سيبوا الديل بقى وامسكوا فى الراس

تحديث تاني :- فيه صيغه عند محمود رئيس جمهوريه نفسي حد يعرف يزود او يترجم يروح ويعملها بلييييييييز


تحديث :- علشان نختصر اللى عنده نقطه ممكن يقولها او جمله حتى نكتبها يقول واحنا نجمع ايه رايكوا كده اسهل علشان يبقى كلام كتير ونبقى كلنا ساعدنا


انتباه كله يقف صف واحد

دلوقتى اخونا البعدا الاسرائليين اللى ربنا ياخدهم بيخططوا مع الحركة العسكرية الاسرائية ضد غزة نشاط اعلامى يهودى بكل صورة لتقديم اسرائيل فى صورة الضحية المضحيه المدافعه عن نفسها فى فكرة دلوقتى فى اول التنفيذ ليها وهى ببساطه تجميع ايميلات الهئيات والمنظمات الدولية سواء كانت رسمية او مستقلة ومخاطبتها بايميل مكتوب باللغات الانجليزيه والفرنسية ولغات تانيه لو امكن وارسال الميل ده من قبل اكبرعدد من مستخدمى الانترنت لتوضيح حقيقة الوضع فى غزة
حاليا الفكرة فى طور التجهيز مطلوب حد يكون قادر على شرح الوضع فى صورة مبسطه وبطريقه كويسه وواضحه بكل تفاصيلها عن اللى بيحصل فى غزه وبعد الانتهاء من الميل ده ترجمة الميل وحاليا بنجمع ايميلات الهئيات الدولية لو فى اى حد عنده القدرة على المساعده باى حاجه
وبدل ما هما نجحوا انهم يخلونا نسيب الراس ونمسك فى الديل يبقى جه الوقت اللى نقول لهم لا احنا صاحين وفايقين جدا علشان هما نجحوا فى انهم يخلونا نقول مصر هى السبب لا حزب الله لا حزب وداد قلبى يبقى لازم نقف ايد واحده ونضغط بطرق تانيه ونبطل بقى لو سمحتوا اللى بنعمله وشويه مصر وشويه زعبوط العفريت لان ده مخططهم اننا نتلهى فى بعض ونقعد نشجب وننتحر من على السجاد وانا السجاده عندى دابت بصراحه

اللى عاوز يشتغل فى الفكره عنده الكومنتات او ايميل محمود رئيس جمهوريه نفسى


m.fawey@gmail.com


حكمه الامبراطورة

تعيش الوزة العربيه وهى بتكاكى


رساله الى مصر



مقدرتش الومك يا امي

مقدرتش اقف قدامك وانا نايمه ودموعي على خدي

مقدرتش الومك وانا بردانه وبنام مقهوره من ظلم اخواتى

عارفه خوفك عليا عارفه انك بتحاولى تحمينى

بس يا امي الحمايه مش انك تقتلي اخواتى

احمينى من غير ما تجرحيهم

احمينى من غير ما تكوني الايد اللى بتدبح

خبينى جوا حضنك مهما قسيتى عليا انتي امي

مقدرتش اتكلم وانا بشوف اخواتي بتموت قدامي

قاعده بكتب ودموعي على خدي

مش قادره اشوف الحروف من الدم اللى على ايدي

ايوه يا امي دم اخواتى على ايدي وانا مدبحتش

بس سمحت مقدرتش اقف معاهم صوتى اتخنق جوايا

صرخت مبتسمعنيش قفلتي قلبك وعيونك عنى

يا امي انتي مبتحمنيش كده انتي بتقتلى انسانيتى
انتي بتفقدينى الوعي من غير ما تدري
مقدرتش اقول انك مش امي
ومش هقدر يا امي خالص مش هقدر اقول انى مش مصريه
بحبك بكل قسوتك بحبك بكل جحودك
فاكرين بيحموني وهما بيقتلوني سيبى اخواتى يعيشوا
نظمي حياتنا وحياتهم
عجزتينى وانا فى عز شبابى
دبلتى ورده حياتى وقلبى
قلبى كبر قبل الاوان حرام الظلم يا امي
حرام
حتى لو هما قسيوا افتحي انتى حضنك
ارجوكي افضلى الكبيره ارجوكي ابقى ماما الكبيره
اوعي تقفلى عيونك عن الدم
عن دموع وصرخه طفل وشاب وام زيك
هما غلطوا وانتى قدمتى الكفن ليهم
ليه يا امي لي
مقدرتش اشوفهم بيتقتلوا مقدرتش اشوفهم جعانين
واشوفنا بنعتقل ونتخرس وبنقطع فى بعض
مقدرتش اشوف الكلام مقدرتش اعرف الغلط فين
او يمكن شايفه ولساني مش مطاوعنى والدم على ايدي مخوفنى
ضمينى تاني وامسحي الخوف من قلبى
ارجوكي يا امي
ادتيهم فرصه للمزايده وهم كسبوا


يا ريس اطلع بقى وقول حاجه قبل ما نطلع من هدومنا وساعتها اوعدك انك مش هتقدر ترجعنا تاني يا ريسسسس انطق بقى قول اي حاجه بجد وارحمنا من ابو قردان واخواته اللى بيطلعوا يكسفونا اكتر واكتر ملعون ابو الغباء والاغبياء بقى

ملحوظه البوست اللى قبل ده هرد على تعليقاته بس والله مش قادره يوم ولا حاجه وهرد واللى عاوز برضه يكمل تعليق عليه يعلق



I'm so tired of being here....فعلا دي الحقيقه


من اصعب لأصعب يا قلبى لا تنقهر

الصورة من مدونه الفنان محمد عتــــلم


تحديث تانى :- اقروا البوست من عند ادم مطلوب نقل دم فى الاسماعيليه للجرحى بتوع فلسطين ومكتوب طريقه السفر يا ريت اللى من الاسماعيليه او يقدر يكلم حد يبلغه البوست هنا


تحديثث:- اللى اتكتب عن التدوينه البيضاء فى اليوم السابع انطح يا ريس شكرا لمحمد
على فكرة هو صاحب مدونة جاست هيومن كمان وهو اللى اتصل وسالنى فى الموضوع بس والله قولت له اسماء ناس كتير مكتبهاش ليه بقى حد يفكرنى ابقى اعلقه على باب الكوكب


اصعب حب


هو اننا يوما نحلم بأشياء لا نستطيع ان نملكها
وان نحب شخص ليس له وجود الا فى خيالنا
ولكننا نأمل فى يوم ان يتحرك القلب بداخلنا
ونحب ونعيش ويرانا



اصعب دموع


هى دموع قلب


القلب الذي لا يستطيع ان يبوح


بما فى داخله لمن يحب


ويبكي ويداري هذه الدموع


والاصعب ان من تحب لا يري هذه الدموع



اصعب جرح


هو جرح حبيب لا يشعر برعشه قلبك

عند لهفتك على عينيه واحضانه


ان يصبح حضن الحبيب سجن من الالم


ان تصبح الكلمات بيننا ليس لها معنى


كانت دى اصعب لحظات فى حياتى من فتره من الزمن ولكن اكتشفت ان اصعب لحظات فى حياتى ملهاش علاقه بده ابسلوتلى واكتشفت انها

