خيخه فاكره الاغنيه دى


خيخه انتى وحشتينى اوى انا مرضتش اكتبها لكى مش للنشر
فاكره الاغنيه دى يا خوخه فاكره قبل ما اسافر ما بعتيها ليه
انا بسمعها على طول وبعيط لما بسمعها ومحمد دايما بيستعجب من عياطى دا
فى الاخر قولت له علشان خيخه بعتتها ليه وانا مكنتش متحمله حد يقولى حاجه عن السفر وكنت خايفه
انا منستش يا خيخه انا منستش لما كنت تعبانه وزهقانه ومجروحه وجريت عليكى قعدت قدامك على السرير وقعدت اعيط كتير وانتى جبتى ليه بيبسى
وبعد ما شربته
قولتى ليه انتى على فكره مش بتحبى البيبسى انتى بتحبى الفانتا او الميرندا اكتر ضحكت وانا بعيط وقولت لكى اه
فاكره لما كنتى بتطبطبى عليا لما اضايق واعيط
فاكره لما جيتى ليه الشغل وجبتى ليه الجاكت بتاعك اللى بيدفينى اوى دا واحسك انك حضاننى فيه
فاكره لما جبتى ليه البيجامه اللى عليها الخرفان
تعرفى هتجنن واجيبها هنا رحت ماذر كير لقيت شبها بس عليه بقره مرضتش اجيبها بس مسكتها وعنيه دمعت وافتكرتك
فاكره لما كنا بنسهر نبعت لبعض كومنتات مش للنشر ونضحك وعنينا تدمع وساعات كنا بنعيط
مع ان سهل اننا نكلم بعض فى التليفون بس كنا بنحب نلعب اللعبه دى
انا متغيرتش يا خيخه انا مفيش حاجه احلوت فى عنيه بعيد عن اصحابى
انا زى ما انا بس ناقصنى الضحكه اللى فى عنيه
فاكره يوم ما صرخت وانا بتبرع بالدم وانتى اتخضيتى
افتكرتها وانا بعمل تحليل هنا والبنت بتدب الحقنه فى دراعى عنيه دمعت افتكرت
انتى وحشانى وداليا وحشانى وبيتى وحشنى اوى اوى اوى
داليا كمان وحشتنى اشتكى لها واعيط واضحك واتصل اسمعها اغانى هابطه وتضحك وتقولى يا مجرمه
كلكم وحشتونى
انا مش عاوزه ابعت لكى مش للنشر انا عاوزه اقولكم كلكم وحشتونى
فاتيما
وحشتينى يا ام دماغ ناشفه انتى كمان
باى بقى هقوم اولع ليه فحمه انفخ فيها

التابلوه الاخير

غدا ستنزل الستاره على اروع تابلوه راقص للحزب الوطنى فى مصر لم يحدث ولن يحدث من سنين
فأنا اشهد لهم بالبراعه فى تصميم وتنفيذ التابلوه فقد كان من اروع ما قدموا ويشهد العالم كله على ذلك
دعونا نتفق او لا نتفق على ان الحزب ليس حزب غبى بالعكس فهو قد اخذ خطوات هامه اولها تخلص من الرعاع ومن ينضمون اليه لمصالح شخصيه او دعونا نسميهم باسمائهم الحقيقيه الاسماك البرساريه وهو سمك صغير جدا وشعبى وسعره كان فى مصر اوقات يصل لاتنين جنيه فهؤلاء هم المرتزقه الصغننين وهم من كانوا يسوؤن سمعته على حد علمهم
لقد قدم الحزب خدمات كثيره لهؤلاء الاسمالك المتطفله لكى ينضفوا ويرتقوا ولكن من الواضح انهم لم يستطيعوا التخلص من الجيفه التى يعيشون فيها فانقلب الشبكه ضدهم وتخلص الحزب منهم
واكتفى باسماك القرش التى ترعى وتعيش على بقيه الشعب التى يعتبرونه جيفه
من منا يخفى عليه كم عدد الموظفين فى المصانع التابعه لقروش الحزب الوطنى فلو احصينا عددهم على حد علمى لكانوا كثير بما يكفى لانجاح الحزب ما حدث فى الانتخابات من قتل وضرب نار وسقوط مرتزقه ودعونى اقول مرتزقه ولو انها مش هتعجب حد بس صدقونى هذا ما يحدث فىى الانتخابات
فهم على علم انهم مع مناصريهم مقتلون او يقتلون ويرضون بهذا وذاك لانهم يطمعون فى فتات القروش واعجبنى جدا من كل الفيديهوات التى نشرت الشخص الذى خرج وقال مش هما دول اللى طلعتوا وراهم خلوهم ينفعكوا عندما كان يصرخ فى شخص اخاه توفى فى احداث الشرقيه
ما يحدث فى الانتخابات ليس جديد ويدهشنى اندهاش الناس فلو انكم لا تعلمون فتلك مصيبه او تعلمون وتستعبطون او تتعشمون فى شئ اخر فهذا هو الهطل بعينه
اعجبنى البعض الذى ذهب وبوظ صوته على الاقل ارضى ضميره لم يعجبنى من جلس فى شباك بيتهم يطل على بنت الجيران وينتقد الانتخابات لانهم لا يصنفوا تحت بند سلبيين ولا معاتيه حتى فهؤلاء لابد لهم من خزوقه جماعيه علشان يتعلموا ميجعجعوش على الفاضى
انا اشترك فى الانتخابات منذ الصغر واتذكر عندما والد صديقه لى كان مترشح واخدتنا كلنا البنات وراحت اللجان تعمل شغب وتعلم على اسماء وهى لا تنتمى لحزب ولكن اتذكر كنا فى ثالثه ثانوى ضحكت وقولت لها مش هنتخب ابوكى علشان مش يستاهل اتذكر انها قطعت علاقتها بى بالرغم من سقوطه
نحن متاصل عندنا التزوير من الصغر من ايام ما كنا بنتتخب رائد الفصل والاحزاب اللى كنا بنعملها
فيا ساده التزوير ليس حقرا على حزب بعينه ولكنها عاده متاصله فينا ولكننا لا نريد ان نواجهه الحقيقه
الحزب ليس بالعدو السهل ولكنه صعب جدا
ولكننا تجاهلنا هذا ولعبنا على نفس وتر البلطجه
فى النهايه البلطجه حق لكل مواطن وليست ايضا حكر
ولن نستطيع غلب حزب طالما لا نعرف عدونا
وفى النهايه اسالوا بتوع الانتخابات وقولوا لهم ايه البند اللى بتكتبوه فى المصاريف دعايه وتاجير
اسالوا تاجير يعنى ايه
اسالوهم بيصرفوا قد ايه على البلطجيه فهو ليس موسم انتخابات ولكنه موسم البلطجه وكله بيرزق
لم يعجبنى من قاموا بنشر فيديوهات بدون وعى ولا فهم ولا شرح مظبوط يوضح حاجه لان لو نظرنا للفيديوهات بدون فهم انها انتخابات هنلاقى خناقه فى سوق خضار مش اكتر
لم يعجبنى من قاموا باالاستهزاء بواحده طالعه تقول ضحكوا عليا وقالوا هيدونا مائتان جنيه وقالك ضيعت حقها
حق ايه الناس دى تفهم ايه غير لقمه العيش تفهم ايه غير قرشها وعلبه اللبن لطفل على كتفها لماذا السخريه من الواقع
انه الواقع واذا لم نواجهه سوف تكمل الراقصه التابوله لاخر العمر
وغدا سيدل الستار على التابلوه وتظل سالى التى كانت تلقب بسيد وعملت عمليه تحويل بالرقص بدون رادع
وبالشفا
اعلم ان كلامى لن يروق لناس كتير ولكنى لا استطيع كتابه اى شئ اخر عن هذا التابلو الراقص
ومبروك عليك يا جيمى العروسه وبالشفا ان شاء الله

