.jpg)
امبارح بالليل وانا راجعه بعد الشغل والمعاناه طول اليوم(طبعا تمثيل معاناه ايه احنا بطاله مقنعه بنروح الشغل نشرب شاى) المهم وبعد الغدا وانا قاعده ممددة على الشازلونج (ده اختراع بقى زى الكنبه اللى فى دوار العمدة بس مريحه شويه) ومدده كده وبقلب فى الاختراع العبقرى الهلامى اللى اسمه تليفزيون الله يرحم ايام زمان اللى كان عنده راديو يبقى اقطاعى المهم وبقلب وبتنقل بين القنوات الفضائيه بالمركبه الفضائيه بتاعتى القنوات الهلاميه الخزعبليه القشوريه الجمبريه اللى بتجيب اغانى لقيت خير اللهم اجعله خير واحد اسمه(عماد زعرور) الله مين زعرور ده مش عارفه اقول يمكن لوزة تقلت العيار معايا شويه وانا مش شايفه اقول يا بت لا انتى كويسه المهم الزعرور ده بقى طالع بفلنه داخليه وواحده غريبه فى شكلها ولبسها كده قولت لا حول ولا قوة الا بالله اكيد انا مت وروحت النار وبتعذب علشان اللى انا شايفاه ده وبينط من مكان لمكان وصوته يا ساتر يا رب والغريبه انه جايب توم معاه اه والنبى توم من اللى بيتقشر ويتعمل على الاكل (المعلومة دى لربات البيوت)قولت يا خبر ربنا يستر والتوم كمان ميغلاش زى البصل اصل انا مؤخرا اكتشفت ان مش الطماطم لوحدها اللى مجنونه دى انتشرت العدوى دى بين كل الخضار المهم قعدت اعصر فى الطماطم (قصدى دماغى) لغايه لما افتكرت ده زعرور بتاع سوق العبور ....سورى قصدى بتاع اغنيه العنب والخضار والفاكهه يعنى ومنتجات البحر الاحمراللى الاخ المبجل سعد الصغير سرق قفصين عنب ياعينى من عنده فى سوق الخضار
قعدت اتفرج وانا مزبهله من هول الصدمه وتمنيت انى اقوم من النوم بس اتضح فى النهايه انه انا مكنتش نايمه ولا بحلم واتاكدت لما سمعت الصوت الهلامى بتاع زعرور فى الشارع وانا نازله وكان فى الميكروباص
بس انا عاوزة حد يقولى هى دى الثقافه الجديدة اللى هندرسها ولا ايه
ولا البنت التانيه اللى قرفانه من كل حاجه اللى اسمها (يايا) والاغنيه اللى قهرتنى على رأيها اللى اسمها ياى
انا بقيت اتمنى ان الاختراع ده يتنسف او اكون مهيسه مع لوزة صحبتى(لوزة دى الشيشه بتاعتى وهى ساكنه معايا فى البيت علشان عليها حكم وهربانه ومحدش يبلغ عنها انا بقول اهو)
قعدت اتفرج وانا مزبهله من هول الصدمه وتمنيت انى اقوم من النوم بس اتضح فى النهايه انه انا مكنتش نايمه ولا بحلم واتاكدت لما سمعت الصوت الهلامى بتاع زعرور فى الشارع وانا نازله وكان فى الميكروباص
بس انا عاوزة حد يقولى هى دى الثقافه الجديدة اللى هندرسها ولا ايه
ولا البنت التانيه اللى قرفانه من كل حاجه اللى اسمها (يايا) والاغنيه اللى قهرتنى على رأيها اللى اسمها ياى
انا بقيت اتمنى ان الاختراع ده يتنسف او اكون مهيسه مع لوزة صحبتى(لوزة دى الشيشه بتاعتى وهى ساكنه معايا فى البيت علشان عليها حكم وهربانه ومحدش يبلغ عنها انا بقول اهو)