انى اشوف دموع قدامى ومقدرش امد ايدى امسحها

انى اشوف طفل واقف فى اشارة ومعرفش احميه من اغتصاب وسرقه وبرد وحر


انا اقف عاجزة كما القطار للى واخد شالوت امام حكومه عامله زى المنشار طالعه واكله نازل شاربه من دمنا ومنشار كهرباء كمان


ان تأتى طعنات خلفيه من اشخاص ليس لهم وجود فى حياتى والاصعب انهم بيعتقدوا انهم انتصروا عليا والاصعب والاصعب اني اشفق عليهم والنبى حونينه طول عمرى


انى اشوف ناس بتنساق وراء افكار خزعبليه هلاميه قشوريه جمبريه ومقدرش اقولهم اقفوا فكروا بعقل شويه فكروا يمكن حالكوا يتصلح ومتمسكوش النار باديكوا فكروا هتعرفوا الصح فين بس بخاف برضه يفكروا يدخلوا فى شجره بدماغهم وابقى جنيت عليهم


اكتشفت اصعب لحظات حياتى لما بشوف الناس حوليه مبقتش تضحك زى الاول ولا عارفه تحب ولا عارفه تعيش ووصلنا لمرحله اهى عيشه والسلام ونسينا كلمه عاوزين نعيش عيشه كويسه محترمه والاقى كلام فى عيون حبيب ومش قادر يقول ولا يتكلم


اصعب حاجه اكتشف انى فى حياتى شخصية غبيه ان ان تش ودى بتكون صدمه اوى لان مبعرفش اتعامل مع اغبياء سواء بنات او رجاله وبجانب الغباء اللى هابط عليهم كدابين ومنافقين ومنفسنين على نفسياتهم المنفسنه


اصعب صدمه انى اكتشفت ان الاخلاق بتتجزأ عند الناس عن نفسى مقدرش اشوف واحد بيشتم واحد او بيقول عنه كلام وحش واروح اتعامل معاه اكتشفت ان فيه ناس عادى عندهم طيب ما هيجى يوم والشخص ده يضرك لا هما بيهمهم مصالح شخصيه اولا واخيرا

اه كمان حاجه صعبه اوى لما كل شهر اروح للميكانيكى ويبقى ده الواجب المقدس للست بطوط هانم بتوجع اوى هئ هئ هئ

انتم بقى ايه اصعب لحظات فى حياتكم كل واحد يدخل يقول ونعتبرها اعترافات ليليه يمكن نعرف فى السنه الجديده نتغلب على اللحظات الصعبه اللى بنمر بيها فى حياتنا ونكسر وراها قلل وانا هورد لكم القلل دى
كان معكم من داخل اذاعه اعترافات ليليه لواء طيار جناح فرخه ابى هانم

حكمه الامبراطورة

الحقيقه ليست مُطلقه ولكنها موقوف حالها


التدوينه البيضاء


تحديث:- يا ريت اللى اشترك فى التدوينه البيضاء يدخل البوست اليتيم اللى تحت ده ويقولى علشان بنعمل حصر بيهم علشان نعرف العدد لان دي اول سنه الموضوع يبقى عليه اقبال كبير اوي وعلقوا بقى على حل الفزروه الكومنتات تحت فيه ولا انطح بقى

فزورة الفأر المسلوخ


تحديث:- ميرسي لكل اللى عمل يوم التدوينه البيضا بجد انا مبسوطه اننا اتجمعنا فى حاجه كويسه واليوم السابع هتكتب ان شاء الله عن الموضوع بجد مبسوطه اوي اننا اتجمعنا فى عمل كويس ويا رب يبقى بنتيجه شكرا استاذ احمد شقير



بما انى حد عاقل جدا فى بعض الاوقات وليس من عاداتى الدائمه انى اكون هذا كلا وحاشا وفاشا ومسك كل حاجه بالكماشه فقد قررت الفتره الماضيه عدم قراءة اى اخبار بترتر فى اى مكان
بس على غير العاده طلعت عيله وقريت ويا ريتنى ما قريت يا يونس يا خويا
لقيت الخبر ده انا هجيبه كله بصراحه علشان مقولش انطح ومحدش ينطح وتنطحونى انا

القاهرة - محرر مصراوي - شدد جمال مبارك الأمين المساعد ورئيس لجنة السياسات بالحزب الوطنى، على ضرورة التركيز في مراجعة تنفيذ مشروع توشكي على أرض الواقع، بدلاً من التقارير الورقية المكتوبة، مطالباً المواطنين بمحاسبة الحكومة والحزب الوطني على تنفيذ تلك البرامج

طيب سيبونى طيب بجد محدش يمسك فيه وانا هفهم انا مثلا بقول لواحد حل المساله دى واحده زائد رجل فرخه وودن كلب ورجل فار مسلوخ يساوى كام

اللى يعرف يحل المساله دى يحل اللى الباشا بيقوله يا جماعه

يا فندم انا معاك قلبا وقالبا وكوارعا وامعائا دقيقه فى انى احاسب الست نسيبتكم اللى هى الحكومه الرشيده النظيفه بنت العز واكل الوز بس ازاى وبعدين اوعى ترجع فى كلامك الراجل مش بس بكلمته الراجل براعيته لبقرته وعزبته

وحضرتك يا فندم مشروع توشكر ده بقالنا 100 سنه فيه ومفيش حل طيب احاسبهم ازاى

بص يا هندسه حضرتك فكرتينى باغنيه كلامنجى بتاعت الواد اللى بيغنى فى القطر ده

طيب يعنى اجيب ورقه وقلم واروح احاسبهم وبعدين حضرتك تانى بتتكلم عن الشعب

اى شعب بس ده اللى بيلف من شارع تانى علشان ميحركش قالب طوب من قدامه ويحاسب ازاى

بص بقى حضرتك يعنى بما انى صاحبه مرض وبطوط مطلعين عينى غير الكلاب الضاله غير الكمين اللى تحت البيت عندى

انت قولى على الطريقه واوعدك وعد اشرف عبد الباقى اروح على طول احاسبهم وهجيب لهم معايا ابو ورده وامها وعيلتها

فياكينى وفيكوناتى رفقا بى وبحالتى الرجاء على كل من يحل فزورتى يرسلها اللحزن الوثنى ويقوله حل فزورة ابى هانم

اسهل بكتير من اللى انتم بتقوله
يا ناس كلموا الشعب بلغه يفهموها الله يكرمكوا يعنى ويوعدكوا بشقه فى مساكن
الزلزال وتركبوا عربيه 127 زى باقى الشعب وربنا يرضي عليكوا يا رب

ارحمونا بقى
وعلشان بس اكون تييتوقراطيه زى ما حضرتك علمتنا فعلا فعلا موضوع الصرف الصحى وتغطيه

المصارف بتكلف كتير وفعلا رمى الناس للمخلفات بتاعتهم فى الترع والمصارف بتكلف
بس والله حضرتك انا شوفت

ناس بعد ما اتقفل المصرف ده عملوا جنينه قدام بيوتهم وبقت حاجه تفرح اى والله

وحضرتك برضه بقالكم يعنى 20 سنه بتصلحوا فى وصله من بعد ميت غمر لغايه بلد اسمها صافور حضرتك كاوتش العربيات النقل باظ منها 20 سنه حضرتك بلا مبالغه والطريق ده متعدلش فيه عود حطب حتى

