انا انسانة



الاغنيه دي بتناقش قضيه مهمه اوي اسمعوها وشوفوها علشان تفهموا اللى يفهم او يحس انها بتعبر عنه فى حاجه يقولها نتقابل فى الكومنتات بقى

ملحوسه:- اطفى الهباب اللى انا مشغلاه فى الجنب ده علشان تسمعوا الاغنيه وعلى فكره مليش علاقه بالموضوع محدش يسقط عليه بدل ما اعضكم



كان معكم انسانه فى عالم لا انسانى ابى هانم كعب الغزال



حكمه الامبراطوره


المراه كالزجاج اذا ملمعتوش دايما واعتنين بيه هيتكسر ويضلم الكون حواليك

هششششششش حبه هدوء يا ادم انت وحوا




انا جيت اولا ميرسى للناس اللى اتصلت وانا معرفتش ارد معلش غصمن عنى
كنا بنقول ايه بقى فى البوست اللى فات بتاع حوا وأدم نلخص بعد الخناقات اللى حصلت وبرضه كل واحد بيقول حوار والتانى شيفاه بيدافع يعنى الفكره ان الموضوع بقى بين الست والراجل دفاع وهجوم زى ماتش الكورة بالظبط
عن نفسى هلخص اللى شايفه الاتنين محتاجينه

1- الست..... عاوزة راجل يحتويها ويحميها ويدلعها

2- الراجل ... عاوزة واحده مش زنانه ومبتسالش هو بيعمل ايه ولا رايح فين وتديله الحق يعمل كل حاجه ده اللى انتم عاوزينه
بصوا بقى خلينا نتفق على قواعد
1- الراجل مبيتغيرش يعنى لو انتم الاتنين من البدايه واخدين بعض زى ما انتم كده متعمليش فيها فكيهه الحمشه وانك هتغيره بعد ما تكعبليه وتتجوزيه يبقى بتحلمى وانتى اللى هتتغيرى علشان كده هتفضلى مخنوقه ومضايقه والمشاكل للركب
فلازم تبقوا راضيين عن بعض من قبل الجواز او الارتباط الخطوبه العاديه
واعرفى واتاكدى انه مش هيتغير ومش لوى دراع منه انما اعتقد تربسه دماغ وفهم خطأ للرجوله ان انا كده ومينفعش اتغير فخلاص لازم نرضى بالامر الواكع

2-النقد مينفعش الست تنقد الراجل طول الوقت يعنى هتلاقيه بيطلع اصوات مش كوويسه وهو نايم وعارفه انه موضوع بيخنق او قاعد فى البيت شبه امنا الغوله

تعالى على نفسك وحاولى تظبطى الامور مش علشانك بس علشانه كمان ممكن ميكونش بياخد باله من الحاجات دى انما لو هو محفلط ومزفلط فى نفسه فبلاش تشكى فيه طول الوقت وتقولى له حاطط برفان لمين ومتشيك ليه لان ساعات بتيجى له هفه فى عقله بيكون عاوز يبقى كده فى المقابل الراجل يا ريت بلاش نعكشه فى نفسك فى البيت وانت خارج بقى تبقى ميه فل وخمسه وعشرين لان ده هيخليها تشك فيك اكيد

3- الست بلاش النكد اممممممم لا مش هينفع انتى نكدى براحتك بس يا ريت يبقى فيه ثقه بينكم شويه عارفه انها صعبه فى الزمن ده
عن نفسى بوصل لها بصعوبه جدا مع اى شخص
بس عموما حاولى علشان متضايقيش نفسك

ومش لو جاب لكى ورده يبقى بيخونك اممممممم مش داايما ممكن عادى تكون طالبه معاه نحنحه اتنحنحى انتى كمان


الراجل
راعى نقطه ان الست فجأه بتكون ام وبتجيب بيبى يعنى مسئوليه تانيه ومبتقدرش تنام كتير وبتحاول ترضى جميع الاطراف المزغود الصغير والمزغود الكبير يعنى تبقى رحمه كده شويه بينكم مطلعش عفاريتك عليها والدنيا هتمشى شويه شويه

انا بقى عن نفسى اللى عاوزاه مش موجود ومعتقدش هيتوجد اولا انا شخصيه صعبه المعامله وبتقمص بسرعه ولا اطاق ومدلعه مقرفه ومفيش حد هيتحمل كل ده بالتالى مشكرين يعنى اعملوا انتم بالنصايح اما انا فنوووووووو
انا بقى اللى بقول انا لوى دراع هو انا كده ومن هنا ينطبق عليا باب النجار مخلع تيررررارررررررر


نصيحه برضه للراجله فى الاستبوخس :- البنات تودى وشها الناحيه التانيه لما الدنيا تخنقك اوى اوى وهى جنبك وقاعدين ساكتين مد ايدك وخدها فى حضنك وارقصوا

سامع الاغنيه دى اللى هنا ارقصوا عليها هتحسوا احساس تانى خالص انكم فعلا مش على الارض

نصيحه للبنات :- الراجله وشها فى الحيطه بقى اهتمى بيه وبنفسك علشان ترتاحى ويرتاح شوفى كل حاجه بعينه هو لو انتى بتحبيه اوعى تفتكرى انك لما تضحى انك بتيجى على نفسك انتى فى الاول بتسعدى نفسك بس اوى تعملى ده الا لما تكونى واثقه فيه اوى وحسه بالامان

