سرداب الحياه




دائما ما يوجد بداخلنا سرداب مرعب من الاحزان والانطواء على النفس
دائما وابدا فى ظل ما نعانى منه من وحده .... برغم وجود الكثير من الاصدقاء والاهل
كل منا بداخله هذا السرداب
ولكن العجيب انه على الطرف الاخر دائما لابد من وجود من يهوى فتح هذا السرداب ورؤيه ما بداخله من كوابيس واحلام محطمه وضياع هويه
فيا من تهوى ومن تحب الحياه وترغب فى التغيير
اترك العنان لاحلامك
اعطى المفتاح لمن هواك واراد الدخول للسرداب
الحياه لن تستمر بدون تجارب
الكثير من المخترعين لم ينجحوا الا بعد الفشل
فى النهايه من يريد التقدم فى حياته لابد له ان يجرب كل المعانى وكل الاختراعات وكل الصدمات لكى يتعلم

اممممممممم كل بقى الرغى اللى فوق ده اللى انا مش فاهمه منه كلمه عن ذات نفسى يعنى مع ان انا اللى كتباه
عاوزه اقولكم منه حاجه واحد لا حاجتين تلاته
اولا البلد مش هتتغير طول ما احنا بننتقد اللى حوالينا وبس كل واحد عنده حل فى حاجه او مشكله يبدا يعملها يعنى مثلا
واحد رافض الرشوه خلاص ابد بنفسك ومتديش رشوه
ومتقوليش ما هى ماشيه كده لا تنح وزعق وانفش ريشك هتاخد حقك بدل ما اهبدك بقله فى دماغك
واحد مضايق من الزباله فى الشارع خلاص امسح بجيرانك الارض لو شوفتهم بيرموا الزباله
بس لو اتلموا عليك وضربوك متجيش ليه تشتكى نيهاهاها
مضايقك اعلان مستفز فى التى فى
خد رقم الشركه اللى بيتعلن عنها واتصل قولهم رايك بصراحه فى الاعلان اى والله انا عملتها هههههههههههههه والناس اتخضت بس عادى يعنى ايه المشكله فى اعلان حزام السونا علشان الراجل اللى بيبص على جيرانه وكانت تجربه ممتعه ليه انى اقولهم راى بصراحه

يعنى زى اللى بقوله كده اعمله اى حاجه شايف انها غلط ابدا بنفسك واعملها وقول لنا عملت كذا ورد الفعل كذا غيرك يتعلم
واللى عنده افكار تانيه يقول
ونبطل نخبط راسنا فى الحيطه لان عندنا حكومه بس هما مش عندنا بمعنى عايشين فى عالم تانى منفصلين عنا يبقى بالسلامه بقى ونطنشهم منستناش منهم حاجه ولا نضغط علشان يعملوا هما مش هيعملوا

الحاجه التانيه
اممممممم لما تكون من جواك حزين وحاسس انك وحيد وقرفان من العالم كله وعندك اكتئاااااااااااب ولقيت حد مجنون يدخل حياتك بليز متقفلش الباب وساعده انه يكمل معاك ساعده انه يخرجك من اللى انت فيه
يمكن هو هوايته وحبه فى حياته انه يخرجك من ده
متقولش انا لوحدى متقولش مفيش حد هيعمل ليه حاجه متقولش انا زهقت
دايما فى وسط الضلمه والسماء الضلمه كمان نجوم او نجمه صغيره بتنور وبتفتح طريق
العالم مبينتهيش وانت لوحدك لازم يبقى معاك حد
وهو ده كان قصدى من الحته اللى فوق

امممممممممم
نطلع بقى من كل الكلام اللى فوق ده بايه ولا حاجه وانى مهيسه على الاخر ومبسوطه اوى وخير اللهم اجعله خير بنزل كل يوم بضحك وبصحى من النوم فايقه
ربنا يستر بقى

كان معاكم استاذ ورئيس قسم فتح الابواب والسراديب ابى هان كعب الغزال


حكمه برنارد شو

إذا كان قلبك من حديد تذيبه المرأه , و إذا كان قلبك من جليد تذوب في المرأه

64 اخبط وقول رايك:

بت خيخة وأي كلام said...

ايه؟
قلتى ايه؟
بتصحى من النوم فايقة
و بتنزلى وانتى بتضحكى؟

ليه؟
ليه كدة يا ابى؟

خير يا بنتى
قلقتينى عليكى

لا لا لا لا
انا مش عايزة اروح لماما وانا شايفاكي فى الحالة دى


لا يا ابى
انا عايزاكى تتشائمى
وعايزاكى تبصى للدنيا بمنظار اسود ومنيل بنيلة





لا بجد يعنى
انا عايزة اقولك على حاجة
انا كنت شطورة مرة ولا قيت سلالم العمارة عندى مش نضيفة وانا اللى كنستها


لكن بصراحة ماكنتش هاقدر اروح امسك الجيران ابهدلهم لانى جبانة وبخاف اتضرب



ومرة كمان كنت ماشية فى النادى ولاقيت كانز مرمية على الارض مسكتها ورمتها فى الباسكت



مش عايزة اتكلم عن السرداب



يلا سلام بقى

على فكرة انتى كنتى امورة يوم البؤجة
وانا نسيت اقولك كدة واحنا هناك




سلام
اختك خيخة

بت خيخة وأي كلام said...

