كل سنه وانتم طيبين

ودي راس البر اللى تعتبر تاني مصيف كنت بروح فيه ساعات بعد الاماكن التانيه مع بابا واخواتى وانا صغيره البلد بقت حلوه اوي اوي


شرم الشيخ واللى فوق الكافيه اللى فى الاوتيل اللى كنت فيه والبلاج ده بتاع الهضبه مكان هايل وتقدروا تشوفوا فيه السمك وهو بيعوم بس لازم تلبسوا حاجه فى رجليكوا علشان الصخور وتشوفوا السمك الملون الجميل
الكافيه للى عاوز يشرب شاي وشيشه ويقعد فى جو كانه فى الاقصر واسوان الهضبه بقى للى عاوز يعوم جهزوا المايوهات يالا


العين السخنه وفندق مارينا وادي الدوم مكان هادي وكلاس اوي وسعره حلو ممكن تاخدوا داي يوز فيه بس
البى سين اهو يالا نطوا واللى زي حالاتي بيغرق على حرف كنكه يمسك فى السور


الاسماعيليه بلد الحبايب كلهم ومن اكتر الاماكن اللى بزورها على طول ولما بكون متربسه دماغي فى حاجه وسايبه خرفانى على الناس لان المشوار ساعه من القاهره
الحب تيرررررررارررررر وتحت الياسمينه

الساحل الشمالى والقريه اللى كنت فيها صوره الشاليه وصوره من البلاج
فيه بى سين فى القريه والجاردن بتاعت الشاليه تجنن وفيها مرجيحه مين جاي الدور بعشره جنيه فى المرجيحه تخفيضات هههههههه



قولت اجيب لكم الاماكن اللى زرتها وليه فيها اجمل الذكريات فى حياتى على فترات ورا بعض علشان تروحوا معايا حتى بخيالكوا فى ظل الظروف ال.احم احم بلاش نكد فيه اماكن بره مصر بس مسحبتهاش اسكنر قولت بلدي حلوه وشوفتها بعيون حلوه بس نحافظ عليها

كل سنه وانتم طيبين وحلوين وبتحبوا بعض كلكم ويا رب تبقى اخر عيد على اللى فى بالى قولوا ااااامين هههههههههههههه

اشوفكم بعد العيد بقى



كل صوره تحتها اسم المكان

كان معكم الرحاله ابن بطوطه ابى هانم

الماس الكهربائى والعقلى


والله ما كنت ناويه انكد عليكوا بس ده مش نكد دول شويه اخبار موتونى من الضحك بجد الخبر الاول ده انطح هنا

وبيقول انه تم تعيين اول مأذونه وكمان فى مدينه القنايات اللى ميعرفش المدينه دى بلد صغيرة جدا بعد الزقازيق على الطريق للمنصورة ودى قريه والست المأذونه بعتت جواب شكر لطنط سوزى علشان المجلس القومى لحموم المرأه ساعدها واخد بتارها من برعى المفش واداها حق المأذونيه طيب بالمرة كان نفسى اقولها ابعت لها جواب شكر على الستات اللى بتضرب من الظباط بتوع الدويقه والستات اللى بيتحرش بيها كل يوم فى الشوارع والاطفال اللى بتموت فى ابو الريش علشان يبقى جواب كدب كامل وخيبه بالقوى طيب سؤال برئ خالص مش كتب الكتاب لازم له اشهار فى المسجد فى الميكرفون استنوا بس سيبكوا من صوت المرأه عورة والحركات دى مليش فيها الاهم بقى مش الستات ساعات يعنى مش بتصلى وبتوقف صلاتها فى بعض الايام فى الشهر طيب والنبى الحجه المأذونه دى يعنى هتروح الجامع ازاى ولا هتقولهم استنوا اربع خمس ايام ههههههههههههههههه اه على فكره فى القنايات وهى من المدن او الفلاحين زى ما بيقول الاشهار بيكون يا فى المسجد يا فى النادى بس غالبا المسجد ده عرف فى بلاد الفلاحين او المدن غير القاهرة ايون انا ضد ده انا مع الست تاخد حقوقها فى حفظ كرامتها وفى الحفاظ على كيانها ودورها بس يا بنتى دورك مش هيبقى اكتمل الا لما تبقى مأذون ده ايه تخمه المخ اللى عملوها للناس دى

الخبر التانى الماس
انطح هنا


تانى مرة والمتهم الماس الكهربى طيب ما يجبوهها على بلاطه ويقولوا احنا عاوزين نجدد البلد وننظفها ونعملها على طراز حديث علشان كده بنولع لكم فيها عادى احنا مش زعلانين
او حاجه تانيه يشوفوا ايه مزعل السد العالى مننا ويقولوا له حق علينا علشان ميعملش ماس ويراضوه شويه والكدب المنعكش بتاعهم اللى مبقاش له حل والوزير المنعكش اللى طالع يقول اى كلام بس الراجل معاه حق انتم شعب خايب ولا عارف يموت غرقان صح ولا عارف يتحرق صح ولا عارف تقع عليه صخور صح اتعلموا بقى متقرفوش الناس زهقتوهم بجد الا صحيح هو ده مكنش فيه انذار هو كمان يشتغل اتوماتيك طيب انا قولت بعد ما المجلس اتحرق وبقدرة قادر بقى عباره عن مركب فى النيل هههههههههه من كتر الميه قولت هيأمنوا الباقى بس واضح انى مش فاهمه ان شاء الله هيأمنوا باقى البلد بعد ما تولع ويخفوا عدد السكان

كان معكم رئيس نشره الاتحاد الكهربائى للسد العالى الشيخ مأذون أبى هانم
حكمة الامبراطورة
دور القرد فى دفاتره
مالقاش الاشفاتيره وظوافره

تزامن متزامن للتزامن

الصوره دي من الطريق بتاع شارم برضه بالكام بتاعتى

ايوووون هو ده التطور الطبيعى فعلا للاعلانات

حاجه غريه جدا فى الوقت اللى نزلت اعلانات عدم استغلال السائح النائح فى مصر يحصل خطف 11 سائح من مصر وكمان عن طريق ناس غريبه من السودان

