مفاهيم مقلوبه



احنا ليه الشعب الوحيد اللى عنده المفاهيم مغلوطه يعنى كل كلمه بتتفهم بقفاها مش بوشها
يمكن ده علشان احنا مش فاهمين نفسيتنا ولا حياتنا ولا اصلا محدش بيكلف مخه يفهم
هقولكم ايه الكلام علشان اتجنب فقع مرارتى اللى بقت عامله زى الاسكريتش دى ومفيش فايده برضه هتتفقع

الطيبه ...... ناس بتقول على الطيبه هبل مع ان الطيبه ده شئ تانى خلص الهبل ده حد مبيفهمش ومعندوش مخ انما الطيب حد بيسامح قلبه ابيض بيتعامل على فطرته وبيفترض حسن النيه فى الناس ومش معنى كده نديله كل مره على قفاه لان هيجى وقت ويشوط فى اللى قدامه

البخل ....ناس بتقول عليه حرص طيب بخل المشاعر ايه بخل الواجبات ايه وبخل التفكير ايه

النكد..... ناس بتقول على الناس النكديه عاقلين طيب ازاى عاقلين وهما عقدين حواجبهم ليل ونهار وتشوفهم تتخض

تقل الدم ... بيقولواراسى وعاقل يعنى تلاقى واحد عمال يقول كلام ولما متفهموش يقولك دى دعابه اللى فى نهايته لازم يقولك انها مزحه انها دعابه وهو اصلا دمه تقيل ليه اطلق عليه انه هادى او عاقل

البارد ..... الشخص البارد فى قراراته او حياته او تعاملاته يقولوا برضه عاقل وحكيم اه بس مش حكيم اللى بيغنى على فكره فيه قرارات فى حياة الانسان لازم تاخدها بسرعه لان لو اتاجلت بجد ممكن يبقى خلاص الوقت انتهى ومبقاش ينفع خالص والحياه ولااشخاص بتتغير

الافاق المنافق ...... يقولوا مجامل تلاقيه عامل زى الزرافه الطويله الهبله كده ماشيه برقابتها الهبله وعامل نفسها قياديه وهى المرشد العام للناس فى حياتهم وهو هفأ وخيبه وكل الناس مبتكونش طيقاه وحركاته قرعه ومكشوفه

المؤدب....... ناس تقول عليه يا عينى مكسور الجناح وميقدرش يعمل حاجه
بس فيه فرق بين التربيه وبين الناس اللى متربيه على الارصفه والحوارى والشوارع ولاد الناس مبيردوش ومبيلموش الزباله من تحت رجليهم بيدوسوا عليها ومش ضعف دى كرامه وعزة نفس

قليل الادب ....ده جرئ مش عارفه على اى اساس بيقولوا على قليل الادب جرئ طيب بيكون جرئ فى ايه فى طوله لسانه ولا فى كره الناس ليه على فكره مفيش اسهل من قله الادب وصعب اوى ان الواحد يبقى متربى انما احنا فى زمن فعلا كتره فيه الناس اللى مش محترمه

المغرور.... .. عمر المغرور ما كان واثق من نفسه فيه ناس استغفر الله العظيم شكلا وموضوعا وفكرا ومستوى اجتماعى واخلاقى بجد يعنى تخطوا مرحله الصفر بكتير وتلاقيهم بيتكلموا بتعالى على ايه مش عارفه بس ده راجع لنقص فى حياتهم وفى خلل فى حاجه من دول يعنى فى الشكل الاخلاق اى حاجه بس مش عارفه ليه الناس تقول عليهم وهما يقولوا على نفسهم انهم واثقين من نفسهم دول كبيرهم يثقوا ان بجد الناس بتلعن اليوم اللى عرفتهم فيه

فيه ناس عامله نفسها مثقفه وحاشره مناخيرها فى كل حاجه وهو جاهل ولا عنده ذوق ولا فكر ولو سالته عن كتب قيمه يتكعبل فى لسانه وهو على راى البوهى ايه مواصفات المثقف الجامد اخر حاجه
وفيه ناس تقول للناس اللبس ده مش لايق على بعضه وتبص له تلاقيه لابس لبس شبه حاله التورلى ومش لايق على شكله كمان وتلاقيه بيتنك على الناس وهو شكله ملعبك فى بعضياته ولا جسم ولا عقل ولا لبس

ويا ريت كل واحد يبص لنفسه فى المرايا قبل ما يفتكر نفسه فالنتينو او تفتكر نفسها افروديت الهه الحب

اكتشاف عظيم بقى ليه اخيرا ان فيه ولاد اى والله بتغير من البنات يعنى مثلا ولد يغير اوى لما يلاقى ناس بنات وولاد بيحبوا بنت ومهتمين بيها وكمان واحد تانى يقعد يقول مثلا لواحده لا عيب فلان ده يقول كذا على زميلتنا ازاى ودى مش اخلاق ودى قله ادب وتانى يوم يبقى ماشى معاه يا ريت حد يسمعنى زغروطه للشخصيه دى لان بجد لو وقعت تحت سنانى هقطعها وارميها للاسوده والنموره ياكلوها واكيد هيجى لهم تسمم من الشخصيه دى


ملحوسه :- على فكره انا لما فتحت الكوكب ده فتحته علشان اكتب سلبيات فى حياتنا وانتقض واشكر فى حاجات يعنى مش علشان اكتب ذكريات عنى حتى لو كتبت موقف شخصى بكتبه مش علشان افضفض ولا اتباهى بيه لا علشان نتعلم منه حاجه فاكيد مش كل موضوعاتى نابعه من مواقف شخصيه ولا من اسقاطات لان الحمد لله فى الحقيقه لما حد بيضايقنى هو عارف ان اخره معايا تحت الشوز بتاعى فارجو من الفياكين والفيكونات انهم يرحموا حضرتى من انهم يقولوا مين ضايقك لان جناب سعادتى هيطق قريب وينفجر وفرامل لسانى هتفوت تانى ويا جدعان التيل الاصلى غالى ومحدش يجيبه لروحه بقى وقد فنذر من بعجر
لان اللى بيضايقنى عندى موبيل اعرف اكلمه عليه واقدر امسح بيه الارض رايح جاى لغايه لما يبان له صاحب ده لو حظه حلو ومقبلتوش شخصيا


كان معكم سياده لواء اركان حرب عميد متقاعد دكتور مهندس ابى هانم وتوب علينا يا رب

حكمه الامبراطورة

راحه الانسان تبدأ من أذنيه

90 اخبط وقول رايك:

الربان said...

تحياتي

فعلا يوجد الكثير من المفاهيم الخاطئة في حياتنا....
او علي الاقل لا نستطيع ان نفرق بينها
مثلا: البخيل و الحريص....الجريء وقليل
الادب...هذان المثالان حضرتك ذكرتيهم في المدونة....و معظمنا تقريبا لا يستطيع
ان يفرق بينهما...

مع انه لو دققنا قليلا و استعملنا عقلنا الذي وهبنا الله اياه لهذا الغرض
اي إعمال الفكر و العقل سنجد ان الحرص
يعني ان تضع الشيء في مكانه الصحيح و هو يشترك هنا مع مفهوم الحكمة.

اما البخيل...فهو بخيل في كل شيء و يستوي لديه المكان الصحيح او الخاطيء
هو غير معني بهذا....هو معني فقط بالاستحواذ هلي اكبر قدر ممكن من المال مثلا او المشاعر..وخلافه...لكن ماذا يقدم هو في المقابل...هذا بعيد عن تفكيره.

محتاجين للكثير من امثال هذه التدوينة..حتي نتعرف
علي المفهوم الصحيح من الخاطيء...او علي الاقل لا نقلب المفاهيم.

