الجارة الجاسوسة........المتطفله

اسكان المستقبل فى القاهرة الجديدة

بجد موقف صعب وبعانى من التوابع المترتبه عليه لدلوقتى زى الزلزال بالظبط ا
نبتدى الرغى(على راى بتوع المترو المنافق) من سنه ربنا كرمنى واشتريت شقه فى القاهرة الجديدة مدينة هايله واللى راح هناك عارفها يعنى الاخوة اللى زاروا نياببه امن الدوله والمحكمه ههههههههههه عارفين قد ايه المدينة دى هايل اشتريت شقه من اسكان المستقبل (اللى اونكل مبارك وطنط سوزى عاملاه) ربنا موفقنيش وعرفت احجز بس اشتريت بعدها من واحد حجز لان الحجز كان بألفين جنيه وانا اشتريت منه بعدها تخيلوا بكام 45 الف جنيه اه والله وترجعوا تقولوا مفيش سكن وازمة اسكان والله احنا اللى عاملنها بس رزقه بقى الراجل ربنا يبارك ليه فيه ما علينا بجد العمارات دى هايله والشقه صغيرة 63م بس منظمة حلو قوى حجرتين وريسبشن ومطبخ امريكان كيتشن(شوفتوا الثقافات) المهم الامريكن كيتشن ده مفتوح على الريسبشن وده كان اكتر حاجه بتعجبنى فى الشقه المهم شغل الاطفال كبر فى دماغى ولونتها زى الوان بيض شم النسيم اورانج على اوف وايت(بيج يعنى) وموف فى الاوض بدرجاته ونقلت وانا مبسوطة جد الشقه دى بتبص على عمارة تانيه جيران بينا وبين بعض شارع حوالى 6 متربس ده عبارة عن جنينه حلوة قوى المهم بقى بقيت اقعد فى الشقه براحتى صيف بقى وحركات وكمان ببص على جنينه يعنى الاختراع اللى اسمه بلكونة ده يفضل مفتوح وكنت بقفل اوض النوم لانها ميصحش حد يشوفها المهم البلكونه بتاعتى صغيرة وانا بموت فى الزرع جبت زرع وحطيته فى البلكونه جارتى بقى النوسه الكونوسه (الحيزبونه القرعه) معجبهاش الحال بقت تسيب شغل البيت وتستلمنى من ساعه لما اروح بعد الشغل لغاية لما اقفل البلكونة وانام وانا علشان الناس اللى خيالها بيسرح مكنتش بطلع البلكونه بحاجه وحشه بكون لابسه اسدال او روب علىالاقل بس هى كاشفه الشقه عندى ومش مكفيها كده لا تجيب بنت جوزها بنت فى ثانوى كده ويقفوا دى تسيب مذاكرتها ودى تسيب اولادها ويقعدوا يبصوا عليا ويضحكوا قولت يالا عادى يمكن معندهومش تليفزيون وانا بسليهم عادى بس الموضوع زاد عن حده تجيب ولد عنده 15 او 16 سنه توقفه يتفرج عليا وانا قاعده والله انا مش بقعد بلبس وحش يعنى بس صيف وكل واحد له بيته وانا حرة فى بيتى طالما مش بطلع بلكونات المهم سمعتها بتقول له دى مبتبردش صيف ولا شتا قاعده تهوى نفسها طول الوقت.........ونزلت الموسيقى التصويريه وكبرت فى دماغى والعفاريت لعبة شطرنج فى وشى وطلع دونالد دك وعم دهب والاشرار كلهم لا كده زياده بقى قمت لبست وطلعت لها البلكونه قولت لها لوسمحتى انتى تعرفينى هى: لا معرفكيش أنا: طيب هو حضرتك تايهه لكى حد وبتبصى عليه عندى ولا انا طلبت حراسه طولاليوبتحرسى ى ليه الشقه خايفه اتكعبل ولا حاجه تسمى عليا. وهنا نزعت الفتيل وسمعت احلى كلام معرفتش ارد من فوق ولا من تحت وقعدت بقى(تييييييييييييييت تربت تيييييييييتنا بكل ادب وهدوء قولتها انا اسفه انى بتكلم معاكى انت مينفعش معاكى التفاهم لقيتها تقولى ما تقفلى على نفسك (غريبه جدا بتحكم عليا فى بيتى ودى المنفذ الوحيد ليه ولازم تفضل مفتوحه علشان المطبخ كمان مفتوح على الصاله وعندى شفاط بس لازم