كائن خزعبلى




عندما ابدأ بالكتابه تقف الافكار فى عقلى كما عرابى على حصانه امام الخديوي يتحدث بكل تناكه او كطفل يتلعثم امام مدرس شرير بشوارب عريضه كما شوارب الصورصارات ...واشعر اننى سوف اكتب عن كائن خزعبلى
وانه فى مكان هناك بعيد ارسم
كائن لا يتعدي خيال جميل والم رائع وولكن ليس كالقلم على القفا ولا يضاهيه فى الانكسار


لا اعلم ما هى المتعه فى تعذيب النفس لا اعلم هل ما يفعله البعض منا فى نفسياته اللي منفسه عليه وعلينا هل هذا ممتع ام لا
لا اعلم ما هى المتعه فى السباحه ضد التيار
هل هى لاثبات بطولات من ورق ام اننا كائنات من الفضاء الخارجي
عندي تساؤلات تدور فى عقلى كما النحله والدبور ودار هذا الحوار الذي انتهي بضربى لها بابو ورده وامها كمان
بعد ما شعرت انه يسكن عقلى اتنين نجارين مسلح وخلاطه اسمنت من النوع الثقيل

الدبور:- ايه متعتك فى انك تروحي لاماكن ليكي فيها ذكري

النحله :- بكل تناكه علشان اضحك

الدبور:- بخبث بذمتك بتضحكي ولا عنيكى بتتملى بالدموع زي حله شوربه معموله عليها كيلو بصل

النحله:- بحس براحه نفسيه لما اعدي فى مكان ليه فيه ذكري حتى لو مؤلمه


الدبور:- الذكري المؤلمه بتوجع زي جرح اتحط فيه كيلو ملح خشن

النحله:- تفكيرك محدود الذكري المؤلمه لما تواجها تذيدك قوه مبتضعفش دي فلسفه الحياه الخرافيه اللى عايشنها اللى اختراعتها ام حلموس

الدبور:- فلسفه ااااااااه قولتيلى طيب والفلسفه بتمسح الدموع من عنيكي يا ام حلموس

النحله:- وهي يعنى كانت بتوطي صوتى من كتر الكركره اللى بتتسمع لما افتكر مقلب من مقالبى فى اللى بحبهم

الدبور:- الدموع صعبه ...الضحك حلو انتى ليه بتعذبى نفسك ومتقلويش انها نفسك وانتى حره فيها

النحله:- لا هى نفسي صحبتى وانا حره ...اقولك لما بعدي فى مكان بفتكر ان شخص بحبه عايش فى المكان ده او المكان ده بيحمل جزء منه بحس انى ببدأ حياه من جديد لما بروح مكان كنا فيه بحس انى سامعه صوت انفاسه جنبى

الدبور:- وده ايه بقى قلبتى كده من امتى

النحله :- انا مقلبتش انا بنهى حياه كامله بس محدش شايف وانا بغمض عينى عنها علشان محسش بالوجع فبعمل صدمه لنفسي علشان انهى

الدبور:- ااااااااه طيب قومى بقى نامي الا انتى فعلا فاضل شويه والاقيكي بتنتحري من حرف سجاده

الحوار انتهى فعلا بس الاسئله منتهتش ليه بنعمل كده انا عن نفسي لما بعملها او لو عملتها علشان ادور على ابتسامه ضاعت او احس بأمان مبقتش حساه

انتم لو بتعملوا كده بقى ليه ؟؟؟

الذكري المؤلمه مش لازم تضعف دي لازم تبقى خطوه انك متكررش الغلط الذكري الحلوه اوعي تخليها تغرقك زي طفل فى لعبه الخاصه لانها بتفقدك الزمن والحياه وبتقف عند لحظه واحده بس وعمرك كله بيربط عندها بس لما بتفك بتكون زي الجمل اللى اتحمل كتير ولما فك طاح شمال ويمين عذاب النفس ليس الم فقط وكي بالنار وعض فى المناخير كما انقضاض سممكه قرش على فريسه ولا ولوله ضفدعه مطلقه فى يوم شتا ولكن عذاب النفس اغراقها فى حاجتين ذكري مؤلمه وفرحه مجنونه وتتابع الفرحه دي من مظاهر جنان لبس شوال زعبوت سليبر فرده وفرده عذاب الجسد بيخف مع مرور الوقت ولكن عذاب النفس مستمر الا مالا نهايه اما عذاب الوطن الذي لانعرفه اشعر ان الوطن كائن خرافى نخترعه بخيال خصب لكي نشعر بالدفئ نخترع كل الشخصيات لكي نعذب انفسنا وفى نفس ذات النفس نشعرها بالراحه

فيا نفسي كفى عن تعذيب نفسك لاننى لم اعد اشعر بك ولا اجد هذا الوطن ولا هذه المتعه

كان معكم فيلسوف قسم اول حالات حرجه عباسيه كولج ابى هانم

حكمه الامبراطوره


لاتندم على ما رحل ولا تندم على ما هو ات فانت بلاستيك ولا تشعر

89 اخبط وقول رايك:

رئيس جمهوريه نفسى said...

دة عايز تأني فى الرد بشكل كبير ونظرا لهزيمة كابتن ماجد قدام الدروايش وحالتى الزفت حتمعن فى الرد بكرة

Unknown said...

ايه يا مفتريه انتي حرام عليكي ايه كم الكآبه ده في بوست واحد

انا هاعيط لوحدي و قلبي مش مستحمل اليومين دول اي كلام عاطفي

اولا الاغنيه دي عاجباني اوي اوي و كل ما اسمعها احس اني خلاص هاعيط

بصي يا صديقتي العزيزه انا بعمل ساعات عالم خيالي و افضل فيه لان الواقع مش عاجبني و الذكريات احلي و اجمل

و علي رأي ورده ذكرياتي يا ذكرياتي يانا منك يا ذكرياتي كل ما افتكرك بشوف حبي الي كان حبي الي ياما اديته من نبع الحنان حب كان فوق احتمالي و انتي شاهده يا ليالي

انا هاعيط شويه و اجي تاني

رحلتنا في الحياة said...

مش عارفة ليه فعلا بنحب تعئيب نفسنا الذكريات حتى لو كانت مؤلمة فى جزء من حياتنا ولو نسينها هننسى اجزاء من حياتنا
بس المواقف المؤلمة والذكريات الحزينة المفروض تقوى مش تتضعف

Empress appy said...

نحنوت
=========
هههههههههههههههييييييي اجيب لك شوب مانجه تروق اعصابك معلش تعيشوا وتاخدوا غيرها
وقال فيشو طالب هدنه دي بعينه









ميمي جزره
==========
اهئ اهئ اهئ
طيب سيبى حته من الملايه يا بنتى علشان انا على اخري هههههههههه
يا بنتى دي مش كأبه انا بس قولت انكد عليكوا مش اكتر اشمعنى يعنى بضحكوا الله

Empress appy said...

ايوشه
=======
هي عمليه نفسيه يا حبيبى بتختلف من شخص للتانى فيه ناس عاوزه تعيش الالم تيرررررراررررررا
وفيه ناس عاوزه تبقى قويه قويه بس الصح انك تقوي علشان تكملى القرف اللى عايشينه

thunder said...

