مفيش عذر لعدم كتابتى غير انى فعلا الذكريات والتفاعلات انتهت فى مصر

الحياه فى مصر بتخليك عامل زى انبوبه الاختبار كل يوم فى تفاعل وفرقعه وهدوء وشعرك يوقف وتبقى شبه فيدوديدو او شبه العيال اللى ضاربين شعرهم جل وطالعين من كهرباء 300 فولت

بجد الحياه فى البلاد البلاستيك مفيهاش ذكريات انت حياتك شغل وشوبينج واكل ونوم

لا شئ مفيد ولا مضر اللهم انك تطلع روح شريك حياتك وانت وبختك بقى يا يطلع ابن حلال متصفى ويتحمل جنانك زى زوجى العزيز

يا يطلع مربى كتاكيت فى دماغه ويطلع شبه الرجاله فى الافلام الابيض واسود

يعنى انا هنا بالصلاه على النبى اليوم بيعدى عليا بدون ذكرى كل الايام شبه بعض

مبقتش عارفه اكتب عن حاجه مشاعر متجمده حسه نفسى شبه زجاجه البيبسى اللى اتجمد فى الفريدج ومستنيه الفرج علشان تفك

سامعه واحد فلعوطه هيقولى اكتبى عن مصر اقوله اكتب ايه واحنا فى الهم سواء ما هو اللى ميشوفش من الغربال يبقى اعمى

يا هكتب ونتخانق يا هكتب ونتخانق محدش بقى طايق حد بس ليه ملاحظات على السريع

عمر سليمان ... الذئب صاحب القبضه الدمويه لا يكل ولا يفل وحكم من حديد

الاخوان .... ارمله مطله بتجرى ورا ميراث جوزها لابنها اللى مجبتهوش منه ولما خدته اتهبلت وقلعت ملط وجريت فى الشارع

دراويش السلفين ... لو الميه بتجمد فى الصيف هفكر اصدقكوا

ابوسمعايين ....... مش كدا يا عم الكوتكوت انت ناقص تطلع ليا فى الكويت هنا من كاوتش العربيه ولا الاقيك باعت ليا على الواتس اب

بعض الاشخاص اللى اتحولوا من الثورة وضدها معلش يا كتاكيت اصل الثورة مش رحله طالعينها تقضوا يومين وترجعوا تانى تأخدوا تان فى لاشمس الثوره طريق طويل لغايه لما البلد تنضف واذا كنتوا من اللى قضوا عمرهم برا مصر ورجعوا فى وقت غلط يستمتعوا بفلوسهم هوووووب الثورة بوظت سهراتكم اقولكم فيكوا تطلعوا برا البلد تانى

الطائفيه الكلمه اللى بترعب الناس وكلنا بنحاول ننفيها بلاش تترعشوا كدا منها ويجلكم تبول لا ارداى لانها موجوده فى كل بلاد العالم

سؤال على الهامش هى كل الجنسيات بتكرهه المصريين ليه هو احنا علمنا على قفاهم اوى كدا طبعا بستثنى الناس المحترمه بس يا ربى حتى البنغالى بيكرهنا يخرب بيت ام الحقد الوسخ

رساله لواحده خيخه عندى خبر حلو وحياه امى وامك ما ها اعبرك ولا اقوله لكى وخليكى تتنطى زى السمكه الصاحيه فى طاسه القليه :P

اشوفكم قريبا

حكمه الامبراطوره

انا لست نادمه على عدم معرفتك بى ولكنى نادمه على عدم فهمى لك

صباح الفل على الحلوين
النهارده بقى وبعد غياب دام اربعه اشهر عن قاهرة المعز اللى بقت تكيه ال مبارك اكتب لكم باحاسيس مختلفه تماما عن الشخصيات او الجنسيات الاخرى والجنسيه العربيه
بعد ما وصلت الكويت بعشرين يوم بس قاعدهم فى البيت بقشر بصل وتحولت لانثى العونكبوت اللى بتغسل وتطبخ ومستنيه جوزها بس الى كائن منكوش زهق من القاعده جدا فبدات ابعت السى فى بتاعتى فى اماكن واتعرض عليا شغل والحمد لله
واشتغلت يعنى بعد عشرين يوم من وصولى اشتغلت فى مكان كويس الحمد لله وبوظيفه هايله جدا
معايا فى الشغل واحد زميله ست كبيرة تبلغ من العمر اثنان وستون سنه من سيرلانكا مسلمه اسمها شيرين بس بنقولها شيرودا
بقى فى الست دى انها برغم كبر سنها وان فعلا عندها مشاكل فى رجلها مش بتكل ولا تمل وعلى الرغم من ان ولاد بس برضه عاوزه تصرف على نفسها
تحملت اسره وبيت وزوج كسول مأنتخ وسابت بلدها وجت اشتغلت هنا بقالها اكتر من ثلاثون عاما
شافت كل الويل فى حياتها وجحود كتير من ابنها العايش ووفاه ابن اخر
وعلى الرغم من كل هذا بتعمل فى صمت تام وقويه جدا ومخلصه فى عملها
الاغرب بقى ان شيرودا دلوقتى عايشه مع ابنها اللى كان مهمل فيها ومش بيعرفها غير علشان الفلوس وبس بعد ما جابته الكويت وامنت له شغل عاشت معاه بعد عشر سنين هو وزوجه ابنها
وعلى الرغم من انها حكت ليه انها مش هى اللى اختارت زوجه ابنها
بس الموضوع مش مسبب لها مشكله وهنا مربط الفرس بقى
زوجه ابنها دى بتشتغل من الصبح للساعه اتنين الضهر وترجع من الساعه خمسه الى الساعه احدى عشر وعندها تلات اولاد اه فيه شغاله بتعتنى بيهم
بس العجيبه جدا انى عمرى ما سمعت شيرين بتشتكى من زوجه ابنها ولا عمرها قالت دى عملت ولا سوت
حتى لما بتقول عليها فى موقف فى شغلها بتحكى الموقف كله مش بتاخده بازل بمعنى مش بتسيب اللى مش على هواها وتحكى الوحش عنها وبس
لا بتحكى كله ولما مره لقيتها بتشترى حاجه من الشركه بقولها متنفعش ليكى قالت لزوجه ابنى

