هششششششش حبه هدوء يا ادم انت وحوا




انا جيت اولا ميرسى للناس اللى اتصلت وانا معرفتش ارد معلش غصمن عنى
كنا بنقول ايه بقى فى البوست اللى فات بتاع حوا وأدم نلخص بعد الخناقات اللى حصلت وبرضه كل واحد بيقول حوار والتانى شيفاه بيدافع يعنى الفكره ان الموضوع بقى بين الست والراجل دفاع وهجوم زى ماتش الكورة بالظبط
عن نفسى هلخص اللى شايفه الاتنين محتاجينه

1- الست..... عاوزة راجل يحتويها ويحميها ويدلعها

2- الراجل ... عاوزة واحده مش زنانه ومبتسالش هو بيعمل ايه ولا رايح فين وتديله الحق يعمل كل حاجه ده اللى انتم عاوزينه
بصوا بقى خلينا نتفق على قواعد
1- الراجل مبيتغيرش يعنى لو انتم الاتنين من البدايه واخدين بعض زى ما انتم كده متعمليش فيها فكيهه الحمشه وانك هتغيره بعد ما تكعبليه وتتجوزيه يبقى بتحلمى وانتى اللى هتتغيرى علشان كده هتفضلى مخنوقه ومضايقه والمشاكل للركب
فلازم تبقوا راضيين عن بعض من قبل الجواز او الارتباط الخطوبه العاديه
واعرفى واتاكدى انه مش هيتغير ومش لوى دراع منه انما اعتقد تربسه دماغ وفهم خطأ للرجوله ان انا كده ومينفعش اتغير فخلاص لازم نرضى بالامر الواكع

2-النقد مينفعش الست تنقد الراجل طول الوقت يعنى هتلاقيه بيطلع اصوات مش كوويسه وهو نايم وعارفه انه موضوع بيخنق او قاعد فى البيت شبه امنا الغوله

تعالى على نفسك وحاولى تظبطى الامور مش علشانك بس علشانه كمان ممكن ميكونش بياخد باله من الحاجات دى انما لو هو محفلط ومزفلط فى نفسه فبلاش تشكى فيه طول الوقت وتقولى له حاطط برفان لمين ومتشيك ليه لان ساعات بتيجى له هفه فى عقله بيكون عاوز يبقى كده فى المقابل الراجل يا ريت بلاش نعكشه فى نفسك فى البيت وانت خارج بقى تبقى ميه فل وخمسه وعشرين لان ده هيخليها تشك فيك اكيد

3- الست بلاش النكد اممممممم لا مش هينفع انتى نكدى براحتك بس يا ريت يبقى فيه ثقه بينكم شويه عارفه انها صعبه فى الزمن ده
عن نفسى بوصل لها بصعوبه جدا مع اى شخص
بس عموما حاولى علشان متضايقيش نفسك

ومش لو جاب لكى ورده يبقى بيخونك اممممممم مش داايما ممكن عادى تكون طالبه معاه نحنحه اتنحنحى انتى كمان


الراجل
راعى نقطه ان الست فجأه بتكون ام وبتجيب بيبى يعنى مسئوليه تانيه ومبتقدرش تنام كتير وبتحاول ترضى جميع الاطراف المزغود الصغير والمزغود الكبير يعنى تبقى رحمه كده شويه بينكم مطلعش عفاريتك عليها والدنيا هتمشى شويه شويه

انا بقى عن نفسى اللى عاوزاه مش موجود ومعتقدش هيتوجد اولا انا شخصيه صعبه المعامله وبتقمص بسرعه ولا اطاق ومدلعه مقرفه ومفيش حد هيتحمل كل ده بالتالى مشكرين يعنى اعملوا انتم بالنصايح اما انا فنوووووووو
انا بقى اللى بقول انا لوى دراع هو انا كده ومن هنا ينطبق عليا باب النجار مخلع تيررررارررررررر


نصيحه برضه للراجله فى الاستبوخس :- البنات تودى وشها الناحيه التانيه لما الدنيا تخنقك اوى اوى وهى جنبك وقاعدين ساكتين مد ايدك وخدها فى حضنك وارقصوا

سامع الاغنيه دى اللى هنا ارقصوا عليها هتحسوا احساس تانى خالص انكم فعلا مش على الارض

نصيحه للبنات :- الراجله وشها فى الحيطه بقى اهتمى بيه وبنفسك علشان ترتاحى ويرتاح شوفى كل حاجه بعينه هو لو انتى بتحبيه اوعى تفتكرى انك لما تضحى انك بتيجى على نفسك انتى فى الاول بتسعدى نفسك بس اوى تعملى ده الا لما تكونى واثقه فيه اوى وحسه بالامان

امممممممممم اخيرا كده قفلت الموضوع ده بقى المره الجايه نقلب على موضوع تانى خالص اللى عنده نصايح تانى يكتبها بعد نقاش البوست اللى فات واللى قبله


كان معكم استاذ ورئيس قسم مكافحه مشاكل الاسرة والمجانين ابى هانم

حكمه الامبراطورة

اتلم الشبشب على القبقاب وبيتلقحوا على الابواب

62 اخبط وقول رايك:

سبهللة said...

