الاقاليم طلعت اجدع من العواصم يا رجاله





انا جيت الكوكب تانى
هاى عليكم يا فياكين يا اصحابى ويا فيكونات انا اكتشفت ايه بقى ان مش انا لوحدى اللى نفشت ريشى دى العيله كلها وهقولكم ازاى بعدين .
الصور اللى فوق دى بالترتيب كده شكل العيش فى الفرن اللى قدام البيت وبما انه رايق موت وهتعرفوا ليه انا دخلت زى الاسد الفيكونى وصورت بقلب جامد وكلمه فى سركم الفرن قدام البيت على طول ههههههههه فالسيطرة موجوده .
وبعدين البطاقه اللى معموله علشان نستلم بيها المخضروات قصدى العيش وبعدين صورة داخليه خارجيه ليله للبطاقه مقسمه شهور وسياده المفنتش بتاع التنوين اللى فى الفرن بيمضى فيها بالشهر مش معقول هيمضى باليوم ده يبقى وجع دماغ ههههههههه
رحت اكتشفت ايه انهم عملوا بطايق لاستلام العيش وده بصراحه اختراع خزعبلى وخطوة تقدميه انتحاريه من حكومتنا الغير احممم احممم ومش انا اللى بقول لا والله الناس لان عمرنا فى البيت ما كنا هنحس بالموضوع ده بما ان ماما مسيطرة على المنطقه هى ووالدى العزيز فايه بقى بينفشوا ريشهم على الناس ويقفوا فى البلكونه ويشاورا عاوزين بكام عيش وبعدين الولد اللى فى الفرن ينادى عليهم يأخدوا العيش ههههههههههههه
لقيت المجلس المحلى عمل البطايق دى والناس هى اللى بتحدد هى عاوزة بكام يعنى فى اليوم بخمسين قرش ولا بخمسه وسبعين والرغيف بخمس قروش بس آه والله ده لسه حاجه بالثمن ده والله انا احترمت الخمسه قروش دى
المهم عملوا حاجه زى مجلس ادارة الحى بيختاروا ناس كبيرة وهما اللى بيكونوا مسئولين عن الموضوع ويلموا 4 جنيه من كل واحد ويعملوا البطايق لاهل المنطقه اللى فيها الفرن وبعدين كل يوم لما الفرن يشتغل يتنقل العيش لمحل على اول الشارع والناس تسلم البطاقه وينادوا عليهم كل واحد باسمه يستلم العيش بتاعه ...... بس فيه افران تانيه بتوصل للبيت وانت وذوقك بقى تدى للولد اللى جايب لك العيش تيبس او لا.
طبعا الموضوع ده بصراحه عمل حاجات حلوة كتير جدا اولها فيه ناس اشتغلت التلات ساعات بتوع الفرن دول يعنى وظفوهم شهريا ب150جنيه اللى بيقفوا فى المحل وينقلوا العيش تانى حاجه مبقاش فيه زحمه ولا سرقات لان بجد بابا واخويا حكوا ليه على مهازل بتحصل عند الافران يعنى واحد غلبان بيشتغل على عربيه كارو كان معاه 70جنيه وواحد ابن تييييييييييييت سرقهم منه والراجل ياعينى قعد يدور عليهم لدرجه انه رجع الساعه11 بالليل يدور تانى فشباب الشارع واخويا قالوا له روح ومتقطعش قلبنا عليك ولما من بعض للراجل فلوس من معاهم .....غير سرقه موبيلات فى الزحمه وبلاوى طبعا تانيه انتم عارفينها فى الزحمه بقى والحركات من الناس اللى مش محترمه.
هتتلمضوا طبعا وتنطحوا زى خرفانى وتقولوا ما فيه زحمه على المحل اللى بيسلموا منه العيش هقولكم لا لان الناس بقت تروح بعد ما الفرن يشتغل بساعه يكون عيش كتير طلع فمش بيقفوا كتير يسنوا غير كده المحل فى مكان واسع والناس واقفه عارفه ان مفيش محسوبيات ولا بتنجانات و(قطعوا الفرصه على امى انها تنادى من البلكونه وانا فرحانه فيها هههههههههههههههه).
غير كده بقى اللى اكتشفته فى حكومتنا الفزيعه المريعه الشنيعه انهم اغبياء اخر حاجه بمعنى احنا عندنا افران كتير فده مغطى كل منطقه تقريبا بيكون فيها فرن او اتنين تعالوا بقى فى القاهرة تلاقوا فى القاهرة الجديدة مثلا كلها فرن واحد يعنى سوء توزيع ومن هنا بيجى القتل والسرقه والزحمه والازمه اللى من غير لازمه طيب يا حكومه تايهه من نفسها ما ترخصى لافران العيش المدعم وهيبقى فيه وافرة فى كل حاجه انما تقول ايه لناس دماغها مزنوقه فى كعب جزمتها .
الاحلى كمان بصراحه اللى شوفتها التعاون اللى بين الناس عندنا يعنى لو العيش خلص من المحل تلاقى الشباب بتوع الشارع يجروا على الفرن يجيبوا الاقفاص ويودوها مش علشان يأخدواعيش لا علشان يساعدوا الناس ده غير اللى بيشتغلوا ويأخدوا فلوس
وكمان واحد عنده عربيه بحمار صغنتوت كده سكر بيحمل عليها العيش وينقله وده من غير فلوس .
طيب الحكومه المتأندله بقى بتاعتنا دى مش بتعمل كده ليه فى كل الاماكن والله انا شايفه ان الموضوع كويس جدا وانتم هتشوفوا شكل العيش والوزن بتاعه 120جرام بالظبط والحصه بتطلع كامله يعنى مفيش سرقه .
طيب لو الناس راعت ضميرها فى الافران والحكومه اتحركت بدل ما هما قاعددين فى التكيفات اللهى الدور اللى فوق يقع على دماغتهم ولا يوعدهم بقرد اهبل يطنطط فى دماغهم ولا دبور عبيط يدخل ودانهم ....
وبليز بلاش تحسدوا الرغيف عندنا اصل بصراحه شكله هتشوفوه وطمعه زى السكر ههههههههههه (بطلع لكم لسانى )
لا بجد يا جماعه اللى فى منطقه يحاول ينفذ الموضوع ده ويروح الحى وطالبوا بيه بلاش تروحوا الافران خلو العيش يجلكم انا شايفه انه كويس جدا .
اقولكم ليه انا اكتشفت اننا عيله نافشه ريشها على طول الحاج والدى العزيز حبيبى بيقف مع الناس على اعتبار انه من الناس الكبيرة فى الحى يعنى لما الناس أخدت العيش وفيه ناس مرحتش مش عاوزين ايه بقى باقى مجلس الادارة بتاع الحى نده فى الجامع ان فيه عيش زياده للى عاوز وخاصه ان اقصى حاجه ممكن تأخدها هما 15 رغيف فى اليوم بس فدى فكرة كويسه اللى عاوز زياده يروح المهم فيه ناس راحوا يشتروا بتوع مجلس الادارة المنيلين عاوزين يبيعوا ال15رغيق بجنيه وهو اصلا بخمسه وسبعين قرش وهنا بابا بقى مش فرامل لسانه اللى فلتت لا ده كل الموتور باظ وزعق وتييييييييييييييييت وانا بقى التييييييييييييت بتاعت بابا مش زى التييييييييييييت بتاعتنا واتحدى اذا حد وقف قدامه وفهم هو بيقول تيييييييييت ايه بما انه من العريش فمحدش بيفهم قوى التييييييييت وهو بيتعمد يعمل كده وراح تانى يوم للمجلس المحلى بتاع المدينه واشتكى لرئيس المجلس وقاله انتم اولى تعالوا امسكوا الموضوع ولو هتغلوا على الناس وتكسبوا الربع جنيه خدوه بس اعملوا بيه لنا خدمات احسن المهم قاله لا خالص حضرتك مؤقتا امسكوه انتم لغايه لما نظبط وهنمسكه احنا
وراح بابا تانى والناس زعلت منه قالهم انا مش هقبل نأخد حق حد وليه ننصب على ا لناس هنبقى احنا والحكومه يعنى بجد صعب عليه قال هو لو الحكومه مسرقتناش نسرق بعض وبعدها بقالهم كام يوم ماشين زى النمل على السطر هههههههه.
وصح كلامه مظبوط احنا ليه بنيجى على بعض كده حرام والله يعنى مينفعش نعمل حاجه كويسه بس سيبكوا طول ما الحاج موجود الوضع تحت السيطرة هههههههههههههه والكل بيعمل له الف حساب وانا اكتشفت انا جبت عرق التناكه ونفش الريش منين طلع من بابتى حبيبى.

