تخاريف العيد والتنفيض

طبعا فى ظل الاحداث المؤسفه دي اللى بيهون عليا شويه تخاريفنا على الفيس بوك اهو بنهون على بعض شويه
واحده صديقه وبحبها جدا على الرغم من انى متشرفتش بيها شخصيا هى اصلا مدونه كتبت استاتيوس على الفيس بوك وقعدنا نعلق عليها عاوزه اوريكم بجد نموذج للست المصريه الفزيعه لما تقلب معاها بخفه دم وتخاريف ورغي وانها تدخل الخطوط فى بعضها ابطال الموضوع كنت انا وهى واتنين مدونين كمان هرمز لهم باول حروف اسمهم علشان الرقابه لو عاوزين يذكروا اسمائهم يبقوا يدخلوا بقى فى التعليقات يقولوا بس ركزوا فى طريقتها لاول مره من فتره بجد اضحك من قلبى والشغل عندي يسمع صوتى يمكن بقالى اربع شهور مش عارفه اضحك هجيب لكم الحوار
الاستاتيوس بتاعتها بدات بكلمه

والدنيا بتشتى والحمد لله مغسلتش الستاير
وادي التعليقات

اناعلقت وقولت
رشى ميه على الساتير وبعدين نشفيها بالسيشوار وبكده تبقى اتغسلت
هي
بالسشوار !!!!؟
:))))))))
بس انا كنت عايزاها كيرلى

انا
عملى بالسيشوار وبعدين هبعت لكى المكوه بتاعتى هى بيبى ليس اعملى بيها هتبقى تحفه
هي
طب مانا اعملها كيراتين اسهل وخلاص ...ولوماتعدلتش ...احلق للشبابيك وخلاص بقى بلا وجع دماغ
:-)


زميل تانى
وصلتني دي على التويتر امبارح: عندما يبدأ قرص الشمس في المغيب .... والنبي يا سعاد ماتنسي تلمي الغسيل من على الحبل

يكونش دي احلام شاعر واتحققت؟
هي
:))))
ده مكانش شاعر ...ده خبير ارصاد جوية مراته كانت غاسلاله البنطلون البيج القطيفة اللى بيلبسه على البلوفر الزيتى اللى جابه من عند اسمه ايه اللى فتح جديد ده ..اسمه ايه ده اللى فوق محل العصير وانت طالع من الميدان رايح تاخد المحور عشان تجيب العيال من المدرسة اللى قفلت فصلين لحد دلوقت ومش عايزة تدى باقى العيال اجازة مع ان اجازة العيد 10... ايام ॥والله مش بطالة المهم الشتا يهدى شوية عشان الناس تعرف تخرج تزور قرايبها ।قال يعنى حد بيروح يزور حد دلوقت ..الناس بقت وحشة ...ودك النهار اتنين اخوات لسه متخانقين لموا عليهم الشارع ..والشارع اصلا عايز يتسفلت مش كفاية البلاعة اللى سرقوا غطاها ...شفت الولد نام من غير غطا قوم جاله برد وخد الدوا على معدة فاضية اصل مكانش فى عيش وهو مصمم ياكل ساندوتش جبنة ..طب ماهو كان فى كورن فليكس ما كان ياكله وخلاص..ايه الدلع ده . هو لازم عيش يعنى ..صحيح لازم الناس تجيب عيش مقمر عشان الفتة بس بيقولوا ان سعاد عليها نفس فى الفتة ماشاء الله ...سعاد مين!!!؟ ...سعاد مرات الشاعر صاحبك ..لحقت تنساه ولا ايه

