كائن خزعبلى




عندما ابدأ بالكتابه تقف الافكار فى عقلى كما عرابى على حصانه امام الخديوي يتحدث بكل تناكه او كطفل يتلعثم امام مدرس شرير بشوارب عريضه كما شوارب الصورصارات ...واشعر اننى سوف اكتب عن كائن خزعبلى
وانه فى مكان هناك بعيد ارسم
كائن لا يتعدي خيال جميل والم رائع وولكن ليس كالقلم على القفا ولا يضاهيه فى الانكسار


لا اعلم ما هى المتعه فى تعذيب النفس لا اعلم هل ما يفعله البعض منا فى نفسياته اللي منفسه عليه وعلينا هل هذا ممتع ام لا
لا اعلم ما هى المتعه فى السباحه ضد التيار
هل هى لاثبات بطولات من ورق ام اننا كائنات من الفضاء الخارجي
عندي تساؤلات تدور فى عقلى كما النحله والدبور ودار هذا الحوار الذي انتهي بضربى لها بابو ورده وامها كمان
بعد ما شعرت انه يسكن عقلى اتنين نجارين مسلح وخلاطه اسمنت من النوع الثقيل

الدبور:- ايه متعتك فى انك تروحي لاماكن ليكي فيها ذكري

النحله :- بكل تناكه علشان اضحك

الدبور:- بخبث بذمتك بتضحكي ولا عنيكى بتتملى بالدموع زي حله شوربه معموله عليها كيلو بصل

النحله:- بحس براحه نفسيه لما اعدي فى مكان ليه فيه ذكري حتى لو مؤلمه


الدبور:- الذكري المؤلمه بتوجع زي جرح اتحط فيه كيلو ملح خشن

النحله:- تفكيرك محدود الذكري المؤلمه لما تواجها تذيدك قوه مبتضعفش دي فلسفه الحياه الخرافيه اللى عايشنها اللى اختراعتها ام حلموس

الدبور:- فلسفه ااااااااه قولتيلى طيب والفلسفه بتمسح الدموع من عنيكي يا ام حلموس

النحله:- وهي يعنى كانت بتوطي صوتى من كتر الكركره اللى بتتسمع لما افتكر مقلب من مقالبى فى اللى بحبهم

الدبور:- الدموع صعبه ...الضحك حلو انتى ليه بتعذبى نفسك ومتقلويش انها نفسك وانتى حره فيها

النحله:- لا هى نفسي صحبتى وانا حره ...اقولك لما بعدي فى مكان بفتكر ان شخص بحبه عايش فى المكان ده او المكان ده بيحمل جزء منه بحس انى ببدأ حياه من جديد لما بروح مكان كنا فيه بحس انى سامعه صوت انفاسه جنبى

الدبور:- وده ايه بقى قلبتى كده من امتى

النحله :- انا مقلبتش انا بنهى حياه كامله بس محدش شايف وانا بغمض عينى عنها علشان محسش بالوجع فبعمل صدمه لنفسي علشان انهى

الدبور:- ااااااااه طيب قومى بقى نامي الا انتى فعلا فاضل شويه والاقيكي بتنتحري من حرف سجاده

الحوار انتهى فعلا بس الاسئله منتهتش ليه بنعمل كده انا عن نفسي لما بعملها او لو عملتها علشان ادور على ابتسامه ضاعت او احس بأمان مبقتش حساه

انتم لو بتعملوا كده بقى ليه ؟؟؟

الذكري المؤلمه مش لازم تضعف دي لازم تبقى خطوه انك متكررش الغلط الذكري الحلوه اوعي تخليها تغرقك زي طفل فى لعبه الخاصه لانها بتفقدك الزمن والحياه وبتقف عند لحظه واحده بس وعمرك كله بيربط عندها بس لما بتفك بتكون زي الجمل اللى اتحمل كتير ولما فك طاح شمال ويمين عذاب النفس ليس الم فقط وكي بالنار وعض فى المناخير كما انقضاض سممكه قرش على فريسه ولا ولوله ضفدعه مطلقه فى يوم شتا ولكن عذاب النفس اغراقها فى حاجتين ذكري مؤلمه وفرحه مجنونه وتتابع الفرحه دي من مظاهر جنان لبس شوال زعبوت سليبر فرده وفرده عذاب الجسد بيخف مع مرور الوقت ولكن عذاب النفس مستمر الا مالا نهايه اما عذاب الوطن الذي لانعرفه اشعر ان الوطن كائن خرافى نخترعه بخيال خصب لكي نشعر بالدفئ نخترع كل الشخصيات لكي نعذب انفسنا وفى نفس ذات النفس نشعرها بالراحه

فيا نفسي كفى عن تعذيب نفسك لاننى لم اعد اشعر بك ولا اجد هذا الوطن ولا هذه المتعه

كان معكم فيلسوف قسم اول حالات حرجه عباسيه كولج ابى هانم

حكمه الامبراطوره


لاتندم على ما رحل ولا تندم على ما هو ات فانت بلاستيك ولا تشعر

وثيقه لتفكيك اسرائيل





انا البوست نقلته من عند نواره زي ما هو بجد انا مشغوله ومش عارفه ارد على تعليقاتكم يا ريت بس تساعدونا فى الطلب ده اقروا الموضوع كويس وكلها يومين وارجع لكم زي القرده وارد عليكم واناكف فيكم

ارجو من الجميع التوقيع على وثيقة تفكيك اسرائيل
وهنا كمان بالانجليزي
على فكره اللى بالانجليزي هى ترجمه العربي احنا ترجمناها علشان ممكن حد ميجيش له صبر يقرا علشان تتطمنوا مش هنبيعكوا هدمكوا ولا حاجه المره الجايه اوعدكم نيهاهاههاهاها
الوثيقة مستندة على
1- التعريف العالمي للدولة
2- الميثاق العالمي لحقوق الانسان
3- العهد الدولي للحقوق المدنية والسياسية
4- العهد الدولي للحقوق الاقتصادية والاجتماعية والثقافية
وبتثبت من خلال المواثيق الدولية دي ان الكيان الاستيطاني العنصري القائم على الفكر الصهيوني الموجود المسمى باسرائيل لا ينطبق عليه شروط الدولة ولا يلتزم باي من المواثيق او القوانين الدولية وعليه فيجب تفكيكه، وانا اسفة الموضوع ما كانش فيه لا قرود ولا خنازير
اذا سمحتوا اقروا الوثيقة واذا عجبتكوا وقعوا عليها النسختين العربي والانجليزي
انا دورت ما لقتش حد بيطالب بتفكيك اسرائيل غير حركة ناتورا كارتا! اظن حان الوقت اننا يبقى لنا دور في الموضوع ده
لو تحبوا يعني

