انا على الحرة وهما مالهم

دى صورتى انا والصباغ والكاست بيصور من بعيد
بس كفايه ضهرى ليكواههههههههه خفت عليكم من الخضه هههههههه

صباح الفل والورد والياسمين

البوست ده خفيف خفيف بما انى هبقى فى أجازة من بكرة لغايه يوم الجمعه .
يوم الخميس اللى فات سافرت علشان عيد ميلاد الواد السكر المقالب ابن اختى ايموو حبيب قلبى انا ورحت عملنا له عيد ميلاد
نيجى بقى للاحداث من قبلها وخالو الريس احمد عبد العال هههههههههخخخخخخخ اللى هو خالو احمد الصباغ سابقا وده اسمه الجديد طلبنى وعاوزنى اصور معاه برنامج لقناة الحرة طبعا مقلكوش عملت سبع الكرنبه وقولت ماشى وانا عماله اطنط فى البيت واقول يا دى النيله ايه التدبيسه دى انا بتكسف آآآه والله مش مصدقين انا بس لسان كده على النت انما فى الحقيقه لما اتعامل مع اشخاص ببقى مكسوفه أخر حاجه وضاربه الوان الطيف فى وشى .
المهم احمد قالى التصوير الخميس ومكنش ينفع خليته الجمعه وهو كلمنى الخميس بالليل يقولى الميعاد وأنا كنت مقتوله وفى عالم الاموات خالص من السفر واللعب مع ابن اختى
تانى يوم كلمنى وقولت له انا هاجى فى الطريق بس سيبونى اروح اغير وعديت فى الزقازيق وبعدين طلعت بلبسى وشعرى المنكوش شبه عفريت العلبه هههههههههخخخخخخ على الزمالك وكان معايا سووو وخالد همس الاحباب بس سابنا ومشى وبعدين جه الصباغ والكاست بتاع البرنامج وحسيت ان كلهم عاوزين يضربونى على التاخير ويشدوا فى شعرى بس بما انهم محتاجنى اتبعوا سياسه الهدوء ومسكوا اعصابهم بمشابك هههه وانا كل شويه وانا فى الطريق يكلمونى وارد وبعد ما اقفل اقول لسووو واغيظ فيه مش عارفه اعمل ايه يا ربى اوردارات طول الوقت انا زهقت بجد ههههههههخخخخخخخخ(وسووو يقولى واحد مرايا هنا ) وده سين ما بينا فهمينه خخخخخخخخ
ومش هقول معناه لحد هههه بس الشاطر يقول معناه (وله جايزة)
والصباغ اول ما شافنى حسيت انه هيجرى ورايا فى الزمالك فى مكان التصوير كافيه سينابوو وتخيلوا الصباغ بطوله ده وانا نونو كده بيجرى ورايا هههههخخخخخ زرافه بتجرى وراى قطه وعدت على خير
وقعدنا صورنا واتكلمت عن الفيس بوؤ ( الفيس بووك يعنى) بس كنت مكسوفه جدا والواد الصباغ وسوو يقولوا ليه كنت مزة وهما عارفين انا بكرهه الكلمه دى (وش مطلع دخان ومدلدل ودانه )

وعدى اليوم على خير وكانوا عاوزين يصوروا معايا فى البيت وكمان الشغل بس اقنعتهم بقى ان كده حلو بعد طبعا ما وافقت خخخخخخخخخ علشان يعنى ميصحش تعرفوا كل حاجه كده عنى حتى البيت .
ولسه البرنامج قدامه شويه لما يتذاع وهقول لكم على الميعاد.
هجيب لكم صورتى مع الصباغ بس مش كلى باينه نيهاهاهاهاها غتاته خلوها مفاجأة فى التليفزيون للناس اللى متعرفنيش
وبجد فى النهايه بشكر الصباغ قوى على ثقته فيه علشان رشحنى وفلترنى وصبر الكاست عليا لانى من اولها وبضرب مواعيد التصوير بس علشان عيد ميلاد ابن اختى
وسوووو اللى كان قاعد يتكلم مع الناس عنى هااااا وطبعا هو فاهم مزززة فى عينك يا سووو
وكمان خالد همس الاحباب انه وصلنى لغايه مكان التصوير اختكم عبيطه قرنبيطه مش بتعرف حاجه فى الزمالك
وقطتى الحلوة انها سابتنى اروح على الرغم من انه يوم عيد ميلادها

ملحوسه :- انا اجازة بقى وهخلص منكم ومن النت خخخخخخخ ليوم الجمعه بجد تعبانه ومحتاجه اقعد مع آبى شويه تراجع نفسها فى حاجات كتير قوى قوى ....ممكن ابقى اعمل تحديث للصور تانى ههههههههه وانزل صورة تانيه ليه
وكمان الشغل صعب عندى فمحتاجه هدنه بس هبقى اتابع تعليقاتكم على الكوكب عندى بس مش هقدر ازور حد لانى تقريبا هقفل النوبيل وارمى اللاب توب (زامباتيكا) فى الدولاب فترة وعلى فكرة ده اسمه هههههههخخخخخخخ مش ماركه يعنى انا سميته كده
وكل سنه وانتم طيبين بمناسبه اى حاجه وكل حاجه


كان معكم استاذه مذيع شنيع فظيع مريع آبى هانم وربنا يستر منطلعش من الحرة على لازوغلى وبركاتك يا صباغ


والقطنه طلعت بتكدب


بصوا بقى ربنا ادانا عقل نفكر بيه واونكل القطنه مبتكدبش عاوز يحول عقولنا لخرده ويبعها هو يستفيد بيها
التصريع طبعا فى مصراوى اللى ربنا يعمر بيته يا رب

أسعار عز ليست الأعلي
وأضاف:"أحمد عز يعمل فى مصر ، ويدفع ضرائبه بالكامل ، وأسعاره ليست الاعلى فى السوق ، بالعكس لإن انتاجه أكبر ويعتمد على التصدير بالدرجة الاولى ، فإن أسعاره أقل من أسعار شركات أخرى كثيرة ، ومع ذلك فإن أى شكوى تصل الينا عن احتكار فى السوق يقوم جهاز منع الاحتكار بفحصها ، وإذا وجد أن هناك احتكارا يتم اتخاذ الاجراءات فورا

طيب انا بقى وبالدليل وفواتير تحت ايدى هعرض لكم الارقام بما انى يعنى بشتغل فى مكان وفيه مصنع لسه تحت الانشاء على مساحه 30الف متر مربع
1-سعرالطن فى حديد بشاى قطر 25 مللى يوم 10/3/2008 ب 5904جنيه مصرى.
2- سعر الطن فى حديد عز 12 مللى فى نفس التاريخ 5476جنيه مصرى.
من هنا يبان التفاوت فى الاسعار وازاى الاتنين قريبين من بعض المفروض يبقى الفرق كبير دى حاجه
طبعا هتسألوا ليه مش جيبين من مكان واحد لان لعبه الاحتكار بكل بساطه جايه من هنا هو بيصنع حديد بأقطار معينه محتكرها عن المصانع التانيه ومن هنا بيجى اللعب فى الاسعار فلما يطلع بقى يقولك مش هو اغلى سعر يبقى عنده حق بس هو الراجل بحكم القطنه اللى منظفه عقله على طول نسى يقول انه فى اقطار معينه ههههههههخخخخخخخخخ
ومن هنا اللعبه بتتكشف انا بس حبيت اوضح علشان حرقه الدم واللعب مع الكبار مش قولت لكم سيبوا النحله والدبور اللى هيودونى فى داهيه دول هما اللى يتعاملوا مع الناس دى