ملحوسه منحوسه مبسوسه :-
والناس اللى بتقولى على الاغانى انا عامله لكم برنامج ما يطلبه المدونون علشان ادلعكم بس ما هو مش لازم يبقى قلل وخرفان يعنى شويه دلع كده علشان الكوكب ميكونش خنقه وبلاش النيات الوحشه انا بحذر .........واحد بس اللى ييقى نيته وحشه هههههههههه مش كلكم وهو عارف نفسه اتهدوا بقى .

كان معكم مراسلكم دكتور استاذ لواء جزار آبى كعب الغزال المتحنى من امام فرن ابو عزيزة


81 اخبط وقول رايك:

ka2en Makboot said...

السلام عليكم

اخيرررررررا وصلت

آآبى بجد البلوج بتاعك تقيل مش عارفة ليه , ابقى شوفى يمكن في خروف من خرفانك محشور في كابل الداتا هههههههه

بوست جميل وواقعى والف مبروك مشكلة العبش اتحلت عندكم

لكن اهل القاهرة بسبب الكثافة العالية اعتقد احنا نحلها بتصفية جسدية خفيفة كدا علشان نخف الكثافة

وبعدين تبقى الحكومة الموقرة تحللنا مشاكلنا

عض قلبى ولا تعض رغيفى
ده حتى حاف من غير بيفى

عصفور المدينة said...

يارب يستمر بس تطور إيجابي

Empress appy said...

كائن مائى

حبيبه قلبى الفيكون المائى الغالى هههههههههه ما هو انا فى القاهرة يا حبيبتى ده بيت العيله بس هناك ما هوانا كمان بعانى من العيش اللى لا يرى بالعين المجرده ده بس حلك مظبوط هنحاول نراعيه واقدمه للمسئولين ههههههههههه
وانا هشوف الخروف الغبى ده تلاقيه كان داخل خيمه ولا حاجه فى الكوكب اتحشر فى الكابل وكسبتى معانا 3 كيلو ارز وابقى قابلينى اذا عرفتى تطبخيهم هههههههههههههههههههه





استاذى عصفور المدينه

يااااااا وانا اقول ايه النور ده كله اللى مغطى على الكوكب يارب يا استاذى تتحل فى الباقى والناس تتحرك

Desert cat said...

اولا حمد الله على سلامتك يا قمر
ثانيا انتى فرحانة فى مامتك علشان مش هتقف فى البلاكونة وتتشترى اللى هى عايزاه من العيش
وانتى اللى كنتى لسه امبارح بتغنى لها ست الحبيبة يا حبيبه
بالنسبة لموضوع العيش والمخضروات والاسواق والحوارات دى انا مقدرش افتى فيها اصلى للاسف مش بقف لا فى طابور عيش ولا بنزل سوق علشان فى حد عندنا بيجيب لنا طلبات البيت كل يوم
عموما الايجابيات اللى حصلت عندكو فيها بارقة امل ولو النظام ده فعلا اتعمم الناس هتستريح من الطوابير .. كل سنة وانتى طيبة يا قمر

Hossam Nasr said...

السيدة Appy
شكر الله لك البشرى ونتمنى أن تستمر هذه الجهود الإيجابية نحو حل مشكلة قوت الفقراء.
ولن تكون آخر زيارة إن شاء الرحمن

كلاكيت تانى وتانى said...

اهلا ياجميل البوست يجنن وتعبيراتك رائعة وجديدة موووووت
ع العموم بالنسبة للعيش انا باكل عيش من الفرن اللى فبلكونتنا مش من الشارع ولسة فأجازة من الشغل فمعرفش الدنيا ماشية ازاى بس مش كل المحافظات للأسف متطبق فيها القصة دى
ولو اتطبيقت بحد يبقة خير لأنى لما برجع الشغل زمايلى بيجننونى عشان اشاور لبتاع الفرن يبعتلهم العيش عالشغل من نظام انتى واصلة والراجل ما بيصدق تصبحى علية وكدة يعنى
وعشان مزعلهمش باخد كلام من عينة ص القل ياقمر والفرن نور ياجميل وكدة وبستعين بالكاظمين الغيظ ععشان تعدى ومقتلوش
يارب تتطبق عندنا يارب

الطائر الحزين said...

انتى كنتى طلبتى العنوان مش كدة


ما انتى كدة كدة بتعدى علينا

ابقى فوتى اى حاجة يا ستى


ارى ان هذه المشكلة ليست بنقص الدقيق أو سرقته او بيعه فى السوق السوداء لان كل هذا موجود من قبل

المشكلة انهم عاوزين يعملوها مشكلة



تحياتى

الربان said...