النبى الوثيقه دي اتعب فيها جامد والله اوعوا متوقعوش اللهي تقوعوا فى بير يا رب لو موقعتوش ها بقى

اصل الوثيقه كله خبط لزق لو عاوزين تقروا كمان او تنقلوا فى المدونات على المدونه بتاعت نيو هولكوست انطح هنا بس برضه لازم توقعوا اللهى ما يرميكوا فى ضيقه
هو انا شكلى هشحت صح مش مهم المهم بس نعمل حاجه كويسه ومننساش زي حاجات كتير اتنست
ومتزعلوش منى علشان انا قصير اوزعه ومشغول وحياتك مشغول بس اخلص اللى فى ايدي فومين غسيل وافوق لكم تاني اصلى حسه انى بقيت عامله زي مجاذيب السيده والحسين اليومين دول


كان معكم محتاسه هانم مشغوله من ارض الضباب ابى هانم بتنجانى

حكمه الامبراطوره

ايه اللى رماك على مر قال ملقتش سكر

اه يا مصر


منكم لله منكم لله
دلوقتى من شويه على الجزيره تفجيرات فى الحسين تانى تانى تانى
طيب ليه طيب افهم ايه الاستفاده
ايه اللى هيعود على العالم دي من اللى بيعملوه اعتراض طيب بيعترضوا بالدم
ترهيب طيب بيرهبوا مين تحذير طيب لمين
طفل وتلاته مصرين اتصابوا ده الاولى و17 اجانب
طيب عاوزين ايه السياحه واضربت
الناس فى شرم والغردقه قفلت اماكن بسبب الازمه الاقتصاديه الحسين مبقاش زي الاول
اتصلت على اصحابى هناك اتنين بنات لهم ورش فضه وفكرونى ان النهارده الاحد وهما كويسين ومش هناك
طيب التفجير حصل فى الميدان طيب الميدان ده مليان ناس غلابه ناس على باب الله والعالم كله بيعطف عليها
طيب اللى فجر عاوز ايه
وكالمعتاد طلع حدير البغدادى :- يقول امن مصر كويس ...... لا مؤاخذه قمل ايه اللى يقصده
وان الجماعات الاسلاميه مسئوله او الجهاد او طالبان ... يا ريت حد يستعين بالمفتش خرومبو يحل لهم الشفره دي
او ناس معترضه على اللى بيحصل فى فلسطين وانهم هو يعنى والحزب مع القضيه ومع التهدئه ...... ايه اللى جاب القلعه جنب البحر يا ابنى انت بس هو اي كلام وخلاص اي تهطيل واستهبال حد يكشف على عقل الناس دي يا جدعان والنبى

وعلى الجانب التانى الشلل والنقطه
منتصر الزيات :- مش بيرد بيردح للبغدادي وبيقول تلاقيه واقف جنبه بتوع الامن ولا حد من الرؤساء وبيمدحهم طيب البعيد معندوش دم ده وقته بالذمه ناس دمهم على الارض ودول بيردحوا لبعض
لا واللى يفرس ويشل يقول جايز حد من الشباب اللى اتأثروا بالقضيه الفلسطينه عمل كده
برضه ايه جاب ام الخلول للميه الحلوه نفسي افهم
هي الناس دي مش عاوزه بقى تلم نفسها وتفهم انها بتعامل شعب بيفهم
هما كلهم بقوا لابسين زعابيط وطراطير وبيقروا الطالع والنازل انا عمري ما شوفت تصريحات قبل ما يتعمل بحث جنائي او حتى بحث عيالى
حسبى الله ونعم الوكيل فى مجلس الشعب كله من الكبير للصغير
وفعلا المصلحه الشخصيه سواء معارضه او وطنى هتفضل فى البلد دى للنهايه
الاسلام كله برئ من اللى حصل ده دينا مبيقولش نقتل حد دخل بلدي مفيش دين بيقول اقتل حد اعزل جاي يزورك
منكم لله خربتوا البلد واهو الحسين هيبقى مكان ميت هو كمان

كان معكم ابى هانم المنقوطه من تصريحات المتسولين

حكمه الامبراطوره

الخيبه تقول للعويله يا ام خيبه تقيله

فراشة تحترق




اعشق الفراشات بشكل غير طبيعي فاشعر فى بعض الاحيان انى مثلها تمام ليس فى الجمال ولكن فى طريقه الحياه
وبيننا صفتان مشتركتان

الاولى
===
انك لا تستطيع ان تملك فراشه..... ولكن تسطيع ان تنظر لها وتراها وهى تلعب بعيد وتتمتع بجمالها وجميع تحركاتها الشقيه الرشيقه
وما ان حاولت تملكها فى لحظه فسوف تموت لانك لن تستطيع باي شكل مراعتها والحفاظ عليها
انا مثلها فى هذه الصفه اكره التملك بكل انواعها التملك العاطفى اولهم حتى لو عن طريق الحب فالحبيب الذي يمتكلنى فى حبى واشعر اننى احببته اكثر من اي شئ هو ايضا امتلاك وفى هذه اللحظه اذبل واكون اقرب للموت

الثانيه

====
النور .... فعاده الفراشات عندما تري النور تنجذب له وعندما تقترب تتكتشف ان هذا النور يا اما لمبه مضيئه قويه لا تسطيع الفراشه الاستمتاع بها وتحترق او نار تبتلعها فى لحظه
وانا كذلك عندما اكتشف بادره نور فى اي طريقى اذهب اليها واكتشف انها نار تحرق وليست منبع قوه كما اعتقد

