.jfif)
.jpg)
الكلمه دى بتتردد جوه ناس كتير وبتتردد من على لسان ناس كتير اوى فى حياتنا سواء اهل عاوزينا نبقى احسن سواء اغراب بيحبطونا سواء اصدقاء خايفين علينا او برضه بيحبطونا
وعلى الرغم من انها كلمه واحده ولكن بتتنوع نواياها واللى وراها كل وقت على حسب اللى بيقولها
عاوزة اسالكم حاجات فضفضه زى ما بنلعب ساعات بما ان احنا اخر الاسبوع والاحداث السياسيه عملت قلبى زى اللى ماسك مبشره وبيبشر صابون او اللى استفرد بلوح خشب وبيقصه بمنشار حامى
فقولت نلعب شويه
1- يعنى ايه فشل بالنسبه ليكم؟
2- ايه الحاجه اللى انت حاسس انك فشلت فيها ؟
3- عملت ايه علشان متوصلش للفشل ده عملت ايه بكل ضمير مش كروته يعنى ومحدش يطلع نفسه دور ضحيه اصل انتم عارفين ايه مصيره؟
4- لما فشلت ايه كان احساسك ؟ واحساس اللى حواليك؟
5- حاسس انك راضيت ضميرك علشان متفشلش ولا كان فيه عوامل خارجيه؟
امم ده اللى فى بالى دلوقتى لو عندكم اى زيادات قولوها وكله بالدور محدش يتخانق مع اللى جنبه علشان يحكى
كل واحد له الشزلونج بتاعه يمدد عليه دا انتم هتشوفوا ايام
وانا هشغل لكم موسيقى محبطه ويأسه علشان اخليكم تأكلوا اللحاف اللى متغطيين بيه والمشابك وكل حاجه تقابلكوا
يالا اتمسوا بالخير بقى وعكرتوف عليكم
كان معكم اساذ ورئيس قسم المراض المناخوليا قسم اول العباسيه كولج ابى هانم
حكمه الامبراطورة
السلطان من لا يعرفه السلطان
41 اخبط وقول رايك:
فشل على الصبح كده
إيه التفاؤل ده
بصى يا ستى
الفشل يختلف منظوره من شخص لآخر
أنا من رأيى إن ما ينفعش حد يحكم على أى حد تانى إنه فاشل
بمعنى
لو انا مثلاً مهندس
فيه ناس بتعتبر ده فى حد ذاته نجاح
إنما لما أحس إنى كنت ممكن أكون دكتور مهندس ومبقتش يبقى انا حاسس إنى فاشل
المهم
الفشل ما هو إلا
"عدم الحصول على ما نتمنى"
السؤال الثانى
أى حاجة أتمنتها ومحصلتش عليها
التالت
بطلت أتمنى
الرابع
إحباط واللى حواليا شفقة
الخامس
لأ طبعاً ما راضيتش ضميرى اومال ليه حاسس بالندم لحد النهاردة
وكفاية كده أسئلة محرجة بقى
علشان أنا بتضايقنى كلمة فاشل
تحياتى
تصدقي يا آبي لو قلتلك اني ماعرفتش الفشل في حياتي ..رغم اني ماحققتش حاجه من اللي حلمت بيها ..يعني احلامي واللي خططت له حاجه .. والطريق اللي مشيت فيه حاجه تانيه خالص وسبحان الله ماحسيتش للحظه اني فشلت لأني كنت سعيده بكل خطوة باخدها حتى لو ماكانتش ضمن احلامي وحتى لو لقيت نفسي في مسار تاني تماما بس راضيه الحمدلله
لكن عارفه يا آبي لما تكوني انتي من جواكي حاجه والصورة اللي تتاخد عنك حاجه تانية فتحاولي انك تغيريها ومع ذلك ماتقدريش هنا بقى فعلا بشعر بالفشل المصاحب بإحساس بالظلم بس عادي يعني الحمدلله على كل شئ :)
ميخو
========
هع هع انت اول واحد وبتهرب لا يا ريس احكى موقف ونتناقش بس شكلك بتعترف فعلا بالحكيكه العاريه لانك قولت انا مرضتش ضميرى
يالا هديلك جايزه اول تعليق واول اعتراف بصراحه فيه شكولا عندى مبحبهاش هبعتها لك
آبى هانم
هههههه
لأ أنا ما بحبش الشيكولاتة
بس هاحكيلك على حاجة مضايقانى قوى
انا متضايق علشان مطلعتش دكتور فى الجامعة
وكنت مقصر جداً فى دراستى
عارفة أنا كنت بذاكر قبل الامتحان بيومين بلم المنهج كله
وتقريباً كنت بجيب تقديرات كويسة زى باقى زمايلى اللى نازلين طحن طول السنة
وطبعاً ده من رابع المستحيلات فى كلية زى كلية الهندسة دى
والله أنا فاكر واحد زميلى كان معايا فى السكن
كان بيشد فى شعره وبيقولى
أنا بقى مش هاسيبك إلا لما أعرف إنت بتنجح أصلاً إزاى
ياعم أنا مفحوت طول السنة وإنت مقضيها كوتشيتة وخروجات ولا بتحضر حتى امتحانات أعمال السنة
وفى الآخر بتجيب زى زيك ويمكن أكتر كمان
شفتى بقى أنا قصرت أد إيه فى حق نفسى
ظلمت نفسى كتير قوى والله
آه فيه حاجة تانية
أول ما دخلت عالم التدوين
شتمت نفسى إنى أتأخرت قوى فى الخطوة دى عارفة أتأخرت أد إيه
أتأخرت 8 سنين
لإنى فى سنة 2001 كان عندى موقع شخصى على النت بس مكنتش عارف أستغله كويس وقفلته
انا أتكلمت كتير قوى
سلام بقى لحسن أجبلك القديم والجديد
أنا أصلى بعز الرغى زى عينيا تمام
ههههههه
تحياتى
صباحك سكر زياده ليهمن الصبح كه خلتيني عياط لان حياتي كل فشل
فشل هي
إحدى المحطات التي تقف عندها وأنت تركب قطار الحياة، وليس معنى هذا أن تقف في هذه المحطة وتعتقد أنها المحطة الأخيرة التي وصلت إليها.. إبدأ..
