الادعاء الثقافى والحضارى والبتنجانى المخللى


شوفتوا العنوان مكعبل ازاى اه بجد انا بقول كلام مكعبل بس فعلا دى حقيقه اليومين دول بقى طلعوا شويه شباب حافظين كلام من كتب سواء بنات او اولاد ويقعدوا يرجعوه فى وشك (يععععععععع ايه القرف ده معلش ما علينا ) ودول بقى بيجيبوا ليه غممان فى النفس وميل للنطح وساعات تقلب بميل لاكل الفول السودانى والموز وهما بعاد تمام البعد (بتكلم زيهم اهو)عن الثقافه او التحضر يقولك ايه حريات ....حريات (طيب والله النحله والدبور اللى فى دماغى بيفهموا اكتر منهم ) طيب طبقوها على نفسكم بقى ياللى بتنادواا بيها وانتم اول ناس تنتقد معلش بقى اتحملونى بجد اصل المرارة بتاعتى اللى اشتريتها من الصين بكام يورو انفجرت فى وشهم خلاص .
كتير اشوف اولاد مع بنات فى كافيه فى نادى فى الشارع واحنا كمان على النت على الرغم اننا بنتواصل عبر الاثيهه قصدى يعنى عن طريق النت ونادر منا لما حد يشوف حد وعلى الرغم من كده فيه منا المحترم وفيه منا اللى داخل يتكعبل فى (اوكشه او موزه ) شوفتوا الثقافات المنيله دى اخرة قعدتى على البورصه ما علينا يعنى يدخل يتعرف على بنت طيب ده اصلا هدفه معروف نيجى للنوع التانى بقى طيب احنا ليه ميكونش بينا علاقات محترمه شويه يعنى والله وعن تجربه فى المعمل ه قصدى تجربه شخصيه انا ليه اصدقاء اولاد بقالنا بالظبط 14 سنه مع بعض (الله اكبر ماشاء الله حسه انى حالا هقوم اقتل واحد فيهم من كتر الحسد اللى بيطق من عيونكوا )وعلى فكرة منهم اللى اتجوز ومعاه بيبى كمان وعلاقتنا كويسه جدا وزوجاتهم عارفه وفيه طبعا اللى مش اتجوز لسه بس بيستشرنى فى حياته وشغله وكل حاجه وانا نفس الموضوع هتقولوا ليه من قله البنات يبقى اولاد يعنى هقولك انت وهو وهى اتبطوا (زى البط كده البيكينى ) بقى وبطلوا نيه منيله بنيله اصل بالقله على دماغكوا لا مش من قلتهم بس فيه حاجات بجد مش بيفيد الولد فيها غير بنت ولا بيفيد بنت فيها غير ولد برضه شايفه ناس بلسان طويل تقولى ما اخواتك طيب اذا كانوا اخوات كان وإن ..... صغيرين او بلاش فيه فعلا من التربيه بعض البيوت بلاقى ان الاخوات مش متواصلين وكل واحد واخد البيت ده على انه اوتيل ينزل فيه كل يوم بس اوتيل فوووول بورد (ده غير الفول والطعميه اللى بيجيب ليه القولون)يعنى اقامه كامله ودى حقيقه .
انا بصراحه بسال ليه كل ولد بيهتم ببنت ويخاف عليها وتكون نيته كويسه لانه حاسس ان دى اخته (ومش عاوزة فذلكه هى اسمها على اسمه لا طبعا )بس بيعاملها على انها اخته او قريبته تقوم البنت تعيش فى البحر الابيض المتوسط وتفتكر انه بيحبها وتبدأ تسمع الاستاذ عبالحليم ابو حافظ يا امى فوقى والمصيبه بقى انها تدعى الثقافه وانها متفتحه طيب ما انتى فهمتى الواد غلط اهو ولا هو على راى الاستاذ بعاء قرطاس (الواد قلبه بيوجعه وعاوز حد يدلعه).
لا فوقى يا امى ده بيخاف عليكى بس وبيهتم بيكى من باب انه شايفك ملكيش خبرة فىالحياة او انسانه طيبه او اى حاجه وبصراحه دى مشكله قابلتها مع ناس اصحابى.
او اعكس بقى بنت حلوة وشيك وامورة وبنت ناس (هههههههه زى كده وبطلع لكم لسانى )
تتعرف على واحد اوباااااااااااا تقوم الدنيا ومتقعدش وتلاقى بنات اوزعه مش بينين من الار ض مع الاعتذار للقصرين طبعا بس اقصد فى تفكيرهم يبقى دى مأنتمه مع ده ياااااا سلام طيب ليه طيب هو مينفعش يكون صديق او اخ او حتى زميل معارك بنقعد نضايق فى بعض بأفكارنا لاااااااا ازاى والغريبه انهم بيدعوا الثقا فه والتطور ويقولك حريات ابقى سلم ليه على الكفتات .
او بنت مثلا تلاقيها بتتعامل مع الناس ببساطه وحب وود قوم ايه الواد يطلع فجأه فى جبينه قرنين كده ويقلب لونه احمر ويبقى زى الشيطان اه وتكبر فى دماغه انا ممكن اخد البنت دى ونسافر مع بعض نهيس يومين ......اقوم ايه اجيب قله واخبطه بيها على طول واقوله فوق ده ساعتها يبقى اخرك معاها الشوز بتاعها يا عم الكو ت كوت مش معنى كده انها سهله وبرضه دول اللى بيدعوا الثقافه والحريات والبتنجان المقلى والمخلل ولا علشان البنت تبقى حلوة ومهتمه بنفسها تبقى نازله تصطاد برص جعان لا طبعا بجد فوقوا يا شباب وافهموا بعض كويس وافهموا ان ممكن يبقى فيه علاقات نظيفه بس احنا ننظف مخنا وقلوبنا بجد ونصيحه للبنات اللى بتغير من بعض وتبدأ تطلع اشاعات على البنات التانيه انها مأنتمه ولا مأنتخه مع واحد او العكس لا بصى الاول انتى بتتكلمى فى ايه وعن ايه لان دى اعراض ونفس الفكرة للوظاويظ اللى هما الرجاله ويا ريت برضه تتطسوا فى نظركم كده وتشوفوا مستوى البنت اللى قدامكم او العكس البنت تمسح مرايات عنيها وتعرف ان الحب لازم لما يكون بين اتنين يبقى متكافأ شكلا وموضوعا واجتماعيا وماديا وحاجات كتير جدا لان ده مصير اتنين (اه بتهمنى الشكليات للناس اللى هتسأل اصل عندى التركى بينفش عليا ساعات كده وعندى احساس انى لو دورت فى اصل العيله انى هلاقى نفسى اصلى تركى او من الخلافه العثمانيه وساعتها اهلى هيقتلونى بما انهم عرب وهيعدمونى فى الميدان بتاعنا فى العريش بس اعمل ايه فى نفسى معلش بقى) وعلى فكرة ده مش عيب لان لازم يبقى فيه تكافؤ فى حاجات كتير
وبجد نصيحه للبنات بينى وبينكم والاولاد اللى قاعده معانا تقوم تمشى علشان هقول سر فى أذن البنات .....يالا يا واد انت وهو مش عاوزة رخامه روحوا اتمشوا هناك بعيد شويه فى الكوكب بص يا بنانيت اوعى تشوفى واحده حلوة او شيك او مهتمه بنفسها وتحسى انك اقل ممكن يكون هى عندها امكانيات اكتر فى حاجات بس انتى اكيد عندك اللى يوازى ليها ودى نعمه من ربنا بس حاولى تكتشفى ايه الجميل اللى عندك واظهرى وبلاش تنتقدى وتوجهى كل اسلحتك لنقد البنت لانك ساعتها بتبقى هايفه وتافهه وكمان بتبقى مفقوسه قوى لان الكل بيبقى شايف وفاهم
تعالوا يا شوباب اقول لكم بس بالعند فيكم مش هطرد البنات تفرقه عنصريه بقى ورخامه مش كل بنت تهزر وتتباسط معاكوا وتتعامل كويس وتهتم بنفسها وتهتم باللى قدمها يبقى هى هتموت عليه او العكس انها بنت مش كويسه وسهله ورخيصه لا يا من تدعوا الثقافات والبتنجان والعبط فوقوا بجد لان فعلا دى اخرها معاكوا الشوز بتاعها وهتلاقى الملاك اللى قدامك اتحول لديناصور بيطلع من بقه نار ولا مطافى القاهرة الكبرى ولا ضواحيها تعرف تطفيها.
وقد عنذر من فنجر وبنجر ولا عزاء للأغبياء

