سنه جديدة ...سعيدة


كل سنه وكل الدنيا بخير
ويا رب اللى محققش حاجات فى 2007 يحققها فى 2008 او حتى فى 2020 المهم يحققها
ودى امنياتى للعام الجديد وخاصة انه بعدها بكام يوم هيكون عام هجرى جديد علينا
* الشوباب اللى ما اتجوز يتجوز بس يا بنات امانه عليكوا يعنى بلاش طلبات زياده فيلا وعربيه والسرجانى(ده الماظ بس) يعنى ممكن وشيه تنازلات كده والله الشكليات دى ما لها اهميه واللى بيحب حد بيتحمل معاه كل حاجه ونقف جنب بعض يعنى نشتغل وبكرة (حلنى بقى)نبقى كويسين ونحقق احلامنا ولى أولدنا المهم الرضى النفسى عن الحياة يعنى لو اوضه وصاله( وده اللى ممكن تلاقيه متوفر حاليا) مش عيب بس باتنين بيحبوا بعض تبقى جنه
* والشبا ب بقى متستهبلوش وتقولوا ما هى رضيت باى حاجه يعنى اعمل اللى تقدر عليه والله الستات دول قلبهم طيب وبيضحك عليهم بسهول(ايوة لما تدخل لهم من الحته اللى فى الشمال دى) يعنى كلمه حلوة هديه بسيطه تقدير للى بتعمله وشوفها كل يوم بعين تانيه ومش عاوزة حد يقولى يعنى ابصلها من فوق لتحت ومن الجنب لا شوفها انسانه جديدة وده دور البنات برضه اتجددى يا ام الخلول بلاش القوقعه اللى انتى فيها.
* المتزوجين بقى يبقوا سعداء يعنى اللى مزعله بعلها تصالحه يعنى تعمل له مفاجعه كده يعنى مرة تستناه ورا الباب وتنكش شعرها وتقف فى الضلمه لابسه اسود وااااااااااو وهو اول ما يدخل يطب ساكت(ويبقى خلصنا من وجع الدماغ) لاااااااا انا بهزر يعنى تهتم بنفسها شويه والراجل كمان يهتم بالنسبه فى البيت زى برة البيت (فاهمينى ولا اضرب بالقلل ) ونبطل زن اصلى عارفه الست والبنت لما تزن يا ساتر لو يعملوا لنا فيبريشن زى الموبيل يبقى احسن.
* اما لما لمصر امى وحبيبتى فيا رب كل مسئول يكون عنده ضمير وبيبص لمصر كويس ربنا يحميه ويزيده ويساعده اما بقى اللى نايم وعجلته نايمه نوديه لخالتى فرنسا تنفوخها ليه ههههههههه (اصلها خبرة فى العجل عندها واحده عامله دوشه) ربنا يهديه كده ويبص للناس الغلابه.
* اما المدونين اللى اعرفهم ومعرفهمش يا رب يكون موضوع التدوين ده بينفس عن اللى جوانا ونلاقى اللى يساعدنا فى حل مشاكلنا ونقدر نوصل حاجات كويسه للمجتمع ونصلح من نفسنا.
* اما عن نفسى اكبر بطوط شويه (عربيتى) وابو الهول ينطق واروح اسكن معاه تحت سفح الهرم وربنا يرضى عنى وعنكم ويحفظنا ويسترنا فى الدنيا والاخرة.
وابطل اجيب لعبد الرحمن فارس الضغط ولو زعلت حد منى والله ميزعلش انا قلبى طيب بس عبيطه كده واللى فى قلبى على لسانى معلش سامحونى
كل سنه وكل الدنيا طيبه

19 اخبط وقول رايك:

عبدالرحمن فارس said...

الرائعون كالأحجار الكريمه لا نصنعهم ولكن نبحث عنهم لنهنئهم بالعام الجديد ... كل عام وأنتم بخير
عام مضى وعام يأتي ويارب السنه دي تكون أحسن من الي قبليها ونشوف نفسنا و مصر أحسن .... بدري بدري كده قبل الزحمه

Desert cat said...

happy new year
كل سنة وانتى طيبة يا جميل
وان شاء الله تحققى كل ما تتمنى
دمتى سعيده

ابن حـجـر الـعـسـقـلانـى said...

كل سنة و انت بألف خير ... و يا رب تتحقق لك كل أحلامك

عبقرينو said...

السلام عليكم
شكرا ليكى على زيارتك لقعدتى الصغيرة بس معلش مش عرفت اضايفك قهوة شاى اى حاجة بس ملحوقة ان شاء الله
كل عام وانتى وقرائك وكل مصرنا الحبيبة بكل الخير

رئيس جمهوريه نفسى said...

كل سنه وانتى طيبه وسنه جديده سعيده عليكى

الجمعاوي الاصيل said...

السلام عليكم ورحمة الله

كل عام وانتم الى الله اقرب وعلى طاعته ادوم


وان شاء الله يكون عام الحسم وتحقيق الاحلام

واهم حاجة بقى موضوع الجواز ده

الله يسهلنا كلنا

فرنسا هانم said...

كل سنه وانتى وكل المدونين بخير
وعلشان كده
انا بعمل تخفيض لمده 39 يوم
علشان كل يوم يبقى بسنه من عمرى
تخفيض 100 فى الميه
على جميع انواع العجل
النصر
والرالى
والعربيات البطوط
وعجل الاطفال
خدمه 24 يوميا

عام سعيد

الجحيم هو الحقيقه said...

appy


كل سنه وانت طيبه


البوست جميل وخفيف عادى كده كاننا بنساهر احلام بسيط جميله بس فى الجون خصوصا حكاية
الاوضه والصاله


هههههههههه


بجد روح طايره رقيقه


تحياتى

nour el 3ozamaa said...

