مبروك على ايه ولا ايه


مش عارفه قبل الماتش كله كان فى احاله احتقان وشتيمه وقله قيمه وقله عقل لا يرثى لها سواء من مصر او الجزائر
بعد الماتش كله بيقول مبروك والجيران بيزغرطوا والناس بتهلل فى الشارع والعربيات اتكسرت واتنين ظباط بيفكوا خناقه اتخبطوا بعربيات بسبب الماتش

مبروك على ايه هى مصر مبقاش فيها حراميه
مبروك على ايه هى مصر الريس بتاعها اتغير
مبروك على ايه هى مصر حلت مشكله البطاله خلاص والفقر اللى فيها
مبروك على ايه نزول الاسعار ورجوع الحاجاه رخيصه
مبروك على ايه قله عدد حاله الاغتصاب اللى بقت كل يوم فى تزايد رهيب
مبروك على ايه على اننا مبقاش عندنا زنا محارم ولا اغتصاب اطفال دا الموضوع بينه طلع موضه وانا نايمه على ودانى
مبروك على ايه شويه الرعاع خريجى العباسيه اللى بيشتموا فى الاشرف منهم اتلموا وراحوا فى داهيه
مبروك على ايه مصر خصبت يوارنيوم
مبروك على ايه هو احنا مبقاش عندنا عشوائيات وبقينا شعب محترم

لما كل ده يحصل يبقى يجى حد يقولى مبروك
لما تلاقوا شقق تتجوزا مش لعيبه تاخد ميليارات ابقوا قولوا ليه مبروك
لما البلد دى تنضف من الاشكال الضاله اللى فيها ابقوا قولوا مبروك واخرجوا ملط فى الشارع


على فكره مش عاوزه حد يسفسط عليها ولا يقولى الفرحه ولا الفرخه مليش فيه الكورة لا تعنى شئ ليه غير انها البانجو الرخيص والسجاير الكليوباترا اللى بيدارى الناس فيها خيبتهم
بانجو علشان مخدر والسجاير لانها رخيصه بس اهو اقرع ونزهى


حكمة الامبراطورة

أكل فول و أخرج قفاي عرض و طول و لا آكل كباب ووقفة الديانة ورا الباب

47 اخبط وقول رايك:

الربان said...

تحياتي


مبروك و الفرحة عارمة لان ببساطة لا يوجد ما يدخل السرور علي الشعب سوي
كرة القدم...و المباريات بتلعب امام الجميع...يعني بشفافية...يعني لا احد يدعي النصر او تحقيق انجاز وهو في الحقيقة فاشل...

يعني لا حزب يدعي حل مشكلات...و لا حكومة تدعي إنجازات ..قد يكونا حققا
لكن لم تصل الي الناس عامة...بل الي فئة
ما او طائفة ما...

ايضا الناس فرحه و مسرورة لانه لا يوجد
مشروع قومي وطني يلتفون من حوله...كما
كان الحال في السد العالي ..الذي شعر
غالبية الناس بفوائده...

او بالاستعداد لحرب اكتوبر...حيث كان
الشعب كله يضحي بالثمين و الغالي من اجل هدف واحد هو بناء القوات المسلحة
و استعادة كرامة شعب و امه...

الناس ما بتصدق شيء يدخل السرور حتي
لو كانت مبارة كرة...


تحياتي و تقديري لحضرتك

sakayar said...

كان نفس رد فعلي امبارح وتقريباً كلام كتير م اللي قلتيه ف البوست ده قلته امبارح
قالولي انت مستكتر علينا الفرحة؟
قلتلهم ما انتو لو بتفرحوا لحاجة ليها قيمة بجد هفرح معاكم ... قاعدين يقولوا حلم 80 مليون ومش عارف ايه ... طب خلي ال80 مليون دول يجتمعوا على حاجة بجد ليها قيمة ... قالولي لا يكلف الله نفساً إلا وسعها ... يعني احنا بقى وسعنا ف الكورة وبس
مرارتي راحت يا آبي خلاص من السفه اللي بقينا فيه

Appy said...