هذا وقد أعلنت النتائج الاوليه والاخيره عن ان الحزن الوتنى قد خاض المعركه الانتخابيه امام نفسه بكل نزاهه وقد اعطى الاصوات لنفسه ولضده بكل نزاهه واعيدت الانتخابات فى بعض الدوائر ونافس نفسه بكل نزاهه واستحق المقاعد يقعد عليها او يستعملها استخدامات اخرى بكل نزاهه هذا ويا ريت حد يفكرنى نقدم بلاغ لمجمع كل لغات العالم بالغاء كلمه نزاهه ونزيهه وبالمره نلغى النزهه من على الخرايط بالشفا

كان معكم ابى هانم كعب الغزال من الاراضى الكويتيه الشكيكه
حكمه الامبراطورة
صوت الصاجات اعلى من اغنيه المطرب

رمز الصمود



مش عارفه ليه الربط اللى نط فى ذهنى اليوم وانا راكبه عربيتى ورايحه الشغل الست المصرية والناس اللى قافشين فى مجلس الشعب وهضرب لكم النموذج على نفسى وانا طبعا مثل احتذى به فى الدماغ اللى ولا دماغ التنين فى التصميم على حاجه وعَند الفأر لما يكون عاوز يخرج من مصيده
الموضوع ببساطه انى بعد ما اتجوزت زوجى العزيز اللى الله يكون فى عونه بسببى المفروض يدوله نيشان علشان متحملنى فى البيت فعلا فأنا ابسط مثل بس من اللى بعمله اقعد العب على الفيس بوك وفى نفس الوقت مشغله التى فى ونفس ذات اللحظه مشغله اغنيه وبسمعها وكل دى اصوات عاليه جدا فى البيت ودا عمله حاله تشوش ذهنى رهيب بس انا واثقه فيه هو قدها هتيجى ايه يعنى فى المقالب اللى بعملها فيه
المهم مرارا وتكررا يلح على زوجى انى اترزع فى البيت ومش اروح الشغل خاصه ان الدياسطى سمير واللى هى عربيتى بالمناسبه ودا اسمها ما شاء الله عربيه كبيرة وانا بصر وبصمم اجرى بيها فدا من احدى الاسباب اللى بقت تخلى قلبه يفط من مكانه السبب الاساسى والاهم له انه حاسس انى طول عمرى بشتغل وبتعب فمن حقى انى ارتاح واحنا الحمد لله عايشين كويس
وانا كل يوم والتانى اصحى ضاربه البوز اللى شبه اتوبيس هيئه النقل العام وانا رايحه الشغل يقوم هو مشغل الريكوردر بتاع كل يوم يا حبيبتى بلاش شغل ونامى واصحى براحتك اخرجى
اقوم عاقده حواجبينى شبه شنبهات الصرصار اللى واقع على ضهره واسيبه وامشى
فانا بلا فخر لم اتخيل اننا يوما اتنازل عن منصبى وهذه مناصبى قبل الزواج فانا وزير الماليه فى البيت ووزير الاقتصاد والتجاره والعلاقات الخارجيه وفى بعض الاحيان وزير الداخليه باصطف عساكر وظباط ايه درجه اولى
وهذا لاننى كنت متحمله مسئوليه نفسى
فبعد الزواج شعرت ان لو منصب من دول ضاع منى كان عيل من عيالى أكلته القطه كأنى بتبرى من سيمبا بنتى اللى فى مصر
فرفضت بكل تصميم وانقهرت فعلا بكل قهره لما اصحى كل يوم الساعه 6 الصبح واروح شغلى واخرج والدنيا نور وارجع والدنيا ضلمة لانى شغلى بيخلص خمسه ونص
التشبيه دا ليه بقى تخيلوا انا وانا انسان عاديه جدا جدا متقلده مناصب فى خيالى وبمارس سلطتها على نفسى مش قادره اتخلى عنها
تفتكروا بقى سهل على بتوع الحزن الوتنى او اى حزن اسود من اللى فى مصر يتخلى عن الكرسى بتاعه طيب دول حتى الكراسى بتاعته كراسى قديمه خشب اصلى من بتاع زمان اللى ممكن الواحد غصب عنه وهو قاعد تقوم هدومه شابكه فى مسمار من بتوع الكرسى يقوم يا حبه عين امه لازق بقيه عمرة فى الكرسى امال هيوقم ويقطع البنطلون وحاجات مش لطيفه تبان
كل الناس بتطالب بالتغيير وهى شخصيا مش بتتغير انا عن نفسى بطالب بالتغير وانا راىسى والف خروف انى الزق فى مناصبى
فمش كتيرعلى الناس دى الا اذا تكلفوا نفسكوا وتجيبوا لهم كراسى تيفال مش بتلزق او علشان نبقى واقعين كراسى جلد مريح بمعنى يهبش هبشه مره واحده وميبقاش محتاج يلزق فى الكرسى تانى
