سوق العبور ....غير عبور 6أكتوبر


هى الحكايه دى حصلت ليه من فترة بس حبيت احكيها لكم علشان بجد البنات تأخد بالها كويس وتتنصح ومش عاوزة ضحك من اولها عليا انا بقول اهو
نبدأ هلاوس فى يوم جمعه كده وده طبعا يوم أجازتى من الشغل عملت عمله ملخبطه اليوم ده بصحى بدرى معرفش ليه واحب افطر واقعد فى البلكونة اغيظ فى جارتى شويه وانا بشرب شاى (ايون علشان مش بحب المسكافيه ده) . خير الله ما اجعله خير جت ليه الهواجس تانى والهلاوس السمعيه والبصريه وقالت ليه انى اقوم زى الستات او البنات الشاطرة واروح اجيب حاجات للبيت من سوق العبور زى الناس الشاطرة دى (سوق العبور بتاع الخضار والاسماك فى القاهرة علشان اللى مش عارفه سوق كبييييييير قوى وجمله ) الهاجس ده بقى اقنعنى انى ست اقنعنى بكده وطلع كداب كدب. المهم قمت عملت حركة مكوكيه فضائيه زى بيرنارد ودونالد دك ولبست بنطلون ترننج وتى شيرت ونكشت الكام شعرايه اللى ربنا انعم بيهم عليا (هههه اصلى شعرى خفيف بس مبقتش زى المجانين ) وده طبعا بعد ما حطيت السائل الهلامى اللى بيتقال عليه جل (اللى تحس ان فيه صعايده مسكين فى خناق بعض فىشعرك ) ولبست النظارة الشمس لون التى شيرت والبنطلون لونهم بنى ولبست كوتشى موف ملوش علاقه بالموضوع (محدش يضحك عليا انا بكسل البس الكوتشى اللى برباط وده من غير رباط بس اللون مختلف ) وقولت فى عقلى اتلمى وبلاش ميك اب والوان شم النسيم اللى بتعمليها دى انتى رايحه سوق. ونطيت جوة المركبه الفضائيه بتاعتى (عربيتى بطوط) وروحت يا اخونا وعنيك ما تشوف الا النور مبقتش فاهمه حاجه من اى حاجه واسمع احلى كلام اكتشفت ايه بقى ان اللبس ده مينفعش للمكان ده خاااالص (بس اصل دى اول مرةانزل سوق بجد جهل بس بجيب من كارفور او اى ماركت كبير ) والناس كمان مش بتلبس كده خالص وانا بقيت واقفه عامله زى القرنبيطه العبيطه وسط السوق المهم (جهه دور التبذير والهواجس لعبت دورها) اشتريت قفص طماطم وخمسه عشر كيلو بطاطس وزيهم بصل وزيهم موز من عند واحد بتاع جمله وخيار برضه خمسه كيلو وبعدين مشيت شوية وكنت اتنصحت بقى ولقيت الناس بتاعت القطاعى جبت كيلو ليمون واتنين كيلو رومان ومبقتش لاقيه مكان فى عربيتى بما انها صغيرة وكانت حوسه فعلا (محدش يسال انا جبت الكميات دى ليه اصل اخبط بقله انا اصلا معرفش ليه ) المهم قولت ايه بعد الصدمه دى مش ممكن اجى هنا ومزورش منتجات البحر الاحمر قمت رحت عنبر السمك (ومحدش يسال يعنى ايه عنبر هما قالوا ليه كده ) بس الاهم بقى وانت رايح هناك تأخد معاك حاجه من الاتنين يا مايوة شيك يا جزمة بوت بلاستيك تكون على الموضه كده وكمان حاجه تقفل بها الشعب الهوائيه بتاعتك (مقلوكوش على الروايح بقيت محتاسه ارفع البنطلون من الارض لا اقفل مناخيرى ) وطبعا هنا المعاكسات اتغيرت اتحولت من تفاح مانجه لالفاظ الاسماك ههههههه وخد عندك جبت اتنين كيلو سمك بورى وكالمارى وجمبرى جامد وعلى فكرة الحاجات رخيصه جدااااا المهم اشتريت الحاجات دى والراجل نظفهم وشوى ليه السمك . وقررت الرحيل بقى من السوق بعد معركه عنيفه داخل السوق من انى اعرف امشى من الناس ولا مصمصه شفايف الستات اللى هناك . واحتست فى البيت بقيت العن ابو الهساهس اللى اقنعتنى اصلا انى ست وانى اعرف اشترى حاجه وانى زى بقيت الستات . وقعدت اعصر فى الطماطم وارميها فى التلاجه من غير ماأصفيها (ايووووون جهل سمعاكوماما قالت ليه سبيها وبعدين هصفيها ) وافرط فى الرومان واغنى له (ادحرج واجرى يا رومان ههههههههه) وارمى البرتقال والموز فى كل حته وكله كوووم بقى وطلبت انى اعمل الكالمارى دلوقتى بعد تلات ساعات حرب مع الطماطم وباقى الخضار فى انى اقنعه انه يدخل التلاجه او اشيل البطاطس تحت السرير (دى معلومة جامده حطى البطاطس تحت السرير على البلاط مش هتبوظ ) واصلا عمرى ما عملت الكالمارى بس جت على خير وقرأت فى جرايد المعارضه انه كان هايل . ومن ساعتها قدرت اغلب الهساهس دى وتحيا السوبر ماركت فى شراء الخضار ويسقط سوق العبور كله وده اخرة اللى بتمشى من غير ما تسمع كلام امها بجد لانى اخدت تريقه من امى واخواتى واشتغالات اللى يقولى افرشى بيهم فى الشارع واللى يقولى هات الحاجات وتعالى وكان يوم بس بجد انا مكنتش اعرف ان فيه مكان للجمله ومكان للقطاعى وغير كده مفيش ست تروح لوحدها سوق العبور ده خالص ونصيحه بلاش افتكاسات هبله وتحيا السوبر ماركت.