تحياتي و تقديري لحضرتك

nody_1987 said...

فعلا اسهل حاجه ان الواحد يكون قليل الادب
والاصعب انه يكون مؤدب فى زمن بيتقال فيه على المؤدب ضعيف لان علشان يبقوى قوى لازم يبقى مش مؤدب

جامداوى ان ابن الناس مابيلمش الزباله وبيدوس عليها
ابدعتى يا ستى

رئيس جمهوريه نفسى said...

احترس من فضلك الشعب يرجع اللى الخلف كل مفاهيم المواطن المصري بقيت مغلوطه لاسف الشديد نسيتى تضيفى اكرامية او هديه بدل الرشوي والنصب اللى بقى فهلوة الميكيافيلية تغزو اوساط الشارع المصري فى قلب المفاهيم وتلوية النص والمعنى حسب الاحتياج الشخصى
موضوع المثقف بقاء بخصوص الثقافه واى اهم مواصفات المثقف الجامد اخر حاجه كتاب من القطع المتوسط لسهولة الحمل يفضل ان يكون من الادب المترجم او حبذا اذا ما كان لكاتب غير مشهور لدواعى الابتكار كما يراعى صعوبة نطق اسم الكتاب مع الاحتفاظ بنظارة لا تقل عدساتها عن قعر الكوباية والاهتام بندوة او اتنين مش مهم ايه اللى حيتقال فيهم بس اهم حاجه يكون اسمها ندوة مع التحلى بالقدرة على المناقشة بطول نفس رايح جاى واخذ ورد مع حشر كلمتين انجليزى على ثلاثه فرنساوي وسط الكلام لمصطلحات مالهاش ترجمه تبقى اقتربتى من الحصول على لقب مثقف اخر حاجه بس على فكرة الناس اللى بتتباها بلقب مثقف فى المغرب ليها معنى تانى خالص وبخصوص الثقافه انتى عارفه راى الخاص فى موضوع المثقفين وعديت ليكى قبل كدة اللى بعتبرهم مثقفين على حق ربنا
طبعا انتى بتكتبى فى المطلق مش حجات شخصية انا عارف الموضوع وانتى طبعا حرة فى الكوكب بتاعك وانا من منطلق حريتك بحتفظ بحريتى فى انى اسالك مين اللى ضايقك :P:P:P:P:P وش بيطلع لسانة

اسامه عبدالعال said...

ممممممم
كده يبقي فى حاجه معكننه عليكي بصي هيفضل فى تنوع للابد وهيفضل فى كل الناس دي لان كل دول مع بعض بيكونوا منظومه الحياه الحل بقي انك تنفضي لكل الحوارات دي وعلى فكره يارحاب احنا كمان بنغلط ولو افتكرنا ان كل الناس بتغلط بس احنا لا هنبقي اسوأهم
بس ارزل نوع بقي على قلبى المتطفل اللى بيدخل فى حياه غيره اعمل كذا وسوي كذا والبس كذا
بس كده

أحــوال الهـوي said...

معك في كل اللي قلتيه يا صاحبة الكوكب و المدونه
وواضح ان حضرتك بتهددي اللي يمكن يقول رايه لان الويل له و دي طبع الحكومات الديموقراطيه فما بالك بصاحبة معالي الكوكب

و علي فكرة ياريت تغييري شعار اللي خرفوا معايا
اولا لانك مابتخرفيش ثانيا احنا ما بنخرفش حتي لو كنا بنقول راينا المتواضع في مدونة تدعي صاحبتها
انها فتحت المدونه علشان اكتب سلبيات فى حياتنا وانتقض واشكر فى حاجات)
تحياتي

~*§¦§ Appy §¦§*~ said...

الربان
========
والله يا استاذنا انا فعلا بعانى من الموضوع ده جدا ومش عارفه اعمل ايه بتصدم فعلا من الناس
بس لازم نفكر لازم يبقى فيه احساس شويه مش اكتر
ميرسى لذوقك وكلام حضرتك










نودى
========
ربنا يخليكى يا قمر وفعلا دى الحقيقه يا حبيبتى وهتشوفيها وتعرفيها مع مرور الوقت

~*§¦§ Appy §¦§*~ said...

رئيس جمهورية نفسى
================
يا لهوى انا بجد على الرغم من ان مودى منيل بس بجد ضحكتنى يا محمود على التعريف الجامد اخر حاجه ده يا ابنى والله
وبعدين مين ده اللى يضايقنى ما انت عارف انا بصطاد بزعافه كده الحشرات الطايره
ميرسى ليك على التعريف يا زمخشرى عصرك وغسيلك







اسامه
========
انا بتكلم عن مفاهيم مغلوطه مش حاجه شخصيه لانى شوفت ناس كده
وموضوع انفض دى نو مش فى قاموسى انا اللى بشوفه غلط بصلحه
ومعاه بصلح اخطائى والحمد لله عمرى ما بنتقد شئ وهو فيه
نورت يا اسامه

~*§¦§ Appy §¦§*~ said...

احوال الهوى
=============
هو بجد مش عارفه كلامك هزار ولا بجد
يعنى والله انا مبحجرش على راى حد وكل حد بيقول رايه عادى انا بتكلم تحديدا عن الاشخاص اللى ممكن تغلط فيه فاكيد اخرهم تحت الشوز انما المواضيع اللى بتتكتب دى حاجه تانيه بنتقض فيها سلبيات فينا
ومش فاهم كلمه بتدعى دى برضه هو عموما مش هحاول افهم قصدك غلط علشان مهرش فى دماغى واضايق
على فكره كلمه خرفوا معايا مش وحشه لان فى النهايه بعتبر كل ارائنا بما فيهم حضرتى يعنى يا فندم
حاجات ما بينا مش هتأثر كتير فى الكبار وخاصه فى السياسه ولو اجتماعيات مش كله هيعمل بيها
فالكلمه مش اهانه
لانى لو اقصد اهين حد يبقى كده بهين نفسى الاول
منور يا فندم الكوكب ومتخافش قول رايك بكل صراحه وانا هرد عليك

romansy said...

السلبيات مش هتنتهى فى مجتمعنا دا

مش يبقى مجتمع غير بسلبياته

المفاهيم عندنا غلط بنقدر بكل سهوله اننا نحول الوحش لكويس والكويس وحش واحنا فى قاعده كده

محمد عتلم said...

ما بين الجنون والعبقريه شعره
كل الشباب روش ..جميل ..شيك ..مثقف .. محترم .. ابن ناس .. دمه خفيف .. بيحترم الاخرين .. كوول .. رومانسى .. جامد .. مفيش زيه اتنين .. .... ايه
مفيش حد غير كده ولا ايه ؟؟
كل واحد فاهم كل حاجه من وجهة نظره ولما تسالى اى حد فى اى موضوع لازم يفتى ويقول ان وجهة نظره دى هيا اللى صح
فيه مقوله قديمه بتقول
ربنا لما وزع الارزاق محدش عجبه رزقه ولما وزع العقول كل واحد عجبه عقله
انا عشت فى مصر فتره كان كل الشباب فاكرين انهم سوبر ستار ولما سافرت برا مصر لقيت برضه كل الشباب سوبر ستار
طب اشمعنى انا مش سوبر ستار ؟؟ هوا احسن منى فى ايه ؟؟
كل ده من المفاهيم والمعتقدات اللى بتتفهم غلط
وعلى فكره كل الدنيا كده
اما بالنسبه للى انتى قلتيه عن البخيل والمؤدب والجرىء وكل المصطلحات دى فهى اكيد من ضمن المفاهيم اللى اصحابها فهموها وفسروها غلط وطبقوها من وجهة نظرهم الشخصيه عشان كده انا قلتلك البؤين الأولانيين دول وبالتالى الناس برضه حكمت عليه غلط

عايش... ولكن !!!! said...