الزميل تانى
هو انا كان اسمي ايه؟
انا جيت هنا ازاي؟

زميله س
عسل يا ن صباح الفل
هى
مالك يا باشمهندس ..فى ايه !!!؟
صاحبك جوز سعاد هو اللى وصّلك لحد هنا وراح يشترى حاجة وقال جاى تانى ..استناه بقى وعلى ما ييجى حاحكيلك حكايته مع سعاد لما اتخانقوا وضربها بالألم قدام الناس ..راحت الناس اتلمت وسعاد طلعت تجرى فى الشارع راح خبطها توك توك ..ونزل بقا السواق واتخانق مع جوز سعاد ..وبالصدفة كان معدى جوز نادية راح مهدى الموضوع ونادية خدت سعاد عندها عشان تهدى واقنعوه يجيبلها ورد عشان يصالحها ..لكن سعاد دماغها ايه ..ابدا ما يصالحها بورد ابدا ..ليه يعنى هى مالهاش اهل ..لازم يتجاب ويتربى ..واخوها سعيد ايده طرشة وبيلعب بوكس وبطل النادى فى البنج بونج .بس هى جابت سيرته قدام جوزها وده قام اتنطط ..سعيد لأ سعيد لا حقك عليا وادى راسك يا ستى وادى ايدك وادى رجلك وماقولكش كان عامل ازاى ...قصره ..هى سامحته بعد ما باس راسها قدام الناس برده وحلفلها يجيبلها انسيال دهب زى بتاع بنت خالتها اللى اتجوزت مهندس فى البحر الاحمر ومرتبه شىء وشويات ..لكن طبعا ميسلمش مع القر ده كله ..رفدوه وراح اشتغل فى البحر المتوسط بس للامانة يعنى هو مرزق ..بيصطاد سمك وجمبرى وكابوريا بالصنارة كده من غير شبكة ..وبييقولوا انه لقا فى بطن سمكة كبيرة خاتم الماظ اداه هدية لمراته اللى هى بنت خالة سعاد .واول ما لبسته سعاد نقرتها بالعين التانية خدو جوزها يا عينى وشغال دلوقت فى البحر الميت ..قصره عشان ماطولش عليك كلمة منه منها وصلوا لخاتم دهب وحلق بدلاية عشان ترجع
معاه البيت
واذ فجأتن ....ان ان تشششش....
.........................
يُتبع
:-)

هي
.. تابعى الحلقات ....لا تقوليلى نور ولا مهند ...احنا معانا سعاد
وفى مسابقة فى نهاية الحلقات
:-))

صباحك ياسمين
:)

الزميله س
ههههههههههههه متابعه متابعه مش تقلقى
على امل الفوز فى المسابقة طبعا
:))

انا

ههههههههههههههههههه احمد
هيكره اسم سعاد ومش هيدخل عندك تانى
انا متابعه الحلقات كملى

هي
بقوا معنا يا بنات
والجوايز كتيرة
بس اتصلوا على
0900 5%&*#@$7999
وكل ما تتصلوا اكتر فرصتكوا فى الفوز تكتر
...
انتظروا السؤال فى نهاية الحلقات
...
فاصل
تامر حسنى
الستات بيشجعوا سعاد ..واحنا معاهم
مدينتى
لافاش كي رى

انا

هههههههههههههههههههه انتى عامله دماغ ايه

الزميله س
ههههههههههه انا حاسه برضه يا ابى
ياريت ن مش تبخلى علينا بالوصفه السحرية
ولا دى هتكون الجايزة؟؟؟؟؟