49 اخبط وقول رايك:

الفاتح الجعفري said...

ههههههههههه
يعني بتروحي كارفور وهايبر ومترو تقومي تروحي سوق العبور دي غلطه فظيعه وبعدين سوق العبور ده مكان راقي جدا طب لو رحتي سوق الجمعه ولا سوق التلات كان ايه اللي حصل
علي العموم ربنا ستر وعدت علي خير ولماتجيلك الهواجس دي تاني استعيذي بالله من الشيطان الرجيم
بس طبعا الحجات هناك رخيصه جدا واديكي خدتي خبره وشوفتي انواع جديده من الناس
علي فكره في دعاء لدخول السوق(لااله الا الله وحده لاشريك له له الملك وله الحمد يحي ويميت وهو حي لايموت بيده الخير وهو علي كل شيء قدير)اللي يقول الدعاء ده يكتب له الف الف حسنه (بما يعادل مليون)ويمحي عنه الف الف خطيئه ويرفع الف الف درجه
يعني ثواب كبير جدا
وجزاكم الله خير

بحبك يامصر said...

طبعا الخطوه كانت غير محسوبه
وعدت على خير بس فى حاجه الناس الى فى السوق معظمهم صعايده مش بيروحوا بلادهم الا فى الاعياد فبلبسك اللى انتى وصفتيه عندهم حق يعكسوكى
طبعا انا بهزر المعاكسه مينفعش تكون حق
بس جت سليمه

Ahmed Al-Sabbagh said...

هههههههههههه

يا عينى المووووووزة

هيشنوقوها

عاااااااااااااا

انا بس جاى احجز التعليق التالت واروح يمكن المدونة بتاعتك تحن عليا وتخلينى اقرا باقى البوست

وبعدين انا فرحان

عشان نيتى .. اتعدلت

هههههههههههههه

:)

تحياتى ولى عودة

أحمد

Desert cat said...

اااااااااااااااه فكرتينى بالتجربة اللى حلفت انها مش هتعود
اصلا انا عمرى ما روحت سوق برضه
بس مرة كنت سهرانة وقرفانة وعندى ارق
روحت السوق مع بنت عمتى
ولسه هدخل برجلى اليمين لاقيت خناقة وبتاع سبتها ورجعت
انا مبحبش الاماكان الزحمة علشان كدا مبحضرش افراح ولا مياتم حتى
يقوم انتى جاية تقولى سوووووووووووق

shams said...

