ماما وبابا دقه قديمه

لااااااا استنوا أزيكم الأول الحمد لله أنا محدش اعتقلني ولا طلبوا بقطع الكهربا عن كوكبى علشان البوست اللي فات وفلت زى القردة ههههههههه وقاعدة على قلبكوا على طول

العنوان اللى فوق ده مش أغنيه مش هنقضيها مراجيح يعنى اصبروا دى الأخت العزيزة صاحبه مدونة (كلام بنات) خبطتنى بدعوة فى وشى انى افتح الكلام فى المشاكل الاسريه حلو قوى الكلام ده على اساسه انى المتحدث الرسمى لصينيه المشاكل المصرية الأسريه

نبدأ بقى وزى كل مرة البنات لوحدهم والأولاد لوحدهم والآباء اللى هنا يقعدوا فى وسطنا.

كان الاخ العزيز صاحب مدونة (انا حر) اتكلم فى الفجوة اللى بين الاباء والأبناء واننا مش قادرين نفهم بعض طيب هسأل سؤال واحد بس وجاوبوا عليه لو انت او انتى قولتوا سر لماما او بابا ونفس السر ده لصديق او صديقه مين هيحتفظ بالسر ومش هينشرة ولا يطلعه بره لما تزعلوا ولا تتخانقوا مين هيغير عليك ومين هيغير منك ..............

هتقولوا مش كل حاجه نقدر نقولها لا هقولكم كل حاجه البنت بتحتاج امها وهى مراهقه والولد كمان بيحتاج والده او حتى اخواتهم الموضوع سهل احنا بنتعامل معاهم على انهم دقه قديمه او زمنا غير زمنهم او هما كائنات انقرضت ده غلط انا معاكوا فى ان الزمن غير الزمن بس هما الخبرة هم الحنيه هم القلب الدافى هما حاجات كتير ومش هجيب آيات قرآنيه ولا احاديث كلكوا عارفينها واقولها هتقولوا مش بيتكلموا معانا هقول لان المفروض الصغير هو اللى يروح للكبير بلاش النرفزة والبرطمه فى السر اللى بنعملها (اصلى بعملها كتير هههههههههه) على فكرة كل ما الأب والأم بيكبروا كل ما بيحتاجوا حنان اكبر واهتمام مننا عارفين المشكله اللى حكيت عنها تخاطيف (طبعا هتموتوا وتعرفوا ايه هى بعينكوا ) كده ما بين امى ووالدي حلها كان فى حاجه بسيطة قعدت معاه بس ساعه ونص هو يتكلم وانا اسمعه ومكونتش بقطع كلامه لغاية ما فى النهايه قولت له كلمه واحده وهى اللى حلت كل المشكله الحمد لله (ربنا يستر بقى من الحسد عليهم اروح الاقيهم مسكين أنابيب الغاز لبعض)

بجد يا بنات ويا ولاد اهلينا بيحبونا جدا ممكن ميكونوش بيعرفوا يعبروا عن مشاعرهم نحيتنا او ممكن يعتبروها ضعف بس ايوة يا صديقتى صاحبه مدونة كلام بنات والدتك شيفاكى حوريه وقمر وكل الصفات الكويسه ممكن تكون مش قادرة تعبر لكى هى مش صحبتك علشان تستنى منها كلمه شكر هى مستنيه دايما انتى اللى تشكريها احنا اللى مش قادرين نفك الحواجز ما بينا وبينهم فيه ناس هنا متجوزة صح انا شايفه أستاذى الطائر الحزين ولا استاذى عصفور المدينه وخيخه ورودى كل دول اباء وامهات لازم تحسسوا ولادكم بحبكم وعطفكم لازم منكونش عايشين فى بيت واحد وكأنه فندق بنام فيه ونمشى يا شباب ادوا وقت لاهليكم بجد الصبر حلو اتقربوا انتم بلاش تبعدوا ومتخافوش منهم مهما انفعلوا فهيكون لمصلحتك بصراحه انا شايفه العيب فينا احنا شباب متهور متفشلح متخنشر متشعوط ومستعبطين ووكلين مستهبله كمان .

ونسمعهم ساعات كتير جدا بيكون لهم وجهه نظر جايه من خبرة حتى لو كانوا ناس بسطاء ام ربه منزل واب موظف او حتى صنايعى او دكتور اى مهنه مهما ان كانت هنلاقى عندهم خبرة بالحياة اكتر بكتير مننا اتناقشوا معاهم هتوصلوا لحل الله يكرمكوا شغلوا عقولكم اللى ركنتوها دى وسيبتوها تتباع روبابيكيا ليه بنتحمل اصحابنا ومش بنتحمل اهلينا.

انا عن نفسى بجد وبأمانه اكتر اتنين اصحابى فى حياتى بابا وماما واخواتى كمان وبحبهم جدا وكمان مصحبه اخواتى قوى وبنقعد نهزر ونلعب طول الوقت مع بعض (ربنا يستر بقى من العين ومقومش اضربهم بعد البوست ده هههههههههه).

وفى النهايه بجد اللى عنده مشكله ممكن يقولها وانا اناقشه فيها بس الموضوع كبير وممكن يكون له فروع تانيه كتير هتكلم فيها بعدين.

كمان شايفه ان فيه اباء وامهات بسطاء جدا متعلموش احنا اتعلمنا واجبنا ناحيتهم نفهمه بالراحه وبالحب هما عندهم خبرة عمليه احنا عندنا خبرة علميه كمان نفسى اوصل للاباء يحتوى اولادهم بس مش عارفه ازاى بجد اكتر حاجه ممكن تمنع مصايب كتير فى الدنيا ومش هتخلى الاولاد يهاجروا ولا يغتصبوا ولا يدمنوا

ملحوظه مش خرفانيه :- يا ريت اللى عايش مع والده ووالدته قبل ما ينزل يطمن عليهم لو بينزل بدرى يروح شغل وده هيعمل تواصل شويه ما بينهم وتبقى دى البدايه.

كان معكم مراسلكم من قناة الاسرة أخصائى نفسى لعلاج الحالات المستعبطه من الشباب والاهل المنفضين لاولادهم آبى بتنجان