تهويه) وانا قولت لها انتى هتحكمينى من هنا وجريت استخبيت (اصل بصراحه مليش فى الخناق واكتر واحده ممكن تضحك الناس وهى بتتخانق انا ) وهى مسكتتش بقى توقلش كانت بلعه راديو وجايبه محطة الشتيمه وقله الادب (ابقوا دوروا على المحطه دى وقلواا لية) او مثلا واخده كورس من المعهد البريطانى بس فى الشتيمه . كبرت فى دماغى وقولت هنزل اروح القسم بقى اعمل بلاغ فيها ويتعمل معاها احلى واجب لو اديت لامين شرطة خمسه جنيه هيجبها من بيتها المهم واحدة جارت السوسه سمعت سنفونيه الردح المنفرد فنزلت متطوعه ودخلت لها من البلكونه عندى قالت لها عيب ما يصحش وياااااااااا كانت نيله اتقلبت وصله الردح عليها قفلنا البلكونه وجارتى قالت ليه معلش بلاش قسم وانا بصراحه صعبت عليا لسببين الاول عندها طفلين صغيرين هيعملوا ايه لما يلاقوا امهم بتتاخد من البيت ثانيا منظرها قدام جيرانها(انا طيبه بشكل يعنى هى مخافتش على منظرها وانا خوفت عليها. وجارتى اللذيذه فهمتنى انها الست دى متجوزة واحد على مراته وهو بيشتغل جزمجى وهى من منطقه اسمها الجيارة اممممممم ودى طبعا من هنا فهمت وصله الردح المنفرد جت منين قولت تانى يوم اعمل شالوم زى بتاع اسرائيل يعنى من تحت لتحت كده ورحت لها وأتاسفت لان صوتى طلع وسالتها قولت لها هو انا عمرى بصيت عليكى بدأت تستفذنى تقولى ليه هو انا اراجوز قولت لها الله يسمحك يعنى انا كده قولت لها دا احنا ستات زى بعض يعنى خليتى ايه للرجاله قالت ليه اصلك مسليانى(هو انا لب ولا سودانى ومش واخده بالى) قولت الله ما طولك يا روح فى سرى طبعا لاضرب قولت لها خلاص متزعليش منى تقولى ما انتى بتطلعى البلكونه ومتقوليش صباح الخير (يا نهار هو بالعافيه يا ناس) قولت لها بتكسف معلش واستأذنت ومشيت فهمت بقى من شويه كلام لها انها بتغير على اسم النبى حارسه بلعها طيب بالزمه دى عندها نظر انا هبص لجوزها طيب والله عمرى ما شوفته انا اصلا مش ببص لحد بس هى معقده علشان واخدا من مراته وأولاده فمتخليه ان حد هياخده منها قولت خلاص فكرة جت فى دماغى وقولت اضحى ب700جنيه واركب تندة وبالفعل اتصلت والناس ادونى ميعاد اسبوع وهيركبوا طيب يا نهار اعمل ايه قولت بما انى دمى محروق هتسلى عليها (فكرة شيطانيه) جايه من دونالد دك وعم دهب بقيت عامله عرض ازياء فىالبيت لان بعد الحوارت دى هى ما زالت بتبص عليا ومتبعانى وتحرك الكرسى اللى قاعده عليه على حسب مكان قعدتى فى البيت بقيت كل ساعتين ادخل البس حاجه واطلع وفتحت شباك اوضه النوم لانها بتكشفه واحط مكياج وانا فىالبيت واعمل حركات هبله اقعد فوق البار بتاع المطبخ اغنى بصوت عالى لبست كل لبس المصيف وانتم عارفين لبس المصيف المنيل غير لبس البيت طبعا اللى انيل لغايه لما التنده ركبت والله غطت البلكونه الست من جنانها بقت تقعد وتتزحلق علىالكرسى علشات تبص عليا من بين الحديد او تقعد علىالارض لان دى الطريقه الوحيده انها تشوفنى طنشتها وسكت من يومها ومبقتش اديهها اهتمام لغايه لما ساعات تزهق وتقفل البلكونة المصيبه بقى لو انا فاتحه ومش منزله التنده وهى فاتحه عندها وجرس الباب عندى رن بتجرى تبص قبل ما انا افتح الباب علشان تشوف مين جاى لانها بتسمع صوت الجرس الدنيا عندنا هاديه جدا. ليه بقى


