هرتل مع اميريكان دبلوما


صباح الخير عليكوا
بنت خالتى امريكان دبلوما مدارس لغات فاضل لها تو ليلفيل وتدخل الجامعه زى ما هى عاوزة امريكيه مصريه بتنجانيه مش مشكله
المهم الدراسه عندهم حلوة قوى ومش مرهقه خالص ولا بحس انها بتروح المدرسه بتجر وراها مكتبه زى الاطفال يا عينى اللى بشوفهم بتوع المدارس الحكوميه
وكمان فى الكلاس هما خمسه هى وزمايلها لان الامريكان دبلوما شويه غاليه لانها اتناشر مستوى من بعد ابتدائى على تيرمات مش زى السنه الدراسيه العاديه وبعدين بتروح المدرسه الساعه عشرة وترجع واحده او اتنين بالكتير
حلو كل ده والبنت هايله بسم الله ماشاء الله فى الانجليش والفرنساوى كمان
وبما انها هى واختها وهما كانوا فى السعوديه كانوا مدارس بريطانى فالبنات حلوين فى اللغات جدا.
ومن هنا جت الكارثه ..استنوا بس اه بجد كارثه كنا من يومين بنلعب لعبه من سيربح المليون على الكمبيوتر وبقت بضحك لغايه لما عنيه بدمع ليه بقى البنت مش عارفه تقرأ عربى يعنى بتقرى الكلام غلط خالص وتقوله بطريقه تموت من الضحك بجد
هى المعلومات صعبه انما القرايه نفسها مش عارفه تقرى ولا كلمه صح
قعدت بعد الضحك ده كله اقول لطنط ازاى ساكته كده دى فضلها اقل من سنه وتبقى فى الجامعه اصلهم نظام الدراسه غريب شويه قالت والله مش عارفه اعمل ايه
المهم الكارثه الاكبر
فى الامتحان جالها سؤال فى علوم او عربى ايه تاثير التدخين على صحه الانسان وبيعمل ايه فى الاجهزة
فالبنت عاوزة تقول انه بيدمر الرئه او بيعمل دخان عليها نسيت كلمه الرئه بالعربى وفاكرها بالانجليش تصوروا كتبت الرئه ازاى هى نسيت اساسا ان دى اسمها رئه كتبتها كده ....... لااانج)Lung
كتبتها بالفرانكو آراب
وطبعا طنط بتراجع معاها اكتشف العبقريه بتاعت بنتها الفذه ههههههههه اللى هى طبعا طالعه ليه بحكم انى بنت خالتها ههههههههههخخخخخخخخ
طبعا مش هننكر ان التعليم اللغات هايل وشيك وبيدل على تحضر لانك بتعرف لغه بلد تانيه وافضل بكتير من التعليم العادى الحكومى اللى انقرض اصلا وبقى زى ام اسماعيل وهى قاعده تزغط البط مفطسه الولد ولا البنت تحت رجلها وبتحط المعلومات فى دماغه بالعافيه وتشربه وراها توكسفين باليه علشان يحبس المعلومات
انا اصلا تعليم الايصال الاحمر عارفينه طبعا المجانى يعنى بس ايامى كان فيه مدرسين فعلا محترمين وتقريبا الموضوع بيقف على المتلقى (شوفتوا بكلمكم بالفصحى علشان متفتكروش انى زيها بينى وبينكوا انا انيل منها حتى فى كلامى زى الاطفال شويه ههههههههه)
فى المدارس بجد التعليم له جانبين الطالب والمدرس يعنى طالب كويس من غير مدرس كويس يبقى مينفعش ومدرس كويس من غير طالب عاوز يتعلم صح او يأخد المعلومه ويفكر فيها ويجتهد ويذاكر بس علشان الامتحانات وده حال الاغلبيه يبقى ملوش لازمه
انا اخدت كوراسات انجليزى بعد ما خلصت خالص بس الحمد لله من البدايه كان تاسيس صح من مدرسين اللى بحبهم وبحترمهم لغايه دلوقتى فى المدرسه مش دروس خصوصيه ولا دروس لتسهيل الدرجات لان ده اللى بيحصل دلوقتى خد درس علشان تنجح مش علشان تقوى معلوماتك لانى مأخدتش غير فى ثانويه عامه بس
وطبعا فى ظل الحياه الغريبه اللى مشقلبه وماشيه بقفاها اليومين دول كل ما نلاقى اعلان وظايف يقولك مطلوب مش عارف ايه يجيد اللغه وساعات بيكون عامل بوفيه والله متضحكوش هههههههههه
ليه معرفش بس هو كده مع انى اشتغلت فى شركه كانوا طالبين حد لغات شرط اساسى واشتغلت فيها سنه والله كنت بكلم نفسى بس بالانجليزى وقولت كفايه عليه ههههههههه يعنى مش استخدمته بس من منطلق ان الواحد صاحب الشغل يتفشخر ويتبهوأ باللى بيشتغلوا عنده انهم لغات وخلاص
طيب المشكله دى وعارفنها نعمل ايه بجد انا اقترحت على طنط انها تجيب مدرسه عربى للبنت
طبعا هى الحمد لله تقدر بس فيه ناس ممشيه اولادها فى مدارس اللغات بالعافيه اكيد
علشان المصاريف والبلاوى الحمرا والصفرا اللى حصلت وبتحصل
يبقى الحل علشان مش عبأ مدرس كمان تحاولوا تسعدوهم فى البيت جامد فى العربى ركزوا عليه انا عارفه انها بتكون فرحه وحاجه تخلى الواحد يتأزح من الفرح اولاده يتكلموا لغات ومن هما بيبى كده بس برضه متنسوش ان العربى مهم جداااااااا
لانه لغه القرآن وغير كده لغتنا احنا المصريين

حاجه تانيه كمان لازم نزرع فى الاولاد وهما صغيرين او حتى دلوقتى ان التعليم ده تحصيل معلومات مش شهاده تتحط على الحيطه وخلاص سواء هيدخلوا لغات او حتى حكومى اللى ربنا محيرهم فى سته ونظام الثانويه بجد بقوا محسسينا ان الاتنين دول زى اخواتهم بس من ام تانيه يزعلوا يشيلوا سته يتصالحوا يحطوا سته ونفس القصه مع الثانويه وكلنا معترفين ان التعليم فى مصر فاشل فاشل يا ولدى بس لازم ننقذ ما يمكن انقاذه
بجد بنت خالتى لها اختين اكبر واصغر نفس المشكله الكبيرة اتخرجت برضه من اللغات وبتشتغل مدرسه انجليزى فى مدرسه خاصه بس خط التلات بنات نكش فراخ ولا تفهم له هو هيروغليفى ولا عربى طبعا فى العربى
انما الانجليزى رسامين فيه وخاصه رنا اللى هى الوسطانيه دى وممن تقولها على اى موضوع فى الدنيا بس تكتبه بالانجليزى مش العربى
خلوا بالكوا من الموضوع ده بجد مصيبه
واكيد احنا مهما كانوا بيطلبوا موظفين معاهم لغات لازم برضوا نعرف عربى حتى علشان اصول دينا واربطوا اللغه العربى فى رجل اولادكم
بدل ما تصحوا الصبح تلاقوهم ناسين هما فين ولا البلد بقت لغات ونحس اننا غرب فى بلدنا
كان معكم مدرس اول لغه عربيه بى ام دبيلوا آبى بتنجانى

108 اخبط وقول رايك:

لورنس العرب said...

صاحب الشركه اللي انا بشتغل فيها خريج الجامعه الأمريكيه، نفسي تشوفي خطه وهو بيكتب عربي، اقسم بالله ولا عيل في ثانيه ابتدائي بالكتير، لكن العيب مش عليهم، اعيب على البلد اللي تخلت عن اللغه، من 3 سنين قرأت أعلان وظيفه للبنك الأهلي، وكان مكتوب في آخر الاعلان مربع بالعرض فيه حرفيا " خريجي المدارس الحكوميه يمتنعون" وده بنك حكومه، ومش عاوز خريجي المدارس الحكومه، وباستمرار أي حد طالب موظفين انشالله حتى في دكان سجاير عاوز واحد قنبله في الانجليزي، على الرغم أننا تقريبا لا نستعمله إلا نادرا أو في بعض المصطلحات العاديه اللي ممكن الواحد ياخد عليها بمرور الايام،لكن لا أعرف ان كانت عقده أو منظره او ايه بالظبط، نا كنت لسه هاكتب موضوع عن حاجه مشابهه، لن فعلا انا مرارتي مفقوعه

Hook said...

نفس المشكلة مع واحد صاحبي...
ربنا يستر...يعني هو تعليم كويس من غير أو تعليم زبالة بالعربي؟
ده ايه المرار ده؟

رئيس جمهوريه نفسى said...