مممممممممممممممم انا زيك يارئيس بس ياعم لسة بدرى وان شاء الله هنكتسحهم
المه نتكلم بقة
هى كلمة واحدة اللى عندى على البوست مش عارف ليه علاقة ولا لا االمهم اننا بنحن للماضى لاعتقدناه انه فى احلى واسعد اللحظات وكل فترة بتعدى علينا بنحن للقابلها دا طبعا فينا لانها مرحلة مكانش لسة كانت بعيدة عن مسؤليات وتروس الحياة افتكر بابا الله يرحمة قالى حكاية عن جحا لما الناس سئلوة اية احلى ايامك يا جحا قالى اللى كنت بعبى فيها التراب فى طاقتى اللى هى الطفولة او عدم المسؤلية المهم بوست حلو ((يا ام حلموس )9 هههههههههههه قدى يا دبور ربنا يديم عليكى التوفيق يارب

ميرا ( وومن ) said...

شن ...شن

الصوت ده صوت دموعي قبل ماتنزل

بجد مش وقتة خالص لسة واخده محاضرة من نفس النوع في الجامعة والربع الضارب اللي عندي احتل باقي الدماغ

عاااااااااااااا ليه بتعملي فينا كدة ليه ها لييييييييييه

كل شوية توقفينا قدام نفسيتنا ونقعد نحقق وندقق ونقولها ليه وعلشان ايه

تصدقي بقي مش هاكمل تعليق علشان لو كملت هانفجر في العياط وسمعني سلام
اهرب من حبك اروح علي فين ليالينا الحلوة في كل مكان

NIDAAL .R said...

عن نفسي برمى الذكريات النؤلمة فى الباسكت .. بس ده بعد ما اخد الفايدة منها .. الى هى ان اتعلم من اخطائى الى تسببت فى الذكريات دى .

اما الذكريات المفرحة
فدى حاجة انا بعشق تذكرها دايماًًًً
وتلاقينى وقت ما افتكرها اقعد اضحك
وخاصة فى المترو ...
ليا ذكريات كتير فى المترو حلوة اوى .. ولما بفتكرها مش بقدر امسك نفسى من الضحك علي نفسى .
وبعدين لما اكتشف انى بقيت عامل زى المجنون بالنسبة للناس الى شايفانى بضحك وانا سرحان خااااالص ... فبضحك اكتر انى بضحك وبقيت عامل زى الى لاسع او جاتله نوبة هيستيريا فجائية

يااااااااااااااااااه
الذكريات جميلة اوى يا آآآبى
ولازم نتكرها فى كل وقت وخاصة وقت الازمات او لما نكون مخنوقين هنلاقى نفسنا بنضحك
جربى الاسلوب ده وعمرك ما هتتخنقى ابداً

mido said...

احنا بلاستيك ؟

:))

سمكه واحده said...

شوفي انا لسه جايه اعلق عندك ولقيت الدنيا قالت خد عندك ورعد وبرق وشتا بالعبيط يالهوي بقلك ايه استني كده افتح البلوكنه وابص علي الشتا واهو ندعي دعوتين وارجعلك تاني يمكن الذكريات دي تحل من علي دمغنا وتسبنا في حالنا جييييييه تاني اما اشوف الجو

مواطن مصري said...

الدبور:- بخبث بذمتك بتضحكي ولا عنيكى بتتملى بالدموع زي حله شوربه معموله عليها كيلو بصل


ههههههههههههههه لول


فيا نفسي كفى عن تعذيب نفسك لاننى لم اعد اشعر بك ولا اجد هذا الوطن ولا هذه المتعه


أكنها بتتكلمم عني

سمكه واحده said...

هااا انا جيت بس لسه في مطر المهم الجو ده تحديا فكرني بزمان اي والله وماليكي عليا حلفان بس طبعا مكنتش لوحدي كمان وانا ببص من البلكونه عربيه رايحه وعربيه جايه ومشغلين ايه؟اواخر الشتا والاغنيه دي بذات بدل علي ذكريات كتشير كتشير بصراحه هي الذكريات مؤلمه اوي ومتعبه خاصا لما بتتمني ترجع وتفتكري ايام زمان بس غصب عن الواحد بيعيش فيها وبيحن ليها ويمكن اوقات كتير بيعيط لانها حجات راحت واستحاله ترجع مجرد ذكريات جميله او مؤلمه بس بيني وبينك احنا شعب عاتشفي وبنحب الغم نفرح تلاقينا نعيط نزعل بردو نعيط
بس اقلك انا عندي الذكريات الحلوه مش بحب افتكرها لانها بتتعبني اوي وبنكمش وأشرب في نفسي وابقي في حاله من الكئابه لان حاجه راحت ومش بطولها تاني وخاصا وانا صغيره وبردو ايام الشبوباب والشقاوه والصحبه الحلوه اللي خلاص راحت و كل الصحاب اتكلوا ربنا يسعدهم بقي

قوس قزح said...

دى مش متعة تعذيب للنفس
الحالة دى يطلق عليها اسم الشجن
و ده بتكون فيه النفس حزينة اوى على حاجة معينة ضاعت منها ..شخص بنحبه ..مكان عزيز علينا .. ايام مرت و مش هترجع .. اى حاجة عارفين انها راحت من ايدينا
و هنا النفس بتدور على اى حاجة تفكرها اكتر و فى نفس الوقت تصبرها بذكرى بتحبها و تمنى نفسها برجوع الاحساس ده تانى
ده الشجن الحزن اللى بينتج عنه فضول انك تعيشى تانى اللى فات
كلنا فينا الحكاية دى لانها صفة فى الانسان بس بتكون عند ناس اعلى من ناس
و يمكن بتزيد اوى فى الوقت اللى بنكون فيه حاسين بالوحدة و افتقاد اللى ضاع منا فبندور على ايام كنا فرحانين فيها و نبكى عليها
يمكن يكون ده بيحصل لان جوانا مشاعر حزن متراكمة و من نعمة ربنا انها عايزة تطلع فبندور على اقرب حاجة فقدنها و بنطلع همنا فيها
حلها اننا نعرف ان اللى فات مات خلاص و مفروض منقفش عنده كتير و ندور على حاجة تانية تدينا نفس الاحاسيس اللى فقدنها .. طبعا الحب صعب اقوله كن فيكون .. بس على الاقل مقفلش قلبى و اقول مفيش حد هيعرف يسعدنى زى اللى كان

من الاخر كده
زى ما بتدى نفسك فرصة للشجن ادى نفسك فرصة للسعادة و مش بانك تضحكى و تخرجى لكن بالرضا و الايمان ان اللى جاى احلى

بحبك و انتى مشاعير كده :)

بسمة انور said...

اه صحيح ايه حكاية الحزن الايام دى

والله مهى مستاهلة اطلاقا

انا شعارى لاتبكى على الماضى فالماضى قد مضى
ولاتلم من خدع فمن خدع قد خدع

وبعدين انا ودعت الذكريااااات من زماااااااااان

تامر علي said...

الذكريات هي جزء من الإنسان ... ووجودها مرتبط بوجوده سواء كانت مؤلمة أو سعيدة لأنها جزء من حياته ... ذكريات الإنسان هي تاريخه .... والإنسان بدون تاريخ هو طفل حديث الولادة :)

ساره said...