بحكى الموضوع ده لان الرسول عليه الصلاة والسلام وصى على سابع جار طيب ليه مش بنحافظ على الجيرة دى

تانى حاجه لما حد يتكلم معانا ليه منردش باحترام وادب والالفاظ اللى بتتقال طيب هى مش خايفه على اولادها الصغيرين يلقطوا الكلام ده ويحفظوه دى ام ازاى ولا احنا هنكون امهات ازاى واحنا مش عارفين نعلم ولادنا ابسط حاجه
الرجاله يا جماعه او الستات اللى غاويين القصه دى يعنى يبصواعلى جيرانهم والله بتكون مؤلمه جدا انك تحس انك متراقب طول الوقت(ولا بتوع أمن الدولههههههه) وبعدين ده بيتى يعنى انا حرة فيه طالما انا مش بعمل حاجه مش محترمه ده لبس مش رقص ولا سهر ولا اى مصيبه من اللى بتحصل لو الناس راعة بعضها هتلاقى اللى يقف جنبها فىالشده يعنى دى لو حصل عندها حاجه وانا سمعت او عرفت وانا مش بكلمها اكيد والله هجرى واقف جنبها لوجهه الله تعالى مش لحاجه تانيه زى ما حصل مع واحدة تانيه جارتى لما عرفت انها تعبت اخدتها وديتها المستشفى وفضلت معاها لغايه لما خلصت محاليل ورجعتها ومكنش بينى وبينها غير السلام عليكم بس ليه منكونش ناس محترمه ونحترم بعض وبعدين حتى لو هى من منطقه عشوائيه ربنا كرمك واخدتى بيت فى منطقه راقيه ونظيفه وهادئه ومستقبل لاولادها ليه مصممين اننا نربى اولادنا بطريقه غلط حتى لو احنا اتربينا فى مكان غلط نحسن من نفسنا لما نفهم واولادنا يا ريت تكونوا فهمتوا اللى عاوزةقوله

كمان كل واحده تبقى تبص يا جماعه على جوزها (ههههههه وتخلى بالها من نفسها الاول) الاول يعنى تشوف جارتها دى مستواها ايه وجوزها مستواه ايه ولا الاجتماعيات والشكل الاجتماعىى والتوافق الفكرى والثقافى مبقاش همنا قبل ما تحكم على جارتها او حتى جوزها وبكده مش هكون فيه خلافات لان فيه ناس حتى بتغير من صحبتها وده بصراحه هبل من الستات وعبط من الرجاله علشان عيب عليهم (يعطوا بره بلاش صحباة مراتتهم
ولا صحبات خطيباتهم ههههههههه لا بهزر اوعوا الخيانه) اللى فوق دى شكل العمارات اللى انا ساكنه فيها شوفوا بلدنا حلوة قوى ازاى بجد مش هزار
حاجه كمان من السهل انك تبقى قليل الادب بس مش صعب انك برضه تكون مؤدب
وكرهت الامريكان كيتشن اللى جاب ليه وجع الدماغ مع انى بحب الموضوع ده جدا تقعد تأكل كده فى المطبخ وبار رخام يعنى مش محتاج سفرة كرسيين وخلاص ووفرنا حق السفرة
وانا لسه برضه عند وعدى بغيظ فيها رغم اننا فى الشتاء بشغل الدفايه والبس اللى انا عوزاه هههههههههههههههه

25 اخبط وقول رايك:

mohammad hamza said...