تحياتي

مشكلتنا في مصر سوء الادارة...نعم ..سوء الادارة...تعرفي اخر ازمة في الازمات ايه؟ ما هو احنا لازم كل يوم تطلع لنا ازمة جديدة ...
اخر ازمة ان لوحات السيارات الجديدة
التي يتم صرفها في المرور عند الترخيص لاول مرة غير موجودة....بها ازمة...قرأت
الخبر في اخبار اليوم و ضحكت فشر البلية
ما يضحك..... يعني اللوحات لا تباع في السوق السوداء...و لا سعرها في المرور
اقل من سعلا السوق....و لا محلات الحلويات
بيستخدموها....اليس هذه حجج رغيف الخبز؟؟

الحكومة ذكية بجد...و حتي اسالوا اي مسؤول فيها...هايقول كلة تمام...و معدل النمو وصل 13 % و الشعب مفتري
و لا يستحق الحكومة.


تحياتي و تقديري

بنت الاسلام said...

اخيرررررا بقي في حلول للازمة الفزيعة

عقبالنا يارب عقبالنا

ماما برده بتحب تنده من الشباك وتزعق

مش عارفة غيتهم في كدة ايه

الصورة بدات توضح

والالام في امل تتحول للمحات فرح

بس احنا نشارك

بس

ونقول

ياااااااااااارب

تحياتي

Anonymous said...

كل الموضوع الطويل العريض ده علشان تعرفينا إنكم عيلة نافشة ريشها وسخصيات مهمة يعني في المنطقة
كنتي وفرتي علينا وقولتي كده من الأول يارح رح
وإيه التيييييييييييييت دي اللي كل شوية ؟؟ إبقى قوليهالي بيني وبينك
ولو سمحتي بإتنين جنيه عيش بس بسرعة علشان مستعجل

Empress appy said...

قطه الصحراء
يا قطتى الحلوة اصل الناس كانت بتصعب عليا ههههههههه امى بتأخد العيش والناس بتقف فى الشمس ففرحت فيها هههههههههه وكل سنه وانتى طيبه يا سكر




Whispers just for a Night
يا رب تستمر وتنور دايما كوكبى المتواضع ميرسى خالص لوجودك



كلاكيت تانى وتانى

انفشى ريشك عليه وابقى قابلينى لو ادالك عيش ههههههههههههه طي ما هو كويس انكم بتخبزوا ده عندنا فى البلاد الفلاحين مش بيرضوا يخبزوا بيكسلوا وبقت حاجه نيله

د/اجدع بنوته said...

طب والله العظيم فكره ولا اروع

تحياتى لللى فكر فيها

وتحياتى للسيد الوالد

وانا اقول أأأبى طالعه منفوشه لمين

بس احنا الحمدلله ف محافظة الشرقيه

معندناش ازمه ف العيش

فكل الامور متظبطه والحمدلله

Empress appy said...

استاذى// الطائر الحزين


يا سلام حضرتك تؤمرنى بس تفتكر انهم عاوزين فعلا يعملوها مشكله بس طيب والناس اممممممممم مش عارف ربنا يهدى ويعملوا حاجه ايجابيه بجد الناس بقت بتأكل بعضهابس انا حسه ان وراء الامور امور طيب ايه هى مشعارفه بس عندى امل تكون كويسه ولا انا متفائله زياده شويه



الربان

اهلا وسهلا ايه النور ده كله فعلا مشكله المرور انا عشتها بجد بس انا كنت جايبه واسطه علشان اخد نمر حلوة ههههههههههههههه والله حكومتنا اذكى حكومه بس من الاخر فى التاريخ حكومه متكهربا عندها كهربا زياده فى دواخيل مخها ههههههههههههه نورتنى يا استاذى



بنت الاسلام

يا رب يا بطوط تتحل فى كل مكان ان شاء الله بس انا فرحت فى امى خلاص ههههههههههه واتبسطت كل سنه وماما طيبه يا بطوطه

Empress appy said...

د/علام

ابو طويله انا بحنذرك من التيييييييييت بتاعت بابا انت عارف انا طالعه له فى كل حاجه ههههههههههههه نورتنى يا دكتور



د/أجدع بنوته
والله يا سمسم هى المفروض تتعمم على كله والاكتر العواصم والقاهرة بالذات وده امل فى ان الحال يتصلح الحكومه بدأت تاخد خطوة
شوفتى بقى النفش جاى منين ههههههههه

la3lahakhier said...

السلام عليكم يا ستى
على فكرة الحكاية دى موجودة فى مدن كتير وانا شخصيا بجيب العيش من البلد ماما بيتعتهولى فاكسا وبقت فضيحة والنبى يا ختى تاخدى لبتى عيش معاكى فى مصر لاحسن معندهمش عيش
وما ماشاء العيش كبييييييييييييييييير ولونه حلو كدا وماما تفضل تقولى شفتى اهو انتقام ربنا فيك انك اعدة فى مصر كان زمان والكه عيش لكرامتك
بس ولوووووووووو
تحياتى

سمية said...

بجد اسلوبك فى البوست ده سكر اوى

والله لو الناس كلها عملت كده فى كل حاجة ماشية غلط البلد دى هينصلح حالها..

كتر الله من امثالك انت و العائلة الكريمة

تحياتى لك و لهم

همس الاحباب said...

حمدلله على السلامة
جيتى من المنصورة منصورة يا ابى
والله فكرة جميلة قوى بتاعت العيش بالبطاقة
احنا عندنا فى الصعيد العيال الصغيرة بتوديه لينا لحد البيت
واحيانا بنوزع منه على الجيران ببلاش
بس نعمل ايه انا عندى المودام حبت تعمل ناصحة نزلت تجيب عيش الساعة 7 الصبح رجعت 12 الظهر
لدرجة كنت اجيب منادى او اكتب خرج ولم يعد
تحياتى ليكى

عبده الرايق said...

وبما انه رايق موت وهتعرفوا ليه انا دخلت زى الاسد الفيكونى
-------
انا سعيد ومتشكر مس ابى انكى حطيطى اسمى فى البوست الجميل ده
رايق
بجد انا نفشت ريشى
ايام فرى هابى

مصطفى فتحي said...

يا ريت ده يستمر على طول
تحياتي

رئيس جمهوريه نفسى said...

ازمه العيش ليها اسباب كتير وحلها سهل والله بس هى الفكره من المستفيد من موضوع الزحمه على العيش وانى الشعب يتحط فى مطحنه البحث عن لقمه العيش

بحبك يامصر said...

اببى
النظام العيب فى النظام يا.......طبعا انا مقصدش النظام اياه لا اعوذ بالله انا اقصد النظام بجد شوفنا ازاى لما الناس نظمت نفسها مشكلتهم فى العيش اتحلت واكيد لو نظمنا نفسنا فى كل مشاكلنا اكيد هنلاقى لها حل
تحياتى للعائله الايجابيه

فاتيما said...

آبى الجميلة
متشوفيلنا شقة جنبك يا بيبى ...
و فرحانة فى مامتك يا بنت دا لسه عيد الام مفتش عليه 48 ساعة حتى ...
يللا عقيال ما تتحل فى كل البلد و منطرش لسماع التييييت بتاعة الوالد العزيز
تحياتى و حرصى بقى عشان المغص ...
الف عين بصالك فى العيش دا ..
انا حذرتك أهو

فرنسا هانم said...