ده حلم ولا حقيقه


انا مش مصدقه عنيه دى فى احلام بتبقى حقيقه اه والله بجد فتحوا المعبر علشان ندخل حاجات لفلسطين طيب كويس بس السؤال بقى ومن غير خبث (ومش مفتحه عين ومغمضه عين ولا النحله والدبور اللى متجوزين وعايشين فى دماغى ما يزنوا هما واولادهم ولا يعملوا الفرح بتاع كل يوم ) انا هتكلم بما انى اقدر اونكل مبارك بجد يعنى لما يا ريس فتحت المعبر هتسيب اللى رايحين يودوا معونات يعدوا بالسلامه ولا ايه هتعملوا مصيده زى الفئران وتعملوا لهم مطبات هوائيه وصناعيه وحلزونيه......
ولا هيرجعوا من غير اعتقالات يعنى سؤال برئ جداااااااا (يا نهار انا بتكلم فى الباميا قصدى السياسه مش مهم انا مش خايفه عادى هى هترسى على ايه اونكل الظابط هيجرنى من قفايا ويقررنى انى انا اللى عملت الانقلابات وزودت الاسعار وتأمرت مع السحاب علشان تنزل مطر وتغرق شوارع القاهرة بمية المطر علشان بعت البلاعات خرده لبتوع الصين ولا انا اللى حفرت الشوارع بعد ما سفلتوها ولا حتى انى تامرت مع بتوع العيش انهم يسخطوا الرغيف علشان منقدرش نشوفه بعيونا المجرده عادى هو بس يؤمر يشخط فى اى حد واقف جنبى وانا هعترف على طول انا مش عاوزاهم يضايقوا خالص) .
لا بجد انا مبسوطه جداااااااااا اولا علشان هتبدأ المشكله تتحل مع انى زعلانه من الفلسطنين علشان ضربوا المصريين اه هما متعشمين فينا خير بس مش تيجى على مصلحتنا يعنى يبقى فيه تكسير وسرقات وحركات لان مش كله نفوسه كويسه وممكن فى ظل الزحام ده والتوافد يحصل حاجات مش كويسه كتير وتضر بالجانبين يعنى ومش عاوزين برضه نبقى ضدهم لان بصراحه مش هيضربوا عندنا واحنا نسكت يا ريت يظبطوا بس نفسهم مش اكتر ويبقى فيه نظام. الحاجه التانيه بجد مبسوطه قوى ان الدنيا بتقوم وبتقعد عندنا علشان نطالب بحقوق الناس والاخوة الفلسطنين طيب واحنا يا بشر حقوقنا فين طيب ما هو سياده الريس اهو اونكل مبارك طلع كويس وسمح بحاجات كتير طيب ليه مش بيسمح بحاجات لين (ولا احنا ولاد البطه البيكينى )ا يعنى يخفض فى اسعار الحاجات بجد لان ده صعب انا مش عارفه الاسر اللى بتاخد دخل صغير دى هتعمل ايه ولا عايشه ازاى وكل شويه يقرفونا هيلغوا الدعم هيسيبوا الدعم الله طيب ما ترسوا على حل بقى لما انتم بتناقشوا الموضوع بتقرفونا بيه ليه ولا بيشغلوا وقت فرغنا وعقولنا لاااااااا انا عرفت هما بيعلو الضغط عندنا ويحركوا الامراض المستوطنه بداخلنا بقالها فترة علشان يبقى ضربوا عصفورين بحجر الناس تموت من الغيظ ويبقى تخلصوا من ازمه السكان والمواصلات بس بكده بيدوا فرصه للتجار يلعبوا بينا ليه دا انا عندى رغيف العيش بيتباع بعشرون قرش ولا يرى بالعين المجرده هروح اشترى ميكروسكوب بعشرة الاف جنيه علشان اشوفه وبعدين ابدا اكله اصلا يكون جالى هلع وفزع من شكله اول ما اشوفه لانه غير صالح للاستخدام الادامى وممكن يجيلى مرض هبل الخرفان وانطح طيب نعمل ايه. بس انا مبسوطه ومزقططه اووووى كمان عارفين ليه انا رحت نفشت ريشى وبقيت عامله زى الدندى كده (الديك الرومى يعنى )على بتوع شركة النظافة وخوفتهم جدا وقولت والله هشتكيكوا لاونكل الظابط لو مجتوش نظفتم السلم بتاع العمارة كل اسبوع فى ميعادكم علشان يوظبوا على نظافه السلم (بما اننا شعب يخاف ميختشيش ) وفعلا عملوا كده وبقوا كل اسبوع ينظفوا السلم فى ميعاده والحمد لله الاولاد فى العمارة يستنوا اليوم ده ويعملوا هجوم جماعى على السلم والاقيهم بيعملوا مؤتمرات ومؤامرات على السلم ويوسخوا السلم تانى بس اعمل ايه هى ديتها بس ازعق فيهم مرة بس من غير ما اضحك ويحرموا يوسخوا السلم (لان بصراحه كل ما ازعق يقعدوا يضحكوا عليا ويفتكرونى بهزر علشان شكلى بيضحك ومش عارفه احل الموضوع ده بجد). وكمان المطب الرخم اللى عند مستشفى مبارك للشرطه سفلتوه ومبقاش عامل زى الكوبرى بالنسبه لبطوط هما مطبين وراى بعض بس يبوظوا عفشه عربية هامر النهارده الصبح لقيتهم شالوا المطبات دى فرحت قوى انا وبطوط. هو سؤال برضه برئ وبصوت واطى من غير ما حد يسمع اهو هو ليه كل حاجه فيها اسم اونكل مبارك بتبقى بايظه كده ............... ايه محدش يعلى صوته بقى فى الاجابه انا بقولكم اهو انا مليش فى الباميا فاهمين مش عاوزة هزار اصل مش انا اللى بسال دول النحله والدبور اللى مستوطنين فى دماغى هما واولادهم مش انا يعنى علشان محدش يفهم غلط ومستنيه الجديد اللى يفرحنى ويفرحكوا تفتكروا الاسعار هتقل ولا هتزيد ولا هتجنن اختار حاجه من دول ومن غير ما حد يعلى صوته فى الاجابه الله يكرمكوا