يعنى يا فندم عفاريت الاسفلت الكاوتش العالى يعنى سواقين القطش اللى مبتغلطش والنقطه دى حايرة طايرة
اتخنقوا خنقه الدبدوب الميت يبقى اللى زى حالتنا يعملوا ايه بس

يا ريت حد لو فهم حاجه ينوبه ثواب ويفهمنى بجد

تفجير :- متنسوش التدوينه البيضه بكره تاخدوا اللوجو وتكتبوا العنوان التدوينه لبيضه وبس خالص تسبوها كده

كان معكم سواق قطش لواء اركان حرف ابى هانم


حكمة الامبراطورة

اللى يجيبه العويل يشربه




تونس


تحديث هام جدا جدا:- منها لله سمكه القرش الرخمه اللى كان اصلها فسيخه ومتنكره اللى قطعت الكابل خلتنى يفوتنى حدث هااااام اي نعم حدث فى حياه البشريه جميعا حدث مريع شنيع فزيع الا وهو عيد ميلاد محمود رئيس جمهوريه نفسي النهارده 12-20 كل سنه وانت طيب يا نحنوت وانت المحامي بتاع بلوج سبوت واخواته وعماته وانت اطيب قلب واجدع اخ فى الدنيا ربنا بعته ليه ولناس كتير بيحبوك اوي بصوا بقى محمود لسه سايب عيد ميلادي اخر حاجه عنده فى البلوج انا هحط له تورته هنا بتاعته وانتم رحوا كلوا من هناك

الا سؤال يا نحنوت مش ملاحظ تزامن غريب من عيد ميلادك يقطع النت شوفت عاوزينك ترجع يا ريس وتحارب بقلمك النظيف الاشرار كل سنه وانت بخير يا رب
كملوا بقى البوست بتاع تونس وعاوزه مشاركه بجد كل اللى هيشارك يقولى الموضوع سهل جدا



تونس ... يوم التدوينة البيضاء

=============================



ورسالة إلى السيد عمّار 404


ActionNoteBlanche
يوم التّدوينةالبيضاء
ActionBlankPost

قبل عامين وبالتحديد في يوم 25 ديسمبر 2006 قام المدونون التونسيون بأول إعتراض سلمي على الإنترنت بعد حجب مجموعة من المدونات التونسية على شبكة الإنترنت ، وتمثل الإعتراض في قيام المدونين التونسيين بنشر
تدوينة خالية في يوم 25 ديمسبر تحمل شعار يوم التدوينة البيضاء ، وقد تضامن معهم في هذا الوقت كثير من المدونين المصريين بقوة وبنفس الفكرة ، وتكرر يوم التدوينة البيضاء في نفس اليوم عام 2007 نظراً لإستمرار سياسة الحجب في تونس ، وللعام الثالث على التوالي تقوم المدونات التونسية بإستكمال الإعتراض السلمي بيوم التدوينة البيضاء الثالث في 25 ديسمبر 2008





ومثلما نحن في مصر نرمز للمرأة المصرية أحيانا ببهية وأحياناً بليلى ، فالمدونين التونسيين عندهم شخصية
عمار 404 هذه الشخصية ترمز للرقيب الخفي الذي يقوم بمنع هذا المدون أو تلك المدونة اللتي لاتعجب سيادته بضغطة زر بل قام مؤخراً بحجب لموقع الفيس بوك من الإنترنت التونسي ، والمدونين التونسيين يطمعون في مشاركة المدونين المصريين هذا اليوم ، لما لمشاركتهم من تأثير قوي سواء إقليمي أو عالمي لإيصال صوتهم بعدما أصبح التدوين المصري مثالاً للمدونين العرب ، وقد كان التدوين المصري حاضراً بقوة ومُرحباً به في الفعالية الأولى



شعار عام 2007


وهذه دعوة لجميع المدونين المصريين والعرب من أشقائهم في تونس بمشاركتهم هذا اليوم ، لذلك عزيزي المدون المصري والمدونة المصرية إذا لم يكن هناك تدوينة خاصة لك في يوم 25 ديسمبر 2008 ، فكل ماهو مطلوب منك نشر تدوينة خالية بعنوان يوم التدوينة البيضاء وعليها أحد شعارات الحملة التي يمكن أن تنتقي أي منهم من هذا الموقع



فلنتحد جميعاً معهم على حذف العبارة السخيفة التي تقف ضد الحق في حرية الحصول على المعلومة والتي تحمل في وجوههم عبارة ... خطأ 404

لاتنسوا موعدنا ... الخميس 25 ديسمبر


يعنى من الاخر كده وعلشان محدش يسال كتير يوم 25 هنعمل ايه نحط الشعار من دول او تختار وتكتب التدوينه البيضاء كل الموضوع لمده يوم واحد ها كتير اننا نتشارك مع الناس فى طلبهم ولا ايه ويمكن ده يبقى اسلوب حلو لتجمع الناس فى هدف واحد وفكر واحد بدون تخريب ولا حد يعتقل ولا يتعلق من ودانه

على فكره عجبنى الموضوع السلمي ده اوي وعجبنى وخلانى اتفشخر موضوع ان الاخوه التونسيين مؤمنين قد ايه المجتمع التدوينى المصري بياثر وده كويس اوي واتمنى اننا نبقى قد الثقه دى كلنا فى النهايه

بصوا بقى زي ما لقيت بلوج سبوت تحول لشوز سبوت عاوزاه يبقى كله وايت سبوت ده


ملحوظه :- البوست منقول من عند الاستاذ احمد شقير وانا بشكره علشان سمح ليه بنقله كوبى وبست

كان معكم ابى هانم بتنجانى من امام الاستاد بتونس

حكمه الامبراطوره

التكبر على المتكبر تواضع




هسهسات ليليه


عندي مقدره غريبه من تحويل حياتى الكئيبه الى مطارده بين قط وفار فى توم اند جيري ..في مواقف كوميديه
ومن محاوله الانتحار ليلا من فوق السجاده بتاعت الانتريه ، او من فوق سريري العزيز ، الى رقصه على جسد الكلاب واتحول انا لاسد ولكن ليس له انياب ...
اكبر فى العمر ويصغر قلبى فى السنوات ! اتحول لطفله غاضبه وتكسر كل العابها فى لحظه وفى نفس نفسيه اللحظه تبكي عليها وتحاول ان تلمم ما تبقى منها من مسامير فى محاوله فاشله لتحويلها للعبه مره اخري ، ولكن هأوات وهيهات .. ان تتحول المسامير الى لعبه كامله او شبه اللعبه التى اعشقها وأظل مع الذكريات الخاصه باللعبه
واسال نفسويتى بقلبى الطفولى هل تعود اللعبه ؟
اري فى ايامى هذه الكل ينتحر بوضع اقطار جمع قطر بيقول توت توت ، فوقه ولا اعلم السبب ولكنى ! ابيت ان اضع هذا البتاع وعديت عليه انا ... وبما انى باخد بالى من كل كبيره وصغيره والكل كليله فدماغي لسعت ابلاتين خلاص وقررت انظر للمواقف بنظره تانيه او تالته او حتى اتنين وتلاتين ... وكما قال صديقى يا استنجالينا برتبه عميد لن اخذله هذه المره واكون قد حمل اللقب والذهاب به الى الشعله واشعال طريقى