فالقطار سيتحرك وسيطلق صفارته لينطلق من جديد،وعليك أن تنتهز الفرصة وتسرع في الركوب قبل أن يمضي وتصبح وحيداً..
المهم أن تركب حتى لو أدى بك الأمر أن تتشعبط.. وسوف تكتشف ان في القطار وجوها جديدة لم تقابلها في المحطات السابقة، ووجوها قديمة تعودت على النظر إليها والتعامل معها، وعليك أن تجرب الركاب الجدد.. أن تتعرف عليهم وتستفيد من خبراتهم.. ان تمد إليهم يديك،
وتأكد بأنك ستجد من يرشدك إلى طريق النجاح..
قد تقف في محطة أخرى من الفشل، فلا تدع اليأس يتغلغل إلى نفسك،
ولا تحاول أن تلوي عنقك إلى الخلف أو تقف في مكانك وكأن الكرة الأرضية قد توقفت عقاربها عند هذه المحطة، فالحياة لن تتوقف وعقارب الساعة لا تعود إلى الوراء من أجلك..
وعليك أن تركب القطار مرة اخرى، ولكن في هذه المرة حاول أن تغير المقصورة والمكان، وان تغير من طريقة تعاملك مع الآخرين..
وتأكد ان لكل مقصورة في الحياة أناسا غير الذين قابلتهم في حياتك السابقة، وقد تكتشف في النهاية ان فشلك ليس سببه الاخرين ولكن الفشل نابع من نفسك وعدم تقديرك للأمور وكيفية التعامل معها و مع الاخرين..
المهم لا تقف حائرا عند محطة الفشل الأولى أو الثانية أو الثالثة..
ولا تعاقب نفسك بالنظر إلى الخلف والى الماضي.. ولكن اجعل نظرتك دائما متجهة إلى الغد..وتأكد ان الغد سيكون اجمل من اليوم..واليوم سيكون اكثر بهاء وجمال من الأمس.. حاول ولا تيأس، وثق انك ستتجاوز محطة الفشل مادام هناك امل يراودك للنجاح!!