وانا اقول نفشه الريش دى منين
اتارى بالصلاه على النبى نمسك الخشب
فين ايد الرايق اهو اى حاجه خشب وخلاص

اتارى العيله كلها واخده حقها
بجد عجبنى وقوف الوالد ضد بتوع العيش
فعلا لازم كل واحد مننا يحاول ياخد حقه
والا
هنضيع فى الرجلين

mohand said...

اه الموضوع ده حصل في اغلب الاقاليم بعد ما عملوا نظام اللامركزيه في الدعم

وبعد مشروع قرار اللي مش عارف اتنفذ ولا لاء

فصل الانتاج عن التوزيع

ويا بختك بالعيش بتاعك

ومش هحسدك بقي

ههههههههههههههههه

Anonymous said...

أختى الغزيزة / آبى
أولا : حمد لله على سلامة الوصول للكوكب .
ثانيا : أنتى تقريبا ساكنه فى توريل .
ثالثا :ثلاثة أرباع سكان الدقهلية بيشتروا العيش من بورسعيد.
رابعا :وده المهم تحقيق فى المسائى الاسبوعى ملايين الجنيهات غرامات تهريب الدقيق فى أول ثلاثة أيام من تنبيهات السيد الرئيس و على رأى أخويا سوووووو سلاموزززززز
أبو خالد

Anonymous said...

آبى العزيزة
خامسا : دى برضوا الوصية اللى و صيتها لك قبل السفر أن تقبلى يد أمك و قدمها فرحانه فيها ده كلام يا آبى .
أبو خالد

nigro said...

فيه مقولة خالدة بتقول
طابور العيش هو مصنع الرجال
فاللي ملهوش خير في المصنع
ملهوش خير في الرجال
اشرح العبارة السابقة
*********************************
بجد يا آبي فكرة و لا أحلى و لا أجمل
الحل سهل بس اللي يفكر و يشتغل
عجباني قوي روح الجماعة اللي في منطقتكم دي
و ربنا يخليلك بابتك حبيبك و مامتك اللي فرحانة فيها

في حب مصر said...

آبي الجميلة
بوست جميل
بس مش هاقول غير حاجة وحدة

مفيش اي بلد في العالم دلوقت سواء كانت فقيرة او غنية بتعاني من ازمة عيش غير مصر
في الصومال فيه مجاعات لكن مفيش ازمة عيش.. في الهند 1.2 مليار شخص وفيها فقرا كتييييييييييييير قوي بس مفيش ازمة عيش..الحكومة بتعمل مشاريع الكترونية وقرى ذكية ومش قادرة توفر العيش الحاف للناس.. سلامات يا حكومة..ههههههه

حمادة زيدان said...

والله يا أبي أنا عن نفسي لغاية الآن معرفش اى حاجة عن موضوع العيش الا اللي بشوفوا فى التلفزيون وده لسبب صغنون اننا بنجيبب العيش من السوبر ماركت !!! والله بجد بنجيبوا من هناك ويومياً أكتر من 8 جنية عيش ... والله مش فلوسنا كتير ولا حاجة بس بناخد بالمثل اللى بيقول
الباب اللي يجيلك منو الريح
سدوا واستريح

موناليزا said...

ياه ده الموضوع بجد بقى انا كمان قدام بيتنا الاختراع الجديد نكونش جيران؟
بس تفتكرى الموضوع هيستمر ولا ............؟

بطوط حبوب said...

احنا العيش عندنا حلو برضه وبيجى لحد البيت
اقاليم بقى ههههههههههههههه

Cleo said...

الحقيقة أنا مش عارفة هى ميزة ولا عيب إن العيش يتباع على البطايق وفى جداول وحصص معروفة..

النظام ده لا يتبع فى أى مكان فى الدنيا إلا فى البلاد التى تعانى من حروب طاحنة مثل الحرب العالمية مثلا!!!

أنا بجد مش عارفة احنا رايحين على فين

مروة الزارع said...

اية يا حجة انا سمعتة انهم 10 ترغفة ياتامى على البطاقة ولا هيا كوسة حتى من اقليم لأقليم

ععععععععععععععععععععععااااااااااااااااااااااااااااااااااااااا

سهر الليالى said...

امممممممممم
فكرة برضو كويسة ويمكن التوصيل للمنازل يكون احسن لان فى ناس ممكن تزاحم برضو ماهى دى مصر يا عبلة

بس ربنا يستر بعد كدة منرحش فى يوم بالبطاقه يقولولنا مفيش عيش النهاردة تعالو بكرة ومش مهم تاكلو النهاردة زى ما بيعملو فى التموين

بس أنا مفهمتش هو الكلام دة فين يعنى

تحياتى

المـــفـــــــقــــــــوعـــــة مــرارتـهــا said...

أيه ده ياآبي هي البطاقة دي حقيقية مش هزار ؟؟
انا افتكرت حد كان بيهزر

روابط said...

الصديقة العزيزة آبى كعب الغزال يا متحنى , ممكن تحذفى آخر كلمتين
بعدين يا آبى حرام بوست بالطول ده كل يومين , ويمكن ده اللى جعل كائن مائى يصف البلوج بالتقل , حاول تختصرى شوية .. حاولى
اما موضوع رغيف العيش ده فشئ له العجب وحاليا هو موضوع الساعه فى مصر , بصراحة شكل الطوابير يفزع

من كتر الحرامية فى البلد بقوا يسرقوا رغيف العيش كمان وعينى عينى يتباع الدقيق فى السوق السودا وارقع دماغك يا مواطن فى اتخن حيطة

Empress appy said...

la3lahakhier

اهلا بيكى فى الكوكب ....هههههههه حلوة حكايه الفاكس دى والله بجد بقت فضيحه واهلينا ماسكنها علينا بس تعملى ايه بقى معلش نورتى الكوكب كله


سميه

حبيبة قلبى انتى اللى سكر ميرسى ليكى يا قمر ويا رب يبقى فيه نظام فعلا


همس الاحباب

ربنا يخليك يا خالد...طيب هى مراتك غاويه تعب قلب ما الحاجه بتجيلها اهو هى بس تلاقيها كانت زهقانه منك شويه هههههههههه قالت تفك ربنا يخليكوا لبعض

Empress appy said...

عبده الرايق

هو بما ان اسمك جه غلط ههههههههههه بس انا مبسوطه انك هابى يا رب دايما على طول تبقى فرى هابى


رئيس جمهوريه نفسى

اقولك ماشيين على مثل ايه معانا وانت افهمه علشان تفهم اللى وراه الهى الكلب بعضمه صح ولا موصلتش


بحبك يا مصر
النظام هو فيه زى النظام بتاعنا ده ولا الدول المتقدمه تقدر عليه هههههههههنورت الكوكب

Empress appy said...

