ماذا لو...؟؟ وشباب المارينز



من يومين كنت قاعده مع اصحابى المارينز وواضح ان الحجه كانت داعيه عليا فى ساعه صفا ربنا يكرمها ... والمارينز لا سمح الله غير المارينز اللى فى الجيش الامريكى استغفر الله العظيم اللهم احفظنا
ولكنه ما يطلقه علينا المجتمع

اي فى تعريف آبى الصحاح اللى بيروحوا مارينا بالبلدي كده اي نعم فقد اطلق علينا المجتمع الراس بري والجمصي نسبه الى جمصه وراس البر الشباب المارينز فانا من هؤلاء الشباب الذي يذهبون هناك ولكن طموحنا مبقاش يقف عند دخول مارينا فقط
ولكن التمسح بطوب سور لسان الوزراء فقط لكي ننول الشرف السامي الشامي وليس الدخول اليه فانا رضى عني الله وتمسحت بكام طوبه من جناين قصور لسان الوزراء فى مارينا اي نعم ولا اطمع فى اكثر من ذالك بطاطا البطه وكلا وحاشا واتمسك بالماشه فنحن نحقد الان .....الموضوع تطور بداخلننا واصبحنا نحقد على الشباب الوزاري اى من يملك الدخول لهذا الشاطئ ومتحقدوش على القصور كفايه حقدنا احنا لانه شكله هيولع باللى فيه

مع ان فى راي لا يختلف كثير عن ترعه ام جالمبو نايم على جمبه اللى فى اي قريه بس طيش شباب تقولوا ايه بقى .


وطبعا الكل واخد فكره عن شباب المارينز انهم لا يفكرون وهذا بعيد كل البعد عن الحقيقه العاريه
لاننا نفكر ونفكر واخذ يفكر ويفكر اي نعم فييا حضرات نحن نفكر ما هو نوع المايوه الذي سنقوم بارتدائه الصيف القادم ويبدأ التسابق والتنافس على الجيم لتدعيم التراي والباي مثل دعم غزه بل حفظكم الله افزع من ذلك وتلك
والبنوتات المارينز يتميزون بحفظ كل البراننيمز فى العالم وما هو الجديد فى عالم الموضه .. بنشقى صحيح

الا يدعوكم هذا للكف ورفع ايديكم والحقد والكره عن اتهام الشباب المارينز انهم لا يفكرون
اعلم انكم مغرضون معرضون كما المعارضه الطائشه التى تمتلكها مصر ام الدنيا سابقا وكسه الدنيا حاليا

فقد اثبت الشباب المارينز انهم يفكرون بقوه الاسد ودهاء الثعلب وفرار الارنب ودلع السلحفاه الممله اي نعم وهذا اثبته لى احد الاصدقاء عندما فاجأنى بسؤال خبيث من نوع العيار الثقيل او بالاصح كما قذيفه من كلاشينكوف موجهه

وكان هذا دفاعا عن كينونتهم المارينزيه المتاصله بانهم عديمي التفكير وكل همهم التيك واي والتفكير كيف سنسهر ونتريب اي نقوم بتربايه فى الصيف وخاصه انه قادم على الابواب وجميعا نكون فى حاله انشكاح غريب من حبنا المستميت للصيف والدفاع عنه هو والربيع ..احم احم
انا هذه الشخصيه التى تعشق الصيف بكل جوارجي وجوارح الجيران

عندما سرحت فى الربيع وعندما بدأت فى اخد بعض القرارات الصعبه فى قص شعري كاريه ام ديجراديه
ومن عليه الدور فى ازاحه وجهي عنه لانه استنفذ كل محاولاته معي انه يثبت على حاجه فاقوم انا بتاخذ قرار بالبعد بالا راجعه سواء بنت او ولد
وهنا يغنى لى اصحابى الدور الدور ملعونه ياللى عليكي الدور

وفجاه نط زي الفار المسلوخ وخبط على الترابيزه امامى وقالى عاوز اسالك سؤال باسم العروبه والاخوه

ومن الخرعه والفزعه اللى انا فيها قولت له ربنا يلعنك انت والعروبه وشارع العروبه والاخوه اللى هتقطع الخلف عندي دي

قال لى وهو واثق من نفسه ومستلذ من رد فعلى كانه صلاح نصر عندما كان يعذب احد ضحاياه

هتقولى ايه للريس لو قدر لكى وقابلتيه؟؟؟؟؟؟

وهنا وشي جاب كل الالوان مثل يوم عاصف فى امشير بزعابيبه

وجاوبت بكل ثقه هشرح له حال مصر ....

وكان مجهز اجابته كما ينقض الاسد على غزاله لا حول لها ولا قوه

قالى لا ازاي هتكلميه وازاي هتقولى له كل اللى عاوزه تقوليه وتكسبى الجوله فى صالحك
وهنا تلعثم لسانى تحت سنانى اه يا لسانى وقولت له هكلمه ازاي زي ما بكلمك طبعا

قالى عارفه ان فيه عظماء فى التاريخ كأمثال احمد عرابى ضيعوا قيمه القضيه اللى بيأمنوا بيها علشان الطريقه الفجه اللى كلم بيها الخديوي وكانت اخرته بيشرب شاي فى جزيره بعيده

وهنا تلعثمت وصفرت الاشارات وودانى طلعت نار وبقيت شبه قطر سكه حديد بيكحكح وفتحت نص عين والعين التانيه دخل فيها تراب شرير قفلها

وقولت له بكل برائه فجه يعنى ايه
وانفرط من الضحك كما رمان البلى بتاع عربيه مقطوره محمله زلط وقالى نسيت انى بكلم طفله هو وكل الموجودين ومش فاهمه ليه عالم غريبه غربنه

رد وقالى :....يعنى الطريقه اللى مش كويسه

واكتشفت انه شاب مارينز مثقف جامد اخر حاجه:))) وكان اعظم اكتشاف على مر التاريخ والشرف ليه انه يكون على ايدي

قالى اوفر عليكي غمضى عينك وتخيلى انى انا الريس وابدئي اتكلمى واعرضى عليه
وعجبتنى اللعبه اوي وعملتها اول ما غمضت وتخيلت اتفزعت مش لا سمح الله من شكل الريس محدش يفهمنى صح من فضلكم

ولكن من هول الموقف فعلا والمقارنه الجباره بين صديقى المارينز والريس
قولت له بصوت حنين كما شهرزاد امام مسرور السياف وامام شهريار
سيبنى لبكره الله يخليك

عزيزي الفيكون والفيكونه
==================
غمضوا عنيكوا وتخيلوا فعلا الريس قدامكوا هتتكلموا ازاي معاه وهتقولوا له ايه
الموضوع مهم جدا ماذا لو قابلت السيد الرئيس هتقوله ايه وهتتطلب منه ايه ولاحظ انك بتكلم الريس مش ابى هانم بتنجانى مع انى مقلش قيمه عنه احم احم احم
عاوزه كمان طريقه تقديم الموضوع يعنى محدش يدخل يقلى الطلب بس تخيل انه قدامك الطريقه اللى هتكلمه بيها بالظبط اكتبها

محدش يقولى انتى اتجننتى فمن يعلم من الممكن والجايز انك تقابل الريس
منكن يعنى فى مؤتمر فى مارينا
ومنكن اوي وده اللى اضمنه فى ابو زعبل او طره لما يكون بيفتح فرع جديد للمجانين المهابيش شباب المارينز هناك ونكون احدي النزلاء عادي بتحصل فى احسن وافضل العائلات محدش احسن من العظماء اللي دخلوا المعتقل من اوسع الابواب واضيقها ايضا