ليه كذا يا أبي
رجعتيني لفتره نفسى امحيها من ذاكرتي طبعا اللى نفسي امحيه مش حب لكن ذكرى صعبه حصلت لنا فى العائله

نفسى اشيل الجزء هذا من مخي عشان
نفسي كائنك الخزعبلي يعملي غسيل مخ

Foxology said...

هو الواحد فعلا مينفعش يقف عند ذكرى حلوة علشان الزمن ميقفش على كدة

بس اليومين دول الواحد مش فاكر اى حاجة حلوة ليه ؟؟ يمكن بسبب الضغوط ولا دوامة الشغل والمسؤليات ولا ايه ؟؟

تحياتى

شمس النهار said...

الحاله اللي انت فيها دي حاله صحيه جدا
وعلي فكره الذكري المؤلمه فعلا بتقوي والضربه اللي مابتموتش بتقوي
يعني بتاخدي تطعيم ضد الصدمات الكهربائيه والمائيه والعاطفيه
بس علي فكره الذكريات الحلوه بتؤلم اكتر من الذكريات الوحشه
قومي حطي راسك تحت الماء الساقع صدقيني دي مش تريقه دي وصفه متجربه هتلاقي نفسك زي الفل
وكل ماتعملي كده هتلاقي نقطة ضعف منك وقعت لحد ما مايبقاش عندك لاضعف والا نقطة ضعف

micheal said...

حلاوتك يا فواخري
:)
ده بوست اكتئابي إنبعاجي خوزعبلي من بتوع الريس ميشو بما أن سيادتك النايبة التقيلة ..فقلتي تشاركي الريس بسلاطاته وبابا غنوجه يعني
وبعدين فين الخروف البمبي يا بت
وبعدين كده أنا حقولك الجملة اللي بقالي فترة مقلتهاش بعدما اختلفنا في كذا حاجة ورا بعض
حجييب المنفضة..هو أنتي كمان طلغعتي بتفكري فيها كده وعايشة في الحوارات دي
كان بدري عليكي يا شابة والله
عامة بجد الحوار طريقته لذيذة وشيقة
يعني هي عادتك ومش حتشتريها من بره
دايما كده مسلينا يا فواخري سواء بتضحكنا ولا بتغمنا
تحياتي

mahasen saber said...

مالك يا قمر الباشمهندس الصحفى نضال
خضنى عليكى وبيقول انك شغاله بوستات نكد زى حالاتى وحالاتى اصلا مش كاتبه حاجه نكد

انا كنت مشغوله لشوشتى زى حالاتك برضه
مشوار القاهره كل اسبوع معطلى مرور اسبوعى ويومى خالص بتهد والله يا رحاب

المهم خلى بالك من نفسك

mahasen saber said...

الذكريات المؤلمه والتجارب الحزينه
بتعمل حاجتين فى الانسان
لبتقويه قوى لبتجبله اكتئاب قوى قوى ثم تجننه موت

ربنا يقوينا جميعا على ما ابتلينا من ذكرى
بس تصدقى فعلا النسيان نعمه

Lyssandra said...

ممممممم

إنتي صعبه بجد يا آبي

بس عندك حق

الذكري دي مش بتخلينا أضعف
بالعكس

لما أفتكر ذكري مؤلمة
أو أبكتني في اليوم
أو انها كانت سعيدة وقلبت حالها عليا
ده مش بيضعفني
لكن بيخليني أحس إني قدرت أتجاوز الأمر
وأعيش عشان أفتكرها في يوم

بس برده احنا بنهوي نعذب نفسنا
بنستعذب ألمنا

بيبقي صعب
لما يرن في مسامعي صوت حد بحبه
لما أسمع كلمة قالها بصوت كل البشر
بتدخل لوعيي بصوته وبس

ده بيبكي برده

يمكن لأن الذكري جزء مننا ومش ينفع نلغيه
مش ينفع
زي ما مش ينفع نلغي الماضي

ممكن نخفي الذكري شوية
نتحاشاها شويه

بس مش ينفع مهما كانت مؤلمة انها ترحل للأبد

....

إيه الكلام الغلس بتاعي ده ؟؟

خلاص

كفاية كده بقي

وانتي عامله إيه دلوقت ؟

:)

mohamed ibrahim said...

كلامك زي الفل يا ابي
بس احيانا المرء بيعجز عن انه يطلع من الحالة دي
و بتستغرق معاه وقت
بس مع دوامة الوقت
و الناس الي حوالين البني ادم
الذكري الأليمة بتعدي
و بتبقي مجرد طيف لما بيمر بالعقل بيبقي مجرد ذكري تعكنن الدماغ
و تمر لحالها
بس بجد الحوار و الكلمتين الي بعده
في الصميم
و الاغنية جامدة جدا

تحياتي
محمد

Lobna Ahmed Nour said...

يونيك جدا الحالة اللي انتي عاملاها في البوست
الذكريات يا آبي هانم هي اللي بتحسسنا ان احنا لسه عايشين ولسة بنحس مش بلاستك يعني .. وكل ما كانت مؤلمة اكتر فده عز الطلب .. الم اكتر يعني احساس اكتر يعني نسبة خشب وحديد ومواد صلبة اقل

*البت المشمشية *حلوة بس شقية * said...

احنا ناس كئبية والله
سعات لوحدى كدة احب اعيط

واكئب نفسى وافتكر الزعل وكل حاجة
بس ايه انتى مالك مش متعودة منك على كدة

ليلى فى عالم ادم said...

الذكرى
ساعات مؤلمة وساعات حلوة
لكن دايما بتدى احساس زغزغة كدة فى فلبك لما بتيجى على بالك




تحياتى ليكى وياريت تقوليلى رأيك فى البوست الجديد

مواطن مصري said...

هو احنا لية جيل مكتوب علية الحزن و الحرب و القرف و هزائم الزمالك ؟؟؟

@alhaidar said...

يقال أن الذكريات تبقى أجمل من النسيان ..


ويقال أن النسيان نعمة من نعم الله ..

أظن العبارتين صحيحتين .. أحيانا !


تحياتي ..

funckydoctor said...

لما حد يقولى هاكونا ماتاتا
باعمل زى ما عمل القرد
واخبطه على راسه
يقولى ايه ده
أقوله ده ماضى انساه
يقولى بس بيوجع
أقوله الماضى برضه بيوجع

nor said...

مش مصدقه ده كوكب ابي
شكلي غلطت في العلوان علي راي الصعاديه
ربنا معاكي يا قمر
مستنيه ابي اللي بتتخانق
تحياتي

Asmaa mahaba said...

فعلا احنا عالم نكديه ههههههههه
بس على فكرا انا بعشق انا كمان انى اغتت على نفسى وفعلا بضحك لو مريت بمكان اعرفه وليا فيه ذكرى بس بضحك وعينى بتدمع:))

أمل حمدي said...

