سؤال


صباح الخير اولا انا عندى كام سؤال يعنى كده محشورين فى صوباع رجلى الصغنن ومش عارفه البس الشربا بجد
يعنى فيه حاجات بتحصل لما بقعد اهزها شمال ويمين مبتوقعش غير براغيت وصراصير واقعد اجرى وراها بالشبشب علشان تجاوبنى عن غرضها بتتخرس ومبلاقيش نتيجه
اللى عنده اجابه بدون حنجوريه فارغه يا ريت يقولى اللى فكر فى الاسئله دى يقولى اللى عارف للحاجات دى فايده يقولى بجد لانى فعلا مش عارفه وفيه فرق ما بين مش عارفه ومش شايفه
دى كلمه ودى كلمه
المهم بقى السؤال الاول

ان ان تششششششششش
يعنى ايه محاكمه شعبية دى زى النزله الشعبية كده يعنى ؟
انا بسمع عنها بس ايه الفايدة العايده منها علينا يعنى الناس اللى بتدعوا ليها واللى بيعملوها ايه الفايده يعنى محاكمه عن تصدير الغاز الىل مش هنخلص منه بقالنا سنين وبنخبط دماغنا فى الحيطه
محاكمه عن احداث الجزاير وفى النهايه قاعدين نولول اهو
محاكمه لاحمد عز والراجل كل يوم ولا ماثر فيه شعره بيطول وسايح ونايح ولا السمنه البلدى

حاجه تانيه
سمعت ان فيه بنت اعتقلت من صلاه العيد انا طبعا ضد العبط ده بس داخل واحد يقول علشان اخوها لابس كوفيه بتاعت فلسطين وهنا يصدر صوت مدوى منى جدا يهز ارجاء المأروصه امال اللى رابطينها على كتافهم ليل نهار محدش بيكلمهم ليه الواد نضال اه هبلغ عنه ما هو اهو لابسها والناس اللى رابطاها فى عربيتها كمان طبعا السبب ولا له معنى اكيد فيه حاجه
السؤال بقى وقفه احتجاجيه والامن ضربهم على صوابعينهم جريوا طيب لزمتها ايه الوقفه ولا القاعده
البيان الىل هجيب لكم جزء منهم بجد رعبنى يا مامى

خصوص واقعة الخطف الاجراميه لبنت من بنات مصر بنت الزقازيق الطالبه بكلية العلوم على يد مخبر امن الدوله محمد عبدالله و عناصر معاونة من الشرطه من مصلى العيد بالزقازيق

يؤكد اتحاد شباب مصر ان هذه العمليه الاجراميه بخطف بنت مصريه على يد اى عنصر كان لن تمر مرور الكرام

كما يؤكد ان ما حدث لم يكن عملية ضبط قانونى ونحمل المدعو محمد عبدالله ورؤساءه فى جهاز مباحث امن الدوله المسئوليه كاملة عما حدث كما نحملهم المسئوليه عن الغضبه الشعبيه من جماهير الشعب المصرى العزيز

كما يطالب اتخاد شباب مصر جماهير شعبنا العزيز بالمشاركه فى الةقفه الاحتجاجيه المقرره يوم الاثنين الموافق 30 من نوفمبر بعد صلاة الظهر مباشرة امام المحامى العام بالزقازيق ( المحكمه ) بشارع الزراعه

يعنى البهوات اللى بيقولوا مش هيمر مرور الكرام عملوا ايه راحوا وقفوا زى دكر البط والامن جراهم البيه اللى نافخ نفسه وكتب البيان ده هيحط السيخ المحمى فى صرصور ودنه
طيب بجد ليه بنتريق على الحكومه لما بتقول انا بدين واشجب وانتحر ما هما كمان بيقولوا كده وفى النهايه بيج طزززززز فى كله

