بوست راس السنه وديلها




التاج ده تدبيسه يعنى اللى هيقرا يجاوب يعنى اللى مش هيجاوب احمد سمير بتاع الاغلبيه الصامته هيزعل يعنى انا مدبس لوحدى من الاخر بس على فكره هو مفيد لانه بيجمع احداث سنه يالا معاكوا ربنا واتنين ملايكه وواحد شيطان يونسكم

السؤال الأول : أجباري
بالنسبة لسيادتك......ياترى سنة 2009 تقدر تعتبرها بشكل عام سنة سعيدة....كبيسة...مملة...مالهاش لازمة.....الخ؟

كبيسه باللحمه
ياريت تختار لها وصف من كلمة واحدة
السؤال الثاني : اجباري برضة
ايه أجمل حاجة حصلت لك في 2009؟ و بالمرة أسوأ حاجة حصلت في 2009 (لو كانوا كتير اختار الأسوأ)؟

غيرت بطوط وجبت سيمبا ربنا وعدنى باللى يملى حياتى عملت كتير اوي كويس فى شغلى اسوء حاجه اللى عمال بيحصل والتوريث وعدم وعى الناس كانهم مغيبين وبقوا كلهم بيحلموا وشايلين دباديب بمبى
السؤال الثالث: برضة اجباري
لما بيتقال قدامك 2009.....ايه اول حاجة بتتبادر لذهنك على طوووووووووول؟

الازمه الماليه والاضمحلال اللى بقينا فيه والازمه بمعنى الازمه الخاصه بيه ههههههه حرب غزه

السؤال الرابع: أكيد عرفت انه اجباري
بتحتفل بليلة رأس السنة؟؟؟ و لا بتعتبر الأحتفال بها حرام؟؟؟ (طبعا اكيد مش مقصود الأحتفال السكر و العربدة لأنها حرام في رأس السنة و رجليها كمان) و لا ايه؟

اه بحتفل طبعا بعمل محشى وبسبوسه وشيشه واقعد فى جزيره القطن اللى فى ميدان اللحاف

السؤال الخامس : مبني على اللي قابله
لو مش محبكها॥و ما بتعتبرهوش حرام....ياترى هتحتفل بيه السنة دي ازاي؟؟ او احتفلت بيه ازاي لو جاوبت على التاج دة بعد 31 ديسمبر؟؟

نفس الاجابه اللى فوق انظر السطر اللى قبله

السؤال السادس: مش محتاج افكركم انه اجباري
فاااااااااكر 31 ديسمبر 2008 (اه...السنة اللي فاتت)؟ ياترى فاكر حالك ساعتها كان ايه و كنت عامل ازاي؟؟؟

اه طبعا كنت بصلح كبالن بطوط والحى السابع كله سمع صوتى لما كنت بزعق فى الميكانيكى وردحت له بالانجليزى والفرنساوي والدنيا مطرت عليا يالا الله يرحمها بقى
في 31 ديسمبر 2009....ايه اللي اتغير فيك؟؟ ياترى لسة قاعد نفس القعدة و في نفس المكان و لا في حاجات كتير اتغيرت من 31 ديسمبر 2008 الى 31 ديسمبر 2009؟؟؟؟؟

بقيت انضج فى شغلى والبيت بقيت بحب بقيت اشرس واعنف بقيت عصبيه بقيت صريحه وداخله فى شجره والصراحه اكثر من اللى قبلها الحقيقه

السؤال السابع: برضة
غلطة غلطتها في 2009 و مش هتكررها في 2010
اانى بجاوب على التاج ده هههههههه لا الحقيقه هى انى كنت مسرفه واتزنقت شويه وامنت بناس كمان مينفعش اامن بفكرهم ومردتش على ناس كان المفروض اديهم بالشوز بس مش ناويه اكررها واقول على ناس سكت عليهم كتير بس وعد اى حد هيضايقنى هشرد للى جابوه

لسؤال الثامن: و دة اكيد اجباري برضة
امنية هتتمناها في 31 ديسمبر 2009 و تدعي ربنا انه يحققها لك في 2010....ادعي...(مين عااااااااارف؟) مش جايز تكون ساعة اجابة؟؟

اكون فى مكان واحد مع اللى بحبه اوي وكمان اتعلم كورشيه وكونغوفو وابقى رئيس الوزراء

السؤال التاسع : و الأخير
شخص............تتمنى لا تشوف صورته و لا تسمع أسمه في 2010؟؟؟؟!!!! (ياريت بلاش اللي في بالي....عايزين حد غيره)....بلاش تقليدية

هى واحد لا وحدات ووحايد كتير اوي اعتقد بيدخلوا هنا وبصراحه عاوزه اقولهم لو عندكم دم بقى متدخلوش هنا ومتبعتوش ليه على الفيس بوك دا بالنسبه للى لهم اكونت انما محدثين النت احب اقولهم ابعدوا عنى علشان قرفت وبعد كده هتكلم بالاسم والسن ومش بعيد العنوان نيهاهاها شريره انا عارفه

حكمه الامبراطوره

لا تقرا لاحمد سمير( الاغلبيه الصامته) ولا تأمن لتاجاته
كل سنه وانتم بخير

قنبله موقوته

تحديث يا جماعه فيه صديق لينا دخل التدوين وداخل ببوست انا بعتبره حلو اوي يا ريت تقروه اسم المدونه اكيد بحبها انطح الاسم هتروح للينك وطبعا كله عارف ينطح يعنى ايه يالا هجوم

طول عمرنا غير اى حد فى العالم متميزين حتى فى حياتنا الشخصيه العيب ده مش عيب حكومة لوحده ولا هو واجب عليهم هما بس الموضوع ده احنا كمان لنا ايد فيه
اطفال الشوارع
الموضوع باختصار مغاره فى قلب كوبرى الساحل فى امبابه كانوا بيغتصبوا فيها البنات بياخدوهم هناك ويغتصبوهم
وطبعا المكان مليان مخدرات ودعاره وبلاوى
لما اتكشف الموضوع كله واحد بيدلق جردله بقى
ابو تريكه متصل بجمعيه يقولهم اساعدكم
طلعت السادات هيرفع قضايا على وزيره الصحه والسكان ولا مش عارهف اسمها ايه دى الحجه مشيره وعلى الداخلية وعلى الشئون الاجتماعيه
دلوقتى الداخليه بتتحرك
نرجع وراء شويه دورنا احنا كان فين
لما بنشوف طفل ولا طفله من دول فى الشارع ولا بنعبرهم بنعطف عليهم بفلوس وخلاص وهما كمان عمرهم ما بيساعدونا لانهم بيكدبوا فى اغلبية الكلام اللى بيحكوه لنا
من فتره جابوا فى برنامج صبايا وبيقعدوا يعيطوا
الولادد مش كلهم متعاونين واشد شراسه وعدوانيه من ناحية اى حد وده بطبيعه حالهم اللى هما فيه
حتى هما عملوا مجتمع دلوقتى لوحدهم له قوانين وله عادات
احنا بقى كناس عاديه مش حكومة كنا فين
الناس اللى قريبين من المكان ده مبلغتش على طول ليه
لما بنشوف طفل فى الشارع ولا تحت كوبرى مبنبلغش ليه
الدوريات الراكبه مبتأخدش الاطفال دى تحطه فى ماوى ليه
باختصار اوى العيب مش على فئه وفئه لا
دى مسئوليتنا كلنا
طلعت السادات مفتكرش الكلام ده من قبل كده ليه استنى لما انفجرت واتحرك ولا هى فرقعه وخلاص على الرغم من حبى اصلا له جدا بس الموقف زباله ومش عجبنى
الست بتاعت الوزاره الجديده اللى بتعمل مؤتمرات فينها من المشكله دى
بهوات الداخليه واحنا فين برضه عملنا لهم ايه
كل فرده شمال عمل جمعيه علشان يلم على قلبه حار ونار فى جتته على اسم الجمعيه ويحطهم فى كرشه وخلاص
الموضوع علشان محدش يقولى بتتكلمى وبس
اولا ومن زمان المفروض يعملوا جمعيات على حق محترمه كويسهويحلوا مشكله الوفاء والامل
ثانيا تتقفل كل الجمعيات المشهره والنصابه اللى فى بير سلم واى كلام
وده يتعرف عن طريق تعيين اخصائيين يشرفوا على الاماكن دى