امممممممممم اخيرا كده قفلت الموضوع ده بقى المره الجايه نقلب على موضوع تانى خالص اللى عنده نصايح تانى يكتبها بعد نقاش البوست اللى فات واللى قبله


كان معكم استاذ ورئيس قسم مكافحه مشاكل الاسرة والمجانين ابى هانم

حكمه الامبراطورة

اتلم الشبشب على القبقاب وبيتلقحوا على الابواب

انا حوا وانت ادم

تحديث مهم للرجاله :- انا بجد مبسوطه من الحوار اوي وبنوصل واحده واحده لوجهه نظر كويسه وحلول حلوه انا اتكلمت باحساس حوا شويه مش هنكر لان اكيد انا طلباتى هي دي بجد يا ريت الرجاله تساعد البنات انهم يوصلوا لطريقه مفهومه للراجل يعنى احتياجته ايه عاوز ايه وبرضه بامثله زي ما انا عملت ونتناقش فيها ويا ريت المتجوزين يقولوا برضه ويشاركوا بكلام عملي وبتجارب ومش زعلانه ان حد بيقول مشاكله بالعكس مبسوطه جدا
كمان اي غلط فيه من ناحيه اي حد فى اي مدونه انا مش زعلانه منه لانه كلام لا ينتمي للحقيقه بصله من بعيد او من قريب فمحدش يكلف نفسه ويعتذر عن حاجه ملوش ذنب فيها انا مسامحه وربنا يزيد فى حسناتي وحسنات اهلى اللى بيخدوها من شويه ناس ربنا يهديهم يا رب لان ربنا عالم انى مبجبش سيره حد بحاجه وحشه حتى وانا مخصماه ومش عاوزه اعرفه تاني

طبعا انا مردتش على الكومنتات فى البوست اللى فات وسبتكم تضربوا فى بعض وتشدوا شعور بعض وانا مبسوطه ومنشكحه شريره انا طول عمري
وده لسبب عاوزه كل واحد يقول رأيه بدون تاثير منى لان الموضوع كان له تكمله طبعا كتير اعترضوا وكتيروا قالوا الستات اصلهم بيعملو ويعملوا
انا ليه سميت البوست انا حوا وانت ادم وده متاخد من الاغنيه اللى انا ملقحها فى الكوكب يا ريت تبقوا تسمعوها علشان تفهموا

وعلشان فعلا احنا بنكمل بعض مينفعش نرمي اللوم على بعض اذا عملنا كده يبقى مش هنخلص ولا هنحل المشكله طبعا الكلام موجهه للناس اللى هنا واللى بيقروا مش هقدر اقول للمجتمع كله

بس دوركم تفهموا وتنقلوا لو اقتنعتوا
مش هنكر ان الستات ناقصات عقل ودين زي الارهابى على عبدالله ما قالى فى الكومنت بس يا ارهابى ناقصات دين علشان ولا الصلاه بتاعتنا بتكمل ولا صومنا وعقل علشان لازم يبقى عندنا العاطفه اكبر وده مربط الفرس والحدوه بتاعته كمان
ليه بقى لان الست دي بتكون ام لاولادها ولازم تبقى حنينه وتحتويهم وكمان بتكون ام للزوج كمان ده الصح والمفروض
مش هننكر ان المجتمع دلوقتى وخلينا نقولها بصراحه خلى الست تكتسب بعض الصفات العنيفه وده ليه بقى اولا الست عاوزه تخرج وتلبس براحتها لو حد يقولى الدين اقول ملكش فيه دينها وعلاقتها بربنا بينها وبينه فالبتالى بتتعرض لتحرش وبهدله وطوله لسان
هى عاوزه تحس بالحريه الراجل لازم يكفلها ليها بس فى الزمن ده لا طبعا مفيش الكلام ده بيتحول لوحش بيغتصب اي حاجه شايفها فيها حتى لو ضحكتها
فده خلاها تحس انها محاصره ومن قبل الجواز يعنى عوامل مترسبه حتى لو محجبه او غير
فبقت قاسيه جدا وده انعكس من الشارع للبيت لانها بتحاول تحمي نفسها كل وقت حتى من جوزها
او حبيها او خطيبها اللى المفروض يحميها لانها بقت دايما متهمه فى نظر الراجل انها سبب المشكله
الست لو حست بامان زي ما خيخه قالت واهتمام بتكون رقيقه وبتتخلى خالص عن عنفها وبتتحول من برعي المفش لكوكي او سوسن نونو كده

وفيه خطا بيقع فيه البعض هو كذا خطأ
فزيع
اولا
الست محتاجه حنيه يعنى لما تتخانقوا وتلاقيها اتسهوكت ونونوت وعيطت اعرف انها حتى مع المترليوس اللى طالع

منها بتكون عاوزاك تاخدها فى حضنك او تقولها كلمه صغيره وده بذكاء الراجل لو ذكي يعنى
اللحظه اللى ممكن الست تعمل فيها اي حاجه علشانه وده طبعا مبيعملهوش الراجل