الست ابى بيتانجان
المشكله مش فى كده اولا علشان نعترف نظام التعليم المصرى بيقضى على ناحيه ابتكاريه عند الطالب مجرد حفظ معلومات وكان الله بالسر عليم احفظ احفظ وبعدين اكتبهم فى الامتحان وانجح بس انت استفدت ايه مش مشكله
موضوع الامريكان دبلومه واى تعليم اجنبى المشكله انى المقررات بتعتهم بتيجى من الدوله المنشاء الى بيتبع ليها نظام التعليم وطبعا حتى لو اتقرر العربى بيبقى زى الرسم فى المدارس الحكوميه مالهوش اى تاثير على الطالب او ماده هامشيه وده بيطمس بكل صوره اى انتماء للطالب للغه العربيه لانه بيتعامل فى المدرسه باللغات وفى الدروس باللغات وفى المقررات لما يذاكر باللغات ولو مكنش فى البيت يهتموا بتنميه اللغه العربيه بتبقى كارثه لانى اللغه اول مظاهر الانتماء لدى الفرد ولو معرفهاش ممكن بتنطمس اى مظاهر انتماء لديه ناحيه بلده الام
وعلى فكره المناهج دى بتبقى موجهه لكده طمس الانتماء لانى كمان للاسف فى الامريكان دبلومه بيدرسو تاريخ امريكا ومش بيعرفوا حاجه عن تاريخ مصر
انا مع تعلم للغات والحمد لله بتكلم صعيدى كويس جدا زى ما انتى عارفه

الطائر الحزين said...

بلسان عربى مبين

ليس عيبا تعلم لغات أخرى لكن الاصل ان نعرف لغتنا اولا وهذا عيب أخطر من أن نعرف لغات الأخر ولا نعى لغتنا


ومن أجل هذا اناشد الجميع أن يكتب لفظ تدوينة بدلا من بوست

قل تدوينة جديدة ولا تقل بوست جديد

Abo 7anf said...

طب الحمد لله أنهم بيعرفوا انجليزى
أه أحسن من الدخل مدرسه حكومى وطلع ولا عربى ولا أنجليزى
وخطه بردوا نكش فراخ
التعليم الحكومى خلاص معدش ينفع ببصله
لان مفيش مدرسين بيرحوا بحكم أن عندهم حصه فى الدرس
والاولاد هما البيخدوا الدرس
ومساله الخط دى فكرتنى وانا صغير
مش صغير قوى فى الثانوى العام
المفروض انى كنت شاطر جدا بس خطى العكس تماما
فأخدت درس خط
عادى يعنى
وبعدين ايه فى البلد أحواله أتصلحت لما التعليم يتصلح

tamer.sala7 said...

الموضوع ده بقي منتشر اوي مش بنت خالتك بس هي اللي عندها الكارثة دي

عندنا في الشركة طالبين مؤهل عالي ويجيد الانجليزية والكمبيوتر بطلاقة للعمل في قسم الامن سيكيورتي يعني

مع العلم ان مدير الشركة اصلا لغاية دلوقتي مأخدش البكالريوس

Miss. Sosa said...

آآبي الجميلة
والله مشكلة خطيرة واعرف ناس كتير كدا
ومرة قابلت حالة انيل من اللي بتحكيه ده ياريت علي الخط ونكش الفراخ ده
طز في اللغة العربية المشكلة انها لغة القرآن
مرة قابلت واحدة بقى من النوعيات اللي بتحكي عنها وكانت مش بتصلي
فبقولها ليه قالت علشان مش حافظة قرآن
ومش حافظة قرآن ليه قالت علشان مش بعرف اقرأه البنت ديه كانت في بكالوريوس علي فكرة مش طفلة
فبلاش هقدة الخواجة ونفرط في تعليم اولادنا لغات وننسي العربي اللي هو لغة القرآن وبعدين نطلع شوية مسوخ لا لهم اصل ولا مرجعية

تقبلي تحياتي وتقديري

واحدة مفروسة said...

بؤبؤ ازيك يا قمر
ماقلتليش البتاع الريدر اللى انتى عاملاه على ايدى اليمين و انا داخله عاملاه ازاى؟
المهم خلينا فى موضوعنا ..بصى يا جميله كل المدارس الانترناشيونال...العربى بتاعها بيبقى بالزق....و بعدين ياريت بينقوا مدرسين عدلين فى العربى علشان العيال تحب اللغه
انا اعرف ناس ولادهو مابيحبوش العربى ...ليه؟ لان المدرسه بتزعق و بتشتمهم و تقولوهم يا حمار و يا حماره
اغفلت تلك المدرسه ان الاولاد لابد من ان تتعامل معاهم بطريقه مهذبه
مع انهم يا حبايبى بيحلفوا بالمدرس بتاع السنه اللى فاتت اللى ساب المدرسه و كان وا بيحبوا العربى جدا و الدين و كانوا بيتباروا بالحفظ والمذاكره
السنه ديه بيقولولك مش حنعمل الدوفوار...ليه...؟علشان احنا مش بنحبها...و اخرتها حتزعق حتزعق....
المدرسين نفسهم عليهم عامل فى ان الطالب يحب الماده بغض النظر التعليم مكسح بس هوه ممكن يبتكر و ده فى حد ذاته مهمة المدرس مش بس ..يدخل الفصل يطرش المنهج و سلام عليكم عليكم السلام....لازم يبتكر و يدور ازاى يحبب التلمذه الماد بتاعته

انا طولت معلش اصلى بحس ان التعليم ممكن يتطور بينا احنا...افصد المدرسين مش الحكومه...

.:.-=- ELGaZaLy-=-.:. said...

انا مش شايف انها مشكلة تماما بنت خالتك هاتشتغل احسن شغلانة وان كانت الارض بتتكلم عرفى فالعالم كلة بيتكلم انجليزى...

والمشكلة مش فى خالتك ولا فى بنت خالتك المشكلة فى شغب كامل بيحقر لغتة وبيحتقر تعليمة وعندة كمية نقد ذاتى وكمية عقد نفسية غريبة بنت ,.,,,وللا بلاش,,

فصدقينى مش مشكلة...

الربان said...

تحياتي

هذه واحدة من المشاكل التي تواجه جريجي اللغات...

من فترة كتب احد الاشخاص انه ذهب الي ادارة التجنيد دفعة مؤهلات عليا...
الادراة وزعت عليهم استمارات يملؤوها
بعد ما خلص استمارته...فوجيء بزميل اخر بيقول له ممكن تعبي لي الاستمارة الخاصة بي....فاستغرب و قال له..هذه
الدفعة خاصة بالمؤهلات العليا فقط..
رد عليه الاخ و قال انا عارف انا مؤهل
عالي لكن خريج الجامعة الامريكية و مش عارف املا استمارة التجنيد الخاصة بي.

اعتقد ان مثل هذه النظم التعليمية ضروري ان تعطي اهتماما اكبر باللغه العربية...

تحياتي و تقديري

funckydoctor said...

تعرفى وأنا فى ابتدائى كنت باتكلم لغة عربية فصحة فقط كان الناس بتتريق عليا
كنت شاطر فى النحو والصرف والكلام ده
لما بقيت كويس فى الإنجليزى ربنا مشاها معايا وانعلمت أنطق كويس جدا برده الناس اتريقت على النطق أصلهم متعودين على الإنجليزى المصرى
فأنا شايف انها كده اتعلمت لغة كويس أحسن ماتبقى زى المصريين لا يعرفوا عربى ولا حتى انجليزى.
وصبح صبح

gehad_fci said...

المفروض يعني ان احنا عرب يعني اللغه الام والاب كمان العربي وبعد كدا بقي نتعلم العنجليزي ولا لازم يعني ننسي اللغه بتاعتنا
طيب لو احنا محتلين الاستعمار بيفرض علينا لغتهم
دلوقتي احنا بنحتل نفسنا بمزاجنا
ياجماعه النبي عربي وبلاده عربيه
حافظوا علي العربي شويه

عاليا حليم said...

انا كان ليا تجربة لمدة شهر واحد بس فى مدرسة دبلومة امريكية الى انتى كتباه ده شوية يا بنتى انا قابلت هناك ولد فى اولى اعدادى مش عارف مولد النبى و لا عارف العرايس الى بتتحط فى الملات بالمناسبة دى محطوطوة كده ليه

انا قلت للمديرة و تكالى على الله و كانت النتيجة انها مشتنى بصنعة لطافة

قلتلها انا مش اتعامل مع الى هنا دول على اى اساس لا هم مصريين و لا امريكان هم جنسية غريبة مالهوش شخصية

ارجع و اقولك لو كان نظامنا التعليمى بخير ما كنتش الدبلومة الامريكيىة دخلت البلد

---------------

على فكرة انا زعلت اوى انى محضرتش التجمع معاكم يوم البرصة كان نفسى اجى والله و كنت عايزة اشوفك و اتعرف عليكى أبقوا اتجمعوا بدرى شويةهههههههه

arsenalwy said...

فعلا ابى

المشكلة بتبان بعد كدة بعد ما يدخلوا جامعة مصرية بتبقى كوميديا ياخبر

ناس زمايلى كوميديا والله كوميديا السنة بياخدوها فى اتنين وضاعين فى العربى ضايعين بجد بس عادى بشوية تعب كله بيبى تمام


مستنى اقتراحك على البوست الجديد

وادعوكى لوضع لوجو حملة وقف تصدير الغاز الى اسرائيل

ودة اللينك بتاع اللوجو
http://www.zshare.net/image/12105759293805bb/

محمود المصرى said...

