سلام مربع ..ومثلث ..ومضلع

ازاى بقى معرفش هو كده الاول صباح الفل عليكوا كلكم بجد انا مبسوطه جدا وعندى حاله انشكاح ومتأزحه بشكل محدش متخيله طبعا كنت رايحه لا مش اجيب اومو ههههههههه حفل توقيع الكتاب بتاع مشروع وطن او مدونات مصريه للجيب بما انهم بعتوا ليه وقالوا نزلنا لكى بوست (سؤال الى من لا اعرف) وطبعا ده من حبهم فيه وكنت حسه انى هطلع من هناك على لازوغلى على طول بدون مجهود كل اللى هيعملوه هيدبسوا البوست فى البلوزه بتاعتى وخلاص قضيه جاهزة المهم رحت وكنت مرعوبه عديت على سووو وكنا عاملين مفاجأه هنحتفل بعيد ميلاد لاحن واحلى وارق انسانه فى الدنيا فاتيما ام يوسف وروحنا على البورصه سبناها وبعدين رحنا المكتبه ولقيت ابو طويله خالو احمد الصباغ طبعا اول حد قابلته كانت الحله المندسه وهى داليا اهو ده عيبه وطلعت يا دوب غطاء زجاجه ههههههههههه مش حله خالص والسكر قوى ام دم خفيف شيماء الجيزى فظيعه بجد بخفه دمه وبعدين حكايات فريده وحنين بجد بقيت اشوف الناس وعاوزة اتنطط زى الاطفال من الفرحه اللى بشوفها جواهم وحساها جوايا لما بشوفهم قدامى وكان فيه واحده قاعده بعيد رحت سلمت عليها وقالت ليه هى مين بس مش هقدر اقول بس بجد هى مدونه جميله ومكنش نازل لها حاجه بس جايه علشان تشوفنا وبقولها ميرسى ليكى انتى بالذات وبعدين قبلت سكر اللى زى السكر بجد وقالى قولى انا مين بس عرفته بسرعه مش ذكاء طبعا كلا وحاشا وفاشا لا من الصورة بتاعته ههههههههههه وبعدين الواد سوو جاب واحده زى القمر وعنيها كلها حب وحنيه يقولى مين دى قولت له هو اليوم العالمى للتخمين قولى انتى دماغى مش مركزة قالى دى فاتيما مش عارفه بجد كل اللى حسيته انى فى حضنها وفعلا بقولها انتى احن حضن فى الدنيا يا ام يوسف وبعدين المفاجأة الاكبر وبرضه سوو عملها ليها مش عارفه الواد ده ناوى على انه يجيبى هارت اتاك اليوم ده لقيته بيعرفنى بشخص آيه فى الجمال الربانى شخص تبص له تحس براحه نفسيه وهدوء لالف سنه وتحسه حاجه منك ومن جواك انا تنحت وازبهليت قالى ده بابا ابو خالد بقيت مش قادره وعنيه هتدمع بجد انا والله بشكره من كل قلبى انا كان هيوقفه هههه قصدى انه اسعدنى وجه وعلشنا كلنا وبعدين اسلام حبيبى اللى كان تايهه والحمد لله وصفت له الوصفه سهله الوصفه هايله وكان نفسه يضربنى بس سوو لحقه فى التليفون وقاله المكان فين ...عادى قولت اهزر معاه واتوهه ههههههههه وطلع والناس بتسلم علينا وهو مكسوف قولت له يعنى جيباك تقف جنبى فى كسفتى تتكسف انت ههههههههه وبعد كده جت جارتى العزيزة قوس قزح اللى بجد بشكرها من قلبى قوى لانها بصراحه جايه علشانى وعلشان تشوفنى ولسانها اللى فالت منها دى هههههههههه فظيعه بس قمر وسكر ربنا يخليكى يا ام نور والمفقوعه مرارتها طلعت فيفى حماتهاا جبارة لان البنت رقيقه موووووت