يا مجانى يا مجانى


الحقيقه لا اعلم ما هو سر الفخر والفشخرة من الاخوة اللى تعاليمهم بفلوس وما هو سر الانكسار ومحاوله انك تدار العار الذى الصق بك انك تعليم مجانى
والاقى اصحاب مدارس سنيه شخلع للغات ومدارس عبدو بلطه للتعليم الحكومى ماسكين لبعض المعايرة
طيب انا بقى خريجه تعليم مجانى اى والله ابو وصل احمر دا فاكرينه ابو تقريبا 8 جنيه واحنا فى ابتدائى و42 جنيه واحنا فى ثانوى
بس كان عندى مدرسين محترمين مدرسين ليهم هيبه
اولا عاوزه اقول زى ما فى التعليم المجانى مدرسين ميتقلعوش من الرجل الشمال فيه برضه فى التعليم الخاص مدرسين اصلا تقرف تلبسهم فى رجلك
طيب احب برضه اغيظ الساده اللى بيتنططوا ويقولك انت تعليم مجانى
طيب انا تعليم مجانى اه بس انت اندفع فيك فلوس علشان حضرتك تفهم ويشربوك العلم بمعلقه
الاغلبيه دخلوا ولادهم المدارس دى علشان طنط سعاد تقعد مع طنط برشام تقولها انا ابنى ولا بنتى خريجه مدارس الكونزفوتار الفرنساوى
وكله كوووووووول يا برنس ويبقى جايبين لهم مدرسين بالكوم بفلوسى يا كليبه بقى
طيب انتم اغبياء فعلا علشان كدا بيدفعوا فيكوا فلوس
ملحوظه مهمه انا كان ممكن ابقى فى مدارس خاصه بس للاسف اقرب مدرسه بعيده عن بيتنا 25 كيلو يعنى انا كبيرة ماما واول فرحتها فمكنتش تقدر تودينى وعربيه تودينى وتاخدنى مكنش السبب مادى بس كان السبب قلب ام بتخاف
واهو انا زى الفل اهو يعنى مالى عندى اتنين رجلين واتنين عنين واربعين لسان وبعرف انجليزى وطشاش فرنساوى ومش مهم الالمانى يعنى ما هو انا مش ها استخدمه فى المطبخ
وانا نتيجه التعليم المجانى وانت بتقروا ليه بكل مستوياتكم وتعليمكم
نرجع تانى برضه البهوات اللى بيتكسفوا انهم تعليم مجانى او برضه بيعيروا التانين زى ما انا عملت احم احم يعنى
ما هو حضرتك دا برضه مش معناه اننا تعليم مجانى افضل لا ما برضه فينا المنيل بنيله واللى بيضرب وبيقل ادبه والفاشل والغير مثقف
لو ها اقعد اعد لكم كل مزايا وعيوب دا مش ها اخلص
الملخص ايه مش بالتعليم ابسلوتلى او مش بنوعيه التعليم
لا بالنشأه بدليل صيع وشمامين رجلين وشمامين بطيخ بيطلعوا من المدارس دى هباب واقطران وزفت مزفت
وبرضه فيه ناس بتطلع فله القله
وفيه ناس فى مدارس لغات اللى قواهم ورباهم دادات او امهات جهله
وفيه امهات متعلمين معرفوش يربوا كدا
فااللى عاوزه اقوله ميبقاش كل واحد يتكا على الكرسى اوى ويتخيل نفسه خديوى مصر ويقعد يقولك انت تعليم مجانى وانت جامعه امريكيه تبقى فاشل
دا اسمه استعباط الانسان مش ان اهله صرفوا عليه لفين ما ممكن يبقى بيدفعوا فلوس علشان ياخد الشهاده دى وفى الاخر يعلقها على قفاه وهو ماشى ويبقى تفكيره محدود
عبد الناصر الله يرحمه اتعلم مجانى علشان الناس اللى بتقول دا دخل التعليم مصر طيب وقبل كدا حضراتكم مين علم الباشا الله يرحمه مين علم اللى قبله التعليم ادعم شويه فى عصره انما الساده الجهله من الجانبين حتى التعليم لو كان بفلوس قبل عبد الناصر فكان موجود ومش غالى وكانت نفس الصراع اللى بيحصل دلوقتى مدارس بشاوات ومدارس اولاد الجناينى
العيب فى اللى معاه فلوس والعيب فى الجاهل والعيب فى تفكير مجتمع مش فى هو دخل مدارس ايه يا ما خريجى لغات وفاشلين وخريجى حكومه وصيع والعكس فى الجانبين بس الفكره انكم بتختاروا وسط معين تعيشوا فيه
النهايه بطلوا تتنكوا على بعض يا فاشل يا فاشل انت وهو
اه نسيت اقول ان اصلا التعيلم لغايه ما انا سبت ثانوى كان كويس بعد كدا كله فى الكاوتش
وانا مش كرنب انا كابوتشى يا باشاوات مصر