ثانيا
الست ذكيه جدا وبتكون فاهمه جوزها وعندها احساس عالى بيه اوي يعنى لما بتكون مضايقه منه وعاوزه تقوله حاجه بتخاف علشان عارفه ان البيه عصبى ولما بيكون عصبى بيشوط اي حاجه قدامه وممكن الموضوع يتحول لمكوي طايره فازه فبتتقوقع على نفسها
مش بالظبط بس الكلام بيكون طالع كده
فبتفضل السكوت ومن هنا بيحصل فجوه رهيبه بينهم وبتحاول تعوضها هي وتنتقم فى نفس الوقت
تعوضها ازاي بقى انها تهتم بولادها اكتر بنفسها اكتر تهمله هو تهمل مظهرها وده علشان حاجه كمان انها بتحس انه مبقاش يقول لها كلمه حلوه ولا بياخد باله من اي تغيير ولو صغير فيها
فيا تيجي بنتجيه صح وتهتم اكتر بنفسها يا نتيجه عكسيه وتتخن وتهمل وتبقى ريحتها بصل وتوم زي ما ليكتر قال كده فى الكومنتات
او تتجهه اتجاه تاني تتكلم مع ناس تانيه اصحاب اصدقاء وده مع مرور الوقت بيتحول لجفا وهجر من ناحيتها ناحيه جوزها او حبيبها هي مش قادره تستغنى عنه وفى نفس الوقت نفسها فى حياه وتحس انها عايشه وكتير بيوقعوا فى ده او تكون علاقات محترمه بس مديه لهم اهتمام اكتر بكتير ومن هنا برضه بيحس انها بقت جامده ومش مهتمه ودي بتكون منحنى خطر لانهم اصلا مفيش بينهم حوار وبيكون انتهي خلاص وعلشان ترجع الحياه لازم يبقى فيه حوار
البعد
يعنى مينفعش تكون بعيد عنها وعاوزها تفهمك من غير ما تكون بتشوفك يعنى مسافر بتشتغل طول اليوم عايش فى البيت زي اللوكانده هى هتحس بيك ازاي هتفهم انت عاوز ايه وانت عنيد ومش عاوز تتكلم وواخد كل حاجه على اعصابك واعصابها
لازم تتكلم وتبطل كبرياء ما انت ممكن تتكلم مع اي حد ولو مشكله وانت مش من النوع اللى بيتكلم كتير اكتب لها حسسها فهمها براحه متسبهاش فى حيره


نيجي بقى لنقطه الحوار اياك اياك اياك تلاقى رساله او كلمه حلوه منها وانت متعصب او كنتم متخانقينى وترد ببرود او باهمال ده بيعمل حته سوده جوا القلب شويه بشويه بتكبر اوي اوي ومبيكونش فيه مجال للرجوع وبتكون الحياه بقت بارده علشان كده بيحصل المشاكل والبعد بدون احساس

الست بقى انا عارفه ناس كتير بتعرفش تعبر وتصعب عليها نفسها اوي ومبتعرفش تعبر عن اللى جواها فيه حلول كتير اكتبى ورقه رساله وجههي الرساله على انها من صحبتك لجوزها لحبيبها اي حاجه المهم توصليه الرساله قولى له نفسك فى ايه عاوزه ايه والرجاله بتوسم فيهم الذكاء اممممممم يعنى الاغلبيه واكيد هيفهم ولو مفهمش اضربيه بالكرسي حطي له سم فى الاكل خضيه هاتي له سكته قلبيه المهم خدي حقك ههههههه
بجد الحوار والاحساس جربوا الورد جربوا كلمه رقيقه بلاش العنف بلاش نصد بعض يا ريت يبقى قلبنا اكبر من كده وعقلنا الرجاله بترجع تعبانه بس من حق الست تتكلم وانت تسمعها
ربنا قال الرجال قاومون عن النساء والرسول عليه الصلاه والسلام قال رفقا بالقوارير يا جدعان مش كسروها يعنى
القوامه عند الرجال مش بالعنف مش بكلمه لا لمجرد انها لا
ده صعب وخاصه مع البنت او الست اللى شخصيتها قويه اياك وانك تحسسها انها اوت اوف كنترول يعنى متقدرش تحكم علاقتها ده بيخليها تعند اوي خاصه لما يكون لها شخصيه وانت واخدها كده متلغيش الشخصيه دي لانك هتلاقى العكس وتهد دنيا جميله انتم محتاجينها الست لما بتحب بتبقى زي السكر الدايب فى الميه انتم قاومون علينا بالحب كمان مش بالماديات وبس بالاحتواء الست لما بتبقى نار فى ثانيه بتكون رماد بس العند بيولد الكفر والست كرامتها بتنجرح بتتوجع وقلبها بيتوجع اوي
ايالك ترفض حاجه هي قالت لك عليها وانت فى نفس الوقت تطلبها منها يعنى لو عندها سبب مقنع انك تبعد عن شخصيه معينه او حاجه معينه وانت ترفض وتقول لا وتضايقها وهي تسكت علشان الحياه تمشي وعلشان قلبهاوجعها اوي وعلشان بتحبك اوي
متجيش انت تطلب منها ده برضه وتقولها متعمليش كذا بدون اقناع او مناقشه بحب بينكم بلاش تتحكم لمجرد انك راجل وهي مش هتربس وخلينا متفقين ان الست بتيجي على نفسها فى حاجات كتير وتقبل بحاجات كتير علشان بتحبك يبقى لازم انت تقدر علشان هى تقديرها يكبر ليك