فيه ناس هتقولى انتى بتتهمى كل اللى بيدخلوا الانتخابات اقولك بتهم 90 منهم
ان غرضهم منصب وفلوس ومصالح دايره وبس
الست المصريه صعب عليها متتحملش المسئولية او انا شخصيا من الشخصيات المقرفه دى اللى عاوزه تبقى بتربت لكل حاجه وشايله هم كل حاجه
ما بالكم بقى بالناس فى المناصب دى هتفك من مناصبها عمرها ما هتسيبها رغم القرف اللى بيشوفه الشريف اللى فيهم بيخلع بدرى بدرى
اللى مسماره بيلزق فيه بيتربط فى الكرسى
فى النهايه الانتخابات بقت لعبه زى باقى الالعاب فى الوطن العربى كله كراسى مليانه مسامير مبيطلعش منه اللى بيطلع روحه لخالقها
والحقيقه الاخرى الست المصريه هتفضل زى ما هى ومش هتبقى زى اللبنانيه فاتحملونا بمناصبنا
وسلام علشان عندى شغل


حكمة الامبراطورة

المنصب زى عضه الكلب لا بتروح ولا بتداوى

خلى عندك صوت

وحشتونى دا اولا
ثانيا انا منقطعه لظروف الشغل المنيل مشغوله بس انا على الفتيس توك مجوده
الفيلم اللى انا جيباه دا لاشرف حمدى الحقيقه يجنن وفكرته حلوه واخراجه حلو
انا بقول فيه فايده مش مفيش بجد ابداع بسيط من الابداعات الهايله اللى بتوصل الفكره ببساطه وبسهوله ويا رب يبقى فيه فايده

الناس البجحه


بعد ما كنت قررت قرار لا رجعه فيه من قراءة الاخبار المصرية والتزمت التهييس واللعب على لافيس بوك والفعده فى البيت والمناكفه فى جوزى
ايدى اكلتنى برضه ورحت على مصراوى وقوم ايه الاقى الوزير الغير فنان برضه بيتكلم
انا افتكر زمان ولغايه دلوقتى ان الواحد لما بيغلط غلطه ولا يعمل مصيبه وكارثه كدا كان بيبقى عينه مكسورة ومش قادر ينطق الى ان تمر سنين وتبدا الموضوع يروح فى الوباء او فى الرجلين
فاروق افندى اه على وزن الباز افندى اه
طالع برضه يهاجم فى النقاب وفى القنوات
طيب انا متفقه معاه ان القنوات فيها بعض الناس اللى شغاله فته بالموزه ليل نهار وانا شخصيا برفضها وبقعد كتير احللها حتى بالعقل والمنطق بتاعنا والمنطق بتاع سعيد صالح مش لاقياه واكله معايا عيش من الاخر
انما النقاب كمان قالك خطر على الامن العام وقالك جاى من الصحراء
انا شخصيا معنديش مشكله معاه من دلوقتى ولا قبلين وبالعكس الناس المنقبات لغايه دلوقتى اللى قابلتهم فى حياتى سواء جيرانى او اصدقاء بيتعاملوا معايا كويس جدا
على الرغم من انى حتى مش محجبه ومنحله على راى خيخه وبحط روووووج
وبالعكس تعاملهم معايا كويس ولا عمر حد كلمنى حاجه كله بيدعى باهدايا للى قدامه وخلاص ومعتقدش لما حد يقولى ربنا يكرمك ويهديكى يبقى بيدعى عليه يجلى برى برى يعنى انا شخصيا ساعات بدعى للواد اسامه ان ربنا يهديه او يهده عادى يعنى
الكلمه بقى لساعده البيه الوزير ال. ولا بلاش
طيب مش من باب اولى يعنى كنت تنتقض المثليين اللى انت كنت رايح تسهر معاهم ولا دى حريه شخصيه والنقاب وحياه الناس حريه ملك لك واحدك
طيب مش من بابا اولى بدل البغبغه بتاعتك دى برضه تشوف موضوع لوحه الخشخاش اللى شربتوها
وطالع بكل بجاحه تتكلم من تانى
الحقيقه فعلا على راى المثل اللى عنده دم احسن من اللى عنده فاروق حوسحوس
سؤال بس اخير ليه بيقول ان الحجاب خطر على لاعقول ليه هو بيقفل عن العقل الميه والهواء والله انا مش بدافع عن حاجه علشان مفيش خحمار ماشى بالبوبو بتاعته يدخل يقولى لما انتى بتدافعى ما اولى تعملى انا بس احب لما حد ينتقض حاجه ميبقاش بيروج لعكسها
الحريه الشخصيه وتكوين الشخصيه مش باللبس يا روقه
الشخصيه بافكار ومبادئ وحياة