والاعلانات مستفزه جدا يعنى بلاش تتحرحشوا بالسياح وماله حلو برضه

وبلاش تنصبوا على السياح وتغشوهم والله كلام جميل مقدرش اقول حاجه عنه

طيب واولاد البلد ولا اولاد عزبه الحاج ابو عوكل مش مهم يعنى بتقولوا للشباب بنات بلدكوا اولى بالتحرحش

ولا ماشين على مبدأ اننا لو اتحرحش بينا حد هنديله بابو ورده

طيب والله انا واحده من الناس لو حد عمل كده مش هلحق اقلع حاجه من رجلى اعمل ايه اشيل نطوه قرن دونكي ولا اشيل شبشب احتياطي فى الشنطه فكره

وتبقى ادوات البنت من هنا ورايح عدد واحد شبشب بورده قابل للتجديد ويستحسن نوع رخيص علشان يوجع وابعدوا عن الصينى

عدد واحد نطوه قرن دو نكي او رجل دونكي شغاله فى الرفس

عدد واحد سيلف ديفنس وارد ماماامريكا وتتاكدوا انه مش وارد الصين ولا الداخليه علشان مغشوش ههههههه

عدد اتنين قنبله وارد حاره اليهود لزوم تفجير الاخ اللى بيعاكس

عدد واحد حبل غسيل محترم لزوم ربط الاخ اللى هتسول له نفسه بالتحرحش

اصحاب العربيات زي حلاتي

عدد واحد كوريك رفع هواء

وواخد مثلث عاكس علشان الخناقه متقوفش الشارع مش ناقصين مخالفات ولازم تضمنوا ان اللى هيتفرجوا ميصوروش البنت وهى بتاخد حقها ولازم البنت تلبس كويس علشان مش يتلبخ فى رجلها وينسى يصور باقي الخناقه ههههههه

وبكده تتغير ادوات التجميل ومنبقاش ليلى ابسطوا بقى

اما عن الاستغلال

هما مجمدين قلبهم وعارفين اانا بندوحر فى الفصال ومشهورين بيه

بس الادوات بقى للبنات اللى زي كده واساسا ملهومش فى شراء الخضار

عدد واحد ملايه لف لان الباعه بيتمنوا بضاعتهم على حسب ليس الانسه اللى واقفه

عدد واحد لبانه تطرقع علشان يعرف اننا من مناطق شوعبيه علشان يبقى متوقع ان اللى قدامه هطرقع له

بجد انا مش فاهمه طيب ما تعملوا حمايه وتزود عدد الظباط والامن فى الشوارع ومش كمان كده يا ريت تقوموهم انهم مش يعاكسوا الاول ههههههههه

وجهاز حمايه المستهبل ده مش وظيفته هى دي

ولا وظيفته يحمونا زي الحكومه الرشيده النظيفه بالليفه والصابونه

نيجى بقى لفضيحه الخطف الناس دي اتخطفت ازاى يعنى لو عن طريق سفاري ليه مش بيامنوا الاماكن دي كويس ويتعاونوا مع البدو وبلاش يعادوهم ويقرفوهم اتاوات وحركات

علشان الناس دي محدش يقدر ياخد منها حبايه رمل

لو ادت الامان او وعد اكيد فيه بجد اتفاق ما بين دول ودول

وبعدين التانين دخلوا وخرجوا ازاي والامن فين ولا دخلوا عن طريق مترو الانفاق زي الانفاق اللى عمالين يكتشفوها دلوقتى ما بين مصر وفلسطين مع العلم انها ممكن تكون بقالها سنين كتير لانها مش بتتعمل فى يوم وليله

طيب الامن كان فين نايم ولا مشغول مع الجو فى التليفونات ههههههههه

فى النهايه مش عارفه ايه ارتباط ده بده بس ماشاء الله كل ما يعملوا اعلان اهبل عن حاجه تحصل على طول والله سرهم باتع ومكشوف عنهم الحجاب

راي اللى هيضر فى الموضوع ده كبيره مدير الامن وكام قياده عمرهم ما هيجوا ناحيه اونكل العوادلى بتاتا البته


كان معكم لواء امين شرطه برتبه عقيد اول متقاعد مباحث ومقافل قمل الدوله أبى هانم ومن غير الزواوي


حكمه الامبراطورة
تغيب غيبتك وتجي بخيبتك

تعلمت من الازمات



الاسبوع اللى فات كله ملخبط معايا مش عارفه ليه احداث غريبه كل حاجه بحمد ربنا عليها ومبقفش عند حد الحدث بحاول افكر فى اللى وراه والحكمه منه وايه اللى اتعلمته هقول لكم الاحداث وكمان اتعلمت ايه
اولا موضوع قرينى
===============
اثبت ليه حب الناس وفهمه الصح ليه وعدم تصديقهم لحد حتى اللى ميعرفنيش ودايما زي ما قولت له الالماس مش بيتزور يا زواوي هههههههه لان لازم المظلوم ربنا يبين حاجه توضح الظلم ده وهو انه ميعرفش يخدع الناس علشان بروفايلى قديم من 2007
اتعلمت ان مهما الاساءه جت ليه لازم اقابلها بابتسامه وود ممكن يكون اللى قدامي فهمنى غلط بالتالى اقدر اوضح له
علمنى اتمالك غضبى وارد عليه من قلبى وممشيش ورا شتيمت اللى قدامي ليه وان ربنا له جنود بترد علشان المظلوم

ثانيا سفر دمياط
===============
اليوم ده اللى كان مش ممكن انا سافرت مع اختى اختار لها فرش البيت لها من هناك علشان هتتجوز عقبالكم يا رب
بدأ اليوم لما صحيت الساعه 6 ولقيت شتيمت الزواوي ليه وتقبلتها بصدر رحب
وصلت دمياط ركنت عربيتى ونزلت اتفرج على الحاجات طلعت لقيت فانوس عربيتى اليمين مسروق اه والله هههههههههه قعدت اضحك مع ان بطوط كان شكلها احول خالص ههههه بس صالحتها وكملت اليوم ورحت اشتريت واحد تانى ليها
خلصنا واتعلمت انى متخدعش بشكل الفرنتشر الحلو الاهم الخشب يا رجاله وكمان عنيك بترتاح لايه فى الفرش مش الموضه ايه لان ده حياتك بعدين

