زمن الابيض والاسود..............وزمن الالوان

بجد مش عارفه اقول ايه من الهلاوس دى اللى عندى بقى عندى حاله غريبه من العته المنغولى والهسهسه من اللى بشوفه اليومين دول والضغط بيرتفع ويضرب لخمسه الاف فولت وببقى ولا السد العالى مش عارفه ازاى (يعنى بولد كهربا للبيت طبيعى)
زمان كان زمن حب وود ومشاعر وناس محترمه بجد وبتخاف على بعضها وبتحترم خصوصيات غيرها وزمان كده كانت امى تحكى انهم كانوا بيلبسوا جيبات قصيرة وبنطلونات والبنت خارجه بشعرها (مش معنى كده أننا نخرج كده دلوقتى علشان اللى بيفهوموا الكلام غلط كل واحد حر فى تفكيرة وهيتحمل عواقب اللى بيعمله )وبصراحه انا شوفت صور امى لو فكرت البس قصير وهنا بكون لعبت فى عداد عمرى وفوته كمان( بتبهدلنى بحس ان قلل البيت كلها بتقع على دماغى ) واقعد اقولها ما انتى بتلبسى كده زمان تقولى زمان كان فيه أخلاق واحترام انما انتم جيل ما يعلم بيه الا ربنا (وتبدى حصه فى الاخلاق الرفيعه والتخينه كمان وفعلا دى الفجوة اللى ما بينا وبين الجيل القديم ونفسى تتقفل ونتعلم منهم ومن خبراتهم فى كل حاجه حتى الناس الجهله بتوع زمان اللى متعلومش هنلاقى عندهم حاجات كتير نتعلم منها لانهم عاشوا الزمن الحلو اللى فيه اخلاق والزمن فعلا المنيل اللى عايشين فيه دلوقتى) بس مكنش يقدر ولد يعاكس او يقول كلمه مش كويسه على الرغم من لبس البنت وكان شئ عادى بس مش كل الشعب بيلبس كده يعنى زى ما بنشوف فى افلام الابيض وأسود وكان لما واحد يخرج حتى مع اخته لو قابله واحد صحبه ميبصش له لان عيب ده ماشى مع اخته او اى بنت وخلاص ميسلمش عليه ولا كأنه يعرفه وكانت البنت لو مشيت فى الشارع صوتها على قوى يتقال عليها مش كويسه وكان فيه حريه فى كل حاجه( وزمن الجنيه الجبس هههههههههه) على راى تيته يعنى الجنيه يشترى كتير قوى وتحس فيه الخير مش دلوقتى الجنيه مش بيجيب كيس شيبسى وزمان كان فيه احترام فى السينمات والاماكن العامه كان فيه خروج وفسح بس محدش كان بيضايق حد زمان مكنش فيه موظف مرتشى ولو عمل كده ضميرة يأنبه والدنيا تقوم وتقعد انما دلوقتى بييييسسسسس يا مااااااان كام سنه فى السجن ونطلع نظبط الامور بالفلوس عادى يعنى هيتعوضوا (وده فرق كمان).
انما تعالى دلوقتى لزمن الكوووووووووول وبيس يا ماااااان وهاى شلته قصدى شله وهنكروز فين النهارده وهنسهر عند البت مين بقى لااااااااااا دى وحشه خنيقه ولو كلاااس

(مش قولت لكم جالى هلاوس وبتضحكوا عليا) احنا فى زمن انتهت فيه القيم والمبادئ زمن الخزعبلات والافكار الهلاميه والاعتماد على الغير زمن جاد شويرى وبوسى سمير وعمااد زعرور زمن الشعارات الكدابه ممكن الولد يروح يصاحب اخت صحبه وكمان البنت لو لابسه حجاب وماشيه فى الشارع بتتعاكس ويتقال لها أقذر الالفاظ بجد ومن أطفال صغيرة علشان بس تعرفوا ان مش بس اللى لابسه بنطلون وتى شيرت هى اللى بتتعاكس والبنات عارفين الكلام ده وكمان البنات عادى تروح تبات عند واحد صاحبها وصاحبها يبات عندها طيب ايه اللى حصل فى زمنا زمان مكنش فيه فرص عمل كتير بس كان فيه شباب عاوز يكافح بيعمل مشاريع اى حاجه حتى ممكن يعملوا اكل فى البيت ويبيعوة للناس الموظفين اللى معندهومش وقت والشباب كان بيتعلم بس ميستناش كيلو باميا ولا الرضعه فى الببرونة من ماما لا بيدور على شغل ومشاريع حتى لو صغيرة واحنا عندنا الفرص دلوقتى ممكن نأخد قروض من اى مكان ونبدأ مشروع حتى لو صغير كل حاجه بتنفع مفيش شغلانه عيب لامتى هنعتمد على غيرنا ولامتى هنقولك العيب فى الكيت الجنسى علشان التحرشات وفى البطاله علشان التسكع على النواصى لامتى هنعلق خيبتنا على شماعه غيرنا
الناس زمان كان عندهم اخلاق انما احنا فقدنا تقريبا احترامنا لنفسنا يا ريت زماااااااان يرجع تانى وكمان كان فيه اخلاق لو ولد شاف بنت بتتعاكس وهو ميعرفهاش يروح يبعد الناس اللى مش كويسه دى عنها انما دلوقتى هيص يااااااا مان ممكن يروح يزيط مع الزيطه (زى فرح العمدة كده أى حد معزوم فيه)
وعلى رأى ام كلثوم عاوزنا نرجع زى زمان قول للزمان ارجع يا زمان (بس حاجه اخيرة هى غلط منها الكلمه دى لان الزمان مش هيرجع بس احنا اللى هنتغير ونبقى ناس محترمه وكويسه وعندنا حياء ومنعتمدش على غيرنا