أنا أول واحد يعلق ...

حلو ..

أنا قريت الموضوع كله

وفعلا الموضوع ده يضايق اوى اوى ..

طالما ده بيتى يبقى انا حر ..

والمشكلة ان الجيران يبصولك لو ناقل جديد كأنك زائر من كوكب المريخ ..

معرفش .. بس بجد حاجة تضايق ..

موضوع جميل ..

سلام

ابن حـجـر الـعـسـقـلانـى said...

طول المقال عايز اعرف ايه هو "الأميريكان كيتشن" دة .. يكونش زى "الكيتشين ماشين" كدة ؟؟ جايز والله .. العلم اتطور كتيييييير الكام سنة اللى فاتوا

أنا لى واحد صاحبى فى أمريكا ... ممكن أبقى اسأله .. و أوصيه يجيبلى واحد و هو جاى

---

بس بصراحة الله يكون فى عونك ... مش بيقولوا "اختار الجار قبل الدار" .. و حظك إنك وقعتى مع واحدة من الجيارة .. يعنى من فطاحل اللغة الشعبية المصرية .. خدى بالك بقى من قاموسك اللغوى و حاسبى لا يتشوه

مروة الزارع said...

شوفتى مسرحية محمد هنيدى لما كان كل شوية يجى يقول للجيران خير انتوا بتضحكوا لية هو كان فية حاجة ان شاء الله

احمدى ربنا عندنا الجيران فى المطرية بيزرعولنا كاميرات واجهزة تصنت واستشعار عن بعد داخل الشقق

انتى فى نعمة يابنتى

Desert cat said...

ايه الحيزابونة اللى انتى ساكنة جنبها دى يا قلبى
ده انا لو منك كنت ربيت لها الخفيف
مش هى نقطة ضعفها جوزها
وخايفة على سى المحروس احسن تخطفيه منها
انا بقى كنت عملت لها كمين فى البلكونة عند رجوعه البيت
وخليتها هى اللى تحرم تفتح البلكونة تانى
اصل الناس اللى زى دى بتخاف متختشيش
المهم انتى خدى بالك على نفسك
من العالم محدثين النعمة دول
وبعدين دى واحدة بيئة نشأتها وتربيتها كدا مستنياها تطلع اطفال ايه من الهاى كلاس
ربنا يهديها

newegyption said...

انا ليا واحد صاحبى ساكن هناك وفعلا الشقق تحفة بس عيبها مساحتها الصغيرة
ونفضى لجارتك الهبلة دى هو الواحد ميعرفش يعيش براحته جوه البيت

newegyption said...

شكررررررررررررا لزيارتك مدونتى وشرفتى ونورتى
http://newegyption.blogsome.com

undertaker said...

بصى احنا عندنا فى الشارع من النوع دة كتيييير اوى
يعنى تقريبا نص ستات الشارع
وكلهم مبيصدقوا يشوفوا حد فى حاله وعايش حياته ومبسوط والدنيا ربيع
والجو بديع
الا ولازم يمغصوا عليه عيشته لغاية ميطفش من الحتة لاما تبقى زيهم
اقولك حاجه تعمليها الست دى
بس لازم يبقى قلبك جامد ومتخافيش منها لانها لو حست انك خايفة مش بعيد تيجى تحتل شقتك
وحتى لو جبتلها امن الدولة ولا حيفرقوا معاها لانها اساسا متعودة على الاقسام متربية جوه يعنى
لو متجوزة
خدى جوزك واطلعوا ىف البلكونة واول متظهخر على الشاشه عيشى انتى بقى فى دور الرومانسية والحبيبة وكدة يعنى
حبى فى جوزك جامد اوى
وكأنه بقاله عشرين سنة مسافر
افضلى على كدة بتاع اسبوع
كدةانتى حرقتى دمها
دى اول خطوة
بعد اسبوع خلعى جوزك

