قالوا محافظه ورضينا .. طيب بيتنك ليه

يعنى بجد تسلل لاحداث حرقه الدم اللى عايشين فيها ومش فاهمه ليه كده لدرجه انى جالى هطل على بلاهه على غباوة مفيش بعد كده انا بقف قدام المرايا وبحط شعرى على عينى ومش عاوزة اشوف نفسى وبلبس مش قدامها من اللى بيحص لنا وبجد قررت كل يوم مش هقعد قدام التليفنون الاختراع الخزعبلى ده علشان متحفش بوش معتز الرخم ولا الاقى منى هانم الشاذلى بعد اللى حصل للمصريين فى السودان جايبه موضوع طويل عريض عن السودان وبتقولنا روحوا هناك يا حلوين العبوا مع الاسوده يعنى بيطفشونا من البلد بالذوق انا قررت خلاص اخد زامبتيكا كل يوم وانزل اقعد فى الجونينه تحت البيت قبل ما المحافظ يشيلها واعمل كوبيتين شاى ليه وهى كده اتنين معرفش ليه وزجاجه ميه واشغل اغانى وابقى من الاقليه الصامته
قالوا هيعملوا محافظه حلوان وبعد ما كانت القاهرة الجديدة اللى كلها ناس كلاس وشيك وفيها جزء بسيط متوسط بدل ما تبقى تبع العاصمه بقت محافظه حلوان قولت مش مهم انا بطاقتى مدينه نصر اصلا
طيب قولت كويس وبصيت لها نظرة تانيه يمكن لما يعملوا محافظه بيحلوا مشكله بطاله وهيشغلوا شوباب البلد وشوبات البلد وتبقى حلت مشكله البطاله ومرضيتش ابص لها من زاويه وهشه وكخه ولا نظرة قله من قللى المندسه وافترضت افتراضا النيه الكويسه
وبعدين قولت خلاص خليها حلوان واربطها فى رجل السرير وانا نايمه بدل ما اصحى الصبح الاقى نفسى بقيت فى الصعيد وهو مش عيب ما الارض كرويه بتلف حولين محور ميدان لبنان عاتى يعنى
قوم ايه السيد المحافظ يقول ايه للصحفيين
مدير مكتبي سيرد علي استفساراتكم..ولا تتصلوا بي بعد التاسعة مساء
يعنى لو المحافظه ولعت ملوش فيه اتحرقوا معاها وعين مدير لمكتبه من يومين وكمان الاستفذاذ ايه بقى
وأضاف القويضي تصريحاته التي أوردتها صحيفة المساء والتي قالت إنها صدمت الصحفيين : إنه لا يحب الاستماع لشكاوي المواطنين إلا من خلال أعضاء المجالس الشعبية المحلية وتعلل بأن الوقت غير كاف أمامه للاستماع إلي مشاكل الناس علي الطبيعة وأنه يريد الوقت الكافي للتعرف علي المحافظة والأجهزة المختلفة وتكوين الهيكل الإداري لها.
طيب والله همسك لسانى خلاص علشان الناس اللى خايفه عليا بس يعنى ايه من خلال بتوع المجالش الشوعبيه دى هو ناسى ان دول حزن مستوطن على قلوبنا
يعنى هيعملوا لصالحهم ومش مهم الناس طيب ما يقبل الشكاوى مباشرة زى اى بلد وتتعرض عليه ليه يحط ستارة بينه وبين الناس بقولكم ايه ده حقنا وانا لو قدمت شكوى هروح له مكتبه يا لهوى ده حق من حقوقنا ما انا لما بيحصل مشكله عندنا بروح لرئيس الجهاز علشان احنا تابعين ليه مباشرة يعنى كل مكان وله اختصاصه
والوقت غير كافى فعلا الراجل بينام الساعه 9
شوفتوا المسلمين وصل حالهم لفين سيدنا عمر ابن الخطاب مكنش بينام علشان الناس وخايف يسأل عن حد فى مكان تانى طيب نام نينه هووو يا بيضه
طيب عاوز يتعرف على المحافظه يعنى ازاى هو هيخطبها طيب والله مديينه اشيك اماكن المعاتى وحلوان والقاهرة الجديدة والشروق اماكن نظيفه والجهاز بتاع المدينه مظبطها جدا بس المشكله فى الناس اللى بتبوظها بصراحه
عاوز يعمل هيكل ادارى طيب حقك معندناش مانع والله بس يا ريت يكون عادل او امين اى اسم يعنى وتوظف ناس بقولك ايه ما تروحوا تقدموا كده فى الوظايف دى يعنى لو اعلنوا او مأعلنوش ونتنح كده يمكن تجيب فايده
بصوا كده كفايه انا لو قعدت اكتب من هنا لبكرة فى حركه الشلاليت اللى بتحط على قفانا من هنا لبكرة مش هيكفينى المدونات اللى جنبى كمان
ربنا يرحمنا برحمته ويشيل عن قفانا الناس اللى متنكه دى
والله ومن عندى اديله فرصه يظبط لو بقى طلعت التناكه دى على الفاضى يبقى يا رحمن يا رحيم على المناطق الجديدة ولو على المليان والنبى هرفع له شابووه تحيه واحترام منى واكتب فيه من هنا لبكرة
بس عاوزة نشوف موضوع الوظايف ده واللى عنده معلومه يقولها

ملحوسه نونو من واحده مكسوفه :- بجد اسفه للناس اللى اتعصبت عليهم علشان عاوزين اعدل حاجات فى البوست اللى فات واللى كانوا بينصحونى معلش اعصابى تعبانه ومش متحمله وانتم شايفين الضغط العصبى اللى احنا فيه وعارفه انه من منطلق الخوف بتاعك م عليا ربنا ميحرمنيش منكم كامى متزعليش منى بليزززززززز انتى حبيبتى وانتى عارفه

كان معكم مفروسه النوسه كونوسه آبى هانم وبرضه مش هخاف