سوق العبور
يا خبر حد روح سوق العبور من غير ما يعرف دة انتي جنيتي على نفسك بس انتي اتعلمتي المأساه لو و جبتيها من اقصاها الي اقصاها بس قليلي صحيح مين اللي شالك الشيل دي كلها
-------------------
على فكرة لو نزلتي من البيت اربع محطات بس هتلاقي الخضار دة كله موجود و الله

أحمد سعيد said...

بنت يا آبى

دانتى طلعتى بطلة اهو

وبتخوضى مغامرات

اجمل حاجه فى الموضوع معاكسة بتوع السمك

بس هما صحيح كانوا

بيقولوا ايه بالتحديد

وصح ما عملتيش بنصيحة ماما ليه

وفرشتى بيهم فى حته

كنت هاجى اشترى منك

بس مش تغلى عليا

هههههههههههههههههههه


تعيشى وتشترى

أخوكِ..نيجــر

daktara said...

معلش بقي كل سوق وانت طيبة
المهم الاكل او الطبيخ او حتي السمك المشوي طلع حلو في الاخر
ولا انت يعني عماله تحكيلنا علي الحاجات اللي تتعب بس وساعة الهوبر بطلتي كلام

daktara said...

علي فكرة لو عايزة مايوه
البكيني هنا في شرم علي ودنه ابعتلك واحد

مهندس مصري said...

طيب ما خلاص انتي عرفتي النظام ايه
بعد كده تلبسي بما يناسب السوق و تتجهي لبياعين القطاعي دوغري
و بالهنا و الشفا
:)
و مدونتك تقيلة جداً على جهازي
غيري الخلفية بحاجة بسيطة الله يكرمك

الجهاز قديم و تعبان و مش قد مدونتك كده

د/اجدع بنوته said...

هههههههههههههههههههههههههههههههههههههههههههههههههههههههههههههههههههههههههههههههههههههههههههههه

بس هموت م الضحك اصلا وانا متخيله منظرك بالخضار كده

ههههههههههههههههههههههه

والسمك يالهوىىىىى

ومعاكسات كمان

يوم زى الفل

Heart Beat said...

انا فعلا اسمع عن سوق العبور و ان الاسعار فيه رخيصة و حلوة

بس عمري ما روحته ابدا عشان بعيد عني و كمان ماعنديش غير سكوتر في البيت يعني وسائل المواصلات بيتوتية فقط

بس عندي سؤال اشمعنى احط البطاطس على البلاط اللي تحت السرير ... هل ممكن احطها على البلاط اللي في التورئة مثلا او اللي في المطبخ نفسه و ياريت لو تساعديني لاني حطيت البطاطس على بلاط المطبخ زي كتاب ابلة النظيرة و لما قريت بلاط السرير دي عندك اتلخبط

و انا عندي ليكي وصفة لعمل كالماري مافيش اسهل منها و مش من كتاب ابلة النظيرة ماتخافيش

مفلس افندى الرايق said...

حقيقى على راى المثل

من خرج من داره
ومن سوق العبور اشترى خضاره
واتحمل متاعب السوق وزحمته وغباره
مع ان كارفور قريب منه
ده يمكن يكون جنب داره
بس اهى غلطه وقلت مقداره
وخلت مفلس يتريق عليكى باشعاره
ههههههههههه

احنا نرفع شعارنا هنا

من كـــــــارفور ل ســـوق العبـــور

اسلوبك جميل وخفة دمك واضحه جدا فى كتاباتك بس اوعى تكرراريها تانى وتروحى سوق العبور

تحياتى

kikotalaat said...

سلاموووووووووو عليكوووووووووووو
بجد الموقف تحفة أنا فضلت أضحك من لحد ما خلصت البوست
أنا برضه بقول خليكي في كارفور أو سوبر ماركت
بس أكيد تجربة لذيذة وهتفتكريها بعد كده وتفضلي تضحكي
ومش هنتعلم بين يوم وليلة

كان معكم ..,
كيكوووووووووو

الطائر الحزين said...

