ارحموا من فى الارض يرحمكم من فى السماء

هاى عليكو يا حلوين اكيد افتقدتونى صح وافتقدوا قللى وخرفانى معلش نكدت عليكوا (هو انا ليه بركه الا انتوا) بس حبيت اعرفكم ان الحياة لا تساوى اى شئ خلاص مش هنكد تانى الا فى الضرورات التى تبيح المخضروات.
الولد السكر اللى فوق ده فادى أكرم فلسطينى ابن أكرم او كرمله كوكى صديقىمن فلسطين بقالنا اصدقاء اكتر من 3 سنين اكرم لما اتجوز كان نفسى ينزل مصر استضيفه هو وزوجته مقدرش ومقدرتش اروح له هناك احضر فرحه بس كان بيكلمنى على النت على طول حتى لما بقت مراته حامل كلمونى قالوا ليه ولما جاب فادى بعت ليه صورة اكرم شاب عادى عنده 27سنه وبيحب اسرته جدا كان من فترة اختفى ومش عارفه عنه حاجه لغايه لما قابلنى على النت تانى واطمنت عليهم وبعت ليه صور فادى ....اكرم الصبح بيشتغل فى مستوصف فى غزة وبالليل عمه عنده فندق عند ميناء غزة ....اكرم وعيلته مش عاوزين حاجه فى الدنيا غير انهم يعيشوا فى امان وسلام ويربى ابنه ويجيب له اخ عاوز اللى بيحصل فى بلدهم ينتهى خالص وانا معاه انا مليش دعوة مين مع مين ولا مين ضد مين انا مش عاوزة اشوف فى يوم صورة اكرم ولا ابنه ولا مراته ولا امه اللى بتحبنى على الرغم انها مشفتنيش على التليفزيون فى الناس المصابين ولا المحروقين الناس دى ممسكتش سلاح ولا راحت حاربت دول طالبين ابسط حاجه فى الحياه انهم يعيشوافى امان وسلام وحب .

انا عاوزة الناس التانيه بقى يهمدوا شويه ويبطلوا يقطعوا فى الفلسطنين شويه اللى اختاروا يمسكوا سلاح ربنا معاهم يا رب وينصرهم انما الناس التانيه عاوزة تعيش دى ابسط حقوقها مين سلب اداميتها من قال انه سهل طفله تطلع فى التليفزيون تقول (اى امال اللى باقيه عليها انا مبقاش عندى امل فى حاجه ولا احلام بس اتمنت ترجع بيتها).
اى عقل وديانه فى الدنيا تقبل ان راجل ابنه يموت قدامه وينزف ومش قادر يعمل له حاجه ويبكى عليه ولا طفله تفقد اهلها قدام عنيها ولا راجل يهان من كلاب اسرائيل ويضرب بالقلم ولا بالرجل .
انا مليش فيه حماس عاوزة فتح عاوزة ولا الحكام العرب عاوزين ايه حتى ..... انا عاوزة حد يتنازل وميكابرش علشان يحافظ على بقيت الناس ...الناس دى عاوزة تعيش وبس ليه القيادات متتنازلش ليه ميخفوش الفرم اللى عاملينه على الفلسطنين اتمنى ان يوم يحصل وحد يتنازل مش علشان حاجه وحشه انما علشان شعب واطفال مختاروش حاجه غير انهم يعيشوا ويعبدوا ربنا وبس كمان الناس اللى بتعمل فتنه بين الفلسطنيين والمصرين اللهى يجلكوا الفلونزا القرود وهبل النعام ونطح الخرفان العبيطه خفوا شويه هى مش ناقصه ....شويه احذروا من حكومه مبارك والمصريين ..وليه مش بيسمحوا للفلسطنين يتعالجوا فى القاهرة ويطلعوا كدابين فى النهايه والتليفزيون والفضائيات تنقل حالات من قلب القاهرة فى المستشفيات عاوزة اقولهم اتبطوا بقى وابقوا زى البط المكتوم على نفسه ويارب تفطسوا العمليه مش ناقصه سواء اللى بيعمل كده فلسطينى او مصرى اهمدوا بقى الله ينتقم منكم متكرهوناش فى بعض.

