انا رحت الاسماعيليه .....أنا رحت الاسماعيليه

صباح الخير عليكوا
بجد انا مبسوطة جدا لانى رحت مكان شوفت فيه الحاجات الحلوة دى كلها يوم الخميس وبعد الشغل بنخلص بدرى بدل الساعه 4 بنخلص 2 عقبالكوا يا رب كده المهم نويت وعقدت العزم كده يعنى انى اسافر البلد دى وخاصة انا سافرت قبل كده مرة واحده قعدت 3 ساعات ورجعت يعنى لقربها من القاهرة بنت أم عز اللى احنا عايشين فيها المهم عملت فيها ابن بطوطة وابن ماجلان واكلت الجمل ونويت الرحيل ورحت بدرى شويه علشان الحق الغروب(علشان اصور مش احب للناس اللى بتفهم غلط بس) المهم الطريق من القاهرة للاسماعيليه ساعه تقريبا بس طريق هايل لاحد بيكعبلك(المطبات يعنى) ولا حد بيديك كتف غير قانونى (بيزنق عليك) الطريق واسع وصلت بسلام ونزلت المخله من على الجمل وربطته(دى بطوط عربيتى يعنى) .
وقعدت الفلف بقى قبل كده كنت يعنى خايفه شويه وبلد جديدة ومعرفش حد هناك ليه واحده صديقتى يتيمه كده بس مش دايما بتكون هناك المهم فيها شارع كبيرررررررر اسمه عمارة السياحى وانا سألت الاولاد الحلوين اللى فى الكافيه اللى قعدت فيها (بس المرة دى من غير لوزة صحبتى)قالوا ليه انه شارع على اسم عبد المنعم عمارة والله فيه الخير ... انا مكنتش مصدقه نفسى من اللى شيفاه بجد لما رحت بالنهار نظافة ايه وجمال ايه ونظام والكوبرى والكورنيش اللى على القناة وشكل الغروب والقرى السياحية مفيش بعد كده وطبعا التكسيات هناك لونها اورانج وفيه بتاع صغير كده أصغر من الميكروباص مش عارفه اسمه لونه اورانج تحس كده وانت ماشى انك وقعت وسط جنينه برتقال واستفندى وهيص يا مان .
الاحلى بقى ان الحمد لله هموت وانا مبسوطه انى شفت ناس بتحترم الاشارات (ودى عقدتى طبعا) وفيه اشارات ديجيتال عقبال امالتكم زى الكاميرا كده بالثوانى تفتح وتقفل لوحدها والله ومفيش عسكرى وسبحان اللى الناس بتقف وبتحترمها انا فرحت قوى وحسيت كأنى فى كوكب تانى او اتخطفت وانا فى الفضاء الخارجى وخاصة انى ولا كنت نايمه ولا لوزة معايا يعنى انا صاحية اهو وعنيه متفتحه للحياة ومعنديش هلاوس وقولت مش هموت ونفسى فى حاجه شوفت ناس تختشى ومتخفش عكس(تخاف متتختشيش) وكمان الناس هناك حلوة وطييبين جدا .
والقناة (ربنا يرحم اللى حفروها بدمهم )كمان والمراكب اللى فى القناة وبتعدى والصيادين وبجد الشارع مش فيه زباله ولا حاجه والجناين وتحت السجر يا وهيبه ياما كلنا برتقال انا شوفت نخل وشجر يجنن بجد
بس الناس هناك لهم شكوى فى الاعياد ان الضيوف اللى بتزورهم وتصييف عندهم بجد بتبهدل البلد ومش بتحافظ عليها
وهما بيضايقوا قوى ( يا ريت للاخوة الزوار بلاش زباله فى الشارع ممكن نحطها فى كيس)علشان منقولش الحكومه بتعمل ومتعملش يعنى احنا اللى فينا سلبيات اهو ومش عاوزة ضرب بقى علشان انا مبسوطة
شوفتوا بقى يا جماعه ان سهل قوى علشان نبقى مجتمع نظيف وراقى وكويس ومتحضر ومعندناش انتهاكات لحقوق انسان ولا لكرامة حد سهل قوى بس نبدأ بنفسنا بجد نبدأ بالاسرة اللى هى الاساس كل واحد يعود نفسه على الكويس مش يمشى على رأى عليوة مع القطيع احنا مش قطيع احنا ربنا ميزنا بالعقل علشان نفكر مش نبقى كدابين زفه وكل واحد يقولك انا مالى نفسى نبقى زى البلاد اللى بره فى كل حاجه وعوا أولادكم على النظافه والالتزام واحنا كمان واحنا كبار سهل نصلح أخطائنا بلاش اهمال فى حياتنا هنرتاح الاهمال زى ما هو سهل كمان الالتزام سهل وبيريح وساعتها بس مش هيكون فيه فرق بين اى حد فى الثقافات طالما هنتمسك بحاجات كويس والدين بتاعنا خير مثل لينا
وأخيرا عاد ابن بطوط من رحلته الخزعباليه من بلاد اليس فى بلاد العجائب لانى بجد مكنتش مصدقه انى فى مصر واللى مرحش البلد دى يروحها لانها قمة الهدوء والنظافه وكمان رخيصه جدا الكافيهات هناك (يعنى اللى عاوز يأخد الموزة خطيبته يعنى مش حاجه تانيه او الموديم المدام يعنى والاولاد يروح على ضمانتى )والاكل كمان والسمك .....السمك السمك تحفه بجد وان شاء الله اشوف ايه البلد الجايه ايه لانى زعلانه من نفسى اسافر برة مصر ومش اشوف مصر كلها (والدور الدور الدور الدور موعوده ياللى عليكى) الدور على مين اللى مرحتهاش قبل كده واللى عاوز يجى معايا اهلا وسهلا الجمل بيشيل اتنين وممكن نجيب حمار صغير كده والزاد والزواد موجود
على فكرة الاسماعيليه فيها حاجات من الطراز الانجليزى يعنى بعض المبانى الاحتلال بقى بس ساب حاجه كويسه