ازاي قولتوا لي ازاي... اي والله ما انا عارفه الحبه الل فوق دول ايه معناهم بس اهو كلام تقيل من اللى بنسمعه ومن كتر قعدتى قدام التلافزيون الملعون والهسس اللى جالى فجأه تحول بلوج سبوت الى شوز سبوت بسبب ما فعله الصوحفى العراقى وتقديرا للموقف وفقع المراره التى اتتني من تحويل الموضوع الى طائفيه واحراز اهداف وكأن ابو تريكه بيلعب وتناسوا انه شخص عبر عن غضيه فقط بصوره او بأخري سواء كان التوقيت صح ام لا ولانها اول مره تحدث فى تاريخ ام البشريه وبعد القبقاب دخل الشوزالتاريخ وبعيدا ايضا عن المجانين العرب اللى بعتوا يشتروا الشوز بملاين ونسوا شعوبا جعانه وتتالم فى كل مكان وبعيداايضا عن نقل الخبر بين الناس والبلوج سبوتيين وتضارب الاراء عن كونه عمل بطولي الى البعض الذي قالواانه عمل غير محترم

الى تعليق بوش بانها مجرد شوز مقاس10 وبرغم كرهي له كما كرهي للسبانخ والارانب ففعلا ثبت انه عنده ثبات نفسي وسياسي غريب الله يلعنه اكتر ما هو وده صعب يكون عند حد بجد وخاصه لما يكون سياسي منيل زيه

اكتب عن الحدث التى لا اقلل من شانه بطاطا البطه ولكن اى .. بط بالانزليجي يا مرسي لى عده تساولات مستهويانى زي البرد ايه رايكوا نلعب لعبه حلوه بلاش اقول اسئله علشان ملاقيش نقص فى السوق بسبب الشوزات علشان عارفه انى هلاقى كل الناس بتحدفنى بيها نبتدي اللعب لتشغيل مواتير الادمغه

واحــــــــــــد
======

لو لسه بوش افندي فى الحكم ومطلعش الصحفى هيعمل كده ؟ ويرميه بالشوز ولا مش هيقدر

تنتيـــــــــن
======

لو اتصلت بزيرو تسعميه تلات وزات وطلع ليك صوت بنت تفك صواميل صاروخ موجهه ارض جو
وقالت لك كسبت معانا خمس شوزات هتحدف مين بيهم

تلاته يا ريس
=======

لو طلب منك تمنع نفس الخمس شوزات اللى حدفهم زميل ليك وتبقى حائط صد عن خمس حدات مين الحدات دول

اربعه زي ذوات الاربع
==========


ايه طريقه تعبيرك عن غضبك فى حاله انك اتحبست اتلسعت على قفاك احتليت من قوات كفرالبطيخ الغاشمه واوسعتك ضربا رميا بالبطيخ وبقت ناس مش ولابد وزودت العيار وضربتك بشمام وقرع عسل

خامسا فى عين العدو
=========

تفتكر تعمل ايه لو قرروا منع الشعب او الصوحفين من دخول المؤتمرات بالشوزات ؟ولموا القباقيب من المساجد اعتبار واسوه بما حدث مع شهيده القباقيب شجره الدر هانم وذكاء منهم كى لا يواجهوا نفس المصيرالمظلم
ايه بقي هيكون شكل الناس وهما دخلين بشبشب بلاستيك؟ وهل هذا يؤثر على صناعه الصين وازدهارها فى تصنع البلاستيك حتى فى شباشب الحمام حفظكم الله وراعكم ؟ وهل سيؤثر على شكلنا فى تصنيع اى حاجه او ستيرادها حتى البامبرز من الصين

السادس على الجمهوريه
=============

تفكروا لو الصوحفى مش شيعه كما يقال كانت الشوز صابت بشبوشه ام انه من الافضل ان يكون يمينيا متطرفا او وسط مع هز الوسط كي تصيبه ام ربرالى متحرر فاصابت الجون الخلفى او حتى الاتفاقيه اللى هتنتهي فى 2011 وهل مقاس الشوز كان له علاقه بالهدف

هذا وبالله التوفيق وعلي كل من يقراهذا البوست المنيل المهيس قلع الشوز بتاعه خارج الكوكب والدخول حافى كما ولدته امه والا ساترككم لخرفانى تنطح فيكم زي ما هي عاوزه

كان معكم ابي هانم بتنجانى من امام مطارالقاهره لاستيراد جوز شباب ماركه اديله مترحمهوش

حكمه الامبراطوره

لا تعايرنى ولا اعايرك دا الهم راكبنى وسايبك

اخبار بترتر

تحديث لاخر مره :- يخرب بيت التحديثات انا اللى عملت كده فى نفىسي وبقيت مؤدبه من الاول هشيل الالفاظ اللى بتجرح فى السيد ال.... شيخ الازهر بناء على طلب ناس بحبهم علشان بس ميزعلوش ودي اخر مره كلمتى هتنزل الارض وبرضه زعلانه منه ها بفى

تحديث تانى :- والنبى كلفوا خاطركوا واقروا اللينكات قبل ما حد يدخل يرد علشان يفهم انا اقصد ايه مش كل شويه هدخل اقول بجد انا تعبت وللتوضيح بس علشان مش عاوزه كلام من حد انا لما بنقد شيخ الازهر بنقد تصرفه لما قولت عره ااقصد التصرفات هو كشخص انا مبغلطش فيه ده بس للتنويه مش اكتر انا مبغلطش فى اشخاص انا معرفهاش انا مضايقه من تصرفات من ناس محسوبه للاسف علينا ومحسوبه على الازهر اللى هو منارة الاسلام

بما ان البلد بقت حاجه مفرحه اوى وقلبت مع حضرتى بانشكاح بصراحه وبقيت طول الوقت متنحه ومزبهله ومبقاش عندى اى رد فعل لاى حاجه فى الدنيا ورد الفعل هو الاكشن اللى بناخده اننا حتى نتعصب ولا نولول ولا نزغرط او حتى نلسع اللى قاعد جنبنا قفا فقلت احاول برضه اقرى اخبار بترتر لقيت الاخبار مشخلعه اوى ونفس الحاله المصاحبه بقيأ وهرش ونطح هى هى اول خبر بترتر

شيخ الازهر
=======

بما انه عيب يعنى اقول لراجل كبير عيب من باب العيب مش من اى باب تانى بس مضطره اسفه اقول انت راجل تصرفاتك مش مظبطه بصراحه طيب شيمون ابو بريزه وسلمت عليه وعملت مش واخد بالك وطلعت تقول ما هما اللى قالوا ليه انا مشفوتوش وجت بالصدفه واحنا حفاظا على مرارتنا استهبلنا وقولنا معلش انما جاى تقول دلوقتى انا مكنتش اعرف انهم محاصرين غزة يبقى اسفه بقى ليه هو الخبر مخبينه خوفا على سمعه غزة ولا يمكن علشان يجوزوها ويستروها فمش بيقولوا لك انها متحاصرة ولا خوفا على مشاعير حضرتك فمحدش قالك ويا راجل يا كوباره لما تقول فكواالحصار تقول لاسرائيل بس كخ كده وفكوا الحصار مش عارف تدور وشك هنا وتقولهم لموا نفسكوا شويه يا عم ترتر انت فعلا اثبت ان الازهر بيزدهر اى نعم والله حرام عليك هو فاضل ايه فى مصر متحولش لطراطير بترتر بسببكم روح يا شيخ منك للى كلت دراع جوزها انطح هنا الخبر متلقح اهو

