غدا ستنزل الستاره على اروع تابلوه راقص للحزب الوطنى فى مصر لم يحدث ولن يحدث من سنين

فأنا اشهد لهم بالبراعه فى تصميم وتنفيذ التابلوه فقد كان من اروع ما قدموا ويشهد العالم كله على ذلك

دعونا نتفق او لا نتفق على ان الحزب ليس حزب غبى بالعكس فهو قد اخذ خطوات هامه اولها تخلص من الرعاع ومن ينضمون اليه لمصالح شخصيه او دعونا نسميهم باسمائهم الحقيقيه الاسماك البرساريه وهو سمك صغير جدا وشعبى وسعره كان فى مصر اوقات يصل لاتنين جنيه فهؤلاء هم المرتزقه الصغننين وهم من كانوا يسوؤن سمعته على حد علمهم

لقد قدم الحزب خدمات كثيره لهؤلاء الاسمالك المتطفله لكى ينضفوا ويرتقوا ولكن من الواضح انهم لم يستطيعوا التخلص من الجيفه التى يعيشون فيها فانقلب الشبكه ضدهم وتخلص الحزب منهم

واكتفى باسماك القرش التى ترعى وتعيش على بقيه الشعب التى يعتبرونه جيفه

من منا يخفى عليه كم عدد الموظفين فى المصانع التابعه لقروش الحزب الوطنى فلو احصينا عددهم على حد علمى لكانوا كثير بما يكفى لانجاح الحزب ما حدث فى الانتخابات من قتل وضرب نار وسقوط مرتزقه ودعونى اقول مرتزقه ولو انها مش هتعجب حد بس صدقونى هذا ما يحدث فىى الانتخابات

فهم على علم انهم مع مناصريهم مقتلون او يقتلون ويرضون بهذا وذاك لانهم يطمعون فى فتات القروش واعجبنى جدا من كل الفيديهوات التى نشرت الشخص الذى خرج وقال مش هما دول اللى طلعتوا وراهم خلوهم ينفعكوا عندما كان يصرخ فى شخص اخاه توفى فى احداث الشرقيه

ما يحدث فى الانتخابات ليس جديد ويدهشنى اندهاش الناس فلو انكم لا تعلمون فتلك مصيبه او تعلمون وتستعبطون او تتعشمون فى شئ اخر فهذا هو الهطل بعينه

اعجبنى البعض الذى ذهب وبوظ صوته على الاقل ارضى ضميره لم يعجبنى من جلس فى شباك بيتهم يطل على بنت الجيران وينتقد الانتخابات لانهم لا يصنفوا تحت بند سلبيين ولا معاتيه حتى فهؤلاء لابد لهم من خزوقه جماعيه علشان يتعلموا ميجعجعوش على الفاضى

انا اشترك فى الانتخابات منذ الصغر واتذكر عندما والد صديقه لى كان مترشح واخدتنا كلنا البنات وراحت اللجان تعمل شغب وتعلم على اسماء وهى لا تنتمى لحزب ولكن اتذكر كنا فى ثالثه ثانوى ضحكت وقولت لها مش هنتخب ابوكى علشان مش يستاهل اتذكر انها قطعت علاقتها بى بالرغم من سقوطه

نحن متاصل عندنا التزوير من الصغر من ايام ما كنا بنتتخب رائد الفصل والاحزاب اللى كنا بنعملها

فيا ساده التزوير ليس حقرا على حزب بعينه ولكنها عاده متاصله فينا ولكننا لا نريد ان نواجهه الحقيقه

الحزب ليس بالعدو السهل ولكنه صعب جدا

ولكننا تجاهلنا هذا ولعبنا على نفس وتر البلطجه

فى النهايه البلطجه حق لكل مواطن وليست ايضا حكر

ولن نستطيع غلب حزب طالما لا نعرف عدونا

وفى النهايه اسالوا بتوع الانتخابات وقولوا لهم ايه البند اللى بتكتبوه فى المصاريف دعايه وتاجير

اسالوا تاجير يعنى ايه

اسالوهم بيصرفوا قد ايه على البلطجيه فهو ليس موسم انتخابات ولكنه موسم البلطجه وكله بيرزق

لم يعجبنى من قاموا بنشر فيديوهات بدون وعى ولا فهم ولا شرح مظبوط يوضح حاجه لان لو نظرنا للفيديوهات بدون فهم انها انتخابات هنلاقى خناقه فى سوق خضار مش اكتر

لم يعجبنى من قاموا باالاستهزاء بواحده طالعه تقول ضحكوا عليا وقالوا هيدونا مائتان جنيه وقالك ضيعت حقها

حق ايه الناس دى تفهم ايه غير لقمه العيش تفهم ايه غير قرشها وعلبه اللبن لطفل على كتفها لماذا السخريه من الواقع

انه الواقع واذا لم نواجهه سوف تكمل الراقصه التابوله لاخر العمر

وغدا سيدل الستار على التابلوه وتظل سالى التى كانت تلقب بسيد وعملت عمليه تحويل بالرقص بدون رادع

وبالشفا

اعلم ان كلامى لن يروق لناس كتير ولكنى لا استطيع كتابه اى شئ اخر عن هذا التابلو الراقص

ومبروك عليك يا جيمى العروسه وبالشفا ان شاء الله

هذا وقد أعلنت النتائج الاوليه والاخيره عن ان الحزن الوتنى قد خاض المعركه الانتخابيه امام نفسه بكل نزاهه وقد اعطى الاصوات لنفسه ولضده بكل نزاهه واعيدت الانتخابات فى بعض الدوائر ونافس نفسه بكل نزاهه واستحق المقاعد يقعد عليها او يستعملها استخدامات اخرى بكل نزاهه هذا ويا ريت حد يفكرنى نقدم بلاغ لمجمع كل لغات العالم بالغاء كلمه نزاهه ونزيهه وبالمره نلغى النزهه من على الخرايط بالشفا

