فراشة تحترق




اعشق الفراشات بشكل غير طبيعي فاشعر فى بعض الاحيان انى مثلها تمام ليس فى الجمال ولكن فى طريقه الحياه
وبيننا صفتان مشتركتان

الاولى
===
انك لا تستطيع ان تملك فراشه..... ولكن تسطيع ان تنظر لها وتراها وهى تلعب بعيد وتتمتع بجمالها وجميع تحركاتها الشقيه الرشيقه
وما ان حاولت تملكها فى لحظه فسوف تموت لانك لن تستطيع باي شكل مراعتها والحفاظ عليها
انا مثلها فى هذه الصفه اكره التملك بكل انواعها التملك العاطفى اولهم حتى لو عن طريق الحب فالحبيب الذي يمتكلنى فى حبى واشعر اننى احببته اكثر من اي شئ هو ايضا امتلاك وفى هذه اللحظه اذبل واكون اقرب للموت

الثانيه

====
النور .... فعاده الفراشات عندما تري النور تنجذب له وعندما تقترب تتكتشف ان هذا النور يا اما لمبه مضيئه قويه لا تسطيع الفراشه الاستمتاع بها وتحترق او نار تبتلعها فى لحظه
وانا كذلك عندما اكتشف بادره نور فى اي طريقى اذهب اليها واكتشف انها نار تحرق وليست منبع قوه كما اعتقد

عشقى للفراشات لم ينتهى ولن ينتهي فانا فى كل ركن فى بيت حتى السخان والثلاجه لم يسلموا من وضع فراشات لهم اصدقائي اول هديه يفكرون بها عندما يريدون اعطائي شئ ولو رمزي هى شئ عليه الفراشات
حتى عندما سافرت لماليزيا كان اول شئ ابحث عنه هو حديقه الفراشات ولذكاء الشعب الماليزي ومعرفته مسبقا باهميتها وجمالها
فحديقه الفراشات صممت على شكل اوبن ايريا ومغطاه بشبكه كبيره كي لا تذهب الفراشات بعيدا

وفجأه وانا انظر اليهم وسرحانه وجدت فراشه وقفت على يدي ونظرت اليها ونظر الموجودين معى وضحكنا بصوت عالى

واكتشفت صحه مثل الدم بيحن


فى النهايه انا تلك الفراشه ولن اقبل بان اكون غيرها وفى المره القادمه ساتذكر ان النور البعيد ما هو الا خداع سوف يقوم بحرقى
فكف ايها النور عن ارسال اشاراتك لانى من الان ساكف عن العبث

منحوسه "البوست ده فضفضه فى مود ليه رايق مش اكتر

كان معكم فراشه هانم المتنكره ابى هانم

حكمه الامبراطوره

النار لا تعطي الدفا فقط ولكن تحرق ايضا




Create Yours @ NackVision

89 اخبط وقول رايك:

NIDAAL .R said...

حراااااااااام
انا ليه كل ما اكتب كومنت يقولى خطأ فى أجراءات التنفيذ
هل للأمر علاقة بالنية
هههههههههههههههههههههههه

بصى .. اهم حاجة ان الواحد يعيش ويتمتع بحريته يا كولومبوس.. سواء كان فراشة او اى حاجة تانية
وللأسف كتير بننخدع فى النور و بيطلع نار

ابقى فكرينى بقى امشى بلمبة معايا علشان أجذب الفراشات ..
هههههههههههههههههههه

صباح الفل يا كولومبوس

واحد مش فاهم حاجة said...

بستمتع بحركاتهم وطريقة طيرانهم جدا مع ان الفراشات البيضة بتستهوينى اكتر من اى لون تانى واعتقد والله اعلم برضوا ان مجرد ظهور الفراشة بيدى طابع السعادة على اى حد

ahmed_k said...

يارب أكون أول تعليق

أحجز وأعود

ahmed_k said...

أولا الفراشات لا يمكن حبسها ورعايتها منا نحن بني البشر
ولكنهم قد يحتوون بعضهم البعض
ويتملكون بالحب بعضهم البعض
ونور الفراشات قد يكون فيه الهلكة لها
ولكنه حينما يكون نور الله فهي تستمتع وتستفيد به
كنور الشمس لا يحرقها ولكنه يبعث الحياة فيها
وقديما قال الشافعي

شكوت وكيع سوء حفظي
فأرشدني إلى ترك المعاصي
وأخبرني أن العلم نور
ونور الله لا يهدى لعاصي

فالتأملي في نور الله خيرا
فهو الأكمل والمرجو الفائدة منه

وتقبلي مني خالص التحيه

wanna b a physician said...