ههه والنبى عثل بس على فكره فى جمله طلعت منك اجابت على سؤالك

على فكره مفيش اسهل من قله الادب وصعب اوى ان الواحد يبقى متربى انما احنا فى زمن فعلا كتره فيه الناس اللى مش محترمه

اختلاف الزمن زى ما بيقولوا كل وقت وله ادان وللأسف حاليا كل الحاجات اللى المفروض انها صح فى كتيييير مننا شايفينها غلط والعكس صحيح
انا على فكره قابلت ناس من كل الطوائف اللى قولتى عليها دى بس الحمد لله بعرف اتعامل معاهم كويس
على فكره معظمهم مبيبقاش شايف نفسه زى مانتى شايفاه
بمعنى ان لو هو بخيل مبيبقاش شايف نفسه كده وعلشان تقدرى تتعاملى معاه وتعرفيه ان اللى بيعمله ده بخل " ونتانه " لازم تعامليه زى ما بيتعامل فبيشوف ده فيكى فبيعرف
بس طبعا ديل البوبى عمره ما يتعدل :) بس فى ناس ديلها اتعدل وبقت زى الفل اهم حاجه تأثيرك عليهم

ملحوظه انا مش بكلمك شخصيا علشان متحضريش القله هههه
ولا حضريها وجهزى الموبيل وكل اللى قلتى عليه هههه احنا اصلا للأسف متقابلناش قبل كده ولا بيننا اتصال بس مدونتك من اول المدونات اللى كانت عندى فى الريدر

دمتى بكل الود

أحــوال الهـوي said...

الاخت العزيزة
اعتقد ان مدونتك من المدونات الجادة لصاحبة راي و رؤيه و فكر و منذ اللحظه الاولي لدخولي قمت بحفظ العنوان في متابعاتي
و لم ارد علي معاهدة كامب ديفيد لاني عارف ان البنود اللي حضرتك ذكرتيها صحيحه و مهينه لاصحاب انتصار اكتوبر و كنت مبهم في تعليقي لان توقيتها كان محرج لنا جميعا و كل الاقلام و الالسن تتجرأ علي مصر
و لكن النقطة الفاصله و الاهم هي اعتراف مصر بدولة اسرائيل التي بموجبها اعترف الجميع بالمعتدي بانه صاحب دوله و كيان بعد ان كان وصفه بالمحتل او الغاصب
بل و اضاف اليه الشرعية التي بدورها خولت له الاعتداءات المتكررة بدعوي الاعتداء علي دوله ذات سياده
ثانيا بالنسبه للتعليق علي مفاهيم مقلوبه
لانك انسانه متحضرة و محترمه و في نفس الوقت متخوفه من نوعية المترددين علي مدونتك فاستعملت عبارات الوعيد و التهديد كخط دفاع اول ضد من يفكر بالتطاول او عبور الخطوط الحمراء و اظن الاسهل ان تجعلي التعليقات و التحكم فيما ينشر باذنك
بصراحه تحدثت في موضوع مهم و شتت انتباهي بملحوظاتك النهائيه بما يناقض صلب ما دافعت عنه و للعلم لو بحثت في قديم الموضوعات بمدونتي سوف تجديني بدات بما يشابه اهتماماتك
شكرا لسعة صدرك و تفهمك و اعتذر ان سببت لك هرش دماغ

تحياتي

Migo Mishmish said...

ابى هانم
ارجع واقولك ..لما الامر اختلط ..تاه الصح فى الغلط ..وبقينا وشوش مليانه رتوش ..وشوش جلد على وشوش ظلط
وناس طيبين على ناس سايقه فى العبط ..دا لما الامر اختلط
المفاهيم بقت مختلفه والمعايير باظت ..عندك مثلا فى مهنتنا الى كانت محترمه زمان الى هى التدريس حاجات تودى فى داهيه ..عايزة تعرفى البلد رايحه فين ؟ تعالى عندنا المدرسه وانتى تعرفى ان البلد رايحه الى القاع بسرعه الصاروخ ..بصى على العيال الى طالعه والاجيال الجديده وعلى سلوكهم تعرفى ان العمليه باظت وخربت من زماااان
معلش على جرعه الاحباط
مستنيينك فى البلكونه تشربى شاى وتروقى دمك
ميجووووووو

~*§¦§ Appy §¦§*~ said...

رومانسى
=========
دى مش سلبيات بس دى قله فهم مش اكتر











محمد عتلم
===========
يا فنان انت كووول وروش وسوبر سوبر سوبريم هههههههههه
هو انا اللى هقولك على الصح والمواصفات الصح فين
امممم خليها فى سرك بقى
عماوما كلامك منطقى والمثل اللى انت قولته ده بتاع بابا هو اللى قالى عليه

~*§¦§ Appy §¦§*~ said...

عايش ولكن
==========
والله العظيم انت كمان لخصت بس عاوزه اقولك على حاجه انا معرفش اعامل الناس بنتانه فحلهم انى بقول فى الوش وده الصح المشكله ان فيه ناس بتكابر لان ناس تانيه متخنه ودنها
والله مقدرش يا فندم احضر قلل لحضرتك اوعدك بزير كلاشنكوف قريب هههههههه
نورت وشرف ليه ان مدونتى عنك














احوال الهوى
==========

لاااااااا انت عاوزنى ارد عليك حته حته علشان حقك بس
اولا انا حبيت استفهم منك لانى كتير مش واخده على اسلوبك انما فيه ناس بقدر اميز كلامهم
انما علشان مفيش تعامل كتير بينا فكان لازم ارجع ليك واسالك
نبتدى بقى حته حته
=====================================
اخت العزيزة
اعتقد ان مدونتك من المدونات الجادة لصاحبة راي و رؤيه و فكر و منذ اللحظه الاولي لدخولي قمت بحفظ العنوان في متابعاتي



ربنا يكرمك ويبارك فيك يا رب دى شهاده اعتز بيها والله


و لم ارد علي معاهدة كامب ديفيد لاني عارف ان البنود اللي حضرتك ذكرتيها صحيحه و مهينه لاصحاب انتصار اكتوبر و كنت مبهم في تعليقي لان توقيتها كان محرج لنا جميعا و كل الاقلام و الالسن تتجرأ علي مصر


مش عيب على فكره انى انتقد ابنى العيب انى ادارى على عيبه انا مش مهم ليه الاقلام التانيه تقول ايه انا امتى اضايق لما حد ينتقد مصر لما تكون هى صح واعتقد ان اعظم البناء والنقد انك تنقد ذاتك ومصر يا اخى العزيز مش الحكومه مصر هى احنا انا وانت ولا يمكن اختذالها فى الحكومه ولما انتقدت انتقدت اننا بنبص للحاجه سطحيه مش من جواها يعنى علشان اعالج جرح اطهرة يا دكتور وبعدين احفر فيه علشان اخلص منه وهى دى الاتفاقيه بالنسبه لينا يا فندم

====================================
ثانيا بالنسبه للتعليق علي مفاهيم مقلوبه
لانك انسانه متحضرة و محترمه و في نفس الوقت متخوفه من نوعية المترددين علي مدونتك فاستعملت عبارات الوعيد و التهديد كخط دفاع اول ضد من يفكر بالتطاول او عبور الخطوط الحمراء


لا خالص على فكره انا بس علشان قبل كده كل ما اكتب بوست مشكله حد يفتكر انه عنى انا شخصيا وبعنى طبعا من الموضوع ده
غير كده
اصحاب القريبين عارفين ان طبعى ده مبحبش حد يتعدى حدوده فكانت مجرد هزار وبقوله للناس مش اكتر

و اظن الاسهل ان تجعلي التعليقات و التحكم فيما ينشر باذنك

انا فعلا عامله مودريشن بس مش علشان الاراء لا طبعا لانى بنشر اى رد ولو مختلف فى راى عادى لان لازم نتناقش ونفهم انا بس عاملاه علشان فيه ناس بتدخل تشتم كلام مش محترم جدا ناس مريضه يعنى فعلشان مدخلش فى متاهات وحد يرد وانا ارد وتبقى حاجه مش محترمه
=================================

بصراحه تحدثت في موضوع مهم و شتت انتباهي بملحوظاتك النهائيه بما يناقض صلب ما دافعت عنه و للعلم لو بحثت في قديم الموضوعات بمدونتي سوف تجديني بدات بما يشابه اهتماماتك
=====================================
انا جاوبتك بخصوص الملحوظه هى بس علشان انت متابعنى جديد فمأخدتش بالك
ولا يهمك والكوكب بتاعك وسعيده بحضرتك هنا يا دكتور فى اى وقت

~*§¦§ Appy §¦§*~ said...