انا مش فاهمه ايه الفايده من الحاجات دى يعنى اولى البنت يقوم لها محامى ولا يشفوا السبب ونبطل بقى نقول الشعارات الجوفاء دى وكام واحد صايع يروح مش وراه شغله ولا مشغله علشان يتلطش شالوت ويروح يعيط ويقولك اختطفونى ورامونى فى الصحراء مع الكليبه يا مامى
انا طبعا مش هقلل من مجهود ناس كتير بتشتغل بس العيال اللى طالعه تصدعنا دى وتقلب لها قرشين تتلم بقى علشان كده ضيعوا بنات فى رجليهم

السؤال التالت

رئيس هيئه السكك الحديد متشلش ليه كل يوم قطار طالع نازل واكل شارب
واحنا بندين ونشجب ونعيط برضه العيب فى الهيئه كلها قضبان مش كويسه وقطارات زباله وناس معندهاش وعى لاى استخدام فى اى حته
ده مش بيتشال ليه

السؤال الرابع


هقولكم عليه لما يجيلى التعليقات


كان معكم آبى هانم كايده العزال


حكمة الامبراطورة

اتلم الشبشب على الصرصار والاتنين بقوا من الابطال

31 اخبط وقول رايك:

wanna b a physician said...

اولا ازيك يا ابببى

ثانيا كل سنة وانتى طيبة ولو انها متأخرة بس انا بعيد عنك مش شوفت العيد اصلا محبوس فى الشغل

بعد كدا بقا بالنوسبه لهذة الكلمة المزعومة المحاكمة الشعبيه المفروض اللى انا فاهمه من قديم الازل ويجوز انى مش بافهم انها اعلاء لصوت الشعب والجماهير ضد شخصية معينه واظهار الامتعاض وعدم القبول لامر ما وبذلك يختشى على دمه ويغير موقفه
بس محدش عندنا بيختشى وعلى رأى المثل اللى اختشوا ماتوا

اما موضوع الوقفات الاحتجاجية فده بجد خنقنى زيك بالظبط لان اللى هيعمل مش لازم يطلع بيانات ويندد ويشجب بكلام لان الفعل عكس الكلام وطالما اتكلمنا يبقى مش هنعمل حاجة عكس اللى احنا بنقول ضدهم الكلام مش بيتكلموا بيعملوا علطول

اما السكة الحديد الناس بتركب بمبدء الارخص وبالطبع طالما ارخص هيبقى اسوء اينعم دى مش قاعدة بس عندنا كدا ارخص = اسوء
ولما جم يشيلو شالوا الوزير على اساس انه رأس النقل كله بس المفروض كنا نبص لرأس الهيئة ده مش ده المسئول المباشر

ولا اجابة ليه ده مش اتشال لحد دلوقت


تحياتى

Appy said...

تصدق وتأمن ابلله انت ابن حلال يا اما انا اللى فيه شئ لله يعنى لانك امبارح جيت على بالى قولت هو اختفى فين يكونش اتجنن واتجوز واكلت دراعه هههههههههه
المهم حمد لله على سلامتك بص يا دكتور
موضوع المحاكمه اننا على امتعض الناس دى فاهمه كويس ومش فارق معاهم امتعضنا ولا اتمضمضنا المهم مصالحهم وانهم فاهمين انهم اكبر مننا واحنا الصغننين اللى مش بنفهم مصلحتنا
فالبالالى احنا بديهم كارينه فى ايديهم للديمقراطيه انهم بيثبتوا على قفانا اننا عندنا ديمقراطيه
ده راى يعنى ده مش ضدهم ده فى مصلحتهم
وبعدين التانيه مش اسمها وقفات احتجاجيه اسمها وقفات دكر البط
نورت يا دكتور وكل سنه وانت طيب

واحدة مفروسة said...