وادى تصريع كمان علشان فعلا كلامهم بقى بيجيب ليه صرع
حرية الرأى لاتعنى الفوضى
وعن المظاهرات والوقفات الاحتجاجية فى طريقة التعبير، أكد د.نظيف أن شعب مصر واع تمام ، وقادر على حماية مكتسباته ، ومقتياته ، ودولته ، واستقراره وأمنه بدليل أن الكتلة الاكبر فى المحلة المكبرى وهى من العمال لم تشارك فى الاحداث المؤسفة الاخيرة التى ارتكبتها قلة مدفوعة من بعض التيارات ، مشيرا الى أن حرية الرأى لاتعنى الفوضى .. فالحرية مسئولية

لبست دلوقتى الاحداث والمشاغبات انها قله مدفوعه من بعض التيارات انهى تيارات شماليه جنوبيه ولا غربيه عكسيه فى قفانا يعنى بالعقل اشمعنى عملوا كده فى المحله بس ليه مش فى القاهرة وليه مش فى بعض المحافظات التانيه وليه كتموا على المحافظات التانيه
هما بس بكل بساطه وده راى فى الموضوع انهم قالك مين اللى دايما بيطلع او اول ناس طلعت الاضراب كانوا بتوع المحله ومن زمان فقالك لا يبقى يخدوا العلقه الكويسه علشان ميعملوهاش تانى بس وبساطه

وأكد أن الحكومة القوية لن تسكت أبدا عن أى دعوة للتخريب ، أو هدم استقرار المجتمع وأمنه وسلامته ... فالرسالة كانت واضحة وسوف نطقبها فى المستقبل بوضوح ، وأى خروج على القانون والنظام لن نسمح ب

فعلا الرساله واضحه فى التخريب بتاع البلد وفى المعتقلين وفى ان اللى بيتكلم ايه بيحصله
وفى النهايه اللهى يسترك دنيا واخرة ويلاقوا لك كفن على مقاسك

اما عنى هبلغ فرار يومين بالخمسه جنيه اللى معايا واهاجر بلد تانيه بدل ما اتقفش من قفايا واعمل زى ناس تانيه قالت الموضوع كان لعبه بس اوعدكم انى لو حصل ليه حاجه فانا عندى قضيه متمسكه بيها ومؤمنه بيها وهى اننا لازم نشيل الفساد ونديله بالشالوط ونضربه على قفاه.
كان معكم سجين هربان زنانه رقم 19 معتقل مارينا شهيد فقيد آبى هانم وهنيالك يا فاعل الخير عااااااااااا

الناس دى بتقول كلام كبير كبير


يا اهلا وصباح الفل والياسمين
بعتذر بقى لاخى الطائر الحزين لانه قالى متروحيش عند الناس دى تانى وانا ايدى بتودينى هناك على طول معلش
وفعلا جالى ارتفاع فى مواسير الميه وعملت ضغط عالى
الاول من مصراوى
جمال باشا ربنا يكرمه يا رب ويعلى يخته وفيلاته كمان وكمان بيقول
أولوية الحكومة والحزب الوطنى القصوى لزيادة الدخول وخفض الأسعار
انا بس عاوزة اعرف هو بيتكلم عن اى شعب احنا يعنى ولا حد من المريخ اتكلم عن السلع الغذائيه بما انه فاهم كويس ان الشعب المصرى همه على بطنه ههههه
انما والنبى ما وجهه كلامه لاونكل حماده عزو ليه بقى منعرفش (النحله والدبور بيسألوا وانا هديهم باللى فى رجلى هيودونى فى داهيه)
ويعنى مهتم بالاسرة المصريه والضغوط هو اخينا ده عارف الكلام ده وفهمه ولا بيستعبط ويقولك بقالنا 12 شهر بنشتغل اه فعلا بيشتغلونا وبيقلبونا فعلا
طيب والله الموضوع حله سهل جدا وفى ايديهم احنا عندنا موارد بشريه كتير جدا مثلا عندنا توشكى ليه موتوا المشروع ده ولا كان خبطه واتقلبنا فيها وخلاص
السمك يا جماعه اللى فى البحيرات خلف السد الاسماك دى تحفه ورخيصه مش بينقلوها ليه ويوزعوها مثلا فى القاهرة والمدن التانيه ومنها هيشغلوا شباب وهيخفضوا اسعار اللحوم
يقولك اصل بتكلفنا بنزين كتير للطيارة (اللهى يخليك يا سكر ابقى سلفهم طيارة من عندك خخخخخخخخخ)
طيب هما مش بيبعتوا يجيبوا جمبرى ايووووون البتاع الطويل اللى لونه اورانج ده ويقولك اوعى الجمبرى يعضك من بره مصر طيب ليه مش بيستغلوا الكلام ده
مبيوصلوش ليه مرافق للصحراء ويعملوا استصلاح بدل ما يستوردوا قمح وحاجات تانيه من بره ما يقرصوا شويه ويقدموا الخدمات دى .
يمكن مش واخدين بالهم يالا بلاش اظلمهم بقى وعلى رأى الشاعر اسمه ايه خلى اللى يقول يقول
ويقولك ازمه الخبز على رأى خالتى فرنسا يا حكومه دماااغ دى حلتها فى ثانيه بجد شفتوا احنا لعبه فى ايديهم ازاى .
ده بقى استفذنى جدا بيقول ايه
ردا على سؤال حول إمكانية أن تواجه مصر مخاطر نقص أو اختفاء سلعة استراتيجية، قال جمال مبارك "تقديرى وتقييمى من الوضع فى مصر الأن وبعد التحركات التى حدثت، فإن هذا احتمال ضئيل إلى حد ما... فمن ناحية التمويل ليس لدينا مشكلة لأن وضعنا الاقتصادى أفضل بكثير مما كان عليه منذ سنين طويلة، كما أن لدينا احتياطيا كبيرا من العملة الصعبة يمكننا من تأمين هذه السلع".
اى تقدير وتقييم حضرتك بتتكلم عنه من فوق فى التكييف ولا من الاكل اللى بيجى بالطايرة ولا من العشاء اللى بيكون فى باريس وترجع وليس لدينا مشكله اه يا ناس يا غوغاء فعلا الراجل كلامه مظبوط على واحده ونص احنا معندناش مشاكل اقتصاديه احنا عندنا مشاكل فى عقولنا علشان سمحنا لكم تلعبوا بيها
وفى النهايه وجهه كلام للشباب وقلهم هيشغلكوا ابقى قبلونى بقى على كوبرى اكتوبر الضهر وبقولكم اوعى تعتمدوا على الحكومه وانا مسئوله عن كلامى والله دوروا انتم
ووجهه كلامه للفلاح ويقوله انه بجهوده عمل مش عارفه ايه واحنا جنبك ..اه فعلا جنبه بأمارة بتوع قنا لما تعبوا فى اراضيهم واستصلحوها وفى النهايه عاوزين يأخدوها منهم بعد ما وعودهم اللى هيستصلح الارض كويس وتنتج هيملكوها له وبدين بلعوا كلامهم وعاوزين يأخدوها ويدوها لشركه اجنبيه ههههههه وسلم ليه على اللى حاسين بينا (اه هما حاسين بينا اننا نموس بيقرصهم فبيرشوا بيرسول علينا هههههههه)
نفس الموضوع فى مصراوى عن ابو جيمى مبارك: المحافظون مسئولون عن توفير السلع بالأسعار المدعومة
بيرمى المسئوليه على المحافظين انهم يووفروا لينا الحاجات والمحتاجات وواضح اننا شويه وناقص طنط تطلع تقول بيان وشويه ودودو تطلع تقول بيان مش قولتلكم ناس بتقول كلام كبير