بسم الله الرحمن الرحيم

بصراحة يا آبى الموضوع دا خطير جدا , ونفس الكلام اللى بتقوليه عن بنت خالتك دا انا شفته فى ابن عمتى , الواد فى تانية ابتدائى وما شاء الله ممتاز فى الانجليزى , بس ابيض فى العربى , بسأله اخدتوا ايه فى العلوم بيقولى اخدنا البلانت , بقوله بيتكون من ايه البلانت دا قالى من روت وستيم وليف , بقوله يعنى ايه روت , قالى الحتة اللى بتكون تحت الارض , ايوة يعنى اسمه ايه بالعربى , مش عارف .
قلت دا واد فاشل اسأل اخوه الصغير , اخوه فى كى جى تو بقول اتنين زائد اتنين بكام يا احمد , الواد متنحلى فأخوه قالوا تو بلاس تو , الواد جاوب علطول فور
وهو مش امريكان دبلوما ولا حاجة دا مدرسة لغات , وفعلا التعليم الاجنبى بالطريقة دى مدمر , علشان كده لازم يمنع تعليم اللغات الاجنبية للأطفال فى المرحلة الابتدائية , كلنا مادرسناش انجليزى فى حضانة ولا فى ابتدائى واخدنا كورسات بعد ما خلصنا وبقينا زى الفل , ايه بقى لازمه ان الواحد يعوج لسانه من وهو عيل صغير ومايبقاش عارف يقول كلمتين عربى على بعض , وياريتهم بيدرسوا لغات فقط دول بيدرسوا المواد كلها باللغات ,ناقص يدرسوا العربى بالانجليزى كمان .
ربنا يستر

A.SAMIR said...

اهو دة اللي بيطلق عليه
شر البلية ما يضحك
اللغات جميلة ومهمة بس يرضة بتبقى مستفزة جدا لما الواحد يلاقي مصري مش عار ف يتكلم عربي
عموما اسيبك بقى احسن الهارت بتاعي تاعبني
تحياتي

MKSARAT SAYED SAAD said...

بالعربي ايه يا بنتى
اذا كان هي بتتعلم في اماكن مش معترفه بالعربي
المفروض فعلا ان البيت تكون اللغه الاساسيه فيه بالعربي لأنها لغتنا بس في الاغلب بيتكلموا مع العيال بالانجليزي ويسلام لوفي قرايب كمان يبقة اسخك وادل

قليل اللي بيعمل اللي انتى عايزاه يا ابى
تحياتي
صاحب المكسرات
سيد سعد

appy said...

لورانس العرب
===========

ههههههههه متخيله الخط هى مش عقده هو كويس اننا نطلع على ثقافات تانيه بس العيب انها تبقى الاساس يعنى الفرنساوين بيعتذوا اوى بلغاتهم ليه منكونش زيهم
وسلامتك من فقع المرارة يا قمر وكسبت معانا مسابقه اول تعليق ههههههههه كيبورد انجليزى هههههههههههههنورت الكوكب




hook
======
لا مش زباله احنا العيب فينا كمان بجد لاننا بنهتم بحاجات على حساب حاجات تانيه
نورت يا هووك الكوكب

appy said...

رئيس جمهوريه نفسى
===============

اهلا يا ريس شكلك هنتخانق ولا ايه استنى اركن فى جنب اقرى ما انا عارفه انت عامل زيك الشريك المخالف ههههههههههههه
لا يا محمود المقررات زى العادى هى بتختلف فى حاجات بسيطه وعلى فكرة المدرسين مصريين مش كلهم بس الاغلبيه المشكله انهم بيهمشوا حتى الاولاد بيبقى تركيزهم على الانجليش اقوى هى بتختلف فى النوفل بس او القصص وعموما هراجع الكتب واقولك هههههههههه لانى شوفت بعضها
بس هى فكرة التعليم لازم عموما تظبط فى الجانبين حكومى او لغات وحتى الاطفال لازم تتغير عندهم النظرة للتعليم
فلت منى يا ريس يالا ما علينا ههههههههههه





اخى الطائر الحزين
=================

لااااااااااااا بجد مش مصدقه نفسى حمد لله على السلامه بجد بلوج سبوت نور خالص تانى
وكلامك مظبوط طبعا
وننشرها الكلمه دى بس مفيناش من كروته فى الحكم هههههههههههههه ارجع تانى مستنياك

appy said...

ابو حنف
=========

ههههههههههه والله كلامك صح بس ليه لا مش نصلح من نفسنا زى ما انت عملت يا بتاع نكش الفراخ انت
وبلاش الياس لكل حاجه حل بس ندور ببساطه
نورت الكوكب كله يا زملكاوى يا حزين ومش عارفه ليه





تامر صلاح
=========

ههههههههههه مش يمكن بيجيلكوا ارانب قصدى اجانب ههههه علشان كده والله بص اللغه مطلوبه عادى بس مش اوفر يعنى واحنا نطور من نفسنا بنفسنا بس مش على حساب حاجه تانيه
نورت يا تامر

appy said...

Miss. Sosa
==========

يا نهار ابيض دى مصيبه متحركه على الارض طيب لو تقدرى ساعديها وحفظيها انتى لان حرام عليها ومش فاهمه ازاى اهلها عملوا كده
نورت يا ميس خالص





واحده مفروسه
==========
هاجيب لكى اللينك فى مدونتك هو من عند مهند الباحث عن الحقيقه
وكلامك صح المدرس عليه عامل
انتى عارفه بنت خالتى التانيه بتشتغل مدرسه وبرضه بطيخه فى العربى وربنا يستر ههههههههه نورتى يا مفروسه هانم

appy said...

.-=- ELGaZaLy-=-.:
==================

لا طبعا مشكله كبيرة اه التانيه اشتغلت كويس ومدرسه بس برضه ازاى نصحى من النوم نلاقينا انقرضنا من لغتنا يا نهار اسكت يا راجل متقولش كده هههههههههه عيب عليك
نورت الكوكب كله




الربان
=========
طيب ده ينفع بالذمه متخيله شكله ده لو دخل الجيش والله حلو انك تكون بتعرف لغات بس المشكله فى استخدامها خالص علشان كده بقول نخلى بالنا منها بجد نورت الكوكب

appy said...

funckydoctor
============

ماشى تتعلم لغه مش ممانعه بس متوصلش انها متعرفش تتكلم عربى ما هى دى سلبيه برضه يا دكتور ولا ايه رايك انى اقول كويس على حاجه فرعيه ومش اساسيه
نورت يا دكتور الكوكب كله




جهاد
====
النبى انت سكر مقالب وكلامك ميه ميه المشكله ان الانجليز والفرنساوين محتفظين بكده الا احنا يا خويا
يالا ربنا يهدى اتفضل اشرب حاجه ههههههههههه نورت يا جهاد

appy said...

عاليا هانم حليم
==============

لا الحمد لله ولاد خالتى عارفين بما اننا بنأخدهم البلد ههههههههه بس فيه اللى ميعرفش بنت خالتى بتقول ومقتنعه ان الانسان اصله قرد تخيلى مماتها كانت بتصرخ منها وانا براحله قعدت افهمها ععلشان تفصل بس الكويس انها بتخليهم يصلوا
وعويناتى قولى الميعاد وليه الشرف طبعا بس الخميس الجاى هنكون فى عمر بووك ستورز علشان توقيه الكتاب بتاع مدونات مصريه للجيب وانا فى العدد الاول يا ريت تيجى هيكون 6.30
نورتى يا كامل الاوصاف




arsenalwy
===========

ما هو الهيب من الاول فى الاهل وبعدين هتقولى على الكوميديا انا بطنى وجعتنى من الضحك على بنت خالتى وهى بتتكلم
عنيه حاضر هشوف

appy said...

محمود المصرى
===========

اهلا يا شيخ محمود متخفى ليه من زمان يا راجل فينك وحشنى المعارك بتاعتك ههههههههههه
بص يا محمود هو مش يتمنع بس يقوا العربى بجد لانه كويس بص فكرة وطريقه تنفيذ التعليم الاجنبى حلو اخف من الحكومى فى الهوم وورك او الواجبات والحاجات دى نظام كويس انما المشكله فى الاهمال للغه الام
ونورت تانى ارض المعارك واتمنى تفضل






A.SAMIR
=========
يا جامد يا بتاع الهارت انت شوفت اللغات كلها جت هنا
نورت يا قمر

Rainbow said...

بصى يا ستى
انا ابنى مدارس لغات و بيدرس كل حاجة بالانجليش الا العربى و الدين و دراسات اجتماعية
و دول خاصيين بالوزراة يعنى هى اللى بتحط امتحاناتهم
وخطه من سنتين كان مش نكش فراخ لكن ولا خناق البط
جيبت له مدرس خط ده غير انى كل صيف لازم يروح يحفظ قران فى المسجد
صدقينى لو الواحد عايز يعلم اولاده هيقدر يعلمهم
العيب علينا مش على ولادنا لانهم و هم صغريين مش بيكونوا هم اصحاب القرار ولا فاهمين حتى يعنى ايه قرار

تحياتى
ليا عندك شيكولاتة جلاكسى انا مش ناسية ;)

وومن said...