الحدث التالت
=============
قررت اكمل اليوم فى راس البر بعد ما صلحت عين بطوط ههههههه اول ما دخلت على البوابه بطوط حلفت ما تمشي وقف التاكسي ليه وقالى هجيب لكي ميكانيكى
الدمايطه جدعان والله جاب الميكانيكى قالى ده سير كاتينه واختكم ولا تفقه شئ فى ده هههههههه
المهم استنيا حاجه تشد بطوط ملقناش زقيتها لغايه الميكانيكي وكانت طيبه وخفيفه اوي والله ومحستش بالصيام رحت اجيب السير الناس ساعدتنى والتاكسي رجع معايا دمياط وجبت السير ووصلنى للميكانيكى
وسبت له بطوط ورحت قعدت على اللسان او البحر للناس اللى متعرفش اللسان
والميكانيكى جاب ليه العربيه بعدها بساعه وطلب خمسه وسبعين جنيه وانا هنا الفرامل بتاعتى اللى فلتت قولت له ليه حاجه تعملها فى ساعه تاخد كده بعد الفصال اديته خمسه واربعين جنيه ولما مرضيش قولت هاتهم وروح اشتكينى فى القسم وخد رقم العربيه معاك
اتعلمت انى مش علشان بنت اسيب حد يستغل ده وانى مش من البلد فاخاف وعلشان مزنوقه اطاطي
كلا البته لست انا هذه المراه يا محسن ههههههه
واخدت حقى وسممت ودانه بالفلوس لانه ميستحقهاش كلها ههههههه

الحدث الرابع قدام البحر
======================
انا مش بتاعت نحنحه واقول للبحر اسرار وافكار ده كلام مسلسلات قديمه انا بصيت للطير وهو بيجري وارا مراكب الصيد ومصمم ياكل من اللى بيرموه وقد ايه منظم وفى اسراب
الصيادين وتصميمهم انهم يسعوا على رزقهم على الرغم من تقلبات البحر اللى على طول وغدره بيهم ساعات بس رزقهم وتوكلهم على الله اداهم قوه عجيبه
فرحت بيهم وبشكلهم وعملهم الجماعي
الصخور ورغم تخبيط الموج وترزيعه فيها اوي ولكنها صلبه وبتحاول تحتضنه بكل قوتها ومش بتتحرك برغم من قوته فى الاندفاع
علمنى انى اكون اهدي مهما خبط فيه الزمن وابقى صلبه مع ده احتويه لان الثائر لابد له انه يهدي

اليوم مش خلص قررت الرجوع
=======================
بعد الفطار على البحر وفى الهدوء الجميل
قولت امون العربيه نزلت وفى ايدي موبيلى التانى نسيته فوق سقف العربيه ومشيت وقع وبعد خمسه كيلو افتكرته قعدت ادور ورجعت تانى احساسى ان اللى فى البنزينه مش هو اللى خده طلع صح قعدت ارن عليه ولقيته على الطريق وانا ماشيه على رجلى

بعد كل ده خلص اليوم وخلص الاسبوع
طلعت بايه من كل ده
===
ان الواحد طول ما بيحصل له حاجه اولا يحمد ربنا عليها لانه اكيد يا بيمحي ذنوب عنه يا بيقويه يا بيديه حسنات

ان الحوار واحتواء الغير والصبر حلو

انى مش اسيب بطوط لوحدها ابدا هههههههه
ان شاالله اربطها فى ايدي او قى الشنطه
ان الازمات بتثبت حب الناس من كرههم

ان الطبيعه اللى ربنا خلقها بتعلمنا كتير غير اننا نقف عند حدود سبحان الله وبس لازم نتعلم ونشوف الحكمه منها

انى بحب البحر مش علشان احكي ازرار ولا عراوي لا علشان بتعلم منه قوته

ان النحله والدبور مبيهدوش حتى فى مناهده الميكانيكى والفصال ومصممه انى اعرف ايه سبب معرفته عيب العربيه من غير ما يفكها هههههههههه
والاغرب انى كنت فاكره انى مهتميه ببطوط لقيت ثقافتى زيرو معاها هههههههههههه
اتعلمت انى مخافش علشان فى بلد تانيه انا اعرف اخد حقى فى اي مكان

ان مينفعش انزل فى البنزينه وفى ايدي الموبيل بعد يوم تعب وانى امشي ورا احساسى فعلا لانه دايما بيبقى صادق

الصور اللى فوق دي انا صورتها على البحر والله انا رايقه رغم كل اللى انا كنت فيه وبرضه بضحك ورايقه ههههههههههه

ان الناس فى مصر لسه طيبين وانى مش ليلى ههههههههههههههه خالص انا برعى المفش ههههههه
بعد اليوم ده جاتلى مكالمه من اهم انسان فى حياتى وحسيت براحه كبيره اوي وهو بيكلمنى واطمئنان غريب ربنا ميحرمنيش منه ابدا

ملحوسه كونوسه:- كل الناس اللى سالتنى عن انى افتكر ده مين بقولهم والله ما اعرف انا مليش اعداء وحتى لو حد مضايق منى معتقدش انه ممكن يكون للدرجه دي من الاذيه بس بقوله زواوي والله انت ابن حلال لانك عملت فيه جمايل مقدرش اعدها ولو انت حد انا زعلته بدون قصد متزعلش حقك عليا وميرسي ليك بجد


كان معكم أبى هانم حوادث من كوكبها وخرفانها وكمان قرينها ههههههههههههه

تحذيررررررررررر

تحديث:- يا جماعه البيه نقل الكلام والصوره زي ما توقعت عموما فيه فروق تانيه مش هيعرف يعملها يعنى هتلاقوا البروفيل بتاعى من ديسمبر 2007 وده مش هيعرف يعمله هو البروفيل عنده من غير مدونات انا عندي تلاته بيكيا وابى بلانيت وفرنسا والرايق والضاحكون
يا جماعه فيه واحده ولا واحده حقيرة مش متربيه
عاملين اكونت باسمى
الاول اسمه appysaid
وده على موقع
typekey
والتانى معمول باسم appy
بس على جوجل وداخل يقول كلام مش كويس عند كل الناس
هو من غير صورة وحتى لو سرق الصورة وحطها ارجوكم قبل الرد على الكلام ابقى اضغطوا على الاسم شوفوا هيجبكم على المدونة بتاعتى لو كده يبقى انا
لو وداكم على بروفايل او اكونت بس مقفول يبقى مش انا وهو ده اللى بقول لكم عليه
ارجوكم خلوا بالكوا وانا ولا هعبره بس مش عاوزة حد يزعل منى
وهسيبه هو وغيره يهرى وياكل فى نفسه
لما يزهق وانا مش هعمل ليه اى اعتبار بس اللى يرد عنده يبقى برضه يمسح تعليقه وميردش عليه
الله يخرب بيت النت ابو بلاش اللى لم شويه حشرات ضاله علينا
وحسبى الله ونعم الوكيل فى الحاقدين واللى جواهم غل
وبعتذر لخيخه وسووو وانا جعان علشان هو راح شتم وقل ادبه عندهم
البوست اللى تحت عادى موجود للى عاوز يقراه
اه على فكره انا بشكره برضه او بشكرها علشان انا كده بجمع حسنات كتير



