى ويبقى بيتصرف تصرفات زفت وحاجات مفيهاش احترام

النحله والدبور:- اه انا بقيت اتصدم يا حج والله من اللى بشوفه فى الشباب عيال متخيلش انهم يعملوا كده والاقيهم ضايعين بس برضه ده ميديش الحق لحد يخنق فى التانى فين الرحمه

بابا:- الرحمه عند ربنا هو اللى بيرحم مطتلبيش من ناس بتأكل ععيش معمول بقمح بتاع علف حيوانات يتكلموا ولا لحمه حمير ولا مبيدات مسرطنه الناس معدتهم وامخاخهم بقوا زى الخلاطه بتاعت الاسمنت وكل ده يتصلح لو الناس بقت محترمه وبتحترم نفسها

النحله والدبور :- ايون الله ينور اللمبه اللى فى دماغك يا حج الناس تبقى محترمه ازاى ده فيه ناس بتكدب وتقول كلام غلط علشان توقع ناس تانيه وفيه ناس بتألف كلام وتصدقه وناس بتفترى على الناس بالغلط وواحد بيدحلب زى الثعلب ويعمل حبيبك وهو بيلعن اللى خلفوك من وراك ويقول كلام غلط بس تصدق يا والدى دول اغبياء لان ربنا بيكشفهم بسرعه وانا عندى الملكه دى بجد وانت عارف سرى باتع ولابسه طرطور طول الوقت وماسكه سبحه ههههههه

بابا :- اتعدل فى قعدته قالى هسالك سؤال وانتى هتلاقى اجابتك فيه هتعملى ايه فى البلد لو بقيتى الريس بتاعها

النحله والدبور :- بكل انفعال يوووا هعمل كتيررر بس يمسكونى اى حاجه بس وبعدين بلاش ريس دى بدل ما اتحبس ويتحقق مرادك وتخلص منى

بابا :- اهو مجنونه ومنفعله واول حاجه متنفعش فى الريس الجنان والانفعال احنا عندنا واحد دمه متجمد يعنى مفيش حاجه بتستفزة علشان كده هو عرف يستفز الناس وقافل ودانه انما انتم مندفعين فكرى وجاوبى بقى هتعملى ايه

النحله والدبور:- هنضف الشوارع هشيل الحكومه هخلى امن الدوله ستات ههههههه علشان الرجاله يروحوا يتحبسوا برجليهم من غير ما يدوخونا نيهاهاهاها .... هحبس الحكومه القديمه كلها وهنتزع منها الدسم قصدى ملكيتها لاى حاجه هو هخرجه بره البلد واحكم عليه بعدم الرجوع ليها خالص ويطلع كما ولدته امه هو وعيلته هعمل البنزينه لونها بينك وبنزيه اسود البينك للبنات والتانيه للأولاد هعمل وزاره الاخلاق والتربيه علشان الناس تتربى تانى واللى هسمعه بيشتم فى الشارع هوقع عليه عقوبه قطع لسانه من لغلوغه همنع لعب الاطفال فى الشارع ولااد العفاريت دول واعمل لهم نوادى فى كل منطقه او جنينه يلعبوا فيها هلغى كل تعاملاتى مع ازرائيل ومساندينها وهتف عليهم الاول هودى العساكر نحن الاميه يتعلموا ظباط الشرطه بقى والاقسام هشغل لهم موسيقى هاديه وهعمل حمله ضد زوجاتهم وصحابتهم علشان اللى تنرفز ظابط سواء كان جوزها او صاحبها نوقع عليها حكم وهو حبسها فى قفص معاه لمده يومين وهو متنرفز وفى الحاله دى فى اقل الخساير هطتلع ناقصه ودن او مناخير علشان ميطلعوش اللى بيتعمل فيه فى الناس الغلابه هبعت لهم ورد الاقسام علشان يهدوا اه هأخد موبيل اونكل عادلى علشان هو معاه موبيل مصنع ليه خصيصا جدا وده تالت واحد فى العالم (المعلومه دى من كرومبوا المخبر محدش يفتن ) هلغى العربيات النقل هنقل العشوائيات بره القاهرة خالص ههتم بالصعيد هخلى الناس تفكر غصب عنها معرفش ازاى بس مش هخليهم يقفوا عند حدود الحاجه لازم يعدوا ويفهموا هخليهم يبطلوا اكل فول يا بابتى امضى القرار بس وانا هتعين على طول

بابا :- بكل انبهار وازبهلال قالى تصدقى ان مخك طاقك وان احلامك دى فى البلد ممكن يحققها الناس لو وقفوا ايد واحد والحكومه بتاعنا اللى بتشتغل عندنا دى تحققها
من غير ما تتنازلى وتبقى ريس يا بتاعت البنزينه البينك انتى