هنا بقى ليه واقفه كبيرة

ليه الحموات فى مصر مش كدا يعنى ليه تبقى الوحده بعيده عن حماتها اصلا وملهاش دعوة بيها وحماتها تسيب كلام طويل عريض او مواقف طويله عريضه وتمسك فى كلمه غلط اصلا ومش اتقالت او موقف مش اتعمل
ايه الفرق شيرين دى ست وبنى ادمه والحموات فى مصر نوع تانى مثلا
انا مش ها قول كل الحموات طبعا
انما الاغلبيه العظمى
والانكد بقى والانيل واللى يخلى الواحد يشد فى شعرة
اخوات الازواج يبقوا عاملين زى المنكاش الاهبل اللى بيدور على اى حاجه فى اى وقت لاى مشاكل
يعنى من الاخر احنا فى مصر ولا منا ولا كفايه شرنا فيها ايه لما كل واحد يخليه فى بوزة لما نعوزه يعنى
فيها ايه لما كل واحده تتلهى فى نفسها ولا كل حما تبص ان اللى اتجوزت ابنها دى مأخدتش يعنى ملك انجلترا ولا حاجه دى خدت واحد عادى بنى ادم له اتنين رجلين واتنين عنين واتنين ودان كمان يعنى بيرمى هدومه وبنعملوا له اكل وبنرتب حياته لانه كان معتمد على الحجه فى ترتيب حياته فحضرتك يا حجه بتحملنى مسئوليته كمان نتيجه دلعك ليه حضرتك
لاااااااااا وكله كوم والفكره اللى عندهم ان مراه ابنهم بتقضى على مرتبه
والغريبه ان الناس اصلا مش عارفه مرتب ابنها كام ولا بيروح فين ولا متشطب عليه ازاى
انما يقدروا يرموا كل حاجه على مرات الابن وبس
عمرى ما سمعت شيرين قالت كدا
عمرى ما سمعتها ببساطتها وشغلها وعقليتها دى بتقول دا عمرى ما سمعتها بتعمل ولا بتقول كدا على الرغم ممن انها مش متدينه ولا تعرف فى الاسلام ولا الدين غير انها اسمها مسلم وبس الناس دى فعلا حياتهم كدا بس اخلاقهم كتير كويسه

السؤال بقى الجبار

هى ليه الناس شاغله بالها باللى مبتفهمش فيه
ليه الحموات فاكرين ان مرات الابن دى خدت اللى مش بيتاخد مع ان الرجاله كلهم كربونه واحده مش بيختلفوا غير فى المسمى الوظيفى التعبان اللى هما فيه

ليه اخت الزوج حاشرة مناخيرها فى اللى ملها ش فيه فى النهايه واللى مش بتفهمه وهى هيدور عليها الكأس ومتفتكرش ان حماتها ولا مرات جوزها ها تعملها على انها برنسيسه طيب ما تغيروا من فكركوا بقى
صحيح مهاه عليت الشهادات ا
ليه كل واحد فى مصر مش بيخليه فى بوزه ولا فى حاله ويريح نفسه ويسيب حياه الناس تمشى لوحدها

يالا اللى يجاوب على دا هيكسب معانا ربع جنيه مخروم يصلح بيه امخاخ الناس الغلبان دى علشان فعلا بتصعب عليا

ملحوظه :- اللى هيقرا كلامى ومش هيفهمه يخبط دماغه فى الحيطه واللى هيقراه وياخده على سدرة يبقى بالشفا ان شاء الله وصحه وعافيه

كان معكم ابى هانم كايده العزال انا من يومى


حكمه الامبراطورة

من راقب الناس مات من الفرسه يا خالتشى