__________________
لكن انا مش اهكذب انا يأست
البوست موضوعها مهم جدا لأن حل المشكلة بيبدأ من معرفتها :)
1- الفشل بالنسبة لى هو الأخفاق فى الوصول للهدف اللى انا عاوز اوصله
2- حاسس انى فشلت ف انى اغير حاجات كتيرة فى بلدى كان لازم تتغير على الأقل مفضلش ساكت أو على الأصح مفضلش أأذن فى مالطا
3- استخدمت قلمى وورقى وكتبت وناقشت واتناقشت لكن للأسف يبقى الحال كما هو عليه التأثير ايجابى اه لكن محدود جدا لدرجة انى بحس انى لوحدى اللى بعمل كدة
4- لما فشلت مزعلتش لأنى على الأقل كنت ايجابى مفضلتش ساكت واللى حواليا كانو عندهم نفس الشعور اللى اتأثرو بالتأثير الأيجابى المحدود اللى اتكلمت عنه فى النقطة التالتة
5- حاسس انى راضيت ضميرى الحمد لله والعوامل الخارجية كتيرة ولا داعى للذكر
بس :)
بصى ياستى موضوع الفشل دة هجى اتكلم فية اول ما النتيجة تطلع يوم 15\7
من اساليب البرمجه السلبيةتكرار مثل هذه الكلمات المحبطة التي قد تؤدي في النهايه الي عكس مبتغاها من قائلها
و اجابة لاسالتك
1- الفشل هو عدم المحاولة بجهد للوصول الي الهدف
2-اكتساب محبة كل الناس لم استطع الوصول اليه الي الان رغم محاولاتي الكثيرة
3- التقرب الي الناس محاولة فهمهم قبل الحكم عليهم ابداء الراي و عدم الخوض في النصيحه لانها تزعج الاخرين استخدام الكلمات الايجابيه لمعالجة النواقص واشياء اخري كثيرة
4-حينما تبذل من الجهد وتفشل يختلط الاحساس بالرضا و الضيق و بعد فترة يتغلب الرضا حينما اردد و ما تشاؤون الا ما شاء الله
و يختلف راي من حولي علي حسب علاقة الفشل بهم و غالبا يكون محبط و اتعرض لاتهامات عظيمة و لولا هذا الاحساس بالرضا لكنت مت من زمان
علي فكرة انا مش ممد علي الشيزلونج
زريني و الا انا فشلت في اكتساب صداقتك
تحياتي
أصبحنا وأصبح الملك لله
الفشل هو في فشل أكتر من كل اللي حوالينا
بصي يا ستي الفشل من وجهة نظري مش فشل مادي لأ
الفشل الحقيقي في النجاح ماديا وعدم التوفيق في الوصول للسعاده والرضا وراحة البال يعني لما واحد ياجي ينام بليل ميعرفش ينام من الهموم فهذا فاشل
والفشل الأكبر في إنقضاء العمر قبل التوبه والحصول على رضا الله سبحانه وتعالى
فقمة الفشل والعياذ بالله هو دخول جهنم
وقمة النجاح هو الفوز بجنة الله سبحانه في الآخره
والسلااااام ختام
ليه بس بتفكريني بالذي مضى
الفشل هو عدم تحقيق الهدف من الشيء بعد السعي إليه فتره طويله -ده من وجهة نظري طبعا-
2- عدم تحقيق الهدف انا كنت بعتبره فشل ولكنه قدر من الله الحقيقه، يعني ساعات الواحد كان بيتخيل انه لو كان حصل معاه حاجه معينه كان وضعه تغير لكنها نظره ضيقه وبنعرف اننا كنا غلطانين بعدها بفتره
3- انا لم افعل شيء- انا بشتغل في الحاجه اللي عاوزها واترك نفسي للتيار
4- الحقيقه لما بفشل بنطوي فتره كده، بقفل الموبايلين ومش بدخل النت وبقعد على جنب كده شويه، بس برجع زي الاول على طول
5- الحقيقه وبدون مبالغه- 90% من مواقف الفشل اللي تعرضت لها كان بسبب عوامل خارجيه، وبالتحديد اقرب الاقربين- ولا تعليق!
هههههههههههههههه
صباح الفشل و الاحباط
بيعجبني اختياراك للمواضيع و توقيتاتها الصراحة
1-فشل بالنشبة ليا اني بحاول اتخرج من جامعة زبالة زي عين شمس و مش عارف
2-الاجابة السؤال السابق مع العلم اني بذاكر و مجتهد
3-عملت اني بحضر كل محاضراتي و بدخل المكتبة و اعمل ابحاثي كاملة في حين ان محدش بيحضر ام المحاضرات اصلا و بينجحوا ولاد ....
4-كان احساس رائع الصراحة و اللي حواليا قالوا مبروك عقبال ما تخويها و خويتها كمان
5-انا كل سنة برضي ام ضمير بس واضح اني لازم ارضي الدكاترة ...بس هما عينهم زيغة وانا اسمي عادل للاسف
ههههههههههههههه
بصي يا رحاب انا اول مره اعلق عندك رغم اني متبعاكي من فتره
مدونتي لذيذه جدا
اما عن الفشل والاحباط ده فالحمدلله مافشلتش في اي حاجه في حياتي غير الفشل الاجتماعي.
مش بعرف اندمج مع الناس بسرعه وبتكسف اوي وبيفتكروني تنكه وانا مش كده خالص بس باخد علي الناس بعد وقت طويل.
