.jfif)
.jpg)
كل سنة وانتم طيبين بمناسبة عيد الحب
و يارب دايما تكونوا فى حالة حب للخير زى ما اتعودنا معاكم
عيد الحب السنة دى عايزينه يكون مختلف
عايزين نقول الناس اللى مش بتحتفل به اننا يهمنا نكون معاهم يومها و نقولهم اننا بنحبهم
و ده هنقدر نعمله من خلال جمعية صحبة خير
اللى عاملة يوم لمشاركة الاطفال و الناس فى العشوائيات مشاعر الحب و الاهتمام و نقولهم ان كل اللى بيعملوه اد ايه مهم لهم و لنا و للبلد كلها
و تفاصيل اليوم كالاتى
12:00 - 12:30
تعريف باهداف الجمعية و نشاطها و انجازاتها
12:30 - 01:00
مسرحية الاطفال اللى كنا اعلنا عنها قبل كده و هى من تأليف اطفال اشوارع و تمثيلهم
01:00 - 02:30
مسابقات و ماتش كرة
02:30 - 03:00
استراحة
03:00 - 04:30
طيارات ورق اطفال الشوارع عملوها و هيطيروها فى الجو و دى شعار الحلم لاسطبل عنتر
يومها هتكون نقطة التجمع من الساعة 11 لحد 11:30
فى محطة الزهراء لمترو الانفاق
او عند محطة بنزين التعاون اللى عند كورنيش المعادى
و دى ارقام الناس اللى هتكون فى انتظارنا يومها
مهاب 0128068016
هالة 0106399441
على 0105393135
نفين 0105215288
ياريت نشارك فى اليوم ده بوجودنا معهم و كمان هيكون فى صندوق تبرعات للى يحب يشارك فى مساعدتهم ماديا
وكل عيد حب و انتم بخير
الميعاد السبت 14/2/2009
الميعاد السبت 14/2/2009
طبعا اللى كاتب كل اللى فوق ده قوس قزح اكيد مش انا انا معرفش اكتب الكلام بالشكل ده يعنى لازم تلاقوا حاجات واقعه وحاجات متلخبطه وكلام مش مفهوم بما انى اصلا مبكونش فاهمه
المهم اللى هيجي يدخل يقولى فى التعليقات علشان ادعيله
واللي مش هيجي يدخل برضه يقولى علشان اقرا الفاتحه للنداله :))))
انا هلعب كوره مع الاولاد واللى هيجي هيلعب معانا وهخليه يقف جون كمان عاوزين نعمل حاجه كويسه واليوم هيبقى لذيذ تخيلوا طول اليوم مع اطفال يا سلام بجد ومش اي اطفال دول محتاجين يحسوا اننا بنعاملهم كويس
انا بجد فرحانه كأنه يوم عيد علشان هلعب معاهم وهتبسط طبعا مصلحتى اولا وبما انى بيغلب عليا طابع الاطفال
فهكون مبسوطه
ملحوسه كونتوسه:- مدونه وصحفيه جميله انا شخصيا معرفهاش اسمها اسر ياسر عرفت حكايه حصلت ليها من عند استاذ احمد شقير وهى محتاجه لدعمنا لها معنويا ان شاء الله هكتب عن الموضوع على يوم الاحد من وجهه نظري بس يا ريت تشوفوا الحاله اللى وصلت لها البلد اسر دي ممكن تكون اختى وبنت زي واخت اي ولد فيكوا انطح هنا هتروح عندها
كان معكم لواء طيار اعالى السحاب والترع ابى هانم انظر حولك
حكمه الامبراطوره
لما الدنيا تديك ضهرها لف وشك وعاكسها الدنيا زي البنت الحلوه بتحب اللى يدلعها وعجبى
46 اخبط وقول رايك:
كل سنه وانتو بخير وان شاء الله فى ميزان حسناتكم وربنا يتقبل منكم موضوع اسر دة محتاج بوستات مش مجرد مشاركة بس وانا متضامن معها فى انها تكمل للاخر
اما موضوع الحكمه فا انا رديت عليها فى الفيس بؤ
طب ياريت كمان تشيرى للخبر من بلوجرز تايمز
http://bloggers-times.blogspot.com/2009/02/blog-post_11.html
وتدعوا الناس لجروب الفيس بوك
http://www.facebook.com/group.php?gid=50830678959
اسر حقها مش هيضيع .. لان اى مدونة كانت ممكن تكون مكان اسر
انا الاول بجد
طب كل سنه وانتى طيبه
تقريبا وقعت فى الخدعه مش مهم
المهم انى جيت
و يرب يوم سعيد فى الاسطبل
الله اليوم ده حيكون جميل أوى
يارب أقدؤ آجى
بالنسبة للحالة دى فا انا رايحة أشوفها حالا إن شاء الله
انا جاي اولا ابارك واهني بعيد الحب
وثانيا...اقول لسيادتك اني للأسف لن اتمكن من الحضور لظروف الشغل
وثالثا:
طلب انك ماتقريش الفاتحة على ندالتي لأنها مش ندالة والله
تحياتي
طبعا مستحيييل اكون اول تعليق ..