اولا
حمدا لله على السلامة
ويارب تكونى بقيتى احسن
ثانيا
بالنسبة للبوست
كلام بجد مقنع ومظبوط جدا
بس فين اللى يسمع
الزمن دة فيه من الضغوط والمشكلات ما فيه الكفايه
وبالتالى كل واحد فى الطرفين مش طايق نفسه وبيطلعه على الطرف التانى
=========
انا بقى من خلال تجربتى
نفسى اقول للرجالة
حاولوا تتحلوا بنعمة الصبر
كل واحدة بتحب تتدلع على جوزها
يعنى انا مثلا لولا صبر جوزى عليا فى مواقف كتيرة كان ممكن تقوم بينا مشاكل
لكن كان كل ما اغيظه فى حاجة من غير قصد منى
يستغفر الله ويخرج شوية من البيت ويرجع تانى
ولا كأن فيه حاجة حصلت

Appy said...

سبهلله
===========
الله يسلمك يا حبيبتى

الضغوط يا حبيبتى مش على واحد بس الضغوط على اتنين يعنى عليه وعليكى يبقى علشان الحياه تكمل يبقى لازم الاتنين يخفوا ايديهم
ومن الاول ميرقرفوناش وياخدوا بعض وهما عاملين فيها سبع رجاله
نورت يا قمر

ساره said...

الحمدلله على السلامه ياقمر
نور البلوج

وحشتيني بجد
:)

Bondok said...

موضوع ظريف جدا
و كلام واقعي
بصراحة
آخر نصيحتين انت قلتيهم
واحدة للرجالة وواحدة للبنات 100 100
و صحيح زي ما قلتي على نفسك انت متدلعه و... و.... بس الكلمتين دول بيقولوا انك جدعه و لما حتتحطي في موقف يستاهل انك تخدي قرار حتعرفي تتصرفي

Appy said...

سارة
========
حبيبتى انتى اكتر ميرسى يا ساره على سؤالك عليا بجد ربنا يخليكى ليه






بندق
========
يا ساتر انا دخلت البروفايل بتاعك لقيتك القوس زى اممممممم
علشان كده قولت موضوع القرار
ميرسى ليك وشرفت يا فندم والله
وبتوع برااح كافيه كلهم منورين

arsenalwy said...

لازم فعلا الواحد ياخد المناسبة لدماغه او حتى قريبه منها

لأن التغيير بعد الجواز مبيبقاش فى الحاجات الأساسية ممكن يبقى فى الفروع لكن الأساسيات صعب

صيدلانيه طالعه نازله said...

الحمد لله كده انا اطمنت عليكى و انك بقيتى كويسه
موضوع ادم و حوا ده اعتقد انها خناقه ازليه موجوده و ستظل المطلوب بقى الصبر ثم الصب ثم طوله البال ساعتها كل المشاكل بتعدى و اكبرها مشكله بتصغر و تبقى تافهه جدا و دى نصيحتى للجمييييييييييع اما انا فمعنديش خلق خالص و اقل حاجه بتنرفزنى و تعصبنى و اللى مش عاجبه بقى.......حقه عليا

فاتيما said...

حمدلله ع السلامة
يا أبو اجمل إبتسامة
يا قمر التدوين كله
وحشتينا قوى
و الله ينور عليكى
بس للأسف يا بيبى كل إتنين داخلين ف علاقة دلوقتى متحفزين من البداية
و كل واحد عاوز يمشى القصة بأقل خساير و تنازلات من عنده و بأكبر مكاسب من الطرف الآخر
بيعملوا ناصحين يعنى
بس على حساب العشرة و الصدق اللى المفروض يكون بين الطرفين
عشان كل واحد يدى بشفافية
و محبة
و رحمة كمان
كل الحب ليكى
يا قمر و بوسة و حضونة

dr.lecter said...

اشتات

حلو اوي النصايح دي
بجد

بس ابقي قبليني لو حد عمل بها سواء الرجاله او الحريم

احنا دماغنا ناشفه وكل واحد هيقول لا وازاي وعاااا مش هينفع وهو الالي لازم ييجي لغايه عندي والهجص اللي بيخلرب البيوت


انا عن نفسي نفسي اعمل الكلام ده بس عاوزه اراده كبيره

وهي برده لازم تعمل كده ياريت بجد نعرف نتفق

عامه انت ايه اللي رجعك

روحي كملي اجازه ونامي علشان تعرفي تستعدي للسيزون الحار ده

حمد لله علي سلامتك

بت خيخة وأي كلام said...

الحتة اللى انتى كاتباها ان الست بتبقى عايزة تغير الراجل بعد الجواز

انا اكتشفت مش ان الست عايزة تغير الراجل
لاااااااا
دى بتبقى عايزة ترجعه لقبل الجواز

يعنى الراجل من دول قبل الجواز بيكون رومانسى وكريم ومتشيك على سنجة عشرة وبيحط على شعره بريل كريم


لكن بعد الجواز بيكون حاجة تانية خالص
فالست بتحاول ترجعه للانسان اللى هى عرفته قبل الجواز

وهتلاقى كمان نفس الحاجة مع الراجل

هتلاقيه بيفتقد فى مراته الشخصية والشكل اللى كانت عليهم قبل الجواز


فالفكرة هنا فى الصراحة

الصراحة فى كل شئ
لو واحدة مابتحطش مكياج يبقى خليها صريحة مع خطيبها وتقابله من غير مكياج
لكن متقعدش تتزوق وتعمله من البحر طحينة
فيعتقد انها هتكون مدندشة كدة بعد الجواز