واقفى لوحدك فى البلكونة وعيشى دور
البت الكئيبة الى عيلتها كلها بعد الشر ماتوا
هنا بقى حتلاقيها فتحتلك موشح الشماتة العالمى
لانها حيتهيئلها ان جوزك بعد الشر سابك بعد الشر زى جوزها
هنا بوصيلها اوى كدة
وقللها انتى مضايقة منى ليها
ولا عشان اننا يعنى احلى منك وعندى جوز يضربي جوزك بالجذمة
وعلى الاقل انا جوزى مسبنيش عشان عفنتى وراح اتجوز عاليا
واردحلها بقى شويه
واضحكى مش اشكال كدة حتتنرفز اكتر واكتر ودمها حيتحرق
بس حتعرفى تردحى ولا حتكسفينا
لازم الردحة تكون على مستوى لان دىلا الى مش حتخليها تفتح البلكونة
حتى لو العمارة وقعت
اهى الطريقة دى متجربة عندنا بتاع 50 مرة
وكل مرة بتعمل رقم قياسى
لدرجة ان الست الشرشوحة
هى الى كانت بتمشى من المنطقة كلها
جربى واهو لو منفعتش تبقى سليتى نفسك
الله ينور على البلوج
الواحد دخل عاش فيه

Ragi said...

قلبك ابيض يا ابى وشدى الستارة اللى فى ريحنا
:))

مهندس مصري said...

إحنا عندنا السكن بتاعنا في شقق عاملها بنك الإسكان و التعمير و الشقة 90 م2 بس الشوارع ضيقة و عرضها 6 م برضه فالبيوت في وش بعضها برضه بس علطول بنشيش الشيش و نخليه متوارب و بكده ما نكشفش الجيران و نضايقهم و هما كمان ما يكشفوناش و يضايقونا
دا غير ان البلكونات و الشبابيك بتتفتح الصبح علشان الشمس و الهوا و احنا بنكون في الشغل ساعتها فمفيش مشكلة
غير ان جيرانا اللي قصادنا محترمين و علاقتنا بيهم برضه مجرد السلام عليكم

انتي تشتيكيها في القسم و تعملي ليها محضر و تآخدي عليها تعهد بعدم التعرض

و ابقى تعالي على نفسك و لو غلطت فيك اشتميها و ما يهمكيش دي ناس تخاف و ماتختشيش

اجندا حمرا said...

عزيزتي
Appy

فعلا حاجه مستفزه و تضايق
زي مابتقولي ماتخافش ان ولادها يلقطوا اي كلمه من الكلام الجميل اللي بتقوله بس ماانتي شايفه عزيزتي هي متجوزه مين و جايه منين طبيعي يعني مش حتهتم ولادها يتعلموا من قاموس شتايمها
قولي لما يشوفوها بتضايق جيرانها بالشكل ده اي تربيه حيتربوا عليها ؟

للأسف ماحدش بقه بيحافظ علي شعور حد
رأيي تتقي شرها يعني الحاجات الصغيره اللي ممكن تعمليها صباح الخير ياجاري انت في حالك و انا في حالي و خلاص و طبعا تلبسي اللي انتي عايزاها هي حتحجر عليكي في بيتك كمان اما غريبه و الله

و لا يهمك و لا تتعقدي من الشقه كبري دماغك انتي و انشاء الله التنده تعمل شغل جامد

كل سنه و انتي طيبه و سنه سعيده و يارب يبعد عنك اي غلاسه من اي نوع ياجميله

موضوعك جميل و انشاء الله حاجي تاني و اقري بقيه المواضيع
:)))

Soooo said...

