آه لما بتوع مجلس الشوعب المرجانيه يدلعوا الحيتان



ادلع يا رشيدى على وش الميه هههههههههههه هههههههههههههههه بجد هموت من الضحك ده خبر خدته من عند المصرى اليوم استنوا بقى علشان تموتوا م الضحك بس هقولكم لييه انا بضحك الاول علشان انا زمان قوى قولت لناس اصحابى فاضل حاجتين فى مصر معملوش مظاهرات بتنجان ولا اعتصامات فى غيط ذرة مشوى ولا اشجبوا ولا انتحروا ولا حاجه من اللى بيحصل ده هما مين ايوووووووون الظباط والقوات المسلحه وجه اليوم بقى شوفوا الخبر بس والله مش هعرف امسك لسانى اللى هربان من حكم بالاعدام ده وكمان النحله والدبور وزنهم اعذرونى بقى

قررت لجنة الدفاع والأمن القومي في اجتماعها أمس، (الا مين الست لجنه اللى بيتكلمواعنها وهى معموله للشرطه بس والموظفين لا طيب هى نازله مواصفات خليجى يعنى ولا مصرى ) إرسال طلب الإحاطة الذي تقدم به نائب الوطني جمال الزيني،(هو مش طلب الاحاطه ده اللى بيتحزموا بيه ولا انا بقول غلط هااااا يا سوووو ) حول تدني رواتب ضباط الشرطة وباقي العاملين في الجهاز (ايوة جهاز الارسال والاستهبال )إلي لجنة الخطة والموازنة لبحث زيادة رواتب الشرطة بنسبة ما حد يدينى قله بسرعه اخلص عليهم

وقال أمين راضي، وكيل اللجنة، إنه يعرف أن كثيرًا من رجال الشرطة لايجدون ما ينفقونه علي أبنائهم، علي الرغم من أنهم يحمون أصحاب المليارات، (حطوا ايدهم على الوجع اهو اعترفوا اقفش بقى فى دى يقصدوا ايه ها يا سامبا) وأوضح أنه ستتم إحالة طلب الإحاطة الذي قدمه الزيني إلي لجنة الخطة والموازنة مصحوبًا بتوقيع ١٠ من النواب

وحذر النائب محمد عبدالفتاح عمر، الوكيل الثاني للجنة، من أن هذا جرس إنذار (حد يفتح الباب يا جدعان )لكي لا يجد ضباط الشرطة أنفسهم في موقف لا يحسدون عليه، (يعلقوا خرزة زرقاء هتبعد عنهم العين) وشاركه الرأي أمين راضي بقوله: «نحن نحذر من تدني رواتب الشرطة، الذي قد يؤدي إلي إضراب رجال الشرطة (ههههههههه هما لسه فيهم اللى مضربش.... اه صح علشان مظلمش حد فيه بجد احممممم احممم) وإن لم يتحقق اليوم فقد يتحقق بعد بضع سنوات انا قولت تعيش المسقعه حرة مستقله ».

وشكر اللواء أحمد ضياء الدين، مساعد وزير الداخلية للشؤون النيابية والقانونية النواب علي مخاوفهم ومطالباتهم، (اتنين ليمون هنا علشان شايفه د/أجدع بنوته هتضرب دماغها فى الحيطه بسبب تدنى المرتبات بتاعتهم) مشددًا علي أنه لا يمكن أن يحدث إضراب في وزارة الداخلية وقال: غير وارد إطلاقا أن يقدم رجل الأمن علي القيام بإضراب أو اعتصام. وأضاف ضاحكًا للنائب محمد عبدالفتاح عمر: « ليست لدينا أجراس في وزارة الداخلية حتي ندقها».

ايوة هما عاملينها فيبريشن ههههههههه وقال ضياء الدين: راتب لواء الشرطة في الجدول العام للرواتب «٤٨٦ جنيها» أساسيًا والعلاوات «٣٧٦» جنيهًا والحوافز «١٤٨٦» جنيهًا أي بالإجمالي «٢٣٣٠» جنيهًا، مشيراً إلي تمتع ضباط الشرطة بخدمات أخري اجتماعية وصحية وسكنية تدخل في إطار الدخل الخاص بهم، (فعلا الملازم اول بيأخد تقريبا الف جنيه وموظف الحكومه اقل من كده) وعلق رجب هلال حميدة علي كلام ضياالدين(يا نهارعلى النفاق حد يجيب حبل اكعبله زى االقطه وندبحه ونخلص منه هو دلوقتى بتوع مجلش الشوعب المرجانيه بيدلعوا الشرطه على حساب الناس ) بتأكيده أن راتب اللواء لا يكفي لشراء «٣٠ كيلو لحمة (تصدق عيب فعلا 30 كيلو لحمه طيب والله الموظفين لهم لحمه الصومال قصدى الجنه»،

وقال من غير المقبول أن يكون راتب اللواء بهذه الدرجة من التدني (واطى واطى يعنى ايه مقصدش بتاع مجلس الشعب بقصد البتاع التانى المرتب ايه الناس اللى بتفهم غلط دى )في حين أن أي معين حديثًا بقطاع البترول أو الجمارك يحصل علي ثلاثة آلاف جنيه، وطالب بصرف بدل «ضبط نفس» لرجال الشرطة ليتحكموا في أعصابهم أثناء تعاملهم مع الجماهير(ههههههههههههههه لا مش قادرة ضبط نفس ازاى يعنى هو الواحد لما يمسك اعصابه يدولوا بدل ضبط نفس طيب عندى اقتراح يركبوا لهم منظم يدخل النرفزة بهدوء وبجرعات او يجيبوا لكل ظابط عسكرى يمسك له نفسه وكمان يدوهم بدل ضرب فى الناس يعنى اللى يعدى يوم وميضربش حقن ..قصدى اشخاص يدوله فلوس وبدل استهبال وبدل استعباط )
طيب حلو قوى الكلام ده وفعلا المرتبات متدنيه فى مصر وكلنا بنقول كده بس انا فيه حاجتين مش فاهمهم وركزوا بقى ليه يعنى ميكونش فيه زياده فى المرتبات سنويه مش 10% على الاساسى الهبله اللى بيحطوها كل سنه لا تكون اكتر او يعملوا زى الامارات ويرفعوا المرتبات مرة واحد فى القطاع الخاص والعام وبكده هيقضوا على موضوع الاحتجاجات والمظاهرات والاعتصامات والمسخرة دى اللى بتحصل وفعلا زى ما قولت الشرطه والقوات المسلحه هما اللى فاضلين ودول طبعا ميقدروش يعملوا الكلام ده .
تانى حاجه الساده الافاضل المحترمين المبجلين المستحميين بتوع مجلس الشوعب الهوائيه دول ليه مش بيطالبوا للشعب كله اشمعنى الشرطه بالذمه مش دى مسخرة اللى احنا فيها طيب يخلوا عندهم شويه من البتاع اللى لونه احمر ده ويطالبوا للناس كلها حد هيقولى ما هى الشرطه بشر زينا هقول اوكى بس انهى اقوى اطالب لفئه ولا لبقيه الفئات وابقى انا راجل عادل وحقانى كده ومحترم طيب يا ريت يعملوا قانون يعلوا بيه المرتبات بدل الفتات اللى بيرموها لنا وعلشان كمان الارتفاع الخزعبلى الهلامى اللى فى الاسعار ده وبكده هيقضوا على كرهه الناس ليهم وهيقضوا على جرائم كتير بقت فى المجتمع.
واخيرا فى ظل المهلبيه والرز باللبن اللى بيقوله بتوع الحزن الوطنى وانا من كوكبى هذا اعلن انى سأقوم بثورة خرفانيه جامده اخر حاجه وهقعد على حرف الكوكب وادلدل رجلى وادعى عليهم بتوع الحزن الوطنى متبعين سياسه الهشتكه والزغزغه بس بجد ربنا يكرمهم ضحكونى موت واللهى يوقع من كل واحد دبورة او يزوده نسر فى عينه بس علشان منعممش الوحشين القروده الدببه بس اللى بيعذبوا الناس وبيفتروا انما الناس المحترمه لا طبعا ربنا يكرمهم ويهديهم والتانين برضه ربنا يهديهم او يهدهم عادى اى حاجه

كان معكم سيادة حضرة الظابط ملازم اول نقيب امين شرطه متقاعد آبى هانم.

87 اخبط وقول رايك:

الطائر الحزين said...

شوف يا حضرة الصول
ايه مش شايف الشرايط كمان

معلهش العتب على النظر حكم السن بقى

مبروك الأول البنت بقت مأذون - مش موضوعنا

اما عن طلب الإحاطة

حضرتك فاهمة غلط

الاحاطة دى اسم الفاعل بتاع الحيطة اللى كلنا نضرب دماغنا فيها لو حد مش عاجبه اى حاجة هما عاوزنها

وبعدين صح ما الراتب فعلا صغير وميأكلش عيش حاف حتى

ومن هنا اى واحد عاوز يدخل ابنه الشرطة أو بنته كمان محدش عارف بكرة فيه ايه

يرجع فى كلامة بسرعه علشان الرواتب متدنية
بتقولوا ايه يا ولاد ايوة متدنية وبلاش الألوفات المؤلفة اللى بتندفع علشان الواد يقبل فى الشرطة


ويجعله عامر يا ست آبى

هتودينا فى داهية شكلك كدة


تحياتى

appy said...

استاذى/الطائر الحزين
ههههههههههه انت كده هتأخد كل الشيكولاته اللى فى كوكبى ليك لوحدك بس والله بفرح لما الاقيك اول تعليق بحس انك قاعد ليه على باب الكوكب مستنى بجد ربنا يكرمك اما حلو طلب الاحاطه ده جامد جدا تصدق وجهه نظر حلوة عجبتنى
اما عن الداهيه لا تقلق انا عمله سجن فى مارينا ابقى تعالى معانا واهو نوفر عليهم التعب برضه ونقولهم اتجمعنا فى مكان واحد
اه بجد متدنيه مش مصدق طيب ما يرفعوا كله ويخلوا عنده دم
وبعدين انتباه يا عسكرى انت مش شايف انى بعد ما كتبت البوست اترقيت بقيت لواء

محمد مارو said...