كان معكم ناظر محطه ابو الليف ابى هانم بتنجانى


حكمه الامبراطورة

الفاشل يجى على راس القرد ويفليها

فراشة ... وصقر

ملحوظه الاول التعليقات اعلى البوست يا حلوين علشان امى ريا قلت ليه انتى قفلتى التعليقات الست دى دايما شايله مترليوس امهات جبابرة


هى فراشة وزهرة أمل زهرة جذابة
برعم من النضارة وتصبح فراشة حيوية..
ويأتي اليها كل الفراشات
هى فراشة زهرة تذوى طهارة
هى فراشة ومجمع أرواح وقلوب
هى فراشة الكلمة
كتبت بكلماتها و معاني الدموع
وترجمت آهات الصدور
وفسرت نفحات القلوب
وقد زرعت كلماتها
ابتسامة على الوجوه
وغرست بسمة أمل في قلوب
العديد من الطيور
هى فراشة تنثر ورود المحبة
على هذه الساحة أو الصفحة السوداء
تسجل كلماتها اعذب الالحان
كلمات احتبستها القلوب..
كلماتها جمعت أفكار لملمت أشلاء..

فراشتي .... لا تحزني كل المـشاعـر
تطغى على الأنفس البشرية؟؟
فإما أن تكون مشاعر فرح
أو تكون مشاعر حزن
ولكن لن تكوني زهرة ذابلة
يبتعد عنها الناس

قد يكون الإنسان هو المضطر
إلى للذهاب إليك
لظروف ما فيكون جوابك
كلماتك
وأنت مثل الفراشات جميلة
فلماذا تهوين تحليق الصقور في الماضي
الصقور ليس لها إلا لون واحد
وأنت فراشة زاهية في ألوانها
وفي الأجواء
كانت تحلق الصقور معك
تحاول أنت تكتسب منك الألوان
وربما كانت تحاول
عشق الألوان في شخصك
الصقور تحلق معك
ولكنها تعيش بين الصخور أو في الكهوف
وأنت لم تتعلمي صعود الصخور
أو العيش بالكهوف وأنت فراشة تنتقل
بين الزهور الجميلة الخلابة
بين واحدة تلو الآخرة
فراشتي لا تعشقي النقيض
فأنت فراشة غاية في الرقة والأناقة
الصقور تكابر لأنها
لا تستطيع الوصول إلى عالمك
الصقور تكمل منظر باهي...للطبيعة
ولكن أنت من أعطي لها المعنى
المناسب الجميل
أيتها الفراشة أنت بسمة الأمل
وأنت بهجة البهجة والسرور..
وأنت رمز الجمال....الخلاب الجذاب
والى متى؟
والى متى؟؟
والى متى؟؟؟؟؟