انتي بجد مشكله
مالكيش حل
على فكره انا بادخل على مدونتك كتير بس باجي اعلق الاقي حاجه تروح حاصله عندي ولاخماني
النهارده رحت قافل الموبيل وقلت لا بقى
انا لازم اعلق عندها وخلاص

باعتباري مهندس ديكور احب اقوللك ايه علبة الالوان اللي انتي عملتيها دي يا شيخه
ايه يا شيخه
ده دونالد دك وعم دهب مأثرين عليكي بطريقه رهيبه
بس الحقيقه ماقدرش اقوللك الالوان دي على بعض ماشيه ولا مش ماشيه غير لو شفتها على الواقع

بخصوص الاميريكان كيتشن .. مشكلة الاميريكان كيتشن هي نفسها اللي مديالو شكل جمالي
وده عشان احنا هنا في مصر بطبعنا عزومتنا كتير وبنبقى محرجين ان الست اللي بتعمل الاكل في المطبخ تبقى باينه في خلال ما الضيوف قاعدين .. لكن دي ليها حل وهو نظام ستاير تعليق .. اللي بتدلدل من السقف في الوقت اللي مش عايزين حد يكشف اللي في المطبخ

جارتك بقى دي واللي من الجياره .. ولا تفكري تقربي منها تاني
اوعي
انتي عزيزة على قلبي ومش عايزك تتأذي يابنت الناس
واحده من الجياره .. ومتجوزه واحد سباك .. متجوزها على مراته اصلا .. يعني كل مقومات الاجرام الفطري والتربوي فيها

نصيحه منني .. غيري شقتك



سلاموووووووووووز

الطائر الحزين said...

هو فى ايه
هو ده التعليق

بس لما تكونى صح وحد بيعمل حاجة غلط
مشى فى طريقك المستقيم

وعلى رأى المثل امشى عدل يحتار عدوك فيك

عارفة عاوزاها تحل عنك هاتى وابور جاز وولعية وحطى عليه اروانة تسخنى عليها ماية وهاتى فرخة اسلقيها فيه واربطى شعرك قمطة
وجربى وادعيلى
تحياتى

أنونيمس said...

معلش
والمثل بيقول
اصبر ع الجار السو .. يا يموت .. يا تجيله مصيبه
.
.
سؤال معلش
عملتي الأرض بنفسي ازاي يعني؟؟
:)

EmY said...

هههههههههه
ست مستفزه فعلا بس انتي حكايه مسكتيش و جيبتيلها شلل رعاش
التجسس و الحشريه دي سمع في كتيييييير جدا من المصريين و العرب
بس مش كنتي تقولي انتي وراكي رجاله كنا جينا اتفرجنا عليها و هي بتشتمك
التنده حلت مشكلتك

بوست جميل اوي

DR.HAMAS said...

هههههههههههههههه

هههههههههههههههه

هههههههههههههههه

الصراحة كان نفسى أعلق

بس هقعد أضحك كمان شوية

مش قادر أكتب من كتر الضحك

ده ايه اللى بيحصل ده؟؟؟؟؟

و لا أقولك

يلا أما أعلق على موضوع الجيرة بالمرة قبل ما أمشى

انا عجبنى موقفك لما روحتى لها بيتها

ده كان جميل جدا

و ربنا بيعلمنا ازاى نتعامل مع الناس دى

(( ادفع بالتى هى أحسن فإذا الذى بينك و بينه عداوة كأنه ولى حميم ))

فعلا بتفرق قوى لو عاملتى الناس دى كويس

بس ليا عتاب
أتمنى بلاش شغل عم دهب ده

ريحى الست يعنى

و بعدين برضه خليكى محافظة على لبسك القيم المحتشم فى البلكونة زى ما انتى دايما

عشان ربى يرضى عنك

ربنا يا رب يحفظ كل أخواتنا المسلمات من كل سوء يا رب

و يهدى اللى مخهم مركب شمال


يلا جزاكم الله خيرا على حبة الضحك دول


د.حمــــــاس

appy said...