اه يا عينى دول رواتبهم صغيره خالص

و من كتر تدنى الرواتب الواحد منهم بيبع اللى وراه هو و ابوه و امه و اللى ادامه كمان على شان يكون ظابط ع شان ياخد راتب بسيط ما هما غلابه ياعينى

arabicya said...

أنا باخد 100جنيه فى الشهر ومكفينى والحمد لله
:)
ولا حول ولا قوة الا بالله

Desert cat said...

تعرفى يا آآبى ظباط الشرطة او الجيش الظباط عموماً اول ناس بتتعرض للخطر تحت اى ظرف من الظروف ... انا مش هعيد وازيد فى الموضوع ده علشان انا اتحدفت بالطوب ياما عندى وانتى اكتر واحده عارفه الموضوع ده ... عموما هما من حقهم زيادة مرتبهم ومن حقهم يكون ليهم امتيازات فى كل حاجه .... الموظف العادى ممكن يروح يمضى حضور ويروح زميلة يمضى له انصراف ... فى كمان مصالح حكومية تروحى تخلصى منها ورق يقولك اصل الموظف اللى المفروض يوقع لك عامل خط سير .. على اساس انه قطر ... واكتر الموظفين عايشيين على الرشوة وبيربوا ولادهم منها انا ياما شوفت مهازل انما الظابط ليه مواعيد ميقدرش يحيد عنها الاوامر اللى بياخدها لازم ينفذها لو حتى روح ارمى نفسك فى النار ... نيجى بقى بالنسبة لزيادة المرتبات عموما ... فأنا شايفة ان بلدنا اساسا معدوم فيها النظام ومعدوم فيها الضمير وكلمة معدوم بقت معممة يعنى لا الظباط مرتباتهم حترتفع ولا الموظف العادى ... هما يرفعوا الاسعار يرفعوا لنا الضغط والسكر .. انما مرتبات يعنى فلوس ... ده ايه الشعب الطماع ده

DoctorAllam said...

لأ بقى وربنا ماهو نافع أبداً
هي العالم دي ماعندهاش دم ولا إيه
قال عاوزين يزودوا مرتبات الشرطة كمان
أحيــــــــــــــه يابو سوسو
والدكاترة بلاش بقى ولا إيه
لما بتاع الشرطة كلية 3 سنين وبيقبض ألف جنيه أول تعيينه
وخريج الطب دراسة 7 سنين ونص ويادوب 250 جنيه بالبدلات بكله
لأ بقى يا عالم يا كفرة مش ظلمة بس .. الكل بقى بيميس دلوقت عليهم
أنا من حرقة دمي ما كملتش الموضوع علشان مش ناقصة جلطات
والأخت قطة الصحراء بتقول أول ناس بيتعرضوا للخطر !! .. أمال الدكاترة إيه بقى اللي ممكن بغلطة واحدة يصاب بأمراض خطيرة جداً بداية من الإلتهاب الكبدي الوبائي مروراً بالسل وإنتهاءً بالإيدز
لأ والحكومة بتصرف 50 جنيه بدل عدوى في الشهر
أحيــــــــــه يابو سوسو
وكمان الدكاترة ما ينفعش يمضوا ويمشوا لإنهم مش موظفين عاديين .. لأ دول مسئولين عن أرواح ملايين من البشر ولو حدث إن الدكاترة أضربوا يوم واحد عن العمل في كافة الأقسام شاملة الطوارئ والعنايات فأقسم بالله سيموت مئات الآلاف في ساعات معدودة وساعتها بس حتحسوا بقيمة الدكتور
عامة إلى أول إضراب بإذن الله عن العمل وتضامناً معاهم مش حأروح الكلية وإياكش تولع
بقالي 4 سنين ونص في الكلية ولسه على تخرجي 3 سنين كمان
حــــــــــــــــــــــــــرام

DoctorAllam said...

نسيت أضيف حاجة
الأخ الفاضل بتاع قضية الدعارة رجب حميدة بيقولك مرتب اللواء ما يكفيش 30 كيلو لحمة
أقوله مرتب الدكتور ما يكفيش 5 كيلو عضم مش لحمة
وشكله إنضم لقافلة أطبطب وأدلع بعد ما إتلسع في قضية دعارة إسكندراني معتبرة
ويا ألف ندامة على الرجالة .. أشباه الرجالة

Soooo said...

بوابات مصر اسكندريه وبوابات اي طريق سريع فيها ممر لبتوع الداخليه والجيش والقضاه يسافرو منها من غير مايدفعو ولا مليم

في الاقسام بتاعة الشرطه بيجي وجبات جاهزه مجهزه من كباب وكفته واكل ومالذ وطاب خدمات من المطاعم المجاورة من غير ولا مليم

اي حاجه بتمسكها البلديه من خضار وفاكهه او اي مخالفات بيتم ازالتها بيتم توزيعها على الظباط والشاويشيه وامناء الشرطه

لدرجة ان في ظباط اعرفهم بيشربو حشيش ولما باسألهم ده جبتوه منين بيقولولي دي جزء من احراز في قضايا مخدرات .. طبعا مش الحرز كللو عشان القضيه ماتقعش .. ولو ظابط مافيش حد هيدعبس وراه .. ياخد الحرز كللو ويحط مكانه حنه بلبان دكر .. ويبقى ضرب عصفورين بحجر واحد .. بوظ القضيه وخدلو مبلغ محترم .. وعمل دماغ حشيش اصلي .. مش بالحنه

وفي ظباط اعرفهم برضه بياخدو الاحراز من موبيلات وتلفزيونات وأجهزة كومبيوتر وغيره وغيره وغيره .. ويودوها بيوتهم ويستخدموها استخدام شخصي .. ولما بيعرفو ان في تفتيش يروحو مرجعينها عشان مايحصلش مصايب .. وبعد التفتيش ياخدوها تاني
-------

كل كلامي ده تعليق على رد قطة الصحراء اللي بتقول ان الموظفين بيرتشو .. ماهم بيرتشو عشان مش لاقين لا مرتب يكفيهم ولا لاقين امتيازات زي الظباط
بيمضو حضور ويزوغو عشان يلحقو يشتغلولهم دورين تلاته بالتاكسي اللي بيأجروه بالورديه عشان يعرفو يصرفو على نفسهم
ولو فضلو في الشغل وما عملوش كده يبقى لازم ياخدو رشاوي

------

ملحوظه
طلب الاحاطه ده يا ستي والكلام ده جاي من صخص خبره مش اي كلام يعني .. هو ان الواحد يروح واقف ويلاقي خمسين واحد محاوطينه مره واحده .. ويقولوله بص بقى .. ياتطلع اللي في جيبك بالذوق .. يانطلع ترابنتينك

والترابنتين في المعجم الوجيز هي الروح
ويا ترابنتين .. مابعدك ترابنتين




سلاموووووووووووووووز

appy said...

محمد مارو
ايه يا واد الحقد والغل ده كله ههههههههههههههههههههه
معلش اوك يزودوا بس الموظفين ولا دى زغزغه بس وفرش موكت من مجلس الشعب المنافقين الزياده تمشى على كله

arabicya
الحمد لله على النعمه يا راجل حد طايل ما هو ده اللى بقول عليه المفروض يزودوا كله علشان كده

only spot said...

سلام عليكم
الى يحيرك بجد تضارب الارء فجريده الدستور كانت عامله تحقيق فى عدد الاربعاء الى فات بتتكلم فيه ان رواتب ظباط الشرطه تصل الى 25 الف جنيه شهريا ليه معرفش تقريبا بيفتحو عكه وامبارح سمعت الخبر الى اتنشر بالمصرى اليوم من برنامج الطبعه الاولى قلت فى نفسى طب والى معدمين ومحدش بيسال عنهم دول يعملو ايه بس
هم تقريبا نواب البرطمان المقوقوز ملقوش حد بيعبرهم لما بيتكلمو عن الغلابه فقالو نضرب زيد فى عبيد يمكن يخلصو على بعض
خالص تحياتى

appy said...

قطه الصحراء
انا يا قمر لما بطالب بالزياده اولا للموظفين كلهم وعارفه ان الظباط بيتعبوا بس وجهه نظرى ان ليه بتوع مجلس الشعل مش بيطالبوا للناس كلها مش الظباط بس وكده تفتحى النار فى المدونه اجيب جيوش الخرفان بقى ونستنى هههههههههههههههه


دكتور علام
اعصابك يا راجل معلش ربنا يسهل وكله يأخد زياده ورجب حميده ده انا كرهته كرهه يا ساتر عليه بجد ربنا ينتقم منه بقى منافق بعد ما كنت بحبه

appy said...

سووووووووو
مخضروات هنا فى الكوكب يا نهار مش طالع ليه شمس كده عاوز تحبسنى عموما يا سوووو يا خويا برضه بيتعبوا مش مهم يأخدوا خضار ولا حتى على قفاهم احمممممممم احمممم قصدى يعنى يبقى فيه عدل فى المرتبات بقى متودنيش فى داهيه الكوكب متراقب لسه طالع من قضيه ربنا يخليك ليه انا عارفه انك اللى كنت هتفهمنى طلب الاحاطه ة علشان كده سالتك الا حلوة تربانتين دى ههههههههههه



only spot
اعتقد ان المرتبات الكبيرة لبتوع قمل الدوله بس انما الشرطه العاديه لا بس فىالنهايه هو جنيه الظابط زى جنيه المواطن العادى وربنا ينتقم من بتوع البرطمان ويجيلهم خنقه جواه نورتينى

رئيس جمهوريه نفسى said...