عشقى للفراشات لم ينتهى ولن ينتهي فانا فى كل ركن فى بيت حتى السخان والثلاجه لم يسلموا من وضع فراشات لهم اصدقائي اول هديه يفكرون بها عندما يريدون اعطائي شئ ولو رمزي هى شئ عليه الفراشات
حتى عندما سافرت لماليزيا كان اول شئ ابحث عنه هو حديقه الفراشات ولذكاء الشعب الماليزي ومعرفته مسبقا باهميتها وجمالها
فحديقه الفراشات صممت على شكل اوبن ايريا ومغطاه بشبكه كبيره كي لا تذهب الفراشات بعيدا

وفجأه وانا انظر اليهم وسرحانه وجدت فراشه وقفت على يدي ونظرت اليها ونظر الموجودين معى وضحكنا بصوت عالى

واكتشفت صحه مثل الدم بيحن


فى النهايه انا تلك الفراشه ولن اقبل بان اكون غيرها وفى المره القادمه ساتذكر ان النور البعيد ما هو الا خداع سوف يقوم بحرقى
فكف ايها النور عن ارسال اشاراتك لانى من الان ساكف عن العبث

منحوسه "البوست ده فضفضه فى مود ليه رايق مش اكتر

كان معكم فراشه هانم المتنكره ابى هانم

حكمه الامبراطوره

النار لا تعطي الدفا فقط ولكن تحرق ايضا




Create Yours @ NackVision

ماذا لو...؟؟ وشباب المارينز



من يومين كنت قاعده مع اصحابى المارينز وواضح ان الحجه كانت داعيه عليا فى ساعه صفا ربنا يكرمها ... والمارينز لا سمح الله غير المارينز اللى فى الجيش الامريكى استغفر الله العظيم اللهم احفظنا
ولكنه ما يطلقه علينا المجتمع

اي فى تعريف آبى الصحاح اللى بيروحوا مارينا بالبلدي كده اي نعم فقد اطلق علينا المجتمع الراس بري والجمصي نسبه الى جمصه وراس البر الشباب المارينز فانا من هؤلاء الشباب الذي يذهبون هناك ولكن طموحنا مبقاش يقف عند دخول مارينا فقط
ولكن التمسح بطوب سور لسان الوزراء فقط لكي ننول الشرف السامي الشامي وليس الدخول اليه فانا رضى عني الله وتمسحت بكام طوبه من جناين قصور لسان الوزراء فى مارينا اي نعم ولا اطمع فى اكثر من ذالك بطاطا البطه وكلا وحاشا واتمسك بالماشه فنحن نحقد الان .....الموضوع تطور بداخلننا واصبحنا نحقد على الشباب الوزاري اى من يملك الدخول لهذا الشاطئ ومتحقدوش على القصور كفايه حقدنا احنا لانه شكله هيولع باللى فيه

مع ان فى راي لا يختلف كثير عن ترعه ام جالمبو نايم على جمبه اللى فى اي قريه بس طيش شباب تقولوا ايه بقى .


وطبعا الكل واخد فكره عن شباب المارينز انهم لا يفكرون وهذا بعيد كل البعد عن الحقيقه العاريه
لاننا نفكر ونفكر واخذ يفكر ويفكر اي نعم فييا حضرات نحن نفكر ما هو نوع المايوه الذي سنقوم بارتدائه الصيف القادم ويبدأ التسابق والتنافس على الجيم لتدعيم التراي والباي مثل دعم غزه بل حفظكم الله افزع من ذلك وتلك
والبنوتات المارينز يتميزون بحفظ كل البراننيمز فى العالم وما هو الجديد فى عالم الموضه .. بنشقى صحيح

الا يدعوكم هذا للكف ورفع ايديكم والحقد والكره عن اتهام الشباب المارينز انهم لا يفكرون
اعلم انكم مغرضون معرضون كما المعارضه الطائشه التى تمتلكها مصر ام الدنيا سابقا وكسه الدنيا حاليا

فقد اثبت الشباب المارينز انهم يفكرون بقوه الاسد ودهاء الثعلب وفرار الارنب ودلع السلحفاه الممله اي نعم وهذا اثبته لى احد الاصدقاء عندما فاجأنى بسؤال خبيث من نوع العيار الثقيل او بالاصح كما قذيفه من كلاشينكوف موجهه

وكان هذا دفاعا عن كينونتهم المارينزيه المتاصله بانهم عديمي التفكير وكل همهم التيك واي والتفكير كيف سنسهر ونتريب اي نقوم بتربايه فى الصيف وخاصه انه قادم على الابواب وجميعا نكون فى حاله انشكاح غريب من حبنا المستميت للصيف والدفاع عنه هو والربيع ..احم احم
انا هذه الشخصيه التى تعشق الصيف بكل جوارجي وجوارح الجيران

عندما سرحت فى الربيع وعندما بدأت فى اخد بعض القرارات الصعبه فى قص شعري كاريه ام ديجراديه
ومن عليه الدور فى ازاحه وجهي عنه لانه استنفذ كل محاولاته معي انه يثبت على حاجه فاقوم انا بتاخذ قرار بالبعد بالا راجعه سواء بنت او ولد
وهنا يغنى لى اصحابى الدور الدور ملعونه ياللى عليكي الدور

وفجاه نط زي الفار المسلوخ وخبط على الترابيزه امامى وقالى عاوز اسالك سؤال باسم العروبه والاخوه

ومن الخرعه والفزعه اللى انا فيها قولت له ربنا يلعنك انت والعروبه وشارع العروبه والاخوه اللى هتقطع الخلف عندي دي

قال لى وهو واثق من نفسه ومستلذ من رد فعلى كانه صلاح نصر عندما كان يعذب احد ضحاياه

هتقولى ايه للريس لو قدر لكى وقابلتيه؟؟؟؟؟؟

وهنا وشي جاب كل الالوان مثل يوم عاصف فى امشير بزعابيبه

وجاوبت بكل ثقه هشرح له حال مصر ....