انا ليه بقول ده مش علشان ابيح حريات للبنات لا كل واحد مسئول عن تصرفاته انما انا بوريكم الفرق بين الزمن الجيميل القديم وجبت مقارنات على قدى كده فى حاجات يوميه واخلاق وتفكير عملى وفرق ما بينا وبين الناس الكبيرة اللى بتمنى اننا نتعلم منه
م)
)

37 اخبط وقول رايك:

الطائر الحزين said...

شوفى يا كوكب آآآبى

كل شىء فى الدنيا نسبى

يعنى تخيلى حضرتك لبس زمان مع اخلاق دلوقتى كانت هتبقى بظرميط

المشكلة ان لازم يكون فيه طريق نمشى عليه او على الاقل عارفينة

يعنى مش عذر ابدا ان الواحدة تلبس ملابس خارجة مادام الأخلاق كويسة


الموضوع فى كلمتين افعل ولا تفعل

والخطر الأكبر الا نقول على خطأ ارتكبانه انه خطأ او نحولة الى حق


تحياتى

appy said...

الطارئر الحزين
كلام حضرتك مظبوط جدا وفعلا انا مقولتش انه عذر انا بتكلم على الاخلاق عموما وعلى الزمن اللى اتغير طيب ما انا قولت على المحجبه انها بتتعاكس والله كتير جدا وعلى الشباب اللى مبقاش عنده مبدأ عموما

ابن حـجـر الـعـسـقـلانـى said...

و الله أنا أخويا (اللى أكبر منى بخمستاشر سنة) بيحكيلى إن زمان العالم الصيع اللى كانوا بيقفوا على النواصى و بيعاكسوا البنات كان لما واحد منهم يعاكس بنت .. باقى الشلة ما ترفعش عينها فى البنت دى خلاص .. دى بقت من نصيب اللى عاكسها و عيب الواحد يعاكس البنت بتاعة واحد صاحبه

و الله هو موقف غريب و متناقض .. بس طريف .. برضه كان فيه شوية قيم بتحكم حتى سلوكيات الصيع مع بعضهم

دلوقتى على رأى عدوية: كله على كله .. لما تشوفه قول له

مروة الزارع said...

الله ينور عليكى يا افندم

كلامك مية مية

انا كنت عاوزة اقولة من زمان

انا بوجة نص البوست الاخير بتاعك اللى بيتكلم عن الشغل ل

ميراميد

و

m5m

فعلا اللى عاوز يعمل حاجة بيعملها

الشغل كتير ومش هنفضل مستنين لما نقعد على مكاتب وغير كدة مينفعش

عقدة الخواجة امتى هنخلص منها

لية منشتغلش اى شئ

الكل دلوقتى عاوز يهج برة وفاكر ان برة هياخدوة بالاحضان

زى ما قلت قبل كدة

هو لما تروح تغسل صحون برة حلو

طب ما تشقى وتتمرمط فى بلدك احسن واهى اولى بيك

الله ينور عليكى مرة تانية

..................

عارفة كان نفسى ارجع زمان عشان البس شقتشى زيهم

هعهعهعهعهعهعهع
نيااااااهههههااااا

انا بهزر طبعا

انا مش احب ربنا يزعل منى

Desert cat said...

هايلة يا آآبى بوست واقعى واتكلم عن الحياة من كذا جانب
بالنسبة للبطالة فاللى عايز يشتغل مش بيتحجج ويقول اصل مفيش شغل واصل الحكومة بتطاردنى واصل الدنيا واقفه فى وشى ... دى بقى بتبقى حجة البليد اللى هو عايز ياكل وينام وياخد المصروف من ماما اصل بابا مش هيعبره لانه بيعلف فى عجل نايم فى البيت 20ساعه
والاربع ساعات الباقيين مقضيهم على النواصى يقرف فى بنات الناس
بالنسبة للبس فانا شايفه انه حرية شخصية
يعنى كل واحد يلبس اللى هو عايزه ... واللى يتكلم بالشوز يا قمر

الفاتح الجعفري said...

شوفي يااستاذه اابي
كان في مقوله بتقول
كنا نتعامل بالاسلام فلما فقدنا الاسلام قصدي التعامل يعني صرنا نتعامل بالفضل فلما فقدناه صرنا نتعامل بالعرف فلما فقدناه صرنا نتعامل بالفطره وها نحن قد بدلنا الفطره فبما نتعامل؟
كلام حضرتيك واقعي جدا لان فعلا زمان كان فيه اخلاق واحترام وحجات كويسه كتير بس للاسف دلوقتي العمليه بقت صعبه جدا طب مسألناش نفسنا ليه
اقول لحضرتيك من وجهة نظري
لان الناس للاسف فقدوا الكثير من اخلاق الاسلام وصدقيني طبيعه الشعوب العربيه والاسلاميه انه لايقومها الاالدين حتي وان بدا عكس ذلك حتي الاطفال يعني لو جه طفل وعمل غلط لو قلتله عيب ومينفعش ممكن يعمل نفس الغلط تاني انما لو قلتله ربنا هيزعل منك لابيخاف وحصلت امامي علشان كده لو الناس حست بالنار وبعقاب الله هتخاف وهتعمل حساب للغلط قبل اما تعمله
علشان كده قال النبي صلي الله عليه وسلم (اذا لم تستح فافعل ماشئت)0
وجزاكم الله خير علي الموضوع المميز ده

appy said...