كل عام وانتى بخييييييييييييييييير
وانشاء الله السنه ده تكونى في احسن حال

وبجد انتى شرفتيني في المدونه

تحياتى

الشريف / جمال طة said...

كــــــــــــل سنه وأنتــــــــى طيبــــه

اختيارك للخلفيات أكثر من رائع ويجمع بين الذوق والجمال والرقه


http://gamal51.blogspot.com/

DR.HAMAS said...

بصراحة أختنا الكريمة

كلامك ظريف جدا و كله تفاؤل

أنا أسأل الله أن يعطيكى ما تتمنى من الخير

و أن يبعد عنك كل سوء

و عنا و عن أمتنا كلها يارب


---------------------------

و أحب أن أوجه رسالة للأشخاص الذين تكلموا ببذاءات و حقارات متناهية

أقول لهم:

إن كنتم على حق فقد حقرتم من هذا الحق بهذا اللسان البذئ

و إن كنتم على باطل-وهو الاغلب- فقد أظهرتم حقارتكم على الملأ

و الذى يتهم شخص .. يواجهه بالدلائل و البراهين و العقل
و لا يعلق تعليقا سفيها بدون اسم و يهرب

أنا شخصيا من كارهى بعض أفعال أمن الدولة السيئة بالتأكيد

و لكن لست ممن يواجه هذا-إن صح كلامكم و أشك فيه جدا- بهذا الكم من القذائف الغبية

أتمنى أن تعيدوا تصحيح عقولكم

---------------------

أطلب من الأخت الكريمة Appy

أن تمنع من إعدادات Comments

أن يعلق من هو ليس صاحب مدونة معلومة

كى تتجنب هذه التفاهات

----------------------------

أشكرك أخت Appy
على هذه الامنيات الطيبة لكل الناس

---------

د.حـمــــاس

appy said...

كل سنه وكل اللى نورونى بخير
د/حماس اشكرك لشعورك وكلامك وعموما انا عارفه مين اللى بيعمل الكلام ده وايه السبب وهو انه انا ناقشته فى بعض اعماله ونقدته معجبهوش الكلام بتاعى وكان على مدونة تانيه ولما اتهم الناس اللى بتهاجمه انهم امن دوله رديت ببساطه وفهمته ان امن الدوله مش محتاجه تزق حد عليه لانها بسهوله ممكن تقضى عليه قالى ايه عرفك بيهم قولت له اعرفهم ودول مش محتاجين حد يعرفهم فالغل اكل وهو مشهور بلسانه الطويل فعادى هو شخص مش بيقبل النقاش المحترم هعمل له ايه
والحاجه اللى احب اوضحها ان ابويا راجل عادى واللى يعرفونى شخصيا عارفين كده كويس وعموما شكرا ليك مرة تانيه

appy said...

خالتى فرنسا
ايه النور ده وانا اقول الكوكب بتاعى نورة زاد كده ليه كل سنه وانتى طيبه
الجحيم هو الحقيقه
والله الاوضه والصاله هى المتاحه بس نلاقيها حتى نورتنى
نورررر
مش محتاجه اقول حاجه كفايه اسمك نور الكوكب
الشريف جمال طه
كل سنه وحضرتك بخير وحقك راجع لك

أنونيمس said...

الكوكب ده جميل اوي
روحه خفيفة كده
وهواه بحري
والوانه لطيفة جداً
:)

كل سنه وانتي طيبه

النجم القادم said...

السلام عليكم باسم الله مشاء الله مدونة جميلة ربنا يوفقك وتكون فى ميزان حسناتك واقولك كل عام وانتى الى الله اقرب كل عام وانتى افضل ممكن كنتى ادعوكى لزيارة مدونتى إوعى تخاف اوك منتظرك تحتفلى معنا بيوم ميلادى يوم1/1 اوك السلام عليكم

shrouk said...

Happy new year
اللهم اجعله عام سعيد على الجميع



2008

shrouk said...

Happy new year
اللهم اجعله عام سعيد على الجميع



2008

د/اجدع بنوته said...

الله امنياتك كلها حلوه

خصوصا اللى تاخص الجواز ده والعربيه

يااااااااااااااااااارب

نتجوز ونكبر العربيه هههههههههههه

انا متضامنه معاكى
واللى هتعمليه هعمله

وكل سنه وانتى سعيده

وكل عام وانتى الى الله اقرب

L.G. said...

النهاردة زي ما طلبت من اصحابي بعمل بزور تدوينة قديمة عند كل حد فيهم
فتحت بقدر الله التدوينة ديه لقتها راس السنة تمام قوي جدا خالص لأننا لسه في اعتاب 2012
اتكلمتي في 2007 عن الجواز والحمد لله انت اتجوزت ودعيتي لمصر والحمد لله مبراك مشى والثورة اهه بتشق طريقها
وقلت عن التدوين ينفس عن اللي جوانا ومازال ملجأ لينا
سبحان الله التدوينة ديه جت في الجون أتمنالك من 2012 وطالع تحققي اللي بتتمنيه وتسعدي بكل اللي تلاقيه .. في حياتك وبين أصحابك ومع عيلتك وترجعي مصر بالسلامة واشوفك وتكون عربيتك بقت بطوط اكبر شوية يارب زي ما اتمنيتي :))) رحاب هابي نيو ييييييييييييير