الدوله دى عامله خدمه اجتماعيه لمين نفسى اعرف ليه صديقه هولنديه بتاخد 10 الاف دولار فى الشهر وهى اخصائية اجتماعيه
فين بقى احنا كليه اربع سنين ومعهد سنتين وفى الاخر ولا بنعمل حاجه بيهم قاعدين نبيع فجل وجرجير
مبيعينوش الناس دى ويبقى لهم شغل محترم الوظيفه دى حساسه جدا جدا واللى يتخرج منها لازم يبقى على درايه كبيرة بكل حاجه فى علم النفس والاجتماع والجريمه والعقاب والاسرة والطفوله انا درست فعلا كل ده واستفدت منه جدا
الكليه دى لا تقل اهميه عن هندسه وطب واى كليه تانيه لان دى اللى بتبنى طفل او بنى ادم
ليه مش مهتمين بيها
الناس اللى بتتصل وعاوزه تساعد الموضوع مش ساعة المشكل وبس المفروض طول الوقت ميستنوش صمام الامان
لما ينفجر
احنا لما نشوف حاجه ليه بنسكت ونقول واحنا مالنا ليه منبلغش ونفضل ورا الحاجه حتى لو هما طنشوا شويه
مشكله الاطفال والعشوائيات مش هتتحل غير لما تترتب كويس ويبقى فيه تعاون بين الاتنين
الموضوع بجد وبامانه مسئوليتنا كلنا سواء احنا او الحكومة

يالا اقعدوا بعافيه

ملحوظه كلبوظه:- البوست اللى فات مش عارفه ارد على باقى الناس لان لقيت برضه الاغلبيه زى متلخبط مشاعر انسانيه تجاه فلسطين ومشاعر تجاه بلدى انا وبعض الفلسطنين طلعوا قالوا احنا مش مضررين من وجود الجدار اللى شوفته وسمعته ان حماس اكتر حد واللى سمعته برضه الانفاق دى بيتهرب فيها حاجات كتير والله اعلم بقى بفين الصح بس فى النهايه ربنا ينصر المظلوم وينتقم من الظالم
لان ولا وقفات هتنفع ولا شموع هتفك عنهم حاجه ولا مقاطعه اروبا للمش ابو دودو هتخلى مصر تتراجع الموضوع منتهى


لواء اركان حرب مدرعات ابى هانم سيبونى فى حالى


حكمة الامبراطورة

السكوت احسن من الكلام وسط الزيطه

الجدار والفرخه باضت على الجدار


اقر واعترف انا آبى هانم كعب الغزال وا بتنجانى كما يحب ان ينده لى البعض انى فعلا لا استطيع ان استوعب
استنوا هفهمكوا انا فعلا كونفيوسيد ومش عارفه اقرر ولا عارفه احدد مين الغلط ومين الصح وبفكر بدون عصبيه القرار باصدار الحكم صعب عليا اوى
الله يكون فى عون القاضى فعلا هو بيصدر حكم ازاى ما علينا
ولا الحكم بتاع الماتش لاااااااا الموضوع صعب وانا بقيت واقعه فى حيص فيص ميص خالص
وعلشان اقول لازم تمشوا على النقط اللى جايه دى كلها وعلشان زى ما قولت نقول حكم عادل فهمى نظمى
انما لو اتكلمنا عاتشفى مش هنحكم وهنقول اى كلام وانا المره دى مش عاوزه اى كلام
هقولكم الاسئله اللى فى بالى خبط لزق كده بجد حتى لو ساذجه مش مهم قدركوا تقروا ليه ووتردوا عليا

السؤال الاول

مصر اتفقت مع ازرائيل تعمل جدار علشان التهريب اللى بيحصل فى الانفاق حلو حلو
ليه بقى
علشان ميهربوش سلاح لانهم بيقولوا ان الاغذيه والادويه بتدخل من البوابات انما الممنوعات هى اللى بتدخل من الانفاق
وعلشان بيقولوا ان حماس هى اللى بتهرب الحاجات دى علشان مفيش حاجه من اللى بتدخل من البوابات بتدخل لهم
وناس تانيه وركزوا فى دى فلسطنين بيقولوا ان حماس مش هى اللى بتهرب من الانفاق وانهم ناس عاديين وده ليه لان حماس بتستولى على كل المعونات اللى داخله
طبعا ده المبررات اللى بتتقال

مصر بتقول انا بعمل الجدار الفولاذى علشان احمى حدودى المفوتحه على البحرى كمان سواء من رصاص طائش من العدو ولا اللى بيحصل من الفلسطنين وعلشان مش كل يوم ياخدوا متر من سينا ويضموه ليهم بمعنى كل يوم يحطوا سور ويشلوا سور وفى ده بيضموا امتار لفلسطين وعلى فكره دى حقيقه بس ازرائيل اللى بتعملها
وعلشان تمنع الاجتياح اللى بيحصل على المعابر لان ازرائيل عاوزه تهجر الناس لمصر ويفضوا لها فلسطين

السؤال التانى بقى
وركزوا واربطوا الكلام ببعض
دلوقتى فلسطنين ضربوا على المعدات والمصريين نار وهما بيشتغلوا طيب ليه ما برضه من الجانب الازرائيلى بيشتغلوا
اشمعنى يضرب على عمال غلابه يعنى اه انا زعلانه بجد ومقدره زعلهم بس برضه ميضربوش فينا ما يضربوا فى التانين
ولا مقدروش على الحمار بيشدوا فى البردعه

الزغروف الكبير بقى

بعد كل الاسئلة دى مين معاه حق احنا علشان بنامن بلدنا ولا هما علشان حاسين بالظلم
طيب فيه معابر تانيه فيه على الاردن ولبنان ليه كل اتصب على مصر