ههههههههههههه
ده تأثير الفتة و اللحمة على فكرة

بصي يا بؤبؤ احنا بلد ديمو قراطي
يعنى نعمل اللى احنا عاوزينة...نقول اللى احنا عاوزينة
نعمل محاكمة شعبية...ماشي....نعمل وقفة المطلقة على باب محكمة الاسرة...ماشي......نخبط دماغنا فى الحيط..ماشي....
بس بقا افرسيني و قوليل انهم عملوا حاجة قصاد اللى بيتعمل؟؟؟ نوووووووووو...لأنهم حيعملو اللى همه عاوزينة مش اللى انتى عاوزاه...يعنى بيسيبوا الشعب يفك عن نفسة....بس ده مش معناه انهم يعملولوه اعتبار

و بعدين البنت اللى اتقيض عليها ديه واضحة زي الشمس ان فيه حاجة تانية بخلاف اللى اتقال
و الكوفية يا اوختى بتاعة فلسطين بتتباع على الارصفة و لابسينها فنانين...

اما بقا الراجل رئيس هيئة السكك الحديدية
فكلا و الف كلا انه يتشال يا امى..ليه بقا ...
اولا بيقلل عدد السكان
ثانيا بيشغل الدكاترة و المستشفيات و الحانوتية
ثالثا بقا انا نما الى علمى المفروس ..ان الراجل ده تاجر خردة فى الوكالة
و بيرجع يشتري القطارات المخبطة و اللى عاملة حادثة من الحكومة....بيشتريها خردة
يعنى نفع و استنفع......

شوفتى بقا...
و انتى بس شاطرة تجريلي ورا الصرصار بالشبشب

micheal said...

غريبة أوي موضوع البنت اللي اتقبض عليها بعد الصلاة
أنا ممكن أتخيل الحوار ده لو حصل في فلسطين مثلا من قوات الاحتلال..إنما قمل الدولة في مصر كده واضح أنه عدى أوي
ايه اللي بيحصل في سكك حضيض مصر..أنا كل ما أفتح الجورنال ألاقي العناية الإلهية أنقذت كارثة جديدة
!!
موضوع الجزائر لو فكرنا فيه بزاوية منطقية حتلاقي النظامين مستفيدين جدا جدا من بقاء الوضع على ما هو عليه لتحقيق مكاسي سياسية رخيصة
تحياتي

sookra said...

هنجاوب ازاى واحنا كمان بنسأل نفس الاسئله ياابى
مساكى شيكولاته

الزنارى said...

السلام عليكم
موضوعك جميل و رائع و اسمحيلى أجاوب على السؤال الثالث الناس دول معندهمش دم و لا احساس عشان كدة ماتشلش و لو قطارات مصر كلها انقلبت و لا هيجرالة حاجة .
مع خالص الاحترام و التقدير
أحمد الزنارى

dr.lecter said...

مموضوع المحاكمات ده مجرد انفعال زياده عن اللزوم من المصريين المكشهورين بطبيعتهم

مجرد افوره وهتروح لحالها كانوا يحاكموا الغيلان بتوع النظام الاول ولا هم لسه جايين يفوقوا

اما خنوق مخنوق فعلا ومش عارف اعمل ايه

انسان وبس ! said...

كل سنه وانتى طيبه متاخره خالص معلش

من قال لا اعلم فقد افتى

وبجد انا معرفش مين مسئول عن تردى اوضاع السكه الحديد

ومش عايز اتكلم عن المحاكمه الشعبيه دى برضو

اما الوقفات الاحتجاجيه فدى بقى انا شايف انها بقت موضه ورأيى انها موضه حلوه كمان بس لو تتعمل صح
ومش عارف انتى عايزه الناس تعمل ايه بس يا آبى واللى يقول لازم فعل مش مجرد كلام!
دول مجرد شباب اتحمق ...ففكر يعمل حاجه ..فعمل وقفه احتجاجيه ...يمكن صوتهم يوصل للرأى العام او ما يسمى بكده يعنى
يعنى الناس تتكلم زى ما انتى كده اتكلمتى وانا عرفت منك وهكذا
عاملين زى اللى بيرمى طوبه فى المياه الراكده ... مجرد محاوله
اقولك ممكن بدل كده ...وطالما ان الافعال احسن يقتلوا بتوع مباحث امن الدوله اللى خطفوها او يعملوا كام عمليه ارهابيه انتى ايه رايك ؟

مواطن مصري said...