النحله والدبور:- ايه ليه ازاى بقى يا بابا يعنى ما انت عارف انهم راكبين على قفانا

بابا :- علشان احنا بنسكت ونسلم بالامر الواقع ممكن دلوقتى احنا مش عارفين نتجمع بس نقدر نعمل عمل فردى يعنى الواحد اللى بيجيب حقه او طلبته من جهه حكوميه يجمد قلبه وبالادب والشده هيأخد حقه انما احنا بنستسهل فى دفع رشوه فى ان الموظف يقول امشوا نمشى وبكره نعدى بقوا بيتحكموا انما انتى لو تبتى فى حقك تفتكرى هيكح معاكى واحنا اصل بقينا شعب يخاف ميختشيش يعنى لما كل واحد يقف موقف صلب تفتكرى واحده واحده الناس مش هتظبط

النحله والدبور:- بعد هرشه طويله فى شعرى وبقيت شبه الغوريلا اه يا بابتى بس ده مع الموظفين الصغيرين انما الحيتان الكبيرة هتعمل ايه دول مش بيشبعوا

بابا:- الحيتان بيجى عليها وقت وتهمد هى بتبقى فاتحه بقها وهى جعانه انتم اختاروا الوقت الصح واقفلوا بقها اقولك ازاى علشان انتى مخك تخين (محدش يصدق)
يعنى لما تقفى لموظف بيرتشى مثلا او بيتراخم عليكى فى انه ميخلص حاجاتك او واحد بيطفل عليكى مرة فى مرة اللى اكبر منه هيوصل له اننا مش ساكتين يقوم يتلم ويبقى احنا صح فى نظريه اننا شعب يخاف ميختشيش ويبقى ساعدنا الشعب انه يختشى ويبقى عنده دم
فهمتى يا هبله

النحله والدبور:- والله يا حج منطقى اوى يعنى دا فيه بنت وانا فى المرور راحت دفعت رشوه لبتاع النيابه اللى بيطلع المخالفات ادته عشرين جنيه وبسالها ليه وانا بدفع مخالفاتى قالت جوزى قالى بعشره جنيه تخلصى كل حاجه فانا اديته عشرين ومستنيه يدينى الباقى انا ساعتها كان نفسى اربطها على العمود فى المرور واعلق عليها كلمه واحده اضرب لمساعده الحكومه قولت لها اولا دى رشوه ثانيا هو كده او كده هيجيب لكى اللى عاوزاه ثالثا هيديكى باقى من رشوه ازاى رابعا واللى هيجننى اننا عشر بنات اللى واقفين يعنى البنات لوحدها والرجاله لوحدها وهنمشى بسرعه لقيت البنت اذبهلت وقالت طيب هستنى برضه يدينى الباقى قولت لها بجد انتى ميؤس منك وفعلا معداش عشر دقايق ونده علينا كلنا وهى مكنتش اول واحده لانه نده بالدور بس بما انه سمعنى وانا بقولها كده خلانى اخر واحده وقالى ربع ساعه وانابعد ما عدت الربع ساعه رحت نفشت عليه ريشى وقولت له يا ريت نخلص وتدينى المخالفات لان الربع ساعه عدت من بدرى وبعد ما قفشت الورقه بصيت له شزرا من تحت النظاره وقولت له متبقاش تاخد حاجه مش من حقك يا كابتن لو سمحت وجريت بدل ما يشد الورقه منى ههههههههههه

بابا :- اهو شوفتى اهى دى حافظه مش فاهمه لو كانت مدتش له هو هيتعود انه ميأخدش انما احنا بنستهبل وانتى بتستعبطى وقومى من هنا يا اعبط ريسه هشوفها فى حياتى

وده طبعا بعد ما بابا خلص الشاى وزهق منى لانه قالى انتى مخك متركب شمال وهتفضلى مقتنعه باللى بتقوليه طبعا هو ادرى بيا وفى النهايه قالى عارفه عاوز اعمل ايه قولت له ها قول ما هو يوم التهزئ العالمى قالى هكتب يافطه واطالب بالقبض عليكى فى مقابل جايزه طبق عدس وابقى خلصتك وخلصت الناس من جنانك ومشيت جريت اذايل الخيبه ورايا وقررت اطلع عليكم اللى بابا عمله فيه فيكم اشمعنى انا يعنى

والسؤال
لو انت بقيت رئيس مصررر بنت خالتى هتعمل ايه بجد


كان معكم النحله والدبور فى حوار مريع شنيع من بلكونه بيتنا
ابى هانم اقعدوا بالعافيه


حكمه الامبراطورة

شوف القرد وأتامل عينيه ما تلاقي غير السواد حواليه

الله.....الوطن.....ام الخلول: اسألكم الدعاء


تحديث:- انا كويسه وبخير الحمد لله علشان الناس اللى قلقت عليا ولسه راجعه من فرح اختى وهلكانه والله وملك لسه تعبانه ارجوكم ادعو لها وان شاء الله بكره انزل بوست جديد ومعلش هفضل سايبه المودريشن اصل معاتيه النت بقوا كتير واللى واخدين وصله بقوا اكتر وبيهيسوا على الناس وبعدين هقولكم مين ده عموما حتى وهو بره مصر هجيبه برضه النونو ده اصله طلع مواليد 1985 ههههه
اسالكم الدعاء لملك بنت اسلام صاحب مدونة انا جعان
اضغط هنا