كان معكم ابى هانم كعب الغزال من الاراضى الكويتيه الشكيكه

حكمه الامبراطورة

صوت الصاجات اعلى من اغنيه المطرب

تكمله للبوست اللى فات اللى كتير مفهموش الغرض منه وبرضه دخلوا يناقشوا فى الحجاب والنقاب واللى داخلى يقولى اتحجبى كأنه خليفه الله فى الارض ما علينا واللى دخل يقل ادبه واللى دخل يهفلط باى كلام
كله بيقولى الحلول
الحل سهل جدا ليه مش بنبص لكل نقطه قولتها ونحاول نعمل العكس بتاعها
بمعنى الناس بتوع الصين لما اتعلموا قص الشعر وبالسعر ده ايه العيب ان البنات او الاولاد برضه يعملوا كده ومتعرضش نفسك على البيوت انما على جيرانك اصحابك مشروع مش هياخد منك فلوس كتير بعلكس هيبىقربح ليك
موضوع زويل انا نفسى نهتم بالاطفال مش بقول الحكومه خالص انا بتكلم عن الامهات والاباء فى البيوت يعنى من صغر الطفل نمى عنده موهبه معينه راقبه خلى بالك هو بيحب ايه طوره فيه وبابسط الامكانيات محدش بيقول ابعته فى مكان يتعلم لا بامكانياتك وظفها
موضوع الدين بقى يا جماعه ميه مره قولت وهقول الدين ده لربنا مينفعش التطرف ده شويه نشتم وشويه نكفر بعض وشويه نتهم بعض اتهامات احنا مش فاهمناه وكل واحد عامل ليه العالمه ابن بطوط
يعنى ببساطه القنوات مليانه بلاوى ماشى خد منها اللى يناسبك والباقى ارميه مش لازم اطلع اقول واعمل ده فلان عمل ده فلان ايه هل ده هينقص منه عند ناس تانيه اكيد لا
ولا برضه هيعزلوه عن مكانه يعى كل واحد بتفكيره له اللى بيحبه
فكر انت بقى زى ما انت عاوز بس مضرش حد بفكرك ده خليك فى نفسك وبس وربنا فى النهايه هيحاسب الكل بس اعرف ان لازم تتقيه بالشكل اللى انت شايفه مش اللى انا ممثلا شايفاه علشان لما اتحاسب وانت برضه يبقى اتحمل اللى انا فيه خير او شر
الفساد اللى للركب فى مصر
انا فوق فى الجنب حطيت ارقام تليفونات شكاوى وزارات عملاها
هيدخل حد يقولى تفتكرى هيحصل حاجه
هفكركوا بالبوست بتاع حرامى الدقيق وعلشان اتعمل بلاغات فيه اتقفل وجاله غرامات وحاجات كتير
بمعنى اوضح ان اكيد من وسط عشره حراميه فيه واحد او انين على الاقل كويسين يبقى على الاقل بنحاول نوصل رساله للناس دى اننا مش ساكتين على حقنا
الشباب اللى مش لاقى شغل بخمس الاف جنيه معلش حقك عليا هى ظروف بلدنا كده بس ممكن احنا نظبطها بمعنى مثلا شوف انت عايش فى مكانعامل ازاى واعمل مشروع صغير يخدم المنطقه اللى انت فيها بس متقلدش حد ببساطه جدا فيه اماكن كتير بتدى قروض
مممممممم المركزيه بقى ودى اكتر حاجه مضايقانى على الرغم من انى لما كنت بدور على شقه لقيت فى مدينه نصر الا انا فضلت المدن الجديده واخترت التجمع
ليه على الاقل الهوا يبقى نضيف احنا عندنا مدن جديده كتير جدا ليه الشباب مش بيتوجهه لها يعنى بدر الشروق خمستاشر مايو العاشر اكتوبر اللعينه على راى خوخه
كل لمدن دى خلاص ارتبطت ببعض وفى الصعيد مدن جديده كتير
يعنى عندى زميل قرر يدفع مقدم فى شقه فى عين شمس ولاحظوا المنطقه على الطوب الاحمر من غير اى حاجه 30 الف جنيه وايجار هيدفع 250 جنيه ولسه هيوضب فى حين انى نبهته للمدن الجديده وخاصه بدر واللى مواصلاتها سهله جدا وفيها مجال للشغل فى كل حاجه
رفض علشان ايه يبقى جنب اهله
طبعا ده فكر عقيم لسبب بالفلوس اللى ضاعت دى ولسه قدهم فى التوضيب هياخد شقه على الاقل متوضبه فى اى مدينه ويدفع قسط وهيكون فى النهايه شقته وكويسه وعلى فكره هو مش حاله ميسور دا سالفهم كمان
بمعنى ان الواحد لو فكر كده واتحرك بعيد عن المركزيه والزحمه هندى مجال لبعض فى العيشه والشغل وكمان نوفر فى موضوع الجواز
ولازم نبسط الدنيا شويه فى الجواز البنت مش غلوها يعنى وقيمتها بانها تعمل شبكه بالوفات ومهر ووعفش كل ده كلام بيزول ولما بيتربسوا الاتنين ممكن هى تتنازل عن كل ده يبقى من البدايه العلاقه لازم تبقى احترام
نكون شقه بابسط الحاجات الاساسيه الكويسه على فكره سمعت جمله لخالد صالح فى فيلم بيقوله الفقراء بس اللى بيحبوا يملوا بيوتهم عفش كتير علشان يحسوا بالونس
وفعلا هو عايش فى قصر طويل عريض حاطط فيه حاجات بسيطه وقد ايه حلوه ومش مكركبه انا عجبنى كلمه الونس دى كل ما الحاجات الاساسيه هى اللى بتيجى مش الزيادات بيكون البيت افضل بكتير
انا دى الحلول اللى عندى وفى الكومنتات نتناقش بقى والىل عنده ارقام وزارت للشكاوى يبعتها ليه ويا ريت كله ينشر الارقام دى

مع السلام عليكوا بقى

كان معكم ابى هانم من التجمد التالت


حكمه الامبراطوره

لو وزنوا الوز بميزان هيطلع تلات اربعه ريش

دى مقارنه بسيطه شغلانى بقالها كام يوم

الصين تعددها مليار واسرع دوله فى التقدم العلمى والعملى ناس عمليه جدا ومنتشرين فى انحاء العالم

واحنا بنستورد منهم حتى الابره وبالمناسبه احنا عندنا اقل كوافير حريمى دلوقتى بيقص الشعر بتلاتين جنيه الصين من جبروتهم اتعلموا شغل الكوافيرات وبيعدوا على البيوت بخمسه جنيه القص واحنا لسه بنعاير بعض انت بتشتغل ايه وانتى بتشتغلى ايه اذا اصلا كنا بنشتغل غير المركزيه اللى احنا فيها ولسه بنعاير بعض انت من الاقاليم لا انت من العاصمه لا انت من اسكندريه لا انت من كفر ابو رجل مسلوخه

2- واحده اسرائليه اخدت جايزة نوبل فى الكيمياء

واحنا أخر واحد اخدها عندنا زويل ومن عشر سنين ومش عارفه مصيره فين دلوقتى

3- ماليزيا دوله اسلاميه اللى رحها هيعرف قد ايه الدوله دى متقدمه ونضيفه وشيك ومحترمه حتى شعبها وقد ايه اتقدمت بالرغم من انها كانت متاخره

واحنا لسه قاعدين نتخانق فى مسأله الحجاب والنقاب وانهى شرعى وانهى لا ومين مبسوط ومين زباله ومين مش مقتنع مع ان الدين لله وحده والمفروض كله يتقى ربنا وبس وده بينه وبين ربنا

4- السعوديه رغم تأخرها ولكنها دوله كبيره وغنيه جدا واولادها بيتعلمو ا بره البلد وعملت جامعه شيك وفريده من نوعها لاول مره

واحنا التعليم عندنا مبيطورش ولسه قاعدين نشتم فى الوهابيه والسعوديه وفكر الصحرا و العرب والبنتجان

4- امريكا اتغير فيها 40 رئيس بالانتحابات

مصر عدى عليها اربع رؤساء على مر الزمن كله

5- العالم كله بيحل مشكله الجواز وماشين مخلينها بسيطه جدا كل المتطلبات ومفيش كلاكيع وبيتجوزا فى سن مبكر مصر فيها 13 مليون وشويه عانس واعزب ولسه بنقول الستاير على مين وهنعمل الفرح فين

6- البنات بتشتغل وتسافر وتستقر لوحدها من وهى 18 سنه ومحدش يقولى الانحلال فيه ناس عايشه مع اهليها ومنحلين بالقوى وكله عارف

ومصر لسه الولد بيدور على البنت الرجعيه ولا المتفتحه... واصحاب ام دماغ متفتحه بس متجوزهاش انما اتجوز المنغلقه مع ان فى راى فى الزمن ده اللى منغلق هو دماغه لان مفيش بنت منغلقه ولا بتاع فنبطل نضحك على بعض كله بقى فاهم كل حاجه وكله دماغه شغاله كويس يكفى انها بتبقى عارفه انها عامله مصيده للفأر الدوغوف اللى هتشتغله علشان تتجوزه

7 - بره عاملين برلمان للاطفال وبيناقشوا فيه الحياه وبيعلموهم الحياه السياسيه

وفى مصر لسه بندافع عن تصريحا ت جماعه ما منتسبين لها مع ان تصريحتنا احنا ودافاعنا ممكن يدينهم وفى النهايه لا تجادل يا اخ بطيخ اصل نقيم عليك الحد

8- لسه بنتهم العرب وليبيا بالتخلف

على الرغم من اننا بنسعى للسفر وهما سبقونا بكتير على الاقل فى مستوى المعيشه

9- العالم بيتقدم كل يوم ويخترع وينفذ حاجات

واحنا لسه بندور ننام على انهى جنب احسن والمحجبه ولا الغير ولا منتقبه هى افضل وان البنت لما تقعد فى البيت بتستر عورتها ونسينا ان بجانب العباده ربنا قال العمل عباده

10 - بره تقريبا كل بيت بيحاول يخلف طفلين او تلاته

واحنا عندنا ناس لسه عاوز تجيب 11 طفل وبعد كل ده احنا لسه بنسال ليه مبارك قاعد على نفسنا وليه احنا كده لا والنعره الكدابه مسكانا
بعد كل اللى فوق ده عمرنا ما هنفوق الا لما نعترف اننا فعلا بننحدر

شالوم عليكم واياك حد يدخل يقولى بلاش شالوم اصل حرام

كان معكم من امام متحف ما يسمى بمصر ابى هانم كعب الغزال

حكمة الامبراطورة

ان كان التقدم نقمه فمرحبا بها ولا اعيش جاهله

الكلمه دى بتتردد جوه ناس كتير وبتتردد من على لسان ناس كتير اوى فى حياتنا سواء اهل عاوزينا نبقى احسن سواء اغراب بيحبطونا سواء اصدقاء خايفين علينا او برضه بيحبطونا
وعلى الرغم من انها كلمه واحده ولكن بتتنوع نواياها واللى وراها كل وقت على حسب اللى بيقولها

عاوزة اسالكم حاجات فضفضه زى ما بنلعب ساعات بما ان احنا اخر الاسبوع والاحداث السياسيه عملت قلبى زى اللى ماسك مبشره وبيبشر صابون او اللى استفرد بلوح خشب وبيقصه بمنشار حامى
فقولت نلعب شويه

1- يعنى ايه فشل بالنسبه ليكم؟

2- ايه الحاجه اللى انت حاسس انك فشلت فيها ؟

3- عملت ايه علشان متوصلش للفشل ده عملت ايه بكل ضمير مش كروته يعنى ومحدش يطلع نفسه دور ضحيه اصل انتم عارفين ايه مصيره؟

