عيد الصداقه الصدوق …والخيانه


اولا بحب اشكر الناس اللى بجد بتدينى دفعه زى الصاروخ انى اكمل كتابه واللى عنده حاجه عاوز او بيحب انى اكتب فيها يقولى وانا هكتب وهى اخرتها ايه يعنى المعتقل فى مارينا معنديش مانع اهو الصيف داخل وربنا يكرمنا ونبقى صيفنا ببلاش ههههههههه

ندخل فى موضوعنا وانا بعنذر وانذر وافنجر واشنكل من الاول اللى هيأخده الحماسه ولا الافتكاسه انه يهاجم وميفهمش الموضوع هسيب عليه خرفانى لا والنحله والدبور وزمن القلل انتهى دلوقتى تعاقدت على زير كلاشينكوف بمخرجين لكل مواطن انتم حرين انا قولت.

نيجى بقى بجد ليه مبقاش فيه صداقه حقيقة الأصدقاء راحوا فين (اممممممم فين يا آبى خلصوا فى حرب اليمن افتكرت ) طبعا انتم عارفين قصه سيدنا ابو بكر الصديق وليه سمى الصديق ومش هقول حاجه انتم عارفينها .

هو مين فينا متولدش جواه ملاك برئ نظيف … فين رمينا الملاك ده عارفه ان الدنيا هى اللى غيرت فينا بس ليه احنا مبقاش فيه حب فى قلوبنا لبعض ليه كرهنا الحاجه الكويسه ليه الطيب فى الدنيا يتقال عليه عبيط

تعالوا للمواقف بقى تلاقى واحده مصاحبه واحده تانيه وتقعد معاها تقولك دى اختى وحبيبتى وكل حاجه ولما يتعرفوا على ولد تششششششششششش موسيقه تصويريه البنت تبيع صحبتها فى اول ملف طيب ليه بقى على اساس الوزن تقيل ولا الانانيه طلعت عليهم (ومش كل البنات علشان ملقيش واحده طالعه تعترض علشان متتضربش افهمى للاخر) بس بجد بيحصل وانا بيحصل ليه كده بس بما انى بتبع سياسه الاكتفاء الذاتى بماما حبيبتى واخواتى وبابا فمبيهمنيش بصراحه بس بزعل وبتعب قوى ولا صديقه تنقل سر صديقتها برة يااااا مؤلمه قوى ولا واحدة تكون بتثق فى واحد ولا واحده ويخون الثقه دى لا بتقتل وتدمر النفسيه جدا بصراحه انا بقيت ماشيه على مثل عدو عاقل ولا صديق مجنون ومش مجنون بس وعبيط واهبل .

ليه مبقتش البنات بتخاف على مشاعر صحبتها وليه بقت بتأخد مواقف وتنطح زى خرفانى كده من غير ما تفهم وتلاقيها جرحت مشاعر صحبتها علشان موقف هايف وعرق الهبل يأخدها وتقول كرامتى وممكن تهين صحبتها أنا عاوزة اقولكم انى فى مرة خسرت صحبتى بسبب جوزها بس مش علشان انا عملت حاجه علشان هو اللى مكنش كويس ولما قولت لها انى مش هقدر اجيلها هى كانت عارفه وحاسه مع انى مقولتش لها بس هى كانت فهماه وكانت متمسكه بيا بس انا علشان احافظ عليها وعلى بيتها رفضت انى استمر علشان عارفه انه هيضايقها بعد ما بصراحه طلقت عليه خرفانى ومعيزى ولسانى اللى سايب فرامل على طول بس انا مضحتش بيها لمصلحتى لا علشانها هى.

يا بنات بجد حبوا بعض شويه احنا بنحتاج لحب بعض والدفا اللى ما بينا متخسريش صحبتك علشان هيافه واوعى تفتكرى ان الولد ممكن يكون اامن عليكى من البنت وبلاش غيرة من بعض الغيرة وحشه قوى وبتحطم حاجات كتير وبلاش الحياة تأخدكم وتبعدوا عن بعض وبلاش يبقى وسيله اتصلنا التليفونات (الله يحرق ويشنق ويعتقل الموبيل اللى قطع المسافات بين الناس وخلاهم يكسلوا يشوفوا بعض ) بقت حاجه وحشه دى قوى يقولك ما انا بطمن بالتليفون طيب فين نقعد مع بعض ونهتم ببعض ونشوف نظرات عنين بعض وانفعالتنا على فكرة كل واحده عندها الكويس تظهرة ومتفكريش انتى معندكيش ايه فكرى عندك ايه ونميه.

طبعا كده الاولاد فرحوا طيب دوركم جاى بقى خد يتماسيح هنا انت وهو هتقولولى لا احنا ما بينا وبين بعض واقفه الراجل بعشرة ستات هقولكم كدابين وعند الجد تخسر العفريت علشان خاطر واحده ههههههههههههههه صح ومش عاوزة حد يستهبل ويقولى لا اصل ها هجرب الزير الكلاشينكوفى فيكم .

انا بحزن لما بلاقى اتنين اصحاب بالسنين ويخسروا بعض مش لازم علشان بنت علشان اى هيافه الصديق له عند صديقه ايه (اوعى اسمع الهبل اللى بتقوله غدوة و…….مش فاكرة بس حاجات وحشه)لا الصديق له عنده صديقه انه يقف جنبه ينصح بكل حب واحترام متسعدوش فى الكدب ولا فى الانحراف هى دى الصداقه بجد واوعى تقف جنبه انه يضحك على اهله ولا على بنت حرام حط اختك او اهلك مكانهم انتم هتوفقوا اكيد لا مدوا ايديكم لبعض انا مش بحلم انا بتكلم بجد متبعدوش عن ببعض علشان هيافاتعارفه الحياة فيها الكتير والمصاعب بس بحنتاج لبعض مينفعش كل واحد يندمج فى حياته و ينسى الباقى .

وعلى فكرة اوعى تفتكروا انك لما تجرح فى صديق ويتحملك مرة واتنين وهو اللى يبدأ الاتصال بيك او يبقى متعود انه اللى يتصل بيك مبيكونش محتاج انك تعمل كده مرة لا اكيد بيكون محتاج لده اوعى تفتكر انه يبقى اهبل ولا عبيط ويبقى حق مكتسب ليك انك تيجى عليه الانسان الطيب مشاعرة رقيقه ونظيفه وعلشان هو بيحب بيدى بدون مقابل .