ابيي كل سنة و انتي طيبة اية هو بقى السؤال

؟؟؟؟؟؟؟

فتاه من الصعيد said...

موش عارفه ايه الفايده بصراحه من محاكمه الشعب

بس يمكن عايزين يسيبوها للتاريخ علشان يدين الناس دي ؟

اما الوقفه الاحتجاجيه اعتقد للفت انظار الراي العام للموضوع

بس معرفش كلامي صح ولا غلط

تحياتي

Appy said...

واحده مفروسه


هى تاثير الفته لان انا اللى عملتها فعلا
انا لو على الكوفيه يبقى ربع ظباط الداخليه هيتقبض عليهم لانهم حطينها فى عربياتهم انا بس بقول على التفاهه اللى بتحصل
بجد احنا بقينا عايشين بنظريه المؤامرة بشكل عبيط وهمجى كمان
نورتى يا قمر







فيشو

انا فعلا مستغربه الموضوع يا ميشو بجد واكيد فيه تابعيات تانيه
واكيد برضه مش بسهوله امن الدوله مش بسهوله بتقبض على بنت الا كان زمانى اتاخدت من بدرى بصراحه وناس كتير تانيه

Appy said...

سكرة


طيب نستنى حد تانى يجاوب







الزنارى

ما انا عارفه ان عندهومش دم بس مفيش منطق فى العالم بيقول اللى بيعملوه ده ايه فايدته عليهم شخصيا

Appy said...

ليكتر

مالك فيه ايه يا ابن العم بس مخنوق من ايه ربنا يفك خنقتك يا رب






انسان وبس

محمود ازيك يا متر وربع
لا يا محمود مش هيعملوا عمليات ارهابيه بس فيه اختراع اسمه اقوم محامى نشوف الاسباب ايه بتاعت القبض عليها
سعات الحماس بياخدنا والارعنه ونضايقهم ونشتم مع ان ممكن يبقى معاه حق
يعنى مثلا
لو ظابط وقفنى قالى رخصك اكيد مش هتنح واقوله لا ومش من حقك وبتاع وبعدين نتخانق واقول ضربنى بوشه على ايدى
اكيد هديها له
نفس الفكره بقى ممكن البنت تكون بتوزع حاجه وده ممنوع مانعا باتا وانت عارف
او اشتبكت مع حد وانت عارف اننا بقينا متحفزين للشرطه عموما
وشكل اللى قبض عليها امين شرطه من امن الدوله يعنى اقذر فئه فى الامناء
فبالتالى الموضوع محتاج لباقه فى التعامل
مش شويه الشعارات الهايفه اللى اتكتبت انت شوفت البيان بتاعهم ايه لن نسمح هى اول بنت ما فيه بنات كتير وعملوا ايه
واهم راحوا وانضربوا واتاخد منهم تلاته عارف انا بقيت احسها طريقه للشهره اكتر منها لعمل شئ
اقولك اغلبيه الراى العام
ممكن يقول ايه بنت ايه يخليها تعمل كده بنت ايه يخليها تحتك بيهم وده الاغلبيه ومتنساش اننا فى مجتمع متحضر شكلا انما فكرا لا
فهمت قصدى يا متر

Appy said...

مواطن مصرى



ههههههههههههههههه انا نسيته







فتاه من الصعيد

حبيبتى كل سنه وانتى طيبه
تاريخ ايه بس اولا المحاكمات دى عباره عن مكان ناس بيشربوا فيه شاى ويفرقوا جاتوه عارفه الجمعيات بتاعت اللوتارى شبها كده تقليبه ومصلحه يعنى بصراحه

احمد سعيد said...