دَعِ الأَيَّـامَ تَفْعَـلُ مَا تَشَـاءُ=وَطِبْ نَفْساً إِذَا حَكَمَ القَضَـاءُ

وَلا تَـجْزَعْ لِحَـادِثَةِ اللَّيَالِـي=فَمَا لِحَـوَادِثِ الدُّنْيَـا بَقَـاءُ

وَكُنْ رَجُلاً عَلَى الأَهْوَالِ جَلْداً=وَشِيمَتُـكَ السَّمَاحَةُ وَالوَفَـاءُ

وَإِنْ كَثُرَتْ عُيُوبُكَ فِي البَـرَايَا=وَسَرّكَ أَنْ يَكُـونَ لَهَا غِطَـاءُ

تَسَتَّرْ بِالسَّخَـاءِ فَكُلُّ عَيْـبٍ=يُغَطِّيـهِ كَمَا قِيـلَ السَّخَـاءُ

وَلا تُـرِ لِلأَعَـادِي قَـطُّ ذُلاً=فَإِنَّ شَـمَاتَةَ الأَعْـدَاءِ بَـلاءُ

وَلا تَرْجُ السَّمَاحَةَ مِنْ بَـخِيلٍ=فَمَا فِي النَّـارِ لِلظَّمْـآنِ مَـاءُ

وَرِزْقُـكَ لَيْسَ يُنْقِصُهُ التَأَنِّـي=وَلَيْسَ يَـزِيدُ فِي الرِّزْقِ العَنَـاءُ

وَلا حُـزْنٌ يَدُومُ وَلا سُـرُورٌ=وَلا بُـؤْسٌ عَلَيْكَ وَلا رَخَـاءُ

إِذَا مَا كُنْـتَ ذَا قَلْبٍ قَنُـوعٍ=فَأَنْـتَ وَمَالِكُ الدُّنْيَا سَـوَاءُ

وَمَنْ نَزَلَـتْ بِسَـاحَتِهِ المَنَـايَا=فَـلا أَرْضٌ تَقِيـهِ وَلا سَـمَاءُ

وَأَرْضُ اللهِ وَاسِـعَـةٌ وَلكِـنْ=إِذَا نَزَلَ القَضَـا ضَاقَ الفَضَـاءُ

دَعِ الأَيَّـامَ تَغْـدِرُ كُلَّ حِيـنٍ=فَمَا يُغْنِـي عَنِ المَوْتِ الـدَّوَاءُ

مجداوية said...

السلام عليكم

أولا مبروك النيو لوك الجديد لايق طبعا خصوصا وانتي مطبقة الجناحات ورا ضهرك وماسكة القلة في ايدك اليمين
:)
:)

ساعات بسأل نفسي ليه بآجي هنا وأنا ماما ريا وانت عارفة أن فيه اختلاف كبير بين نظرتنا للحياة على الأقل في التفاصيل ,,أنا بحب فيكي انسانيتك بكل ما فيها من تناقضات ولأن جواكي خير كتير ولأن جواكي حزن كبير وهو ده اللي بيشدني حتة الشجن اللي عندك اللي بتحاولي تخبيها بكل وسيلة لكن بتظهر غصب عنك لما بتكبي تدوينة زي دي

مفيش حاجة بتتنسى إلا اذا فقدنا الذاكرة أو كانت الأحداث غير مهمة لكن اللي بيعلم فيكي لا يمكن تنسيه فيه تناسي لكن مفيش نسيان
وانت قلتي المفيد خلي كل حاجة موجودة ومتدعيش انها مش موجوده أكيد حنتعلم منها وأكيد بتحسسنا وسط الجانجل إننا بني أدمين

أنا جيت كمان أشكرك لأنك كنت متبعاني خلال السنة اللي فاتت ليا في التدوين رغم القلل المتدشدشة اللي حدفنا بيهم بعض
لكن انت عارفة اني بحبك وضرب الحبيب زى أكل الفوندام
عشان بس أليق على عوجانك يا آبي

:)
:)

Unknown said...

السلام عليكم

ازيك يا أبي

وحشتني مدونتك

عايز بس افكرك ببوست كنت كتبتيه زمان
كنتي فيه في راس البر في اليوم بطوط عملت الدنيئه معاكي

ورحتي عند البحر
يومها قلتي انك ملكيش في شغل الرومانسيه والنحنحه والهبل ده

اقولك علي حاجه

من غير زعل

(دموع النحله كشفتك يا ابي وفضحت اللي كان مستخبي جواكي واحساسي في محله) يومها قلت انك بتحاولي تهربي من حجات كتير وتعيشي عيشه تقريبا جامده
وبتخافي من مشاعرك

بس في الاول وفي الاخر انتي بنت يعني براكين من المشاعر


بجد البوست هايل

تقبلي الكلمتين دول ومتزعليش ومستني تعليقك لو في حاجه معجبتكيش ف كلامي

تحياتي ليكي

برقش

دعاء مواجهات said...

لا يابنتى انتى كائن جميل اوى بجد
بيحس وبيعيش ويقدر يفسر ويلون ايامه

مالكيش فالكابة ودا حلو جدا

تعرفى حتة الذكرى المؤلمة دى
بتختلف اذا كانت مؤلمة وى خطأ بمعنى حاجة غلط انتى عملتيها لما تفتكريها تعملى ايه..

ومن هنا اقولك لو ذكرى مؤلمة حفتكرها وافتكر ازاى اتصرفت وقتها وازاى مخليهاش تمر بيا تانى

ولو مخجلة هحاول انساها تماما مع عدم نسيان اثرها

بيس ياقمر

صيدلانيه طالعه نازله said...

تخيلى انا زيك بحب ارجع كتير لذكرياتى القديمه المفرح منها و المؤلم مش عارفه ليه بس اول ما افتكر المؤلم خصوصا افضل اراجع الحدث كله و ساعات اضحك و كتير اكشر و ادمع احيانا و اقول ليه كل ده حصل و افكر ان الموقف ده علمنى حاجه و لا عدى كده و خلاص
يا بؤبؤ مفيش حاجه وحشه على المطلق او حلوه على الدوام كل موقف ليه حلوه و مره المهم فى الاخر نتعلم منه و لو فتفوته صغيره
ربنا يهدى نفوسنا جميعا

محمد عتلم said...

ايه يا بتنجانى
الكلام على الذكريات النهارده ؟؟؟
الذكريات الحلوه بتبقى عزيزه على القلب اوى وبنحبها اما الذكريات الوحشه فتعتبر ماضى لازم نتعلم منه ومنعملوش تانى ولا نقربله
بس عموما لو سبتى نفسك للذكريات هتحسى بعدها بحاله وشعور جميل ممزوج بشىء من العاطفه وبعض من البلاهه او العته ده على شكل الذكريات
واللى ذكرياته مؤلمه ده لازم ينتحر وينجز ويريحنا من نكده
وفيه ناس عايشه فقط على الذكريات ومش مهم اللى جاى ودى ناس هبله
بس فى الاخر كلها ذكريات يعنى ماضى وحش حلو اهو ماضى وخلاص
بس من الاخر مهما عملنا ولا رحنا او جينا طلعنا او نزلنا ولا بالطبل البلدى نقدر نلغى الذكريات من حياتنا يا معلم . غصب عننا موجوده فى حياتنا بعضها بيسعدنا وبعضها بينكد على اللى خلقو اهالينا العيشه وسنينها
انا عندى ذكريات كتير تعبانى اوى مش عارف اخلص منها ولا هيا عايزه تخلص منى تقوليش مرتبطين وبنحب بعض .... دى نيلة ايه دى يا بتنجانى
طب قوليلى اعمل ايه ؟

Fatma said...

انا بقيت بلاستك

:)
كله محصل بعضه ولا بحس بأي حاجة من اي نوع لا حاجة حلوة ولا حاجة وحشة

أنا بقيت ببتسم وبس :)

Abo 7anf said...