لو عندك حل يا دكتوره ابقي قوليلي
تحياتي
طيب نبدأ الاجابه على الامتحان الصعب ده .... يا مسهل
الفشل هو عدم تحقيق شيء رغبت وربما سعيت في تحقيقه
الحاجه اللي فشلت فيها .... اني اكون انسانه بتخدم المجتمع اللي حواليها
عملت ايه علشان ما أوصلش ..... موش كتير الصراحه ...... لأني انشغلت بنفسي عن خدمه الناس ..... دراسه ووجع قلب
لما فشلت حسيت بعدم رضا عن النفس ما زال يلازمني ..... اللي حواليا شايفين اني موش فاشله طالما الشغل تمام وخلاص
لا انا ما رضيتش ضميري طبعا ..... بس بحاول اكون افضل علشان اقدر افيد في مجال شغلي اللي يمكن اضيق من حلمي
بس خلاص
حجاوب عليهم سؤال سؤال بس حبتدي بسؤال بريء ليا:هو البوست ده عام ولا فيه إسقاط
؟
:))
نجاوب بقي
1-يعني عدم القدرة علي تنفيذ أي رغبة من الرغبات العديدة المكبوتة والمشروعة كلها لحسن فيه ناس بعيد عنك بتفهم كلمة مكبوتة دي أني عاوز أغتصب واحدة ولا أتحرحش بيها
:)
وبما أن أداة التنفيذ الوحيدة مش موجودة ،فبالتالي الاحساس بالفشل بيتولد
2-التكيف بمعني أني مقتنع وواثق جدا الحمد لله من موهبتي في مجال معين ولكن لما بخرج منه ببقي عامل زي الصرصار ودي نقطة قد تكون سلبية لان فيه ناس كتير عندها حتة التكيف أني النهاردة ممكن أشتغل مثلا في وظيفة خدمة عملاء بعدها مراجع لغوي بعدها في هيئة إغاثة لاجئين وبعدها موظف في شركة طيران وأنجح فيهم كلهم..انا بقي مش كده ومش عارف أكون كده..مجحت نجاح ساحق في اللي بفهم فيه وفشلت بنفس درجة هذا النجاح في اللي مش بفهم فيه
3-عملت 100+ إنترفيو..كفاية ولا لازم يبقوا ألف ليلة وليلة
:)
80% منهم أشعر بالرضا التام نحو أدائي فيهم
4-إحساسي أنتي عارفاه كويس..مخنوق وعندي كبت وبحاول أدخل في المجال اللي بفهم فيه بكل الطرق رغم خطئي الأخير اللي كان سببه الضغط العصبي الهايل اللي شل تفكيري وخلاني أقع في غلطة موقعتش فيها علي مدار الاربع سنين اللي فاتوا رغم أن المفروض خبرتي زادت دلوقتي
إحساس اللي حواليا مخنوقين أكتر مني وزهقوا وجابوا جاز
5-جدا جدا..ضميري مستريح والحمد لله رغم شعوري بعقدة الذنب في الموقف الأخير وبعض المواقف في جزء من ال20% من الانترفيوهات اللي قلتلك عليهم
اه كان فيه عوامل خارجية وغير طبيعية كمان صادفتني وكان لها دور في الحال اللي أنا فيه..مش أنا مثلا اللي خليت واحد مجنون يتربص بيا في جريدة الكورة اليوم ويهزأني بدون سبب قدام الكل وأضطر أسيب الجورنال وأنا في أوج نجاحي بكل ما تحمله كلمة أوج من معاني
مش أنا اللي خليت راديو حريتنا يقول مفيش فلوس وبالتالي أضطر اصرف عليهم من جيبي لزوم المشاوير والتغطيات الصحفية بتاعتهم وبالتالي أضطر أسيب وظيفة تانية ناجح فيها لاني لا أملك قدرة الصرف عليهم ولو شهر
:)
حستني الروشتة بقي يا دكتور مناخوليا
:)
باي
يعنى ايه فشل بالنسبه ليكم؟
الفشل هو كابوس حياتى
اكتر حاجه بخاف وبترعب منها
او الحاجه الوحيدة اللى بخاف منها
وحتى هذة اللحظه مقدرتش اتغلب على خوفى دة
المشكله مش فى الحاجه اللى فشلت فيها
المشكله فى الاحساس بالفشل نفسه
وسيان بقى ان كان حجم الفشل دة ضخم جدا
او حتى فشل فى حاجه تافهه
المهم انى فشلت
دى النقطه اللى بتوجعنى
ايه الحاجه اللى انت حاسس انك فشلت فيها ؟
يوووووووووووووووووووووووووووووووووووووووووووووووووووة
كتيييييييييييييييير
ممكن تغيرى السؤال وتخليه
ايه الحاجه اللى مفشلتش فيها
عملت ايه علشان متوصلش للفشل ده عملت ايه بكل ضمير مش كروته
امممممممم
اقولك عملت ايه
المزيد من الخوف من الفشل
واللى ادى بالضرورة الى رعب اكبر واعلى
مما يؤدى لانخفاض مستمر فى الاداء
مما يترتب عليه
المزيد من الفشل
لما فشلت ايه كان احساسك ؟ واحساس اللى حواليك؟
كان احساسى ايه
اقولك
هو كان احساس ممتع جدا
يعنى بالظبط زى احساسك كدة وانتى بتاكلى ملوخيه حمضانه مخلوطه بالعسل الاسود والبيض الاومليت الممشش