إلى متى ستظلين هكذا؟؟



أنت من علم الصقر التحليق في فضائك
أنت من جعل الصقر صقر
وكان المغزي جميل والكلمات أجمل
عرفة الكثير من خلال كلماتك
وصل معك إلي القمة ذع صيته
كان مفتاح نصر الصقر
بيدك آيتها الفراشة
آيتها الفراشة كنتى الفجر الأصيل
وسر هوى وعشق الصقر
وقف القراء صامتين انبهاراً
وأنت والصقر عالمياً تحار بكم العقول
وعقود من السنين تمضي بالكلمات
كانوا يتسألون ما علاقة الصقر بالفراشة
هل تعشق الفراشة الصقر
هل الصقر هو من يعشق الفراشة

الفراشة كانت تعشق الصقر
وتعشق الخيول في طبعها وهو من تقمص الدور
اخذ من الصقور التحليق حول كلمات الفراشة
ومن الخيول العدو خلف كلمات الفراشة
وعين نفسة فارس لكلمات الفراشة
ووضع لكلمات الفراشة مقص الرقيب
لماذا هذا ولماذا ذاك
لا تبكي فراشتي لا تشتكي ولتمسي لهم العذر
الكلمات أعجزتها المعاني أيتها الفراشة
وبوحك كان الفجر والضحى الأصيل
ولكن في فجر الكلمات وفي الأسحار قلتي لي
هناك من يدعو عليك فراشتي الصغيرة
سرقتي قلب الصقر من أحضان الوطن
أصبح يعيش الحب والاغتراب
أيها الصقر لا تحمل المعاني أكثر مما تحتمل ولا تغضب
أنت ِلوحتها والرسم موهبتها
هل يوافق عنوان كتابها
حرف أسمك
لكل كتاب عنوان
وأنت عنوان لكتابها
هل توافق كلماتها حروف أسمك
وجزء من شخصك
غالباً ما يطلقون على الصقر الوحش
وهو أول القبض عليه يسمى (وحش)
لأنه متوحش بري لا يأنس البشر
وبعد ذلك يطلقون عليه اسماً
وهي كانت تسميك الصقور المسالمة
أيها "الصقر السيزر" لكل شاعر أو كاتب ملهم
الصقر يتميز بخاصية الأبصار
وكان يعجبني أنا شخصياً نظرتك الخاصة لكلمات الفراشة
أو بمعني أخر كان لك فلسفتك خاصة
التي توافق في صفتها الصقور
الصقر يتميز بخاصية
السمع القوي وهو يساوي
إضعاف السمع عند الإنسان
لذلك كنت تسمع مكنون كلمات الفراشة
تتميز الصقور بتميز الصوت
أسرع من البشر مما يساعدها
على تحديد موقع كلمات الفراشة في الظلام
وبين ألف الكلمات
ولكل خطيب سامع والنفس تهوي وتميل
ولكن يبقي في الأساس لكل شخص
منكم عالمة الذي ينتمي إليه
وشخص يرجع إلي أحضانه
أنت تختار أحضان الوطن
وهي تختار أحضان الاغتراب
هي تحب الصقور الحرة
"الحر الأشقر" هو اسم من أسماء الصقور
هي لا تحب الصقور المبرقعة والتي تلبس النقاب
لأنها تثق في شخصها وتثق في صقرها
ولأنها تؤمن أن جمال الشيء وهو حر طليق
وليس مقيد ويلبس النقاب ويحاسبها بغيرة أنثي
أنا لا اصدق أن هناك أنثي تغار من كلمات
تغار من فراشة نشرت فرحتها واخزنها
أنا أغار على الفراشة
ولكن أغار على شخص الفراشة
وليست من كلمات الفراشة

كنتم توافق فكري

و الفراشة و الصقر لم تجمعهم حدود مدينة أو وطن
وكلاً منهم له عالمة الخاص

هذه الكلمات تنتهى بانه لا يمكن ان تعشق الفراشه صقر جارح وحتى لو عقت الفراشه هذا الصقر لابد له من اعاده حسابته بان يحافظ على فراشته