الاسواق
المفترض نشترى الحاجة ونجرى منها


تحياتى

عصفور المدينة said...

إيه يا بنتي البوست الأرستقراطي ده

إحنا عايزين ناس تندمج مع الشعب كدة

احمد الجيزاوى said...

طلمه ملكوش فيه بتعمله له
طيب الدعايه دة ليكى كدة
هتجبلك جوز جزمه قديمه يطلع عينك فى السوق
هههههههههههههههههههههههه
احمد الجيزاوى

بيتنا القديم said...

نورتي السوق يا فندم وعنبر السمك
عايزك تعرفي ان الخبرة تراكمية يعني النهاردة اتريقوا عليكي عشان هيستي في السوق..وكنت عشوائية في الشراء غوغائية في التنفيذ مكوكية في الهساهيس
ولكن
يبقا الاهم انك خضت بحراً يخشي الاخرون الخوض فيه..روحت وغامرت واتريقوا عليك واشتريتي ورجعت بالسلامة بنصر عظيم مبين رجعنا لروح 6 اكتوبر العظيمة والرصاصة لا تزال في جيبي
شكراً لك
ولعربيتك
ولعنبر السمك
وكل من ساهم في معاكستك
نسيت
وشكراً للكوتشي ايضاً
(:
دمت بخير

محمد الجرايحى said...

التجربة أكبر معلم
وأحييك على أسلوبك السلس والطريف

تقبلى تقديرى واحترامى

أخوك
محمد

اجري على الله said...

الاستاذه اببي
اولا بعد كثير من الضحك انا مش عارف اقول ايه
في كلمه بتقولهالي الست الوالده اطال الله عمرها -الجوع ولا الراحه- كنت قاعده في الكوكب بتاعك مستريحه تنزلي ليه لكوكب الارض
على فكره انا مش قاهري
علشان كده مش عارف سوق العبور كويس
لكن يقينا هو احسن حال من سوق باكوس خصوصا ان سوق باكوس ايضا به سوق شهير اسمه سوق السمك

بالهنا والشفا وعلقه تفوت ولا حد يموت
على ذكر الاكل كان في شاعر بيحب الاكل قوي فكتب الابيات دي بيقول ايه
****
احب الحم مشويا وطبخه
واعشق من اطايبه الكبابا
ولو نشبت يدي بصدر ديك
اقرمشه ولو اتت النيابا
فقرمشة العظام اشد حبا لقلبي
من الكامنجة والربابا

تحياتي دائما
الشاعر بن هلال

Shark said...

بالذمه يعنى مالك انتى ومال الكلام ده ؟ بقى من كارفور وهيبر وان لسوق العبور ومش عايزه الناس تتريق عليكى .
ثم بطاطس ايه دى اللى تتحط تحت السرير ؟ البطاطس تتحط فى الدولاب !!!!
انتى باين عليكى مابتاكليش كرانشى ولا ايه.

فرنسا هانم said...

بالذمه مش قاعدتك فى البلاكونه
وتغيظى فى جارتك
ارحم مليون مره
من السوق
بس قوليلى
هى جارتك متغاظه ليه ؟؟
هى معندهاش شاى ؟؟؟

appy said...

الفاتحالجعفرى
هو مين سوق الجمعه ده يمكن اعمل له زيارة وشكرا على الدعاء

بحبك يا مصر
هى مش خطوة هى طقة فى دماغى

احمد يا خالوووووووو
الحمد لله يا رب تثبت نيتك دى بس

قطتى

قريتها عندك بس بصراحه الناس فى سوق العبور مبتضربش ولا تشتم متخافيش

شمس
اللى انت بتقول عليه ده ناس بيشتغلونى فى الاسعار وانت عارف النكان هناك عامل ازاى يبقى برضه تحيا السوبر ماركت

احمد سعيد
ميرسى ليك المرة الجايه هقولك وتيجى تشترى

دكترة
انا مبلبس بيكينى ولا تينى كينى انا بس بنصح اللى بيروح هناك وهى مرة ومش هتتكرر ليه هههههههه