فى النهايه طبعا اللى هيدخل ويقولى انتى ارحمى الفلسطنين وياخد الكلام بالمقلوب انا مستورده طقم من ابو ورده هنسله على دماغه انا مش عاوزه غباء انا مش عارفه اصدر حكم فعلا انا كله صعبان عليا
ومش علشان بكره الحكومه التيتتتتتت بتاعتنا يبقى كل حاجه غلط بيعملوها ما احنا مضغوط علينا ومتجوزين الامريكان عرفى يعنى وده غصب عنا
والمثل بيقولك لو جالك الطوفان حط ولدك تح السرير ولا مش عارفه ايه
انا فعلا محتاره ومش عارفه اتصرف ومينفعش برضه نقول ما حكومتنا هتعمل لا مش هتعمل حاجه ومش هنقدر نضغط عليها لان اللى هما عاوزينه بيتعمل وبس واحنا بنجعجع فى الهواء
انا ليه بقول ليه ده لان فعلا اصدار الحكم على جانب بالعقل صعب اوى اوى
الحمد لله انى مش قاضى


كان معكم مستشار اول وزير النقل والمواصلات ابى هانم بتنجانى

حكمة الامبراطورة

اللى ميعرفش يقول عدس بالبصل

سنه كمان


اكتشفت ان يوم 17 ديسمبر كان تانى سنه ليه فى التدوين
اممممممممم يمكن رؤيتى للموضوع اختلفت كتير
هقولكم ازاى
كنت لما دخلت التدوين حسيت ممكن اكسر العالم وان التصرفات الايجابيه اللى بعملها على حد قول الناس هتاثر فى ناس تانيه بس اكتشفت ان انا وناس تانيه هما اللى كده والباقى فى البتنجان يعنى يا عم كبر هقولكم شويه حاجات اكتشفتها بمناسبه مرور عامين من التدوين ووجع القلب واستهلاك صوابعى مع الكيبورد وتمأيأ عنيه قدام اللاب توب
استعنى على الشقا بالله
1- بقى ليه اصحاب بيجمعنا هدف واحد زى مساعده الناس واننا نبقى بنعمل حاجه صح
2- اكتشفت انى مبقتش عاوزه اروح تجمعات فى الهواء يعنى علشان محدش يزعل او يفهم غلط اول ما دخلت التدوين كنت بحب اشوف الناس واعرفهم بس الصراحه اتصدمت واكتشفت او يمكن حظى وقعنى فى ناس مبتحبش غير قاعده المصاطب وقولنا وقال وشباب بيرسم نفسه على الفاضى وهو جعر وفاضى وريحته وحشه كمان ونصاب فمبقتش احب اتعرف على ناس
3- الناس بتتصدم لما تشوفنى يقولوا ليه مش متخلين انك كده انتى هاديه ومش جباره مش عارفه ليه الانطباع ده مع انى برعى برعى يعنى

ناس كتير بتقول عليا مغروره بس انا مش كده انا بعتز بنفسى بس وبحط حدود يمكن علشان فيه ناس الحياه بالنسبه لهم سبهلله فانا مش بحب ده
5 - بقى ليه اصحاب واكتر من الاخوات وبحبهم جدا جدا
6- اكتشفت ان ناس بتعلق لمجرد التعليق وبتكتب وهى دماغها هواء فاضيه فرد كاوتش نايمه ملهاش لازمه مينفعش معاه تتملى غير سبيرتو
7- مش كل اللى بيدونوا بيفهموا ولا عندهم اراء تنفع ناس كتير بتكتب فراغ مش اكتر وحب فى الشهره مش اكتر
8- ناس كتير بتسرق من جرايد وبتنسب لنفسها ناس كتير بتسرق من منتديات وتغير وتقول انا اللى مبدع
9 - ناس كتير بوشين يتكلموا على حد وحش وفى نفس الوقت يروحوا يصاحبوه
10- فيه ولاد زى النسوان الفاضيه بتوع قاعده الشلت اللى اتكلمت عليهم فى الاول بيحبوا يوقعوا البنات فى بعض وفاكرين ان دى شاطره ده مرض يا متخلف انت وهو روح استحمى واتعالج
11- قابلت ناس حلوه اوى استفدت منهم فى حياتى كتير
12- كل اللى بيشتمونى ولا يعرفوا عنى حاجه وبيتكلموا اى كلام وخلاص لما ازنق حد واساله فى حاجه يكمل وصله الردح القذره بتاعته وانا اقسم بالله وفيه مجربها لو فتحت فى طوله اللسان ما حد هيعرف يرد قدامى وبادله وحقايق وهجرح جامد وكل مجهول بيدخل عندى غالبا بكون عارفه هو مين ولو راح حتى بغبائه عند حد من اصحابى برضه ببقى عارفه المشكله اللى هما مش فاهمينها ان اصحابى اللى بيروحوا عندهم دول بيقولوا ليه وبنتكلم فى الموضوع وبنضحك ثم محدش فى العالم يعنيه انا عبمل ايه ولا بقول ايه يبقى على راى صديقى العزيز خليك وخليكى فى بوزك لما نعوزك
وعلى فكره هما مجموعه معروفه وانا مطرقعه لهم باللى فى رجلى قبل كده فخلاص بقى بطلوا تماحيك شكلكم بقى وحش وعلشان محدش يسال فيهم ناس من التدوين وناس من بره التدوين خالص
13- الناس بتزعل لما اقول دى مدونتى وانا حره اكتب اللى اكتبه ومش فاهمه ليه هو انا يعنى مأجراها منهم فالمفروض يقولوا ليه اكتب ايه ومكتبش ايه

هو ده تقريبا اللى فاكراه من التنوين المغناطيسى ده
هذا وبالله التوفيق واوعدكم
اوعدكم
اللى جاى انيل بس قولوا يا كريم

لا ريا وسكينه ولا الخط انا مستر اكس جنبيه قط انا كل اللى مطرقع لهم عارفين مكانتى انا

كان معكم ابى هانم من فوق برج الكفاح المسلح

الناس امخاخ


ربنا سبحانه وتعالى لما خلقنا خلقنا درجات باعمالنا وبكل صفات فينا وحتى فى طريقه فهمنا للامور
والطريقه الصح لفهم الامور هو انك تجرد نفسك من ميولك ايه واسقاطاتك ايه وفشلك فى حياتك فى ايه وعقدك ايه وتفكر فى الموضوع وطبعا الغالبيه عمرها م بتعمل كده ولا هتفهم ده
مثلا واحده ذكيه جدا وواحد غبيه بس ربنا مديله حلاوة وركزوا على حلاوة شكلا ااقصد يعنى مش جمال لان الجمال ده حاجه والحلاوة حاجه تانيه خالص
تقوم الغبيه علشان كاره نفسها تعمل اسقاطات على التانيه
يعنى مثلا شوفوا فستانها عامل ازاى شوفوا جزمتها لونها ايه ومتنتقدش مثلا طريقتها فى حاجه مهمه على راى المثل ملقوش فى الورد حاجه قالوا له يا احمر الخدين
مثال تانى مثلا معترضين على حد من الحكومه وطبعا كلهم ولاد تيييييييت فى تيييييييييت بس لاحظت ان اغلبيه اللى بينتقدوا بينتقدوا شكل يعنى شوفوا بيعمل ايه شوفوا بيصقف ازاى شوفوا شعره ازاى
مبدئيا كل ده ميهمنيش فى حاجه والمفروض انه برضه ميهمش حد
الصح انك تنتقد فكره قاله كلمه قاله تصرف عمله انما مش انتقاد لمجرد الانتقاد
وعلى فكره اللى بينتقد ده مبيكونش عنده اصلا حاجه يقولها ولا فكره قادره يعمل حاجه
غير كده كمان مش معنى ان شخص طريقه لبسه وحياته وتفكيره غيرى يبقى هو غلط وانا اللى صح كل واحد له معايير واحنا منعرفش معايير الناس عامله ازاى والحقيقه مش حجر على حد ولا الصح انا مثلا علشان مسلمه بقول ان دينى هو الصح والمسيحى بيقول هو الصح واليهودى بيقول هو الصح وكل واحد متمسك برايه يبقى الحقيقه مش مطلقه ولا مسلم بيها هى بتختلف علشان اذواقنا وتفكيرنا وطريقه حياتنا بتختلف كل مكان وله ظروفه كل حياه ولها ظروفها فبلاش الاسقاطات الفارغه اللى بتتعمل ساعات