نفسى كل الشعوب تبقى كويسه فى العراق والفتنه الطائفيه الله يحرقها بجد وفى لبنان الناس لغت عقولها ليه طيب ايه الاستفاده من الاهانات اللى بتحصل دى مش عارفه بجد انا قلبى بيتقطع لما اشوف مسلم بيقتل او يضرب او يتخانق مع مسلم طيب ليه منحبش بعض.
يمكن احلامى ورديه بس هو ده اللى عاوزاه بجد من قلبى.
ومصررررررر حبيبتى اللى بقيت اسمع اسمها بالصدفه (الا محدش يعرف النشيه الوطنى بتاعنا راح فين هما خصخصوه هو كمان انا مبقتش اسمعه) نداء من قلبى للناس اللى فوق قوى دول ربنا على الظالم انا نفسى اعرف احساسهم ايه لما بيشوفوا راجل كبير فى السن طالع وماسك رغيف عيش ميأكلش طفل صغير ويقول لما يبقى ده بربع جنيه ااكل ولادى فى الشهر بكام واجيب قد ايه ومرتبى مش بيكفى الزيت بقى ب11جنيه الارز بقى 3.5 الملوخيه ب4جنيه الفول الكيلو ب6جنيه العدس اللى كنا بنقول عليه اكل بتاع المساجين والله انا بحقد عليهم دلوقتى بيأكلوا عدس الكيلو ب10جنيه وبابا علشان انا مش بحب العدس ولا البصارة كان يقلى يا رب تروحى الجيش وتأكليهم علشان النعمه اللى مش حسه بيها أه دلوقتى حسيت بيها بجد يعنى اخوانا اللى بيروحوا الجيش ميزعلوش هيأكلوا حاجات غاليه وقيمه.
اللحمه بقت ب42ج ومحدش يقولى ليه وازاى يمكن معندناش مزارع حيوانيه خدوا البقر والجاموس وكل الحيوانات فى نزهه مفتوحه لخارج البلاد او طلعوهم اعارة ...انا مش عارفه احنا هنفضل ساكتين لامتى وهنفضل مش بنطالب بحقنا لامتى وهيفضلوا بيلهونا بقضايا تانيه وحاجات تانيه ويسبونا نزيط ونبقى عاملي زى كدابين الزفه لامتى وهما يغلو كل حاجه من غير ما نأخد بالنا وهيفضلوا الظلمه كابسين على قلوبنا لامتى

احنا بقى ترتبنا فى العالم رقم 38فى الفساد (ريحته طلعت زى الشراب اللى بقاله قرن متغسلش يعععععععع ) السيد أبو طويله المسبسب ظيف رئيس الوزارء بيقولك مفيش ازمه عيش ولا ازمه حديد ولا اى ازمات انا نفسى اعرف امال فيه ازمه فين فى رباط الجزمه بتاعتنا ولا ازمه فى عدم استيعبنا للامور وان البلد بقت بتاعتهم واحنا نهاجر على الواحات ولا الصحراء انا بدعى عليهم من قلبى ربنا يوعده برئيس حى محترم يشيل منه دور ابو طويله ده او طيارة تدخل فى دماغه .
قال ايه الغوغاء هما اللى عاملين كده طيب اسكتوا يا غوغاء يا وحشين يا دببه هما الناس دى معندهاش شويه من اللون الاحمر مش شايفين بعيونهم ولا اتعمت

اخيرا بجد هدعى على كل واحد ايديه تتمد على طفل فلسطينى ولا شعب فلسطين
وربنا يهدى شعب العراق لبعض ويفهموا ان عدوهم هو اللى فرقهم
ويأخد الناس الطويله الهبله والقصيرة الأوزعه اللى فى الوزارة بتاعتنا ويا رب لو من بابها يعنى تأخدهم من أول فوق لغايه اصغر واحد كل الشعب مش مهيعترض .
يا رب نفوق بقى ومنفرطش فى حقنا ونتكلم بقى وننطق بدل ما الصبح كلنا نمشى ببوت فرده وفرده وشورت فى الشارع ونكشين شعرنا وميلاقولناش مكان فى العباسيه .
يا رب نفوق من سلبيتنا ونقول لا للظلم بدل ما يتلف حولين رقبتنا ويخنوقنا ولسنا يطلع يدلدل .
يا رب خد اللى فى بالى وعذبه عندك فى الاخرة وبلاش يعذبنا هو فى الدنيا .
ومن هنا سوف اقوم بوقفه احتجاجيه مهلبيه والدعوة عامه واهو منها نشغل اخوانا الحلوين بدل ما هما ملبوخين فى المحنيات ههههههه بداخل كوكبى وادعى كل الادعيه اللى ممكن تفوقنا وتخلصنا من الظلم اللى احنا بقينا فيه وتجعل الرحمه فى قلوبنا على بعض وترحمنا يا رب
وتفوقنا يا رب من الغفوة اللى احنا فيها ويطلع لنا لسان ونوقف ايد ةواحد ونطالب بحقوقنا

تهديد واعذار على يد محضر رخم رزل مضروب على قفاه لخمسين سنه :- مش عاوزة واحد ولا واحده دماغه مزنوق فى كعب جزمته يقولى انتى ضد حماس ولا مع حماس ولا انتى مع فتح ولا ضد فتح انا مليش فيه زى ما قولت انا مع الشعب العادى اللى اختار يعيش ..... واللى يختار يجاهد ربنا ينصرة يا رب فمش عاوزة تصنيفات مليش فيها خالص انا بتكلم من قلبى انا كده انسانه بسيطه ..... ربنا على الظالم ومع المظلوم وهو اعلم ما فى القلوب والنيات.
انا حذرت اهو احترسوا الخرفان ملت الكوكب على الاخر وسلحت نفسى بالزير الكلاشينكوفى ولسانى ولا مطار امبابه ههههههههه

كان معكم مراسلكم حول العالم من قلب المعارك والتفكك الطائفى والثقافى البتنجانى استاذ لواء اركان حرب دكتور فيكونى آبى بتنجانى من قناة الفياكين الخاصه ا ولا عزاء للساسيين البمياجيه.