انا رحت الاسماعيليه .....أنا رحت الاسماعيليه

صباح الخير عليكوا
بجد انا مبسوطة جدا لانى رحت مكان شوفت فيه الحاجات الحلوة دى كلها يوم الخميس وبعد الشغل بنخلص بدرى بدل الساعه 4 بنخلص 2 عقبالكوا يا رب كده المهم نويت وعقدت العزم كده يعنى انى اسافر البلد دى وخاصة انا سافرت قبل كده مرة واحده قعدت 3 ساعات ورجعت يعنى لقربها من القاهرة بنت أم عز اللى احنا عايشين فيها المهم عملت فيها ابن بطوطة وابن ماجلان واكلت الجمل ونويت الرحيل ورحت بدرى شويه علشان الحق الغروب(علشان اصور مش احب للناس اللى بتفهم غلط بس) المهم الطريق من القاهرة للاسماعيليه ساعه تقريبا بس طريق هايل لاحد بيكعبلك(المطبات يعنى) ولا حد بيديك كتف غير قانونى (بيزنق عليك) الطريق واسع وصلت بسلام ونزلت المخله من على الجمل وربطته(دى بطوط عربيتى يعنى) .
وقعدت الفلف بقى قبل كده كنت يعنى خايفه شويه وبلد جديدة ومعرفش حد هناك ليه واحده صديقتى يتيمه كده بس مش دايما بتكون هناك المهم فيها شارع كبيرررررررر اسمه عمارة السياحى وانا سألت الاولاد الحلوين اللى فى الكافيه اللى قعدت فيها (بس المرة دى من غير لوزة صحبتى)قالوا ليه انه شارع على اسم عبد المنعم عمارة والله فيه الخير ... انا مكنتش مصدقه نفسى من اللى شيفاه بجد لما رحت بالنهار نظافة ايه وجمال ايه ونظام والكوبرى والكورنيش اللى على القناة وشكل الغروب والقرى السياحية مفيش بعد كده وطبعا التكسيات هناك لونها اورانج وفيه بتاع صغير كده أصغر من الميكروباص مش عارفه اسمه لونه اورانج تحس كده وانت ماشى انك وقعت وسط جنينه برتقال واستفندى وهيص يا مان .
الاحلى بقى ان الحمد لله هموت وانا مبسوطه انى شفت ناس بتحترم الاشارات (ودى عقدتى طبعا) وفيه اشارات ديجيتال عقبال امالتكم زى الكاميرا كده بالثوانى تفتح وتقفل لوحدها والله ومفيش عسكرى وسبحان اللى الناس بتقف وبتحترمها انا فرحت قوى وحسيت كأنى فى كوكب تانى او اتخطفت وانا فى الفضاء الخارجى وخاصة انى ولا كنت نايمه ولا لوزة معايا يعنى انا صاحية اهو وعنيه متفتحه للحياة ومعنديش هلاوس وقولت مش هموت ونفسى فى حاجه شوفت ناس تختشى ومتخفش عكس(تخاف متتختشيش) وكمان الناس هناك حلوة وطييبين جدا .
والقناة (ربنا يرحم اللى حفروها بدمهم )كمان والمراكب اللى فى القناة وبتعدى والصيادين وبجد الشارع مش فيه زباله ولا حاجه والجناين وتحت السجر يا وهيبه ياما كلنا برتقال انا شوفت نخل وشجر يجنن بجد
بس الناس هناك لهم شكوى فى الاعياد ان الضيوف اللى بتزورهم وتصييف عندهم بجد بتبهدل البلد ومش بتحافظ عليها
وهما بيضايقوا قوى ( يا ريت للاخوة الزوار بلاش زباله فى الشارع ممكن نحطها فى كيس)علشان منقولش الحكومه بتعمل ومتعملش يعنى احنا اللى فينا سلبيات اهو ومش عاوزة ضرب بقى علشان انا مبسوطة
شوفتوا بقى يا جماعه ان سهل قوى علشان نبقى مجتمع نظيف وراقى وكويس ومتحضر ومعندناش انتهاكات لحقوق انسان ولا لكرامة حد سهل قوى بس نبدأ بنفسنا بجد نبدأ بالاسرة اللى هى الاساس كل واحد يعود نفسه على الكويس مش يمشى على رأى عليوة مع القطيع احنا مش قطيع احنا ربنا ميزنا بالعقل علشان نفكر مش نبقى كدابين زفه وكل واحد يقولك انا مالى نفسى نبقى زى البلاد اللى بره فى كل حاجه وعوا أولادكم على النظافه والالتزام واحنا كمان واحنا كبار سهل نصلح أخطائنا بلاش اهمال فى حياتنا هنرتاح الاهمال زى ما هو سهل كمان الالتزام سهل وبيريح وساعتها بس مش هيكون فيه فرق بين اى حد فى الثقافات طالما هنتمسك بحاجات كويس والدين بتاعنا خير مثل لينا
وأخيرا عاد ابن بطوط من رحلته الخزعباليه من بلاد اليس فى بلاد العجائب لانى بجد مكنتش مصدقه انى فى مصر واللى مرحش البلد دى يروحها لانها قمة الهدوء والنظافه وكمان رخيصه جدا الكافيهات هناك (يعنى اللى عاوز يأخد الموزة خطيبته يعنى مش حاجه تانيه او الموديم المدام يعنى والاولاد يروح على ضمانتى )والاكل كمان والسمك .....السمك السمك تحفه بجد وان شاء الله اشوف ايه البلد الجايه ايه لانى زعلانه من نفسى اسافر برة مصر ومش اشوف مصر كلها (والدور الدور الدور الدور موعوده ياللى عليكى) الدور على مين اللى مرحتهاش قبل كده واللى عاوز يجى معايا اهلا وسهلا الجمل بيشيل اتنين وممكن نجيب حمار صغير كده والزاد والزواد موجود
على فكرة الاسماعيليه فيها حاجات من الطراز الانجليزى يعنى بعض المبانى الاحتلال بقى بس ساب حاجه كويسه

