انت بدود ليه



سؤال بجد بيحيرنى اليومين دول ومش قادره اقفش فيه رايح جاى زى بندول الساعه لما جاب ليه تربنه فى دماغى الداخليه وعقلى الخارجى
احنا بندون ليه ؟؟؟؟؟؟؟
يعنى علشان حاجه تتغير ... ما هو مفيش حاجه بتتغير


علشان نأثر فى بعض........ دا احنا بنقرأ من هنا والكلام بيطير زى الكحول من هنا
علشان نفش غلنا مثلا ..... طيب ما انا اجيب بتاعه الهبله الكبيره دى بتاعت البوكس واقعد اضرب فيها او اضرب حد من اصحابى انا عندى ناس غاويه العب بوكس فى اكتافهم
او اروح الجيم ومنها رياضه واستفاده

علشان الناس تدخل وتقولى الله كلامك حلو .... يا سلام طيب وايه الفايده كلامى حلو ولا وحش انا مش شايفه اى تأثير من اى اتجاه

الناس اخلاقها وحياتنا بقت دووووووون دوووووووووون دووووووووون يا شوباب والله
ومتزعلوش من اللى هقوله فيه ولاد بقوا اكثر تناحه واستعباط وفيه بنات بقوا اكثر صيدا للعرسان والتفاهه وفيه ولاد عايشين على قفا بنات وفيه بنات عايشين على قفا رجاله كبار
والبلد باظت اى والله باظت انا صحيت من النوم فجأه لقيتنى شيفاها بايظه

دا انا اكتشفت ان فيه ستات محترمات بنات عائلات شورعيات سورى يعنى غاويه فرقعات اعلاميات فى التليفزيونات باى استعباطات

طيب نرجع لسؤالنا بقى
انتم بدونوا ليه طالما مش هنغير
انا عن نفسى
عندى اقعد ااشتغل مفرش تلاجه بالخيط والابره افيد مع انى برضه دى مبعرفش اعملها اى والله طول عمرى فاشله فى القصص دى
سؤال كمان احنا شغلين نفسنا بحاجات مش بتاعتنا ليه
هو احنا عارفين نعدل المعوجه اللى عندنا لما نعدل المايله اللى برا مش كل حد يتلهى على عينه ويخليه فى نفسه

هو انتم زهقنتونى بسرعه ليه
امممممممممم يالا بقى ردوا عليا والله ومحدش يسفسط عليا على راى نواره علشان معضش حد من مناخيرة وانا بنقرف اصلا

ملحوسه خفيفه :- البوست اللى فات الراجل لغايه دلوقتى اتعمل له اربع قضايا منهم بتاعت سرقه ميزان وكهربا ومش عارفه ايه بس انا عاوزه الموضوع ده الصحافه كلها تنشره ومش عارفه ازاى لان ده هيبقى رادع لناس كتير اليوم السابع كلمونى بس برضه اسكت هوس محدش عمل حاجه مع انهم اللى كلمونى مش انا يكونش خافوا من الراجل
يالا ما علينا

اعتذار كمان :- انا عارفه انى مبزورش حد كتير او والله بقرا بس مش بعلق الوقت عندى مهبب بهباب اسود لون الزفت بتاع الاسفلت فمحدش يزعل انا تقريبا بقرأ لناس كتير بس مفيش حاجه اعلق بيها هبقى اجيب مشبكين اعلق بيهم فمحدش يزعل منى

اتمسوا بالخير بقى
كان معكم مراسلكم من جوه التلاجه لواء اركان حرب آبى هانم

حكمه الامبراطورة

الشاطرة تغزل برجل خروف

79 اخبط وقول رايك:

محمد فوزي said...

غريبه إن واحده من أكتر الناس في عالم التدوين اللي بتأثر تأثير إيجابي وعملي تسأل نفسها السؤال ده و اكيد ده مش رأيي لوحدي ,,فيه ناس متقدرش تسكت على السلبيات وبتحب تشوف كل شيء جميل ويمكن بيحسوا ان قدرتهم على التغيير اكبر من مواقعهم اللي هما فيها عشان كده بيشاركوا في المجتمع ويدونوا وبحس انك منهم

انتي بس متاخديش كل حاجه على أعصابك وحاولي تستمتعي بالكتابه على قد ما تقدري واكيد دي حالة ذهق طارئه وهتعدي ان شاء الله

لورنس العرب said...

مش شرط عشان مفيش حاجه تغيرت يبقى نتخلى عن اللي بنعمله
ومش شرط عشان فيه ناس كتير جهله أو اعدادهم في ازدياد اننا نبطل تعليم
لكن معنى ان فيه كلام ان هناك بصيص من التغيير -وانا بقصد التغيير في انفسنا- المهم ان الكلام موجود
لأن حتى لو ده مش موجود يبقى عليه العوض في كل حاجه واولهم امخاخنا
صحيح مش عارفه تعدلي المعووجه
لكن على الاقل لم تجعليها تزداد اعوجاج لغاية ما تنكسر
يعني كلامك كان حمايه للمعووجه من الكسر

GeHaD-----(male) said...

التغيير التغيير تفتكري هييجي من يوم وليله
وبعدين البلوج اسمه مدونه زي مذكرات شخصيه كل الناس بتشوفها
ههههههههه
الحكومه بقي مش هتعين ناس تقرا المدونات كلها وتشوف هما عاوزين ايه
مش كدا ولا ايه ولا انا عاوز انام؟

Appy said...

محمد فوزى
=============

والله يا دكتور اعصابى بقى عامله زى مراجيح مولد النبى بس فعلا انا مش شايفه فايده يالا ربنا يسهل واعرف اعمل المفرش احسن
نورت يا دكتور الكوكب تانى








لورانس
=========
عارف يا معتز والله لو الاقى تأثير ربع جرام حتى انا موافقه انما الناس تقرا الكلام من هنا وتناقشم فى الحقيقه تلاقى دماغهم حدفه من هنا
طيب قولى بزمتك احنا عاملين مظاهرات علشان ايران ليه هو ايه تأثيرها يعنى
هو احنا عايشين فى رفاهيه ومش لاقين حاجه نعملها

Appy said...

جهاد
========
روح نام يا جهاد انت شكلك مطبق بقالك خمستاشر سنه وانا خايفه عليك انت زى اخويا الكبير برضه

ديالا said...

انا فعلا نفسي اعمل اي حاجه نستفيد بيها

بس معظمنا بقت المدونه ليه عباره عن دفتر يوميات فكري انتي ممكن نعمل ايه واحنا نساعدك فيه

تقبلي مروري

Appy said...