معلش بقي يا جميل
بي كوز اي كيم سو ليت
مش عارفة اقولك ايه بس دي مش مشكلة الجيل ده وبس واللي قابلة كمان
يعنى انا وانا في ابتدائي مامتي حبيبتي اختارتي مدرسة لغات بس كمان بدرس قرآن كواحد من مناهجها عشان اتعلم عربي كويس
كدة معنديش مشكلة والحمد لله المشكلة ظهرت في اختي الصغيرة لأننا عزلنا والمدرسة بقت بعيدة دخلت مدرسة عادية ومن ساعتها وكل ما تقرا جنبي اي حاجة احس ان ضغطي علي
وتقولي مش مهم عادي طالما انا فاهمة
متيهئلي لازم نرجع نحترم العربي ونردله هيبتة وبالنوسبة لبنت خالتك فخليني اقترح عليها انها تخلي البنات تحفظ قرءآن ده هايساعدهم كتير قوي
تحياتي وأسفه علي التطويل

طارق الغنام said...

الرائعة ابلاى
مش عارف انا كاتبها صح بالعربى ولا لأ بس انا قصدها لانك تنادى بالحفاظ على العربية وتختارى اسم اجنبى
تعرفى المشكلة الان ان حتى العامية بتاعتنا اصبحت مبتزلة مش اللغة العربية بس
بصى فى كلمات العامية حتلاقىنا بهدلناها اشى اشتغالة واشى كبر واشى مش عارف اية
لغة القراءن اتبهدلت على ايدينا
استمتعت بموضوعك وعالجتية بخفة دم وروعة فى السرد
تقبلى تحياتى وشكرى
ودمتى بحفظ الله
وشكرا على زيارتك التى اسعدتنى

فليعد للدين مجده said...

الاستاذة عميدة كوكب آبي
تحية طيبة
في آخر تدوينة لي كتبت عن اللغة العربية المهددة فعلا بالانقراض، و الاجيال القادمة التي نخشي عليها من الاغتراب عن الدين واللغة
وسميت التدوينة

كياننا المهدد

لأن اللغة ليست لسان فقط
انها كيان ايضا
كيان نعيش فيه
فإن تبدلت اللغة تبدل مكان أقامتنا أيضا وصرنا أغراب في بلدنا

اللغة لسان وكيان

وأذكر في مؤتمر تم في شهر مارس الفائت أن قامت فتاة طالبة بالجامعة الامريكية لتترجم كلمة احد الضيوف التي ألقاها بالانجليزية فنطقت أول كلمة من ترجمتها بالعربية ثم انطلقت تتكلم بالانجليزية حتي وقفت فجأة واكتشفت انها تترجم بالنجليزية للإنجليزية وضجت القاعة بالضحك واعتذرت ، فقام آخر بالمهمة

همس الاحباب said...

طبعا حضرتك بتتكلمى فى موضوع انتشر انتشار رهيب فى مجتمعنا وخاصة فى المدارس اللغات التركيز الاكثر على اللغات وتهميش اللغة الام للبلد
انا عندى فى الشغل اناس بيحملوا دكتوراة ولا يجيدون الكتابة ولا القراءة بالعربية وتلك طامة كبرى
انا طبعا موافق على تعلم جميع اللغات بس بجانب اللغة العربية بما انها اللغة الرسمية للبلاد ولغة القران اولا
وانا اكاد اشك ان هناك ايد خفية ومخططات لطمث الهوية العربية وتهميش اللغة العربية فى مدارسنا ومجتمعاتنا الشرقية
لكى يبعادوا بيننا وبين تراثنا ومعتقداتنا العربية
على اى حال احييكى على ارائك وعرضك لقضايا المجتمع باسلوبك الرائع
تحياتى وتقديرى
خالد

appy said...

سيد مكسرات
==========
ما هو الكلام معاهم بيقوى اللغه يعنى نفضل عادى نقويها بس مش نهمل اللغه بتاعتنا يا سيد فهمت
مش حاجه على حساب حاجه تانيه خالص
نورت الكوكب كله






Rainbow
========

صح يا حبيبتى ربنا يخليهم لكى هو ده اللى عاوزاه وبقوله بجد
ربنا يكملك بعقلك ويخليهم لكى
نورتى يا احلى جارة

appy said...

وومن
=====

ني فر مايند ماى دير هههههههههههههههههه
وحشانى شوفتى اهو انتى شوفتى اللى انا شوفته
المشكله البنات بتربس دماغها بس بيموتونى من الضحك بجد والبنت فى الانجليزى خطها هايل بترسم الحروف والعربى توقليش فرخه بتتنطط على الورق ههههههههههههه نورتى يا قمر خالص





طارق الغنام
============

فاهمه قصدك بس والله اسمى ده حكايه يعنى اسمى الحقيقى ريحاب ابن اختى بيبى لسه اول ما نده قال آبى وده الدلع بتاعى فحبيت القسم وسميت المدونه باسمه وان شاء الله لما يكبر هيشاركنى فيها هههههههههه
ميرسى ليك خالص على ذوقك ورقتك وبيسعدنى وجودك

appy said...

فاليعد الدين لمجده
=================

اهلا يا دكتور والله حاجه تموت من الضحك على فكرة فى سرك ساعات بعمل كده هههههههه وبغلط واتكلم بالانجليزى غصب عنى بس بلحق نفسى خالص
وكلامك حق بجد ويا رب نأخد بالنا
نورت يا دكتور وبيسعدنى وجودك





همس الاحباب
==========
خالود مش للدرجه دى قوى انهم يطمسوا حاجه لان دى لغه القرآن يعنى لغتنا بجد
المهم خلى بالك من همس ومتغلطش غلطه خالتى وديها بس خلى بالك من العربى اربطه فى ايديها
ميرسى ليك يا خالد ونورت ويا ريت تعلمها قرآن من دلوقتى

هيثم الدهشان said...

ابى اللغات شيك اوك وبالضرورة لازم نتعلمها علشان نعرف تفكير الحضارات التانية
لكن مشكلة مدارس اللغات عندنا انها عملت زى احتلال ثقافى للبلد ومفيش مدرسين عربى فيها اساسا
انا قابلت كتير مصريين لكنهم مش بيعرفوا يتكلموا عربى لكن الشئ اللى وجعنى بجد انى شفت جنسيات تانية بتتكلم عربى احسن من ناس كتير مصريين وعارفة تاريخ مصر وكل حاجة عنها وحاجات احيانا احنا كمصريين ممكن نكون مش عارفينها

تقبلى تحياتى

الطائر الحزين said...

يتساوى من ينفد من ثقب ابرة مع من ينفد من اوسع الابواب لكن الاختلاف فى مدة النفاد

wanna b a physician said...

الحقيقة يا اببى ان كل الناس تقولك لغات لغات
طيب فين لغتنا كمان نسيناها مفيش اصلا بلد فى العالم بتدرس لغة غير لغتها من غير ما يكون شعبها عارف لغته صح
وبعدين يعنى من امتى بنعمل حاجة صح
جاتنا القرف

mayada said...

هههههههههههه
باابي ياللي جايبه الحاجات المستخبيه
عارفه فعلا مشكله جامده
الحكايه دي بس في مشكله اكبر
هي ان المدارس الحكوميه بتخرج ناس لا عارفه عربي ولا عارفه لغات ولاعارف اي حاجه
انا برضه وصل احمر عشان محدش يفهني غلط بس كنت باخد كورسات وانا في الجامعه عشان اعدل الكافه شويه

يعني ولاد خالتك ارحم
وبرضه فكره انهم يحفظوا قران دي ممكن تساعدهم

حمادة زيدان said...

الست الابلة الناظرة ابي
والله يا أبلة عندك جق ... مدارس اللغات فيها مميزات كتير أوى بس للأسف بتبهدل العيال في العربي , واللغة العربية أصبحت في الركن الراقي من مصرنا الغالية "دقة قديمة" وأصبح اللي مش بيدخل كلمتين تلاتة أربعة أنجيليزي بيبقي ياي "بيئة" على فكرة العدوة بتاعت اللغات اتنقلت الصعيد وفي كتير دلؤتي بيدخلوا كلام كتير انجيليزي
يعني البقاء لله في لغتنا العربية

خواطر رئيس شاب said...

تعرفى مشكلة الشعب المصرى ايه

ان هو بيدور على المظاهر الاجتماعية بشكل كبير لدرجة انه بينسى الاساسيات اللى لازم تكون موجودة

هل يعقل انه يكون فى حد عربى فى بلد عربية اتم دراسته الجامعية ولا يعرف القراءة جيدا فضلا عن سوء الخط

Nsreen Bsunee said...

والله احسنلهم من جهل التعليم الحكومي
بس عندك حق فى نقطه قرايه القرآن لازم يتعلموها
بس حتكون سهله انشاءلله لانه مهما حصل العربي بالنسبالهم اللغه الام اللى بيسمعوها ليل نهار لكن لو كانو اتعلمو فى مدارس عربي كانو لا حيعرفو عربي ولا انجليزى ولا حيبقو قابلين للاصلاح
:)

رفقة عمر said...

عارفه احسن حاجه لما ذكرتى موضوع مدراس اللغات كوس قوى انك ركزتى على موضوع اللغه العربيه مع انها لغه القراءان ولغه اهل الجنه
بس للاسف اهالنا مش بيهتموا يعلموها لنا صح
انا واحدة ولا اعرف االفاعل من المفعول به كويس قوى انى باعرف اكتب عربى دة اللى اتعلمته بس لكن قواعد اللغه وجماليتها لا افقه عنها اى شئ
نفسى اتعلم بجد قواعد اللغه العربيه
اتمنى

بحبك يامصر said...