السلام عليكم
مهو لو كنا بلاستيك مكنش الموضوع اتكتب :)
ساعات لما افتكر الذكريات دى بفكر
كتير بضحك بحش انها مكنتش مؤلمه ولاحاجه
وانا السببتها لنفسى
وكبرت الدنيا
و ساعات بتفكرنى بناس بحبهم فقدتهم
الذكريات لازم علشان مننساهمش
اما عن انتشار الحزن
دى حاله عامه فى البلد
زى ميكونوا بيحطوا فى الميه حبوب كئابه
الموضوع جامد ياابى

arsenalwy said...

رائع الهدف من البوست ياابى

الذكري المؤلمه لما تواجها تذيدك قوه مبتضعفش دي فلسفه الحياه الخرافيه اللى عايشنها اللى اختراعتها ام حلموس


صح بس للأسف برضه لازم الواحد بيتوجع غصبا عنه لما يفتكر الذكرى السيئة دى

فاتيما said...

أنا هعمل نفسى مخدتش بالى من النصيحة بتاعتك يا بيبى
عارفة ليه ؟
عشان أصلاً أصلاً أنا واقعة فى بحر واسع من الذكريات و مش ناوية اخرج منه دلوقتى
لأسباب كتير بما إنك بتسالى ليه ...
عشان الواحد لو نسى قلبه بينشف
بخاف أنسى اللى بحبه
أقوم أتعود على بعده
دا بالنسبة ليوسف طبعاً
اما لو لحبيب أو صديقة او حد مهم فى حياتى و كان لازم أبعد عنه
فالذكريات هيا الخيط الوحيد اللى رابط بينى و بينه ...
كمان دا أقطعه ؟!!!
مينفعشى
معاكى إن التفكير لورا بيجمد اللحظات الحالية و القادمة
بس فيه ناس زى حالاتى كدا وقتهم بالفعل جامد لحين إشعار آخر
و الذكريات هنا هيا الونس الاكيد فى الوقت دا ...
بوسة و حضونة يا حبيبتى

r said...

تفتكرى يا آبى اننا لو بلاستيك وما بنحسش كنا هنكون لسه عايشين على الارض دى
يا بنتى الارض دى للمعذبون عليها
واللى ارتاحوا سابوها من زمان

عجبتنى اوى اننا ما نندمش
ربنا يسهل ان شاء الله

دمتى متفاءله
وعندك امل
ومش ندمانه ابدا

L.G. said...

أنا بعمل كده بس مش بقصد انت عارفة اسكندرية صغيرة وخاصة ان زملاء الجامعة كلنا كنا ساكنين في حتة واحدة وبصراحة مبزعلش لما بعدي جنب مكان فيه ذكريات خاصة عند الجامعة بس بقول كانت أيام جميلة حب وشقاوة وعلم وحياة

وشباب
أنا بفتقد سن العشرين ولما كنت صغيرة كانت الدنيا أجمل وكان لسه عندي أمل

قلبت المواجع .. ما علينا

ادم المصرى said...

والله الزكيرات بتكون ديما شيئ اساسى فى حياتنا والزكريات الجميله خاصه اما السيئه فلبد تزكيرها لئنا مدرستنا القادمه التى نتعلم من اخطائنا بها

Empress appy said...

thunder
===========
مش دايما الماضى سعيد ومش دايما مؤلم
انا عن نفسى مرتبطش بماضى ولا حاضر بس بحب ازغزغ نفسى كل فتره بالموضوع ده علشان مكونش بلاستيك
اما عن زعلك زى محمود فمتخافش هجيب لك جردل مانجه يروقك هههههههههه







وومن
=========
انتى بتتلككى على العياط بقى ولا ايه
لا انا عاوزه تبقى قويه مش بتعيطى

Empress appy said...

نضال
=========
يا ابنى هو انا اصلا بعمل حاجه فى حياتى غير انى بضحك
ما انت عارف هما شويه عفرته من الاشكال الضاله وبس
بطل تطلع اشاعات احسنلك انت بتقلق الناس عليه
لازم احدف بقلل علشان تطمن









ميدو
=========
انت اول مرة تعرف ومعاد تصنيعه كمان

Empress appy said...

سمكه واحده
===========
اوعى تتزحلقى







مواطن مصرى
===========
عرفت بقى ان كلنا بلاستيك علشان لما بتكلم بتكلم عن جيل كامل

Empress appy said...

سمكه واحده
==============
حمد لله على السلامه من البلكونه
يا حبيبتى ما هو الغرض يبقى ولا قديم ولا جديد يعنى القصد اننا نبقى فى الوسط








قوس قزح
==========
همشى على العلاج يا دكتور
هههههههههه
بس انا مش عاوزة ماضى يرجع ولا يبقى مستقبل هى مجرد حنين تيرررررارررررررر بس فى ثانيه بيضيع قدام واحده وايت شيكولا
وكل شئ بينتهى
هحاول يا دكتور اسمع كلامك

Empress appy said...

بسمه
=========
فيرس يا اختى ماشى فى المدونات بس انا مش حزينه خالص انا بضحك ومنشحكه اهو







تامر على
=============
وهو عيب نكون طفل يا سلام طيب ارجع انا طفله بس وانا ابهدلكوا

Empress appy said...

سارة
=========
لما يجى فى بالك وانتى قاعده قومى امشى من المكان لو جه فى بالك وانتى على السرير قومى واتحركى يعنى غيرى المكان اللى انتى فيه وان شاء الله مع مرور الوقت تنسيها








فوكس
==========
لا لان الفتره الاخيره الاحداث كانت سريعه اوى اوى فملحقناش يبقى فيه ذكريات
نورتنى يا فوكس

Empress appy said...

شمس النهار
===============
يا لهوى يا شموس حرام عليكى دا انا صيف شتا باخد شاور ميه دافيه تقولى ليه ميه صاقعه ده كده ادخل على الانعاش على طول لا يا ستيى
دى مرحله وهتعدى اى والله









فيشو
=========
بص يا فيش اذا كنا اختلفنا فده عادى يعن كده معناه اننا بنفكر ولو انى اشك انك بتفكر اصلا نيهاهاهاها
اننما اكتئاب يبقى انت متعرفنيش لانى معنديش القصه دى انا كائن بيتكيف مش بياخد مككيفات لا بيتأقلم من الاقاليم يعنى
نورت يا فيشو وبلاش الفواخرى دى هتحبسنا على طول

Empress appy said...

محاسن صابر
===============
لا يا سمسمه انا كويسه نضال البشمهندس الدكتور بس متعود على القلل مش واخد على الهدوء وده بوست نفسى او اجتماعى مش حاجه وحشه يعنى بتكلم عن ظروف كلنا بنمر بيها
نورتى يا قمر وربنا معاكى يا حبيبتى









ليساندرا
=============
يا لاسى يا قمر هو ده اللى قصدته بنرجع للذذكريات المؤلمه علشان نقوى نفسنا
وفيه نوع بيرجع علشان هو عاوز يبقى نكد وينكد على نفسه واللى حوليه وده عمره ما هيتقدم خطوه واحده فى حياته
نورتى يا قمر

Empress appy said...