وكان مجهز اجابته كما ينقض الاسد على غزاله لا حول لها ولا قوه

قالى لا ازاي هتكلميه وازاي هتقولى له كل اللى عاوزه تقوليه وتكسبى الجوله فى صالحك
وهنا تلعثم لسانى تحت سنانى اه يا لسانى وقولت له هكلمه ازاي زي ما بكلمك طبعا

قالى عارفه ان فيه عظماء فى التاريخ كأمثال احمد عرابى ضيعوا قيمه القضيه اللى بيأمنوا بيها علشان الطريقه الفجه اللى كلم بيها الخديوي وكانت اخرته بيشرب شاي فى جزيره بعيده

وهنا تلعثمت وصفرت الاشارات وودانى طلعت نار وبقيت شبه قطر سكه حديد بيكحكح وفتحت نص عين والعين التانيه دخل فيها تراب شرير قفلها

وقولت له بكل برائه فجه يعنى ايه
وانفرط من الضحك كما رمان البلى بتاع عربيه مقطوره محمله زلط وقالى نسيت انى بكلم طفله هو وكل الموجودين ومش فاهمه ليه عالم غريبه غربنه

رد وقالى :....يعنى الطريقه اللى مش كويسه

واكتشفت انه شاب مارينز مثقف جامد اخر حاجه:))) وكان اعظم اكتشاف على مر التاريخ والشرف ليه انه يكون على ايدي

قالى اوفر عليكي غمضى عينك وتخيلى انى انا الريس وابدئي اتكلمى واعرضى عليه
وعجبتنى اللعبه اوي وعملتها اول ما غمضت وتخيلت اتفزعت مش لا سمح الله من شكل الريس محدش يفهمنى صح من فضلكم

ولكن من هول الموقف فعلا والمقارنه الجباره بين صديقى المارينز والريس
قولت له بصوت حنين كما شهرزاد امام مسرور السياف وامام شهريار
سيبنى لبكره الله يخليك

عزيزي الفيكون والفيكونه
==================
غمضوا عنيكوا وتخيلوا فعلا الريس قدامكوا هتتكلموا ازاي معاه وهتقولوا له ايه
الموضوع مهم جدا ماذا لو قابلت السيد الرئيس هتقوله ايه وهتتطلب منه ايه ولاحظ انك بتكلم الريس مش ابى هانم بتنجانى مع انى مقلش قيمه عنه احم احم احم
عاوزه كمان طريقه تقديم الموضوع يعنى محدش يدخل يقلى الطلب بس تخيل انه قدامك الطريقه اللى هتكلمه بيها بالظبط اكتبها

محدش يقولى انتى اتجننتى فمن يعلم من الممكن والجايز انك تقابل الريس
منكن يعنى فى مؤتمر فى مارينا
ومنكن اوي وده اللى اضمنه فى ابو زعبل او طره لما يكون بيفتح فرع جديد للمجانين المهابيش شباب المارينز هناك ونكون احدي النزلاء عادي بتحصل فى احسن وافضل العائلات محدش احسن من العظماء اللي دخلوا المعتقل من اوسع الابواب واضيقها ايضا

والمطلوب منكم جميعا الدخول بلا خوف ولا رهبه ولا تخبيط ركب ولا طرقعه سنان فى بعضيتها ولا تغطيه القفا خوفا من اي قلم طائش من هنا او هناك

ان تقول بكل جرأه كيف وما الذي تقوله عندما تقابل الريس مباشره
ومن هذا المزنق ليه كام طلب بعد الاجابه واحد ليكم هقوله فى الاخر وواحد مقدم عليه اتنين دمغه وواحد شاي لزوم تفتيح المخ وتقفيل الجيوب

اطالب القلم السياسى او حتى الاستيكه السياسيه او لو تطوروا يبقى الكيبورد السياسي ولو اتلغي يبقى قمل الدوله مباشره او المستخبارات انا الموقعه ادناه

اطالب بمقابله السيد الرئيس اي نعم وانا بكامل قوايا العقليه مش اوي يعنى
لانى اشك انى فى لحظه كتابتى للبوست ده انى عند عقل اصلا
وبما ان لقبى ابى هانم بتنجانى يبقى معليش حرج ولا مرج ده على اساس انهم كما يزعم المغرضون بيقروا اصلا المدونات يعنى وانا عارفه ان دي اوشاعه مغرضه هما مش فاضين اساسا لنا
طبعا ده عشم ام الخلول فى انها تعيش فى الميه الحلوه مش الملحه

الطلب التانى ليكم انتم يا شوباب

يا ريت تجهزوا البانرات بعد البوست ده وطالبوا مقدما بالافراج عنى وتغير الفكره من ان شباب المارينز انه بيفكر الى انه بيهبل وملوش فى الملوخيه ولا الباميه وانه شباب باميجى وكوفتجي مع مرتبه الشرف وتمسكوا برايكم فى الشباب المارينز لاخر شاب
والمطالبه بانهم لازم يفرجوا عنى ويعتبرونى عيله وغلطت وصاحبه خرفان بمبى يبقى حقى الدستوري انهم يفرجوا عنى ويعاملونى معامله الاطفال وهنيالك يا فاعل الخير

كان معكم ابى هانم بتنجانى لواء اركان حرب مستشفى العباسيه قسم الحالات المستعصيه سابقا وشهيده المارينز حاليا الله يخرب بيتك ياللى فى بالى

حكمه الامبراطوره

اذا فقدت المرأه شعرها فلا حرج على عقلها

حبرشنى يا حبرشنى




ندخل فى الموضوع طبعا تقريبا كله عرف موضوع اسر ياسر واللى بيحصل واننا وقفنا معاها معنويا وده اللى كانت محتاجه له وعلى الرغم من اللى حصل ناس دخلت تقولها اتحجبى واللى دخل يقول متخرجش لوحدها وكل واحد قال اى كلام
خلونا نتكلم براحه ومش هرد على كل عقليه لانها بتحكم من زاويه واحده وبس
اولا المجتمع طبقات كل طبقه تلبس اللى مناسب ليها وفى الوسط بتاعها هو ده اللى كويس وبلاش يا ريت نحكم على بعض من طبقتنا احنا ومش معنى ان البنت مش محجبه تبقى قليله الادب والعكس برضه على فكره برضه كل طبقه فيها المحجبات والغير
ومش بتكلم عن حجاب او غيره لان ده شئ مفروغ منه
ثانيا
المحجبه كمان بيتحرش بيها بيها انزلوا فى اى مكان او اسالوا المحجبات وانتم تعرفوا اللى بخمار وكان فى ايدها بنتها فى اكتوبر واحد اتحرش بيها فى وسط الشارع