خبر بترتر اتنين
========

وصوتى ياللى منتيش غرمانه كل يوم والتانى اخ قتل اخته اب قتل بنت عمة جوز خاله ام احمد الا مين ام احمد دى ما علينا واحد قطع شريان ايد بنت وهو بيسرق شنطتها وده حصل فى التجمع عندنا والحمد لله اتقبض عليه سحلو زوجه دكتور برضه وسرقو دهبها وعادى برضه كل الحوادث دى والحكومه تقولك مصر مفيش فيها بطاله ونسبتها بتقل واحنا نقول هما ادرى دول عارفين مصلحتنا احنا اللى سوداوين ومش شيفين الحياه والناس دى بتسرق وتقتل من باب الفشخره والفضا عادى يعنى بيروشوا على نفسهم وفى الاخر يرزعونا الخبر ده واخير الحكومه الرشيده النظيفه بنت ام عز اعترفت ان اساسا فيه بطاله انا ليه طلب قبل ما اموت اشوف حد اتعين من الهباب اللى بيقولوا عليه ده ولا حد بياخد مرتبات كويسه وبعدين هما بيصدروا الناس لبره علشان فى النهايه يقولوا مفيش بطاله ولما الطلبات يقل تبقى البطاله زادت هما الناس دول معندهومش من الاحمر اللى عند الناس

اخر خبر بتراااااااتير وحاجات بتطير
================

بما انى من اللى بيكرهو ايمن نور جدا وبحسه ممثل فزيع وفاشل كمان بس فى النهايه بقول يا رب فك سجن كل مظلوم اذا كان مظلوم ايمن بيه نور من فتره زعلان انه مبيصليش فى المسجد بتاع السجن ومعترض ورافع قضايا على دبان وشه والمحكمه حكمت له وبيقول ادارة السجن مرضيتش تنفذ الحكم ورافضه رفض شنيع مريع وتقوله كلا البطه يا وزة
طيب ده يبقى انتهاك للبتنجان والمصقعه بتاعته فى ايه
انما اللى انا مش فاهماه يعنى هو بيصلى علشان ربنا ولا علشان يتقال بصلى فى جامع ويعمل شوو هى الصلاه فيها شو هى عباده ربنا فيها شوو ما تصلى فى اى مكان بنبقى مسافرين على طريق وبنركن نصلى فى العربيه ايه لزمه الدوشه ووجع السنان ده مش قادره افهم كل اللى فهماه ان كل يوم بيزيد اعجابى بتمثليه وانه قادر يلفت انتباه المقروصه امريكا اللى رامى نفسه فى حضانها زياده ايمن انا بجد بكرهك ومبقتش تصعب عليا انت بقيت ممثل فاشل وبعدين هما نهوك عن الصلاه فى مكانك يا نووووووور افندى اللى عاوز يصلى بيصلى فى اى مكان رابعه العدويه كانت بتصلى فى سجنها وبيترمى عليها حشرات وبتصلى اتقى ربنا ومتاخدش من ده شو اعلامى انت مش ناقص بهلونات الخبر متلقح اهو لحرقه الدم اللى انا مش فهماها

واخيرا كده برضه انا لسه عندى حاله تناحه متناهيه وشايفه انى برضه مش فاهمه حاجه ومستغربه البلد دى كأنها مش موجوده وكانى فى عالم وهى فى مكان تانى وانا قررت مجبش سيره حد غايب بعد كده علشان عيب

كان معكم ابى هانم من امام عالم ديزنى هذا وبالله التوفيق واحترس البلد بتولع باللى فيها

حكمه الامبراطورة

تاج القيصر لا يمنعه عنه الصداع


عيد ميلاد الليله مين عيد ميلاد القرده

دي هديه دوللي قوس قزح ليه واللي هيمد ايده يا ويله دي للفرجه بس لو سمحت شيل ايدك انت وهو
دي تورته للناس اللى بحبهم كلهم بالوان الحب من قلبى وعلشان لونوا حياتى باجمل حاجه


دي هديه محمود رئيس حمهوريه نفسي واللى هيمد ايده عليها هنطحه انا بحذر اهو



دي بقى للبنوتات الدلوعات خالص واياك اشوف ايد راجل عليها شيل ايدك يا واد منك له





دي لكل المدونين رجاله وبنات علشان بحبهم اوي وبما انى ديكتاتوريه فلازم اجيب فراشات فى عيد ميلادي





ودي برضه لصحابتى وكل اللى طلبونى وبعتوا ليه مسج على موبيلى وهنوني عند محمود بعيد ميلادي البعيد والقريب منهم اللى فى مصر وبره مصر


اه مفيش تورته شيكولا مبحبهاش وبالعند فى خيخه خوخه مش هجيبها علشان هى ناويه تجيبها يوم التجمع النسائي يوم الجمعه فى نادي الزراعين بناااااااات بس الجنس الناعم كله متجوزين وغير


اما الفياكين الرجالى يحتفلوا هنا بس هستنى كل الناس اللى بحبهم وبيحبونى يحتفلوا معانا




ودي بقى المقطع ده هديه الريس ميشو او مايكتلو ليه فى عيد ميلادي يا حرام عصر البرد اللى عنده كله وعصر مخه والف اغنيه ليه


عقبالك يوم ميلادك..يوم ما تكيد كل عزالك يا ايبي يا ايبييييي


عيد ميلاد الليلة مين..عيد ميلاد النايبة..حندلع ست الحلوين ونشيلها في عيوننا


أشرق اليوم علينا بالفرح والترحاب..إنه عيد ميلادك يا رحاب


هابي بيرزي تو يو هابي بيرزي تو يو


:)


هو بصراحه انا مبسوطه اوي اوي ومحدش يسالنى عندي قد ايه انا بقول اهو انا عندي كتير اوي اوي مش عارفه اشيلهم وبقول كفايه عليه تلات سنين كمان وماخدش زمنى وزمن عبد الباسط حموده وزعرور ده اللى بيغنى


بابا وماما احساسهم ايه مش عارفه بس الله يكون فى عونهم


حتى اخواتى وابن اختى


عاوزه اقولكم حاجه لو كنت زعلت حد فيسامحنى اما اذا حد زعلنى مش مسمحاه نيهاهاهاهاها


كان نفسي ناس كتيره اوي تبقى موجوده وغايبين عن التدوين بس هما فى قلوبنا اوي اوي




يالا بقى عاوزه طراطير وحاجات بتطير وفراشات


وكله يجيب هدايا بالعند فى خيخه هههههههه ايوه وهكمل الدسته يا خوخه هكملها لووووووولى وهبقى اخضر وباستك من فوق وانتى لااااااااااااااا