محمد ابراهيم
================
ما هو المفروض يبقى قوى لان احنا فى زمن مش هينفع فيه تكون ضعيف لان الضعف هيؤدى لانتحار الشخص على طول
ميرسى ليك يا محمد ونورت








Unique
==========
ومين قال اننا بنحس احنا يمكن بنحس بوجعنا انما مش وجع اللى حوالينا البلاستيك لما بيتعرض للنار بينكمش
يعنى بيحس بنفسه بس
عمر البلاستيك ما بينكمش لغيره
نورتى يا قمرايه وبلاش الغيبه دى

Empress appy said...

البنت المشمشيه
================
لا يا اختى اكتئبى لوحدك انا نو مليش دعوة
نورتى يا حبيبى








ليلى فى عالم ادم
================
المهم انك متقوفيش عندها كتير علشان مبقاش فيه وقت للى فات

Empress appy said...

مواطن مصرى
=============
يا دى الزمالك عارف مصر لو بقت فى رخاء الزمالك هيكسب لانه بقى زيها









احمد الحيدر
=============
اهلا اهلا
هى كل نعم من عند ربنا بس يا ريت نقدر نوظفها صح
نورتنا كتير

Empress appy said...

funckydoctor
===============
بس الماضى على قد ما بيوجع برضه مش زى هكونا مطاطه هههههههه
عموما حلوة برضه









نور
=====
لا هو يا بنتى بس بعمل نيو لوك مش اكتر

Empress appy said...

سومه المجنونه
===============
لا نكدى انتى يا اوختى انا لا مليش فيه اللون ده وحش عليا








ماما اموله
==============
الله عليكى وعلى مجايب ايديكى يا حبيبه قلبى

Empress appy said...

مجداويه
===========
مانتى الجميله
والله العظيم انا ساعات بشد فى شعيرات راسى منك بس برضه بحبك ومعرفش ليه اه لو اعرف كنت موت السبب
كل سنه وانتى جميله ومعانا ومختلفين
وبعيدن مين قالك انى بعشق الفوندام ها قولى وانا اعضه بجد انا كتيييييير بموت فيه وبحبه
ربنا يكرمك يا رب وتبقى حد كويس زى ما انتى وبتصلحى ليه حاجات كتير










برقوش
=========
ايه ده انت بتطلع من نهايه الشتا
يا سيدى والله ما فيه رومانسيه يا جدعان دى حاله بنمر بيها اعمل ايه بس مش معناها رومانسيه يعنى ما انا قولت بتقوى النفس مش اكتر
نورت وبطل غيبه

Empress appy said...

دعاء مواجهات
=================
يا لهوى يا اوختى مين قال كأبه دى ابدا ابدا بطاطا البطه
انا بتكلم فى العادى وف اللى بيحصل لينا جميعا اما عنى انا بعديها وبخلص هو انا لسه هقف عند الذكريات بلا نيله اذا كان اصلا فيه









صيدلانيه طالعه نازله
========================
وده اللى عاوزاه يا لولو نتعلم ونقف ونعدى والايام تمشى
وده اللى بعمله يا حبيبى
نورتى يا جميله

Empress appy said...

محمد عتلم
==============
بزمتك احنا فى زمن نقف فيه قدام ذكريات حلوه والله وحشه انا بيتهيأ ليه ساعات مخى بيتمسح باستيكه خالص
وبعدين انت والذكريات مرتبطين اتجوزا علشان محدش يجيب فى سيرتكوا
انا كويسه كده وانت ازيك كده على الناحيه التانيه













فنون
========
ههههههههههههههه انضمى للصف يا قلبى
ما كله كده ومش راضى يعترف تعيش فنون تعيش

Empress appy said...

ابو حنف
==========
البلاستيك بيتفاعل مع نفسه انما مش اللى حوليه
احنا فعلا حياتنا شبه البلاستييك شكل جميل من غير روح
لو ركزت هتلاقى ان ده موجود العيب بقى اننا نستمر لازم نقف وكويس اننا عرفنا الوجع فين وبالتالى نعالجه صح ولا ايه يا زملكاوى













arsenalwy
==============
مش مهم تتوجع المهم تكمل وتعدى وتدور وشك عنك

Empress appy said...

فاتيما
==============
ياااااااااه يا امو يوسف كده برضه ماشى
المهم يا حبيبى الموضوع سهل انتى بالذات لازم تنسى الذكريات الوحشه وتفتكرى الحلوه علشان تقدرى تجيبى اللى ضاع
ولما تحتاجى للوحشه طلعيها علشن تقويكى متضعفكيش
نورتى يا قمر وكل البوسات ليكى














بسنت
=========
اى نعم بلاستيك كل حاجه بقت ملهاش طعم واحنا بنكابر ما هو مش عيب اننا نعرف عيبنا ونعالجه
نورتى يا قمرايه

Empress appy said...

ال جى
=======
كل مرحله فى العمر لها جمالها
ما عدينا العشرينات ولسه اشقيه وبنتنطط اهو وبنلعب انت بس اللى قافل يا قمر شويه افتح الشبابيك كده وانزل امشى على البحر هتلاقى الدنيا حلوة









ادم
=======
ميرسى ونورت

Ehab said...

هو انتي بس محتاجه حقنة انتي بيوتك كويسه
وهتبقي زي الفل
وتتعشي لحمة راس وكوارع ومتنسيش الشوربه بالليمون
وهتبقى فل الفل
هتلاقي نفسك نسيتي الفلسفه والمشاعر وتعذيب النفس
هتحسي بقى بتمتيع البطن
بصي كل واحد فينا ساعات بيقلب في ذكرياته على حاجه توجعه مش بمزاجه ده غصب عنه
كلنا عندنا احساس الذنب دايما لأننا مكشوفين لنفسنا وعارفين غلطاتنا وعيوبنا فبالتالي بنبقى عارفين اننا نستحق عقاب كتير على افعالنا اللي مزعلانا من نفسنا
والحل بيكون في جلد الذات
حلوه جلد الذات دي جامده قوي
المهم بندور على حاجه تحزنا علشان نصعب على نفينا ونبكي علينا بدل ما نبكي مننا
الموضوع مكلكع زي عادتك بس دماغ قوي
انصحك تهدي اعصابك شويه وتتفرجي على فيلم رعب كويس هتلاقي نفسك مستريحه نفسيا بعديه بس يكون مفيهوش دم وتقطيع دوري على حاجه تخوفك بس بشياكه
هتلاقي اعصابك احسن بعديها
سلااااااااااااااااااااااااااااام
اخوكي ايهاب

الربان said...

تحياتي


اولا الذكريات حلوها و مرها هي جزء منا...من حياتنا...و لا نستطيع ان نلغي اي منها من الذاكرة...كل ما نستطيع فعله هو ان نرسلها الي اللاشعور....

واللاشعور هو :
وهي منطقة إفتراضية في النفس تحتوي الدوافع والذكريات والمخاوف والاحاسيس والوجدان وأفكار ممنوعة من الظهور في الوعي .
و كل هذا ينعكس علي تصرفاتنا و علي حياتنا بشكل او أخر....

ثانيا : الذكريات جزء من ماضينا..و من هنا فهي تجارب انسانية نستفيد منها
من حين لاخر...

ثالثا...الذكريات وان كانت اليمه..الا
انها تمدنا بقوة و تقدير للنفس لاننا استطعنا ان نجتاز هذه التجربة الاليمة
مما يعزز الثقة في النفس و يضفي شعور
بقوة الشخصية.