اى تشابهه بين الكلام دا واحداث حقيقية تبقى مصلحة

حكمه الامبراطورة

الصقر بيعيش على الفريسه لا تجعلى نفسك فريسه سهله

كان معكم ابى هانم من ارض الصقور ورقصه يا معلم

خليك فى بوزك لما نعوزك



صباح الفل على الحلوين
النهارده بقى وبعد غياب دام اربعه اشهر عن قاهرة المعز اللى بقت تكيه ال مبارك اكتب لكم باحاسيس مختلفه تماما عن الشخصيات او الجنسيات الاخرى والجنسيه العربيه
بعد ما وصلت الكويت بعشرين يوم بس قاعدهم فى البيت بقشر بصل وتحولت لانثى العونكبوت اللى بتغسل وتطبخ ومستنيه جوزها بس الى كائن منكوش زهق من القاعده جدا فبدات ابعت السى فى بتاعتى فى اماكن واتعرض عليا شغل والحمد لله
واشتغلت يعنى بعد عشرين يوم من وصولى اشتغلت فى مكان كويس الحمد لله وبوظيفه هايله جدا
معايا فى الشغل واحد زميله ست كبيرة تبلغ من العمر اثنان وستون سنه من سيرلانكا مسلمه اسمها شيرين بس بنقولها شيرودا
بقى فى الست دى انها برغم كبر سنها وان فعلا عندها مشاكل فى رجلها مش بتكل ولا تمل وعلى الرغم من ان ولاد بس برضه عاوزه تصرف على نفسها
تحملت اسره وبيت وزوج كسول مأنتخ وسابت بلدها وجت اشتغلت هنا بقالها اكتر من ثلاثون عاما
شافت كل الويل فى حياتها وجحود كتير من ابنها العايش ووفاه ابن اخر
وعلى الرغم من كل هذا بتعمل فى صمت تام وقويه جدا ومخلصه فى عملها
الاغرب بقى ان شيرودا دلوقتى عايشه مع ابنها اللى كان مهمل فيها ومش بيعرفها غير علشان الفلوس وبس بعد ما جابته الكويت وامنت له شغل عاشت معاه بعد عشر سنين هو وزوجه ابنها
وعلى الرغم من انها حكت ليه انها مش هى اللى اختارت زوجه ابنها
بس الموضوع مش مسبب لها مشكله وهنا مربط الفرس بقى
زوجه ابنها دى بتشتغل من الصبح للساعه اتنين الضهر وترجع من الساعه خمسه الى الساعه احدى عشر وعندها تلات اولاد اه فيه شغاله بتعتنى بيهم
بس العجيبه جدا انى عمرى ما سمعت شيرين بتشتكى من زوجه ابنها ولا عمرها قالت دى عملت ولا سوت
حتى لما بتقول عليها فى موقف فى شغلها بتحكى الموقف كله مش بتاخده بازل بمعنى مش بتسيب اللى مش على هواها وتحكى الوحش عنها وبس
لا بتحكى كله ولما مره لقيتها بتشترى حاجه من الشركه بقولها متنفعش ليكى قالت لزوجه ابنى

هنا بقى ليه واقفه كبيرة

ليه الحموات فى مصر مش كدا يعنى ليه تبقى الوحده بعيده عن حماتها اصلا وملهاش دعوة بيها وحماتها تسيب كلام طويل عريض او مواقف طويله عريضه وتمسك فى كلمه غلط اصلا ومش اتقالت او موقف مش اتعمل
ايه الفرق شيرين دى ست وبنى ادمه والحموات فى مصر نوع تانى مثلا
انا مش ها قول كل الحموات طبعا
انما الاغلبيه العظمى
والانكد بقى والانيل واللى يخلى الواحد يشد فى شعرة
اخوات الازواج يبقوا عاملين زى المنكاش الاهبل اللى بيدور على اى حاجه فى اى وقت لاى مشاكل
يعنى من الاخر احنا فى مصر ولا منا ولا كفايه شرنا فيها ايه لما كل واحد يخليه فى بوزة لما نعوزه يعنى
فيها ايه لما كل واحده تتلهى فى نفسها ولا كل حما تبص ان اللى اتجوزت ابنها دى مأخدتش يعنى ملك انجلترا ولا حاجه دى خدت واحد عادى بنى ادم له اتنين رجلين واتنين عنين واتنين ودان كمان يعنى بيرمى هدومه وبنعملوا له اكل وبنرتب حياته لانه كان معتمد على الحجه فى ترتيب حياته فحضرتك يا حجه بتحملنى مسئوليته كمان نتيجه دلعك ليه حضرتك
لاااااااااا وكله كوم والفكره اللى عندهم ان مراه ابنهم بتقضى على مرتبه
والغريبه ان الناس اصلا مش عارفه مرتب ابنها كام ولا بيروح فين ولا متشطب عليه ازاى
انما يقدروا يرموا كل حاجه على مرات الابن وبس
عمرى ما سمعت شيرين قالت كدا
عمرى ما سمعتها ببساطتها وشغلها وعقليتها دى بتقول دا عمرى ما سمعتها بتعمل ولا بتقول كدا على الرغم ممن انها مش متدينه ولا تعرف فى الاسلام ولا الدين غير انها اسمها مسلم وبس الناس دى فعلا حياتهم كدا بس اخلاقهم كتير كويسه