اببى
ازيك اخبارك ايه؟
موضوع اللغه العربيه فعلا كما صورتيها فى الضياع حتى لخريجى المدارس الحكوميه مش المدارس الخاصه والجامعات الخاصه فقط

وفى موضوع تانى مهم ان السياسه الموجوده فى البلد من فساد فى التعليم ومحسوبيات فى التوظيف وغيره قتل الطموح عن المتعلم قتل عند الشباب امل التفوق ولما يتعب ليتفوق ان كان لن يأخذ حقه من مكانه فى المجتمع
على رأى مرة الزارع بقت سلطه
تحياتى

سكــر said...

من كم اسبوع فى الاهرام

الاستاذ ابراهيم حجازى اثار الموضوع دا
وكانت البدايه انه جاله ايميل

ان واحد فى مركز التجنيد

كان بيدور على شخص يملأ ليه الاستمارات

الناس استعجبت

لان المطلوبين شهادات عليا

فا بيسألوه

قالهم انه خريج جامعه امريكيه

ومش بيعرف يكتب عربى

ودى المصيبه

بس حلها سهل جدا

بس من البدايه

محمد ابنى فى مدرسة لغات

بس طبعا من اللغات اللى على ادها

مش الهاى كلاس ههههه

يعنى بيروح فى المواعيد العاديه

ودراستة مع الدراسه العاديه

بس انا جايب ليه محفظ قران

بيحفظه القران

وطبعا بيعلمه عربى كمان

بس ربنا يسترها من المصااريف السنه الجايه يااابى

وخصوصا

ان محمود كمان داخل

ربنا يسترها

تحياتى

احمد سكر

مجداوية said...

السلام عليكم
آبى بتنجانى الفيكونية اللأمريكية المشتركة
طبعا عشان انا فى المجال ده باشوف بعينى كل اللى انت كتبتيه

فيه ناس كويسة جدا رايحة تاخد الشهادة الصح من المكان الصح عشان تدخل الكلية الصح وفيه ناس كتييييييييييييييير رايحين يضمنوا مكان فى الكليات لأنهم بمستواهم الضعيف فى كل حاجة عمرهم ولوقعدوا عشرين سنة مش حيدخلوا كلية ولا معهد حتى فأهاليهم بيعملوا جمعية أو يبيعوا حاجة عشان يدخل المعدول أو المعدولة الدبلومة ويضمن مكان لكن للأسف معظمهم حيطلعوا مهندسين مش فاهمين حاجة ودكاترة مش فاهمين حاجة وحتبقى كارثة مستقبيلة وبدل العمارات ما تقع بعد عشر سنين حتقع وهى بتتبنى وبدل الدكتور ما ينسى فوطة ولا ملقط حينسى هو فتح ليه بطن المريض أصلا

التعليم ده فرصة للناس الشاطرة وكارثة للفشلة

وانصحى خالتك توديهم دروس تجويد بيعلموا فيها مخارج وصفات الحروف لأن تعلم القرآن هو سبب فصاحة أى حد وبالمرة روحى معاهم طالما انتى خواجة زيهم

ام كلثوم بتعرفى تسمعى منها كل حرف بكل وضوح لأنها كانت بتحفظ القرآن وهى صغيره
جربى وادعيلى

NIDAAL PAL said...

آآآبى
انتى اتكلمتى فى المشكلة اوك وواقعية المشكلة بالفعل موجودة و لكن احنا برده مسألناش نفسينا ليه ؟
ليه الاطفال فى مصر بيكرهوا المدارس ؟
طبعاً الاسباب معروفة و لكن كان المفروض انك تكتبيها و تتكلمى عن الحلول الى فى فكرك الى بيها ممكن نحبب الاطفال دول فى المدارس الحكومية
يعنى لو قلنا مثلاً .. ليه ميبقاش نظام المدارس و التعليم عندنا زى نظام الاميركان دبوما
ليه ما يبقاش فيه انشطة رياضية حقيقية مش فالسو او مش شكل بس امام الوزارة
ليه ما تشاركش جهات و مؤسسات الدولة
و انديتها فى جداول محددة المواعيد و التواريخ بأنشتطها مع المدارس
ليه ما يبقاش فيه كلاس خاص لكل من يظهر لديه موهبة او حتى بوادر موهبة
و لا اعتقد ان مصر فقيرة بحيث انها ما تقدرش تعمل ولو رحلتين مجانيين للاطفال فى المدارس ..
الحكومة بتحسسنى ان الى فى مدارس مستوى عالى دول ولاد ناس
و الحكومة دول ولاد*** ناس تانين برده

NIDAAL PAL said...

و كمان ليه ما نغيرش مناهجنا خالص
و تبقى مناهج مفيدة
اظنك قريتى البوست الى كنت كاتب فيه عن ولد بتاع 12 سنة او اكبر
مش عارف يعنى ايه فلسطين و كان فاكر ان الفلسطينيين هما الاعداء
و فاكر ان الاسرائيلين هما الاحباب
فين بقى التعليم هان يا آآبى
فين المناهج الهادفة
ما يدرسه الامريكان و الاوروبيين فى الابتدائى ندرسه نحن فى الثانوى
و الله ده واقعى
فتخيلى لما تيجى تكلمى امريكى ..هل تعتقدى ان مع اختلاف المناهج فى كلا المرحلتين انك هتقدرى تجاريه فى ثقافته و معلوماته

نهر الحب said...

ابل
ازيك
والله يا ابل دى مشكلة اغلب الناس اللى تعليمهم اجنبى بينسوا ان القران عربى واننا مصريين
لكن هو دا التقدم والتحضر الغير صحيح بالمرة
عشان كدة انا بقول ان المفروض الاسرة تعمل توازن بيناللغات الاجنيبة وبين لغتهم الام العربية
عارفة الالمان لا يتكموا ابدا سوى لغتهم الام
كل الود

m5m said...

أوكى..وى ويل دو....ثانك يو

الفاتح الجعفري said...

آبي
لاحول ولا قوة الابالله العظيم
دي والله العظيم كارثة فعلا ,عدم الالما بلغة الرسمية للامة اصلا معناه انعدام الهوية ,ويؤدي الي مشاكل وحالات انفصام رهيبة في المستقبل,وده طبعا بسبب الانظمة المتخلفه الفاشلة المتبعة في هذه البلاد ومبيحصلش كده الا عندنا احنا بس ولا في اي دولة من دول العالم ال 3 وال 4 وال5 وال6 واللي فوق السطح حتي
برده زي اما بنودي اولادنا مدارس الرهبان الفرنسيسكانات والمدارس التبشيريه التنصيرية ,فتلاقي الولد يدرس عقيدة النصاري او يتأثر بهم وهو مسلم فيحدث عنده خلل في العقيدة
اللهم يسر لهذه الامة امر رشد
جزاكم الله كل خير علي هذا الموضوع

نوسه said...

فى مدارس لغات عجبانى اوى هيا تبع جمعيه اسمها جمعية المحافظه على القرآن الكريم..مش عارفه حد عارفها ولالا .. هو الطالب بيتعلم لغات وكل حاجه وفى نفس الوقت بيتعلم القرآن واللغه العربيه صح

ناويه باذن المولى اودى ولادى فيها :)
بس اتجوز انا بس يااااااااارب :)
---
وحشتينى ياآآبىىى

صاحب المضيفة said...

تعرفي يا ابي


اللغة العربية في حياتنا دي زي الاكل والشرب


لازم الواحد مش يستغنى عتها خالص

ودي اللي بتعبر عن مورثاتنا الحضارية وأصولنا العربية الجميلة


الواحد بيحزن بجد لما بيقلاي حد بيتكلم عربي مكسر ولا حتى بيكتب عربي مكسر وبيقول لما نكون احنا أهل العربي ولغة القران ومش بنعرف نتكلم عربي او نكتب عربي


يبقى سيبنا ايه لغيرنا

دي حتى تبقى كارثة بكل المقاييس


ربنا يستر علينا يارب


تحياتي

كلاكيت تانى وتانى said...

انتى سكر مش مشكلة تعليم ولا مشكلة تدريس مشكلتك فالعرض تجنن وانتى يابنتى مين اللى قالك ان كلامك ى الاطفال انتى اصلا طفلة
جميل البوست كالعادة
تحياتى ياقمر

WhItE HeArT said...

آبي

بجد مش عارف يمكن لو كنتو لعبتو حاجة غير من سيربح ال2 مليون كانت تجاوبت مهو ده الجديد ههههههههههههه

لا بجد دي مش مشكلة دي كارثه فعلا

وبالنسبة للمدارس الحكومية بصراحه بقيت احس انها مش مدارس من اللي بسمعه عنها انا عمري مادخلتها وعمري مادرست في مصر الا في الجامعه لكن اللي بسمعه يوضح اللي جواها

تقبلي تحياتي

خديجة عبدالله said...

تدوينة روعة بجد ربنا يوفقك ويحفظك

طبعا لازم نتعلم لغات لإن من علم لغة قوم أمن مكرهم بس ده مش معناه أننا نتخلي عن لغتنا اللى هيا لغة القرآن ..التطور معناه التقدم والنماء وليس معناه الإنسلاخ والتخلي
نتطور ونتقدم لكن بهويتنا

بجد كوكبك جميل اقبلينى ضيفة عندك علطول وربنا يكرمك ويوفقك :)

Sharm said...