لو هى بطبيعتها مش بتلبس لبس مخصوص تقعد فيه فى البيت
يبقى تقابله بقميص النوم الكستور او بنطلون البيجامة وعليه تى شيرت اخوها
علشان يكون عارف من البداية شكلها بعد الجواز وهى قاعدة فى البيت هيكون ازاى
وبالتالى مايكونش اتخدع فيها


وهو نفس الحكاية
لو هو حريص على القرش
يفهمها انه مش من النوع اللى بيحب يجيب هدايا وانه بيحب يحوش اكتر
لكن مايجيش قبل الجواز داخل بصنية حلويات شرقية وجاتوهات وازازة برفان وخاتم دهب على فستان
فالست تفتكره كريم
ويجى بعد الجواز تلاقيه قاطع مية ونور
والست بعد كدة تقول ده بقى بخيل وجلدة
وهو مبقاش ولا حاجة
دى طبيعته هى اللى ظهرت لانه لو كان بيمثل ساعتين فى اليوم وقت الخطوبة
فهو مش هيقدر يمثل طول عمره

لازم الاتنين يكونوا صرحاء مع بعض فى كل شئ
لو واحد مابيصليش بلاش يدعى انه مابيفوتش فرض
وتيجى مراته بعد الجواز تلاقيه مابيركعهاش

ولو هى مابتطبخش
ماتجيش تستهبل فيها وتخلى امها تعمل صنية المكرونة بالباشميل وتقوله انا اللى عملاها
ويجى بعد الجواز يلاقيها تور الله فى برسيمه فى موضوع الطبيخ




ماتتغيروش علشان خاطر تصطادوا عريس او توقعوا بت فى هواكم


خليكوا على طبيعتكم
واللى قدامكم عاجبه كدة
يبقى خير وبركة

مش عاجبه
يبقى يغور فى داهية ونشوف اللى بعده








اسكتى يا بت يا ابى
مش انتى تهتى منى دلوقتى

اصل انا غيرت اسمك وخليتك
بتنجانة هانم بدل رحاب وكوكبها و و و و والهلمة بتاعتك دى

وعايزة ادخل عندك وعمالة ادور على رحاب وكوكبها والهلمة بتاعتك
مالقتش اسمك

روحت اتخضيت بقى وعنيا برقت
وبعدين افتكرت انى اساسا غيرتك وخليتك بتنجانة هانم
فارتحت وشتمت نفسى
علشان الزهايمر اللى عندى


بس خلاص

سلام
اختك خيخة

هندسة وصفية said...

علي فكرة كرجالةشرقيين معندناش ثقافة الاهتمام بالمظهر في البيت
ده حقيقي
:) علي فكرة مرة كنت لسة راجع من الشغل بليل و بحط المفتاح في الباب
و بفتح لقيت مراتي في وشي بتقولي استنا
طلع كيس الزبالة برة
بس و بقية الاسبوع كان اسود علي كل الي في البيت
فانا من هذا المنطلق بجد بقول احنا الاتنين رجالة و ستات بنعمل حاجات كتير قوي من غير منفكر
و بنقول الله هو احنا هنقعد نفكر في كل حاجة قبل منتصرف
بس هو الموضوع متهيالي محتاج مجهود في الاول و بعدين هيمشي تلقائيا

Appy said...

arsenalwy
===========
الاساسيات لو غلط وده ممكن بنسبه كبيرة مش عيب اننا نغيره المهم نبقى واثقين انه للاحسن








صيدلانيه طالعه نازله
=====================
جبتى خلفى ليه يا لولو ما كنتى بتقولى اللى مش عجبه اهو
شوفتى بقى حقه عليا دى ممكن تعمل فيه ايه هو شخصيا
انا عارفه ضغوط الحياه ولاجواز والاطفال ومفيش وقت للست
ربنا يكون فى عونكم يا اوختشى ويدمهاعليا نعمه نيهاهاهاها

Appy said...

فاتيما
==========
الله يسلمك يا قلب الام يا جميله يا رب
وانا كويس كويس زى القرد خالص بس هما حبه كده كنت جايه على جنب
وبعدين شفافية ايه يا فاتيما البنات هتموت علىالجواز والولاد هيموتوا على امممممم مش عارفه بقى
اهم هيموتوا وخلاص
ومحدش بيفكر علشان كده الاجيال اللى جايه مش اليومين دول اللى بعدين مهببين بهباب
نورتى يا طمطم














ليكتر
=========
هو انت كده يعنى جايب ليه احباطات فى ايديك وانت جاى مفيش مره كيس برتقال حتى
هو كلامك صح بصراحه بس مكن واحد بس فى الميه اللى بيجوا عندى هنا الكوكب يعمل بيها
وانا الصيف بدأ من بدرى يا فندم

Appy said...

