مش عاوزة ضرب وعاوزة حق البنزين

امبارح كله هجم عليه علشان الظباط وكله بعت ليه اللينك اللى بيقول ان ظابط مرور قتل واحد وانا التزمت الصمت وقولت ياليله عدى بقى ورحت بعد الشغل والقصه كالاتى:-
الظابط ده كان فى كمين عادى يعنى بيكشف على الرخص زى الدكاترة كده والراجل بتاع العربيه النقل كسر الكمين وخبط القرطاس(البتاع المستفز ده اللى لون اورانج) المهم الظابط جرى ورا الراجل علشان الرخص بالعربيه بتاعت المرور طبعا ووقفه قدام محجر على الطريق على ملحقه يعنى (مطاردة شريرة) وبعد كده حصلت خناقه بينهم تدخل فيها ناس كتير من المكان ده ومن ضمنهم راجل صاحب محجر المهم الخناقه تحولت من ما بين الظابط والسواق الى السواق وصاحب المحجر لان تقريبا صاحب المحجر عارف الظابط او السواق غلط فى الراجل مقدرتش اعرف فالراجل خبط السواق بحجر فى دماغه واتعور واللى نقله للمستشفى الظابط والراجل توفى زى ما الناس عارفه وتم اخلاء سبيل الظابط من النيابه والراجل محبوس على ذمه القضيه واللى عاوز يعرف يروح يسال الناس والله اعلم ولو عرفت جديد والله هقوله بصراحه مش هخبى علشان اعرف اول قله من القلل بتاعتى هتوقع على دماغ مين
تحديث:-
اسم الراجل اللى محبوس وضرب السواق على مصطفى محمود وده بتاع المحجر
وزى ما قولت المصادر بتاعتى الناس بس مش شخص واحد واللى عاوز يعرف الحقيقه يروح المكان اللى بتحصل فيه الحادثه ويسأل اكتر من حد ويفكر ما بينه وبين نفسه ايه الصح والحقيقه فين وده طبعا اللى دينا كمسلمين او مسيحين بيحس عليه اننا يكون لنا مصادر فى تقصى الحقيقه من ناس اهل للثقه ولها شروط اعرفوها وانتم هتفهموا وبلاش ننقل اخبار من بعض وبس يعنى انا مكنتش بقول حق البنزين استعباطا لانى رحت جد وبينى وبين الشرقيه حوالى 80كيلو

13 اخبط وقول رايك:

Ragi said...

ابى
ازيك وعاملة ايه؟ انتى دمك خفيف خالص وكتاباتك فيها اخلاص
ولكن
شفتى قدايه الهجوم اللى حصل عليكى من المدونيين فى قصة البنت التى اغتصبت؟
عاوز انصحك نصيحة اخوية ان المدون لو حيكتب عن موضوع مثير للجدل او ليس فيه وجه نظر واحدة انه يتحوط ويعرض كل وجهات النظر ان امكنه او يعرض مصادر معلوماته لو ده لا يعرض المصدر للخطر او صور هو التقتطها بنفسه يعنى يوثق التدوين
يعنى ما بنفعش وبالذات فى الاحداث التى فيها قتل او موت او تعذيب اننا نتعرض لها واعذرينى فى اللفظ بخفه وتهريج يعنى البعد عنها اسلم
وبعدين فى واحدة حلوة وامورة زيك كده وعندها لوزة وقلل قناوى توجع دماغها بالحاجات دى ليه؟
انا والله بانصحك باخوية وارجو ان تتفهمى كلامى

رئيس جمهوريه نفسى said...

اولا مره ليه فى البلوج بتاعك وجبت اللينك من مدونه قطه الصحراء للاسف بقى فى حساسيه جامده ناحيه ضباط الشرطه واى غلط غلطهم وبكده منظومه البلد فاشله بجد لانى بقى كله بيخاف من كله اقباط فى مسلمين ومواطنين فى ضباط شرطه وهلما جر وربنا يستر والقنبله متنفجرش فى اى لحظه تودى البلد دى فى ستين داهيه

appy said...

استاذى راجى وكل المدونين اللى بيشرفونى والله العظيم وده مش محتاج حلفنات منى ما بكتب حاجه فى مدونتى الا من مصادر موثوق منها وعلى فكرة فيه ليه اصحاب قالوا ليه ان حالتى النفسيه وتأثرى بالموضوع بيتعكس فى كتاباتى بس هما عارفين وده اللى عاوزاكم تعرفوه بجد انى بكتب من قلبى مش لاى غرض تانى خالص بعرض وجهه نظر انما الاحداث بجد بتحرى فيها الدقه فى كل مكان حتى لو سافرت لها وبعدين انا عيلتى كبيرة قوى وفى جميع البلاد فى مصر بس الاغلبيه فى العريش طبعا فمتخفش عليا وبشكرك من قلبى لنصيحتك ومش هتنازل عن القلل بتاعتى برضه هههههههه

appy said...