انا بجد نفسى ارجع اشوف الناس حلوة وبتحب بعض افتحوا قلبكوا بلاش تشمروا أكمامك وتدخلوا تنطحوا من غير ما تفهموا الصداقه انواع كتير بس بتكلم عن القريبين من بعض يا ريت نبطل نجرح فى بعضنا ونعض فى بعض ونتكلم على بعض فى غيابنا ونرجع الصداقات الكويسه معرفه الرجال كنوز وبالعند فيكوا معرفه الستات الماظات ههههههه.

ملحوسه على جنب مش عاوزة حد يقراها:- اه أسفه علشان جرحتك انا اسلوبى جامد وصعب عارفه بس انت عارف السبب انا بخاف من الدنيا وعلى نفسى انا اتجرحت من ناس كتير قوى ويعلم الله وحده انى مبحاولش اجرح حد ولو حصل بعتذر اسفه وهغير من نفسى بس كنت نبهتنى من الاول بس انت عارف انت ايه عندى وعارف انك قلبي كله وعقلي.

كان معكم دكتور مهندس مقدم آبى الا يا ناس جرح الحبيب..... صداقه فاشله اخر حاجه

68 اخبط وقول رايك:

Anonymous said...

أستاذة /دكتور مهندس صيدلى آبى
تحية و أحترام و بعد
سعيد بمواضيعك القيمة وأؤيد كلامك من قلبى و أنا لست طمعان فى تورته و لا حاجة و لكنى أحببت أن أقول لك أن لى صديق عمر من أيام الأبتدائية و هى من زمن سحيق ،أتعلمين سبب نجاح الصداقة أن تكون فى الله و بدون مصالح سعيد أنى حصلت على هذا المنصب أول المعلقين.
أبو خالد

appy said...

اخى /ابو خالد

لاااااااااا كده كتير عليا بجد والله ربنا يسعدك انت مش متخيل انا بفرح قد ايه لما بشوف حضرتك اول تعليق
واستاذى الطائر الحزين هيزعل بس كده انت حجزت على الكوكب خلاص وبقيت شريك فيه
وفعلا عندك حق هى دى الصداقه انا بحزن لما بلاقى ناس بعد عمر طويل قوى يسيبوا بعض على هيافات

اجندا حمرا said...

الصديقه العزيزه ابي

مفيش صداقه حقيقيه عشان للأسف المصالح دخلت في كل حاجه ياابي

النفوس بقت وحشه
كل واحد بقه ماسك للتاني علي غلطه

تحياتي ليكي علي اثاره الموضوع المهم ده

Desert cat said...

فعلاً يا آآبى الحاجات دى بتحصل كتير
علشان كدا انا كمان بطلت اندمج مع بنات كل صحابى ولاد
هههههههههههههههههه
الا انت يا جميل
انا مش سألتى عليكى بالموبايل
ده انا جيت لك القاهره الجديدة
هو بالرغم من ان المشوار يعتبر سفر
بس اليوم كان ممتع ووقت ظريف
الا قولى لى انزل الصورة
نياهاهاهاهاهاها

appy said...

اجندا حمرا
طيب يعنى هو الواحد هيفضل يفكر فى نفسه وبعدين مصالح شخصيه ايه بس هو بقى حد عارف يعمل حاجه اناعارفه والله اللى بتقولى عليه بس ده مؤلم قوى
نورتينى فى الكوكب


قطة الصحراء
بصى ياللى عمله نفسك اسد انتى اولا ميرسى طبعا لتشريفك ليه فى القاهرة الجديدة الدنيا كلها بتضرب صواريخ علشانك وكانت القاهرة كلها مش الجديدة بس منورة بنورك
بس سيبك تعالى نيجى للجد هتنزلى صورتى انتى عارفه انا عندى صور ليكى وانت حرة صورة بصورة والمصوراتى اظلم
هههههههههه بس دى ضحكه شريرة وانتى عارفانى

Desert cat said...

لاء خلالالالالالالالالاص
ما انتى فاهمه قطة بقى وعاملة اسد
استر عليا يا اختى الهى يسترك دنيا واخره
منه لله الموبايل اللى رن وانا جنبك
كان لازم من الفضايح

حمادة زيدان said...

آبي .... آبي ... آبي
ايه يا بنتي المواضيع الجامدة دي ... انا عن نفسي موضوع الصداقة عندى الحمد لله ربنا موفقني فيه عالآخر وأنا وأصدقائي عدينا مرحلة الصداقة وكمان ممكن تقولى عدينا مرحلة الأخوة وبقينا دلؤت في مرحلة جديدة أوى يعني بقيت أنا واصحابي شيء واحد والحمد لله انا حياتي فيها 4 أنتيم مقدرش أفرق في المعزة بينهم وبين أى واحد فيهم ... ودول أصحابي من زمان ... وضيفي على دول بقي حبيبي مارو ... والشاعر ... وكمان جيزاوى ... وكتير من المدونين
ميرسي عالبوست
حمادة زيدان

a7med3bdelfta7 said...

الصداقة بتنتهى بدقة نقص يا Appy
ده هو السبب الوحيد لانتهاء الصداقات
وبما اننا فى زمن النق متتوقعيش انك تلاقى صداقة حقيقة الا فيما ندر
تحياتى على البوست الجميل

شقاوة شعب said...

آبى بتيجى ع الجرح وتدخل فيه بشنيووووور
ليه الاذى ده
مممممم
مش عارفة اقولك ايه بصراحة
فى صداقات بنبقى نفسنا قوى قوى نسترجعها فى حياتنا .. بس طول الفراق اقسى القلوب
عارفة الاية اللى فى سورة الحديد
بتاعة
"أفطال عليكم الامد فقست قلوبكم"
هى صحيح كان المقصود منها الايمان بس برضه لو طبقنا الجملة دى على العلاقت هنلاقيها تمشى
ربنا يرزقنا باصدقاء مخلصين يفهموووونااااا

تحياتى
شيماء

أنا إنسان said...

لو استبدلوا كلمه الصداقه بكلمه الاخوة في الله
ولو استبدلوا مضمونها بمضمون الحب في الله
والله ما هايبقى فيه كل الكلام ده

أنا إنسان said...

صحيح
انا نسيت احسد حضرتك المرادي
ما شاء الله
كل ده بوست
:)
..............
على فكره
انا اللي بيعملي stimulation
أني احسد
العين الكبيره اللي في البنر
ياااااااااااه
كل دي عين
:)

appy said...

قطتى
ايوة كده ارجعى لقفصك سالمه ههههههههههههههه هااااااا هوريكى العين الموف انا بقولك اهو


حماده زيدان
نعم نعم نعم هههههههه ربنا يخليكوا ليعض يا رب يا حماده ويبعد عنكم العين ان شاء الله بس ابقى خلى بالك شويه ههههههههه من اللى انت عارفه اوعى يا مارو تاخد الكلام على نفسك هههههههههه


أحمد عبد الفتاح
ايه يا عمنا التشاؤم ده طيب انا بعمل دعوة ان الناس تبقى بتحب بعضها بس وبلاش نقص ده

appy said...