بس كفايه بقى عليكوا ونكمل فى الكومنتات ونشد فى شعور بعض نيهاهاها والمره دي عاوزه دم للركب كده مينفعش يا جدعان ايه الهدوء ده بس امال انا جايبه شنطه المسعافات الاوليه ليه مش علشان كده دا انا هفتح جناج للاصابات هنا


كان معكم ابى هانم حلال المشاكل حلال العقد اللى متعقد لوحدياته


حكمه الامبراطوره

القلب لما بينقط باسود صعب تزيل اللون لانه اللون الوحيد اللى ملوش صبغه تغيره ولا مطهر

ملحوسه محدش يقراها :- مش هسمح لنقطه سودا تيجي فى قلبى يا ريت متضغطش علشان بحبك

راجل تفصيل




بعد العاصفه الترابيه والكلاميه والمهلبيه التى اجتاحت كوكبنا المصون الايام الماضيه
قررنا قفل الشبابيك وتقفيلها قبنورى وغلق الترابيس علشان المخلوقات الخارجيه وطلق الخرفان فى الكوكب علشان اللعب والتنطيط
نيجى بقى للمهم
الست عاوزه ايه من الراجل او انا كبنت يعنى هكون عاوزه ايه من الراجل
فى نظرى يعنى
اممممممممممممم
عاوزة واحد ميرميش هدومه فى كل مكان ويا حبذا لو طبقهم وحطهم فى الدولاب مش عيب يعنى ما هو انت لو عايش لوحدك هتتنيل تعمل كده
ومش علشان الست الوالده دلعت حضرتك يبقى اتحمل انا
متقوليش قومى اعملى شاى قولى لو سمحتى يا حبيبتى ممكن اطفح شاى انا مش القهوجى بتاعك فيه اختراع اسمه ذوق
لما يرجع البيت ويسال على الاكل حتى لو كان ملحه قليل او كتير ميخبطهاش فى وشى ويقولى وحش يقول بس براحه او يقوم يجيب ملح لنفسه عادى يعنى
لو ممكن يقول تسلم ايديكى يا حبيبتى بس الملح زياده
ايه لسانه هيوجعه لو قال كده

سؤال بقى ليه بشوف رجاله بعد الجواز كرشهم بقى خمسه متر قدامهم واحس يا عينى ان الست وهى بتعرفه على صحباتها سيادته جوزى وده كرشه جاى معاه يونسه

ليه الراجل ميهتمش بنفسه وهو خارج مع مراته
مع ان سبحان الله هى نفسها مراته دى اللى كان بيخرج معاها قبل الجواز على سنجه عشره ونص

فى البيت ليه يقعد الراجل منكوش ويبقى صاحى ضارب بوز خمسه متر
مع ان ايام الخطوبه لو صادفت وبات عندهم يعنى يصحى فاتح بقه وبيضحك شبه نفق الشهيد احمد حمدى

ليه لما الست تعيط الراجل بيكون عارف كويس انها بس محتاجه يطبطب عليها وهى هتهدى وتسكت مع انه واثق من ده يسبها بتتنطط قدامه زى السمكه الصاحيه فى طاسه القليه

مع ان بحاجه بسيطه هيهديها ليه الساديه والتعذيب ده
ما انتم عارفين اللى فيها كلمه تجننا وكلمه تهدينا
هو علشان الحق فيه ستات لازم تتخبط بحاجه فى دماغها علشان تسكت بس مش كله والله فيه ناس هاديه وستات محتاجه حنيه

فى النهايه يعنى انا بقول نستغنى عن الراجل ده ونعمل وقفه احتجاجيه ونطالب براجل آلى تصنيع خاص وكل ست تختار المواصفات اللى هى عاوزاها
يعنى مثلا شبه البطيخه شبه الاناناس شبه يوم التلات زى ما هى عاوزه

جاوبوا بقى ومش عاوزه حد يضرب حد ولا تضربونى انا شخصيا

ملحوسه :- علشان انا امبراطورة ولازم اكون بحكم بالعدل مش اوى يعنى وعلشان زمتى الاستك مش هكتب عن الستات نيهاهاهاهاها نخلى البوست ده عن ده وده والراجل يقول هو عاوز ايه من الست اتفقنا