رئيس جمهورية نفسه
يا رب تبقى رئيس جمهوريتنا احنا كمان بس هاااااااا خلى بالك دى مصيبه مش حاجه كويسه مسئوليه وهتحتاج للقلل بتاعتى ولوزة كمان شرفتنى وانا متبعاك على فكرة وبشوف تعليقاتك ووجهه نظرك دى هى اللى انا بلفت الناس ليها ان بجد يا جماعه الظلم فى كل المجتمع فى الفقراء والاغنياء والطبقه المتوسطه كله انا مش بصنف الناس التانيه هى اللى صنفت ما علينا ان فيه ايد خفيه بتبوظ مصر واحنا بقينا لقمه سهله ليها بجد ربنا يستر ويلم شملنا على الصح تانى

Desert cat said...

اولا انا زعلانة علشان كنتى جنبى ومش اديتينى خبر حتى عن طريق الحمام الزاجل
ثانيا
الناس اصبحت شايفه رجل الشرطة المجرم اللى المفروض ينضرب ويتقتل ويتبهدل هو واللى يتشدد له اصله بلطجى وخريج شرطة وكل خريجين الشرطة بلطجية يبقا يترجموا
انما تتعامل مع الامور بموضوعية ويعرفواايه الحقيقة ويبنوا احكام لاء
ده يبقى انتى كدا مع الظلم بتدافعى عنه
دلوقتى بقى المغتصب والمجرم مظلوم وراجل الشرطة ظالم ويستاهل القتل
الناس محتاجة توعيه علشان تقدر تميز بين الظالم والمظلوم
وبين الشرطى اللى بيطبق القانون وبين اللى بيستغل سلطته
تحياتى

m5m said...

اتشرفت بزيارتك مدونتى وتعليقك فيها
.................................

ياريت تذكرى لنا ايه مصدرك الموثوق فيه لأن الحقيقة القصة بالشكل ده مش منطقية شوية

يعنى واحد موت السواق مجاملة للظابط؟
ولا واحد شيلوه الليلة فداء للظابط؟

تحيا مصر

appy said...

قطتى معلش الحمام كان بعافيه شويه معلش ما انتى عارفه الفلونزا الطيور

بس المرة الجايه هقولك
بس نشوف طريقه غير الحمام ده اصل كده ممكن يعطس فى وشنا

m5m
انت نورتنى وسعيدة بيك انا قولت ان مصدرى انك تروح وتسمع من أكتر من حد وعلى فكرة هو مكنش بيجامل الظاط ولا الراجل قصده يقتل التانى يعنى بس ساعة الخناق يعنى وانت عارف استاذ شوشو ودورة الفظيع فى تهدئه نفوس الناس وبص لها نظرة تانيه لما يكون ناس داخله خناقه ممكن واحد يتعور او يموت بس مش لازم اللى يتخانق معاه هو اللى يضره فهمتنى
وبعدين يا كابتن احنا فى زمن حد بيفادى حد ولا ايه............

Nsreen Bsunee said...

appy
فكك يا بت المدونين مش مسؤلين انهم يقعدو يفصصو المعلومات اللى بتوصلهم المدونه ديه اوضه فى شقتك اكتبى فيها اللى انتى عاوزاه و الى انتى حساه انتى مش موضع محاكمه او مسؤليه انت بتقولى وجهه نظرك واحساسك محدش يقدر يحاسبك انتى شايفه ان الظابط مظلوم انتى حره كل موضوع ليه الف الف تحليل وتفسير حد يقدر يحاسب حد على رؤيته وتفسيره

مدونتك جامده وانتى سكر يا بنتى وياريت نعرف بعض اكتر
سلام

MerMaid said...

القصة دي حصلت هنا عندنا في اخر شارعنا

و الموضوع صحيح

الظابط اسمع انه محبوس و محدش شال الليلة مكانه ولا حاجة

هو فضل يضرب السواق بالمسدس لغاية ما السواق طب ساكت في الحال

ربنا ينتقم من كل ظالم

بجد بلد مقرفة و كلابها مساعير

عبدالرحمن فارس said...

الضابط محبوس يا appy
ردي عليها بقى دي من المكان نفسه

يلا بقى

appy said...

mermaid
حبيبتى واضح انك مفهمتيش اللى انا كاتبه اولا نورتينى بس اول شارع ايه اصلا الحادثه كانت على الطريق مش على باب شارع الكمين بتاع الظابط والمحجر فى الطريق بتاع الصالحيه الا اذا كنتى انتى ساكنه بقى هناك المهم التقرير الطبى والشهود قالوا ان ده حجر اللى ضربه انتى جبتى منين بقى قصه المسدس بتاع الظابط مش عارفه انتى بتتكلمى فى حادثه تانيه الناس مش عارفينها لانك انتى الوحيدة اللى قولتى كده وانا رحت هناك وعارفه الحقيقه من هناك اقرى كويس ووضحى انتى كنت بتتكلمى عن ايه عموما نورتينى

appy said...

عبد الرحمن
متصطادش فى المياه العكرة لانك فاهم ان تعليقها ملوش علاقه بالموضوع الحادثه كانت على الطريق مش على اول شارع ولو كلفت نفسك ومهجمتش كده زى المتربصين كنت فهمت ان تعليقها ملوش علاقه بالموضوع الراجل مات بضربة حجر فى دماغه مش مسدس

M@@@@H said...

للاسف اكتر من كده وبيحصل .. والكلام بيوصلني من ضباط اصحابي .. حسبي الله ونعم والوكيل