مش ملكه والله حلها بسيط جدا فى الدستور الاسبوع الماضى العدد الاسبوعى بالنص ميزانيه وزاره الداخليه 15 مليار جنيه منهم 3.2 مليار جنيه تقريبا استيراد وتدريب الضباط على وسائل اقتلاع الاعتراف من المجرمين واضحه ولا اوضح وفى ناس بتوصل مرتباتها وبدلتاه لحوالى 30 الف جنيه شهريا ده بس بدايه للتعليق وحرجع تانى اصحح الارقام لو غلط
يبطلو يشترو عصيان بمليار جنيه ويوزعو فلوسها على الضباط

بطوط حبوب said...

هههههههههههههههههه
عماله تتكلمى بعد كل جمله معرفتش اقرا
ايه ده كنتى بتقولى ايه بقى
هيصرفوا لكل لواء 30 كيلو لحمه
ومالوا يا اخويه

ولا كنتى بتقولى انهم هيلغوا مجلس الشعب
وماله برضه

انا فى حاجه كده كنت شاككك فيها اوان بقرا
اوعى تكونى بتقولى هيزودوا مرتبات الشرطه
لا متعملهاش اكيد انا فهمت غلط وكلامك كان داخل فى بعضه

راجى said...

انتى بتجيبى الكلام ابو دم خفيف ده منين ؟ دى على فكرة موهبة لابد من صقلها

appy said...

رئيس جمهوريه نفسى
اهلا يا ريس ما تشوف لك حل بقى مع الناس دول وخاصة بتوع البرطمان المخلل وبعدين ايه الارقام الفلكيه الخزعباليه دى ما علينا لا بينى وبينك قمل الدوله هما اللى بيوصل مرتباتهم لحاجات كتير الناس التانيه لا وبعدين يشتروا عصيان ليه بس هما هيحطبوا مع بعض ههههههههههههههههه



بطوط الحبوب
لا خالص انت اللى بتقول صح متخافش انا اقدر ههههههههه والله لكم الجنه يا دكاترة انتم كمان معلش بقى على تعليقاتى اعمل ايه فى لسانى اللى متزحلق بشاور جل ده على طول سامحنى بقى



استاذى/راجى
يااااااااااا نورتنى والله خفه الدم دى من بابا بصراحه ولتعليقات بقى من حرقه الدم مش خفه الدم اما اصقلها دى مش عارفه يعنى انا بحب اكتب كده من دماغى الهلاميه القشوريه دى والكلام بيجى على لسانى ويتزحلق فى المدونه نورتنى يا استاذى

MerMaid said...

العزيزة ابي
------------
استفسارك في محله
فعلا بدل ما يطالبوا بزيادة رواتب جهاز الشرطة فقط
يطالبوا بزيادة رواتب جمع اجهزة الدولة
لان بالفعل لو كان اللواء مرتبه ميجيبش في الشهر 30 كيلو لحمة
فمرتب الموظف العادي بيجيب كيلة لحمة ونص فرخة وطبعا مش هيجيب بقوليات لان سعر كيلو العدس بقي 9 جنيه
انا مش قادرة افهم والله البلد دي ماشية ازاي
وكمان انا تابعت التعليقات لقيت اكتر تعليق واقعي و يمس الواقع تعليق سوووو
الحقيقة يا ابي انا شايفة ان اعضاء مجلس الشعب كلهم في نفس الكفة
سواء كانوا اخوان او حزب وطني او مستقلين او اي حاجة تانية معرفهاش
فكلهم نفس الحاجة الا وهي كلهم بيدوروا علي مصلحتهم الشخصية
محدش مهتم
لما واحد بيقدم طلب احاطة او استجواب
بيقدمه لانه مفقوع مثلا من اللي بيستجوبه
زي مثلا احمد عز
الكل مش طايقه والكل بيستجوب فيه
و كمان الحكومة و رئاسة المجلس معجبهاش الاستجواب فقامت بمنع عضو مجلس شعب اللي قدم الطلب من حضور باقي الجلسات
كله في البطيخ يعني

بلا نيلة


تحياتي ليكي
و بجد سيبك انتي
كفاية خفة دمك و اسلوبك

أنا إنسان said...

ياه
كل دي مقالات جديده في اليومين اللي انا غبتهم
قر بقى
:)
انا كده الواجب بتاعي في القراءه بقى ضخم
استادنك بقى علشان اقرا
معنديش وقت
:(

النجمة الصامدة said...

مش انا يا سعادة البيه اللي اشتكيت والله
:D

وبعدين ياستي من حقهم
اشمعنا هما يعني
ايه الحقد اللي انتوا فيه ده

بصي يا آبي يا بنتي
في كل طبقة وشريحة وظيفية في مجتمعنا ده
هتلاقي ناس فووووووووووق
وناس تححححححححت
المشكلة مش في ان اللي تححححححححت يقولو عايزين نبقى فوووووووووووق

انما المشكلة ان اللي فوووووووووووق
يوافقوا


ها دختي من الطلوع والنزول ولا لسه
هههههههههههههههه

ربنا يكرمك يا سكرة
سلامات

Nsreen Bsunee said...

هههههههههههههههههههههه
ههههههههههههههههههههههههههههههه
بدل ضبط نفس
اسمحيللى
احييييييييييييييييييييييييييييييه
احيه احيه يا ابو سوسو احيه

وحشانى يا بت متزعليش منى انا وقتي مضغوط اوى والله حابقي احكيلك كل حاجه قريب ان شاء الله

Desert cat said...

معلشى يعنى يا سو فى ردك الطويل العريض اللى مالوش اى لزوم
لانه كله هجوم غير مبرر ولا اصل له من الصح
انا واحدة من الناس اللىاتسرقت وتليفونى رجع
مش خده الظابط ليه طالما هما حرامية وتجار مخدرات
بيشم على ضهر ايده ان فى تفتيش ولا بيقعد يضرب الودع يقوم يرجع الحاجات اصله شغال فى قسم ابوه
ظباط تعرفهم بيقولوا لك
متاكد انهم ظباط شرطة ولا ظباط ايقاع
شكلهم فى الاخر ناس ظابطين نفسهم بكام كيلو حشيش
بلا ارف
انا مش فاهمه الناس هتفضل قلبها اسود لحد امتا
الموظف اللى بيهرب من شغله علشان يشتغل على تاكسى ما يراعى ضميره ويتقى الله فى مصالح الناس علشان يلاقى اكل حلال
مش يرتشى ويزوغ من الشغل ونقول يشتغل على تاكسى
ده ايه الكوسة دى
مش تنسى تسلم على الظباط صحايبينك مع انهم فى النهاية برضه ناس مظبطة نفسها تقريبا

Desert cat said...
This comment has been removed by the author.
Rania said...

ايه دة يا ابى انت عندك خوناقة هنا و لا ايه؟
عموما يا اختى الضباظ نوعين نوع محترم و بيقدس الوظيفة بتعته و نوع تانى عايز الضرب الى اضربته شجرة الدر
و لزيادة المرتبات متفتحيش الموضوع دة بيغمن عليا على طول
:))
تحياتى

Desert cat said...

معلشى بقى يا آبى رد اخير ونهائى وانا اوعدك انى مش داخلة الموضوع تانى
اصل الواحد معندوش خلق للناس اللى مورهاش شغلانة غير الكلام على الفاضى ولما بنيجى للمليان هما اول ناس بتستخبى
لما تدخل بيتك وتلاقيه مسروق ولا حد يثبتك فى الشارع ويقلبك ولا اختك او مراتك او بنتك او امك حد يغتصبها متبقاش تجرى عليهم
وابقى حل مشاكلك بنفسك طالما هما ناس يعععع كدا
حد لذيذ هيقولى ما هم بياخدوا فلوس على الشغل ده والمشاكل دى ... هقوله ما الموظف اللى بيعمل خط سير واللى بيزوغ واللى مش بيخلص لى مصلحتى علشان مش اديته رشوة بياخد برضه فلوس مش مشكلتى انا اذا كانت فلوسة دى بتكفيه ولا لاء ... انا رايحة اخلص مصلحة مش رايح اسدد له ديونة ولا اصرف على ولادة ....
مش تبقى تروح تقرفهم بمشاكلك
مش تبقى تروح تشتكى لهم
من الواضح ان الشعب بقى بيحب اللى بيسرقه ويقلبه
مش بيتحدف بالطوب غير الشجرة المثمرة وطالما الناس كلها مفتحة لهم ومستكترة عليهم مرتباتهم واللى بيقولك دول يععععع
وعندى الدليل اصلى صوحابينى ظرابيط هقوله معلشى اتاكد انهم ظرابيط بجد .... اصل لو فعلا بجد ومتخرجين من الشرطة هتعرف ان مش اى اى حد بيدخل شرطة .... ولو هما يععععع مش كان زمان انت وجيرانك وصحابك واى حد يجرى عليها اول نتيجة الثانوية ما تطلع واللى هيقول مجربتش ادخلها هقوله كداب لو جاركو مخبر بتمشى تفتخر بيه وتقول جارنا مخبر قد الدنيا
متضايق اوى ومتغاظ منهم يبقى ؟؟؟؟؟؟؟؟؟
وبالمناسبة الناس تشتم مهما تشتم هما مش فى دماغهم اساسا ولا بيلتفتوا اصلهم بيقولوا القافلة تسير
حد يبقى يكتب الجملة اللى قبلها بالمناسب
فاللى مش لاقيه له شغلانة غير انه يفضل يشتم فى الناس بحجج واهية وملهاش اى مبرر يعمل هو الحلو اللى فى الصالح العام يعمل هو الصح علشان الظباط الحشاشين الوحشين الحرامية دول يقلدوه

alshared said...