والمطلوب منكم جميعا الدخول بلا خوف ولا رهبه ولا تخبيط ركب ولا طرقعه سنان فى بعضيتها ولا تغطيه القفا خوفا من اي قلم طائش من هنا او هناك

ان تقول بكل جرأه كيف وما الذي تقوله عندما تقابل الريس مباشره
ومن هذا المزنق ليه كام طلب بعد الاجابه واحد ليكم هقوله فى الاخر وواحد مقدم عليه اتنين دمغه وواحد شاي لزوم تفتيح المخ وتقفيل الجيوب

اطالب القلم السياسى او حتى الاستيكه السياسيه او لو تطوروا يبقى الكيبورد السياسي ولو اتلغي يبقى قمل الدوله مباشره او المستخبارات انا الموقعه ادناه

اطالب بمقابله السيد الرئيس اي نعم وانا بكامل قوايا العقليه مش اوي يعنى
لانى اشك انى فى لحظه كتابتى للبوست ده انى عند عقل اصلا
وبما ان لقبى ابى هانم بتنجانى يبقى معليش حرج ولا مرج ده على اساس انهم كما يزعم المغرضون بيقروا اصلا المدونات يعنى وانا عارفه ان دي اوشاعه مغرضه هما مش فاضين اساسا لنا
طبعا ده عشم ام الخلول فى انها تعيش فى الميه الحلوه مش الملحه

الطلب التانى ليكم انتم يا شوباب

يا ريت تجهزوا البانرات بعد البوست ده وطالبوا مقدما بالافراج عنى وتغير الفكره من ان شباب المارينز انه بيفكر الى انه بيهبل وملوش فى الملوخيه ولا الباميه وانه شباب باميجى وكوفتجي مع مرتبه الشرف وتمسكوا برايكم فى الشباب المارينز لاخر شاب
والمطالبه بانهم لازم يفرجوا عنى ويعتبرونى عيله وغلطت وصاحبه خرفان بمبى يبقى حقى الدستوري انهم يفرجوا عنى ويعاملونى معامله الاطفال وهنيالك يا فاعل الخير

كان معكم ابى هانم بتنجانى لواء اركان حرب مستشفى العباسيه قسم الحالات المستعصيه سابقا وشهيده المارينز حاليا الله يخرب بيتك ياللى فى بالى

حكمه الامبراطوره

اذا فقدت المرأه شعرها فلا حرج على عقلها

92 اخبط وقول رايك:

قوس قزح said...

هههههههههههه
هجهز البانر و اجى اجاوب

لا استنى بهرج

انا لو قبلت الريس مش هساله حاجة
انا بس هطلب منه يجى معايا يشوف اللى شوفناه يوم السبت
و فى الاخر هو و ضميره
و لو ضميره ساب الحال كما هو عليه يبقى مهما قلت و وصفت و سالت هيكون مفيش فايدة من كلامى


عجبنى المثل و مصدقاه هههههههههههههه

رئيس جمهوريه نفسى said...

بما انى رئيس جمهورية والروساء بتكون جلساتهم مغلقة بعيد عن عامة الشعب والصحفيين فا انا مش حصرح بحاجه الا في موتمر صحفى

الجواز و سنينه said...

اول تعليق هالف و ارجع افنكش معاكى

Foxology said...

ههههههههههههههههههه

قاعد مع الريس حتة واحدة ؟؟؟

الحقيقة مش هقول حاجة لأنى مش متخيل الموقف اساسا

انا هبتدى اعمل البانرز من بكرة :))

تحياتى :)

نهر الحب said...

يا ابى هانم
ربنا يديكى الصحة كل دا موضوع
طيب هكلم وارجع لسعادتك تانى

أحمد الحيدر said...

حابين نمسي ونعبر عن تذوقنا لطعم المدونة الجميل ..

ولو للحظة كنت حضيع بس الحمد لله اللهجة المصرية جميلة وأصدقائي المصريين كثار يعينوني :))


إلى الأمام دائما ..

سمكه واحده said...

اقولك عارفه الفيلم بتاع محمد سعد
)يوسف خوري)
لما كتب علي السبوره فاكره لما اتنرفز كتب ايه
بدل ما يكتب يوسف خوري كتب ايه؟
يخربيت اللي جابه ابو ابوك
ده مش انا هه هه مش انا

والله ربنا يهد القوي ويصلح حال المسلمين

ايوشة said...

ههههههههه بصراحة مش عايزة اقابله علشان مش هعرف ااقول ايه كل الغل والحقد اللى جوا البر وهوا اللى هيتكلم

احمد سعيد said...

ابى هانم فحلقى ذات الخروف البمبى
اما بعد
حيث انه حال كونك مارينزيه من مجتمع مارينزى
وكونكم تحقدون على الطبقه الوزارتيه اللسانيه
وبم ان الجمصيون والبلطيميون والراسبريون
دا غير الراسقدميات
بم انهم يحقدون عليكم ايما حقد

فانا بدورى من هذا المزنق
اعلنها قويه صريييييحه مجلجله
على اعتبار انى لا اصيف مطلقا
فانى احقد على المجتمع الراسبرى والبلطيمى اياه

ام انتوا بقى
هشق هدومى فى ليله عتمه وانكش شعرى وادعى عليكم

EmY said...

انا من موقعي هذا اطالب بالاعدام نفخ لابي هانم بتنجاني
لانها عايزه تعكر مزاج الريس

و من موقعي هذا ارددها عالية مدوية
اخترناك و بايعناك و احنا معااااك ياريس

ايه يا ابي الاغنيه دي بس كأبتيني و انا مش ناقصه

ممكن اجيب المايو و اجي معاكي بس هاتيلي عوامه علي قدي

انا يا ستي هاعمل زي داليا هاخده افرجه و اسمعه الناس الي مش لاقيه تاكل ولا لاقيا دوا و عايشين 10 في اوضه واحده

و هو يتصرف بقي

و طبعا هانام علي بورش واحد يا ابي و نستقبل التوست و المربي

ايوشة said...

هوا تعليقى مش بيظهر ليييييييييييييه

مواطن مصري said...

هههههههههههههه يا صباح الدماغ العالية


اطالب بمقابله السيد الرئيس اي نعم وانا بكامل قوايا العقليه مش اوي يعنى



يبقى استنى لما الزمالك يفوز الاول ب الدوري او ياخد الكأس و بعد كدة هيقابلك


اولا لو جاتلي الفرصة هتكلم معاة بكل ادب و احترام و ليس طريقة الاخوانجية او الناصرجية مع الاحترام

و احاول ان اشرح لة الموقف دون تجميل و استمع الية ايضا باحترام

و خليني اقولك بصراحة ل الاسف المعارضة في مصر أصبحت زعيق و خناق و رفع جزم
و لا تقدم اي برامج ولا حلول

و محدش عاوز يسمع لبعض لا المعارضة عاوز تقعد مع الحكومة ولا الحكومة عرفة تتكلم مع المعارضة


المهم الحوار المحترم و النقد البناء

و تقديم برامج و حلول و مصر اولاً

مواطن مصري said...

و ايضا حسني مبارك عشان ربنا اكيد عمل حاجات كويسة تحسب لمصر


مش رسول ولا ملائك و اكيد حياتة كلها مش خطا

لكل رئيس الايجابيات و السلبيات

زي ما الثورة ظلمت جلالة الملك فاروق الله يرحمة و التاريخ اثبت ان جلالة الملك رجل وطني و كان يكرة الانجليز و كان يحاول ان يفعل شىء

احمد سعيد said...