غالبا مثل صاحبة هذه الشخصية ( صاحبة
النحلة )...تميل الي المواجهة في الامور
التي تتطلب ذلك في حياتها الشخصية...
و لديها الاستعداد لتحمل تبعات هذه المواجهات....
قد تشعر احيانا بأنها تهورت او تسرعت
لكن غالبا ما تحس بالرضي عن نفسها..

لابد ان نتذكر انه لولا الآلم...ما عرفنا
طعم السعادة....

ولابد ان نتذكر انه مهما كانت قسوة التجربة...فأن الله سبحانه و تعالي وضع
فينا القدرة علي التحمل و تجاوز اي تجربة غير سارة.... فقط علينا ان نستعين
بالله و نتوكل عليه حق توكله.


تحياتي و تقديري للنحلة و الدبور...لحوارهما المتميز ..

وينكى said...

طب انتى ومهطوله خلقه
تهطلينى معاكى كده؟؟؟؟؟
زى ماقلتى المهم من كل الذكرى انك تاخديها سلمة رخام لحياة افضل ودرجة خشب زان لبناء الشخصية
( مستنياكى بكره فى حفلة الواد علي الألفي)
الساعه 8 فى الساقيه ولو ماجيتيش هاطرقعلك

Mostafa Safwat said...

السلام عليكم
مش عارف دي اول زيارة ولا لأ
بس حعتبرها اول زيارة
:)
حوار ظريف بين النحلة و الدبور
و ان كنت مش قتنع بحكاية ان الذكريات المؤلمة تقوي
بس حكمة جناب الامبراطورة جامده جامده فعلا
احنا من البلاستك لا نشعر
هههههههههههههههه

Alexandrian far away said...

أنتي فين يا ستي؟
مش بتظهري على النت ليه؟
أتمنى يكون المانع خير ومش عامله لي بلوك مثلا
:-)
تحياتي

Hossam said...

Heyyyyyy Appy
وحشتينى جدا ووحشتنى مدونتك
موضوعك بجد جامد جدا
وانا بقرا الحوار بين النحلة والدبور حسيت بحاجة غريبة واد ايه كمان لمست ان فعلا فى شخصيات زى النحلة والدبور فى حياتنا العادية
شكرا على طرحك للموضوع
تحياتى صديقتى
سلام

Unknown said...

ينفع وجع القلب ده يعني علي بلليل كده؟

احنا بنروح الاماكن دي عشان نحس بوجود الناس دي معانا
يعني بنحاول نعوض افتقادنا ليهم

امشي بقي خليني أقوم أعيط

روابط said...

فيكونيتى الغالية

الكتابة لا تكون كتابة الا اذا كانت عن كائنات خزعبلية يا صديقتى, كما السباحة لا تكون الا ضد التيار

الكتابة الحقة وكما يقول سارتر, لا تكون الا عن أحداث جسام

والسلام ختام يا خزعبلية

الـسـيـدة نـون said...

عاملة يا ابى هانم بتنجانى

بصى يا ستو انا

تعذيب النفس باننا ناخدها على ملا وشها ونزقها لاماكن الذكريات لاحبائنا اللى فقدناهم او فقدونا

ده بيكون فيه متعة اثارة تشويق

متعة انك تفتكرى كلمة عدى عليها سنين
ولمسة حلوة دافية على خدودك الناعمة من ايد حنينة
انك تبكى على حاجة راحت
ده شئ وارد ومقبول ومحدش يقدر يلومك

مش لازم حبيب او حبيبة
لما صديق يفارق
دى برضه بتوجع

لما حبيب بيغدر
دى بتقتل


لما انسان غالى علينا يروح للى خالقنا وخالقه
دى حاجة برضه مؤلمة


الموضوع مش موضوع الم وعايزين نعيش فيه

لكن لازم نرجع له من وقت للتانى
علشان نستمد منه قوة تخلينا نكمل الحياة




قريت التعليق وحسيت ان الكلام متلغبط ومش مفهوم

بس واثقة انك هتفهمى انا عايزة اقول ايه


سلام يا ابى
وخدى بالك من نفسك يا حبيبتى

اختك خيخة

الـسـيـدة نـون said...

اه صحيح يا خروفة هانم

فين يا بت اسمى من قائمة الفياكين والفيونكات
ولا التجديد اللى عملتيه مايجيش غير على اسمى وتشيله

نهارك هيكون مخرفن لو مارجعتيش اسمى تانى
خوخة خيخة


يلا امشى من هنا

أحــوال الهـوي said...

ازيك
رغم ان عندي ذكري صعبه في مكان ما و لكني احب خناقي زي القطط باروح اتبهدل و ارجع و تعليقاتي ما القيهاش
تفتكري ده له دعوة بالموضوع بتاعك


تحياتي

dr.lecter said...

الذكري المؤلمه مش لازم تضعف دي لازم تبقى خطوه انك متكررش الغلط الذكري الحلوه اوعي تخليها تغرقك زي طفل فى لعبه الخاصه لانها بتفقدك الزمن والحياه وبتقف عند لحظه واحده بس وعمرك كله بيربط عندها بس لما بتفك بتكون زي الجمل اللى اتحمل كتير ولما فك طاح شمال ويمين عذاب النفس ليس الم فقط وكي بالنار وعض فى المناخير كما انقضاض سممكه قرش على فريسه ولا ولوله ضفدعه مطلقه فى يوم شتا ولكن عذاب النفس اغراقها فى حاجتين ذكري مؤلمه وفرحه مجنونه وتتابع الفرحه دي من مظاهر جنان لبس شوال زعبوت سليبر فرده وفرده عذاب الجسد بيخف مع مرور الوقت ولكن عذاب النفس مستمر الا مالا نهايه اما عذاب الوطن الذي لانعرفه اشعر ان الوطن كائن خرافى نخترعه بخيال خصب لكي نشعر بالدفئ نخترع كل الشخصيات لكي نعذب انفسنا وفى نفس ذات النفس نشعرها بالراحه



البقين دوول في الجوون يسلم حنكك

Unknown said...

انا شخصيا لما بعدى على مكان لية فيه ذكرى حلوة وراحت بضحك....بابتسم عشان ساعتها ببقى فاكرة الحاجة الحلوة بس....اى نعم بعد شوية باخد بالى انى بابتسم على حاجة انتهت ومش موجودة الا انى باروح مدية راسى هزة يمين وهزة شمال وافكر فى اى حاجة تانية وخلاص....ابى الله ينور عليكى

رامز عباس said...