خيخه يا خوخه
=================
اولا وحشتينى
ثانيا بطلى تشحططى اسمى وبزمتك واحده بالعقل والنصايح والحكم دى يتقال عليها بتنجانه تصدقى اما انك اخضر وباستك من فوق وخيخه كمان
وهموتك بغيظك واقولك انى عرفت الصواريخ اللولبيه نيهاهاهاها

وش بيرقص حواجبه وبيطلع لسانه ويرقص كمان

نيجى للهم بقى
كلامك مظبوط الصراحه بين الاتنين يا خوخه
يعنى يا تقبله من البدايه بعيوبه بعبطه يا بلاش
حته بقى مختلفه فيها معاكى

الواحده لما تهتم بنفسها وتحط روووووووووج
بضم الراء اوىىىى
تحط فى دماغها مش علشانه بس علشانها كمان
بلاش رووج علشان انتى مش بتحبيه
لما تلبس كويس لما تغير فى شكلها على فكره يا خوخه بيغير النفسيه جدا
يعنى خدينى عندك مثل ايوه مثل
لما بزهقن من نفسى واحس بملل اخس مثلا
او اغير لون شعرى او اقصه
وانا قاعده فى البيت مكونش مبهدله
حتى لو بغسل
لو سبت نفسى لده بحس باكتئاب وضيقه
الواحده تغير من نفسها وتهتم علشان بتهتم هى ليها اولا
وثانيا دور الراجل بقى انه ياخد باله
يا اوختى عنيه تدب فيها رصاصه بره بيفلوا الواحده
وتعالى عند خطيبتهم ولا حبيبتهم اللى بقالهم فتره خلاص بقى بيتعموا فى عويناتهم وميشوفوش حاجه
حتى لو حلقت شعرها زيرو
رجاله هم والله يا بنتى
المهم بقى زى ما انتى قولتى بخيل يقول علشان هى متتصدمش

موضوع انها تغيره مش ده اللى اقصده
مثلا لو انا اتخطبت لواحد وله كرش وانا مش بحب الكرش مقولش بعد الجواز هخليه يخس
لووووووول
ابىق كده هبله فهمتى ودى بقى ابسط حاجه
يعنى واحد مهمل مش هينفع يتغير
يا نتفق من قبلها يا ارضى واتكتم
يا ارميله باجدعها قله واقوله روح عند مامى بتاعتك علشان انا مش هتجوز ناس وحشين
ونلتقى فى الوصله التانيه يا خوخه

Appy said...

هندسه وصفيه
=================
بجد انا متخيله المنظر وموووووتنى من الضحك بجد
عارف والله مش هلومك ساعات الستات بتعمل حركات غريبه بس عموما اقرى البوست اللى قبل ده واللى قبله علشان دول سلسله متكامله
وعموما لحظات من التفكير مش هتضر خالص يعنى
نورت الكوكب

وومن said...

آبي

حمد الله علي السلامة انا عارفة اني ندلة ومتصلتش بس انا بعد ماعرفت من دودو أصبت بحالة أعياء ومكنتش هادخل أخر إمتحان لولا البت شيماء صحبتي اللي كتر الف خيرها سندتني لحد الإمتحان ووقعت هناك براحتي بقي
ههههههههههههههههههههههه
انا طبعا محضرتش الخناقة من أولها وتابعت اللي فات علي خفيف كدة بس بجد نصايح جامدة وكويس إن كل واحد قال اللي في قلبة من ناحية التاني
انا عن نفسي عندي قناعة إن الرجالة مش وحشة قوي زي ما احنا فاكرين الستات برضوا فيهم العبر بس كل واحد مش معترف بعيوبة وبيبص لعيوب التانين
القناعة دي جاتلي بعد ماصديق ليا أهاني كتاب الرجل من زحل والمرأة من المريخ أسمة كدة صح علشان انا لسه عندي زهايمر
طبعا أنا مش قريت الكتاب علشان كدة جابلي ملخص ليه واللي يقرا الكتاب أو ملخصة فعلا هاتختلف نظرتة للطرف التاني

بالنوسبة بقي ليك يا حج برعي حلو قوي الإعتراف بعيوبك دي بس بلاش تفقد الأمل في أن حد يستحملها ربنا يرزقك براجل يكون كاريزما كدة هو كمان ويفهمك ويستوعبك ولو المحلي مضروب نستورد يا ستي نو بروبلم

سيبك انتي وحشاني خالص مالص

أم أحمد المصرية said...

الله ينور يا فيلسوفة دي بقي الحكمة الاخيرة من فم الامبراطورة :))))) ابقي قابلني لو مشاكل حوا و ادم اتحلت

فتاه من الصعيد said...

حمد الله ع السلامه
والله طيب حكم كويسه
علم وينفذ جناب الامبراطوره.....الا فى حالات الطوارىء......وانت عارفه اننا بنطبق قانون الطوارىء...ههههههه
دمتى بخير وسعاده

ويكا said...

العوافى عليكم
انا بس عندى تعليق بسيط خالص خلوص
على الهندسه سبهلله
بالذات موضوع لما تغيظ جوزها بالغلط ده.
انا نفسى الراجل فى مره هو كمان يغيظ مراته بالغلط ، وشوفوا هيه هتعمل فيه ايه؟
بصوا يا اخوانا
سعد زغلول قال "مفيش فايده"
وانا بقول " لن ترضى عنك مراتك ، حتى ولو عملت الللى"

وما حدش يشتم ولا يضرب انا ما اتشتمشى الا من مراتى بس لو سمحتم.
ولو لم اكون تزوجاً لوددت ان .........
ايه؟!! منتظرنى اقول ايه يا خلابيص .....نفسكم توقعونى فى الغلط انا عارف.
لوددت ان اكون متزوجاً طبعاً
ـــــــــــــــــــــــــــــــــــ
"حلو كده يا مراتى" يارب اكون عجبتك.

بت خيخة وأي كلام said...

عرفتى ايه هى الصواريخ اللولبية
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

اكيد داليا هى اللى قالتلك
واكيد انتى اللى زنيتى على دماغها لحد البنت ما انهارت واعترفت

وعقاب ليكى
فى عيد ميلادك الجاى
هاجيبلك علبة صواريخ لولبية وهاحطهملك على راس التورتاية

نيهاهاهاهاهاهاهاهاهاهاهاع

GeHaD-----(male) said...