محتاره تقصيه كاريه ولا دي...ايه؟؟؟
ديجراديه؟؟؟

اقولك

اعمليه موظمبليط

Appy said...

ههههههههههههه والله موتنى من الضحك انا مبهزرش الله انا بتكلم بجد مش اوي يعنى
هرد عليكم بكره

بس احمد يا سعيد
الديجراديه
جاي من التدريج اي زي السلالم ده موضوع طويل
بس انا فى النهايه قصيته كاريه طويل شويه
المزمبليطه دي تسريحه او شكل للشعر وبيكون غريب من ايام الابيض والاسود كده
هبقى اديلك كورس وافتح حلاق حريمى
وبعدين انتم ماخدتوش بالكم
انا كاتبه اذا فقدت المراه شعرها فلا حرج على عقلها وانا بالفعل قصيته يعنى مش عليه حرج

مواطن مصري هو ده اللى عاوزاه الطريقه ازاي وكل حد له طريقه والتاريخ اثبت ان الطرق والكلام بيفرق فى تلقى المعلومه والاستجابه لها
برافو عليك
بكره ارد عليكم واحد واحد

احمد سعيد said...

افادكم الله ياختى
منكن نستفيد
فعلا
ليس على ابى حرج

اسماء عوني said...

احم احم
حلوه اوي حوار المارينز بتوع مارينا ده
ههههه
بصي انا لو قابلت الريس
وماعرفش هاقابله فين اصلا
بس لو حصل وقابلته
هاقوله
احم احم
بص يا ريس
من الاخر كده عشان ماحورش عليك البلد بقت وحشه اوي ومصر بقت زحمه لازم تشوف حل يا ريس ماينفعش كده
تؤ الله
ماينفعش كده ياخي
ده انا حتي بحبك

A.SAMIR said...

مش هتكلم معاه كتير بس هسأله سؤال
هو انت ليه مش بتتنكر وتنزل تتفرج ع البلد على الطبيعة من غير حراسات وموتسيكلات
ساعتها قرارات كتير قوي وسياسات هتتغير

dr.Roufy said...

مممم
الحقيقة لوقابلت الريس
هاعمل كما افتي البحبحاني
بالاستعاذة..ثم اسباغ الوضوء
ولو اي حد واقف على شمالك تف عليه تلات مرات
والله اعلم
:))
ابقى حطيني في البانر معاكي بقى يا اختي

الربان said...

تحياتي

الحقيقة انا مجهز البانر من فترة طويلة.....ههههه.

من مارينا في الشمال الي العروبة....
و ما بينهما من اماكن قد تكون منسية
او غير موجودة اصلا علي خريطة التنمية.

بالنسبة لمارينا...اقول انهم ليس بالضرورة شباب مارينزي...اي دلوعه
وخرعيين....هناك منهم من تظاهروا بالجامعة الامريكية و منهم من ارتدت الحجاب...و منهم من تظاهرت امام السفارة الاسرائيلية بالقاهرة و تم اعتقالهن لفترة ثم اطلق سراحهن....

التعاطي مع مشاكل الوطن هم للجميع سواء كان مارينزي او سدراوي...نسبة الي رأس سدر او حتي نيلاوي نسبة الي نهر النيل...وهو اقصي ما يتمناه المرء مثلي من ان يجد فسحة من الوقت للمشي
علي ضفاف النيل او الاستمتاع بركوب فلوكه بالنهر...

لو قابلت الريس ...اذا قدر لي ان اقابله سوف اقول له الاتي:

1- نحن ابناء مصر المحروسة نقدر لك جهدك
و عملك الدؤوب....لحماية الوطن و المواطنين....و لكننا نريد المزيد ..

2- ارجوك.....ادفع بالشباب الي المواقع
القيادية و الرئاسية....نريد ان نري رئيسا لمجلس الشعب و اخر للشوري من الشباب المثقف الواعي..... لا نريد ان تفرض علينا وجوها بعينها عشرات السنين
و كأن مصر اصبحت عقيمة لا تنجب عظماء او نجباء...

3- ارجوك....انظر الي شباب الخريجيين الذين هم امل مصر و فلذة كبدها...يسر
لهم البدء بالعمل الخاص يكل منهم...فمن يريد منهم افتتاح مشروع خاص به...فلا تطلبوا منه تأمينات اجتماعية ولا ضرائب...و لا اوراق ثبوتية تعجيزية...تعوق المشروع و تجعل
الشباب تيأس و تفكر في الهجرة...اعينوهم علي ان يتحولوا الي طاقة منتجة مبتكرة....

4- ارجوك.... المزيد من الحريات حتي لا يتجه الشباب الي فكر اخر لجماعات او مجموعات خارج نطاق القانون.... لابد ان يمارس الشباب العمل السياسي من خلال
الاحزاب الشرعية الموجودة...و ان يتنافس من خلال افكاره و برامجه... بعيدا عن سطوة الامن...و عن تجريم الفكر.

5- ارجوك.... لنبدأ بمشروع قومي واحد
تلتف حوله الامه... و تضحي من اجله..
بشرط ان يشعر الناس بمردود ايجابي لهذا
المشروع.... و لنقل مثلا التعليم...لانه
قاطرة التنمية.... نبدأ به و نكرث معظم مواردنا خلال 5 سنوات للنهوض بالتعليم..... ثم الصحة... و هكذا..
اما ما يحدث الان من تشتيت للموارد في
نواحي صرف مختلفه...و لم يشهد المواطن البسيط اي مردود ايجابي فهو في رأيي
المتواضع غير فعال....

اسأل الله ان يوفق الجميع الي ما يحب و يرضي...و ان يلهمنا الصواب و الرشاد.

تحياتي و تقديري

واحدة مفروسة said...

انتى صحيح بتنجاني
انا لو قابلت الريس لازم اكون على سنجة 10 و حاطة بارفان آخر صيحة
اما اقوله ايه ديه
خليها لما اروح اجيب لبس جديد
لأأحسن يكون الموضوع بجد و نقابله

اما عن الشباب اللى بيصيف فى مارينا
فانا مش حتكلم عنه و لا حتكلم على لسان الوزراء
و لا حتكلم على منطقة نادي السيارات
و لا حتكلم على مارينا الجديدة و لا فينيسيا
ولا حتكلم على بورتو مارينا
وده مش لأني بحقد طبعا
لأ
ولكن لاني من رواد مارينا من ايام لما كانت لسه بخيرها
اما دلوقتي حالها كحال كل شيء

انا حروح الحق الاوكازيون و ارجع

احمد سعيد said...

اقولك
انا لو قابلته؟؟؟؟
اناعارف انا هعمل ايه ساعتها كويس
هههههههههههههه

Appy said...

قوس قزح
=============
يا سلام ياختى هى دى طموحك هتأخديه من ايده وتقولى له تعالا يا كابتن نروح تتفرج ايه العيال دى
وبعدين يا فاشل يا فاشل هى مشاكل مصر محصورة فى العشوائيات بس
ما ممكن تقترحى عليه مصنع كبير فى مكان او ينقلهم الصحرا مدن جديده بس ساعتها اضمنى بقى انتى له الناس انها توافق فيهم اللى هيوافق وفيهم اللى هيبلطج
امممممممم
انتى سقطتى مش هتيجى معايا المقابله
روحى قشرى بطاطس
المثل اكيد يعنى انتى اول واحده لازم تصدقه نيهاهاهاها











رئيس جمهوريه نفسى
==================
خد ياض انت بتهرب طيب لو مجاوبتش هعلقك من ودناتك الخرفان تنطح فيك يا حافى القدمين يا عفيفى

Appy said...