سفاح المعادى كان بيضرب منقبات ومحجبات يعنى كله سواء

مره زميل ليه قالى واحنا رايحين شغل فى مكان استنى ادخل قدامك علشان كان فيه شباب واقفين قولت له عيب انت معندكش اتيكيت قالى يا بنتى العيال هياكلوكى بعنيهمم قولت له انا لابسه حاجات واسعه اهو
قالى عارفه وبما انى ولد يعنى ممكن بنت تشدنى تكون لابسه خمار وواسع جدا قولت له ليه قالى دايما الواحد بيشتهى اللى مش شايفه اكتر
يعنى برضه بيسيبوا خيالهم المريض يعيش
وده بينعكس على البنت لانه بيطول نظرته ليه وده اسمه برضه تحرش للى مش عارف
التحرش بالكلمه ومش بالفعل ولمس الايد بس
طبعا هو يومها اتعلق من قفاه منى شويه وقلبت بنكد وخناقه بس الحمد لله الاصابات ضغيفه خلصنا الشغل وراح خد حقنه فى المستشفى لمده 21 يوم بس هو كويس واليف مبيعضش دلوقتى

اللى يقولى متخرجيش من بيتك لوحدك هقوله اتلهى على عينك لان انا مثلا من ضمن الناس اللى بتشتغل وكتير زى يبقى نقعد فى البيت ازاى واصرف على نفسى ازاى يبقى يا حد يقول كلام وحل صح يا يحط لسانه تحت سنانه ويسكت خالص
كان فيه واحد والله بيقول سبب خراب اقتصاد مصر الستات بس نسيت اقوله يعنى الست الوالده لما اتحملت مسئوليتك لغايه ما بقيت شحط برضه كانت بتخرب فى اقتصاد مصر
عجبى على التفكير بجد


المهم طبعا مش تضامنا معاها هنا ولا على الفيس بوك ولا تحت بيتهم اصلا هيرد لها الجرح اللى من جواها ومش هيعمل حاجه اكتر من انه سابورت ليها معنوى يقويها لان الكلمه اللى بتتقال للبنت هى الوحيده اللى بتحس بجرحها واحنا عندنا عيال عاوزين ضرب النار فى ميدان عام بعد ما يتعلقوا من بوكسراتهم الحمراء ام دباديب وبينك دى

لانهم بجد كل حاجه ليهم بقت تيك اواى ومبيعرفوش يفرقوا ما بين بنت محترمه وبنت بتجرى وراء اى كلب فى الشارع يبص لها حتى ولو بعد كده اداه على قفاها هتفضل تحت رجليه
فبيعاكسوا بالفاظ زباله شبهم بالظبط وبرضه ده تحرش

وبعد ان شاء الله ما الولد يتعاقب هنرجع لعنب ديبو يعنى هيظهر واحده تانيه وتالته
انا بقى عندى اقتراح ومش عارفه انفذه او تساؤلات ببساطه

وزراه الاحلام قصدى الاعلام قرفتنا اهلينا باعلانات الخواجات والعيال بتوع الازهر ومتتحبرش بيهم
ليه بقى مبيعملوش كده مع بنات البلد ويعرفوا الناس ان فيه احكام قانونيه ويعرفوهم يعنى ايه تحرش
ويبقى سهلوا على نفسهم وعلينا قرف وبلاوى كتير بدل ما ابو شنب بريمه يطلع ويقول مفيش تحرش ومش ظاهرة

طبعا بقول اعلام لسبب واحد ان ماشاء الله الشباب اليومين دول وقتهم مش فاضى انهم يقروا حاجه ولا يتابعوا وفعلا ممكن الولد اللى عمل كده مع اسر ميعرفش حاجه عن اللى حصل مع نهى
اذا كان فيه ناس مش عارفه ايه اللى كان بيحصل فى غزة
وجايز ابوه برضه لما استفذها ورده العبيط ويوقلها انتى اكبر من ابنى وابنى مش هيعاكسك
بجد نفسى اقابله واقوله انت متعرفش ان لما حد يجيى يقولك ابنك مدمن متشتمش الراجل والمفروض انك تكشف على ابنك
انما احنا ومن عاداتنا المتأصله لازم نرمى اللوم على غيرنا
يعنى هو رمى اللوم على التانيه وقالها انتى اكبر منه عمره ما هيجيب الخطأ على ابنه ايوه هى اللى غلطانه علشان اكبر منه كنتى اصغرى شويه يا اسر بقى المشكله فى الشماعه مش هتخلص
يا عالم الاعلام مش الجرايد الاعلانات فى التى فى هى اللى هتعمل ده

بس اللى فعلا مش فاهماه الولد اللى عمل كده مع نهى محدش هددها يعنى ولا لواءات مدرعات
اشمعنى ده
الاولاد بتوع المهندسين محدش كلم البنات
بجد لازم يبقى فيه تساوى شويه فى الموضوع ويصلحوا ام الخرم اللى فى المله فى القضاء ده ويشوفوا خالتى نزيهه راحت فين يرجعوها
ولحد ما يبقى فيه حاجه مقنعه على كل بنت عمل الاتى

1- لبس حزام سهل القلع تلسوع بيه اى كلب يبص لها طبعا البنات اللى حبين ده هما حرين عادى يعنى حبين يتعاكسوا ويتحبرش بيهم
2- اوعى تصوتى لان صوتك هيروح فى الهوا ومحدش من الشعب هيعبرك وفرى صوتك للاتصال بالشرطه بسرعه مع تجهيز قاموس شتايم شحن ذاتى فى لسانك
3- كل بنت عليها انها تتدرب كونغفو او كارتيه وابعدوا عن الشيبسى بيجيب امراض علشان ترزع البيه علقه محترمه
4- يا بنات اوعوا تخافوا من اى ولد لان اللى بيعمل كده اضعف من انه يقف قادمك ولو حسه انك قويه فعلا هيخاف ( مجربه قبل كده )
5- انا البس اللى انا عاوزاه طالما ماشيه محترمه ومش معنى حتى ان الواحده لابسه اى حاجه ان ده يدى الحق لاى عيل برياله حتى لو كان كبير فى السن برضه عيل انه ينتهك خصوصيتى سواء كنت محجبه او غير