وعند مين أبى كمااان
طبعا مش ممكن :)
بس يارب اكون اول تعليق بجد بقه :)
المهم انا دخلت علشان اقولك انك هتقرى الفاتحه على النداله للأسف
لأنى بعيده عنكم ومقدرش اجى والله يا ابى
غصب عنى حبيبتى .. مش هرووب طبعا من يوم جمييل
ربنا يوفقكم يارب فيه
واتمنى ليكم جميعا اجمل وقت
تحيتى لكِ
السلام عليكم
بجد ربنا يجزى حضرتك ويجزى قوس قزح كل خير على المجفود الرائع ده
ويارب الحق أجيلكم بس المشكلة ان عندى شغل فى الكلية يومها من 8 الصبح لبعد الظهر بشوية
معلش بقى
على ما الزلطة اللى باقية دى تخلص
دمتى بكل خير ويلا سلام
إن شاء الله يكون يوم جميل
ألا بالمناسبه عيد الحب حيكون إمتى ؟؟؟؟
يعني تاريخه علشان مش يوم 20/2 تقريبا
تحياتي
انا شاء الله انا جى بس هيى الزهراء دى فى طريق حلوان صح اه باين كدا انا فاكر انى شفت حاجه ذى كدا ان شاء الله هاخد اى نمره وهتصل بيكو يوم السبت عشان نأكد على بعض وكمان هحاول اجيب اصحابى والى اقدر عليه ويارب يوفقنا ونقدر نسعد اطفال كنا ممكن نكون فى مكانهم والحمد لله الحمد على كل شيئ
اه سورى انا بردو عشان اكون مطمأن لحسن انا بخاف من الحفر الى ديما بقع فيها بردو دى نمرتى 0100707907 عشان نطمأن اكتر ومحدش يتوه
حلو قوى جو الحب ده فى يوم الحب
جميل اكتر مشاعركم الرقيقة دى
بجد ربنا يحفظكم
جزاك الله خيرا
فى الخير دوما ساعيين
كل سنه وانتوا طيبين ان شاء الله لو ربنا سهل هاجي
يا خساره
ولله كان نفسي اشوفكم وخاصة انها هايتجمعوا جنب البيت عندي أثناء التجمع بجانب محطة التعاون
بس الشغل مش بيرحم يا آبي
الله يا آبي فكرةجميلة أوي
ويكون في ميزان حساتكم ان شاء الله
والله فكرة كويسة جدا وهيبقى يوم حلو ان شاء الله
كنت اتمنى اكون معاكم لكن ان شاء الله اللى موجود يسد مكان الغايب
بالنسبة لأسر ياسر انا كنت سبت كومنت عند شقير وقلت ان البلد سابت بجد من ايدين الناس ومن ايدين الحكومة كمان
تحياتى
حلوة الفكرة أوى
دى طبيعة نشاط مختلفة عن المعتاد فى عيد الحب , هو بينى و بينك أكبر نشاط فى عيد الحب بيبقى لصحاب الكافيهات من كمية الترابيزات اللى بتتحجز ههههه
ربنا معاكو يا شباب
كل سنه وانت بألف خير
احلى مافيك نشاطك الدائم بتفكريني بشبابي يابنوتي الحلوه
ربنا يجعله فى ميزان حسناتكم
وموضوع اسر محتاج مشاركة وبوستات
حفاظا على اخلاقنا وتقاليدنا
تحياتى
انا انا عايزه اجي يا آبي
خديني معاكي العب كوره و اشنكل الاطفال علشان اخد الكوره و اكسب
الماتش
و طبعآ هاتجيبيلي هديه محترمه علشان الفالنتين لو مش هاتجيبي مش هاااجي
كلك حكم يا امبراطوره انتي
الله فكرة كويسة و هابي فلنتين
ابئ الجميلة
كل سنة وانت طيبة حبيبتي
كان نفسي اكون معاكم والله ومش ندالة
ان شاء الله يكون يوم حلو ليكم يارب
وموضوع آسر قريته عند أسامة عبد العال
الصراحة موضوع مؤسف
ربنا معاها يارب
شكرا حبيبتي
على فكرة الحكمة جميلة وكلها دلع
سلام