عندما تتحول الاحلام الى اوهام وموووووت


فى ظل الاحداث الهايله اللى احنا طبعا عايشنها اليومين دول من غلاء فى الاسعار مع مظاهرات مع اعتقالات امنيه من (قمل الدوله )مع اللى بيحصل فى غزة فأنا الحياة عندى بمبى بمبى بمبى خالص (الله يرحمك يا سندريلا ) ولا بيهمنى ايه يعنى هيحصل ايه هبوط فى الدورة الدمويه ولا اختناق ولا هلبس كيس فى دماغى ومقشه فى ايدى واجرى فى الشارع وارمى الناس بالطوب عادى مش بيهمنى الكلام ده كله . كل يوم قلبى يتقطع على طفل فى غزة ولا على الانتهاكات اللى بتحصل هناك ولا على ناس بتقتل فى بعضها فى مصر علشان خمسه جنيه ولا ام ضربت بنتها وهى عندها سنتين وماتت فى ايدها وتقول لا انا ضربتها بالقلم وقعت من على السرير وكل ده علشان خاطر جوزها برضه عادى مش مهم الحياة لسه بمبى بمبى بمبى اتصدم فى ناس عرفتها وظلمونى برضه عادى لسه قويه ولا هيجيلى شلل رعاش ولا هنتحر من الكوكب بتاعى ولا هضحى بخرفانى هفضل برضه ارمى الناس بقلل نوويه وانطح عادى.
انما بقى اللى بجد كده كفايه وهيموتنى ومش قادرة اتحمله موضوع الهوس بالهجرة لخارج مصر من كام يوم قاعده لا بيا ولا عليا والاقى الاستاذ/وائل بيه الابراشى بيتحفنا بقصه من قصصه انا بيشدنى مواضيعه بصراحه مع انى قررت متفرجش على برامج من بتوع الباميا قصدى السياسه المهم ايه القصه ولد عنده 17سنه سافر على باريس على عجله الطيارة (اه بجد مش عجله خالتى فرنسا) . اتعدلت افتح فى عنيه وابص للصندوق اللى قدامى انا لسه كويسه وشايفه مهيستش يعنى ولا الهلاوس جت ليه الاختراع الجديد بقى انه الشباب اخترعوا طريقه جديدة للسفر وهى التجويف اللى بيدخل فيه العجل بتاع الطيارة بيدخلوة قبل ما الطيارة تقوم ولما الطيارة بتمشى العجل بيدخل فى التجويف ده بس رئيس رابطه الطيارين فى مصر قال انه عمليا المكان جوة واسع بس محدش يقدر يعيش فيه لان الطيارة بتبقى على ارتفاع عالى والهواء مش بيدخل ودرجه الحرارة بتبقى 60تحت الصفر . وفعلا الولد دخل وقبل الطيارة ما تنزل فى المطار وهى بتنزل العجل الولد وقع على بيت من بيوت فى فرنسا واتفتت ميت حته . الانيل جابوا ابوة وقالك انا كنت شديد مع ابنى وهو عاوز يسافر زيه زى الشباب بس انا قولت له يخلص ثانويه الاول (يا نهار ابيض ده لسه فى الثانويه يعنى مش دبلوم ولا خلص تعليمه ولا عاوز يتجوز ولا اى حاجه )وراح عمل له جواز علشان يطمنه بس بيقول انا كنت قاسى على ابنى كتير . مبدئيا الولد مش معاه فلوس يدفعها لحد المصيبه الاكبر الولد ده دخل المطار ازاى ووصل لغاية الطيارة وايه دى بتاعت الاير فرانس يعنى تأمينها بصراحه بيبقى اقوى من مصر للطيران بكتير طيب وازاى فلت من ظباط وامن وعمال تحت الطيارة مع التاكيد ان الولد راجع بهدومه بتاعته ومتعلقاته 25جنيه مصرى. وده دور الحكومه انها ترد علينا بجد. تانى حاجه ليه الاباء بيوصلوا اولادهم لكده ليه مش بيقربوا منهم ودى فجوة خطيرة يا جماعه ابن فى السن ده يعنى خطر ومن قبل السن كمان لانه بيكون شايف كل حاجه حوليه وعاوز يواكب التكنولوجيا اللى فى اليومين دول من موبيل لكمبيوتر عاوز كل الامكانيات ومعندوش عقل يفكر امتى ينفع وامتى لا وكمان الشباب بيبصوا للبس بعض والماركات والهوس اللى جالهم بسببها ومش بيفكروا امتى ينفع وامتى لا يبقى لازم الاباء يحتوى ولادهم كان فيه راجل قريب الولد وهو اللى شاف جثته لما وصل مصر قال كلمه حلوة قوى (انا اكلها بملح ولا انى ارجع بلدى بالشكل ده وقال يا شباب ازرع اشتغل بايديك بس متعملوش فى نفسكم كده ) الشباب بقى اللى بجد احلامهم مسباقهم بعصور وسنين والطمع مالى قلوبهم وحب التقليد الاعمى لا صعب بجد ده اسمه انتحار فين عقولنا لازم نؤمن بربنا وان دى ارزاق بجد بس مشكلتنا اننا بندور على الرزق السريع او المكسب السريع مستعجلين طيب قولنا قبل كده على بتوع الهجرة عن طريق البحر شباب وظروفهم وحياتهم انما ده طفل لسه فى ثانويه عامه مش خلص لسه تعليمه يعمل كده ليه بجد مش لاقيه اجابه غير ان مش لاقى اهله جنبه يخلوا بالهم منه .على فكرة فى العمارة عندى قابلت نفس المشكله واحده ابنها عاوز يسيب التعليم ويروح يشتغل فى كافيه علشان يجيب كوتشى ولبس زى اصحابه (احنا فقدنا الرضا خلاص عن حياتنا وبجد ربنا بيجازينا ) يا ريت الاباء والامهات يوعوا ولادهم وهما كمان يبقى فى قلبهم رضا بما قسمه الله. بجد اللى عندة اخ يخاف عليه ولا عنده ابن او بنت يقرب منه قبل ما الاحلام تؤدى للهلاك فعلا والموت وده طفل يعنى لسه قدامه كتير يعنى متخرجش ومزهقش انه مش لاقى شغل ولا حاجه ده ابوة بيصرف عليه لسه يا شباب فوقوا بقى من الاوهام واللى بجد معاه فلوس يستثمرها فى بلده بدل ما يوجع قلب اهله وبلده عليه
وعلى فكرة برضه فيه بنات بتستسهل الطرق وتسيب بيت اهليها ونلاقيهم بعد كده فى الشوارع وبوليس الاداب كل شويه جاريرهم من قفاهم والمصيبه انهم صغيرين وده برضه علشان احلامهم الخايبه وعدم رضاهم بما قسمه الله بجد انا بحزن على مصر وولادها.
معلش بقى نكدت عليكوا بس غصب عنى انا بقالى كتير بشوف حاجات من دى وعموما هبطل اشوف الاستاذ وائل والبرنامج بتاعه .

تاج ومش اى تاج


تاج وتلبيسه فى الحائط السياسى مرة واحده ربنا يوعدها بكلب يجرى وراها لغايه لما يقطع نفسها بما انها اختى مقدرش ارد لها سلطانيه قصدى كلبش يووا قصدى طلب اصل فى اعتقادى ده يودى السجن بس السجن بتاعنا فى مارينا ههههههههههههه انا هقول بصراحه ومش عاوزة ضرب ولا ضحك ممكن تلاقوا حاجات خياليه بس والله دى احلامى تصبحوا على خير ...قصدى نبدأ بقى(ملحوظه التدبيسه دى اصلا من تاليف خالتى فرنسا)
دخلت مجلس الشعب من اوسع ابوابه ايه هو رمزك الانتخابى المفضل ؟؟؟؟

رمز الفراشه علشان معناه الحريه والانطلاق والجمال
كنت تفضل الدخول مستقل او تتبع حزب معين ؟؟؟؟
مسقل مستق بالتلاته
اذا دخلت مستقل هل توافق على التوقيع للحزب الوطنى بعد نجاحك كمستقل ؟؟؟؟
اممممممم ممكن ليه لأ بس ده لاسباب وهقول من غير ضرب كل حزب فى مصر فيه الكويس وفيه الوحش وبما ان ده الحزب الحاكم فليه منعملش خطه مضاده وندخل فيه ونكون احنا العناصر الكويسه ونقدر نغير وثانيا لانك من خلال هتكون خدماتك للناس اكبر واكتر (ومحدش يقولى فى المشمش )
ايه اول حاجه هتعملها لنفسك ولاسرتك ؟؟؟؟؟
ليه انا بس هشترك فى نادى علشان اروح الف التراك علشان نفسى يبقى طويل فى المناقشات ههههههه لاسرتى هساعد اللى عاوز يشتغل زيه زى اى حد غريب
ايه المشروع اللى ناوى تعمله لاهل دايرتك ؟؟؟؟دون ذكر اسم الدائره ان اردت
ناويه اغير الاتوبيسات القديمه واتصدى للى بيبعوا الانابيب غاليه وارصف الطرق واعمل بسكت للزباله كتير فى الشارع واوقع غرامه على اللى بيرمى زباله واكتر الامن فى المنطقه لان شركة الامن عندنا مبلطجه واعاقب الستات اللى بتشتم ولادها وافتح نادى وحاجات كتيررررررر الدائرة بتاعتى القاهرة الجديدة بما ان المنصورة فيها واحد كويس فمش هنافسه والعريش فيها من عيلتى فمش هنافسه ههههه
قعدت فى المجلس جنب نائب مميز . من هو النائب ؟؟؟
هقعد كل مرة جنب حد لغايه لما اشوف مين الاحسن وافضل حنبه وبكده اضمن انى مش هلحق واطلع بدرى بدرى او اقولك جنب فتحى سرور هههه علشان اقولهم موافقه
قدمت سؤال للحكومه ايه هو السؤال ؟؟؟؟؟