ابن حجر العسقلانى
طيب واحنا بقى فقدنا المبادئ دى لما الصيع يبقى لهم احنا نفقدها وعدوية بقى له وجهه نظر ورأى الله يسامحك مقبوله منك ههههههههههههههه

مروة يا سلطه
والله برافو عليكى انك اتكلمتى كدهة وفى النقطه دى اصلها بتغيظنى انا كمان وبعدين شفتشك ده مين لا طبعا عيب ومش ده الغرض يا قله هههههههه
قطه الصحراء
ما انتى خير مثل هنروح لبعيد ليه وبعدين يا حبيبى لو يسيبوا النواصى يروحوا فين دا انا حسه ان النواصى والقهاوى هتسيبهم وهما مش هسيبوها برضه ههههههه
الفاتح الجعفرى

اهلا بيك كلامك صح جدا يمكن زمان مكنش فيه تظبيط شويه فى موضوع اللبس انما الدين كان محدش يقدر يجيى نحيته مش زى دلوقتى والناس كانوا متمسكين بيه ومعندهومش شعارات كدابه زى دلوقتى والمسميات الغريبه دى اللى داخله علينا واما موضوع الاطفال ده صح وانا معاك وابن اختى بنعمل معاه كده فعلا وهو لسه بيبى وربنا معانا جميعا

زعيم كمورا مورا said...

مين الى قال ان الزمان هو الى اتغير
ويمن الى قال ان مصرى دلوقتى غير المصرى زمان
الى اتغير
هما الاهل
الى بقوا مشغولين فى لم الفلوس ورسهم اكوام اكوام
علشان مستقبل العيال
ومش مهم بقى عندهم العيال يتربه ازاى او بيعمله ايه
زمان لما كان الواحد بيشوف واحدة بتتعاكس
كان بيدخل يدافع عنها حتى لو ميعرفهاش
وبيضرب وبيضرب ضرب موت كمان
بس دى مبتفرقش معاه
المهم عنده ان البت توصل بيتهم كويسة وانه يحافظ على رجولته
الى دلوقتى للاسف فى نهاية طريقها لانقراض
زمان لما كان الاهل اهم حاجه عندهم ان ولادهم يعرفوا الصح فين والغلط فين
اتمه المهمة والعيال كبرت ودخلت مرحلة الشباب
يبدئه يلموا الفلوس عشان مستقبل العيال والجواز بقى والكلام دة
لكن دلوقتى
اهم حاجه الفلوس عشان العيال ميتعبوش لما يكبروا
وعشان ميحرمهمش من حاجه
مع انهم اه صحيح وفرلهم المتع والسعادة المزيفة
بس حرموهم من اهم شئ حنان ودفئ الاسرة
العيال دلوقتى بقت بقوا يخدوا معلوماتهم ونصايحهم وطريقة العيشة
من الافلام الاجنبى
الى طريقة حياتهم مختلفة تماما عن طريقة حياتنا
هما ليهم اسلوبهم الى عايشين بيه مئات السنين
واحنا لينا اسلوبنا الى كنا عايشين فيه
حلو انك تتفرج على الحضارات التانية وانك تتعرف عليها من خلال افلمهم
بس مين من الاهل بيقول للعيال دة صح ينفعنا ودة غلط مينفعناش
الى اتغير عادات وتقاليد
كانت بتحمينا زمان
دلوقتى الشباب الكول
بيقول عليها انها دقة قديمة
ومتنفعهوش
مع ان لو كل بت فكرت فيها
حتلاقى انها معملوة اساسا عشان تحميهم هما
وتحافظ عليهم وعلى شرفهم وكرمتهم
الى دلوقتى بيقروا عليها الفاتحة
والراجل الى كانت بتحافظ على رجولته وشموخه
دلوقتى بعد مبصلها بحتقار وانها دقة قديمة وانها متمشيش مع الجو الكول الى هو عايش فيه
ضاعت معاها لارجولة والنخوة
وبقى الراجل المصرى
ولا هو مصرى ولا هو اجنبى
بقى هجين من الاتنين
وزمان كاناو بيقوله على النوعية دى كلمة مقدرش اقولها
بدل متدينى بالقله
وانا دماغى مش ناقصة اساسا
عايزين ترجعه ايام زمان
ممكن ترجع والزمان ممكن يرجع تانى
بس لما ترجعه العادات والتقاليد الى اتنست مع الايام
وحلت معاها قيم ومبادئ
الحيوان ولامؤخذة يعنى ميقبلش انه يعيش بيها
دة غير ان محدش بيفكر فى الحرام والحلال
ولو حد قال على لبس بنت مثلا انه حرام
بيقولوا عليه اخوانى
او انه انسان رجعى
الى اتغير
اننا سبنا الاصل
ورحنا للتقليد
ويارتنا عارفنا نقلد صح
زمان لما اروبنا حاولت تقلدنا
قلدتنا فى الحاجات لاى تفدهم هما والى بتتوافق مع اسلوب حياتهم
احنا لما حاولنا نقلدهم عملنا العكس تماما
اخدنا منهم الى يرضى شهوتنا
وسبنا الى كان ممكن يخلينا اسياد الارض
ياله نقول ايه
العيب على الى عمل للفلوس قيمة
وخلى التربية للزريبة
مهو الاصل التربية
اتمنى ان الجيل دة ميعملش زى الجيل الى قبله ويعرف يربى جيل صالح ويعرف الغلط فين والصح فين