هيا فعلا رواتبهم قليله بس بالنسبه لايه

ما كل حاجه في الدنيا نسبيه
وكل حاجه دلوقتي بقيت غاليه
يعني لواء الشرطه اللي مرتبه 2500 جنيه هايعيش ازاي

أنا مش عارف والله أنتوا عايزين الناس دي ما تاكلش ولا ايه

عموما
كفايه عليهم اللي هما بياخدوه

تحياتي

بحبك يامصر said...

والله هى حاجه تخنق وانا شايف اننا كشعب نسيب البلد للشرطه واعضاء مجلس الشعب ومجلس الوزراء وطبعا الريس ...احنا ياجماعه نسيبلهم البلد ونمشى ويقعدوا يعتقلوا فى بعض وينافقو بعض لحد اما يزهقوا بعض ونرجع نلاقى البلد فاضيه ماهم اكيد هيخلصوا على بعض

اما بخصوص زيادة الرواتب فانا عندى حل اسهل على رأى المثل ودنك منين يا جحا.مش اسهل من زيادة الاسعار وبعد كده زيادة الرواتب ؟ ما الاسعار تفضل احسن زى ما كانت ..وبناء عليه اطالب برجوع الاسعار الى ما كانت عليه

جمعاوى روش طحن said...

قف غنتباه الأول و إنتى بتتكلمى عن أصحاب الفخامة و السمو


مش عيب كده


دول برده اللى بيحموا البلد

شعب غريب

حتى الضباط بتوع الشرطة الحلوين المسكرين العساسيييل أوى ما سلموش من لسانكم

كده بدره

هى دى الصراحة اللى الريس عودكوا عليها ؟


شعب يخاف ما يختشيش

Anonymous said...

وَاذْكُرُوا اللَّهَ فِي أَيَّامٍ مَعْدُودَاتٍ فَمَنْ تَعَجَّلَ فِي يَوْمَيْنِ فَلَا إِثْمَ عَلَيْهِ وَمَنْ تَأَخَّرَ فَلَا إِثْمَ عَلَيْهِ لِمَنِ اتَّقَى وَاتَّقُوا اللَّهَ وَاعْلَمُوا أَنَّكُمْ إِلَيْهِ تُحْشَرُونَ (203) وَمِنَ النَّاسِ مَنْ يُعْجِبُكَ قَوْلُهُ فِي الْحَيَاةِ الدُّنْيَا وَيُشْهِدُ اللَّهَ عَلَى مَا فِي قَلْبِهِ وَهُوَ أَلَدُّ الْخِصَامِ (204) وَإِذَا تَوَلَّى سَعَى فِي الْأَرْضِ لِيُفْسِدَ فِيهَا وَيُهْلِكَ الْحَرْثَ وَالنَّسْلَ وَاللَّهُ لَا يُحِبُّ الْفَسَادَ (205) وَإِذَا قِيلَ لَهُ اتَّقِ اللَّهَ أَخَذَتْهُ الْعِزَّةُ بِالْإِثْمِ فَحَسْبُهُ جَهَنَّمُ وَلَبِئْسَ الْمِهَادُ (206)
سورة البقرة
أهدى الآيات الكريمات للسادة الحيتان أعنى أعضاء مجلس الشعب و حسبنا الله و نعما الوكيل
أبو خالد ..

NIDAAL PAL said...

حضرة الظابط الملازم ماشى
النقيب ماشى
أمين الشرطة ماااااشى
بس متقاعد ده ايه يا افندم ؟
موضوع حلو يا آآبى
و كان فعلا المفروض يتكلموا عن الشعب كله مش على الشرطة بس
يا آآبى .. دى عنصرية و انا عايز حقى
يا افندم ...
سلام

NIDAAL PAL said...

فيه أشى تانى لاحظته بعد ما نشرت الكومنت
حوارارارارارت ساخنة حول مدى نزاهة الشرطة
انتوا مش عايزيين تقتنعوا ليه ان فى كل مكان فيه الحلو و الوحش
هرجع و اقول الكلام الى قولته 100000000 مرة
لو انت من اى جنسية و جيت مصر مثلا و قابلت نموذج سىء من المصريين و سرقك و نصب عليك
يبقى المصريين كلهم حرامية و نصابين
..
و بالمناسبة الجميلة دى
انا عايزكم تشاركوا فى المناقشة عندى
كلكم ...>>>>>
بسرق الزباين منك يا آآآبى
هههههههههههههههههه

مهندس مصري said...

الضباط مرتباتهم تختلف على حسب هما ضباط فين بالضبط
يعني شرطة السياحة و الجمارك و الكهرباء و التليفونات و بعض الفروع التانية المحظوظة مرتاباتهم فلكية
بينما الأمن العام مرتاباتهم غلبانة زي بقية موظفين الحكومة او أحسن شوية

و ميزانية وزارة الداخلية هي اكبر ميزانية في الدولة لكنها لا توزع بعدل
فالرتب الكبيرة و الناس المسنودة و الفروع المحظوظة تحظى بنصيب الاسد
و باقي الشرطة ينالها الفتات الباقي

كما ينفق مبالغ ضخمة لإستيراد ادوات التعذيب و فض المظاهرات من الخارج كالصواعق الكهربائية و القنابل المسيلة للدموع

و لو تم توزيع ميزانية وزارة الداخلية بعدالة بينهم لما اشتكى واحد منهم و لإرتاحوا جميعاً

أما بالنسبة لنزاهة رجال الشرطة
فهم مثلهم مثل غيرهم بهم الجيد و السيئ
و لكن الخلاف حول نسبة السيئ فيهم
فأنا اراها كبيرة و غيري يراها قليلة و هكذا

و الخلاف في الراي لا يفسد للود قضية

خالص مودتي
:)

عصفور المدينة said...

أعرف واحد ضابط برتبة مقدم وظروفه صعبة فعلا يعني لو بنتكلم على الراتب يبقى الكلام شبه مضبوط ومعاك إن المفروض المطالبة تكون لكل الفئات

ملك الكبدة said...

طيب بالنسبة للملوك ماحدش اتكلم على مخصصاتهم ولا ايه؟

انا مرتبي مش بيكفيني اجيب 30 جرام جمبري في الشهر رغم اني اسكندراني يعني و الجمارك عالجمبري مش كتير

شقاوة شعب said...

هههههههههههههه
هههههههههههههههههههههه
هههههههههههههههههههههه

"بدل ضبط نفس"

ههههههههههههههههههههه
ههههههههههههههههه

لا بجد نواب الوطنى دول اخر تحافة
يموتوا من الضحك

ساعد نسرين الايمن said...

ابي

نعم يا ست ابي
انتي مش عايزهم يزود الشرطة ليه بقي
انتي عارف ان اهالي العيال دول دفعوا رشوة الشي الفلاني عشان ولدهم يخشوا
ولازم يقصروا الطريق
يعني مثلا واحد دفع 10000. جنيه رشوة لابنه المتخلف عقليا عشان يخش شرطة
مش ممكن يستردهم علي 10 سنوات لازم 3 بس
في حاجة اسمها دورة راس المال

انا مش عارف جابوا من فين ان راتب اللواء الفان جنيه
طيب انا واحد لواء شرطة راتبه 30000 شهريا
من مخالفات المرور والوزارة

بدل ضبط النفس مطلوب
وانا شايف انهم يصرفوا لكل ضباط
خمسة جنيه عن كل مواطن يشوفوه ومش يديه علي قفاه
كده الناس والشرطة هيبقوا مبسوطين والله

بجد تحيللك وعرضك رائعين

فرنسا هانم said...

ههههههههههههههه
هههههههههههههه
ههههههههههههههههه
اضراب رجال الشرطه ؟؟؟؟؟
هههههههههههههه
ههههههههههههه
انا متصوره الموقف اللى قاله أمين راضي
ورجال الشرطه مضربين
والقوات المسلحه مضربه هى التانيه
والشعب لابس الخوذه وواقف يحل الاضراب او الاعتصام
بنت يا ابى
انتى كان مالك ومال السياسه
ما كنتى بعقلك
كل شويه ارهن العجله واجيبلك محامى

الفاتح الجعفري said...

استاذه اابي
ربنا يبارك فيكي
انا زعلان منك علي البوست ده ليه بتظلمي ظباط الشرطه الطيبين اللي بيسهروا علي حمايتنا ومتبهدلين في الشوارع بيقبضوا علي الاخوان اه اه اسف علي الحراميه والمرتشييييييييين والمهربين وكمان بيضبطوا نفسهم في التعامل معهم ,فياريت يدو لااقل ظابط بتاع 10000 الاف جنيه في الشهر وبعدين ليه ينزل يجيب لحمه علي حسابه يوصلوا كل يوم 2 كيلوا دليفري علي البيت مع الخضار والتحابيش
هنبصلهم كمان في اللحمه ده احنا مننا لله
وياريت كمان يخدوا بدل مواصلات وبدل مشي في الشارع وبدل نرفزه وحرقة دم وبدل اقلة ادب وبدل متعه
ربنا يوفقهم ويزودهم ياسلام
هقوليك ايه انا كنت هااكتب لاتعليق بس قولت متجيش
وجزاكم الله خير

الفارس الملثم said...

يعني انتي يا ابي عاوزه مين يحافظ علي مصالح رجال الشرطة غير رجالة الحزب الوطني متعرفيش ان في صلة نسب بين الاتنين وعلي راي احمد بدير في مسرحية ريا وسكينة ونسبنا الحكومة
يعني صراحة جمايل الشرطة مغرقاهم يعني ازاي هم اصلا كانواايقعدوا تحت القبة لولا مساعدة رجال الشرطة الشرفاء في الانتخابات انتي فاهمة طبعا

بس انا متهيالي ان رجال الشرطة عندنا مش يمكن يعملوا اضرابات لانهم بيعملوا بالحكمة الخالدة اللي بتقول الجيش بيقولك اتصرف وهم صراحة بيتصرفوا بطريقتهم!!!