Migo Mishmish
==============
المشكله فعلا فى المفاهيم اللى اتغلطت يعنى بالنسبه ليه انا ان حد يشتم حد ده عيب بالنسبه لناس تانيه عادى ما هو يستاهل
جايه يا ميجوو وسلامى لميشو كتير

تــــايه ومش تـــايه said...

متتعبيش نفسك احنا عالم واخدين الدنيا من ورا
يعنى انا مثلا علشان مبدخنش ومبضربش فالعيال بيعتبرونى خنيق بالنسبه ليهم

تحياتى

مصــــري said...

آبي هانم

طب ياريتها جت علي الشخصيات
ده علي الاحداث كمان

الهزيمة....نكسة
الانقلاب....ثورة
الديكتاتورية ...ديموقراطية

وغيره وغيره
احنا بنعمل كده قال ايه بنحافظ علي احساس الناس زي حركة عاقل ورزين كده
بس هانعمل ايه
ازدواجية مش في الفرد بس
ده في المجتمع كله
يعني لو في موقف معكوس مش هايقول ولا عاقل ولا يحزنون

تحياتي صاحبة الخرفان
أسامة

وينكى said...

ايه ده ايه ده
اول مره أجى أطل عليكي من مدة طويله كده ألاقيكى بتخانقى دبان وشك؟؟
هو بصراحه معاكى حق
والموضوع ده انا كنت بافكر فيه النهارده بالذات اول ما صحيت مالنوم على صوت الوليه أم منه جارتى
اهى كلها خنقه
طب وياسيادة اللوا ظبطشي تانى قائمقام حرس الحدود
ايه رأي سعادتك فى الموضوع ده وازاى احنا الجامهور العادى نتعامل معاه؟

الطائر الحزين said...

اختلاط المفاهيم و اختلاط المعانى حتى الحق والباطل اصبح له مفاهيم مختلفة

مشكلتنا كما وضعت انت يدك عليها اننا عاوزين الفكر التيك اواى يعنى معلومة نأخذها من لسان قائلها ايا كانت و نعرفها دون ان نعمل العقل فى معرفة مدى صحتها عقلنا فى أجازة

s.m said...

اولا مش اول زيارة علشان كان فى بوست العزى المهم ماهو دا اختلاف الرؤا اللى اتكلمنا عنه عند نوادى يعنى كل واحد بيشوف كل حاجة من وجهت نظرة زى موضوع حماس انا شايفهم غلط وانتى شايفهم صح وبالتالى كل حاجة فى حياتنا خاضعة للشكل دا يعنى هتشوفى فرد كويس ممكن انا اشوفه غلس او زى ما قولتى قليل الادب لكن محدش الناس بتتفق عليه دا تنوع الحياة لكن انا معاكى فى انها فعلا مفاهيم مغلوطة وخصوصا الطيبة لانها بتتعرف انها عبط رغم انها فطرة الله اللى خلقنا عليها التعامل بالنوايا......
بوست جميل على الرغم من انك فعلا وضحتى سالبيات كتيرة اوى اعتقد ان الكل بيحاول يدرايه

البت المشمشية حلوة بس شقية said...

ههههههههههههههههههههههههههه
صح
بس خلاص

مواطن مصرى نايم said...

عجبتنى جزئية المغرور اوووووووى
دا غير ان البوست فالمجمل تحفة بجد

و انا رديت على البوهى فسؤاله
قلت له
انه يكون بنضارة
الناس اغلبها بتحكم من المظهر مش الجوهر

و الطيب طيب و العبيط عيبط
و البخل لا تفسير له

بوست تحفة يا ابى
الله ينور

اول حاجة عدله اقرها عند حد بعد رجوعى
و كنت متأكد انى حلاقى عندك ما يسرنى

جامد يا كبيبر

أحمد الحيدر said...

مساء الخير ..

كل كلمة من الكلمات التي تفضلتي بذكرها تحمل اكثر من وجه ..

هكذا هي الحياة عموما .. كل منا يراها وفق منظوره ..

ولولا هذا التباين في الاعتقاد لكان الناس نسخة متطابقة وساد الملل المعيشة ..

الموضوع مميزة ..

تقبلي تحياتي :)

عاشــــــ النقاب ـقــــة"نونو" said...

لا ولسة دة لسة بدري
اصل الزمن دة اختلط به الحابل بالنابل
وربنا يرحمنا برحمته

mahasen saber said...

كل المفاهيم اليى عرضتيها صح يا رحاب وان دلت بتدل على الشلل اليى المجتمع هيسببهولنا

وفيه مفهوم يا سلام بئه عليه هو ان كل واحد صاحب دقن او ست منتقبه يبقوا هما على كمال الدين
وانا بتكلم عن تجربه لانى بشوف المفهوم ده فى محيط الشغل كل اليى على هذه الهيئه ليهم نظره مختلفه اما المحجبه ومعتدله او المسلم المعتدل فده بئه بيوصفوا بالمنافقين والمذبذبين

مجتمعنا بئه يحمل مفاهيم بصراحه تودى فى داهيه

tamer.sala7 said...

سبحان الله

هي الودان كل مصيبة لازم الودن تكون طرف فيها

يعني راحة الانسان تبدأ من ودنه

ومفتاح الست هو ودانها

ومن علامات الذكاء برضه شكل الودن

ومفتاح الحاسة الوقية عند الفنان ودانه

والمستمع الجيد هو من له اذن جيدة

بجد تاودان دي مظلومة خالص

باله عليكي يا ابي عايز بوست عن الودان
:D

!!! عارفة ... مش عارف ليه said...

نخلي موضوع الضيق والنرفزة ده على جنب


ماشاء الله عليكي
المفردات ومعانيها دي حاجة هااااايلة

لازم تعملي معجم

في تصحيح المفاهيم المفلوطة

تنافسي بيه معجم مختار الصحاح :)


تحياتي
وليد

EmY said...

هاتي بوسه يا ابي يا مسخره انتي

انتي عارفاني طبعآ ميمي طول عمرها مثال للأدب و الاخلاق و الطيبه و الحنيه و الذوق و كل حاجه حلوه تبقي ميمي علي طول

ولا انتي ليكي رأي تاني

بصي يا سيتي انا معاكي جدآ جدآ في هذا البوست و تعبيرآ عن تأيدي هاقتل مايكل

الناس بتشوف ان الحنين الرومانسي الي بيحب شخص ضعيف و بيعاملوه زي ما يكون من جمعية ايتام بنت مصر

و القاسي قليل الادب السافل البارد ده سوبر مان يا سلام عليه عاقل و واقعي و مش عارفه ايه

حاجه تخنق اكتر ما انا مخنوقه

شمس وقمر said...