20 اخبط وقول رايك:

مصطفى said...

بسم الله وبالله أكتب..أنا مصطفى من السعودية..فمعليش لا تواخذوني على اللهجة..هحاول أتكلم مصري..بس أكيد بتضحكوا عليا..ولا أحكي باللهجة الفصحى أفضل؟..مممم..خلص حتكلم باللغة الفصحى أسهل..وأكيد بتفهموا عليا

الأسماعليليةُ بلدةٌ جميلةٌ
أووه..كأني بقرأ كتاب مطالعة صف أول ابتدائي

أرجع لطبيعتي

يعني بتنصحينا إحنا الخليجيين نسافر للاسماعيلية؟ على فكرة بتقصدي مين إلي بلعوز شوارعها (بلعوز بكسر الواو يعني ببهدلها..هذي بالخليجي)؟؟ مين؟ قصدك الخليجيين ولا أهل البلد؟

كلامك بالآخير عن جد عجبني..إن الله لا يغير مابقومٍ حتى يغيروا مابأنفسهم.. صحيح على الحكومة القيام بمسؤليتها في التنمية والإعمار..بس إحنا كمان..لو غيرنا من أنفسنا شوي..أكيد حنحس بالفرق في النظامة والنظام..مهو الإسلام أصلو قايم على النظام والنظافة واحترام الآخرين..المشكلة غيرنا بطبق دينا أكتر منا..شوفي اليابانيين مثلاً لما يحضروا مباراة في المدرجات..مايسبوهاش متل ماهي بس.إلا ينظفوها كمان..عسى الله انكون مثلم في القرن الخمسين
:)

appy said...

مصطفى
اولا اهلا بيك واهلا بالخليج كلهم ينورونا فى مصر طبعا واه طبعا بنصح الخليجين والمصريين كمان اللى فى البلد ومروحش الاسماعلية يرواحوا لانها هايله ومصر مش شارع الهرم بس مصر فيها الكتير والاحلى ولما بقول يبهدلوها انا بصراحه اقصد الزوار عموما يعنى من داخل مصر او خارجها بس بصراحه الاخص واللى اتقال ليا من اهلها ان بتوع الاقاليم والمحافظات التانيه هما اللى بيعملوا كده
ونورتنى واتمنى انك تزورها

3abdo me7tas said...

السلام عليكم
معاكم عبده محتاس من المنصورة
أيون الكلام اللى انتى بتقوليه صح الصح أكيد جبنه بريزيدون
المهم
انا قعدت 5 سنين فى الإسماعيلية شوفت أيام حلوة وأيام مقدرش أقول عليها حلوة
بس الحمد الله اهى أيام وعدت
كليتى كانت هناك
بصراحة الاسماعيلية بلد جميلة بس الكلية بقى كرهتنى فيها
بس بصراحة الاسماعيلية نضيفة جدا لانها أصلا من البلاد الساحية
ربنا يكرمك وانا اول مرة ادخل المدونة دى ومش آخر مرة ان شاء الله

Ragi said...