اللهم اشفيها شفاءا لا يغادر سقما يارب يا حي يا قيوم نستغيث بك لمرضانا فمن لهم سواك نجدك عندهم ان عدناهم فانت احن عليهم من خلقك اجمعيناللهم بحق قولك ادعوني استجب لكم اللهم ان ندعوك ونتوسل اليك باسمائك و صفاتك و بحق قولك ان تشفي ملك



ارجوكم ادعو لملك ربنا يشفيها ويقومها بالسلامه لوالدها والدتها

فرحانه ...ومتأزحه....وسعيده مبارك عليكم



بما انى اليومين دول فى سعاده بالغه جدا وده لعدة اسباب
اولا
انى اثبت لنفسى ان احساسى باى شخص قريب منى لا يمكن يخيب ابدا


ثانيا
انى الحمد لله ذكيه بالقدر اللى اقدر اخلى اى حد يقولى اللى عاوزاه من غير ما اسأله نيهاهاهاها شريرة طول عمرى على فكره


ثالثا :
وده الاهم اختى الصغيره هتتجوز فرحها يوم الخميس وهدت حيلى طلوع ونزول وانى اشخط فى الناس وقرايبى كلهم وعيله بابا وماما علشان يشيلوا العفش بتاعها وانا الحمد لله مش شيلت غير دبدوبين اه بتبصوا ليه مبقدرش والله اشيل حاجه نسمه اختى زى بنتى ومش عارفه ليه خايفه عليها واعصابى سايبه خالص منى زى طواميل الموتور اللى مفوت
ماما بتقعد تضحك عليا وتقولى قلب الام مع انى هى امها مش انا هههههههههه بس هو واضح زى ما اختى ساعات بتقول انى انا اللى امها وان ماما هى مرات ابوها ههههههههههههه بجد ربنا يهنيها واشوفها عروسه زى القمر عموما الفرح فى البلد ودى عزومه لكل الناس ...اللى ميعرفوش تليفونى ويحبوا يشرفونى يبعتوا ليه على الميل كل اصحابى فى انحاء المأروصه معزومين ومن كل المحافظات الدعوة عامه يا شوباب دى مش اختى بس دى تعتبر بنتى اللى مربياها انا اكبر منها بعشر سنين

رابعا :-

انى بجد مبسوطه انى اكتشفت ان انا وشخص فى حياتى مهما زعلنا من بعض مش بنعرف نبعد حتى لو شدينا فى شعر بعض على النت ولا التليفون وتحولت انا لديناصور وهو لمارد شرير فالرغم من عصبيته بس عقله فى انه ياخد قرارا كبير وهادى مش اوى( وش بيطلع لسانه ) بس ماشى اكتشفنا اننا مينفعش نبعد عن بعض او نتخاصم خالص وبنضحك اول ما نكلم بعض ولا كأن فيه خناقه كانت معموله واقعد اقوله مضحكنيش مش بهزر ربنا ميحرمنيش منك ابدا ابدا

و
بناءا على ما جاء سابقا قرار فيكونى رقم مش فاكره كام
قد قررت انا لاامبراطورة آبى هانم انى اجاوب تاج السعاده اللى عمله محمد الغاليه وهو زميل مدود جديد معانا
نبتدى ومحدش يضحك لانى هجاوب بدون تفكير خالص والله اللى هفهمه هجاوبه

ماهى السعادة من وجهة نظرك؟

========

السعاده انى بلعب مع ايمو ابن اختى انى اكون متخاصمه مع حد وبخيت فى وشه كل اللى مضايقنى بعدها بكون مبسوطه
ان تجيلى مكالمه مش متوقعها من حد بحبه اوى وبيوحشنى اوى
انى اساعد كل الناس اللى حوليه واكون ناجحه فى شغلى وكل ده مش هيجى غير لما ربنا فعلا بيكون راضى عنى


(2)
كيف تصل إلى السعادة؟

اطلع على السلم او اخد الطريق الدائرى هههههههههه لا بجد انى اكون واضحه ومحدده وبالى فاضى يعنى ميكونش جوايا حاجه من ناحيه حد لو زعلانه او مضايقه او شاكه فى حاجه اتصل واقول مخبيش جوايا حتى لو اللى قدامى بعقله الصغير افتكرها تنازل منى او تماحيك او ضعف او خوف فمش مشكله لانى بعذره لانه مش عارف انى ساعتها بكون سعيده انى فرغت اللى جوايا اه وانى اشتغل كتير علشان اساعد ناس اكتر