4- لما فشلت ايه كان احساسك ؟ واحساس اللى حواليك؟

5- حاسس انك راضيت ضميرك علشان متفشلش ولا كان فيه عوامل خارجيه؟

امم ده اللى فى بالى دلوقتى لو عندكم اى زيادات قولوها وكله بالدور محدش يتخانق مع اللى جنبه علشان يحكى
كل واحد له الشزلونج بتاعه يمدد عليه دا انتم هتشوفوا ايام
وانا هشغل لكم موسيقى محبطه ويأسه علشان اخليكم تأكلوا اللحاف اللى متغطيين بيه والمشابك وكل حاجه تقابلكوا
يالا اتمسوا بالخير بقى وعكرتوف عليكم




كان معكم اساذ ورئيس قسم المراض المناخوليا قسم اول العباسيه كولج ابى هانم

حكمه الامبراطورة

السلطان من لا يعرفه السلطان

الست تنبهر بهذا الممثل الأجنبي الذي يحتضن زوجته على الشاطئ وهو يرتدى مايوه وهى ايضا ترتدى مايوه بكينى

ثم يرتميا سويا على الرمال ويتدحرجا إلى أن يصلا إلى البحر

ثم يعودا ويتدحرجا بالعكس على الرمال على الشاطئ الهادئ الخالي من أي بني آدم،

ولذلك يحلم الرجل بأن يكون هو هذا الممثل صاحب العضلات والذي يرتدي البوكسر

وأن تكون معه هذه الفتاة الرشيقة الجميلة التي ترتدي هذا الكاش مايوه وتضع 'صن بلوك' على يديها،

ولكن في الزواج يا عزيزتي انسى كل هذه الخيالات تماما،

فسوف تذهبي إلى شاطئ يعج بآلاف المواطنين الذين يبحلقون لأي دراع معدي أمامهم،

كما أنك لن تأخذي راحتك لأنك مشغولة بإعداد الساندويتشات وكأنكم في الجونينة يوم شم النسيم،

بالإضافة إلى أن الكرش الذي سيظهر له بسبب الاكلات والانتخه على الكنبه امام التى فى سيمنعه من ارتداء البوكسر،

وهذا غير انك ستتحولين بفعل عوامل الزمن لكائن غريب يشبه الى حد ما شجره الجميز من جسم غير متناسق بسبب الحمل والاطفال وشعر متكهرب على 280 فولت عالى

وهنا ستدركين حقيقه انك لن ترتدى الاختراع الذي يسمى كاش مايوه

وستكتفي بجلابية مليئة بالتطريز إذا كان حالته مستعصية،

أو ترتدي بنطلون برمودا ضيق إذا كان روش طحن ومعه شبشب بلاستيك بصباع

وعادة ما يكون بمبي أو لبني وستجلسين على كرسي صغير على الرمل أمام البحر مباشرة

وتدلدلى رجليكي وترفعهما مع كل موجة ببلاهة غريبة وستكوننى في قمة السعادة من كتر الغباء اللى بقيتى فيه

وفجأه يلتفت هو لكى بكرشه المتدلى امامه خمسين متر واصابعه التى تلعب فى الرمل وينظر لك من خلف الكتاب التى يقراه او الجرنال او لو كان حبيب شويه هتلاقى شايل لاب توب فى كل مكان ثم يلتفت لكى ويقول

' المية حلوة قوي النهاردة .. هاتى شاندوشت بلوبيف'

كل هذا وأنتي جالسه خلفه على الكرسي الأخضر الكبير تحت الشمسية وتنظري له من تحت النضاره ام عشره جنيه

وتتحسري على الكاش مايوه والكرة الشاطئية لأن الوضع أصبح حلل محشي وطاولة وجلابية

زوجه في المطبخ

يستيقظ الرجل صباحا على السرير الأبيض النظيف وشعاع الشمس ضارب في عينيه،

ويمسح وجهه بيده استعدادا للفوقان ثم ينزل من على السرير وهو يرتدي التي شيرت البادي الأبيض

مع شورت كاروه قصير ويبحث عن زوجته ليجدها في المطبخ تجهز التوست والجبن المطبوخ

وترتدي فقط تيشيرت أبيض طويل يصل حتى فوق الركبة بعشرين سنتيميتر وترتدي فوقه

مريلة مطبخ ربما أطول من التيشيرت الأبيض من الأمام ثم يقف الرجل خلفها مباشرة ويقبلها

ويرمي نفسه على الكرسي المجاور لترابيزة المطبخ ليصنع الكابتشينو حتى يصحصح

كل هذا بالطبع لا يحدث في الواقع، لانه فى خيالك فقط ومن كتر الفرجه على الافلام الامريكانى اللى خربت عقولنا ولا احنا عارفين نحب ولا نفضل مجانين

ولكن الصورة الواكعية ستختلف تماما عن الصورة السابقة،

فسوف يستيقظ الرجل من تحت اللحاف المشجر ويجد الحجرة ضلمة كحل لا داخلها شمس ولانور

لأنك مقفلة الشبابيك عشان محدش يجيله نزلة برد رغم أن نزلة البرد مكمكمة في المنزل

ونفسها تلاقي باب شباك اتفتح عشان تخرج منه،وخوفا على الاولاد من البلكونات لان لا قدر الله لو حدث شئ لطفل منهم سوف يقوم هو بمقاضتك فورا والحصول على نفقه منك ومش بعيد يطالب باعدامك فى حين انه طول السنه ولا بيفتكر ان عنده اطفال لهم متطلبات غير الفلوس

ثم يمسك الرجل أنفه بسبب ريحه البصل وغلي اللحمة وهبو المطبخ اللى هو طبعا بسبب طلبات سعادته واطلب يا سيدى ويطلع عين ابوكى يا هانم

وتقولى ايييييييه فين ايام بيت العز يا بيتنا

ثم ينزل من على السرير وهو يرتدي ترينج التوحيد والنور ليذهب اليكى في المطبخ

لينظر اليكى نظره الذئب للضحيه ويمصمص شفتيه مستنكرا حالك وكأنه ليس السبب في العيشة الضنك،

ثم عليكى عزيزتى بأن تحدفيه بأى كوب امامك لكى تتخلصى من هذا البوز اللى على الصبح

ولكى تواجهى الواقع المرير فى انك متجوزتيش براد بيت وانك اتجوزتى ابو رجل مسلوخه

وبالتبعيه اصبحتى انتى كما القرنبيطه العبيطه

او امنا الغوله

ولا تنسى ان ترمى له الفوطة المتسخة المصرية الشهيرة وتقول له بكل الاطه ارفع اللحمة من ع النارعلشان انا جهزت طعام الغداء منذ الصباح،كما امرت يا ابن المفجوعه

وبالطبع كل ذلك وهي ترتدي جلابية وتحتها بنطلون وتيشيرت هاي كول صوف.

دى الحياه المعاصرة للجواز المصرى انا جاتلى على الميل بس العكس وعلى غرار انهم بيحاربونا عاوزه برضه اوريهم الصورة ازاى

فيا ايها الرجل انت لست براد بيت وبالتالى انا لست انجيلينا جولى

احنا الاتنين انتاج مصرى ميه فى الميه فمتحلمش كتر وبطل عنيك تزوغ لبره

كان معكم كايده الرجاله انا من يومى ابى هانم

حكمه الامبراطورة

اللى ميشوفش من الغربال يركب لينسيز

انا جيت اولا ميرسى للناس اللى اتصلت وانا معرفتش ارد معلش غصمن عنى

كنا بنقول ايه بقى فى البوست اللى فات بتاع حوا وأدم نلخص بعد الخناقات اللى حصلت وبرضه كل واحد بيقول حوار والتانى شيفاه بيدافع يعنى الفكره ان الموضوع بقى بين الست والراجل دفاع وهجوم زى ماتش الكورة بالظبط

عن نفسى هلخص اللى شايفه الاتنين محتاجينه

1- الست..... عاوزة راجل يحتويها ويحميها ويدلعها

2- الراجل ... عاوزة واحده مش زنانه ومبتسالش هو بيعمل ايه ولا رايح فين وتديله الحق يعمل كل حاجه ده اللى انتم عاوزينه
بصوا بقى خلينا نتفق على قواعد
1- الراجل مبيتغيرش يعنى لو انتم الاتنين من البدايه واخدين بعض زى ما انتم كده متعمليش فيها فكيهه الحمشه وانك هتغيره بعد ما تكعبليه وتتجوزيه يبقى بتحلمى وانتى اللى هتتغيرى علشان كده هتفضلى مخنوقه ومضايقه والمشاكل للركب
فلازم تبقوا راضيين عن بعض من قبل الجواز او الارتباط الخطوبه العاديه
واعرفى واتاكدى انه مش هيتغير ومش لوى دراع منه انما اعتقد تربسه دماغ وفهم خطأ للرجوله ان انا كده ومينفعش اتغير فخلاص لازم نرضى بالامر الواكع
2-النقد مينفعش الست تنقد الراجل طول الوقت يعنى هتلاقيه بيطلع اصوات مش كوويسه وهو نايم وعارفه انه موضوع بيخنق او قاعد فى البيت شبه امنا الغوله