وحتي حكاية انهم بيتعصبوا شوية علي الشعب زي ما بيحصل في الاقسام فبرده مفروض الشعب يستحملهم وانا بقترح بدال ما الدولة تتحمل اعباء جديدة كان الله في عونهم
ان كل موظف يتبرع بجزء من مرتبه عشان رجال الشرطة الغلابة دول ويجعل بيت الشعب عمار زيادة وزيادة

سلام يا ابي

الربان said...

تحياتي

طبعا كلامك منطقي و معقول...لكن بالفعل مرتبات الشرطة ضعيفة و مهامهم
جسيمه...طبعا انا اتحدث عن معظمهم مممن
لا يقبلوا رشاوي او هدايا وخلافه..

لكن الحل ليس في زيادة مرتباتهم هم فقط
لان مصر ستصبح دولة فؤية بمعني كادر خاص للمعلمين...و اخر للاطباء و ثالث لاطباء الاسنان و الصيادلة...ورابع...
لكن الاغلبية العظمي المقهورة و المطحونة...التي قد تجد قوت يومها او لا
تظل محلك سر...

ياريت تكون فيه منظومة شاملة عامة للمرتبات ...و في نفس الوقت النظر في
تثبيت الاسعار لفترات محددة.

تحياتي و تقديري و دمت بالف خير.

appy said...

هاجر
ازيك يا سكر ربنا يكملك بعقلك يا بنتى ده اللى بقول عليه يبقى الشعب كله مش فئه وفئه انا مش ضد طبعا انهم يزودوهم بس باقى الموظفين


أنا انسان
قل اعوذ برب الفلق انا مش عارفه اصلا انت بتتأخر ليه اوعى تكون بتتلخبط فى العنوان ههههههههههههههه

النجمه الصامده
اه انا خسيت خمسه كيلو يالا كمان بقى وهديكى ربع جنيه من الطلوع والنزول ده نورتينى


نسرين
قف انتباه وعند جزا هههههههه معلش ربنا يكون فى عونك بس ابقى طمنينى اما بخصوص سوسو مقدرش ادلك كتير هههههههههههههه

appy said...

قطه الصحراء
كل مكان فيه الحلو والوحش وهدى اعصابك يا امى بلاش كده سوووووووو مننا وعلينا وبعدين هو نقد سلبيات فيهم وممكن تكون صح او غلط مش كله زى بعضه واه هما بيجيبوا لنا حققوقنا بس بصى الموظفين انا مش معاهم انهم يأخدوا رشاوى ولا يسيبوا شغلهم بس برضه تزيد مرتباتهم هو انتى على طول كده اعمل ايه بس فى نفسك دى اللى هضربها واكهربها انتى متعرفيش دلوقتى ان اللى ماسك الكوكب انا برتباتى كلهم ههههههههههه



رانيا
لا مش خوناقه دى اختى قطه الصحراء بس عادى انا واخده على كده بس بحبها اعمل ايه وانا معاكى طبعا ومش ضد زياده مرتباتهم بس انا بستغرب على بتوع مجلس الشعب



الشارد
فيه فئه فيهم مرتباتهم قليله فعلا ومش كلهم مرتشين بس انا بطالب للناس كلها وبستغرب على نفاق مجلس الشعب نورتنى


بحبك يا مصر
طيب ما تخلينا قاعدين فيها ونتفرج عليها انا عن نفسى بحبها وهفضل فيها ههههههههههههه

appy said...

جمعاوى روش طحن
تمام يا فندم ههههههههههههه وبعدين انت هتأخد رتبتى ليه بس ايه الرخامه دى انت اللى انتباه يا عسكرى


اخى /ابو خالد
ربنا يبارك فيك يا رب وميرسى لمتابعتى دايما


نضال
برافو عليك هو ده اللى قولنا عليه وايه يعنى لما يزودوهم بس باقى الناس وخد يا عمنا اللى عاوزة مش مشكله كلهم حبايبى هيرجعوا ليه تانى ههههههههههه


مهندس مصرى
ايه النور ده كله بجد انت لخصت فيه فعلا مرتبات متدنيه فيهم بس باقى الناس يا جدعان والله حتى اللى قى قطاع خاص

appy said...

استاذى/عصفور المدينه

فعلا هو فيه فئات فئات او اجهزة واجهزة يعنى توزع المرتبات مش عادل فى الداخليه خالص وشكرا لحضرتك نوت الكوكب



ملك الكبدة
لا يا ريس معلش انا هظبطهم واضربهم واكهربهم لحضرتك وجمبرى كده مرة واحده هتخلى الناس تحقد عليك ههههههههههههه



شقاوة شعب
شوفتى انتى الكلام الجامد بتاع الاعضاء الموقرين رجب حميده بيلاعب الحكومه بعد فضيحته ربنا ينتقم منه كنت بحبه



ساعد نسرين
انت فين يا راجل من زمان نورت اه شوفت ضبط النفس والهايفه اصل رجب حميده اتجنن خلاص وبيهرتل بعيد عن حضرتك

appy said...

خالتى فرنسا
حبيبتى
حرمت خلاص سامحينى المرة دى اخر مرة بس خرجينى وانا اوريهم قصدى هقعد مؤدبه ههههههههههه طيب والله تخيلت نفس الموقف تخيلى يبقى مسخرة بس هما مش هيضربوا هما هيعملوهم فيبريشن


الفاتح الجعفرى
ايه يا راجل هما عاملين قسم بس للاخوان ولا ايه ههههههههههههههه معلش بقى انا مش بتكلم على قمل الدوله ربنا يجعل كلامى خفيف عليهم انا بتكلم عن الظبابيط التانين يعنى الامن العام والحاجات دى شوفت بزمتك مسخرة رجب حميده بجد كنت بحترمه منه لله كرهنى فيه طيب يحسن صورته بعد فضايحه دى ويطالب للدنيا كلها حسبى الله ونعم الوكيل فيهم


الفارس الملثم

اهلا وسهلا تصدق فكرة حلوة التبرعات دى لا انا اقترحت نجيب لهم ورد كل يوم ونعمل نداء لزوجاتهم وصحباتهم انهم مش ينرفزوهم ونشغل سوفت ميوزك فى الاقسام وهما يهدوا اعصابهم هههههههههههههه


أستاذى / الربان
والله كلام حضرتك منطقى وعين العقل بس تفتكر مين ينفذه بتوع الحزن ودول جبناء ميقدروش يطالبوا للشعب ولا الاحزاب التانيه بطالب لنفسها بس نورتنى

ملك الكبدة said...

انا موافق يصرفوا بدلات ضبط نفس بس بشرط يصرفولنا بدلات تحمل اهانة و كظم غيظ

appy said...

ملك الكبده
وتكتم ليه يا ملك اللى يضايقك عضه انا بعمل كده وبنطح بس سيبك انا بتحامى فى انى بنت هههههههههههههه

عبدٌ من عباد الله said...

تحيا مصر
viva l'egypto

Soooo said...

معلش بقى يا آآبي .. هنقضيها تعليقات هنا انا وقطة الصحرا وهنمسك في خناق بعض

بهزر طبعا عشان قطة الصحرا ماتقفشش مني وتاخد كلامي على محمل وحش ولا تفتكر اني ارهابي كل غرضه اني ازرع فتنه بين الشعب

بصي يا ستي
اولا وبادئ ذي بدئ .. انا اخويا كان ظابط شرطه وحاليا قاضي بعد مادخل نيابه وساب وزارة الداخليه
وخالي مساعد اول وزير داخليه
ولي اتنين ولاد عمي ظباط شرطه
اضافة الى ولاد بنت خالي واللي كلهم ظباط شرطه وعددهم تلاته
يعني من الاخر .. انا والحمدلله لا انا مجرم ولا بتاع مظاهرات ولا بخاف من اي حد حتى لو كان وزير الداخليه ولا رئيس جمهوريه والحمدلله مش بخاف غير من اللي خلقني

ثانيا .. قرايبي واخويا لما كان ظابط .. كانو بيشوفو الفساد والحوارات دي وبيتكلمو عنها .. ولو فعلا انتي تعرفي ظباط شرطه وتعرفيهم بحميميه اسأليهم بنفسك هيقولولك ان فعلا في فساد في الداخليه .. زي مافي فساد عند الموظفين وبياخدو رشاوي زي مافي فساد زمم في كل المجالات وده شيء طبيعي .. لان اي مكان فيه الكويس وفيه الوحش .. جميل على كده

ثالثا .. انا .. ولا بلاش انا عشان ماتقوليش علي اني باشكر في نفسي .. انتي بنفسك ياقطة الصحرا .. لما اتكلمتي عن الاجانب اللي جم السايبر بتاعك وخدو قعدتهم وجم ماشيين من السايبر وادولك حاجه ازيد من حقك رحتي قلتيلهم لأ شكرا وخدتي حقك وبس ولا بلطجتي ولا عملتي حاجه غلط .. صح ولا مش صح .. يعني عملتي وظيفتك وخدتي عليها أجرك بس مش اكتر ولا أقل .. نيجي بقى لحالة موظف مرتبه الاساسي ميتين واتنين واربعين جنيه شهري .. والموظف ده عنده خمسه وعشرين سنه .. ولسه متخرج من كلية وعرف بالواسطه والكوسه والمحسوبيه يلاقي شغلانه .. بينما على الناحيه التانيه .. خريج كلية شرطه اللي لسه متخرج مرتبه بالبدلات والحوافز والامتيازات بيوصل لحوالي تسعميه وخمسين جنيه قولي تسعميه .. يبقى ازيك بقى؟؟؟؟؟؟