الفراشة ضعيفة الجسم او التكوين ولكنها رشيقة جميلة رائعة هكذا خلقها الله
ولكن يا اببى الحب فى حد ذاته هو انانية وامتلاك فكل محب يبغى حبيبه له فقط دون الاخرين وتلك انانية وامتلاك ولكنها طبيعة الحب


تحياتى

dr.lecter said...

الفراشه بالنسبه لي كائن متغير مبهر

من بدايه الشرنقه لغايه مايبقي كائن جميل لغايه مايموت ويذبل

مراحل متغيره باشكال متغيره كل مرحله فيها كلاام كتيير جدا

حـــــدوتـــــة said...

السلام عليكم

صديقتى العزيزة ايه البوست الجامد ده
انا مش متعود منك على كده
عموما انتى من اجمل فراشات التدوين فى البلد
تحياتى

سلالالالالالالالالالالالالالالالالالالالالالام

رئيس جمهوريه نفسى said...

هو في ايه مش عارف يا ضنايا يا بنتى مش امبارح كانتى زي الفل كدة اركب القطر ارجع البلد يحصل كل دة كله منه كله منه

قوس قزح said...

حبيـــبى مالك
انتى عيانة ولا ايه

هو انتى لاقيتى الدبوس ؟؟

بصى يا ستى
التملك فى الحب لو معتدل يبقى مش وحش
لان الحب بيخلى الواحد يحس ان حبيبه ملكه
مشاعره ملكه لكن مش حياته و ده اللى لازم نفرق فيه

اما عن النور فهنا لازم تتعلمى تعملى كنترول خصوصا انك عرفتى نقطة ضعفك و هى انجذابك له
و مش كل النور نار

و بعدين يا ستى لو على نور تعالى خدى اللى عندى و هو ينسيكى الفراشات و كل حاجة :)

هو البوست ده فصحى ولا حاجة !!!

mohamed ghalia said...

كم أنتى رقيقة بعشقك للفراشات
ياريت تشوفى موضوعى عن التفاؤل وتقليلى رأيك
دمتى بكل الود يا أبى

micheal said...

ايوة كده يا حبيبي
برعي المفتش ايه بس
ارجع لأصلك..فراشة جميلة تطير مع الاحتفاظ بلدغة النحلة برضه
:)
عامة أنا ليا قصة طريفة شوية مع الفراشات حبقي احكيهالك بعدين
تحياتي وسمعيني أحلي سلام كان فيه فراشة صغنططة
عندي الأغنية يا بت علي فكرة كليب واوديو
باي

أخـــ مسلمة ـــت said...

يافراشة انت يافراشة
ايه العسل ده؟

ممممممممممم
أما عن التملك فهو شئ مكروه جدا
مرة سمعته شيخ محترم جدا بيقول انه ربنا سبحانه وتعالي في آية
"وجعل بينكم مودة ورحمة"
لم يقل "حبا ورحمة" لانه الحب بطبيعته أناني
أما المودة
=
حب + عطاء

اعتقد ده احسن حاجة في الدنيا

دمتي بالف خير حبيبة قلبي
يارب تكوني سعيدة ورايقة دايما
وما أجيش المرة الجاية الاقيكي بتضربي حد

:)

همس الاحباب said...

الفراشات
مخلوقات رقيقة جدا
بي اللى انا مستغربله
ايه هو وجه الشبه بين الخرفان والفراشات
بس تعرفى ان كلامك صح قوى قوى
تحياتى

sabrina said...

بوست جاااااامد
i really enjoyed specially ......i began 2 love the butterflies lately!

أحمد سعيد بسيوني said...

كلامك عن الفراشة و وجه التشابه بينكم جميل

دمتم بخير

وومن said...

ايه يا ده يا قمر قلبي رفرف

هو برعي اتسرق ولا ايه :)

ايوة فراشة في كل حاجة مش بس الحاجتين دول

انا متفقة معاكي انتي والفراشات في حكاية تملك الحب دي انا كمان محاولات تملكي بتقتلني وربنا يستر

نوري said...

اللـــــــــــــــــه
يا ابي انا اكتشفت النهارده
انك رومانسيه قوي

وفعلا
اجمل حاجه في الفراشه
الحريه
ياريتنا كان عندنا جناحات وبنطييير


بست وشز فور يو

حسن حنفى said...

ياريت كلنا كنا فراشات

أنا حر said...

مش عارف بس والله معرفتكيش
حسيت اني دخلت مدونة تانية وكنت مستني في النهاية اعرفالبوست ده جيباه من مين لكن المفاجأة ان انت اللي كتبتيه
والسبب ان الاسلوب اللي متعود عليه اختفى وده اسلوب جديد في الكتابة اول مرة اشوفه ليكي
عموما انا كمان بموت في الفراشات بس اجمل حاجة عجبتني التشابه في الحرية
تحياتي

احمد سعيد said...