جميل اووووووى موضوعك

و الغريبة ان الناس بتقلب المفاهيم و تصدق نفسها و تصدق ان المفهوم الغلط هو الصح و الصح هو الغلط
مش عارفة هو ده بسبب ان الناس اتغيرت
و لا الناس اجبرت نفسها عشان تتغير عشان مش تتعب نفسها و تحاول تبقى صح

تقبلى مرورى

wanna b a physician said...

والله يااببى هى كل المفاهيم عندنا باظت مش بس كدا
يعنى مثلا لما تلاقى واحده لابسه مش كويس وتكلمى حد عندها يقولك خليها تتجوز
يعنى كدا العرسان هتقف طابور
حكم والله
ولا واحد تقوليله انت ليه مش بتسلم على جيرانك حتى قول السلام عليكم وامشى
يقولك انا كدا فى حالى

عالم غريبة
ولا احد منا يخلوا من السلبيات


تحياتى

همس الاحباب said...

اختلط الحابل بالنابل
فاختلطت المفاهيم
وضاعت المعانى
البوست بجد جامد جدا وذكرتى امثلة توضيحية لكل حالة وعجبنى قوى تعريفك للجرىء وقليل الادب
تحياتى

مهندس مصري said...

متفق معاكي في الموضوع ده بنسبة 100% بجد

قوس قزح said...

عارفة ليه بقينا كده ؟
لان كل واحد بقى لابس ماسك مش بتاعه و مصدق انه هو كده
فبالتالى بيفهم غلط
لو كل واحد بقى بطبيعته و عاش الدنيا على انها هيخرج منها زى ما دخلها ..هيفهم صح .. و دايما هيحاول يشوف الجانب الحلو منها .. لان الدنيا متستاهلش كل اللى بيتعمل ده و كل الجرى ده


الاهم من ده اننا لما نشوف الوشوش دى منزعلش منهم اوى لانهم هم نفسهم مكسوفين من نفسهم و بيداروا وشهم وار الماسك ده.. انا بيصعبوا عليا و الله

اما عن الصفات اللى بتقولى عليها دى فهى فعلا مفهومها بيختلف من شخص لتانى .. لان الصفة بتحدد فى نظر الشخص حسب هى له ايه .. يعنى لو شرير هيشوف الطيبة ضعف و هكذا

و اخيرا ..حتى لو فاتحة الكوكب علشان تقلبيه ديسكوتيك .. انتى حرة تعملى فيه اى حاجة انتى عايزاها .. و اللوم على الزائر لو مش عجبه اللى بتعمليه لان ببساطة هو عارف ان فى اكس فوق تقفل المكان و يمشى
كونى زى ما تحبى انتى و مش محتاجة تفهمى حد .. مفيش غير ربنا بس اللى تهتمى انك تكونى مش بعيدة عنه

هاتى بقى الخروف البمبى تعبتيه معاكى يا بتنجانى و تعبتينى :)

قوس قزح said...

عارفة ليه بقينا كده ؟
لان كل واحد بقى لابس ماسك مش بتاعه و مصدق انه هو كده
فبالتالى بيفهم غلط
لو كل واحد بقى بطبيعته و عاش الدنيا على انها هيخرج منها زى ما دخلها ..هيفهم صح .. و دايما هيحاول يشوف الجانب الحلو منها .. لان الدنيا متستاهلش كل اللى بيتعمل ده و كل الجرى ده


الاهم من ده اننا لما نشوف الوشوش دى منزعلش منهم اوى لانهم هم نفسهم مكسوفين من نفسهم و بيداروا وشهم وار الماسك ده.. انا بيصعبوا عليا و الله

اما عن الصفات اللى بتقولى عليها دى فهى فعلا مفهومها بيختلف من شخص لتانى .. لان الصفة بتحدد فى نظر الشخص حسب هى له ايه .. يعنى لو شرير هيشوف الطيبة ضعف و هكذا

و اخيرا ..حتى لو فاتحة الكوكب علشان تقلبيه ديسكوتيك .. انتى حرة تعملى فيه اى حاجة انتى عايزاها .. و اللوم على الزائر لو مش عجبه اللى بتعمليه لان ببساطة هو عارف ان فى اكس فوق تقفل المكان و يمشى
كونى زى ما تحبى انتى و مش محتاجة تفهمى حد .. مفيش غير ربنا بس اللى تهتمى انك تكونى مش بعيدة عنه

هاتى بقى الخروف البمبى تعبتيه معاكى يا بتنجانى و تعبتينى :)

وومن said...

ايه ده في ايه مين اللي طفي النور

اخص عليكي يا آبي والله اتخضيت حسيت ان في قنبلة هاتنفجر اخر البوست

بصي بقي بصي مش عارفة ارد علي ايه ولا علي ايه

بس عارفة ان في ناس بتفرق بين الطيبة والعبط

في حاجات من اللي قولتلي عليها انطباع واحد واخدة عن نفسة علشان مفيش حد اتجرأ مره وقاله الحقيقة

حاجات تانية مجتمعنا هو اللي فرضها علشان احنا ناس تخاف متختشيش بجد

في حاجات بقي الناس بستخدمها كمبررات علشان تحسن من صورة ناس تانية وبتغالط في نفسها لأسباب شخصية

كفاية كدة بقي اروح اشرب بوء مية علشان الخضة بتاعة البوست

Foxology said...

اه من النوعيات دى

بنقابل ناس وبنعيش حياة كلها تناقضات مش عارف ليه ؟

ربنا يتوب علينا بأة

تحياتى :)

ريمان said...

السلام عليكم

هههههههههه


ولله يا آبى اولا انتى دمك خفيف اوى اوى يعنى

وعايزه اقولك كمان انتى فعلا معاكى حق

دايما المصريين كده يفهموا الكلمه من قفلها مش من وشها

بوست فى الجووووووووون

جنّي said...

السلام عليكم

ازيك يا آبي

مش بس المفاهيم اللي انتي ذكرتيها للاسف كل حاجة بقت ملغبطة ومقلوبة تجعل العاقل حيران ..من زمان مش من دلوقتي بواسطة الاعلام والسينما فالعري اصبح تقدمية والالتزام رجعية حتى المشروبات المحرمة ( الخممور) اصبحت مشروبات روحية وغيرها الكثير ..
وسيبك من شوية العيال اللي تقصديهم ..
سلام

الفاتح الجعفري said...

سلام الله عليكم ورحمته وبركاته
معلش يازميلة المعارك هو للاسف الشديد المفاهيم اختلطت وانهارت لان مبقاش في مرجعية الناس ترجعلها يعني اذا كان بيعمل الانسان عمل كويس او سيء هو مش عارف بيعملوا ليه هو بيعمل كده وخلاص ,احد الصالحين يقول:
"كنا نتعامل بالاسلام وعندما فقدناه في معاملاتنا كنا نتعامل بالاخلاق فلما فقدناه صرنا نتعامل بالنخوة و الكرامة فلما فقدناه اصبحنا نتعامل بالعرف فلما فقدناه لم نجد ما نتعامل به"
وده من اهم اسباب اختلال المفاهيم او المفاهيم المغلوطه
ففعلا الان قلة الادب اصبحت جراءه وهقوليك السبب افتحي التليفزيون وشوفي اللي بيحصل من برامج وغيره فعلا شيء في منتهي القذارة ,لما تنزل في بلد مسلمة افلام زي عمارة يعقوبيان وحين مسخرة ومن علي شاكلتهم يبقي نعرف ليه الناس بيحصلها كده , لما نلاقي الاب والام يعلموا الاولاد الغش والكذب علشان يمشوا حالهم يبقي وقتها نعرف ليه اللي بيحصل ده
--
هو انتي وضعتي ايدك علي نقطه في منتهي الاهمية هي نقطة الناتج من مجتمع ضائع بنعيش فيه فعلشان نعالج الحجات دي نرجع للاساس ونعرف السبب ونبدأ نصلح من القاع
--
وفي الاخر احسن شيء دع الملك للمالك ودع الناس لرب الناس
وكما يقول الله تعالي
"وما اكثر الناس ولو حرصت بمؤمنين"
وقوله ايضا
"وما منع الناس ان يؤمنوا اذ جاءهم الهدى ويستغفروا ربهم الا ان تاتيهم سنة الاولين او ياتيهم العذاب قبلا"
وفي النهاية نسأل الله ان نكون كما يحب ويرضي وان يؤتي نفوسنا تقواها
وجزاكم الله كل خير يازميلة المعارك

esraa said...

