راجل تفصيل




بعد العاصفه الترابيه والكلاميه والمهلبيه التى اجتاحت كوكبنا المصون الايام الماضيه
قررنا قفل الشبابيك وتقفيلها قبنورى وغلق الترابيس علشان المخلوقات الخارجيه وطلق الخرفان فى الكوكب علشان اللعب والتنطيط
نيجى بقى للمهم
الست عاوزه ايه من الراجل او انا كبنت يعنى هكون عاوزه ايه من الراجل
فى نظرى يعنى
اممممممممممممم
عاوزة واحد ميرميش هدومه فى كل مكان ويا حبذا لو طبقهم وحطهم فى الدولاب مش عيب يعنى ما هو انت لو عايش لوحدك هتتنيل تعمل كده
ومش علشان الست الوالده دلعت حضرتك يبقى اتحمل انا
متقوليش قومى اعملى شاى قولى لو سمحتى يا حبيبتى ممكن اطفح شاى انا مش القهوجى بتاعك فيه اختراع اسمه ذوق
لما يرجع البيت ويسال على الاكل حتى لو كان ملحه قليل او كتير ميخبطهاش فى وشى ويقولى وحش يقول بس براحه او يقوم يجيب ملح لنفسه عادى يعنى
لو ممكن يقول تسلم ايديكى يا حبيبتى بس الملح زياده
ايه لسانه هيوجعه لو قال كده

سؤال بقى ليه بشوف رجاله بعد الجواز كرشهم بقى خمسه متر قدامهم واحس يا عينى ان الست وهى بتعرفه على صحباتها سيادته جوزى وده كرشه جاى معاه يونسه

ليه الراجل ميهتمش بنفسه وهو خارج مع مراته
مع ان سبحان الله هى نفسها مراته دى اللى كان بيخرج معاها قبل الجواز على سنجه عشره ونص

فى البيت ليه يقعد الراجل منكوش ويبقى صاحى ضارب بوز خمسه متر
مع ان ايام الخطوبه لو صادفت وبات عندهم يعنى يصحى فاتح بقه وبيضحك شبه نفق الشهيد احمد حمدى

ليه لما الست تعيط الراجل بيكون عارف كويس انها بس محتاجه يطبطب عليها وهى هتهدى وتسكت مع انه واثق من ده يسبها بتتنطط قدامه زى السمكه الصاحيه فى طاسه القليه

مع ان بحاجه بسيطه هيهديها ليه الساديه والتعذيب ده
ما انتم عارفين اللى فيها كلمه تجننا وكلمه تهدينا
هو علشان الحق فيه ستات لازم تتخبط بحاجه فى دماغها علشان تسكت بس مش كله والله فيه ناس هاديه وستات محتاجه حنيه

فى النهايه يعنى انا بقول نستغنى عن الراجل ده ونعمل وقفه احتجاجيه ونطالب براجل آلى تصنيع خاص وكل ست تختار المواصفات اللى هى عاوزاها
يعنى مثلا شبه البطيخه شبه الاناناس شبه يوم التلات زى ما هى عاوزه

جاوبوا بقى ومش عاوزه حد يضرب حد ولا تضربونى انا شخصيا

ملحوسه :- علشان انا امبراطورة ولازم اكون بحكم بالعدل مش اوى يعنى وعلشان زمتى الاستك مش هكتب عن الستات نيهاهاهاهاها نخلى البوست ده عن ده وده والراجل يقول هو عاوز ايه من الست اتفقنا

كان معكم سياده معالى فخامه لواء اركان فؤاد آبى هانم حفيده تركى باشا


حكمه الامبراطورة

الست الوحشه تجيب عسر هضم والست الحلوه تجيب صداع

61 اخبط وقول رايك:

الطائر الحزين said...

كنت لسه هكتب حاجة شبيهه
هى:عاوزاه وسيم
هو : عاوزها جميلة
هو: عاوزها مثقفة
هى عاوزاه حنون
هو عاوزها لماحة
هى : عاوزاه شيك
.........
........
كنت هعمل كدة


مفيش اى مانع من اللى قلتى عليه فى التدوينة بتاعتك خالص خالص

بدراوى said...

انا عايز اقول لحضرتك على حاجة
بس ياريت متضحكيش

انا شخصياً كراجل مع كل حقوق المرأة يكفى اننا مثلاً لما بتناقش مع بعض النساء اللى للأسف بيبقوا ضد المرأة
بقف فى صف المرأة

يعنى انا مثلاً مع حق ان المرأة تعمل
مع حقها انها يبقى ليها كيان مستقل
مش تبقى مسئولة من جوزها اللى ممكن يبقى وحش و يرميها
و يذلها

كمان الكلام اللى حضرتك قولتيه بخصوص كباية الشاى و خلافه
انا شايف ان مش ده دور الست انها تبقى خدامة للوح اللى متجوزاه

كمان حاجة ليه الراجل لما بيهمل فى شكله بيشخط فى مراته يقولها الحياة و المعيشة

و فى نفس الوقت مش بيقبل منها غير انها تكون ملكة جمال قدامه و لازم تبقى مزاجها كويس على طوول

ده كله كلام ميزعلش
---
اما بقى اللى ممكن يخليكى تضحكى

انا شخصياً بقى رغم كل قناعاتى
بتمنى تيجى قنبلة ذرية تشيل كل النساء اللى على الأرض
و الراجل يتناسل زى الأميبا بعد كدة
ههههههههههههههههههه

فاكرة لما قلت لحضرتك عن الخجل و قولتيلى كويس ان لسة فيه رجالة مش بجحة و بتتكسف
خليك زى ما انت

يا استاذة الخجل ده بيوقعنى فى مشاكل لا حصر لها مع اى بنى ادم راجل او ست

بس طبيعى مع الست بيبقى اكثر
خصوصاً لما اكون فى انترفيو شغل
يعنى واحد زيى المفروض يقول انه ضد عمل المرأة
عشان يرتاح

انا الخجل ده هو اللى خلانى اكتب التدوينة اسف للإزعاج
و اللى لو مكنتيش قريتيها
فحقولك انى قلت فيها

و لا حد يجيله كريزة ضحك من خجلى الغريب
-------
اخيراً
انا الست بدافع عنها اه
بس بعيد عنى
انا مثلاً مش ناوى اجوز خالص
و مريح دماغى مش عايز دوشة
---
اه انا اصلاً ماليش اختلاط جامد بالمجتمع سواء كان رجالة او ستات
عشان كدة بقول بعيد عنى
---
و اسف على كلامى ده اللى بقوله لاول مرة
ارجو متضحكيش او تتصورى انى سايكو
:-(

لورنس العرب said...

الست عاوزه ايه من الراجل؟
الست عاوزه من الراجل فلوس وبس
تقريبا طالما ان الراجل بيدفع يبقى حلو وجميل وزي الفل
المحفظه هي المقام الأول عندها تقريبا وبعد كده تأتي الاشياء الأخرى
أما بالنسبة للإهتمام بالمظهر
في الوقت الحالي اصبح صعب على الرجل والمرأه
لأن في ظرف سنه واحده بيبقى معاهم ولي العهد
وبتبقى امنية كل واحد فيهم انه ينام زي ما باقي البني آدمين بينامو

يوميات شاب منوفى said...

اوك بس لاازم الست برضة بعد الجواز ميبقاش عرضها ستة فى ستة وتضرب من كل حتة
وبرضة لاازم تهتم بجوزها مش علشان جابت طفل يولع جوزها

يوميات شاب منوفى said...

اوك بس برضة لاازم الست بعد الجواز ميكونش عرضها بقى 6فى ستة وتضرب من كل حتة وبرضة تهتم بجوزاها مش علشان خلفت يولع جوزها

mohamed ghalia said...

أكيد الموضوع محتاج مشاركة دايما من الإتنين
أنا أسف جدا على تقصيرى فى زيارتك بس معلش مشغول فى المذاكرة بكالوريوس وأخر سنة بقى
ربنا يكرمك ويسعدك

قوس قزح said...