(3)
هل السعادة وهم أم أنها حلم صعب؟

دى سهله خالص لو لعبتوا مع ايموا ورقصتوا وقولتوا حاضر حاضر حاضر ليه هتلاقوا الدنيا كلها سعاده او مع اى طفل او تبقى صريح مع نفسك

(4)
هل السعادة طريق للنجاح ؟وضح؟

هى طريق لامل او بتدى دفعه لقدام بس انما السعاده مش هتحقق لك النجاح 100% هى احدى طرق النجاح او من المقاومات لان فيه بعض الناس الحزن بيقتل احلامهم عكسى طبعا انا احزن افرح بكمل الطريق عادى جدا بس هى عمود من عواميد النجاح بالنسبه لناس كتير


(5) ماهى أكثر اللحظات التى شعرت فيها بالسعادة؟

لما بلعب تانى وعاشر مع ايمو ويقولى مش تأمشى يا ابى استنى العب معاك ولما يعضنى ويقرص خدودى لما اتصالح مع نفسى لما انضف الشقه بتاعتى هههههههههه ...
لما القى واحده او واحد قاعدين على نار بسببى وبسبب غيرتهم المتخلفه اللى ملهاش اساس نيهاهاهاها ......
لما الاقى حد بيبذل مجهود ان يطلع فى شخصيتى القطط الفاطسه
لما ازعق لمديرى وده تقريبا كل يوم هههههههههههه لما بخرج مع اصحابى القريبين منى ونقعد نسقط فى الكلام هههههههه ....... و اقابل اللى بحبهم على النت وخاصه كامى فوندامى لما بسمع صوت احن انسان فى حياتى .........لما بشترى لعب جديده العب بيها لما بشترى شوكلت بوولا لما بعمل حاجه فى شغلى محدش بيعرف يعملها وتكون مطلوبه من حد تانى .... لما حد بيعتمد عليا فى حاجه وابقى قدها ....
لما بسافر بره مصر اتفسح
ولما اشوف البحر فى الساحل واسكندريه والسخنه حتى لو بحر الاسماعيليه

لما كمان اصحابى بيدافعوا عنى من غير ما اعرف بتبسط اوى اوى وده لانى بس بحس بحبهم ليه


(6) هل ممكن أن تحقق كل شىء؟

لا طبعا لازم تقع منى كام حاجه وعموما انا مؤمنه بان دايما الحاجه اللى متتحققش فى الدنيا ربنا شايلها ليه فى الاخرة او ممكن ميكونش فيها خير خالص
فمش بزعل

(7)
السعادة تجعلك تقبل على الحياة أم لا؟

اانا كده كده مقبله هى زى ما قولت هى بوش اب مش اكتر انما انا قدامى اهداف سعيده حزينه هو خط لازم وحتما ولابدنا امشيه ههههههههههههه فطريقك مسدود مسدود يا ولدى

(8) هل أحسست يوما انك وصلت لقمة السعادة؟

اه بس مش هقول امتى هو عارف بس هى مرتبطه معايا بأغنيه وينتى هيوستن الويز لاف يووو الاغنيه مش الاعلان علشان متسبيوش بقيت الاغنيه وتمسكوا فى الكلمه الاولى هههههههه

(9) لماذا تمر أوقات السعادة بسرعة؟
علشان بتحس انك مش فى الدنيا بجد بتحس انك زى البيبى والبيبى دايما مبيعرفش الوقت

(10) هل ترى السعادة فى التدين؟

نعم اى والله بس على فكره التدين فى الزمن اللى احنا فيه اتمط اوىىىى مفهومه كل واحد بقى فاهمه براحته على الاخر من اول المتسيبين الى المتشددين وكمان السعاده فى الاحترام والادب وحب الناس

(11) هل أنت متفاؤل وعندك أمل؟ وضح؟

والله اه عندى امل اختى مامة ايمو ههههههههههه
مفيش حد معندوش امل بس فى ايه مش عارفه

(12) إذا شعرت بالحزن ماذا تفعل؟

ايه الاحراج ده بصراحه بصراحه يعنى ومن غير ضحك وده اللى بيحصل بالترتيب بصلى واكلم ربنا كتير وانا بعيط
وبعدين ادخل على النقيض وده كله ورا بعض يعنى جنان رسمى ههههه بعدها اقعد اسمع اغانى وارقص وانظف الشقه وبعدين انام زى القتيل اصحى تانى يوم عنيه وجعانى بس منشكحه ههههههههه


(13) ما رأيك فى الأفراد المتشائمين؟

شكلهم وحش اوى وبيجيبوا ليه مغص ومش عارفه اصدقهم بحسهم ممثلين اوى مش عارفه ليه لان دايما الحياه بسيطه اوى بس احنا ساعات مكلكعينها فى النهايه بجد الانسان وحده بقوته او ضعفه هو اللى بيخرج من موود او يدخله
حاجه عنى انا من اكتر الناس المعرضين للإكتئاب وبشكل رهيب ولو دخلت فيه مش بخرج وده اللى متحذرة منه من دكاترة كتير بس فى النهايه مش بدى لنفسى فرصه لدخوله بقفل الباب فى وشه على طول وقبلها اديله هو واللى جابه ليه بالشالووووت