ديالا
=========
والله لو على دفتر يوميات ده فانامش عاوزاه انا مبعملش الحاجه علشان الناس تقول هيييييييي حلوه
انا لما بعمل حاجه بعملها علشان مينفعش اسكت على غلط ابدا
ولما بوقلها يمكن علشان الناس تبطل تنبله وتتحرك
بس انا فى طبعى مش بحب الفضفضه الكتير
فالمدونه مش منفذ بيع بالنسبه ليه لحياتى دى هدف
والهدف فى النهايه ده طلع اوت
فنفسى حد يرد عليا
عموما انا لو عندى فكره كنت هقولها فكرى انتى بقى يا جميله

لورنس العرب said...

باستمرار لازم تتكلمي لأن معنى السكوت ان الناس الموجوده بايعين القضيه
ولعلمك
لولا الكلام ده كان فيه ناس كتير عملت كوارث- لكن لأنهم عارفين ان فيه ناس على الجانب الآخر واقفين لهم هتلائي البعض لامم نفسه شويه
وقيسي على كده حاجات كتير

esraa said...

فاكره اغنية محمد منير بتاعة اتكلموا؟

اهو احنا كمان بنتكلم كده

بس صدقيني انا عندي أمل ان الدنيا هتتغير
يمكن عشان انا متفائله بطبعي

بس هتتغير ان شاء الله

قولي يارب
:)

karim said...

عزيزتى اابى كلنا جوانا طاقات واحاجات تغير حياتنا بس بنواجة حاجتين فى منتهى الصعوبة, اولا صعوبات الحياة اليومية التى تلهينا عن كل شىء ودية مقصودة طبعا علشان مش نفضى و نفكر ومعروف الكلام دة من قضية فى محكمة لماتش كورة لمسلسل او فيلم و الحركات دية اللى تشغل الناس, ثانيا والاهم اللى بيكونوا زيك كدة جدعان و بيتحركوا بيكونوا لوحدهم مفيش جمعية او حزب او اى مجموعة نكون قوية علشان تعمل تغيير وطبععا دة من المحرمات فى بلدنا الجميلة, وزى ما انكل سعد قال مفيش فايدة, وسلميلى على التغيير, تحياتى

karim said...

عايز اضيف شىء التاس بتعمل مدونات علشان على الاقل تحس انها بتقدر تعبر وفى حد بيسمعهم وبيتواصلوا معاهم يعنى مش مووت و خراب ديار, علشان حس اننا عايشيين, شكرا

Me7'o said...

أولاً
تحياتى على النتيجة الإيجابية بتاعت البوست اللى فات ده
تانياً بقى
إنتى ناسية إن كل اللى بيخش عندك يقرا متعلمين وبيعرفوا يستخدموا الكمبيوتر وطبعاً متوافقين مع الكلام اللى بتقوليه ده
يعنى من الآخر مش هما اللى بيعملوا الغلط
لإن كل الكلام اللى على المدونات ده بتاع الناس المثقفة الواعية
لو عاوزة تغيرى يبقى حاجة من الاتنين

أولاً تبقى لازم تنزلى لتحت شوية علشان توصلى لمستوى الناس اللى ممكن تغيريهم وده مش هاتلاقيه على المدونات للأسف

ثانياً وده الأهم

إنك تطلعى لفوق فوق فوق فوق فوق قوى علشان توصليلهم (طبعاً إنتى عارفة هما مين ربنا يجعل كلامنا خفيف عليهم) وبرضه مش هاتغيرى حاجة عندهم

يعنى أحسنلك فشى غلك معانا وأمرك على الله

ملحوظة صغيرة
"مفرش تلاجه"
أنا عمرى ما سمعت العبارة دى
أنا طول عمرى بأسمع مفرش سفرة مفرش ترابيزة او مفرش سرير
إنما مفرش تلاجة

مين هايطول يبص عليه ده

تحياتى

بدراوى said...

آبى هانم
قبل ما اقرا البوست و اعلق

معلش هو ايه قلبان المدونة ده
هو اللى حصل بالضبط

انا حاسس انى تايه

و كله كووم و ان مفيش تاريخ فوق للتدوينة كوم تانى

ابقى حلى المشكلة لو سمحت انا بهتم بالتاريخ اوووى
---
لى عودة بعد قراية البوست

بدراوى said...

!!!!
ده حتى عنوان البوست راح كمان
طب بقول لحضرتك ايه
لو عايزة مواقع تصميمات جاهزة تبقى مضبطة مع عنوان البوست و تاريخها
اقولك عليها
---------
بخصوص بقى انا بدون ليه
اهههه شىء بيخلينى عايش

بس الصراحة انا بقالى فترة قرفان اخر قرف و ماليش نفس اكتب خالص

لولا بس انى مش عايز حد يزعل منى مكنتش علقت كمان

adel said...

ايه النيولوك الجامد ده

ههههههه

و بعدين بندون و خلاص ياستي
انا عن نفسي بحب الكتابة ولا عاوز احل ولا اربط ....و كده كده بكتب يعني انشره علي مدونة او اسيبة علي ورق محدش يقراه مش هتفرق كتير

و هنا في ناس بتقول رأيها و ناس كتير بتجامل
يلا ماعلينا

و بعدين انتي مش بتزوريني خالص دوقتي
و هابعت الحكومة تشمع المدونة الخضرا دي و تأمم بطوط و الخروف البمبي
و قد اذعر من انعر

Appy said...

لورانس
========
الناس بقت بتبتسم فى بلاهع وتقولك انا عارف يا عم كبر
يعنى الموضوع مش بيتحسن بقيت احس بنخبط دماغنا فى الحيط وانا دماغى صدعت ومش من النوع اللى بيحب يضيع وقته فى حاجه ملهاش فايده





اسراء
========
يا حبيبتى الامل حاجه والواقع حاجه تانيه خالص التغير مش اننا نستنى ولا اننا نتكلم التغيير تحرك المشكله مبقتش حكومه وبس بقت الاتين

الكلمة نور said...

طب ماهو كويس يعنى كان فى فايدة
الراجل بتاع الدقيق لبس فى الحيط
***********************
الناس بتدون عشان اللى يجوا بعدهم يعرفوا الناس دى لما كانت دوووون كانت بتكتب ايه
وفى رأى تانى اننا حين ندون نستبدل الانفجار الداخلى ومرض ضغط الدم والسكر بشوية فضفضة والبعض يدون لانها تشبه المضمضة
او يمكن لخلق عالم افتراضى لطيف ليس به زحام او طوابير او حتى رخامة
وفى سبب كمان بس ماعرفش اشرحه

Appy said...

كريم
=====
يبقى انا بضيع وقتى وانا مش من النوع ده خالص ومحبش اعمل حاجه ملهاش فايده






ميخو
=======
لاااااااااا اوعى تكون حاطط فى بالك ان اللى بيدخلوا على النت مثقفين مش كلهم يا ميخو بكره تنصدم بالوكع الاليم
دول فيهم اجهل من الراجل الامى اللى فى الشارع دول فيهم مهللتيه ومطبلتيه من هنا للصبح
ياااااختى لو قولت لك على اللى فيهم
وبعدين هى وقفت على مفرش التلاجه طيب والله ما اعرف جت ازاى بس اهى كلمه جت فى بالى يا ميخو مدقش بقى

Appy said...