الشوبينج وسنينه

تحديث تانى :- القذر اللى عمل الاكونت باسمى عمل برضه على جوجل ودخل يشتم الناس فى مدوناتهم ارجوكم قبل اى رد او ظن اضغطوا على الاسم شوفوا انا ولا لا يعنى هيوديكم على المدونه عندى ولا لا لغايه لما نشوف حل وربنا يرحمنا من الحشرات دى وهو مش مستخدم الصورة بتاعتى بس عادى ممكن يستخدمها فخلوا بالكوا امسحوا التعليق وبس


تحديث :- يا جماعه اللى يدخل يقرا تعليق نواره نجم عندي جبهة التهييس الشعبيه لان فيه صورصار او حشره بيدخل
باسمي وواضح انه عامل اختلاف بسيط طبعا انتم عارفين اسلوبى انا مش بشتم حد ولا قليله ادب خلوا بالكوا لغايه ما ابعت لجوجل واشوف ايه الموضوع نواره هتقولى على الاختلاف فى ايه وهقول لكم بس اقروا تعليقها بليزززززربنا يكفيكوا شر الحقد والغل وعدم التربيهالاسم بتاعه appysaidهو مش على جوجل على موقع تانى طبعا هتعرفوا لما تدخلوا عليه
هتلاقوا تعليقه فى البوست عند نواره بوست باسم
عبله الكحلاوي تعليقه قبل هرطقه على طول هو عامل اكونت علي موقع اسمه
typekey
مش عاوزه اقولكم الادمان بتاع الشوبينج عامل ازاى عندى وعند ناس كتير...... انا ساعات مش عارفه بشترى ايه بس المهم انى اشترى اه هى بتبقى حاجات مفيده بعدين بس ساعات فى نفس اللحظه ملهاش اى لازم ومن هنا دار الحوار بينى وبين الخروف البمبى بتاعى اللمض اللى فوقنى لحاجات كتير

آبى :- ام انا هنزل اروح مترو اشترى حاجات ليه للبيت عاوزة جبن وعصير وفول نفسى اكله (والله مش تناكه بس انا عندىالقاولون ومش باكل الفول غير يمكن مرة فى الشهر )

خروفى البمبى :- ايون الزمبلك اشتغل هو انتى مضايقه من حاجه ولا النحله ووالدبور بيزنوا فى دماغك

آبى :- لا ليه وبعدين زمبلك ايه دا حتى البطاريه نايمه يا رخم ههههههههه

خروفى البمبى :- ما انا عارف مش هتنزلى الا لما تكونى مضايقه وبعدين تعالى هنا جبنه رومى ايه ما عندك علبه جبنه فى التلاجه لسه متفتحتش وفيه مربى وقشطه و...... حاجات كتير
انتى بتنزلى تجيبى حاجات وانتى عندك وغير كده اللى فى التلاجه مش بتستخدميه وبيبوظ وبترميه كمان طيب بتشترى ليه مش قولت لكى الزمبلك اشتغلك ههههههههههه

آبى :- طيب اتلم آه صحيح والله يعنى انا بعمل كده ده وناس تانيه مش لاقيه تاكل ونايمين فى الشارع فعلا ساعات مش باخد بالى طيب منكن اجيب عصير بس

خروفى البمبى :- نيله عليكى وعلى ايامك انتى يا بنتى مش عندك تباع ده اخو الكركاديه تمر هندى اللى جالك من اسوان وانتى بتحبيه ما تعملى لا هو كسل وخلاص وهيعدى رمضان ولا هتخلصيه وبرضه هيلاقى مصير كل الحاجات ويترمى

آبى :- آآه يا ضميرى انت صحيح دا حتى غلبت لغايه ما عرفت اعمله والله باين اللى كان جايبه ليه عاوز يعذبنى او يعلمنى طرق الوقوف فى المطبخ لانه عارف انى خيبه ههههههههههههههههه

خروفى البمبى :- بصى بقى يا صديقتى انتى فيكى عيب بس هقوله من غير ما تنطحينى .لاااااااا مش اقصد دا انا اللى بنطح
انتى بتشترى حاجات كتير ملهاش لازمه والتلاجه الحاجات فيها بتبوظ فى وقت بجد ناس تانيه مش لاقيه لقمه العيش شوفتى بتوع الدويقه مرمين فى الشارع وغيرهم وغيرهم
عارف مش هتقدرى تاكلى مصر كلها بس خدى عبره من اللى قدامك ربنا هاييحسبك على ده

آبى :- تصدق انت وجعت ضميرى اللى منيماه فى الفريزر ده انا فعلا بجيب حاجات ملهاش لازمه او كماليات وممكن بفلوسها اساعد حد تانى حتى الاطفال المرضى ممكن دواء بخمسه جنيه ينقذ طفل والخمسه جنيه دى ولا تعنى ليه حاجه
بص خلاص انا هلم نفسى واربطها فى رجل الكنبه بدالك ههههههه واعاقبها خلاص

خروفى البمبى :- طيب كويس يعنى مش هنفقد فلوسنا بقى فى برفانات وميك اب ولبس بران نيم وهناخد بالنا ان ممكن بحاجه واحده تساعدى الناس التانيه

آبى :- أأأأن ان تشششششششششش لا بص اهو ده اللى مقدرش انا ممكن يعنى اتنازل عن حاجه انما فيه حاجات لا وفعلا ده عيبى انا بحب كده اعمل ايه وبحب اللبس والبرفانات والميك اب
يعنى انا ممكن ارشد الاستهلاك شويه انما مش احرم نفسى وخاصه اتعودت
انت رحت فين مش بترد الله انت اغمى عليك تانى اممممممممممم طيب ارش عليك برفان