كان معكم ام العروسه فاضيه ومشغوله آبى هانم بتنجانى رئيس قسم اول الحموات قادمات هههههههههه

وبما انى مش شريره ولا فزيعه ولا قرده على راى مفروسه التاج ده عاوزة ادبس فيه مفروسه حبيبتى وقوس قزح وكامى فوندامى ورندا وليساندرا
بنات هجوم يالا وشلوه من هنا ههههه

اولبيريت غونائى لوزعى

الالولبريت ده بعته ليه صديق مدون مسوس عاوز يخلص منى ويسلمنى يد بيد لمين مش عارفه

بس عموما انا قولت هنشره بما انى عندى احبال فاضيه كتير واهو رزقى على ربنا هو بصراحه الواد عبقرى مع ان النحس لازق فى قفاه بس ما علينا قولت اكتشف مواهبه

وبينى وبينكم هو كا ن خافى كيفه شره بس انا اللى سوسوه وزنيت عليه ننشره

وبناء عليه اقر واعترف انى اتحمل كل حاجه فى الدنيا دى الا عواقب الاولبريت ده هههههههههههخخخخخ

بس لمساعده اخونا اللى هو انا وهو يا ريت لو حد عنده الهباب ده الاصلى كامل يبعته ليه وان شاء الله ينضم للحزن بتاعنا بتاع حزمنى يا وحركه شباب احم احم

وامانه عليكوا والله ما بحب الحلاوة يا جدعان مشوها كنتاكى او اتنازل واكل ماك مع انى مش بحبه واه محدش ينسى العصير انا بحب الفرواله

يالا كله يغنى مع الاولبريت للفنان العظيم صحاب حركه احم احم ومشوها احم احم علشان عيب

خمنوا بقى هو مين اللى هيودينى فى داهيه ده

اخترناه

اخترناه اخترناه..يوم ما نهب خيرنا وياه
اخترناه اخترناه من أول خطبة سمعناه
اخترناه اخترناه من أول سرقة فهمناه
اخترناه اخترناه..وادينا شفنا الفقر معاه
وده تورييث مش تزييف بكره ندق الطبلة وراه
هم كبير حمله تقيل جاي يذل في جيل وراه
اخترناه اخترناه زوروا اللجنة وقولنا الاه
اخترناه اخترناه قالوا رأينا وقلنا اه
اخترناه اخترناه..في مشروع توشكي وجربناه
اخترناه اخترناه..خرب بيتنا وصدقناه
وده توريث مش تزييف بكره ندق الطبلة وراه
مص بلدنا وهد بيوتنا وشوفنا خلاص الويل وياه..وإحنا معاه لما شاء الله
لا حينفيني ولا يخفيني ولا فيه مصلحة بيني وبينه الا السجن وقمل الدولة..وبقولها وعوضي علي الله
علشان كده احنا اخترناه
عهده بطالة وكله دعارة وأهي كملت بالعبارة..داس القاضي علينا بالجزمة وقالوا براءة يا خلق الله
علشان كده احنا اخترناه
قلنا وقالوا زود ماله..ما هي عزبة أبوه سايبهاله..وأما يحابي يقوم يتغابي ويجيب عز وزير وياه
علشان كده احنا اخترناه
أول مرة يا مصر يا حرة تدوقي طعم العيشة المرة بعد ما خرب وقالوا بيعمر.كرهنا طعم العيشة معاه
علشان كده احنا اخترناه


كان معكم واحده مش اختارت حد فى دنيتى غير اصحاب حلوين واصحاب تانين شوزات بس قلعتهم خلاص من رجلها وفضل الحلوين اللى بحبهم

شكر واجب لرينا نسرين بسيونى حبيبتى وبنت القمر وقوس قزح ومفروسه وكامى فوندامى ورئيس جمهوريه نفسى وسكر سنكرة وكل الناس اللى

علقت فى البوست اللى فات ميرسي ليكم وبعتذر لانها كانت وقت نرفزة وراحت لحالها وخلاص

والناس اللى كنت مخصماهم وصالحتهم انا يمكن حتى واحنا بنتصالح دبيت كام كلمه وحشين بس علشان اقطع الفرص على اى حد انه ينقل كلام غلط وعادى يعنى انتم عارفين انى بلطجيه واللى فى قلبى على لسانى وبرضه هو كده