بدراوى
=======
انت ايه دخلك واحنا بنقلب فى العفش بتاع الكوكب انا بغير الونات وحركات
التاريخ هتلاقيه تحت مع الكومنتات والساعه كمان لا تقلق اصبر شويه يخرب بيت الاتش ام ال ده منيل بظبط فيها بس قولت ازرعها لكوا حاجه كده وبعدين نبقى نسودها

alexandrany said...

يا رحاب
يااا رحااااب
يااااااااااا رحاااااااب

ما بقتش فارقه
سينا من سونيا
:)
أه يا اولاد الامانه يا منبع الشرف

بت خيخة وأي كلام said...

مبروك على النيولوك يا بتنجانة هانم


انا بدون ليه؟

كدة
غتاتة
فراغ
شحنة جوايا وبخرجها
بأي صورة وبأي اسلوب


تدوينى له علاقة بدراستى
باعتبار انى دارسة اعلام قسم صحافة

فبالتالى تدويني يعتبر تحقيق لجزء
من حلمي انى اكون صحفية

واحس ان التعليم
اللى اتعلمته مارحش هدر


بكتب اللى نفسى فيه
ومافيش رئيس تحرير يقولى
لأ احذفى الحتة دى
وزودى فى المكان ده
مش عايزة حد يقولى
ماتكتبيش ده واكتبى ده

مبسوطة من فكرة انى اكون انا الكاتبة وانا رئيسة التحرير وانا اللى مسؤولة عن الاخراج الصحفي

مبسوطة انى بعمل كل حاجة على مزاجى
ومحدش بيستغل سلطته ويعمل حاجة فى موضوع من مواضيعى على مزاجه هو
او على مزاج سياسة الجريدة

علشان كدة رافضة اى حد من اهلى واسرتى انه يتدخل فى اسلوبى او مواضيعى او انه يقولى اقفلى المدونة

حاسة ان دى حاجة مش من حق اى حد اطلاقا

زى ماهو مش من حق حد يقولى البسى ايه وماتلبسيش ايه وتاكلى ايه وماتاكليش ايه
فامش من حق حد انه يقولى اكتبى ايه وماتكتبيش ايه
ساعتها هايكون رد فعلى عنيف جدا
ومافيش حد هاعمله اى اعتبار

لان التدوين بالنسبالى مش حالة كبت هتنتهى بكتابة شوية بوستات

لا مش كدة خالص

لان مدونتى جزء مني
ومن شخصيتى ومن مشاعرى

واللى يرفض مدونتى
يبقى رافضنى انا شخصيا


التدوين بالنسبالى ببساطة
زى ماواحدة صاحبتى قالتلى
انتى يا خيخة واخدة التدوين
على قلبك اوى

وده فعلا اللى حاصل

انى واخداه على قلبى اوى



انا بستغرب اوى لما الاقى واحدة
ممكن تقفل مدونتها
علشان جوزها طلب منها ده

ساعتها بحس انها واخدة
التدوين كدة وخلاص

اه طبعا انا معاها
انها تحترم رغبة جوزها

بس فيه حاجات كدة لا مؤاخذة بحس انها من الخصوصيات اوى وماينفعش اى حد
ايا كان انه يطلب منى
انى اقفل مدونتى

والتدوين حاساه كدة
انه حاجة شخصية اوى
وخاصة جدا لصاحب او صاحبة المدونة
وماينفعش حد غيره يتحكم
فى غلق المدونة او استمراريتها




مش هدفي انى اغير الكون من خلال اللى بكتبه

لكن مايمنعش انى بيكون عندى امل ان اللى بكتبه يأثر بشكل ايجابى على اى حد



مش متفقة معاكى ان الواحد يتلهى ويخليه فى النيلة اللى هو فيها

لان انا ياما كتبت بوستات
فيها حاجات حلوة
وانا ماكنتش بعمل الحاجات الحلوة دى
لكن ده مايمنعش انى انصح غيرى بالصح اللى انا مقدرتش اعمله
يمكن حد تانى يقدر يعمل
الحاجة الحلوة دى
وبكدة اكون انا اثرت فى انسان ماعرفهوش ولا يعرفنى
وممكن يدعيلى دعوة حلوة من قلبه علشان اثرت فيه



وبعدين ازاى يا بتنجانة هانم
انتى تقولى ان مافيش حاجة اتغيرت

ايش حال انتى كنتى فى يوم من الايام سبب فى تغير الناس

فاكرة يوم مستشفى ابو الريش

انا ماكنتش موجودة
لكن كنت فرحانة بيكى انتى وداليا وفرحانة بكل الى اتحمسوا لفكرتكم وشاركوكم اللحظة دى

وده تغير كبير للاحسن

انك تخلى الناس تنزل من بيوتها من محافظات مختلفة علشان يشاركوا ويتجمعوا فى رسم بسمة على شفايف طفل
دى حاجة فى منتهى الروعة

التغير مش هايحصل فى يوم وليلة يا ابى

لكن هايحصل
مسيره هايحصل
المهم اننا مانزهقش ومانيأسش ومانتعبش فى نص الطريق
ونقول لأ احنا نرجع تانى

بالعكس احنا بدل ما نمشى لورا
نكمل لقدام
وهنلاقى حاجات كتير بتتغير للاحسن

طول ما فى ناس ايجابيين زيك
وشاطرين زيك وبيغزلوا برجل خروف
الحياة هتبقى حلوة



مبروك مرة تانية على النيو لوك

وشوية كدة وهاكتبلك كلام مش للنشر
بس هاروح اغسل المواعين الاول


سلام

اختك خيخة

بت خيخة وأي كلام said...

اه صحيح يا بتنجانة
ازاى بتقولى ان مافيش حاجة بتتغير

وانتى لسة كاتبة ان حرامى الدقيق اتعمله قضية

يعنى فيه تغيير اهوه

ماتقلليش من قيمة اللى بتعمليه
واياكى من اليأس


يمكن مش هتلاقى نتيجة سريعة
لكن العبرة بالنهاية


سلام مؤقت
هاروح اغسل المواعين وارجعلك

اختك خيخة

بت خيخة وأي كلام said...

اه صحيح تانى

هى مين البت اللى نايمة ومدلدلة راسها
وانتى كاتبة فوقيها انك بتحبيها اوى اوى اوى

بت خيخة وأي كلام said...

اه صحيح تالت

انا عايزاكى ترجعى الصورة التانية اللى انت كنت حاطاها فى البروفايل بتاعك

الصورة التانية كانت احلى وانا كنت شايفاكى فيها اكتر

مواطن مصري said...

داخل اسلم و هقرأ البوست لماا شرب النسكافية بس النيولوك القديم احلى تحياتي

عاشقة القمر said...