تعالى على نفسك وحاولى تظبطى الامور مش علشانك بس علشانه كمان ممكن ميكونش بياخد باله من الحاجات دى انما لو هو محفلط ومزفلط فى نفسه فبلاش تشكى فيه طول الوقت وتقولى له حاطط برفان لمين ومتشيك ليه لان ساعات بتيجى له هفه فى عقله بيكون عاوز يبقى كده فى المقابل الراجل يا ريت بلاش نعكشه فى نفسك فى البيت وانت خارج بقى تبقى ميه فل وخمسه وعشرين لان ده هيخليها تشك فيك اكيد

3- الست بلاش النكد اممممممم لا مش هينفع انتى نكدى براحتك بس يا ريت يبقى فيه ثقه بينكم شويه عارفه انها صعبه فى الزمن ده
عن نفسى بوصل لها بصعوبه جدا مع اى شخص بس عموما حاولى علشان متضايقيش نفسك

ومش لو جاب لكى ورده يبقى بيخونك اممممممم مش داايما ممكن عادى تكون طالبه معاه نحنحه اتنحنحى انتى كمان

الراجل راعى نقطه ان الست فجأه بتكون ام وبتجيب بيبى يعنى مسئوليه تانيه ومبتقدرش تنام كتير وبتحاول ترضى جميع الاطراف المزغود الصغير والمزغود الكبير يعنى تبقى رحمه كده شويه بينكم مطلعش عفاريتك عليها والدنيا هتمشى شويه شويه

انا بقى عن نفسى اللى عاوزاه مش موجود ومعتقدش هيتوجد اولا انا شخصيه صعبه المعامله وبتقمص بسرعه ولا اطاق ومدلعه مقرفه ومفيش حد هيتحمل كل ده بالتالى مشكرين يعنى اعملوا انتم بالنصايح اما انا فنوووووووو
انا بقى اللى بقول انا لوى دراع هو انا كده ومن هنا ينطبق عليا باب النجار مخلع تيررررارررررررر


نصيحه برضه للراجله فى الاستبوخس :- البنات تودى وشها الناحيه التانيه لما الدنيا تخنقك اوى اوى وهى جنبك وقاعدين ساكتين مد ايدك وخدها فى حضنك وارقصوا
سامع الاغنيه دى اللى هنا ارقصوا عليها هتحسوا احساس تانى خالص انكم فعلا مش على الارض

نصيحه للبنات :- الراجله وشها فى الحيطه بقى اهتمى بيه وبنفسك علشان ترتاحى ويرتاح شوفى كل حاجه بعينه هو لو انتى بتحبيه اوعى تفتكرى انك لما تضحى انك بتيجى على نفسك انتى فى الاول بتسعدى نفسك بس اوى تعملى ده الا لما تكونى واثقه فيه اوى وحسه بالامان

امممممممممم اخيرا كده قفلت الموضوع ده بقى المره الجايه نقلب على موضوع تانى خالص اللى عنده نصايح تانى يكتبها بعد نقاش البوست اللى فات واللى قبله


كان معكم استاذ ورئيس قسم مكافحه مشاكل الاسرة والمجانين ابى هانم

حكمه الامبراطورة

اتلم الشبشب على القبقاب وبيتلقحوا على الابواب

تحديث:- علشان والنبى الناس اللى زعلانه ومضايقه من انى بحرق فى نظيف وانى اقول عشوائيات اقروا ردي على عاشقه وغلبانه والشنكوتي علشان تفهموا وبعدين اللى قصدتهم فى البوست ده مش كل المدونين انا قصدت الفئه اللى بتتكلم عن زمايلها والفئه اللى عامله نفسه كويسه وعلى فكره تقريبا هما معروفين باخلاقهم الزباله انا مقصدتش كل الناس ومش محتاجه نباهه يعنى علشان اقعد اشرح هتزهقونى ليه انا ليه حق لما حد اقعد معاه او اعرفه ويعمل كده ...ليه حق اعمل كده كل كلمه فى البوست قصدتها عن الشخصيات اللى بتتكلم عن بعض ولا علشان بنت اتكسف واسكت لا والله العظيم اللى هيجي ناحيتى تاني لاكون مبهدلاه هو الواحد بيحترم نفسه بس ويسكت انما لما الموضوع يزيد لا كده اوفر
موضوع النت ببلاش كنايه عن ان الحاجه اللى بتتعمل ببلاش بتكون استخدمها مش فى محله عند بعض الناس ما كلنا بندفع اشتراك مش ببلاش بس اللى بيروح يقعد فى سيبر ولا وصله بعشره جنيه ويطلعه علىنا
هو ده قصدي

امبارح فجأه لقيت ايهاب الشنكوتى داخل يسالنى يقولى انتى مين زعلانه منه وبيعتذر لكى عند خيخه؟
طبعا استغربت قولت له يعتذر فين قالى فى الكومنتات اللى عند خيخه قولت له معرفش هشوف جاب ليه اللينك
واللينك ليكوا انتم كمان اهو انطح
دخلت لقيت انونيمس كاتب ليه اعتذار وبرضه هجيبه لكم هنا

Anonymous said...

خيخة انا اسف انى استغل صفحة تعليقاتك
وابلغ من خلالها رسالة لأبي

اصل انتى الوحيدة اللى بتسمحى للأنونيمس انهم يعلقوا
وأبى لاغية عندها حكاية الانونيمس دى رغم انها بتعمل مودريشن

انا بس عايز اقولها انى اسف جدا

هى اكيد هتقرا تعليقى ده عندك

يمكن لما تقراه تسامحنى

Wednesday, May 13, 2009 1:42:00 AM

طبعا انا حواجبينى اتشعلقت ومش فاهمه حاجه
انا مبزعلش عموما من حد والاغرب انى مش فاهمه كلامه يعنى بصراحه معنديش وسط لما بزعل من حد بتكون اساسا قامت خناقه وانا قطعت نهائيا واللى قدامى بيكون عارف فالشخص ده مكنتش اعرفه دخلت ورديت عليه وقولت له انا هفتح الانونيمس عندى وقولى انت مين علشان اعرف اسامحك ليه
وفعلا دخل وساب ليه التعليق ده امبارح عند

Anonymous said...

كويس انك فتحتى الانونيمس

انا اللى سبت تعليق عند خيخة

انا كنت عايز اعتذرلك لانى كنت بتعمد انى اغلط فيكى فى غيابك

انتى متعرفنيش
بس من كلام واحد مدون عليكى
افتكرتك انك صايعة

لكن لما قريت بوست خيخة اللى كانت كاتباه عن اخر بؤجة خير
لاقتها اتكلمت عنك بصورة مختلفة
وان مظهرك المتحرر هو اللى بيخلى الناس تاخد عنك فكرة غلط
فقلت اعتذرلك
وياريت تتقبلى اعتذاري

May 13, 2009 10:00 PM

هتلاقوه فى البوست اللى فات هنا بتاع عيد ميلاد قوس قزح

طبعا انا مش قادره افهم واحد ميعرفنيش وبيغلط فيه
ده بالبلدى يعنى معلش فيه مثل بيقولك تعرف فلان قاله اه قاله عاشرته قاله لا قالوه يبقى متعرفهوش
ده مبدئيا
ثانيا واحد يكون فكره عن واحد سواء ولد او بنت من لبسه علشان لبسه مختلف عن بيئه الاولانى
يبقى بالزمه ده عقل ولا ده مبدأ ولا ده دين اصلا ده مفيش دين بيقول كده
ثم انا لما بقابل حد ولا كنت زمااااااااااااان ربنا لا يرجعها ايام من سنه ولا اكتر لما كنت بترزع على البورصه ومرة فى الاسبوع مش مرميه زى ناس هناك كنت بروح بلبس عادى جدا منين حكموا عليا بقى
ومنين واحد مش محترم انا تنازلت وقعدت معاهم يقوم يتكلم عنى وحش
اولا الانونيمس انا قبلت اعتذارك اكيد حتى لو معرفكش وده لسبب واحد علشان انت كان عندك الشجاعه انك تعتذر
انما المدون الجبان اللى اتكلم عنى ولا اذا كانت بنت حتى لان فيه بنات واطيه اى والله بجد فانا طبعا مش هسامحها لان دى المفروض انهم قعدوا معايا
وبقولهم رساله واحده استحموا ريحتكوا طلعت وبعدين اتكلموا على الناس اللى انضف منكوا بجد مش انا لوحدى فيه كتير زى جدا
وبعدين ابقوا بصوا لنفسكوا واتكلموا على الناس

رساله لكل الناس مش معنى انى لبسى مختلف عن التانى يبقى هو وحش او صايع او حتى محترم لا خالص الاخلاق وطريقه المعامله
كل طبقه ليها طريقتها كل مستوى له طريقته