الزميل التانى
هه؟
وش فاتح بقه
هو الستيتس كان عن إيه أساسن؟

هي
سعاد كعادتها كتومة ..وغامضة كده ..سهنّة يعنى .. حاولت تعرف جوزها بيروح فين كل يوم بعد الغدا وبعد ما بيشرب الشاى وياكل الكيك او أم على او ام عباس ..يعنى اى حاجة حلوة والسلام اكمنه يعنى عنده السكر وبياخد انسولين ولازم يا...... ده مش موضوعنا ..المهم ابتدت سعاد تسأله بشكل غير مباشر يمكن يقع فى الكلام وتكتشف اى تناقض فى التفاصيل فتقفشه .. لكنه كان حويط... وعمره ما وقع بلسانه معاها ...حاولت انها تتجسس على موبايله عشان تعفأه مرة من افاه..لكنه كان دقرم وبيمسح رسايله اول باول ...النهاردة بالذات كان متشيك على غير العادة وراشش ريحة"يعنى برفيوم" فقررت سعاد انها تتنكر وتمشى وراه بعد ما يخرج علها تعرف مخبى عنها ايه ..لبست سعاد الباروكة الحمرا اللى كان جايبهلها معاه من اليونان ..وبالطو المخبرين ومنسيتش اهم حاجة اتعلمتها من الافلام العربى القديرة وهى انها متلبسش جزمة بكعب زى بتاعة نجلاء فتحى لحسن هو اللى حيعفأها من افاها .. فطبعا لبست باليرينا ودى للى ميعرفهاش جزمة فضى على الارض بتخلى البنى آدمة طايرة فى الهوا بتؤدى بحيرة البجع وهى رايحة السوق ..اه وطبعا ممكن الوان تانية .. لطفى كان حاطط شوية حاجات بجد تجنن .برده مش موضوعنا..المهم ..نزلت سعاد واقتفت أثره "حلوة اقتفت دى" لقيته قعد على القهوة اللى فى آخر الشارع فدخلت باب العمارة المواجه عشان تراقبه عن كثب "حلوة كثب برده" شافته بيطلب شيشة ..عادى الشيشة مسموحة ولا تدل على شىء ..وبعدها طلب سحلب ...برده عادى ..مادام معمول على مية بيضا ..لكنه اول ما طلب قهوة اتنرفذت ..لانه كان بيقوللها انه مالوش فى القهوة وكبسها يوم ما عملتله كابشتينو يا سونة ..وندمت يومها على علبة اللبن البودرة اللى جابتها مخصوص عشان كان عليها هدية ميكسر ..البتاع ده اللى بيضرب النسكافيه عشان يعملله فوم عالية زى بتاعة غسالة ام سيد ..وهى اصلا مبتحبش تشرب لبن نيدو وامها دايما كانت بتقولها لبن الجاموسة يخليكى عروسة ...فجأة جاله واحد على القهوة واول ما شافه قام جرى لدرجة انه مشربش باقى قهوته ..أخده ومشى ... جرت وراه عشان تلحقه واذ فجاتن
......
to be continued

الزميله س

ها وبعدييييييييييين
اذ فجأتن ايييييييييييه
لالالالالا انتى هتسيبنى كده على اعصابى كتير
انا مركزه مركزه عشان المسابقة

الزميل التانى
ألألألألألألألألألألألألأ
إذ فجأتن إيه؟ ها؟
أنا اندمجت ولازم أعرف ॥ عندي اجتماع كمان تلات اربع ساعة ومش هأستحمل انزل من غير ما اعرف ايه اللي حصل

هي

حيلكوا عليا ...ده انا باكتبلكوا بايد وماسكة الزعافة فى الايد التانية
...
قصره
...فاصل ونعود

احلى رنات ..واجدد اغانى منير "ماعدا طبعا اغانى حفلته الاخيرة مع الشاب خالد"

بريل قاهر الدهون ولمعان مضمون لشعر زى الحرير

محبى القهوة بيشجعوا سعاد واحنا معاهم

لا فاش كى رى ..برده

انا
عارفه لما تخلصى هعمل كلامك ده بوست عندى دا انتى مش ممكن
اهو ده رغى الستات بجد طول عمرى بسال ايه هو انتى قدمتيه ليه على طبق دهب