اما عن احساس اللى حواليا
اعتقد اى حد هياكل اكله زى دى مش هيحس باللى حواليه اصلا
حاسس انك راضيت ضميرك علشان متفشلش ولا كان فيه عوامل خارجيه؟
لا انا مرضيتش ضميرى
احيانا كان ضميرى راضى وكنت بعمل اللى عليا وزيادة
بس غالبا لأ
والعوامل الخارجيه كانت موجودة دايما
واللى يتلسع من الولعه ينفخ فى الجيلاتى
انا بقي ح اجاوب بطريقة تانية
من هم الفاشلون ؟؟
الفاشلون هم اناس كانوا اقرب الي النجاح عندما توقفوا
يعني مولانا اديسون اللي اخترع اللمبة قعد يحاول اكتر من 999 مرة لو كان وقف محاولاته عند المحاولة رقم 10 او حتي رقم 100 او 200 في الوقت ده كنا حنقول اديسون فاشل واحنا لسة قاعدين من غير اي نور
الخلاصة مفيش حد فاشل بس في حد معندوش صبر واستسلم للفشل قبل خطوة واحدة من النجاح
يعني انا مثلا بقالي كام سنة بدرس وروحت كام كلية ولغاية دلوقتي لسة في تانية تجارة ومع ذلك لسة عندي امل وبجاول ومش وحفشل ان شاء الله
ويا انا يا وزارة التعليم العالي
علي فكرة انا مفشلتش في اي حاجة او بحسب تعريف الفشل بالنسبة ليا انا مستسلمتش لأي نوع من انواع الفشل غير اني فشلت في تكوين صداقات
هي ناقصة احباط يا بنتي
الكلمة دي اكتر كلمة بكرهها في حياتي و اسوأ احساس في الدنيا
السلام عليكم
انتى بقى هتقلبى علينا المواجع
وتخلى الواحد يجيب القديم والجديد ليه
عموما انا اول مرة احس بالفشل بعد ما دخلت الكليه
لانى وبكل فخر دخلت هندسة وفشلت فيها فشل زريع
هو انا صحيح كنت مقصر ومكنتش بحضر ولا عارف ايه المواد اللى عليا
بس ده ميمنعش انى حسيت بالفشل خصوصا لما اتفصلت وروحت كليه العظماء والعباقرة التجارة
وادينى دلوقتى عقبال ما تشوفى ولادك
محاسب قااااااااااااااااااااد الدنيا
سلالالالالالالالالالالالالالالالالالالالالالالالالالالام
كل الردود بتجاوب بطريقة عامة و لا تذكر التفاصيل المحددة لتجارب الفشل. حاولي تفتحي التعليق بالانونيمس يمكن المعلقين يشعروا بحرية اكثر و هما بيتكلموا و محدش عارفهم. و حاجة ثانية ياريت تبتدي انت بسرد تجاربتك مع الفشل حتي تشجعي باقي المعلقين
1- يعنى ايه فشل بالنسبه ليكم؟
الفشل لو هكتب عنة هكتب مواويل
الفشل في كل مكان محاصرني كل ما اتمنى حاجة و اسعى ليها و اجتهد في الاخر افشل في الحصول عليها
الفشل في صداقاتي لما بيكتنشف كل يوم حقيقة كل واحد بأنة مصلحجي
الفشل في الدراسة
الفشل بكل حاجة تؤدي في الاخر ب الاحباط و الاكتتئاب مخفيش عليكي أني كل لحظة بفكر في الانتحار و الموت
2- ايه الحاجه اللى انت حاسس انك فشلت فيها ؟
حياتي كل حاجة
3- عملت ايه علشان متوصلش للفشل ده عملت ايه بكل ضمير مش كروته يعنى ومحدش يطلع نفسه دور ضحيه اصل انتم عارفين ايه مصيره؟
بحاول و بجتهد بس بفشل اة فية حاجات كروت فيها و فية حاجات بجتهد فيها بس مجبش النتيجة الي بتوقعها
4- لما فشلت ايه كان احساسك ؟ واحساس اللى حواليك؟
انتي اكيد عارفة الاحساس الي حواليا اما احساس زي ما قولت وصلت ل الاكتئاب و الاحباط دة غير اوقات بفكر في الموت
5- حاسس انك راضيت ضميرك علشان متفشلش ولا كان فيه عوامل خارجيه؟
حتى الان مرضتش ضميري
مساء السعادة و الاحلام
شوفي يا ابي انا حسيت بالفشل لما كنت اتابع دراستي الجامعية في الحقوق لما وصلت للسنة الثانية شفت ان الت الوالدة مش حتقدر على مصاريفي و قلت اني لازم اخرج من الجامعة و مش حتابع لكن بيني و بينك في تلك الفترة و مع شقاوة الشباب مكانش عندي نفس اكمل و عملت تلك الحجة
لكن دلوقتي و الله العظيم ندمان حيث لا ينفع الندم
مودتي
الفشل وما ادراك ما الفشل
بجوبك بكل امانه
يعنى ايه فشل بالنسبه ليكم؟
الفشل بالنسبه لي لما الواحد مايحاول يسعى لتحقيق احلامه
يعنى يبغي كل شئ يجي لعنده مايتعب في شئ
وكل واحد على الاقل حاول انه يحقق احلامه ويسعي فى الموضوع حتى وان ما حصل انا اعتبره انسان غير فاشل لانه يكفيه شرف المحاوله
.....................