قوس قزح
=============
يا سلام ياختى هى دى طموحك هتأخديه من ايده وتقولى له تعالا يا كابتن نروح تتفرج ايه العيال دى
وبعدين يا فاشل يا فاشل هى مشاكل مصر محصورة فى العشوائيات بس
ما ممكن تقترحى عليه مصنع كبير فى مكان او ينقلهم الصحرا مدن جديده بس ساعتها اضمنى بقى انتى له الناس انها توافق فيهم اللى هيوافق وفيهم اللى هيبلطج
امممممممم
انتى سقطتى مش هتيجى معايا المقابله
روحى قشرى بطاطس
المثل اكيد يعنى انتى اول واحده لازم تصدقه نيهاهاهاها











رئيس جمهوريه نفسى
==================
خد ياض انت بتهرب طيب لو مجاوبتش هعلقك من ودناتك الخرفان تنطح فيك يا حافى القدمين يا عفيفى

Appy said...

الجواز وسنينه
===============
ايه يا حبيبتى هما قبضوا عليكى ولا ايه يالا والله كنتى طيبه معلش











فوكس
=======
ليه كده ما انا قولت لك الحالات يا عم تخيل انتم بتحفوا تتخيلوا
طيب مش واخداكم معايا ها بقى
بقولك ايه راعى فى البانر ان يكون شكلى حلو ها مش عاوزين فضايح

Appy said...

احوال الهوى
===========
عندكم شاى بفتله








نهر الحب
=========
محسسانى انك بتقرى فى مارثون فيه ايه يا ننوسه بس خدى نفسك وتعالى

Appy said...

احمد الحيدر
===========
اممممممم
انت جيت برجليك
بقولك ايه ما تخلى السؤال ليك لو قابلت عندكم الرئيس بتاعكم برضه هتكلمه ازاى وتقوله ايه بتاع الكويت يعنى
ايه رايك
وبعدين خلى بالك اصحابك ممكن يعكسوا لك الكلام المصرين بتوع مقالب انا عارفه هههههههه
نورت يا فندم










سمكه واحده
===========
اهو نوعيتك يا سمكه هانم اللى مضيعه حق الشعب وهتودينا فى داهيه
اقبضوا على السمكه دى واقلوها فى الزيت الحار علشان تحرم

Appy said...

ايوشه
========
طيب كويس سحبان منك لقب زعيمكه الامه
اركنى على جنب بقى
وعلى فكره انا عامله مودريشن يعنى التعليقات بتتأخر علشان بتتراجع فى الكنتروم بس
نورتى يا قمر











احمد سعيد
==========
ايه يا ابنى الغل الدفين ده
الكوكب هو اللى هيولع مش لسان الوزراء كده
حابس حابس قالع لابس مش هى كده برضه
وبعدين انت لسه هتشق هدومك وتنكش شعرك
ما انا بشوفك كل يوم وانت كانس علينا صلاح سالم رايح جاى ولابس شوال
اطلع من دول انا عرفتك خلاص نيهاهاها
طيب احمس ممكن بجد تجاوب على السؤال بما انك عسكرى فى الجيش يعنى
بجد بجد
ومن غير ما تنكش شعرك علشان السكان اللى فى شعرك ميضايقوش
وعلشان فيلم الرعب ده حضرتك

Appy said...

ايمى
=======
سياده اللواؤ اركان حرف المكعبات
اوامر سياتك تتنفذ يا فندم ونعلق مين انتى قولتى مين
اااااااه ميشو عنيه انفخه لكى يا فندم
وبعدين قولنا ميه مرة الدوست والمربى مش هينفعوا منكن تخلوها سندوتشات مكرونه
على فكره مش هاخدك معايا وهتطلعى تقشرى بصل اقصد لما اقابل الريس يعنى
اقرى ردى على داليا وانتى تعرفى
اما بالنسبه للعوامه استرى عليه يا ميمى ما انتى عارفه اللى فيها انا بغرق على حرف الكنكه زيك خليهم اتنين وهاتيهم اانتى
تمام يا فندم










مواطن مصرى
==========
عارف او حاجه انا هعملها
هخليه يعالجك من عقدة الزمالك دى طيب يا ابنى ما اعلن بقى توبتك وانضم للاهلى او حتى الاتحاد اعمل اى منظر
على فكره انت وقعت فى غلط برضه
يعنى لما قولت مش هعمل زى الناصرين ومش عارفه مين
برضه لطشت فيهم وانت بتتكلم
المفروض الراجل السياسى ميبصش لدول او اى عدو ويعمل اسقاط عليه حتى لو مختلف معاه
لان اللى بيعمل اسقاط على غيره
بيكون ضعيف
بس طريقه تفكيرك فى الحوار حلوه وهو ده اللى انا اقصده ان طريقه الحوار المباشر المهذب الواثق بتجيب نتيجه
وعلى فكره هو عمل حاجات بس اهتم بفرعيات وساب اساسيات
او معرفش يعلم الشعب يعمل ايه لما جاب له حاجات كويس فبالتالى الكل بوظ

Appy said...

احوال الهوى
==============
بلطجه يعنى ايه بقى حضرتك اولا انا مش ببلطج على حد ثانيا انا ليه خمسين اسلوب بكتب بيهم
مش ذنبى برضه ان الناس بتفهم غلط
انت عارف لو قولت للريس ده الكلام ده
شوف على الرغم من عيوبه اللى ملهاش اخر
هيزهق ويضايق وهيمشيمك من اول تلات دقايق
لانه مبيحبش ده خالص وابقى لاحظ الاسئله بتاعته فى اللقاءات او افتتاح حاجه
طيب وهتقعد تعد له من غير حلول يبقى لازمتها ايه المقابله
انا اقولك اكتب موضوع تعبير وابعته وانا اصححه لك عن البلاوى اللى موجوده
ويا ريت تحاول تتعود على اسلوبى وتفهمه لان انا مش ببلطج ولا بفرد عضلات ومبقولش كلمه الا لما بنفذها ولو فاضى ابقى راجع كل المدونه علشان تفهم الشخصيه اللى قدامك
نورت حضرتك يا دكتور

Appy said...

اسماء عونى
===========
انتى بتكلمى الواد حوكشه بتاع البليله يا مصيبه انتى
فاشله اترزعى جنب ايمى والله هتودونا فى داهيه قريب
خليكوا فى الكوره احسن








احمد سمير
========
هو مش محتاج يتنكر هو ممكن ينزل عادى بس هو ميقدرش وكلنا عارفين الاجابه ليه محاولات اغتياله كتيره على فكره مش قليله
علشان كده مش هيعمل كده
انت هتضيعوا البلد واحد رايح يقابل الريس يقوله كده دى فرصه ذهبيه يا ابنى

Appy said...

روفى
=====
امممممممممم طيب مش عارفه تمسكى نفسك شويه
يعنى لا بقولك ايه انا تهمتى غير تهمتك يا اوختى مليش دعوة









الربان
========
تصفيق حااااااااااد
انا كده هاخد حضرتك معايا
لااااا مش مارينا بلاس
للوفد ان شاء الله لو رحت يعنى حضرتك فهمت الغرض واستغليت الفرصه فى اكبر قضايا
لان فيه ناس مبتعرفش تستغلها حتى مع رئيسها فى العمل وده اللى احنا مفتقدينه
امانه عليك متنساش البانر ها
حمد لله على سلامتك

Appy said...