حاجه تانيه النصيحه
لما حد يطلب منى نصيحه اوعى تديله النصيحه دى حسب شخصيتك وبرضه ممتديهاش له على هواه بس اديها له حسب ما يتناس مع شخصيته بمعنى اوضح اكتر
لما واحد عاوز يلبس بلوفر اصفر فى اورانج فى اخضر مثلا وانا مبحبش الالوان دى مقلوش لا دى وحشه لان كده انا بديله النصيحه حسب اهوائى انا وده غلط
الصح انى اشوف ايه الغلط فى الالوان او فى البلوفر مثلا شبه البغبغان شبه الفخفخيان اى حاجه واقوله هات الالوان بس منفصله
ودى على فكره قدرات يعنى مفيش حد يقدر يتحكم فى ده الا اللى ربنا اداله عقل مختلف او قوة تحكم فى عقله

فى النهايه اتمنى اللى بينتقدوا اى شئ فى العالم ينتقدوة بموضوعيه
واللى بيقيموا حاجه يقيموها ككل مش اخد حته واسيب الباقى ده اسمه ضيق افق واسقاطات شخصيه ملهاش لازمه غير عقد فى حياتنا فبلاش نطلع عقدنا على حد

ملحوظه :- لو الكلام اللى بقوله ده لمس الوتر الحساس عند حد وحس انى موجهه الكلام ليه يبقى عبيط ههههههه بجد انا مبقصدش حد ولاحظت ان اغلبيه الناس مش عارفه ليه بتاخد الكلام على نفسها زى كده اللى على راسه بطحه بيحسس عليها
انا بتكلم فى العموم ومن تجارب فى حياتى
فا اللى هيلمس الكلام ده وتر عنده ويحسس على البطحه يبقى يشيل

ايده من عليها علشان اعملها له حفره نيهاهاهاهاها




كان معكم ابى هانم من امام عنبر تلاته العباسيه

حكمة الامبراطورة

لا تصدق كل ما تسمعه اذنك وكل ما تراه عينيك فانت تصدق ما تريد فقط

ارجوكم الدعاء

اولا بشكر كل الناس اللى جت فى بؤجه الخير جزاكم الله خيرا جميعا
انا هقول على اللى فاكراهم
اولا ستيته اللى مقدرش اقابلها لانى اتاخرت اعمل ايه فى الست شمس اللى خلتنا عدينا عليها بقى يالا علشان بحبها اوي مش مهم وميرسي ليها بجد كتير
ومروه حبيبتى اللى مشيت قبل ما اشوفها ولو انها وحشانى
وفاتيما قلبى الجميل وميرا الحته اللى واقعه منى وطبعا مامى الصغننه قوس قزح دي لها شكرااااااا كبيره اوي
وزوجه الاستاذ احمد كمال وطبعا الاستاذ احمد اللى عيد ميلاده يوم عيد ميلاد ي مع اننا شخصيات مختلفه
واهل بورسعيد نوسه ونسمه اختها
وشكر خاص لمحمد اللى شرفنا برضه من بورسعيد ووليد كنج توت وابنه السكر اللى ربنا يخليه ليه ومراته برضه حبيبتى شرفتنا كتير
وبدريه طه السكر وطبعا المجنونه العاقله سومه لا بقت الحجه سومه وبسكوته السكر اللى جت من الاسماعيليه شخصيه سكر
والاولاد
طبعا عسقول وخالد هم الاحباب الجدندي المجهول وهانى سلامه ومينو ومحمود الدوح وتامر وهبه وشريف وروقه فاروق
كان فيه واحد مع يسكوته ربنا يكرمه برضه بس مش فاكره الاسم والاستاذ المحامى الكبير اللى استضافنا فى نقابه المحامين شريف وطلعا الثنائي الفزيع شفقه واحسان
والاستاذ احمد عبد العال
والدكتور احمد عبد العدل واخمد قاسم اللى جاي من الغردقه لينا ومعرفتش اقعد معاه كتير
وطبعا الضلع الرابع لينا اسامه عبد العال
وعادل اللى هسلمه لاول كمين المرهالجايه وعلشان خاطر فاتيما هسيبه شويه
وولو نسيت حد اسفه بقى الذاكره وحشه
ومش هشكر خيخه الوحشه علشان مجتش
الناس اللى اتصلت دودو عاشقهالرومانسيه وحنين القلب ربنا يقولمها بالسلامه ومن السودان عاشقه القمر
كلمتنى كتير ربنا يكرمها شكرا ليهم كلهم وطبعا شكرا ليه ههههههههههه
وضياء برضه ربنا يكرمه مش بيتاخر ابدا
وميشو فيشه اللى كلمنى
الدعاء بقى ليه صديقه من ايام المدرسه ادعوا لها ربنا يشفيها لان جالها لوكيميا فى الدم
ومحاجه دعائكم كتير لانها غاليه عندي اوي اوي ربنا يقومها بالسلامه
وبجد محتاجه دعائكم جميعا
وجزاكم الله خيرا

بؤجه الخير


طبعا اللى حضروا معانا السنه اللى فاتت والسنه دي عارفين الموضوع وباختصار شديد الفكره اننا بنجمع كل الحاجات اللى مش محتاجينها لبس ايشاربات شوزات حاجات للبيت ملايات بطاطين اى حاجه مش محتاجينها فى البيت ان شاء الله شربات او اند وير بنجمعه فى بؤجه وبنوديه جمعيه صحبه خير اللى فى دار السلام فيه ناس عارفه العنوان كويس بتاع كل مره اللى بنتقابل فيه فى المعادي بينزل محطه زهراء المعادي وبيتصل بينا وحد فينا بيجى ياخده الفكره اننا بنساعد ناس فعلا محتاجه بالحاجات دي بس يا ريت تبقى الحاجات مغسوله على الاقل علشان يبقى شكلها كويس هما بيعملوا معرض بيها وبيبعوا القطعه يعنى ممكن بخمسه جنيه والفلوس اللى بتيجى برضه بتتصرف على الناس دي بتوع اسطبل عنتر وعزبه خير الله لان فيه ناس بتحتاج فلوس وادويه وبيحتاجوا يتعلموا

الميعاد يوم الجمعه الجايه اللى هى حداشر ديسمبر

اللى هيكون يوم عيد ميلادى هديتكم ليه ان اللى يقدر يجى يجى من فضلكم اللى مش هيقدر ممكن يبعت مع حد او يقولى ونتصرف وحد يقابله حتى لو من محافظات البوست القديم عن بؤجه الخير هتلاقوه فى مدونه بيكيا هتلاقوها فى البروفايل بتاعى المدونه اغلبيتها عن نشاطات الموضوع ده وعند مامى الصغننه قوس قزح هنا اتمنى انكم تكونوا موجودين