الله ينور عليكى ياآبى
كلامك فكرنى بايام زمان
الى بتمنى انى اعيشها
ومافيش شيئ مستحيل
بس احنا نحاول نرجع الى فات
ونقول للزمان ارجع يازمان
على رئ الست

بحبك يامصر said...

انا هقول تعليقى اللى تقريبا بيتفق مع راى زعيم كمورا مورا
وان السبب فعلا فى التربيه اللى الناس انشغلو عنها منهم اللى انشغل عنها بلقمة العيش ومنهم اللى انشغل عنها بزيادة فلوسه وجمعها اكتر واكتر ومنهم اللى انشغل عنها بالمراهقه المتأخره المهم فى الاخر الاهالى انشغلو عن اولادهم وعن تربيتهم تربيه سليمه



اما بالنسبه لحكاية الوظايف والبطاله وكده انا عندى تعليق صحيح احنا بنقول ان مشاكلنا مش كلها اساسها الحكومه وان احنا لينا دور فيها بس فى دى لا الحكومه مسؤله لانها ادام هى كحكومه مش هتقدر تستوعب الاعداد دى من خريجى الجامعات ليسه تعلمهم تعليم جامعى من الاساس ما بدل كده تطور التعليم الفنى عشان الناس اللى هتشتغل فى المصانع اللى المفروض الحكومه تعملها تكون مؤهله علميا ونتقدم بجد بقى يعنى الاولى من تخرج مليون طالب جامعى مثلا ومش هيشتغل منهم الا 100 الف يبقى نقلل العدد ونزود فى التعليم الفنى ونعملهم مصانع ومحدش يقول اننا دوله فقيره منعرفش نبنى مصانع ونطور من ادأنا الصناعى
وشكرا

الجمعاوي الاصيل said...

بصي حضرتك

اللي حاطط لنفسه هدف هيوصله مهما

كانت الصعوبات ومهما كانت العقبات

واللي عاوز يشتغل هيشتغل

بس لازم يستحمل ولازم يصبر

ويتوكل على الله عز وجل

وهو يرزقه من حيث لا يعلم ولا يحتسب

موضوعي الاخير ايام من امتحاناتي

فرنسا هانم said...

ابى يا عسل ام كلثوم مغلتطشى لما قالت عايزنا نرجع زى زمان قول للزمان ارجع يازمان
لانها ببساطه بتقوله مستحيل ده يحصل
يعنى فى المشمش لو رجعنا لبعض
اما باقى التدوينه
كل جيل وله سلبياته وايجابياته
والجيل القديم برضه كان فيه معاكسات
وعلى فكره
كل جيل بيجى بيترحم على مكارم اخلاق الجيل اللى قبله
واتفرجى كده على فيلم قديم ابيض واسود
تلاقى الست بتقول لبنتها نفس الكلام اللى امهاتنا بيقولوه دلوقتى

أنونيمس said...

وزمان اللي تقصديه .. كان بردك الناس يقولو ..زمان كان احسن والناس احسن
وكانت الست ماسيبش بيها الا ع القرافة

المشكلة مش ف الزمان

المشكلة ف اللي عايشين الزمان

عصفور المدينة said...

تذكرت وأنا أقرأ قول الله عزوجل

فلولا كان من القرون من قبلكم أولوا بقية ينهون عن الفساد في الأرض إلا قليلا ممن أنجينا منهم واتبع الذين ظلموا ما أترفوا فيه وكانوا مجرمين

Ahmed Al-Sabbagh said...

هو أنتى كدة خفيتى المدونة

ده انتى اللى بقيتى خفة ..وش مطلع لسانة

بصى يا ستى

هنشوف موضوع العته المنغولى والعهسهعسس ده

أولا انا عجبنى جدا تعليق الطائر الحزين
وثانيا انا حاسس ان المظهر بالنسبة للبس ما أختلفش كتير

وزى ما بيلبسو عريان دلوقت

زمان بردو كان فى ويمكن اكتر

انما اللى اختلف فعلا السلوك

ولو كان فى قلة ادب زمان كانت قلة ادب باتيكيت ولطافة

دلوقتى بقى الواحد بيشوف حاجات وبالذات فى قلب القاهرة الزحمة

وباتمنى الارض تنشق وتبلعنى

واقول ليه يارب ما خلقتنيش فى القرن التانى الميلادى

ربنا يرحمنا

وفين الشاى

انا قولت هاجى الاقى ساندوتشات على باب المدونة ولا حاجة

اجى الاقى القاعدة اورديحى كدة

انا شوفت الصور

امممممم

انا شاكك ان الصور دى متفبركة

(وش مطلع لسانه)

يعنى لسه بردة نيتى منيلة

هههههههههههههههه

مش هرحمك

ولا بلاش

احسن تمسكى عليا حاجة انتى كمان

ومعرفش اخلص

كل سنة وانتى طيبة عشان العام الهجرى الجديد

ومنتظر جديدك

تحياتى
أحمد

د/اجدع بنوته said...