ليه كرهتوا الشعب فيكوا ليه نسيتوا حب مصر ليه مش بتفتحوا قلبكوا وعقلكوا وبعضكم يقفل جيبوبه شويه
طلب احاطه موضوعه ايه ؟؟؟ وبتقدمه لمين ؟؟؟؟
لوزير العدل اقوله ليه احنا مش زى البلاد التانيه والشرطه مش بتعمل حساب لكم ليه ووزير الداخليه عقدتنا من الشرطة وعقدة الشرطة مننا وكرهتنا فى اللى بيحمينا عالج ولادك بليززززززززز
استجواب لاتنين من الوزراء موضوعه ايه ؟؟؟؟وبتستجوب مين ؟؟؟؟
حبيب العدلى ارحم ولادك وارحمنا وبص فى الشكاوى بقى ووزير التجارة سيبك من الاحتكار
هل انت مع الخصخصه ؟؟؟؟؟؟
ايه الخس ده ما علينا اها طبعا لانه تطوير بس تتباع الحاجه بأرقامهاالطبيعه مع الحفاظ على العمال المصريين والعمل على تطويرهم
هل انت مع قطع العلاقه مع اسرائيل ؟؟؟؟؟
قطع ونسف وتفجير (كده هيتقبض عليه ههههههه) ايوة طبعا
هل تؤيد الحرب الحرب على العراق ؟؟؟؟؟؟؟؟
نووووووووووووو لان دول مسلمين حتى لو مختلفين فى المذاهب كل واحد يذهب بقى براحتوا انما بلاش حرب وتشريد وبعدين ما هو صدام راح امريكا هتفضل مستهبله كده كتير
هل تؤيد مرور الامريكان فى القناه ؟؟؟؟؟؟
الامريكان واى جنسيه بس ميعديش حاجه تضر بالدول التانيه او تضر بالمياة بالجنيه علشان الجنيه قيمته تكبر وتترعرع ومنبوصش له على انه بقى حاجه من غير قيمه وانه مش بيجيب شيبسى حتى
هل انت مشترك فى مؤامره كسر فرنسا هانم بالاشتراك مع ام دبوه ؟؟؟؟؟؟؟؟

لا بصراحه بس انا عارفه مين عمل كده هى جارتى السوسه المفروسه دى هى اللى اتفقت معاها يطفشونى ويكسروكى ههههههههه
بتمرر التاج ده لمين ؟؟؟؟؟؟؟؟
اها انا كده هلبس ناس سامحونى بقى
نسرين بسوينى د/حماس د/اجدع بنوته دكتور مخنوق سوووووووو شمس الزناتى خالو أحمد الصباغ وكل اللى فى مدونتى وبيزرونى واللى عاوزة يأخده ويجهز بطانيه ولحاف لانه هيتجر من قفاه من كوكبى على السجن فى مارينا مباشرة كان معكم من مجلس الشوعب المرجانيه آآآآآبى

سوق العبور ....غير عبور 6أكتوبر


هى الحكايه دى حصلت ليه من فترة بس حبيت احكيها لكم علشان بجد البنات تأخد بالها كويس وتتنصح ومش عاوزة ضحك من اولها عليا انا بقول اهو
نبدأ هلاوس فى يوم جمعه كده وده طبعا يوم أجازتى من الشغل عملت عمله ملخبطه اليوم ده بصحى بدرى معرفش ليه واحب افطر واقعد فى البلكونة اغيظ فى جارتى شويه وانا بشرب شاى (ايون علشان مش بحب المسكافيه ده) . خير الله ما اجعله خير جت ليه الهواجس تانى والهلاوس السمعيه والبصريه وقالت ليه انى اقوم زى الستات او البنات الشاطرة واروح اجيب حاجات للبيت من سوق العبور زى الناس الشاطرة دى (سوق العبور بتاع الخضار والاسماك فى القاهرة علشان اللى مش عارفه سوق كبييييييير قوى وجمله ) الهاجس ده بقى اقنعنى انى ست اقنعنى بكده وطلع كداب كدب. المهم قمت عملت حركة مكوكيه فضائيه زى بيرنارد ودونالد دك ولبست بنطلون ترننج وتى شيرت ونكشت الكام شعرايه اللى ربنا انعم بيهم عليا (هههه اصلى شعرى خفيف بس مبقتش زى المجانين ) وده طبعا بعد ما حطيت السائل الهلامى اللى بيتقال عليه جل (اللى تحس ان فيه صعايده مسكين فى خناق بعض فىشعرك ) ولبست النظارة الشمس لون التى شيرت والبنطلون لونهم بنى ولبست كوتشى موف ملوش علاقه بالموضوع (محدش يضحك عليا انا بكسل البس الكوتشى اللى برباط وده من غير رباط بس اللون مختلف ) وقولت فى عقلى اتلمى وبلاش ميك اب والوان شم النسيم اللى بتعمليها دى انتى رايحه سوق. ونطيت جوة المركبه الفضائيه بتاعتى (عربيتى بطوط) وروحت يا اخونا وعنيك ما تشوف الا النور مبقتش فاهمه حاجه من اى حاجه واسمع احلى كلام اكتشفت ايه بقى ان اللبس ده مينفعش للمكان ده خاااالص (بس اصل دى اول مرةانزل سوق بجد جهل بس بجيب من كارفور او اى ماركت كبير ) والناس كمان مش بتلبس كده خالص وانا بقيت واقفه عامله زى القرنبيطه العبيطه وسط السوق المهم (جهه دور التبذير والهواجس لعبت دورها) اشتريت قفص طماطم وخمسه عشر كيلو بطاطس وزيهم بصل وزيهم موز من عند واحد بتاع جمله وخيار برضه خمسه كيلو وبعدين مشيت شوية وكنت اتنصحت بقى ولقيت الناس بتاعت القطاعى جبت كيلو ليمون واتنين كيلو رومان ومبقتش لاقيه مكان فى عربيتى بما انها صغيرة وكانت حوسه فعلا (محدش يسال انا جبت الكميات دى ليه اصل اخبط بقله انا اصلا معرفش ليه ) المهم قولت ايه بعد الصدمه دى مش ممكن اجى هنا ومزورش منتجات البحر الاحمر قمت رحت عنبر السمك (ومحدش يسال يعنى ايه عنبر هما قالوا ليه كده ) بس الاهم بقى وانت رايح هناك تأخد معاك حاجه من الاتنين يا مايوة شيك يا جزمة بوت بلاستيك تكون على الموضه كده وكمان حاجه تقفل بها الشعب الهوائيه بتاعتك (مقلوكوش على الروايح بقيت محتاسه ارفع البنطلون من الارض لا اقفل مناخيرى ) وطبعا هنا المعاكسات اتغيرت اتحولت من تفاح مانجه لالفاظ الاسماك ههههههه وخد عندك جبت اتنين كيلو سمك بورى وكالمارى وجمبرى جامد وعلى فكرة الحاجات رخيصه جدااااا المهم اشتريت الحاجات دى والراجل نظفهم وشوى ليه السمك . وقررت الرحيل بقى من السوق بعد معركه عنيفه داخل السوق من انى اعرف امشى من الناس ولا مصمصه شفايف الستات اللى هناك . واحتست فى البيت بقيت العن ابو الهساهس اللى اقنعتنى اصلا انى ست وانى اعرف اشترى حاجه وانى زى بقيت الستات . وقعدت اعصر فى الطماطم وارميها فى التلاجه من غير ماأصفيها (ايووووون جهل سمعاكوماما قالت ليه سبيها وبعدين هصفيها ) وافرط فى الرومان واغنى له (ادحرج واجرى يا رومان ههههههههه) وارمى البرتقال والموز فى كل حته وكله كوووم بقى وطلبت انى اعمل الكالمارى دلوقتى بعد تلات ساعات حرب مع الطماطم وباقى الخضار فى انى اقنعه انه يدخل التلاجه او اشيل البطاطس تحت السرير (دى معلومة جامده حطى البطاطس تحت السرير على البلاط مش هتبوظ ) واصلا عمرى ما عملت الكالمارى بس جت على خير وقرأت فى جرايد المعارضه انه كان هايل . ومن ساعتها قدرت اغلب الهساهس دى وتحيا السوبر ماركت فى شراء الخضار ويسقط سوق العبور كله وده اخرة اللى بتمشى من غير ما تسمع كلام امها بجد لانى اخدت تريقه من امى واخواتى واشتغالات اللى يقولى افرشى بيهم فى الشارع واللى يقولى هات الحاجات وتعالى وكان يوم بس بجد انا مكنتش اعرف ان فيه مكان للجمله ومكان للقطاعى وغير كده مفيش ست تروح لوحدها سوق العبور ده خالص ونصيحه بلاش افتكاسات هبله وتحيا السوبر ماركت.