واحده مفروسه
==============
لا انتى بتعملى خريطه لمارينا ههههههههه
نسيتى لابلاج ولو باشا
هى فعلا مبقتش كويسه زى الاول
وظالمنا يا بنتى والله الناس دى مش عارفه ليه
فاكرين ياما هنا ياما هناك
بقولك ايه اعملى حسابى فى طقم معاكى شيرز ومنطلون
نورتى يا زميله البرجوازيه هههههههههه

Appy said...

احمد
=======

يا سوسه
متقدرش ههههههههههههه مش هتقدر تعمل اللى فى بالك اتحداك

لورنس العرب said...

هههههههههههههههه



لو قابلته


هاسيبه وامشي

أصل مفيش فايده من الكلام
ده انا عشان اكلمه لازم اقعد معاه 10 ساعات كاملين
وولله شويه عليه
بس لو كده انا هسأله سؤال واحد
وأقوله جيمي عامل ايه؟
عاوزينك تفرح بحفيده عشان تطمن على اسرة مبارة من الجيل الثالث

احمد سعيد said...

لورنس العرب
.............
عفارم عليك
جبت من الاخر


appy
..........
لا انتى اللى ماتعرفيش دماغى

وبعدين انتى ايه عرفك اللى بقكر فيه؟؟؟؟

يلا يا ام خروف بمبى

احمد سعيد said...

لورنس العرب
...........
الجيل التالت دة ابو كاميرتين

دول اسمهم الاسرة التالته

ايييييييوة
بتاعه خوفو

nody_1987 said...

اقوله ايه؟
ولا هاتعب نفسى على فكره
هاتلى كلام يوصف الى وصلنا ليه من تدهور وانا اقوله
انما ممكن افرجه على تسجيل لمراسم تنصيب اوباما واورى له فرحه الناخبين بفوز الى رشحوه بحريتهم من غير بلطجه ولا قله ادب
انما اكلمه

خلص الكلام يا ابى

وينكى said...

ياااااااااه
بقى هى دى حياة المارينز
الله يرحم أيام بلطيم والميه ان جاز اللى كنا بنعوم فيها
وكان اهل البلد بيعاملونى على انى وافده من امريكا او اوروبا عشان كنت عامله شعرى قطتين ولابسه ميني جيب على شراب اسود
اى والله وبقوا كلهم عاوزين يتصوروا معايا
اما لو شفت الريس بقى هاقوله ايه؟؟
همممم
متهيألى ولا حاجه
هاودى وشي الناحيه التانيه وبس

Appy said...

لورانس العرب
==============
اه يا انهزامى يا شرير
انت بتقولها فى وشى علشان تخلص منى
عموما بالعند فيكوا اصلا انا ادربت على الموضوع ده خلاص يعنى مش راج يجيلى صدمه ههههههههه








احمد سعيد
===========
عارف لو راجعت مدونتى وشفت كلام الخروف البمبى وحوارته معايا
اراهنك تعينه رئيس من الصبح ده دماغ يا ابنى ايش عرفك انت بس اقولك خليك فى صلاح سالم وخليك ناكش شعرك احسن ههههههههههه

Appy said...

نودى
========
اممممممممم طيب يبقى مشطوب اسمك من الوفد مش هتيجى معانا يا بنتى كنا هنتفسح
بس على فكره حبه جد
الكلام مخلص ولا حاجه احنا اللى بستسهل نورتى يا قمر










وينكى
=========
لا يا بنتى قطط ايه بس دلوقتى الاطفال المارينز بيدربوا على الشعله وبقوا حافظين كل انواع الجيل والصن بلوك
شراب ايه اسود دول عارفين كل الصنادى اللى من قالس ونايك واديداس
يوووووووا احنا كنا اطفال هبل يا بنتى
ايام متفكرنيش بقى

احمد سعيد said...

ايه؟
مين؟
اعين مين؟
الخروف؟
اعينه رئيس؟
قصدك ايه؟
كمان بتشتمى الريس؟
طييييييييييييييب
انا هوريكى

اطلبلى يابنى اللوا رفعت السكرى

Appy said...

والله لو جبت ليه رمضان ابو صره بنفسه ولا بيهمنى
اقولك هات جنينه موالح كامله مش بيهمنى
قال رفعت السمكرى قال
ليه حد قالك عاوزة اصلح عربيتى

احمد سعيد said...

لااااااااا
انا هطلب لك ابراهيم بيه الهلباوى شخصيا

ولو عصلجتى هجيبلك اسماعيل باشا صدقى

مصــــري said...

آبي هانم

ازيك وازي شباب المارينز

بكل هدوء لو أنا قدام الرئيس
هأحكيله قصة المرأة التي ذهبت للخليفة العادل "عمر بن عبد العزيز" وقالت له
رأيتك في المنام سائراً علي الصراط

فما كان منه سوي اني يـُغشي عليه

فصرخت المرأة وصاحت فيه
انهض فقد عبرت

تحياتي
أسامة

NIDAAL .R said...

ايه يا عم كولومبوس
انت منفعل ليه ومزعل نفسك ليه ؟
وريس مين غيرك يا ريس

انا عن نفسى مش موافق على ان كل بتوع مارينا مالهومش فى البتنجان
فيه وفيه .. أينعم الاغلبية منهم مقضينها سهر و خروج وبتاع .. لكن فيه ناس برده بتروح كأستجمام او ترفيهه شوية فى السنة يعنى .. الحياة مش كاتمة وخنقة و بس
..
اما بالنسبة لو قابلت الريس هقوله ايه ؟
انا ما اتمناش انى اقابله علشان هو لو عايز يسمع لنا كان سمع من زمان
بس لو يعنى لو .. وكنت مضطر انى اقف قدامه يبقى مش هتكلم وهجيب حتة قماشة وأحطها على بقى كوسيلة اعتراض على الى بيحصل
ومهما كنت مؤدب وعارف المفروض أكلم الريس أزاى .( لأنه فى الاول والاخر .ريس ) بعيد عن اى حسابات سياسية
بس برغم كدة .. كتلة الغضب الى جوايا من تصرفات الاجهزة بتاعته
هتخلينى غصب عنى افقد السيطرة على اعصابى و انسى فكرة انى مؤدب ومتربى كويس
وانسى كمان فكرة انه الريس

ما تقلقش يا كولومبوس .. البانرات متحضرة من زمان .. لأجل هذه اللحظة .. أعملها بس انت و هتشوف البانرات هتطلع فى ثانية
ههههههههههههههههههههههههه

احمد سعيد said...

مصرى
........
دا مين دا اللى عبر

اةةةةةةةةةةة
قصدك على سيدنا عمر

بحسب قصدك على صخص تانى

Appy said...

احمد سعيد
=========
ممكن مصطفى باشا النحاس
تطلبه ليه
علشان حاجه واحده بس
اورى له بيعاملوا الشارع اللى على اسمه ازى والمترو ربنا يخليك واشوفك من الشباب المارينز يا رب يا احمس










مصرى
=======

يااااااا وتفتكر هيفهم يا اسامه
ولا اصلا فاكر قصه المرأه اللى ردت عمر عن موضوع غلو المهور
وازاى قدرت تقنعه
تفتكر احنا فى يوم ممكن نبقى ده اتمنى

ساره said...

طبعاانحنا عندنا ملك مش رائيس

راح اقوله كلكم راع وكلكم مسؤول عن راعيته

وبعد كذا الله يرحمني
لاتنسني يا أبي وصيتك امي ابقي اسئلي عليها
هههههههههههههههه

رئيس جمهوريه نفسى said...