الله انا كان نفسى اعيش زمان اوى م كتر حكاوى ماما برده عن زمان

بس لا زمان لا كان فيه مدونين ولا نت ولا كهربا م اساسه

لا يااختى هنا حلو دلوقت
بس ياسلام بقى لو يبقى تكنولوجيا وتطور دلوقت باخلاقيات زمان

كانت تبقى اعلى عيشه بس الحلو مبيكملش

وبعدين اصلا دلوقت هو التطور الطبيعى للتكنولوجيا برده

يعنى حد هيفتح التلفاز يشوفا دانا ونانا ولما ينزل الشارع مش هيعاكس يعنى

ده حتى يبقى بيستهبل هههههه

بوست روعه

appy said...

زعيم كمورا مورا
أيوة انا عاوزة نتغير كلنا اما بالنسبه للاهل ففى بعض الاوقات أوافق على ما تقوله ولو ان تصرفهم ده بيكون نابع من خوف بس فعلا بيكون له توابع وحشه

بيحبها

اهلا بيك مينفعش يقلل العدد بتاع المتعلمين لان الواحد لما يكون متعلم ويتعلم مهنه كمان بيكون أقوى وأفضل من الجاهل اللى عنده حرفه من غير تعليم فالتعليم اساسى فبرضه العيب فينا احنا لاننا بنستكبر على الحرف

الجمعاوى الاصيل
ربنا معاك فى الامتحانات انت وكل اللى زيك والله يفتح عليك فى كلامك

خالتى العزيزة فرنسااااا

والله انتى اللى زى السكر والعسل كمان صح كلامك بس لازم نقر ونعترف ان زمان برضه كان افضل كانت الحياة اهدى من دلوقتى بكتير

انونيمس
ما علشان كده انا بقول نتغير لان الزمان واحنا واحد

أ/عصفور المدينة

بيشرفنى وجودك دائما وتغريدك عنى وجعل الله الايه فى ميزان حسناتك ان شاء الله

appy said...

خاللللللللو احمد الصباغ
القاتم بدير النحاس انت اللى جبته لنفسك لو مشكة عليك غلطه انت حر هههههههههه وابقى قولى قبل ما تيجى اعمل لك سندوتشات اللى بتقفل البق دى المرة الجايه نورتنى

د /أجدع بنوته

نورتى بجد بس دانا ايه بس والله احنا فى مصر عندنا البنات زى القمر طيب هاتى دى وخليها تقف جنب بنت من بناتنا المصريين وغسله وشها هتشوفى العجب
وميرسى ليك على تعليقك فى كل البوست القديمه وكويس انى ضحكتك ومتخافيش على عربيت هو البادج هو اللى بيفكرك هسجل لكى شريط يقولك كل شويه انتى دكتورة لغايه لما تزهقى هههههههه

اجندا حمرا said...

هاي ابي

البوست بتاعك واقعي اكيد زمان مختلف في كل حاجه عن دلوقتي يمكن رتم الحياه هو اللي غير نفوس البشر و خالاها عمليه زياده عن اللزوم بس برضه ارجع و اقول ان مش كل الناس زي بعضها دلوقتي بتلاقي تفاوت كبير اوي بين البشر يعني فيه ناس لسه عندها مبادئ و قيم و بتحاول تحافظ عليها

وفعلا برضه موضوع البطاله ساعات بيكون شماعه بيعلق الخريجين عليها خيبتهم بمعني ان اغلبيه خريجين اليومين دول عايز يتخرج و لما يجي يبتدي حياته العمليه يشتغل مدير بذمتك ده اسمه كلام؟طب فين الخبره و هل هو مستعد للأداره دي؟
بتمني ان الأيام اللي احنا بنعيشها تكون اكثر بهجه و سعاده و مبسوطه انك قابلتي قطه الصحراء العسل لأنها من الشخصيات الجميله اللي بعتز بصداقتهم
تحياتي ليكي و للجميع

Nabila said...

اهلا ياآبي كل سنه وانتى طيبه

مش عارفه يمكن انا بنادي زيك لان كل انسان يتصالح مع نفسه ويكون شخص كويس سواء بنت او راجل او ست او او او وان العمر مهما عدي منه احنا لازم نستفيد بكل دقيقه

انا معيشتش زمان بس عايشه دلوقتى وبشوف مواقف كتير غريبه بس بصراحه نا اصلا لا اعترف بكثير من الامور دي بعتبرها كانها مش موجوده أقلمت نفسي على ان مفيش فن مفيش اغانى كل الكلام دا للاسف اتلغي من قاموسي تماما
لانه مش هقدر اتجوز واجيب اولاد واسمح ليهم يتفرجوا على القرف دا لانى انا نفسي مش حاباه والحمد لله امى واخواتى زي بالظبط مش غاويين الحاجات الهابطه
معلهش طولت شويه فى الرد
على فكرة الصفحات تقيله اوى اوى عندك ياحبيبتى ياريت تحلى المشكله دي

m5m said...

appy العزيزة

فى الحقيقة أنا كنت داخل أعلق فى امان الله..وأنا متعود قبل ما احط تعليقى أخد فكرة من تعليقات اللى قبلى..مش من باب الغش يعنى لكن من باب عدم تكرار الكلام والاستفادة برضه...
المهم لقيت الأخت مروة اللى مش عارف ايه حكايتها معايا داخلة عشان تلطش فيا..ليه معرفش؟
قلت ياواد اصبر أكيد أختنا أبى حاتقول لها عيب عليكى كده..لقيتك بتقولى لها برافو عليكى..الله؟ دى مؤامرة بقى؟

وحيث ان الموضوع كده..فأنا قررت ماديكوش الفرصة لاستكمالها...وحاحرمك من تعليقى

......................