بصي اللي انتي قلتيه فعلا موجود في الحياه وشفته

الا الولد اللي بيغر من بنت دي عشانها الناس بيحبوها

مش قلتلك الهبل نعمه مايعرفهاش غير المحروم منها

مواطن مصري said...

مش عارف بس انا طيب و الناس شايفني اهبل و ضعيف هو لازم اكون شرير و بلطجي

و منافق

احلى حاجة ان الانسان يكون طبيعي كدة و ميلبسش اقنعة خداعة

جمعاوي صاحب "عيادة أسنان" said...

السلام عليكم

بصى الموضوع كبير اوى وطويل اوى

وانا صراحة طول الموضوع باخاول اكون وجهة نظر بس فعلا مش عارف كده عقلى واقف شوية اليومين دول

دمتى بكل خير ويلا سلام

مسدس صغير said...

فعلا مفاهيم مغلوطة جدا محتاجه تغيير بس مش فيها لأ فى ثقافة شعب

ادم المصرى said...

بجد زمن عجيب وغريب ويجنن

الواحد يكون طيب وفى حالو يضرب على
قفاااااااه من الناس


لكن لما يفترى ويكون يقولو عليه مش محترم ومفترى وقليل الادب

وكل واحد فى عيب مريحو بيطلعلو عفريت بجد والكلام ده فى مصر فقط لئن احنا بلد الت والعجن

مجداوية said...

السلام عليكم

هم دول بس اللي مقلوبين !!!

يا آبي حياتنا كلها بقت زرع بصل

عشان تتعدل المفاهيم

لازم نزرع حاجة تانية غير البصل

لازم نشيل الزرعة دي من جدورها ونزرع صح ودي تقريبا عايزة تسونامي

fahd said...

فعلا يا ابي معاكي حق

اتفق معاكي في معظم اللي قولتيه

لكن ثواني هنا

هو انتي بتراقبي الشعب ولا ايه

انا فكرت امن الدولة بس

لورنس العرب said...

أضيفي: أبو ذقن أو الشيخ، لازم ينضحك عليه، لو جادل في البيع والشراء يقولوا الناس شوف الراجل شيخ وواقف ياخد ويدي في البيع والشراء ازاي

وللأسف جميع السلوكيات اللي تم ذكرها يمكن ان تجدي فيها صفه او أكثر عندنا

أحسن شيء ان الواحد يكون في حاله ويتحفظ برأيه في الآخرين لنفسه
لأن التركيز مع الناس ممكن يجننك

مـحـمـد مـفـيـد said...

زي ما قلت لك
لاننا لم نهتم بأنفسنا واطلقنا العنان للترصد بأحوال الاخرين
فحدث كل هذا

حسن حنفى said...

للاسف فيه ناس كتير زي ما قلتي بتفهم بالعكس وللاسف بيفضلوا معتقدين كده وعاوزين ينقلوا الاعتقاد ده لاي حد ياقبلوه وطبيعي بيعاملوا الناس علي اساس الاعتقاد ده ربنا يرحمنا

:d

ahmed_k said...

إزيك سيادة اللواء عميد أركان حرب
في بعض النقاط متفق معاكي فيها والبعض لأ
مثلا في حالة الطيب أتفق معاكي أنه تغيرت النظره لحامل تلك الصفه ويقال عليه أهبل مع أنه كما ذكرتي الإختلاف بين الصفتين واضح جدا
أما اللي بختلف معاكي فيها مثلا البخيل
عمري بصراحه ما شفت حد بيوصف البخيل بأنه حريص فالبخيل مكروه دوما في مجتمعه ومن المحيطين به
ولو كان هناك تغير في مفاهيم المجتمع فذلك ناتج من التحول إلى الماديه في كل شيئ لدرجة أن من الناس من يعتقد أن في الغنى السعاده والراحه
فأين غنى النفس والروح الذان هم أهم بكثير من غنى المال مع الحرمان من حب
الناس وإحترامهم


ويا آبي كلمه على جمب من أخوكي
خففي من حدتك وكلامك زي أمسح بيه الأرض
لأن مثل تلك التعابير مش بتنطبق على شخصيتك أبدا
وأعلمي أن أفضل علاج للجاهلين هو أن تقولي سلاما
(والذين إذا خاطبهم الجاهلون قالوا سلاما)
تقبلي خالص تحياتي

مصطفي احمد said...

للاسف معظم الناس بقت مفاهيمها مقلوب

عافانا الله

مصطفي احمد said...

للاسف معظم الناس بقت مفاهيمها مقلوب

عافانا الله

blackcairorose said...

هو انا بشوف ان الخطأ او اللبس بين المعنى والمعنى الاخر له الى حد ما تبريراته

لانه لو لاحظنا هنلاقى ان الصفات اللي انتي ذكرتيها بتحمل تفسيرات او مظاهر مختلفة، واللبس بييجى ان الناس بتاخد مظهر واحد وبترجمه على انه الصفة باكملها، وهى علامة عدم نضج او عدم وعي بالدرجة الاولى وهو امر شائع فى مجتمعنا اللي بيستسهل التعميم والنمطية

انا حره said...

بعدك على بالى

ياااااه

صاحب المضيفة said...

لذكل حياتنا كلها بقت مقلوبة وماشية بالعكس


انا ساعات باكون مشلول من تصرفات الناس اللي حوالينا من كتر ما هي غلط

ربنا يرحمنا برحمته ويرضى عنا يارب



كل الود

ساره said...

Appy

اول مره اعلق عندك
بس انا من متابعين كوكبك

وفعلا الناس صارت مفاهيمها مقلوبه عشان بعض الناس اللي كانوا هم اساس هذه المفاهيم مافيهم خير وماعندهم اخلاق فاحبوا ينشرو الفساد عشان يعم التخلف على الجميع

حد فاهم حاجه ... ولا انا :)

تحياتي

Rania said...

عجبنى موضوعك اوووووى
فعلا و الله و الحاجت دى بتفرسنى
و خصوصا الطيبة و الادب
الى بقوا عاملين اكنهم السبب فى انحدار المجتمع و ان الكل بقى سلبى و مش بياخد حقه
اكن الحق بقى انك تتطول لسانك و تفرد غضلاتك

و معاكاى جدا ان الواحد اكيد لازم يبدا بنفسه ماهو لو كل واحد بص لنفسه بصراحه
اكيد هيشوف عيوبه و هيصلح منها
دة لو عايز

تحياتى يا جميله

micheal said...

يا باشا..أنت في البوست ده شرحت تقريبا كل اللي انا كنت كاتبه في الاستاتس الأخيرة لاني زهقت جدا من دماغ الناس وموضوع ان كل حاجة ليها ألف معني لدرجة أن الواحد لازم يفكر ألف مرة قبل ما يقول كلمة أو يعمل حاجة في فيمتو ثانية
بالنوسبة للشخصية فاقلبها من دماغك تماما وطاالما أنت ناجح ومحبوب يبقي طز في أي حاجة تانية
تحياتي دوما

الرابطة وبناء الأمة said...