17 اخبط وقول رايك:
هههههههههههههههههههههههه
هههههههههههههههههههههههه
هههههههههههههههههههههههه
والله انتي عسل ودمك خفيف ومليش تعليق علي الي انتي قلتيه غير اني خايف عليكي من العدوى بقيتي بتقولي كلام غريب
( -هلاميه - خزعبليه - قشورية - بفلنه - مزبهله - )
انجليزي دا يا مرسي
سؤال وجيه جدا مين يايا دي ؟؟؟
وخفي بقى من علاقتك بلوزه
شكلي بدأت أهيس
لكن وكما قال المثل هيس هيس تبقى شاب كويس
سلاموز بقى
فارس يا اعز صديق
يايا دى اغنيه او صحبت الاغنيه المهم انهم الاتنين الاغنيه واسم المغنيه زى بعض وبتغنى بالبنانى ولدغه كمان ومتغلطش وتقولى ما انتلى زيها علشان عيب انا لدغه بس مش بغنى وميرسى للنور اللى انت عامله ليه على طول بس خف علشان الفاتورة:)
الشازلونج بيصنفك فى الطبقة الارستقراطية ولوزة بتصنفك مع سواقين الميكروباس ، ياريت تتحركى شوية فوق او شوية تحت عشان تبقى معانا فى الطبقة اللى ماتتسماش المتوسطة
الكلام اللى فات من تأثير معركة فكرية كنت داخلها من يومين
دمك شربات ياسمك ايه
بس هو اسمه عماد بعرور
مش زعرور
:))
وللا ده مطرب جديد؟
ثم ان الشيزلونج مش مريح ولا حاجة دي زي الضرب على الركب
انا باستخدمه كدولاب بارمي عليه الهدوم
حتى القطط مش بترضى تنام عليه
وتحسي ان فيه حد بيديكي بالبونية على قفاكي انا مش عارفة لازمته ايه ده
هو احنا بنقول شيز لونج ليه
هو ترجمته الكرسي الطويل
ما نقول الكرسي الطويل
أستاذ راجى انا مبسوطه بالمراجيح اللى بركبها دى شويه فوق وشيه تحت وبعدين لوزة اترقت وبقت من الطبقات الارسقراطيه ايه الكلمه اللى مش عارفه حتى اكتبها دى ما علينا يعنى وبعدين دى خريجه كليات الفاكهه يعنى مش تعليم مجانى يا فندم دى أبل وشيرى وحركات وميرسى ليك على ذوقك نورتنى
نوارة نورتينى
اولا شازلونج كلمه جايه من برة بس هو مريح بالنسبه ليه جدا يمكن الضرب ده عندك انتى لزمته فى البيت زى قلته عادى بس اهو كماليات وانا مبقولش عليه كرسى طويل علشان اعرفك الثقافات التانيه ههههههههههههههه بهزر طبعا نورتينى وانا بقى مصممه على انه زعرور والنبى ما ينفع عليه اسم غير كده لانه فيكون فضائى غريب
هو انتى لسه مكنتيش تعرفى عماد بعرووور
لالالالالالالالا فين الثقافه
ده علم من اعلام مصر
ده رمز من رموز اى فرح
يعنى انا ولافخر حفلة خطوبتى مبقتش هايصه ومفرفشه كده غير بأغنيه ايظظظظظظظظظظظظن ترياراراراراراا والعنب العنب العنب ده غير السمك السمك طبعاااااااا
وبعدها خطيبى قالى كفااايه كده حرررام
قصده من جمال الصوت طبعااا
ده فنان اصيييل نبييييل
نبيل مين
نيهاهاهاهاها
ده كلام
مش عاجبك عماد بعرور
ده صوته جنان و طبقاته ولا طبقات الكادليز
إنتى بس مش عارفه تسمعيه إزاى
ده لازم يكون النور يكون خافت و يستحسن مقطوع و لوزه تكون متعمره و شوبين عصير جزر و أهم من كل ده لازم تشوفيه على ميلودى تتحدى البلل