انا ان شاء الله من غير مقاطعه كدا
هتجوز واحده تطبخ وتكنس وتمسح وتشتغل وتجيب فلوس وانا اقعد في البيت راجل ملو هدومي وهي يطلع عنيها في كل حاجه وهي اللي تخلف برضه احسن انا عارفك هتقولي وانت اللي تخلف

بس انا اخلص من الكليه دي بس وهبقي ارد بجدد علي البوست دا انا عارف هيكون اختفي بس مش مهم

تحياتي آبي فوق الشجره (دي بتاعه احسان بيه)
سلام

Appy said...

انا بس هرد على اتنين وهكمل كله بكره بس العيال دي مستفذه وهعضها


خيخه
======
خوختى انتى تعرفى عن ابى انها زنانه والله ما عرفت من داليا لانى عارفاه كويس مكنتش هتقول طالما انتى قولتى سبيهم يموتوا بغيظهم وعارفه دواللى كمان ههي مانتى بس ساعات بتبقى اعيل منى وبتغيطنى
وهموتك بغيظك ومش هقولك مين اللى قالى ومن غير زن انا اتسهوكت بس عليها روحي اتصلى بيهم بقى واسالى ههههههههههههههههه
نيهاهاهاهاها
شريره انا وهغيظك




ويكا
=======
امانه عليك تجيب مراتك تقرا التلات بوستات دول
وبعدين يا راجل يا اخي العزيز تتفهم غلط ويفتكروا الكلام متوجهه ليه مش توجهه صح ايه مبسوطه يا مراتك دى ههههههههههه
النبى انا حملت امانه قولها ابى بتقولك اقري التلات بوستات بتعليقاتى نيهاهاها
وابقى قابلنى اذا بيتتك فى البيت ههههههههههههههه



اه فيه كمان جهاد

هستنى تعليقك يا ابنى تحت الشجره
دي بقى كلمه ابى هانم
ربنا معاك يا جهاد وافتح مدونتك يا ابنى وابقى طمنا على الامتحانات

Appy said...

بالمره بقى

وومن
=======
سلامتك يا ميرا الف سلامه ربنا يخليكي ليه يا رب
عموما ابىق هاتى الكتاب اقراه بس اوعدك على السنه الجايه بقى وابقى قابلبنى ههههههه







ام احمد المصريه
=================
صديقتى الجميله
ايوووون الحكم حلوه بس تنفيذها صعب على طرف من غير الطرف التانى يعنى نصيحه كمان كل واحده عندها خطيب جوز اي حاجه تجرجره ويقره هو كمان وعقاب ليه بالتعليقات ايه رايك مش بزمتك هنعلمهم الادب

Appy said...

فتاه من الصعيد
===============
الله يسلمك يا حبيبتى

عموما الداخليه مش اجدع مننا نفذي قانون الطوارئ بس بالعدل انتى عارفه اننا متضررين منه يا بنتى
نورتى يا قمر

Appy said...

ويكا
=====
مره كمان ساعات الست بتتحمل كتير من الراجل فكر بينك وبين نفسك عملت كام مصيبه وهي كبرت الجي عندها ولملمت نفسها واسالها فى ساعه صفا بعد الرقصه اللى قولت لكم عليها وهي هتخرررررر بكل حاجه
وسبهلله قالت انها بدون قصد يعنى الست متقصدش اهي ايه التلاكيك دي بس يا ربى

بدراوى said...

ازيك
حمد الله على السلامة
انا بس بمسى
و مش حقول رأيى
عشان مالوش لزمة فى المواضيع
زى ما انتى عارفة رأيى قبل كدة
----
اوعى تكون واخذة على خاطرك منى اكمنى مسألتش
هو الصراحة لما لقيتك قافلة التعليقات قولت يبقى مش عايزة حد يعلق
بس كنت بجى الكوكب من حين لأخر اشوف التعليقات و بس
و كنت حسأل بس قولت بلاش ادوشك
معلش مش بقولك مخى متركب شمين

هههههه

لقد خلقنا الله احرارا said...

حمدلله على السلامة ياجميل
ايه الحكم دى كلها؟
بس اكتر حاجة لفتت نظرى ان طلبات الطرفين من بعض مش جديدة دى من قديم الازل

ياترى ليه على مر القرون مقدروش يوصلوا لصيغة تفاهم او معاهدة سلام

يمكن ده سر جمال علاقتهم
وبعدين ياجميل مين قال ان اللى انت عايزاه مش موجود
لا طبعا موجود وفى رجاله كتير مش معقدين ومعندهمش مركبات نقص
لكن انت برده فاهمه الحكايه صح هى المشكله كلها فى الشعور بالامان ومتهيألى بعدها احنا ممكن نستحمل ونغير من نفسنا بحب علشان نرضيهم
ربنا يرزقك الخير دايما

مواطن مصري said...

انا داخل اسلم و هقراء البوست بعد الامتحان بكرة تاني


دعواتك معانا

مسدس صغير said...

مع التفاهم
تنصهر كل المشاكل

نصائح غالية
بس ياريت حوا تاخد بيها

اشمعنا حوا يعنى؟؟
هوه كده وبس

ههههه

احييكى على البوست

hasona said...