سؤال


صباح الخير اولا انا عندى كام سؤال يعنى كده محشورين فى صوباع رجلى الصغنن ومش عارفه البس الشربا بجد
يعنى فيه حاجات بتحصل لما بقعد اهزها شمال ويمين مبتوقعش غير براغيت وصراصير واقعد اجرى وراها بالشبشب علشان تجاوبنى عن غرضها بتتخرس ومبلاقيش نتيجه
اللى عنده اجابه بدون حنجوريه فارغه يا ريت يقولى اللى فكر فى الاسئله دى يقولى اللى عارف للحاجات دى فايده يقولى بجد لانى فعلا مش عارفه وفيه فرق ما بين مش عارفه ومش شايفه
دى كلمه ودى كلمه
المهم بقى السؤال الاول

ان ان تششششششششش
يعنى ايه محاكمه شعبية دى زى النزله الشعبية كده يعنى ؟
انا بسمع عنها بس ايه الفايدة العايده منها علينا يعنى الناس اللى بتدعوا ليها واللى بيعملوها ايه الفايده يعنى محاكمه عن تصدير الغاز الىل مش هنخلص منه بقالنا سنين وبنخبط دماغنا فى الحيطه
محاكمه عن احداث الجزاير وفى النهايه قاعدين نولول اهو
محاكمه لاحمد عز والراجل كل يوم ولا ماثر فيه شعره بيطول وسايح ونايح ولا السمنه البلدى

حاجه تانيه
سمعت ان فيه بنت اعتقلت من صلاه العيد انا طبعا ضد العبط ده بس داخل واحد يقول علشان اخوها لابس كوفيه بتاعت فلسطين وهنا يصدر صوت مدوى منى جدا يهز ارجاء المأروصه امال اللى رابطينها على كتافهم ليل نهار محدش بيكلمهم ليه الواد نضال اه هبلغ عنه ما هو اهو لابسها والناس اللى رابطاها فى عربيتها كمان طبعا السبب ولا له معنى اكيد فيه حاجه
السؤال بقى وقفه احتجاجيه والامن ضربهم على صوابعينهم جريوا طيب لزمتها ايه الوقفه ولا القاعده
البيان الىل هجيب لكم جزء منهم بجد رعبنى يا مامى

خصوص واقعة الخطف الاجراميه لبنت من بنات مصر بنت الزقازيق الطالبه بكلية العلوم على يد مخبر امن الدوله محمد عبدالله و عناصر معاونة من الشرطه من مصلى العيد بالزقازيق

يؤكد اتحاد شباب مصر ان هذه العمليه الاجراميه بخطف بنت مصريه على يد اى عنصر كان لن تمر مرور الكرام

كما يؤكد ان ما حدث لم يكن عملية ضبط قانونى ونحمل المدعو محمد عبدالله ورؤساءه فى جهاز مباحث امن الدوله المسئوليه كاملة عما حدث كما نحملهم المسئوليه عن الغضبه الشعبيه من جماهير الشعب المصرى العزيز

كما يطالب اتخاد شباب مصر جماهير شعبنا العزيز بالمشاركه فى الةقفه الاحتجاجيه المقرره يوم الاثنين الموافق 30 من نوفمبر بعد صلاة الظهر مباشرة امام المحامى العام بالزقازيق ( المحكمه ) بشارع الزراعه

يعنى البهوات اللى بيقولوا مش هيمر مرور الكرام عملوا ايه راحوا وقفوا زى دكر البط والامن جراهم البيه اللى نافخ نفسه وكتب البيان ده هيحط السيخ المحمى فى صرصور ودنه
طيب بجد ليه بنتريق على الحكومه لما بتقول انا بدين واشجب وانتحر ما هما كمان بيقولوا كده وفى النهايه بيج طزززززز فى كله

انا مش فاهمه ايه الفايده من الحاجات دى يعنى اولى البنت يقوم لها محامى ولا يشفوا السبب ونبطل بقى نقول الشعارات الجوفاء دى وكام واحد صايع يروح مش وراه شغله ولا مشغله علشان يتلطش شالوت ويروح يعيط ويقولك اختطفونى ورامونى فى الصحراء مع الكليبه يا مامى
انا طبعا مش هقلل من مجهود ناس كتير بتشتغل بس العيال اللى طالعه تصدعنا دى وتقلب لها قرشين تتلم بقى علشان كده ضيعوا بنات فى رجليهم

السؤال التالت

رئيس هيئه السكك الحديد متشلش ليه كل يوم قطار طالع نازل واكل شارب
واحنا بندين ونشجب ونعيط برضه العيب فى الهيئه كلها قضبان مش كويسه وقطارات زباله وناس معندهاش وعى لاى استخدام فى اى حته
ده مش بيتشال ليه

السؤال الرابع


هقولكم عليه لما يجيلى التعليقات


كان معكم آبى هانم كايده العزال


حكمة الامبراطورة

اتلم الشبشب على الصرصار والاتنين بقوا من الابطال

تخاريف العيد والتنفيض


طبعا فى ظل الاحداث المؤسفه دي اللى بيهون عليا شويه تخاريفنا على الفيس بوك اهو بنهون على بعض شويه
واحده صديقه وبحبها جدا على الرغم من انى متشرفتش بيها شخصيا هى اصلا مدونه كتبت استاتيوس على الفيس بوك وقعدنا نعلق عليها عاوزه اوريكم بجد نموذج للست المصريه الفزيعه لما تقلب معاها بخفه دم وتخاريف ورغي وانها تدخل الخطوط فى بعضها ابطال الموضوع كنت انا وهى واتنين مدونين كمان هرمز لهم باول حروف اسمهم علشان الرقابه لو عاوزين يذكروا اسمائهم يبقوا يدخلوا بقى فى التعليقات يقولوا بس ركزوا فى طريقتها لاول مره من فتره بجد اضحك من قلبى والشغل عندي يسمع صوتى يمكن بقالى اربع شهور مش عارفه اضحك هجيب لكم الحوار
الاستاتيوس بتاعتها بدات بكلمه

والدنيا بتشتى والحمد لله مغسلتش الستاير
وادي التعليقات

اناعلقت وقولت
رشى ميه على الساتير وبعدين نشفيها بالسيشوار وبكده تبقى اتغسلت
هي
بالسشوار !!!!؟
:))))))))
بس انا كنت عايزاها كيرلى

انا
عملى بالسيشوار وبعدين هبعت لكى المكوه بتاعتى هى بيبى ليس اعملى بيها هتبقى تحفه
هي
طب مانا اعملها كيراتين اسهل وخلاص ...ولوماتعدلتش ...احلق للشبابيك وخلاص بقى بلا وجع دماغ
:-)


زميل تانى
وصلتني دي على التويتر امبارح: عندما يبدأ قرص الشمس في المغيب .... والنبي يا سعاد ماتنسي تلمي الغسيل من على الحبل