فاتيما

حبيبة قلبى دا انا مش اشوف لكى شقه دا انا احطك جوة عنيه بس انتى تقصدى فين لو فى المنصورة فى بيتنا هناك يا ستى من الصبح افضيلك شقه فى العمارة انما لو جنبى فى القاهرة الجديده تعالى اسكنى فى شقتى وقلبى وانا عندى اعز منك انما ماما اسكتى اه احسن كانت بتزعجنى وانا نايمه وانا بكون رايحه اجازة يومين معرفش انام هههههههههههههه



فرنسا هانم

النور بتاع الكوكب كله ربنا يخليكى يا حبيبتى وبعدين ملقتيش غير خشبه الرايق تمسكيها ههههههههههه قصدى ايده يالا زى اخونا ما علينا وفعلا لو الناس تتحرك شويه بس الامل فينا احنا يا حبيبه قلبى



مهند

هو انت لسه محسدتنيش الحق اتصل بيهم هناك اعرف الفرن حصل له ايه هههههههههه وفعلا اطبق بس عندنا فى القاهرة نوووووو لسه ليه بقى مش عارفه

Empress appy said...

أخى العزيز/ابو خالد

أولا : الله يسلم حضرتك يا رب من كل شر
ثانيا : اجابه خطأ ههههههههه .
ثالثا :ايه الاوشاعات المغرضه دى لا طبعا والافران اللى عندنا دى خيال مأته هههههههه.
رابعا :وده خبر هايل بجد وحلو قوى وبادرة امل
خامسا : والله العظيم عملت كل ده بس انت مش عارف بفرح ليه كانت تخلينى نايمه وانا بروح اجازة يوم او اتنين وتقف بدرى فى البلكونه وانا الاوضه بتاعتى على البلكونه وتنادى بصوت عالى فأصحى اقوله بس يا امى عاوزة انام تقولى اصحى العصافير صحيت طيب انا مالى هو انا هأكل العصافير اللى فى الشارع فبكده هعرف انام ههههههههههههه




nigro
ايه مصنع الراجل ده لا بقولك ايه مش بحب الالغاز لو بيصنعوا الرجاله انا موافقه واحد موووووف هنا لو سمحت هههههههههه والله روح الجماعه فى كل مكان وعموما هى عجبتنى جدا وكنت مبسوطه بيها لانى ال مرة اشوفها



فى حب مصر

اهلا وسهلا هى المشكله اننا كمصريين معندناش توفير فى حاجه زى ايه فيه ناس فعلا بـاخد اكتر من حقها فى حاجات فبتيجى على ناس تانيه ...ومين قال انا حكومتنا ذكيه دى عطيات ههههههههههه

Empress appy said...

حماده زيدان

يا كاتبنا القادم ان شاء الله ....ليه مش مطبق عندكم يا حماده المفروض انه اتعمم يعنى لبس العمه بكسر العين ههههههههههه معلش يا حماده شكلك بترسم انى اجيب لك عيش بعينك ههههههههههه


موناليزا
هو انتى من السنبلاوين ولا ايه قصتك ههههههههههه هو عموما هناك بيت العز قصدى بيت العيله انما انا فى القاهرة وان شاء الله يستمر يا حبيبتى


بطوط حبوب
طيب بتصيح لنفسك ليه هتتحسد يا اينى طيب بقولك ايه بما انى اختك آبى فى القاهرة ومش بتنزل غير كل فترة المنصورة منكن تبعت ليه على الكوكب كام رغيف كده هههههههههههههههه

Empress appy said...

cleo
لا يا حبيبتى هو نظام حلو قوى بما انى كنت بشوف المهازل لما بسافر عند ماما من البلكونه فده افضل بكتير وده عامل نظام حلو قوى بجد وربنا يستر على البلد كلها نورتى يا احلى كليوباترا



مروة الزراع
حجه حجه اللهى تتهدى يا مروة ماشى بطلى زن من يوم ما عرفتك وانتى بتزنى الناس عندنا هى اللى بتحدد يا مروة يعنى يا تأخد عشرة او خمسه عشرة فهمتى مش كوسه يا محتاسه انتى خالص نورتى الكوكب يا مروتى


سهر الليالى

ايه النجوم اللى بتزيد فى الكوكب ده
لا يا قمر مينفعش يقولوا كده لان الفرن بيشتغل كل يوم
الموضوع ده اتنفذ فى المنصورة والاقاليم وبما انى بروح زيارة كل شهر مرة لبيت العيله فشوته وبما انى من القاهرة وبشترى العيش اللى لا يرى بالعين المجرده فبجيب من هناك العيش واخزنه فى الفريزر فهمتى يا سكرة

Empress appy said...

المفقوع مرارتها

اها يا حبيبى بجد عقبال عندنا فى القاهرة ويبقوا ريحونا بقى من الصداع اللى احنا فيه


حازم سويلم
ليه بس يا متر هى عيب الكلمه ولا ايه وحاضر هقص البوستات شويه بس بينى وبينك تلاقى الجهاز بتاعها قديم شويه خخخخخخخخخخخ
وبعدين فيه بودار امل لحل المشكله ومين اللى بيسرق يا حازم ما هو احنا اصحاب الافران بس

Yasser Hussein said...

مصر لسه مليانه خير
وأهلها هيفضل فيهم الخير
ولو كره الحاقدون
:)

خالص تحياتي

روابط said...

اسمعى يا آبى النكتة دى بمناسبة العيش

الريس "مبارك" راجع من دبى بعد مافرجهم عالمنتخب هناك,بص من شباك الطيارة وهو فوق مصر شاف طوابير ملهاش اول من آخر .. ام استغرب وسأل "نظيف" ايه ده

قالوا دى طوابير العيش يا فندم

رد الريس وقال

هما لسه معاهم فلوس يجيوا عيش

المنسى said...

أولا السلام عليكم
أنا أول مرة هسيب تعليق على مدونتك يآبى
على فكرة انا قعدت معاكو قبل كده ممكن ماتفتكرينيش كان فى صالون الجيزاوى الثقافى إللى مش ثقافى
ماعلينا كوكبك لذيذ
بس إللى مسعجبله فى موضوع العيش إزاى دولة ذات سيادة جمهورية مصر العربية حبيبتى إللى نا بعشقها يبقى شغلها إلشاغل إزاى تأكل مواطنيها عيش حاف
وإزاى المواطن المصرى المسالم بقى بيقتل أخوه على طابور العيش المفروض أننا محتلين يعنى لازم إيدينا تكون فى إيدين بعض ولا إنتو مش معايا إننا محتلين

المنسى said...

http://elmancy2000.blogspot.com/

Empress appy said...