كان معكم سياده معالى فخامه لواء اركان فؤاد آبى هانم حفيده تركى باشا


حكمه الامبراطورة

الست الوحشه تجيب عسر هضم والست الحلوه تجيب صداع

اكتبوها يمكن تنفعكوا


الرقعاء السخفاء سبوا الخالق الرازق جل في علاه ، وشتموا الواحد الأحد لا إله إلا هو ، فماذا أتوقع أنا وأنت ونحن أهل الحيف والخطأ ، إنك سوف تواجه في حياتك حربا! ضروسا لا هوادة فيها من النقد الإثم المر ، ومن التحطيم المدروس المقصود ، ومن الإهانة المتعمدة مادام أنك تعطي وتبني وتؤثر وتسطع وتلمع ، ولن يسكت هؤلاء عنك حتى تتخذ نفقا في الأرض أو سلما في السماء فتفر من هؤلاء ، أما وأنت بين أظهرهم فانتظر منهم ما يسوؤك ويبكي عينك ، ويدمي مقلتك ، ويقض مضجعك.
إن الجالس على الأرض لا يسقط ، والناس لا يرفسون كلبا ميتا ، لكنهم يغضبون عليك لأنك فقتهم صلاحا ، أو علما ، أو أدبا ، أو مالأ ، فأنت عندهم مذنب لا توبة لك حتى تترك مواهبك ونعم الله عليك ، وتنخلع من كل صفات الحمد ، وتنسلخ من كل معاني النبل ، وتبقى بليدا!غبيا صفرا محطما ، مكدودا ، هذا ما يريدون بالضبط.
إذا فاصمد لكلام هؤلاء ونقدهم وتشويههم وتحقيرهم وكن كالصخرة الصامتة المهيبة تتكسر عليها حبات البرد لتثبت وجودها وقدرتها على البقاء. إنك إن أصغيت لكلام هؤلاء وتفاعلت به حققت أمنيتهم الغالية في تعكير حياتك وتكدير عمرك ، إلا فاصفح الصفح الجميل ، ألا فأعرض عنهم ولا تك في ضيق مما يمكرون. إن نقدهم السخيف ترجمة محترمة لك ، وبقدر وزنك يكون النقد الآثم المفتعل.
إنك لن تستطيع أن تغلق أفواه هؤلاء ولن تستطيع أن تعتقل ألسنتهم لكنك تستطيع أن تدفن نقدهم وتجنيهم بتجافيك لهم ، وإهمالك لشأنهم ، و إطراحك لأقوالهم!. ( قل موتوا بغيظكم ) بل تستطيع أن تصب في أفواههم الخردل بزيادة فضائلك وتربية محاسنك وتقويم اعوجاجك.
إن كنت تريد أن تكون مقبولاً عند الجميع ، محبوبا لدى الكل ، سليما من العيوب عند العالم ، فقد طلبت مستحيلا وأملت أملاً بعيدا



القطعه دي جابتها ليه فنون ربنا يكرمها من كتاب لاتحزن وعجبتنى فعلا

م
لحوظه من واحده مفروسه :- الناس اللى مفهمتش البوست اللى فات وزعلت لو قريت ردودي ومفهمتش معلش حقكوا عليا

والناس اللى فهمت البوست وعرفت انى مش بتهم كل الناس ولا بقول الفقر عيب بس لما يبقى اللى قدامك اقل منك فى كل حاجه ويغلط فيك وفى تربيتك من غير ما يعرفك هو ده اللى ميستاهلش تتعامل معاه

وحاجه كمان البعض افتكر انى بجمع كل المدونين وطبعا واضح انهم قريوا من على الوش بس انا قولت فى الاخر انا ليه اصحاب كتير منهم وبحبهم والوحش بعدت عنه من زمان ودول الرساله كانت ليهم شخصيا وهما عارفين نفسهم كويس

اذا حسيتوا بالتعالى فى كلامي معلش انا كده عندي تركي بينفش عليا لما حد بيجي على كرامتى


اممممممم سمه الشعب المصري بقى عموما يسيبوا اللى قتل ويجيبوا العيب على القتيل ويقعدوا يقوله له انت ليه تتقتل ها اكيد عملت حاجه
والله راجعوا الكومنتات وانت تفهموا فى النهايه اللى زعل معلش ده حقى انا مبحبش حد يغلط فيه واعتقد كلكم كده ومحدش يعمل واعظ عليا انا مبدخلش فى حياه حد وعلشان كده عندي خطوط حمرررررررررررا مبحبش حد يدخل فى حياتى

ميرسى واتمنى اللى زعل واللى حسس على بطحه عنده يفهم انى لو اقصده هقولها فى وشه انا فعلا معرفش الانونيمس ولا البتاع التانى اللى اتكلم عنى
ويا ريت الناس متاخدش الموضوع بشكل شخصى سوري بجد بس اعذرونى


حكمه الامبراطوره

البس اللى يليق عليك ومتلبس اللى على مزاج الناس
لانك مش هتعرف ترضيهم والصراحه راحه واللى يزعل يشرب من الترعه

الانونيمس المحترم والمدون الغير محترم

تحديث:- علشان والنبى الناس اللى زعلانه ومضايقه من انى بحرق فى نظيف وانى اقول عشوائيات اقروا ردي على عاشقه وغلبانه والشنكوتي علشان تفهموا وبعدين اللى قصدتهم فى البوست ده مش كل المدونين انا قصدت الفئه اللى بتتكلم عن زمايلها والفئه اللى عامله نفسه كويسه وعلى فكره تقريبا هما معروفين باخلاقهم الزباله انا مقصدتش كل الناس ومش محتاجه نباهه يعنى علشان اقعد اشرح هتزهقونى ليه انا ليه حق لما حد اقعد معاه او اعرفه ويعمل كده ...ليه حق اعمل كده كل كلمه فى البوست قصدتها عن الشخصيات اللى بتتكلم عن بعض ولا علشان بنت اتكسف واسكت لا والله العظيم اللى هيجي ناحيتى تاني لاكون مبهدلاه هو الواحد بيحترم نفسه بس ويسكت انما لما الموضوع يزيد لا كده اوفر
موضوع النت ببلاش كنايه عن ان الحاجه اللى بتتعمل ببلاش بتكون استخدمها مش فى محله عند بعض الناس ما كلنا بندفع اشتراك مش ببلاش بس اللى بيروح يقعد فى سيبر ولا وصله بعشره جنيه ويطلعه علىنا
هو ده قصدي