ابى
الاسماعيلية موش الشارع الرئيسى فقط ولا مبانى هيئة قناة السويس
انصحك المرة القادمة تزورى ابورخم وحى السلام و العرايشية ، عرايشية مصر وعرايشية العبيد وكمان تروحى التلاتينى هى دى اسماعيلية العادية زى اى حى شعبى فى اى مدينة فى مصر
ياخسارة اسماعيلية بتاعة زمان كانت فعلا جوهرة قناة السويس
انتى مرة قلتى انك من العريش؟ فعلا حقيقى؟

Hossam said...

hello appy
this is hossam.nice blog.hoping to be a frinds
----------------------------------
i visted ismailia when i wss young
it is really pretty cool reigion.it charictrized by its silence.it makes me feel relax
hope visite it again
c u soon
bye

appy said...

عبده ميرسى لوجودك
بس معلش انا لوعارفه ان الكليه كانت وحشه كنت ضربتها لك وشيلتها من هناك بس برضه انا حبيت البلد دى

appy said...

استاذ/ راجى
ليه يا راجل بتحبطنى مش بقولك حلوة وعجبانى ما علينا انا شوفت الشوارع التانيه والشيخ زايد كمان بس الجميل انك تلاقى اماكن حلوة ومشرفه يعنى لازم نبص للجانب المنيل ما نبص للكويس
واه والله انا من العريش بابا من هناك من حى الفواخريه وانا من الفواخرية

appy said...

اهلا بيك يا حسام نورتنى

فعلا انا بعشق البلد دى حلوة قوى يعنى اللى اعصابه تعبانه يروح هنا ويقعد فى الشوارع الحلوة دى

MerMaid said...

Appy

يااااااااااااااااااه

انا حبيتك قوي دلوقتي مع اني اول مرة اشوف مدونتك النهاردة
بس يمكن لاني بعشق الاسماعيلية

بحبها حب مالوش حدود طبعا للاسباب اللي ذكرتيها كلها و لانها بلد الذكريالت بالنسبة لي
و الهدوووووووووء و الجمال
و يمكن المحافظة الوحيدة في مصر اللي نظيفة واهلها محترمين قوي كدة و بيحترموا القانون
هي اكتر بلد بحبها حاليا ولاني درست يها فانا بحب الجامعة رغم مساوئها

بجد سعدت بقراءة موضوعك

:)))

MerMaid said...

علي فكرة

انا بذلت مجهود علشان ابعتلك التعليق دي

:)))

Desert cat said...

الاسماعيلية دى حبيبتشى
هى دنبينا على طول
الفرق بينا وبينها الصالحية الجديدة علشان كدا كل لما احس بزهق اشد الرحال واخد بعضى واطلع على هناك اعدى القناة وادخل الكافية الحلو اللى هناك ده واشرب كباتشينو يا سونة واخد بعضشى وارجع على بيتنا طوالى
طالما اكلة السمك عجبتك هناك
المرة اللى جاية جربى تتعشى فى ايطليانو
بس خليكى بالليل متأخر شوية
حتحسى انك مش فى مصر من اساسه
احنا بايدينا نخلى بلدنا احلى بلد بس محتاجين نتغير ونحس بمسؤليتنا تجاهها شوية
يارب دايما مبسوطة
محبتى يا جميل

عصفور المدينة said...

يعني ينفع رحالة في القرن 21 من غير كاميرا ولاصور

على كل مقبول الوصف التفصيلي وواضح إن زحام كوكب القاهرة خانقك فعلا

تحياتي

مهندس مصري said...

أنا فاكر اني رحت الإسماعيلية من بتاع 12 سنة كده في رحلة في الثانوية العامة تبع المدرسة
بس كانت بلد نضيفة و هادية جداً
دا غير الأماكن الجميلة اللي فيها
و لا أهلها كل اللي إتعاملت معاهم من البلد دي كانوا مؤدبيين جداً
و محدش بيسمع للإسماعيلاوية حس غير في ماتشات الإسماعيلي
ساعتها بس بيبقوا حاجة تانية
بس بجد الحاجات الحلوة دي ياريت تصوريها و تنشري لينا الصور
:)

Ahmed Al-Sabbagh said...