ياسر حسن

طبعا ودى وجهه نظرى انا كمان بس العيال جابوا ليه احباط ربنا يستر ميرسى لزيارتك



حازم سويلم
ههههههههههههههههههههه ما هو لازم يخلص على اى حاجه بس العيب فينا يا حازم احنا سلبيين



المنسى
اهلا وسهلا بيك بس مين قال ان الجيزاوى بيعمل صالون ثقافى هههههههههه ده صالون بتنجانى يا سيدى كبر دماغك المهم اهلا بيك فى عالم التدوين وممكن تفكرنى بيك

only spot said...

سلام عليكم
على حسب كلامك يا ابى ان المشكله اتحلت بايد الناس وبتنظيمهم وده ايجابى وعلى حسب كلامك ان المسؤلين خلاعون من الموضوع بتاع العيش ده ومكلفين الناس الكبار بالبلد بالموضوع
افهم من كده اننا هنعيش بعد كده عصر الجهود الذاتيه بقى والناس هى الى هتحل مشاكل الحكومه بنفسها
ميه ميه ولا عيش الافران بما ان الناس مش لاقيه العيش يبقى هتلاقى فراخ الجمعيه حتى قفلو كل الجمعيات الاستهلاكيه عندنا
عموما برضه اهو احسن من مفيش اهى الجكومه مش بتفتكر الشعب الا لما تتخرب ملطه
ويا عالم
تحياتى

تــــايه ومش تـــايه said...

والله جميل يا ابى ان فيه ناس زى والدك.مبيسكتش عن الحق .وكويس انك ورثتى منو دى
ربنا يخليهولك

أنا حر said...

تخيلي يا آبي وصلنا لمرحلة اننا لسا بنخترع حلول علشان الناس تشتري العيش
انا نفسي اعرف حاجة صغيرة الحكومة اللي مش عارفة تخلينا نشتري العيش ممكن تعرف تعمل ايه؟؟؟
عموما مبروك عليكي الاختراع السهل وده ومبروك وصول العيش ليكي بسلام من غير سرقة ومن غير اي خسائر في الارواح
تحياتي

Unknown said...

أنا جعان
............
على فكره
طول ماالحكومه مليانه المركزيه المريرة دي
عمرها ماهاتبقى نافعه
والكلام ده على اي حكومه
حتى الاخوان فيهم المركزية دي
وعمر العيش ولا اي حاجه هاتتحل مادام المركزيه دي موجوده
وادي الاقاليم لما مخمخوا
حلوا المشكله لوحدهم
وتيجي الدوله تقولهم
لا
مين اللي قالكم اعملوا كده
استنوا القرارات
حسبنا الله ونعم الوكيل
فينا
لاننا سايبنهم

Soooo said...

تصدقي والله العظيم فرحتيني
اه والله فرحت
في امل والله اننا نبقى كويسين
----
النهارده كنت في الشغل في قلعة الكبش في السيده زينب .. ولقيت منظر خلاني فرحت قوي
لقيت شوية شباب ومعاهم ناس كبيره في السن والمقام وشيخ جامع زين العابدين .. ماسكين اتنين مفتشين تموين وبيضربو فيهم ومصورينهم بالموبيل من اول ما خدو بتاع عشر شوالات دقيق مدعوم من الفرن بتاع المنطقه وبيحطوهم على عربيه ربع نقل تبعهم
وبعد ماضربوهم بلغو القسم راح جه وخد الاتنين المفتشين وراح معاهم اتنين من اللي صورو الحدوته بالموبيلات بتاعتهم
بجد والله في امل اننا نتصلح ونبقى كويسين
بس المهم نعمل حاجه كويسه كلنا مع بعض


ملحوظه
انتي لما قلتي واحد بس اللي نيته مش عارف ايه .. خليتي الناس كلها افتكرت الكلام عنها
خبييييييييييثه انتي يابنتي





سلامووووووووووووووز

الفارس الملثم said...

انتي عاملة الموضوع ده عشان تغيظينا ولا ايه ممممممممم

والله كويس ان في شئ ايجابي بالنسبة لسلوكيات الناس , بس مش شايفة ان في الوقت اللي حكومة عم نظيف بتكلم عن الحكومة الاكترونية وثورة الاتصالات , الشعب اياكل العيش بالبطاقة, ؟؟؟؟؟

علي عم صلاح جاهين عجبييييييييييييييي

طيب ممكن ليا طلب ياريت تحجزيلي طاولة عيش بس يكون كده زي اللي كنا بنشوفه في الافلام الابيض والاسود القديمة
...

سلام يا ابي واحنا طبعا بنق عليكي فخلي بالك

Abo 7anf said...

السلام عليكم دا تقريبا اول رد ليه فى مدونتك الجميله
والحمد لله انى عرفت ازمه العيش اتحلت
بس ربنا يستر متتقلبش مافيا ونلاقى الناس بتتخانق علشان تكسب على........الغلابه
وبجد فكره جميله بس وتنفعش إلا فى مكان صغيرر ناسوا قليله
واما بالنسبه لحكومتنا ال.....فهى اكيد بتحاول تتفرج علينا
ويمكن بتتضحك واحنا واقفين فى الطابور
وبعد التعقيد اللى انا عايش فيه
اقلك موضوعك جميل

رئيس جمهوريه نفسى said...

وصلت

دكتورة سنان said...

احنا العيش عندنا فللللللله
بجد والله مش بهزر وبعدين تقريبا فى 5 افران فى المنطقه اللى انا فيها
فتقريبا مفيش مشكله فى العيش والحمدلله يعنى
وانا معاكى ان فى سوء توزيع بالنسبه للافران
يعنى منطقه فيها 5افران ومنطقه ممكن ميبقاش فيها غير واحد وحصته من الدقيق ممكن تكون قليله كمان

Marwa Friday said...

صباح الفل يا آبي
الحمد لله ان الأزمة اتحلت حداكم
عقبال حدانا كمان
بجد مبروك ولو ان أحيانا الحصة المخصصة في اليوم بتبقى مش كافية لبعض الأسر خاصة لما تلاقي العيش وشه زي قفاه ولا مؤاخذة
حد يفرح في مامته هههههههههه
ده بمناسبة عيد الأم:)).. تحياتي يا فيونكة

3ala asm masr said...

انتى طلعتى جامده جدا واحنا مش واخدين بالنا
وانا اللى عماله اتفشخر على البشر واقول قريبنا بيجبلنا العيش
ده احنا ولا حاجه بقى
15 معاكى يا انسه ممكن؟

بطوط حبوب said...

تبيعى العربيه يوصلك احسن عيش
تغيرى اسمها من غير بيع يوصلك برضه اجدع عيش
تفضل اسمها بطوط هدعى عليكى تموتى من الجوع ههههههههههههههه

Unknown said...