شقاوة شعب
هو انا ورايا غير الشنيورات يا شيماء وكلاشينكوف وكل حاجه ما هو يا حبيبى لازم نعرف عيوبنا فين ونصلحها فهمتى نورتينى فى كوكبى

انا انسان
اخوة فى الله او محبه كله كلام جميل ما انا قولت قصه ابو بكر الصديق المهم انا حمدت ربنا بقى انك مخدتش بالك وحسدت انت عاوز تعمل فيه ايه اقفل الكوكب واقعد اشحت على بابه يا اخى سيبنى استرزق دا انا مش هجيب عين احطها عين زرقاء دا انا هدهن الكوكب كله ازرق بسببك ههههههههههههههههه ربنا يخليك وميحرمنيش من زيارتك

DoctorAllam said...

فكرتيني بجملة واحد صاحبي قالهالي لما زعلت مع صاحب تالت لينا
(الصداقة زي القلم الرصاص ، والخلافات زي البراية ، وكل مرة يحصل خلاص بتبري القلم لحد ما في يوم حينتهي)
أنا الحمد لله ليا مش أصدقاء بس ، لأ إخوات ويمكن أكتر كمان من الإخوات بيخافوا عليا وبيهتموا بيا بغض النظر عن أي مصالح دنيوية .. وكمان بأحبهم ومش بأطيق أبعد عنهم إلا للشديد القوي ولو أطول أفضل معاهم العمر كله
وأنا فعلاً كتبت موضوع في مدونتي عن أصحابي وإخواتي من على النت ، وحأنزل قريب موضوع عن إخواتي بقى اللي معايا على طول وبالصور كمان
الصداقة لسه موجودة بس نادرة الوجود وعلشان كده لما ألاقي شخص محترم ومؤدب بأمسك فيه بإيديا وسناني ويمكن يحس إني زي العيل الصغير معاه ، بس والله لإني بأخاف يبعدوا عني
وأظن الموضوع ده بقى كتبتيه لما شفتي الستيتس بتاعتي على الياهو (ويل لدنيا ليس فيها صديق صدوق) .. عامة طلعت إني ظالم اللي فكرته باعني ، وإتضحلي إنه ضحى بسعادته علشاني وعلشان ما يجرحنيش .. وعليه عمري ما حأسيبه ولازم أخليه يرجعلي وتبقى آخر ذكرى لينا كلها حب وصداقة وأخوة
عاوز أعرف بقى في النهاية أنا من أي نوع ليكي يا باش دكتورة آبي ؟؟

appy said...

د/علام
حبيب هارتى ابو طويله لا انا مش كتبته بس علشان كده انا كتبته لانى شايفه كده فى كل اللى حوليه
انت من النوع المحترم بجد يا محمد ربنا يكرمك وبص شوفت انت ظلمت الشخص ده ازاى هو ده اللى كنت بقول عليه منتسرعش هههههههههه

Nigro said...

عارفة يا آبي الصداقة دي شيء غالي قوي
و نادر كمان
أنا مش عارف ليه؟
بس النفوس مبقتش وحشة
دي بقت زبالة
كل واحد فاكر انه عايش لوحده
و ماشي بمبدأ
أنا و من بعدي الطوفان
شغل يهود
بالنسبة للبنت اللي تسيب صاحبتها علشان ولد
أو الولد اللي يبيع صاحبه علشان بنت
أو لأي سبب تافه
دول أغبيا
و الحياة و الزمن هايعاقبهم على غبائهم ده
الحمد لله على نعمة الصداقة

محمود المصرى said...

بسم الله الرحمن الرحيم

هى الصداقة مسألة مش سهلة يعنى زمان قالوا ان الخل ( الصديق بالفصحى مش الخل اللى بتحطوه على السلطة ) الوفى من المستحيلات الثلاث , لكن ممكن اوى تلاقى صديق حقيقى او اتنين بالاكثر طول حياتك لو اكتر من كده مايبقوش اصدقاء حقيقيين والباقى صنفهم براحتك , زملاء معارف اخوة اى صنف اخر .
بالنسبة بقى للعرض السخى اللى عرضتيه فى اول التدوينة انا هاطمع فى ان حضرتك تكتبى تدوينة عن فلسطين انا بقالى كام يوم ادخل المدونة عندك على امل انى الاقى تدوينة عن فلسطين لكن للأسف مالقيتش ياريت تكتبى فى الموضوع دا وحتى لو اختلفنا فى وجهات النظر مش مشكلة .
ولو حصل حاجة انا عليا العيش والحلاوة .

د/اجدع بنوته said...

مش عارفه بما ان اغلب وضع الخيانه

انت وانتى بتكتبى عرضتى انه ابطاله بنات

معرفش انتى قاصده كده ولا جت باى لك

البنات صعبين اوى ف صداقتهم

يعنى كل 50 بنت ماتلاقى صديقه تستاهلك

كل 50 ولد تلاقى 45 ولد رجاله واصدقاء بجد

البنات بتغير م بعض

بتحقد ع بعض

بتعيش وتكدب ع بعض

الولاد مع بعض رجااااله

ولو اتخانقوا تلات دقايق بيتعاتبوا

والدقيقه اللى بعدها بياكلوا سوا

البنات لو اتخانقت 6 شهور قطع علاقه

كل واحده تطلع اسرار التانيه اللى عرفتها

للشعب كله

وبعد ال 6 شهور يرجعوا تانى

مركبين ماسكات جديد لبعض

وكل واحده مستنيه تنتقم هى الاول وتفوز

يتهم القرررررررف

تحياتى اابى ع البوست ياقمرايه

كائن مائي said...

السلام عليكم

استاذ دكتور مهندس / آآبى

بجد موضوع حلو اوى تسلم ايدك ودماغك العالية .

بس انتى عارفة الغير بين البنات مرض متأصل مزمن مالوش علاج.

واحسن صداقة اللي بتكون في الله ومايكونش في مصالح مشتركة

والبنات اندال وبيستندلوا مع بعض اوي ولا المرض المنتشر اليومين دول لو واحدة اتخطبت ولا هتتخطب تكتم ع الموضوع ولا كأنها اسرار عسكرية وماتصرحش بالخبر الا قبلها بيوم زي مايكون خلاص يعني الحسد هيفرتكلها عريس الغفلة .
يالا ربنا يهديهم ويهدينا جميعا

تحيـــاتى

Che The Hermit said...