خروفى البمبى :- لا انا فوقت لوحدى خلاص برفان لااااااااا كلنا فينا عيوب بس لازم نسيطر عليها لازم نحس بالم غيرنا وفى نفس الوقت منحملش نفسنا فوق طاقتنا احنا لما بنعمل حاجه بنعملها علشان ربنا مش علشان حد يقول دى هايله
فخليكى وسط وارحمى وسطى وانزلى من على ضهرى انا فسحتك فى الشقه كلها اوعى بقى اقولك روحى هاتى شاى بالتفاح اشربيه هههههههههههههههههه

ومن كل اللت والعجن ده طلعنا بايه لا يا خفه مش رغيف عيش ههههههههههه
محدش يصاحب خروف بمبى لانه هيفضحه فضيحه حرامى الغسيل ههههههههههه
ان كلنا فينا عيوب وساعات شهواتنا فى الشراء بتنسينا حاجات تانيه وناس محتاجه مش بقول ميبقاش فى بيوتنا اكل ولا شرب لا يبقى فيه بس الضروريات مش حاجات تتجاب وتترمى
انا بجد فيه العيب ده بس الحمد لله بعد كذا مكان روحتهم وشفت حالات الناس بحاول اغير نفسى
الحاجه التانيه انى فاقده السيطرة تماما فى موضوع البرفانات واللبس والنظارات ده هوس ونفسى اعمل برضه كنترول عليه وهحاول
انتم بقى حد جاى وهينضم ليه وهياخد باله ولا لا
ومش كده وبس ونقول لاهلينا فى البيت كمان ويبقى فى كل حاجه وتبقى فكرة تبدأ من وسطنا اهلينا واصحابنا
يا ريت واللى يعرف يقدم نصيحه لمرضى الشوبنج يقول وهنيالك يا فواعل الخير
هئ هئ هئ هئ

كان معكم محاور اول لواء متقاعد آبى هانم فى حوار مباشر من القاهرة الجديده مع خروفها البمبى

حكمه الامبراطوره

الله يعين الراجل اللي يوقع بين يدين المرأة ولسانها

واجب شكر ..وواجب تطليع لسان


صباح الخير انا مش عارفه اكتب ازاى لاول مرة بجد بس انا عاوزة اشكر كل الناس اللى جت امبارح فى ابو الريش لان انا مكنتش متوقعه العدد ده احنا كنا فوق الستين شخص كلهم ناس بيجمعهم خير وبيجمعهم حب لبعض ولا حقد ولا كرهه ولا منظره كل حد ساهم بالقليل والكتير وبالمجهودات اللى خلانى بجد مش قادره اعبر عن سعادتى الناس اللى من بره التدوين ومن المدونين خالص وجت لهم الانفتيشن على الفيس بووك البنوته الجميله ساجى برضه جت لها من على الفيس بوك و مدام ايناس وعمر ابنها اللى عنده 12 سنه وبعتوا لنا ميلات واتصلووا وجولنا المستشفى كمان وساعدونا وعاملوا مجهود كبير والناس اللى جت من بورسعيد واللى من كفر الشيخ واللى من العريش واللى من الزقازيق واللى بعت من الغردقه احمد ربنا يكرمه بجد انا مش عارفه اعبر لكم عن شكرى فى الموضوع ده حتى فى المستشفى كانوا مبهورين بينا وخاصه اننا مجهودات فرديه مش جمعيات ولا عاملين شوو اعلامى ولا عاوزين فرقعه ولا برنامج يستضيف حد فينا كل اللى كنا عاوزينه اننا نساعد الناس اللى هما اهلينا وفعلا حالتهم صعبه اطفال حالتهم توجع القلب وحالتهم من غسيل كلوى وقلب مفتوح وعمليات مخ واعصاب الناس دى محتاجه اللى يتوجهه لها جامد ويساعدها اليوم كان حلو بس انا كنت حطه ايدى على قلبى علشان مش عارفه مين اللى جاى حتى فى المستشفى اتخضوا من العدد وقالوا احنا كنا فاكرين خمسه سته اللى جاين بس الحمد لله كنا منظمين وطلعنا مجموعات كل مجموعه ماسكه شنطه الهدايا اللى جبناها وقسمنا فيها الحاجات اللى جبناها وكمان كل واحد خد ظرف فيه مبلغ مقسمينهم بالتساوى وكل واحد مننا ادى لطفل صغير الظرف ومعاه شنطه الهدايا والحلويات علشان بس ميطلعش صورصار ولا حشره زاحفه يتكلم ويقول خدتم الحاجات ولا بنتبرع بفلوس غيرنا احنا كلنا شاركنا ومش محتاجه اقول لحد كل واحد عمل ايه بس محتاجه اقول للحاقدين اللى قلوبهم سودا موتوا بغيظكم واذا كان ليكم صوت ولا ليكم صورة فى الحياه غير انكم تجعجعوا وانتم فيران جوا جحور ورونا عملتوا ايه للناس الغلابه اللى انتم عاملين نفسكوا بتجيبوا حقها وبتتكلموا بلسانهم انتم لا تتعدوا الحشرات الضاله فى الصحرا شكلكم متعرى وبرضه مش هنرد عليكم ولا هنا ولا فى اى مكان انا مش هقدر اكتب كل الاسماء بجد بس لان 60 حد هيبقى صعب بس يا ريت اللى يدخل من الموجودين يقولى وانا هعمل بوست على بيكيا فيه كل الاسماء وبشكر الناس اللى اول مرة تيجى فى حياتها واللى جابها عمل خير والناس اللى معانا من الاول وقوس قزح حبيبتى معلش ربنا يخفف عنك يا رب ورجلك تخف بشكر كل الناس اللى عملت لينكات عندها بالموضوع واسلام مواطن مصرى علشان بعت الايفنت على الفيس بووك والصباغ كمان والناس اللى بعتت ليه رسايل بتدعى ان ربنا يوفقنا عاوزة اقول لكم على حاجه احنا لما بنعمل الافكار دى بتكون مجرده فكره طقت فى دماغ حد وبنبدأ نتشارك فيها كلنا وبنطورها يعنى عمل جماعى وهو ده اللى نفسى نبقى كلنا عليه وفى كل مكان ومحافظه التدوين بالنسبه ليه مش انى اقعد احط عصارة مخى واعمل نفسى محلل سياسى بارع فى المضارع والماضى وانا اساسا بطيخ لا التدوين وحب مصر بالنسبه ليه مش اشتم فى النظام وبس ولا اجيب فيديو من هنا ولا هناك لا التدوين عندى يعنى اعمل حاجه افيد نفسى بيها وغيرى فى قدر استطاعتى هو ده اللى انا عاوزاه ونفسى الناس تبقى عليه مش يا فرحتى انقل اخبار حتى محطش حل ليها اه اليوم كمل ورحنا بتاع 35 واحد فطرنا مع بعض ومن ضمن الناس برضه ساجى وايناس اللى من بره التدوين ومش عاوزة اقول لكم مبسوطين قد ايه ونفسهم يفضلوا معانا على طول وساجى قالت انها هتنقل الفكره لاصحابها علشان نعمل حاجه كمان وفى النهايه بطوط هلكت وعاوزة اجازة ومش طايقه تبص فى وشى مع انى والله حمتها امبارح بس مفيش فايده مزنجرو معايا ومكشره ربنا يعديها على خيرههههههههه