سؤال بجد هو معنى ان الواحد بيتعامل ببساطه مع ناس اقل منه اجتماعيا او ماديا او فكريا يبقى كده وحش ولا ايه يعنى لازم نتنك على الناس ونتكلم من طرف مناخيرنا علشان تتبسطوا يعنى ولا اعمل ايه بجد؟

سؤال كمان
هما دول المدونين المثقفين هما دول اللى بيدافعوا عن قضايا وبيلعنوا فى الحكومه ليل ونهار وهما دول برضه اللى بيكتبوا شعر وحب ونحنحه
بيتهيأ ليه كده وضحت اوى اوى يعنى الشعارات المزيفه والاقنعه الهبله اللى لابسينها
انا عن نفسى مش اى حد باخد منه معلومه اه بصراحه ميبقاش واحد منفسن ومتلقح ليل ونهار على القهوه باتنين جنيه وجايب كتاب من سور الازبكيه باتنين جنيه وماسكه وعامل مثقف
ولا واحده سورى يعنى ملزقه شعرها بفازلين وبرضه استلفت كتاب وقاعده عانس ووحشه واسمعها وهى بتنضال
انا اخد الكلام من ناس طبيعيه معندهمش عقد ولا كلاكيع واعتقد بعد سنه وخمس شهور فى التدوين قدرت اعرف مين ومين
انا بس حبيت اوريكم ابسط حاجه وسط المناضلين اللى على ورق

انا على فكره مش زعلانه لانى قادره احكم علاقاتى كويس جدا واللى بيغلط ملوش راجعه معايا تانى خلاص
انا بس زعلانه على نفسى انى نزلت للمستوى ده
ومش كل واحد جاى من عشوائيات ولا بيئه يبقى يتكلم على اللى احسن منه مش شكلا بس وموضوعا الحمد لله انا حد ناجح فى شغلى ومباخدش مصروف من اهلى وعملت نفسى بنفسى ومبدعيش حاجات مش عندى ولا قدام اهلى بشكل ولبس ووراهم بشكل ولبس ولا بكدب فى بوست والتانى يبقى فيها كلام مخالف للاول ولا باخد اكسبريشن من حد ولا طريقه كلام واعمل بيها بنت ناس
ولاد الناس اللى عندهم اصول ومتربيين مش محتاجين يثبتوا لحد اساسا لانه بيبان اوى
المعقدين والمشوهين واللى عندهم كلاكيع اخرهم معايا الشوز بتاعتى
بس فعلا خساره على مصر ان ده يكون تفكير اولادها
يالا خلوها تتحرق وحلال اللى بيتعمل فيها

انونيمس مش زعلانه منك وبجد انت حد محترم ولما كتبت البوست ده مش علشانك بس انت باللى عملته اثرت نقطه فعلا فى مصر كتيييييييير بين الشباب والبنات وكله يقولك انا مثقف ومتفتح وتفكيره فى كعب الشوز بتاعه لو جيت تطبق كلامه ده عملى على الواقع مع انى اصلا معرفتش انت مين بس انا عالمى وحياتى مش المدونين بس انا ليه عالمى واصحابى اللى بقالنا 15 سنه اعتقد دول اللى يهمونى اكتر انما ناس تانيه عاديه او اقل ميهمونيش

فى النهايه طبعا التدوين طلعت منه باصحاب وحبايب كمان
وطلعت منه بحاجات منيله بس صدقونى المنيل اكتر

والله يحرقك يا نظيف علشان انت اللى عملت كده وخليت النت ببلاش وقرفتنا

حكمه الامبراطوره

الكلب يهوهو عليك والجرب اللى فيه يجيبوا فيك

اولا ميرسى للناس اللى علقت فى البوست اللى فات بس انا فعلا كنت مصدومه ومضايقه ومش شايفه الموضوع شخصى قد ما هو من ضمن سلسله المهازل وانحدار القيم والمبادئ فى مصر وانهيار اى علاقه بين اتنين اصحاب متجوزين اخوات اهل اى حاجه المهم بجد اكتشفت ان كلنا اكلنا على قفانا هههههههههه ودى الحاجه اللى خففت عنى شويه وقولت يالا ما الناس اهى كلها فله اشمعنى انا يعنى اللى هبقى عجبه بس عموما الحمد لله انا عمرى ما هخون ثقه حد فيه لان انا مش بتأثر بالسلب

نيجى بقى للموضوع العجيب الفلوكسا الخنازير طبعا الكل بيلك يلوكوا الكاكا فى الموضوع بس اللى هيموتنى غباء الناس اى والله بجد هجيب لكم تعليق واحد على خبر موضع قرار الحكومه بذبح كل الخنازير وتعويض اصحاب المزارع اللى الناس نفسهم امبارح لما جبوهم لايف على قناه الحياه قالوا انهم موافقين وهما هيشتروا بدل الحاجات دى الخنازير يعنى خرفان وماعيز وانا قررت طالما هيشتروا خرفان هروح اشرف عليهم نيهاهاهاها المهم الناس معندهاش مشكله مش عارفه الكام بتاع اللى اتمطعوا وقالوا هنعمل احتجاج واستعباط واحتكاك ونبعت لاونكل اوباما نشتكى له علشان بيضهدونا دول المفروض مسيحين طبعا انا شامه اقباط المهجر ربنا يجعل كلامى خفيف عليهم فى الموضوع مش عارفه ليه ما هما كل شويه يطلعوا لنا بافتكاسه وهقولكم على اروع افتكاسه سمعتها منهم بجد وبصراحه عارفين الواد ميشو ده قولت له على موضوع الخنازير وقد ايه هو طبعا يهمه مصلحته وقرف من الناس جدا اللى رافضه الدبح هو اه صعبان عليه الناس اللى مش هتلاقى شغل بس اكيد هيلاقوا يعنى ميشو ده مسيحى ومعندوش مشكله فى دبح الخنازير اهو وبعدين فيه حاجه للاخوه اللى بيقولوا ده اضطهاد اقوله اتلهى على عينك لان امبارح مسيحين ومسلمين بيربوا الخنازير دى ولما جابوهم فى اللقاء بصراحه كنت اول مره اعرف ان مسلمين كمان بيربوا الخنازير يعنى لو قولنا خراب مش هيكون على مسيحى بس فاتبطوا بقى زى البط البلدى كده واهمدوا ومتالفوش وخلى اوباما ينفعكوا جتكم القرف التعليق الظريف بقى اللى فعلا اكتشفت اننا بنستورد غباء والناس بتتعطاه حقن

تسقط الحكومة المفجوعة

مجموعة من الوزراء و كبار رجال الأعمال فى مصر راحوا استوردا كمية كبيرة من الفراخ المجمدة و طبعاً بأسعار مخفضة جداً و مش مهم اذا كانت الفراخ دى صالحة للإستخدام الآدمى و لا لاء ماهو الناس اللى فى مصر دول مش بنى ادمين اصلاً طبعاً الناس شافت الفراخ المجمدة و شكلها اللى يقرف و ريحتها الغريبة و طعمها الغير جيد فبعدت عنها و بدأت تاكل الفراخ الصاحية و البضاعة وقفت و حنفية الفلوس اتقفلت فجأة و خللوا بالكم من فجأة دى ظهر مرض انفلونزا الطيور و لأن الحكومة بتحبنا عملوا اعلانات فى التليفزيون بتوعى الناس بأهمية الفراخ المجمدة للمحافظة على صحة الناس من مرض انفلونزاالطيور و لما الحكومة زهقت من الشعب اللى مش بيسمع الكلام اتجهوا لإغلاق محلات الطيور و قطع أرزاق الناس و مش مشكلة اصحاب المحلات دى لما يشحتوا و لا يجوعوا و الناس اللى بتشتغل عندهم يقعدوا فى البيت من غير شغل لكن المهم ان الفراخ المجمدة تتباع و لما البطالة و معدلات الجريمة تزيد محدش يسأل إيه السبب أهم حاجة محلات الفراخ تتقفل و خلاص و السبب الظاهرى هو القضاء على أنفلونزا الطيور فى مصر أما السبب الآخ فلا يعلمه إلا الله


هو مين جاب القلعه جنب الكشك بتاع السجاير ومين اخد ابو الهول من مكان بجد ده كان احساسى لما قريت التعليق
يعنى مثلا كل العالم فيها الفلونزا الطيور ومصر الوحيده اللى اتوكست فيها اكتر علشان الناس معندهاش وعى ومش عاوزه تفهم ومش عاوزه تحافظ العالم كله كان كداب ومكنش فيه الفلوكسا الطيور
هما الوزرا بتوعنا ورجال الاعمال سيطروا على العالم يااااا ده الفراعنه تاثيرهم قوى اوى يا جدعان طيب الخنازير كمان كدبه ابريل مثلا انا بجد مصدومه هو الناس بقت عايشه فى نظريه المؤامرة ليل ونهار