بجد ورئيسه حزب الاحلام النايمه طلعت صاحيه خالص ولماضه ماسكه بيبسى كانز اكبر منها ههههههههههه بس سكر يا عينى بحسها مخضوضه على طول كده والمفاجاة اللى اتسمرت طبعا قدمها استاذ/عصفور المدينه بجد شخص ربنا يبارك فيه جميل والابتسامه مش بتفارق وشه بكل حب للناس زى ما تعودنا منه فى المدونات وسلمت من بعيد عليه وانا كلى رهبه وخوف مش عارفه ليه بس علشان اول مرة اشوفه بس هو حد جميل جدا وم/احمد كمال اللى شوفته فى الاخر وانا بقعد بعد معاناه وكنت وقعت من هدومى خلاص وبقيت شبه الكلب اللولو خالص واتبسطت بيه اوى وقالى انا صاحب مدونة رحايا العمر بس خلاص كنت جبت اخرى اسفه يا بشمهندس معرفتش ارحب بحضرتك كويس والله
وكان فيه بنوته واقفه لوحدها كده بعيد منقبه بعت العسس بتاعى اللى هى رودى بنوته مصريه بما انها جت ولزقت بنتها فى وشى ههههههه لا بجد لان نور بتحبنى فانا اخدتها ومرضيتش تروح لحد كتير كانت بتروح للناس وترجع ليا تانى هقولكم مش حب فيه بس بتعاكس اسلام هههههههههه المهم رودى راحت سالتها انتى مين قالت لها انا مدونه بتاعت الزواج روضه الحب انا رحت اسلم عليها وقولت لها انا مين بجد البنت قمه فى الرقه والاخلاق والهدوء وكانت مبسوطه قوى وانا بتعرف عليها وكنت حسه انها حضنانى وهى مساكنى من ايدى وانا شايله نور طبعا على قلبى بس بجد ربنا يبارك فيها ويكرمها على اخلاقها الحلوه وجمال روحها اللى شوفته منها وناس كتير قوى وحكايات فريده شوفتها تحسها فعلا فريده هانم كده مش عارفه ليه واوشه مكان فى القلب ناس كتيرررررررررررر لهم فى الكتاب وناس لا
بس جم يقعدوا ويتعرفوا علينا وفهد من غير الشيخ طلبه هههههههه قولت احسن بدل ما اضربه ومصطفى ريان وهانى واحمد مبارك ودكتور حر بجد وكمان صاحب المضيفه اللى عرفنى بنفسه وطلع عكس ما اتصور خالص هههههههه بس منتهى الاخلاق بجد ....عندىبنزهير ومش هقدر افتكر كل الناس بس بجد بشكرهم كلهم لانهم خلونى فرحت مرتين اول حاجه انى شوفتهم وتانى حاجه حسيت كلهم فرحانين ليه بخطوبى وكأنهم اهلى حتى اسلام يقولى كل واحد يجى يسلم يقولى خلى بالك منها الله مش بيقولك ليه خلى بالك منه اشمعنى يعنى انا هههههههههههه وزعل علشان اول توقيع على كتاب مش ليه بس انا بقوله من هنا يا اسلاام يا حبيبى انت وقعت قلبى فى رجلى من اول يوم شوفتك فيه ومن ساعاتها مش لاقين بلدوزر يشده لفوق تانى ومتزعلش منى ما انا قلبت لك الكتاب كراسه وكتبت لك فى كل حته فيه حاجه هههههههههه وابقى قابلنى اذا عرفت تقرى منه حاجه اصلا لا بجد وجودك معايا فرق كتير قوى وكلكم وجدكم معايا غير مودى والاكتتاب اللى كان عندى من الناس الوحشه ورحنا على البورصه بعدين واحتفلنا بعيد ميلاد ام يوسف فاتيما ونور بنت رودى جرت الناس وراها هههههههه من شقاوتها ربنا يحميها يا رب ويخليها لمامتها