2- ايه الحاجه اللى انت حاسس انك
فشلت فيها ؟
فشلت في حاجات كثير
...........................
3- عملت ايه علشان متوصلش للفشل ده عملت ايه بكل ضمير مش كروته يعنى ومحدش يطلع نفسه دور ضحيه اصل انتم عارفين ايه مصيره؟
والله ولا عملت شئ لان الموضوع كان خـــــــــــــــارج عن قدرتي
......................
4- لما فشلت ايه كان احساسك ؟ واحساس اللى حواليك؟
حسيت ان طموحي اتحطم .. وانى ضعيفه ... وصغيره جدا فى المجتمع ... لانه فيه اشياء ثانيه اقوى منى تفرض على مسار معين
احساس اللي حولي ... يكونوا متعاطفين معاي لانهم عارفين الظروف اللي سببت الفشل
سيبك انتى من الفشل ... وحشتينى ياقلبي :)
الفشل مهم جدا لو لم اكن فاشلا لوودت ان اكون فاشلا
الفشل هو السبب في اني اتعملت حاجات كتيره وصلتني لبلي انا فيه
انا فشلت مره من 10 سنين في الدراسه بس كان لازم افشل علشان ابقي دكتور سنان حاليا
وفشلت في العلاقات العاطفيه بس باراداتي وباختياري يعني الطرف الاخر مالوش ذنب
وفشلت اني اكنل مشواري في الادب وابقي روائي وناقد بس غالبا ده هيبقي مرحله مؤقته علشان انا مشغول لكن اعتقد اني هارجع للحلم ده تاني واكمل الطريق اللي انا عاوز انبغ فيه باذن الله
وكل فشل وانتم بخير
بتزعل من كلمه يافاشل طب يافاشل يافاشل
انا بكره الكلمه دي اوي فعلا بحس اني ضغطي بقي عالي وهيغمي عليا
انا حاسس اني فشلت اني اذاكر في سنه اولي وتانيه كليه بس ان شاء الله بتدارك الامر واعوض اللي فات في تالته ورابعه
حاولت اعمل زي الناس اللي بتذاكر بضمير من غير ما تسمع الراديو او تدور علي حاجه تشغلها طول وقت المذاكره انا مش عارف كنت جايب البرود دا منين
تعرفي منين؟
لا انا الحمد لله مفشلتش اني اسقط انا فشلت اني اجيب تقدير ووالدي كان زعلان طبعا واخويا عمالين يقولوا كنا عاوزين تقدير وكل ما يشوفوا حد يقولولي شفت دا عمل ايه حاجه تزهق
من ناحيه اني رضيت ضميري لسه شويه لازم اعمل اللي بحاول احققه او اللي انا حاطه في دماغي اني اوصله مش عوامل خارجيه طبعا لاني المفروض ابقي عارف مصلحتي الاول
انا عاوز انام واعمل سي في
سلاحف
انا مش عارف اقولك ايه
بس حتستحملى كلامى و لا لأ
يالا معلش ادينى مضطر افضفض و امرى لله
1- الفشل بالنسبة هو الفشل فى الحصول على وظيفة محترمة
هو ان يكون نفسى قصير مع النجاح هو ان تكون حياتى مسلسل من الفشل
2- الحياة بصفة عامة
اهم شىء فى حياة البنى ادم انه يكون عنده شغل و انا لسة ملقتش و جاتلى كذا فرصة من كثر الإحباط بعد التخرج سبتهم زائد شخصيتى اللى مقفولة شويتين
بس دلوقتى بحاول امسك فى الفرص بإيدى و سنانى
3-معملتش الصراحة عشان موصلش
الفشل بالنسبة لى من صنعى انا
بس مش عارف ليه كدة و ليه بيحصلى ده
4- كان احساسى انى نفسى اموت و انتحر
احساس اللى حواليا
!!!
هههه هماه فين اللى حوالياه دوول
متخلنيش اضحك
اهلى و لا فهمينى و لا حسين بيا
و بمشاكلى و ده لانى الصراحة مش بحب اتكلم معاهم عشان بيقطمونى و مش فاهمينى خالص
5- للأسف انا لست راضى عن ضميرى
و لم ارضيه
6- من عندى ديه
انا عندى الفشل قاعدة و النجاح استثناء
تفتكرى ده تصور غلط
؟!
واضح ان انا فاشل ومش عارف اكتب تعليق!!!!
