ده حلم ولا حقيقه


انا مش مصدقه عنيه دى فى احلام بتبقى حقيقه اه والله بجد فتحوا المعبر علشان ندخل حاجات لفلسطين طيب كويس بس السؤال بقى ومن غير خبث (ومش مفتحه عين ومغمضه عين ولا النحله والدبور اللى متجوزين وعايشين فى دماغى ما يزنوا هما واولادهم ولا يعملوا الفرح بتاع كل يوم ) انا هتكلم بما انى اقدر اونكل مبارك بجد يعنى لما يا ريس فتحت المعبر هتسيب اللى رايحين يودوا معونات يعدوا بالسلامه ولا ايه هتعملوا مصيده زى الفئران وتعملوا لهم مطبات هوائيه وصناعيه وحلزونيه......
ولا هيرجعوا من غير اعتقالات يعنى سؤال برئ جداااااااا (يا نهار انا بتكلم فى الباميا قصدى السياسه مش مهم انا مش خايفه عادى هى هترسى على ايه اونكل الظابط هيجرنى من قفايا ويقررنى انى انا اللى عملت الانقلابات وزودت الاسعار وتأمرت مع السحاب علشان تنزل مطر وتغرق شوارع القاهرة بمية المطر علشان بعت البلاعات خرده لبتوع الصين ولا انا اللى حفرت الشوارع بعد ما سفلتوها ولا حتى انى تامرت مع بتوع العيش انهم يسخطوا الرغيف علشان منقدرش نشوفه بعيونا المجرده عادى هو بس يؤمر يشخط فى اى حد واقف جنبى وانا هعترف على طول انا مش عاوزاهم يضايقوا خالص) .
لا بجد انا مبسوطه جداااااااااا اولا علشان هتبدأ المشكله تتحل مع انى زعلانه من الفلسطنين علشان ضربوا المصريين اه هما متعشمين فينا خير بس مش تيجى على مصلحتنا يعنى يبقى فيه تكسير وسرقات وحركات لان مش كله نفوسه كويسه وممكن فى ظل الزحام ده والتوافد يحصل حاجات مش كويسه كتير وتضر بالجانبين يعنى ومش عاوزين برضه نبقى ضدهم لان بصراحه مش هيضربوا عندنا واحنا نسكت يا ريت يظبطوا بس نفسهم مش اكتر ويبقى فيه نظام. الحاجه التانيه بجد مبسوطه قوى ان الدنيا بتقوم وبتقعد عندنا علشان نطالب بحقوق الناس والاخوة الفلسطنين طيب واحنا يا بشر حقوقنا فين طيب ما هو سياده الريس اهو اونكل مبارك طلع كويس وسمح بحاجات كتير طيب ليه مش بيسمح بحاجات لين (ولا احنا ولاد البطه البيكينى )ا يعنى يخفض فى اسعار الحاجات بجد لان ده صعب انا مش عارفه الاسر اللى بتاخد دخل صغير دى هتعمل ايه ولا عايشه ازاى وكل شويه يقرفونا هيلغوا الدعم هيسيبوا الدعم الله طيب ما ترسوا على حل بقى لما انتم بتناقشوا الموضوع بتقرفونا بيه ليه ولا بيشغلوا وقت فرغنا وعقولنا لاااااااا انا عرفت هما بيعلو الضغط عندنا ويحركوا الامراض المستوطنه بداخلنا بقالها فترة علشان يبقى ضربوا عصفورين بحجر الناس تموت من الغيظ ويبقى تخلصوا من ازمه السكان والمواصلات بس بكده بيدوا فرصه للتجار يلعبوا بينا ليه دا انا عندى رغيف العيش بيتباع بعشرون قرش ولا يرى بالعين المجرده هروح اشترى ميكروسكوب بعشرة الاف جنيه علشان اشوفه وبعدين ابدا اكله اصلا يكون جالى هلع وفزع من شكله اول ما اشوفه لانه غير صالح للاستخدام الادامى وممكن يجيلى مرض هبل الخرفان وانطح طيب نعمل ايه. بس انا مبسوطه ومزقططه اووووى كمان عارفين ليه انا رحت نفشت ريشى وبقيت عامله زى الدندى كده (الديك الرومى يعنى )على بتوع شركة النظافة وخوفتهم جدا وقولت والله هشتكيكوا لاونكل الظابط لو مجتوش نظفتم السلم بتاع العمارة كل اسبوع فى ميعادكم علشان يوظبوا على نظافه السلم (بما اننا شعب يخاف ميختشيش ) وفعلا عملوا كده وبقوا كل اسبوع ينظفوا السلم فى ميعاده والحمد لله الاولاد فى العمارة يستنوا اليوم ده ويعملوا هجوم جماعى على السلم والاقيهم بيعملوا مؤتمرات ومؤامرات على السلم ويوسخوا السلم تانى بس اعمل ايه هى ديتها بس ازعق فيهم مرة بس من غير ما اضحك ويحرموا يوسخوا السلم (لان بصراحه كل ما ازعق يقعدوا يضحكوا عليا ويفتكرونى بهزر علشان شكلى بيضحك ومش عارفه احل الموضوع ده بجد). وكمان المطب الرخم اللى عند مستشفى مبارك للشرطه سفلتوه ومبقاش عامل زى الكوبرى بالنسبه لبطوط هما مطبين وراى بعض بس يبوظوا عفشه عربية هامر النهارده الصبح لقيتهم شالوا المطبات دى فرحت قوى انا وبطوط. هو سؤال برضه برئ وبصوت واطى من غير ما حد يسمع اهو هو ليه كل حاجه فيها اسم اونكل مبارك بتبقى بايظه كده ............... ايه محدش يعلى صوته بقى فى الاجابه انا بقولكم اهو انا مليش فى الباميا فاهمين مش عاوزة هزار اصل مش انا اللى بسال دول النحله والدبور اللى مستوطنين فى دماغى هما واولادهم مش انا يعنى علشان محدش يفهم غلط ومستنيه الجديد اللى يفرحنى ويفرحكوا تفتكروا الاسعار هتقل ولا هتزيد ولا هتجنن اختار حاجه من دول ومن غير ما حد يعلى صوته فى الاجابه الله يكرمكوا