بوسى سمير................وفوران فى الدم على الصبح

انا قولت مش هنزل بوستات اليومين دول نتيجه حاله الاكتئاب اللى جت ليه (منه لله هو عارف نفسهم كويس اللى عملوا فيه كده) لقيت على الصبح الكلام ده فى موقع مصراوى قولت يا فتاح يا عليم ما كنت قعده فى حالى لا حول ولا قوة الا بالله ليه بس تستفذنى على الصبح خدوا بقى عندكم علشان لما انطح واضرب محدش يلومنى والاخوة الاطباء ميفقدوش اعصابهم الكوكب عندى مش متحمل جرحى
بوسي سمير: الرقص مهنة شريفة زي الطب بالظبط

الرقص مهنة شريفة مثل الطب.. أنا فنانة زي نيللي وشريهان.. (يا دى النيله طيب دول رقص استعراضى هو حرام بس غيرها خالص ادى الكدب والجهل )الشباب يحبوني ويدفعوا 700 جنيه لحضور حفلتي (ياااااااااا انا نفسى اشوف فين الشباب دول علشان اخبطهم بقلل فى دماغهم دول موظفين اكيد لا ولا حتى ولاد ناس محترمه لان ولاد الناس ميعرفوش ايه دوسى منير دى)" تصريحات من العيار الثقيل (زى دمها التقيل والجهل بتاعها ) أدلت بها الفنانة الاستعراضية المثيرة للجدل(هى فنانه استعباطيه كوفتجيه دى واحده مستهبله) التي حلت (ايون هى حله دى ومن غير غطى كمان )ضيفة علي برنامج "صبايا" الذي تقدمه ريهام سعيد على قناة المحور الفضائية وتناولت موضوع "الرقص الشرقي" .

كانت بوسي من الصراحة والوضوح (نسى يقول والبجاحه والجهل والتخلف وعدم التدين )وادلت باعترافات صريحة وفجرت قنابل مدويه (ربنا يوعدها بحزام ناسف ومنقدرش نلم اشلائها) عندما كشفت أن اسمها الحقيقي "سعدة" (او معزة عادى يعنى الاتنين مش بعيد )وقالت إنها امتهنت (شوفتوا ثقافات الرقصات )الرقص لحبها له وليس بدافع مادي (لااااااااااااا كده كتير عليا )وإنها كانت في بداية مشوارها تقترض أموالا من أبيها وأمها كي تشتري ملابس للرقص (شوفتوا يا حرام صعبة عليا جداا طيب كانت خدت قرض من البنك بقى طالما هى اللى بتصرف على المهنه واهلها ناس طيبين طيبين يعنى )"لأن بدلة الرقص الواحدة بحوالي 15 ألف جنيه، وهي تبدل ثلاث بدل في ساعة".

وقد فجرت بوسي قنبلة من العيار الثقيل عندما اعترفت بأن لها ملف في مباحث الآداب ،(امال هيكون لها ملف يعنى فى شغل ستات البيوت ولا لف ورق العنب ولا تربيه الاطفال ولا السياسه ) وقالت إنها ترى أن ملف الآداب أمر ضروري (عادى عادى جدا ده زى البطاقه الشخصيه او بطاقة التعارف بين الناس شوفت الهلاوس اللى هتجيلى بعد ما خفيت منها) في أي مهنة ليلة،(يعنى سؤال بتوع التمريض والطب والمهندسين اللى لهم شغل بالليل عندهم ملفات ولا يمكن لظباط الشرطه والعساكر لهم ملفات فى الاداب هى الملفات دى مش المكان اللى بنلف منه علشان نروح مكان تانى) وبالتالي هي لا تجد فيه عيبا، فهو مثل"الفيش والتشبيه" في أقسام الشرطة مؤكدة ان مهنتها مثل الطبيبة (يا دكاترة امسكوا نفسكوا امسك يا كابتن انت وهو الجماعه دول مش عاوز اجيب الاسعاف يشيل اهدوا بس ) كل منهما تعمل ليلا وكل منهما لها رسالة (رساله الى الوالى ههههههه والى عكا ).

وحول الضجة التي أثيرت حول كليباتها واتهامها بالإيحاءات الجنسية، قالت سمير اللي مش عاجبه كليباتي ميتفرجش عليها (اها علشان احنا ناس جهله هو انا عاوزة اسال مين اتفرج لها على فيلم بورنو من اللى هى بتقول عليه ده )" وهي الفاظ تتداول في الشارع (انهى شارع الله يكرمكوا حد يشاور ليه عليه علشان اروح اتثقف فيه واطلع على الحضارة الجديدة ) طوال اليوم متهمة الصحافة الصفراء (والبيضاء والحمراء وحمرا يا اوطه حمرا يا اوطه ) أنها تشوه صورتها، في حين تصفق لأية لبنانية تتعرى وترقص (عقدةالنقص والخواجه وما انيل من سيتى الا سيدى) ).

وأشارت بوسي سمير إلى أنها تملك رسالة فنية (نفسى اعرف ايه هى الرساله دى يمكن تمارين ايروبكس يا جماعه يمكن بتدىدروس فى الفاشون الجديدة للبنات وبتثقفنا واحنا مش عارفين ولا رساله من تحت الماءءءء) لا تستطيع توصليها إلا خلال القبلات والعري (طيب مش هعلق بس سيبونى انا كده هنتحر وابقوا خلوا بالكوا من الكوكب الله يكرمكوا )، وقالت: "أنا عندي رسالة ولازم أوصلها لو موصلتهاش بالعري والبوس؛ هنوعي الناس إزاي؟ (توعى مين توعى ازاى توعى ايه هى بتقول ايه ).

وحول خشيتها من عدم الزواج خوفا من أن تجلب العار لأبنائها قالت، إنها ليست متزوجة، وإذا أرادت سيكون هناك مليون شخص (اه كليون من كام مليون مليون مليون مين يتجوز مين فين ولا امتى امال البنات اللى زى الفل دول يعملوا ايه ) في انتظارها، وأنها لا تتبرأ من مهنتها كراقصة بالعكس بل تشعر بالسعادة من كونها راقصة (اه رقاصه وبترقص وماله عادى يعنى مش عيب عيب علينا احنا اللى مش فاهمين رساله الهانم احنا جهله)

واخيرا وبعد البوست ده مش عارفه مع حاله الاكتئاب اللى عندى والهلاوس السمعيه والبصريه اللى جت ليه على الصبح والخزعبلات اللى فى دماغى والقلل اللى عماله تقع دى مش عارفه بجد هعمل ايه طيب ردوا انتم بجد بس اللى اقدر اقوله حسبى الله ونعم الوكيل لما تكون دى واحده بتنشر افكارها المسمومه زى غسيلها اللى مش نظيف.