السلام عليكم

مرة أخري الرجل والمرآة
الذكر والانثي
حوا وأدم

،،،،،
الموضوع ده تحدث فيه الكثير
ووضعت فيه الكثير من الكتب والحكم
بس تقولي لمين
أدم يقرأ من هنا وينسي ويهيس ويوقل هتعدي

وحو طول اليوم تقري وأول ما يجي زوجها (المعدول) تنسي كل اللي قرأته وتبدأ وصلة عزف منفرد بعد لحظات تتحول الي عزف ثنائي وقد تتحول الي عزف جماعي

،،،،،
ساعات يكون الرجل متناقض
في بعض الاوقات تكون المرأة متناقضة

بمعني أنهم يقولوا شئ ويفعلوا العكس
أو يتفقوا علي شئ وعند التنفيذ كل واحد بيعمل اللي في دمافه

،،،
وبعدين الابتسامة لها مفعول سحري
هو يبقي راجع من بره ابتسامة رقيقة كده وكلمتين كويسين لهما فعل المخدر- وخصوصا في أول الشهر - مش علشان الراتب طبعا
بس علشان مش يقارن بين اللي بيسوفه بره وبين اللي بيشوفه في البيت - ويقول مالها سوسو ما كانت بتضحك لي وبتتكلم كويس

،،،،
مجموعة من النصائح الجميلة
يا رب الناس تستفيد منها بقي
علشان تستريح بقي

تحياتي

Appy said...

ويكا
==========
يا لهوى عليك بجد تصدق انا هدور على مراتك واقولها
احنا اللى شرريين
انا عماله اقرا تعليقك ومش قادره انشره اعمل ايه بقى هههههههههههههههههه
ما انت فاهم المدونة بالمرصاد يا خويا واللى بيصطادوا فى الميه العكره كتير
عارف لو مصدقوش وده مش اكيد هيطلعوا اوشعات معلش يا ويكا بقى انا عجبنى النص الاول من التعليق هجيبه والتانى هرميه فى البحر هههههههههههههه
والله ما تزعل اتفقنا

Appy said...

Blogger ويكا said...

ابى يا شريره
انا مش هنفز طلبك طبعاً
ومراتى هخليها تقاطع كل المدونات اساسا
علشان الشريرين اللى زيك ما يبوظوش دماغها اللى كلفتها دم قلبى لغاية ما اتكلفت.

اما موضوع سبهلله
انتى هتوقعينى فيها ليه؟؟ًً!!!!! انا قلت انها يا عينى ماتقصدشى تنرفزه ولا تزعله ، انا قلت ان الواحد هو كمان نفسه ما يقصدشى يزعل مراته حبيبته.


طبعا انا بهرج انا ما اقدرشى اتجوز على مراتى ابداً

على الاقل دلوقتى.

نياهااااههاهاهاهاهاع

May 26, 2009 10:41 PM
Delete



ده تعليقك بعد ما قصيناالاجزاء والرقابه شالتها

Foxology said...

اولا حمد الله ع السلامة

ثانيا حلوة النصايح دى وفى نصايح كتيرة جدا ممكن فعلا تخللى الحياة جوة البيت جميلة اوى بس المهم ان الواحد يبدأ بنفسه

تحياتى :)

Appy said...

بدراوى
==========
الله يسلمك
يا سيدى ساعد اخوانك المتجوزين ولو بنصيحه
وعموما انا راى انك بكره هتغير تفكيرك كله من الحاجات دى لما الحياه قدامك تبقى اكبر بكتير واهدى بكتير
ميرسى على سؤالك ومخك مش متركب شمال خالص انت حد زى الفل








لقد خلقنا الله احرار
=======================

ايوه قديم الازل دى صعبه اوى حتى الاجيال بتتغير والوراثه هى هى مبتتغيرش التفكير عارفه بحس ان المشاكل بين الطرفين ببتورث مع زياده الضغوط بتكبر
ميرسى على الدعوة الجميله انا وانتى يا رب

Appy said...

مواطن مصرى
=============
ربنا معاك يا رب يا عمرو







مسدس صغير
==========
كل ده وحوا بس ما انا كاتبه لادم كمان اهو اتقوا الله بقى بطلوا ظلم

Appy said...

hasona
==========

اممممم لا علشان المرتب برضه
عارف المشكله ان فيه ستات بتعمل كده وجوزها يبقى على راسه بطحه بمعنى يقول بس هى عاوزه حاجه او
تكون شاكه فيه فهتبوسنى علشان تشم
خيالات كتير بين الاتنين
يا ريت لو تنتهى كلها هتبقى الحياه اهدى

Appy said...

فوكس
========

يا ريت تعمل بيها بقى وتخلى اينو كمان تعمل بيها وتقولوا ليه ايه الاخبار
ربنا يسعدك يا رب

الشنكوتي الكبير said...

حمدا لله على سلامتك يا قمرايه

هو ده المهم

سلاااااااااااااااااااام
اخوكي ايهاب

rooooe said...

ما هي الحياة مش كلها احتواء ومش كلها حب اكيد هيجي يوم وتتقرفوا من بعض يعني مش بمعنى انكم تسيبوا بعض بس اكيد مع مرورالسنين والوقت الدنيا بتتغير والحب بيضعف وكمان انتي مزة يعني كفاية بوستاتك الجميلة يا إيبي بوست جميل كالعادة وتقبلي تحياتي

Appy said...