نيجى للصدمه التانيه من المصرى اليوم
وزارة الداخلية تشكو من ارتفاع الأسعار والحكومة تمنحها ٩ مليارات جنيه ودى خدتها من المصرى اليوم
الوزارة تستورد أجهزة الاتصالات والحاسبات وبعض الأسلحة وأجهزة فض الشغب باليورو، الذي ارتفع سعره أيضاا
شوفتوا علشان تعرفوا بيجيبوا لكم حاجات مستورده علشان الغوغاء ههههه يعنى بيعملكوا انضف معامله عاوزين ايه تانى بقى
طيب لما الحكومه بتدى اهو فلوس طيب مش بتحرك المشاريع الميته ليه زى مثلا النوباريه والله اللى راح هناك قلبه يوجعه على الخضار والفاكهه يعنى الشباب زارعين احلى حاجه ومش عارفين يوزعوا ولا ينقلوا ولما حد بيشترى بيخسف بيهم الارض طيب ولاد الييييييييييتيت دول ما يساعدوهم انما ليه يا حرام مش معاهم فلوس.
بجد وبعد حرقه الدم دى احنا عندنا حاجات كتير ممكن نشتغلها زى السمك ده حقيقى بس هى المشكله فى المسافات موضوع الخضار فى النوباريه ممكن الشباب تجيب من هناك وتعمل مشروعات و تجيب الخضار ده وتعبيه فى اطباق وتبيعه
واونكل القطنه مبتكدبش رايح يستفذ الطلبه فى الجامعه فعلقه على كلامه طالب وقاله

وقاطع بلال دياب، الطالب بكلية الآداب، نظيف - خلال اللقاء الذي نظمته جامعة القاهرة لرئيس الوزراء بمناسبة مئويتها - أثناء استغراقه في ذكرياته، قائلاً: «الجامعة زي الفل والعملية التعليمية زي الفل ورغيف العيش والديمقراطية موجودة والحديد موجود، طيب مصر حزينة ليه يا ريس؟

والشباب معتقلين ليه من يوم ٦ أبريل؟ افرج عن مصر يا ريس.. افرج عن مصر يا ريس»، وقوبل كلام الطالب بتصفيق حاد من زملائه الحضور

نيهااهاهاهاهاها خخخخخخخخخ والله انا لو مكانه كنت قدمت استقالتى قال ايه يرد يقوله مصر بتتعرض لضغوط خارجيه نفسى افهم اللى بيضغطوا على مصر دول بيقولوا لهم يعنى احبسوا الشعب واعتقلوه ولا بيهددوهم بايه يمكن ناسيكن عليهم ذله ولا واجبنا كده نستر عليهم ويقولك فيه ديمقراطيه ولو مكنش فيه مكنتش انت قدرت تتكلم خخخخخخخخخخ ويا عينى بعد اللقاء الواد اتسحب على الحرس ويقال انهم اطلقوا سراحه اتمنى يا ريت وميكونش راح على مارينا.


وفى النهايه سيبوا الناس دى تقول الكلام الكبير الحلو ده والنحله والدبور يتكفلوا بيهم ههههههه ومقلكوش هيعملوا ايه فيهم

كان معكم دكتور فى علم الاستهبال والاستعباط وتحليل البلهاريسيا اللى فى عقول الكبار آبى هانم واستر علينا يا رب*

رسالة إلى من لا اعرفه



هذه الرسالة إلى كل من ظلم إنسان سواء من سُلطه أو في حياته الشخصية وكل من يعتقد انه لا يوجد من هو اقوي منه ويتعالى على البشر ويعايرهم بفقرهم أو حياتهم البسيطة ويعتقد انه أكثر منهم وضعا اجتماعيا.

أسألك بكل ود هل لديك أبناء أو عندما سيصبح لك؟

هل قلبك وعقلك يتألم عندما تراهم يتألمون من ابسط شئ؟

استحلفك بالله هل تتألم؟

استحلفك بكل اسم لله عز وجل هل ترضى عن نفسك؟

هل ترضى بهتك عرض ابنك أو ابنتك؟

هل ستعاقبهم اشد العقاب عندما يعترضون على قراراتك الظالمة؟ أيكون الرد أن تعاقبها بآدميتها؟

هل تستطيع أن تسمع صراخها وتقفل أذنيك؟ حتى لو أخطئوا في التصرف؟

إذن يا سيد نفسك كيف تقبل هذا علينا

وأنت يا من تقول انك عبد المأمور وليس هناك أقوى ولا اعز من الله سبحانه وتعالى أن تكون له عبدا ومأمورا.

كيف تصلى وتقف بين يديه وأنت مخطأ في حق كل من حولك؟

كيف تنام وتغمض لك عينا وهناك آلاف لا ينامون من الدموع وخشيه الله وعقابه؟

كيف ستقف بين يديه يوم لا ينفع مال ولا جاه ولا سلطان ولا ولد ؟

أنت تعلم أن دم المسلم على المسلم حرام وماله وعرضه...كيف تعيش وأنت تعلم أن كل ما في بيتك حرام لأنه من دمائنا ودماء أخواتنا وآبائنا؟

هل يكفيك ما تأخذه من مال اعلم انه لا يكفيك مهما أن كان حجمه كبير

أسال نفسك ماذا ستفعل

عندما ستترك الٌسلطة

عندما يأكل المرض جسدك ولا ينفعك مال ولا كرسي سابق

ماذا ستفعل عندما تقف بين يدي الله وتندم ..أهنئك يا سيد نفسك فلا شئ وقتها يرجعك لتصحيح أخطائك

اعلم انك تراني وتعرفني وانأ لا أراك ولكن جاوب على كل من هم مثلك بشر ولا يفرقون شئ عنك سوى أنهم شعروا بآلام غيرهم .

كان معكم رئيس جهاز مباحث امن الكوكب آبى هانم

وجع الضرس ولا وجع الغربه

تحديث على السريع تانى : شكر كتييييييير للاستاذ/صلاح حجازى وكل العاملين بالبرنامج على اذاعه البوست بتاع مرور كوكبى الخرفانى اليوم الخميس وكمان اختاروا تعليق تامر نبيل علشان يوضح اللى بيمشى على القواعد دى ايه بيحصله هههههههه
=======================================================
يا صبااح الورد البلدى اللى من مصر مش من الصين

معرفتوش مش انا جالى هجرة للبر التانى وهسافر اكوم مستقبلى ايوون واجيب شروحه وراديوم من اللى بيجيب الاغانى حدانا فى الكفر.

مش هى دى احلامكم مش هو ده اللى عاوزينه تهاجروا وتسيبوها بتقولوا هى ماسكه فينا ليه خليها تسيبنا هى كمان مش عاوزاكم هى كمان رفضتكم وعمرها ما هتبقى حنينه عليكم.