و الله يا آبى الموضوع مش زوج و زوجة بس
الموضوع داخل البيت و بره البيت

ليه فى بيوتنا مع اى حد اهلنا او شريك حياتنا بنكون فظين و بره البيت بنكون ذوق و نحاسب على الناس
على الرغم من ان اللى جوه البيت هم دول فعلا الناس اللى بيحبوك بجد

يعنى انا فى نظرى لو الازواج اتعاملوا مع بعض زى ما بيتعملوا مع اصحابهم هتكون حياتهم احلى كتير

MaNoOoSh said...

انا شخصيا عاوزة من الراجل الأمااااااااااااااان والاحتواء والرحمة فى المعاملة.. اما بالنوسبة لموضوع الكرش دة فاعتقد ان نوعية طبيخ الزوجة ممكن يكون بيأثر قوي على موضوع الكرش دة.


وفعلا الستات كلمة وحشة تعفرتهم وكلمة طيبة تهديهم وترفع روحهم المعدنية.. دول جنس حسااااااااس ومشاعرة رقيقة.. والمفروض الرجالة يفهموا كدة


وموضوع الراجل الآلى التفصيل دة عمره ما هيرضى الست ابدا لانها كائن يعتمد على المشاعر بالدرجة الأولى

وبالنوسبة للحكمة.. الستات عمرهم ما بيريحوا نفسهم اساسا.. يبقى هيريحوا اللى قدامهم ازاى

تحياتى يا قمر

Ahmed Talk said...

انا اهتمت بقراءة تلك السطور لكي أخذها في أعتباري طبعا

لكن المهم أن أعرف ما هو المطلوب من المرأة في نظر حضرتك

لورنس العرب said...

ولله هو فيه شروط صعبه اليومين دول

شروط البنت: يكون راجل ملو هدومه ماديا حالته ميسره، وشبه تامر حسني وفي جسم رشدي اباظه وتدين الشيخ الشعراوي

أما شروط الرجل: واحده جميله جدا ومفيش مانع تكون زي نوال الزغبي وفي خفة دم منى زكي وفي تدين رابعه العدويه

karim said...

واللة يا اابى هانم بما اننى ساتزوج قريبا انا كل اللى يهمنى مش عايز الزن ايااة ولا كلام مالوش سبب وعمال على بطال وساعات بقى تلاقى مكالمات فى اوقات غريبة و مهمة وتتفاجئى انها حاجة هايفة يالهوى على دية بتجنينى, بس واللة كلة متعب راجل وست بس هما يظبطوا وكلة يبقى فى التمام, بس انتى واضح انك عنصرية بس مش مهم ساعات كتير بيبقى مطلوب واللة, تحياتى

dr.lecter said...

راجل الي

ابقي خلوه ينفعكم

ده انتم مش مدركين كم التضحيات اللي بنعملها علشانكم

الواحد بيطلع عين امه علشان يعرف يجيب شقه ويوفر حياه كريمه للهانم اللي ماتتسماش اللي اتنيل علي عينه وحبها وعاوز يتزوجها

وهي قاعده زي الملكه مستنيه يكلبش ايدها بشبكه شيء وشويات

ويتشغل ليل ونهار علشان يعرف ياكلها وياكل ابنها

ولو قدر انه جت له ازمه منتصف العمر وحس ان مراته بتهمله ومطنشاه ولابساله لبس البيت مليان زيت وطبيخ

والعماص مالي عينها

لو شاف واحده تانيه حلوه وةالشرع محلله اربعه يقول لا بلاش حرام استحمل واجي علي نفسي واضحي
انا عندي بيت وعيال

ويبقي خلاص جايب جاز يقول مامراتي في البيت مكفياني

ييجي يداعبها تقوله انا مش فايقه لللي خلفوك فكك مني الواد عاوز يرضع الواد وراه مزاكره

الواد عاوز يتزوج


يحرق الواد علي ابوه علي اليوم اللي اتزوجتك فيه

هو انا متزوجك علشاني ولا علشان الواد ياوليه؟


هي تقول انا مستحملاك ومضحيه علشانك وسبت عرسان احسن منك واجمل منك وارجل منك ويبقي ده جزائي في الاخر؟

انا الغلطانه وتقعد تتشحتف وتعيط وتنهنه

واهيء اهيء

دموع التماسيح


ولو الراجل طفش وساب البيت ولا غار في داهيه واتحرق

تقول انت فيين ياسبعي

طيب مالسبع كان موجود من الاول يااختي

ليه كده بس




انا اطالب بحفظ حقوق الرجل

والوليه ولا البت اللي ماتاخدش بالها من زوجها يبقي له الحق يتزوج مزه تانيه فورا حتي لا يقع في المعصيه وخاصه مع فتنه الفضائيات


انا عن نفسي لو معايا فلوس وصحه ومراتي طلعت بالمنظر ده

قواااام اروح اشوف لي مزه في عمر الزهور اتزوجها علشان اقضي باقي ايام حياتي مرتاح

منكم لله هتمتوني ناقص عمر

اسماء said...

حلو الموضوع ده يا ابي
وطلباتنا من الرجالة بقت كتيرة اليومين دول اووووووي
يعني عايزينه متدين وطيب ومفيش مانع ميسور الحال
واهم حاجة انه يحس بقيمة البني ادمة اللى معاه دي مش كده يعني طلبات طلبات وخلاص
وحلوة النصيحة الاخرانية دي

همس الاحباب said...

اممممممممممم
كلام معقول فعلا
بس مع الاسف الاخطاء غالبا بتحدث من الطرفين
يا ريت كل طرف يحاول يغبر من عيوبه بقدر المستطاع
عجبتنى قوى الحكمة
الست الوحشه تجيب عسر هضم والست الحلوه تجيب صداع
هههههههههه
تحياتى

د. ياسر عمر عبد الفتاح said...

هههههههههههههه
طيب وليه الإسلوب ده طيب
ليه الزق والشخيط .. أنا كنت حاسس إن البوست هينفجر في الأخر في وشي .. بس تقريباً مخدش باله إنه راجل

لا بجد نصايح كويسة والله

مجداوية said...

السلام عليكم

يعني الستات ميتكلموش المرة دي ؟

لا بقى أنا حاتكلم وحاقول جملة واحدة

لو اتقى الرجل الله لوجدت فيه كل صفات فارس احلامك وحتلاقيه كمان بيطبق الهدوم رحمة بك ولكي يرضى الله عنه فمن لا يرحم لا يُرحم

وكذلك المرأة

ولأن الصنف ده شحيح في السوق

فيا بختها ويا بخته اللي يتكعبل فيه

mayada said...

يخرم جيبك ياشيخه ههههههههههه
مت من الضحك علي حته وبتقول لصاحبتها جوزي وجايب كرشه يونسه هههههههههههههه
وعشان خاطر حكايه الكرش والضحك اللي ضحكته هقولك خلاصه تجاربي المعمليه المهلبيه المنوفيه
بصي عارفه ياابي بحس ان كل قرف مابعد الزواج ده ليه
البنت ماجله وموقفه كل حياته لما تتجوز
تخرج وتعيش وتختلط بالناس وتشوف الدنيا وتعيش حياتها لما تتجوز
في الناحيه التانيه تلاقي الولاد بصين للجواز علي انه نهايه الصرمحه يعني هيتقاعد فهماني يعني قصدي زي مايكون حاسس انه خلاص هيطلع علي المعاش ملوش لازمه يتروش ويبقي شيك
فلما الفكرين دول يتجوزوا تلاقيهم زي اللي دخلوا في حيطه
هي عاوزه تدلع وتعيش حياتها ورمانسيه ونظام وتخرج
في حين ان هو شايف ان الجواز مش دلع وخروجات ونحنحه دي اتجوز عشان واحده تراعيه وتجيب عيال تشيل اسمه وبتاع
والمحافظه علي جنسه النادر من الانقراض
فتلاقي الحياه بقت صعبه ومش طايقين بعض وتظهر اللي بتقولي عليه ده الحاجات المقرفه بتاعه الجواز دي
وبرضه شايفه ان هبل البنات وسرعتها ع الجوا ز سبب في ده يعني الولد فاكر انه تعطف وتكرم واتجوزها حتي تلاقي الولاد مبيحبوش البنت اللي بتفكر وشخصيه هو عاوز شلته كرسي في البيت يمين يمين شمال شمال
ضيفي بقي كارثه الجواز التقليدي بتاع الانتريهات ده تقلولي ماجدي وجدتك اتجوزوا انتريهات اقولك هاتيلي واحد شيك وشخصيه وجنتل واراجل راجل زي جدي وانا من الصيح ابقي زي جدتي وادخل اقدم القهوه في الانتريه يعني هاتيلي رشدي اباظه اكون سعاد حسني
يلا سلاموز

فتاه من الصعيد said...