شكلوا كده الحر مزهقي
جدا
لاتزهجي ولا حاجه استحملي
ام عن تغير
املي في لله ان شاءلله اهنتغير

sakayar said...

التدوين وما أدراك ما التدوين
مش شايفة يا آبي إن المدونات عملوا أي حاجة إيجابية؟؟
التدوين ف مصر عمره بس 4 سنين ... مش مطلوب منه إنه يقضي على فساد بقاله تلاتين سنة موجود ... لكن بيحاول ... على الأقل ممكن تشوفي ناس اتغيرت من جواها والتغير ف شخص بيغير اللي حواليه بالتالي واحدة واحدة
لكن تغيير شامل مأتوقعش انه هيحصل كده بالسرعة دي .. وانتي أكيد مش محتاجة اني اقول كده
:)
التدوين بعتبره زي الصحافة
فيه بيكتب ف السياسة ... كشاهد على العصر .. ممكن كلامه ف وقت م الأوقات يعمل حاجة
وفيه بيكتب شعر أو قصة
وفيه بيكتب عن حياته اللي متهمش حد غيره
فيه حد بيتكلم عن حياتنا اليومية والمشاكل وده بيلاقي اللي يخفف عنه ... مش لازم يضرب حد بالبوكس :)
فيه اللي مدونة عبارة عن دعوة للابتسام يعطيك شوية أمل تعرف تمشي بيهم ف وسط الضلمة اللي احنا فيها
فيه مدونات اسلامية بتتكلم عن الاسلام وتعاليمه
فيه مدونات تعليمية الكترونية
انتي مدونتك مثلاً لما بتكتبي بتنقضي شيء معين ف المجتمع ... تفتكري لو واحد فينا كان بيتصرف التصرفات دي وقرأ البوست بتاعك ... مش برضه لما ييجي يعمل التصرف ده تاني هيفتكر كلامك وبنسبة كبيرة هيبطل التصرف ده بدافع الخجل من نفسه ؟؟
فيه حاجات كتيرأوي بس مش تنفع ف كومنت وخايف التعليق بتاعي يقع على التعليق اللي بعدي يعوره فكفاية تطويل لحد كده
اللون بتاع المدونة ده عاجبني جداً
والصورة الأولانية كانت عاملة رابط ذهني عندي بآبي ياريت ترجعيها زي ما خيخة قالتلك
:)
دمتي بكل خير مدونة ايجابية

عايش... ولكن !!!! said...

يا سلام انا بقالى كتير بعيد عن التدوين مكنتش اعرف ان المدونين نفسهم هيتغيروا
ازيك يا رحاب
انا كل ما اقرا كلمتين فى البوست اقول هيا دى رحاب ولا مين
اصل مش انتى اللى تسالى السؤال ده
ده تسيبيه لحد يكون داخل التدوين جديد
اه على فكره انا مش شرط ان كلامى الاقيله رد فعل بس اهو ع الاقل خرجت اللى جوايا واتعاملت مع فئه انا بعتبرها من اكتر فئات الشعب حبا للبلد دى وقدره على احداث تغيير

فتاه من الصعيد said...

مبرك النيو لوك
بس انت بتاثري يا رحاب ..... والدليل موضوعك الاخير ...... على فكره انا كتبت بوست عن رؤيتي للتدوين ......... او الفايده منه ........ ممكن تشوفيه

حلم بيعافر said...

فعلا فعلا
الشاطرة تغزل برجل جاموسة

بت خيخة وأي كلام said...

فين يا بنتى الصورة القديمة الى انتى كنت حاطاها فى البروفايل


اللى هى البنوتة اللى راسمة حاجة على خدودها
والقصة نازلة على عنيها

بت خيخة وأي كلام said...

ايوة خلاص هى دى الصورة
معلش ماكنتش اعرف انك حطتيها خلاص


سلام يا حبيبتى
اختك خيخة

أحــوال الهـوي said...

ما تغيير في سنوات لن نستطيع تغييرة في لحظات

فصبر جميل و جهد جهيد و مثابرة قد تاتي بالمامول

و لاظن ايجابيتك و تفاعلك سوف يخبو او يصبه التعب و اكلل فمن تعود علي شئ فلن يسلاه

تحياتي

mUsLiM said...

والله بالنسبه ليكى انا شايف التدوين ليه فايده

على الاقل انا لما بدخل اقرالك برتاح وببتسم :))

يعنى انتى ليكى اسلوب دمه خفيف اوى بصراحه

على كل حال

هى كلمات يحصيها الله على الانسان

ليس المهم ما تأثيرها فذلك على الله المهم ان تكون بحق وخالصة لوجه الله تعالى

السلام عليكم

engy said...

انت عندك حق مفيش حد فى دماغه حاجه
المشكله مش فى ان احنا نتكلم لكن المشكله فى اننا نخلى الناس التانيه هى كمان تشاركنا
وده فعلا هيكون ليه تاثير كبير بجد
لو عندك افكار قوليها يمكن

جنّي said...

السلام عليكم

من حقك تزهقي وتتضايقي من احوال الناس وردود افعالهم .. وعدم استجابتهم للتغيير فعلا .. ونحن كمدونون قد تصيبنا العدوى احيانا فنصاب بحالة من البلادة او التناحة .. ولكنك تنظرين للامور بمثالية كبيرة كما قلت لك من قبل .. ولو تغير واحد من كل عشرة ها يكون عندنا 8 مليون يستطيعون تغيير مصر من فوقها لتحتيها .. بس مطلوب الصبر والنفس الطويل .. والتعليقات على البوست السابق ( حرامي الدقيق ) مين قالك ان ما فيش حد اتغير واستجاب .. ها تلاقي ناس ها تكررها وتبلغ عن حرامي وحرامي وحرامي حتى نصل للحرامي الكبير ..

قولي يارب يجمد قلب الناس ( من غير ما يشربوا البتاع اياه)وما يسكتوش على الحرامية الصغار والكبار ..

اتمسي بالخير

جنّي said...

تعقيب

هو العنوان بدون ولا بدود ؟

ولا عايزة لها مترجم ..

اللي ممكن يجاوب هو بدود ليه بالطبع المش .. احسن من يقول لنا هو بدود ليه ..

اضحكي واخرجي من مود الزهق شوية

سلام

لاسع افندى said...

كفايه حرامى الدقيق اللى اتمسك


تحياتى

Love-Guru said...