6- كل واحد يربى عياله ونفسه واللى حوليه لو قدر

ملحوسه اللى عنده افكار غير بتاعت الاعلام والاعلانات يا ريت يقول عليها واللى يقدر يساعدنى فى انى اوصل الموضوع لحد يعمل الاعلانات دى يا ريت يقول برضه لان الموضوع مش هيقف غير بكده ومش عاوزه حد يقولى والتوعيه الدينيه انا معاكوا جدا فيها بس لما تتكلموا عن شباب بتقرا حتى اى حاجه انما اكبر عامل مؤثر فينا هى الاعلانات

كان معكم عميد اول مباحث برج الجزيره ابى هانم الشهيرة ببرعى المفش

حكمه الامبراطورة

قليل العقل داريه لا تبيعه ولا تشتريه


فالنتيم داي فى اسطبل عنتر


كل سنة وانتم طيبين بمناسبة عيد الحب

و يارب دايما تكونوا فى حالة حب للخير زى ما اتعودنا معاكم

عيد الحب السنة دى عايزينه يكون مختلف

عايزين نقول الناس اللى مش بتحتفل به اننا يهمنا نكون معاهم يومها و نقولهم اننا بنحبهم

و ده هنقدر نعمله من خلال جمعية صحبة خير

اللى عاملة يوم لمشاركة الاطفال و الناس فى العشوائيات مشاعر الحب و الاهتمام و نقولهم ان كل اللى بيعملوه اد ايه مهم لهم و لنا و للبلد كلها

و تفاصيل اليوم كالاتى

12:00 - 12:30

تعريف باهداف الجمعية و نشاطها و انجازاتها

12:30 - 01:00

مسرحية الاطفال اللى كنا اعلنا عنها قبل كده و هى من تأليف اطفال اشوارع و تمثيلهم

01:00 - 02:30

مسابقات و ماتش كرة

02:30 - 03:00

استراحة

03:00 - 04:30

طيارات ورق اطفال الشوارع عملوها و هيطيروها فى الجو و دى شعار الحلم لاسطبل عنتر


يومها هتكون نقطة التجمع من الساعة 11 لحد 11:30

فى محطة الزهراء لمترو الانفاق

او عند محطة بنزين التعاون اللى عند كورنيش المعادى

و دى ارقام الناس اللى هتكون فى انتظارنا يومها

مهاب 0128068016

هالة 0106399441

على 0105393135

نفين 0105215288



ياريت نشارك فى اليوم ده بوجودنا معهم و كمان هيكون فى صندوق تبرعات للى يحب يشارك فى مساعدتهم ماديا


وكل عيد حب و انتم بخير
الميعاد السبت 14/2/2009

طبعا اللى كاتب كل اللى فوق ده قوس قزح اكيد مش انا انا معرفش اكتب الكلام بالشكل ده يعنى لازم تلاقوا حاجات واقعه وحاجات متلخبطه وكلام مش مفهوم بما انى اصلا مبكونش فاهمه
المهم اللى هيجي يدخل يقولى فى التعليقات علشان ادعيله
واللي مش هيجي يدخل برضه يقولى علشان اقرا الفاتحه للنداله :))))
انا هلعب كوره مع الاولاد واللى هيجي هيلعب معانا وهخليه يقف جون كمان عاوزين نعمل حاجه كويسه واليوم هيبقى لذيذ تخيلوا طول اليوم مع اطفال يا سلام بجد ومش اي اطفال دول محتاجين يحسوا اننا بنعاملهم كويس
انا بجد فرحانه كأنه يوم عيد علشان هلعب معاهم وهتبسط طبعا مصلحتى اولا وبما انى بيغلب عليا طابع الاطفال
فهكون مبسوطه
ملحوسه كونتوسه:- مدونه وصحفيه جميله انا شخصيا معرفهاش اسمها اسر ياسر عرفت حكايه حصلت ليها من عند استاذ احمد شقير وهى محتاجه لدعمنا لها معنويا ان شاء الله هكتب عن الموضوع على يوم الاحد من وجهه نظري بس يا ريت تشوفوا الحاله اللى وصلت لها البلد اسر دي ممكن تكون اختى وبنت زي واخت اي ولد فيكوا انطح هنا هتروح عندها

كان معكم لواء طيار اعالى السحاب والترع ابى هانم انظر حولك

حكمه الامبراطوره

لما الدنيا تديك ضهرها لف وشك وعاكسها الدنيا زي البنت الحلوه بتحب اللى يدلعها وعجبى


تشكرات بترتر

الصوره اهداء محمد عتلم ايوه اشمعنى انا اروح فى شجره لوحدي لازم حد يبقى معايا اي خدمه يا فنان

سبيب بترتر واحد ( يعنى شكرا بالروسي شوفتوا الثقافات

==================

بما ان برضه حكومتنا الرشيده النظيفه بنت ام عز مصممه على انها تعاير فينا فالسلام ده حاير طاير منى ليهم ونبتديهم بالكبير كبير اونكل عادلى
طلع علينا فى عيد الشوربه ووزع شيكولا على الناس فى بعض المناطق المجاوره وبما اننا مش عارفين ومش راح نعرف ايه هى المناطك دي يبقى الراجل مبيكدبش زي القطنه بالظبط بس انا معترضه اييوووووون انا ماخدتش الشيكولا بتاعتى يا اونكل والله وانا مبحبش غير هيرشيز ولاحظت ان كل حاجه رخصت الا هى وبقدم التماس ليك علشان ترخصها يعنى حرام تلاته جنيه وخمشه وشبعون قرش ادفعهم غير ان غالبا مبلاقيهاش غير فى شون ذا رن فانا اشجب واعترم واطالب بالشيكولا بتاعتى
ونصيحه اخويه يا معلم الشعب مش محتاج شيكولا الشعب محتاج الاحترام من ولادك يا كبير العيله محتاج الكبار يخفوا عنهم علشان ميطلعوش تتتيييييييت ابونا احنا او على الاقل الغلابه
وشكرا لكم لحسن فرستنا بالقوي

شكر بترتر اتنين
========


لابو عوكل يعنى الادب يعنى الاخلاق يعنى الكبير والله يا ريس جمايلك مغرقانا فى بحر فى جو فى حتى حله شوربه ولا مايوه محوق ولا علمنى العوم والنبى يا سمسم نافع برضه:)
يعنى هتدينا اجازه يوم عيد الشوربه طيب انا موافقه بس على شرط اروح القسم الاقى ظابوط كده مستحمي ويقولى احنا اجازه النهارده ...ها كده عدانى العيب واتزحلق ملكش عندي حجه اهو هسمع كلامك لاول مره لا مش لاول زي كل مره فى حياتى
بجد احنا مش محتاجين اجازتهم احنا محتاجين امممممم انظر الكام سطر اللى قبلك ايون اشمعنى انتم هريتونا فى كتب الوزراه انظر ص 34 ومعرفش ليه الرقم ده هو كده