53 اخبط وقول رايك:

أبوشنب said...

ههههه

ده واقع بيفرض نفسه

لا هو بمزاجه

ولا بمزاجنا

دي جزء من مرحلة الفوضى الخلاقة

بكرة هيسمحو لهم انهم يبنو بيوت كمان يا ستي ناحية مصر

ويعيشو

ويفضو ناحية فلسطين لليهود

ويا دار ما دخلك شر

والمعونات بتنزل زي الرز

Desert cat said...

هو مين اللى قالك ان مبارك هو اللى سمح لهم يدخلوا شتروا حاجات من مصر
الشعب الفلسطينى من الجوع والبرد والناس اللى بتموت قدام اهاليها كسروا الجدار الاسمنتى اللى بينا وبينهم
يعنى مجبر مبارك لا بطل
والمضطر يكسر الجدار الحدودى

appy said...

ابو شنب

مرحبا بك هنا اممممممممم انت اتفقت مع النحله والدبور عليا ولا ايه مش عاوزة اروح عند اونكل الظابط

ســـــــمــــكة said...

لحد امتى هنشكي لحد امتى هنتكلم ونحكي
بس هنفضل زي ما احنا لطالما الجبناء رؤسائنا والخراب حكومتنا ومفيش احساس ولا رحمة

عجبتني مدونتك اوي
تحياتي

appy said...

قطه الصحراء

ما هما بعد ما فتحوا الجدار ده مبارك سمح ليهم ان الموضوع يبقى قانونى ويسمح للناس من عندنا انهم يدخلوا لهم حاجات

احمد الجيزاوى said...

بصراحه او طلع الرئيس مبارك فعلا هو اى سبهم يدخله يشترة حاجات بصراحه انا احترم الراجل دة وارفع له القبعه
وانا فعلا سمعت التصريح دة من رئاسه الجمهوريه
ولكن مطلوب بصراحه تحرك اكتير من كدة مطلوب التحرك على مستوة رئيس دوله ودوله وشعب
تحاتى
احمد الجيزاوى

الطائر الحزين said...

سبحان الله
ممكن نفكر فى الامر شوية

ان يكون المعبر مفتوح هذا هو الامر الطبيعى

اما غلقة فهو الامر غير الطبيعى

واعادة فتحه هو عودة للأمر الطبيعى ولا يحتاج الى شكر أو استقبال الفاتحين


سؤال

شخص مداوم على الحضور الى عمله فى كل يوم فى موعده تماما؟؟


هذا الشخص
يستحق مكافأة-لا يستحق- يستحق جزاء

تحياتى

احمد الجيزاوى said...