نفس السؤال وجهته مدونة نت اون راديو لقرائها و هذه هي عينة من
الاجابات التي تلقتها من فراءها
----------------------------------
اكيد كلنا فى اول يوم تدوين كان جوانا شحنه غضب من شيىء ما و نريد تفريغها.ساعتها فكرنا فى انشاء المدونه و لكن مع مرور الوقت حدث التواصل بيننا و بين الاخرين و اصبح التدوين من اجل تفريغ الشحنات و مشاركه للاخرين سواء فى افراحهم او احزانهم
-----------------------------------
من يكتب يمكن فى البداية يكتب لنفسه ومش شرط أنه يقوم بتفريغ شحنه أنفعال أو توتر ، يمكن أحيانا بيكون حاسس بالوحدة و يود ان يكون هناك من يشاركه حالاته التى يمر بها سواء فرح أو حزن ، يبدا يفرغ ما بداخله بالكتابة ، وعندما يجد من يشاركه و يرد و يتفاعل معه يبدأ فى التشجيع و يواصل الكتابة بهدف التواصل مع الآخرين ، أحيانا كثيرة نعيش مع من حولنا وهم لا يشعرون بنا ولا بحالتنا النفسية أو المزاجية ولا يقدرونها ، و قتها نكتب حتى و إن لم نجد من يشاركنا بالكلمة و قتها سيكون الورق هو شريكنا فى همومنا و تصبح بيننا صداقة و حميمية ، يكفى أنك و قتها تجد من يستمع إليك و انت تهمس بكلماتك و أحزانك ، و يعطيك الحق فى التعبير ولا يصادر على مشاعرك أو يستنكر دموعك .الكتابة شيئ رائع و أن أستبدلنا الورق و القلم بكيبورد و مدونة فستبقى هى مخزن و ملكة المشاعر ، و إن كنت أعتقد أن الأمساك بالورقة و القلم له طابع حميمى و خصوصية و صداقة أكبر من النت و الكومبيوتر .
-----------------------------------
اعتقد انها فرصة لتبادل الاراء والافكار مشاركة الحالة الوجدانية الدى لم يكن متاحا فى الوسائل الاعلامية الاخرى بهذا الشكل من الاستقلالية
-----------------------------------
اعتقد اللى يدون مش شرط بيكون بيفرغ غضب بس بيقول كل اللى جواه بدون حواجز او احراج بيقول ممكن جدا اللى حاسس بيه وخايف يقول قدام الناس اللى حوليه لانهم ممكن وبسهوله جدا يتتريقوا عليه وعلى كلامه بس .
-----------------------------------
متهيألي اجابة هذا السؤال تختلف من شخص لأخر يعني انا مثلا كان نفسي اطلع صحفية و انا صغيرة و لم تسمح الظروف بسبب اقامتي في الاسكندرية و لكن جاءت المدونات لتحقق حلمي من منازلهم :))
اعتقد ان عالم النفس ذاك عنده حق لحد ما .اما حكاية شحنات التوتر و الانفعال فمن زمان و انا افرغها علي الورق ثم اقطعه دون ان يقرأه احد ما ينشر هو فقط ما اتوقع ان يستفيد منه الاخرين و اثاب عليه من الله سبحانه و تعالي
-----------------------------------
بالتأكيد التدوين يختلف سببه من شخصية لأخرى . فمنها ما يكون لمجرد إفراغ شحنة بداخله من الخواطر ثم يستريح بعدها كأنه كان بيفضفض مع صديق .وإذا كانت ميول الشخص أدبية نجده يكتب بأسلوب أدبى فيدون قصصاً أو شعراً أو غيره وإذا كانت ميوله سياسية فنجد المقالات والصور التى تظهر تلك الحالة .وإذا كان طالباً أفرغ هموم الدراسة فى مدونته . وهى فكرة جيدة للطلبة حتى لا يفرغوها على الوالدين والأسرة .وفوق كل هذا يعرف الإنسان حقيقة ما يكتبه إن كان له قيمة أم لا من خلال ردود الآخرين .وربما أفرزت المدونات شخصيات أدبية طبعت لها الكتب ونشرت .
-----------------------------------
هى معنى كلمة مدونة فى الاصل ..هى اخراج ما فى القلب لتفريغ شحنة بداخل الانسان . فبعد ان كان التدوين على ورقة ..اصبحت الان على الحاسب الالى..وتفريغ الشحنة الداخلية امام جمهور التدوين ..وليس امام نفسك فقط. اما الان فالتدين اصبح يختلف من شخص لأخر ..فالمدونة قد تكون اظهار لموهبة معينة .وا نشر اراء الشباب وافكارهم ..وهى مكان الشباب بيحاول يثبت نفسة منة ..واصبح لها وظائف اخرى كثيرة
-----------------------------------
المدونه في نظري هي مكان اخرج فيه طاقتي الداخليه اللتي ربما يعترف بها من حولي ومن الطبيعي ان انتظراراء من لهم نفس اهتماماتي الكتابيه لاستطيع ان اطور من نفسي في كتابة المواضيع
-----------------------------------
أسلوب الفضفضة بالكلام أو الكتابة أو الابداع الفنى معروف عنه أنه من اساليب العلاج النفسى التى ثبت نجاحها . كما أن أسلوب المجموعات النقاشية الخاصة بموضوع يهم كل المجموعة من أساليب العلاج التى ثبت نجاحها أيضا.وهذان العلاجان متوافران فى النت ،خاصة بعد الحدود والاسوار العالية التى فرضتها التطورات الكبيرة فى التكنولوجيا والصناعة.العالم يعود لانسانيته بالنت فيخلق علاقات حية مع بشر مثله بعدما أضاع تلك الكنوز فى لهثه من أجل جمع المال.
-----------------------------------
وانا اضيف ان السؤال الذي كان الواجب سؤاله بالاضافة الي لماذا تدون؟ هو لماذا تقرأ المدونات؟ فليس كل فرد يدون بل الغالبية يزور المدونات و يقرأ و ربما يعلق.

قلم رصاص said...

خديها من ولاد الكلب الصهاينة حكمة

هما عملوا كتاب برووتوكلات حكماء صهيون من حوالي 150 سنة تقريبا على اما اتذكر

وبيحاولوا ينفذوا مخططاتهم يوما بعد آخر
هما لحد الان نفذوا منها كتير
لكن لسه منفذوش يجي 3% من مخططاتهم هذه

ومع ذاك لم يتسلل اليهم اليأس في تحقيق حلم السيطرة على الكووووووورة الأرضية كلها

ولا انتي يا أبي عشان في كوكب تاني ملكيش دعوة بينا يعني ههههههههههههههههههههههههههه

انا ضد فكرتك هذه المرة
انا عن نفسي التدوين بالنسبة لي أصبح كالماء والهواء

ولو بطلنا ندون نموت

وبعدين ياستي خلي املك في بكره أكبر
وربنا يهديينا ويجعلنا سببا لمن اهتدى

وزي ماقالها زمان مصطفى كامل هقولهالك انا دلوقتي :

لاحياة مع اليأس ... ولا يأس مع الحياه

وبخصوص التعليقات

انتي فعلا تقريبا مبتعلقيش عندي الا واحد في الألف ، ومع ذلك انا مش ببقى زعلان ولانويت ابدا اني مجيش في يوم واقرألك واعلق على موضوعاتك طالما انا باستفيد منها بشيئ او بآخر

وكنت حاسس انه وراء عدم تعليقك عندي ظروف ما ، بدليل اني مبلاقيكيش فعلا معلقه كتيرعند الأخرين

وربنا يوفقك

والله تعالى اسأل التوفيق لي ولكم ولجميع المسلمين

في حفظ الله

عاشقه الرومانسيه said...