الربان


لما السرور مش موجود يبقى ميتفهوش من نفسهم ويشحنوا بعض وواحد يقول لمراته وشك هيبقى وحش ولاحياه تقف وواحد يعاند فى صحبه دا اسمه فضا بس من بره ومن جوه يا بشمهندس
لان ببساطه انا شبهت الموضوع فى الاخر باللى بيشرب بانجو لانه مش عاوز يواجهه حقيقه










سكريار


خلاص يا ابنى اقعد زغزغهم علشان متبقاش نكدى واهم بكره يرجعوا للنكد ويفوقوا

فاتيما said...

الله
هوه الخرفان صاحية بدرى ليه النهاردة كدا ؟؟؟
شوفى يا بيبى
بعد وحشتينى طبعاااااا و اكيد
انا زيك تمام
شايفة الفرحة دى ملهاش
أى لزوم
و لكن ...
الواد ماجد اخويا راح الإستاد امبارح و لما كنت قاعدة اتفرج على الماتش فى التليفزيون
و الوقت عمال بيجرى
و مفيش امل
كل تركيزى كله فى جملة واحدة قعدت أرددها زى البغبغان
يا حبيبى يا ماجد
يا حبيبى يا بنى
الواد هيتعقد خلاص و قطعت الكورة على اللى عاوز يشجعها تانى
و فى آخر ثانية الجون جه
بصراحة
فرحت
و قعدت أهلل
و انا لوحدى فى الشقة
قوم القطط بتاعتى
اللى كانت نايمة جنبى على السرير إتفزعت
و قالت إيه الست المهبوشة دى
بصراحة الفرحة منقوصة
لأنها نظام حد جاب دور تانى
و منجحش من اول مرة
بس غالبا و قولتها عندى فى صباحاتى ...الفرصة التانية دايما بتبقى افضل و احسن
و لعل و عسى الماتش الجاى نفوز احنا بنلعب دايما برا احسن من عندنا متعرفيش ليه؟؟
و ان شاء الله نكسب و بجدارة
تستحق كل هذه الفرحة و تستحق مرواحنا لكاس العالم و بقوة مش بالزق
اللى الناس عملته امبارح يا آبى
يا حبيبتى
مجرد تنفيس عن المكبوت
تنفيس ببلاش لن يكلفهم شىء
و لما فزنا بالعافية
الناس استخسرت تنام متنكدة
و قالت أهو لسه فيه امل
احنا شعب عايش على الامل
يا بيبى
خالص حبى ليكى
يا قمر التدوين كله

Appy said...

فاتيما

انا ولا يهمنى نكسب تانى ولا اولانى انا بتكلم عن رد الفعل العبيط اللى احنا فيه مفيش حاجه اسمها الناس بتتلكك تفرح لا الناس بتهتف وبتصرف فلوس على القاعده على الكافيه واشتراك دش وبلاوى زرقاء علشان الكوره محدش بيسمع صوتهم لما بيشتكوا من الاسعار الغاليه ولا من الظلم بيتكتموا وساعتها يقولك امشى جنب الحيطه فهمتى قصدتى

فاتيما said...

أيوه يا حبيبتى فهمت قصدك
بس انتى ناسية حاجة مهمة جدااااا
الأيجابية فى الكورة
لا تكلف شىء
لكن فى اكل العيش و الأعتراض على الظلم
تمنها غااااالى قوى
و انتى فاهمنى طبعا
اللى بيقف اعتراضا ...بيحصله إيه؟!!
ومش كل الناس عندها الشجاعة
و الإقدام دا يا بيبى
و حاجات كتير حاكمهم
الخوف على العيال
و على حياتهم
و اهلهم
و مستقبلهم
و كرامتهم
و ....
و ...
دى ممكن تكون مبررات واهية
لأنهم برضو بسلبيتهم بيخلوا كل الأعتبارات دى تتحول لريشة
فى مهب الخطر
و حياتهم بتتحول للأسوأ كدا كدا ...
بس ارجع و اقولك
كل واحد بيدفع تمن اختياراته
و مش الكل عنده شجاعة التغيير
و جسارة الدفاع عن حقه
منطق الجبناء
عارفة
بس دول قطاع طوييييييل عريض من الشعب المصرى
نعمل إيه بقى ؟
خالص حبى يا حبيبتى

Appy said...