!!رائع

بجد بوست حلو اوى لأنى بحب النوع ده من البوستات

يعنى اديلة 90% كدة

ولو كانتى حطيتى صور كان هياخد 100% بجدارة

ونشوف صور الغروب

والا بقى يبقى الموضوع مش موضوع تصوير الغروب ;) واظن انتى فهمانى ههههههههه

انا من الناس الوحشين سيئين الظن

بالمناسبة انا رحت اسماعيلية مرة

بس كان فى حتة اسمها ابو سلطان وعديت بس على المدينة ولفت نظرى النظافة

وابو سلطان دى حتة صناعية كلها مصانع وقريبة من فايد

عموما انا مش هتنازل عن حقى فى الصور

ومنتظر

وكل سنة وانتى طيبة

وهابى نيو يير

تحياتى

أبوشنب said...

فين المنجة

فين المنجة

هيا الاسماعيلية تبقى اسماعيلية من غير المنجة

appy said...

mermaid
يا اهلا يا هلا بالنور ده وانتى كمان حبيبتى علشان انتى حبيتى البلد دى وده يدل على انك انسانه كويسه لان اللى يعشق النظام والنظافه يبقى كويسى نورتينى يا حبيبتى

قطتى
هعمل بنصيحتك وربنا يستر والفلوس متقلش معايا واتحول على القسم وازعل منك قوى والمرة الجايه شدى الرحال معايا
أستاذ/عصفور والله انا صورت كتير بس لسه منزلتش الصور هنزلها واوريها لك عيب عليك دا الجمل بتاع بكاميرا ديجتال كمان
مهندس مصرى
إزاى مصورش هنزل الصور يا بشمهندس واقولك على سر على الرغم من انى اهلاوى بس انا بموت فى الاسماعيلى بجد فيهم لعيبه جامده موووووت وبعدين الجمهور يعنى ما جمهور الهلى بيطلع مواهبه برضه عادى يعنى
أحمد
كده يعنى من اول مرة تدخل ليه تفهم غلط ان شاء الله هنزل الصور بجد بس اتخلص من الجهل اللى عندى وأقرى التتالوج بتاعها بس وهابى نييو يير عليك

سووووووووو (ابو شنب)
والله انا لقيت مانجه فى كل مكان بس بما انى من ارباب السوابق مع المانجه فى مواقفه يعدت عن الشر وغنيتله نورتى

الربان said...

تحياتي

مبروك زيارتك للاسماعيلية...و الله نفسي ازورها...من سنين كانت أخر زيارة لي.

المهم... النظافة يا سيدتي سلوك يكتسب من الصغر...يعني الام و الاب لازم يعلموا ابنائهم النظافة من الصغر...يعني لما يرمي لعبه لازم يرجع يلمها و يضعها في مكانها المحدد... يعني لما يرمي شيء علي الارض لازم يشيله و يضعه مكانه...

ثم يأتي دور المدرسة لتعزيز هذا السلوك
و أخيرا دور الدولة في توفير أماكن لوضع القمامة...في الشوارع...و فرض القانون علي المخالفين.

مثل بسيط من دولة الامارات... البلدية فرضت علي كل محل ان يضع امام الباب وعاء موحد للقمامة..و أن يضع بداخله كيس اسود.... و يمر العاملون بجمع القمامة و يفرغوا الوعاء من محتواه...و الكيس الاسود يتم تغييره اسبوعيا...
الاكثر من هذا ان اي قطعة ورق امام المحل تكون مسؤلية العاملين بالمحل و يتم
فرض غرامه عليه...لذلك نري احد العاملين اول بأول ينظف امام المحل من اي مخلفات....لهذا البلد نظيفة انيقة...

تحياتي و تمنياتي بالتوفيق دائما

appy said...

الربان ميرسى لمرورك مش هقولك نورتنى دا انت كلامك نور للدنيا كلها بجد
انا عندى ايمو ابن اختى والله بعمله كده على الرغم من الفلته اللى فى لسانه لماضته بس فعلا بقى لما ياخد اى حاجه من اى مكان يلعب بيها احنا مش بنقوله لا لانه لما بيزهق منها والله بيرجعها وبيرمى اى حاجه مش كويسه او ورق فى الباسكت بتاع الزباله وده والله طفل لسه مكملش سنتين ما بالك احنا بنرمى فى الشارع واستهبل عادى

M@@@@H said...

الاسماعيلية مدينة جميلة فعلا .. ونضيفة .. وعدد السكان مش كبير بالمقارنة بالمحافظات الاخرى .. علشان كده اي ميزانية بتيجي للمحافظة .. بيظهر الخير بتاعها على المدينة .. عكس معظم المحافظات الآخرى

ومبروك عليكي الفسحة

appy said...

يااااااااا يا بشمهندس منورى كده فى كل بوستاتى
بوستانى يا بستانى
والله سعيده بيك