مبروك النيولوك الجديد للمونه
وليه موجه الاحباط اللى وخداكى دى؟
يابنتى انتى اكبر دليل على التغيير اللى بيحصل
بس معنى كلامك اننا نقفل المدونات ونحط ايدينا على خدنا
طيب خلينا مع بعض على الاقل نخفف عن بعض شويه من القرف اللى بنشوفه ده
ولا ايه؟

بس عايزه اقولك ان الحكمه الامبراطورية
طول عمر باسمعها كده
الشاطرة تغزل برجل حمار

عبد الجليل said...

ومازلت استمتع بقراءة شخابيطك والله لما قرأت البوست ضحكت من قلبي

اما انتم بتدونوا ليه فأنا اري ان الحركة التدوينية لها تأثير واضح ويمكن ان يوجه دفة المجتمع هذا طبعا اي مجتمع غير المجتمع المصري لانه أخد على التناحة والبلادة ولن يتحرك حتي لو دقيتي على
دماغه بالهون

mayada said...

هو لازم الواحد يدون عشان حاجه
؟؟؟؟؟؟؟؟؟؟؟؟؟؟؟؟؟ظ
جديده دي

هفكر وارجع

أ / أحمد عبد المنعم said...

بسم الله الرحمن الرحيم
دعى
مثل
هذا
الكلام
لشخص
غيرك
لا يعرف
قيمة
التدوين
فى التأثير والتأثر
فأنت أستاذة فى فن التأثير لا التأثر
رغم أنك حادة فى التعبير أحيانا

بسنت said...

يعنى مش شرط كل حاجه حوالنا تتغير لما ندون ونكتب كفايه ان فى حاجات كتيره جوانا اتغيرت وبتتغير وبتتحسن
يعنى لما انا وانتى وغيرنا نتغير يبقى فى حاجه كويسه حصلت
التدوين بصفه عامه بشوفه كتير شئ ترفيهى سواء وافقتينى او لا
بس هو فعلا عندى تفريج وكتابه شئ جديد مختلف عن الروتينى بتاعى
وفى مدونات فعلا بتغير وبتدعوا لاهداف كتيره كويسه يعنى فاكره كويس ايام الحرب على غزه التدوين كان دافع ممتاز لنتحرك على ارض الواقع
والصراحه فادنى جدا انا وزمايللى
اللى شاركوا
الاطلاع على الجديد ومحاوله اننا نلاحقه لان مش كلنا قاعد قدام التى فى
وبيعرف اخر الاخبار فى البلد والعالم
التدوين ليه فوايد كتيره بس ساعات بشوف انى لو الواحد اتوقف فى اى فتره مش هيخسر حاجه بردوا
ابى هانم
من بره التلاجه
اصل الجو هنا نار
ليكى كل التحيه

احنا said...

ما علينا الا المحاولة
ونحتسبها عند الله سعى
للتغيير
وربنا بيقول
)ان الله لايغير ما بقوم حتى يغيروا ما بانفسهم(
لا ياتى التغير الا عندما نغير ما بانفسنا
فعلينا المحاولة ومن الله التوفيق
-----------------------
دمتى بود
مع تحياتى / هانى عمر

Love-Guru said...

The name of the lead-singer of Evanescence is mispelled. The right name is "Amy Lee".

قوس قزح said...

اممممم
تصدقى انا بدون علشان اتناقش مع الناس فى بلوجتهم مش علشان اكتب فى البلوج بتاعى
بس ساعات كده فى كلام بحب اقوله يطير فى الهوا زى البابلز او حاجة مضايقانى اوى و عايزة اشكى فى المطلق و بس

انا بدون علشان انا عايزة اتكلم مش علشان حد يسمعنى

بوستات الخير بس هى اللى بزعل لما الاقى مفيش لها رد فعل و انتى اكتر واحدة عارفة الناس بتطنشها ازاى

يمكن يكون كلامك مش هيغير حاجة .. بس وراها فايدتين مهمين
اول حاجة انك فضفضتى بحاجة بتفكرى فيها
تانى حاجة فى ناس لما بتقرا بتخليها توجيه عينيهم لحاجة هم مش شايفين .. اتأثروا او لا مش مهم .. المهم انهم شافوها .. و هم حريين فى انهم يشوفها صح او غلط .. يمشوا وراها او لا ..

و ياريت تحطى مع البوست ده اغنية فتح عينيك لمحمد العزبى و احلى سلام من عالم الالوان للنيو لوك الجديد :)

ساره said...

تصدقي عمري ما فكرت انا ليه ادون
لان اللي اكتبه مجرد افكار وحالات نفسيه امر فيها ... يمكن بالنسبه لي طريقه للفضفضه ... لاني طول عمري ما احب اتكلم عن اللي احس فيه مع حد وكنت دائما اكتبه

بس فيه مدونين كثير وانتي منهم التدوين عندهم له هدف
اّبي الحقي علي الحاله النفسيه عندي زيرو :(

امتى الصيف يخلص عشان الصيف يتعبني نفسيا كثير

dr.lecter said...

حلو النيولوك ده

انت كل شويه تغيريه ليه؟ ماتثبتي ليك علي واحد بقي


بتدوني ليه؟
المساله مش مساله تدوين

اللي بيكتب روايات او مقالات
تفتكريه بيكتب ليه؟

علشان الناس تقرا؟ علشان تتاثر

السبب الرئيسي والااهم علشان يخرج اللي جواه

افكاره ماتضيعش في الهوا كده وتروح من غير مايثبتها ويرزعها علي الورق




فيه كاتب رعب امريكي سالوه انت بتكتب الحاجات دي ليه؟
قالهم علشان اخرج كل الافكار السوادء والكوابيس اللي جوايا واترحم منها واحمي عيلتي من اي تخيلات بشعه علشان انا خايف عليهم من خيالي



لو علي اللي يهتغيروا

ممكن مايتغيروش خالص علي فكره

ولو قعدت تطبلي جنبهم للصبح

بس بعد ماتمشي بكام سنه وهم قاعدين مع نفسهم كده ممكن لعل وعسي يسمعوا صدي التطبيل

فهمتي حاجه؟

GeHaD-----(male) said...

ايه اللى دلق ليمون علي المدونه كدا
ههههه

بنت سيناء said...