لا يا طمطم
كل الناس ععندها الشجاعه احنا لو خرجنا ميه الف بس وقفنا واقفه محترمه مش تكسير ولا همجيه وطالبنا بحقنا هناخده لو اعترضنا هناخد حقنا
احنا بنستسهل فى ده الناس شاطره تستقوى على نفسها اتفرجى ىف الخناقات وفى العشوائيات
قوليلى لو فكرنا نعمل ده هما عددهم كام واحنا كام
لما الف يتصدوا لخمسه يبقى ايه الشكل العام
محدش بيخاف يا طمطم
احنا بس اللى بستسهل

Appy said...

لا يا طمطم
كل الناس ععندها الشجاعه احنا لو خرجنا ميه الف بس وقفنا واقفه محترمه مش تكسير ولا همجيه وطالبنا بحقنا هناخده لو اعترضنا هناخد حقنا
احنا بنستسهل فى ده الناس شاطره تستقوى على نفسها اتفرجى ىف الخناقات وفى العشوائيات
قوليلى لو فكرنا نعمل ده هما عددهم كام واحنا كام
لما الف يتصدوا لخمسه يبقى ايه الشكل العام
محدش بيخاف يا طمطم
احنا بس اللى بستسهل

فاتيما said...

يا بيبى يا حبيبتى
انا مش بعارضك إطلاقا
فى اللى قولتيه
انا بس بسوق اليكى المبررات ( و ان كانت زى ما قولت مش قوية و واهية) اللى بتخلى الناس جبانة كدا
و أيوه لو أتلموا
و بقوا إيد واحدة حاجات كتير هتنصلح
بس للأسف ...دا مبيحصلش

مواطن شووجااع said...

أنا عندي 21 سنة



عيني ما شفتش غير مباركـ وكمان عايزين يخلوللي طول عمري مباااااااركـ



من ساعة ما وعينا ع الدنيا
كل الجيل دا

رضع زبالة


وإتفطم بالروبة


فلما تبقي حاجة حلوة كدا زي الكورة تفرح الناس الغلابة دي
بيفرحوا قوووووووووووي
والفرح بيبقي أوفر قووووووووي




بس دا من الهم والغم اللي هما شايفينه ليل نهااااااااااار



فبصراحة ربنا من حقهم يفرحواااااا

Soma said...

ازيك يا ابي

انا معاكي ان الفرحه دي مبالغ فيها اوي وزمان مكانتش الناس بتعمل كده عشان الكوره ولا الستات كانت بتتفرج من اصله
عارفه ايه اللي اختلف؟
الاعلام
كل وسائل الاعلام تشجيع واغاني وطنيه وكلام كبير وتضخيم لحدث لا يتعدي كونه لعبه

عشان كده الناس حست انها داخله حرب وطنيه ولازم يكونو جنب بلادهم وهات يا هيصه لما حسو بالنصر


ده رايي الموضوع خطه محكمه لتغييب عقول الناس اكتر
وقال ايه عايزينهم يفرحو
بلا نيله

dr.lecter said...

بصي المصريين مابيفرحوش غير بحاجتين

ماتشات الكوره وعلاوه يوليو

الكوره فعلا بتوحد صفوف الشعب كله

اه جيمي كان موجود وكان فاقعني هو وزكريا عزمي وشله الحزب كلها

اه كان فيه تجاوزات وقله ادب وكان فيها افوره في الفرحه

بس علي الاقل المصرين ليوم واحد طلعوا من الاكتئاب اللي هم فيه ينسيهم همومهم كلها واحباطاتهم

اهم حاجه بس يوم الاربعاء مانتغمش

وعلي فكره من مصلحه الحكومه اننا نفوز علشان تلهي الناس عن السياسه

فتاه من الصعيد said...