لتذكرة ونصرة الشعب الفلسطينى

لجنة الإغاثة والطوارئ:

-للتبرع على أرقام الحسابات الآتية:
بنك فيصل: 212051
بنك مصر: 18810/1/101
البنك التجاري الدولي (CIB): 4-9000291-10
بنك قناة السويس: 0/1/21090
-أو تبرع مباشرة في مقر إتحاد الأطباء العرب على العناوين التالية :
42 ش القصر العيني - دار الحكمة – القاهرة - جمهورية مصر العربية.
نقابة أطباء القاهرة-مدينة نصر-تقاطع شارع علي أمين مع شارع مصر للطيران-بجوار المخبز الآلي
22شارع بورسعيد -الشاطبي- الإسكندرية
373شارع جمال عبد الناصر-المندرة-الإسكندرية-تلفون: 0101930344

walaa said...

ااابى
ازيك عامله ايه
ثانيا عارفه ليه مبارك فتح المعبر علشان الناس اتحركت وقالت لاه المعبر يتفتح
وعارفه ليه هو بيزود الاسعار كل يوم على للى قبله علشان هو عمال يزود الاسعار واحنا ولا واخدين بالنا
ولا بنقوله انت بتعمل ايه حتى
ولا حد فينا اتحرك بس صدقينى لو نتحرك هنعمل اكتر من كده وياريت نحسبها صح بقه عارفه ليييه يعنى 80مليون نسمه مش قادرين يغيروا حاجه
تحياتى لك ولاء
وليييه نتكلم بصوت واطى دى بلدنا ودى حقنا هنتكلم بصوت عالى

فرنسا هانم said...

الحقوووووووونى بدكتور
مالك يا ابى يا حبيبتى ؟؟
مانتى كنتى كويسه
ومالكيش دعوه بالباميه
ليه الكلام فى الويكا
عارفه الويكا ؟؟؟؟
باميه صعيدى ناشفه
لا
انتى تيجى تدارى عندى فى السويس
وامرى وامرك لله

مهندس مصري said...

:(
كلها فترة بسيطة
أيام و يرجع الحصار
آلاف من جنود الأمن المركزي بمدرعاتهم تدفقوا لمنطقة الثغرات الحدودية في انتهاك واضح لإتفاقية كامب ديفيد مع اسرائيل و ذلك للسيطرة على التدفق الفلسطيني
و الحصار سيعود أشد مما كان
لا تتفألوا كثيراً

مش فاهم شكلك بيضحك ازاي و انتي بتزعقي
:l

3ala asm masr said...

انا مش راضيه عن اللى اخوانا فى فلسطين عملوه يعنى اوك نفتح المعبر ويعدوا وياخدوا كل احتياجتهم وكده بس من غير تكسير وضرب وكلام من ده
هما مقدروش على الحمار يتشطروا على ...........

لماضة said...

لعله خير
ربنا يستر بجد مش عارفه رايحين على فين كده
انا سمعت كمان ان عضو مجلس الشعب حمدين عبر المعبر ودخل غزه
لما نشوف اخرتها ايه

ساعد نسرين الايمن said...

نحلة ودبور
معبر يفتح ثم يغلق ثم يكسر
اسعار تترفع ثم ترتفع اكثر
مطبات تغادر مكانها
بطوط اصبح لا يشتكي
واونكل مبارك يراقب كل ذلك من بعيد
ويعطي اشارة البدء لاونكل الضابط

والنتيجة
بوست رائع
ودماغ قاري تحتاج الي البانجو كي يستطيع ان يفهم كل هذه المنحيات

بجد اهنيك بشدة

NIDAAL PAL said...

العزيزة آآآبى
كيفك و كيف احوالك ؟
ما كنش نعدى لغزة و نرجع تانى حتى دلوقتى
المهم انا مش عارف اى شىء عن حكاية الضرب و التكسير و كدة
ياريت لو عندك اى فيديو او صوزر للكلام ده ابعتيه عالطوووول
e_eimnem@yahoo.com
معلش انا عارف انى مقصر فى المدونة تبعك بس اعذرينى
و بالنسبة للاسعار
الى بيرفع فوق ما بينزل تانى و خاصة فى مصر
سلام .. واوعى من الدبان و الناموس و الدبابير و النحل

رئيس جمهوريه نفسى said...

ياختى جميله ياختى انتى مصدقه انى المعبر اتفتح المعبر اقتحم وهناك فرق

e7na said...