السؤال بقى الجبار

هى ليه الناس شاغله بالها باللى مبتفهمش فيه
ليه الحموات فاكرين ان مرات الابن دى خدت اللى مش بيتاخد مع ان الرجاله كلهم كربونه واحده مش بيختلفوا غير فى المسمى الوظيفى التعبان اللى هما فيه

ليه اخت الزوج حاشرة مناخيرها فى اللى ملها ش فيه فى النهايه واللى مش بتفهمه وهى هيدور عليها الكأس ومتفتكرش ان حماتها ولا مرات جوزها ها تعملها على انها برنسيسه طيب ما تغيروا من فكركوا بقى
صحيح مهاه عليت الشهادات ا
ليه كل واحد فى مصر مش بيخليه فى بوزه ولا فى حاله ويريح نفسه ويسيب حياه الناس تمشى لوحدها

يالا اللى يجاوب على دا هيكسب معانا ربع جنيه مخروم يصلح بيه امخاخ الناس الغلبان دى علشان فعلا بتصعب عليا

ملحوظه :- اللى هيقرا كلامى ومش هيفهمه يخبط دماغه فى الحيطه واللى هيقراه وياخده على سدرة يبقى بالشفا ان شاء الله وصحه وعافيه

كان معكم ابى هانم كايده العزال انا من يومى


حكمه الامبراطورة

من راقب الناس مات من الفرسه يا خالتشى

فرعون وزلطحون

المارينا احدى الاماكن المفضله لدى هنا فى دوله زلطحون
والغريبه ان محدش بيتحبرش بحد زغم الزلط ملط اللى الناس فيه