هههههههههههههههه
عسل بجد
بصى انا عايزه من الراجل انه يكون....راااااااااااااااجل....بجد موش حاجه مضروبه زى بتاعت اليومين دول
المهم موضوع جميل....ليه حاسه اننا متشابهين؟
المهم فى تاج علشانك عندى....اتفضلى خديه
دمتى بخير....تقبلى مرورى

بت خيخة وأي كلام said...

يا مسهل
استعنا على الشقا بالله

نبتدى التعليق

اولا
انا معترضة باحترام مع لورنس العرب لما قال ان الست عايزة من الراجل
فلوس وبس
انا معترضة معاه باحترام هنا فى مدونتك يا بتنجانة هانم
لكن ماقدرش انكر انى اعترضت باباحة واطلقت لفظة اعتراض شهيرة وانا قاعدة فى بيتى

لا يا لورنس العرب الست مش عايزة من الراجل فلوس وبس
الست عايزة اماااااااااااااان
عارف يعنى ايه امان
يعنى لما اغلط ماخافش من انه يعلقلى حبل المشنقة
بالعكس يطبطب عليا ويقولى معلش
حصل خير
فداكى
هدى نفسك
يعنى يكون رحيم معايا وقت زعله
او وقت ما اعمل حاجة غلط
يطمنى ان الغلطة اللى غلطتها مش هتاثر على علاقتنا
ومش هتقلل من حبه ليا
يعاملنى كانى بنته الصغنونة

مايجيش يوعدنى قبل الجواز انه هيحققلى مطالبى المادية العادية
وبعد الجواز الاقيه بخيل ومقرط وجلدة

لو تخنت شوية بسبب هرمونات الجواز
او بسبب حمل وولادة
مايجيش يقولى مالك فشولتى كدة ليه ولا بقيتى شبه شوال البطاطس
وقبل ما ينطق بكلامه اللى يسم البدن
يبص لنفسه فى المراية ويبص لكرشه

مايجيش يتلكك ويخوفنى بانه هيطلقنى علشان اسمع كلامه فى اى حاجة
ليه اساسا يجيب سيرة الطلاق ويحسسنى انى رخيصة عنده


الفلوس بالنسبالنا مش كل حاجة يا لورنس
احنا عايزين الامان قبل الفلوس
عايزين الحنان والرحمة
وعايزين هدية فى عيد ميلادنا
وتكون ازازة برفان اصلية مش مضروبة ولا تقليد

احنا بنضايق لما نحس ان الزوج بيسترخص فينا الحاجة الكويسة

لو بالنسبالك ازازة البرفان ده معناه ان احنا ماديات
يبقى مش مشكلة افهم اللى تفهمه

لكن احنا من حقنا ان احنا يجيلنا احسن حاجة فى عيد ميلادنا فى حدود امكانيات الزوج
يعنى لو زوج يقدر يشترى ازازة برفان اصلية يبقى يشترى ومايسترخصش
لكن لو مش فى مقدوره يبقى يجيب احسن حاجة فى حدود امكانياته


احنا من حقنا نتفسح فسحة جميلة حتى ولو كانت مكلفة شوية
لكن دى بتكون فسحة ممكن تكون مرة فى السنة او فى العمر كله
يبقى ليه لأ


ليه دايما عايزين تبقى فسحتنا
نتمشى على النيل وناكل كوز درة

و ايه اللى يمنع انكم تعزمونا على عشوة حلوة فى مركب على النيل

هو احنا لو طالبنا بحقنا فى الرفاهية نبقى ماديات
ومابنفكرش غير فى الفلوس؟



نيجى بقى لدكتور ليكتر
انا برضه اطلقت صيحة اعتراض مدوية

انت حكيت من وجهة نظرك الحكاية التقليدية اللى الناس كلها بقت بتحكيها
تصور قديم عن البنت اللى مش بتضحى باى حاجة وانها بس عايزة وعايزة ومش مقدرة تعب الراجل

خد عندك واسمع الحكاوى دى

فيه ستات هما الى بيجيبوا الشقة
وبيتنازلوا عن الفرح وعن المهر وبيساعدوا فى تاثيث الشقة
والشبكة بتتباع من ورا اهل العروسة وتجيب بيها اجهزة كهربائية المفروض ان العريس هو الى يجيبها
مع وعد من الزوج ان اول ما ربنا يفتحها عليه هايعوضها عن الشبكة الى اتباعت وانه هيجيب شقة واسعة
وبعد كام سنة ربنا بيفتحها عليه والشبكة مش بتيجى
والشقة مش بيتيجى
لان الزوج حط الفلوس فى مقدم عربية والعربية عليها اقساط
والعربية محتاجة كاسيت جديد وجنوط ومساحات


والواد الى انت زعلان من عياطه
وبتسال هو انا متجوزها علشانى ولا علشان الواد

الواد ده لو ماجاش بعد سنة بالكتير بعد الجواز
بتروح تشوف واحدة تانية تقدر تجيب الواد


ولو مضايق من ريحة هدومها الى ريحتها بصل
ابقى ارفع دراعك وشم تحت باطك وقولى شامم ايه
شامم مسك وعنبر ولا شامم ريحة شراب منتن؟


وعنيها المعمصة الى مضايقاك
حوش يا واد عنيك الدبلى اللى رموشها تدبح

ايييييييييه
جرى ايييييييييييييه
ماتقولوا كلمة حق

هى الست بس الى بتكون مبهدلة فى نفسها

وانتوا مابتجوش تقلعوا جزماكم وتبقى ريحة رجليكم قبر

وتيجوا تبوسوا وانتوا بقوكم ريحته سجاير على بصل على صحيان من النوم

قبل ما تشم ريحة بصلها وتشوف عنيها المعمصة
روح اغسل سنانك واحلق دقنك
وسرح شعرك والبس بيجامة
وبلاش تلبس الفانلة الداخلية
مع السليب الرعاش


قبل ما تتكلموا
عن بهدلة الست فى مظهرها
بطلوا تتكرعوا وتجيصوا
زى ماتكونوا عايشين فى زريبة


وبعدين ايه يعنى هتروح تتجوز واحدة تانية
انتوا بتهددونا مثلا

ماتروحوا تتجوزوا

بس قبل ما تتجوزوا خيرونا مش ممكن احنا كمان نكون عايزين نخلص منكم ونشوفلنا راجل تانى احسن منكم

ولا انتوا بس الى ليكم حق تتجوزوا على مزاجكم وتفضلوا ربطينا طول العمر جانبكم

ايه الغرور بتاعكم ده اللى مصورلكم ان احنا مش ممكن ابدا نزهد فيكم برضه ونفكر فى الى احسن منكم؟

ليه معتقدين ان احنا هنفضل نتعبد فى محرابكم؟




انا تعبت واتحمئت واتنرفزت

شوية كدة وهاجى اكتب تعليق عن الستات
ينصف الرجالة شوية

شكرا يا بتنجانة على الموضوع ده

ومعلش خدت مساحة كبيرة فى التعليقات


سلام مؤقت وراجعالك تانى

اختك خيخة

حاجات جوايا said...

والله يا ابى الموضوع ده كله سواء كان التقصير من الرجل او المراة راجع للجهل بالدين

لو كل واحد عرف اللى له واللى عليه هتبقى الدنيا جنة

بس تقولى لمين

شمس النهار said...

تصدقي انت مستبده
يعني هو يقول لك لو سمحتي ويقول علي نفسه اطفح كباية شاي:)ماعلينا

بس تفتكري الرجل اللي في البوست بتاعك هنا يقري للرجل اللي في البوست عندي

ياماما احنا نحاول ورزقنا علي الله

بس ممكن نجيب منادي ينادي علي الاتنين

مهندس حر said...

مش عارف ليه فيه رجاله عدوا و كانوا متأنسرين خالص إعزن ما ينفعش أصلا يكون لست أو بنت طلبات..