اى نعم يا رحاب...التغيير يسير ببطئ يكاد لا يرى بالعين المجردة تماما كالسراب الذى ما ان تصلى اليه حتى لا تجدية..فالنغير انفسناجميعا ..من هنا فقط..قد نجد التغيير..

أم أحمد المصرية said...

حبيبتي أبي
لأ تدويناتنا لها فايدةو بتغير حتي لو شخص واحد بس قرا كلمة و احدة بس عندي و استفاد منها يبقي انا نجحت اغير حاجة في الدنيا و اخذت ثواب عند ربنا
شامة ريحة احباط مش عجباني
ايوه التدوين له فايدة و مش بيطير زي الكحول المفيدمنه بيبقي
بس التغيير اصله بيجي خطوة خطوة مش بيتحس لكن بعد ميت سنه و هما بيعملوا دراسة عن تاريخ المدونات حيبقوا يجيبوا سيرة أبي هانم الامبراطورة ساعتها احفادك حيعرفوا ان جدتهم اثرت و غيرت في المجتمع :)))))ايه رايك بقي

مجداوية said...

السلام عليكم

إنت من اليائسين يا علي قصدي يا آبي

ايه الاحباط ده
بصي

في قصة أصحاب السبت في سورة الأعراف ثلاث فئات فئة عصت كلام الله وفئة أطاعت كلام الله ونصحتهم بذلك وفئة اطاعت كلام الله لكن لامت الفئة التي نصحت وبتسألها مستنكرة بتنصحوهم ليه والله مهلكهم فردت الفئة الناصحة معذرة إلى ربكم,, بمعنى حتى لو متأكدة إن كلامك مش حيجيب نتيجة ولا حاغير حاجة لازم تقوليه عشان تخلصي ذمتك أمام ربنا ده أقل حاجة ,,لكن انت متعرفيش انت أثرتي على مين
وعشان كده الكلمة أمانة لازم نراعي احنا بنقول ايه وازاى


واللي يكتم الحق شيطان أخرس واللي يقول وانا مالي أنا وبعدي الطوفان حيتسأل قدام ربنا ولن يكتمل ايمانه لأنه لم يحب لأخيه ما يحبه لنفسه
الله
الكلام ده انت عارفاه كويس

عندك حق تقعدي جوه التلاجة أنا مجربة جهنم القاهرة

micheal said...

أولا ..مبروك علي النيولوك الشديد للبلوج
عارفة يا بت يا لوا أنتي..اللي بيخليني استحمل الدبش اللي بتحدفيه ذوقك العالي ودماغك الكبيرة اللي في نفس الوقت فيها تصرفات طفولية في ميكس عالي
ثانيا..نخش في الموضوع بقي:أنا يا ستي كنت بدود في الأول من باب الثقافة..اه والله فيشه كان زمات متغير..بدليل شوفي بوستاتي الأولي ..حتلاقيها مواضيع سياسية وقضايا مجتمعية مهمة ومش بس بناقشها لأ كمان بوصل لحلول ولكن دوام الحال من المحال..اتقلب البلوج دلوقتي لحاجتين:كتابة مذكراتي اللي هي مغامراتي في انترفيوهاتي اللي فعلا حاسس أنها ممكن تفيد الناس بالذات الخريجين الجداد اللي أكيد حيستفيوا من أخطائي ويتعلموا من عصارة تجاربي الطويلة لأني تاريخ بكل ما تعنيه الكلمة من معني
والشق التاني للبلوج تهيييسي للكتابات الساخرة والبونات جحش فون
عندك إعتراض بقي
احم احم
تحياتي

فاتيما said...

معقولة يا بيبى ؟!!!!!
إنتى آخر واحدة يطلع منها هذوها السؤال يا بنتى ...دنتى من الناس اللى مدونتهم ليها هدف واضح و دور مهم و يمكن دا اللى بيجيبلك إحباط ساعات لما تحسى إن رد فعل الناس مش قد حماسك ..
لكن التغيير بيحصل و إن كان بطىء
لكن حااااااااااصل و الله
و طبعاً إنتى مش منتظرة منى إجابة بس هجاوبك برضو
أنا بدود بالنووووووووون عشان يوسف و عشان أنقل تجربتى للآخرين بشكل غير مقصود و عشان أتغير للأفضل لما أفضفض و أتكلم مع ناس محترمة زيكم و يشاركونى حياتهم و خلاصة تجاربهم ...
بس خلاويص يا قمر التدوين كله
و بوسة و حضونة كبييييييييييرة
و يا ريت تيجى يوم التبرع بتاع خيخة و متنفضيلناش يا ست هانم عشان وحشتينا قوى

جنون الكويت said...

بالعكس اختي التدوين يحرك افكار لدنيا ويغر مسارات عقليه كثيره انا واحده من الناس الي تغيرت بعض افكاري بفضل اراء اخرين بالتدوين والى الايجابيه وطبعا ليس كل المدونين يغيرون مسارات العقول هناك مدونين فاشلين ماعندهم سوا اكلنا وشربنا وطلعنا طيب وين المشاكل والحلول

Appy said...

عادل
=========
ازورك اممممممم
عندك شاى طيب ولا هاجى وامشى وخلاص







الكلمه نور
===========
ما هو لو على الانفجار انا ممكن اوجهه طاقتى فى حاجه افيد من الكلام وخلاص
وبعدين ما انا قولت بتاع الدقيق اوك لبس فى الحيط كام واحد عندهم افران وشايفين ده ومبعملوش فهمت قصدى
وبعدين اشرح ومش هنشر لو عاوز تقول السبب يعنى عادى

Appy said...

يا مصطفى يا مصطفى اعمل ايه طيب

اعمل ايه اتزهقنت يا ضنايا







خيخه
=======
يا خوختى حتى هنا بتلاقى عليكى رقابه من منطلق يصح وميصحش وكنهم ولاه الامور يا اوختى
عموما كويس ان عندك هدف وشايفه انه بيعمل حاجه كل واحد له وجهه جزرة برضه

Appy said...

خوخه
========
نسيت البنت دى بتاعت فريق اجنبى اسمها ايملى فريق ايفانسينس
انا بموت فيها فعلا
وانا مش بياس انا بس بعكس حاجات مش شايفه فيها تاثير وبفكر اغير النشاط وازرع بانجو ههههههههههههههههه








مواطن
========
طيب

Appy said...

عاشقه القمر
===========
لا مش الحر الموضوع له علاقه بانىاعمل حاجه مفيده بس







سكرايار الطاغيه
====================
يا طاغيه
مش كله بيفكر تفكيرك ومش كله بيتكسف من نفسه وحتى التاريخ بيتزور وعموما كلامك مقنع
بس عموما انت ممكن تعلق وتوقع وتدلدق على اللى وراك وقدامك احنا يزيدنا شرف يا فندم

Appy said...