ميرسي بترتر ثلاثه
================


يا اونكل عادلى معلش نسيت اقول لحضرتك انت بتقول مفيش تحرش وهو مش ظاهره اه فعلا احنا شعب نمرود قرود فعلا هو مفيش تحبرش ده فيه تلزيق فى الناس بس هو يا اونكل مش قلت لحضرتك يا ريت تنزل بس من الهامرشيدس وتبص على الشعب ابن النمرود ده علشان تشوف ولا اللينسيز مش جايبه حاجه معاك خالص عموما ممكن اتبرع لك انا والشعب ....وانا بما انى امبراطوره هحكم عليه بده انه يتبرع لك وتعمل نظاره على حسابنا او حتى نشترك لك فى التاميم الصحى الا صحيح انت عندك تاميم صحى زينا كده اللى بيعمل للناس اسواء نضارات
يا رااااجل ده حتى العيال الصغيره اتعلمت تتحبرش ولسه جايبه اتنين متحبرشين بكاوتش عربيتى عيب كده والله طيب العربيه ترد تعمل ايه غير انها شغلت الانذار ورقعت بالصوت البطوطي ولما خافت من الفضيحه قامت طبت سكته يا قلبى عليكي يا بطوطي

ثانك يو بترتر اربعه
====================


وان مكنتش انت تدلعنى مين هيدلعنى مع كامل احترامي لعمرو موسي طبعا كلنا شوفناه واللى عمله فى مؤتمر دارفوس دي ولما قام ومبقاش عارف يعمل ايه يمشى ولا يقعد وبقيت حسه انه بيغنى مشينا كتير تعبنا كتير لمحمد وفؤاد وفى الاخر قعد
بس بصراحه انا احترمته الوحيد اللى لما برر تصرفه برره بحاجه بجد كويسه وقال كان لازم استنى يا هوا علشان لو ابو بريزه قال كلمه كده او كده وانا ... وبصراحه معاه حق ابوبريزه ده راجل لئيمه وعمال يتكلم وانا مقطعه الملايات من العياط بصراحه والشحتفه اه بجد صعب عليا بس بجد البتاع ده مصدق نفسه وهو كده كائن هلامي جمبري بكلامه ابو ريحه وحشه ده
انا بقى واحده من الناس احترمته لانه عامل الشعب ده على انه بيفهم
ومن هنا بجد بقوله السيده فى ضهرك والعدرا فى وشك يا جدع اى حد يقول اي حاجه من باقى الحلوين يا ريت تطلع انت تصحح غلطهم وخليهاعليك يا كبير ولو معملتش كده هكنس عليك صلاح سالم رايح جاي ويبقى حرام عليك انا واحده صاحبه مرض وبطوط مع بعض

جراتسيا بترتر خمسه
==================


يا عم القطنه قولنا انها بتكدب مش قلنا قبل كده كدب مساوي ولا صدق منعكش افيش فايده برضه مصمم انك تضحك علينا برضه تطلع تقول اقتصاد مصر متاثرش ايييييون فعلا هو بقى اوزعه مش اتقصر يا راجل ده الحاجات رخصت ومحدش بيشتري طيب يرضى زمتك اللى باستك دى
طيب انا مش راح ارد عليك علشان مانتى قالت ليه مترديش على حد اطول منك
وبهذا تنتهى نشره الاخبار المحليه من غير سكر وعشانا عليك يا رب

كان معكم ابى هانم المحروسه من امام تصريحات كبار مصر المأروصه

حكمه الامبراطوره

عامل فيها معلم ولا عارف يتكلم


Holocaust in Palestine




الفيديوهات دى معموله على اليوتيوب يا شوباب وعاوزين نوزعها مش هنطبعها يعنى لا
ممكن تأخدوا اللينكات وتبعتوها على الفيس توؤ او على الايميلات
او حطوها فى مدونات فى الدولاب فى اى مكان المهم ان الموضوع ده ينتشر
ودى مقارنه ما بين الهولوكوست اللى اتعمل زمان واللى عملوه الصهاينه دلوقتى فى الفلسطنين


الموضوع كله هنا
انطح هنا عند الحاجه نواره اقروا وانتم هتفهموا
على فكره علشان محدش برضه يسالنى الحاجات دى بتجيب نتيجه اقولكم اه والله و

ادخلوا هنا برضه واحد يهودى يهووووووودى اسمه
البروفيسور فنلكشتاين نشر الصور بتاعت الهولوكوست دى تخيلوا بقى مش يبقى عيب علينا هما يعملوا كده واحنا نقعد نشغل سيمفونيه مص الليمون ونتحسر وخلاص
انطح وشوف




النهارده اسامه عبد العال عمل يوم التدوينه السوداء ودى تضامن مع اهل غزة فكرتها زى التدوينه البيضاء بالظبط هترفع البانر وتكتب التدوينه السوداء
انطح هنا وشوف

قدامكم مهمتين سهلين خالص مش هيحتاجوا تفكير ولا ارهاق يا ريت نعملهم يا ريت يا شوباب انا عارفه ان دماغكوا هتوجعكوا من كتر النطح بس معلش عندى انا دى هنزل المشاريب فى الكوكب ببلاش النهارده اهم حاجه موضوع الفيديوهات اللى عند نواره وتكتبوا العنوان زى ما انا كاتبه او هلوكوست وخلاص نردها لكم يا رب كده فى الافراح ويوم ما تتجنن الصهاينه وومعاهم ابو عوكل وعوكل وكل اللى زيهم


كان معكم لواء مدرع عباسيه حد جاى ابى هانم


حكمه الامبراطورة


كدابه وعويله وخبيتها ثقيله


مفاهيم مقلوبه



احنا ليه الشعب الوحيد اللى عنده المفاهيم مغلوطه يعنى كل كلمه بتتفهم بقفاها مش بوشها
يمكن ده علشان احنا مش فاهمين نفسيتنا ولا حياتنا ولا اصلا محدش بيكلف مخه يفهم
هقولكم ايه الكلام علشان اتجنب فقع مرارتى اللى بقت عامله زى الاسكريتش دى ومفيش فايده برضه هتتفقع