السلام عليكم ورحمة الله وبركاته
نتقدم بدعوي لك أخي ( أختي ) المدون بمناقشة
محاكمة عادلة
مبارك بين التأييد والرفض
ملف يناقش ويحلل ويضع الحلول
رائيك يهمنا جدا
مع خالص تحياتنا الكتيبة السياسية

أحــوال الهـوي said...

نزلت حاجة جديدة
محتاج رايك
تحياتي

NIDAAL .R said...

الافاق المنافق .. والى بيدعى الثقافة
:D
اوحش حاجتين ممكن بتفقسوا بسرعة جداً
والشخصية المنافقة الى بتروح تقول كلام محصلش وتزود على كلام .. دى شخصية مريضة .. وزارة الصحة كانت حذرت قبل كدة من التعامل معها .. عدوى بقى
...
فاكرة يا آآبى .. لما سألتينى على كتاب فى المعرض انا رديت عليكى بأيه .. قولتلك انا ما اعرفش وانا مش قارئ نهم .....
ليه بقى واحد تانى يروح يتفلسف ويحسس الى قدامه انه مثقف جداً ويعنى التانى هو الجااهل واتريه هو الجاهل
....
زى امبارح فى المترو .. بتاع شبرا
واحد بيسأل واحد بيقوله هو اتعجاه الجيزة من هنا .. وهما كانوا لسة بينزلوا على السلالم الكهربائية
ففيه مدخلين للاتجاهين
لكن الى بيتسأل مش يقولوا مش عارف
لا
قالوا ده انت تطلع تانى وتخرج من المكن وتدخل من الناحية التانية
يعنى كان هيخليه يا عينى يدفع تذكرة تانى اونطاااااا
بسبب ادعاء المعرفة .. ما تقول مش عارف
ناس تخنق والله يا سيادة العقيد أركان حرب آآبى هانم

وعلى فكرة .. اكيد لازم يكون فيه فرق بين الحكمة و بين البرود
الحكمة هى رؤية ما وراء السطور والنجاح فى ايجد التصرف السليم
لكن البرود ده مالوش لا وصف ولا حل
يااااااااااااااااااااااااااااارب

L.G. said...

عزيزتي أبي
آه طبعا كل واحد بيفسر التصرفات على مزاجه عارفة ليه
عشان المعايير مختلة وكمان مختلفة مفيش معيار واحد نقيس عليه
راي فلان ان علان مؤدب وواحد يقول لأ أهبل لأن كل واحد حاطط معيار من عنده

إذا التزمنا جميعا بمعيار الدين
التفرقة حتبقى واضحة جدا ومسافة الالتباس في الحكم ستضيق للغاية

تحياتي

dr.lecter said...

نعيب زماننا والعيب فينا

صيدلانيه طالعه نازله said...

للاسف يا حبيبتى البنى الادم اللى بيكون قليل الادب و صوته عالى الناس بتخاف منه مش بتحترمه لانه مش بيقف على محطات و بالتالى دايما بتبقى ليه مكانه نابعه من خوف الناس مش من حبهم
اما ابو دم تقيل فربنا يبعدهم عنى لانى معنديش مراره و بتجيلى حاله كده اما اشوف حد غلس ابقى كل ما يتكلم ارد عليه لغايه اما احس انى باتخانق مش بارد
ربنا يبعدهم عنى و عنك يارب

~*§¦§ Appy §¦§*~ said...

تايهه ومش تايهه
====================
سواء تعبت نفسى او متعبتهاش هما هيتعبوها والله ناس تجنن بصحيح







مصرى
=========
لا انا عندى اواجهه واحد بالصفه اللى فيه احسن ما انافقه يا اخى حتى بيبقى شكلهم وحش اوى

~*§¦§ Appy §¦§*~ said...

وينكى
=========
حبيبى انت والله ام منه دى لو انا منك اقوم الصبح ازعق لها عارفه جيران يسمعونى على السلم كله يدخل بيته علشان اديت لهم كام وش قبل كده على الطاير فكله اتلم
او اقولك ابعتى ام منه وانا هتصرف معاها تحت امرك معالى الباشا










الطائر الحزين
===============
اشمعنى انا اللى عقلى مبياخدش اجازة بحقد عليكوا

~*§¦§ Appy §¦§*~ said...

s.m
======

اهلا اهلا ايه النور ده يا جماعه حد يجيب هنا كابتشينو
بص يا عمنا اختلاف الروؤى فى حاجات بعيده موافقه عليها انما مثلا فى مبادئ ينفع نختلف يعنى عارف ايه مفهومه الجرئه معناها ان الواحد يواجهه ويتناقش وميخافش ولو موقف يحله الجرأه اللى عملتها انا وانت ونودى فى النقاش انما قله الادب ان لا سمح الله كان واحد مننا يشتم حد ويقل ادبه ويتعالا عليه
فهمت وجهه نظرى يعنى انا عندى المبادئ مينفعش نقول بتختلف من حد لحد
بجد سعيده بزيارتك







البنت المشمشيه
===============
:)

~*§¦§ Appy §¦§*~ said...

مواطن مصرى نايم
=================
ايوه كده يا راجل ارجع خلى الواحد يعرف يعمل الاصطباحه افتح بقى القهوة ورش قدامها
انت لو عرفت موضوع المثقف الجامد ده اختك فقسته فى تلات ثوانى اى خدعه يا عم









احمد حيدر
===========
معاك ان لكل شخص روئ بس فيه مبادئ مينفعش يكون له رؤيتين
ميرسى لحضرتك ونورت الكوكب

~*§¦§ Appy §¦§*~ said...

عاشقه النقاب
=============
لا اللهى يسترك دا كده انا اخلص منكم بدرى يا بنتى حرام كده
نورتى يا نونو







محاسن صابر
==============
ايون المبدأ بتاع لابس ايه ده يووووووووا بيموتنى بس سيبك اختك جدعه وبتخبط فى حيطه لا تكلكى وعارفه ده ازاى اثبتى انك كويسه باخلاقك واياكى لما حد من دول يغلط فى كلمه مثلا تقولى له عيب على دقنك ولا على اللى لابسه او لابساه ردى انتى بادب اكتر علشان هو يتحرج وبكده تبقى كسبتيه وينوبك ثواب وخليته يفكه من التشدد اللى هو فيه ويحس بغلطه بجد وفيه طبعا ناس تانيه ولا هيأثر بس عادى يعنى
هما بس المشكله زى ما احنا واخدين عنهم الفكره دى هما فاكرين ان غير المحجبات او اللى لابسين حجاب عادى مش ملتزمين فهمتى يا جمر بوسه لبودى كبيره

~*§¦§ Appy §¦§*~ said...

تامر صلاح
===========
هههههههههه مش هى مركز خدمه وصيانه السمع انت تؤمر يا تامر عنيه ما هى سبب البلاوى صحيح ويا سلام لو سمعت غلط تخرب بلاد







عارفه مش عارف ليه
====================
ايه ده انت متعرفش ان حضرتى عامله المعدم ده من بدرى اسأل عليه فى السوق حضرتك هتلاقيه قوله بس معجم ابى الصحاح

~*§¦§ Appy §¦§*~ said...