هي
وإذ فجأتن تنكفى سعاد على بوزها ...جاتها خيبة امال لو مكانتش لابسة باليرينا كانت عملت ايه .. فيجرى عليها الناس ويتلموا تحاول واحد ست تقومها . لكن سعاد استسلمت للوقعة وحبكت معاها تستعيد بعض الذكريات المؤلمة زى ما حصل فى المسلسل الخليجى بتاع الساعة 9... ..اللى فيه البطلة جوزها كان بيخونها وسرقها وضربها وهى مستحملة لحد ما جه اليوم اللى اللى كان سقعان فيه فلبس "اللكلوك "بتاعها عشان يتدفى وصحيت هى من النوم ملقيتش اللكلوك تحت السرير فمشت على الرخام الساقع "ماهم فى الخليج ارضيتهم جرانيت مش سيراميك طبعا" فجالها برد واعدت تعطس ..نزلت الدور التحتانى "ماهو بيت بدورين طبعا" لقت المحروس قاعد لابس اللكلوك اللى على شكل بطة بمبى وحاطط رجل على رجل وبيتكلم فى الموبايل .. فضلت تعطس على السلم طول ماهى نازلة واتدألجت فى اخر سلمتين لانها مرضتش تجيب دوبلير تقوم بالحركة مكانها وفى نفس الوقت مرضتش تقع من على 3 سلمات خوفا على السليكون من الصدمات ..ولما وصلت عنده بتزك فى رجلها راح حدفلها اللكلوك البطة وقاللها ايش هذى البطة الهبلة لا بتدفى ولا بتكفى ... وهنا افتكرتله كل حاجة وحشة كانت مستحملاها لكن عند البطة ولازم يقف ..كانت البطة البمبى هى القشة التى قصمت ظهر البعير فانفجرت بالبكاء واعدت تشد شعرها لحد ما طلع نصه فى ايدها ماهو كان صناعى لو ركبتيه مع الضوافر بتاخدى خصم ..وقامت مسكت فيه واعدت تخنقه وهى بتقوله ايش بيج يالرجال ايش بيج لحد ما كان حيطلع فى الروح لولا المخرج قال كت عشر مرات .. مرت هذه اللقطات امام عيون سعاد وهى ممددة على الارض زى اسمها ايه فى فيلم فؤاد المهندس لما كانت بتغنى شابا دابا دا ..الناس ملمومة والحلقة بتزيد حواليها ..ومن بعيد سمع جوزها وصاحبه الهرج والمرج فرجعوا تانى يشوفوا زى غيرهم فى ايه .. ولما وصلوا عندها ودقق فى ملامحها وقبل ما ينطق او يتكلم كانت بتؤدى دور البطلة ام سليكون بالظبط وبدون خروج عن النص وهى تردد ايش بيج ايش بيج .وبحركة بهلوانية فيها تمكن كانت واقفة على قدميها وماسكة زمارة رقبته بايديها ... بالكاد عرف ينطق وهو مبحلق عنيه ..شفت يا دكتور ان حالتها سيئة فعلا وبتزداد سوء ..مش قلتلك .. لكن الدكتور مكانش سامعه لانه كان بيطلب المستشفى عشان يبعتوله عربية واتنين متغذيين وقميص ابيض فى ابيض
....
تمت

الزميله س
اهئ اهئ كده تهون عليكى سعاد يا ن
كل ده عشان يتجوز عليها
رجالة ملهاش امان يا اوختى

هي
آبى .... يا لهوى بوست ايه ..لا بلاش فضايح ...دى آثار التنفيض ..بكرة ان شاء الله حابقى كويسة وزى الفل
بس اخلص اوض الولاد
:)(

س ..سعاد اصلا انا معرفهاش يا سوسو ....دى مش تبعى ..الباشمهندس احمد هو اللى جابها الستيتس ...
:))

هي
كمل ايه يا آبى ...تمت
وهو بعد ما لبست القميص وراحت لهنومة حتقوملها قومة المسكينة
:))

انا
هههههههههههههههههه قريت التكلمه
بوست تشريده فى الجون

هي
الحمد لله انى مش بنفّض كل يوم
:))

الزميل
أنا جيت من الشغل ولسه داخل الفندف أهو
أنا معرفش سعاد دي ولا عمري سمعت عنها .. ما تلبسونيش تهمة

سعاد اللي عندي كانت بطلة قصيدة شعر .. لكن سعاد الل هنا دي (سعاد المجنونة) أو (سعاد المهبوشة) مش هتفرق كتير .. ودي لازم تعدمة في ميدان عام رميا بالبراطيش
:-))

ودي كانت اخر حاجه افتكست قصه لاحظوا القصه بتحصل كتير من الستات لما تكلموها فى موضوع وتدخلك فى الف موضوع تانى ودي جزاء اللى بينفض فى العيد وهى جابت نموذج حي للابداع فىالقصص بجد وخفهالدم
انا بشكرها على الاستاتيوس دي اللى هلكتنى من الضحك
وكل سنه وانتم بخير يا رب

كان معكم ابى هانم بتنجانى رسمى فهمى نظمى من امام احدي صفحات الفتيس توك اللى بقى ادمان

حكمه الامبراطوره

احترس الخرفان عندها الفلوانزا القرون