الشنكوتى
===========
ميرسى يا ايهاب







roooooooe
===========
اهلا بيك بس انا مش بتكلم عن نفسى اصلى وبعدين الحب مش فيه قرف
ثانيا انا مبحبش حد يقولى كلمه مزة دى ثم حضرتك متعرفننيش يبقى محدش يقولها لان حتى القريبين مبيقولهاش
حقيقى لو انت حد انا عارفاه كان عمره ما هيقولها ولو انت مش اول مره تدخل هنا كان هيبقى ليه تصرف تانى خالص
معلش الكلمه بتعصبنى
ميرسي لذوق حضرتك ونورت وسورى على الحده فى الكلام علشان انا مبحبش الاسلوب ده ولا الكلمه دى

بت خيخة وأي كلام said...

بس ماتنكريش ان كرسى الخرفان
عاجبك
وقعدتى تضحكى اول ماشوفتيه


وايه يا بت الحكمة دى

عندما تطعن من الخلف
اعرف انك اديت قفاك للناس


انا فطست على روحى منها

وبعدين هى قفاك برضه؟

نعديها قفاك المرة دى

Appy said...

خوختى
=======
لا طبعا افتكاسه فى الجون علشان كده اخدته عندي
بس والنبى قولى للى مبيقورش او مبيحبوش مدون تاعبين نفسوياتهم ليه وبيقروا له
يعنى عن نفسي لما مبحبش مدون اصلا مبحطوش على الريدير خالص ولا بدخله ولا حتى من باب الفضول حاجه تنقط يا اوختى وبعدين انا عارفه انك هتعرفنى فيه حد بيقول علي نفسه انه بيحب الشيشه غيري ولا بيقلب الحكم غيري
نسيت اقولك انتى هتعملى ايه بالاجابات عموما انا خدتها كانها لعبه ولو تحليل بالهنا بقى ليك
ولو انى عارفه هتعملى ايه اكيد هتبليهم وتبخري بيهم عتبه باب البيت ينكن حد عامل لكي عمل هههههههههييييي

حـــــدوتـــــة said...

السلام عليكم

ربنا يكملك بعقلك
ايه الجمال ده
والله لو يسمعوا الكلام ويستهدوا بالله
كل المشاكل هتتحل بس تقولى لمين

سلالالالالالالالالالالالالالالالالام

Love-Guru said...

في ال 10 سنين اللي فاتت و كنت خارج مصر و لازلت , انتشرت انماط جديدة من اللغة و الالفاظ و التعبيرات اجد بعض الصعوبة في فهمها و منها كلمة "موزة" فياريت حد يتطوع و يفسر هذه الكلمة تفسيرا كاملا ما معناها و ماذا تدل علية و ما اصلها و لماذا يعتبرها البعض كلمة غير لائقة و لماذا لا تحبها بعض الفتيات ؟

Appy said...

love gure
============
كلمه مزه يعنى يقصدوا بيها فى مصر البنت الجميله او اللى جسمها وشكلها حلو
وطبعا ده الغاء للعقل وكلمه بصراحه تقيله على قلبى
اصل الكلمه موزاليندا باليونانى
اي المراه الفائقه الجمال ولكن البعض فى مصر اخدها وحرفها على انها الست اللى قولت عليها
وعلشان كده انا شخصيا مبحبهاش غير كده بحس انها كلمه low
اوي لو حد تاني عارف تعريف لهايقولها
بس انا مش بحبها وبس











حدوته
=======
اهلا اهلا
اه والنبى قولهم يمكن حاطين قطن فى ودناتهم
نورت يا حامد

(أم البنين) said...

حمد الله على السلامة
كيف أنتِ أختي الرقيقة؟

Love-Guru said...

@ Appy
شكرا علي محاولة شرح اصل كلمة "موزة" و معناها. و لكن لا يزال شئ غير واضح, لماذا تكره اي امرأة ان توصف بأنها جميلة الشكل هذا عكس الواقع فالمرأة عموما لا تمل من سماع كلمات الاعجاب و الافتتان بجمال شكلها و جمال و تناسق جسدها و قديما تغني الشعراء و المغنيين بجمال و تناسق شكل المرأة و انها كغصن البان و لم نسمع اي امرأة اعترضت علي هذا. أذن لا بد ان هناك معني غير مقبول توحي به كلمة "موزة" و هذا ما لا افهمه. ربما يستطيع شخص آخر ان يوضحه لي.

Appy said...

ام البنين
==========
اهلا بيكي الحمد لله يا ست الكل
ربنا يكرمك على سؤالك انا بخير الحمد لله







Love-Guru
===========
والله لو ميقصدوش بنيه وحشه يبقى برضه فيه معاني احلى يعنى مالها يقول عليها بنوته حلوه انثي مثلا ليدي
ليه نحرف فى معنى وساعات مش كله بيكون نيته مش كويسه من المعنى عموما لو حد عنده تفسير تاني يقوله
انا بقى شخصيا عندي مشكله مبحبش اسمع الكلام ده غير من الشخص اللى بحبه او هتجوزه غير كده مبحبوش خالص انا فعلا كده
نورت وترجع من بره مصر بالسلامه الا حضرتك عايش فين
وليه لما بدخل على اسمك بيدينى خطأ

Love-Guru said...