الحمد لله ما طلعتش الوحيد المستغرب
فيه زميلة استغراب
حتى لو كان اقتحام زى ما الناس شايفه
فتعامل الامن معاه كان فى منتهى الرقه يعنى عساكر الامن المركزى المرهفين لو كانت الاوامر انهم يصدوا الناس ويرجعوها
وربنا ما كان حد مشى خطوه واحده
كانوا مستكينين خالص

عاوز افهم

appy said...

أحمد الجيزاوى
يا ريت يبقى صح اعتقد كده بس اكيد هيقى فيه شويه تحفظات ربنا يسهل

استاذى الطائر الحزين
هسال حضرتك سؤال هو انت بتسيب باب بيتك مفتوح طول الوقت للجيران يدخلوا ويخرجوا من غير ما يخبطوا ولا انت تسمح لهم اكيد لا يعنى اللى بقصده انهم يدخلوا وندخل لهم حاجات بس بدون ضرر لينا دى وجهت نظرى بس لانى مش بسيب باب بيتى مفتوح وانا عارفه ايه الامان ليه وايه لا

ولااء

ازيك انتى يا قمر معلش انا بتكلم بصوت واطى علشان اونكل الظابط مش يضايق منى بس متخافيش عليه ساعة ما بطالب بحقى صوتى بيجيب لروسيا هههههههههه

appy said...

خالتى فرنسا
ما انا بتكلم بصوت واطى اهو وبعدين ما قولت مش انا دول النحله والدبور الوحشين دول ان شاء الله اجيلك بس مش استخبى علشان اكتب عن السويس اللى هى بلد فى بلدى وكمان بلد الشهداء

بشمهندس
اولا البقاء لله للمتوفى اللى عندك ثانيا طبيعى يعملوا كده لما يحسوا ان بلدهم بتنتهك من ناحيه يعنى يدخلوا الفلسطنين بس بهدوء وضبط نفس وخير مثل للهمجيه عندنا العراقين اللى فتحنا لهم بيوتنا وقلوبنا وفى النهايه تعالى اتفرج عليهم عندنا فى القاهرة الجديدة وهما بيشتمونا
وشكلى بيضحك لانى مش بعرف اكشر على طول تلاقى وشى مبتسم ميزة ربنا ادها ليه وبعدين بقعد اقولهم حاجات تضحكهم اعمل ايه فى نفسى انا قلبى عمرة ما بيقسى على حد

appy said...

على اسم مصر
هو انا بلتمس ليهم العذر بس على الرغم من كده اكيد مش هوافك ان ابن بلدى يضرب او اخ ليه او يتنهب خيرنا اللى احنا مش عارفين ناخده احنا

لماضه
اهلا يا دكتورة ربنا يستر ويقدروا يساعدوهم من غير خسارة لينا ولا ليهم وبعدين انا مستغربه ليه التوجهه لينا احنا بس ليه مش للدول التانيه

appy said...

ساعد نسرين

ربنا يكرمك بس انا مش قصدى حاجه انتم ناوين تحبسوونى صح انا مقصدتش حاجه وحشه اونكل مبارك بيحاول يساعد بس متودناش فى داهيه الله يكرمك

نضال
اهلا بيك هدور عليه حاضر بس هو كان على اليوتيوب وادخل عند قطه الصحراء هتلاقى صورة لتكسير الجدار وربنا معاك وانا عذراك

appy said...

سيادة رئيس الجمهوريه
لما اقتحم حضرتك اونكل مبارك حب يسكت الناس فسمح ليهم انهم يدخلوا ويطلعوا والناس اللى فى باقى محافظات مصر تدخل لهم معونات وبعدين هو انت مع ان حد يقتحم بيتك ولا ايه انت شكلك كده هتضرب بالقله بتاعتى على دماغك هههههههههههههه

احنا
بص يا سيدى زى ما شرحت لما اقتحموا الامن فعلا مضربش بالعكس عندنا ناس اضربت فهنا ملقوش حل غير انهم يحتضنوا الناس دى فسمحوا بدخول المعونات لهم وبالفعل دخل لهم حاجات

appy said...

سمكه
حبيبتى ميرسى على المجامله ونورتى الكوكب ده مش مدونة ده كوكبى بخرفانه بس بينى وبينك مش كله على الحكومة لازم احنا ناخد موقف يعنى هما مش بيقولوا للفران صغر الرغيم بس الفران عاوز يسرق فهمتى

اجندا حمرا said...