لو قابلت الرئيس هو صحيح مفيش مواعيد بينا كزعماء اليومين دول بس هو تقريبا حنتقابل قريب عارفه انتى مشاغل الدول المهم بجد حسألة هل هو كانسان تحمل الامانة وبقى راعي واحنا الرعية بتوعه ضميرة مرتاح وادي الامانة كما يجب ان تكون حيقابل ربنا باي وش حسالة العيب في مين في هو اللى بيختار مسئولين تحوط بيهم الشبهات من كل اتجاه ولا المسئولين بيفسدو حقولة هل هو ما بيسمعش ولا ما بيحسش بالم الناس فى الشارع لانى محدش من الحاشية بيوصل ليه الحقيقة ولا هو بيسمع ويطنش وعامل ودن من طين وودن من عجين هل هو مقتنع انه قدم لمصر الديمقراطية بتشوية الدستور علشان خاطر الورث

وطبعا حنطلع نعقد مؤتمر صحفي نقول فيه انه من خير ما انجبت هذه البلاد

مش بحب الحلاوة ولا العيش عايز ماك وبيبسى كانزز والسجائر روزمن ابيض لو سمحتى ووصيتك القصر بمشتملاته

احمد سعيد said...

ههههههه
فال الله ولافالك
مش لما ابدا السلم من اوله
واحده واحده كدة
يعنى
انضم مثلا لشباب ترعه الاسماعيليه
وبعدين اترقى شويه
وانضم للشباب الجمصواى
وبعدين اتحول
ابقى من الراسبريات
وبعدييين اتحور
ابقى بطنقدميات

وممكن بعد كدة اتنقل لفرقه المارينزيين

ومين عارف

ممكن ابقى من طائفه اللسانيين

واقف ورا السور
بتاع شط البهوات

واطلعلك لسااااااانى

ترااااتا

وينكى said...

بت يا بتنجانييييي
الخبر اللى ماحدش يعرفه لسه
انا هاغني مع علي الألفي فى الحفله دى
يعنى حضرتك تظبطى الكالندار عندك اللى هو التقويم يعنى وتجيبي كل الخرفان بتوعك وتيجو تمامأوا عندنا
لازم لازم تظبطونا يا جدعاااااااان
بوستات واعلانات وناس تيجي وهيصااااااااااا
ماليش دعوه هاشوفكم كلكم هناك واللى مش هاييجى هايتبقلظ
هه. بس

مواطن مصري said...

يا ست ابي هانم لقينا الحل للقضاء على ظاهرة التتحرش بكل انواعة من تحرش جنسي الي تحرش سياسي و ديني



هنخصي المتحرش

http://www.youm7.com/News.asp?NewsID=71544
اعتبر وزير التسهيل الإدارى الإيطالى روبرتو كلديرولى العضو فى رابطة الشمال، الحزب المناهض للهجرة فى حكومة سلفيو برلوسكونى، أن إيطاليا يجب أن تتمكن من اللجوء فى بعض الحالات إلى خصى مرتكبى الاعتداءات الجنسية عبر الجراحة.


هذا هو الحل و كل واحد يخلي بالة من مستقبلة
هههههههههههههههههههة

nody_1987 said...

والله ما هو استسهال ولا حاجه
اصلك ها تتكلمى عن ايوه ولا ايه هاتى كده اى قطاع من قطاعات البلد
سواء كان تعليم ولا صحه ولا مرور وطرق ولا قضاء ولا حتى رياضه مشاكل وفساد ورشاوى وسؤ تخطيط
دا كل ده وما جبناش سيره حقوق الانسان ولا الكلام الى بالك فىه يا ابى
تفتكرى يعنى كام يوم يكفوا علشان نتكلم
وبعد ما نتكلم ايه الى ها يحصل
حتى لو حاشيه السؤ والشماشرجيه الى حوليه ما كدبوش كل ده
وهو حاول يغير
ها يقدر دى تكعيبه فساد اشبه بخلايا البكتريه
هايجيب صحه منين
ولا ها يوكل جيمى وعز هما الى يحلوها؟

احمد سعيد said...

مواطن مصرى
............

مصر دايما ولادة
ونحن سباقون دااااائما وابدا

فيه جوز مدونين عتاقى
طلعو بالنظريه دى من اكتر من سنه

اكيد انت علافتهم

dr.lecter said...

سيدي الرئيس

بتعرف تنام؟
لو بتعرف تنام وضميرك مستريح يبقي احنا ظلمناك سيدي
الرئيس

سيدي الرئيس فالكر لما تشريفه حضرتك عدت واتعطلت في المرور 3 ساعات واتاخرت علي جامعتي من 5 سنين


فاكر حضرتك لما فيه ناس بيتقبض عليها ظلم ويتلطوا في معتقلات باسم انهم قالوا عليك كلام اخيي؟

ده اساسا لو عرفت اتحكم في نفسي واعيط واقول لا لا ياريس اوعي تسجنني ولا تمونتني ابوس ايدك ماتضيعش مستقبلي

ثم انط علي رجله وابوسها واطلع القنبله النوويه من جيبي وهووووووب

كل حاجه تنتهي ويطلقوا اسمي علي ميدان التحرير وابقي شهيد الانسانيه بس المشكله ان مصر الجديده كلها هتروح في الانفجار هههههههههه معلش بقي ياعمتي كل حاجه بيبقي لها ضحايا



او ممكن اقلع مالط ادامه واقول انت عاوز تسلبني اعز ماملك ياوحش ويكون ده ادام الاعلام علشان يتفضح بجلالجل




ايه الافكار السوده دي لا لا انا مش هاعمل حاجه خالص


غالبا انا هارفض اروح له واقعد معاه

لو هو عاوز يسمعني يجييلي بنفسه في قهوه ولاد ابو اسماعيل في ميدان التحرير



علي فكره انا اول مره اعرف ان في مجتمع جمصاوي وراس براوي

دول طلعوا امتي دوول؟



وبعدين صيف ايه ده اللي قرب يامفتريه فال الله ولا فالك

خلينا نتمتع بالشتا الصيف ده صعب اووي عليا

شمس النهار said...

انت مش بتتفرجي علي جولاته في المصانع
ماالعمال بيتكلموا معاه عادي يعني
وبعدين هتقولي له ايه يعني ماهو عارف كل حاجه
هو الولد عنده ذكاء حاول يسكتك وخلاص
وعموما انا هجز البانرز والعيش والحلاوه والا طمعانه في كنتاكي

ana ga3an said...

هاقولة ممكن تديني كارت

الفاتح الجعفري said...