قشطة بوست فى الجون
صحيح هى كل البوستات فى الجون
بس البوست دا فكرني بحاجات بتحصل حواليا
مش حكاية الناس اللى بتبيع لا لا لا لا انا معرفش حد كدا
وما بنخسرس بعض علشان بنت ولا غير بنت اصلا
بس اللى بيحصل معايا حكاية ان حد بيسامح على طول والتاني ما بيعرفش يقول انا اسف
شكله ما اتعلمش يقولها وهو صغير

اه صحيح انتى بتتفرجي على تيمون وبومبا ولا أيه
هههههههههههههههههه
تعالي نعمل جمعية محبي تيمون وبومبا
قال عيد صداقه صدوقه قال
وكمان عصارة حشرات بالكهربا
يييييييييييييع
ههههههههههههههه

تحياتي
تشي

Che The Hermit said...

اه صحيح
عندنا دكتور فى الكلية ما بيكتبش غير
سيادة اللواء الاستاذ الدكتور المهندس / عبد الله مصيلحي
والله بجد بيكتب كدا وهو فعلا كدا
فكرتيني بيه

تشي

بطوط حبوب said...

ابى
متفق معاكى فى الجزء الاول بس
فعلا البنات اندال اندال يعنى
هههههههههههههههههه
انما احنا ؟ ! دا احنا زى العثل

الفارس الملثم said...

ايه ده انتي عاملة بوست تشنعي فيه علي الولاد ولا ايه ممممممممممم

بصي يا ابي بداية بصرف النظر عن حكاية ولاد وبنات اللي يخسر صديقه خاصة لو صداقة عمر"بس المهم ميكنش الخطأ من جانب صديقه ده "
هو انسان غير مؤتمن في صداقته ..

طبعا الصداقة الحقيقية دلوقتي بقت اشبه بالعثور علي قطعة ماس حقيقية وهي امر نادر جدا ,احنا عادة بنطلق لقب صداقة علي حد بنعرفه لكن الصداقة معني كبير جدا مش مجرد شخص اتعرفنا عليه..

وبالنسبة للاشياء اللي ممكن تدمر اي صداقة او نوعية الاصدقاء الذين يحملوا هذا اللقب دون ان يستحقوه

هناك قول قلته في موضوع سابق خاص بهذه النقطة ..

احذر نوعين من الاصدقاء صديق لايأبه لمشاعرك وصديق لا يغفر لك ان اخطأت دون قصد منك

تقبلي مروري

الطائر الحزين said...

الموضوع هو ادوار واولويات

لكل واحد دورة

المهم الا يطغى دور على الاخر

وان كان هناك من يترك الاخر لاسباب تافهه

فهم لم يكونوا اصدقاء من البداية

مريحك منى من اول تعليق

تحياتى

monaliza said...

الغريب فى الموضوع ياآبى(معلش يعنى مش لازم اذكر كل وظايفك دى غيرك مش لاقى برضه نراعى مشاعر الناس)
إن الغالبية العظمى بيأيدوا كلامك يعنى كل الناس ياحرام مظلومين أمال مين اللى بيغدر ومين اللى بيخون ؟
كل الناس بتشجب الخيانة والغدر استنى انا استنتجت حاجة الناس مبتحبش حد يخونها لكن لو هى خانت عادى
ربنا يدى لكل واحد على قد نيته
بوست جميل أحييكى

Salwa said...

الصداقه شئ جميل

بس في حاجات مش هايفه بتحصل
ما ينفعش تتفوت
غدر
خيانه الثقه
وحاجات كتير

عزيزتي
من أراد صديق لا عيب فيه فالله يكفيه

وأكيد لازم يكون في حدود لكل شئ

بوستك جميل جدا جدا

خالص تحياتي ودمتى بكل خير

alexandrany said...

Dear Appy """My Friend"""
i want to give you those quots as a gift for you and your nice topic
with my all pleasure to know you.

Good friends, good books and a sleepy conscience: this is the ideal life.
Mark Twain

Never explain--your friends do not need it and your enemies will not believe you anyway.
Elbert Hubbard

Nobody sees a flower - really - it is so small it takes time - we haven't time - and to see takes time, like to have a friend takes time.
Georgia O'Keeffe

بت خيخة وأى كلام said...

انا مجروحة اوى بسبب الصداقة دى
كان ليا واحدة انتيمتى جدا
بعد الجواز بعدت عنى وانا اللى كنت بادور عليها
كانت هتطلق من جوزها انا اللى صلحت بينهم
دايما تبعد وانا اللى ادور عليها واسال فين اراضيها
لحد مافى مرة وقفت واقفة مع نفسى وقلت مش هاسال عليها لما هاشوفها هى هتسال ولا لأ
لقيتها ولا اهتمت ولا فكرت مرة انها تسال عليا
تعبت بلا قرف
رافعة راية اللى عايزنى يجينى انا مابروحش لحد
دلوقتى انا مكتفية بأختى
هى صديقتى الوحيدة
تحياتى على البوست
وبالنسبة للملحوسة اللى انتى كاتباها
ولا كأننا قريناها ماتاخديش فى بالك يعنى


سلام يا ابى
اختك خيخة

mado80 said...

آبي

ازيك

بجد الله عليكي يا آبي الله عليكي بجد ايه الموضوع الهايل ده

مش عارف أنا حسيت انه لمسني أوي يا ابي
بجد الواحد كان قرب ينسي كلمه صديق دي

الصداقه دلوقتي بقت مصالح ومنافع للأسف
يا ريتنا بجد نعمل زي ما بتقولي بجد الدنيا كانت اتغير ت كتير اوي

علي فكره أنا برضه مخنوق من الموبيل للأسف بجد تحسي انه خلانا نبعد عن بعض كتير اوي مع انه ليه فوايد كتير برضه محدش يقدر ينكرها

تحياتي ليكي يا آبي وبجد ألف ألف تقدير ليكي ولمواضيعك الجامده اوي

أنا بشكرك أوي أوي علي الموضوع ده

NIDAAL said...

آآآآآآآآآآآآآآه
الصداقة
الصداقة يا آآآآبى بقت اليومين دول ما تأكلش عيش
مش كله طبعاً ولكن الظاهر على السطح الوحشيين بس
ومش عارف اقولك ايه تانى
بس مش عارف لحد دلوقتى الاقى الصديق الصدوق الى اتكلمتى عنه
صدوق بكل معنى الكلمة

alter said...