كان معكم ابى هانى من بلاد الواك واك

حكمه الامبراطورة

حبيبي كان ماشي تاتا تاتا كبر و اتعلم الغتاتة

تاريخ عائلتى من تاريخ اهل سيناء

روايات متعددة يحفظها الفواخرية حول
سبب تسميتهم وقدومهم إلى مصر، منها أنهم أحد فروع قبيلة «الأحويطات»،
رحلوا إلى سوريا ثم فلسطين عندما عم القحط الجزيرة العربية، ثم استقروا
أخيرا فى مصر، وتحديدا فى محافظة شمال سيناء، وهناك رواية أخرى تقول إن
سبب مجيئهم إلى مصر، هو أن «على وحمودة وعبدالرحمن أبناء فقيه العقبى»
مؤسسى العائلة هاجروا إلى «غزة»، ونزلوا فى بيت رجل فلسطينى أحسن ضيافتهم،
وعمل الأولاد الثلاثة فى تصنيع الفخار، فتمت تسميتهم بالفواخرية، وكان
للفلسطينى ثلاثة أولاد تم طلبهم للتجنيد (فى عهد الدولة العثمانية) وعندما
دخل الليل اتفق الفلسطينى مع زوجته على استبدال أبنائهما بالفواخرية
لتسليمهم للتجنيد، وكان أحد الأشقاء الفواخرية مستيقظا فسمع حديثهما،
فأبلغ شقيقيه، وقبل شروق الشمس كانوا قد تركوا فلسطين ورحلوا إلى سيناء،
ويقال أيضا إن سبب تسميتهم يرجع إلى نزوحهم من منطقة تسمى بنى فخر القريبة
من مكة المكرمة بالسعودية، ثم رحلوا إلى غزة ثم إلى العريش واستقروا فى
منطقة قريبة من قلعة العريش عند بئر تسمى «عطوان».

رواية أخرى جاءت على لسان يحيى الغول الفواخرى، باحث فى التراث السيناوى،
يقول: أصل الفواخرية يرجع إلى عقبة بن جزام من كهلان، كانوا ضمن قوافل
حماية الحجيج فى شبه الجزيرة العربية، اختلفوا مع أمير المدينة اختلافا
قبليا فتحركوا شرق الأردن، والتفوا مع قبائل وعائلات أخرى حول مكان به
آبار، فتوزعت عليهم هذه الآبار، بحيث صار لكل قبيلة أو عائلة يوم تروى فيه
وتملأ أوعيتها، لكن خلافا نشأ بين بنى عقبة (الفواخرية) وقبيلة أخرى تعدت
على البئر فى اليوم المخصص لهم، فتفرق بنو عقبة، منهم من هاجر إلى مصر،
ومنهم من ذهب إلى فلسطين، وآخرون نزحوا إلى سوريا، وهنا يتفق الغول مع
الروايات التى قالت إن فرع فلسطين هو الذى قدم إلى مصر وتكونت منه
«الفواخرية»، وزاد عليها قوله: بعد أن استقر المقام بالفواخرية عند بئر
عطوان تزوج «على وحمودة وعبدالرحمن» من بنات البدو والحضر، وعندما سألوهم
عن عملهم قالوا نعمل فى الفخار، فأطلقوا عليهم اسم «الفواخرية»، وتزوج
الفواخرية أيضا من بنات قبيلتى السماعنة والعيايدة فكثر نسلهم وزاد عددهم.
الروايات سالفة الذكر ترجع بالزمن إلى ما يزيد على 300 سنة، تكونت خلالها
العائلة العريقة فى مدينة العريش وما حولها، والفواخرية من أكبر قبائل
وعائلات سيناء عددا وتأثيرا فى الحياة السياسية، حيث يبلغ عددهم ما يقرب
من خمسين ألف نسمة، يعمل أغلبهم بزراعة المحاصيل التى تشتهر بها سيناء مثل
النخيل والزيتون. ولديهم 13 ألف صوت انتخابى رسمى.

الفواخرية يتركزون فى قسم إدارى كامل هو قسم ثالث مدينة العريش، وينتشرون
فى الإسماعيلية والسويس، ومنهم عدد يقيم فى القاهرة بحكم التجارة والعمل.
ويؤكد عبدالحميد سلمى الفواخرى عضو مجلس الشورى، أن العريش تم تقسيمها إلى
قسمين بين الفواخرية وأولاد سليمان، فاختارت الأخيرة الخط الساحلى، بينما
استوطن الفواخرية الظهير الصحراوى لارتباطهم بالزراعة، وقتها اعتقد أولاد
سليمان أن الفواخرية ضحكوا عليهم وأسكنوهم مناطق القحط بينما انفردوا هم
بخيرات النخيل والزيتون، لكن عندما تبدل الحال وصارت العريش منطقة جذب
سياحى أصبح الفواخرية هم الذين يغبطون أولاد سليمان بعدما تحولت أراضيهم
على ساحل البحر إلى قرى سياحية.