اعلنى الندالة ماهو لو المكان قرب شوية كنت من غير ندالة لكن انا فى حاجة قريبة من الحوار دا اتمنى انى اقدر انفذه انا كمان يااااااااااااااارب وعلى العموم شكلك هتقرائى الفاتحة كتير كل الكومنتات لدلوقتى مباشرة بتعاون على العموم فكرة حلوة ودعوة للحب للجميع ياااارب وبلاش يقتصر بين طرفين الدعوة مفتوحة لكل القلوب انها تحب بعض ربنا يجعلها فى ميزانكم يارب دمتى بكل ود وخير
كل سنه وانتى طيبه يا ابى
وكل عيد حب وانتى بخير
وكل سنه وانتى طيبه
وحشتينى
كل عيد حب وانت طيبه
كان نفسي اكون معاكم بس عندي حاجه مهمه جدا يومها مش هقدر الغيها
Happy valentine ;))
Very nice ideas isa yb2a fe mezan 7asntkom
ربنا يبارك فيكى ويجازيكِ كل الخير يارب بجد
ربنا يكرمكوا اجمل قلوب عرفتها
فى حياتى
وحشتينى اوى اوى
عجبتني الفكرة بجد
وهابي فالنتيم
:)
كل سنه وانتي طيبة وسعيده
ومبسوطه انك هاتلعبي كورة وتعيشي الطفوله ياستي
:)
سلام
ان شاء الله سأكون هناك
وهالعب كورة كمان
السلام عليكم ورحمة الله وبركاته
دعوة
أخي يا من رفضت سياسة مبارك عليك أن تكمل معنا الطريق حتي لا تكون دعواك دعوة إفتراء دون إثبات
دعوي مرفوعة ضد مبارك بنص ".........................."
أول جلسة
نتمني منك أخي المدون الحضور للجلسة
مع تحياتنا لك بالتوفيق
الكتيبة السياسية
كل سنة وانت بخير وكل سنة وانت في حالة حب انت وزوار مدونتك الكرام
الفكرة حلوة قوي وممتازة جدا وان شاء الله تنجح تحياتي
طب انا في الاردن اقريلي الفاتحه
كل فالانتيم وانت طيب يا باشا
وبالنسبة لي زي ما أنت عارف حضوري متوقف علي ظروف الشغل..يعني مقدرش أوعد بشكل نهائي أني جاي بس أوعد أني ححاول
بالنسبة لاسر فأنا حزين جدا علي اللي حصلها لاني قابلتها 3 مرات قبل كده وعارف قد ايه هي انسانة محترمة ومثقفة
ع العموم كلنا لازم نتضامن معاها
تحياتي
ربنا يعينكم يا اببى على الخير
بس للاسف بقا انا غير متاح حاليا للخدمة العسكرية
بجد والله الواحد نفسه يلتقى بكم بس للاسف الظروف دايما مانعانى
تحياتى وكل سنة وانتى طيبة
ربنا معاكم يا ابى هانم
وربنا يقدركم على فعل الخير دايما
السلام عليكم ورحمة الله وبركاته يا آبى
مدونتك سعيده وانا واثقه انه الهدف من الى هتعملوه السبت هدف نبيل وسامى
بس كان ممكن تعملوه فى اى يوم تانى لأن اليوم ده بدعه
ولعن الله المتشبهين بالكفره
والله الحب عندنا كل يوم
فمنماشيش مساعدتنا للمحتاجين فى اليوم ده لتخليد ذكرى حرام
ارجوا ان تكون كلماتى قد وصلت اليك
تحياتى اختى الغاليه
اختك
بنت الشمس
هههع هههع هههع هههع هههع هههع
أنا للأسف .. هتفرى عليا الفاتحة
شوفتى شوبير فى الفيديو
انا حرامى يا سامية .. أنا حرااامى .. روحى بقى قولى لخالتك ان جوز خالتك حرامى .. يا أم محمود .. انا حرامى يا ام محمود . ههههههههههههههههههههه
انا نفس القافية كدة .. بس ممكن أقول انا ندل غصب عنى
مع ان المفروض بكرة أجازة
بس فيه شغل .. بس اوعدك أستندل و أحاول آآجى
دعوة حضورإجتماع كونفرانس
الأخوة الكرام أعضاء رابطة مدونون من أجل فلسطين
تتشرف اللجنة التأسيسية للرابطة أن تدعوكم
إلي حضورإجتماعاً مصغراً على الكنفرانس