رابع حاجه .. ايه الفرق مابين الظابط والدكتور والمحامي والمحاسب والمهندس .. والله يكرمك ماتقوليش الظابط احسن واحد عشان بيحمي الناس دي كلها .. ولا تقوليلي الدكتور عشان هو اللي بيعالج الناس كلها .. ولا المهندس عشان بيبني عماير ويسكن الناس كلها .. ولا المحاسب عشان هو اللي بيظبط التعاملات التجاريه مابين الناس كلها .. ولا المحامي عشان هو اللي بيدافع عن المظلوم وبيحاول ياخدلو حقه من اللي ظلمو .. لا خالص
دي منظومه متكامله
وكل واحد لو استغل سلطته استغلال سي هيموت ناس وارواح
لو دكتور مهمل او مش شايف شغله هيموت ناس
لو محاسب مهمل او مش كويس هيسرق الناس ويموتو من الجوع
لو المحامي غير شريف يبقى هيختلط الحق بالباطل ويطلع مجرم وقتال قتله من السجن عشان يقتل الناس
لو مهندس وحش او مهمل هيبني عماير تقع على دماغ الناس
لو ظابط وحش ومش شايف شغله يبقى البلد هتبقى فوضى والناس تقتل في بعض
الظابط زي الدكتور زي المحاسب زي المحامي زي المهندس زي المدرس زي الفنان .. كل دول بشر بيتعاونو مع بعض عشان يعملو حاجه للمجتمع
يعني وصلنا ان مافيش فرق بين حد والتاني بناءا على وظيفته ولا على مركزه .. يبقى انا ما افضلش مهنه على مهنه واديها مرتب اكتر من باقي المهن واقول ان دول احسن ناس .. ودول بيضحو بعمرهم فداءا للوطن .. ودول بيتغربو ويتبهدلو عشان الشعب .. ماهو كل الناس كده .. انا لو شغال يوم في القاهرة باقي السنه متشحور في باقي المحافظه .. والدكتور اللي بيقعد نباطشي اربعه وعشرين ساعه ومناوب ولازم يبقى فايق ومصحصح عشان مايغلطش والا هيروح فيها ناس .. والمحاسب لو غلط في رقم هيودي ناس في داهيه .. لو اي واحد بيؤدي وظيفته صح .. يبقى ساعتها لازم الكل يتساوى

خامس حاجه واستحمليني في رغيي انا واحد فاضي وماعنديش شغل النهارده .. الظباط اللي بقولك عليهم واعرفهم وصحابي وبيعملو مخالفات زي انهم ياخدو موبيلات ولا اجهزة كومبيوتر ودي انا شفتها بنفسي .. وبياخدو الحاجات دي من أحراز قضايا مختلفه .. لما بيبقى في تفتتيش عليهم ولا حاجه بيرجعوها لمكانها عادي ولا من شاف ولا من دري .. ولو واحد اتضح انه بريء وزي الفل بياخد حاجته بيس خالص ويادار مادخلك شر .. تقدري تقوليلي ده استغلال سيء للسلطه ولا لأ؟؟
ماهو ده هو نفسه الموظف اللي بياخد رشوه عشان يمشيلك مصلحه
بلاش الظباط .. امناء الشرطه اللي بياخدو رشاوي من اي عربية نقل ماشيه في وقت غير الوقت المسموح بيه .. ولا امناء الشرطه اللي موجودين في المرور وبياخدو فلوس عشان يخلصو لواحد مستعجل ورقه .. وماتقوليليش لأ انا باتكلم عن الظباط وما باتكلمش عن الامناء عشان الامين بيبقى تحت سلطة الظابط والمفروض انه يظبطه .. ومايخليهوش يمارس البلطجه مع الناس او المواطنين

ياقطة الصحرا في اي مكان في الكويس وفي الوحش .. ولو خدتي بالك ان اصلا رواتب ظباط الشرطه مرتفعه عن الموظفين العاديين فده عشان يخلوهم مش يعملو حاجه غلط من الاساس ومايمدوش ايدهم لحاجه غلط ولا يمارسو سلطتهم .. انما نيجي بعد فتره ونقول نزودلهم مرتباتهم هم بس وباقي البشر لأ يبقى هنا لأ .. اشمعنا هم يعني ولا الزياده اللي كانت معموله ليهم دلوقتي مابقتش بتكفيهم وباقي الناس مايزودوش مرتباتهم عشان هم اقل

ملحوظه
اه طبعا لو شقتي اتسرقت ولا حصلت معايا مشكله هاروح القسم اقول انا حصللي كزا كزا .. من نفس منطق ان لو ظابط ولا اي حد جالي وقالي انا عايز اعمل شغل ديكور ولا تشطيبات في شقتي ولا مكتبي ولا الفيلا ولا العماره بتاعتي هعمللو الشغل اللي بيطلبه .. ده شغل ولازم كل واحد يراعي ربنا في شغله .. وبعدين ممكن نتخيل حاجه مع بعض .. لو البلد مافيهاش غير الظباط ومافيش مواطنين ولا شعب .. ايه لازمة الشرطه؟؟؟؟؟؟




سلاموووووووووووووز

أوشــــــه said...

ههههههههههههه
يعني جات عليهم
مابلاش الحقد ده
هما مش من الشعب المطحون برضه؟؟!!
خاللينا ساكتين هتودينا في داهيه
هههههههههههه
بس والله دمك شربات
سلام يا سكر

سكــر said...

ويلكمووو ااابى

اول مره ادخل عندك كدا

الاقيكى عاوزا تقومى ثوره

ههههههه

ثوره مرتبااتى

يااابى انتى بتتكلمى فى ايه

انتى عاوزاهم يرؤفعو المرتباات

والناس تبقى مستريحه ومزقططه كدا

علشان الناس دماغها تروق ليهم

ويتكلمو ف السياسه

هقلك شىء هو فقع مرارتى

ربنا يسترها على مرارتك

لانى عارف انها اتفقعت كذا مره قبل كدا

وانتى ماشيه بالحتياطى

من كم يوم جت لينا طياره سودانيه
(انا بشتغل فى صيانة الطائرات )

المهم الطياره جت علشان نعمل فيها صيانه

وكان جاى معاها مهندس من الشركة السودانيه

طبعا مش هقول واعيد فى طيبة وخفة دمهم

المهم واحنا بندردش سالته قلتله اللا اخبار المرتبات عندكم ايه

قالى تمام

قلتله ياابو القاسم >>>>>>>>> اسمه ابو القاسم

المهم سالته كام يعنى مرتبات الفنيين اللى زينا ياعم

بلاش المهندسين

امممممممممممم

امسكى اعصابك

ها

مسكتيها

طيب خدى عندك

الراجل قالى هما قبل شهر يناير كانت الفنى بياخد 1500 دولار

ايوا
فى السودان وبيقبض 1500 دولا

انا طبعا اذمهليت وذهلت وصعقت

وكل حاجه نخطر على بالك
المهم هو كمل وقالى دا قبل شهر يناير

وقالو لينا المرتبات هتزيد

اممممممممممم

تخيلى زادو كاام

زادو يا اابى 1000 دولار

والله الف دولار يعنى 6000 الاف جنيه

السودان اللى تعتبر افقر دول المنطقه

المهم انا مرارتى اتفقعت

وقلتله طب ياعم ما احنا كمان هنزيد فى شهر 7

الراجل بصلى كدا

قلتله اه هنزيد زيااد رهيبه

لدرجة مش عارفين هنودى الفلوس فين

قالى كام يعنى

قلتله 7 دولا

امممممممممممممم

وكفايه بئه

علشان المراره اللى انا ساكن فيها بالايجار

بتشاور عقلها


نو كومنت

تحياااتى

احمد سكر

واسف انى طولت عليكى

gannah said...

اهنيكى وبجد انتى ليكى بونبونى منى على الكلام الحلو ده

Ahmed Al-Sabbagh said...

ههههههههههههههههه

وهقعد على حرف الكوكب وادلدل رجلى وادعى عليهم بتوع الحزن الوطنى

مسخرة

هههههههههههههههههه

بجد انتى اسلوبك رائع

وبفطس على نفسى من الضحك

ولو انى عنيا بتزغلل على اخر المقال

بس حلو اوى

هو انتى كمان عندك حزب وطنى فى الكوكب بتاعكو ؟؟

سبحان الله !

والله فكرة زيارة المرتبات دى فكرة حلوة

او يطبعو فلوس كتير اوى

ويفرقوها على الشوعب المصرى

هههههههههه

جميل تسلم ايديكى

تحياتى

أحمد

محمود المصرى said...

بسم الله الرحمن الرحيم

من واحنا صغار كنا بنسمع مقولة ( نوم الظالم عبادة ) لأنه بيمتنع عن ظلمه اثناء نومه فبناءا على ممارسات الشرطة واثرها وصورتها فى ذهن شعب مصر نقدر نقول ( اضراب الشرطة عبادة )

3ala asm masr said...

30 كيلو لحمه
صحيح اللى اختشوا ماتوا

mahmoud farag said...

أول مره أعدي من هنا

لكن هعدي علي طووووول

بضم صويتي لصويت زميلي دكنور علام اللي شكل البوست جاله علي الجرح

استحمل يا صاحبي ... مسيرها تتعدل ونتخرج وربنا يتولانا بعدها

المهم طلب اإحاطه ده جاي في وقته تمام عشان يقول يا جماعه متقروش علي الشرطه دول غلابه ومحتاجين
تعاطفك لوحده مش كفايه
اتبرع ولو بجنيه

appy said...

عبد من عباد الله

يا رب تحيا مصر حرة مستقله


soooooooo
يااهلا وسهلا بالانوار رد براحتك يا عمنا قطه الصحراء اختك وانتم حرين

أوشه
اهلا وسهلا ميرسى لمجاملتك يا سكر

سكر
اهلا يا بشمهندس نورت هنا فى الكوكب ماش بقى امال بتوع السودان جايين يقولوا انهم فقرا ليه

appy said...