بعد ان تحدثنا عن سوء الادب بين الاشقاء

وانشغال الشباب من البلدين بالشتيمه

نتحدث عن رد الفعل

في البلاد الكبيره فرحه مفزعه

في البلاد الصغيره فرحه عاديه

في البلاد الكبيره مستشفيات فارغه

في البلاد الصغيره عيادات خاصه تعمل عااااااااادي يمكن موش بنفس الطاقه .... بس عادي

ليه ؟

لان الهموم في بلاد صغيره اكبر بكتير

لان اللي خرجوا هللوا ربما لا يحملون نفس الهموم

انتم ظالمين الناس

الناس فرحت لان ده رد فعل طبيعي لاي بلد

الفرحه المبالغ فيها روج ليها اعلام غبي ومجموعه من الشباب الذي لا يحمل الكثير من الهموم .... طلع يفرح ويهيص .... وتواجد في مكان واحد فازدحم

احنا الناس عندنا هيصت ساعه بدون زحمه .... وذلك تقليد منهم لاهالي القاهره والمدن الكبرى

كنت هكتب الرد ده عند استاذه نواره لاني شفتها محبطه

بس بجد انتم فاهمين الموضوع غلط

تحياتي

فتاه من الصعيد said...

على فكره موش بقول ان اللي خرجوا موش عندهم مشاكل

لا عندهم ويمكن بيتلككوا يفرحوا

لكن بتكلم عن الشعور المزيف بان كل شيء تمام في البلد

شعور تبثه اجهزه الاعلام .... بتخلطه مع صور لفرحه الناس .... فيبان ان ده راي الناس

الناس اللي تعبانه بجد .... موش بتفرح غير في لحظتها كاي ناس طبيعيه بتشجع ماتش كوره

وصلت الفكره ولا ايه ؟

اتمنى تكون وصلت

فتاه من الصعيد said...

ملحوظه تاني بالمره .... اعذريني بس الموضوع بفكر فيه من امبارح

مين اللي حط اغاني 56 و73 على صور اجوان .... وسفه من انتصاراتنا

الاعلام مع الاسف

ملحوظه تانيه

اصبح حضور ماتشات الكوره والخروج للتشجيع مظهر طبقي لبنات بعد ما التذكره وصلت لالف جنيه وزياده

فلما يخلصوا بيخرجوا ويهيصوا .... ووراهم بنات تقلد

الموضوع ظاهره موش خيبه ولا نكسه لشعب

اسفه جدا للاطاله

تحياتي

GeHaD-----(male) said...

لا بقي معلش انتي ملكيش في الكوره ماشي
ال 80 مليون مصري نقصوا واحد مش هيفرق

الناس كلها مجمعه علي الكوره وعاوزه تفرح انتي مستكتره عليهم الفرحه دي

karim said...

كل اللى بتقولية مظبوط, بس اعتقد مش ممكن نحجر على الشعب كلة فة فرحتة يبقى حراام, مش من كلة ولا ايية, واى كلام غير كدة يبقى اقوليك حاجة حلوة شوفى بلد غيرنا, مع الاسف احنا كدة ومااعتقدش ان هايكون فى تغيير مع الاسف, بس فى ايجابية حلوة قوى بجد. لو قربتى تعليقات الناس فى مصراوى علشان جمال بية اتكلم على الماتش اللى جاى واد اية الناس مش طايقاة ولا حزبة, تعرفى ان فى امل

مواطن مصري said...

المصرين من حقهم يفرحو و دة اقل شىء نقدمة لمصر

Appy said...

ملحوظه للجميع
انا اسفه مش هرد على حد فى الموضوع ده علشان محدش يزعل منى كل واحد له رايه هو حر فيه
دى قناعتى يبقى انا حره
دى قاعتكم يبقى انتم برضه حرين فيها
كل واحد له وجهه نظر مش هيفرضها على التانى
انا مصممه على راى ان فيه اهم من الهبل اللى بنعمله ده اصلا بكتير
ولا ده هيقدم ولا ياخر
ميرسى ليكم كلمك

محمود المصرى said...

بسم الله الرحمن الرحيم

ازيك يا حاجة اخبارك ايه ؟
عندى سؤالين مهمين جدا تعليقا على البوست دا
اولا انتى سمعتى الماتش ولا لا؟
ثانيا لو كانت الاجابة بنعم عملتى ايه لما مصر جابت الهدف الاول والهدف التانى؟
بالنسبة لرد الفعل دا بيبقى موجود فى كل حتة فى الدنيا سواء فى مصر اللى فيها عشوائيات وتأبيد للسلطة وقمع وقهر او فى انجلترا اللى من اغنى دول العالم وتداول للسلطة وحرية .
تحياتى

micheal said...