ملحوسه :- مش عاوزة الناس تنام يا ريت اللى يقدر على طول يتابع المستشفى دى ويجيب ادويه يعملها ويروح مش لازم تجمع بس نساعد على قد ما نقدر

حكمه الامبراطورة


إبرتي المصدية أحسن من اسوارك أبو ألف ومية

كان معكم ابى هانم بتنجانى

عن ابو الهشاهيش والحزن


تحديث :- موضوع مستشفى ابو الريش اللى هنروحه يوم السبت ان شاء الله هتلاقوا تحديثات على بيكيا باسماء الدواء اللى ناقصه يا ريت نجيب الدواء ده لانه مش موجود مش مهم نجيب كله يا ريت تختاروا نوع او اتنين ويبقى كميه واللي يجيب بخصم يقول عدد الاطفال 50 طفل من سن سنه الى ست سنوات تابعوا بيكيا ومدونه قوس قزح هتلاقوا عليها ونتقابل السبت عند مستشفى ابو الريش اليابانى قدام القصر العينى الساعه 3 انا هناك من قبلها علشان اللى هيجى


الحوار داير على هشام طلعت مصطفى عند نوارة ما بينى وبين ناس من كام يوم والحوار ده ما بينى وبين ناس بحبها اوى ونوارة يا عينى متحمله قعدتنا على قلبها كده هههههههههه وقلبنها منتدى للرغى بس طلعنا بشويه حاجات فعرضت عليهم كام سؤال فجأه خطروا فى بالى ومش عاوزيين تهييس ركزوا بقى وده علشان دماغى فيها نحله ودبور


مش السكري ده كان قمل دوله

يعنى مدرب كويس وصايع ازاى تفوت عليه كذا حاجه كده


انه يسيب السكينه فى نفس المكان اللى شاريه كريدت كارد يعنى مش كاش ودي مصيبه تانيه


لما غير هدومه ليه مش غير البرنيطه

ش شايفين ان اعترافه بسرعه كده فيه سبب غامض يعنى كان ممكن يبقى فى زياره لاي حد مش شرط ليها صح

فيه خبر بيقول ان اباظه بيهدد الوليد ابن طلال بتوقيع عقوبه علشان اراضى توشكي اللى مش خلصها

الوليد ادخل فى موضوع هشام علشان يسلموه

الوليد كان شريكه بس قك الشراكه ما عدا فى الفورسيزون اللى فيه نفس الظابط


فكروا بقى فى الحاجات دي واربطوها ببعض
يا ريت نجنب ان بتوع قمل الدوله اغبياء لانهم فعلا مش اغبيه هههههههههه واللى هيقول او عقله يوزه على ان بتوع قمل الدوله اغبياء هسيب عليه خرفانى هما بيستعبطوا اه بيحاولوا يبانوا سذج ماشى دول بيمروا بتدريبات كتير ومنها المراقبات اللى بيعملوها على الناس مش المخبرين ولا الامناء يعنى ده كان مدرب كويس وفاهم ان فيه كاميرات ومداخل ومخارج
اربطوا ده ببعضوا وشوفوا لو طلعتوا بحاجه ابقى عيله غير صداع بس فى دماغكوا ههههههههه


ندخل على اللى بعده
هشام اتلعب بيه ومش عاوزه حد يضرب اصل اسيب خرفانى عليكم


هشام اتلعب بيه واتجاب اسمه اتسخن عليها عن طريق السكري الموضوع فيه واقعه او وقيعه او حاجه من حد


افتكروا فين الريان فين اشرف سعد فين السوركي فين كل واحد كان اسمه بيكبر على فكره الحزب له اسقف مش بيسمحوا لحد يتخطاها مهما ان كان وبكره تشوفوا الدور على مين علشان كبر والله مش مؤامره بس فكروا براحه واربطوا كل الاحداث ببعضها اللى ميعرفش يربط ينادى عليا وانا اربط له كله ببعضه


طلب للنائب العام بالتحفظ على امواله علشان خد الارض وعليه فلوس هشام اغلبيه فلوسه قروض ومنهم البنك الاهلى طيب ليه تحديدا دلوقتى ما كان موجود لو هنقول علشان هو فى قضيه اقول لكم مجموعه شركات طلعت مصطفى مش قايمه على كيان شخصى دول مجموعه يعنى لو مات لا قدر الله فيه غيره يعنى اخوه مسك مكانه وهيكمل المشوار


الوليد سحب شراكته من معاه ليه وساب بس الفور سيزون


ها حد جاي فى التفكير ولا هنستنى الاخبار على فكره عمرنا ما هنعرف الحقيقه الا اذا ركزنا


احنا وممشيناش ورا كلامهم فهمتوا اللعبه بقى بتمشى ازاى اخبار متضاربه بس بينها تفاصيل صغيره بس نقدر نطلع منها لو ركزنا حد هيقولى علشان دول ناس كبيره فعليهم اسبوت ودى مطربه وحصل فى بلد تانيه بتحترم القانون هقول لكم