جنه
ميرسى ليكى

أحمد الصباغ
ابو طويله الغالى ازيك والله لك وحشه يا راجل ميرسى ليك يا صباغ ونورتنى

محمود المصرى
يسمع من بقك ربنا ما قولت يفتحوا الباب من بدرى


على اسم مصر
اه يا هنود شوفتى الازمه بقى لهم النار قصدى الجنه الناس دى

محمود فراج
هو انت زى دكتور علام ربنا يهدى ويستر بس مش عاوزة مظاهرات فى الكوكب

سقراط said...

الاول فى البداية انا اول مرة ازور مدونتك
بجد مدونة جميلة جدا جدا
حتى الاغنية اللى حاطها جميلة جدا جدا
شكل المدونة والبروفيل هايل
بصراحة مدونة اكثر من رائعة اونا حاطتها فى المفضلة

بالنسبة للخبر بتاع البوست انا قراتة فعلا فى المصرى اليوم واقعدت اضحك اوى بجد بيستهبلوا بقى ظباط الشرطة مش لاقين يصرفوا على ابنائهم
طب والرشاوى والاتاوات اللى بيخدوها مش بتتحسب
فعلا مسخرة

سقراط said...

انتى عملتى الاغنية دة ازاى يعنى اية الكود بتاع الاغنية وتشغيل الملف الصوتى

مدحت محمد said...

الظباط مرتباتهم قليلة
طيب
لا تعليق

mohamed hesham said...

والله الموضوع كبير ومحتاج تفكير ...

أنا مش فاهم ايه اللي بيحصل ده ..

أولا أنا لا زعلان من حد ولا بحقد على حد ... أنا ليا اصحابي ظباط شرطة وجيش وناس زي الفل مقلناش حاجة ...

يعني الظابط بيخدم بلده زيه زي أي حد تاني في مكانه ... وكون ان فيه ناس وحشة فيهم ده لا يسئ للمهنة أبدا لأن كل مهنة فيها الحلو والوحش ...

حلو الكلام ... حلو الكلام

نبدأ بقى بحاجة ... الا وهي ان مرتب الظابط عموما في الشرطة أو في الجيش على السواء -كبداية اول ما يتخرج- بيقفل الباكو أو بيقترب منه جدا .. جميل
وده مش وحش هنا في مصر كبداية أبدا بل انه جميل جدا بالنسبة لخريجين كتير آخرين زي الدكاترة مثلا -اللي هما اكتر فئة مظلومة في مجتمعنا- ... المهم انه الاولى يبتدي يعلي من مرتبات قطاعات أخرى حكومية - المدرسين مثلا والتربية والتعليم كلها- والصحة والتأمين

لأن مش معقول ان الدكتور يقبض في أول تخرجة 200 أو 300 جنيه ... هيقولو مهو هيشتغل شغل تاني عيادة ومش عارف ايه اوكي بس الشغل ده مبيجيش كده مرة واحدة لأ ده بيبقى على مهله خالص ... والمدرسين بيدوا دروس ... برضه مش كلهم أو مش كلهم بيدوا بالشكل اللي في بالكو

يعني احنا مختاجين حاجات كتير أوي انا مش قادر أحددها لوحدي الدنيا في مصر شكلها اختلف ومحتاجة تتظبط

والمثل الصيني بيقول
"السلم يبدأ كنسه من أعلى" والشاطر يفهم

appy said...

سقراط
اهلا بيك يا فيلسوف هنا عندنا فى الكوكب مش كلهم والله يا سقراط فيهم الكويس نورت يا جميل اما بخصوص سؤالك هشوف اسم المدونة اللى انا واخده منها الطريقه واقولك عليها



مدحت محمد
اهلا نورتنى خلاص متزعلش نفسك ههههههههه اعصابك يا عمنا


mohamed hesham
مين هيجيب المقشه ومين هيبدأ الكنس هاااااااا ولا ناوى تلبسها فيه وتودينى فى داهيه ههههههههه

simple girl.. ..simple dream said...

اه طبعا الظابط ياخد مرتب كبير
عشان يعرف ينفخ بضمير
اصلا النفخ المفروض يكون على الاضافى مش اساسى المرتب
يعنى كل ظابط يتصرف له كل شهر مع الحوافز بدل نفخ

appy said...

شاهى
حلو ثقافه النفخ دى جبتيها منين انتى شغاله فى المدبح هههههههههههههههههه
معلش يا بنتى بقى هنعمل ايه

دكتور بيطرى said...

أختى الكريمة
فيه مثل بيقول (خدوهم بالصوت )وآخر ( إن لم تستحى فافعل ما شئت )وده فعلا كل واحد من وجهة نظره مظلوم حتى رئيس الجمهورية بيتعب كتير وبياخد مرتب زى باقى المواطنين حتى إنه فى إحدى الخطابات له كان بيدلل على كثرة مسئولياته فقال أنا لما بروح امريكا ما بالحقش أهرش , وموضوع الشرطة ده فكرنى بيوم غلطت وركبت معايا أمين شرطة مرور ودار نقاش بينى وبينه وعلل لى بأن رواتبهم أقل من الجيش ولكن الحكومة بتتعامل معانا بأننا بنخلص حقنا بطرقنا المختلفة!!, وقال لى أنا ما بخدش البراغيث دى خالص لأنها حرام ؟؟ البراغيث جمع برغوس وهو (خمسون قرش) ربنا يهدى الجميع.
أختى الكريمة لقد عملت مدونة جديدة بإسم "الدعوة إلى الله فن وذوق" تتكلم عن فن الحوار ووسائل الإتصال , فأكون سعيدا بمشاركتك وتعليقك وجزاك الله خيرا

المفقوعة مرارتها said...

طب ماأنا عندي حل أظرف ليه مايرخصوش الأسعار ويبقي لينا وللظباط
وبعدين الظباط محتاجين فلوووس ليه ماهما بياخدوا علاج ببلاش ونوادي ببلاش واكل مدعوووم من مؤسسات الظباط غير الخدمااات اللي بتتقدم لهم ببلاش او بسعر متهاون
آه يابلد عاوزة حد يشكمها

Nigro said...

بصي.. بالنسبة للقضية
انت موقفك سليم
و ماكنش قصدك حاجة وحشة
انت كنت كاتية البوست ده تضامناً مع رجال الشرطة البواسل
بس في ايدين خفية عرفت الباص وورد بتاع المدونة وهي اللي كانت بتكتب التعليقات جنب كل جملة
بدليل انها بلون مختلف عن باقي البوست
-----------------------------
هدّي اللعب شوية
دي الحكومة

أنونيمس said...

والله رجال الشوربه دول بيصعبوا عليا
تلاقي الواحد فيهم يا عيني طول النهار نازل ضرب وشتيمه في المواطنبن اللي يستاهلو .. أو واقف في وسط اشاره يقفلها اما الباشا المهم يعدي

وف آخر الشهر يادوب ياخد اللي يعيشه هو ومراته في الشقه اللي الوزاره اديتهاله.. لما اتجوز في نادي الشرطه وطلع قضى شهر العسل ف مصيف الشرطه برضه... وكل يوم يا عيني يروح الشغل بالبوكس اللي ما فيهوش تكييف ولا أير باجز

والله غلابه

خبيب said...

نياهاهاهاها

"إضراب" أكتر من كده ؟
معتقدش قفانا ممكن يستحمل !

--

وبعدين أساسا المفروض احنا اللي ناخد منهم بدل ضبط نفس !!!

أمال لو مكانوش بيضبطوا أنفسهم ؟

--

لكن الحقيقة - صدق أو لا تصدق - هناك فئات مهضومة ( يعني غلبانة يعني ) في الشرطة !!

الراقص مع الذئاب said...

السلام عليكم
ازيك يا آبي
الموضوع كويس ويستحق النقاش
وانا هوضحلك امور كتيرة فيه
اولا الشرطة هي هيئة نظامية (ترتدي) الكتافات
يعني حاجة كدا زي هيئة السكك الحديدية او اي حاجة تبع الحكومة
بس ليها حاجة صغيرة اسمها سلطة تنفيذية
مرتبات الشرطة عادية جدا زي اياي مؤسسة في الحكومة
موظف عادي خالص الفرق بينه وبين الراجل العادي اللي ماشي في الشارع البدلة الميري
وبيبان ضعفهم اوي ادام القوات المسلحة...
طبعاً دي ناس ليها شغلها وليها دروها
التجاوزات اللي بتحصل من كتير منهم متخلناش نحكم عليهم إنهم اعداء للناس
تخيلي كدا البلد من غير الشرطة هتبقي عاملة ازاي

طيب هل القوات المسلحة بتتعامل بنفس الوضع من حيث الاوضاع المالية؟؟

لا طبعا...عشان احدث صف ضابط متطوع يعني (صول) ممكن يوصل مرتبه لألف جنيه
اما الالوية(جمع لواء) والرتب الاعلي بيخدوا مكافئات تقدر بملايين

عشان الجيش هو الاصل في البلد....مش عشان انا دلوقتي فيه ولا حاجة
دا اللي اتعلمتوا في الكلية العسكرية
القيادة العليا ديما بتحافظ علي ولاء الجيش
من حيث السلطة والماليات والخدمات والوضع الاجتماعي
ومبدخلهوش في اي سياسة داخلية او خارجية وممنوع اننا نتكلم أو نشترك في اي إنتخابات او مظاهرات او عك من الكلام دا

وكلمة اعتصام او اعتراض في الجيش حاجة كبيرة اوي...وليها عقوبة واحدة بس
الاعدام

عشان كدا عمرك ما هتسمعي عن حاجة زي كدا في الجيش....ولو حصلت بتتحل وتتستخبي ويتكنم عليها اوي

المهمة الرئيسية لنا هي الحفاظ علي البلاد من اي عدوان خارجي وحماية الشرعية

حبيت اطلع القوات المسلحة من الموضوع عشان متخلطيش بينها وبين الشرطة


سلام يا آبي

ضد الظلم said...

