انا اخدت حقى ..حد هيتحرك ولا باركنج باركنج

ايووووون اللى كتبته فوق ده انجليزى مش عربى ههههههه وحصل بلا حرج فى مصر وتحديدا فى القاهرة الجديدة اللى مبقتش بنت ام عز .
بما انى عندى هوس النظافه وبتجيلى حساسيه فى عنيه ومراخينى وبهرش فى شعرى (تقريبا بقلب على قرد هههههههه) من عدم نظافه السلم اللى فى العمارة بتاعتنا وكمان الجناين والشارع . هى الجناين المفروض تتنظف يوميا او على الاقل كل يومين وكمان السلم مرة فى الاسبوع بس بما انى عندى فى العمارة مش اطفال لا دول الجيش الخامس فأول ما السلم يتنظف يجروا عليه ويجمعوا الورق ويرموه من تانى وبما ان اهاليهم عاملين سيئات مجتمع (سيدات سابقا) فمعندهمش اهتمام بالموضوع خالص وانا تعبت ومش بيتكسفوا على دمهم ومحدش بينظف والكسل بقى محدش عاوز يعمل حاجه ولازم يعتمدوا على غيرهم ....المهم انا خلاص قررت الانتقام من الأشرار ركبت بطوط وشحنتها على الأخر وبقت زى الثور اللي شاف فنله حمرا ورحنا دخلت لمدير الشركه المسئوله عن النظافه يقولى ارتاحى حضرتك قولت له مفيش راحه قولت له اسمع سلم مش نظيف جنينه مش نظيفه محدش مهتم باى حاجه انتم مستنين ايه لما يطلع علينا حشرات وتعبانات من الجناين والمكان بقى فيه كلاب بتجرى ورايا وانا راكبه العربيه فرد بأدب وده غصب عنه لان عاوزة اقولكم صوتى كان بيهز القاهرة الجديدة بلا فخر ههههههه (وده لاثر رجعى لانى رحت حوالى اربع مرات واتكلم بالذوق وبرضه يهملوا تانى يتعدلوا مرة واحده بس)فقررت المرة دى استعمل خطه مضاده للذوق والأدب واصهلل زى الحصان وفى الأخر بعد ما قالى هنعمل كل حاجه قولت له متشكرة

بس على فكرة انا عملت فيكوا محضر فى قسم الشرطه رقمه 1009 وقولتها وانا بجرى على الباب زى الفأر اللى واقع فى حله شوربه سخنه.

وبرضه النحله والدبور اللى فى دماغى مسكتوش قعدوا يزنوا عملت ايه بقى ايوووون رحت للمهندسه سونه اجدع ناس هههههههه والله اسمها سونه دى فى البيئه عندنا اللى مسئوله عنها طلعت ست ذوق ومحترمه واتكلمت معاها وفهمتها اللى بيحصل وابتدت عجله الروتين الهبله تقولى طيب هطلبك المهندس زعبوله تروحى له فى المكتب اللى جنبى تقولى له طبعا لقيت الدبور خبطنى وقالى هتهزرى دول بيباصوكى لبعض يا هانم ضربته على قفاه وقولت له استنى رحت بقى للمهندس زعبوله راجل محترم وبااااااااااااااارد اخر حاجه وكان قدامه اتنين عندهم مشكله وانا دخلت ونفشت ريشى وقولت عليا وعلى اعدائى حمرت عينى ونكشت شعرى ودخلت من غير صباح الخير قولته اسمع حضرتك الموضوع وقمت حكيت على عدم النظافه قالى طيب هتصل بالشركه قولت له اسمعنى كويس ده ميخصنيش ده شغلكم مش كل واحد قاعد على مكتب وماسك تليفون ويقولى هتصل انتم مستنين الناس تجيلكم ولا ايه انا مليش فيه والست والراجل ياعينى اللى كانوا قاعدين يبصولى باستغراب قوى لانهم تقريبا بيتكلموا بصوت واطى معاه ههههههههه وفجأة قالى طيب انا المهندس المسئول وهكلم الشركه اقعدى علشان تتاكدى قولت له مش قاعده انا مش فاضيه لكم انتم عاوزين واحد يمشوا وراكم يقولكوا تشتغلوا ازاى كل ده والراجل متنح بجد مش فاهم انا ليه بتكلم كده (عبيط مش عارف ان النحله والدبور هما السبب )

وانا ماشيه قولت له مين مسئول مباشرة عن شركه بتاعت الجناين قالى ادخلى ادارة الزراعه جنبنا قولت ايوه يعنى اسمه ايه قالى المهندس اليف الناس اللى قاعده بدأت تبتسم ليه وسمعت صوتهم عالى بعد ما طلعت ههههههه وانا خارجه رميت قله فى وشه زى الاولى وقولت له على المحضر ههههههه.