مثل حى :
كنت واقف فى المترو طلعوا تلت بنات و لجل الحظ جم وقفوا جنبى ..
هاا تماحيك فارغة بقى
ولما واحدة منهم نزلت الاتنين مسكوا ودان بعض وووورك ووورك ووورك
دول نقوا عليها و جابوا فى سيرة البوى فريند بتاعها .. و دخلوا فى مواضيع شخصية وكل الى عملته و انا نازل قلتلهم على فكرة زميلتكم زمانها ماتت بسبب النق الى عليها من الصبح ارحموها

NIDAAL PAL said...

العزيزة / آآآآآآآبى
انا رايق الى حد ما دلوقتى يعنى هعرف اتكلم و احكى كيف ما بدى
انا قولت انى مش قادر الاقى الصديق الصدوق و ده كان لغاية فترة معينة
بس انا فيه مشكلة دايماً فعلاً بتقابلنى مع اصدقائى الى بحبهم جداً .. بس هما مش حاسيين انا بحبهم قد ايه ...
دايماً اكون انا فى وضع المتصل و صاحبى مش بيتصل و بينفض او مش باجى على باله .. طب اشمعنا هو بيجى على بالى
بيجى على بالى انى اطمن عليه وهو منفض مرة ورا مرة ورا مرة ...
زى ماقولتى . بقى حق مكتسب خلاص
نفسى الصداقة تبقى بمعناها الصح نفهمها ونقدرها

فرنسا هانم said...

معرفه البنات الماظ
طبعا
انا معاكى فى النقطه دى
وتأيد كامل منى
وتحيه لخرفانك ولسانك اللى بيعرفوا يوقفوا كل معتد عند حده
جدعه يابت
ملحوظه
انا عندى صداقات فى صالونى
تثبت بما لايدع مجال للشك
ان الخل الوفى مش من المستحيلات
لا
فى خل وفى
فين الجراج بتاع العجله ؟؟؟؟؟؟؟
كوكب بحاله مش قادره اركن فيه العجله؟

fatima said...

آبى العزيزة
بصى الصداقة هى هى سواء ولد و بلا بنت
أنا الحمد لله خدت مقالب كتير من ناس كنت فكراهم أصدقاء ...
بس اللى طلعوا بجد سندى و خط دفاعى المتين كانوا أكتر ...
ليا صديقة من أيام إعدادى و صديقة من أيام الجامعة و صديقة من الشغل ..
و حبايبى كتتييير لدرجة انى بعتبرهم برضو أصدقاء محتملين مستقبلا
هنروح بعيد ليه يا آبى
و هو المدونات دى موش صداقات برضو
ناس بترتاح لبعض
و يوم ورا يوم يتونسو ببعض
و يحتاجو بعض
و وقت الضيق يسمعوا بعض
و يعيشوا تفاصيل حياة بعض
الصداقة موجودة و بكثرة
بس إحنا اللى ساعات كتير مبنشوفهاش كويس
تحياتى ليكى يا صديقتى
المحتملة مستقبلا

الفاتح الجعفري said...

اابي
فعلا البنات عايزه تغير من نفسهم كتير او نغيرهم خالص انتي عارفه انا بحس ان البنات عاملين زي الديناصورات هايقعدوا يحاربوا في بعض ويبهدلوا بعض لغاية اما ان شاء الله هينقرضوا ويعيش العالم بقي في سلام وامان
هههههههه
بهزر طبعا
بصي يااابي اقسم بالله معلشان اي حاجه بس انا اصحابي واخواني فعلا هما اهم حاجه في حياتي ومتخيلش حياتي من غيرهم لاننا ببساطه اتجمعنا علي الله ودائما كل تجمعنا طاعه لله والله العظيم وتلاقي بينا معاني الايثار والتضحيه والبساطه عاليه جدا
----------
عارفه برضه ناس صحابي بيحكولي كانوا في الجامعه وكانوا بيعملوا تقريبا زي معرض طبعا انتي فاهمه المهم وهما بيدخلوا الحجات طلع عليهم بلطجيه كتييييييييير وقعدوا يضربوهم وكان في منهم ناس ملهاش في الخناقات وبعدين دول طلبه والتانيين بلطجيه المهم اهم حاجه كان عند الاخ انه يحمي اخوه ةيصد عنه الضرب ويلحقوا بعد الخناقه الناس قالولهم احنا مشفناش رجاله زي كده ابدا
بس متقوليش لحد لانصيف في عين الصيره
------------
علي العموم
ماكان لله دام واتصل
وماكان لغير الله انقطع وانفصل

مدونه من اجل الحب said...

حلو قوى الموضوع ده
صحيح احنا ليه بنعمل فى بعض كده ليه ميكونش هدفنا فى الدنيا اننا نحب بعض نخاف على بعض نفهم بعض من نظره عنين بعض
لما حد فينا يزعل التانى يسيب اللى وراه واللى قدامو عشان يروحلو ويفضل وراه عشان يخليه كويس
ويبقى مبسوط انه بقى كويس
هاقول جمله فاروق جويده اللى دايما بقولها
لقد اكتشفت منذ البدايه ان الحب هو القيمه الوحيده التى تستحق ان يعيش الانسان من اجلها.. ان الناس متساوون فى المال والجاه والفقر والحاجه،ولكن الشىء الذى يفرق بين انسان واخر هو ان يحمل قلبا نابضا..

ammar said...

هو البوست جميل اوى
بس يعنى لازم تهديد فى اوله
وبعدين لو عندك قلل وزير كلاشنكوف
فاحنا النووى بيتباع عندنا على الارصفه ههههههه
المهم
انا مع الرأى اللى بيقول ان الصداقه فعلا فى الله وبدون مصالح
دى لازم تستمر
ومافيش وجود للهيافات فيها اساسا
وماقرأتش الملحوسه على فكرة
وعلى رأى المثل
يابخت من بكانى ...الخ
شكرا

appy said...

نيجرو
اهلا اهلا والله ربنا يهدى الجميع والنفوس الوحشه بس انا بحاول اعمل دعوة للحب بين الناس بس ميرسى ليك


محمود المصرى
مش عارفه انت ناوى على ايه يا محمود اممممممم طيب شكلك كده هتعمل فيه مقلب بس عموما ان شاء الله مش هنختلف وعنيه ليك بس انا مكتبتش فيه لان فيه ناس كتير بصراحه اتكلمت نورتنى


د/أجدع بنوته
ازيك يا سمسمه لا خالص مش باى لاك دى حقيقه يا سمسمه والله كلامك مظبوط جدا وده اللى مضايقنى بينى وبينك مش عارفه ايه حلها وليه اساسا البنات تغير وليه عقلنا يبقى هايف كده احمممم احممم اسكتى بقى لتشمتنى التماسيح فينا

appy said...