اة صحيح
appy
ايه وجه الشبه
مابين الفراشات
والخرفان البمبى؟؟؟؟؟

ايوشة said...

الفراشة رمز للحرية للحياة وللجمال وساعات رمز للضعف
بوست حلو جدا وحبك للفراشات بيدل على انك شخصية رقيقة

Abo 7anf said...

السلام عليكم
بالحب وكل الحب اتجمعنا و نقول الو:

فالحبيب الذي يمتكلنى فى حبى واشعر اننى احببته اكثر من اي شئ هو ايضا امتلاك وفى هذه اللحظه اذبل واكون اقرب للموت


مش معاكى
حتى الفراشه بتحب الزهور تلعب حوليها
تبعد عنها ترجع ليها

ممكن تكون الاضواء ساعات كذابه
بس فى بردوا الشمس
فى كدا و فى كدا

وزى مبيقولوا

لاتبكى فكل اللبن مسكوب

علي الصبي said...

هي التذكرة لماليزيا بكام؟ علشان نفسي أشوف حديقة الفراشات

تحياتي على البوست الجميل ده

Lady E said...

بوست رقيق اوي يا ابي

انا كمان بعشق الفراشات وبحب النور اللي بينور وساعات بيحرق

ساره said...

ابي
حببتيني

الفراشات فيها كل اللي قلتى عنه
وحلو كثير اني تعرفت اكثر على شخصيتك

يافراشه ياحلوه :)

الرابطة وبناء الأمة said...

السلام عليكم ورحمة الله وبركاته

لواء أركان حرب : أبي هانم

لقد نلتم سيادتكم الثقة الغالية من الكتيبة السياسية في إختياركم

أفضل مدونة سياسية للفترة السابقة

ولمعرفة المزيد تابعنا علي الكتيبة

محمد عتلم said...

ازيك يا آبى يا بتنجانى
انا بس حبيت ادحرج التماسى على الفراش اللى ناسى
يعنى ميه مسا على الفراشه الكويسه
فراشه يعنى حريه .. يعنى الوان .. يعنى جناحات .. وسمعنى سلام صباحو بحره ابيض متوسط خالى من العقد والمشاكل
ـــــــــــــــــــــــــ
ايه بخرف . من حق كل مواطن انه يخرف عادى يعنى

شمس وقمر said...

جمييييل اوى الموضوع يا ابى

بالنسبة للتملك فى الحب
فى ناس بتظن ان مادام هيا بتحب حد و بتخلصله يبقى من حقها انه يبقى ليها لواحدها
مش عارفة منين جابو الاعتقاد ده
بس متهيالى ده اوقات كتير بيسبب انهيار الحب ده

تقبلى مرورى

Foxology said...

كان فى مقولة بتقول ان الأنسان بيشبه الكائن اللى بيحبه

اللى بيحب الحصان بيبقى زيه .. فى الصفات طبعا ..اللى بيحب الفراشات بيبقى زيها وهكذا

بالنسبة لموضوع التملك .. محدش بيحب يبقى ملك لحد حتى لو برضاه وخاطره .. الا حالات نادرة كدة .. وزمان كانو يقولو .. ربنا يكفينا حكم النفس على النفس :)

تحياتى :)

محمد الكومي said...

يعني كاتبة ممنوع كتابة تعليقات من الحشرات

و البوست اصلا من الحشرات

بس الصراحة اللي يصنف الفراشة على انها حشرة يبقى تعباااااااااااان

الفراشة حاجة كدة زي الحرية و الحب و الجمال مابتتوصفش

اشطات

thunder said...

هو اللى انا فهمتة من البوست الحرية
مش الحب لكن على وجود الحرية المفروض منوقعش فى اخطاء وتكون حريةفى مكانه بمعنى.... مش معنى انى لى مطلق الحرية فى تصرفتى اازى نفسى او غيرى بافعالى
دا اللى بشوفة من اقتراب الفراشة من الضوء الغريبة ان ملاحظ الكل قلبها على نمط الحب ممكن اكون الغلط فى تفسير والاكيد ممكن تكونواصح لكن الكل بيفسر من وجهت نظرة بوست حلو باابى وعلى فكرةthunder دا هو انا
sm
ولما قولت مارينز قصدت بيها فكرة المقابلة مش اعتراض على الشخصيات والله
ارجوا افكرة تكون وصلت
ربنا يديم على التوفيق

احمد سعيد said...