مساء شريف بتنجانه خانم

صراصير وبراغيت وابيتريل

يييييييييييييييييييع

دا كدة المدونه بتاعك عاوزة تتعقم ياماما

وبعدين قلتلك ميت مرة بلاش تركبى خشب فى المدونه

استخدمى الومينتال

ويستحسن يكون من عند اونكل القبنورى المونيوم اطلب منه بالتليفون

مبدهاش بقى
عليكى بالعجينه بتاع الصراصير
بتتباع فى الصيدليات

كشكول الاجابه
الوقت عشر دقايق
الاسم كذا
رقم القعاد كذا
اتفضل جاوب
تررررررررررررررررن

اجابه السؤال الاولانى
المحاكمه الشعبيه افتكاسه مصريه بحته نتجت بشكل عفوى جماعى تلقائى للتفريغ عن شحنات غضب مكبوته من النظام مغلفه بطبقات سميكه من الجبن والسلبيه والتخاذل.
ولدت فى قاعات الندوات وتنمو وتترعرع على سلم نكابه الجورنالجيه
وتتغذى على خرزانات وشوم ونعل بيادات جنود القمل المركزى.
وهى بالاساس صناعه مصريه
made in lazogly
شجع صناعه بلدك...

احمد سعيد said...

اجابه السؤال التانى
القاعدة طبعا لازمتها معروفه
وفيه قاعدة بلدى وفيه افرنجى
بيقولوا ان البلدى صحيه اكتر
والافرنجى لازم معاها مناديل
علشان الميكلوبات ولا مؤاخذة

اما الوقفه فدى بتبقى لما يكون السخس فى الشارع ومش لاقى كنيف عمومى ولا مؤاخذة برضه ...

البنى ادم اللى عندة عقل
لما يعمل حاجه يكملها ويمشى فيها للاخر
مش يجى فى النص ولا مؤاخذة...
وقبل ما اعمل حاجه اعرف ايه الفايدة من وراها
لو ملهاش فايدة يبقى اوفر مجهودى لحاجه عمليه اكتر
حاجه ترعب النظام
مش تخليه ياخد بعضه بربطه المعلم
يلا ياجدع ننزل وسط البلد نضرب العيال المقاريض دول شويه ونتحرش بالبنات مقصوفه الرقبه شويتين

مش كدة برضه ؟؟؟

احمد سعيد said...

السؤال الرابع

الاجابه تونس

احمد سعيد said...

السؤال التالت

يتشال ليه ولا مؤاخذة؟؟
هو الراجل عمل حاجه غلط
دا حتى بيساعد على تحديق النسل وتنزيم الاسرة
ممكن بقى يقدم استقالته ويشتغل لوّلوّ

mohamed said...

حكمة الامبراطورة
اتلم الشبشب على الصرصار والاتنين بقوا من الابطال
تصدقى يا سمو الامبراطورة
خير الكلام ما قل ودل
وانتى قلتى كل الكلام
فى الحكمه الامبراطوريه
تحياتى لكى جداااااا

Foxology said...

اولا : المحاكمة الشعبية دى زى ما تقولى كدة ليها نفس فايدة اتحاد الطلبة الموازى يعنى حبر على ورق وكام صورة وشكرا

ثانيا : موضوع البنت اللى اعتقلوها كلامك مظبوط وكفاية شعارات جوفاء بأة احنا بقينا فى ديل الأمم من كتر الكلام وقلة أو عدم الفعل

ثالثا :مش عارف ليه دايما بنضرب ديل التعبان مش راسه اللى فيها كل السم .. غريبة مش كدة ؟

يلا ما علينا

تحياتى

حـــلـــم كــــان said...

اتلم الشبشب على الصرصار والاتنين بقوا من الابطال

ههههههههههههههههههه

حكمه جامده

Wanda said...