العائلة استطاعت الحصول على مقعدين فى مجلسى الشعب والشورى عن دوائر شمال
سيناء لسببين، أولهما: القوة العددية، والثانى: الثراء الواضح لدى أغلب
فروع العائلة، خاصة بعد ظهور شرائح ثرية ورجال أعمال مثل «زيد الفواخرى»
حيث يمتلك الفواخرية أسطولاً كبيراً من سيارات النقل والمعدات الثقيلة.
بالإضافة إلى سبب ثالث مهم هو: الميول السياسية التى تطغى على قادتهم
وعواقلهم، ومن ثم فإنهم فرضوا أنفسهم بقوة على الساحة السياسية السيناوية.
وفى عام 1965 ظهرت القوة العددية الحقيقية للفواخرية الذين ساندوا توفيق
الشريف المرشح للانتخابات البرلمانية وحسمت وقتها لصالحه ليكون بذلك أول
برلمانى فى سيناء بالانتخاب. ورغم أن الشريف من خارج الفواخرية فإنهم
اختاروه لأنه كان متعلما ومثقفا، حتى إن الفواخرية أنفسهم فى ذلك الوقت
حملوا الناخبين على إبلهم إلى لجان التصويت وحثوهم على اختيار الشريف لأنه
الأحق بتمثيل الدائرة. وهو أول برلمانى حقيقى بالانتخاب وليس بالتعيين،
منذ ذلك الوقت والفواخرية يقدرون قيمة التعليم حتى أنه من النادر أن يوجد
بيت للفواخرية به ولد أو بنت لم يكملا تعليمهما.

الفواخرية حديثا بادروا بكتابة وثيقة خاصة بالتحكيم العرفى لعائلات مدينة
العريش اتفق عليها مشايخ القبائل وقيادات العائلات، واستقر الرأى على
اختيار بعض المحكمين الثقات، وحازت الفواخرية النصيب الأكبر فى اختيار
المحكمين من رجالها. وقد تعدد القضاة والمحكمون العرفيون من الفواخرية عبر
الأجيال المتعاقبة، مما أدى إلى اختيار الرئيس السادات للمحكم «صبحى مسلم
الفواخرى» ليكون ضمن 1001 محكم شهدوا مع السادات توقيع اتفاقية «كامب
ديفيد» بين مصر وإسرائيل. رموز الفواخرية الذين حفروا أسماءهم كثيرون،
منهم العميد سرحان عيسى الفواخرى واحد من أبطال حرب أكتوبر. والمهندس
سليمان راضى الفواخرى من أوائل المهندسين الذين شاركوا فى بناء السد
العالى، واغتيل على يد مجهولين عندما كان يشارك فى تنفيذ مشروع مماثل فى
سوريا، يقول عنه عادل راضى الفواخرى عضو مجلس الشعب: تخرج سليمان فى كلية
الهندسة جامعة فؤاد الأول (القاهرة حاليا)، وعمل بوزارة الرى، وعند
التفكير فى بناء السد العالى وقع عليه الاختيار ضمن 5 مهندسين مصريين، كما
اختارته سوريا للإشراف على عملية بناء سد الفرات، ومنحه الرئيس عبدالناصر
نوط الواجب الوطنى من الطبقة الأولى وكرمته نقابة المهندسين، ويوجد ميدان
فى محافظة أسوان باسمه هو ومجموعة من بناة السد العالى. ومنهم أيضا عطية
الغول الذى ساعد الأتراك بالمال والعتاد أثناء الحرب العالمية الثانية
وذلك لكونه مسلما ينصر مسلمين.

شيوخ العائلة يذكرون واقعة تدل على شجاعة أبنائهم، فقد كان حاكم العريش
«يعقوب أغا» ممثلا عن الباب العالى فى تركيا وكان له أقرباء يمارسون
أفعالا مشينة، وأراد أن يطردهم من العريش، فأرسل إلى بدران الفواخرى، شيخ
الفواخرية فى ذلك الوقت وكان معروفا بشجاعته وإقدامه، فقال الحاكم لبدران
إنه سوف يدعو أقاربه إلى القلعة ويصنع بهم مثلما صنع محمد على بالمماليك
(أى ذبحهم)، فهدد بدران الحاكم بإشارة إلى السيف إذا خان أهله، (وهو ما
يعنى قتله)، فخاف الحاكم وتراجع، ثم أرسل إلى أهله فتدخل بدران لإصلاحهم
وردهم عن أفعالهم المشينة تجاه أهل العريش وتجاه الحاكم. الحكايات عن
الفواخرية كثيرة وتنبع من تواجدهم فى بلد حدودى وهو ما يحمل أجيالهم
المتعاقبة مسئولية كبيرة تجاه الوطن فى الدفاع والذود عنه، فوجود
الفواخرية فى سيناء كان بمثابة المعادل الموضوعى لتقديم خدمات وطنية لمصر،
خاصة أنهم يسكنون منطقة على جانبها الشرقى «إسرائيل»، وعن ذلك يقول أحمد
أبوحج الفواخرى، أخصائى اجتماعى: إن إسماعيل الفواخرى ومعه مجموعة من
المواطنين كانوا يضعون أجهزة لاسلكية بجوار الآبار لمساعدة المخابرات
المصرية أثناء الحرب ضد إسرائيل المواقف الوطنية المشرفة للفواخرية
متعددة، فقد شاركوا أبناء سيناء فى مساعدة القوات المسلحة المصرية عقب
هزيمة 1967، حيث ساعدوا فى ترحيل 100 ألف جندى بعتادهم، وهو ما كان بمثابة
إنجاز تاريخى أدهش الجميع وقتها، إذ كان من الصعب خروج هذه القوات الغفيرة
بهذه السهولة من صحراء سيناء الوعرة. كما ساعدوا المخابرات الحربية
المصرية كثيرا، شأنهم فى ذلك شأن قبائل وعائلات سيناء، ففى أوقات الاحتلال
الإسرائيلى لمصر كان من الصعب دخول أوخروج أى فرد من وإلى سيناء إلا
لأصحاب البطاقات التى تحمل محل إقامة سيناء، فكان الفواخرية يقومون بتزوير
البطاقات لصالح المخابرات المصرية لاختراق العدو الإسرائيلى وجمع معلومات
عنه. ومن الذين عملوا لحساب المخابرات المصرية محمد القصلى الذى خدم لمدة
7سنوات، وإبراهيم عليان وصبحى مسلم وصالح مطر، وقد كرمهم الرئيس الراحل
أنور السادات ومنحهم أنواط الامتياز.