مبروك النيو لوك
بتاع المدونه
فراش وهىء ومىء وشخاليل
وبمبى بمبى بمبى
ايه الجمال دة
مش ناقصها غير حاجه واحدة بس
خروف بمبى

محمد عتلم said...

مبروك النيولوك بتاع المدونه يا بتنجانى

اقصوصه said...

يا فراشه يا فراشه

مين قدك يا فراشه؟

انا بعد احب الفراشات:)

الشنكوتي الكبير said...

بعض الناس تختلف عن البعض الأخر
طب ازاي
علشان كل واحد بيستجيب للناس اللي حواليه بطريقه مختلفه
وهو ده اللي بيسمى شخصية كل واحد
شخصيتك هي طريقة استجابتك للمؤثرات من حولك
وشخصيتك دي بتنشء من مؤثارت بيئتك واهلك ومدرستك وقرائتك في داية تكونك سواء جسديا او نفسيا
الناس اللي اتعودت على ان كل اللي حواليها ناس كويسين بيكون تقبلهم للأخر بشيء من الأندفاع
وبالتالي بيكونوا زي الفراشه اللي بتجري على النار بجنون
لكن مع بعض الصدمات والتوعيه نتيجة المعرفه والخبره الحياتيه بيقل اندفاعهم ده لأن العقل الواعي بيبدأ يحط حواجز لنفسه قبل تعامله مع الناس الحواجز دي كل الناس بتحطها لكن سمكها وشدتها بتختلف من شخص لأخر
اما في حالة الفراشات دول الحواجز بتكون عقلانيه جدا نتيجه للذكاء الشديدي اللي بيتمتع بيه عقلها الواعي
لكن للأسف بيظل القلب والعاطفه اللي هم في الواقع العقل الباطن بيظل عنده رواسب قديمه من عاداته القديمه بتخليه يفضل مرتبط بفكرة حبه للنور المبهر او الضوء الشديد سواء نور او نار
علشان كده لما العاطفه بتطغى على اي علاقه في حياتهم بيتوقف مفعول السور الحاجز اللي عمله العقل الواعي وبترجع تاني للسلوب القديم بتاع الأندفاع الساذج

====================

عايز احللك شويه كمان بس خايف تحدفيني بالقله

خدي بالك من نفسك قوي يا بنت انتي
علشان انتي مش قويه ولا حاجه انتي عامله زي البيضه قشره من بره تبان قويه لكنها ضعيفه جدا وجواها كتوت بريء صغنن


سلاااااااااااااااااااااااام
اخوكي ايهاب

ملحوظه : ايه رأيك اكتب كتاب في علم النفس انا كمان

Appy said...

معلش علشان مشغوله خالص هرد على

احمس
===
الخروف موجود بس مش لاقيه مكان ارزعه فيه وكل ما ارزعه فى حتته يا خويا العيال اصحابى يطمعوا فيه وبعدين يتعب ويسخن اعمل ايه










محمد عتلم
==========
ميرسى يا فنان بجد بس لسه عاوزة شويه توضيبات انا خلاص ضهرى اتقطم من النضيف فيها بكره هبقى اكمل

حازم سويلم said...

رغم حبى العارم للفراشات كشئ جميل لا يتلوث, الا اننى حانق عليها فى سعيها المحموم للأحتراق فى النار كأنما هو قدر لا فكاك منه, ولا مفر

شمس النهار said...

بس خاللي بالك الفراشه تفضل تطير تطير والنهايه برضه بتروح تتحرق في النار
خالللللللللي بالك

عاشقة الحب said...

للاسف دايما
النار بتحرقني

تحياتي

أميرة الجنة said...

ابى انتى واحدة حلوة قوى وعسولة قوى
مش عارفة اقولك غير كده
مدونتك ممتعة جدا
تقبلى تحياتى

يوميات نائمة في الأرياف said...

ههههههههههه
بوست حلو اوي يا ابي
بس انا عايزة اعلق على البوست بتاع الريس
يا ترى انا لو قابلت الريس هقوله اية؟؟؟؟؟؟؟؟؟؟؟؟
اكيد طبعا هتنفخ واتنطط ووشي يحمر ويخضر
واقوله بمنتهى الفخر
ازيك ياريس؟؟؟؟؟
ما هو ده اخرنا
يعني هنقول اية يعني؟
دمتي بكل خير يا ابي
رنا

بدراوى said...