@ Appy
أنا برضه مش مستريح لهذه الكلمة و لكن اريد سبب منطقي. من كلامك بستشعر ان الكلمة لها اسقاطات حميمية او علي الاقل هذا هو انطباعك و لهذا لا تحبي سماعها الا من زوجك او من سيكون زوجك. يا ريت حد يساعدنا نفهم اكثر

عايش في ولاية تكساس

بيديكي خطأ لانك مابتخبطيش قبل ما تدخلي
:D
أنا معنديش بلوج اصلا

micheal said...

هههههههههههههههههههه..تصدقي وأنا بقرأ في البوست في أوله ..عمال بقول بين نفسي هل يجوز تطبيق هذا الكلام عند البتنجاني لحد ما قريت السطور اللي فيها الشفا واللي ردت ع التساؤل

انا بقى عن نفسى اللى عاوزاه مش موجود ومعتقدش هيتوجد اولا انا شخصيه صعبه المعامله وبتقمص بسرعه ولا اطاق ومدلعه مقرفه ومفيش حد هيتحمل كل ده بالتالى مشكرين يعنى اعملوا انتم بالنصايح اما انا فنوووووووو
انا بقى اللى بقول انا لوى دراع هو انا كده ومن هنا ينطبق عليا باب النجار مخلع تيررررارررررررر

عارفة أنا اللي ضحكني أكتر أني عملت اللي أنتي بتقولي عليه بس في الانترفيوهات..كتبت بوست وافي اديت فيه نصائح نفسية وغالية وفي الجوون عن كيفية أداء الانترفيو وازاي تلاقي وظيفة بسرعة قياسا علي خبرتي العريضة مع أني أكتر واحد راح إنترفيوهات وبرضه مشتغلش
نياههههههههههه
والله مش عارف أقولك ايه يا بتنجاني
أتمني تكون بخير ومرتاح
تحياتي

samamasr said...

ربنا يوفقك يارب :)

أنا آسفة لإزعاجك في الردود,بدون المعرفة بينا:)

بس,ربنا يوفقك يارب:)


السلام عليكم,ورحمة الله وبركاته:)

مجداوية said...

السلام عليكم

حمدا لله على سلامتك

سيبتلك رسالة على الياهو لكن اظاهر انك مكنتيش بتردي على تليفونات ولا رسايل
لو وصلتك ردي عليا هناك مش هنا ها

دنيا المدونات كانت مضلمة
بس كانت هادية
:)
:)

Jasmine said...

السلام عليكم
اولا الموضوع جميل جدا ومفيد ايضا واجمل شئ النصحتين وكويس ان حضرتك وجهتى نصحتين للبنات والرجالة ويارب كل الناس تعمل بالنصائح الغالية قبل ما يفوت الزمن ولازم يبقى فى حب وتضحية بين الطرفين لان دى هيبقى له نتيجة كويسة جدا هيعم الخير والمحبة وكل شئ كويس دائما ولازم نتحمل بعض ونصبر لان فى مشكلات كتير فى الزمن دى ولو عملنا كلنا بالنصائح دى هنهزم كل الصعاب ان شاء الله دائما
ثانيا المدونة مشاءالله جميلة جدا والمواضيع رائعة وانا اول مرة ازور المدونة وان شاء الله دائما دومتى بخير فى رعاية الله

OverFOrty said...

اللى على الشط عوام يعنى عقبال ما تطبقى الكلام ده بنفسك حنستنى منك فبد باك على البوست ده
:)

يا مراكبي said...

ده هدية مني ليكي

http://yamarakby.blogspot.com/2007/07/blog-post.html#links

شمس النهار said...

حمد الله علي السلامه وياريت ماتتعبيش نفسك لو سمحتي

لا الرجاله هتنصلح والا الستات هتنصلح
وطول عمرك يارضا وانت كده

ريحي نفسك ياابله
وخاللي بالك من نفسك
وياريت تطمنيني عليكي

وياريت تاخدوا البؤجااااااااااااات اللي عندي
لحسن هبعتهلكم علي القسم

قلب صادق said...

انت جميلة اوى

انسان وبس ! said...

حمد الله على السلامه

Appy said...

مانتى ريا
============
مجداويه الله يسلم قلبك لا والله رديت عليكي
اقولك كلمينى على الفون وانا اقولك اللى انتى عاوزاه
وبرضه انا رجعت اهو اعمل دوشه اي خدعه






انسان وبس
===========
الله يسلمك يا محمود من كل شر






قلب صادق
==========

ميرسي يا فندم ربنا يكرمك

Appy said...

سما مصر
==========
ليه يا حبيبتى بتعتذري
ربنا يكرمك على دعواتك وكلامك منورانى والله








يا مراكبى
=========
ههههههههههيييييييي
معلش عندي انا دي والله بس انا رديت عندك فى البوست ده
الوقت يا ريس لازم تختار وقت صح





جاسمين
========

ميرسي حبيبتى ربنا يكرمك

Appy said...

over
=======
انا قولت انا مش هقدر اعمل ده لوحدي يعنى قولتها علانيه اهو مستنى ايه بقى







ميشو
=======

اتهد ربنا يهدك بقى علشان انت عارف انا ممكن اعمل فيك ايه ودينى اقطع عنك الحصانه جمع حصان يعنى

Appy said...

شموس الجميله
==========
ادينى بحاول
وبعدين ايه تبعتيها القسم دي ليه هو انا طلبتها فى بيت الطاعه
عونيه يا حبيبتى بس دوللى تفضى ونيجي على تووووووول انتى عارف ظروفى كانت ملعبكه بس