السلام عليكم ورحمته الله وبركاته
تدوينة فكرتها قوية جدا فعلا
اولا بس علشان منظلمش شباب المارينز ,يعني هما الشباب اللي مش مارينز هما اللي بيفكروا وايجابيين ومقطعين السمكة وديلها اهو كله شباب اقاليم وخلاص مش مارينا دي اقاليم برضه!!
بس انا هقوليك حاجة تعليقا علي تعليق الرجل علي موقف عرابي
اظن ان الرجل لم يوفق في تعليقه لاننا عندما نقدم موقف لاننظر له من منظور ضيق او ننتظر نتائج قريبه بل يمكن ان تكون لنا نظرات ابعد بكثير وبغض النظر عن ذلك ان عرابي هو ماقام به الموقف الامثل اذ انه لم يراهن علي وطنه وامته امام خديوي خائن وعميل بل انه وقف موقفا صار فيما بعد رمزا للصمود والقوة والبطولة والحكمة وصار عرابي وموقفه من روايات البطولة في التاريخ
--
ثم ان عرابي في حد ذاته لم يكن ممثلا لنفسه حتي يتصرف كما يحلو له ولو فعل ذلك لحاسبه الله وانما كان يمثل مجموعه من الظباط الشرفاء ثم مثل الامة كلها فكان صوته هو ضمير الامة وما كان له ان يتصرف تصرفا فرديا كما يحلو له
وهنا نخلص الي نقطة اخري انني عندما اقابل الرئيس اقابله بأي صفة هل بصفتي الذاتية ام انني امثل مجموعه من الناس لها حقوق ومطالب وبناء علي ذلك لي ان اتحدث
---
صدقني اننا ممكن ان نكتب سنقول له كذا وكذا ونوبخه ونعنفه ونقول له اتقي الله في كذا وكذا
فكلنا يكتب في بيته وراء شاشات والكلام سهل جدا
ولكن كما قال رسول الله صلي الله عليه وسلم
"لاتتمنوا لقاء العدو واذا لقيتموه فاسألوا الله الثبات"
وبما انه حاكم ظالم فهو عدو واذا التقينا به وكلمناه فنسأل الله الثبات في القول والعمل وان لانقول الا مايرضي ربنا
-----
ولكن اذا جاء الوقت الذي نقف فيه ضد الظلم ونمنعه ونقيم الحق والعدل وقتها اقول لكي ماذا يمكن ان يقال للحاكم اذا ظلم
اما الان نحن لانقول له اي شيء يفعل بالشعب مايريد والشعب متخاذل وضعيف واصحاب الاهواء والمصالح هم من يفعلون ويقررون والناس في صمت
فأكيد الغالب لو قابل الرئيس
سيبتسم ويسكت او يصمت
وجزاكم الله كل خير يازميلة المعارك

*البت المشمشية *حلوة بس شقية * said...

ههههههههههههههه
انا هطلب منالريس يسلفنى فلوس
بس كدة

*البت المشمشية *حلوة بس شقية * said...

ملحوظة صغيرة المدونة بتاعتى طارت اللى انا دخلت بيه ده مدونة جديدة بس بنفس الاسم زيها بلظبط ياريت تضيفه لينك المدونة الجديدة عندك وياريت تعملى تنويه بكدة دى خدمة منك يعنىhttp://o0mshmsh0o.blogspot.com/

*البت المشمشية *حلوة بس شقية * said...

يعنى عشان متستغربيش المدونة الجديدة زى القديمة بلظبط بس اللينك اتغير ياريت تعملى فيا الخدمة دى

أحــوال الهـوي said...

مش قلت لك كل ما ارد فيه حاجات بتفرقع

؟؟؟

انت متحفزة كده علي طول
ما تزعليش
بناقص تعليقي

تحياتي

أحــوال الهـوي said...

ابنتي او اختي الفاضله

لا يربطنا غير الاحترام و تبادل الاراء و اذا انحني بنا المسار عن غير الطريق المرسوم اظن من الاولي اخذ هدنه لاعادة ترسيم الحدود
يجوز انني لم اعتاد علي اسلوبك ولكني دائما اري في المراة صورة محددة و اذا اختلفت هذه الصورة تصبح غريبه بالنسبة لي من الممكن اني دقة قديمة و لا افهم احوال الشباب و تعاملتهم فلهذا قد يحدث بعض الصدام

لا اريد ان اوضح بعض المعاني حتي لا يساء فهمي
فكل المدونين احترمهم و اتخذ منهم اصدقاء مجهولون اتحدث اليهم بصدق و حرية غير طامع باكثر من دفئ العلاقة الانسانيه و الفكريه
كلهم اولادي و اندادي اصدقاء
عكفت عن ذكر سني في البدايه حتي لا ينفر مني الشباب

اعذري حساسيتي و اذا كنت اسبب الضيق لاحد فاني انسحب بهدؤ و اذا استدعي الامر سوف انسحب من التدوين نهائيا

تحياتي

نوري said...

ههههههههههههههه
بس تفتكري لو انا جهزت كلام زي مانتي بتقولي
وقعدت اتدرب ع الادب و الاخلاق
عشان اقابل الريس
هو هيبقي عتده وقت يقابلني
يابنتي ده ع طول مشغوووووووووول
ومبيقابلش حد خااالص
ع كل حال انا هعمل الي عليا
وهقوم اغسل هدةمي عشان تبقي جاهزه

بقلك ايه صحيح اوصي ع اي حاجه حلوه
ناخدها معانا
ولا مش لازم
نياهاهاهاهاها

بست وشز فور يو

محمد عتلم said...

انا جهزتلك سندوتشات عيش وحلاوه وعلبتين سوبر لزوم التخشيبه
اتحبسى انتى بس وملكيش دعوه

أحــوال الهـوي said...
This comment has been removed by the author.
أحــوال الهـوي said...

ما حدث لفظ الي سطح شخصيتك بعض الجوانب الخفيه التي لم اراها و يبدو انك تتعمدين اخفاءها لظنك انها من سمات ضعاف الشخصيه و انت تريدين اظهار جانب اخر عكسها
انت تملكين طيبه و حنية ثريه تكلفين نفسك العناء بتصحيح مفاهيم شخصي الفقير
علي العموم عفا الله علي ما سلف و ارجو دوام التواصل البناء بما يعود غلينا بالنفع و الثقافه

الحنان و الرقة من درر المراة ان تزينت بهما صارت اكثر بريقا و تميزا

تحياتي

February 18, 2009 8:45 AM

ahmed_k said...

أنا لو قابلت الريس مش حكلمه خالص ولا حقوله حاجه
لأنه أساسا مش حيكون فاضي يسمع
ولو قلت مش حيركزلي
فحشتري دماغي وكرامتي ومش حكلمه من أساسا

يا آبي هو الريس بيسمع لحد ولما يكون في مجال أنه يسمع لحد بيكون اساسا متلقن حيقول ايه وعامل يآجي 15 بروفه أدام الحرس والمنظمين

هو الراجل عارف كل حاجه ومش محتاج حد يوصله أي معلومه عن حال البلد بس عامل نفسه مش واخد باله

وأجدع سلاااااام للمارينز ودماغهم الشغاله

الجواز و سنينه said...

تصدقى انى من ساعتها بفكر هاقول ايه للريس
بس لقيت ان احسن كلمه هيه ان كنت تعلم فهذه مصيبه و ان كنت لا تعلم فالمصيبه اعظم

goodman said...

ليا واحد صاحبى هناك
اسمه ابو غريب
تعرفيه؟

micheal said...

هههههههههههههههههه..ايه حدوتة شوباب الماينز دي
ع العموم يا اما حنسمع حاجات غريبة من دي
بس أنا عن نفسي لو تخيلت نفسي في مقابلة مع الريس حقوله حاسس بإيه بعد 28 سنة في السلطة وده بجد اللي في بالي
ويحصل اللي يحصل
تحياتي يا سيادة اللواء

همس الاحباب said...

هههههههههه
ده من ايه يا بنتى
ما انتى كنتى بعقلك
كله من قص الشعر
كنتى جيتى عند بولو الحلاق
كان هبعمله ليكى فراخ بالكارى
بصراحة لو قابلت الريس
هقوله انا عايزاعرف مين ابن الايه اللى حدفنى فى الحفرة دى
ههههههههه
صباح البتنجان

وومن said...