عايش ولكن
==========
اهلا اهلا اهلا
ايه النور ده
بص يا سيدى مش كل اللى بيدون بيحب البلد دى هو بيحب نفسه وازماته اكتر بكتير






فتاه من الصعيد
=================
اتمنى والله يا حبيبتى علشان مبحبش اركز فى حاجه وتطلع بدون فايده

Appy said...

حلم بيعافر
===============
بس هات ليه انت بس رجل الجاموسه وانا هتصرف







احوال الهوا
=============
على الاقل تغيير طفيف انا بجد بضايق لما اخلص لحاجه وتضيع هدر

Appy said...

مسلم
========
وانا مبسوطه انك بتبتسم
ربنا يكرمك يا رب






engy
========
دماغى قفشه يا انجى بحاول ومش عارفه

Appy said...

جنى
=======
اتمنى الاقى حد اتحرك فى اى اتجاه واسترجل من غير البتاع اللى قرفينا بيه
نورت يا جنى
ههههههههههههه هى بدود جايه من التدوين التصريف الاربعتاشر






لاسع افندى
=========
وفى بلدنا كام حرامى وكام واحد ساكت

Appy said...

Love-Guru
===========
كتابات كل الشعارات دى حاجه وتنفيذها وحقيقتها حاجه تانيه
صدقنى بجد








قلم رصاص
==========
الصهايه كانوا وما زالوا متكاتفين وحاجه واحده احنا كل يوم بنتفكك
ومعلش متزعلش انا فعلا مقصره ربنا يكرمك يا رب

Appy said...

عاشقه الرومانسه
==================
لقيت الحمار مش فاضى قولت اغزل برجل خروف هههههههههههههه
مش مضايقه انا بجد ولا محبطه بس مبحبش تعب ليه يضيع على الفاضى مش بعمل حاجه لمجرد انى اعملها لازم يبقى فيها هدف يا قمر








استاذ عبد الجليل
====================
اتمنى انت عارف قد ايه الدنيا بايظه ويمكن انت تفهمها اكتر منى بحكم خبره حضرتك
سعيده انى برسم ابتسامه ليك

Appy said...

مياده
=========
ايوووون انا مش بدود علشان ادود وبس يا مادى كل واحد له هدفه علشان كده سالت







ا احمد عبد المنعم
=================
يا فندم والله اخجلتنى
بس الموضوع بتاع حاده ده لان انا باخد كل حاجه على اعصابى مش اكتر والموضوع انى عاوزه اعرف هدف كل واحد مش اكتر

Appy said...

بسنت
========
مختلفتش يا بسبوسه
هو الفرق انى مبعرفش اعمل حاجه لمجرد الترفيه التدوين ليه هدف فعلا اغير بيه حاجات وكل واحد عنده اهدافه يا قمر








احنا
=======
والله يا هانى مش عارفه بس ربنا يجعلها كلمه حق

Appy said...

قوس قزح
=======
شوفتى الالوان الهايله بزمتك مش شبه اليومين اللى انا عايشهم قولت اعملها خضرا كده بدل ما هى معتمه
والله يا دوللى انتى اكتر واحده عارفه الموضوع ده بيازمنى ازاى غير كده
ميتثروش عموما هما مش بيتاثروا وانتى عارفه والاغلبيه شعارات وخلاص







سارة
=========
حبيبىانتى تعالى بس وانا اخليها لكى 180 كل واحده يا سمسمه له هدف انتى فضفضه انا لا
يعنى على حسب يا حبيبة قلبى

Appy said...

ليكتر
==========
لا مش بحب الثبات على حاجه غير دينى هههههههههه
اما اى حاجه تانيه انا ملوله جدا جدا
غير كده انا بدون علشان عندى هدف مبحبش حاجه تضيع فى لاهوا وبس
وبعدين انا مبعرفش اطبل تعرف انت يمكن ودانهم تتسد







جهاد
========
ده بانجو
والبانجو مش بتاعى ده بتاع جهاد يا بيه ايهههههههه

Appy said...

بنت سيناء
==============
اتمنى يبقى فيه حتى داخلى يا ريت والله يا حبيبتى







ام احمد المصريه
==============
صديقتى الجميله
ايه ده احفادى هيتعلموا كلامى الملخبط ده
اتمنى احفادى يجيوا يلاقوا الحياه والناس احسن بكتير

Appy said...

مجداويه
=========
لا والله يا ام على خالص
مش محبطه ولا مياوسه دى
انا بس يا حبيبتى مبحبش اعمل حاجه وتضيع فى الهوا يعنى اوجهه لحاجه افيد فهمتى يا مانتى
وانا عارفه القصه اللى بتقوليها دى
انا بس حبيت اوجهه فكر الناس ان محدش يضيع وقت وبس يعنى تبقى حاجه يفيد بيها نفسه واللى حوليه يا ريا
نزلى المدفع بقى







ميشو
========
لا يا مايكل مش معترضه على حاجه بجد
كل واحد حر انا بس مش من النوع اللى بيضيع وقته فى الفاضى وانت عارف انى عمليه اكتر
وعلى فكره انا ممكن اعترض على كلامك واعلقك على باب الكوكب للخرفان تنطحك

Appy said...

فاتيما
=========
يا حبيبه قلبى يا ام يوسف
انا عارفه ان كل حد عنده هدف بس عاوزه الناس تشوف
الهدف ده اتحقق ولا لا
يعنى نقف لحظه وبس نفكر فهمتى يا قمر
وان شاء الله جايه يا حبيبتى






جنون الكويت
=============
اهلا بيكى يا حبيبتى هنا
وده اللى انا اقصده يعنى لازم يبقى فيه تأثير بس نفسى احسه فى الناس فهمتى يا قمر واهلا بيكى اول مره هنا

Zika said...

طيب انا مش هاتكلم عالبوست ده
انا عايز اعرف يعني ايه الشاطره تغزل برجل خروف
وبعدين يا آبي هو يعني انتي لسه فاكره ان الحياه سودا كده

عاشقة القمر said...

لو فكرها انو مره قولت ليك تعالي نعمل حاجه تكون فيها فيدها لي كل مدونين نعمب تجعم عبر رومات
نشوف نعمل حاجه مفيدة لنا كلنا

Foxology said...

والله انا عن نفسى بدون علشان اقول حاجة ف دماغى وعاوز اعرف رأى الناس فيها ايه سواء كانت الحاجة دى نقد او مدح لو حتى محاولة يائسة لايجاد حل من الحلول

المهم ان الواحد ميبطلش يفكر ويكتب افكاره يمكن بعد عشرين سنة حد تعجبه فكرة من افكارى ولا حل من حلولى وينفذه مش كدة ؟؟

تحياتى :)

GeHaD-----(male) said...

بما انك عماله تغيري في شكل المدونه الشكل دا مش عاجبني
غيرييييييييه

Love-Guru said...

تغيير شكل المدونة بالسرعة دي دلالة علي ان مزاج الامبراطورة متقلب هذه الايام. ربنا يستر
:))