أ/ ابى
أولاً اعرفك بنفسى
بدراوى مدون سابق
و قررت اعادة مدونتى للحياة
بعد ان كنت هائماً فى طرقات الفيس بوك

ديه مدونتى
ياريت حضرتك تشرفينى
فيها
http://ta3melboyout.blogspot.com/

على اساس انى مدون على باب الله
لسة بكون نفسى تدوينياَ
ههههههههههه

ابقى إسألى الصباغ باشا
زعيم المدونين و حيقولك عليا
:-))))))
-----
اما بخصوص تدوينة الفراشة
فشىء جميل
اووووووووووووى
بجد
بس مش دايماً النور بيحرق
النور ساعات بيعطى امان
بيعطى امل
بجد

تحياتى ليكى

اه و شكراً على استامباية التنبيه على التعليقات
هههههههههههههههههههههههههههه
استقبال كويس برده
هههههه

tamer.sala7 said...

يا بخته
:P

EmY said...

آبي هاصطادك انا و اعذبك و اقصقص جناحاتك علي سبيل الغلاسه و كل ما اشوفك هاعذب فراشه قدامك

التملك سخيف اوي و ما شاء الله العرب عندهم الحب يعني التملك يكتموا علي نفسك لحد ماتكرهي اليوم الاقرع الي عفتي الشخص ده فيه مع ان اساس الحب الثقه و التفاهم و دول مايتفقوش ابدا مع حب التملك و السيطره

موضوع النور ده بيحصل للكل ساعات تحسي ان راحتك و سعادتك في النور ده و اول ما تقربي يحرقك

موك مالو مش عاجبني يا ابي هانم لازم تعزميني علشان يبقي مودك حلو

مصــــري said...

آبي هانم بتنجاني

لازم المود يبقي رايق ده حتي البوست ده ولا فيه نحل ولا دبابير ولا أبو وردة.

علي فكرة البوست ده لغة أحسن ما كتبتي
بس ده مش يقلل من جمال اللغة الآبية البتنجانية الخاصة.

أما بقي عن تشبيهك بالفراشات
فدي حاجة ترجعلك
ويشرفنا اني أعرف فراشة زيك

تحياتي
أسامة

رئيس جمهوريه نفسى said...

حلو قوي النيولوك بتاع البلوج يليق بفراشة بجد فكرينى اسيب ليكى مفتاح القصر تعملي ليه نيولوك والحساب يجمع

ghorBty said...

صدقتي

وانا ايضا احبها بشده

سبحان الخالق العظيم

وانت كمان اخذتي منها الرقه

غربتي

ادم المصرى said...

تعرفى بجد ان الفراشه ليها احساس جميل ومخلوق

رومنسى جدا وحساس ورقيق

وشيئ جميل انها تكون متواجده فى الاماكن

الهادئه المليانه بلظهور والالوان

انا لما بشوفها سعات بقف اممها واتفرج على الى بتعملو

او بشوف حيتها بحس ان الابداع فى مثل ذه الاشياء شيئ جميل جدا من عظمه الخالق سبحانه وتعالى

موضوعك رقيق جداااااا

Appy said...

نضال
=========
تصدق حتى وانا بكتب البوست عمل فيه كده اى والله يبقى جوجل قافل الجمعه اكيد متخبطوش عليه تانى لو سمحتوا











واحد مش فاهم حاجه
=================

عارف مجرد متابعتك لشئ بتركيز لازم تتعلم منه الكتير

Appy said...

احمد
=======
طبعا نور ربنا مش بيأذى بس برضه ربنا اللى خلق الفراشات وهو اللى خلق فيها حب الانجذاب
نورت يا احمد







wanna b a physician
=====================
لاااااااا بلاش منه الحب ده اللى بيبقى فيه انانيه وامتلاك مش ناقصين خنقه والله الدنيا مبقتش فاضيه لكده كمان يعنى نورت يا دكتور

Appy said...

dr.lecter
==========

كائن محير بكل الوانه وتحركاته انا قعدت كتير اتابع كل حاجه عنه حتى رقتها








حدوته
========
اهلا اهلا
اممممممم تغير بقى البوست ده كلمتين نطوا فى دماغى قولت اركنهم فى اى حته كده يا حدوته ميرسى لذوقك خالص

Appy said...

رئيس جمهوريه نفسى
==================
ايه يا محمود هو انا هموت خلاص يا عينى عليه مكنتش اعرف مش كنت تقولى
وبعدين مفيش حاجه انا كويسه دى حبه برد وهعطس وهيمشوا لا تكلك










قوس قزح
=========
طبعا انا فهمتك التملك معناه ايه ليه
انا حتى حبى الكبير لحد هو فى حد ذاته تملك ملوش علاقه بالشخص يعنى مثلا لو انا حبيت اعمل حاجه وعارفه انها هتضايقه مش هعملها فبالتالى ده تملك يا اوختى وانتى عارفه انى معرفش اعيش كده افطس وابقى شهيده الخنقه
وبعدين الدبوس موجود لا تكلكي

Appy said...

mohamed ghalia
==================
ميرسىى يا محمد مش اوى يعنى
يا عبدو واحد ليمون للبيه هنا ههههههه







ميشو
========
انت ياض ابعد عنى بقصصك اللى بتكئبنى دى مش ناقصاك اصل انا عارفه انت الماده الخام للاكتئاب
وبعدين انا برضه برعى ومش هتغير

Appy said...