ابقوا ورونى بقى حاتعملوا ايه

mohaawad8 said...

اولا اشادة بالمدونة واسلوب الكتابة لان دي اول مرة ادخل مدونتك

انا رايي ان زمنا مش زمان الوان
احنا زمان اسود وبس اللي قبلنا كان ابيض واسود

اكيد زمانهم كان احسن في الاحترام والكرامة والاخلاق والتعاملات
بجد بحب اسمع كلام اللي يحكولي عن زمان وجمال زمان وطبعا كل كلامك صح ومتفق معاكي في كل نقطة ده بما اني في وسط المعمعة دي

بس خروجا عن الموضوع الي فرع له
سؤال سالته لنفسي ايه اللي حصل
هنقول انحلال اخلاقي طب سببه ايه تدخل من برة ، الناس اللي في البلد دي اتغيرت
طب ايه الفرق بينا وبين زمان
اكيد كل ده كان موجود زمان
بس كانت الحالة تانية

كل واحد هيفكر في اجابة بس دائما هي نسبية

تحياتي

MerMaid said...

عزيزتي ابي

اولا كلامك واقعي وكلنا بنقوله
بس زي ما تكرم زملائي و قالولك
كل جيل بيترحم علي الجيل اللي قبله
هي دي طبيعة البشر و طبيعة الازمان

وبرضه زي ما قبلي قالولك
الزمان اللي كان قبلنا كان برضه فيه عيوب و بلاوي ومعاكسات و كل الكلام ده

المشكلة بس اللي عندنا هي الانفتاح
علي العالم
اللي هو عن طريق الدش والانترنت

مكنش فه كدة زمان
وعلي فكرة
ده اللي سبب الكبت الجنسي و التحرش و الاغتصاب

الموضوع بتاعك ده حلو قوي
انتي ممكن تعملي بوست عن كل حاجة لوحدها
انا مش عارفة ارد كويس لان الموضوع بجد دسم

احييكي عليه
:)))

نورتيني

------------------------------
اما مروة الزارع فلا تعليق علي كلامها

:(

اشكرك يا ابي مرة تانية

3ala asm masr said...

مش الزمن هو اللى وحش أحنا اللى بقينا وحشين
زمان كان فى مشاكل وكان فى ناس مش لاقيه شغل وكان فى ناس تعبانه وأرفانه
بس الناس كانت بتحترم بعض وتخاف على بعض
لكن دلوقتى بنكره بعض وبنمد أدينا فى جيوب بعض كله عايز يخطف ويجرى
ربنا يعينا ويصلح حالنا

DR.HAMAS said...

سلام عليكم أختنا آبى

انا آسف فعلا انى عدانى الموضوع اللى فات

الصراحة موضوعك ده مهم جدا

بس اللى انا شايفه

ان زمان كان فيه اخلاق بدون علم كبير

و الوقتى زاد الفساد الخلقى
و لكن يقابله انه زاد العلم

و أصبح فيه موجة كبيرة كضادة للفساد الخلقى الحالى

و ده تلاقيه فى كمية الشباب و البنات اللى بقول ملتزمين و محتشمين

زاد جدا جدا عن زمان

بحس انه تطبيق للقاعدة الفيزيائية

ان لكل فعل رد فعل مساوى له فى المقدار و مضاد له فى الاتجاه

كل ما بيزيد الفساد بيزيد أهل الأخلاق برضه

طبعا انا مع الاحتشام جدا فى لبس البنات

و بالأخص مع رأى الاسلام فى اللبس
انه يكون فضفاش لا يصف و لا يشف ما تحته
طبعا زى ما انتى فاهمة

انتى قلتى ان البنت اللى لابسة حجاب بتتعاكس هى كمان زى اللى لابسة بنطلون و بلوزة

بس بالتأكيد ده مش معناه ان البنات تلبس اى حاجة بقة و خلاص طالما كلهم بيتعاكسوا

لا طبعا

البنت لما تلبس اى كلام هتتحاسب حساب عسير من ربنا فى المقام الأول
لانها تسببت فى انها تتعاكس
و طبعا خالفت أوامر ربنا الصريحة
اللى هى مش مخالفة للحريات اطلاقا

و مهما كان فالملتزمة بالزى الاسلامى المحتشم

بتكون مقدرة و محترمة جدا من المجتمع

انا شخصيا لو شفت اى بنت بتتعاكس فى الشارع
مش هاطيق ابدا و لازم ادافع عنها
مهما كان لبسها

لكن عمر ما هيكون شعورى و انا بدافع عن الملتزمة بحجابها و زيها زى التانية

التانية هبقى بقول بلسان حالى انتى السبب

انتى اللى فتحتى باب المعاكسة
و انا فى الحالات دى بنصحها
مبعرفش اقعد ساكت


أشكرك للغاية على طرح الموضوع الغاية فى الخطورة

و ربنا يكرمك



د.حمـــــاس

نوسه said...