ابى هانم بتنجانى

وبلاش نداله يا جدعان لو جرى ليه حاجه عااااااا




اوبا افندى وامه



اصباح الخير عليكوا
بصراحه كده بما انى يعنى هقول راى بيصدم العقليات البشريه فتحملونى يا اخوة ويا اخوات بجد
انا بجد مش شغله نفسى بالاخ اوباما ده او اوبا بأعتبار ما سيكون .... لانى حسه انه زيه زى غيره
هيحب يقرص مصر ويقرقصها يقولك شيلوا المعونه وطبعا حكومتنا العفيفه الشريفه النظيفه متقدرش على كده دى بيوت ناس برضه
بالعقل وبراحه اوبا افندى هيغير ليه سيستم اللى جاى ناس حطه عليه امل فى مصر بتاع ايه
الاخوان والغد والوتنى لااااا سورى الوتنى مش مهم بعتوا له تهنئه ليه على اساس بيشتغلوا نفسهم ويقولوا مسلم هو رجع فى وشنا وقال انا مش مسلم
هو مٍسلم بالامر الواقع بس مش اكتر
الحجه ملك اللى بتخوفنى دى الداعيه ان شاء الله كانت رايحه تعمل معاه مباحثات فى شئون المرأه المصريه ليه هو ماله اصلا هى عادتنا زيهم ولا تقاليدنا ولا الدين بتاعنا زيه هى الست دى اتهرشت انا اه مش بحبها اه بتزعق ولابسه اسود على طول وبتخوفنى وانا اه توتى خالص وبتخض ايه يعنى
طيب ايمن نور ومهروش فى عقله وطول عمرة بيجرى ورا الامريكان وبيتمسح فيهم الاخوان بيهنوه ليه هيرفع لهم علم الاسلام هناك
شوفوا الخبر ده
انطح يا ريس وهتنطحوا بالعند فى اللى مش بيحب الكلمه دى هههههههههههههههههه

بيقولك هبعت حد يصلح علاقات مع مصر اه هيدق مسمرين جداد فى نعشها ومش بعيد نقوم الصبح نلاقى الشوارع كلها بقوا امريكان
يعنى هى كانت بايظه من ايام بوش ابو وشين والحكومه الظريفه اللطيفه كانت كدابه مش قولت انهم بتوع الكدب المنعكش حد يجيب لهم مشط يا جدعان
وبعدين باعت مبعوث يقابل رئيس دوله بزمتكم مش ده عار يعنى ينفع يا اخى والله انا مكسوفه لكم بجد يعنى فيه حاجه اسمها برستيج انت على طول ممرمط كرامتنا فى الارض ويقولك مطالب مصر خير بقى المطالب دى ايه حد يقولى وبناء على ايه بتطلب وايه كمان خبطها فى وشنا هنساعدكم عسكريا ونبعت طيارات طيب افهمها بقى دى بجد يعنى ايه عسكريا هو اللى بيدرب الجيش امريكان يا لهوى لا بجد هى مصر ماشيه على خطه عسكريه امريكيه اه صح والجيش عمال يبنى كبارى اى والله تسلم ايديه
ويقولك هنصلح العلاقات مع سوريا طيب بامارة ايه اذا كان بوش قايل انهم حلفاء للقاعده هتيجى انت يا حج تعدل على اجندا ماشى بيها الكونجرس كله بلا استثاء
بصراحه يا الراجل ده واكل مسقعه ومستهبله مصرى يا بيشتغل الناس والناس مبسوطه بالاشتغاله
انا بسمع كلام اونكل ابو الهول فى الحاجات دى هو قالى يا بنتى ايش تأخد الريح من البلاط قولت له بمعنى قالى هو ماشى على سياسه سيبك من الوعود البراقه (هى ايه البراقه دى ) اللى بيقولها علشان كان يكسب ود الناس بعد شويه هيدى لكله بالشوز على قفاه
انتم اتلهوا على عينكوا خليكوا فى بلدكوا وفى حكومتكم والريس متقال وولده الحج عوكل وبطلوا تتواكلوا وكل واحد يدخل يقول عندى امل
يبقى ده اهداء منى ليه يسمع اغنيه الامل بتاعت الست ام كلثوم ويروح يقعد على حرف البلكونه ويخليه عايش فى الاحلام والاوهام لان مفيش جديد
فى النهايه اتفقت مع اونكل ابو الهول على ده
انا بقول مش بيهمنى غير اللى هيأثر عليه انما اللى بنوا أمل وعمر واحمد كمان على اوبا افندى فاقول لهم من مزنقى هذا ابقى قابلنى يا كابتن عند اول قفا هنأخده

ملحوسه على جنب:- اللى بيقولوا الامن هو اللى حرق الغد اقولهم بلاش عقدة الامن يا اغبياء لان معروف ان الغد مين اللى حرقه الاعضاء وقله ادبهم والسلطه اللى بينهم والطمع فيها وجتكوا البلا مليتوا البلد بغابئكم وخبيتكم القويه وتعليق الخيبه على شماعات ناس تانيه الامن هيحرق الغد ليه ودلوقتى تحديدا هو ايه اللى حصل اصلا علشان يعمل كده غير كده للى بيقولوا مفيش تواجد امنى اقولهم انتم مش بتشوفوا لان مديرة امن القاهرة على بعد اقل من كيلو من المقر وشارع الموسكى اللى واصل لحزب الغد مليان دبابير ومعروف المنطقه دى بكده يا مجانين