صديقتي العزيزه ابي

بصي ياابي انا مش موافقه علي الأسلوب اللي الفلسطنيين عملوه عند المعبر
ده يعتبر فيه اخلال بالأمن المصري
اوكي احنا كلنا اخوات بس فيه شئ اسمه نظام و اللي اتعمل ده عشان يخاللي منظرنا وحش قدام العالم ال يعني اسرائيل قافله المعبر من نحيه و المصريين بقه حيقفلوه من النحيه التانيه

فيه مثل بيقول ماتدنيش سمكه علمني ازاي اصطاد
لازم هما يقفوا وقفه صح قدام اسرائيل من النحيه اللي هما قافلين فيها المعبر من عندهم و هما شجعان و بيحبوا ارضهم صح يبقي يعملوا كده و لو دخلوا عندنا يجيبوا احتياجاتهم يبقي يرجعوا بلدهم بعد كده يحاربوا عشانها ده الشئ الطبيعي اللي لازم يحصل بس اللي حصل عند المعبر و الضرب ده مايصحش ابدا ابدا
:(

appy said...

اجندا حمرا
اهلا نورتى المحكمه وهو ده والله اللى اقصده بس تقولى ايه للمسكين مدرعات وبيهاجموا وخلاص انا معاكى فى رأيك

د/اجدع بنوته said...

ابى بتكتب ف السياسه

لا وايه سياسه وع المكشوف كمان

مش حالجه متداريه

حبيبة قلبى

مش تقلقى ان شاء الله

هبقى اجيب بطوط ولوزه يزوروكى

هنااااااااااااااك

ابقى خدى بالك م نفسك

تعليقى ع البوست

يااااااااااااااااارب ....

Che The Hermit said...

للأسف المعبر ما اتفتحش برضانا المعبر اتفتح بعد ما الفلسطنين كسروه واصبحنا امام الامر الواقع قلنا نعملها جميلة ونقول فتحنا المعبر ليهم لكن دا مش صحيح والمعبر اتدمر بايادي نساء غزة ودخلوا سينا ولن لسوء الحظ المصريين هناك كانوا اندال جدا باعوا الحاجة ليهم باصعاف مضاعفه يعني السكر ابو 3 جنية اتباع ب 10 جنيه يعني ليهم حق يهدوا اللى يلاقوه فى وشهم يعني الإسرائلين ودا العادي بتاعهم بس احنا ليه مش كفاية قفلنا المعبر لا دا الشعب كمان ما سابهمش فى حالهم وراح يستغلهم بصراحة يعني انا شايف معاهم كل الحق وكانوا حرقوها احسن

تحياتي علشان انا شكلي طولت
تشي

بحبك يامصر said...

والله انا شايف ان اللى حصل مش حاجه يتشكر عليها مبارك هو الزام عليه انه يعمل كده لانه مسلم ولا ايه؟
وبعدين هو يكمل بس مش يقفله على طول الناس بتموت هناك

دمعاتي said...

بقا مستغربه ان رغيف العيش بتشوفيه بمكرسكوب
طب احمدي ربنا انه بيظهير تحت المجهر
بكره ان شاء الله الدقيق هايتوزع في اكياس صغيره ويتشم زي الهروين
واي حد هايتمسك بكيلو دقيق هايتلسع ربع قرن

ياااااااااه انا بحب مصر قوي وهافضل احب فيها لغايه ما تجيلي سكته قلبيه من فرط الحب

مدونة يلا نفضحهم said...

الحرية للمدون الدكتور ابراهيم الزعفرانى
وقع على وثيقة الالف مدون للافراج عن الطبيب المدون
www.dahayaa.com

أنونيمس said...

أنا مش فاهم بس الناس اللي بتقعد تتنأوز دي عاوزين أيه؟؟
ما الريس ريسنا حبيبنا طلع زي الأسد أهو وقالك مش هاجوع الفلسطنين
عنده حق والنعمه كفاية مجوع المصريين
كمان هايجوع الفلسطنين
مش عارف عاوزين ايه تاني
وسلميلي ع الباميه
:)

شريف طلال said...

أول مره ازور مدونتك و عجبتنى و ان شاء الله مش اخر مره
على فكره مبارك مش بيتاخد قرارات زى دى على ما أظن
دى وزاره الداخليه و مبارك مجرد ظابط فى الجيش و عقليته غير سياسيه بالمره
على العموم شكراً ليكى
و تحياتى

Eno said...