نطلق اليوم في تمام التاسعة والنصف الأربعاء الموافق
(25/2/2009)وتستمر حتي نهاية مارس القادم
حملة (دعونا نعيش بكرامة)
حملة (دعونا نعيش بكرامة) هي حملة عبر الأنترنت ووسائل الأعلام
ونناشد من خلالها الصحف المصرية
بتبني مأساتنا نحن معاقي مصر
الذين يعانون الويلات جراء عدم تطبيق قانون 39 لسنه 1975
والذى بتطبيقه نستطيع الحصول علي فرصة عمل
وأن نعيش بكرامة مساوية لكرامة المجتمع
لذلك نرفع نص الرسالة المرسلة إلي كلاً من
السيد المستشار/وزير العدل- مصر
السيدة الفاضلة / وزيرة القوى العاملة والهجرة - مصر
السيد المستشار/عبد المجيد محمود النائب العام - مصر
تحية طيبة وبعد
مقدمه لسيادتكم الموقعون أدناه يلتمسون من سيادتكم العدل ..
وذلك من خلال تنفيذ القانون 39 لسنة 1975
وتعديلاته (الخاص بتأهيل وتشغيل المعاقين)..
حيث أن أصحاب الأعمال ومسئولي الشركات يتعنتون في تطبيق نصوص ذلك القانون
في تعاملهم معنا مما يجعلنا من المتعطلين إضافة لاننا من فئات المعاقين هذا بخلاف
تأثيره علي نفسيتنا ومعنوياتنا لاحساسنا ان المجتمع يرفضنا..
وبعض الأحيان يقابلنا بالشفقة التي قد تجرح مشاعرنا..
لذا نرجوكم التدخل والعمل علي إصدار أوامركم بتطبيق القانون...
وتفضلوا سيادتكم عظيم الشكر والاحترام
مقدمه لسيادتكم عن المعاقين
أ/ رامز محمود عباس
معاق سمعياً
أ/ محمد سعد الدين نصير
نقص نمو وتشوه بالجمجمة
أ/ محمد مختارغريب
شلل أطفال بالساق اليمني

ملحوظة هذا الموضوع خاضع للتحديث طوال مدة الحملة
وفي إنتظار مزيد من المطالب التي يأمل المعاقين الحصول عليها
تبعاً والتي أرجواً أن تكون ذات إتصال بهدف واحد حاليا وهو حقنا بالعمل
وأيضا لكم في تعليقاتكم أن تطالبواً بإضافة توقيعاتكم لنرسلها للمسئولين

http://ramezabas.blogspot.com/

اقصوصه said...

ااااااااااااابي

انا بس حبيت اسلم

واقووووووووول

انا هنااااا :)

اسماء عوني said...

انا هاجي اعيط معاكي انتي وجزره
اهئ اهئ اهئ
عااااااااااااااااااا

عمو said...

Appy

ازيك عاملة أية
وحشنى كلامك وكوكبك الجميل

اسمحيلى اضحك على حكمة اليوم
"لاتندم على ما رحل ولا تندم على ما هو ات فانت بلاستيك ولا تشعر
"
ههههه
هو مين اللى بيكتب الحكم دى.؟

تخيلت فعلا إنى كائن بلاستك
بس يا سلام لو كمان مكتوب عليه صنع فى الصين

إنسان القرن الواحد والعشرين
بلاستيكى
لا يحزن ولا يبكى ولا يفرح
وليس له ماضى ولا مستقبل
ولا حتى حاضر
وعلية تيكيت " صنع فى الصين"ـ

....
عارفة يا آبى
ساعة ما تشوفى دة
يبقى فاضل كلمة واحدة فى آخر السطر
من على الشمال، نكتبها ونقفل الدفتر


تمت
....

طبعا الدنيا مش بتقف عند حدث وبتمشى
معاكى حق فى دة
وياريت الناس كلها تعرف تعمل دة
بس كمان الحياة كلها اية غير أمبارح والنهاردة وبكرة
وساعات كتير ناس بتدارى مشاعرها ورى ستار الضحك
بس انا عن نفسى بأحسهم

ممكن طلب صغنن وأمشى على طول...ـ

بصى فى وشوش الناس العواجيز
اللى وشهم مكرمش
وشعرهم أبيض
وساندين على عصاية

ليه كلهم ملامحهم كدة.؟

بلاستيك.....!!!!؟
طب مشيها خشب
على الأقل له ريحة
:)

سعيد جدا بيكى وبمحاولاتك

تحياتى وتقديرى

كوارث said...

اهلا يا آبي
ازيك
البوست جميل جدا وكلام النحلة منطقي ونصايح الدبور اكثر منطقية !!
بس انا مع النحلة !
وبالنسبة للفلسفة
فوالله زي الفل

Empress appy said...

الشنكوتى الكبير
=================
انا مبدورش على حاجه تحزنى يا شنكت
انا بس بحب العب كل فتره
وبعدين كوارع يععععععععع جتك القرف مش بحبها يا نيله









الربان
=========
هى صاحبه الشخصيه النحله
اى نعم بتميل لده وللاسف بيتعبها بس هى اتعودت
تحليلك فى مكانه

Empress appy said...

وينكى
=========
ابوس ايدك شعر ودقن سامحينى كان عندي شغل ومروحه متاخر اسف ومتعوضه والله








Bondok
=========
اممممم وانا اكيد مش فاكر بس نورت المكان كله
اما عن البلاستيك بقى فسمعت انه هيغلى بالجامد اوى ربنا يستر

Empress appy said...

Alexandrian far away
=====================

يا لهوز يا صديقى الغالى انا اقدر مشغوليات يا فندم الوقت بيتسرق بس مننا مشوفتش الحرامى
نورت الدنيا يا فندم












Hossam
==========
اهلا بيك يا حسام ونورت تانى ونورك غطى على الكهربا يا فندم

Empress appy said...

esraa
===========
يا سلام ليه والعياط هنا وحش طيب حتى هنا فيه فسحه ههههههههه








حازم سويلم
=============
ما هو انا مش تعبنى غيرك يا بتاع سارتر انت
الا مين جسام ده اللى بيتكلم عنه
حد معرفه يعنى

Empress appy said...

خيخ خوخه
=============
خوخه ابنتى الغاليه بعد السلام
انتى يا بنت انتى انا بفهم كلامك حتى لو انتى فى اكتوبر الللعينه ام عن السؤال فهى بدايه وقلقانه بس
عارفه اغنيه يا واد يا تقيل
ابقى اسمعيها يا جمر وانتى تفهمى هههههههههه
اما عن اسمك يا قلبى هو فعلا والله وانا بنفض المدونه وبهزها كده وقعت حاجات كتير بس لما حد بيفكرنى برجع اللينك تانى
انما انت لازق على الريدر على طول يا قلبى والله
بوسه لشيكووووووو كبيرررررررررة
بقولك ايه الهديه هتبوظ ارجعها ولا اعمل ايه بس
نورتى يا خوخه














احوال الهوى
-===========
يا نهار يا نهار
تعليقاتك مش بتلاقيها مين اللى بينشلها
دا انا اقتله قولى عليه بس
انا بنزل كل التعليقات والله اوعى تكون تقصدنى كده اعيط
وبعدين اللى بيخنق حد بيكون بيحبه ده العادى يعنى ههههههه

Empress appy said...

dr.lecter
===========
طيب مفيش صنيه كنافه ولا حتى ملبن بالقشطه علشان قولت كلمتين حلوين
ههههههههه
نورت يا دكتور










انجى
=========
ايووووون طريقه مجربه هزة شمال وهزه يمين جامده دى

Empress appy said...

اقصوصه
=========
اهلا اهلا يا قمر نورت تانى












اسماء عونى
=========
سمكه قلبى الشمال اقعدى يا اوختى جتنا خيبه فى حظنا

Empress appy said...

عمو
========
ايه النور ده بس يا ربى
انا اللى بكتب الحكم ايه رايك مش حد شاطر انا
ومتخافش عليا انا جامد جامد وهستمر
ويا رب بلاش اكتب تمت دى الا كده هتبقى صعبه








كوارث
===========
يا طارق بيه اخيرا حنيت وجيت برجليك
مكنش العشم يا ريس

Share |