أنا شايف إن طلبات سيادتك معقولة جدا و لو هاتمضى على إنك مش هاتطلبى حاجة غيرها تلات تربع شباب البلد هاتلاقيهم طابور قدام البيت من بكرة الصبح و يمكن ناس تصلى الفجر و تيجى تحجز مكانها..

الطلب الوحيد اللى صعب هو موضوع المظهر يعنى من ناحية الكرش فده دليل محبة الزوجة المصرية و تفانيها فى إسعاد زوجها.. يعنى الزوجات المصريات نوعين نوع لهلوبة فى المطبخ و واخدة أصول الطبخ وراثة و تقليد عائلى عريق و دى بتهرى الدلعدى جوزها بما لذ و طاب من السبك و المشمر و المحمر اللى يعمله كرش أوسع من ميدان التحرير و يعجل به إلى جنة الخلد و هو بيدعيلها و يحلف بحبها.. النوع التانى ما لوش فى الطبخ من أصله و دى بتضطر المأسوف على شبابه إنه يقضى عمره رمرمة من المحلات و أكله كله يبقى جنك فوود و بالتالى فالكرش برضه نتيجة طبيعية و الطريق السريع للآخرة مضمون برضه بس من غير ما يدعيلها فى الحالة دى..

بخصوص منظره و هو صاحى من النوم.. يعنى بذمتك حد يعرف يتحكم فى الحكاية دى.. ناقص تطلبى إنه ما يشخرش و هو نايم.. هههههههه

على أى حال أنا موافق تماما على بقية المطالب و لو المدام عدت هنا هاتقولك إنى بنفذ معظمها و هى بتتجاوز عن الباقى.. و إن كان على كوباية الشاى أنا عمرى ما بطلبها هى اللى لما بتحب تشرب شاى بتشربنى معاها..

micheal said...

ههههههههههههههههه..مفيش فايدة فيك يا حبيبي
بس تعرف كلامك واكعي جدا بالذات في حتة الكرش والبوز الخمسة متر
الذوق مهم برضه في طلب الحاجة
يعني أنا مش حنكر أني مدلع في كوني عمري ما دخلت المطبخ واتعلمت أعمل لنفسي حاجة بس الواحد بقي يخلي عنده دم ومبقاش خيبة وبجح يعني
:)
ممممم..رأيي بقي في الست
احم احم
شوفي أنا قلتلك بصراحة قبل كده أني مش حتجوز بس ده لا يمنع أني بحب البنت اللي عندها شخصية وتكون لمضة ودمها خفيف ويا سلام لو بتحب الكورة والرقص وأفلام الكارتون
هع هع
بخرف شكلي كده
يلا سلام وبإذن الله تلاقي الراجل اللي بتحبه وسيبك من موضوع الانسان الالي لأن علي رأي الست يسرا الطبيعي يكسب يا حبيبي
:))
تحياتي

ويكا said...

بصى يا ست ابى
لن ترضى عنك ...ولا ..... حتى تتبع ملتهم، وما انت بتابع ملتهم" فريحى نفسك وريحينا .
عمركم ما هتلاقيه ، وادى دقنى.
ولا عمر واحده هتلاقيه .
بصى يابنتى
انتى ما ينفعشى معاكى غير الواد مهند اللى انا ما بحبوش ده ، هو اللى ممكن ياكل عقلك ويبقى معيشك التيييت وهو ماشى مع توب الارض.

ههههههههههههه
ومع ذلك لو عايزه الجد ، انا اللى مقتنع بيه هو هو اللى قاله قوس قزح بالظبط .
آبى
الله يكرمك
ابقى شيلى صورة الست اللى انتى حطاها فى البوست اللى فات دى لاحسن انا تعبت

ويكا said...

بالمناسبه على فكره
انا كاتب موضوع عن الحوار ده (عباره عن رد على بوست كانت كاتباه سبهلله)
بجد اتمنى انك تقريه لانه بجد بجد هيعجبك اوى اوى كاتب فيه الاسباب الحقيقيه لمشاكلنا وده الرابط

http://agmalmakara2t.blogspot.com/2009/05/blog-post_03.html
ياريت تقريت بجد وتقوليلى ايه رأيك

بت خيخة وأي كلام said...

الرجالة برضه هما النص التانى بتاعنا

ولما اقول راجل يعنى بابا يعنى باباكى يعنى هانى يعنى شريف يعنى اخويا

يعنى ناس بنحبهم

وزعلهم يزعلنا
وبنبقى عايزين رضاهم برضه

اى نعم هما ساعت يرخموا علينا ويغتتوا ويطلعوا تربنتين اللى خلفونا
الا ان الصراحة راحة وانا وانتى والناس كلها عارفة ان مافيش راجل يستغنى عن ست ومافيش ست تستغنى عن راجل


يبقى زى ماهبيت فى الرجالة فى تعليقى الاولانى
وبعد ماهديت شوية
اجى بقى اهب فى الست

واقول وجهة نظرى
واقول الراجل عايز ايه من الست

الراجل عايز يرجع بيته يلاقيه متوضب ونضيف ومراته عاملة الاكل ولابسة لبس حلو ونضيف مش لازم يكون محزء وملزق بس يكون نضيف

الراجل بيرجع بيته مثلا الساعة خمسة يعنى ميعاد محدد
يبقى الست تعمل حسابها وتحضر الاكل وتغير هدومها قبل ما يرجع
مايجيش يلاقيها لسة فى المطبخ
بجلابية البيت اللى ريحتها بصل

الراجل مش بيحب الست المهملة
حتى ولو كان هو مهمل
الراجل بيحب الرواقة
مابيحبش يجى يلاقى
الدنيا مكركبة
ولعب العيال متنطورة فى كل حتة

الراجل عايز الست تبقى نضيفة
نضافة داخلية باستمرار
تحسبا لاى سيكو سيكو يجى فجأة
غير بتاع يوم الخميس ده
عايز يلاقيها نضيفة وريحتها مش منفرة


الراجل مش عايز مراته تقوله
اشمعنى فلانة عندها عصارة بالكهربا وانت جايبلى عصارة من غير كهربا

مش بيحب يحس ان مراته بتشوف اللى عند غيرها وتحسسه انه مقصر معاها ومش مكفيها

مش عايزها تطلع اسرار البيت لامها وجارتها وخالتها واختها وصاحبتها وخيختها


مش عايزها تطلب حاجة ابدا

ولو جابلها كورة شراب عايزها تفرح اوى وتزغرد كانه جابلها حتة من السما


عايزها مربية فاضلة لاولادهم
وعاهرة فى السرير
وعسكرى فى الشارع
ورابعة العدوية على سجادة الصلاة

عايزها تعتمد عليه فى كل صغيرة وكبيرة وقت وجوده
وفى نفس الوقت يكون مطمن عليها
وقت غيابه
وعارف انها تقدر تعتمد على نفسها وتكون بمية راجل ومتحتجش لحد
ومتبوظش الدنيا

عايزها مثقفة علشان ولادهم وعلشان الناس
وعايزها جاهلة وهى معاه

عايزها تخاف من كلمة عليا الطلاق علشان ترتجع وتعمل اللى هو عايزه
عايزها مكسورة الجناح
وعندها نقطة ضعف ويكون عارف نقطة ضعفها ايه
علشان يعرف يتك كويس عليها


عايزها تحسسه انه هو كمان مرغوب فيه
وتبدا بالخطوة الاولى
وتتحرش بيه لو لزم الامر



واخيرا وليس اخرا

جاتها نيلة اللى عايزة الجواز




عاجبنى راى قوس قزح


سلام
اختك خيخة

Dr.m said...

السلام عليكم

طبعا موضوع الست عايزه من الراجل والعكس ده موضوع مهم جدا والحقيقه ان الست للراجل زي الراجل للست كل مكمل للاخر
ولاغنى للمجتمع عنهم
((هن لباس لكم وانتم لباس لهن))صدق الله العظيم

فالعلاقه متبادله

وقد سمعت مقوله عظيمه في هذا المجال وهي من اراد فاطمه فعليه ان يكون عليا

تحياتي
سلام

Dr.m said...