عمرنا ما هنتقدم الا اذا احترمنا لغتنا
ادخلى اي صيدلية و اطلبي دواء اسمه دي دي بي بتاع الكبد

و دوري على اي كلمة بالعربي او بالانجليزي .. مفيش
كله بالصيني .. و متصدر بالصيني .. و الدكاترة بتكتبه لانه ممتاز

hesham said...

ايه يا جدعان

دى الارض بتتكلم عربى ..احنا مش هنتكلم عربى

اللغة فى حد ذاتها جزء من هوية البنى ادم بس احنا بالنسبة لنا اللغة جزء من هويتين مش من هوية واحدة..يعنى جزء اولا من هويتنا الدينية كمسلمين لانها لغة القرأن و فى نفس الوقت جزء من هويتنا كعرب عايشين فى وطنى حبيبى الوطن الاكبر

و عشان كده اللى عنده مصيبة فى لغته العربية عنده فى الواقع مصيبتين مش مصيبة واحدة

و بصراحة بقى دى اللوم يقع فيها على الاسرة اولا..صحيح التعليم فى مدارس اللغات الهاى لايف مهم و انضف من التعليم الحكومى اللى قضى على عقليات كتير و هى فى المهد
:)
بس مش للدرجة دى..الاسرة لازم تاخد بالها من دماغ اولادها بتتشكل ازاى لان اللغة هى اللى هتشكل اهتمامتهم..الافلام اللى هيشوفها..الاغانى اللى هيسمعوها...و الكتب اللى هيقروها ..الى اخره من الحاجات اللى بتشكل دماغ البنى ادم و اذا الموضوع اتساب كده يبقى اللى هيطلعلنا فى الاخر شاب او بنوتة متعلمين كويس اوى لكن للاسف مش مصريين ..مش تبعنا يعنى

و سمعنى احلى سلام ل أمل و عمر
و لغتنا العربية الجميلة

تحياتى
هش

حماتــــــــــــي ملاااااااااااك said...

انا بقي مش مقتنعة بالمريكان دبلومة ... لاني عرفت انهم بيريحوا العيال علي الآخر
وانا بقي عندي لو ماكانش العيل من دول يتفرم بالمفرمة بتاعة المدرسة يبقي كأنه ماأتعلمش
خليهم يتعبوا بلا دلع عيال مالوش لازمة

Z_Diva said...

loooooooooooooooooooool
kollo ella lung de bgd mawetitny
ybnty ana kn m3ya sa7bty felgam3a 5reget IG msh 3rfa asln el alphabets bel3arby :D
bas dlw2ty fe mdares lo3'at we american 7tta b2t bthtm bel3rby we t3lmo lelatfal, we byb2o kwaysen awy fe both 3rby we english, we kman lmma y5do frensh b3den we kda, bas howa f3ln elrak 3la el3ela, lazm hma yhtmo in waldhm y3rfo 3rby, l2n fela5er y3ny de el mother tongue bta3 ele5na :D

اهو ده عيبه said...

ازيك يا ابى
اولا الصورى اللى انتى حطاها مسخرة والاغنيه خطيرة

ثانيا وانتى بتتكلمى عن بنت خالتك افتكرت شويكار فى فيلم ليها كانت بتتكلم عربى مكسر خالص

حلو ان الانسان يعرف لغات لكن متبقاش هى كل حياته لدرجه انه ميعرفش يقرا او يكتب بلغته الام لان دى تبقى مصيبة

اللى بيخلى الناس تجرى ورا اللغه ان كل حاجه فى البلد بقت م الاخر متأمركه من اول اسامى الاكل والمحلات لحد المدارس والشهادات والبنوك والشركات
يعنى هما بقوا اصحاب البلد واحنا الاغراب والغريب علشان اعمى يبقى لازم يتعلم لغه اهل البلد

حاسه اننا عاملين زى عوكل لما صحا فى تركيا وكان فاكر الاحتلال رجع مصر
الاحتلال رجع فعلا بس فى لغتنا وثقافتنا وانتمائنا وتعليمنا
وربنا يستر

ayman badr said...

لية كلمة واحدة يا آبى
اللى ميعرفش لغة بلده عمره ما ينجح فى لغة ناس تانية لانهم هيكونوا أحسن منه فى لغتهم الأم
تحياتى

المنسى said...

عزيزتى آبى
أسف جدا ماقرأتش الموضوع عشان أسيب رد عليه
بجد مشغووووووووول
عندى إمتحانات
رديت عليكى
وموافق جدا
ربنا بوفقك

الطائر الحزين said...

اسف
هى ينفذ وليس ينفد

Tarek said...

بصراحة أنا من المعقدين الي كانوا بيتمنوا يدخلوا لغات وهم صغيرين انا عشان ظروف شغلي ووجود عدد كبير من غير العرب فالإنجليزى هو اللغة الرسمية فى شغلي أنا بتكمل وبفهم ممتاز بس المشكلة فى النطق حاجة تكسف يعني تحسي إن طوب بيطلع مش إنجليزي من الرايق ده بتاع ولاد الايه
عموما التوازن في كل شئ مطلوب

اميره الصعيد said...

هاي يا ابي
هاو ار يو
ايه رايك انا مش بكتب كده فزلكه لا والله بس هو ده اسلوب الكتابه اللي منتشر حتي مع الجماعه بتوع الترجمه الفوريه يعني ولا محصلين يترجموا بالانجليزي ولا يكتبوا بالعربي فمتزعليش قوي كده اينعم دي كارثه كبيره بس عادي في وسط الكوارث اللي احنا عايشين فيها ويبقي انت اكيد اكيد في مصر

بنت الاسلام said...

والله يا ابي معاكي حق

الواحد بيتعلم لغات جنب لغته

بس احنا بقينا في زمن ماشي بالمقلوب في كل حاجة

هنتعلم لغتنا جنب لغة الاجانب

اهو بقي بندفع ضريبة التقدم والتمدين عشان نبقي مودرن لازم ننسي الارابيك ونبقي في الانجليش بريمووووووو

علميها انتي واكسبي فيها ثواب

واهو الدروس الخصوصية بتاكل ملبن اليومين دول برده

تحياتي

ضد الظلم said...

فعلا مشكله
ولكن دى مشكله مجتمع انا قريب كنت عند سيتى استارز ووى ناس كتير عماله تكلم عيلها بالانجليزى والعيال ترد عليهم قولت الاحتلال وصل مدينه نصر وخفت قوى على مصر وفعلا بيطلبو فى الشغل طلبات غريبه قوى وبتبقى امتحانتهم صعبه جدااا يعنى كان فى اختبار محصل ميه كانو طلبين انجليزى ليه بقى هيحصل من امريكا ولا ايه النظام دى حاجه تشل
تحياتى

شيماء الجيزى said...

والله انتى عسل يا آبى
فعلا انا بتفق معاكى فى كل كلمة والله
انتى ناقشتى موضوع اينعم بخفة دم
بس هو فعلا موضوع مهم
ازاى نكون فى بلد عربى ولغتنا الرسمى اللغة العربيه وده حال ولادنا
انا مش متصورة علشان اعلم ولادى تعليم كويس
اخليهم يفقدوا قدرتهم فى اللغة بتاعتهم
بس والله العيب فى تعليمنا
اللى بقى عامل زى البطيخه القرعه

سعيدة انى علقت عندك
تحياتى يا قمر

Hosam Yahia حسام يحى said...

ههههههههههههه


عقبالنا

احنا لسه بنفك خط فى العربى اصلا

:d

كوارث said...

تحيا اللغة الغربية وتموت اللغة العربية
فعلا اهتمام الناس باللغة العربية وقف من بعد سيبويه واتدهور من بعد السادات
ده مش مشكلبتها لوحدها ده ناس كتير
والمصيبة اني اتفاجىء بأمريكان وصينيين خطهم تحفة في العربي
انا جمعة الازهر
معايا روس وصومال وماليزيين والخ الخ .. والله فيهم ناس مبدعين
عرفت مرة واحد سنغالي كان واخد شهادة في اللغة العربية من مجمع البحوث محدش في مصر واخدها اساسا الا من رحم ربي
ربنا يستر علينا

MoHaMeD HoSSaM said...

والله يا ابي الفكرة ابسط من كدة

هي كل الحكاية ان التعليم بالنظام الامريكي وبالذات الامريكان دبلوم

بيبقي حوار اللغة دا عندهم اهم من المواد نفسها يعني الدادا تقريبا بتتكلم انجليش

مثلا انا ليا واحدة صاحبتي كانت في مدرسة الدليفراند
لو تعرفيها وكانت بتتكلم الفرنساوي احسن مااحنا بنتكلم عربي بس في نفس الوقت بتتكلم عربي عادي وبتفهمه

بالنسبة للحوار بتاع ان لازم يكون في حل فحيبقي من البيت زي مانتي قلتي

بس والنبي هو حد لاقي

هما بس يتعلموا لغات والعربي الواحد يسبهم في الشارع يومين
وخلاص كدة

في حب مصر said...

السلام عليكم
ازيك يا جميل
انا عن نفسي شايف ان الاهتمام باللغة الانجليزية حاجة مهمة جدا دلوقت مش بس في مصر لا ده بقى في كل حته، بس ده مش لازم يكون على حساب اللغة العربية طبعا لانها لغة القرآن الكريم
بس صدقني اصبحت اللغة الانجليزية دلوقت هي المتحكمة في سوق العمل بالدرجة الاولى.
تقبلي مروري
على فكرة انا شوفت برنامج الفيس بوك على قناة الحرة النهاردة بس للاسف في اخر عشر دقايق بس وما شوفتكيش، هو مش برضة في برنامج عين على الديمقراطية؟؟؟؟؟؟

وجهة نظري said...