مهندس مصرى
غير البروسيسور او طور الجهاز انا لن اتنازل عن خلفياتى مرة أخرى انا هعمل اعتصام واضراب ههههههه

د/ أجدع بنوته
ما انا بعمل مصايب وبعدين بنصحكوا أهو علشان محدش يقع فى الغلط

هارت بييت
ممكن تحطيها فى اى مكان بس بما ان تحت السرير فاضى ومتغطى يبقى اشيك يعنى وعموما انا عملت الكالمارى وطلع تحفه فى الفرن

appy said...

مفلس أفندى
كده بتتريق عليا مقبوله منك نردها لك فى حاجات كويسه هههههههه

كيكووووووو

هسمع نصيحتك ونورت الكوكب

الطائر الحزين
ما انا مكنتش اعرف بصراحه

عصفور المددينه
هو سوق العبور ارستقراطى الله يجازيك خير طيب حضرتك قولى اروح فين

أحمد الجيزاووووى

كده ماشى ما انت عارف اللى فيها ومين ده يطلع عينى ربنا يسامحك

بيتنا القديم
انت كمان زيهم محدش قدر معاناتى هههههههههه

محمد الجرايحى
ميرسى للمجامله

الشاعر ابن هلال
ربنا يخلى ليك الوالده انما فين باكوس دى

shark
لا مش بحب كرانشى البطاطس بتتحط على البلاط اصلا علشان مش تبوظ لما تكون جايب بكميات كبيرة

فرنسا هانم

هو انتى مقريتيش بوست الجارة الجاسوسة عندى اقريه وانتى تعرفى بغيظ فيها ليه هههههههه

الربان said...

تحياتي

العيب في بطوط...طلعت مش كويسة لانها وصلتك لغاية هناك...كان لازم تزرجن..و تحلف ماتروح لا سوق العبور ولا سوق الجمعه...:)

في رأيي انك اضفتي تجربة جديدة الي تجاربك
يمكن تكون مكلفة لانك اشتريتي كميات كبيرة يمكن تكوني لست بحاجة اليها...لكن
في النهاية اتعلمتي شيء جديد...لهذا ابتسمي و لا تتجهمي..
نصيحتك و اعطائك تفاصيل تجربتك مفيدة جدا للرجال و النساء و خاصة هؤلاء الذين لم يذهبوا الي سوق العبور سابقا
جزاك الله خيرا...

تحياتي و تمنياتي

رئيس جمهوريه نفسى said...

طب اسالى او خدى معاكى قائد وبعدين مين قال فى الاول انى شعرك خفيف حتضحكى على شعب الكوكب بتاعك مكلهم شافو الصوره نيعععععععععه
وايه حكايه الصعايده الى بتتخانق فى شعرك الصعايده لو اتخانقو فى شعرك راسك حتطير هههههههههههههههههه
خاليكى فى الماركت يا ابى بس بجد الطازجه احسن لما تكون من السوق

ABUL_HASAN said...

السلام عليكم ورحمة الله وبركاتي....دي اول زيارة ليا هنا اصلي انا مدون جديد..ياريت تقبلني ضيف وصديق للمدونة.وبصراحة البوست جميل بس الصورة اجمل ومعبرة جدا.وبرغم اني مش عايش في القاهرة وانما عايش في المكان اللي بيجيبوا منه الناس اللي بيحطوهم في الجل علشان يعملوا خناق في شعر الناس....الا اني بشوف ان السوق ده بيعبر عن ثقافة مجتمع... ولسه كنت سامع عن اكبر لوحة دخلت موسوعة الارقام القياسية رسمها فنان مصري وموضوعها هو سوق التلات لو مكنتش غلطان...بس بجد هي فكرة مجنونة ومغامرة تستحق التكرار.

appy said...

