.jpg)
بفكركم بميعادنا إن شاء الله
يوم الجمعة الجاية
الموافق 3 يوليو
للتبرع بالدم
التجمع هيكون الساعة عشرة صباحا
قدام هيئة المصل واللقاح بالدقي
بعد التبرع ان شاء الله
هانروح مكان نقعد فيه شوية
والمكان ده انا اختارته على مزاجى
هيكون تسيباس فى اول شارع الهرم
انا اخترت المكان لعدة اسباب
اول سبب انه مكيف ومش حر زى نادى الزراعيين
اسعاره معقولة ومش غالية زى كافيتيريا بنت السلطان
يقع بالقرب من جامع نصر الدين لاداء صلاة الجمعة
قريب من محطة مترو الجيزة
والأهم من ده كله إنه
قريب من بيت بابا وماما
علشان لو حبيت أستخيخ فيها
و أفلسع منكم فى أي وقت
أبقى أفلسع براحتي
وتسيباس ده يا جدعان عبارة عن حلواني
وفرع الهرم عاملين فوقيه
كوفي شوب وريستوران
يعنى اللى عايز يشرب
حاجة ساقعة او حاجة سخنة ينفع
واللى عايز يشرب وياكل جاتوه ينفع
واللى عايز يتغدا ينفع
يعنى الاختيارات متعددة
المكان عائلي ولذيذ
يعني اللى يحب يجيب
اسرته معاه واولاده هيتبسط
واللى مش عايز يجي التبرع
وعايز يجي يقعد معانا شوية
ممكن يبقى يجيلنا على هناك
المكان بعد نفق الجيزة
وانت داخل على شارع الهرم
على ايدكم الشمال
بعد مبنى النساجون الشرقيون
واللى جاى من الهرم
هيكون على ايده اليمين
واساسا اكيد اللى ساكنين
فى الهرم وضواحيها
عارفين المكان كويس
اللى هايجي بالمترو
هاينزل محطة مترو الجيزة
ويخرج من عند اليافطة
اللى بتقول مخرج شارع الاهرام
اللى هو شارع الهرم يعني
ولما ينزل سلم المترو
هايفضل ماشى بتاع تلات دقايق كدة لحد مايوصل
ولو سأل اى حد فين النساجون الشرقيون
الف مين يستعماه
لأن النساجون الشرقيون هتكون فى وشه علطول
وتسيباس لازق فيها
و على فكرة تسيباس ده
هو نفس المكان اللى اتجمعنا عنده
يوم مارحنا دار المسنين اللى فى الخانكة
رقم تليفوني الخيخي
0180004374
الرقم مفتوح يوم التبرع فقط
انا فى انتظاركم
بلاش تتأخروا
علشان الدنيا حر
ومش عايزة اتلطع فى الشمس
احنا هنستنى لحد عشرة ونص
وبعد كدة هاندخل
واللى هايجى متأخر بعد كدة
يبقى يجيلنا على مركز التبرع علطول
واللى هايجى بعد الصلاة
يبقى يجيلنا على تسيباس
افطروا كويس يوميها
واشربوا سوائل كتير
وبلاش مجهود قبل وبعد التبرع
اشوفكم على خير يوميها ان شاء الله
24 اخبط وقول رايك:
بارك الله فيكم و اثابكم و سدد خطاكم
وطبتم و طاب ممشاكم و جزاكم الجنة منزلا
كنت اود اصطحابكم في مشوار الخير و اعتذر لغربتي
تحياتي
نفسي بجد اتبرع بالدم
ولما رحت عشان اتبرع رفضوا عشان انا تحت الوزن المطلوب
مع ان فصيلت دمي مطلوبه
B+
بجد اتمنى اني اتبرع وحكايه الوزن هذي مش مهمه مدام الواحد سليم ماعنده اي شئ يشتكي منه
الله يجزي اللي يتبرعوا خير
ويتقبل منهم صالح اعمالهم
أبي حبيت اللوك الاخضر اكثير
بوسه لكي
عشان انتى وحشتيني
ايه الموضوع الحلو ده
فكره هايله
والله تلاته بقدر الامكان هفضى نفسى واجى ان شاء الله انتوا ناس محترمه وشغاله والله بس انا عايز اعرف معلومه لو هيرد حد
لو انا متبرع من اربع اشهر
ينفع اتبرع تانى عادى
صح؟
أحوال الهوى
=============
ربنا يكرمك وترجع بالسلامه
ساره
========
الوزن فعلا مشكله ونقص الحديد وحاجات هما بيكشفوا ويحللوا لنا قبل التبرع
اللون الاخضر هرجعه تانى بس كان فيه غلطات لما احاول اصلحها يا حبيبتى
THE illusionist
===============
ميرسى لذوقك واه ينفع تتبرع تانى احنا تقريبا كل تلات شهور بنروح
جزاك الله خيرا يا ابى هانم
السلام عليكم
جزاكم الله كل خير يا أبي
في ميزان حسناتكم ان شاء الله هذا العمل الخيري والانساني اللي بجد مفيش كلمات تعبر عن معانيه الحلوة
وزي ما انا قولت عند خيخه في البوست الأصلي اللي حضرتك ناقلاه :
كان بودي جدااااااا اني اجي اتبرع وطول عمري نفسي اتبرع بالدم بس مفيش فرصه ومفيش تشجيع من حد حواليا
وكانت لافتتكم الطيبة هذه فرصه رائعة اني اتشجع واتبرع لكن للأسف المكان بعيد علي شوية
فهحاول اعوضها واتبرع في أقرب مكان لي
وجزاكم الله كل خير
في حفظ الله
اسمحيلي أرفع لسياتك القبعة بما انك من محبي amy lee ;)
اسمحيلي كمان أهدي سياتك الأغنية دي يمكن تعجبك
http://www.4shared.com/file/64650759/7c8799e8/Sallys_Song_-_Amy_Lee.html?s=1
أشوفك يوم التبرع ان شاء الله ...