على فكرة كل كلامك مضبوط وزي الفل ومقدرش ألومك عليه بس زي ما تقولي يئسنا من تغيير كل الكلام ده وبعدين من بعد أكتوبر 73 مالناش إنجازات غير في الكورة
:(
مش دي الحقيقة برضه؟
تحياتي

أحــوال الهـوي said...

طيب

نور الدين said...

لالالا يا آبى كدة بقى أنت دخلتى فى الغميق كله إلا المنتخب
شوفى انا كاره النظام والحكم والحكومة صحيح
لكن المنتخب بصراحة بررررررة اللعبة
قد اكون صح قد اكون غلط معرفش
لكن اللى اعرفه كويس ان امبارح كانت ليلة سعيدة جدا بالنسبالى
...
آبى إنت قلتيلى إن اصولك مصرية صح ؟؟؟
هههههههه
...
تحياتى استاذة آبى

فكرة من الزمن ده said...

مبروك على كل حاجة على الخيبة والنصر

على التناقض اللي مالي حياتنا
معاكي في كل اللي قلتيه
لكن ميمنعش اني فرحت وفرحت بهبل كمان
من حقنا نلاقي حاجة تفرحنا بدل ما نموت من كتر الهم

الشعب لابد له من حكومه تشكمه said...

امممممممممممممم طايب.
احب اقولك انك مش هتسمعى مبروك خالص..
لو مش هتسمعيها فى الكوره او فى اى اوليمبياد احب اقولك اقلمى نفسك انك مش هتسمعيهااا..

أحمـــــــــــــد أبو العلا said...

مش عارفه مبروك على ايه؟
مبروك على المرقعه اللي كانت في الشارع
مبروك على الموضه الجديده اللي بتتعمل بعد كل ماتش
مبروك على جيل جديد فاضي وصايع وفاقد هوا ده اللي هيحكم مصر قريب جدا


ياقلبي ياكتاكت خليك كاتم في نفسك وساكت

بدراوى said...

انا عاوز احييكى على هذا البوست انا كنت متصور انه بوست زى اى بوست من اللى فقعوا مرارتى بس اول ما المزيكا اشتغلت بأغنية هشام عباس فى تتر نهاية يتربى فى عزو
قولت يبقى رأيك من رأيى

انا بشكرك بجد عشان انا الحقيقة حاسس ان بقى بيتبصلنا بصة وحشة اننا سوداويين و اننا لا مؤاخذة مش بنحب مصر خالص

احييكى لثالث مرة

صيدلانيه طالعه نازله said...

يا بنتى احمدى ربنا انه كل فتره يبعتلنا حاجه تفرح الناس عشان ينفسوا الكبت اللى جواهم و اهو اما يطلعوه فى الفرح احسن ما يطلع فى الغضب
الشعب ده و الله شايل كتير و بجد صابر صبر الجمااااااااااااال

sookra said...

انه الخوف ياابى
الخوف من غدا والخوف على لقمه العيش المغمسه بالاذلال
تحياتى

nody said...

انا معاكى انها حاجه تغيظ ان مايكنش عندنا هدف غير الوصول لكاس العالم
وعيب المسخره الى القنوات والمسؤلين عملنها
والغلابه نسوا شكل اللحمه لان اقل كيلو وصل 50 جنيه
بس اقولك على حاجه الناس نفسها تفرح
كله ضرب ضرب
نفسنا مره واحده شتيمه

انسان وبس ! said...

طب اهدى بس
انا هقولك يا ستى مبروك على ايه
اصل كان فى ماتش كوره بين مصر والجزاير
اه والله .. ومصر كسبت
هههههههههه

مين الرعاع خريجى العباسيه دول ؟

اه والنبى شوفيلنا موضوع الشقق اللى نتجوز فيها دى يا رحاب او نؤجرها ايجار جديد ونستفيد بالايجار او نبيعها تمليك .....انا هنتخبك لو رشحوكى لاى حاجه على فكره قلبك ع الشعب