شكر لاسلام مواطن مصري نايم على اهدائه فى البلوج


وسالى حاجات جوايا


ومحمود رئيس جمهوريه نفسي وبرضه هاخد القصر منك يا نحنوت
ودوللي قوس قزح حبيبتى اللى مبسمعش كلامها ابدا ومغلباها معايا


تحديث فرحنى اوي البت المشمشيه دي الحلوه اللى هسيب عليها خرفانى هي كمان احتفلت بعيد ميلادي بجد مش عارفه اشكر الناس دي ازاي بس بشكر ربنا الاول علشان حبب كل الناس دي فيه والله لاول مره مش عارفه ابعبر عن اللى جوايا ميرسي ليكو بجد وكل اللى بعتوا ليه على الفيس بوؤ كمان

مفيش حكمه الامبراطوره المره دي فيه ميرسي ليكوا كلكم بجد





ما هما اللى قالولى


فى يوم فى الشغل جالى تليفون واحد عادي بيعرض خدماته علينا المكامله كالتالى


الشخص:- صباح الخير يا فندم معاكي فلان الفلانى من شركه كذا بنصنع اكياس تعبئه مكرونه وعاوز اعرف انتم اتفقتوا مع حد ولا لا


انا:- صباح النور حضرتك الموضوع ده مش معايا ممكن اديلك رقم دكتور نور واتفق معاه هو المسئول عن الموضوع واديته الرقم


الشخص :- بذكاء فزيع مشوفتش زيه هو حضرتك دكتور نور فى مصر ولا بره
انا :- مذبهله قولت له حضرتك رقم موبيل فى مصر يبقى هو فين اكيد فى مصر بس بره الشركه دلوقتى


الشخص:- ايوه يعنى بره الشركه بره مصر


انا:- لاااااااا دا حضرتك حالتك صعبه بقول لحضرتك بره الشركه اكيد ما هو لو بره مصر هديلك رقم جوال يعنى مش محتاجه ذكاء


الشخص:- هو حضرتك ليه عصبيه اوي كده انتى اسمك نهله


انا:- وعنيه مبراه وكان قدامي المحاسب بيمضى منى اوراق لقانى هشد فى شعري وشكلي جاب ميه لون وهقع من على الكرسي من الغيظ والفرسه كتم الضحكه لانه عارف لو ضحك وانا فى الحاله دي هنفجر فيه زيه ماسوره الميه المكتومه

ورديت ببرود على الولد قلت له نهله ليه حضرتك يعنى اولا انا قولت لك اسمي بس انت ماخدتش بالك يبقى ليه نهله مش عارفه


الشخص :- اصل كان معانا واحده فى جيل المستقبل واسمها نهله وعصبيه زي حضرتك


انا:- نورت لمبه المخيخ عندي وبدات اكتم الضحك وانا خلاص هرفص من كتر الضحك والاستغراب والاستعجاب والاستنكار وزي ما أكون لقيت كنز قلت له جيل المستقبل هو حضرتك تبع الحزن الوتنى


الشخص :- بكل زهو وحسيت ان رقبته اتمدت بقت زي رقبه الزرافه من الافتخار والفشخره كانه قال انا ملاك نزلت من السما ايوه يا فندم وهى ايه المشكله


انا:- طيب حضرتك اتصل برقم دكتور نور وهو يفيدك فى الموضوع ده لان انا مش ده اختصاصى خالص هو اللى ماسك ده

الشخص:- طيب وحضرتك ليه زعلانه من الحزب الوطنى


انا:- زعلانه لاااااااااا دا انت حالتك صعبه وهو ايه عمله الحزن حضرتك علشان مزعلش منه يعنى


الشخص:- يووووا كتير عارفه حضرتك انا ساكن فى الهرم وبروح الدقى كل يوم كان بياخد منى المشوار ساعه ونص بعد الحزب ما مسك مصر حضرتك انا بروح فى ساعه الا ربع


انا :- بقاطعه بسرعه مين فين اولا اسمه الحزن الوتنى وحفاظا على مشاعرك مش عاوزه اقولك الحزن الوثنى غير كده هو ده الانجاز ده اقصى املك انك تختزل الوقت هو ده امل المصريين يعنى ما هو احنا لو ماشيين منظمين فى المرور وكل حاجه هنوصل لو ملتزمين فى حياتنا عمرنا ما هنبص الحزن عمل ايه وهنحس انه مش موجود فى الحياه لانه مصالح شخصيه


الشخص :- لاااااااا حضرتك فاهمه غلط ده بيدينا كورسات وبيعملوا اجتماعات وبيجيبوا لنا تى شيرتات وشنط هدايا وبيشغلونا


انا:- يا حرام اه اصل الشعب ماشي من غير تى شيرتات هو حضرتك مش حاسس بكل اللى بيحصل عموما علشان بس انا ورايا شغل كلم دكتور نور فرصه سعيده وربنا يوفقك وياخد الحزن بكل اللى بيتكلموا باسمه يا رب مع السلامه


لغايه هنا واتفرطت ضحك على الارض هو ايه الشباب اللى ده تفكيرهم هما الناس دي معندهمش ثقافه النقاش ليه بيردوا اى كلام فى اي كلام مفيش حاجه لها علاقه بحاجه خالص زي واحد تقله الساعه كام يقلك اسكت مش ام فاروق ولدت

هههههههههههههه طيب ايه علاقه ده بده بعد المكالمه دي افتكرت فردوس عبد الحميد وهي بتهرش فى شعرها وتقول هما اللى قالولى وانا مالى وحسيت انى بقيت شبها وعملت ازعاج للسكان اللى فى شعري والمحاسب مشي وقالى هجيلك وقت تاني لانى تحولت قدامه تماما هههههههه

الشباب دول حافظين انهم دايما متهمين ومحفظنهم كام كلمه يرجعوها فى وش الناس

ومكنش ده اول حاله تقع تحت ايدي من الحزن خالص ده كان فيه حاله مستعصيه واحد بيناقشنى ان الحزن اداله شرعيه مش عرفيه وفاهم انه طالما فى الحزن يقدر يعمل حاجه معندوش ادنى فكره ان اللى يحيد يمين او شمال عن الحون بيطير وبالقوي كمان وبيهدلوه وخاصه اذا كان عارف حاجه او قريب من الكبار او لو ناقش دول عاملين زي الغبغنات فى زمانها

بجد حسره عليها يا حسره عليها اللى يكون عندها شباب بالشكل ده ضايع فى التفكير

وقال عاوزين مصر تتقدم طيب منين وفين وامتى وازاي

باماره ايه طيب ده حتى المختلفين فى الافكار مبيعرفوش يتناقشوا مع بعض اللى فى حزب مش عارفين اهدافه وحتى لو عرفوا مبياخدوش بالهم انها مجرد ريكلام بس مفيش تنفيذ غير المصالح الشخصيه وشخصنه المسائل لحسابهم بس وبيتخلوا عن مبادئهم كلها قدام مصالحهم

وبالمناسبه دي اهديكو اللينك ده انطح يا معلم عن الحزن والتغيرات والشياطات اللى هتحصل ما بينهم قريب بسبب الحرس القديم والجديد