السلام عليكم
الموضوع دع فعلا مهم
والحقيقه ان الراجل للست زي الست للراجل
((هن لباس لكم وانتم لباس لهن ))صدق الله العظيم
فكل منهما مكمل للاخر

ولا يقوم المجتمع باحدهما دون الاخر
ولا يصله المجتمع بصلاح احدهما دون الاخر

فكل له دوره الذي فطره الله عليه لاعمار الكون
وطبعا لا ينبغفي للرجل ان يتخذ من زوجته خادمه فقد كان الرسول صلى الله عليه وسلم وهو خير رجال الارض في خدمة اهله
اما النغمه الغريبه بان المراه لا ينبغي ان تكرس حياتها لتربيه اولادها
والا تكون خادمه ويجب ان يكون دورها في المجتمع اكبر من ذلك
فاقول اي دور اعظم من صناعة الرجال بل صناعة الامه
ان اول من ساعد نبينا المصطفى صلى الله عليه وسلم في امر الدعوه هي السيده خديجه رضي الله عنها
وقد سمعت مقولة بديعه في هذا وهي

من اراد فاطمه فعليه ان يكون عليا

وقال تعالى
((من يتق الله يجعل له مخرجا ويرزقه من حيث لا يحتسب ))ص
اما حكايه الزوق والحنيه والنظام اللي اتكلمت عليهم فمعك كل الحق وهم الموده والرحمه التي جعلها الله بين الزوجين

معذره للاطاله
تحياتي
سلام

enjy said...

مش عارفة ليه حاسة انها مش فارقة يعنى حتى لو عمل كل اللى انتى بتقولى عليه دة برضه مش فارقة والله

عاشقه الجنه said...

ههههههههههههههههه
لا ده انتي بجد تجيبي صداع لانك سكرة يا ابي
و الله برافو عليكي نفس الموضوع بيحصل مع الاخوات الولاد وقعتهم طين
تسلمي عالبوست يجنن

Love-Guru said...

هذه هي المشكلة عندما تزوج هو هي
هي ارادته ان يتغير و لكنه لم يتغير
هو ارادها الا تتغير و لكنها تغيرت
المحصلة حياة تعيسة للاثنين

اما عن الزوج التفصيل فسوف استعير مقولة ابو لمعة الشهيرة "حصلت يا خواجة" و لكن بالعكس فقد اخترع شاب ياباني من كندا الزوجة الالية المثالية جميلة رشيقة تقوم باعمال المنزل بلي ملل او شكوي تقرأ لزوجها الصحف و تساعده في عمله مقطوعة من كمبيوتر (شجرة) ملهاش ام و لا صديقة تزن في ودنها الاليكترونية

http://www.thesun.co.uk/sol/homepage/news/article
2023392.ece

Love-Guru said...

آبي هانم
بوست جميل جدا
عندك حق في بعض الرجال بيزودوها شوية و في آخرين بيغطوا عقد نقص عندهم و بعد سنوات من الغربة في بلاد الفرنجة اكتشفت ان الزوج المصري في كثير من الحالات "جلياط" معدوم الذوق و ترسخ في عقيدتي انه لكي نغير من اسلوبه لابد ان نأتي به من بيداء مصر الي العالم المتحضر لفترة من الوقت و مؤكد حيرجع فشر مهند بس حتبقي فيه مشكلة بسيطة و هي انه لن يرضي باقل نور

لورنس العرب said...

الخت الفاضله خيخه

أولا: الأمان الذي تقصديه هذه الأيام هو عباره عن الفلوس، ولا شيء غير الفلوس، وهذا واضح جليا في اختيارات البنات، قد يكون عندهم الحق في توفير معيشه كريمه لهن وانا ليس عندي اعتراض على هذا، اعتراضي الوحيد ان يكون هذا هو الهدف والغرض ولكن الكثير منهن يبدين عكس ذلك!
وإلا - فما المقصود بالأمان؟
كل ما ذكرتيه ليس امان ولكنه حسن معامله
الأمان من وجهة نظر النساء شيئا آخر غير هذا يا خيخه
ثانيا: سبحان من يغير ولا يتغير، من قال ان الرجل يتضايق من منظر زوجته إذا تغير جسمها تبعا للحمل والولاده وغير ذلك؟
ما يحدث من شجار بسبب هذا يكون نادرا
ولكن الأمر يقع غالبه على الانثى في هذا الأمر
والسبب انها تهتم بنفسها فقط قبل الزواج وتكون صديقه غاليه للمرآه - اما بعده فلا يهمها من امرها شيء إلا عندما تخرج خارج المنزل فقط
فتهتم غالبا بمن ينظر إليها من الغرباء ولا تهتم بالذي يجلس معها في المنزل
وفي هذا عقده ابديه عندنا جميعا رجال ونساء
المهم عندنا هو نظرة الاخرين إلينا وليس اقرب الاقربين
ثالثا:
النماذج التي رأيتها كانت معظمها في اتجاه واحد، وهو انه مهما فعل الرجل للمرأه فلن ترضى عنه ابدا، ولله لو ولع لها في نفسه عشان ترضى ولا كأنها شافت حاجه
ولا يوجد اكثر ممن يصرف ببذخ من الرجال على النساء
وعلى الرغم من ذلك يطلبن المزيد دائما

لورنس العرب said...

صحيح
فيه حاجه نسيتها
ليه دائما ما تنتظر المرأه هديه في عيد ميلادها بينما لا تفعل العكس مع الرجل؟
هو التعبير عن مشاعر الحب عن طريق الهدايا حكرا على المراه فقط بحيث انها تستقبل الهدايا بينما الرجل لا يهم إن اعطت له هديه فياي وقت أم لا؟

من الواضح ان هناك مساواه بين الرجل والمرأه في كل شيء إلا عند دفع الفلوس
عندها فقط يتقلد الرجل منصبه كرجل!

Abo 7anf said...

السلام عليكم
المهم ان الست تبقى عاقله
تعرف تسايس الراجل
تمتص لحظات غضبه لما يكون متضايق
و متبرطش الراجل بالتزامات الدنيا و الاخره
تكون زكيه يعنى وهى هتاخد كل الهى عوزاه
و فى نفس الوقت انا معاكى فى الانتى كتباه
انه لازم يعاملها كويس

بت خيخة وأي كلام said...

لأ انا متغاظة
انا منكادة
انا باكل فى نفسى

يا لورنس العرب انا لما قلت على موضوع الهدايا
وان الراجل يجيب لمراته هدية
ولما ماذكرتش ان الست تجيب هدية
ده لان الطبيعى والى انا بشوفه والى بعمله ان بلاقى ان الست دايما فاكرة جوزها فى المناسبات والغير مناسبات

الست مش محتاجة عيد ميلاد جوزها علشان تجيبله هدية

الست وهى ماشية تجيب الخضار لو لاقت قميص حلو تقوم تشتريه لجوزها وتهديهوله
ولو راحت للدكتور علشان ضهرها واجعها ولاقت فى طريقها محل بتاع ساعات وفيه ساعة كان جوزها نفسه فيها بتطنش ام الدكتور على ام ضهرها وتروح تشترى الساعة لسبع الرجال


عدم ذكرى لموضوع الهدية ده مش معناه ان الراجل بس هو اللى مطالب بيها والست مش مطالبة بيها

ده معناه ان الست مش محتاجة ان جوزها يطالبها بالحاجة دى لانها بتعملها وزيادة

احنا بندفع فلوس علشانكم برضه ويمكن اكتر منكم
احنا بنجيبلكم القميص من ماركات عالمية والبرفان مش تقليد والساعات واحدث الموبيلات ممكن نقعد ندفع فى اقساطها سنة

لكن انتوا مش بتجيبوا الا لو طالبناكم وفكرناكم ولو جبتوا بتجيبوا برفان مضروب
وجلباب من على عربية كارو فى العتبة والإسورة بتجبوها من محلات كل حاجة باتنين جنيه ونص


احنا ممكن نقعد طول السنة نفكر نجبلكم ايه فى عيد ميلادكم اللى جاى
وانتوا تبعتوا الفراش بتاعكم بعشرين جنيه وتقولوا روح هات طبق بسبوسة من الحلوانى الى على الناصية




حسن المعاملة من الامان يا لورنس


شكرا يا بتنجانة هانم
على مساحة الحوار دى


سلام
اختك خيخة

جنّي said...