الرباااااااان
الحمد لله حضرتك اخدت بالك منن الغرض من تدوينى ان الناس تستقيد حتى لو غلطات صغيرة ونفسى كلنا نبقى كده

سيادة الرئيس
كده بلاش الصعايده وبعدين ربنا يجازيهم خير اللى نشروا صورتى فى الفضائيات ههههههه

ابو الحسن
اهلا بيك فى كوكبى وانا بحب فى كتاباتى ارعى التوقيت المحلى قصدى الناس اللى عايشين بره القاهرة فبوصف شويه بدقه لو شوفت بقيت البوستات هتعرف

walaa said...

ههههههه
انا طول ما انا بقرا البوست وانا ميته على نفسى من الضحك دمك حفيف بجد وبعدين انت رايحه تجربه تقومى تجيبى كل ده
بس انا على فكره معرفش سوق العبور ده لانننى اسكندرانيه والحمد لله
ولاء

أنونيمس said...

اومال لو ربنا كرمك بقى وروحتي سوق الجمعة تحت كوبر التونسي هاتعملي ايه يا ابي؟؟

بعدين دي معركة صغيرة كده شدي حيلك
وابعتيلي اتنين كيلو موز وتلاتة بطاطس

:)

bondque2001 said...
This comment has been removed by the author.
raspoutine said...

سوق العبور ده ليه معايا حكاية بس مش ظريفة خالص ومن ساعة اخر مرة كنت هناك وانا بطلت اتعامل مع تجار فاكهة تانى

L.G. said...

افرشي بيهم في الشارع
عندما قرأت تلك الجملة ضحكت ياه ربنا يسعدك من زمان مضحكتش كده
بس بجد أحييكي عارفة ليه زي ما عصفور قال عايزين ناس تعيش مع الشعب انت كده حتعيشي وتفهمي وتزودي خبراتك في طبقتك وفي غيرها حتشوفي وتتعلمي وتعرفي وعمرك ما تنجحي من غير ما تغلطي على الأقل عرفتي سعر الخضار والفرق بين الجملة والقطاعي وعادات الناس فس الأسواق ونظرة الفلاحين للطبقات بتاعة كارفور الموضوع مش هزار الموضوع جد والله شفت الناس شفت لبسهم شفت عيشتهم رأيك ايه ليه مصورتيش ولو انهم كانوا حيضربوك ساعتها كويس انك مصورتيش
التجارب بتعلم أحسنت

صانعة الحرية said...

هههههههههههه
انتى عارفه انا كمان عمرى ما نزلت سوق
والحمد لله انتى عقدتينى
ومش هتخلينى انزله ابدا
بس كويس والله
اتعلمتى حاجه جديده
وبعد كده ابقى استخيرى قبل ما تنزلى اى مكان
وجميله مدونتك

Nada said...

ههههههههههههههههههههه
ههههههههههههههههههههههههههه
ياخبر ابيض
دانتى بتحاربى يابنتى
حسة انى كنت بقرا مذكرات حرب 73
هههههههههه

أبو خالد said...

سيدتى الفاضلة Appy palnet..
أنا لا أعلم هل انت تغيظيين جارتك أم تغيظيين أصدقاء مدونتك فيه حد يروح السوق بالوصف ده ..
حرام يا Appy
أبو خالد

اجندا حمرا said...

لوووووووووووووووووووووول

اما موقف ياابي يالاهوي يابنتي ايه اللي عملتيه في نفسك ده
بقه تروحي سوق العبور لوحدك ده برضه اسمه كلام

بس استمتعت جدا بحكاويكي اللذيذه و الحمدلله انك رجعتي بيتك بالسلامه
:)

عجبتني حته البنطلون لما رحتي عنبر السمك لول

مروة الزارع said...

هههههههههههههه

على فكرة لو اى أكل زيادة من السوق او غيرة تاعبك ممكن أجى أساعدك

بقى مفتوح 24 ساعة

ابن حـجـر الـعـسـقـلانـى said...

طب بصى يا ستى أنا هاعلق على حاجة واحدة بس من الحاجات الكتير الطريفة اللى قلتيها

ليه ما روحتيش سوق القلل .. أهو تجيبى نقلة قلل قناوى من بتاعة بلادها عشان يبقوا مخزون استراتيجى ليكى لزوم القذائف اللى بتوجه لرؤوس الناس

بس بجد مقال جامد .. ضحكتينى

نوراى said...