يكونش دي احلام شاعر واتحققت؟
هي
:))))
ده مكانش شاعر ...ده خبير ارصاد جوية مراته كانت غاسلاله البنطلون البيج القطيفة اللى بيلبسه على البلوفر الزيتى اللى جابه من عند اسمه ايه اللى فتح جديد ده ..اسمه ايه ده اللى فوق محل العصير وانت طالع من الميدان رايح تاخد المحور عشان تجيب العيال من المدرسة اللى قفلت فصلين لحد دلوقت ومش عايزة تدى باقى العيال اجازة مع ان اجازة العيد 10... ايام ॥والله مش بطالة المهم الشتا يهدى شوية عشان الناس تعرف تخرج تزور قرايبها ।قال يعنى حد بيروح يزور حد دلوقت ..الناس بقت وحشة ...ودك النهار اتنين اخوات لسه متخانقين لموا عليهم الشارع ..والشارع اصلا عايز يتسفلت مش كفاية البلاعة اللى سرقوا غطاها ...شفت الولد نام من غير غطا قوم جاله برد وخد الدوا على معدة فاضية اصل مكانش فى عيش وهو مصمم ياكل ساندوتش جبنة ..طب ماهو كان فى كورن فليكس ما كان ياكله وخلاص..ايه الدلع ده . هو لازم عيش يعنى ..صحيح لازم الناس تجيب عيش مقمر عشان الفتة بس بيقولوا ان سعاد عليها نفس فى الفتة ماشاء الله ...سعاد مين!!!؟ ...سعاد مرات الشاعر صاحبك ..لحقت تنساه ولا ايه

الزميل تانى
هو انا كان اسمي ايه؟
انا جيت هنا ازاي؟

زميله س
عسل يا ن صباح الفل
هى
مالك يا باشمهندس ..فى ايه !!!؟
صاحبك جوز سعاد هو اللى وصّلك لحد هنا وراح يشترى حاجة وقال جاى تانى ..استناه بقى وعلى ما ييجى حاحكيلك حكايته مع سعاد لما اتخانقوا وضربها بالألم قدام الناس ..راحت الناس اتلمت وسعاد طلعت تجرى فى الشارع راح خبطها توك توك ..ونزل بقا السواق واتخانق مع جوز سعاد ..وبالصدفة كان معدى جوز نادية راح مهدى الموضوع ونادية خدت سعاد عندها عشان تهدى واقنعوه يجيبلها ورد عشان يصالحها ..لكن سعاد دماغها ايه ..ابدا ما يصالحها بورد ابدا ..ليه يعنى هى مالهاش اهل ..لازم يتجاب ويتربى ..واخوها سعيد ايده طرشة وبيلعب بوكس وبطل النادى فى البنج بونج .بس هى جابت سيرته قدام جوزها وده قام اتنطط ..سعيد لأ سعيد لا حقك عليا وادى راسك يا ستى وادى ايدك وادى رجلك وماقولكش كان عامل ازاى ...قصره ..هى سامحته بعد ما باس راسها قدام الناس برده وحلفلها يجيبلها انسيال دهب زى بتاع بنت خالتها اللى اتجوزت مهندس فى البحر الاحمر ومرتبه شىء وشويات ..لكن طبعا ميسلمش مع القر ده كله ..رفدوه وراح اشتغل فى البحر المتوسط بس للامانة يعنى هو مرزق ..بيصطاد سمك وجمبرى وكابوريا بالصنارة كده من غير شبكة ..وبييقولوا انه لقا فى بطن سمكة كبيرة خاتم الماظ اداه هدية لمراته اللى هى بنت خالة سعاد .واول ما لبسته سعاد نقرتها بالعين التانية خدو جوزها يا عينى وشغال دلوقت فى البحر الميت ..قصره عشان ماطولش عليك كلمة منه منها وصلوا لخاتم دهب وحلق بدلاية عشان ترجع
معاه البيت
واذ فجأتن ....ان ان تشششش....
.........................
يُتبع
:-)

هي
.. تابعى الحلقات ....لا تقوليلى نور ولا مهند ...احنا معانا سعاد
وفى مسابقة فى نهاية الحلقات
:-))

صباحك ياسمين
:)

الزميله س
ههههههههههههه متابعه متابعه مش تقلقى
على امل الفوز فى المسابقة طبعا
:))

انا

ههههههههههههههههههه احمد
هيكره اسم سعاد ومش هيدخل عندك تانى
انا متابعه الحلقات كملى

هي
بقوا معنا يا بنات
والجوايز كتيرة
بس اتصلوا على
0900 5%&*#@$7999
وكل ما تتصلوا اكتر فرصتكوا فى الفوز تكتر
...
انتظروا السؤال فى نهاية الحلقات
...
فاصل
تامر حسنى
الستات بيشجعوا سعاد ..واحنا معاهم
مدينتى
لافاش كي رى

انا

هههههههههههههههههههه انتى عامله دماغ ايه

الزميله س
ههههههههههه انا حاسه برضه يا ابى
ياريت ن مش تبخلى علينا بالوصفه السحرية
ولا دى هتكون الجايزة؟؟؟؟؟

الزميل التانى
هه؟
وش فاتح بقه
هو الستيتس كان عن إيه أساسن؟

هي
سعاد كعادتها كتومة ..وغامضة كده ..سهنّة يعنى .. حاولت تعرف جوزها بيروح فين كل يوم بعد الغدا وبعد ما بيشرب الشاى وياكل الكيك او أم على او ام عباس ..يعنى اى حاجة حلوة والسلام اكمنه يعنى عنده السكر وبياخد انسولين ولازم يا...... ده مش موضوعنا ..المهم ابتدت سعاد تسأله بشكل غير مباشر يمكن يقع فى الكلام وتكتشف اى تناقض فى التفاصيل فتقفشه .. لكنه كان حويط... وعمره ما وقع بلسانه معاها ...حاولت انها تتجسس على موبايله عشان تعفأه مرة من افاه..لكنه كان دقرم وبيمسح رسايله اول باول ...النهاردة بالذات كان متشيك على غير العادة وراشش ريحة"يعنى برفيوم" فقررت سعاد انها تتنكر وتمشى وراه بعد ما يخرج علها تعرف مخبى عنها ايه ..لبست سعاد الباروكة الحمرا اللى كان جايبهلها معاه من اليونان ..وبالطو المخبرين ومنسيتش اهم حاجة اتعلمتها من الافلام العربى القديرة وهى انها متلبسش جزمة بكعب زى بتاعة نجلاء فتحى لحسن هو اللى حيعفأها من افاها .. فطبعا لبست باليرينا ودى للى ميعرفهاش جزمة فضى على الارض بتخلى البنى آدمة طايرة فى الهوا بتؤدى بحيرة البجع وهى رايحة السوق ..اه وطبعا ممكن الوان تانية .. لطفى كان حاطط شوية حاجات بجد تجنن .برده مش موضوعنا..المهم ..نزلت سعاد واقتفت أثره "حلوة اقتفت دى" لقيته قعد على القهوة اللى فى آخر الشارع فدخلت باب العمارة المواجه عشان تراقبه عن كثب "حلوة كثب برده" شافته بيطلب شيشة ..عادى الشيشة مسموحة ولا تدل على شىء ..وبعدها طلب سحلب ...برده عادى ..مادام معمول على مية بيضا ..لكنه اول ما طلب قهوة اتنرفذت ..لانه كان بيقوللها انه مالوش فى القهوة وكبسها يوم ما عملتله كابشتينو يا سونة ..وندمت يومها على علبة اللبن البودرة اللى جابتها مخصوص عشان كان عليها هدية ميكسر ..البتاع ده اللى بيضرب النسكافيه عشان يعملله فوم عالية زى بتاعة غسالة ام سيد ..وهى اصلا مبتحبش تشرب لبن نيدو وامها دايما كانت بتقولها لبن الجاموسة يخليكى عروسة ...فجأة جاله واحد على القهوة واول ما شافه قام جرى لدرجة انه مشربش باقى قهوته ..أخده ومشى ... جرت وراه عشان تلحقه واذ فجاتن
......
to be continued