محمد القصلى الفواخرى، عضو مجلس شعب سابق، يقول: دفع إبراهيم عليان ثمن
وطنيته، فقد تم قتل أخويه على يد اليهود ومثلوا بجثتيهما، فعلقوهما فى
طائرة هليكوبتر ومروا بهما على أهل سيناء لتخويفهم ولتوصيل رسالة مضمونها:
كل من يتعاون مع المخابرات المصرية فإن مصيره سيكون مثل أخوى إبراهيم. حزن
إبراهيم على ما فعله اليهود بأخويه، فانتقم منهم وفجر سيارة إسرائيلية
محملة بالأسلحة فى رفح، فاعتقله الإسرائيليون، وسأله أحد ضباطهم: «إنت
عملت كدة ليه؟»، فرد عليه قائلا: وإنتوا عملتوا فى إخواتى كدة ليه؟ وبعد
حرب 73 تم إطلاق سراح إبراهيم وزملائه فى حركة لتبادل الأسرى بين مصر
وإسرائيل. أحمد الفواخرى يتحدث عن عادات وتقاليد الفواخرية قائلا: فى حالة
الزواج التى يكون طرفاها من الفواخرية، فإن أحد كبار العائلة يرعى غداء
الحضور، حيث تذبح الخراف، ويقدم كل بيت من الفواخرية شاة أو أكثر، كل حسب
استطاعته ومقدرته، على سبيل الهدية
اما عن عيله الترابين اللى اتهمونا فى يوم زوى العاهات الفكريه اننا ضدهم فاصول الترابين هى
  • سليمان الترابين جاسوس مصري جنده الموساد الإسرائيلي بعد نكسة 67 و احتلال سيناء ليكون دليل للقوات الإسرائيلية في الصحراء لأن عائلته و قبيلته من امهر القبائل في التنقل بين صحراء النقب و صحراء سيناء

  • حصل على الجنسية الإسرائيلية تقديرا لخدماته لدولة إسرائيل و التحق أبناؤه بالمدارس الإسرائيلية

  • عند القبض على ابنه عوده عند حضوره لسيناء من قبل القوات المصريه ووجوده فى السجون المصريه الان تم توصيل رسالة إلى سليمان الترابين الخائن مفادها : "احمد ربنا و بوس ايدك وش و ضهر إننا سايبين بناتك عايشين في العريش" و ذلك بعد محاولات عديدة مارسها عن طريق اقتراح مبادلة الأسرى و المسجونين عن طريق المخابرات الإسرائيلية و نظيرتها المصرية
وسيناء طول عمرها شرفاء واعتقد دلوقتى الفرق بين بين العائلات المحترمه والخونه الكلاب واللى بيتبعوهم
وكله موثق بالتاريخ وبالحقائق فى كل مكان


الموضوع دا كان لازم ارد فيه من زمان بس الحقيقه كنت ساكته علشان بس الايام تثبت مين اللى خاين ومين اللى قليل الاصل ومين اللى ملوش اصل من الاساس والموضوع دا موثق فى اماكن كتير وانا حفظاه ظهرا عن قلب وفيه الاكتر من كدا
ومين اللى مجهول النسب والهويه ومين اللى واطى وخاين وخسيس ومين اللى سمعته فى الطين وعلشان بس يبصوا لنفسهم فى المرايات الاول