نخرج ملط فى الشارع ؟؟؟
هتتحذف دى من الرقابه يا رحاب

الله الله الله بانجو رخيص وسجاير كيلوباترا؟؟

طبعا انتى عندك حق ان المشاكل اللى قلتيها لسه متحلتش وان البلد مشاكل تانيه حتى غير دى كمان
بس تعالى نبسط الأمور شويه
متش كوره بين فريقين واحد منهم منتخب يحمل اسم بلدىوالنتخب ده كسب الماتش ( بعيدا عن حالة الاحتقان والاهانه اللى حس بيها بعض المصريين )منخب بلدى كسب
عادى جدا انى افرح بل هو ده المنطقى
والمفروض انه يحصل
لكن
السؤال مش بنفرح ليه ؟
لان ده الطبيعى زى ما قلت
وانما السؤال هو
- ليه الفرحه بالشكل ده ؟... وممكن برضو تبقى فيه اجابات كتير منطقيه على السؤال ده
- ليه الناس مبتهتمش بمصالحها الحقيقيه وتجتمع من اجلها بالشكل ده ؟

واسئله تانيه من عينة الاقصى بدنس من اليهود ولسه قريب وكتير منفض طب اشمعنى الكوره وهكذا

والله اعلم

الزنارى said...

بردو مبروك
رغم انتقادك لهذة الفكرة الا أن الفرحة تسيطر على لذلك أبارك الفوز لمصر و أنتظر فوزها القادم فى السودان ان شاء اللة
مع خالص التحيات و التقدير
أحمد الزنارى .

ماما أمولة said...

هههههههههههههههههههه

دايما كدا حرقة في دمك

ماتسيبي الناس تفرح ياروبي

لما يزعلوا كل السلبيات ها تتحل ؟؟؟؟

وحشاني ومش بتسألي عليا

سلام

أم بتول said...

و الله آبى انا قلت نفس كلامك و أكتر ، فيه حاجة كمان مهمة ياترى الفريق دة ها ياخد كام مليون من خزينة الدولة مكافآت " ربنا يبارك لهم مش بنقر ولا حاجة " ياترى الكام مليون دول كانوا عملوا ايه لو أتوجهو صح لنظافة المستشفيات ، لأعالة المرضى و المحتاجين و علاجهم على نفقة الدولة الى هم من حقهم ان الدولة تعالجهم مش الفنانين و الراياضيين الى بيكسبوا بالملاين ولما واحد يقع و لا يمرض طيارة خاصة تاخدة على بره و يتعالج على نفقة الدولة وهى فى الأساس من دم الشعب الغلبان ودة لأنه ثروة قومية !!!!!!!!!! وش مقهور ....... الملايين دى كانت بنت كام شقة لناس كل حلمها أنها تعيش فى غرفة بحمام بس و الله بس مش بيطمعوا فى أكتر من كدة ......... كانت أعانت كام فقير و محتاج مش لاقى يجوز بنته ولا يساعد أبنه أنه يتجوز علشان يحصن نفسه من الفتن وما تحدث حوادث الأغتصاب و التحرش ، عارفة يوم الماتش سيبك من حوادث التصادم الى حصلت بسبب المهرجانات ، كام سيارة اسعاف و مطافى أتعطلت علشان زحمة الوشارع و الجنان الى بيحصل ، كام مريض حالتة أتأخرت علشان ما قدروا يلحقوا يدخل المستشفى بسرعة ، يمكن يكون كبت صحيح ولا مشروع قومى زى ما بيقولوا ، بس صدقونى لو فى مشروع قومى واحد أتحمسنا له زى الكورة كان زمان مفيش زينا فى الدنيا ، أسمحى لى أضيف لحكمتك حكمه أنا كمان أنهاردة ، قاله يابابا علمنى التفاهة ، قال له يا بنى تعالى فى الهايفة و اتصدر . أحنا كدة بالضبط فى الهيافة حلوين قوى و نتجمع و نقول كلنا مصرين ولازم نشجع فريقنا القومى ، لكن فى الجد و المشاريع الى محتاجة كل أيد وكل كلمة تشجيع تلاقى ........... ولا بلاش أسكت احسن

سمكه واحده said...

مبروك علي ايه ولا ايه ولا ايه
علي الويل ولا الحراج ولا معرفش ايه اللي راح
بلا خيبه
صح يا ابي والله

سمكه واحده said...

