من الاول مش عاوزة تحديف قلل ولا رش ميه فى الكوكب انا بقول اهو هسسيب عليكم خرفانى انا بفتح على حاجه غيظانى وبعدين اصلام اصلام يعنى النظافه والنظام والادب من الايمان فموش عاوزة استعباط اه بجد بقى عذاب مع ان ده اليوم الحلو اللى بستناه تقريبا مرتين او مرة فى الشهر لان بطلع فيه كل ميولى الخرفانيه للشراء وبيكون تخريب فى الميزانيه باقى الشهر واربط الحزام الناسف على باقى المرتب اللى بيكفينى بالقرص بالعافيه ومع متطلبات بطوط بقت حاجه صعبه
المهم انا بحب اروح الماركت الكبير كارفور سبينيس او المحمل لان دول بيعملوا اوفرز حلوة وكمان اماكن كبيرة وتلاقى الحاجه مرتبه واسعارهم اقل من بره انما مترو كلا البطه لانه بجد غالى جدا عن اى مكان بره
كالمعتاد اروح اشترى حاجه الشهر الاقى ايه بقى بجد ولا حديقه الحيوان او السيرك العالمى ياااااااااااه على الدوشه وعدم النظافه والصداع والزهق والملل والصوت العالى والرحلات اللى بتكون طالعه اقولكم ازاى تلاقى الست رايحه تجيب حاجات واخده بنت خالتها وبنت عمها وعمه خال ابن اخو جوز خالتها واولادهم واولاد اولادهم كل ده ليه مش عارفه واللى بيخلينى بجد عاوزه انطحهم الاطفال بقى بيأخدوا حاجات من مكانها ملهاش لازمه ليهم ويرموها فى اى مكان تانى الستات تلاقيهم ماشين يتمختروا ويا ارض اتهدى ما عليكى قدى والرجاله عنيهم رايحه جايه على ستات تانيه غير مراتهم او لو لوحدهم بيكونوا بيعاكسوا ويتسنكحوا وخلاص ولا كأنهم بيتفسحوا ويتكلموا مع بعض بطريقه فظيعه مش فاهمه ايه ده وبعدين انا اساسا واحده لسانها فالت وعندها نحله ودبور ولو سمعت حد بيقول كلمه مبتعجبنيش بروح بجد مسخسه من الضحك لو اكسبريشن غلط وبكون لوحدى ساعات طيب مش يراعوا مشاعيرى فى ان حد يقول عليه هبله والله بيكون شكلى مسخرة وانا دايما ولابد تفاديا لهزوهى المواقف المتشفلحه المتشنقطه بعمل نفسى بتكلم فى التليفون او احط الهاند فرى فى ودنى لما ودنى بتوجعنى موووت بس احسن ما يقولوا عليه هبله ومسكوها كارفور
كمان بجد بيعملوا زحمه ملهاش حل بحس ان الناس دى تجار والله العظيم بيرحوا يشتروا الحاجه فى الاوفرز ويبعوها بره باغلى وده طبعا بيأثر على وجود الحاجات فى الماركت وفعلا ده جشع التجار المصريين
طيب ما تسيبوا الحاجات للناس ويا ريتهم يبعوها عندهم بنفس السعر لا بيغلوها يعنى الماركت الكبير يعمل حاجه ودول يجوا يخلصوها فى منتهى الاستغلال ولا يفكروا غير فى نفسهم وبس
المحمل عامل حاجه حلوة قوى للحد من جشع التجار والناس اللى بتاجر فى الحاجات بيعملوا حد اقصى للطلب من الحاجه اللى عليها الاوفرز بس بما اننا شعب متفنن فى استخراع الحركات ممكن الواحد يشترى خمس اكياس سكر ويبعت حد تانى قريبه يجيب خمسه تانين يعنى بجد لازم ظبط شويه على حياتنا لاننا السبب كمان فى الاستغلال والغلاء ده مش الحكومه بس وهنبقى احنا ونفسينا على نفسينا طيب والله نفسينا لها حق تنفسن علينا ههههههههههههه
طيب انا اعرف اللى بيروح الماركت لازم يبقى مركز وعارف هيشترى ايه وكاتبه فى ورقه او فاكر يعنى على الاقل ومحدد اتجاهه انا بعمل كده انما الناس دى غريبه موووووووت بلاقيهم ساعات مش بيشتروا بيتفسحوا يا جماعه الماركت مش للفسح ولا للكلام مع بعض والفرجه والضحك وتقييم الحاجات اللى فيه اكتر ناس عجبتنى الاجانب منظمين جدا حتى لو معاهم اطفال بتلاقيهم حطينهم فى العربيه او شيلنهم على ايديهم وبيشتروا فى صمت وبسرعه جدا ونظام مش زينا تلاقى الست ماسكه عربيه وابنها بيلعب بواحده وكأنهم بيلعبوا بلاى استيشن وفجأه تلاقى الواد هوووووب عمل حادثه فى رجلى فى ظهر حد ويبص لك بكل تناحه ويضحك بيكون هاين عليه احطه تحت العربيه واعمله سجاده هههههههه
اه فيه بعض ستات بتأخد اولادها تجيب لهم لبس بس بصراحه مش بالشكل ده وكمان زعيق وصوت عالى كأنها قاعده فى البيت وشوشه شويه تقولها ادينى حبه ميه يا ام احمد ولاحظوا انى بتكلم عن كارفور المعادى وسبينيز سيتى ستارز اللى بجد مخلينى هتجنن بلاقى ناس جايه من اماكن بعيد جدا يشتروا يعنى والله مرة واحده سمعتها بتقول احنا عندنا فى بولاق انا اتخضيت قولت دى جايه من بولاق لهنا يا نهار متكعبل
طبعا قريب هينقرض الاجانب من كارفور ومش بعيد كارفور نفسه ينقرض واحنا كمان ننقرض ويبقى الحاجات اللى بحبها مش فيه كمان لانه بجد بقى ولا سوق الخضار مع انه فتح فيه محلات بران نيمز كتير جدا بس بقى منظر غير حضارى من الناس والزباله والعمال مش ملاحقين الحقيقه يعملوا حاجه ولا من البضاعه اللى بتبوظ وتترمى
و نفس الكلام عن المحمل بتاع التجمع بقيت اقرف اروح اشترى منه حاجه بجد بجد حرام الاهمال والشباب اللى بيروح يتلكع هناك ويضايق البنات ده ايه وجع القلب ده يا ريت نحافظ على نظافه مكان فى بلدنا ونبقى متحضرين شويه والامهات يا ريت بلاش الاطفال الكتير والكلام بصورة مش حضاريه ولا كويسه معاهم يعنى ممكن تسيبيهم مع جدتهم اختك اى حاجه الموضوع مش هيأخد كتير بجد علشان انا هشتكى لكل الادارت واقولهم يمنعوا جرجرت الاطفال فى السوبر ماركت وبما اننا عندنا فن فى تكسير النظام يبقى هتخانق مع الناس واخر حاجه هقعد على حرف الكوكب وادعى عليهم بقى او اسيب خرفانى هناك تنطحهم وربنا يستر عليا وابقوا جهزوا المستشفيات والقطن والميكركروم ولا بلاش طعهمه وحش شوفوا حاجه تانيه ههههههههه
ملحوسه كونوسه انا مش هفتح حضانه علشان الناس اللى عندهم اطفال يقولولى خديهم عندك انا بعنذر اهو وافنذر وافنجر اتصرفوا بقى واعملوا فيهم اى حاجه
كان معكم آبى هانم بتنجانى رئيس مرور السوبر مركب