انتم مش حنين وهى مش هتأخدكم فى حضنها انتم بعتوها للحراميه والنصابين للى طمعانين فى الكراسى الموسيقيه وطمعانين فى حسابات بره(احم احم انا مقصدش يا بيه خالص انا اقصد يعنى يشتروا الات حاسبه بس ).
هى كمان هتديكوا ضهرها وهتكشر على اسنانها وتفرمكم
الحمد لله سافرت تلات مرات بره مصر وانا كبيرة وانا صغيرة عشت فى السعوديه لغايه 7 سنين ورجعت يعنى فترة معرفش عنها الكتير بس كنت فاكرة انى لما جيت مكنتش بفهم مصرى ولا حد بيفهمنى ومكنتش عارفه اتكلم مع حد حتى فى المدرسه وعلشان كده طلعت هاديه جدا وانا فى المدرسه ( يعنى كنت بعمل مقالب على خفيف هههه ) بس لما كبرت سافرت تركيا والمغرب وماليزيا كنت ببقى عاوزة ارجع على طول احساس فظيع انى بعيده مع انها بلاد تجنن بس كانت مصر بتوحشنى بكل حاجه ترابها ناسها اللى بيرخموا عليا مش قادرة اعيش من غير الغلاسه وخفه الدم بتاعتنا مهما ولا بجد الدفا اللى بشوفه هنا حتى لو فيه ناس وحشه.
حتى ان كان الشعب التانى كويس وبيضحك فى وشك بس كنت بحس لما ابص للناس انى غريبه تفتكروا فلوس الدنيا كلها تسوى الغربه دى تفتكروا فلوس الدنيا كلها تسوى انك تبص فى وشوش ناس تلاقى نفسك متعرفهاش ده كان احساسى طيب ابسط حاجه مع انى بنزل فى فنادق شيك جدا مكنتش بعرف انام كنت لما برجع مصر احسن انى بقالى زماان منمتش حتى الشاور كنت بحس انى مش بعرف اخد شاور غير فى بيتى مع ان والله هناك احلى من حمامات التلات هههههخخخخ تتخيلوا الفنادق عامله ازاى هناك.

بجد تسوى ايه الغربه لما يسافر اب ولا ام وتسيبوا اولادكم وترجعوا مفيش تواصل كبير ما بينكم او الام تبقى جامده فى قرارتها علشان الاب مسافر ولما يجى الاب يدلع ما هو جاى شهر مش هينكد هى دى التربيه الصح فى نظركم
ولا الام اللى تسافر ويبقى العكس هتجيب اولاد كويسه منين.
ولا الشباب اللى يتغرب ويمسح بلاط ويسافر على مراكب ويعرض نفسه للموت ويوجع قلب امه وابوه وفى النهايه يسافر ويفضل بيتمنى انه يرجع ومهما كون صداقات ومهما عمل فلوس بيفضل قلبه وجعه وعاوز يرجع .
اشتغلوا هنا الشغل مش عيب ومش عاوزة اسمع واحد بلسان طويل ولا دماغه مزنوقه فى كعب الشوز يقولى مبقاش متخرج مش عارف ايه واشتغل ايه طيب ما الشغل بيجيب شغل ياكتكوت وانت بره هتشتغل سفير.
ولا احسن تقعد كل يوم سهران للصبح على النت وبتمد ايدك لوالدتك ولا ولدك علشان تاخد فلوس تنزل تقعد على القهوة ولا تقف على ناصيه تعاكس ولا تاخد منهم حتى تمن وصله النت اللى انت بتهييس عليه وتيجى تكلمه يقولك انا بدور على سفر ههههه والله بيصعبوا عليا
انا بس عاوزة الناس اللى بره مصر واتغربوا بقالهم كتير يكتبوا بكل امانه عن احساسهم فى الغربه ويقولوا للناس اللى هنا انها متسواش البعد ده كله
لو اتهنت من امك احسن ما تتهان من الغريب انا عن نفسى مقدرش ابعد عنها ولا عندى استعداد ابيعها باى تمن انتم ايه بقى.
وفى النهايه على رأى بابتى حبيبى (عويل بلاده عويل بلاد المسلمين)


ملحوسه من فيكون ادبس:- كامى فوندامى (زهرة الكاميليا)حدفتنى بسؤال وعاوزانى اجاوب عليه اللى هو ازاى حياتى قبل وبعد التدوين وانا من منطلق الحريه الفيكتاتوريه والتيتوقراطيه المتفنيخه عندى هجاوب وقررت ابعزق فى التيتوقراطيه واللى له سؤال يساله وانا اجاوب عليه مع سؤال كامى بس فى حدود الخرفان بتاعتى موافقه يكتبه لما يعلق على البوست ويالا اعمل فيكم ثواب واعرفكم بيه اكثر واهو ارمى الثواب فى البي سين هههههههههخخخخخخخخخخخ


كان معكم سفير سفروت لواء اركان حرب طيار آبى هانم

آآآآه يا وطن لم يعد لى



اقر واعترف انا آبى امبراطورة الكوكب ان والله العظيم الشعر ده مش بتاعى يا سعاده البيه وانه بتاع صديقى محمود اللى هو صاحب مدونة رئيس جمهورية نفسى.على فكرة هو محامى بس شكلنا هنحتاج محامى تانى ربنا يستر
بس بما انى قولت الراجل ميروحش مارينا لوحده لازم نروح معاه نونسه هناك يعنى عيب على رجاله وبنات مصر الحلوين صح ولا ايه
وبجد مش عارفه هو ده بقى حال مصر ولا حالنا ولا انا لسه مجنونه وعندى امل ان البلد دى تتصلح والله يا كوكى نفسى تتصلح والله نفسى تفضل ومتسبهاش انا بقيت خايفه لاكون بدل ما بقنع الناس بحب ليها انى بقنع نفسى وان بس علشان مش اموت بأمراض الدنيا كلها لسه شيفاها بمبى وشايفه الخير جاى.

فى النهايه بقى وصيتكم الكوكب ومش عاوزة حد يطمع فيه والخرفان بتأكل بيتى بان وبطوط حبيبتى غيروا لها الزيت وحموها على طول
ومحدش يجيب عيش وحلاوة مش بحبه انا قولت اهو عااااااااااااا

بهيـــــه


قيدي النور يا بهية
طفى النور يا بهية
سكنوا القصر الحرميه
عالي السور مليان بالنور
والعسكر داير ما يدور
حراس للسور والحرميه
قيدي النور يا بهية
طفى النور يا بهية
في الميدان واقف سجان
ناصب القضبان
بيكمم أفواه الناس
وبيحسب حتى الأنفاس
والغلبان فيك ينداس
طفى النور يا بهية
قيدي النور يا بهية
فيك الناس لابسين طراطير
وقفين طوابير ماشيه في مشاوير
واهي ملهيه
بأكل العيش عن حرميه
سارقين القوت سايبينا نموت
نهابين خيرك يا بهية
والعمال عاملا إضراب
والفلاح مش لاقى ميه
كلنا في الظلم سويه
تحت أيدين الحراميه
طفى النور يا بهية
قيدي النور يا بهية
بكره الشعب يهب يثور
ويهد السور ويشيل النور للحراميه
ومن العتمة نخلق نور
ونرجع نورك يا بهية
قيدي النور يا بهية
قيدي النور يا بهية


تحديث:- الحمد لله صاحب مدونه انا انسان طلع عارف د/حماس وطمنى عليه انا بشكرة لانه اول مرة يعمل حاجه كويسه معايا غير انه يحسدنى ههههههههههخخخخخخخخ لا بجد شكرا ليك
معكم سجين المعتقل السياسى بمارينا شاليه رقم واحد يخت 606 قبطان اعالى الترع آبى هانم