السلام عليكم

والله الراجل مظلوم .. دا فيه ستات قوية ومفترية .. طيب عمرك سمعتي واحد راجل دبح مراته وقطعها وعباها في اكياس ..

انا بقى بحب الست الغير نكدية والباقية على العشرة واللي مش قاعدة على الواحدة لجوزها ..

الجواز و سنينه said...

برافواااا يا ابى
قولتى كل اللى فى نفسى
كله يقعد يتكلم بالدين
طيب ما الرسول كان بيساعد فى نظافه بيته
لكن الراجل من دول عايز يدخل و و يلاقى كله تمام و لا يمد ايده فى حاجه
و عجبى
لو عملوا اللى انتى عليه يبقى بالنسبالى كفاااااااااااااايه
و نبوس ادينا وش و وش و وش

مواطن مصري said...

يا سلاممممممممممممممممممممممممم

اية العنصرية دي بقى قال يعني كل الرجالة وحشين كدة و الستات بس الملايكة الطيبينننن



طيب ما فية ستات تخلي الراجل ينتحر و يتجنن


طيب الستات بردو تعمل العكس للراجل

انسان وبس ! said...

ههههههههه انا بجد اعدت اضحك لما قريت البوست ده

فعلا الكوكب بتاعك كان ناقص تعلنيه منطقه منكوبه وتفرضى حالة الطوارىءوتفتشى وتعتقى اى حد

بس كويس ان العاصفه هديت

وبعدين عايزه ايه من الراجل مش فاهم ؟
لو سمحت ...ويا حبيبتى كمااااااان ...وممكن يعنى لو مفيهاش احرج اشرب شاى
كل ده عشان كباية شاى ؟
اومال لو هتغديه غدوه محترمه هيقولك ايه ؟
بصى هو لازم فعلا الراجل يبقى محترم فى تعامله مع مراته معامله فيها شىء من النديه
انها انسانه زيه وعادى هو ممكن يعملها شاى معاه كمان وفيها ايه ؟

بس صدقينى انا اعتقد ان الزوجين يبقوا اكتر من الاخوات !ههههه اقصد انها بتبقى بالنسبه له مراته واخته وامه فبيدلع عليها وهو بيبقى جوزها واخوها واابوها وطفلها المدلل كمان
بتبقى فيه عشره وبياخدوا على بعض المفروووض يعنى

وده برضو ميمنعش ان الاحترام واجد خصوصا لو اختلفوا على حاجه يعنى مش يديها بضهر ايده لما تختلف معاه

ليه بيبقى الراجل متبنى كرشه
لما اتجوز هعرف ..بس من صحابى المتجوزين اعرف ان ده سببه ان الهانم بتظغطه

ميهتمش بنفسه عارفه ليه ههههههههه لانه يا عينى بيكتشف بلاوى ان اللى كان بيهتم بمظهره عشانها دى طلعت حاجه ...تيييت خالص
كفايه انه شافها وهى لسه صاحيه من النوم

فحته انه ممكن يهديها لما تعيط بسهوله عندك حق بس انا اقدر اقولك ليه مش بيعمل كده وخديها منى ثقه

لانى مبحبش وجع الدماغ ونظام الاطفال ده انا اسيبها تعيط احسن لحد متهدى وبعدين ابقى اصالحها عشان متخدش على كدهيعنى مش اصالحها فى ساعتها

احنا كمان هندعوا لاستيراد زوجات صينيه
هو احنا هنغلب يا ماما

والراجل بدوارى ده عنده حق والله انا زيه كده
رغم كل افكارى ع حقوق المرأه( المشروعه ) الا انى بجد اتمنى زيه من ورا قلبى ...قنبله نوويه تاخدكم ولا مؤاخذه مش ذريه

وبقوله يا سيدى انت كده فل وهتتجوز هتتجوز مش معنى الحياء اللى عندك انك يعنى ....لا عادى ده معناه انك راجل محترم وبس

تأثير الفراشة said...

السلام عليكم و رحمة الله و بركاته

بوست جميل و أسلوبك أجمل

و على فكرة حكاية الرجل التفصيل دى، فيه مسلسل يابانى قصته كده فعلا، بس أنا لسه مكملتوش لآخره

تحياتى ليكى على مدونتك الجميلة
تقبلى مرورى

الشنكوتي الكبير said...

زمان وانا بحسب اني مولود من زمان
لقيت اني لسه بتولد لما قابلتك يا قمر في لحظة جنان
وقعدت اغني واقول في شعر
واحكي وألف في حكايات ماليانه حب
لحد ما سالني صديقي بأهتمام
ايه اللي شدك يا جدع وذاد الأهتمام
ايه اللي دلقك فوق جدور رقبة سعادتك يا جدع
وقعدت افكر ايه اللي انا حبيته فيها
او اكون اتمنيته فيها
وقعدت اقوله عن عيونها وابستامتها الجميله
وقعدت اوصف في اهتمامها وفي كلامها
وقعدت احكي عن حنانها وحبها
رعايتها ليا
وانسجامي بسحرها
وقعدت اقوله عن طاعتها للكلام
وقعدت اقوله انها عوضتلي اللي فات
وقلت له برده انها داوت جراحي والألام
وبعد ساعه من الكلام
تنح وقالي يا سلام
في كل كلمه قلتها واسبابك اللي شرحتها
دي كلها تدل على انك اناني لكن تمام
وان حبك كله مبني فوق كتفها
وانها هي اللي شايلاك في الزحام
وشايله همك والبلاوي اللي سعادتك رأسها
وده يبقى حب ازاي بقى او اهتمام
دي حاجات سعادتك عوزتها ولقيتها سهله عندها
علشان كده بتقول في قلبك حبها

وسكت من هول الكلام
مبقتش عارف ارد من وجع الكلام
اصل الحقيقه ساعات بتوجع بالقوي
وقعدت افكر في الكلام
وبعد سنتين من حوارنا وصدمتي
بصيت لقيتني بخيبتي
ازاي انا معرفتش اشرحله الكلام
ازاي انا مقدرتش اشرح ان معنى الحب يا بقره انسجام
وحاجات نقدمها وتضحيات جنان
وانك تحس بكل حاجه اخدتها وعمرك ما تشرح الحاجات اللي انت برده قدمتها
وده كله انا فهمته ساعة ما هي ببؤقها
قالتلي انا شاكره اهتمامك والحنان
وساعتها بس فهمت يا صاحبي الهمام
انا زي ما بطالبها بحب وبأهتمام
قدمت ببساطه عيوني بدون كلام

وده هو يا عزيزي مفهومي للغرام
حاجات نقدمها وحاجات يقدمها شريكك في الغرام
لا هو حاسس انه قدم شيء جنان
ولا انت حاسس انك وفيته حقه ويا سلام
وفي النهايه عشان اظبط خاتمتي
احب اقولك يا صديقتي هنا
وسلااااااااااااااااااااااااااااااام


اخوكي ايهاب

الشنكوتي الكبير said...

طيب كده فل قوي

لمحت خيخه بتتخانق هنا مع حد على موضوع الهديه

احب اقول لسعادتك ان انتم فعلا بتجيبوا هدايا احسن مننا
وبتنقوا حلو
وبتفكروا فيها طول الوقت
وكل ده موافق عليه
بس هنعمل ايه يعني

انتوا ازواقكم تلخبط
اللي بتحبوه النهارده بتكرهوه بكره
اللي بيعجبكم من ساعه بعد ساعه بيبقى قديم وفيه احلى منه

لما نجيب الغالي نبقى مبذري ومش عارفين المصلحه ولو جبنا الرخيص نبقى معفنين ولو اديناكم الفلوس تشتروا على مزاجكم وبرغم ان ده بيعجبكم قوي بس برده بتزعلوا علشان معملناش مفاجأه ليكم
طب نعمل ايه ايوه الراجل في موضوع الهدايا ده تفكيره محدود امال هم اخترعوا لينا ام الدباديب ليه علشان مبنعرفش نجيب غيرها
هو انتي فاكره انهم عملو الدباديب للستا
ابدا دي عملوها علشان الرجاله مش عارفه تشتري ايه
انا بحمد ربنا ان موضوع الورد ده طلع كويس اهو الواحد لما بيحتار بياخد بوكيه ويعمل فيها عبد الحليم وبيعمل شغل حلو بصراحه يعني الناس بتتقبله بفرحه بتخليني انا نفسي مبسوط قوي ول اني مش فاهم ايه الميزه في حاجه هتبوظ كمان يومين بالكتير

ده غير ان الراجل الغتت بيقعد يسالني عايز لونه ايه
اقوله شكله وخلاص يخرب بيتك انا ناقص اسئله
حتى الهدايا اللي في محلات الهدايا بتغيظني ومش بتعجبني
سيبك من اسعارها بس بحس مالهاش لازمه
تيجي للهدوم المقاس كام مبفهمش فيه
الألوان اللي عايزها مش عارف هي بتلبس كل الألوان بس اختار ايه مش عارف
ويا ترى ده هيعجب ولا لأ
الجزم والشنط يا تجيبي حاجه محترمه يا متجيبيش انا شايف كده لأن الرخيص بيبقى معفن قوي
والغالي بيبقى غالي قوي
طب نجيب ايه بس

اقولك هبقى اقول كل سنه وانتي طيبه

ونروح نسهر في الحسين


سلاااااااااااااااااااااااااام

الشنكوتي الكبير said...