الزميله س
ها وبعدييييييييييين
اذ فجأتن ايييييييييييه
لالالالالا انتى هتسيبنى كده على اعصابى كتير
انا مركزه مركزه عشان المسابقة

الزميل التانى
ألألألألألألألألألألألألأ
إذ فجأتن إيه؟ ها؟
أنا اندمجت ولازم أعرف ॥ عندي اجتماع كمان تلات اربع ساعة ومش هأستحمل انزل من غير ما اعرف ايه اللي حصل

هي

حيلكوا عليا ...ده انا باكتبلكوا بايد وماسكة الزعافة فى الايد التانية
...
قصره
...فاصل ونعود

احلى رنات ..واجدد اغانى منير "ماعدا طبعا اغانى حفلته الاخيرة مع الشاب خالد"

بريل قاهر الدهون ولمعان مضمون لشعر زى الحرير

محبى القهوة بيشجعوا سعاد واحنا معاهم

لا فاش كى رى ..برده

انا
عارفه لما تخلصى هعمل كلامك ده بوست عندى دا انتى مش ممكن
اهو ده رغى الستات بجد طول عمرى بسال ايه هو انتى قدمتيه ليه على طبق دهب

هي
وإذ فجأتن تنكفى سعاد على بوزها ...جاتها خيبة امال لو مكانتش لابسة باليرينا كانت عملت ايه .. فيجرى عليها الناس ويتلموا تحاول واحد ست تقومها . لكن سعاد استسلمت للوقعة وحبكت معاها تستعيد بعض الذكريات المؤلمة زى ما حصل فى المسلسل الخليجى بتاع الساعة 9... ..اللى فيه البطلة جوزها كان بيخونها وسرقها وضربها وهى مستحملة لحد ما جه اليوم اللى اللى كان سقعان فيه فلبس "اللكلوك "بتاعها عشان يتدفى وصحيت هى من النوم ملقيتش اللكلوك تحت السرير فمشت على الرخام الساقع "ماهم فى الخليج ارضيتهم جرانيت مش سيراميك طبعا" فجالها برد واعدت تعطس ..نزلت الدور التحتانى "ماهو بيت بدورين طبعا" لقت المحروس قاعد لابس اللكلوك اللى على شكل بطة بمبى وحاطط رجل على رجل وبيتكلم فى الموبايل .. فضلت تعطس على السلم طول ماهى نازلة واتدألجت فى اخر سلمتين لانها مرضتش تجيب دوبلير تقوم بالحركة مكانها وفى نفس الوقت مرضتش تقع من على 3 سلمات خوفا على السليكون من الصدمات ..ولما وصلت عنده بتزك فى رجلها راح حدفلها اللكلوك البطة وقاللها ايش هذى البطة الهبلة لا بتدفى ولا بتكفى ... وهنا افتكرتله كل حاجة وحشة كانت مستحملاها لكن عند البطة ولازم يقف ..كانت البطة البمبى هى القشة التى قصمت ظهر البعير فانفجرت بالبكاء واعدت تشد شعرها لحد ما طلع نصه فى ايدها ماهو كان صناعى لو ركبتيه مع الضوافر بتاخدى خصم ..وقامت مسكت فيه واعدت تخنقه وهى بتقوله ايش بيج يالرجال ايش بيج لحد ما كان حيطلع فى الروح لولا المخرج قال كت عشر مرات .. مرت هذه اللقطات امام عيون سعاد وهى ممددة على الارض زى اسمها ايه فى فيلم فؤاد المهندس لما كانت بتغنى شابا دابا دا ..الناس ملمومة والحلقة بتزيد حواليها ..ومن بعيد سمع جوزها وصاحبه الهرج والمرج فرجعوا تانى يشوفوا زى غيرهم فى ايه .. ولما وصلوا عندها ودقق فى ملامحها وقبل ما ينطق او يتكلم كانت بتؤدى دور البطلة ام سليكون بالظبط وبدون خروج عن النص وهى تردد ايش بيج ايش بيج .وبحركة بهلوانية فيها تمكن كانت واقفة على قدميها وماسكة زمارة رقبته بايديها ... بالكاد عرف ينطق وهو مبحلق عنيه ..شفت يا دكتور ان حالتها سيئة فعلا وبتزداد سوء ..مش قلتلك .. لكن الدكتور مكانش سامعه لانه كان بيطلب المستشفى عشان يبعتوله عربية واتنين متغذيين وقميص ابيض فى ابيض
....
تمت

الزميله س
اهئ اهئ كده تهون عليكى سعاد يا ن
كل ده عشان يتجوز عليها
رجالة ملهاش امان يا اوختى

هي
آبى .... يا لهوى بوست ايه ..لا بلاش فضايح ...دى آثار التنفيض ..بكرة ان شاء الله حابقى كويسة وزى الفل
بس اخلص اوض الولاد
:)(

س ..سعاد اصلا انا معرفهاش يا سوسو ....دى مش تبعى ..الباشمهندس احمد هو اللى جابها الستيتس ...
:))

هي
كمل ايه يا آبى ...تمت
وهو بعد ما لبست القميص وراحت لهنومة حتقوملها قومة المسكينة
:))

انا
هههههههههههههههههه قريت التكلمه
بوست تشريده فى الجون

هي
الحمد لله انى مش بنفّض كل يوم
:))

الزميل
أنا جيت من الشغل ولسه داخل الفندف أهو
أنا معرفش سعاد دي ولا عمري سمعت عنها .. ما تلبسونيش تهمة

سعاد اللي عندي كانت بطلة قصيدة شعر .. لكن سعاد الل هنا دي (سعاد المجنونة) أو (سعاد المهبوشة) مش هتفرق كتير .. ودي لازم تعدمة في ميدان عام رميا بالبراطيش
:-))

ودي كانت اخر حاجه افتكست قصه لاحظوا القصه بتحصل كتير من الستات لما تكلموها فى موضوع وتدخلك فى الف موضوع تانى ودي جزاء اللى بينفض فى العيد وهى جابت نموذج حي للابداع فىالقصص بجد وخفهالدم
انا بشكرها على الاستاتيوس دي اللى هلكتنى من الضحك
وكل سنه وانتم بخير يا رب

كان معكم ابى هانم بتنجانى رسمى فهمى نظمى من امام احدي صفحات الفتيس توك اللى بقى ادمان

حكمه الامبراطوره


احترس الخرفان عندها الفلوانزا القرون






ثقافه الاستهلاك


طبعا كله متوقع منى اتكلم عن اللى بيحصل بين مصر والجزائر
انا بس هلخص رائى فى جملتين اللى هيقولى عروبه وعرب واى استعباط هقوله مع الاسف
go fuck your self