مرور كوكبى الخرفانى

صباح الخير عليكوا فى ظل الاحداث اللى مش عارفه ايه هى دلوقتى قولت اطلع شويه قرارات بصفتى امبراطورة الكوكب

قرار فيكونى فيروقراطى رقم واحد بتعيين السيده /فاتيما طباخة الريس يووووا طباخه الكوكب
والاخ العزيز الاستاذ/
الطائر الحزين حكيم الكوكب (بس مش اللى بيعالج لا مطلوب منه كل يوم يدخل يقول حكمه .
وده قرار من منطلق الفيروقراطيه المفرطه والمبعزقه والمتشفلحه عندى وسوف يتم تعيين بعض الاشخاص قريبا واللى يعترض على اللى يتم تعينهم يخبط دماغه فى خروف معنديش استنخابات ههههههههه خخخخخخخخخ
نبتدى دروس المرور و دى جت ليه على
الايميل وانا قمت بعمل تعديلات وزياده ودى طبعا نتيجه خبرتى فى السواقه فى مصر اللى هى مرات بابا واللى انا لازم احترمها علشان بابا خخخخخخخخخخخ.

نرجو من الساده الركاب القراءة بتمعن سواء كان عندك عربية أو لا .. من الأخر فتح دماغك,واقفل مراخيرك

القاعدة الأولى:
لو عربيتك كبيرة أو قديمة ، أستخدم المبدأ القانوني: اللي خايف على عربيته يوسع!!

ملحوظة: ابعد عن سكة العربيات المخرشمة ، بيسوقوا بنظرية ضربوا الأعور على عينه!!
القاعده الثانيه:
البوز بيز: اللى يدخل ببوز عربيته الاول للتقاطع هو صاحب أولويه المرور احرص على ان تكون صاحب اول بوز
اللي يدخل ببوز عربيته الأول للتقاطع هو صاحب أولوية المرور! احرص على أن تكون صاحب أول بوز.
ملحوظه:-

لا تطبق الـبوز بييز مع اى لورى أو اتوبيس حرصا على بوزك لا مؤاخده ههههههههههههه
الاشارات تكشف نواياك للاعداء اياك ان تستخدمها

القاعدة الرابعة:
لا تترك مسافاه للامان بينك وبين السيارة التى امامك

1- عربيه تانيه هتملى الفراغ فى ثوانى وبرضه ميبقاش فيه مسافه كل اللى هتكسبه انك اتأخرت لورا شويه

2. تعطي فرصة للعيال يعملوا غرز قدامك.

3- كل المشاه حيغمضوا عنيهم ويعدوا من الحته دى .

4. الي وراك حيقعد يزمر - لو كان مؤدب - أو تسمع شوية أسامي حيوانات لو كان سواق تاكس ويبقى اتعلمت اسمائهم علشان تعلم الاولاد وده لو هو مؤدب ، أو حيخبطك من ورا لو كان سواق ميكروباص ودول مفيش حد منهم مؤدب.

الإشارات مش معمولة علشان تنظم المرور ، معمولة علشان شكل القاهرة يبقى متحضر بس! اعتمد على العساكر ( مع تحملك كامل المسؤلية لو واحد منهم شاورلك تعدي و بلدياته الناحية الثانية فتح السكة للوري ).

القاعدة الخامسة:

اذا كنت مش واقف في الصف الأول في الاشارة اعمل حسابك تزمر بشكل هستيري أول ما الإشارة تفتح ، لأن الناس الي قدام بيبقوا واقفين في الاشارة من زماااااااااان و جايز جداً يكونوا ناموا واتغطوا!!

القاعدة السادسة:

معظم الحوادث تحدث في التقاطعات أول الإشارة ما تحمر، كل ما عديت الإشارة الحمراء أسرع كل ما قلت فرصة انك تتخبط! القاعدة السابعة:

الشارع مكان خنيق ، سوق بأسرع ما يمكن حتى تتخلص من هذا الهم بسرعة ، الناس الي ماشيين بالراحة مرضى نفسيين بيستمتعوا بالعذاب ، يستاهلوا يبقوا مهيسين.
القاعدة الثامنة:
من حقوقك الدستورية أن تركن أمام باب المحل الذي تريد أن تشتري منه ، اذا سبقك واحد ابن (تيييييييييييت) و ركن ، فمن حقك أن تقفل عليه و تركن صف ثاني أو ثالث، و مش مهم لو الشارع اتقفل ، ايه يعني أما الناس تتعطل عشر دقائق علشان تستمتع بحقوقك الدستورية؟ هو مش الدستور يا سيادنا حق لكل مواطن مطحون

القاعدة التاسعة:
حقك أن تخرج من مكان انتظارك في أي لحظة تشاء ، اكسر الدركسيون شمال و اطلع ، بسرعه وغصب عنهم سيتنوا لو مستنوش هيتحملوا نقفات تصليح بطوط وده حقى الفيروقراطى.
القاعدة العاشرة:
إحترس من ثلاث أنواع من السائقيين بيسوقوا و كأنهم مش ممكن يموتوا:

1. العيال الروشين الي بيلعبوا Computer Games و فاكريين إن ممكن يكسبوا Life زيادة لو ساقوا أسرع (وانا منهم خخخخخخخخخخخخخ).
2. موتوسيكلات توصيل الطلبات (
Home Delivery ) الخوذه مش بتخليهم شايفين قفاهم من وشهم.

3. سواقين الميكروباص ودول لو هفلط مهاهم يطلع يقولك عدى يا طنط لو مؤدب لو بيئه يقولك يا خالتى او يا حاجه وفجأة تلاقى قدامك كأن فنله وقعت من على حبل غسيل لانه بيكون مدلدل نفسه من الشباك ملحوظة: إوعى تحاول تثبت لحد منهم إن فكرته غلط. (لانه ساعتها هيبص لك على انك فيكون فضائى )
القاعدة الحادية عشر:
لما تشوف حادثة لازم تهدي و تتفرج - مش مهم تساعد - الحجات دي دمها أخف من الأخبار المملة بتاعة التلفيزيون والتعتيم الاعلامى بتاع اليومين دول ، و بعدين لما الطريق وراك يقف يبقى انت كده بتحمى باقى الناس من الحوادث (لا طبعا بلاش بهزر اصلا انا بخاف من الحوادث وربنا يستر علينا كلنا ).

القاعدة الثانية عشر:
لما تخلص سيجارة أوعى تحطها في الطفاية ، ارميها من الشباك أول ما تشوف واحد بموتوسيكل معدي جنبك ( علشان يحرم يعمل غرز ) او واحد بعجله ويحك لك رفرف العربيه (آآآآآه يا بطوطى).