امبارح فجأه لقيت ايهاب الشنكوتى داخل يسالنى يقولى انتى مين زعلانه منه وبيعتذر لكى عند خيخه؟
طبعا استغربت قولت له يعتذر فين قالى فى الكومنتات اللى عند خيخه قولت له معرفش هشوف جاب ليه اللينك
واللينك ليكوا انتم كمان اهو انطح
دخلت لقيت انونيمس كاتب ليه اعتذار وبرضه هجيبه لكم هنا

Anonymous Anonymous said...

خيخة انا اسف انى استغل صفحة تعليقاتك
وابلغ من خلالها رسالة لأبي

اصل انتى الوحيدة اللى بتسمحى للأنونيمس انهم يعلقوا
وأبى لاغية عندها حكاية الانونيمس دى رغم انها بتعمل مودريشن

انا بس عايز اقولها انى اسف جدا

هى اكيد هتقرا تعليقى ده عندك

يمكن لما تقراه تسامحنى

Wednesday, May 13, 2009 1:42:00 AM

طبعا انا حواجبينى اتشعلقت ومش فاهمه حاجه
انا مبزعلش عموما من حد والاغرب انى مش فاهمه كلامه يعنى بصراحه معنديش وسط لما بزعل من حد بتكون اساسا قامت خناقه وانا قطعت نهائيا واللى قدامى بيكون عارف فالشخص ده مكنتش اعرفه دخلت ورديت عليه وقولت له انا هفتح الانونيمس عندى وقولى انت مين علشان اعرف اسامحك ليه
وفعلا دخل وساب ليه التعليق ده امبارح عند

Anonymous said...

كويس انك فتحتى الانونيمس

انا اللى سبت تعليق عند خيخة

انا كنت عايز اعتذرلك لانى كنت بتعمد انى اغلط فيكى فى غيابك

انتى متعرفنيش
بس من كلام واحد مدون عليكى
افتكرتك انك صايعة

لكن لما قريت بوست خيخة اللى كانت كاتباه عن اخر بؤجة خير
لاقتها اتكلمت عنك بصورة مختلفة
وان مظهرك المتحرر هو اللى بيخلى الناس تاخد عنك فكرة غلط
فقلت اعتذرلك
وياريت تتقبلى اعتذاري

May 13, 2009 10:00 PM

هتلاقوه فى البوست اللى فات هنا بتاع عيد ميلاد قوس قزح

طبعا انا مش قادره افهم واحد ميعرفنيش وبيغلط فيه
ده بالبلدى يعنى معلش فيه مثل بيقولك تعرف فلان قاله اه قاله عاشرته قاله لا قالوه يبقى متعرفهوش
ده مبدئيا
ثانيا واحد يكون فكره عن واحد سواء ولد او بنت من لبسه علشان لبسه مختلف عن بيئه الاولانى
يبقى بالزمه ده عقل ولا ده مبدأ ولا ده دين اصلا ده مفيش دين بيقول كده
ثم انا لما بقابل حد ولا كنت زمااااااااااااان ربنا لا يرجعها ايام من سنه ولا اكتر لما كنت بترزع على البورصه ومرة فى الاسبوع مش مرميه زى ناس هناك كنت بروح بلبس عادى جدا منين حكموا عليا بقى
ومنين واحد مش محترم انا تنازلت وقعدت معاهم يقوم يتكلم عنى وحش

اولا الانونيمس انا قبلت اعتذارك اكيد حتى لو معرفكش وده لسبب واحد علشان انت كان عندك الشجاعه انك تعتذر
انما المدون الجبان اللى اتكلم عنى ولا اذا كانت بنت حتى لان فيه بنات واطيه اى والله بجد فانا طبعا مش هسامحها لان دى المفروض انهم قعدوا معايا
وبقولهم رساله واحده استحموا ريحتكوا طلعت وبعدين اتكلموا على الناس اللى انضف منكوا بجد مش انا لوحدى فيه كتير زى جدا
وبعدين ابقوا بصوا لنفسكوا واتكلموا على الناس

رساله لكل الناس مش معنى انى لبسى مختلف عن التانى يبقى هو وحش او صايع او حتى محترم لا خالص الاخلاق وطريقه المعامله
كل طبقه ليها طريقتها كل مستوى له طريقته

سؤال بجد هو معنى ان الواحد بيتعامل ببساطه مع ناس اقل منه اجتماعيا او ماديا او فكريا يبقى كده وحش ولا ايه يعنى لازم نتنك على الناس ونتكلم من طرف مناخيرنا علشان تتبسطوا يعنى ولا اعمل ايه بجد؟