وكام انتهاك ودعاره وقتل لاجانب بتحصل فى البلاد دي هتقول شخصيه معروفه ياااااما ناس كبيره قتلت ناس صغيره بس محدش اتكلم غير كده قبل كده حصل وصحبه اخو سوزان اترمت من الفور سيزون من الدور27 تقريبا واتقال انتحار مع انه مش كده بس اتغطت علشان فيها اسم هشام لانها من اوضته هااااا حد جاي برضه ولا لسه


برضه النقاش مشى على ان هشام مش اقوى من عز فى الحزب ولا اغنى


اجابه السؤال


هشام محبوب غير عزووووووو وانتم عارفه مفيش واحد على الاقل فى شركه هشام مش بيحبه وده معروف

قولوا ليه لما يكون قدامك منافس تحب تشيل اي واحد الغنى ولا اللى الناس بتحبه وعامل هاله كبيره جوليه

الدبور بيقولى :- طيب يا بنت الحلال يعنى لو هشام خد برائه هتقولوا القضاء مش عادل


هرد واقول لا لان كده ثبتت نظريتى ان هما عملوا اللى عاوزينه وخلوا صورة هشام وحشه جدا فى السوق واضرب يعنى وفيه مثل بيقول العيار اللى مش يصيب يدوش


الحزب من مصلحته او عوكل تحديدا محدش يتلمع غيره واللى يتلمع يتقمع على طول يعنى يكسروا عينه هااااا ولا نفتح القديم ولو هشام اتحكم عليه يبقى خلصوا منه استنوا شوفوا الدور الجاى على مين لسه


عزوو الابن المطيع فى الحزن لغايه دلوقتى


نسيت اقول لكم حتى الحزن فيه عصافير من قمل الدوله علشان كله يصب فى السياسات


وعلشان عوكل ينزل بقوة ونأجل موضوع عوكل بعدين


يالا كله يسخن الجمجمه ويدخل من غير خناق اصل اشد فى شعركم واسيب عليكم خرفانى


تحذير :- للحشرات الضاله اللى بتدخل هنا وتستهبل وانا عارفاهم كويس يا ريت تلموا نفسكم علشان احنا فى رمضان وانا كمان معايا شبشب بوردة ومش هرحم حد

ملحوسه :- فيه بوست على بيكيا بخصوص مستشفى ابو الريش البانر فى الجنب انطحوه هتروحوا هناك التبرعات انا ولا غيرى بنأخدها الكل بيوديها بايده وبعدين اللى فى بلدى اولى اهتم بيهم الاول وبعدين اشوف غيرى لما تخلص الكوارث عندنا مش ابقى اقرع ونزهى


حمكه الامبراطورة


الملايه تقول للعبايه الرجال بقت ولايه

الدويقه ضاقت باهلها


تحديث رابع :- يا شباب محتاجين شباب اولاد يروحوا علشان يوزعوا الفطار على الناس والسحور هتلاقوا هناك بتوع الجمعيات الخيريه هناك يا ريت تقدروا تساعدوا
البنات يا ريت تأجلوا مرواحكم يوم او اتنين او ابعتوا الحاجات للناس مع زمايلكم او اخواتكم الاولاد لان صعب تواجد بنات هناك


تحديث تالت:- الناس دلوقتى فى حديقه الفسطاط فى معسكر اللى عاوز يروحيقدم مساعدات هما هناك لغايه ما ينتهوا من الانقاذ الجرحي 36 واحد والوفيات 25 فرد لغايه دلوقتى


تحديث تاني:- ماما عبله الكحلاوي ربنا يبارك لها بعتت اتوبيس مساعدات لهم ناس تأكلهم وتقف معاهم يا ريت كلنا
نقف معاهم انا ان شاء الله رايحه بكره اللى عاوز يجي يقولى واقولكم نتقابل فين اللى يقدر على حاجه من بيته يجابها ربنا يكرمكوا بقى
تحديث:- اللى يقدر يساعد الناس يا جماعه يروح بجد الناس دي محتاجه اكل اكيد ولبس اللى يقدر يعمل حاجه الاخوه الدكاتره يا ريت تتصرف وتروح المنطقه دي الانقاذ هيفضل لبليل يعنى هيحتاجوا مساعدات
مش هنعتمد على الحكومه وبس ويا ربت الناس تلتزم النظام شويه يعنى المكان مش للفرجه
الدويقه من ضمن الامكان العشوائيه فى مصر
وفيهم اللى رفض من زمان بروح شقق تانيه علشان هما هناك عايشين من غير ايجار ولا حاجه
بس اهو جه اللى هيخلوهم يوافقوا بقى
يا رب باقى العشوائيات تتنقل يا رب

على الصبح خبر بانهيار جزء من المقطم على اناس فى الدويقه
النا س تحت الانقاض
بيقولوا فيه ناس بدأت تتصل من تحت الانقاض الانهيار حصل الساعه 8 الصبح على 40 منزل
لغايه دلوقتى 20 واحد توفوا
محتاجين يفتتوا الصخور
حيدر البغدادي بيقول بالفم المليان ان الناس دي اتظلمت ما بين المجلس المحلى وما بين المحافظه والاسكان والتعمير
لان فيه 1300 شقه فاضيه فى اسكان طنط سوزي
وهما الكبار بيهلبوه ما بينهم وبين بعض
هو بنفسه حيدر عضو مجلس الشعب عن المنطقه بيقول الفساد كتير فى الحزب ولا ينظروا للحكومه
الخيبه بقى ان البيه المحترم بيقول انا اري على شاشات الجزيره الان ان الجهود بسيطه
هو البيه منزلش مرحش ليه
يعنى برضه نفس القصه بيعيب على غيره وهو فيه العيوب
وبعدين المجنون على الصبح الجزيره مكرره نفس المشاهد
الفضائيه بث حى
والقوات المسلحه وصلت والدفاع المدنى وعثمان احمد عثمان والجبلى فتح المستشفيات
هو قاعد فى التكييف وبيتكلم يخيبك على الصبح يا راجل زيه زيهم اهو وانا اللى فاكراك نزلت جري من بيتكوا
اتفرجوا بقى على اللى بيتحرك وبيجروا من اماكنهم قاعد فى البيت وبيتفرج على الحدث من الجزيره ويعلق حسبى الله ونعم الوكيل فيكم وفى الوطنى كمان
والغلابه لهم ربنا