اه فيه وزرا مش كويس ورجال اعمال بس ده فى حدود مصر يعنى مش هيسيطروا على المكسيك يعنى ولا اسرائيل ولا اى بلد ولا يمكن ليه لا بركاتكم يا رجال اعمالنا هى دى الفراعنه ولا بلاش

لا دى مش مؤامرة ده غباء ده غبااااااااااااااااء بجد انامش عارفه واحد يكتب تعليق زى ده على خبر دبح الخنازير ازاى وواحد تانى الناس بتقول هندبح فى المدبح والمصانع وفى الاماكن نفسها بتاعت الخنازير التانى يقولك انتم هتكفوا كل ده ازاى هو احنا عندنا امكانيات يا لهوووووووى يعنى الناس قالت وانت تقول امكانيات لا بجد كده كتير ما هما قالوا الحل يعنى احنا بنشكك فى كل حاجه وخلاص ولا ده غباء هو يعنى لو تشكيك تبقى مبلوعه انما نوصل لحاله التردى دى والغباء ده كده كتير عليا انا شخصيا بجد القرار انا شيفاه صح ومفيش مسيحين معترضين بالعكس معندهومش مانع

موضوع اقباط المهجر
النكته دىىىىىىى جديده ومن عندى ومش هعلق عليها لو حد مسيحى يدخل يقول

عاوزين يسمحوا للمسحين يدرسوا فى الازهر تيرررررررررررررارررررررر طيب انا بس هفهم اخوانا ان معنى كده هيقرا وهيحفظ القرآن وهيدرس شريعه وفقه وووووووو وحاجات كتير فى الدين الاسلامى هل هما عندهم استعداد لده ولا ايه اقباط المهجر مقومين الدنيا ومش مقعدنها علشان ده طيب دا انتم عندكم مش هيوفقوا يبقى ليه على فكره هما بيعملوا اى فتيل وخلاص اى حاجه تعمل قلق بين مسلمين ومسيحين وبس ويا ريت ننتبه لده




كان معكم ابى هانم المفش


حكمه الامبراطورة
لما تطصدم خليك مطاطى بس اوعى تطاطى

انا عندى القاولون اه بجد مش مصدقين اه انا دلوقتى متعصبه ومضايقه

شوفوا معايا المقتطفات الهايله اللى انا شايفه انها جاوبت بطريقه منطقيه على سؤالى بتاع البوست اللى فات

اه احنا عندنا نعره كدابه اى نعم ودى حقيقه مش راح اقبل فيها نقاش

وشوفوا السم القاتل

اولا
=====

دهشور بلد فقيره جدا من ضمن الاف القرى اللى فى مصر فيها ناس فقيره اوى ومتعرفش اى حاجه فى الدنيا غير قوتها اليومى وبس
الخبر هنا طبعا قريته عنه بتاع الهانم اللى من اسبانيا اللى جمعت تبرعات للمصرين وجت تديها لهم
طبعا ست عجوزه جدا باست ايدها
الجميل بقى انهم نشروا لها الصورة علشان الست كتر خيرها بتجمع لنا تبرعات وعلشان تعرف الناس قد ايه احنا مذلولين ومتهانين
انا مبلومش على الست الفلاحه دى بجد الفقر اللى هى فيه يخليها توطى على رجلها كمان انا بعيب على البلد القذرة حكومه وناس وشباب ايوه
فيه شباب البلاد دى المتعلمين لو كل واحد بدل ما هو متلقح على قهوة صايع ولا واقف على ناصيه ولا بيتفرج على مصيبه
ليه ميعلمش الناس دى ليه ميساعدهمش انهم يبقوا بنى ادمين
ليه كل واحد ماشى ماسك منديل على مناخيره ويقول ياى قرف
ليه كل واحدهولا واحد عاملين نفسهم مناضلين وعايشين جنب منهم قريه ولا هما شخصيا فى قريه متعلمش الناس دى وتعرفهم حياتهم تمشى ازاى
ولا احنا شاطرين نتنطط على بعض وخلاص
خلاص اشربوا
الناس اللى بتقول لا دى سياده مصر وازاى تعمل زياره من غير ما تقول
مش عاوزه بصراحه اقول لفظ وحش هكتفى بتيييييييييييييييت كبيره بجد والقفا اللى واقف جنبها متصور فى الجنب ده ايه
وبعدين سياده ايه ما خلاص ما كل يوم والتانى اى حد عاوز يدخل بيدخل عاوز يخرج بيعمل اللى هو عاوزه الحكومه المعفنه بس بتتشطر على الناس انما الغرب بيوطى يبوس رجليهم طيب سياده مصر فين مع اسرائيل سياده مصر فين مع الناس دى ولا هى سياده ورياله مصر بس مع اللى بيعملوا حاجه كويسه وعاوزين الشعوب يبقى عندها كرامه وعاوزين بلاد تتحرر من الاشكال الزباله يالا روحوا افتخروا بنفسكم بقى وكل واحد عمال يلطش فى اللى جنبه شويه اخوان شويه معارضه شويه رقاصه شويه فلانه ولدت شويه محدش يدوس على خيال ابو قردان وابو ودان والكلب الجربان
ابقوا قابلونى اذا البلد دى نظفت طول ما الاشكال دى فيها
جتكم القرف ربنا يولع فيكم
والشباب كمان اللى ملوش لازمه ربنا ياخدكم بدل ما تقعدوا على القهاوى والسيبرات وسايبين الناس ها بقى ومحدش بيساعد حد
بس فيه حاجه كمان انا بجد حيرانه يعنى زمان كده كنت اسمع واعر فان الفلاح عنده عزة نفس وكرامه دلوقتى ايه اتنشلت مثلا
اللى يلعن الحوجه اللى فيها الناس

الخبر التانى

بما اننا مش عاوزين نتعلم ولا نأخد بالنا من حاجه وعلشان ظهرت الفلونزا الخنازيروقبلها بكام يوم اطفال ماتوا بسبب الفلونزا الطيور اللى بقالنا بنوعى فيها الناس من سنين ومفيش ام فايده فى القصه دى
يبقى نعمل توعيه للطيور والخنازير يخلوا بالهم من بعض واللى يتعب التانى يبلغ عنه طالما الناس مش عاوزه تفهم ولا تستوعب
يالايمكن الحاجات دى يكون عندها مخ ومش واخداها فتونه وفاتحه صدر

الخبر التالت

الحكم على ظابط شرطه ومندوب بعشر سنين وغرامه

والنبى يا حج عادلى بالمره اعمل تحليل لكل الظباط كل فتره علشان تطلع باقى البلاوى
ولا نص الحشيش فى جيوبهم والبانجو يا بيصلحوا بيه عربياتهم ويعملوا واجب مع الصنايعيه يا بيدوه هدايا ويشربوا مع اصحابهم على فكره ممكن الظابط ده ميكونش له ضهر يتسند عليها علشان كده عملوا فيه ده اصل دول كمان فى تصنيفهم بينهم اللى له ضهر سورى ميضربش على قفاه منظومه قذره كلها
يعنى كمان عشر سنين فى المخدرات ومفيش حاجه للتعذيب
عرفتوا بقى بلدنا نظيفه ازاى

تحديث:- الناس بس اللى زعلانه علشان انا متعصبه اهدى ليكوا الخبر ده كمان علشان المفروض انى ابقى هاديه
محاسب اتقبض عليه بيلم الفراخ الميته بالفلونزا الطيور وكان هيبعها مجمده للناس ها كده المفروض ابقى هاديه صح
علشان شايفه انى عايشه وسط ناس عندها ضمير انا هاديه اهو ومبسوطه ومش متعصبه ومنشكحه

انا كده مخلصتش اخبارى انا لسه شويه واتحملوا اللى جاى بقى معلش

ملحوظه:= اللى بيقول المدونه بتقوله رساله ان فيها فيرس يبقى يمسك اى شبشب جنبه ويطرقع للفيرس
قال فيرس قال يا شوباب هتلاقوا بس الفاير وول عندكم هو اللى بيعمل كده وبعدين قولت افتحوا بالفلوك او الفاير فوكس
يالا اتمسوا بالخير
بالنسبه للرد على البوست اللى فات الكام بوست الجايين بما فيهم ده هيردوا عليكوا جميعا

كان معكم مراقب اول الفالوكسا الشعب المصرىحكومه وشعب الى هانم


حكمه الامبراطوره

بلد المتغطى بيها عريان

تحديث:- لابد منه يا شوباب انا زيكم مستعجبه من اللى عمله رشيد واللى بقاله فتره بيعمله وعرفت من زمان لما وقف لعز انه كان هيقدم استقالته ففعلا رشيد بيعمل واجبه بس فى زمنا وفى مصر بصراحه بالذات شايفه انها عجيبه علشان محدش بس يفهم غلط