وذلك في تمام الساعة العاشرة من مساء يوم الاحد القادم 15/02/2009
وذلك على ايميل الرابطة bloggersforpalestine@yahoo.com
وذلك لمناقشة الأعمال المقترح القيام بها فى الرابطة ومناقشتها معكم
وايضا دراسة بعض الاقتراحات المقدمة من الاعضاء
وذلك من اجل النهوض برابطتنا والعمل على نشرها واستمرارها
وللأهمية يرجى الحضور وعدم التغيب
الامين العام للرابطة
من أمير الطغاة الملك القائد المظفر الطاغية السكايار إلى الامبراطورة المعظمة صاحبة الكوكب البتنجاني
يارب أحوالكم تمام
بجد بيسعدني جداً مروري على مدونتك وفاتيما وقوس قزح وخيخة والجروب الجميل بتاعكم وكلامكم عن التجميعات والتبرعات والاعمال الجميلة اللي بتعملوها - ما أقصدش أعمال شعوذة والله لكن أعمال الخير دي - وكفاية انكم تدخلوا السرور على قلوب الناس .... وعلى رأي أحد المدونات وهي بتقول حد هيقوللي الفلانتين بدعة والتاني هيقول مش بحتفل بيه والتالت مش عارف ايه ... مش مجال اني اتكلم ف حاجات من دي ... بس اللي بجد لافت انتباهي هو حبكم لفعل الخير ده وانتهازكم لكل فرصة علشان تساعدوا الناس وتدخلوا على قلوبهم الفرحة والسرور
ربنا يجزيكم خير بجد على كل ده ويارب يوفقكم ويباركلكم ف حياتكم قااادر يا كريييم
خمسة دعاوي شحاته بقى
إلهي ما تنضااامي أبداً
إلهي يقعدلك ف عافيتك وف حبايبك يا اختي يااارب ههههه
بالمناسبة لو عرفتي يعني إيه تنضامي دي ابقي عرفيني حضرتك
وعن موضوع أختنا المدونة آسر .... بجد أنا مش عارف الموضوع ده انتشر كده ازاي ف مصر.... للأسف انا مش موجود على أرض الواقع لإني خارج مصر ... لكن بقيت بحس برعب وخوف وقلق على بناتنا واخواتنا ... ومش عارف الموضوع ده بقى حالة عامة وعادية ولا ايه .. يعني هل تطورت المعاكسة فعلاً من رمي كلام وانت يا جميييل ياللي معدي ... لمسك ايدين وتحرش بالطريقة دي؟؟؟
ربنا يحفظكم بجد ... قالتهالي خطيبتي مرة انت مجربتش تكون بنت وتمشي ف الشارع او تركب مواصلات ... بجد ربنا يحفظكم ويارب يهدي شبابنا كلهم
آسف ع الاطالة بجد ... تحياتي على الروح الايجابية
هوا انتو كل مره تروحو من غيرى ؟
ينفع كده يابتنجانى ؟؟؟؟
إزيك يا جميل
على الله تكون قضيته يوم حلو
معلش أنا عايزة أطلب منك حاجة ...أنا نفسى أعرف رأيك فى بوستى الجديد
أنا آسفة معلش :)
ربنا يوفقكم للخير دايما
خبير نفسي يرجع السبب للوازع الديني عند المصريين
الحكومة المصرية: 89% من الشعب سعداء وراضون عن معيشتهم
كلمة "الرضا" مفتاح السر
13% لا يؤيدون الحروب
القاهرة - منى مدكور
أظهرت دراسة حكومية مصرية صدرت مؤخرا أن 89% من المصريين سعداء، رغم كافة الظروف المحيطة بهم، وأنهم يشعرون بالرضا التام عن أوضاعهم الاقتصادية، غير أن خبيرا نفسيا قلل من أهمية هذه النتائج المفاجئة، مرجعا إياها إلى سيطرة الوازع الديني على حياة المصريين، وتبسيطهم التقليدي للحياة اليومية، واعتبارهم أن الإجابة بغير مشاعر الرضا، والكلمات المأثورة مثل "مستورة والحمد لله" يخرج عن مقتضيات الإيمان.