اخت مسلمه
==========
اهلا اهلا بيكى
شوفى سبحان الله يعنى ربنا قال كده
والناس برضه حتى فى دى بتمشى بالعكس
نورتى يا حبيبتى وميرسى لذوقك وكلامك وللايه كمان المفيده









همس الاحباب
================
طيب افهمك ازاى انت لو فهمت هتفطس منى
بص يا خالد الفراشات مبتحبش الحبس والخنقه الخرفن بتدافع عن الحريه
فاهم ولا نقول تانى ما هو لو تشغل مخيخك هتفهم
نورت يا ابو همس

Appy said...

sabrina
==========

اهلا بيكى وان شاء الله بعد شويه يا هتكرهيها اوى يا تحبيها اوى لانها مخلوق عجيب










احمد سعيد
==========
ميرسى يا احمد ربنا يكرمك

Appy said...

وومن
========
يا ما
قلبك ايه رفرف ليه مركبه له جناحات نيهاهاهاها







نورى
=========
رومانسيه يا مامى فين دى انا اممممممم طيب مش هكتب لكم حاجه كده تانى قال رومانسيه قال

Appy said...

حسن حنفى
=========
انت من جواك فراشه رقيقه اكيد









انا حر
=========
ههههههههههه بجد موتنى من الضحك بص لما تلاقى بوست زى ده اعرف ان المدونة اتنشلت ومش انا
علشان متتعبش نفسك كتير فى التفكير

Appy said...

احمد سعيد
=============
انا الشبه الوحيد اللى بيربط الاتنين يا احمد








ايوشه
=========
هى بترمز لحاجات كتير وميرسى يا حبيبتى على ذوقك

Appy said...

ابو حنف
=========
انت اتحولت وكمان بقيت اسامه فوشير
بكره حرام عليك يا ابو حنف ده حد يسمعه ده









على الصبى
==========
كانت بالفين وخمسميه وشويه كده مش عارفه دلوقتى ممكن تسال فى محطه المترو
نورت يا على

Appy said...

Lady E
==========
ميرسى يا قمر على ذوقك








سارة
========
شخصيتى مش دايما بتكون دى بس ده جانب صغنن بس يا قمر

Appy said...

الرابطه وبناء الامه
====================
ميرسى ليكوا على الهديه الجميله بس والله فيه غيرى يستحقها كتير








محمد عتلم
=============
تعيش الحريه حره مستقله وعلى ايه تتعقد يا فنان
امال البحر المتوسط والاحمر مين يتمتع بيه
يا سيدى سيبك من الكلاكيع مش تبعنا متخافش
وانت خرف براحتك البيت بيتك يا فندم

Appy said...

شمس وقمر
===========
جابوه من الانانيه المفرطهه اللى جواهم وعارفه لو واحده حاولت تفهم اللى قدامها انها مش هتتملكه وبراحته يهملها والله الانسان بقى حاجه محيره جدا









فوكس
=======
اه حكم النفس على النفس بتدى خنقه على طول وانتحار بسم فأر ربنا يستر نورت وسلامى لاينو

Appy said...

محمد الكومى
==============
اشطات بالمربات يا اسكندارنى








thunder
==============
هو انا فعلا بتكلم عن الحريه وفى نفس الوقت الحب اللى بيتملك بيخنق حريه الانسان والحريه على فكره لها حدود مش مفتوحه بحرى
موضوع مارينا انا كمان والله ردى هزار بس حته اسم ام دى مفهمتش معلش العتب على الباب بقى حكم السن
مبروك الاسم الجديد

Appy said...

اقصوصه
=========
ازيك عاش من شافك يا جميله يا رب تكونى بخير







الشنكوتى
==========
لا يا هوبه متنفعش تعمل كتاب
لان نص تحليلك اللى فكرت تحلله ليه غلط جدا نيهاهاهاها
اما حته الرقه او الضعف فصدقنى عندى عقل ومش معنى كده ان كل نور بجرى عليه انا لئيمه برضه مش برمرم
ههههههههههههههه
يعنى بختار انوار كويسه مش مجهوله النسب
وبعدين ده تحليلك ولا تحليل ام لسانين اللى عامله فيها ملك الفلك اصل اسلوبكم واحد اوعى تكون بهتت عليك
نورت يا هوبه ومتخافش على اختك

Appy said...