سؤال كمان
هما دول المدونين المثقفين هما دول اللى بيدافعوا عن قضايا وبيلعنوا فى الحكومه ليل ونهار وهما دول برضه اللى بيكتبوا شعر وحب ونحنحه
بيتهيأ ليه كده وضحت اوى اوى يعنى الشعارات المزيفه والاقنعه الهبله اللى لابسينها
انا عن نفسى مش اى حد باخد منه معلومه اه بصراحه ميبقاش واحد منفسن ومتلقح ليل ونهار على القهوه باتنين جنيه وجايب كتاب من سور الازبكيه باتنين جنيه وماسكه وعامل مثقف
ولا واحده سورى يعنى ملزقه شعرها بفازلين وبرضه استلفت كتاب وقاعده عانس ووحشه واسمعها وهى بتنضال

انا اخد الكلام من ناس طبيعيه معندهمش عقد ولا كلاكيع واعتقد بعد سنه وخمس شهور فى التدوين قدرت اعرف مين ومين
انا بس حبيت اوريكم ابسط حاجه وسط المناضلين اللى على ورق

انا على فكره مش زعلانه لانى قادره احكم علاقاتى كويس جدا واللى بيغلط ملوش راجعه معايا تانى خلاص
انا بس زعلانه على نفسى انى نزلت للمستوى ده
ومش كل واحد جاى من عشوائيات ولا بيئه يبقى يتكلم على اللى احسن منه مش شكلا بس وموضوعا الحمد لله انا حد ناجح فى شغلى ومباخدش مصروف من اهلى وعملت نفسى بنفسى ومبدعيش حاجات مش عندى ولا قدام اهلى بشكل ولبس ووراهم بشكل ولبس ولا بكدب فى بوست والتانى يبقى فيها كلام مخالف للاول ولا باخد اكسبريشن من حد ولا طريقه كلام واعمل بيها بنت ناس
ولاد الناس اللى عندهم اصول ومتربيين مش محتاجين يثبتوا لحد اساسا لانه بيبان اوى

المعقدين والمشوهين واللى عندهم كلاكيع اخرهم معايا الشوز بتاعتى
بس فعلا خساره على مصر ان ده يكون تفكير اولادها
يالا خلوها تتحرق وحلال اللى بيتعمل فيها

انونيمس مش زعلانه منك وبجد انت حد محترم ولما كتبت البوست ده مش علشانك بس انت باللى عملته اثرت نقطه فعلا فى مصر كتيييييييير بين الشباب والبنات وكله يقولك انا مثقف ومتفتح وتفكيره فى كعب الشوز بتاعه لو جيت تطبق كلامه ده عملى على الواقع مع انى اصلا معرفتش انت مين بس انا عالمى وحياتى مش المدونين بس انا ليه عالمى واصحابى اللى بقالنا 15 سنه اعتقد دول اللى يهمونى اكتر انما ناس تانيه عاديه او اقل ميهمونيش

فى النهايه طبعا التدوين طلعت منه باصحاب وحبايب كمان
وطلعت منه بحاجات منيله بس صدقونى المنيل اكتر

والله يحرقك يا نظيف علشان انت اللى عملت كده وخليت النت ببلاش وقرفتنا

حكمه الامبراطوره

الكلب يهوهو عليك والجرب اللى فيه يجيبوا فيك

هنهوووف الشمع

Align Centreدى هدور عليها علشان اجبها لكى او هرسمها وامرك لله بقى اتحملى الشخبطه وهجيبها لكى برضه
دى بتاعت المدونين كلهم
دى بتاعتها هى وبس محدش يبص فيها
دى هديتك بقى امممم جبتها فيها فراشات علشان اخدها تانى عادى يعنى


النهارده عيد ميلاد مانتى الصغيره دوللى قوس قزح هانم
وطبعا بما انها بتحب الوان قوس قزح كلها فحاولت اجيب لها تورته على الشكل ده ملقتش يعنى بس لقيت شويه الوان مع بعض كده صغننين قولت يمكن ينفعوا

قوس قزح مش هعرف اتكلم عنها لان اللى بينى وبينها هى بس والقريبين لنا اللى فاهمينه بس هى عارفه قد ايه انا بحبها وبسمع كلامها وبثق فيها
واعتقد كل الناس عارفين داليا ايه بجد هى كتله متحركه من الحنان والحب والجدعنه والدماغ النظيفه

كل سنه وانتى طيبه يا دوللى وعقبال 95 سنه ونص يا رب

سرداب الحياه




دائما ما يوجد بداخلنا سرداب مرعب من الاحزان والانطواء على النفس
دائما وابدا فى ظل ما نعانى منه من وحده .... برغم وجود الكثير من الاصدقاء والاهل
كل منا بداخله هذا السرداب
ولكن العجيب انه على الطرف الاخر دائما لابد من وجود من يهوى فتح هذا السرداب ورؤيه ما بداخله من كوابيس واحلام محطمه وضياع هويه
فيا من تهوى ومن تحب الحياه وترغب فى التغيير
اترك العنان لاحلامك
اعطى المفتاح لمن هواك واراد الدخول للسرداب
الحياه لن تستمر بدون تجارب
الكثير من المخترعين لم ينجحوا الا بعد الفشل
فى النهايه من يريد التقدم فى حياته لابد له ان يجرب كل المعانى وكل الاختراعات وكل الصدمات لكى يتعلم