دي مصيبه سوده يا أبي... والأنيل إني أعرف ناس مش عايزين ولادهم يعرفوا عربي خالص، وبيتفاخروا إن ولادهم ولا بيتكلموا عربي ولا بيكتبوا عربي

مره كنت في مول في محل فيرجين بشتري كمبيوتر... دخل شوية شباب مش عارف هما بنات والا ولاد بصراحه (تعبت اوي علشان أحدد) ... بشري منهم سئل البياع: فين الميوزك إنسترومنتس؟؟ البياع قله: الـ إيه حضرتك؟؟ البشري دا بصله وقاله: الميوزيك إنسترومنتس!! وكان مستغرب أوي إن البياع مش فاهمه ... قلت للبياع: عايزين الأدوات الموسيقيه .....، أه لأ معندناش في المحل. البشري بصلي من فوق لتحت وبص للبياع من فوق لتحت وقلب شفته ومشي مع البشريين إلي معاه بيبرطموا

ربنا يرحمنا يا رب

ليلـــــــــــــــــــــــــــــى said...

ازيك يا رحاب؟ و الله انا بتفق مع الناس اللى بتقول على شيخ لتحفيظ القرآن و برضه ممكن نجيب للأطفال قصص و كتب توين بالعربى علشان عينيه تتعود على شكل الحروف و يحب اللغة
أنا مدارس لغات بس مش امريكان دبلومة و لا أى جى كمان أهلى كانوا بيدونى دروس فى العربى و النحو من خامسة ابتدائى علشان اتأسس
بصى زى ما ناس كتير قالوا الأهل هم السبب
وعلى فكرة أنا مش ضد فكرة ان الأهل يكلموا و لادهم بلإنجليزى لأن ده بيساعد على تحسين اللغة بس زى ما قلت لازم يبقى فيه تأسيس و قراءة كثيرة للطفل و من جانب الطفل

appy said...

هيثم الدهشان
===========

انا نفسى اتعلمت وهدور واخد فرنساوى او ايطالى بس مش بنسى لغتى يا هيثم وكلامك صح يا زميل
نورت الكوكب





اخى الطائر الحزين
==================

ربنا يكرمك يا رب ويبارك فيك

appy said...

wanna b a physician
===================
انا دايما بقول معرفة حضارات تانيه بيكون حلو وكويس بس فعلا مش على حساب لغتنا ومثال لكده فرنسا
نورت يا دكتور






مياده
=======
اهلا اقعدى جنبى بس هى فعلا بدأت تعمل كده او قولت لها اكتبى لهم وعلميهم ا ب تانى ههههههههههههه
نورتى يا قمر

appy said...

حماده زيدان
==============
شد حيلك يا حماده فى اللغه بقى ه واربطها فى رجل السرير
نورت يا كاتبنا





خواطر رئيس شاب
==============

عندك حق والله يا ريس ونورت الكوكب اول مرة

appy said...

نسرين بسيونى
=============

صح يا رينا انا معاكى بس فعلا لو قعدتى تموتى من الضحك على كلامها
المشكله اننا بلد معندناش وسطيه فى حاجه ولا تعليم ولا غيره
نورتى يا قمر الكوكب كله وفكيها بقى احسنلك






رفقه عمر
=========
طيب يا حبيبتى انتى بتقولى قواعد اصلا دول معندهمش قواعد احمدى ربنا على اللى انتى عارفاه وخلاص هههههههه نورتى الكوكب

appy said...

بحبك يا مصر
===========

ماشى كلامك بس لازم احنا بقى نغير نفسنا ولا ايه نورت الكوكب كله






سكر
=====

ربنا معاك يا رب بجد قلبى معاكوا من المصاريف دى انما حادثه الولد ده عرفتها ههههههههههه اصل جامعه امريكيه يا سيدى ومتخيله خطه
ربنا يقويك يا سكر ويبارك لك فيهم

appy said...

مجداويه
========
طبعا يا ميس منهم الكتير قوى وانا اقترحت على خالتى كده وهى فعلا بتحاول بس المشكله البنات مش عندهم وقت مذاكرة وتدريب فى النادى وطبعا هما مكبرين
ماغهم عن اى حاجه عربى بس الا الصلاه بتخليهم يصلوا ربنا يستر على الجيل اللى طالع او نازل مش عارفه
نورتى يا حبيبتى الكوكب






نضال
=======
ما هو يا نضال احنا عارفين عيوب التعليم اكتبها ليه يعنى مش عارفه ما كلنا عارفينها
المهم المثل اللى انت جبته واحد من كام يعنى حاله نادرة المشكله بقى خلاص فى ايد الحكومه ومش هتقدر تعمل حاجه انا لما بكتب بحل على مستوى الاسرة انما نقول الحكومه لا مش هتعمل يا نضال وكلنا عارفين كده
نورت يا ابنى الكوكب تانى

appy said...

نهر الحب
===========
اهلا بيكى وانا اسمى آبى مش أبل خالص ههههههههههه
والفرنساوين كمان مش بيرضوا يتكلموا مع حد غير باللغه بتاعتهم فى بلدهم يقولك انت جاى بلد اتعلم لغاتها
بس عادى اننا نبقى مع الثقافات التانيه بس لغتنا نحتفظ بيها
نورتى يا قمر








ما يهمش
=========
يو ويلكم يا مستر هههههههههههههه نورت الكوكب

appy said...

الفاتح الجعفرى
=============

هو بقى فيه تصنيف كده طيب جاوب علىالسؤال ايه دول العالم اللى على السطح دى ههههههههههههههههه
نورت يا زميل المعارك الكوكب كله




نوسه
====
اهلا يا دكتورة وحشتينى خالص فينك يا حبيبتى من زمان ربنا يديكى يا قمر وتقدرى على تربيتهم ومتشديش فى شعرك ههههههههه نورتى الكوكب كله

appy said...

صاحب المضيفه
===========
اهلا وسهلا ما هى دى الكارثه اللى لازم ننتبه ليها بقى
ونخلى بالنا كويس لان كل حاجه سلاح ذو حدين

نورت الكوكب كله يا صاحب احلى مضيفه






كلاكيت هانم
==========
ماشى انتى جايه تشردى ليه هنا ماشى لينا ماسنجر نتلم عليه
ههههههههههههه ميرسى ليكى خالص يا كلاكيت

appy said...

القلب الابيض
==========

المشكله انها بتقرى عربى بس رايح فى شجرة بجد ههههههههههههه ربنا يستر هديها انا دروس واهى نظبطها شويه
نورت يا قمر





خديجه عبد الله
============

يا نهار ابيض اقبلك دا انتى تشرفينى يا قمر الكوكب كله تحت امرك ويزاد شرف بيكى

appy said...

sharm
========
طيب لما هو من مصر مش بيكتبوا عربى ليه يمكن تناكه ههههههههه نورت الكوكب كله اول مرة




هشام
=====

بس الارض عندنا بقت بتتكلم لغات ده كان زمان عربى هههههههه
نورت يا هشام الكوكب كله

appy said...

حماتى ملاك
================

هو انتى اتعلمتى الشرانيه من حماتك ههههههههههه نورتى يا سكر





Z_Diva
======
فعلا الركك على العيله او الاهل ويا ريت الناس تبطل سياسه تكبير دماغ يا ريت
نورتى يا قمر الكوكب

appy said...

اهو ده عيبه
==============
ميرسى يا قمر بس والله شكله ده اللى بيحصل عندنا فعلا هههههههه
نورتى الكوكب يا احلى حله تيفال





ايمن بدر
=======

كلمتين وبس صح يا ايمن نورت الكوكب تانى اهلا بيك

appy said...

طارق
=====
صح الوسطيه وغير كده تمسك باللغه بتاعتك
نورت يا استاذ طارق دبش هههههههههه





اميرة الصعيد
==========

يا سيدى يا ولدى على اللغات المتحضره ههههههههههههههه بس لازم نصلح يا ميرا ولا ايه رايك
نورتى يا قمر الصعيد كله

appy said...

بنت الاسلام
==========
تعالى انتى يا بطوط علميها ولو عرفتى تقعدى خمس دقايق من غير ضحك يبقى لكى الكلام ه
انا فعلا فكرت فى كده نورتى يا بطوطه





ضد الظلم
=========
لا العدادات بتقرى بالانجليزى ههههههههه ولا علشان يعرفك الثقافات الا سيتى ستارز متقوليش عارفاهم شوفت دول ولاد خالتى كده فعلا زيهم
نورت الكوكب

appy said...

شيماء الجيزى
==========
اهلا يا قمر انا مبسوطه والله خالص ان خرفانى جابتك هنا فى الكوكب كله
ياااااااااه ايه النور الحلو ده بجد
شرفتينى يا قمر





حسام يحيى
========
طيب يا حسام فكه بس اوعى يفرط منك هههههههههههههههه نورت يا سكر الدلتا

appy said...