ايمى
=======
لا عيب يا جزرة مش قدام الناس انا مرتبطه ههههههههههههه
حبيبى انت يا فاهمنى وبعدين هو انا خلفت الا ايمى انا عندى الا ايمى ده الادب جزرة دى الاخلاق جزرة
يالا بقى مفيش عزومه على كافتشينو
منورة فراو ميمى







شمس وقمر
==========
هى النس عملت كده علشان تدارى ضعفها
ونورتى يا شمس ولا انتى قمر اممممممم عموما منورين انتم الاتنين

~*§¦§ Appy §¦§*~ said...

wanna b a physician
=====================
هههههههههه ده على كده تلات اربع البنات هتتجوز لانهم بيلبسوا اى كلام ومش كويس ههههههههه
لا بجد موضوع الجيرن ده بقى يا سيدى ساعات بشوفه صح ليه انا عندى جارة لزجه يعنى مره بقول سلام عليكوا لقيتها ازيك اتفضلى انتى مبتعبرنيش ليه يالهوى عرفت بقى ساعتها حرمت بس هى مساله سينس انك تحس ده كويس او لا
لان برضه الجار بقى زى النار دلوقتى
نورت يا اخويا الصغير ويا رب تكون بخير دلوقتى








همس الاحباب
=============
ميرسى يا ابو همس ربنا يكرمك يا فندم

~*§¦§ Appy §¦§*~ said...

مهندس مصرى
=============
لووووووووولى لا بجد مش مصدقه فلت من تحت ايدك وانك تناكف فيه يا محمد اشهد ان لا اله الا الله
منور يا هندسه








قوس قزح
=========
بما اننا اتناقشنا فى هذا الموضوع خارج نطاق الخدمه
تحبى بقى فى النهايه افتح ديسكو شرقى ولا غربى فى مدونتى ههههههههه
والخروف هبعته لكى تليفيرى

~*§¦§ Appy §¦§*~ said...

وومن
========
عارفه برضه بيغيظنى الناس اللى معروفين بخبثهم ويحاولوا يبينوا انهم طيبين حاجه تجيب شلل بجد
ممكن تجيبى القله معاكى اشرب لو سمحتى ومتحطيش ايدك على الكهربا دىالفيشه يا بنتى مش المفتاح كل يوم كده اشدك منها









فوكس
========
علشان احنا سكتنا للناس دى يا فوكس

~*§¦§ Appy §¦§*~ said...

ريمان
=========
ميرسى يا حبيبتى ربنا يخليكى ليه ويعدلها فى وشهم ويفهموها صح







جنى
========
كل حاجه موجوده من زمان بس اعتقد الناس هى اللى اتغيرت يا جنى وبقى عندهم قابليه لده

~*§¦§ Appy §¦§*~ said...

الفاتح الجعفرى
===============
يا زميل المعارك الناس فعلا بقت معندهاش استعداد تفهم ولا تعرف غلطها وبقت بتستسهل علشان تعيش
يالا هنعمل ايه اهى دنيا منور يا زميل المعارك يا بتاع الاقاليم








اسراء
========
ربنا يدمها عليه نعمه يا بنتى وميحرمهوش منها

~*§¦§ Appy §¦§*~ said...

مواطن مصرى
===========
عمر الانسان ما بيعرف يكون عكس ما خلقه ربنا
بس بيعرف يمثل انه العكس
خليك زى ما انت









جمعاوى
========
معلش حقك علينا مشاغلك كتير وشغلناك معانا
جبت الكتب ولا لا

~*§¦§ Appy §¦§*~ said...

مسدس صغير
==========

طيب يا ريت نساعد بعض طالما متفقين






ادم المصرى
==========
لا هو عند كل العرب مش المصريين بس ركز انت وانت هتعرف

~*§¦§ Appy §¦§*~ said...

مجداويه
=========
هما دول اللى قدرت اجيبهم يا مانتى تعبت من كتر التفكير بصراحه يعنى
وبعدين بلاش زرع بصل خليها حاجه تانيه والنبى







فهد
=======
لا ده فيه ناس مكلفه نفسها ليل ونهار لمراقبتى والله لو امن الدوله مش هيعملوا معايا الواجب ده فالبالتالى بتكعبل فيهم

~*§¦§ Appy §¦§*~ said...

لورانس العرب
==============
اخلينى فى حالى لو مفيش اذيه بتجيلى من الاشكال دى انما اذيه يبقى لا كده كتير يا لورانس







محمد مفيد
==========
صح يا محمد وانا متفقه معاك فيه

~*§¦§ Appy §¦§*~ said...

حسن حنفى
========
لا دول علشان مش عاوزين يفكروا ولا يتعبوا مخهم








احمد
=====
انا شوفت والله
سوفت ازاى انت مشوفتش بس انا شوفت ركز انت وانت هتعرف
مين قال انها متطبقش على شخصيتى يا احمد بالعكس انت شوفت الجانب الكويس الهادى لان تقريبا كل اللى حوليه محترمين انما لما واحد بيقل ادبه انا فعلا بعمل ده مش هزار والله

~*§¦§ Appy §¦§*~ said...

مصطفى احمد
============
يا رب نورت حضرتك








blackcairorose
================
اهلا بيكى
على فكره المظهر مش صفه واحد ولا كامله بس فيه حاجه اسمها عينى بترتاح لفين يعنى مثلا متجيش واحد محجبه ولابسه ضيق وتعيب على لبسى ولا واحده لابسه لبس من ايام هيا بنا نخترع الشوال وتتكلم عن لبسى
او واحد بكرش ومنزل البنطلون ويقولى اصل الالوان مش عارف ايه
فهمتى وجهه نظرى
وبعدين اه المفاهيم ممكن تتغير انما المبادئ لا اكيد
سعيده بتعليقك ونورتى

~*§¦§ Appy §¦§*~ said...

انا حره
==========
:)







صاحب المضيفه
===============
بعد الشر عنك يا انس ان شاء الله هما

~*§¦§ Appy §¦§*~ said...

سارة
=======
اهلا بيكى
انا فاهمه وكلامك صح وضيفى ليه انهم مبيفكروش







رانيا
=========
اللى بيغيظنى اكتر البنات اللى عاملين محترمين وبيشتموا ويقلوا ادبهم والناس شيفاهم وعامله مش واخده بالها
حاجه بقت قرف بجد

~*§¦§ Appy §¦§*~ said...

ميشو
========
ده تقارب ادمغه بس لو سمحت روح بعيد علشان النفس كده
منور يا ريس







نضال
========
هههههههههههههه هموت منك يا سوسه اتهد يا واد انت
ماشى علشان انت ابنى هفوتها لك خالص يا نضال
منور يا باشا هنا وهناك وفى كل مكان
وبطل تقولى اسالى مثقفين بير سلم

~*§¦§ Appy §¦§*~ said...

l.G
=======

ايه النور ده اخيرا حضرتك ظهرتى
نورتى والله موافقهعلى كلامك يا فندم







dr.lecteR
=============
هو اناعيبت فى زمان انا بعيب فيا اهو انت بس اللى مش واخد بالك

~*§¦§ Appy §¦§*~ said...

صيدلانيه طالعه نازله
======================
وحشتينى خالص خالص
كله الا ابو دم تقيل وبارد ده عاااااااااا مش قادره اقولك مدى الكره اللى بينا يا حبيبتى

son's egypt said...

السلام عليكم
يمكن قلب الحقايق طبيعة بشرية
ويمكن علشان دايما بناخد الامور من الظاهر بس
يعني مش بندخل في صلب الموضوع
يمكن اكيد ده السبب في مشاكل كتيرة

انا ودماغي said...

البوست عجبنى أوى و فعلا فى ناس كتير كدة بيفسروا كل حاجة على مزاجهم
و بضايق اوى بالذات لما يكونو فى حد محترم و يقولوا عليه ده أهبل و قليل الأدب اللى مترباش أصلا يقولوا ده جامد و بيعرف ياخد حقه

المفاهيم عند الناس أتلخبطت...بس عند الناس العاقلة لأ و هما دول اللى يهمونا لأن الناس اللى مش بتفهم حاجة اصلا المفروض ميهمناش رأيها