انا قابلت البلوجريه ..................لولللللللللللللللللللللللللللى





بجد كان يوم جميل رحت افتتاح مكتبه دار الكتب واول مرة ليه احضر افتتاح (اصلى كسوله وزى الدبه بعمل بيات شتوى دايما)

المهم قابلت ناس كتير كنت اتمنى اشوفهم وناس مش عاوزة اعرفهم (معلش دى حريه شخصيه بس عدت على خير من غير اصابات ولا قلل ولا نطح خرفان)

واتصالحت مع ناس بس قابلت اجمل حد عرفته أحمد الجيزاوى شخصيه هايله وجدع قوى وابن بلد جدااااا لابعد الحدود وقابلت خالوو احمد الصباغ وانا الى عرفتهوعرفته بنفسى (ورحت صلحت نيته الوحشه من ناحيه صور الغروب ههههههههه)بس ده بجد شخص محترم جدا وقابلت ايناس (فكر سجين) ونشرت صورتى عندها وفضحتنى على الفضائيات هبقى ابعت لها فيكونات فضائيه تخطفها واخلص منها بس محدش يفتن بقى وشمس الزناتى ونوشه ومنذر وشاهنده كتير قوى وبعدين بعد الافتتاح رحنا البورصه وبدأت الصراعات عن الاحزاب وكل شويه يجى حد يقولى حزب ايه (يادى الليله مليش والله فى الاحزاب كنت اقولهم على حزب وداقلبىهههههههه او حزبى الله ونعم الوكيل)هو انا لازم ابقى حزن انا برشح نفسى مستقل ههههههه بس بجد زعلت على التضارب فى الافكار وكل واحد عاوز يبقى حزبه السايد طب بزمتكوا تبقى دى ديمقراطيه (دى بيراقراطيه وديكتاتوريه وامبيريه والبيريه) هههههههههه اصلى مش بقتنع بالمسميات بجد وبما انى لدغه فى حرف الراء مبعرفش اقول الحاجات دى بجد وبصراحه معرفش غير انى مسلمه والقرأن والسنه واضحين وهما طريقى بس المهم بقى على راى احمد كان يقولى انتى عملتى (صدمة حضاريه وبصراحه مش عارفه معناها اصل الجيزاوى بيقول كلام كبير قوى ويقعد بعدها يفهمها ليه ساعه بيغلب معايا) معلش بقى يا جيزاوى اتحمل ههههههههههههه بس بجد كان يوم هايل واتبسط وفهمت الناس اللى كانت مش فاهمه وجهه نظرى ( حلوة وجهه نظرى دى من أثارالعدوان قصدى الاحزاب) وفهموا وفيه ناس بصراحه مقربتش منهم عادى يعنى بس بجد بحزن على التفكك فى الافكار والاتجاهات دى لان بحس ان مصر مش بتتوحد دى بتتفكك من غير ما نحس والاقوى انى اول مرة اشوف البورصه دى (كافيه فى بلدى مصر اللى بحبها قوى) لانها فى وسط البلد وانا جاهله جاهله يعنى فى وسط البلد يالا نبقى نعمل لها رحله وهنزل بقى الصور وبشكر كل الناس اللى رحبوا بيه وبهنى مصطفى على المكتبه وربنا يبارك له فيها وبشكر الجيزاوى انه عرفنى بالناس الهايله دى وعرفت افكار كتير بس فى النهايه انابعلن انى مستقل وبتكلم بلسان الناس العاديه او راى الشخصى والناس عرفوا مين لوزة (الشيشه بتاعتى ) لانهم كانوا فاكرنها واحده صحبتى وعرفوا بطوط وهى اسم عربيتى والدكتور بقى قعد ينصحنى انى ابعد عن لوزة ويا رب ابعد علشان متعبش منها بس هى صحبتى اللى بتسلينى مش مهم هخلى خروف ينطحها من عندى واخلص بقى (بس كده خيانه للصداقه بس فى دى حلال ههههههههه) الدكتور ده صاحب مدونة كلابش بس زى السكر ودى بعض الصور من المكتبه ساعه الافتتاح للناس اللى قابلتهم

زمن الابيض والاسود..............وزمن الالوان

بجد مش عارفه اقول ايه من الهلاوس دى اللى عندى بقى عندى حاله غريبه من العته المنغولى والهسهسه من اللى بشوفه اليومين دول والضغط بيرتفع ويضرب لخمسه الاف فولت وببقى ولا السد العالى مش عارفه ازاى (يعنى بولد كهربا للبيت طبيعى)
زمان كان زمن حب وود ومشاعر وناس محترمه بجد وبتخاف على بعضها وبتحترم خصوصيات غيرها وزمان كده كانت امى تحكى انهم كانوا بيلبسوا جيبات قصيرة وبنطلونات والبنت خارجه بشعرها (مش معنى كده أننا نخرج كده دلوقتى علشان اللى بيفهوموا الكلام غلط كل واحد حر فى تفكيرة وهيتحمل عواقب اللى بيعمله )وبصراحه انا شوفت صور امى لو فكرت البس قصير وهنا بكون لعبت فى عداد عمرى وفوته كمان( بتبهدلنى بحس ان قلل البيت كلها بتقع على دماغى ) واقعد اقولها ما انتى بتلبسى كده زمان تقولى زمان كان فيه أخلاق واحترام انما انتم جيل ما يعلم بيه الا ربنا (وتبدى حصه فى الاخلاق الرفيعه والتخينه كمان وفعلا دى الفجوة اللى ما بينا وبين الجيل القديم ونفسى تتقفل ونتعلم منهم ومن خبراتهم فى كل حاجه حتى الناس الجهله بتوع زمان اللى متعلومش هنلاقى عندهم حاجات كتير نتعلم منها لانهم عاشوا الزمن الحلو اللى فيه اخلاق والزمن فعلا المنيل اللى عايشين فيه دلوقتى) بس مكنش يقدر ولد يعاكس او يقول كلمه مش كويسه على الرغم من لبس البنت وكان شئ عادى بس مش كل الشعب بيلبس كده يعنى زى ما بنشوف فى افلام الابيض وأسود وكان لما واحد يخرج حتى مع اخته لو قابله واحد صحبه ميبصش له لان عيب ده ماشى مع اخته او اى بنت وخلاص ميسلمش عليه ولا كأنه يعرفه وكانت البنت لو مشيت فى الشارع صوتها على قوى يتقال عليها مش كويسه وكان فيه حريه فى كل حاجه( وزمن الجنيه الجبس هههههههههه) على راى تيته يعنى الجنيه يشترى كتير قوى وتحس فيه الخير مش دلوقتى الجنيه مش بيجيب كيس شيبسى وزمان كان فيه احترام فى السينمات والاماكن العامه كان فيه خروج وفسح بس محدش كان بيضايق حد زمان مكنش فيه موظف مرتشى ولو عمل كده ضميرة يأنبه والدنيا تقوم وتقعد انما دلوقتى بييييسسسسس يا مااااااان كام سنه فى السجن ونطلع نظبط الامور بالفلوس عادى يعنى هيتعوضوا (وده فرق كمان).
انما تعالى دلوقتى لزمن الكوووووووووول وبيس يا ماااااان وهاى شلته قصدى شله وهنكروز فين النهارده وهنسهر عند البت مين بقى لااااااااااا دى وحشه خنيقه ولو كلاااس

(مش قولت لكم جالى هلاوس وبتضحكوا عليا) احنا فى زمن انتهت فيه القيم والمبادئ زمن الخزعبلات والافكار الهلاميه والاعتماد على الغير زمن جاد شويرى وبوسى سمير وعمااد زعرور زمن الشعارات الكدابه ممكن الولد يروح يصاحب اخت صحبه وكمان البنت لو لابسه حجاب وماشيه فى الشارع بتتعاكس ويتقال لها أقذر الالفاظ بجد ومن أطفال صغيرة علشان بس تعرفوا ان مش بس اللى لابسه بنطلون وتى شيرت هى اللى بتتعاكس والبنات عارفين الكلام ده وكمان البنات عادى تروح تبات عند واحد صاحبها وصاحبها يبات عندها طيب ايه اللى حصل فى زمنا زمان مكنش فيه فرص عمل كتير بس كان فيه شباب عاوز يكافح بيعمل مشاريع اى حاجه حتى ممكن يعملوا اكل فى البيت ويبيعوة للناس الموظفين اللى معندهومش وقت والشباب كان بيتعلم بس ميستناش كيلو باميا ولا الرضعه فى الببرونة من ماما لا بيدور على شغل ومشاريع حتى لو صغيرة واحنا عندنا الفرص دلوقتى ممكن نأخد قروض من اى مكان ونبدأ مشروع حتى لو صغير كل حاجه بتنفع مفيش شغلانه عيب لامتى هنعتمد على غيرنا ولامتى هنقولك العيب فى الكيت الجنسى علشان التحرشات وفى البطاله علشان التسكع على النواصى لامتى هنعلق خيبتنا على شماعه غيرنا
الناس زمان كان عندهم اخلاق انما احنا فقدنا تقريبا احترامنا لنفسنا يا ريت زماااااااان يرجع تانى وكمان كان فيه اخلاق لو ولد شاف بنت بتتعاكس وهو ميعرفهاش يروح يبعد الناس اللى مش كويسه دى عنها انما دلوقتى هيص يااااااا مان ممكن يروح يزيط مع الزيطه (زى فرح العمدة كده أى حد معزوم فيه)
وعلى رأى ام كلثوم عاوزنا نرجع زى زمان قول للزمان ارجع يا زمان (بس حاجه اخيرة هى غلط منها الكلمه دى لان الزمان مش هيرجع بس احنا اللى هنتغير ونبقى ناس محترمه وكويسه وعندنا حياء ومنعتمدش على غيرنا