القنوات دى و الناس اللى بيطلعولنا فيها بتخلينى أعيط على مستقبلى اللى أبويا ضيعهولى فى المذاكره و الكلام الفاضى
مش الواحد لو كان إنحرف و عباله شريط أو فرقعله كليب كان زمانه عنتر زمانه بدل المرمطه و الخدمه فى البيوت
يللا
كل شئ نصيب
لحمدى ربنا وبوسى ايدك وش وضهر انتى وقعتى فى الفاكه انا وقعت مع الحمار اللى بيغنى للحمار وقعدت أقوله بطل نهيق ومنه لله خلانى كسرت البتاع اللى اسمه الدش والتلفزيون خوفا ان الحمار يرفسنى يابرنسيسه تحياتى
نوسه يا حبيبتى للاسف لما عصرت الطماطم زى ما قولت لك عرفته وافتكرته بس حرام والنبى انا ناقصه هلاوس سمعيه وبصريه كمان الله يكون فى عون خطيبك عنده حق
درويش شكرا لمرورك بس لما تعبى الشريط ابقى قولى امسك لك الشوال بس والله الخدمه فى البيوت احسن من الهسهس اللى هيجيلى ده ما انت لو شفت الكلب (قصدى الكليب) كنت عرفت انى حسيت انى فعلا رحت النار وبتعذب
الشريف /جمال
انا عندى ابن اختى صغير لسه مكملش سنتين وبيغنى بحبك يا حمار دى لما كنت بكلمه فى التليفون قالى زعلت قوى ومفهمتش غير كلمه حمار منه لانه بيبى ولما سالت لقيت اختى بتقولى بيقولك بحبك يا حمار انا افتكرت ان حد علمه انه يشتم مع انه لسانه طويل ولمض شويه والله زعلت علشان الاطفال بيتعلموا الحاجات دى من التليفزيون الاختراع الفاشل ده والقنوات اللى هتموتنا من الغيظ
على فكرة
تصحيح للمعلومة
اسمه
عماد بعرور
بس ..
هوا وصل التليفزيون أمتى؟
ادا كبيره كانت الافراح الشعبية
واعتقد
والله اعلم
هو صاحب اغنية
أيظن
إني هاشرب بيره!!
ًصباح حلمنتيشي منتشى بالإستلمساح السلبوصي
حتقولي مش فاهمة ، حأقولك ولا انا فاهم حاجة
بس ماله عماد بعرور ، على الأقل بيشجع الإنتاج الزراعي وتسويق منتجات مصر الزراعية في الخارج وهذا في إطار الحملة القومية للقضاء على شلل الأطفال
وعلى فكرة إكتشفت إن سعد باشا كان بيفهم بجد لما قال (مفيش فايدة) ومات
-------------------
طلب أخير وهو إني نفسي أتعرف على لوزة ويا حبذا لو كانت القعدة تفاح .. وصباح الخيييييييييير
لا يا دكتور لوزة صحبتى انا بس
وبعدين هى مبتحبش التفاح خالص
الحمد لله مبتفرجش على كليبات .. لا فاضيلها ولا بحبها .. بصراحة مهزلة اللي بيحصل ..
على فكرة .. اسلوبك جميل في عرض حاجة للاسف بقت موجودة في كل بيت .. مش في دوار العمدة وبس
وَمِنَ النَّاسِ مَنْ يَشْتَرِي لَهْوَ الْحَدِيثِ لِيُضِلَّ عَنْ سَبِيلِ اللَّهِ بِغَيْرِ عِلْمٍ وَيَتَّخِذَهَا هُزُوًا أُولَئِكَ لَهُمْ عَذَابٌ مُهِينٌ (6) وَإِذَا تُتْلَى عَلَيْهِ آَيَاتُنَا وَلَّى مُسْتَكْبِرًا كَأَنْ لَمْ يَسْمَعْهَا كَأَنَّ فِي أُذُنَيْهِ وَقْرًا فَبَشِّرْهُ بِعَذَابٍ أَلِيمٍ (7) سورة لقمان
لم أجد سوى كلام الله للرد على هذا الفن الجديد
أبو خالد
Post a Comment