ونطلع من ده بايه بقى

اولا لما تكون سيلز مان فى شركه اياك تجيب سيره الحزن

ثانيا حاول تبقى لبق وذكي لانه مينفعش تكون غبي وانت بتكلم حد ومتعرفش ظروفه ايه فى الشغل

ثالثا ربنا ما يوقعك فى مديره زي كده يكون عندها حساسيه من الحزن ومتحاولش تستظرف

رابعا كلمت نور وانا بضحك وحكيت له اللى حصل ومات من الضحك ورفض العرض لان الشركه اللى تشغل حد بالشكل ده تبقى واقعه واقعه يعنى حتى بعد ما بعتوا العرض هههههههههههه

ملحوسه :- انتظروا قريبا حركه احم احم برياسه الريس ميشو والنايبه التقيله بتاعته اللى هو حضرتي بس اللى هيدخل لازم يجاوب على ميثاق شرف الحركه وتعيش حركه احم احم من اجل مستكبل كوي اشمعنى الحزن هبقى انزل لكم الميثاق
ومع السلام عليكو


كان معكم مفروسه هانم من قلب العيد الكبيير اللى اتسرق ابى هانم كعب الغزال


حكمه الامبراطوره


بكره نقعد على الحيطه ونسمع الزيطه

قال رومانسيه قال

دي الصوره اللى طلعت ليه بعد الاختبار


مش عارفه ليه اصحابى بيتهمونى الاتهام الشنيع المريع الفزيع ده انى رومانسيه دا انا واحده صاحبه قلل وخرفان ابقى رومانسيه والنبى ده كلام دا انا بسمع حسن زعبوله ماشي يتسلى وبسمع نزلت على الشط اصطاد بط وانا عايم ههههههههه

وانا دايما انفى الكلام ده لانى فعلا مش رومانسيه انا طيبه اه هاديه اه مش قليله ادب اه انما رومانسيه كلا البطه خالص

حتى النهارده عملت اختبار على الفيس بوؤ المنيل


وكانت نتيجته ايه الرومانسيه دي كلها يا بخته

يمكن انا مبعرفش ارد الاسائه مبعرفش اشتم مبعرفش اكون حد مش كويس متربتش على كده انا ممكن احرج اه ارخم اه اقول كلام يوجع اه اصحابى بيقولوا ليه انت الشخص المؤدب اللى بيهزأ من غير ما حد يمسك عليه غلطه انما رومانسيه كلا البطه برضه دا انا برعي المفش يا جدعان فيه ايه انا عمري فى علاقتى بخطيبى او ارتباطي انى اسبل ولا انيل دا انا مطب صناعي من بتوع الحكومه الرخم ده اللى بيبوظ عفشه اي قلب فى الدنيا ههههههه

يمكن بكون بحلم بحد كويس فى حياتى مبعرفش اكون غير انا غير شخصيتى مبعرفش اكون شخصيتين ابدا انا ورا الكيبورد اللعينه هو انا فى الحقيقه انا طيبه وهبله ايوووووون لانى بامن للناس كتير اوي عادي يعنى بس ربنا بيكون جبنى دايما مبعرفش اخوض معارك قذره ايووون مبعرفش لكن انا بتعامل من منطلق تربيتى بس وقت الجد يا نهارده اسود اللى بيقع تحت ايدي يمكن رد فعلى مش وقتى لانى اتعودت مأخدش قرارات سريعه ولما تكون اذي ههههههه لازم اخد حقى على المدي البعيد وعلى نظافه مبضربش من تحت لتحت وبعلن مباشره وبعلن بعد ما بعمل بس ده لما اتأذى اوي

نيجى بقى لشويه اسئله واستمحان


واللى كانت نتيجته معايا هي

فأنتي رومانسيه وحالمه وحساسه، تفضلين المشاعر النقية المليئة بالحنان، الثقة أهم شيء لديك في ارتباطك بالطرف الآخر. وبعد اجتياز أزمة الخيانة يمكنك أن تستعيدي ثقتك بمن أحببتي تيررررراررررر تاتاتاتاتا وواااااواوووا


السؤال الاول

لمن تعطي اهتمامك الاول فى الارتباط

المظهر ... للمشاعر المتابادله ... للتوافق


السؤال التاني


هل ترفضوا الانسان

المهمل فى مظهره .....البذئ....الفظ


السؤال التالت


انت لا تسامحين من تحبين ابدا

اذا لم يعطي اهتمام دائم ....اذا نظر لامراه اخري او الست اذا نظرت لرجل اخر...اذا لم يصارحك بكل شئ


السؤال الرابع


اذا فجأك من تحبه بخيانته

هل ترغب فى الانتقام....هل ترغب فى تفسير ما حدث....هل تتركه


السؤال الخامس


بعد اكتشاف الخيانه


هل ترغب فى مواجهته .....هل ترغب فى مواجهه منافك او منافستك....هلى ترغب فى مواجهه نفسك


السؤال السادس


اذا تلقيت صدمه ماذا يحدث لك


هل يدب الياس فى نفسك ....هل تقرر الا تحب بعد ذلك ....هل تتالم كثير


انتهى الاختبار انا قولت اجيب لكم الاسئله علشان نواجهه نفسنا بمواقف بتحصل فعلا وبنتعرض لها كلنا من صاحب صحبه حبيب زوج اي ان كان المسمي الغرض عكس حاجه جوانا يعنى نبقى مرايات لبعض مش اكتر

ودي هديتى ليكوا بمناسبه العيد قبل الاجازه والسفر


كان معكم معلم اول نفسي بحتري افندي لواء متقاعد ابى هانم بتنجانى


حكمه الامبراطوره


لا تأمن للندل ولا تصاحبه ومن السهل انك تبقى قليل الادب بس صعب تبقى مؤدب

بحبك يا خروفى يا بمبى

محدش يحط عينه على الخروف البمبى بتاع قوس قزح والصورة هى اللى جيباها ليه وممكن تدبح اى حد فيها اختاروا الالوان التانيه

تحديث :- بناء على طلب ماما ريا ههههه قصدي مجداويه الارهابيه يوووووا قصدي مجداويه حبيبتى غيرت عنوان البوست من اوقفوا ذبحهم علشان هى اتريقت عليا فى الكومنت عااااااا بس مس مهم دي مانتى وانا بحبها واقتنعت بكلامها انا بس قصدي هزار يا مانتى مش اكتر انما انا مش معترضه على كلام رب العالمين الحمد لله بس برضه هعض اللى يدبحهم هههههههههههه

كتير اوى بيسالونى وبيشدوا فى شعرهم بسبب الخرفان البمبى بتاعى ويقولوا هو فيه خروف بمبى
ايووون فيه وقررت النهارده احكى لكم ليه بقى وايه سبب حبى للخرفان

وبما انى سعيد جدا فمسموح لكم فى التعليقات انكم تسألونى اى اسئله مش مستهبله والا مش هيكون لكم منى او اللى هيعمل كده غير قله فى دماغه