يا نهار اكتشفت انى دماغى بدات تثلج مع البرودة المحيطة
اصلى مفهمتش حاجة من السوال
بس اكيد السوال مهم
اصل
الى خبط فى دماغى محاكمة شعبية ، بيع الغاز لاسرائيل
، الجزائر، اعتقالات، كوفية، سك حديد، وزير يقيل او يستقيل

انت كنت بتقرأى جرنال ايه؟؟؟

بس الى عجبنتى الحكمة :-)
اتلم الشبشب على الصرصار والاتنين بقوا من الابطال

طيب الشبش اعتقد فاهمة انه بطل لانه قام بتنفيذ المهمة انما الصرصور ماله؟ طلع شهيد؟؟:-)

اعذرى تخاريفى بس بجد توهت منك هو السؤال الى احنا ممكن نرد عليه ايه؟ اصل كلها اسئله للعلم فقط مش للاجابة للمواطنين الى زينا :-(

سندس وأمل said...

تيييييييييييييييييييييييييييييت
تييييييييييييييييييييييييت
:D:D:D:D:D:D:D:D
ازيك يااوبه:D
شكلى بعد مااخلص كلامى هترشينى

بالبتاع بتاعك ده نأى واحد رائحته حلوه يابنت:D:D

....
بصى ياستى انا هكلمك بالنسبه للوقفه والبنت الى اخذت.....

احم احم...ياساااااااااااااااااتر:D

بصى هى الحكايه مش بالظبط

لانه اخوها لابس الشال بتاع فلسطين

فهى اتاخدت .....هو رخم عليها شويه

فعصلجت معاه ومش رضىت ترد عليه

فراح واخده....وبدون تفصيل فى الكلام

تعرفى انه ظابط الامن ممكن يعمل اكتر من كده!!

انا كنت هناك يوم الوقفه فبما انه

انا عندى 15 سنه:D

الراجل بتاع التكسى نزلنا بصى لسه نزلين

بتاع الامن :انتو بتهببو ايه هنا

يالا يااتى انتى وهى..فمشينا شويه

عشان هبلهم!!رجع تانى راح قعد يزعق

وبعدين راح قايل لنا هاتو بطايقكم

فكان واقف معانا واحد من بتوع الوقفه

طلع بطاقته وكمان واحده طلعت بطاقتها

فضل مين انا ومريم 15سنه فبيبصلنا

وزعق وقال فين البطايق احنا ساعتها كنا شاريين ذره علشان نبعد الشك عننا:D

فمريم قالت له احنا لسه صغيرين مش معانا بطايق

وراح باصص لى وانا عماله اكل فى الدره

ومش معاه راح بأقصى صوت فيه

مزعق وقال :وانتو ماشيين من غير بطايق ليه؟

وكان هيشدنا ع البوكس لولا انه واحد واقف معاه راح شاده من ايده..

وكان هيوقف لينا تكسى ويروحنا ..

انا مش قصدى حاجه لاكن انه بتاع امن

الدوله ياخد بنت لمجرد انه لابسه خمار

فده شىء مش بعيد!!..عموما

(اكمل فى تعليق تانى لسه لسه مترشيش( D

سندس وأمل said...

انه هما عملو الوقفه بس عشان
حسو بمسئوليه اتجاه البنت دى

ازاى انها تعتقل

فعملنا الوقفه دى بس مش اكتر عشان كده

المصيبه بقى ان الوقفه اتفركشت قبل اما

تتعمل بمعنى ان عربيات الامن كانت بالعشرات

وكان فيه ناس طبعا راحه قبليها بيوم

اتفركشت بمعنى اتفركشت

ده مش عمل حاجه فاانتى مش تقولى عيال ومش

عيال لانهم عملو الى هما فى فكرهم

انه لازم يتعمل والى المفروض يتعمل

مننا...