ياسبحان الله
كنت متأكد اني علقت طلعت اوهام
اقاليم مين دي اللي اجدع من العواصم
وبعدين ايه عواصم دي
هي كام بلد هي عاصمة واحده اسمها القاهرة
ولا بتعتبري عين الصيرة والالف مسكن عواصم تانيه ولا ايه
بس كويس والله ان لسه في حاجه شغاله مظبوط يعني ان اول الغيث قطر يمكن باقي الناس تغير منكم ويعملوا حاجه ,ولا اقوليك بلاش لحسان يهدلكم الفرن ,ربنا يمن علي جميع المسلمين بالخير واليسر في جميع امورهم
وجزاكم الله كل خير

صالح سعيد said...

بصى الموضوع باختصار
الحكومه مش عارفه تعمل ايه مع الناس اللى فاض بيها الكيل
فبتعمل اى مسكن لعل وعسى الناس تنسى وتسكت شويه
وكان توفير رغيف العيش الذى اصبح لا يسمن ولا يغنى من جوع هو اهم انجازات حكومتنا النظيفه الموقره
ومش مهم بقى السلع التانيه اللى اسعارها بتزيد بالثانيه
ربنا يستر علينا بجد

mado80 said...

آبي

ازيك

معلش مقصر في حقك أوي وربنا بس أسف كنت مشغوووووول أوي

هو انتي يا آبي بتتكلمي عن أنهي محافظه بالظبط

أنا سمعت صحيح أنهم في بعض المحافظات عملوا حكايه توصيل العيش للمنازل بس عقبال ما يوصلوا للقاهره وخصوصا الأحياء الفقيره منها تكون خربت مالطه ومات ناس ياما

أنا سمعت برضه أن الرئيس مبارك طيب الله ثراه أخيرا أفتكر ان فيه أزمه فأمر القوات المسلحه انها تتدخل في الموضوع
علي الله نسمع خير ان شاء الله

ولو أني مش متفائل خالص أن فيه خير اللي جاي أسوأ بكتير

يلا مش عاوز اكتئب عليكي أكتر من كده

سلام يا آبي وألف تحيه ليكي وألف تقدير

Empress appy said...

only spot

اتحلت كده اه بس ده كان قرار الحكومه وده شئ كويس انهم عاوزين يتصلحوا وبينى وبينك افضل ان الناس تمسكها علشان هيخافوا على مصلحتهم اكتر
ولو عشنا علىالجهود الذاتيه افضل من جهود الحكومه الزيتيه ههههههههههههه نورتى الكوكب خالص

تايهه ومش تايهه
والله هتلاقى جوانا كلنا الحاجات الجميله دى بس تتحرك شويه نورتنى يا اخى الصغير


انا حر

هنعمل ايه احنا بقينا بندور على بارقه امل مع حكومه القطنه اللى بتكدب دى ههههههههههالحمد لله على كل شئ نورتنى

Empress appy said...

أنا إنسان

انت جعان ولا انسان ما تهمد فى مكان يا جعان هههههههههه
............
مركزيه مريره اممممممممممم عندنا امل تتحل والله الست مركزيه دى اما الخوان فانا معرفش حياتهم ولو عندهم الموضوع ده تبقى مصيبه سوداء طبعا
بس الحكومه مقلتش للاقاليم لا لانها ببساطه هى اللى عملت كده بس مسكت اهالى الحى الموضوع وانا اشيفه ده احسن لانهم شغلوا ناس وغير كده الناس مش هتسرق بعض زى الحكومه بس



سووووو
والله يا سووو فيه امل من بدرى بس لو نتحرك واهو انت شوفت موقف بعينك يعنى ممكن نبقى ناس محترمه
وبعدين ايه وداك قلعه الكلابش دى تانى يا ابنى اهمد بقى

الملحوسه بتاعتك يا سوووو مش فى محلها لانه برضه عارف نفسه وهو مش مدون ههههههههههخخخخخخخخخخخخخ




الفارس الملثم

كويس انى عرفت اغيظكم يمكن تتحركوا هههههههههههههههه
ومش حجزة حاجه روح اعمل فرن لنفسك

Empress appy said...

Abo 7anf
اهلا وسهلا بحضرتك نورت الكوكب كله ...لا هىالفكرة تنفع فى كل مكان بس لو وزعوا الافران مظبوط وبكده يحلوها بس هما ركنين دماغهم صف عاشر نورت الكوكب كله وخد خروف وقله فى ايديك هديه هههههههههه



رئيس جمهوريه نفسى

الحمد لله ومتفقين ههههههههههه


نوسه
حبيبة قلبى ما هو ده سوء التوزيع والغباء فى خروج التراخيص من البدايه يا ريت يظبطوها وعندنا زى عندك كله واحد وحشتنى يا ننوسه خالص

Empress appy said...

مروة جمعة

صباح الورد والياسمين على الناس الحلوين ان شاء الله تتحل حداكوا فى الدوار عند العمده هههههههههههههه
ما هى مش بتكون كفايه لان فيه سوء توزيع فى الاماكن بس واه فرحانه فيها كانت بتزعجنى كل ما بروح اقعد اجازة يوم ولا اتنين مش بعرف انام من صوتها هههههههههههههههه



على اسم مصر
خخخخخخخخخخ علشان تعرفى مش انتى بس اى خدمه يا كابتن المرة الجايه بقى اجيب لكى اول سفريه ليه هناك



بطوط حبوب

بطوط عربيتى حبيبتى بطوط مش هتنازل عن اسمها وبعدين بطوط عربيتى اكبر منك بطوط عربيتى الوز عاوز يخطبها انت مش لاقى حد يخطبك بطوط عربيتى هههههههههههههههههههه

Empress appy said...

الفاتح الجعفرى

هههههههههههههه بطل الاوهام دى والله عذراك من اللى انت فيه انا قولت لك على الحل وايووووون الاقاليم اجدع احنا الدقهليه اجدع وبقيت البلاد العواصم اللى هى القاهرة هااااااااااااا مش عجبك الجغرافيا بتاعتى كمان هو انت البوست اللى فات مش عارف تصريف تعبانات والمرة دى مش عارف العواصم ههههههههههههههه معلش انا هدرس لك
وبعدين انا معرفش اللى انت قولت عليهم دول ما يمكن عواصم مستخبيه خخخخخخخخخخخ

وبعدين الموضوع اطبق فى محافظات كتير والخيبين مش عارفين يطبقوه فى القاهرة بنت ام عز وده لانهم اغبياء من البدايه وعملوا مركزيه فى الافران ولما حب يعدلوا بتبوظ منهم اكملك ولا فهمت ولا فاضى نحكى ههههههههههههه

نورتنى يا ابو المعارك





صالح سعيد
هو يعنى لما يعملوا كده الناس مش هيفيض بيها ههههههههههههههه دول هتتنيل عليهم اكتر متخافش ان شاء الله هنتحرك
نورت الكوكب كله




مادو

انا بتكلم عن المنصورة وفيه ناس بتقول انها اتعممت فى محافظات تانيه وبطل تجيب ليه اكتئاب واحباط وارحمنى هههههههههههههه ومتتأخرش تانى كل ما ابعتك مشوار تقعد سنه كل ده بتجيب عيش امال لو لحمه هتعمل ايه
نورت الكوكب يا مادو

walaa said...