السلام عليكم
الفشل داه اوحش حاجة الأنسان ممكن يحس بيها لما الأنسان بيحس ب الفشل بيحس ان الدنيا اسودت في وشه وميتحملش اي حاجة
ولما حد يقول لشخص انه فاشل دي بتبقي كلمه جامده اوووووووي وبتأثر علي نفسيه الواحد جامد وبعدين لو الواحد حاسس انه فاشل عمره ماهيقدر يكمل حياته
يعني مثلا في ناس كتير اوي بيفشلوا ف الدراسه فبيحسوا ان هم فاشلين فامبيقدروش يكملوا ودي حاجه وحشه لكن لو الواحد حط في باله انه فشل في حاجة معينه اكيد هيتوفق في حاجة تانيه الدنيا هتمشي
والفشل دا صفه من المفترض ان الأنسان مش يتوصف بيها لان كل واحد ليه حاجة اكيد بيحقق نجاح فيها
وانا من رأي مادام الواحد بيحب الحاجة ال بيعملها عمره ماهيحش بالفشل
معلش طولت عليك بس موضوع حلو .....
^_^
يانهار ابيض .. انا فرى سورى واللهى انا كنت هاغلط غلطة عمرى وانسى عالم التدوين ده خالص بس الحمد لله صوابعى جابتنى هنا تانى .. هتقولى ايه بقى على الجيش وسنينه
انا بصراحة مش باحب افكر فى الفشل لان اى حاجة باعملها فى حياتى عاملة بالظبط كده زى السيمفونية الناقصة .. يعنى ببساطة عمرى ما كملت حاجة للاخر
دايما اشتغل 90% من الحاجة دى ممتاز جدا ويركبنى 100 عفريت وماخلصش العشرة فى المية الباقيين ... وبالتالى لو نظرنا نظرة منطقية للكلام ده هتلاقى انى انسان فاشل بمعنى الكلمة .. علشان كده باحب اهرب من التفكير فى الموضوع ده وباكتفى بهذا القدر
ويارب كده تكونوا دايما منورين النت
انا مش جاي اتسئل انا كنت معدي قلت اهدي وابعت السلام
...وانا راجع هابقى اجاوب
وبعدين دي أسئلة صعبة قوي يادكترة
انا ايه اللي جابني هنا انهاردة يالا زي بعضة
بصي يا ستي
1- الفشل بالنوسبة ليا اي هدف بحطة قدامي ومش بحققة
2- إيه الحاجات اللي فشلت فيها
هي حاجة واحدة الحب فشلت فشلت فشلت ومش مرة واحدة ولا مرتين لاء دول ثلاثة
3- معملتش حاجة كل مرة اقع في نفس الأخطاء وأقول لنفسي ان قلبي عبيط
4- إحساسي زفت بس انا بعرف اتماسك
إحساس اللي حوالي حاسة انهم متواطئين عليا علشان يضخموا احساسي بالفشل ده وانا عاملة نفسي مش واخدة بالي
5- الأتنين انا مش رضيت ضميري وبالتالي فشلت
كمان عوامل خارجية وانا كنت سلبية تجاهها ولو ان ده مش طبعي بس لايمت الدور علشان الناس اللي بحبها وبرضة مش قادرة ارضيهم
فاشلة فاشلة يعني
فيما عدا علاقات الإرتباط والخطوبة الحمد لله بعمل أي حاجة عوزها ويارب انجح علشان محسش اني بقيت فاشلة في كل حاجة أبقي أدعيلي يا بتنجاني
هو انتي ناوية تجاوبي امتي ؟؟
انا عايز اشوف اجاباتك
مادام الانسان بيعترف بخطاه ويحاول يتعلم منه ويستوعب يبقى مفيش وجود لكلمة فشل
الجماعهير تسئل اين ذهبت ابي؟
فضل كده علطول
طيب
هو الفشل وحش
ده حتى طعم الجبنه منه خطير
فقولت نلعب شويه
طيب نلعب منلعبش ليه
1- يعنى ايه فشل بالنسبه ليكم؟
انى معرفش اعمل حاجه تم توكيلها ليا
او انى مقدرش اعمل حاجه غيرى عملها
2- ايه الحاجه اللى انت حاسس انك فشلت فيها ؟
انى ابقى مجتهد
وابقى متميز
3- عملت ايه علشان متوصلش للفشل ده عملت ايه بكل ضمير مش كروته يعنى ومحدش يطلع نفسه دور ضحيه اصل انتم عارفين ايه مصيره؟
ذاكرت جامد قوى فى الثانوى عشان اطلع مهندس
ووصلت
بس مش حاسس انى فرحان
4- لما فشلت ايه كان احساسك ؟ واحساس اللى حواليك؟
كان احساسى
مكسور ومهزوم
بس محدش من اللى حواليا حس بحاجه
لانها كانت شخصيه
5- حاسس انك راضيت ضميرك علشان متفشلش ولا كان فيه عوامل خارجيه؟