كائن مائى
يا اهلا اهلا ايه ده انت سبت البحر يا قمر وجيت هنا ايه النور ده ..وهو اللى انتى بتقوليه ده اللى مزعلنى عارفه المفروض نبقى انقى وافضل من كده مع بعض بكتير وعلى ايه التكتيم مش فاهمه حاجه بقت خانقه ايه ده احنا بنتكلم على البنات وحش ليه هو احنا مش بنات هههههههههه نورتينى بجد يا صاحبه اعلى دماغ بأمانه


Che The Hermit
انت تعرف عدم الاسف ده بسبب الم عند اللى اتجرح وتبلد فى المشاعر عند التانى يعنى بيبقى زى ما انت بتقول كده متعلمش يقولها
وبعدين فيه ايه اه دى القابى كلها هو انا مش بقعد اذاكر كل بوست واعصر النحله والدبور اللى فى دماغى مش عاوزنى اقول القاب ولا ايه ههههههههههه نورتنى خالص



بطوط الحبوب
والله شكلك ما هتجيبها لبر وهخلع لك ضرسك ده علشان تقول عثل بجد مين دول التماسيح عثل ده حتى من اسمهم هههههههههههههه نورت يا احلى بطوط انا اقصد عربيتى علشان اسمها بطوط هههههههههههههههه


الفارس الملثم

ليه بس واللى انا قولته على البنات مش عجبك اجيبهم هنا اضربه وترتتاح ههههههه الله ينور عليك يا فارسنا


استاذى/الطائر الحزين
بعد كده هبعت لحضرتك فيكون من عندى يصحيك الصبح علشان تبقى اول تعليق اصل انت مش عارف ابو خالد حجز على الكوكب ملاقيش معاك 2 جنيه اديهم له ويسيب لنا الكوكب ههههههههههه ربنا يبارك فيك يا رب

appy said...

الموناليزا

ايه ده الموناليزا كلها هنا يا دى الابتسامات اللى هتنور الكوكب .انتى زعلانه من الالقاب دا انا بتعب لغاية لما اجيبها بجد بس والله كلامك صح بس فيه اغلبيه كويسه ..نورتينى يا سكر


سلوى

والله كلامك صح يا سلوى وانا معاكى ولحاجات اللى ذكرتيها بتكون صعبه قوى وميرسى لذوقك وكلامك الرقيق

alexandrany

صديقى العزيز بجد ميرسى على الحاجات دى وميرسى خالص انك بقيت بتنورنى هنا وحتى كده نطمن عليك
Elbert Hubbard هو اكتر واحد عجبنى ميرسى ليك

appy said...

بنوته خيخيه ام شيرى

ما هو ده بقىالصعب انك تعيشى فى الدنيا لوحدك واللى عاوزنى يجيلى عارفه لانك بكده مش هتدى هتبقى عاوزة تأخدى وعموما ربنا يخليى ليكى اختك وبعدين مش انا قولت محدش يقراها مفيش فايده طيب هتشوفى هعمل فيكى ايه هههههههههههههههههههه


mado80
ميرسى لكلامك ولذوقك ويا رب يدينا الصديق الكويس اللى يقف جنبنا ويكون نافع لينا ان شاء الله منورنى بجد


نضال

هتأكل بيتى بان يا نضال هههههههه واه من الحق المكتسب انت هتقولى عليه بس بجد فيه ناس كويسه وبيمدوا ايدهم للناس ربنا يديلك الصديق اللى تحبه ويحبك لانك انسان محترم والله بجد نورتنى يا قمر

appy said...

alter

والله برافو عليك انك عملت فيهم كده بنات رخمه انت عارف لو شوفت انا كده برخم عليهم جدا وكويس انهم معملوش كده قدامى بس ايه انت سبت الاولاد ومسكت فى البنات هنهزر ولا ايه هههههههههههههه


فرنسا هانم
حبيبة قلبى بجد انا عن نفسى حسه انى صحبتك مع ان اللى بيربطنا ببعض مدونات ربنا يخليك اصحابك وبعدين يا نهار ابيض ازاى بس مفيش جراج هى قطه الصحراء اللى عامله الازمه ى انا هرفدها من الكوكب خالص وسووووو كمان علشان هو المسئول عن المرور متزعليش


فاتيما
اهلا يا ام يوسف بس اقولك ساعات ناس علىالنت تكتب بشخصيه وهى شخصيه تانيه لو ان شاء الله بقينا اصحاب هتعرفى وطبعا انا شخصيا طلعت بصحاب حلوين جدا من النت وبلوجريه كمان نورتينى يا صديقه المستقبل

appy said...

الفاتح الجعفرى
يعنى اول زير يجى فيك كده على طول البنات زى الديناصورات على اساس انكم تماسيح صح ماشى يا جعفرى هردها لك قريب وفعلا باقى كلامك بايده وربنا يبعد عنك وعن اصحابك العين بس كنت مستنياك تتكلم عن ابو بكر وليه سمى بالاسم ده اعيط بقى لا بلاش مليش نفس نورتنى يا ابو المعارك


مدونه من اجل الحب
ايه الحب الكبير اللى دخل الكوكب هنا ده نورتينى خالص وفعلا لو اجتمعنا على محبه بعضنا ومحبه الله لا ولن نفترق نورتينى


ammar
اصل انت مش عارف فيه ناس بكون انا بكتب فى موضوع وهما يفهمومه غلط خالص ودول بيعلوا ليه الضغط موووووووت وببقى مش قادره امسك نفسى ورأيك على عنينا يا جميل

كاميليا said...

آبى الجميلة

أما موضوع جميل بشكل

بس ايه رأيك تكتبى عن اسس وقواعد الصداقة
يعنى ازاى اتنين ممكن يكونوا اصدقاء طول العمر اذا التزموا بحدود معينة تجاه بعض فى اطار الصداقة

هيبقى موضوع يجنن

تحياتى لقلمك الرقيق

كاميليا

زعقوقة said...

حبوا بعض ياولاد ...و الله تعرفي انا اكتر شخصية خدت على دماغ اللي....يتشددولها و كل مرة اقول يا بت ما تثقيش في حد و ارجع زي العبيطة اثق في الناس عادي و اخدمهم بعنيا...تقريبا العبيط بيفضل عبيط على طول مهما اتعمل فيه

و بالمناسبة دي بهديكي جزع الشجرة بتاعة تيمون :D

الفاتح اليعقوبي said...