السلام عليكم

الموضوع حلو اوي ياابي :D

انا كمان والله فرحانه اني المعبر اتفتح واهو كان عند الفلسطنين بمثابة طاقة نور اتفتحت عليهم :)
بس برضه اضيقت اني مجتش مننا من الاول كان لازم يعني القوه !!
مع اني مش بحب الكلام في الباميه خالص بس ده رئي
من خاف سلم :D

تحياتي ليكي

ibn_abdel_aziz said...

والله اعلم
الموضوع بدأ بفوضي
لكنه قد يؤدي الي نتائج سياسية مباشرة وغير مباشرة

انتي عارفة موضوع الترانسفير
اسرائيل بتحلم ان كل الفلسطينين يتهجروا لمصر او الاردن ومادام الاراضي العربية كثيرة جدا خدوا عندكم خمسة مليون فلسطيني واديهم حقوقهم وظبطوهم وسيبونا ف حالنا

اللي حصل ده احتمال يصب في سيناريو مشابه

مبارك ترك الامر للدعاية
وكمان للضغظ الاعلامي
والاهم انه عاوز يضغط علي اسرائيل
بمعني عملتم حصار ومكلمناكوش
ومسلحي حماس فتحوا الجدار ومكلمناهمش
يبقي مين يا امريكا يكون احسن وسيط لحل القضية ويجمع المتنازعين؟
يبقي انا عمو مبارك

مبارك بيحاول يسترد دور مصر فالوساطة بين الاسر ائيلين والفلسطيين بعد حتي ما خسر ده ومفلضشي ليه حاجة تانية يعملها لان مصر محكومة بعصابات الان مش بالرئاسة غالبا

فهو قاعد فاضي يعني

المتوقع وانا كتبت عن ده من كام يوم
هو ترك الفلسطيين يخشوا
يريحوا حبة
الامن المصري يحاصر رفخ المصرية ويمنع تمدد الفلسطيين اكثر من كدة
ثم يعيدهم مرة اخري
الي غزة
حيحصل احتكاك
وحنتفرج علي المنظر
اللي انا شايف حيكون خليط من مواقف سيئة وجيدة كل حسب اخلاقه

بالمناسبة الفلسطيني الغزاوي ليس بالضرورة فقير
يعني فيه فلوس
بسبب ان ملايين الفلسطيين بيرسلوا اموال وعملة صعبة لفلسطين من بلادهم اللي هما فيها سواء ارووبا او امريكا او حتي الخليج
الحصار سبب عدم دخول بضاعة وطاقة
لكن فيه فلوس
اعتقد ان مستوي دخل الغزاوي اعلي من المصري اللي ساكن علي الحدود والله اعلم

Nsreen Bsunee said...

اوبااااااااااااا
ابتديتى تتكلمى فى الباميه يا حبيبتى
عليه العوض ومنه العوض
بصي من غير لف ولا دوران كل الليله اللى حصلت دى والاحداث اللى بتحصل لغايه انهارده اثبتتلى ان الفلسطنيين فعلا زى ما بيتقال عليهم بيعضو الايد اللى تتمدلهم
بس برضه الاطفال والستات والمرضى مالهومش زنب يجوعو وياريت مصر كانت بعتت من الاول مواد غذائيه وسيارات اسعاف لغزه بدل انتهاك الحدود المصريه والمسخره اللى حصلت دى

الاسعار لسه حتتجن كتير ربنا يستر علينا

وحشتينى يا بت يا ابى

appy said...

د/ أجدع بنوته

عارفه ان وريا ستات بالف راجل ربنا يخليكى ليه يا قمر

che
محدش استغلهم يا جماعه دا احنا ودينا لهم معونات وحاجات ولا طبعا يعنى ايه يحرقوا ما يحرقوا اسرائيل هما لهم حق الضيافه عندنا انما بصراحه مش بلطجه

appy said...

دمعاتى

اهلا وسهلا نورتم هنا فى كوكبى وعموما انا كمان بحبها قولا وفعلا
ونشم الدقيق ايه يعنى حتى مفيد للرئة بتاعتنا

appy said...

بحبك يا مصر
لا يتشكر ليه لا ولا احنا قاعدين للغلط بس ولما يعمل كويس يبقى لا منشكروش ليه يعنى

انونيمس

الباميا وصلها سلامك يا دكتور يا حابسنا هههههههههههههه

appy said...