عديها على خير بقى


اولا كل سنه وانتم طيبين وحلوين وعاملين دايت فى رمضان ثانيا بقى بما انى واحده شايله الصح والغلط على كتافى من قديم الاذل وواجع كتافى بجد هقولكم بعذ من الحاجات اللى بتعمل ليه صداع فى الحياه وانتم قولوا ليه انا اوفر ولا لا

الموقف الاول
=========

بمناسبه رمضان جارتى الحشريه :- تعالى صلى معانا التراويح فى الجامع
آبى :- لا معلش مش بصلى فى الجامع انا بحب اصلى فى البيت مش عارفه ساعات بحس ان الناس بيشتتونى فى الجامع
جارتى :- يا ستى ليه دى بتبقى حلوة والقعده جميله
آبى :- وحواجبينى مرفوعه خمسات فى سبعات ازاى قاعده حلوة انتم قالبينها كافيه هناك
طبعا الفضول هيأكل فيه وعاوزة اعرف فيه ايه بس تقلت المرة دى قولت لها بكرة هاجى معاكوا عدت عليا قولت لها تيجى نروح بالعربيه قالت لا احنا كتير وبنتمشى قولت احسن برضه مشينا بتاع ربع ساعه كل اللى بيحصل ضحك وهزار فى الشارع بصوت عالى جدا وانا بتنيل بضايق من الموضوع ده جدا ومش بحب كده بحس شكلى وحش وصلنا الجامع لقيت بلا استثناء الناس رايحه تنقد بعض شوفتى دى لابسه ايه وشوفتى دى بتصلى ازاى وووووووووو كل اللى تتخيله فى انتقادات وبعد الصلاه رجعوا للوكلوك تانى بزمتكوا ده ينفع من حقى اتغاظ ولا لا ورجعت لقواعدى سالمه وبصلى فى هدوء جدا فى البيت حتى على الاقل ابقى ضمنه اللى هأخده من حسنات مش هيتنطر منى كده ولا كده فى التريقه على الناس والنقد وانا مصيبه ولسانى ميتوصاش صلاة الفجر كمان بيروحوا فى الجامع الستات بسمعهم بيدقوا على بعض بالمقشات زى الساحرات ههههههه بيصحوا بعض وبينزلوا من غير راجل النبى ده يصح
ده رمضان اللى فات على فكرة ومن ساعتها فعلا حرمت ولا هعملها خالص

الموقف التانى
=========
السواقه وطبعا احنا فنانين فى الفن التشكيكى و الابداعات على الطرق يعنى الطريق رايح وطريق راجع هوووووب يتقفل واحد لحادثه او ماشى ببطئ تيجى ازاى بقى لازم نبدع ونفنن ونروح نمشى من الطريق التانى ما هو ده الانفراد بتاع المصريين فى كل حاجه فى التصرف والجيش بيقولك اتصرف يقوم الاتنين مقفولين
الله طيب ما كده ولا هنوصل بدرى ولا هتتحل ابدا ليه مش بنصبر وتيجى تكلم حد
تلاقى فلنه داخليه طالعه لك من الشباك ويا سلام لو سواق ميكروباص والنبى ارحمينا يا طنط احنا صايمين اللهم انى صايم
سبحان الله يعنى بعد ما يطول لسانه ويمشى اصلا غلط يقولك اللهم انى صايم طيب هو كان ناسى ولا ايه ولا الصيام ده عن الاكل والشرب بس على فكرة كل الفئات او اغلبيتها بتعمل كده فى رمضان وبتغاظ من اللى يعمل مصيبه ويقولك اللهم انى صائم يا ريت نتحكم فى غضبنا شويه ونهدى علشان لو الطريق مقفول منقفلهوش اكتر
المثلث العاكس يا جدعان مش بيتعلق على العربيه من ورا بجد ايه العقول دى ده بيتحط فى الشنطه علشان لما نعطل انا بلاقى ملاكى كمان وميكروباص معلقينه على الزجاج ورا والعربيات النص نقل اغلبيتها وعلى طريق الزقازيق ومش عارفه ايه الحكمه معلقينه قدام يمكن عندهم فى بلدهم قانون تانى يا ريت بتوع الشرقيه يفيدونا وبجد ده غلط لو جهل من الناس اللى يعرف يفهمهم يعمل كده واللى الاقيه حاطط تلات مثلثات طيب ليه بيخزى عين الظابط هههههههههههههههه ومش بعيد بكره الاقى الناس لابسين المثلث فى دماغهم علشان يحلفوا انه معاهم فى العربيه هههههههه المثلث بيتساب فى الشنطه علشان لو عطلت تحطه على مسافه عشره متر من العربيه

الموقف التالت
========

الخيم الرمضانيه انا طبعا مش هقولكم حفظاهم ظهرا عن قلب وممكن اسمع لكم بالاماكن والعناوين بجد انا اخدت سنه تقريبا كنت بروح يوم ويوم بس بدافع الفضول مش اكتر لقيت ان مش ده رمضان خالص يا جدعان رمضان مش سهر وسماع اغانى وكركره طول الليل مع الاصحاب ممكن اقابل اصحابى ساعه بجد ودى بتكون حلوة انما مش تفانين يعنى واسمع المطرب ده وارقص هو ده جو رمضان واللى بيغيظنى البنات بالذات اللى بيجوا فى خيمه سوليدير دول مصيبه بجد ايه دة وبلاش دى شوفوا بتاعت دريم اللى بيتذاع منها على التليفزيون اه رمضان نخرج ويحب اللمه انما مش السرمحه ما احنا طول السنه متسرمحين اصلا هههههههههههههههههه طيب بزمتكوا ليه حق اتغاظ ولا انا اوفر

ملحوسه مهمه جدا جدا :- يا شوباب ويا شوبات انا فاتحه الكومنتات علشان نتناقش مش اكتر وكله يرد على بعضه بس فى حدود الادب والاحترام فاى حد يرد على راى اى حد هو حر انا مش عامله الكومنتات علشان حد يدخل يقولى انتى هايله وكميله وقمر وعقلك يوزن اتنين كيلو بتنجان لا انا عاملاها علشان نستفيد او على الاقل انا كمان استفيد

حكمه الامبراطورة
=========

الطول طول الباب والعقل عقل الذباب


كان معكم عسكرى مرور بدرجه لواء آبى هانم

Share |