كان معكم من قلب الاحداث وقلب ورق الخس
ابى هانم بتنجانى


حكمه الامبراطورة

ما يكابر في الامور الا غبي أو مغرور

شرف شرفنطح افندى


كتير اوى اسمع كلمه شرف وطبعا مختلفه من حد لحد يعنى مثلا مرة واحده رقاصه بتقول انا برقص بشرف وواحد تانى يقولى انا بسرق بشرفى طيب هو يعنى ايه بترقصى بشرفك رابطه فى البدله يعنى علشان ميقعش واللى بيسرق بيسرق بشرفه ازاى سحبه فى ايده زى البيبى الصغير يعنى ولا كاتب على ضهره انا حرامى بشرفى تيجى بقى لواحد يقتل مراته ويقولك شرفى هى لوسته تقريبا جاله الفلونزا القرود نيجى بقى لشويه اسئله ومسمعش فيكون ولا فيكونه يقولوا ليه يوووووا هو كل شويه استمحان ايون هو كده انا قولت انا ديكتاتوريه صاحبه نظريه ديموكراتيه متطوره فى اللاوعى
الشعورى


السؤال الاول :-

ايه هو الشرف ويا اه يا اه ؟


السؤال التانى :

اللى هيقولى الشرف ده خاص بالبنت ومرتبط بالعذريه بس هل الشرف مرتبط بفقد البنت لعذريتها؟

السؤال التالت
ليه فى مجتمعنا بس الشرف مرتبط بالبنت مش بالولد ؟
السؤال الرابع
ليه البنت هى اللى تتحمل نتيجه اخطاء غيرها وخطائها ؟

السؤال الخامس:
ليه الشرف مش مرتبط فى دماغنا بالسرقه والرقص وكل البلاوى التانيه ومقتصر على عذريه البنت وخلاص ؟

وليه الشرف مش مرتبط بالكذب والخيانه والجرح والنداله والوطيان والتلقيح على الناس وان واحد او واحده يقولوا ده فلان وحش ويرجعوا يتمسحوا فيه تانى ويكلموه؟

يالا صدعونى بقى ونتخانق فى الكومنتات يا حلوين بس بقول ايه بجد انا عاوزة كل حد يقول كل حاجه بصراحه مش هوصيكم على فكره انتم ممكن تكتبوا اجابات طويله عادى يعنى ومش لازم تجاوب بالترتيب انا عملت الاسئله بس علشان تفهموا النقط اللى بتكلم فيها والهى يستركوا ما يفضحكوا الهى يا رب اللى يعمل اسقاط عليا تجيله حشره رخمه فى ودنه يا سحالى ويا تماسيح للمرة العشروميه الف لما بكتب حاجه بتكون موضوع نط فى دماغى من مفاهيم جوا الناس يعنى انا مش بكتب حاجه شخصيه دى اسئله بتتنطط فى دماغى ونحله ودبور بيزنوا

كان معكم مربى جيل اول وتانى معلم الاجيال واحلى من الشرف مفيش سياده لواء مباحث اداب ابى هانم بنتنجانى


حكمه الامبراطورة

تلاقت المكنسة مع البلاعة وبقوا جماعة

فكر حصاوى كلاكيت تانى مرة



تحديث علشان بس بسرعه موضوع نهى يتحسم اتفرجوا هنا على حوارها مع الحياه ورد الست الكتكوته المحاميه لما غيرت كلامها وتصريحاتها اللى كانت بتقول سمعه مصر ومتقولش ايد اديتنا مصر قولنا الكتكوته عملت ايه لمصر انطح يا ريس

على فكره فيه لها حوار على المحور عكس كل اللى قالته اللى هى المحاميه هتلاقوه عند الصباغ هههههه

تابع لبوست فكر حصاوى اللى قبل كده اكتشفت ان عندنا فكر حصاوى من نوع جديد خالص

كل واحد عاوز يعمله نفسه بطل ويعمل نفسه زى فيجيتار ويبقى مناضل ومحدش يصحح ليه ويقولى اسمه جيفارا
يقولك ايه تشويه سمعه مصر وانا لن اقبل ولن اتنازل مصر هى امى ونيلها هو دمى
ساعتها بجد دمى بيتحرق ليه ؟ اقولكم مثلا مثال بسيط محاميه نهى رشدى تقول ان نهى عملت القضيه دى علشان تشوه سمعه مصر
بجد لقيت نفسى بقول نعم يا دلعدى سمعه مين ليه هى مصر مفيهاش تحبرش بالبنات
وايه علاقه اتهامها لسواق بسمعه مصر ومن هنا قررت اطلاق فكر حصاوى وبيرفص كمان على المحاميه دى