بس انا حاسه ان الدنيا لسه بخير
يعنى مثلا حصل موقف كده وكنت جايه من الكليه وبعدين كان فى شلة ولاد واقفين على اول شارعنا وانا معديه فواحد عاكس وقال كلمه راح واحد تانى ضربه حتة قلم وقاله احترم نفسك اختك ممكن تبقى فى مكانها

المشكله مش فى الزمن فعلا
المشكله فى الاخلاق زى ماقولتى

نعيب زماننا والعيب فينا ..وما لزماننا عيب سوانا
ونهجو الزمان بغير ذنب .. ولو نطق الزمان لنا هجانا

بالنسبه للشغل بقى
ليا ملحوظه بس
الشباب اللى مستنى الشغل على فكره انا متفهمه وجهة نظره
اولا لو واحد مهندس واتخرج وملقاش شغل غير بياع فى مكتبه
زميله اتخرج بتقدير زيه او ساعات اقل منه واشتغل فى مكتب هندسى كبيررر بواسطه او بفلوس
ماشى نصيب وكل حاجه
بس فين تكافؤ الفرص؟؟
فين العدل؟؟
لو الاتنين ملقوش شغل غير شغل متواضع مثلا يبقى اوكى مقبوله..المساواه فى الظلم عدل
لكن مش واحد يشتغل بواسطه والتانى يشحت

appy said...

أولا اشكر كل الناس اللى نورونى حتى اللى اول مرة يدخلوا هنا بجد سعيده انى اثرت الموضوع بينكم كلكم وشوفنا حاجات يمكن بنشوفها بس بتمر علينا عادى واتمنى ان لما بنزل موضوع نستفيد منه كلنا ولما برضه حد ينزل موضوع غيرى كلنا نستفيد منه وطبق أرائنا دى صح


انا ليه تعليق واحد بس على M5M

متزعلش بس انا هنا بقول اللى عاوز يرد على حد يرد براحته طالما الكلام موججه ليه او حتى ليه وهو شايف من وجهه نظرة ان كلام الاخر غلط فاللى عاوز يرد على حد يرد لان انا هنا فى كوكبى عاملاه علشان المناقشه بس من غير تجريح وعموما يا قمر انا لما كنت بقول لمروة برافو عليكى كنت بقولها انها فهمت موضوع الاعتماديه فى الشغل مش علشان بتهاجمك انت ومرمريد وبعدين هضربك لو معلقتش وابعت فيكونات فضائيه من كوكبى تخطفط وأحبسك هنا ليل ونهار

appy said...

نوسه
يا حبيبتى شباب المنصورة جدعان انتى هتقولى ليه على اهل بلدى بس مش كلهم الحق يقال هههههههههههههههههههههههههه
اجندا حمرا ونبيله ومحمود اهلا بيكم فعلا وكلامك اقنعنى يا اجندا بصراحه عاوزين يبقى مديرين والله اتمرمت لغاية لما وصلت لمدير دى
ومحمود منور قوى الكوكب

د/حماس
عامل ايه فى الامتحانات ربنا يطمنا عليك

السـيد شبـل said...

عزيزتى ....


ارجعى اقرى الموضوع واقرى وجهة نظرى عن الاشتراكيه وعلاقتها بالاسلام ثم عبرى عن رايك


هناك موضوع طويل وعميق متصل بالشعار


هنتظر تعليقك

bondque2001 said...

معى لاعادة الحب للمجتمع المصرى
وشكرا يا ابى على زيارتك لمدونتى وياريت مش تحرمينا من زيارتك ابدا
http://bondque2001.blogspot.com/

appy said...

سيد شبل
اوكى بس انا كنت مش موافق عن ضم الاتنين فى حاجه واحد وهطبع المقال كله واقئه فى البيت وعد واعلق تانى
بندق 2001

جارى يا فندم وعولم نورتنا

NIDAAL PAL said...

كيفك آآبى
يارب تكونى بخير
طبعاً لازم يبقى فيه اختلاف
زمان ما كانش فيه دش ولا بتاع
زمان كان فيه احترام وده الى مفقود حالياً او خارج نطاق الخدمة
دلوقتى الشباب بيعاكسوا البنات فى الشارع عادى خالص و امام الناس ولا حد بيقولهم عيب ولا بتاع
يعنى كلوا ماشى
ربنا يهدى الجميع و ايانا
بس برده يا آآبى البنات عليهم عامل كبير هما كمان
يعنى البنت لما بتلبس قصير ولا بتاع بتقول دى حرية شخصية
طب والولد هو كمان ممكن يعاكس بافظع الالفاظ و يقول حرية شخصية
يعنى هيا معادلة
يعنى الولد لو شاف بنت منقبة او محجبة و لبسها محترم و ماشية فى الشارع استحالة هيفكر يعاكسها
واصلة الفكرة .. هاا
يلا سلام

Rain man said...

يا ريت بلاش الفاظ مش كويسه علشان مضربش بقله فى الدماغ على طول

اوعدك هحاول
..