اممممممممم كل بقى الرغى اللى فوق ده اللى انا مش فاهمه منه كلمه عن ذات نفسى يعنى مع ان انا اللى كتباه
عاوزه اقولكم منه حاجه واحد لا حاجتين تلاته
اولا البلد مش هتتغير طول ما احنا بننتقد اللى حوالينا وبس كل واحد عنده حل فى حاجه او مشكله يبدا يعملها يعنى مثلا
واحد رافض الرشوه خلاص ابد بنفسك ومتديش رشوه
ومتقوليش ما هى ماشيه كده لا تنح وزعق وانفش ريشك هتاخد حقك بدل ما اهبدك بقله فى دماغك
واحد مضايق من الزباله فى الشارع خلاص امسح بجيرانك الارض لو شوفتهم بيرموا الزباله
بس لو اتلموا عليك وضربوك متجيش ليه تشتكى نيهاهاها
مضايقك اعلان مستفز فى التى فى
خد رقم الشركه اللى بيتعلن عنها واتصل قولهم رايك بصراحه فى الاعلان اى والله انا عملتها هههههههههههههه والناس اتخضت بس عادى يعنى ايه المشكله فى اعلان حزام السونا علشان الراجل اللى بيبص على جيرانه وكانت تجربه ممتعه ليه انى اقولهم راى بصراحه

يعنى زى اللى بقوله كده اعمله اى حاجه شايف انها غلط ابدا بنفسك واعملها وقول لنا عملت كذا ورد الفعل كذا غيرك يتعلم
واللى عنده افكار تانيه يقول
ونبطل نخبط راسنا فى الحيطه لان عندنا حكومه بس هما مش عندنا بمعنى عايشين فى عالم تانى منفصلين عنا يبقى بالسلامه بقى ونطنشهم منستناش منهم حاجه ولا نضغط علشان يعملوا هما مش هيعملوا

الحاجه التانيه
اممممممم لما تكون من جواك حزين وحاسس انك وحيد وقرفان من العالم كله وعندك اكتئاااااااااااب ولقيت حد مجنون يدخل حياتك بليز متقفلش الباب وساعده انه يكمل معاك ساعده انه يخرجك من اللى انت فيه
يمكن هو هوايته وحبه فى حياته انه يخرجك من ده
متقولش انا لوحدى متقولش مفيش حد هيعمل ليه حاجه متقولش انا زهقت
دايما فى وسط الضلمه والسماء الضلمه كمان نجوم او نجمه صغيره بتنور وبتفتح طريق
العالم مبينتهيش وانت لوحدك لازم يبقى معاك حد
وهو ده كان قصدى من الحته اللى فوق

امممممممممم
نطلع بقى من كل الكلام اللى فوق ده بايه ولا حاجه وانى مهيسه على الاخر ومبسوطه اوى وخير اللهم اجعله خير بنزل كل يوم بضحك وبصحى من النوم فايقه
ربنا يستر بقى

كان معاكم استاذ ورئيس قسم فتح الابواب والسراديب ابى هان كعب الغزال


حكمه برنارد شو

إذا كان قلبك من حديد تذيبه المرأه , و إذا كان قلبك من جليد تذوب في المرأه

كل سنه وانت ..... وبعيد

ده الفرق





ما انا قولت مش ممكن بصراحه كلنا نحتفل بعيد ميلادتنا يعنى ومنحتفلش بيه هو
انا مش حد وحش زى العيال الوحشين التانين
انا بجد هسأل سؤال بمناسبه عيد ميلاد الريس وعيب يا ولاد بصراحه انا مقدرش اغلط علشان انا بابا قالى متغلطيش فى حد اكبر منك
مش علشان هو كويس لا علشان المفروض ابقى مؤدبه

عاوزين له هديه فى عيد ميلاده ايه هى بقى

السؤال الاول تتتتتتتتتتتتتتن تتتن تششششششششششش

اذكر خمس انجازات بس للريس على مر الحكم بتاعه ومش هذكر كام سنه علشان كل ما اقراها وافتركها احس ان هيجيلى هارت اتاك؟


السؤال التانى

بصراحه مش قادره اقول لكم خمس مساوئ اصل حد يعضنى اقولكم ماشاء الله العدد فى الليمون قولوا زى ما انتم عاوزين بس خليكوا ناس عادله بلاش ظلم اصل انا عارفاكوا ما هتصدقوا وتفشوا غلكوا فيه ههههههههههههههه

بس ابعتوا الاجابات على الكوكب وان شاء الله نتقابل فى مارينا جميعا الصيف ده ..

وكل سنه وانت كبير يا كبيررررررررر وكابس على نفسنا وابو كل حاجه فى الدنيا والحدق يفهم نيهاهااها


كان معكم لواء طيار دكتور اركان حرب ابى هانم


حكمة الامبراطورة

لو دامت لغيرك كانت دامت ليك يا حدوقه

Share |