دى للناس اللى بتأخدها موتو رجل

القاعدة الاولى:
اذا كان هناك سيارة قادمة اعمل نفسك مش واخد بالك و عدي براحتك خالص،ما تخافش، هوا حيقف، هو اهبل يدوسك و يودي نفسه في داهية؟ وده للناس اللى بتمشى على رجليهم (بس لو انا بدوس عادى اعمل ايه ما هى الفرامل بايظه)

القاعدة الثانيه:
اياك أن تنظر نحو السيارات القادمة ، أعبر الطريق و ظهرك لها حتى لا يشك أحد قائدي السيارات أنك تراه و يحاول يخوفك علشان تقف انت.
القاعده الثالثه
حتى لو شفته أوعى تخاف - خصوصاً لو معاك مراتك - تبقى راجل ملو هدومك و تخاف من حته عربية؟ عرض قفاك و سيبه يتفلق.
القاعدة الرابعه:
الرصيف ليس للمشاه ، بل لركن السيارات و فرشات الباعة الجائليين و المحلات... الخ ، لذلك يحق للمشاة السير في وسط الشارع ، لمزيد من الأمان وده حقه الفيروقراطى.
القاعدة الخامسه:
إذا كان الماشي من فئة النقل الثقيل ، فمن أبسط حقوقة إنه يمشي على أقل من مهله و يهتز براحته. واللي مش عاجبة الهز يدور على لوري يخبطة...

فى النهايه اعتقد لو نفزتوا كل قواعد المرور لكوكبى صح يبقى اولا هنخلص على ازمه السكان ونلاقى عندنا عربيات خرده كتير وبكده يبقى نمينا اقتصاد البلد وساعدنا على تجدد نشاطها وفرز جيل عبقرى خلاق يتولد من جديد

كان معكم من مرور كوكب آبى سياده اللواء امين شرطه شويش آبى هانم



تهانى ....وتعازى ....ومحاشى


صباح الخير على الناس المحترمه اللى بحبها الناس التانيه اللى عرفين نفسهم لا ويا ريت ميدخلوش هنا تانى بالذوق علشان كده انا جبت اخرى
النهارده هنرجع للباميا ونسيبنا من الاجتماعيات شويه فى ظل الاحداث المؤسفه (حلو المؤسفه دى ) اللى بتحصل .


تهانى :- لكل اهالى السويس وخاصه رئيس رابطه البمبوطيه على صراحته ووضوحه وقوته وموقفه من قتل البمبوطى ربنا يرحمه يا رب لان وائل الابراشى جابهم امبارح على الحقيقه والراجل كان فى منتهى القوة فى رده على المنيل اللى كان تقريبا محافظ ومشى ودلوقتى مالك لشركه ملاحه وساله سؤال فى الجون لما الراجل قال ان البمبوطيه هما اللى غلطانين وراحو قالوا بخخخ للامريكان والامريكان يا حرام اتفزعوا وضربوا نار فالراجل بكل بساطه قاله انت منزلتش البحر من امتى قاله من 3 سنين قاله يبقى متعرفش حاجه خخخخخخخخخخ

تعازى:- للسيد المحترم اللى جهه يكحلها عماها بتاع شركه الملاحه لما قال ان البمبوطيه كانوا بيتنافسو على البيع والمركب اتخضت يعنى من الاخر طلع يبرأ الحكومه قام نيله بالنيله وباظت الطبخه منه


تهانى:- للنائب طلعت السادات على موقفه من المعارضه المستهبله اللى ضارباها فى العارضه وعاوزة تسحب كل الاستجوابات قال ايه علشان وقفوا زميلهم ..يعنى من الاخر الشعب ولا يهمنا فى حاجه وبصراحه المهم بريستجنا انما النائب طلعت السادات رفض يسحب استجوابه علشان كان معاه مشكلتين واحده ل2000اسرة هتتشرد والحمد لله رجعهم لبيوتهم والتانيه 4000أسرة فى برج العرب ودى لسه عليها شويه ومن الاخر قلهم انت يعنى بتعملوا ايه ولا حاجه ولا ليكوا لازمه فى المجلس ولما انتم معترضين استقيلوا خخخخخخخخ وبجد تحيه واحترام ليه من كل قلبى انه قلب الترابيزة على كل المعارضه والحزن الوطنى وقالها بصراحه احبسوا احمد عزووووووو البلد حالها هيتصلح.

تعازى:- للشعب المصرى اللى ادى ثقته فى المعارضه المهلستيه اللى ميفرقوش عن الحزن الوطنى فى حاجه واللى يهمهم مصلحتهم وبس ومن الاخر الشعب يروح يشرب من البحر وابقى سلمى على المعارضه المصلحجيه بجميع طوائفها وكسفت النائب اللى كان بيتحاور مع طلعت السادات البعيد معندوش دم وفى اخر البرنامج يسال السادات انت يعنى مش هتسحب الاستجواب بصراحه كان نفسى ارش عليه ميه يمكن يفوق ويعرف انه طول الحلقه شكله غبى جدا وبرضه ختمها بكده والسادات قالها صراحة انا فى مجلس الشعب علشان الناس


تهانى :- لاهالى محافظه قنا على موقفهم من عدم اخد اراضيهم اللى استصلحوها علشان الحكومه عاوزة تديها لشركه يابانيه والاهالى رفضت وعملوا اعتصام.
تعازى :- للسيد محافظ قنا اللى برضه كالمعتاد جه يكحلها عماها وقال ما احنا هنعوضهم يعنى يا بعيد معندكش دم هو انتم كنتم مشغلنهم بالسخره عندكم يعنى يصلحوا وتأخدوا على ا لجاهز وترموا لهم فتافيت طيب ما تدوا للشركه دى باقى الاراضى وهى تصتصلحها ومن هنا يبان ذكاء الحكومه

تهانى :- للسيد الدكتور الجبلى انه قدر يقضى على الناس باهمال المستشفيات وهيحد من الازمه السكانيه وهيطفش الدكاترة برة مصر الكويسين لانهم حاسوا انهم مقهورين فى بلدهم وكفايه عليه مصنع ابو زعبل للاسمده يبقى خلى الشعب يموت وللساده الشرطه اللى سيبين البلطجيه فى كل مكان يقتلوا وكل ما يخدوهم يطلعوهم تانى ومش فاهمه ايه السبب

تعازى :- لوالدة الشابين اللى اتقتلوا على ايد بلطجى وجريت بيهم على مستشفى شبرا وسابوا الاتنين ينذفوا لان معندهومش امكانيات ولما راحت القصر العينى الفرنساوى بعد موت واحد منهم قالوا لها ادفعى عشرة الاف جنيه ورفضوا يستقبلوه الا لما تدفع وجريت على معهد ناصر واتعمل له عمليه بس بعد فوات الاوان ومات.



تهانى :- للشعب المصرى اللى قدر يعبر عن غضبه من الاسعار والظلم اللى احنا فيه حتى لو كان بعضهم قعد فى البيت خوفا من اللى هيحصل فى الشارع وكان واضح جدا حتى فى القاهرة الجديدة اللى هى هاديه قوى الظباط انتشروا قوى فى الكمين اللى دايما وابدا فاضى بس هااااااا ولا بيهمنى

تعازى :- لاهل المحله واللى حصل ليهم بجد من قلبى ده حرررررررررررررام يا وزير الزفت ارحمنا بقى والله مابقيت عارفه اقولك انت ارحمنا ولا اللى فوقك ولا اللى تحتك دى بقت نيله افهموا بقى مش عاوزينكم بجد خلاص نعمل ايه تانى علشان تفهموا ايه القلب الجامده ده ولا ايه مبقاش فيه دم ....وكمان للاخوان اللى خانوا ثقة ناس كتير فيهم وبجد مش عاوزة حد يقاوح فى الموضوع ده لان كده مبقتش محتاجه كلام بس كده كان عيب قوى


تهانى :- لدومه السكر انه طلع وكل اللى كانوا واخدنهم قبل الاعتصام بيوم وقال ايه كان عاوزين اروح معاه الاعتصام اقف ويقولى لو حد بصلك ابقى اتكلمى ..يا دومه يا دومتى دول كانوا هيسيبوا الناس كلها ويجولى انا بسببك بس عارف ربنا عمل فيك كده علشان اكلت اللب بتاعى كله ههههههه لا بجد دومه من اكتر الناس المحترمه اللى قابلتها فى حياتى على الرغم من انه طاقق بس عنده مبدأ فى حياته وقضيه مهتم بيه وكفايه انه عنده اخلاق بتحكمه


تعازى:- للناس اللى عاملين ثورجيه وهما فى البطيخ ودماغهم مزنوقه فى كعوب الشوز بتاعتهم ايام لما كان عندهم شوز ولما دلوقتى بقوا حافين يبقى عقلهم راح معاه وكانوا مستخبيين وبينسبوا اعمال ناس تانيه ليهم وهما قعدين زى الفيران الجربانه ومستخبينن بس عاملين نفسهم محترمين ومثقفين وهما ولا فاهمين.