انا ليه بقول ده مش علشان ابيح حريات للبنات لا كل واحد مسئول عن تصرفاته انما انا بوريكم الفرق بين الزمن الجيميل القديم وجبت مقارنات على قدى كده فى حاجات يوميه واخلاق وتفكير عملى وفرق ما بينا وبين الناس الكبيرة اللى بتمنى اننا نتعلم منه
م)
)

الجارة الجاسوسة........المتطفله

اسكان المستقبل فى القاهرة الجديدة

بجد موقف صعب وبعانى من التوابع المترتبه عليه لدلوقتى زى الزلزال بالظبط ا
نبتدى الرغى(على راى بتوع المترو المنافق) من سنه ربنا كرمنى واشتريت شقه فى القاهرة الجديدة مدينة هايله واللى راح هناك عارفها يعنى الاخوة اللى زاروا نياببه امن الدوله والمحكمه ههههههههههه عارفين قد ايه المدينة دى هايل اشتريت شقه من اسكان المستقبل (اللى اونكل مبارك وطنط سوزى عاملاه) ربنا موفقنيش وعرفت احجز بس اشتريت بعدها من واحد حجز لان الحجز كان بألفين جنيه وانا اشتريت منه بعدها تخيلوا بكام 45 الف جنيه اه والله وترجعوا تقولوا مفيش سكن وازمة اسكان والله احنا اللى عاملنها بس رزقه بقى الراجل ربنا يبارك ليه فيه ما علينا بجد العمارات دى هايله والشقه صغيرة 63م بس منظمة حلو قوى حجرتين وريسبشن ومطبخ امريكان كيتشن(شوفتوا الثقافات) المهم الامريكن كيتشن ده مفتوح على الريسبشن وده كان اكتر حاجه بتعجبنى فى الشقه المهم شغل الاطفال كبر فى دماغى ولونتها زى الوان بيض شم النسيم اورانج على اوف وايت(بيج يعنى) وموف فى الاوض بدرجاته ونقلت وانا مبسوطة جد الشقه دى بتبص على عمارة تانيه جيران بينا وبين بعض شارع حوالى 6 متربس ده عبارة عن جنينه حلوة قوى المهم بقى بقيت اقعد فى الشقه براحتى صيف بقى وحركات وكمان ببص على جنينه يعنى الاختراع اللى اسمه بلكونة ده يفضل مفتوح وكنت بقفل اوض النوم لانها ميصحش حد يشوفها المهم البلكونه بتاعتى صغيرة وانا بموت فى الزرع جبت زرع وحطيته فى البلكونه جارتى بقى النوسه الكونوسه (الحيزبونه القرعه) معجبهاش الحال بقت تسيب شغل البيت وتستلمنى من ساعه لما اروح بعد الشغل لغاية لما اقفل البلكونة وانام وانا علشان الناس اللى خيالها بيسرح مكنتش بطلع البلكونه بحاجه وحشه بكون لابسه اسدال او روب علىالاقل بس هى كاشفه الشقه عندى ومش مكفيها كده لا تجيب بنت جوزها بنت فى ثانوى كده ويقفوا دى تسيب مذاكرتها ودى تسيب اولادها ويقعدوا يبصوا عليا ويضحكوا قولت يالا عادى يمكن معندهومش تليفزيون وانا بسليهم عادى بس الموضوع زاد عن حده تجيب ولد عنده 15 او 16 سنه توقفه يتفرج عليا وانا قاعده والله انا مش بقعد بلبس وحش يعنى بس صيف وكل واحد له بيته وانا حرة فى بيتى طالما مش بطلع بلكونات المهم سمعتها بتقول له دى مبتبردش صيف ولا شتا قاعده تهوى نفسها طول الوقت.........ونزلت الموسيقى التصويريه وكبرت فى دماغى والعفاريت لعبة شطرنج فى وشى وطلع دونالد دك وعم دهب والاشرار كلهم لا كده زياده بقى قمت لبست وطلعت لها البلكونه قولت لها لوسمحتى انتى تعرفينى هى: لا معرفكيش أنا: طيب هو حضرتك تايهه لكى حد وبتبصى عليه عندى ولا انا طلبت حراسه طولاليوبتحرسى ى ليه الشقه خايفه اتكعبل ولا حاجه تسمى عليا. وهنا نزعت الفتيل وسمعت احلى كلام معرفتش ارد من فوق ولا من تحت وقعدت بقى(تييييييييييييييت تربت تيييييييييتنا بكل ادب وهدوء قولتها انا اسفه انى بتكلم معاكى انت مينفعش معاكى التفاهم لقيتها تقولى ما تقفلى على نفسك (غريبه جدا بتحكم عليا فى بيتى ودى المنفذ الوحيد ليه ولازم تفضل مفتوحه علشان المطبخ كمان مفتوح على الصاله وعندى شفاط بس لازم تهويه) وانا قولت لها انتى هتحكمينى من هنا وجريت استخبيت (اصل بصراحه مليش فى الخناق واكتر واحده ممكن تضحك الناس وهى بتتخانق انا ) وهى مسكتتش بقى توقلش كانت بلعه راديو وجايبه محطة الشتيمه وقله الادب (ابقوا دوروا على المحطه دى وقلواا لية) او مثلا واخده كورس من المعهد البريطانى بس فى الشتيمه . كبرت فى دماغى وقولت هنزل اروح القسم بقى اعمل بلاغ فيها ويتعمل معاها احلى واجب لو اديت لامين شرطة خمسه جنيه هيجبها من بيتها المهم واحدة جارت السوسه سمعت سنفونيه الردح المنفرد فنزلت متطوعه ودخلت لها من البلكونه عندى قالت لها عيب ما يصحش وياااااااااا كانت نيله اتقلبت وصله الردح عليها قفلنا البلكونه وجارتى قالت ليه معلش بلاش قسم وانا بصراحه صعبت عليا لسببين الاول عندها طفلين صغيرين هيعملوا ايه لما يلاقوا امهم بتتاخد من البيت ثانيا منظرها قدام جيرانها(انا طيبه بشكل يعنى هى مخافتش على منظرها وانا خوفت عليها. وجارتى اللذيذه فهمتنى انها الست دى متجوزة واحد على مراته وهو بيشتغل جزمجى وهى من منطقه اسمها الجيارة اممممممم ودى طبعا من هنا فهمت وصله الردح المنفرد جت منين قولت تانى يوم اعمل شالوم زى بتاع اسرائيل يعنى من تحت لتحت كده ورحت لها وأتاسفت لان صوتى طلع وسالتها قولت لها هو انا عمرى بصيت عليكى بدأت تستفذنى تقولى ليه هو انا اراجوز قولت لها الله يسمحك يعنى انا كده قولت لها دا احنا ستات زى بعض يعنى خليتى ايه للرجاله قالت ليه اصلك مسليانى(هو انا لب ولا سودانى ومش واخده بالى) قولت الله ما طولك يا روح فى سرى طبعا لاضرب قولت لها خلاص متزعليش منى تقولى ما انتى بتطلعى البلكونه ومتقوليش صباح الخير (يا نهار هو بالعافيه يا ناس) قولت لها بتكسف معلش واستأذنت ومشيت فهمت بقى من شويه كلام لها انها بتغير على اسم النبى حارسه بلعها طيب بالزمه دى عندها نظر انا هبص لجوزها طيب والله عمرى ما شوفته انا اصلا مش ببص لحد بس هى معقده علشان واخدا من مراته وأولاده فمتخليه ان حد هياخده منها قولت خلاص فكرة جت فى دماغى وقولت اضحى ب700جنيه واركب تندة وبالفعل اتصلت والناس ادونى ميعاد اسبوع وهيركبوا طيب يا نهار اعمل ايه قولت بما انى دمى محروق هتسلى عليها (فكرة شيطانيه) جايه من دونالد دك وعم دهب بقيت عامله عرض ازياء فىالبيت لان بعد الحوارت دى هى ما زالت بتبص عليا ومتبعانى وتحرك الكرسى اللى قاعده عليه على حسب مكان قعدتى فى البيت بقيت كل ساعتين ادخل البس حاجه واطلع وفتحت شباك اوضه النوم لانها بتكشفه واحط مكياج وانا فىالبيت واعمل حركات هبله اقعد فوق البار بتاع المطبخ اغنى بصوت عالى لبست كل لبس المصيف وانتم عارفين لبس المصيف المنيل غير لبس البيت طبعا اللى انيل لغايه لما التنده ركبت والله غطت البلكونه الست من جنانها بقت تقعد وتتزحلق علىالكرسى علشات تبص عليا من بين الحديد او تقعد علىالارض لان دى الطريقه الوحيده انها تشوفنى طنشتها وسكت من يومها ومبقتش اديهها اهتمام لغايه لما ساعات تزهق وتقفل البلكونة المصيبه بقى لو انا فاتحه ومش منزله التنده وهى فاتحه عندها وجرس الباب عندى رن بتجرى تبص قبل ما انا افتح الباب علشان تشوف مين جاى لانها بتسمع صوت الجرس الدنيا عندنا هاديه جدا. ليه بقى