هاى
بصى انا كمان روحت سوق العبور مرة واحدة فى حياتى بس مل كنتش لوحدى بس بعدها قررت انى عمرى ما هعمل الموضوع تانى بس للاسف انا ما شترتش حاجة خالص منة انا اول ما دخلت ولاقيت الدنيا كدة اللى كانوا معايا جرونى من افايا على العربية وقالولى مش عايزيين نسمع نفسك طول اليوم لان طبعا الفكرة دى كان من افتكاساتى

ومن ساعتها حرمت

على فكرة انتى دمك خفيف جدا تحياتى ليكى

DR.HAMAS said...

ههههههههه

يحيا سوق العبوووووووور

تسقط السوبر ماركتات كلها

بس للرجالة بس

انما الستات


تحيا السوبر ماركتات

و يسقط الخروج للسوق من أساسه

انا عن نفسى مش هبقى أخلى زوجتى تروح اى سوق

انا بغير الصراحة


شكرا اختنا آبى



د.حمــــــاس

NIDAAL PAL said...

ههههههههههههههههههههههههههههههه انا بقى عايز اعرف شىء واحد هنا
كيفك الاول ؟ و كيف الخضار ؟ و كيف لوزة ؟ هههههههههه
انتى شكلك كدة مش عارفة حجم المغامرة الى انتى كنتى مقدمة عليها
يعنى ممكن واحدة مش بتروح كارفور يعنى تعرف تسلك فى سوق العبور
لكن مادام جت لغاية كارفور يبقى انتى شجاعة بجد .. بس ده غير كارفور و هايبر
و الناس دى .. لان نوعية الناس بتختلف 360 درجة و اعتقد كونك عرفتى تتعاملى معاهم ده تقدم هايل فى طريق الخضرية الحديثة العصرية
اما بالنسبة للمعاكسات ايتها العزيزة آآآآآآآآآآآب
دى حاجة عادية جداً جداً فى الاسواق المصرية زيها زى التتنيح و التسبيل و الى فاكر نفسه انه ما فى زيه فى السوق
روميو بقى و من المفترض انك جولييت السوق .. ههههههه
ده انا لما شوفت صورتك فى البلوجر تبع الصباغ .. كنت عايزاشوفك مخصوص علشان اعاكسك .. و اللوم على الصباغ مش عليا .. هو الى صور النجمة مارلين مارلو ...هههههههههه
انا بعاكسك هنا هاا
و ازاى قدرتى تتحملى ريحة السمك .. ده انا عديت مرة و مكررتهاش من جنب عنبر الاسماك ده و كنت بره السوق خالص اساساً و ما قدرت اكمل
دمتى و دام قلمك الساخر العجيب
و دام سوق العبور لكل بتوع كارفور
تحياتى لك يا / آآآآآآآآآب

Soooo said...

يانهارك ازرق
يابنتي ده انا اللي اسمي راجل والحمدلله راجل
باروح هناك بابقى خايف
تقومي انتي تروحي وانتي لابسه جزمه موف
موف
!!!
ونضاره سمس
سمس
!!!!!!!!!!
وحاطه على شعرك جيل كمان
لاااااااااااا

وتخشي عنبر السمك
كمان
ده انتي قلبك ميت يابنتي
ده لو على جثتي مادخلش عنبر السمك اللي هناك ده خاااااااااالص


عموما اديكي اتعلمتي من اخطاءك
وماله كارفور المعادي يعني
ده خطوتين تلاقي نفسك هناك
وفي ربع ساعه تجيبي كل حاجاتك
وتقفي تحاسبي اربع تيام بلياليهم
عادي يعني


يلا الحمدلله انك رجعتي من غير اصابات
هتعزمينا امتى ان شاء الله؟؟؟


سلاموووووووز

3ala asm masr said...

المهم حمد الله على سلامتك

حازم سويلم said...
This comment has been removed by the author.
حازم سويلم said...