وشملت الدراسة، التي قام بها مركز المعلومات ودعم اتخاذ القرار في مجلس الوزراء، عينة من 3000 مصري من مختلف الطبقات الاجتماعية والفئات العمرية، وهي تهدف إلى التعرف بأسلوب علمي على منظومة القيم التي تحكم الشعب المصري، وتشكل وجدانه، ومقارنتها بالمجتمعات الأخرى.
كما استهدفت رصد المتغيرات التي تحدث في معتقدات ودوافع المصريين؛ مما يسهم في فهم أفضل للمنظومة الفكرية والقيمية للمصريين، ويساعد على تحقيق قدر أكبر من التوافق المجتمعي حول السياسات العامة.
بالإضافة إلى التعرف على التفاوتات في اتجاهات المجتمع، حسب العمر والنوع ومحل الإقامة والحالة التعليمية والحالة الاقتصادية؛ مما يساعد على صياغة رسائل مناسبة لشرائح المجتمع المختلفة، كما تقول مقدمة الدراسة التي حصلت "العربية.نت" على نسخة منها .
وأكدت الدراسة أن 89% من المصريين يشعرون بالسعادة والرضا التام بين الفئات التعليمية الحاصلة على تعليم جامعي أو أعلى، وأن 87% من الإناث لديهن شعور بالسعادة، وهذه السعادة جاءت مقترنة بالرضا عن الوضع الاقتصادي للأسرة، في حين أشار 94% من المصريين رجالا وإناثا إلى أهمية الدين البالغة في حياتهم بين مختلف الفئات العمرية.
كلمة "الرضا" مفتاح السر
وحول ارتفاع نسبة المصريين السعداء على الرغم من أوضاعهم الاقتصادية الصعبة، قال د.محمد يحيى الرخاوي استشاري الطب النفسي، إنه رقم غريب بالفعل لا يمكن تفسير دوافعه إلا إذا ما استطعنا من البداية تعريف كلمة السعادة.
وأضاف ما يسعدني قد لا يسعد الآخرين، والسعادة في حد ذاتها ليست مقترنة بالمال والوضع الاقتصادي فقط، بل هي جملة من التوازنات النفسية والاقتصادية والاجتماعية تعطي للإنسان الشعور بالراحة، ومن ثم البهجة أو الإحساس بالسعادة.
ويستطرد بأن "كلمة الرضا هنا ، قد تكون هي مفتاح السر في هذا الرقم ، ولكن الرضا مختلف تماما عن السعادة ،خاصة أن الرضا في مجتمعاتنا الشرقية أو المصرية مرتبط بالدين والعلاقة بالله سبحانه وتعالي، فمن يقول إنه غير راض، قد يكفره الناس، أو حتى يكفر نفسه؛ لأنه لم يقنع بنعمة الله، وبالتالي حالة الرضا او التعايش تنبع عند معظم المصريين من وازع ديني في المقام الأول، فإذا سئلوا عن أحوالهم أجابوا "مستورة والحمد لله".
ويشير الرخاوي إلى أنه من المهم أن ندرك أيضا أن ارتفاع معدلات الجرائم ليست دليلا أبدا على تدهور اقتصادي، خاصة أن أصحاب العينة أكدوا أنهم راضون عن أوضاعهم الاقتصادية، فالجرائم المجتمعية تحديدا لها علاقة بالكثير من العوامل التي قد يكون الوضع الاقتصادي أحد دوافعها، ولكن يجب الإشارة إلى أن الجريمة تحدث في كل مكان، وفي الدول الغنية أكثر من الفقيرة.
ولفت د.يحيي الرخاوي النظر إلى أن العينة التي أخذت منها الدراسة قد تكون شريحة كبيرة منها لاقت طفرات كبيرة بالفعل في حياتها خلال الثلاث والأربع سنوات الأخيرة، وهي السنوات التي عاش فيها كثير من الناس طفرات معيشية، والبعض الآخر حدثت له انتكاسات، لكن نسبة كبيرة من الناس أصبحت شاهدة على تغيرات تحدث للأفضل في المجتمع أو على المستوى الاقتصادي .