كبايه مايه يابنتى...:Dاااااااااااه

هو الهدف من الواقفه حلو وكويس جدا لكن نقدر نقول كان سوق تنظيم..

بس:D

سندس وأمل said...

والسلام عليكم ورحمه الله وبركاته:D

كانت معكم من قناه الحقيقه للاخبار...او الكدب

سندس عاطف...تيييييييييين

(البت ابى رشتنى..وااااااااء(

يا مراكبي said...

احنا مش قلنا نبطل كلام في السياسة؟

مش انتي أهو لسه قايله انهم في الإعتقالات ما بيفرقش معاهم ولاد ولا بنات؟ يعني ما فيش عزيز ولا غالي خلاص

:-)

التعليقات نزلت .. خشي بقى على السؤال الرابع

:-)

amirelhob said...

الله البوست حلو جدا ولذيذ جدا بس انا مستنى السؤال الرابع بفارغ الصبر يا ترى ايه هو (: يا رب ميطلعش سوال صغير وصدقينى انا عندى اجابات كتير بس مينفعاش تقال لان ملهاش اى لازمه ولا هتقدم ولا هتاخر ودا مش يأس لقدر الله لا دا معرفه لقدر الرد ومن قلبى بتمنلك كل خير وسعاده وصحه وتوفيق وفرح وابتسامه تدوم يارب طول العمر

لورنس العرب said...

1- الحقيقه انا بسمع بردو من فتره عن المحاكمه الشعبيه، ولنفترض انها حصلت وتم ادانة من يتم محاكمته، هل هانعدمه؟ هل هايدخل السجن؟ إذن المحاكمه الشعبيه دي غير قانونيه، مفيش حاجه اسمها محاكمه شعبيه، يعني يا اما يقف امام المحكمه يا اما يقعد في بيتهم، ومع الشخصيات المذكوره مش هاينفع انهم يتحاكموا من الاساس لأن كل شيء معاهم ماشي قانوني 100%، ولهذا نحن في انتظار محكمة العدل الالهيه معهم، دي الوحيده اللي ممكن تجيب الحق، اما الحديث عن أي شيء آخر كلام فارغ واستهلاك اعلامي

ثانيا: هو الناس بتعمل المظاهرات والاحتجاجات -من المفترض- من أجل الضغط على صاحب القرار للعدول عن قراره، بس المشكله ان صاحب القرار بيستمر في قراره، والمحتج بعد ما يحتج بياخد الميكروباص ويروح على بيتهم ويشوف حاله
ثالثا: رئيس هيئة السكك الحديديه لم ولن يستقيل لأن فيه حاجات اهم منه دلوقت والناس مش مركزين معاه، الناس عقلهم مع الجزائر

Appy said...

انامعنديش سؤال رابع هههههههههه او كان عندي ونسيت
اي والله
هبقى ادور عليه

يا مراكبى

مقدرش ابطل الموضوع ده


لورانس كنت مستنيه ردك يا هندسه



هكمل رد بكره بقى علشان انا اجازه

Appy said...

احمد يا سعيد


يا سيدى عليك لما تتجلى




سندس وامل


حبيبتى قلبى انا فعلا خايفه عليكم
الفكره اننا بنقول نشجب ومش عارفه ايه وبنضيع نفسنا وبنتريق على الحكومه علشان بتقول كده
عارفه انا فعلا مبخافش بس بخاف من سوء تصرف بعض الناس وتضيع نفسهم
دايما بحب فكره الظباط الاحرار فى تنظيمهم لان محدش قدر يوصل لهم فهمتى فكرتى

قوس قزح said...

طيب علشان ارد عليكى لى كام سؤال

هى مش كلمة شعبية يعنى خاصة بالشعب و الحكومة مالهاش دعوة بها بردو ؟؟

هى البنت حلوة ؟

هو بتاع الهيئة قريب حد مهم ؟