بس ملط لاء ملط لاء
جومي بينا نمشي
جومي بينا نمشي

مواطن مصري said...

مش هتشاركي بين حملة التهدئئة بين مصر و الجزائر؟

Israa El-sakka said...

مفيش حاجة يتباركلنا فيها
بجد الماتش ده تعب اعصابي بجد ده الكورة بقت افيون الشعوب بجد !! على فكرة هما كان عندهم انتفاضة للفقراء بالجزائر الانتفاضة دي اختفت بسبب الماتش المهبب ده !! و قيسي على ده كل حاجة تانية دي بقت دماغ الشعوب و في ناس حتزعل و تقولك تنظير نخبوي ملناش فيه !!!! ياريت تشاركي في المبادرة حتلاقيني كاتبة عنها و حتلاقيها عند نوارة و مواطن مصري كمان


ربنا يستر انا خايفة جد يموت بسبب الزفت الكورة

قلم رصاص said...

يا ابي احنا مجبناش جديد

الكلام اللي انتي قولتيه ده كلنا حافظينه وعارفين اكتر منه وفيه اكتر منه بكتير موجود في مصر

بس احنا بشر نفسنا اي حاجة تفرحنا شوية ولو دقايق معدودات

ده طبعا بعيد خالص عن مسألة التعصب والاحداث المؤسفه اللي حصلت بسبب الماتش ده

عموما اهو نفرح شوية ونكسر الملل اللي احنا عايشينه ده .. مفيهاش حاجة يعني .. الدنيا فيها كل المتناقضات

واهو في النهاية الكورة مش حاجة خاصة بمصر بس .. اهي متنيله في كل البلدان الغنية والفقيرة الغبية والذكية

وان ربنا كرم وصعدنا اهو تبقى حاجة كويسه مش وحشه يعني

دمتي على خير

AMoAMen said...

بصى
وجهة نظرك خاطئة 100%
مش علشان مابتحبيش كورة يبقى كل اللى فرحوا بعد الماتش مغيبين وناسيين مشاكلهم
دى حاجه بتضحك الناس وتفرحهم وسط الهموم اليومية
والتسلط والاستبداد اللى موجود وعلى فكره مش فى مصر بس
لعلمك المانيا وانجلترا رغم انهم من الدول المتقدمة
بس متعصبيين ويعشقوا الكورة اكتر مننا بكتير
حاولى تبصى للموضوع من ناحية حاجه تافهه بس بتعشقيها
تامر حسنى مثلا اعترف ان عمرو دياب عمة وتاج راسه
تصورى هتبقى مبسوطة قد ايه
كده يعنى

سومه...مجنونه فى بلد عاقل said...

هههههههههههه يا حكمك الجنان
مبروك على ان امريكا واسرائيل استغلوا صغر عقلنا وهبلنا
اسرائيل كاتبه فى الجرنان عقبال فتح وحماس
قال يعنى فتح وحماس حابين بعض قوى وميت فل واربعتاشر

مجداوية said...

السلام عليكم

الكلام ده كبير

متفقة معك فيه مليون في المائة

أيوة أنا ريا مستغربة ليه ؟!!!

ايون متفقة معاكي جداً ,, على فكرة فيه ناس بتكتب التنوين بالنون يعني جدان وتمامان
فأنا متفقة معكي تمامان

ولما تتنصر مصر على العدو الصهيوني الجزائري حنتلقى العزاء في أسرانا في البلد العربي الشقيق سابقان العدو الصهيوني حاليان وطبعا احنا كمان بقينا بالنسبة لهم أعداء وهذا انما يدل على العمى والحول اللي أصاب العرب جميعا فبقوا بيعاملوا الأعداء الحقيقين كأخوة وبالحضن والقبلات و بيقابلوا الأخوة الحقيقين كأعداء أحلت دماءهم
فلا دين ولا أخلاق ولا عروبة ولا قومية وسمعني سلام الشهيد على شهداء الكورة آخر معاركنا الباسلة
وبلاش لطم وصوات عشان حرام ونكتفي بالقهوة السادة

ست البيت said...