ويشوفوا اصلهم اللى مش معروف منين ولا فين وبعدين يتكلموا على اسيادهم

هام وعاجل من عند خالد همس الاحباب

طلب مساعدة .... عاجل وهام

احيانا ينتاب المرء منا حالة من العجز عن التفكير او الشعور بالتقصير تجاه الاخرين
واحيانا اخرى تتقاذفنا امواج الحياة وتجذبنا بعيدا عن شاطىء الحياة ولكن عندما يريد الله لنا خيرا يرسل من ياخذ بايدينا او من يدلنا الى فعل الخير اومساعدة شخص ما وتلك نعمة من الله نحمده ونقدسه عليها فالشكر للاخ الكريم صاحب مدونة طهر فؤادك على دعوته الكريمة لمساعدة شخص مريض يحتاج منا المساعدة والى نص الرسالة
فاكر جمعية الامل (فرع سوهاج ) اللى كانت عاملة معرض ملابس لمساعدة مرضى السرطان يارب تكون افتكرتها... المهم جت ليهم حالة بس صعبة شوية ومحتاجة كلنا نتكاتف مع بعض ونساعدها وهكتبلك تفاصيل الحالة ويارب تنشرها ونحاول نساعدها كلنا باللى نقدر علية ان شاء الله وهى على لسان الحالة طبعا ربنا يشفيها ويعافينا جميعا اللهم امين والمسلمين
بتقول :-اسمه بخيت محمود أحمد والذى يعمل بالهيئة العامة للتأمينات الاجتماعية بســوهاج
وبيقول :-
حيث انني مريض بمرض ( السرطان فى الكلى ) وتم اجراء عملية لاستئصال الورم على نفقتي الخاصة بتاريخ 26/11/2009 ثم تم دخولى الى معهد اورام اسيوط بتاريخ 5/12/2009 واوصى الطبيب المعالج بضرورة الاستمرار فى العلاج بدواء (sutent) وذلك لمدة 18 شهرا حتى يتم الشفاء وتبلغ قيمة علبة الدواء 23 الف جنيها ونظرا لارتفاع سعر الدواء عن قدرتي المالية فقد وافقت شركة فايزر للادوية على تخفيض 50% من قيمة الدواء وحيث ان الدواء بعد تخفيض 50% تبلغ قيمته 11.500 الف جنيها .ونظرا لظروفى المالية الصعبة حيث انني اعول اسرة فأرجو من سيادتكم التكرم بالموافقة على مساعدتي لشراء هذا الدواء بصفة مستمرة أو مساهمة اهل الخير ويعتبرهذا الدواء الوحيد فى علاجي الذى تحسنت عليه صحتي حيث اننى فى حاجة الى 6 جرعات حتى اتماثل للشفاء .
وجعلكم الله عونا للمحتاجين
ت/0115428158
العنوان/سوهاج- شارع ابو الحسن البصري خلف شارع 15
الى هنا انتهت الرسالة من صاحب الرسالة وبدا دورنا فى مساعدته كل بقدر استطاعته فمن يريد النشر او التنويه عن الحالة فى مدونته او على موقع الفيس بؤك فشكرا له وجزاءكم الله خيرا
ومن يريد التبرع فيمكنه ارسال حوالة بريدية باسم السيدة / ماجدة بخيت محمد ابراهيم وهى زوجة المريض على مكتب بريد سوهاج الفرعى بالحميات ورقم التليفون المذكور بعاليه يخص الحالة ايضا .
او من يرغب بارسال حوالة بنكية اوالتبرع نقدا فانا مستعد لاستقبالها وارسالها الى الحالة باليد ،ولاى استفسار يمكنكم الاتصال برقم المريض بعاليه او الاتصال على رقمى 0101345140.
برجاء الاهتمام بالنشر ودعوة الاقارب والاصدقاء من خارج التدوين للمشاركة بقدر المستطاع .
دعوة خاصة للمدونات الاتية بالمشاركة فى النشر او التنويه
فاتيما ام يوسف
قوس قزح
بت خيخة واى كلام
د. ستيته
وكل مدون اومدونة قرا الموضوع ويريد المشاركة
جزاءكم الله خيرا .
فالدال على الخير كفاعله

سلاح التلميذ الخايب


من الممكن ان اكون الوحيده التى تفائلت بوجود الوزير الجديد ولا اعلم سبب لهذا الانشكاح فى الاسارير اللى جالى لما عرفت انه هو برغم الفيديوهات والانتحارات والاشجابات واللى قالوا ان اللى جاى انيل من اللى فات
بس انا حبيته لله فى الله
ايون هو وزير الداخليه فى التربيه والتعليم انا فعلا فرحانه بيه يمكن علشان النزعه العدوانيه اللى عندى العنيفه
بس احب اوضح بعض النقاط اولا هو راجل تربوى بصرف النظر عن ابوه الله يرحمه
يعنى مجبوش واحد بياع بطاطا يمسكه التعليم
مجبوش بياع اثار يمسكوه التعليم
جابوا دكتور
انا عارفه ان ناس هتعرض على كلامى وتقولى قدمه نحس لدرجه ان موت الناس فى اللجان هو اتحمله
مع انه قضاء وقدر عن نفسى كل دا مش بيهمنى
انا فعلا نظرتى فيه مخيبتش
دا سورى يعنى ومقصدش بالمعنى الحرفى انه وزير بلطجى
بمعنى انه فعلا ميمشيش مع شويه المدرسين اللى معندهمش زمه ولا شويه العيال السيس اللى داخلين التعليم ومش بيستفيدوا منه غير واحد زيه
وعلى رايه هى النار اتعملت ليه علشان الاشكال دى
انا سمعته امبارح فى برنامج محمود سعد وعلشان ماتهوش منى هقولكم
اولا
ليه اولياء الامور فعلا مصممين يحفظوا العيال ويطلعوا جيل غبى حافظ مش فاهم
ثانيا
ايه يضر الاب اللى كان بيشتكى انه واقف تلات ساعات يجيب الكتاب اللى الوزاره اصلا مش موافقه عليه
طيب ما تفتكر كدا لو كانوا التلات ساعات دول لف فى الشارع على كعوب رجليك ورا واحده كنت هتشتكى
ولا منتظر واحد جايب لك تعميره لدماغك كنت هتشتكى برضه
الاغرب بقى
بعض الامهات تقولك انا لسه هروح اجيب الكتب من بره ليه
فعلا انتى تروحى ليه هى تجيلك دليفرى
وبعدين فعلا الوقت يا حرام هتقعدى امتى على الفيس بوك ولا هتقعدى امتى ترغى مع صحباتك
انا فعلا مستغربه احنا عاوزين ايه
اولا الوزارة مش عاوزه الكتب دى والراجل وجهه نظره صح ميه فى الميه
قالك عاوزين العيال تفكر مش تفهم اغلبيه التعليم الاجنبى بيقوم على البحث
هتقولوا ليه هو فيه وقت للبحث ومنين نجيب كمبيوتر
اقولكم كل بيت بقى فيه ولو مفيش زى ما بتدى فلوس لابنك يروح يعمل سيرش على اغنيه ولا يلعب يبقى يستفيد بالفلوس دى فى حاجه كويسه او بدل ما بيعملوا سيرش على افلام بورنو
مفيش وقت لايه الناس مبقتش عاوزه تتعب ليه
الستات عاوزين كل حاجه على الجاهز علشان متذاكرش لولادها ليه
هو الفيس بوك هيطير ولا جارتك هتعزل
ابقى يا ستى اربطيهم فى رجلين الكنبه
الرجاله مضايقه ليه ومصممين على الكتب الغبيه
طيب والله انا معاه قلبا وقالب لو المحكمه حكمت ياخد الكتاب ويروح يطبعه وتبقى حرقه دم
الراجل بيحاول يصلح منظومه فاسده يا ريت الناس تساعد وتبطل كسل وتواكل وتنطع على الارصفه
مش قادرين على التعليم يبقى متخلفوش واقعدوا ساكتين افضل
بالمناسبه انا معتدقش انى اشتريت سلاح التليمذ دا مره او مرتين فى حياتى
لانه فعلا بيخلى الواحد يتواكل
فى النهايه بصر فالنظر عن كرهه الناس ليه
انا بحبه ومتوسمه فيه الخير
وان شاء الله يودى كل المدارس النار وكل المخالفين