محمد / دايما تبقى الاول كده يا رب وميرسى ليك
ابن حجر العسقلانى
الامريكان كيتشن ده المطبخ اللى مفتوح على الصاله وقول لصاحبك يمكن يجيب لك واحد ههههههههههه
مروة منورة انتى هتقوليلى على المطريه
قطتى شيلينك لوقت عوزة يا قمررررررر
نيو ايجيبشن
اهلا بيك ويا ريت ردى عندك يكون اقنعك

3ala asm masr said...

بصراحه ربنا يكون فى عونك
احنا جمبنا واحد فاتح محل
كل ما نطلع البلكونه يفضل مشعلق رقبته وباصص علينا
وربنا صعب عليا لحسن يجيله اتب ولا حاجه
بامانه دى اكتر حاجه ممكن تضايق

MerMaid said...

ابي

ايه يا كوكي؟؟
انتي الخرفان بتوعك مربوطين الايام دي؟؟
مش شايفة ولا خروف عندي يعني؟؟

دايما منوراني
بس تعالي بس

-------------
الجيران اللي زي دي يا بنتي ماتستاهلش انك اصلا تحطيها في دماغك
خليهم يتفرجوا عادي يعني
علي الله يتعلموا منك حاجة مفيدة يمكن تنفعهم في يوم من الايام

:))

ولا تزعلي نفسك

:))

منوراني دايما
بجد والله واحشاني

WhItE HeArT said...

اول مرة ادخل على البلوجاية دي بس عجبني شكل البيوت فقلت استنى

بيني وبينك مناظرهم حلوه

المهم الموضوع محزن فعلا وشكلك كده لو عرفت احوش 46 ألف بعد عمر طويل ان شاء الله هاخد شقتي في عماره في الصحرا علشان مقابلش امثال الحيزبونه دي الا صحيح يعني ايه الحيزبونه هيه اكيد شتيمة بس لسه موصلتش موسوعتي

بس اكيد الست دي عندها وقت فراغ كبير قوي حاولي تشغليهولها يعني حطليها مرايه جنب التنده على طول ماهيه قاعده تشوف خلقتها وتزهق من نفسها وتقوم

اما عن نظام المطبخ فاانصح انك تقلبيه مصري "هيه تلاجه وبوتاجاز واللي عايز ياكل أرض الله واسعه" بجد البوست رائع

تحياتي لحضرتك

appy said...

أندر تراك
أول مرة نورت الكوكب بتاعى شكرا على النصيحه بس انا مقدرش انزل للمستوى ده
أ/راجى متغبش عننا كده رايك بيهمنى بس هات انت الستارة وانا اشدها دى مش نافع معاها حاجه
مهندس مصرى
حلو العمارات بتاعتكم عندنا زيها بس المستويات اللى فيها فعلا بتكون محترمة لان كان حجزهل غالى شويه بس انا مينفعش ارد على الاساءة باسائة فهمتنى
اجندا حمرا
ايه النور ده وبعدين مفيش صباح الخير لجارة زى دى لان توابعها وحشه هتلاقيها بقى معندكيش بصله لا حبه رز وقصص انا عارفه الشخصيات دى
سووووووو
منور يا بشمهندس بجد ولما تدخل البلوج عندى قولى علشان اقفل الكوكب عليك لغايه لما تعلق وعموما هقولك انا عامله ضلوع الامريكان كيتشن اورانج غامق وضلعين قدام بعض من الريسبشن اووف وايت والضلع الباقى لون الكافيه الغامق بس فيه ماتشنج يعنى كل اللى شافه قالى حلو قوى بس اذا انت عاوز تعمل شغل يعنى معنديش مشكله هههههههههه نهده من تانى وانت تعمله وعموما انا عامله ستارة قلوب كده زى البامبو على باب المطبخ
الطائر الحزين
والله ماشيه عدل بس مشروع الفرخه ده صعب قوى هو انا هعذب جارتى ولا اعذب نفسى ولا الفرخه ههههههه
انونيمس
اهلا بس يا رت تقول سؤال الارض ده مفهتش قصدك
ايمى
شيلاكى للكبيرة يا قمر وعموما هى تستاهل