هو فعلا العلم ثبت عدم وجود علاقة بين سوق العبور وعبور أكتوبر , دى اول زيارة بس عجبنى تعبير ( القرنبيطة العبيطة ) فى السوق .. وعلى فكرة انا ملاحظ ان القلل كتير فى المدونة .. وأهم شئ أن أنتى بخير وكاليمارى

Zika said...

والله فكره..اما اجرب انزل سوق العبور ده
وابقي لابس شورت عشان ماعدش ارفع البنطلون من عالارض
وكمان عشان تبقي ايدي حره امسك بيها مناخيري لامؤاخذه
تجربه رائعه ..وربنا يكتر من التجارب المنيله اللي زي دي
انا ليا تجارب مبهدله بارضه بس مش في سوق العبور
في اماكن تانيه روحتها بالصدفه البحته وبالاجبار لما كنت بشتغل صحفي
ايام الله لا يرجعها
تحياتي

appy said...

يا رب بجد تكونوا استفدتوا من التجربه او غلطاتى على قد ما قعدتوا كلكم تضحكوا عليا
عااااااااااااااااااااااااااا
بجد بعيط علشان انتم ضحكتوا كتير عليا بس عادى انا اخدت حسنات كتير علشان ضحكتوا هههههههههههههههههههههههه

واللى مرحش السوق يروح ويتعذب زى بس هيكون خد خبرة
ومقبوله منك يا نضال عاكس براحتك انت اخويا الصغير ههههههههه

سووووووووووووو
شوفت التضارب فى الالوان عملته علشان اغيظك هههههههههه

د/حماس
يا ريت كل الرجاله زيك الا فيه معندهومش نخوة

مروة
مفجوعه عنيه
زيكا
اكتب بلاويك دى ممكن نستفيد منها
حازم
هى قرنبيطه بس اللى عجبتك ماشى
نوراى
كويس لقيتى حد يشدك من قفاكى اما انا لقيت نفسى بقوة الدفع جواه نورتى الكوكب بتاعى الصغير

ابن حجر ولا نقول ابو العساقيل

هههههههههههههه هأخد معايا وانا بجيب القلل ييمكن تكون اول واحده من نصيبك ههههههههههههه

أُكتب بالرصاص said...

صحيح

النفس أمارة بالسوق


ومن خرج من كارفوره

اتقل مقدوره

بقالي كتير ما ابتسمتش


حزاكي الله خيرا
وتسلم إيديكي

Dr.Mohammed Gohary said...

سلامو عليكوووووو

انا جيت تاني

ايه دااااا
سوق العبور ايون ايون عارفه

السائل الهلامى اللى بيتقال عليه جل (اللى تحس ان فيه صعايده مسكين فى خناق بعض فىشعرك )


تصدقي كان نفسي اوصفه ما لاقيتش ابلغ ولا افصح ولا أجمل ولا أحلي ولا أحمدج ولا محمد ولا مصطفي ولا ام ناجي .... وراكي حاجة ولا أكمل
هههههههههه لا بجد وصف دقيق جدا للحالة المأساوية للشعر بعد وضع السائل الهلامي العجيب دا عليه


لبست النظارة الشمس لون التى شيرت والبنطلون لونهم بنى ولبست كوتشى موف ملوش علاقه بالموضوع

طيب كويس انو ملوش علاقة بالموضوع بس قوليلي بذمتك ما كان جذاب يعني وانتي ماشية محدش قالك ياواد ياجميل يابو كتشي موووووووف هههههههههه غريبة جدا
الطقم كله بني ودااااا موف أصله شيطاني هههههههههههه



وانا بقيت واقفه عامله زى القرنبيطه العبيطه وسط السوق

أو زي راس الكرنبه هههههههههههههههه
عسل وربنا


محدش يسال انا جبت الكميات دى ليه اصل اخبط بقله

وليه العنف دا مش هسأل
قال قلة قال



دى معلومة جامده حطى البطاطس تحت السرير على البلاط مش هتبوظ

لا ولله معلومة جديدة الفران هتاكلها وماعرفش هتيجي منين بس هتيجي



تحياتي بوست هايل بجدج اسعدني

دمتي بسلام