وحبه فضايح:-
لقد قام كل من المدعو سووو والمدعو احمد عبد العال الصباغ سابقا بنسف كل مخلفات التورته ههههههههههههه وتحويلها للخلاطات الداخليه عندهم وغلبت سوو معايا فى التورته اقوله مش عاوزة دى هات دى ودى صغيرة وفى الاخر قال لاسلام ما تسكت خطيبتك يا عم قاله براحتها سيبها ههههههههههههههه وكانت اول مرة طول اليوم اسلام ينصرنى بما انه كبسنى من الاول قدام الناس بهزار طبعا
محمود الدوح صاحب مدونة احنا وهما كان بيمضى للناس على الكتاب ليه مش عارفه مع انه مش مشارك

انا بقى كان كل ما حد يقولى امضى ليه مش عارفه اكتب له ايه وكلهم سالونى عن خرفانى الناس دى غريبه هما مش كانوا شايفين وسط البلد مقفوله ازاى دا انا كنت ركنها صف تسعتاشر ههههههههههه وبيلعبوا علشان كده مشيت بسرعه علشان مينطحوش الناس
بجد بشكر كل اللى كانوا موجودين خالد همس الاحباب ؛ميرا امرأة بعقل رجل، الشاعر اللى جه من المنصورة مخصوص،يونيك البنوته الرقيقه، هيثم الدهشان ،هانى جورج،استاذنا الكبير احمد يوميات عيل مصرى، ادهم ابو اياد وده صديق لنا فلسطينى واشتريت له الكتاب على حسابى وعملت له اهداء لكل فلسطين اللى بدعى لها من قلبى ان ربنا يخلصها من اللى فيها
وكلاكيت هانم اللى هى تانى وتالت اللى جت علشانى مع انها كانت ضاربه بوز مش عارفه ليه باين خروف نطحها. وكل الناس اللى شوفتهم ومعلش نسيت الاسماء كتير علشان كنت عامله زى البيبى الفرحان قوى بوجدكم كلكم ووجود اسلام معايا وحسيت انكم عيلتى وبشكر محمود رئيس جمهوريه نفسى المحامى بتاعى اللى هيجيب ليه اعدام عند تخفيف الحكم هههههههههههههههه ووزة انين الحزن حبيبتى اللى كلمتنى فى التليفون بجد بحبكم كلكم ومبسوطه بيكم ومحدش يزعل منى لو نسيت اسماء بجد وكان نفسى ناس كتير قوى غاليه على قلبى وعقلى تكون موجوده بس مقدرة ظروفهم اكيد اللى بره مصر واللى جوه بس برضه بعيد بس بقولهم كلكم كنتم فى قلبى وعقلى

على الهامش حصل مشاده كلاميه بين حد مش عارفه هو مين اصلا وليه جه اليوم ده مع احمد مهنى اللى من ضمن المسئولين عن اصدار الكتاب بخصوص البوست بتاعه وكان ممكن الراجل يتكلم بهدوء اكتر بس فى النهايه ولا وصل لحاجه وكان احمد قدم اعتذار قبل كده عن البوست بتاع البنت المغتصب لما حتى اتكلمنا معاه مباشرة بس واضح ان كان فيه ناس مش عاوزة توقف الموضوع عند كده والمشكله انه متكلمش بموضوعيه ولا احمد رد الا بالاعتذار علشان فيه تعبرات خانته فى الموضع لما كان بيكتبه ووضح لنا انه راح بلغ الشرطه بتاعت المترو وهما قالوا له هنتصرف انا بصراحه مسمعتش الحوار لانى كنت هفطس من الحر وواقفه مع اسلام بره خالص بس سمعت عن المشكله وانهم صفوها بعد الحفله من الناس اللى قعدت احمد من ضمن المجموعه الكبيرة اللى مسئوله عن الكتاب بس فى النهايه دار النشر هى اللى بتقرر ايه يتنشر وايه لا

ملحوسه نونو :- فيه صور عند الصباغ للى عاوز يشوف بس يبقى يغمض عنيه هههههههه وهو داخل مدونة خالو احمد الصباغ

كان معكم اسعد واحده فى الدنيا بجد سعيده هانم هالو آبى هانم بتنجانى المكسوفه خالص