كوارث
========

والله واحنا كمان عندنا بس عاوزين اهتمام بما اننا مش قادرين على الحكومه نقدر على نفسنا صح ولا غلط
نورت يا عم الكوارث والزلازيل





محمد حسام توأمى
===============

حلو التعليم ده بس فعلا لازم يبقى فيه حل
نورت يا محمد وانت مش بتذاكر ليه اتهد بقى

appy said...

فى حب مصر
=========
وانا معاك انها مهمه فعلا
لا البرنامج اسمه الحرة اليوم لسه مش اتذاع لانهم مش بلغونى وميرسى خالص بجد لاهتمامك
نورت الكوكب






وجهه نظرى
==========
ههههههههههههههههه حرام عليك الكائن ده بيعيش ويتعايش يا راجل انتم اللى جيين من كوكاكيب تانيه فيه ناس بتبقى اوفر شويه ودول بيبانوا قوى
نورت الكوكب

appy said...

ليلى
=======
اهلا بيك الحمد لله انا كويسه
وانا مع فكرتك لانها صح وده اللى انا عاوزاه واهلا بيكى اول مرة فى الكوكب بس هو انا اعرفك ههههههههههههههه
نورتى يا قمر

القط البرى said...

يا طنط ابى مع ان دى اول زيارة
بس ان شاء الله مش هتكون اخر زيارة
اقسم بالله
دى مدونة جميلة جدا ومافيش زيها فى عالم
التدوين


تحياتى

محمود

سلااااااااااااااام يا طنط

عاليا حليم said...

يا كسوفى يا انى

ايه الكلام الكبير ده

عاليا هانم و عويناتى و كامل الاوصاف كمان؟؟؟؟

انا ححاول باى طريقة ان شائ الله احضر توقيع الكتاب كفاية حشوفك انتى و لماضة و برنسيس دودو

تحياتى

دنيتى الجميله said...

ازيك يا ابى
عامله ايه فى كوكبك الجميل
نفسى اجيى واقعد شويه فى كوكب ابى
المهم موضوعك بجد مهم جدا لأن عندى المشكله دى بس بشكل اضغر شويه
بنتى رايحه سنه اولى ابتدائى ونفسى اكملها فى المدارس التجريبيه
ولكن المشكله ان الامهات السابقات فى الخبره قالولى ان اولادهم تعبوا فيها كتير علشان الدراسه صعبه
والاسوأ مستواهم فى العربى بيبقى سىء جدا جدا فى الكتابه
ولما بيطروا ينقلوهم مدارس عربى بيتعبوا جدا فى الكتابه يعنى لو واحده فصلها 6/8 تكتب 8/6
من الشمال لليمين يعنى
هههههههههههه
بنتى بتكتب أ -ب من الشمال لليمبن والله
ههههههههههه
فعلا بحس انها مهزله
واحنا اللى عاملين فيهم كده
ربنا يعينهم ويستر علي مخهم
سلااااااااام

ليلـــــــــــــــــــــــــــــى said...

لا أنا مستجدة على الكوكب بس متابعاكى من زمااااااااااان

عجبنى كمان البوست بتاع الجارة الفضولية أوىىىىىىىىىىىى بجد قعدت أضحك :)

m5m said...

:أبويا العزيز

غاز مكتوم؟
غاز مكتوم؟

مالقيتيش تعبير ألطف شوية تعلقى بيه عندى؟

انتى عارفة الغاز المكتوم ده ايه؟

ربنا يسامحك

انت جاى تشتمنا ف بيتنا يا عم الحاج؟

أبو خالد said...

أبنتى الغالية /آبى
دائما ما تثيرين قضايا فى غاية الأهمية
و جميل طرحك لهذا الموضوع قرأته كثيرا
و لم استطع التعليق لأننى كنت فى غاية الحزن لغياب فرنسا ربنا يشفيها و تقوم لنا جميعا بالسلامة
احسك بنيتى قريبة منى للغاية
تشبهينى.. تحزنين و تتأثرين من غياب أى إنسان حتى و لو مر بحياتك عبر هذا العالم .
أما عن لغة القرآن فلا تخافى عليها
فهى باقية باقية ببقاء القرآن و حفظه من قبل العلى القدير
و لا تنسى أنها لغة خطاب أهل الجنة
فسواء حاولوا القضاء عليها أو تغريبها فلن يفلحوا فهى باقية فى صدور أطفالنا و آجيال و راء أجيال تتوارث حفظ القرآن الكريم فلا تحزنى بنيتى
لا أريد أن أنهى الحديث معك
و لكنى سأغادر الآن و إلى أن نلتقى
أستودعك الله الذى لا تضيع و دائعه

Sherif said...

صعب ان مدرّسة فى البيت تحل المشكلة

لأن برضه المطلوب ممارسة برضه .. جزء منها القراءة .. ان شالله أى قصة

صحيح اللغة مطلوبة وحيوية لأننا بنتعامل مع العالم .. وانت وارسايل مع الشركات الاجنبية وغيرها .. يعنى مابقتش مسألة شياكة .. مسألة احتياج حقيقى ..بشرط أننا ماننساش لغتنا فى السكة ..

جميل الموضوع .. ومشكلة بحق

الشنكوتي الكبير said...

يا سلاااااااااااااام انا التعليق رقم ميه
يبقى ميه ميه

المهم
انتي زعلانه ليه ده بيبقى لغتهم ونطقهم يفطس من الضحك مسليين خالص
هم بيضحكوا على الناس لما يتكلموا انجليزي ويعكوا فيه واحنا كمان بنضحك عليهم لما ينطقوا عربي
بجد يا ابي مش عارف انهي احسن نضمن لولادنا مستقبل ووظيفه افضل وطظ في لغتنا اللي راحت عليها ومبقتش تاكل عيش ولا نهتم بلغتنا اللي هيقروا بيها دينهم وقرآنهم
اما انك تقوليلي نهتم بالأتنين زي بعض فصدقيني صعب يكون الأهتمام متساوي اكيد حاجه هتضغى على التانيه

عموما حاجات كتير في بلدنا بالشكل ده والسبب اننا مبقناش بنهتم بهويتنا ولا بنفخر بيها بالعكس بندور بكل السبل ازاي نطمسها ونخفيها

سلاااااااااااااااااااااااااااام

طارق الغنام said...

الرائعة ابى
مررت للتحية والسلام ولرؤية جديدك
ولأدعوكى لقراءة الضحية بمدونتى المتواضعة
تقبلى تحياتى وشكرى
ودمتى بحفظ الله

دكتور بهــدوء said...

المشكله دي كبيره فعلا
انا اعرف ان منهج العربي عندهم
نحو وتعبير بس
وع النصوص والادب والقراءه السلامه
كنت بستمتع ف العربي بلغه القصص اللي كنا بندرسها
والمعلقات ف النصوص
ده اللي يحسسك فعلا بجمال اللغه
ربنا يستر
ع ما اعتقد بدأوا يحطوا ضوابط لطلبه الاميريكان دبلوما دلوقتي

appy said...

القط البرى
===========
ميرسى ليك ونورت الكوكب





عاليا حليم
===========
ان شاء الله هكون موجوده علشان اشوفك انت يا مالكا القلبى

appy said...

دنيتى الجميله
==================
يا قمر تنورى الكوكب كله اهلا بيكى
وفعلا مهزله الحكومه بقت مدارسها صعبه بصى انا مع اللغات بس المشكله انك تركزى انتى على العربى شويه بس ويبقى حلتيها



ليلـــــــــــــــــــــــــــــى
=================================

مبسوطه قوى انك متبعانى وشرف ليه بجد نورتى


m5m
=======
والله يا عم ما قصدت انت اللى اتكتمت غلط قصدى فهمت غلط ههههههههههههه انا رديت عليك وبعدين ابوك وهو حر فيك هتهزر ولا ايه

appy said...

بابا ابو خالد
===================

فرنسا ربنا طمنا جميعا عليها وميرسى يا بابا انى قريبه منك وشرف ليه وانا مش خايفه لانه كلام الله سبحانه وتعالى فاكيد بجد هيبقى معانا بس نحافظ عليه ومنخليش حاجات تانيه تدخل علينا






Sherif
========
ميرسى يا شريف واقتراح مظبوط يا ريت نطبقه فى بيوتنا يا ريت
نورت الكوكب

appy said...

الشنكوتي الكبير
=================
طول عمرك يا هوبا ميه ميه طبعا
بص يا ايهاب مفيش حاجه صعبه والوسطيه فى كل حاجه سهله بس للى عاز يبقى وسط صدقنى انما الباقى فلا
نورت يا واد يا شنكوتى


طارق الغنام
==============
ميرسى ليك وانا رحت وموضوعك هايل فعلا ربنا يكرمك




دكتور بهــدوء
==========
ولا اى ضوابط بنت خالتى رايحه فى شجرة وربنا يستر وتعيش قصه كفاح شعب مصر ههههههههههههه
نورت يا دكتور

Zika said...

ازاي في بلد عربي
نبقي مش مهتمين بتعليم العربي في المدارس الموجوده في بلدنا
اكيد العيب مش عندهم العيب علي الوزاره اللي سايباها سبهلله وكل مدرسه تهتم باللي عايزه تهتم بيه
....
حلوه اوي لانج دي ضحكتي لما قولت يا بس :D:D

appy said...

زيكا
=======

ما هو ده اللى غايظنى نورت يا متاخر افندى