لأسباب معلومة..لن أتمكن من الحضور
سلميلي علي الناس كلهم هناك
ميرا وداليا وفاروق وضياء وأي حد يجي
تحياتي وربنا يباركلكم
أولا الخير على قدوم الواردين اللى هما خيخة و داليا قوس قزح و آبى هانم بتنجانى و مبسوطة إن هشوفك يوميها
ثانياً القالب اللى إنتى حطاه دا يهوووووس و لايق قوى عليكى يا بيبى و القطاطيط اللى فى الآخر دول حلوين قوى
ثالثاً ما هى أسباب مايكليتو المعلومة و اللى مش هتخلينا نشوفه بقى ؟
ربنا يجعل هذا العمل فى ميزان حسنات كل متبرع ويجده يوم القيامة شفيعا له
ربنا يجعل هذا العمل فى ميزان حسنات كل متبرع ويجده يوم القيامة شفيعا له
فاتيما
ازيك وازاي يوسف
والله بتبسط جدا لما ببقي ممعاكوا كلكوا وانتي عارفة بس اعذريني المرة دي
فعلا إقامتي محددة ومعتقل في الاسر حتي إشعار اخر(بقرار من مايكل)
مفيش بنزين اتحرك بيه
:))
أتمني بعد 3 شهور تكون الظروف اتعدلت
تحياتي
مشكله الدقي بعيد عني أوييييييي
وبرضو الهرم بعيد عني أوييييييي
يعني مش جاي
بس بدعيلكم من قلبي ربنا يكرمكم على مجهوداتكم وفي ميزانكم بإذن الله
ازيك يا ابي يا حبيبتي
معلش السفر في الحر عندي مينفعش كمان السكر والضغط مينفعش التبرع
ربنا اعلم بالنية بقى
ها ابقى اكلمك ان شاء الله
ياعم ياعم علي التمبليت والحركات اشوفكم يوم الجمعه إن شاء الله
حلو قوي النيو لوك ده والله افتكرت غلطت في العنوان وانا داخلة :)
السلام عليكم
ياخبر أبيض
أنت شكلك يااستاذة كنتي بتعملي دعاية لتسيباس
وربنا يكرمكم في موضوع التبرع بالدم
وعلي فكرة احنا ساكنين جنب تسيباس علي طول وبأذن الله أجيب الواد الجعفري ونسلم علكيم
وربنا يوفقكم لفعل الخير
والسلام
معلش يااستاذة
هو في مدونين رجالة جايين ولا الموضوع ده حريمي بس
نرجو التنويه للاهمية
عشان نخلي بالنا
والسلام
ربنا يكرمك يا قمر و يجعله في ميزان حسناتك
الفاتح اليعقوبى
=================
لا كله عادى رجاله وبنات ده تبرع بالدم مش لقاء حريمى يا فندم انت تنور
ربنا يجعله في ميزان حسناتك
وبرضه زي ما قل لخيخه ....موش هاجي :))))
عارفه كان نفسي اكون من سكان القاهره علشان اتعرف عليكم
حقيقي انتوا جُمال اوووي :)
ربنا يجازيكم كل خير يارب
السلام عليكم
شوفتي بقي ابي هانم فوائد التدوين ان تتجمعوا على هذا العمل الراقي .. بس ياريت تعزري من لم يستطع الحضور فقد يتبرع في مكان آخر او ان ظروفه الصحية تمنعه من ذلك ..
تحيتي
Salmtk ya gameel alf slama... bgad ka nfsy ashofk gedan, m3lesh 5erha fe 3'erha ISA :)
Post a Comment