هههههههههههههههههههههههه ياخراشي منك علشان يالهوي مش مناسبه للموقف

انا قعدت نص البوست الأولاني اهرش في راسي واقول ده من إيه ده ما انا سيباها كويسة

لحد ما جينا عند عرابي وبصراحة الراجل ده عاملي حفرة في نافوخي من كتر الهرش اللي بعملهولي وصديقك المارينزي ده بجد جاب من الأخر عارفة ليه يا آبي
كل ما أشوف صورتة اللي في كتاب التاريخ ده وهو علي حصانه والخديوي قدامه اقول لنفسي بجد ايه الراجل المستفز ده ده واقف بيكلم خديوي مش سايس الخيل وبرضة اقعد اقول لنفسي هو عرابي دخل القصر كدة عادي بالحصان والخديوي دة مكنش عنده حراسات خاصة ساعتها طب الإنجليز اللي كانوا حاطين عينهم علي مصر ساعتها سابوه علي الحصان ومفيش عسكري ولا ظابط ينشة رصاصة كانت تعمل وقتها نكله مخرومة ولا حاجة مش راكبة في دماغي خالص
وفعلا ضيع قضيتة بطريقتة الغير دبلوماسية دي خالص

المهم نيجي بقي للراس الكبيرة لو قابلتة هاقوله ايه
(( متي أستعبدتم الناس وقد خلقتهم أمهاتهم أحراراً ))
وطبعا وقتها هاتمني اني كنت ابقي ايام عرابي علشان طرق التعذيب مكنتش اطورت هههههههههههههههههههههههههههه
يهنزر

هاقوله اللي يجي علي بالي ساعتها

هو صحيح لسه الريس بيقابل شباب الجامعه ويقلوله بابا مبارك ممكن نحضنك أو نسلم عليك
أصلهم كانوا بيعملوا كده وانا صغننه وهو كان ساعتها ليه 12 : 13 سنه بس في الحكم

:)

Founoon said...

طب هقولك لو قابلته هقوله ايه من غير تريقة :)

هقوله ليه كدا
ليه بجد كدا
اذا كنا احنا اللي مستورين والحمد لله قربنا نكره بلدنا
والله والله والله الواحد كل يوم الصبح يصحى يقول لنفسه مصر مالهاش ذنب اكرهها ليه
امال الغلابة يقولوا ايه ؟؟
ليه كدا
هقوله انا حزينة وقلبي مكسور وبحقد على كل الناس اللي عايشين في بلادهم عيشة ادمية
ليه تخلينا نحس ان اليلد دي مافيهاش امل
ليه موت الامل جوانا كدا وبقينا بنعافر مع نفسنا عشان يفضل عندنا رضا
بصي كفاية بقى عشان هبتدي اعيط على فكرة

أبو أمك said...

أقول له لو سمحت
ممكن تولعلي ؟

مواطن مصري said...

ايمن نور طلع يا ابي و عقبال عبد الكريم عامر

thunder said...

فعلا مارينززززززززززززززززززز
ال يقبلو الريس ال وهو انا هسيبكم مارينزززز بجد

thunder said...

ملاحظة نسيت اقولك عليه الكابتشينوا لسة منزلش sm

Appy said...

هرد عليكم بكره يا شوباب
انا بس كنت واخده هدنه



انا جعان
=======
يا سيزر انت ممسوك فى كمين فعاوز كارت يخرجك ولا ايه انت اروبه انا عارفه بس لما تتمسك ابقى صفر وانا هاجي اضمنك فى المشمش

Appy said...

سارة
=========
حتى انتم هتقولوا للملك كده ربنا يستر ادينى عنوان ماما علشان اديه لماما عندى ما انا هكون معاكى هههههههه








رئيس جمهوريه نفسى
====================
مين يا خويا اللى ضميرة مرتاح ليه هو انت فاكر انه مقتنع انه بيعمل حاجه غلط
اجرى يا بتاع انت هتهزر ولا ايه
ده هو صح طول الوقت
مش هاخدك معايا وانا بقابله ها بقى

Appy said...

احمد سعيد
===========
عشم ام الخلول فى الميه الحلوه قال من اللسانين قال اجرى يا عم كان غيرك اشطر الا اذا سرقت البنك المركزى بنفسه بقى










وينكى
========
عونيه يا ونكوكه

Appy said...

مواطن مصرى
===============
قديم ومفيش حل برضه يا ابنى ده من زمااااااااااان جوى يا بوى
المصرى هو ابو الاختراعات اللى مبتتنفذ









نودى
=========
خلاص نولع فيهم ولا تزعلى يا قلبى

Appy said...

dr.lecter
=============
برضه ضمير
والله انتم ناس فاشله فاشله يعنى يا جدعان افهموا طبعا هو مقتنع انه صح يبقى تروح تقوله انت صح ولا لا ما هيكتمك ويوقلك اه
ويعدين المجتماعات دى احنا اللى اطلقنا عليها كده
علشان يحرموا يطلقوا علينا حاجه هما مش احسن مننا صح ولا ايه













شمس النهار
===========
ايون انا طمعانه فى كنتاكى عرفتى منين يا سوسه
غير كده فى المصانع بيسالوه عن صحته وكله تمام لان محدش بيقدر يكلمه
اما الواد صحبى ده اصلا قطعت علاقتى بيه خلاص

Appy said...

انا جعان
==========

انا رديت عليك اممممم بس اقولك لو ادالك الكارت هتعمل بيه ايه اصلا يعنى










الجعفرى
=========
يا زميل المعارك الواد مش بيقلل من عرابى لا هو بس انتقض طريقه كلامه انما عرابى كان كويس وطبعا كانت فتحه كويسه
بس برضه كانت فرصه وضاعت
فاكر قصه السيده اللى ناقشت سيدنا عمر فى غلو المهور فهمت بقى القصد من اللى الواد المارينز العجيب ده يقصده
نورت يا بتاع الاقاليم قال مارينا اقاليم قال

Appy said...

البنت المشمشيه
================
هى مدونتك حصل لها حادثه ولا ايه










احوال الهوى
===============
كده بقينا صافى يا لبن صح خلاص

Appy said...

نورى
=========
لا بلاش هو عامل دايت ويبقى وفر يا بنتى اسكتى









محمد عتلم
===========
لا سوبر ايه مفيش حاجه تانيه مش بشرب سجاير انا عااااااااااا

Appy said...

احمد
=======
بيسمع يا احمد بس لو حد وصل له يمكن انا لو وصلت يسمع يمكن انت مش بعيد على ربنا









الجواز وسنينه
==============
ياااااااه انا افتكرت خدوكى تحرى وانت بتفكرى هههههههههه

Appy said...

goodman
==========
لا والله معرفوش








ميشو
=======
مالهم شباب المارينزز يا خويا ها قول بقى وسمعنى ما هو كده احنا دايما مظلومين معلش معلش دى اخرتها ربنا يسامحك

Appy said...

همس الاحباب
==============
برضه مجاوبتش على السؤال ولا مش هتعرف يا خالد
اممممممممم مش هاخدك معايا ويا ريت البتنجان فى بلدك زى والله كان حالها اتعدل












وومن
========
عرابى غلط بس الغلطه دى مش اكتر وده مكنش ينفع فى وقتها ابدا
انما بيحضونه ايه انتى ناسيه ان فيه الفلونزا الطيور

Appy said...

فنون
=======
يا بنتى انا اللى هعيط فيه ايه بس براحه شويه بجد









ابو امك
=========
اه ساعتها هيولع فيك

Appy said...

thunder
====
مش فاهمه الملاحظه بتاعتك دى

غير كده ماله شباب المارينز على فكره هو اقرب شباب ممكن يقابله بحكم انه بيتواجد فى لسان الوزرا نيهاهاهاها