لا يخفى عليكم او على اصدقائى المتابعين لى انى من هواة التسكع والتسنطح فى الموولات وعندى داء ولا اجد له دواء وهو الشوبينج وزاد الامر بشراهه حيث اننى مجبره يا ولاده فى بلاد الضباب الذى اعيش فيها الان ان اقتل وانحر بعض الوقت فى الشوبينج
لان بعد الشغل لا اجد شئ اعمله غير انى اطلع روح زوجى كل يوم أعانه الله على فعلا بس يالا احسن يستاهل حد قاله ياخد واحده مش عاديه زى
المهم هنا اجد اغلبيه الماركات فانا اتسوق من ارمانى وجيس واتش اند ام واديداس او جاب وكل الناس الطيبيه دى المحترمه
ما يدعو للاسنغراب فى الموضوع ان تقريبا ومقربا نفس الماركات فى مصر ولكن هايهات اقول لكم بعد ثلاث شهور غربه ما الفارق
الفرق ان ربع مرتبى يستطيع ان يشترى ليى طقمين او طقم من ارمانى او من جيس وخمسه على الاقل من اتش اند ام او اسبلاش
واستطيع ان اشترى روج ماركه استغفر الله العظيم ديور او جيفنشى
ام فى مصر لكى تشترى فقط قلم روج او كحل فعليه العوض ومنه العوض فى المرتب نصف المرتب اذا كنت من قابضى الالف جنيه او اقل
هنا لا يوجد شئ اسمه جمارك العالم دى متعرفهوش لذلك تلاقى السنه كلها خصومات واشترى قطعه وخد عليها قطعتين
عندهم فن رهيب فى البيع عندنا فى مصر قبل الخصومات يزودوا الاسعار وبعدين يحطوا 50 فى الميه
مع ان هنا المحلات اللى بتحط 50 فى الميه محدش بيلتفت لها
اعلم ان المقارنه ظالمه فنحن 80 مليون وهنا عدد السكان اقل عشرين مره من عدد الوافدين وعلى الرغم من كدا وعلى الرغم من صغر الكويت بحس ان البلد دى فاضيه
مصر مواردها فين
احنا برضه فين من الحياه المرفهه دى انا لا احقد على الناس كلا وحاشا وانضرب على قفاه بالماشا
ولكن كنا زمان نتباهى بااننا فراعنه واننا نملك الاهرامات وهى ملكيه عامه باى ذا واى يعنى
طيب قولوا ليه لو الاهرامات اتهدت اختفت جه الراجل اللى بيخفى الحاجات خفاها
هيبقى عندنا موراد تانيه ايه
عاوزه حد يقولى ايه الانجاز اللى احنا دلوقتى 80 مليون عاملينه
يعنى لو الاهرام خلصت والنيل مشى راح مشوار احنا عندنا ايه
فرعون حالف بشنب جده ليعيش المصريين فى تقشف طول عمره
زلطحون بيدى للناس قروض ويسقطها عنها
وعلى الرغم من كدا الناس هنا حسه ان زلطحون واكل فلوسها كمان
فرعون حالف طلاق بالتلاته لمرتبنا مش يكفينا عيش جبس
زلطحون بين كل مطعم ومطعم مطعم تالت
فرعون بياخد ضرايب وعلى لارغم من كدا عندنا 40% تحت خط الفقر بل فى اخره كمان
زلطحون مبياخدش ضرايب وحتى المطلقات او اللى لهم ظروف خاصه بياخدوا فلوس من الدوله
زلطحون بيحاول يعمل اى تطوير فى اى حاجه علشان يقول احنا موجودين
احنا بقى اكتفينا بالاهرام وحضارة سبعه تلاف سنه وشدينا اللحاف واتغطينا

يشهد الله ان هذا ليس قر ولا نح ولا حسد وانما حسره من القلب على البلد


كان معكم ابى هانم بتنجانى


حكمه الامبراطورة

اللى متحتاجش وشه النهارده بكره تحتاج طراطيف صوابعينه

ما تحاسبنيش

لكل اللى كنت فاكرهم اصدقاء او قريبين او حتى فى شغلى او حتى حياتى الخاصه اللى دخلواا حياتى وقررت انى خلاص اقفل الباب فى وشهم خلاص مبقاش لكم مكان فى حياتى خالص
وبالمره بس دا مش ضعف منى ولا عمرى كنت هقبل انى ابقى ضحيه ولا انا ضحيه
بس انا عندي دم وحره مش عيله ولا بهد الدنيا ولا بغدر بحد كل الفكره ان اللى بحسه بعمله وبس
واعتقد انا راعيت مشاعر كتير جدا محدش حس بيها ولا قدرها
ولو مش فاكرين افتكروا بوست انا مش ليلى يا عبدوو
انا مش هفأ انا قويه واقدر اخد قرارات بوسه كبيرة لكل الحاجات اللى قررت ارميها من حياتى
مووووووووووووووووووا

।youtube.com/v/U-VjYLWYcvE&hl=en_US&fs=1">

ملحوظه :- الموضوع ملوش علاقه بجوزى اصل الناس بتدخل الخطوط فى بعضها انا وهو كويسين الحمد لله انا بتكلم عن الىل كنت فاكره انهم قريبين ليه سواء دلقوتى او قبل كدا

انتهت

حكمه الامبراطوره

ضاقت عليها ولما استحكمت قلعت جزمتها

Share |