المهم نيجى لقصه الخرفان وحبى ليهم من زمان اوى وانا صغيره وكنت نزلت اجازة لمصر مع ماما وكنت انا عندى خمس سنين تقريبا كان عندنا شقه صغيره والبيت بتاعنا بيتبنى لسه و زى اى طفله شايفه اولاد وبنات فى الشارع عاوزة انزل وطبعا ده كان مرفوض جدا لماما وكان بتلهينى دايما بالراديو اللى على شكل سلحفه علشان اسمع اغانى وكان كبيرى انزل معاها عند حد من قرايبنا
جدى الله يرحمه ساعات كان بيزوغنى منها لانه كان عايش معانا المكان اللى كنا فيه كان قريب منه ناس عرب وعندهم خرفان وماعيز وبيسبوهم فى الشارع وبيجوا بقى لغايه المكان اللى كنا فيه

ومره اتسربت من ورا ماما ونزلت لقيت خروف صغير جميل اوى عجبنى شكله وكان معايا شيكولا رحت ااكله منها بكل برائه طبعا جه خروف تانى كبير تقريبا باباه ولقيته وطى راسه وقرب منى بقرونه فبرجع لورا رجلى اتنت وجت على زجاج عمل جرح فى رجلى من تحت طبعا رحت على ماما واخدت دش محترم جدا ورجلى اتخيطت غرزتبن واخدت غرزتين فى ضميرى من ماما وجدى الله يرحمه
وطبعا تعدى الايام والاجازة هتنتهى وهرجع تانى مع ماما لبابا وبقف كل يوم فى البلكونه وهتجنن انا عجبنى الخروف البيبى الصغير وكان شكله تحفه بيج فى بنى وقعدت اعيط تانى لجدو وقولت له اركب العجله بس وطبعا من صغيرى عايقه ومضايقه وبلبس زى الاطفال صنادل بس كعبها عالى شويه طبعا البنات فى السن ده عاوزين يبقوا انسات
المهم جدو وافق انزل اركب العجله ولابسه صندل كعب منيل وبرضه بحركه خبيثه بعد ما لعبت شويه قدامه فى المكان اللى بين العمارات وهو اطمن غبت عن عينه ورحت ادور على الخرفان تانى وبالفعل لقيتهم والمره دى اتنطحت يا رداله ايووووون الخروف نطحى علشان بديله مصاصه باين مكنش بيحب اللون الاحمر طيب كان يقول هو بصراحه نطح ووقعت من على العجله ويشاء ربنا ميسترنيش علشان مسمعتش كلام ماما واتعور فى الرجل التانيه فى نفس المكان يعنى بقى عندى عاهتين فى الرجلين فى نفس المكان شبه بعض
ورجعت للبيت وازيال الخيبه معايا وبرضه يومها تعبت جدا بجد وماما فقدت الامل فى ترويضى
وبالرغم من حوادثى انا حبيت الخرفان جدا شايفاهم كائن جميل ونظيف اوى يمكن الناس كانوا بيحموهم اى والله مش عارفه ليه
وسافرت ورجعت وقرر جدى يجيب ليه خروف صغير واربيه فوق سطح البيت وده كنت كبرت ورحت ابتدائى خلاص شقتنا فى العمارة الجديده فى الدور الرابع والسطح فوق على طول جدو بنى اوضه صغيره للخروف وبقى مكلف حد يجيب له اكل على طول بس انا ابيت وقولت انا اللى ااكله وبقيت اطلع العب معاه بس فيه واحد بيجى كل يوم ويوم ينظف له
وسميت الخروف سعد ومحدش يقولى ليه يمكن علشان اغيظ فى ابن عمى مش عارف بس هو كده ههههههههه
الخروف بقى صحبى وعامل زى النونو الصغير بيمشى ورايا فى كل مكان واقعد العب معاه وياكل من ايدى
وبقى ينزل ورايا على السلم وادخله فى الشقه طبعا طبعا فى عدم وجود الحاجه الا كان زمانها ترمينى من البلكونه
وكنت بنزله احميه بالشامبو وماما تقولى الشامبو بيخلص ليه اقولها انا بستحمى كل يوم لغايه طبعا ما اتقفشت فى مرة وانا بحميه وكانت ام محمود الست اللى بتنظف لنا تستر عليا كل مرة فى المصيبه اللى بعملها وفى مره من محاولتى وانا بحميه عاوزة انزله البانيو بس بما انه كان كبير وتختوخه مقدرتش وكان كبر اوى وحلفت ماما ان الخروف ده يدبح قعدت اعيط ومرضتش عمى قالى خلاص هاخده عندى وانا وافقت بس كان العيد الكبير جه ودبحوا سعد حبيبى وخاصمت عمى سنه بحالها وبجد عيطت جامد على الخروف لانه صحبى
وبحبه اوى وهو كمان كان رقيق وطيب وبيلعب معايا كتير وبيمشى ورايا
وبعدها ماما حلفت ما اجيب اى خرفان علشان مرتبطش بيهم عاطفيا كده واتعب
بجد علشان كده حسيت انى بحبهم اوى حسيت كائنات مش مؤذيه وبدافع عن نفسها بطريقه مش فييها اهانه وممكن تدربها بسهوله ونظيفه مش بتوسخ وبيقعد يجرى وراك وهو كلبوظه كده تحس ان البيت هيقع هههههههههه
ومن هنا جت فكرة الخروف البمبى
وقولت بمبى علشان ده اهدى لون وارق لون وانا بحس الخرفان حاجه رقيقه كده وطعمه
انا بكره اى حد بيدبحهم بجد مع ان انا عارفه انه حرام وربنا حلل ده بس انا بضايق وبتخنق وبقرف اوى من الناس اللى بتبعهم فى الشارع وسيباهم مش نظاف ودهنينهم لو معفن كده

حاجات او معلوماتى انا عن الخرفان ولحظوها
الخروف لونه من لون الجبل وبحسه زيه قوى جدا وانا بحب اللون البنى والبيج بدرجاته
انا بحب الجبل لانى بحس نفسى زيه مهما الناس حفرت فيه كهوف مهما المطر نزل عليه مهما الرياح طيرت رمله او ترابه مهما الصخور اتكسرت بيفضل جبل ولا بيحركه من مكانه سوى المولى عز وجل
الخروف بينطح وانا زيه مش بنطح الخروف عندى دليل على النرفزة او العصبيه يعنى لما اقول خروف ينطح يبقى بيدافع عن نفسه
بعدين اتجهنا للكلاب وتربيتهم

معلومه تانيه ليه اخترت اسم كوكب ابى :- لانى فعلا رافضه اعيش على الارض بكل ما فيها من قرف ووجع دماغ وحبيت يبقى ليه عالمى الخاص اللى برضه مترحمتش ودخله فيه دخلاء بس انا حطه ليه قوعد واى هجوم من كواكب اخرى بطلع الاسلحه المدمرة وبدمرها كلها علشان كوكبى يفضل هادى ونظيف وبنلعب فيه كلنا فى كل مكان

كل سنه وانتم طيبين ويا رب عيد سعيد او محمود او احمد بس عليكم جميعا

واللى يجيى يسيب كومنت او سؤال يا ريت من فضلكوا كيلو لحمه واللى هشم انها بتاعت خروف هخبطه بقله فى دماغه على طول من غير تفاهم

كان معكم ابى هانم كيد العزال انا من يومى

حكمه الامبراطورة

الدنيا فونيه والزمن كباس

Share |