شريف طلال
اهلا بيك فى كوكبى وميرسى علىالمجامله
لا اونكل مبارك بياخد قرارته بنفسه وبلاش تودينى فى داهيه وبعدين يعنى ما هى الدخليه دى من مصر يعنى مش من اسرائيل ولا حاجه

appy said...

eno
صدقينى كان ممكن يتفتح من عندنا لو هما صبروا انما هما كده غلطوا وبكرة هنشوف النتايج

ابن عبد العزيز
اهلا بيك لاول مرة هنا وكسبت معانا خروف من المدونه اللى هى كوكبى

appy said...

نسرين
ياااااااااا حبيبى يا بعيد محتاج للمسه ايد جبت من الاخر يا عنيه وشوفتى دة اخر المشى وراى الباميا بس النهارده ومن متابعت الاحداث اقدر اقولك ان الرؤيا بدأت توضح وربنا يستر ومنروحش نحارب ههههههههههه
غير كده فعلا يا امى راحت لهم مساعدات ادخلى على مصراوى وشوفى المقالات وشوفى التعليقات انا مش هكتب اللى اهلى فى العريش بيقلوه عنهم اصل يقولوا انى بتجنى
بس فعلا الاطفال والشيوخ ملهومش ذنب
ابقى اتفرجى على قناة الاقصى فى برنامج الصبح اسمه صباح الخير يا اقصى وشوفى احنا دمنا محروق ازاى وهما عاملين ازاى يالا خلى الدم عندك يفور انتى كمان ما انا موعوده بيوم الجمعه ده صباحا اعمل فى نفسى مقلب يطلع من نافوخى

7koky..... said...

ايه الحلاوة دي يا آبي بجد المدونة حلوة جدا و طريقتك في تناول المواضيع حلوة لأنك بتتكلمي بموضوعية مع طريقتك الساخرة بجد أنا بحيكي علي الابداع ده و سيبك من الكلام الي بيتقال انتي صح كملي

appy said...

حقوقى
اهلا نورت الكوكب يا ابو جولدا ههههههههههههههه
ميرسى على المجامله وانا مش بحط كلام حد فى دماغى ما انت عارف ومجرب

ا بـن عــمــر said...

فعلا ليس مبارك هو من سمح بدخول الأشياء للفلسطينين
وربنا يستر والحصار مايرجعش تانى
جزاكى الله خيرا

محمد الجرايحى said...

أتمنى أن يكون فتح المعبر بداية لفتح أشياء أخرى

wael said...

مش عارف ليه احنا شعب ظالم الراجل بيصغر الرغيف عشان مانتخنش وبيفتح المعبر للاخوان في فلسطين ومش بيزعل حد دايما كده ظالمين الراجل مع انه اخف من النسمه بقاله حوالي 30 سنه بيحكمنا ومزهقش ولا حتى اشتكى احنا شعب بجد اناني ومانستهلش نعيش
اقول ايه بس
حسبي الله ونعم الويل فينا

DR.HAMAS said...

ده تنفيذ مخطط إسرائيلى يا أخت آبى

اقرئى الموضوع فى مدونتى بعنوان

سيناريو إسرائيل الحالى

و هتعرفى ليه بيحصل اللى بيحصل حالا




د.حمـــــاس

ana ga3an said...

ربما يفاجيء البعض
اعتراضي علي فتح المعبر
فالمشكلة ليست في المعبر صدقوني
فالفلسطنيين يعبرون عن طريقة منذ امد بعيد ويحصلون علي كل لوازمهم عن طريق العبور و العودة
وكل حاجة ماشية تمام
حتي اسألو اهل سينا و الظباط علي نقاط الحدود
هو المعبر اتقفل لما العين بقت علية اليومين دول
علي اي حال سعيد اني اكتشفت مدونتك
و ان شاء الله متكونش اخر زيارة

عاشقه الفردوس said...

ايه ده
حتي النحلهوالدبور بقو يتكلمو
والله كويس
حريه راي
ماشاء الله ياماشاء الله

اقولك حاجه بيني وبينك برده
كل المحل والدبابير في دماغ الناس كلها بدات تشتغل
:))

NIDAAL PAL said...

العزيزة / آآآبى
كيفك ؟ مختفية يعنى
شكلى حسدت مدونتك و حسدت مواضيعك الجميلة
وين جديدك ؟ طمنينا عليكى
تحياتى
نضال

NIDAAL PAL said...

انتى جاية معرض الكتاب يوم الجمعة 1/2/2008
ولا ايه ؟
لو مش جاية ياريت التواصل على الميل تبعى
دمتى ايتها العزيزة آآآبى

Heart Beat said...