السلام عليكم
استاذة ابي عاملة يارب تكوني بخير
والله يااستاذة حتي تكون دنيانا دنيا يجب ان يوجد الخير والشر والصح والخطا اليمين والشمال
هتلاقي الكداب وتلاقي الصادق
هتلاقي العطوف وهتلاقي القاسي
هذه هي دنيانا
ومن يتميز ففي شئ ممكن يكون مقصر في شئ اخر يعني ممكن تلاقي واحد صادق بس قاسي كده يعني


اما الاصحاب فيااستاذة اعلمي انه ماكان لله دام واتصل ومالغير الله انقطع وانفصل ،المصالح تنتهي وكل شئ ينتهي الا صاحب يذكرك ويقف معك وقت الشدة والله اني لاعلم اناس يخافون ويحبونني في الله اكثر اخي ابن ابي وامي
لان علاقتي بااخي علاقة دم اما علاقتي بااخي في الله هو الله وماعند الله يبقي ومالغيره يذهب


في مثل بلدي يقول ايه
اعرف صحبك وعلم عليه
يعني اعرفي العيب في كل شخص وهل هتقدري تتحملي منه هذا الخطا ام لا فاذا كان نعم فلا تغضبي منه اذا فعله واذا كان لا فقطع الطريق من بدايته افضل من السير فيه علي امل وهمي ثم الرجوع مرة اخري فقد اضعنا بهذا الوقت والجهد والمشاعر

واسف علي التطويل
والسلام

الفاتح اليعقوبي said...

السلام عليكم
استاذة ابي عاملة يارب تكوني بخير
والله يااستاذة حتي تكون دنيانا دنيا يجب ان يوجد الخير والشر والصح والخطا اليمين والشمال
هتلاقي الكداب وتلاقي الصادق
هتلاقي العطوف وهتلاقي القاسي
هذه هي دنيانا
ومن يتميز ففي شئ ممكن يكون مقصر في شئ اخر يعني ممكن تلاقي واحد صادق بس قاسي كده يعني


اما الاصحاب فيااستاذة اعلمي انه ماكان لله دام واتصل ومالغير الله انقطع وانفصل ،المصالح تنتهي وكل شئ ينتهي الا صاحب يذكرك ويقف معك وقت الشدة والله اني لاعلم اناس يخافون ويحبونني في الله اكثر اخي ابن ابي وامي
لان علاقتي بااخي علاقة دم اما علاقتي بااخي في الله هو الله وماعند الله يبقي ومالغيره يذهب


في مثل بلدي يقول ايه
اعرف صحبك وعلم عليه
يعني اعرفي العيب في كل شخص وهل هتقدري تتحملي منه هذا الخطا ام لا فاذا كان نعم فلا تغضبي منه اذا فعله واذا كان لا فقطع الطريق من بدايته افضل من السير فيه علي امل وهمي ثم الرجوع مرة اخري فقد اضعنا بهذا الوقت والجهد والمشاعر

واسف علي التطويل
والسلام

المفقوعة مرارتها said...

مابقاش فيه صداقة ...فيه مصلحة بس

كويس ان فيه موبايلات احمدي ربنا .. وبرضه فيه ناس مع كدة لا بتسأل ولا بتعبر

appy said...

كاميليا

حاضر يا حبيبتى انت تؤمرينى وميرسى لتنويرك هنا فى الكوكب بضيفى عليه رقه قوى بجد


زعقوقه

هدية مقبوله منك يا حبيبتى والحال من بعضه موووووووت نورتينى ليكى خروفين خديهم فى ايديك

الفاتح اليعقوبى
اهلا وسهلا فينك من زمان يا زميل المعارك
انت عارف المثل ده انا لو مشيت عليه بذمه انا شخصيا هعلم على كتيرررررررر قوووووووووى تسلم ايديك على تعليقك وبعدين طول عادى الصيف داخل والكوكب هواه بحرى ومنعش هههههههههه


المفقوع مرارتها
ااااااااه من الموبيلات وسنينها ربنا يهدى الجميع يا سكر وحماتك بالمرة ههههههههههههههه

حــدوتـــة said...

والله انتى عندك حق
والموضوع ده منتشر بين البنات اكتر من الولاد
البنات بيحبوا المشاكل ولما كنا فى الجامعة كانوا دايما متخاصمين ودى تقول دى بصتلى وحش ودى تقول دى سلمت عليا مش عارف اذاى وحاجات من اللى انتى عارفاها
سلالالالالالالالالالالام

همس الاحباب said...

دى مش اول زيارة
بس بصراحة اسلوبك شيق ومواضيعك جذابة
الصداقة حاجة جميلة جدا واسمى من اى شىء
بس فين الصداقة اللى بجد كله مشغول كله تايه كله مهموم
واللى ماشى على مبدا معرفة الرجال كنوز بس لو جت الست يروح الكنز
عامة تحياتى وربنا يصلح الاحوال
وارجو التواصل

simple girl.. ..simple dream said...

رحاب انا مش هعلق على البوست دة فى المدونة
انا هكلمك واقولك تعليقى بنفسى

بحبك يامصر said...

الصداقه فعلا شئ جميل وانا بعتبر اصدقائى من اقرب الناس لى بصراحه اكتر من اقارب كتير لى من صلة الدم الحمد لله على انه انعم عليا بأصدقاء يحبونى ويخافوا عليا بصراحه بحس بحبهم فى كل لحظه بعيشها ويارب يديمها عليا نعمه واحتفظ بيهم للعمر كله
والحقيقه الصداقه عشان تنجح لازم الاصدقاء بكونوا انتقوا بعض جيدا
اهتمامات مشتركه _فكر مشترك _اخلاق كمان
واهم شئ ينجح الصداقه خروج المصلحه من بين الاصدقاء

Anonymous said...

أختى آبى
أشتريتك غالى تبعينى رخيص والمهم البوست عن الصداقة و الأخلاص تبعينى ب 2 جنيه قولى 3 أو اربعة جنية
أخيك أبو خالد

MKSARAT SAYED SAAD said...

appy
ازيك عاملة ايه
الصداقة انا معاكي انااتشوهت من ناس كتير لكن زي ما في الوحش لسة في الحلو
ممكن يكون الحلو قليل لكن عزائنا انه لسة موجود
تحياتي

شريف طلال said...

بجد انا ليا صديق من ايام زمااان لما كنا عيال صغيره بنلعب فى الشارع و لمؤخذه و حتى الأن لما بقينا شحته بنقف جنب بعض وقفاااات و من غير اى مصالح
اكتر من اخوات
و دى الحمد لله بتبقى حاجات نادره و كويس انها حصلتلى
شكراً ليكى على الموضوع الجامد ألى على الجرح ده
تحياتى

3ala asm masr said...

مش عارفه ارد عليكى فى الموضوع ده اقولك ايه بس بجد انا اتصدمت فى كل بنت صاحبتها وكلهم كانوا اصحابى اوى ودلوقتى معنديش اى اصحاب غير زمايل وبس وشكرا اوى على كده العيب فى مين؟
مش عارفه بس والله انا بحاول مظلمش حد

mabioon said...