طبعا متفقين الا ما فيه وزير يوحد ربنا عندنا عدل وابن حلال مصفى كده وبيعمل نيته لله واحده
وعلشان منكونش ناس ظالمه حتى اللى بيحاول يبقى كويس بتعدى الايام ويتعدى من مرض الاستهبلال والاستعباط المخيم على الوزارات
وده بدلهم عذرهم فيه بقول من عاشر القوم بقى فلازم عدوى اللامبالاه والسرقه وتطنيش الشعب واعتباره كماله زى كده كماله الكشرى
بس ان يطلع وزير لسه بيفكر ويتصدى للناس ويتصدى للاحتكار حتى لو بهزه صغيره كده فده بصراحه اللى مكنتش مصدقاه
وخايفه تكون بس طريقه لهد الغير او تصفيه حسابات
الموضوع بصراحه انى شايفه رشيد بيعمل حاجات كويسه
يعنى موضوع الحديد بعد ما ولع والناس بقت كل همها تشترى سيخ حديد تحتفظ بيه للزمن وتضارب بيه زى اللى بيضاربوا فى البورصه والستات تعايير بعضها ودى تقولها انا جوزى عنده سيخ حديد والتانيه ترد تقولها اوووووه نووووووووو انتم على فكره فقراء خالص انا جوزى عنده اتنين
وفى المناطق الشعبيه بقى اقتناء سيخ حديد فى البيت من الاثاث المطلوب لجواز اى عروسه
وبجد وفجأه كسر رشيد شوكة عز وفتح استيراد الحديد اللى اجبرت عز انه ينزل الاسعار بطريقه كبيرة جدا

وقبلها موضوع الرز بعد ما كان الكيلو وصل لخمسه جنيه رجع الكيلو باتنين جنيه وده علشان قراره انه يمنع تصديرة

تالت حاجه بتاعت الاسمنت دلوقتى والخبر هنا انطحوا واللى مش هينطح هيتشك فى صوابعينه ان شاء الله
كل ده جامد وحلو جدا
راى بقى شخصيا ده راجل عمل حاجات كويسه تعالوا فى المقابل
اولا الحديد فعلا نزل وعز اتلم وحط بطه فى بقه وسكت والموضوع ماشى وطن الحديد فى النازل وبالتالى كل التجار التزموا يبقى كويس مع ان فيه البعض اللى ملتزمش بالموضوع وفضل سايب الحديد سعره عالى وده بىق الاستغلا يا جدعان مينفعش الحكومه تعمل حاجه واحنا نستمر فى استغلال نفسنا وغيرنا ده صعب اوى احنا كده هنرجع نولع فى بعض
ثانيا نفس الموضوع فى الرز يعنى كارفور الرز فيه واى سوبر ماركت مش اقل من اربعه جنيه مع انه عادى فى اى مكان باتنين جنيه كبيرة اوى اتنين جنيه ونص يبقى هنا العيب فى مين ردوا انتم
موضوع الاسمنت فجأه يوم ما بتوع العربيات النقل اللى ربنا يهديهم يا رب ويعقلوا بدل ما بيعدوا بعض على الطريق وتلاقى واحد منهم مسطول ولا ضارب اى مصيبه تشيله بيجرى وبيأخد غرز والله شوفتها بعينى وطبعا اللى معندوش عربيه مش هيعرف معاناه اللى معاهم عربيه من الاشكال دى لانهم ولا يفهموا قواعد مرور ولا غيره
ولا ناس بجحه بتعمل اعتصام علشان انهم يلغوا موضوع المقطورة عاوزنها تفضل عاوزه اقولكم ان تقريبا 80% من الحوادث على الطرق سببها النقل ميحسش دى اوى غير اللى عايش قريب من طريق هاى واى انا بلا فخر كل اسبوعين عربيه مولعه على الدائرى غير عربيه مدخله 15 عربيه تانين فى بعض
المهم دول طبعا فئه منيله بنيله واللى كان موافق على اضرابهم جاهل ومش فاهم حاجه خالص وده مش موضوعنا هبقى اتكلم فيه بعدين
المهم البهوات بقى لما اضربوا بقدره قادرة برضه الاسمنت غلى طيب بناء على ايه قالك التجار
يعنى ام البلد دى كلها مفيهاش غير العشرين عربيه اللى اضربوا يقوم التجار يشتغلونا طبعا دى حجه اخدها منعدمى الضمير الحراميه بمعنى اوضح علشان يكسبوا اسرع وخاصه تجار الحاجات دى لانهم حراميه رسمى بختم الجمهوريه كمان
فى النهايه رشيد كان حقه علينا زى ما بطلع تربنتين عنيهم تهزيئ انى بصراحه اشكره على الكام موقف اللى جامدين فعلا
وكمان اوضح ان العيب هنا فى السلع والحاجات دى مش الحكومة وبس لو احنا ساعدنا وبلغنا عن الاستغلال اللى احنا فيه بيتهيأ ليه البلد دى ممكن تتعدل فيا ريت محدش يفرط فى حقه ومش هنخسر حاجه اذا لقينا واحد بيبعي غالى سبناه ورحنا لواحد تانى او رفعنا سماعه التليفون وقدمنا بلاغ
بس كفايه عليكوا كده انتم رغايين كده ليه

كان معكم مدير اول مرور كوكب البطابيط والخرفان ابى هانم

حكمه الامبراطورة

إللى يدوق الحرام ياكل ما يشبعش

بقالى فتره شاغلنى موضوع هام جدا طبعا مش هقعد زى الهبله اللى مسكوها طبله وارغى فى موضوع التحرش بتاع العيال السيس الهفأ بالبنات ولا الستات
هى حلها معروف اديله باللى فى رجلك ولو اعترض غزيه بالمطوة او بابو ورده وخلصى من الاخر
وخلصينا وخلصى نفسك

الاقوى بقى الناس الكبيره ايوووووووون اللى مثلا تخطت الخمسين او اواخر الاربيعينات وانت طالع دول بقوا موضه جامد بالقوى يعنى تلاقيه مركب طقم سنان وبيتنحنح ولا شعره كله ابيض ولا بلاش علشان فيه ولاد صغيره شعره طق من الغيظ
المهم وتلاقيه عماله يتسهوك وصوصو صو ونونو نو على بنوته ممكن تكون اصغر من ولاده
انا طبعا تصرفى الوحيد لما اكون راكبه العربيه ولقيت واحد من دول حل من الاتنين يا اطلع له لسانى زى العبيطه اى والله
يا اقوله عدى بقى يا جدو عيب كده هتتأخر على الدوا
طبعا انا بكون مضايقه اوى بس هو اللى بيجبرنى على كده
ومش هنقول هنا الرجاله بس فيه بنات صغيره عاوزه اطقم رقبتيها وتفضل رقبتيها مددله على سدرها كده قدامها علشان ايه دول بقى عاوزين جدو من دول يدلعهم يقعدهم فى مكان يجيب لهم هديه
والعيب هنا على جدو المتصابى وعلى البنت وعلى المكان اللى بيرضى اصلا يقعدهم
المنظر بيكون مقزز جدا ومقرف اوى بجد
طبعا ده جاى من عادات من زمان توارثت فى بلاد كتير ان الراجل يبقى عنده 70 سنه ولا اكتر ويروح يتجوز واحده قد احفاده
علشان عنده طين على دماغه طيب فسيولوجيا هيديها ايه طيب معنويا هيديها ايه
اعتقد كل الفكره ماديا فى اهل بيبيعوا بنتهم وبعدين يخلفوا عيال عندهم عاهات ويطلعوا معقدين لان ولا اب هيدى حنان وحب ولا ام هتكون فايقه لانها هتحس ان شبابها ضاع او مش هيخلفوا من الاساس

ودلوقى برضه ماديه فى بنت لسه عيله عاوزة تجيب موبيل وتلبس من مكان شيك وتتمشى فى عربيه
بس الموضوع ده حله صعب انا معنديش مشكله فى الطموح بس عندى مشكله فى طريقه تنفيذه ما يخلصوا تعليم ويشتغلوا وتطلع عنيها ليه حب السرعه فى كل حاجه

وانا بلفلف كده ادور على حاجه اشربها فى التى فى قصدى اسمعها لقيت اغنيه تحفه لديانا حداد والنبى على قلبكوا لتشوفوها شويه وبعدين نتخانق فى الكومنتات بقى
لما سمعتها افتكرت اغنيه قديمه اووووووووى مش فاكره من قد ايه ولا بتاعت مين بس هى دايما بتيجى لما اشوف الناس دى بتاعت ايه يا راجل انت ده ايه اللى انت عمله ده عيب عليك فى السن ده يطلع منك كل ده
فى النهايه ليه مطالب اتمنى من هيئه الانتصالات عدم توصيل النت للعيال الصغيره والعيال الكبيره برضه المنحنحيين وسحب عربياتهم وعقابهم فى البيت يقعدوا يعملوا شيرز ههههههههههه