حقهم حقهم يا جدع حقهم
لازم نرضيهم بردو عشان يشوفو شغلهم حقهم حقهم

يا لاهوى على دى بلد

تحياتى

CheToS said...

على كدا ىاحنا لينا الجنه بقة لما خريج الشرطه 3 سنين وياخد الف جنيه وخريجى الطب بعد 7 سنين اشغال شاقه ياخدو 250 جنيه يبقى ايه دا دا حتى المساواه فى الظلم عدل ....قالها فيلسوف زمان ويل لأمه طبيبها فقير ... بس وقتها لما تسمع الأخبار دى اعرف وقتها انك أكيد أكيد فى مصر يا معلم

Marisar said...

Attention please!
->> Remove Viruses! <<-

حــدوتـــة said...

والله انا الدمعة هتفر من عينى خلاص
اللواء مرتبه مبيكفيش 30 كيلو لحمة فى الشهر حرام والله حرام

بالمناسبه هى اللحمة وصلت بكام النهاردة اصلى بعيد عنك مدقتهاش من وانا فى تانيه اعدادى وكنت ساعتها معذوم كمان
ملحوظة انا مرتبى ذاد بعد مرور سنه ونصف فى احد مكاتب المحاسبة ليصل بحمد الله الى 150 جنيه
لو حد يعرف عروسه يرنلى وانا هكلمه
سلالالالالالالالالالالالالالالام

همس الاحباب said...

رائع جدا
زيارة عابرة كده بمسى وبقول انا راجع تانى
تحياتى

عايش ولكن said...

بجد احنا مش شاطرين غير فى التريقه والهزار
وبجد اسطوات فى خفة الدم
اما بقا عن الرواتب احنا الحمد لله بنعرف نتعامل مع اى راتب هنعيش هنعيش
تقوليلى بقا صغير تقوليلى كبير بردوا هنعيش
وطبعا لان الناس الكبار فاهمه كده
فخلاص يدونا بقا على قدنا
لا كمان مش على قدنا اقل من اللى على قدنا
وهما يملوا كروشهم 40 مليار وحاجات كده
واحنا يادوب اربعين قرش زى الفل وبوس ايدك شعر ودقن
يلا ربنا يباركلهم
تحياتى
علاء

3abdo me7tas said...

والله ما انا فاهم حاجه

سيكو said...

شكلك هتضربى
قلت ميت مره بلاش الشرطة
ملناش دعوه

الا يا اختى حبيب بياخد كام متعرفيش

أنا حر said...

حلو الموضوع قوي بس الفكرة من ورا الليلة دي كلها ان الشعب يتعاطف شوية مع الشرطة علشان نتعامل معاهم على انهم غلبانيين زيينا
بس انا كنت عايز اعرف ازاي غبي يدخل مجلس الشعب يقارن المرتب ب 30 كيلو لحمة في الشهر ده اكيد بسيهرج انا لو مرتبي يجيب 15 كيلو لحمة في الشهر هفتح محل جزارة
ربنا يكون في عونا جد
تحياتي

alter said...

المخلوقة / الفيكونيية
مهو لازم زيادة لكل قطاعات الدولة طبعاً...
لان تدنى الرواتب هو العامل الاساسى لتفاقم مشكلة الرشوة و الدخان و الشاى و السكر و القهوة يا بيه
كله عايز يعمل بتاع 100 جنيه مثلاً على اخر اليوم علشان يعيش و ياكل المدام و الاولاد
وكل يوم يدعى على الى ميظبطوش بالشاى بتاعه
لانه ده رزق العيال وياسلام لو واحد جه جديد معاه ..
يفضل يحاربه علشان يطفشه ..
..علشان رزق العيال طبعاً
انا مش عارف الدنيا بقت ماشية ازاى
ما تاخدينى عندك فى الكوكب بتاعك
على الاقل هريح دماغى من الوش ده
مدونتك جااااااااااااااامدة

عبدالرحمن فارس said...

اه يا عيني معاه حق النائب المحترم في الي عمله

وكما قال عادل امام اللهم انفخنا وفسيهم

وزغردي يالي انتي مش غرمانه

ابن حـجـر الـعـسـقـلانـى said...

ازيك يا آبى .. معلش جيت متأخر .. بس كنت مفحوت بقالى أسبوع كدة

المهم

أنا مش عارف انتم زعلانين ليه من الشرطة

من حق الشرطة إنها تزود دخلها .. دول بيتعذبوا تعذيب على أيدى أبناء الشعب فى أقسام البوليس .. تعذيب شديد .. بعد كل دة و ما يطالبوش بحقوقهم و هم عالم نهيضى الجناح (حلوة نهيضى دى) .. انتم بس مش بتحبوا الخير للناس

دى الشرطة بتاعتنا حاجة حلوة و طيبة خالص .. و مش بيقدروا ياخدوا حقهم بالدراع .. و لازم يتبعوا الطرق القانونية للحصول على حقوقهم .. خصوصا إننا فى بلد ديمو ... يعنى ديموقراطى

appy said...

د/ بيطرى
اهلا وسهلا نورت الكوكب هو الامناء على فكرة مرتبهم حوالى 250جنيه فى الشهر وكمان بيكون متغرب بس ده مش معناه انهم يرتشوا اللهى يجلهم براغيث فى ودانهم علشان كده بقول الفئات كلها الشرطه والناس العاديه



المفقوعه مرارتها
والله وجهه نظر جامده بس ايدى على كتفك ننفذها ازاى بقى قوليلى


نيجرو
انا مش بخاف ولا من حكومه ولا غير وبعدين انا مش ضد زياده مرتبتهم لان فعلا فيهم اللى مش بيكفيه مرتبه انا مستغربه على نفاق الحزب الوطنى والاعضاء دول بس وبعدين ما الزياده تبقى على الكل نورتنى ومتخفش عليا الحق بقى اشوف مكان استخبى فيه سلااااااام ههههههههه



أنونيمس
بس يا دكتور والله بيحجز شقه بس هى بدعمها وده كويس الحيرة بقى اللى عندى ليه بتوع مجلس الشعب يعملوا كده على فكرة ظباط الامن العام مرتباتهم متدنيه جدا وفيه ظباط محترمه مووووت وملهمش فىالرشوه حياتهم فعلا صعبه طيب ما يزودوا كله


خبيب
اهلا يا دكتور نورت هنا انا معاك فعلا ومصدقه وعارفه ان فيه فئات محترمه وغلابه

appy said...

الراقص مع الذئاب
حمد لله على السلامه يا فندم
على فكرة انا لما من البدايه اتريقت على الاعتصامات لان انا اول واحده ضدها على فكرة وهتلاقينى بسخر منها جامد ولما قولت على الشرطه والقوات المسلحه كانوا الفئتين فعلا اللى فضلين بعد بقيه الناس وزى ما قولت انا عارفه ان دول مينفعش يعملوا كده غير كده بقى انا ليه قرايب ظباط قوات مسلحه ودفاع جوى ومنهم اللى فى فايد وعارفه المرتبات وعارفه كل اللى انت شرحته .
وعلى فكرة انا فعلا مش متخيله البلد من غير شرطه ومش معنى ان واحد تجاوز او غلط يبقى كله وحش لا خالص حتى اللى تجاوز اكيد فيه سبب لانى بصراحه مش بقتنع بالميديا اللى بتحصل دى حولين اى قضيه وبتوع حموم الانسان المنافقين
فكرتى بقى ان بتوع مجلس الشعب ليه بيعملوا كده وليه مش كل الناس وانت طبعا عارف قصه رجب حميده وبكده تبقى فهمت هما عملوا كده ليه واعتراضى ان ليه مش الشعب كله يزيد بس

appy said...

ضد الظلم
اهلا وسهلا يا فندم بس حضرتك ضد ظلم مين هههههههههههههه مالها البلد بقى ها ما احنا اللى مش بنطالب بحقنا واحنا اللى سلبيين



شيتوس
اهلا وسهلا طيب كارتونه فى ايديك بقى من الشيتوس ده وانا جاى كده للكوكب تيجى ايديك فاضيه ما علينا.......زوبعدين انا بتكلم عن انه يبقى فيه عدل لكل الفئات



حدوته
طيب ايه مواصفاتها العروسه ههههههههههههههههههههههه


همس الاحباب
نورت الكوكب وتشرف فى اى وقت


عايش ولكن
خلاص انكد عليكوا انت تؤمر ولما بتريق يا استاذنا بتريق على بتوع مجلس الشعب علشان مش بيطالبوا للناس


عبده محتاس
يا اهلا بالمنصورة وناسها ولا انا فاهمه حاجه تيجى نمشى ونسيب الناس دى هنا

appy said...

سيكووو
يا اهلا يا قمر والله انا مش بغلط فى حد هو انا ضد زياده مرتباتهم لا بس بقول العدل يا وزير العدل العدل يا اونكل عدلى يا اونكل مبارك بس وهستعين بصديق فى الموضوع ده وهقولك فى الخباثه ههههههههههههه


انا حر
شوفت الله ينور عليك انت بقى فهمت غباء بتوع الحزب الوطنى

alter
اهلا بيك اول مرة هنا وخدلك خيمه فيكونيه اقعد فيها على طول

عبد الرحمن فارس
الحمد لله اخيرا جيت انت كنت فى بعثه ولا ايه


ابو العساقيل

عذرك معاك يا معلم بس انا كنت هستخبى عندك هناك جاى تودينى فى داهيه هنا ماشى مردوده لك

haitham said...

المهم انك لما تقعد على حرف الكوكب حاسب لتقع