بجد بجد الموضوع ده مهم جدااااا
كتير من الناس فاكرين ان موضوع الصداقه ده سهل وبسيط وانها علاقة شغل او دراسة او جيران وخلاص
الصداقة حاجه اكبر من كدا بكتييييير انا متفق معاكى فى ان محدش دلوقتى بقى بيخلص لصاحبه انا عن نفسي واحد صاحبي باعني عشان واحده بعد ماكنا اصحاب 9 سنين ومن ساعتها بصراحة مش بثق فى حد خالص
انا طولت عليكى :) بس انا بصراحة مقدرتش ما اتكلمش

كلاكيت تانى وتانى said...

أبى
أنا فهمت من كلامك أن الصداقة أنتهت بس الحقيقة أن فية صداقة بس الناس مش بقى فيهم كتير ممكن يكونوا أصدقاء وهى دى المعضلة الحقيقية
بالنسبة لى ياستى أنا برحب بيكى صديقة عزيزة وأعتقد بيننا معاد الجمعة مغ قطقوطة ياريت تنورينى وتلاقى وقت تكونى معانا فية
أما الملحوظة الأخيرة فأظن أنها رسالة من تحت الماء لا تعليق عليها لأنها منك ألية والية فقط
تحياتى

زى الهوا said...

الصداقة الحقيقة موجودة , بس المشكلة مش فى المصلحة وبس , لأ وكمان الدنيا تلاهى , ممكن الدنيا تلهينا عن اصحبنا بحكم الانشغال فى الشغل وبالتالى نادرا ما بنسأل عن بعض وبالتالى بنبعددددددددد عن بعض تدريجيا , والصداقة تتفكك لأن اللى فينا هتبقى محتاجة التانية مش هتقدر انشغالها , بس تقريبا هيه دى كل مشكلتى فى الصداقة

appy said...

حدوته
ايه العنصريه دى اه هما البنات شويه دماغهم بتقفل بس برده الاولاد وحشين فى خيانتهم ولا ايه نورتنى يا اجمل حدوته


همس الاحباب
شرفتنى زيارتك قوى وان شاء الله يكون فيه تواصل


شاهى
ههههههههه تليفون طيب كويس انك لسه فاكرة نمرتى


بحبك يا مصر
ربنا يخليهم ليك ان شاء الله ونرتنى دايما بحبك لمصر فى كوكبى

appy said...

اخى العزيز والصديق الغالى /ابو خالد

هو انا اقدر بس اصل حضرتك قولت من المرة اللى فاتت هتحجز على الكوكب فقولت الم تبرعات وادفع الدين اللى عليا وكان اول تبرع هخده من أستاذى الطائر الحزين عاااااااااااااااا طيب اعمل ايه منكن توعدنى انك متحجز على الكوكب بتاعى وانا ممكن ااجرة لك مفروش او قانون جديد
عااااااااااااااااا
انت حضرتك عارف انى بهزر طبعا وحضرتك عارف انت واستاذى الطائر الحزين وعصفور المدينه وفرنسا هانم وناس كتير قوى من الاشخاص اللى بيسعدنى وجودهم والكوكب من غيركم ولا يسوى اى حاجه

appy said...

سيد مكسرات
بص يا سيد انت نفسك شايف لما سووو طلب صداقه وتعارف الناس الناس عملت معاه وكام واحد راح وكام اعتذر وكام معبرش مبقاش فيه وقت نورتنى .ايه هو انت كل مرة هتيجى ايديك هتبقى فاضيه مفيش هديه كده مش احنا اصحاب ههههههههههه


شريف طلال

ربنا يخليكوا لبعض وميرسى لذوقك

على اسم مصر

الحال من بعضه تقريبا يا حبيبتى معلش بس انا لسه عندى امل نورتينى يا قمر


mabioon
انت اتكلم براحتك الكوكب هنا مفتوح لكل الاراء وعلشان دى اول زيارة ليك لك هديه عندى خروف خده فى ايديك وانت ماشى ههههههههههه نورتنى

appy said...

كلاكيت تانى
اهلا بيك والدعوة وصلت ليه ربنا يخليكى ان شاء الله اجى بخصوص الملحوسه انتى بقى قريتيها ليه هاااااااا مش انا قولت محدش يقراها ههههههههههه هى فعلا رساله علشان انا غلطت بس نورتينى يا قمر


زى الهوا
والله كلامك مظبوط المشكله اننا كمان مبقناش قادرين نحل مشاكلنا يا جماعه بجد نورتينى وهواك زاد الكوكب جمال

الربان said...

تحياتي

دائما ما نجد كل ما هو جديد في هذا الكوكب الجميل...

في رأيي ، ان التجارب غير السارة التي قد يمر بها البعض في مرحلة التنشئة الاجتماعية بالاضافة ما قد يكتسبه من تجارب في حياته اليومية بعد الاعتماد علي النفس...قد تكون هي السبب...

علي سبيل المثال...الفتاه الصغيرة حين
تسمع احد الجيران يبوح بسر ما الي و الدتها...ثم تجد الام تفشي هذا السر الي
والدها...او اختها الكبري...ماذا يكون
انطباعها؟ بالتأكيد ستعلم ان هذا عادي و سلوك لا غبار عليه.

أيضا اود ان أضيف ، ان البعض ثقته
بنفسه ضعيفه...و لهذا قد يخشي من الاخرين ...

تحياتي و ربنا يبارك لك في بابا وماما
و الاسرة.

دمت بالف خير

أوشــــــه said...

مافيش صداقه صادقه بجد
لأن معظم اللي بنقابلهم في حياتنا مفروضين علينا بحكم التواجد في مكان واحد
بنتعود على بعض فنمشي مع بعض وقال ايه أصحاب
بس مع أول موقف أول مطب أول مفترق طرق كله ببقى فركش طالما مافيش مصلحه مشتركه أو مكان مشترك بيجمعنا

الصداقه الحقيقيه زي الحب الحقيقي بالظبط اصبحو عمله نادره كأصحابهم.. وربنا يوعدنا
مواضيعك نار كالمعتاد
تحياتي

appy said...

الربان
ميرسى خالص الكوكب جميل بوجود حضرتك فيه دايما وبيزيد بكلامك بجد


اوشه
فعلا ويا رب الناس تفهم كده نورتينى يا سكر

حسن حنفى said...

ووالله بجد الموضوع ده جمييل جداا

واثر فيا كتير

الصديق لازم يسامح صديقه

ان شاء الله انا مسامحه خلاص

شكرا لحضرتك كتييير