حازم سويلم
===========

ربنا خلقها كده بتحب النور وعاشقه للحريه العيب مش فيها العيب فى النور اللى مش بيميز حازم
نورت وعاش من شافك







شمس النهار
=============
ما هو ده الاختلاف اللى بينا انا مبطيرش انا بمشى على الارض يا شموس

Appy said...

عاشقه الحب
=============
متلعبيش بالكبريت ههههه
نورتى يا قمر









يوميات نائبه
=============
هو وحشك اوى كده يا رنا طيب اقولك ابعتى له اس ام اس ههههههههههه

Appy said...

بدراوى
==========
اهلا بيك
بس زعيم ايه هو حصل انتخابات يعنى قريب وهو خد فيها الزعامه
ولا ايه وهما المدونين فيه حاجه فيها اسمها الزعامه والبطانه
هههههههههههههه
معلش والله الكلمه موتتنى من الضحك
عموما مش مهم انى علشان اتابعك يبقى اسال حد عليك انا اتابعك علشان افكارك او مواضيعك
نورت الكوكب كله وان شاء الله تستمر







تامر صلاح
================
هو مين ده يا سوسه

Appy said...

ايمى
========
لا سياده اللواء انا هبقى كويسه مش مضايقه بلاش اعزمك دى مش ناقصه احنا اخر الشهر ههههههههه
عونيه يا قرعه بس بطلى نوم شويه بقى واطلعى من تحت اللحاف يا دبه انتى وانا اعزمك










مصرى
=======
طيب ههريكوا نحل ودبابير من هنا للصبح بكره تشوفوا ها بقى انتم اللى جبتوه لنفسكوا

Appy said...

رئيس جمهوريه نفسى
================
حسابك تقل يا ريس وبعدين ما المفتاح معايا ولا انت نسيت









ghorBty
==========
ميرسى ليكى بس مش رقه اوى يعنى

Appy said...

ادم المصرى
===========
ميرسى
بس غلبتنى يا ادم على بال ما قريت ده عبرى اللى انت كاتبه ده ابقى خلى بالك انا نظرى على قدى ههههههههه

وينكى said...

انا بحب الفراشات قوى
شكلنا هانبقى اصحاب جامدين
:)
انا بقى .. بحب النار
اه والله مش هزار
الزهرة البرتقالية اللى عبدها بعضهم وعذب بها بعضهم ومن اجلها عوقب احدهم بطائر رخ ينهش كبده كل يوم
ايه الجمال ده
ايه السر الرهيب فى الكيان اللامادى ده
باقعد اولع شمعه فى بيتى وابحلق فيها واسرح واسرح
اكتر واحد وصف مشاعر حد مفتون بالنار كان احمد خالد توفيق
بس مش فاكره فين

واحدة مفروسة said...

بؤبؤ هانم
الفراشة جميلة و كلنا بنحب الفراشات
و كلنا نفسنا نكون فراشات تحلق فى السماء
و تكون حرة طليقة
هوه ده اللى بيميز الفراشة انها تكون حره
كل واحدة فينا جواها فراشة ان اراد احد ان يتملكها و تكون اسيرة شباكه بتلاقى الفراشة اللى جواها بتموت
و تفضل طول حياتها تتمنى ان الفراشة تعود من تاني
تحياتي
بوست حلو
صحى الفراشة اللى جوايا

المحارب المتيم said...

آبى هانم

الفراشة

تعرفى ان عمر الفراشات قصير قوى بس مع ذلك بتتمتع بكل الامان وده اللى خلاها مثال على الحرية والسعادة على وجه الخصوص
انا بحب الفراشات وكنت زمان بمسكها وعرايس البحر ألعب بيها وكانت بتموت ساعات
عامة

لا بأس من قيد الحب ان كان خالصا ولا بأس من قيد الاخلاق ان كانت فاضلة ولا بأس من قيد الاعراف ان كانت صحيحة
وادام الله عليك حريتك وسعادتك

تحيتى

Founoon said...

الفراشة كائن فيه غموض لذيذ
اعتقد دا كمان احد اوجه التشابه بينكم:)

dreem said...

ابى هانم الفراشة

فى النهايه انا تلك الفراشه ولن اقبل بان اكون غيرها وفى المره القادمه ساتذكر ان النور البعيد ما هو الا خداع سوف يقوم بحرقى
فكف ايها النور عن ارسال اشاراتك لانى من الان ساكف عن العبث


منحوسه "البوست ده فضفضه فى مود ليه رايق مش اكتر


احط لك انا شوية علامات استفهام ووش بيغمز ههههههه

daktara said...