لا رضيته
ومفيش عوامل خارجيه
انا بس اللى مش طبيعى باين
عشان عندى انفصام فى الشخصيه
ههههههههههههه
مساء الفل
اولا ازيك
ولاوقت للعتاب الان
شوفي انا لما حسيت بالفشل التام والموت الزؤام
حطيت نقطه
ونزلت عاي اول السطر
وغيرت الدفه
وحولته نجاح في حاجه تانيه
والحمد لله
اعتقد اني نجحت لحد كبير شويه
انا عندى شغل ومزنوقه
اقولكم فىالسريع فشلت انى اختار مدير مالى كلهم مش نافعين اعمل ايه بقى
انا زهقت
لا ده مش فشل
فشلت انى اخد اجازة واططلع الساحل السنه دى انا مش عارفه اخد اجازة
بس على فكره انتم كلكم بتكروتوا زى ما قال
love
محدش فضفض كده كأنه على المصطبه
لا بجد اقولكم فشلت انى اختار ناس نضيفه فى حياتى بس ده كان من فتره وعدت الاول كنت بختار كتير ناس وحشه
وبعدين بدأت تقل
لغايه لما انقرضت
الحمد لله
اما المستوى الشخصى
فانا كويسه الحمد لله فى شغلى ومع اهلى مفيش علاقات فاشله بينا
اممممممممم
اصحابى برضه
لو ارتبطت بتزهقن بسرعه ومبديش مجال للفشل واقوم مطوحه ايدى زى العفريت اخلى اللى قدامى يختفى
لااااااااااااا
فشلت انى اكون ظابط شرطه بس والله منهم مش منى
اعذرونى بقى علشان انا فعلا مطحونه
اقعدوا بالعافيه
انا من رايي ان الفاشل فى دينه هو الفاشل فى حياته
يا نهار فشل
اقولك يا ستى بقلب ابيض بريئ فشلت فأيه
بصى يا دكتوره انا فشلت انى استغل مواهبى
انا انفع جداااااااا على رأى كل اللى حولى انى اكون مذيعه
و لما جاتلى الفرصه كنت اتجوزت
و علشان زوجى لا ينكن انه يخلينى اشتغل مذيعه قعدت جنبه و حاطه ايدى على خدى
بس بحس انى مليانه طاقه مش مستغله
شوفتى بشل اكتر من كده
هو الحمد لله ناجحه فى حاجات تانيه
بس مش ليه لغيرى
و قلبتى عليه المواجع يا بيضه
عجبك كده
الحمد لله السنه دي عديت مرحله فشل السنتين اللي فاتو
وجبت جيد جدااا
تبقي ابعتيلي هديتي بقي
هعهعهعهع
هو صحيح الفشل سمة من سمات المدونين ؟ بمعني ان سبب رئيسي للتدوين هو الفشل في تحقيق شئ او احداث تغيير في الواقع فيكون التدوين هو مكان الهروب من الواقع الفاشل او يكون التدوين هو الواقع الافتراضي لتحقيق النجاح ؟
عموما الفشل ليس عدم النجاح بل الفشل هو عدم النجاح مع الاحباط و اليأس من النجاح. هذا هو مفهوم الفشل عندي.
و من هذا المفهوم مفيش فشل في حياتي يمكن في بعض الاخفاقات لكن هناك دائما الامل في تحقيق الاهداف التي تتحقق بالمثابرة. طبعا لابد من الواقعية في تحديد الاهداف فمينفعش مثلا واحد يعتبر نفسه فاشل لانه لم يحصل علي الدكتوراة فحين انه لم يحصل علي الثانوية العامة فالهدف هنا يجب ان يكون الحصول علي الثانوية العامة اولا.
يعنى ايه فشل بالنسبه ليكم؟
الفشل فى حد ذاته الاحساس بالخسارة ايا كان نوعها وباى مجال واصعب انواع الخسارة هى خسارة الانسان لمبادئه
2- ايه الحاجه اللى انت حاسس انك فشلت فيها ؟
فشلت انى اكره اى شخص
3- عملت ايه علشان متوصلش للفشل ده
بابتسم وابتسم وابتسم
عملت ايه بكل ضمير مش كروته يعنى ومحدش يطلع نفسه دور ضحيه اصل انتم عارفين ايه مصيره؟
ههههههههههههه والله بجد الابتسامة عندى باعتبرها طريق النجاح
4- لما فشلت ايه كان احساسك ؟ واحساس اللى حواليك؟
عادي يعنى
هو انا اول ولا اخر واحد يفشل
هههههههههههه
5- حاسس انك راضيت ضميرك علشان متفشلش ولا كان فيه عوامل خارجيه؟
بجد حاولت وباحاول مفشلش ابدا لكن الظروف احيانا بتكون اقوى مننا
Post a Comment