بحكى الموضوع ده لان الرسول عليه الصلاة والسلام وصى على سابع جار طيب ليه مش بنحافظ على الجيرة دى

تانى حاجه لما حد يتكلم معانا ليه منردش باحترام وادب والالفاظ اللى بتتقال طيب هى مش خايفه على اولادها الصغيرين يلقطوا الكلام ده ويحفظوه دى ام ازاى ولا احنا هنكون امهات ازاى واحنا مش عارفين نعلم ولادنا ابسط حاجه
الرجاله يا جماعه او الستات اللى غاويين القصه دى يعنى يبصواعلى جيرانهم والله بتكون مؤلمه جدا انك تحس انك متراقب طول الوقت(ولا بتوع أمن الدولههههههه) وبعدين ده بيتى يعنى انا حرة فيه طالما انا مش بعمل حاجه مش محترمه ده لبس مش رقص ولا سهر ولا اى مصيبه من اللى بتحصل لو الناس راعة بعضها هتلاقى اللى يقف جنبها فىالشده يعنى دى لو حصل عندها حاجه وانا سمعت او عرفت وانا مش بكلمها اكيد والله هجرى واقف جنبها لوجهه الله تعالى مش لحاجه تانيه زى ما حصل مع واحدة تانيه جارتى لما عرفت انها تعبت اخدتها وديتها المستشفى وفضلت معاها لغايه لما خلصت محاليل ورجعتها ومكنش بينى وبينها غير السلام عليكم بس ليه منكونش ناس محترمه ونحترم بعض وبعدين حتى لو هى من منطقه عشوائيه ربنا كرمك واخدتى بيت فى منطقه راقيه ونظيفه وهادئه ومستقبل لاولادها ليه مصممين اننا نربى اولادنا بطريقه غلط حتى لو احنا اتربينا فى مكان غلط نحسن من نفسنا لما نفهم واولادنا يا ريت تكونوا فهمتوا اللى عاوزةقوله

كمان كل واحده تبقى تبص يا جماعه على جوزها (ههههههه وتخلى بالها من نفسها الاول) الاول يعنى تشوف جارتها دى مستواها ايه وجوزها مستواه ايه ولا الاجتماعيات والشكل الاجتماعىى والتوافق الفكرى والثقافى مبقاش همنا قبل ما تحكم على جارتها او حتى جوزها وبكده مش هكون فيه خلافات لان فيه ناس حتى بتغير من صحبتها وده بصراحه هبل من الستات وعبط من الرجاله علشان عيب عليهم (يعطوا بره بلاش صحباة مراتتهم
ولا صحبات خطيباتهم ههههههههه لا بهزر اوعوا الخيانه) اللى فوق دى شكل العمارات اللى انا ساكنه فيها شوفوا بلدنا حلوة قوى ازاى بجد مش هزار
حاجه كمان من السهل انك تبقى قليل الادب بس مش صعب انك برضه تكون مؤدب
وكرهت الامريكان كيتشن اللى جاب ليه وجع الدماغ مع انى بحب الموضوع ده جدا تقعد تأكل كده فى المطبخ وبار رخام يعنى مش محتاج سفرة كرسيين وخلاص ووفرنا حق السفرة
وانا لسه برضه عند وعدى بغيظ فيها رغم اننا فى الشتاء بشغل الدفايه والبس اللى انا عوزاه هههههههههههههههه

تغير لوحات السيارات الملاكى

أوردت مصادر أنه سيتم اعتبارًا من مارس القادم تغيير جميع أرقام سيارات الملاكي بكافة أنحاء الجمهورية، على أن يتم استبدالها بلوحات جديدة من مادة قابلة للكسر، بحيث لا يستطيع مالك السيارة فكها وتركيبها بمعرفته.


أضاف المصدر أن قيمة اللوحة الجديدة 20 جنيها، كما ستحمل كودًا لكل محافظة من محافظات مصر؛ فالقاهرة سيكون كودها "1" والجيزة "2" والإسكندرية "3"، وكذا المحافظات الأخرى المحافظات، وسيتم وضع الكود على يسار الرقم وسيكون بارزا.


وأوضح أن الإدارة العامة لشرطة المرور اتخذت قرارا سيطبق في نفس التوقيت بمنع وضع أي إشارة على اللوحة الجديدة تميز صفة صاحب السيارة عن بقية أصحاب السيارات الأخرى كالمحامين والصحفيين والقضاة والشرطة.

وأشار إلى أن الإدارة قامت بتدريب ضابط المرور على كيفية فك وتركيب اللوحة دون كسرها.


من جهة أخرى، قرر جهاز تشغيل مترو الأنفاق ابتداء من السابع من يناير القادم نقل عربتي السيدات بمترو الأنفاق إلى منتصف القطار بدلاً من العربتين الأوليتين خلف كابينة القيادة.

جاء القرار بهدف عدم إزعاج السائق بالثرثرة وبكاء الأطفال، وقد تم اتخاذه في أعقاب الحادث الأخير لمترو الأنفاق

الخبر ده نقلته من موقع أمل الامه

هو كويس انهم يعملوا كده بس رقم عربيتى عجيبنى يعنى ومش عاوزة اغيرة ده تلات ارقام بس (بجد هو اقل حاجه اربعه بس انا عربيتى6 ارقام انما متاشبهين يعنى عبارة عن ثلاث ارقام متكررين بس ومجموعهم 18 ))

عروستى صح هههههههه معلش بقى يا بطوط هيغيروا ارقامك بس هى خدت على الارقام القديمه يالا اشمعنى هى اعمل لها نيولوك فى السنه الجديدة

وبعدين ما يشوفوا الاسعار اللى بتطلع وتعلى دى وبقت نار والقتل والبلاوى السودا هى مصر مشاكلها اتحلت بقت المشكله فى أرقام العربيات بس احسن حاجه انه مش هيبقى فيه بادج على عربيات الظباط والدكاترة والمهندسين اصل والله بيجيلى حول منهم ومرة لقيت واحد حاطط 3 بادجات مرة واحده مهندس ودكتور وظابط بس معرفتش ليه

بس حلوة قوى قصه اللوح علشان نضمن محدش يسرق العربيات ولا لا والله الحراميه مخلوش حاجه

الاقوى بقى قصة رغى الستات والاطفال وراء سواق المترو هما دلوقتى هيجيبوا الغلط فى رغى الستات خلاص يعملوا لينا فيبريشن بدل ما نتكلم هى الحوداث بتاعت المترو بقت من رغى الستات ولا رغى الصابون سبحان الله

Share |