مثل تانى اللى يقولك الشباب بتوع المدونات بيسئوا سمعه مصر ايون فيه البعض اللى بينشر حاجات متفبركه وبينقل حاجات من غير تفكير وبيبقى معروف اوى انه عاوز فرقعه وخلاص وده يستاهل نجوزه مصر علشان تطلع روحه ويحرم يعمل كده واهو يبقى شربها بقى ببلاويها واللى فيها
انما فيه ناس فعلا بتنقل حقايق ووجهات نظر مظبوطه حتى لو فيها نقاش بس كل المتسولين الكبار يقولكم بطمعوا الجيران فى مصر

واحد تانى بيسرق اعمال واخبار وتحليلات وينسبها لنفسه ويعمل نفسه بيكاسو عصره وغسيله ده فكره حصاوى لانه فاكر الناس مش هتكتشف حتى لو كان بيجيب الكلام ده من الجرايد البمبى اللى عارف ان الناس مش بتقراه برضه بيتكشف وبيقع وبيبقى شكله وحش اوى اوى ويعععععععععع قرف خالص وعلى فكره ده موجود فى المدونين ومش بيقولوا بيغيروا الكلام وينسبوه لنفسهم زى القص واللزق كلمه من هنا على من هنا بس النبى بيتكشفوا

طيب انا من هنا وهذا الموقع على الكرسى يعنى عاوزة اسال الساده المتسولين قصدى المسؤلين
اللى انتم بتعملوه فينا من نهب وسرقه وخطابات هبله بتطلعوا ترجعوها فى وشنا كل فتره زى اليومين دول وتقولا الحاجات هترخص فى مصر كانكم بتمنوا علينا مع انها نزلت عالميا فغصب عن عين ابو الهول هتنزل فى مصر مش بيبن للعالم قد ايه احنا بلد بايظه
القضاء اللى بيبرا الظالم وبيسجن المظلوم مش بيبن قد ايه احنا بلد مايل ومفيش حاجه هتعدلها وكل العالم بيطور القوانين بتاعتهم الا احنا واقفين ومسمرين رجلينا فى الارض
تعاملكوا مع اسرائيل وحوار الريس متقال الفضيحه اللى بجلاجل واتفاقايات قذرة ده مش بيشوه سمعه الاخت المحروسه مصر
الانتهاكات فى الجامعات الصفقات المشبوه بتاع وزير الزراعه اللى لبستوا فيهاموظفين تانين كل ده مبيجيش عند سمعه مصر
الجنس العلنى بين الكبار والسهرات كل ده ملوش دعوة بسمعه مصر
فساد الشرطه وفساد فى الطب وفساد فى كل حاجه ظابط الشرطه مقهورين بينهم وبين بعض اى والله اقولكم ازاى
يكون واحد ابوه حاجه كبيرة ورتبه كده بتاعت اربعه خمسه كيلو يترقى ابنه ويتنقل فى اماكن نظيفه بسرعه جدا والتانين اللى اهليهم عاديين يتسحلوا فى اماكن كتير وبعيده ده بيعمل كبت وقرف وغل جواهم هيطلعوه فى مين بقى غير فينا احنا وفى باقى الناس يعنى خليتوا الناس بقت منفسنه على بعض
عارفين فعلا امتى احنا بنشوه سمعه مصر لما مش بنفكر لما بنجرى وراى اى خبر بدون تمييز ونهلل ونقول اه
من هنا سورى يعنى بيبانه ان فيه ناس وسطنا برياله
يعنى النهارده ده وحش يبقى ده وحش بكره حلو يبقى حلو عاملين زى الرقاصه والطبال الرقاصه لازم تمشى على نغمات الطبله
البعض منا بقى كده
يا ناس فيها حاجه اسمها عقل مش مهلبيه فى مخنا نفهم ونرتب افكار احنا فعلا بالهطل اللى احنا وصلنا له ده عمرنا ما هنتغير والحاله هتسوء وساعتها نستاهل يجوزونا مصر بكل بلاويها علشان نتستر عليها
انا عن نفسى لن اقبل بتاتا البته
قال سمعه مصر قال بلا نيله
عموما بس الكلمه اللى عاوزه اقولها بعد اللك ده ان سمعه مصر هى تصرفتنا وتفكيرنا مش كلمه بتتقال وكل واحد عاوز يبقى بطل يسمع اغنيه وطنيه ويشرب عرقسوس ويتهيأ له انه عرابى ويطلع يرجع فى وشنا سمعه مصر
بعد كده اللى هسمعه يقول كده هجوزه مصر وهو الخسران فى الوقت الحالى


كان معكم ابى هانم امنحوتب التالت بجوار ابو الهول


حكمه الامبراطورة

اللي يأخذ المقصد بسوء نية تركبه جنية

Share |