حكمه الامبراطورة

اللى يخاف من العفريت يطلع له

عيد سعيد عليكم يا رب


عيد سعيد عليكم يا رب وتعيس على كل من يزعل حبايبى واهلى واصحابى
عيد سعيد على كل الناس الحلوه اللى بموت فيها
والناس البعيده عن عينى بس فى قلبى
ربنا يبارك لكم يا رب ويرزقكم الخير كله

شوفتونى وانا هاديه بقى ببقى حلوه ازاى
الا صحيح هو موضوع الست كاميليا دا مش هينتهى بعد بقى ما طلعت فى الفيديو وقالت انا مغسلوش مخى ببرسيل ولا فيرى ولا ديتول حتى يا ريت نفهم ان الاسلام مش بيقف على حد واسلام الانسان بينه وبين ربه وكفره برضه بينه وبين ربه
ربنا يهدى الجميع يا رب وياخد المتخلفين
قولوا امين بقى

صواريخ مضاده


مش ناويه اطول بس انا هقول لكم كلمتين بس حطوهم توكه فى شعركم حلق فى مناخيركم خلخال فى رجليكم انتم حرين


اللى ميقدرش يحفظ سره هو شخصيا
يبقى محدش ينفع يستأمنه على سره
واللى يحاول يتذاكى على الناس ويعمل فيها شرلوك هولمز ويسأل عن حاجات كتير بعينها
وفاكر ان الناس مش هتفهم ليه سواء بقى ولد بيسال عن بنت بنت بتسأل عن ولد
يبقى شخص غبى لان لو واحد صدق انه سؤا ل عادى الف هيشكوا فيه ولو هو بيقنع نفسه بغير كدا احب اقولهم اذا كان العقل بيشترى مكنتش الكرشه اترمت فى الاسواق
واخيــــــــــــــــــــــــرا

من الكوارث التى لا يوجد لها علاج الكذب على النفس فكذبك على غيرك قد يضره او لا انما المؤكد كذبك على نفسك

سيدمر شخصيتك


الشخص الذى يتدخل فى حياة الناس او يراقبهم ليجمع خيوط حول حياتهم سواء بقى الناس دى مهمه مش مهمه ممثلين مطربين رقاصات ناس عاديه
فدا شخص مريض لانه برضه بينسج افكار عن شخصيات هو خلقها فى باله وبس

اللى بيحاول يضحك على واحده او يعمل علاقه مع واحده سواء بقى بتحليل شخصيات وتدوير اسطوانات انتى رقيقه وبتكتبى حلو وانتى احساسك مرهف ويصوصو وينونو وميعملش اعتبار لكون الانسانه دى لها حياته
يبقى هو شخص واطى وجبان وميستهليش يعيش وهى تستاهل القلى فى مازوت علشان بتركن عقلها وتصدق ناس لابسين شرابات فى دماغهم

اللى تهد حياتها علشان واحد تبقى تستاهل تتعض من سمكه قرش وميلحقوش يلموا جسمها من المحيط

يالا كفايه كدا بقى

ملحوسه :- مش عاوزه واحد فقيق يبعت ليه يقولى انتى بتتكلمنى عن نفسك الكوكب دا يا جدعان علشان اكتب فيه كل المشاكل والملاحظات بتاعتى اللى بشوفها فى حياتى
اما حياتى الشخصيه فملك ليه انا وجوزى فقط مبكتبش حاجه عنها يعنى من الاخر وللمره الخمسه الاف محدش يعمل تسقيط عليا بميه مش نضيفه


كان معكم ابى هانم برنس الليالى ورمانه الميزان