شملت الدراسة الفئات العمرية من 18 سنة فما فوق، واحتوت على أسئلة متعلقة بالهوية القومية والدينية من خلال مدى الفخر بالجنسية المصرية وأهمية الدين في حياة الفرد.
13% لا يؤيدون الحروب
وأشارت النتائج إلى أن نسبة الفخر بالجنسية المصرية ترتفع في الريف وبين كبار السن، وأن 87% من المصريين وافقوا على دخول حرب من أجل الدفاع عن الوطن، .وهذه النسبة متساوية في كل من الريف والمدن.
وهو ما فسره الرخاوي لـ"العربية.نت" حينما سئل عما إذا كانت نسبة 87% فقط من المصريين التي تؤيد دخول الحرب لأجل الدفاع عن الوطن تمثل خللا معينا، فأجاب "ليس معناه أن النسبة الباقية موافقة على ضياع حق من حقوق مصر، أو متهمة بعدم الولاء أو الوطنية، فالفكرة هنا تنبع من رؤية البعض للطريقة الفاعلة في استرجاع الحقوق، على اعتبار أن كثيرا من الناس تراها في الحروب، في حين ترى نسبة أقل أن هناك بدائل أخرى غير عسكرية تجنبنا ويلات الحروب وضحاياها.
وأضاف أن الحروب العسكرية تكون سهلة للغاية عند الشعوب ذات الطبيعة الانتحارية، التي ليس عندها رغبة في الحياة بقدر رغبتها في الموت.
وأكد 62% من المصريين أن لديهم اهتمامات سياسية، النسبة الأكبر من للحاصلين على التعليم الجامعي وما أعلى، خاصة من فئة الذكور والمقيمين في المدن.
كما أشارت الدراسة أيضا إلى أن 48 % من المصريين يرون أن حماية البيئة يجب أن تُعطَى الأولوية حتى لو أدى ذلك إلى تقليل النمو الاقتصادي وخسارة بعض فرص العمل .
فيما وافق 16% فقط من المصريين من ذوي التعليم الجامعي أو أعلى على أن وجود المرأة في المنزل يرضيها كعملها في الخارج، حيث اعتبرت هذه الفئة أن عمل المرأة خارج المنزل له أهميته، ولا يمكن مقارنته بدورها المحصور في المنزل كربة منزل فقط .
تجدر الإشارة إلى أن الدراسة، والتي تحمل اسم "مسح القيم العالمية مصر 2008 " تم تطبيق مفرداتها في العديد من دول العالم؛ منها فرنسا، وبريطانيا، وهولندا، وإيطاليا، وألمانيا، وإسبانيا، وتركيا، وإيران، واليابان، والهند، والصين.
http://www.alarabiya.net/articles/2009/02/12/66309.html
كل الناس الحلوين اللى علقوا
انا مقرتش الفاتحه للنداله بس انا تقريبا خلصت عليكوا جزء عم وداخله على اللى بعده
يالا لو شوفت حد فيكوا بيتكلم هعلقه من ودناته
الاخت اسماء بنت جمعه بنت شمس
تشكر يا كبير نردهالك فى الافراح طيب انا جبت سيره اللى انتى بتقوليه ده اولا الجمعيه هى اللى عماله اليوم وبعدين ولا اتشبهت ولا اتكعبلت فى حاجه
ايه المشكله انى اعبر للولاد عن حبى ليهم هو حد شافنى لابسه فستان احمر وشايله دبدوب على قلبى
وعموما تشكر برضه يا كبير نورتى
محمد عتلم
==========
لا فى مصر عندهم لاسع دينى
اسكت خلينى ساكته والنبى ده كل واحد عنده كتاب لا يتعدى الخمسين صفحه بقى مفتى وبيقول حكم ومواعظ وهيمشوا الكون
وكل حد يقولك دى بدعه وكل بدعه ضلاله
انا ارد وانا عاوزة اروح النار محدش له فيه
هما عندهم رضا اه بس رضا بالهبل اللى طالهم والعته وركنه الدماغ
محمد بطل تحرق دمى بدل ما ابعت تاخد 21 حقنه ومش هضمن بعدها تبقى اليف ولا لا
كل لناس اللى قالت كل سنه وانا طيبه
وانتم كمان طيبين وفى حب وخير
غرام
=====
ميرسى يا حبيبتى ليكى بجد
Post a Comment