بس مجرتش قولت له المرة الجايه مش هجيلكم هنا هروح للوزارة على طول وهتبقى مشكله وخدت ديل بنطلونى فى سنانى وادحرجت زى الانبوبه جرى على ادارة الزراعه نفس اللى حصل عملته هناك بس سى اليف مش موجود اقولهم فين يقولولى بيمر قولت لهم على اللى عملته وبرضه المحضر قالوا ليه هنتصرف قولت له انا مش جايه تاني وده اخر انذار انا اتقرفت.

المهم النحله قامت قرصتنى فى لسانى وقولت له ممكن اسالك سؤال هو سى اليف لما بينزل من هنا بيمشى من الباب ولا السطوح رفع حواجبه زى شنبات الصرصار وقالى من الباب ليه قولت له وانا معتمده عليكوا تراعو الجنينه عندى اذا كان قدام المبنى اللى المفروض انه خاص بشئون البيئه مش نظيف اتكسف الراجل وقالى العماله اصلها قليله
وهنا انفجرت والشكمان ضرب وطلع دخان من ودانى قولت له عماله ايه مش بتشغلوا الشباب ليه ومخلين البلد فيها بطاله ما الشباب مرمين على الكافيهات زى البسله اللى اتفرطت الله يحرق نظيف على اللى مش نظيف على اللى ماسك دى بلد معندكوش تنظيم فى اى حاجه. ومشيت والنحله والدبور فى ايدى وحذرته فى خلال يومين يعمل اللى قولت له عليه والا هتصرف بس انا مكنتش عارفه انا يعنى ممكن اعمل ايه بعدين ههههههههه وقد كان يا حلوين السلم اتنظف ومرتين فى الاسبوع اللى فات الجنينه بقت زى الفل وجابوا واحد كمان للنظافه فى الشارع بدل عم محمد راديو لانه راجل كبير وطول اليوم ماشى يلم ورقه ورقه فى كيس ويقعد باقى النهار يرتاح ويسمع الراديو.
بجد انا مكدبتش انا رحت القسم قبلها بيوم بالليل وعملت محضر فى الشركه المسئولة عن النظافه حتى اونكل الظابط استغرب من المحضر بس طلع ذوق وقعدونى وانا كنت متنكه ونافشه ريشى مش فاهمه ليه وعمل المحضر وسالنى بتعمليه ليه قولت له علشان الحشرات والتعبانات والكلاب اناخايفه وحسيت انه عاوز يضحك بس كتم فى قلبه هههههههه وكانوا تلاته ظباط فى الاوضه وقعدت وكتب المحضر وقالى اقريه وامضى عليه وبعدين خلصت وماشيه قالى استنى خدى الرقم قولت له رقم ايه اصلها اول مرة اعمل محضر ههههههههههه قالى فيه رقم وقالى بتبقى ادارى قولت له ليه قالى لان محدش اتعور فسكت وقولت له يعنى هطنشوه ولا هترموه فى الباسكت بتاع الزباله ولا ايه قالى لا هنبعت لهم الشكوى وكمان تلات ايام هتلاقى المحضر فى النيابه شكرته ومشيت واول ما رجلى جت بره الاوضه جريت زى القطه وسمعتهم بيضحكوا عليا مووووت (حد يعرف ليه)

نستفيد من هنا ايه يا حلوين:-

1-اننا منفرطش فى حقنا ما هى شركات النظافه بتأخد مننا فلوس على قلبها قد كده وانا افرط فى حقى لييييييييييه

2- زعق وانفش ريشك زى الديك الرومى وانت صاحب حق

3-هدد كل اللى فى العمارة ان هيتعمل فيهم محضر هما كمان علشان عدم النظافه ههههههههههه شعب يتقرص بالفلوس وناس تخاف متختيشيش

4-كل واحد يعمل شغله بما يرضى الله واللى يقصر التانى يديله على قفاه ومنسكتش ونبطل سياسه تكبير الدماغ

5- اخذ الحق نفشه ريش مش هز كتاف هههههههه

بجد انا اخدت حقى وبقى كل شئ تمام هتتحركوا ولا هتفضلوا سلبيين على كده كل حاجه بلغ عن الافران اللى بتبيع الدقيق فى السوق السوده بلغ عن اى غلط متسكوتوش ومتركنوش فى الباركنج بتاع الحياة وبس احنا بنأكل علشان نعيش مش بنعيش علشان نأكل فيه اساسيات كتير تانيه وبتصليح الاخلاق والتصرفات الدنيا هتعدل

كان معكم سياده اللواء طبيب جراح كيميائى مسئول عام النظافه عن القاهرة الجديدة آبى هانم كعبل الغزال المتحنى.

ملحوسه منحوسه :- انا مسافرة المنصورة حد عاوز حاجه ومسمعش حد يقولى هاتى عيش وانتى جايه دا انا هوريكوا مهازل بالصور عند فرن العيش انما ايه مقولكوش عيش طعمه وريحته ولا الزبده الفلاحى هههههههههههههههههه وكل سنه وانتم طيبين علشان كل المناسابات اللى جايه وقلبى معاكوا ومعاي فى هديات عيد الام خخخخخخخ