كنت بحب الفراشات زمان
بس لما بقيت بشوف الحاجة علي طبيعتها
عرفت انها دودة مستخبية في قناع فراشه
الصراحة محبش تخش الغرفة عندي علشان بتموت وبعد كام يوم الاقي دودة طالعالي
شئ مقزز


شكلها باظت
انظر حولك
د. خالد عزب

L.G. said...

أبي
أراك في موقعك تماما هنا عندما كتبت عن الفراشات وكأنك تكتبين من قلبك

عندما أرى فراشة بيضاء أشعر أن الله يكافئني على عمل حسن وأنه راض عني

ولكن على الفراشة أن تتمتع بحريتها في جماعة وليس وحدها وتحوم حول النور ولا تحترق لقد اكتسبت الخبرة بالتجربة

تحياتي

وومن said...

يعني يوم ما ربنا يكرمك وتكتبي بوست معدي من تحت شنبات برعي المفش

تطلعيلي برعي في الرد علي الكومينت

ايوة قلبي بجناحات ان كنتي انت فراشة انا عصفورة
:p
يعني براحتي بقي لا نور ولا لمض نيون ياكل معايا

بت خيخة وأي كلام said...

خدى عندك اللينك ده

وابقى اقريه يا فراشة هانم بتنجانى


http://www.55a.net/firas/arabic/?page=show_det&id=1122&select_page=13

Abo 7anf said...

مين قال انى بسمعه
دى الحته بتاعت ظرف طارق
ولقيت رومانسيه
وكلام كميل خالص
قلت اشوف اه الجديد
لكن طالما طلع دور برد
يبقى الف سلامه

maxbeta3zaman said...

معك الحق..فمبمجرد ظهور هذه الكائنات تأتى معها بهجة سحرية .. وعن الفراش كتبت يوما هذه السطور
الفراش مخلوق رقيق
موش هزار حق وحقيق
عمر ما بنسمع فراشة
ليها دوشة أو زعيق
تو ما يرفرف جناحها
فى الهوا بتطير لفوق
زى ما بتاخد رحيق
تدى لون على لون يليق
تبهج الدنيا بجمالها
واخده ليه م الضوء صديق؟؟

romansy said...

ايه دا انا فين
فى الجنه ولا ايه
الفراشات والكلام الجميل دا
انا افتكرت انى دخلت مدونه غلط ولا حاجه بس الحمد لله النمره صح
ياريت تكترتى شويه
من دا

نهر الحب said...

كثير ما اشعر انا ايضا بانى فراشة
لكنى استمر فى الطيران وانا محترقة الاجنحة
وحشتنى ياابى

!!! عارفة ... مش عارف ليه said...

ما أنت رومانسية أهووو
أمال بتنكري ليه ;)


على العموم الحمد لله أن مودك كان رايق اوووي كده علشان يطلع لنا البوست ده

دومتي مبدعة
وليد

كأنني أنا said...

"فكف ايها النور عن ارسال اشاراتك لانى من الان ساكف عن العبث"


مممممممم..

طب وهتعرفي؟

اصل دي بتبقى فطرة يعني.. للأسف

:)

مودتي

الدرعمي said...

موضوع مؤثر ، ربنا ينجي الفراشات ،، فكرتيني بآخر ديوان للراحل العظيم محمود درويش < أثر الفراشة > كان شايف نفسه فراشة .. كل عام وأنت بخير بمناسبة المولد الشريف و هوني عليك فالذي لا يدرك قيمة الفراشة ويتعلم كيفية التعامل معها خاسر .. الفراشة تحيا عمرها كله دون نقصان ولا يضرها جهل أحدهم بالتعامل معها هو الذي سيحرم أثرها الجميل ويبكي بعد فوات الأوان @ تحيتي @

الدرعمي said...

موضوع مؤثر ، ربنا ينجي الفراشات ،، فكرتيني بآخر ديوان للراحل العظيم محمود درويش < أثر الفراشة > كان شايف نفسه فراشة .. كل عام وأنت بخير بمناسبة المولد الشريف و هوني عليك فالذي لا يدرك قيمة الفراشة ويتعلم كيفية التعامل معها خاسر .. الفراشة تحيا عمرها كله دون نقصان ولا يضرها جهل أحدهم بالتعامل معها هو الذي سيحرم أثرها الجميل ويبكي بعد فوات الأوان @ تحيتي @

hasona said...

السلام عليكم

الفراشات علي أختلاف ألوانها وأشكالها
تختلف كأختلاف البشر في الطباع والافكار

Appy said...

حسونه
======
انت مين ممكن اعرف لان ملكش بروفيل ولا حاجه وميرسي لاهتمامك ومتابعتك ليه