ده مش تهانى ولا تعازى :- ده شكر للاستاذ صلاح حجازى وبرنامج انت تسال والكمبيوتر يجيب اللى بيتذاع على البرنامج العام فى الراديو الساعه 9.10 كل يوم ما عدا الجمعه انه توجهه للمدونات واهتم بيها وبيذيع لها بعض البوستات او مقطتفات وذاع ليه بوست (الاقاليم طلعت اجدع من العواصم يا رجاله ) كمان ذاع بوست لمستر عبده الرايق

طبعا هيجى حد ويسألنى فين المحاشى اللى قولتى عليها هقولك هى جزئين وفتحوا عنيكوا واقفلوا ودانكم ههههههه:-
1- الكلام اللى بين السطور والحدق اللى يفهم والغبى ملوش ديه عندى ولا له شرح اصلى مش ناقصه فقعت مرارة. 2- كل واحد يجيب نصف كيلو ورق عنب ويعملى محشى ورق عنب ويبعته على الكوكب علشان اقيم احسن طباخ او طباخه واعينه للكوكب بتاعى هههههههههههههههه


كان معكم مراسلكم من قناة كوكب آبى استاذ مهندس نقيب فقيد شهيد عميد آبى هانم

بلاش تخلعيه ..لخلخيه


حوار دار من كام يوم فى دماغ ما بين النحله والدبور وانتم عارفين انهم ساكنين فى دماغى

النحله :- صباح الخير يا بيه

الدبور :- صباح الخير يا هانم

النحله :- انت هتفضل سيبنا هنا كتير فى الزنقه دى .

الدبور :- زنقه ايه لا سمح الله بس انتى صاحيه من النوم تتخنقى

النحله :- زنقه الدماغ اللى احنا عايشين فيها دى

آبى:- يا ولاد الايه انا دماغى ضيقه يعنى طيب لما اشوف اخرتها معاكوا

الدبور:- يا سيتى خلينا هنا حد لاقى دماغ اليومين دول

النحله :- ما هو ينتنقل يا كل واحد يروح لحاله واخد انا حاجاتى وليه اهل يعرفوا يجيبوا ليه حقى.

الدبور :- حق ايه بقى ان شاء الله عاوزة تأخدى العيال والفص اليمين اللى انا عايش فيه فى العقل ده من زمان ده بعينك لا طبعا ومش هطلق واخبطى دماغك فى الحيطه

النحله:- اوكى خلاص مطلقش انا هرفع عليك قضيه خلع وابقى ورينى بقى هتعمل ايه

آبى :- ايه يا جماعه الصداع والزن ده على الصبح فيه ايه مالك يا عمنا ما تتهد شويه واهدى

الدبور :- كل ما تتنرفز تقولى طلقنى ايا كان السبب

النحله :- ايوة اوعى تفتكر انك هتزلنى ولا بقيت مسكنى من ايدى اللى بتوجعنى انا خلاص اتعمل ليه قانون يدينى الحق بكده

آبى:- يا سيتى اصبرى هو القانون ده اتعمل لعبه يعنى يعنى كل واحده تتخانق مع جوزها تقوله طلقنى مش نهدى شويه امال بنطالب بمساوة ايه بس ونقول عاوزين مش لازم نكبر مخنا ونحتوى الموقف ولا احنا جيل بقى ما يعلم بيه الا ربنا ومتسرعين.

الدبور :- قوليلها الهانم دى اصل مصدعانى ليل ونهار اعمل وهات وروح واخبطها بالفكرة دى وجننها بالموضوع ده.

آبى:- يا حلاوة المولد ايه ده بقى انتم بتعملوا عليا خطط شريرة وتخلونى اخبط فى الناس كلها طيب ماشى لينا قاعده منيله تانيه بص يا سيدى استهدى بالله
اه ربنا ادى لك الحق بالطلاق وخلى الموضوع فى ايديك صح بس برضه وصاك على زوجتك وبعدين لو انت بقى شايف ان حياتكم مستحيله خلاص طلقها بالمعروف والادب وبلاش الاولاد تتعب نفسيا وتتدمر انتم ليه مش بتفكروا فيهم ما هى الست لما تتبهدل فى المحكمه علشان الخلع وتديك كل حاجه حتى المهر يبقى انت كده هتخليها تحت الصفر طيب تعيش ازاى بقى باقى حياتها وكمان هتكره الاولاد فيك وتيجى بالسلب عليهم.

نيجى بقى ليكى انت هو ايه النظام شايفه كده ستات اليومين دول بيحبوا الموضوع ده واحد مثلا سنها كبير وقابلت ولد اصغر منها تقوم ايه تهد البيت و بدل ما تطلب الطلاق والمحكمه تماطلها شويه لعلها تعود لعقلها تطلب الخلع وتنتهى القصه وغالبا الولد بيسبها وبتكون هى ادمرت كليا .

او واحده تانيه مدلعه وبرضه مش بيهمها فلوس ولا نيله ونفس القصه
الامثله دى موجوده كتير جدااااااا واللى مش عارف يروح مكتب الاسرة يسأل ويشوف بيطلبوا الخلع ليه والجرايد يا ما كتبت دكتورة عاوزة تخلع جوزها علشان مش بيتكلم معاها بالانجليزى فى البيت على اساس انها المفروض تبقى قناة السى ان ان .

يعنى فى النهايه الست ست وعصبيه طيب ما كان من الاول ربنا اداها للست وخلاص ....انما لان فعلا ساعات مش دايما يعنى الرجل بيقدر يتحكم فى نفسه عنها وخاصه اليومين فربنا ادى له الحق فى الطلاق فى ايديه
محدش سأل نفسه زمان مكنش فيه الخلع ليه
اقولكم علشان الستات زمان كانوا اعقل مننا بجد احنا جيل زى ما قولت مع التكنولوبيا بقينا مجانين رسمىوكمان الناس كانت عايشه بما يرضى الله ما بينهم وبين بعض
وبصراحه الستات بيضحك على عقولنا بسرعه لما حد يدخل لنا من الحته الشمال دى (مش عاوزة اسمع واحده تقولى لا اصل هااا بالقله)

النهايه انا هسيبهم يضربوا بعض الاتنين ومفيش خلع ولو الحياة استحالت ما بينهم يبقى يطلقها ويديها حقوقها اللى ربنا شرعها لها وخاصه اذا كانت مش بتشتغل علشان البهدله وحفاظا على حياتها من الانحرافات لان دى واحده عايشه طول عمرها فى البيت ومش بتشتغل يبقى يا هتنحرف يا هتنحرف وده كتير فى مجتمعانا .
وبدل ما كل شويه منعرفش نطبق تشريع او نص قرآنى نلف ندور من بعيد على حاجه تانيه ناس هتقولى حديث الرسول عليه الصلاة والسلام بتاع الست والجنيينه اللى ردها لجوزها وقاله طلقها كان من باب اولى الرسول يذيع وسط الناس اللى عاوزة تطلق ترد لجوزها حاجاته وتطلق .