د/ حماس
منورنى دايما بأرائك والله محافظه على لبسى بس هى اللى خلتنى أخد بالى منها ربنا يهدينا جميعا

على اسم مصر
منورة اقولك حل ارمى عليه مياه سخنه هيحرم يبص ليكم
وايت هارت
البلوج منوره جدا اما الحيزبونة دى معرفش يعنى ايه بس من المواقف اللى اتقالت عليها قدامى بتقال على الست الحشرية الرخمه يعنى وانا كلا البته لن أتنازل عن المريكان كيتشن دة لوحده موفر تمن السفرة

مصطفى said...

أنا خايف تعمل لك سحر ولا حاجة زي كدا ..عن جد الله يعينك

الربان said...

تحياتي

بالرغم من ان الموضوع مهم...لكن بجد خفة الدم في سرده خففت من وقعه..

اولا... في رأيي ان أسوء شيء في الكون ان يكون الجار في السكن متلصص.. او علي غير توافق مع جيرانه...حقيقي مشكله.

ثانيا..في رأيي أيضا..انك لو حاولتي التعرف علي جارتك هذه بالحسني و اللين يمكن تطمن اليك و تتأكد انك لن تخطفي الزوج...

ثالثا .. مبروك عليك التندة الشيك..شكلها جميل علي البلكونه...عرفت من اين؟ ...لا و الله انا لا تلصصت و لا تطفلت ..لكن أكيد البلوج الشيك يكون صاحبته لديها ذوق رفيع...

رابعا.. ان شاء الله جارتك ربنا يهديها لك...و تصبحوا جيران بحق...فالجار اقرب من الاهل ...

تحياتي و تمنياتي بالتوفيق.

appy said...

الربان
ميرسى ليك بس عاوزة اقولك على حاجه فيه نوعيات من الناس لو كلمتها تبقى زى الوطواط كده وبعدين فيه فرق اجتماعى وثقافى كبير ما بينا انا وهى ويا سيدى انا بشتغل وبروح البيت ادور على السرير فين يعنى مش فاضيه للكلكه بتاعت الجيران دى منورنى دايما كده

د/اجدع بنوته said...

يخربيت الفقر هموت م الضحك هههههههههههه

متخيله كل الحركات اللى انتى بتعمليها وراكشنات جارتك

ده انتى هتجننيها اصلا هههههه

وكويس انك لميتى المتكسر وبعدتى عنها

وبعدين يا حبيبة قلبى ده واحده كده شكلها اصلا لا تعليم ولا تفكير ولا ثقافه ولا دماغ

عيزاها تفكر م فين .. كل اللى بيحركها غرايزها .. خايفه ع جوزها .. واللى لو سكنت جنبهم هيفا وهبى هتخاف عليه منها برده

وبتربى اولادها بغريزة الامومه وكفى

ربنا يحمينا ويهديها ويخلهالك

اهو واخده بحسك ف الشقه
مغامرات ابى واجيرى

ههههههههههههههههههههههههه

Shark said...

عادى ياأابى ده نتيجه للعشوائيات المتراكمه فى كل مكان فى البلد والجهل والأميه ألخ ألخ ألخ
عايز اقولك انى سبت شقة أبويا ,امى اللى ايجارها 4 جنيه فى الشهر ورحت اجرت شقه ب650 جنيه عشان الأرف ده مع العلم انى عملت كل حاجه ممكنه عشان أضايق الناس اللى بتتعمد تركز معايا فى الرايحه والجايه ومع ذلك فشلت وبقيت أنا الجار السو اللى رحل قبل ماتجيله شوطه .تحياتى .