يا دي النيله ايه يا بنتي نسيت برده البوست بتاعك ولا قلتش انا عايز ايه

عايز ايه
عايز ايه
عايز ايه


همممممم

























اه عرفت

انا عايز غاده حبيبتي


سلاااااااااااااااااااام

اخوكي ايهاب

Sherif said...

آبى الكميلة
----------

عارفة الحل ؟ هو فى انك تعرفى الراجل نفسه مفتاحه ايه

الرجل طفل كبير .. لايزيد فى البيت عن ولاده .. واقف فى الصف .. كلمة حبيبى هى اول مفتاح

والحكمة دى اتعلمتها من فيلم زوج فى اجازة بتاع صلاح ذو الفقار وليلى طاهر .. مش من بنات افكارى

أقل لك من الآخر .. فيه قول قديم لعربية قديمة تنصح ابنتها قبل زواجها .. قالت لها

كونى له أمة .. يصير لك عبدا وشيكا

خللى بالك شيكا دى مش معناها راجل شيك

لكن اقرب اليك وطوع اكثر مما تتخيلى

صدقينى هو ده المفتاح .. الراجل ممكن تكسبيه ببمبوناية .. وابتسامة من الضلفة للضلفة

كل تمنياتى لك بالسعادة

ساره said...

يعني انتي اللي تستلمي الطلبات؟
اعبي الاستماره يعني ولا ايه؟؟

نجي للجد :)

اهم شئ عندي انه يخاف الله عشان لا يضلمني ولا يهيني
وبعدين اكيد من غير كرش
ويكون عنده طموح عشان اللي عنده طموح يقدر يحول الرمل لذهب

وبعد اممممم

خلاص اذا فيه شئ ثاني ممكن اعبي استماره ثانيه
:)

الفاتح اليعقوبي said...

السلام عليكم
ياأهلا بالمعارك اللي كنا بطلنها بعد مادخلنا الجيش
يااستاذة علي فكرة الصنف اللي حضرتك ذكرتيه هو صنف واحد وليس كل الاصناف
فمن الرجال من هو عطوف وحنون علي أهله وبيته ومنظم في شئونه وفي حياته ويحترم زوجته كأنسان له وجهة نظر في الحياة وليس مجرد تابع يأتمر بأوامره ونواهيه
وعلي النقيض تجدي أيضا نساء مفتريات منقصات للعمر منغصات للحياة رغيات فاتكات الواحد أحسن له انه يقعد طول عمره بره البيت علي انه يقابلها كل ماتشوف وشه تقول له هات ده ودي ده البيت هايطربق علي دمغنا البيت هايولع بينا
وأيضا في نساء هن بالفعل خير وصف لهن ماوصفهن به رسول الله صلي الله عليه وسلم (خير متاع الدنيا)يعني يتحطوا علي الجرح يطيب تحاول تحافظ علي بيتها وزجها وتهتم بأمره وهو بالتالي سيهتم بأمرها
وتهتم بمظهرها أمامه وهو بالتالي سيهتم بمظهره
سترضي بعيشتها معه يعني اليوم اللي كله بصل هايكلوا مع بعض بصل ويكونوا راضيين وكأنهم بيكلوا خرفان
واليوم اللي كله لحمة برضه مش هيفرق معاهم لان المهم أنهم مع بعض وجنب بعض

أما عن وجهة نظر كل منا في زوجته فهي تختلف بالتأكيد من شخص لاخر
يعني مثلا مثقفة
كلمة مفتوحة أوي
برضه جيملة كلمة مفتوحة أوي


المهم أنهم في الاخر الزوج والزوجة بيملوا مع بعض ثنائي يكمل بعضهم بعض لايوجد بينهم حساسيات وعصبية وتكلف وأنا عملتلك كذا وأنا عملت ليكي كذا ونقعد نعاير بعض

في رأي الشخصي الزواج مثل من ذهب لشراء حذاء فنظر ف5ي الفاترينة فوجد شوز عجبه أوي ودخل قاسه قلاقاه أصغر بنمرة أو نمرتين فقال مفيش مشكلة بكرة تتطري في رجلي وتوسع وشال الشوز ومشي بيه فوده في النهاية تعب له رجله فنسي جمال الشوز وشياكته وكل اللي فاكره وحاسس بيه هو الالم والوجع
فممكن بالوقت يعمل الاتي
أما يستحمل الوجع ويقول ماخلاص أنا اشترتها ودفعت فيها فلوس
أو يرميها لانها من الاول ماكنتش علي مقاسه
أو يرمي القديمة ويشتري وحدة جديدة علي قده
اتمني يكون المعني واضح
والسلام

tamer.sala7 said...

اقسم بالله انتي مش عايزة غير انك تاخدي كورس مكثف اسبوع في سوهاج وانتي تعرفي ان الله حق


راحت ايامك يا سي السيد احمد عبد الجواد

:P

tamer.sala7 said...

علي رأي يوسف بك وهبي

قال جنس لطيف قال

دول جنس نمرود

عبد من عباد الله said...

امممممممممممممممممممم ( تفكير )
اممممممممممممممممممممممم
و كمان امممممممممممم

على فكره انا شفت عِدة ( موبايل ) زي دي في شارع احمد عبد الكريم

هى صيني باين ! عامله بتاع 560


عموماً انا ممكن اكتب نفس المواصفات دي و اقول نفسي الست ما تبقاش كده و على فكره حيطلع الموضوع صح برده مع بعض الاختلافات ...... لكن الموضوع ملهوش علاقه اوي بالراجل و الست دي افكار و تربيه و شويه حاجات فوق بعض .

و بعدين انتم ناقصات عقل و دين هههههههه

http://hakawywebalawy.blogspot.com/2008/07/blog-post_22.html

hamada said...

يفتح باب بيت المدونين ذراعيه لكل الموهبين في :
1/ القصة القصيرة
2/ الشعر بشتى أنواعه
3/ الرواية "رواية سنوية سنقوم بنشرها في الجريدة"
4/ المقال الصحفي
إذا وجدت في نفسك القدرة على المشاركة أرجوا التواصل معي على الميل التالي
arabicsabah@yahoo.com
شروط المسابقة
1/ ..............................
2/ .............................
3/ ..............................
لا يوجد شروط الشرط الوحيد هو العمل الجيد , والعمل المحترم البعيد عن الإسفاف
المقالات أرجوا أن تكون تخص الانسان العربي , تاريخه , عاداته وتقاليده , مقالات إجتماعية وثقافية ....
أرجوا التفاعل معنا في الجروب على العنوان التالي
http://www.facebook.com/group.php?gid=45202724108#/group.php?gid=78080770039

MaNoOoSh said...

احب احيي خيخة بتصفيق حاااااااااااااااد



انتى قلتى كل البلاوى المستخبية يا خيخة
اديهم كمان يا خيخة يمكن يتعلموا وياخدوا بالهم من نففسهم شوية



اييييييييييييه دنيا

Foxology said...

هى عملية تعود وخلاص بأة انتهى عصر التجمل :)))

تحياتى :)

Adam said...