ومعاك واحد تعليق لسست آبي بتنجاني
بعد التحية والذي منه
وكل عام وانت بخير
والشماتة طبعا أن محدش حيسنع لخرفانك صووت طول الفترة اللي جاية لحد ما يعدي العيد بخير وسلام
أقولك أنا من رأي سومة
الاعلام يا اخوختشي
ثم الاعلام

ست البيت said...

الاعلام قعد ليل نهار يقول معركة 11/11ولا مش عارفة كام
والدنيا ولعت
وانا في كوكب تاني
والله يا بنتي معرفت ألا من قناة الناس
الشيخ عبد الله كان مستضيف مصطفى بكرى وحازم كاديكي ورضا البلتاجي
الناس دي قالت كلام حلو قوي عن مشروعية الفرحة والتشجيع بس ما توصلش لكده
اتكلموا عن شوق الناس للفرحة
وانا حقولك حاجة يا آبي
الناس مشتاقة تفرح بنصر
مشتاقة تعلق أعلام مصر
مشتاقة ترفع راسها وحد يتصل بيها يقولها مبروك
من بره مصر
مش عاوزة اقولك ان لما الموردين بتوعنا بره هنونا السنة اللي فاتت في البطولة الافريقية
ظبطت نفسي بضحك بمرارة وسخرية
الناس بيحركها الاعلام يا آبي
لو القنوات دي لما المسجد الأقصي مسرى نبينا - صلى الله عليه وسلم- بتعمل فيه كل دا ومستني على زلزال حتى ولو صناعي ويقع
وقتها مشوفتش مدحتت شلبي ولا شوبير
ولا ايتها حد من الجزائر
ولا شوفنا حد عملت حركة جدعنة أيام حرب غزة ووقف البث احتجاجا على السياسات المصرية المصرة على قفل المعابر وسجن المسلمين الفلسطينيين ورا باب باطنة فيه الرحمة وظاهره من قبله العذاب
مشفتش حد طالع يندد ويحتج على القنوات ويقطع الارسال ولا حد اذاع اغاني وطنية ولا خلي لاسلاح صاحي

ست البيت said...

أما خروج الناس دي للدفاع عن نفسهم
هو مش فاهميين القضية يا آبي
واحد مش فاهم القضية حيدافع عنها ازاي
الناس معظمها مدعي ثقافة يا حلوتي
تفتكري لو كنا مثقفين بجد كان بقى دا حل
الناس دي بتدور على فرحة رخيصة من غير تمن لأنها جاهلة
غير مثقفة
متعرفش يعني ايه تضحية
شعب زي العجينة يا قلبي تحطية ينحط تبطية ينبط
يعرف منين حقة لما التعليم اللي مسئول عن تفتيح المدارك وادراك الانسان لهويتة اللي بنطالبة بالدفاع عنها
تعليم مأجور لخدمة الاجندات المعدة سالفا
اجندات تهدف لتطويع المنطقة وتمهيد الطريق جيدا لشرق اوسط جديد
وفوضي خلاقة كما يدعون
تعليم يهدف لاخرس انت اشفهمك
احفظ اللي قدامك وخلاص
حل التدريبات
احفظ القانون
تصدقي انا معظمنا ما عدش يسمع عن قانون نيوتن
تعليم مش هدفه يعلمه تستخدمي قانون نيوتن دا في ايه
لأ هو لقاهم بيدرسوه بره قال ندرسه جوه وخلاص
هي اساسا امريكا بقت امريكا كده ازاي لما قررت تعمل ثورة على مناهج التعليم بعد أن صعد أول روسي للقمر

يبقى منستناش يفرحوزا في غير الكورة
واحدة بتقول لد.سليم العوا
اشمعني احنا اللي نضحي بولادنا
لما كان بيتكلم عن حديث النبي - صلى الله عليه وسلم- وان اهل مصر في رباط إلى يوم الدين
شايفه ان وانا مالي اشمعني ابني انا
سبحان الله مع ان ابني انا دا بيروح كل يوم في حوادث اسفلت ولا بيبقى شهيد ولا يحزنون

كيكى عوووووو said...

عندك حق يا ابى
عاجبنى تشيبهك اوى بانها مخدرات

micheal said...

عاوز بوست على موقعة الخرطوم والهبل اللي سمعناه في الإعلام
ممكن تحققيلي طلبي؟؟؟