صدقينى يا آبـى
احنا فى زمن الاخوات البنات بيلبسوا فيه هدوم اخواتهم الصغيرين
اما الصغيرين فمش مهم يلبسوا حاجة طبعا
يعنى الميكرو جيب بتاعة زمان موجودة و الحمد لله
سواء بقى اخلاق الشباب اختلفت او ما اختلفتش
المهم انها موجودة
و الجنيه ممكن يجيب اتنين كيس شيبسى مش كيس واحد زى ما انتى قولتى
يعنى الصورة مش قاتمة اوى كده
ده غير انك ممكن تجيب بالجنيه جبنة رومى و تتعشى
ما علينا
المدونة بتاعتك جميلة اوى
ومقالاتك رائعة
و ليا سؤال ؟
ياترى ليكى مقالات بالفصحى ؟؟

رجل المطر ...... الشمال مش اليمين

m5m said...

appy العزيزة
............
ياشيخة ده أنا كنت حالف...ليه بس تحرجينى بذوقك الزيادة ده..يعنى تصالحينى هنا و تصالحينى فى مدونتى كمان؟
ايه الهنا ده
يافرحتك بابنك يا أم محمد
..............................
ع العموم..تنزل المرة دى..لكن اعملى حسابك
المرة الجاية
لا ممكن تنزل الأرض أبداااا

appy said...

نضال
انا الحمد لله كويسه ومبسوطة انك بتقرأ ليه من وقت لتانى وسمعت عنك كل خير انت والدكتورة ايمان كمان المهم مش شرط اللبس انا بتكلم عن الاخلاق لانى شوفت كتير محجبات بياعلكسوا وتدخلت لواحده من قبل كده فى خناقه وانا معرفهاش بس القيم هى اللى اتغيرت

رجل المطر
منورنى بس انا مش بكتب بالفصحه ابقى شوف مقالاتى قبل كده يمكن يعجبوك

محمد
انا مقدرش على زعل اى حد بيزور كوكبى ويأخد من وقته ويقرأ ليه

Ahmed Al-Sabbagh said...

انا جيييييت

ازيك يا أحلى كوكب فى منطقة شمال القاهرة التعليمية

وازى مدونتك الرائعة

على فكرة كدة المدونة بقت خفيفة

اللهم اجعل كلامى خفيف عليها

:)

انا اتشرف بيكى والله وسعدت بلقائك جدا مع مجموعة المدونين اللى اكتر من أخواتى بجد

ويارب دايما كدة ربنا يجمعنا على خير

بس ما كنتش متخيل انك بحجم الثقافة والتمرد والقدرة على النقاش ده

بجد حاجة جميلة يا آآبى

تسلمى لنا وتسلم مدونتك

تحياتى

أحمد

Anonymous said...

انا جديد يا جماعة السلام عليكم ورحمة الله
عايز اقولكم اننا كلنا بنضحك على بعض مين فينا مرتاح وهو مش مع ربنا هتقولو الاخوان محرمين كل حاجة هقلكم لا الاخوان هدفهم الحكم فى الدولة لاثبات الشريعة الاسلامية على ارض الواقع فى بلدنااما انصار السنة ناس محترمة جدا جدا جدا ودايما بيضحكو ووشهم بشوش اى حد بيرحلهم بياخدوة يعلموة دينة من الالف للياء وانا سمعت تعليق من وحد من ميت غمر بيقو ناقص يقطعو عننا الهوا
ياخى اتقى الله انت مسلم ولا لا دة دينا
طيب بالله عليكم انا هسئلم واقولكم انتم عاجبكم الحال فى مصر النهاردة
كمل اللى الناس دى بتعملو يا جماعة لارضاء ربنا
دول بينقذونا من الفتن سواء شباب او بنات
معلش هطول عليكم هو احنا لو ماشيين على الشريعة كنا نشوف ولد النهاردة ماشى م بنت وابوها عارف وامها ويقوا دانا بحبها
الامام ابن تيمية كانمرة بيغسل وجهة امام بيتة وسمعة احد الصالحين بيقول اللهم انى اعوذبك ان ازنى قال لة الرجل اللذى سمعة يدعى بهذا الدعاء اانت تعوذ من الزنا وكلنا طبعا عارفين ابن تيمية رحمة الله رحمة واسعة
فرد الامام ابن تيمية على الرجل مادام ابليس حيا فانا لا اامن على نفسى وابو بكر رضى الله عنة قال لا اامن لمكر الله حتى تزول قدمى من الدنيا
يا جماعة اللى الناس دى بتقولة هو دة الشريعة حق وبعدين عايز اوضحلكم حاجة انتم اخدتم فكرة ان الناس دية اسلوبها العنف من لاعلام والتلفزيون انتم ما قربتوش منهم خايفين
وهو دة هدف الاعلام والثقافة الحديثة والحضارة العلبة استودكم الله اللذى لا تضيع ودائعة

Anonymous said...

احلى حاجة فى الدنيا صحبة الله
هو فية احسن من الطهارة ربنا خلق كل واحد ميسر لعملة خلق بشر للنار وبشر للجنة وكل واحد ينظر فى نفسة ليرى ان كان يعمل بعمل اهل النار ولا اهل الجنة علشان يعرف هو اتخلق للنار ولا الجنة والانسان ميسر ودة من رحمة ربنا