الطيبه ...... ناس بتقول على الطيبه هبل مع ان الطيبه ده شئ تانى خلص الهبل ده حد مبيفهمش ومعندوش مخ انما الطيب حد بيسامح قلبه ابيض بيتعامل على فطرته وبيفترض حسن النيه فى الناس ومش معنى كده نديله كل مره على قفاه لان هيجى وقت ويشوط فى اللى قدامه

البخل ....ناس بتقول عليه حرص طيب بخل المشاعر ايه بخل الواجبات ايه وبخل التفكير ايه

النكد..... ناس بتقول على الناس النكديه عاقلين طيب ازاى عاقلين وهما عقدين حواجبهم ليل ونهار وتشوفهم تتخض

تقل الدم ... بيقولواراسى وعاقل يعنى تلاقى واحد عمال يقول كلام ولما متفهموش يقولك دى دعابه اللى فى نهايته لازم يقولك انها مزحه انها دعابه وهو اصلا دمه تقيل ليه اطلق عليه انه هادى او عاقل

البارد ..... الشخص البارد فى قراراته او حياته او تعاملاته يقولوا برضه عاقل وحكيم اه بس مش حكيم اللى بيغنى على فكره فيه قرارات فى حياة الانسان لازم تاخدها بسرعه لان لو اتاجلت بجد ممكن يبقى خلاص الوقت انتهى ومبقاش ينفع خالص والحياه ولااشخاص بتتغير

الافاق المنافق ...... يقولوا مجامل تلاقيه عامل زى الزرافه الطويله الهبله كده ماشيه برقابتها الهبله وعامل نفسها قياديه وهى المرشد العام للناس فى حياتهم وهو هفأ وخيبه وكل الناس مبتكونش طيقاه وحركاته قرعه ومكشوفه

المؤدب....... ناس تقول عليه يا عينى مكسور الجناح وميقدرش يعمل حاجه
بس فيه فرق بين التربيه وبين الناس اللى متربيه على الارصفه والحوارى والشوارع ولاد الناس مبيردوش ومبيلموش الزباله من تحت رجليهم بيدوسوا عليها ومش ضعف دى كرامه وعزة نفس

قليل الادب ....ده جرئ مش عارفه على اى اساس بيقولوا على قليل الادب جرئ طيب بيكون جرئ فى ايه فى طوله لسانه ولا فى كره الناس ليه على فكره مفيش اسهل من قله الادب وصعب اوى ان الواحد يبقى متربى انما احنا فى زمن فعلا كتره فيه الناس اللى مش محترمه

المغرور.... .. عمر المغرور ما كان واثق من نفسه فيه ناس استغفر الله العظيم شكلا وموضوعا وفكرا ومستوى اجتماعى واخلاقى بجد يعنى تخطوا مرحله الصفر بكتير وتلاقيهم بيتكلموا بتعالى على ايه مش عارفه بس ده راجع لنقص فى حياتهم وفى خلل فى حاجه من دول يعنى فى الشكل الاخلاق اى حاجه بس مش عارفه ليه الناس تقول عليهم وهما يقولوا على نفسهم انهم واثقين من نفسهم دول كبيرهم يثقوا ان بجد الناس بتلعن اليوم اللى عرفتهم فيه

فيه ناس عامله نفسها مثقفه وحاشره مناخيرها فى كل حاجه وهو جاهل ولا عنده ذوق ولا فكر ولو سالته عن كتب قيمه يتكعبل فى لسانه وهو على راى البوهى ايه مواصفات المثقف الجامد اخر حاجه
وفيه ناس تقول للناس اللبس ده مش لايق على بعضه وتبص له تلاقيه لابس لبس شبه حاله التورلى ومش لايق على شكله كمان وتلاقيه بيتنك على الناس وهو شكله ملعبك فى بعضياته ولا جسم ولا عقل ولا لبس

ويا ريت كل واحد يبص لنفسه فى المرايا قبل ما يفتكر نفسه فالنتينو او تفتكر نفسها افروديت الهه الحب

اكتشاف عظيم بقى ليه اخيرا ان فيه ولاد اى والله بتغير من البنات يعنى مثلا ولد يغير اوى لما يلاقى ناس بنات وولاد بيحبوا بنت ومهتمين بيها وكمان واحد تانى يقعد يقول مثلا لواحده لا عيب فلان ده يقول كذا على زميلتنا ازاى ودى مش اخلاق ودى قله ادب وتانى يوم يبقى ماشى معاه يا ريت حد يسمعنى زغروطه للشخصيه دى لان بجد لو وقعت تحت سنانى هقطعها وارميها للاسوده والنموره ياكلوها واكيد هيجى لهم تسمم من الشخصيه دى


ملحوسه :- على فكره انا لما فتحت الكوكب ده فتحته علشان اكتب سلبيات فى حياتنا وانتقض واشكر فى حاجات يعنى مش علشان اكتب ذكريات عنى حتى لو كتبت موقف شخصى بكتبه مش علشان افضفض ولا اتباهى بيه لا علشان نتعلم منه حاجه فاكيد مش كل موضوعاتى نابعه من مواقف شخصيه ولا من اسقاطات لان الحمد لله فى الحقيقه لما حد بيضايقنى هو عارف ان اخره معايا تحت الشوز بتاعى فارجو من الفياكين والفيكونات انهم يرحموا حضرتى من انهم يقولوا مين ضايقك لان جناب سعادتى هيطق قريب وينفجر وفرامل لسانى هتفوت تانى ويا جدعان التيل الاصلى غالى ومحدش يجيبه لروحه بقى وقد فنذر من بعجر
لان اللى بيضايقنى عندى موبيل اعرف اكلمه عليه واقدر امسح بيه الارض رايح جاى لغايه لما يبان له صاحب ده لو حظه حلو ومقبلتوش شخصيا


كان معكم سياده لواء اركان حرب عميد متقاعد دكتور مهندس ابى هانم وتوب علينا يا رب

حكمه الامبراطورة

راحه الانسان تبدأ من أذنيه

Share |