يا رجاله وستات برضه اللى بتتنحنح على عيال قد ولادها
كل سن له رونقه يا ريت تعيشوه كل فتره ولها اولاويتها
اسيبكم مع الاغنيه ونلتقى بعد الفاصل وكله يحضر شوم وكلاشينكوف ومدافع فى الكومنتات





ملحوظه :- فيه بوست على بيكيا يا ريت تحنوا عليه وتكلفوا نفسكوا والله شويه وتشوفوه منكن يعنى او سمحتوا


كان معكم رئيس مكافحه الاخلاق بنت ام حميده ابى هانم كعب الغزال



حكمه الامبراطورة


حبك في قلبي يا بهية زي حب الاقرع للكوفية

اولا صور وفيديوهات اسطبل عنتر على بيكيا يا ريت تشوفوها انطح هنا

ندخل فى الموضوع طبعا تقريبا كله عرف موضوع اسر ياسر واللى بيحصل واننا وقفنا معاها معنويا وده اللى كانت محتاجه له وعلى الرغم من اللى حصل ناس دخلت تقولها اتحجبى واللى دخل يقول متخرجش لوحدها وكل واحد قال اى كلام
خلونا نتكلم براحه ومش هرد على كل عقليه لانها بتحكم من زاويه واحده وبس
اولا المجتمع طبقات كل طبقه تلبس اللى مناسب ليها وفى الوسط بتاعها هو ده اللى كويس وبلاش يا ريت نحكم على بعض من طبقتنا احنا ومش معنى ان البنت مش محجبه تبقى قليله الادب والعكس برضه على فكره برضه كل طبقه فيها المحجبات والغير
ومش بتكلم عن حجاب او غيره لان ده شئ مفروغ منه
ثانيا
المحجبه كمان بيتحرش بيها بيها انزلوا فى اى مكان او اسالوا المحجبات وانتم تعرفوا اللى بخمار وكان فى ايدها بنتها فى اكتوبر واحد اتحرش بيها فى وسط الشارع

سفاح المعادى كان بيضرب منقبات ومحجبات يعنى كله سواء

مره زميل ليه قالى واحنا رايحين شغل فى مكان استنى ادخل قدامك علشان كان فيه شباب واقفين قولت له عيب انت معندكش اتيكيت قالى يا بنتى العيال هياكلوكى بعنيهمم قولت له انا لابسه حاجات واسعه اهو
قالى عارفه وبما انى ولد يعنى ممكن بنت تشدنى تكون لابسه خمار وواسع جدا قولت له ليه قالى دايما الواحد بيشتهى اللى مش شايفه اكتر
يعنى برضه بيسيبوا خيالهم المريض يعيش
وده بينعكس على البنت لانه بيطول نظرته ليه وده اسمه برضه تحرش للى مش عارف
التحرش بالكلمه ومش بالفعل ولمس الايد بس
طبعا هو يومها اتعلق من قفاه منى شويه وقلبت بنكد وخناقه بس الحمد لله الاصابات ضغيفه خلصنا الشغل وراح خد حقنه فى المستشفى لمده 21 يوم بس هو كويس واليف مبيعضش دلوقتى

اللى يقولى متخرجيش من بيتك لوحدك هقوله اتلهى على عينك لان انا مثلا من ضمن الناس اللى بتشتغل وكتير زى يبقى نقعد فى البيت ازاى واصرف على نفسى ازاى يبقى يا حد يقول كلام وحل صح يا يحط لسانه تحت سنانه ويسكت خالص
كان فيه واحد والله بيقول سبب خراب اقتصاد مصر الستات بس نسيت اقوله يعنى الست الوالده لما اتحملت مسئوليتك لغايه ما بقيت شحط برضه كانت بتخرب فى اقتصاد مصر
عجبى على التفكير بجد

المهم طبعا مش تضامنا معاها هنا ولا على الفيس بوك ولا تحت بيتهم اصلا هيرد لها الجرح اللى من جواها ومش هيعمل حاجه اكتر من انه سابورت ليها معنوى يقويها لان الكلمه اللى بتتقال للبنت هى الوحيده اللى بتحس بجرحها واحنا عندنا عيال عاوزين ضرب النار فى ميدان عام بعد ما يتعلقوا من بوكسراتهم الحمراء ام دباديب وبينك دى

لانهم بجد كل حاجه ليهم بقت تيك اواى ومبيعرفوش يفرقوا ما بين بنت محترمه وبنت بتجرى وراء اى كلب فى الشارع يبص لها حتى ولو بعد كده اداه على قفاها هتفضل تحت رجليه
فبيعاكسوا بالفاظ زباله شبهم بالظبط وبرضه ده تحرش
وبعد ان شاء الله ما الولد يتعاقب هنرجع لعنب ديبو يعنى هيظهر واحده تانيه وتالته
انا بقى عندى اقتراح ومش عارفه انفذه او تساؤلات ببساطه

وزراه الاحلام قصدى الاعلام قرفتنا اهلينا باعلانات الخواجات والعيال بتوع الازهر ومتتحبرش بيهم
ليه بقى مبيعملوش كده مع بنات البلد ويعرفوا الناس ان فيه احكام قانونيه ويعرفوهم يعنى ايه تحرش
ويبقى سهلوا على نفسهم وعلينا قرف وبلاوى كتير بدل ما ابو شنب بريمه يطلع ويقول مفيش تحرش ومش ظاهرة

طبعا بقول اعلام لسبب واحد ان ماشاء الله الشباب اليومين دول وقتهم مش فاضى انهم يقروا حاجه ولا يتابعوا وفعلا ممكن الولد اللى عمل كده مع اسر ميعرفش حاجه عن اللى حصل مع نهى
اذا كان فيه ناس مش عارفه ايه اللى كان بيحصل فى غزة
وجايز ابوه برضه لما استفذها ورده العبيط ويوقلها انتى اكبر من ابنى وابنى مش هيعاكسك
بجد نفسى اقابله واقوله انت متعرفش ان لما حد يجيى يقولك ابنك مدمن متشتمش الراجل والمفروض انك تكشف على ابنك
انما احنا ومن عاداتنا المتأصله لازم نرمى اللوم على غيرنا
يعنى هو رمى اللوم على التانيه وقالها انتى اكبر منه عمره ما هيجيب الخطأ على ابنه ايوه هى اللى غلطانه علشان اكبر منه كنتى اصغرى شويه يا اسر بقى المشكله فى الشماعه مش هتخلص
يا عالم الاعلام مش الجرايد الاعلانات فى التى فى هى اللى هتعمل ده

بس اللى فعلا مش فاهماه الولد اللى عمل كده مع نهى محدش هددها يعنى ولا لواءات مدرعات
اشمعنى ده
الاولاد بتوع المهندسين محدش كلم البنات
بجد لازم يبقى فيه تساوى شويه فى الموضوع ويصلحوا ام الخرم اللى فى المله فى القضاء ده ويشوفوا خالتى نزيهه راحت فين يرجعوها
ولحد ما يبقى فيه حاجه مقنعه على كل بنت عمل الاتى

1- لبس حزام سهل القلع تلسوع بيه اى كلب يبص لها طبعا البنات اللى حبين ده هما حرين عادى يعنى حبين يتعاكسوا ويتحبرش بيهم
2- اوعى تصوتى لان صوتك هيروح فى الهوا ومحدش من الشعب هيعبرك وفرى صوتك للاتصال بالشرطه بسرعه مع تجهيز قاموس شتايم شحن ذاتى فى لسانك
3- كل بنت عليها انها تتدرب كونغفو او كارتيه وابعدوا عن الشيبسى بيجيب امراض علشان ترزع البيه علقه محترمه
4- يا بنات اوعوا تخافوا من اى ولد لان اللى بيعمل كده اضعف من انه يقف قادمك ولو حسه انك قويه فعلا هيخاف ( مجربه قبل كده )
5- انا البس اللى انا عاوزاه طالما ماشيه محترمه ومش معنى حتى ان الواحده لابسه اى حاجه ان ده يدى الحق لاى عيل برياله حتى لو كان كبير فى السن برضه عيل انه ينتهك خصوصيتى سواء كنت محجبه او غير

6- كل واحد يربى عياله ونفسه واللى حوليه لو قدر

ملحوسه اللى عنده افكار غير بتاعت الاعلام والاعلانات يا ريت يقول عليها واللى يقدر يساعدنى فى انى اوصل الموضوع لحد يعمل الاعلانات دى يا ريت يقول برضه لان الموضوع مش هيقف غير بكده ومش عاوزه حد يقولى والتوعيه الدينيه انا معاكوا جدا فيها بس لما تتكلموا عن شباب بتقرا حتى اى حاجه انما اكبر عامل مؤثر فينا هى الاعلانات

كان معكم عميد اول مباحث برج الجزيره ابى هانم الشهيرة ببرعى المفش

حكمه الامبراطورة

قليل العقل داريه لا تبيعه ولا تشتريه

Create Yours @ NackVision