عزيزتي
Appy

الجدار اتفجر و بعد اتهد بالبلدوزر في تحدي للقاهرة كما نشرت الصحف و الجرائد

طيب اهلا وسهلا بالجيران اللي كسروا باب بيتي عشان يدخلوا ... ماشي حاضر مش مشكلة اهلا وسهلا تاني

بس كضيوف يشتروا اللي هما عايزينوا و بس مش مقيمين هو انا بيتي في حاجه اصلا عشان اديها لجيراني ... مش ائكل اهل بيتي الاول ... ما علينا

التبرعات حركة حلوة مننا كمصريين و مالوا ما احنا شعب دايما بيجي على نفسه و ينساها و يساعد غيره و التاريخ اكبر شاهد على كده و حرب فلسطين تشهد و تقول كام شهيد مصري راح فيها... الله يرحمهم

و كام جندي دلوقتي اتصابوا بالقذف بالحجارة من الاخوة الفلسطينيين و كام ظابط مصري اتصاب كمان... ماشي حاضر... اهلا وسهلا بالجيران و الاخوة

في ناس بتقول هو مخطط اسرائيلي عشان اسباب كتيرة... برضه فكرة... بس هل اسرائيل راحت اتفقت مع حماس و اهل غزة و اخدتهم كده على جنب و قالت لهم

شوفوا بقى يا جماعة اهي مصر اودامكم من زمان و هي بتقولكم اهلا وسهلا ما تروحوا هناك احسن لكم على الاقل عندهم كهربا و وقود و اكل و شرب و استغلوا بقى قضية فلسطين و انتم و شطارتكم

فراحت حماس و اهل غزة سمعوا الكلام و وافقوا على الحصار و بما انه مخطط اسرائيلي فأكيد في خطة من اسرائيل طبعا

الخطة انها تحت غزة تحت الحصار و تقطع الميه و الكهربا عنهم فيقوموا يفجروا الحدود مع مصر و يحرجوها اودام الدنيا كلها و بعد اما مصر تسمح لهم بالدخول و تقولهم ها يا جماعة اشتريته اللي انتوا عايزنه خلاص مش ترجعوا بلدكم بقى تروح حماس هادمة الجدار تاني بالبلدوزر و تقول نعم يا مصريين انتوا عايزنا نمشي و لا ايه و نسمع شعار " على مصر يا رجال جيموا الافراح" على راي فيلم 30 يوم في السجن مع بعض التعديلات

اشمعنى المرة دي اسرائيل خطط و هي عارفه و متأكده ان الجدار هايتفجر من ناحية رفح و بايدي عربية حماسية

يمكن سمعت الجماعة بتوع المقاومة و هما بيقولوا لبعض... يا جماعة لو اسرائيل فكرت تحطنا تحت الحصار نتجه الى مصر ... فقالت بس هي دي الخطة الجهنمية عشان كده اطلق عليه مخطط اسرائيلي

هي اسرائيل برضه اللي راحت قالت لرجال المقاومة فجروا الجدار و لا اهدموه بالبلدوزر عشان بس نكمل بقية المخطط

لازم اسرائيل بقى تنبأت ان السيناريو ده بحذافيره هو اللي هايحصل عشان كده اطلق عليه مخطط اسرائيلي

و بعدين هو احنا قلنا لأ لما فجروا الجدار مع اننا كنا نقدر كويس اوي نقول لأ خليكوا عندكم و احنا هانوصل لكم اللي انتوا عايزينه لغاية عندكم و نقفل الحدود

مش هي دي حجتهم من انهم يدخلوا رفح انهم عايزين يشتروا حاجات ضرورية... كان ممكن اوي نقولهم حاضر و لا يكون عندكم اي فكرة خليكوا في بلدكم اللي انتم بتاحاربوا عشانها و احنا هانوصلكم اللي تتمنوه انتم بس تؤمروا

لكن مع ذلك سمحنا ليهم بالدخول و ايوا احنا سمحنا ليهم بالدخول لان مش مصر اللي يتلوي ذراعها و منين من الاشقاء الاخوة في فلسطين... اظن عيب اوي يعني انهم يقولوا كلام بايخ زي ده

appy said...

يا الها وسهلا بالناس الجديدة اللى نوروا الكوكب
وخاصة انا جعان افتقدناك من زمان وعموما انا تقريبا رأى قولت فوق فى الردود على الناس
عاشقه الفردوس
اكيد النحل بيتحرك بس منظم عننا شويه
هارت بيييت
حبيبتى تحليلك مبسوط ومواكب للى بيحصل دلوقتى وميرسى على التوضيح