اسفه اول مره اكتب كده بس دى الحقيقه وده شعورى
كلام علاء مش مضايقنى ومش معناه هنتخبه رئيس ولا هطالب بيه رئيس مبدئيا علاء مينفعش لانه رجل بيزنس ولانه كمان مش تبع الحزب وملوش عمل سياسى فبالتالى طبقا للماده بتاعت تعديل الدستور اللى فصلوها هو مينفعش فيا ريت نبطل اسقاطات هبله على الموضوع ده
بيتكلم بصفته مواطن مصرى عادى راح وانضرب فى اول الماتش اترمى عليه وعلى اخوه زجاجه فاضيه وانا شوفتها فهو اتهان كلامه مش وحش وميدنهوش ولا يخليه عندى الملك الاسد
الجزائرين لما يتكلموا عربى فعلا نبقى نتفاهم معاهم
موضوع المليشيات المنظمه ايوه فعلا ده حقيقى وبكلام ناس من السودان ان فعلا كان فيه طيارات جيش ومش علشان بنكدب حكومتنا دايما يبقى اصدق اى هطل فى دماغى وانهم كدابين فى كل حاجه
خطاب الريس متقال عجبنى وبناء عليه هديله رغيف فينو كل يوم الصبح وعلشان خاطر ياسر صديقى هديله حته جبنه نستو معاه

نيجى بقى للموضوع المهم اللى عاوزاه
احنا فعلا معندناش ثقافه استهلاك فى اى حاجه كل واحد يقولى لما بيمسك رغيف عيش ياكله بيفرفت منه قد ايه ويرمى قد ايه
استهلاكنا للمناديل حتى بنستخدمها ازاى يعنى واحد عاوز يمسح ايده يشد من الرول حته كبيره جدا ليه مش عارفه مع ان الحته الصغيره هتفى بالغرض
الميه واحن بنعمل حاجه ليه على طول سايبنها مفتوحه
حتى الاكل بنعمل كذا صنف واحنا مش محتاجين كل ده وفى الاخر الاغلبيه بتترمى
وعلى فكره الموضوع منطبق على غنى وفقير شوف بواقى الاكل وطريقه الاكل من ده وده يعنى واحد طاقته رغيف فى الفطار يحط هو واسرته كتير ليه ويرمى الباقى ويروح يشترى كل يوم وهو عنده بايت
قيسوا على ده كل حاجه فى حياتنا كله ملخبط وكله استهلاك غلط وعلشان كده مش عارفين نعيش ولا هنعرف



كان معكم ابى هانم من امام نفق العروبه


حكمة الامبراطورة
قليل العقل فكر كل الناس غبيه


خلص المولد


خلاص خلص المولد وانفضت حلقات الذكر وراحت العروسه الحلاوة
استفدنا ايه بقى

قد ايه عندنا ناس بتحب التسخين
قد ايه عندنا رد فعل أوفر فى كل حاجه فى حياتنا تكون تافهه مش حاجه قويه
قد ايه عندنا فراغ فى العقل علشان منعرفش نتحكم فى تصرفاتنا ونصدر مشاعرنا
قد ايه الغرور وحش اوى
متفرحش اوى علشان متتقهرش اوى لان ربنا لما بيعوز حاجه ولا انت ولا غيرك هتعرف توصلها طالما هو مش عاوزها مهما عملت
مفيش حاجه اسمها وحده عربيه دى خدعه كبيرة وحلم كان مع عبد الناصر ومات معاه وهو تقريبا كان بيحلم كتير الله يرحمه
السادات كان اكتر واقعيه فى التعامل مع الوحده العربيه
مش عارفه ليه مصممين نعمل جامعه دول عربيه لو علشان اللهجه بتوع الخليج والجزائر وليبيا وتونس والمغرب بيفهموا بعض عننا
بمعنى انا لو مسافرتش بره صعب افهم اللغه بتاعت الناس دى
هما بيفهموا بعض كويس
طيب ليه منعملش وحده فريقيه حتى دول افريقيا غلابه زينا كده وعندهم قرود زى بتوع الحزن الوتنى وانا عن نفسى بحب القرود
ايه المشكله يعنى
انا مصريه مش عرب ومش عاوزه حد يقولى المصريين عرب لا احنا مش عرب لو عرب كنا فهمنا بعض على الاقل
على فكره مش الشعوب بس اللى بتكرهه بعض احنا بنكرهه بعض وعندنا عدوانيه ودمويه فى الكلام ملهاش حل اتفرجوا على خناقه اتنين مع بعض وانتم تعرفوا على اى حاجه
بس انا خلصت اللى عندى

ملحوظه : انا بتفرج على الماتشات بس انا معنديش اوفر فى التصرفات ولا المشاعر علشان بس محدش يستغرب وابص الاقى حد متهمنى بأنى تبع اسرائيل ولا حاجه بما انها الشماعه الخايبه اللى بنعلق عليها دايما فشلنا


كان معكم ابى هانم بتنجانى لواء اركان حرب مدرعات عالم سمسم


حكمه الامبراطورة

لا تعايرنى ولا اعايرك ده الهم مغطينى وطايلك

مبروك على ايه ولا ايه


مش عارفه قبل الماتش كله كان فى احاله احتقان وشتيمه وقله قيمه وقله عقل لا يرثى لها سواء من مصر او الجزائر
بعد الماتش كله بيقول مبروك والجيران بيزغرطوا والناس بتهلل فى الشارع والعربيات اتكسرت واتنين ظباط بيفكوا خناقه اتخبطوا بعربيات بسبب الماتش

مبروك على ايه هى مصر مبقاش فيها حراميه
مبروك على ايه هى مصر الريس بتاعها اتغير
مبروك على ايه هى مصر حلت مشكله البطاله خلاص والفقر اللى فيها
مبروك على ايه نزول الاسعار ورجوع الحاجاه رخيصه
مبروك على ايه قله عدد حاله الاغتصاب اللى بقت كل يوم فى تزايد رهيب
مبروك على ايه على اننا مبقاش عندنا زنا محارم ولا اغتصاب اطفال دا الموضوع بينه طلع موضه وانا نايمه على ودانى
مبروك على ايه شويه الرعاع خريجى العباسيه اللى بيشتموا فى الاشرف منهم اتلموا وراحوا فى داهيه
مبروك على ايه مصر خصبت يوارنيوم
مبروك على ايه هو احنا مبقاش عندنا عشوائيات وبقينا شعب محترم

لما كل ده يحصل يبقى يجى حد يقولى مبروك
لما تلاقوا شقق تتجوزا مش لعيبه تاخد ميليارات ابقوا قولوا ليه مبروك
لما البلد دى تنضف من الاشكال الضاله اللى فيها ابقوا قولوا مبروك واخرجوا ملط فى الشارع


على فكره مش عاوزه حد يسفسط عليها ولا يقولى الفرحه ولا الفرخه مليش فيه الكورة لا تعنى شئ ليه غير انها البانجو الرخيص والسجاير الكليوباترا اللى بيدارى الناس فيها خيبتهم
بانجو علشان مخدر والسجاير لانها رخيصه بس اهو اقرع ونزهى


حكمة الامبراطورة

أكل فول و أخرج قفاي عرض و طول و لا آكل كباب ووقفة الديانة ورا الباب

Share |