انما فى اعتقادى الشخصى ان ده اصلا كانت حاله معينه . مش معنى كلامى علشان الناس اللى دماغها مزنوقه فى كعب فنجان قهوة انى ضد الست فى انها تأخد حقوقها انما بقولهم اهدوا شويه علشان ده بيت واسرة والراجل عامل مراتك بما يرضى الله وترضاه على نفسك وبلاش بهدله لاولادك .
ملحوسه نونو كالص:- اللى عاوز يتناقش اهلا وسهلا ودى وجهه نظرى انما اللى هيشمر كمه ويغمى عنيه وينطح يبقى هو الجانى على نفسه انا ضد الخلع لان الست مش بتقدر تتحكم فى اعصابها وكمان لو اضحك عليها باى شكل من الاشكال او مش عجبها مناخيرة يبقى هتخلع انا مع الطلاق بعد الرجوع مرة واتنين وتلاته ومع المصالحه بينهم وأخد كل واحد حقه وباحترام انما هكون مع الخلع فى حاله الراجل اللى معندوش دم ويعذب زوجته واولاده ويهجرهم

كان معكم ناشنجى اول فى تحديف القلل أستاذ لواء طبيب مهندس آبى هانم بتنجانى

سيبولى قلبى وارحلو


صباح الفل على العالم كله .
اه سيبولى قلبى بالايمان اللى فيه هو عجبنى كده معرفش غير انى مسلمه مؤمنه بالله سبحانه وتعالى ورسله وأنبيائه بحب سيدنا محمد صلى الله عليه وسلم .
مشوفتش رب العالمين لكن بحبه لانى مليش غيرة مبسوطه انى مريحه دماغى وحطيتى على قلبى وعقلى مراوح وكولديرات كمان مبسوطه انه قالى خدى القرآن اهو هو ده دليلك والاحاديث عن الرسول وريحى عقلك بس يا رب اقدر اعمل بيه لانه اكبر واقوى من اننا نقدر ننفذه كله واعظم بكتير ده حمل كبير قوى.
ساعات مواتير عقلى بتلف وابص للسماء وللطير وحتى الناموسه ببص لنفسى فى المرايه واقول سبحان الله كل ده ازاى قلبى بيخشع ليه اكتر وبحبه اكتر مش برجع الحاجات دى لظواهر بتنجانيه ولا ايدلوجيات متعفنه ولا رز بالتقليه بشوف قدرتة.
بحسها لما بتعب والدنيا تضيق فى وشى واركع وابكى واطلب منه انه يرشدنى للطريق الصح وينور طريق وبصيرتى والاقى نفسى هديت لو قعدت اتكلم مع الناس كلها مش برتاح غير لما بكلمه بيكون عندى يقين من جوايا انه سامعنى وشايفنى عمرة ما خذلنى لما رفعت له ايديى قولت يا رب استحلفك بكل اسم سميت به نفسك وعلمته لنا او اثرته على نفسك اغفرلى او اذا كان الامر فيه خير سهله له اذا كان شر ابعد عنى .
بلاقى الخير جاى او بعد بكون مقتنعه من جوايا انه ده الاحسن ليه ومبزعلش وبكون فرحانه علشان انا ثقتى وايمان بيه كبير.
مش محتاجه اشهد فى المحكمه وشهادتى تتساوى بالراجل هو شرع كده وانا بسمع كلامه مش محتاجه خلع هو ادى الطلاق فى يد الراجل وسهله ليه انا كمان لما قال(فَأَمْسِكُوهُنَّ بِمَعْرُوفٍ أَوْ سَرِّحُوهُنَّ بِمَعْرُوفٍ) بس ازاى لازم نعترض لازم نكابر وبدل ما نقول للراجل اتقى الله واعمل بشريعته لا ندور على حلول بعيد عن القرآن.
مبسوطه انى ست وانه ادانى حقوق كتير وحافظ عليا وعلمنى ازاى احافظ على نفسى .
عارفه اركان الاسلام الخمسه ومبسوطه بيهم عارفه الصلاة وبحبها وسهله على قلبى وروحى مش عاوزة اتعب عقلى وقلبى فى حاجات تانيه .

مش متشدده ومش متزمته عارفه يعنى ايه ابقى مسلمه مش بأذى حد وبحب الخير للناس وبسامح بعمل بالاخلاق اللى اتعلمتها من الرسول عليه الصلاة والسلام حافظه ادعيه كل الانبياء والصالحين مؤمنه بكل الرسل اللى نزلوا عاوزين تتعبونا ليه بتدور لنفسكم على ايه بتفكروا الدنيا اتخلقت ازاى هو خلقها هو العالم مفيش غيرة .

بتحرفوا فى كتب الاديان التانيه مليش فيه بتشرعوا بمزاجكم انتم حرين هو اللى هيحاسبكم

عارفين محتاجين ندافع عن الرسول والاسلام ازاى مش بالجعجعه والصوت العالى والقتل والضرب والارهاب لا بحاجه بسيطه هو اداها لنا نتبع تعاليمه ساعتها العالم كله هيحترمنا ومش هيقدروا يهاجمونا الرسول مش محتاج دفاع باللسان لا بأعمالكم ولا الاسلام محتاج لدفاعكم انتم بدافعوا غلط تاريخه خير دافع عنه اخلاقه ومعاملاته خير دافع

عمل ايه التشدد عمل ارهاب دى كلمه سلام جايه من الاسلام يا عالم .

عملت ايه الانقسامات والمسميات داخل الاسلام خلتنا نقتل فى بعض مع ان ربنا حرم دم وعرض المسلم على المسلم

انا بشر وعندى أخطاء بطلب منه انه يساعدنى ويهدينى وعارفه ان الوقت جاى امتى معرفش بس هيجى بس هو مدينى المقابل مدينى قلب وعقل منورين بيه هو .
بتدور على تشريعات ليه ما هوالقرآن واضح والاحاديث بتحرفوا ليه بمزاجكم انتم حرين بس ابعدوا عن المؤمن البسيط اللى عارف دينه ودايما ربنا بيلهمه للصح والنور ومبيردش ايديه ابدا لان هو الحنان المنان الغفور التواب الرحيم.
بجد سيبولى قلبى وعقلى وارحلو بعيد .
اتجمعوا يا مسلمين على طاعه الله وعدم التشدد وعدم انتهاك حرمات الغير وتكفير الغير (انك لا تهدى من احببت ولكن الله يهدى من يشاء) هى دى قناعتى وهو ده الرضا بتاعى.
ملحوسه بقى كده صغيرة: الكلام ده مش معناه هجوم على ديانات اخرى او على ناس ده كلام حسيته من جوايا فى ظل اللى بشوفه قدامى انا بحترم كل الاديان بس مليش فيه ومش هتناقش فيها انا مقتنعه بدينى وبحياتى البسيطه .

كان معكم فيكون تائهه فى خلق الله وصعبان عليه المسلمين وغيرهم آبى هانم بتنجا
نى

Share |