فعلا عندك حق سوق الاداره زى ما لبتقولى فى مناطق فيها فران ومصر الجديده كلها فرن واحد طيب كده يبقى ايه سوء تخطيط
وفعلا الناس عايزه تحرم بعضيها
وحلو قوى التعاون اللى فى الشارع ده بجد بشرة امل اللى احنا نبقى ايد واحده بقه
اما الناس الحراميه دول حسبنا الله ونعم الوكيييل ولا تيجى تكلمى حد منهم يقولك ازاى كان الراس الكبييييره بتسرق
وطيييب يا بن التيييييييييت على رايك ههههه والناس الغلابه مالها

مستنيه اجابتك على التاج يااا قمر
تحياتى ولاء

NIDAAL .R said...

بجد يا آآآبى خطوة ايجابية جداً جداً
ومش مستحيلة ولا صعبة و ممكن اوى اوى تتعمل فى القاهرة .. بس الى يفكر و الى يبقى مستعد يشتغل علشان غيره قبل نفسه و الى يبقى مستعد يتطوع و يضحى كل يوم بربع جنيه علشان يجيب ريفو للصداع .. الفكرة دى لو اتعملت فى القاهرة هتبقى حاجة جميلة اوى و هتختفى طواااااااابير العيش بس الناس تبطل سرقة فى بعضيها الاول و ياريت الاهالى هما الى يفضلوا ماسكين الموضوع ده مش الحى . العملية مش ناقصة حرامية

Unknown said...

يانهار اسود
نسيت احسد التعليق اللي فات
عموما
يابختك
لاقيتي لقمة عيش تاكليها
ياااااااااه
ياخبر

حـــــدوتـــــة said...

والله ناس جادعة وعرفوا يتصرفوا ويحلوا الازمة
بس المشكله فى المحافظات الكبيرة الموضوع عايز قرار ادارى من لجنة عليا تنبثق منها لجنة اخرى
وعلى ما ده يحصل موت يا تييييييييييت
سلالالالالالالالالالالالالالالالالالالالالام

alshared said...

أنا مش بعرف أعلق عندك خالص يا ست أبي
كل ما أجي أكتب أي حاجه بيبقي عندي أحساس أن الناس قالتها قبلي

عموما النظام ده نظام جميل جدا
ولكن

الناس شويه وهاتكتشف طريقه يسرقوا بيها الدقيق
ويرجعوا الوضع كما كان

بالمناسبه
مفيش عندك رغيفين سلف
:)

تحياتي

مجداوية said...

حمدا لله على سلامتك هو انتى جيتى ,,يادى النور يادى النور ,,ما شاء الله عيش شكله جميل ونافش ريشه زيك برضه ,وبس ايه التغطية الصحفية الجامدة دى وصور وتحريات ميه ميه ,,لما كنت فى مدونة اخونا الفتح الجعفرى عرفت حضرتك العربى بتاعك مدشدش ليه أتاريه من العرق التركى اللى نتر عندك من زيارة تركيا ,الواحد من هنا ورايح ياخد باله بقى ,,المهم تشكرات أفنظم على بوستات خطيرات عفارم أفنظم عفارم

صحفية روشة said...

فعلا
الاقاليم طلعت اجدع من العواصم
ابى ممكن سؤال؟
اكيد ممكن
هى دى صورتك اللى فى البروفايل؟
جاوبى يا بت ولا هوريكى
اه صحيح انا نزلت بوست هيعجبك
خصوصا بعد انتهاء حاله الكأبه اللى كنت بمر بيها
يلا تعالى

Unknown said...

أسفه لم أقرأ موضوعك لكن أمامي مهمة نشر مدونه في غاية الاهميه أنشرها بين المدونين ان استطعت
ادعوكم لزيارة هذه المدونه
http://www.ta7arosh.blogspot.com/

Empress appy said...

ولاء

ميرسى ليكى يا قمر بس ليه تدبيسه التاج دى ده صعب قوى طيب منكن استعين بصديق ههههههههههههههه عنيه حاضر



نضال
الحمد لله اتعالج يا رجاله ههههههههههههه صح كلامك يا نضال بجد بس والله فيه ناس حراميه بجد ومش الحكومه بس نورت الكوكب يا نضال



انا انسان

اعمل فيك ايه بس والله انا دماغى بدأت توقف بسببك اسيب الكوكب وامشى يعنى هههههههههه نورتنى

Empress appy said...

حدوته

هو التيييييييييييت لسه ممتش هههههههههه حلو انبثاق دى هى مستورده الكلمه دى ولا ايه نورت الكوكب



الشارد
ما هو حضرتك اللى بتيجى متأخر ابعت لك خروف يجيب بمركبه فضائيه نورت يا عمنا ومفيش سلف هههههههههه



مجداويه
ههههههههه انتى هطلعى عليه اوشاعات ولا ايه ولا مش مكفيكى آبى الصحاح هههههههههه طبعا اول مرة تكتشفى العرق التركى ده اهو انتى اكتشفتى وأخدتى الجايزة بتاعت الاكتشاف

Empress appy said...

صحفيه روشه

لا مش هجاوبك خمنى انتى وهيطلع صح هههههههههههههههههه
حاضر هاجى اشوف يا حبيبى



Miss Dot
ولا يهمك وحاضر شرفتى

Anonymous said...

الأخت الموهوبه صاحبة المدونه
تحيه وبعد اعجابنا بما قرانا فى المدونه دقعنا لتخصيص حلقه من برنامجنا الذاعى للأشارة والشادة بالمدونه والحلقه تذاع الأثنين 31-3 الساعه التاسعه وعشر دقائق صباحا على اذاعة البرنامج العام اى الأذاعه الرئيسيه لماسبيرو وموقع البرنامج
http://dear.to/cairo
e-mail
netonradio@yahoo.com
وموقعنا الآخر
http://wakeup.to/computer
مع تمنياتنا لك بالتوفيق

Zika said...

ايه ده انا ماردتش هنا
طويب
والله انا مش مصدق نفسي ...حكومتنا بقت تفكر .. سبحان مغير الاحوال
عقبال ما يعملوا عندنا الاختراع ده ولو اننا اقرب فرن بعيد عننا ببتاع نص كيلو بص مش مشكله . لان انا كده كده مباكلش العيش وده يعتبر مصلحه للحكومه اهو بوفر عيش للناس التانيه :D:D
وبالنسبه لصور , احب اقولك انك عندك فكرف في التصوير بجد مش هزار جربي تصوري لو ما بتصوريش هتلاقي نفسك عندك موهبه :)
نرجع لموضوعنا
تحياتي للناس بتوع العيش اللي عندكوا والف مبروك عالبطايق

Share |