الراجل عاوز الست تبقي الست امينه عارفاها
لو مش عارفاها اتفرجي علي التليفزيون او اسمعي نجوم اف ام
تحياتي
ادم
ارجو التواصل

dr.lecter said...

لا بقي

الست للاسف هدفها الاساسي من الزواج هو الخلفه

ماحدش يتكلم ويهجص ويقول لي لا علشان بتحب زوجها ومش عارف ايه

وهي هتحبه منين اصلا ولا تعرفه منين؟
70 بالمائه من
زواجات مصر اغلبها زواجات صالونات او زواجات تقليديه بحته لمجرد ان القطر مايفوتش الراجل او الست

الراجل بيتزوج علشان مايبقاش عايش لوحده

مساله الخلفه او مش الخلفه دي شيء ثانوي ومش عند كل الرجاله

اه هو طبعا عاوز واحد من صلبه يشيل اسمه والي اخر هذه الاسطوانه

لكن فرضا بقي ان مافيش

طهيموت نفسه؟

لا يبوس ايده وش وظهر لو ربنا اداه زوجه صالحه

مساله يروح يتزوج واحده تانيه علشان الخلفه

ده مابيعملوش الا المتخلفين وبس المصرين اصرار رهيب علي طفل وخلاص

مش مهم الطفل ده يبقي ايه

المهم حد يورثه وبس

لكن الست مابتتزوجش غير علشان تشبع رغباتها الاموميه وتعلقها بالطفل

ومستعده تتنازل تنازلت كتيره علشان تحصل علي الطفل ده


واول ماتجيبه من الراجل

تديله استماره سته

ويبقي في المرتبه التانيه في حياتها

ومن هنا الراجل يحس بانه مابيمثلش حاجه في حياتها

ويبتدي يغير من ابنه


ويتدي يلعب علي حلي شعره


علشان الست مش قادره تفهم ان الراجل مهمها كان شحط وبغل وبشنبات

لكن لسه طفل من جواه


ومحتاج رعايه


الست اه بتبقي متاجه مداعبه ورومانسيه من زوجها

لكن لو ماتوفرش
ده


اه ابنها حياتها كلها ومالي عليها دنيتها

علشان كده هتقول بكل بسااطه للراجل

طز فيك



فهمتي يااخت خيخه واي كلام؟

ويكا said...

خيخه
انتى كل يوم بتثبتيلى انك فعلا خيخه ، وخيخه جامده كمان ، ديما فى الجون to the point بجد.
الكلام طالع من القلب ووصل للقلب.
هو ده رأى بالظبط طول عمرى .
بس ادى دقنى لو كنتى بتعملى حاجه من اللى قلتيها دى ، هتلاقيكى خيخه خيخه يعنى بس الخيخه الحقيقيه المره دى .
وهتلاقيكى مطلعه عين ام الواد يعينى.

وبرده هقولك الكلمه المشهوره ،
" ابقى قبلينى لو خسيتى يا خيخه"
لكى منى 75 قرش لو خسيتى

بت خيخة وأي كلام said...

ابى

انا شلت خلاص التعليق الوحش
ماتزعليش لو كنتى زعلانة



دكتور ليكتر

اتنين متجوزين
الست اكتشفت ان جوزها مش بيخلف
ومع ذلك لم تجرؤ انها تطلب منه الطلاق علشان تتجوز واحد تانى وتخلف منه وتمارس حقها فى الامومة


اتنين متجوزين
والراجل اكتشف ان مراته مش بتخلف
حاجة من الاتنين
يا اما الراجل بيروح يتجوز واحدة تانية علشان يخلف منها
اى كان بقى بعلم زوجتىه الاولى او بدون علمها المهم انه بياخد خطوة الجواز التانى

وراجل تانى مش قادر يفتح بيتين فابيطلق الزوجة الاولى ويروح يتجوز واحدة تانية علشان يخلف منها


الخلفة عند الراجل اهم من زوجته
لكن الست عندها الحفاظ على جوزها وعلى مشاعره اهم من امومتها







ويكا

شكرا على كلامك
بس تعرف كلامك وجعنى
عارف ليه؟

لانك استفزتنى لما قلتلى تلاقيكى خيخة ومابتعمليش اى حاجة من الحاجات الى قلت عليها

استفزتنى لدرجة انى كنت هاقعد اسرد تضحياتى واللى عملته والى بعمله علشان خاطر جوزى



لكن مسكت نفسى
وقلت لا يا بت يا خيخة ماتبقيش خيخة اوى كدة

ولو انتى شايفة انك اديتى فاكيد برضه هانى اداكى كتير

ووتضحياتك انتى وجوزك
شئ مايهمش اى حد
دى حاجة بتاعتكم انتوا
وربنا وحده اللى عالم
انتوا عملتوا ايه لبعض



وعندا فيك هاخس برضه يا ويكا
وهاخد جنيه ونص مش بس خمسة وسبعين
وش واحدة مطلعة لسانها




شكرا ليكى يا بتنجانة
علشان بتسيبينا نلعب براحتنا
فى صفحة التعليقات


سلام
اختك خيخة

Appy said...

انا ميرسي ليكم والله ومتابعه بس الموضوع على اجزاء ومش عاوزه احرقها لانه مينفعش نرد على تعليق تعليق احنا عاوزين نكمل مع بعض يا ريت محدش يزعل من حد هو حلو اوي بجد وجهاتالنظر اللى بتتقال وانا مبسوطه ليها ومش بزعل من حد بس نلعب مع بعض يعنى منجرحش اتفقنا
لان كل واحد بيقول من وجهه نظره لنا نعترض ونعرض باحترام وكل اللى هنا بصراحه ناس زي الفل وارائها بحبها وباحترمها



خوخه انا كنت هعمل لكي تحديث اقولك ادخلى ردي على التعليقات علشان انتى بتتكلمى زي وبتقولى اللى انا عاوزه اقوله فعلا وانتى ولورانس وكلكم قولتوا كلام خطير ومهم جدا
بس انا عملت بوست جديد نكمل فيه بعد المناقشات دي ولو هنكمل كمان بوست تالت مش مهم المهم اننا نطلع بهدوء وباقتناع من الكلام ده

ميرسي لكل الناس ويا ريت تكملوا معايا واهدكم واللى يكسب له خروف هديه

Appy said...

بدراوى
=========
بص يا سيدى مينفعش تقولى انا مؤمن بحقوق المرأه وفى نفس الوقت عاوزه قنبله الحياه مشاركه بين اتنين
الخجل ملوش علاقه
حقوق المراه اللى بنطالب بيها دلوقتى وانا بنت وبقولها لك مش كلها عادله حتى للمراه فيه ناس بتزيط فى الزيطه الست قدرات الست مش سوبر وومن يعنى
احنا بطبعنا حاجه رقيقه وحتى لو قدرنا نعمل الحاجات الكبيره الجامده
هيجى وقت وننهار اذا كان الراجل كده
يبقى احنا لا احنا فى النهايه بشر
فهمتنى الخجل زى ما قولت لك مش عيب بالعكس بكسبك احترام بيخلى اللى قدامك يحترمك وده شئ جميل فى نظرى واعتقد محدش مختلف عليه
علشان كده دايما ماسك جرنال ومخبى وشك مش تقول
ثم اميبا اميبا روحوا بقى وورونا هتعملوا ايه ههههههههههه

بدراوى said...

على فكرة انا عايز اقول لحضرتك
انى حطيت صوابعى العشرة فى الشق خلاص

نقول خجل تقولوا حياء

انا فيه واحدة قالتلى حلو الخجل ده
ده حياء
و الرسول عليه الصلاة و السلام كان عنده حياء

لولا انى مشوفتهاش وجهاً لوجه كنت
خبطتها بالكى بورد

يا استاذة انا عارف انه خجل انا ادرى بنفسى كويس

انا فيه كتاب عن الخجل بقرا فيه اكتشفت انى بتدهور
احتمال ابقى احط جزء منه فى تدوينة عشان تفهمى قصدى اكثر

ياريته كان شىء جميل
بس هو مش جميل خالص

اتمنى تكونى فهمتى قصدى بالخجل

من غير عنـــوان said...

وعلى اللي إختار
يقع الملام