والنبى يا ابى تطمنينى
هو انا اول تعليق عندك
ولا فيه قبلى تعليقات؟


يارب اكون اول تعليق

Appy said...

خوخه خيخاتى
=================
عارفه اهو كلمتك الاخيره كمان ضحكتنى وخلتنى ابتسمت
بتاعت كنتى اموره كسفتينى مش انتى عارفه انى بنكسف اتحشمى بقى يا به

على فكره انا بمسح السلم بس انا استغلاليه بخلى الاولاد والبنات فىالعماره يساعدونى والله بجد علشان اعلمهم ميرموش حاجه لانك موتيهم ومطلعيهمش من اللعب فبقوا يحرموا ساعات يستهبلوا اقوم جايبه المقشه واقولهم اكنسوا
بس انا زعقت فى جيرانى بصراحه علشان الولاد اللى بينضفوا السلم مره فى الاسبوع عملوه وبعدها سمعت جارتى بتنفض علىالسلم التراب نفض فى دماغى طلع زعقت وحرموا هههههههههه
ممكن نتكلم بالذوق عادى
والله يا خيخه احنا شعب طيب وبيقلد بعضه بجد يعنى لما نشوف بعض بنعمل كويس اكيد كله هيبقى كويس وهيتكسف

انتى اول تعليق وابقى فكرينى اجيب لكى شيكولا دايت بتحبيها بيضاء ولا بنى
علشان اجيب معايا
صباح الفل يا خوخه

بت خيخة وأي كلام said...

نسيت اقولك ان
الصورة اللى انتى حاطاها مع البوست
حلوة اوى


كلمة سرداب
بقالى كتير ماسمعتهاش
والكلمة
فكرتنى باغنية بقرة حاحا للشيخ امام


هو انا مش عايزة اتكلم
بطريقة مباشرة
عن السرداب اللى انتى كاتبة عنه
عايزة الف وادور
ينفع؟



ولا اقولك خلاص مش هاتكلم خالص

الكلام بيوجع برضه


سلام
اختك خيخة

Appy said...

خوخه خوخه
======================
اتكلمى يا حبيبتى وانا معنديش مشكله النصيحه حلوة برضه نيهاهاهاهاها

بت خيخة وأي كلام said...

لولولولولولولولولولولولولولوى

انا اول تعليق


الشكولاتة تكون بني ومش دايت




صباح الجمال

Appy said...

مجنونه انتى وبموت فى جنانك كارثه متحركه والنبى اعملى التجمع الخيخاوى الحريمى بقى علشان نقول فى الودنات هههههههههههههههههههههههه

بت خيخة وأي كلام said...

اتكلم
اممممممممممممممممممم

اقول ايه طيب يا ابى


جوايا اوضة من الذكريات
قفلاها بمزاجى
وعاملة نفسى ناسياها

اوضة فيها لطشة قلم من ماما
اه كنت غلطانة
بس ماكنتش استحق لطشة القلم
كان كفاية قرصة فى الودان

وفيها لحظة جبن عشتها
ومقلتش كلمة حق
علشان كنت خايفة من لطشة قلم المدرسة


وفيها ذنب ارتكبته

لا مش ذنب
فيها ذنوب كتير
وفيها تكرار للذنوب


ومؤخرا فيها بابا
بكل ماتحمله هذه الكلمة من معنى
ومن حكايات ومن احضان ومن ضحكات ومن تربية
ومن تقصير من ناحيتى
وااااااااااااااااه



ولو عايزة نصيحتى
متسلميش حد مفتاح سردابك
خليكي قافلة عليه
والمفتاح يكون ملكك انتى وبس


انا زمان كنت بتهبل فى دماغى واقعد احكى عن السرداب بتاعى

بس ايه الحظ الوسخ ده

مافيش حد حكتله عن سردابى
الا والاقيه مش محل ثقة


فبالتالى قررت ان سردابى هو ملكى



انا مش عارفة اكمل كلام

بابا وحشنى اوى

من شوية كنت بدعبس على الصور اللى فى الكمبيوتر
لاقيت صورة لبابا وشريف وكانوا بيلعبوا طاولة مع بعض
كنا فى الاسماعيلية فى العيد الكبير اللى فات

غصب عنى ايدى جت على الشاشة

كنت عايزة احس انى بلمسه
بلمس حضنه
بلمس خدوده
بلمس شعره
حاولت احرك راسه علشان يبصلى
لكن الصورة كانت ملقوطة من الجنب

غصب عنى قربت شفايفى وبوست الصورة


انا مضايقة اوى
مضايقة انه مات

وهاتجنن واعرف فين البلوفر الكحلى
مش لاقياه يا ابى
مش لاقية البلوفر

Appy said...

خوخه خوخاتى
===============
يا حبيبه قلبى عارفه وفاهمه مشاعرك
بس مش معنى ان الناس خانت الثقه انى على الاقل مفتحش الباب انى اخرج حزنى مش لازم احكى
شوفى انتى قولتى عناوين مش تفاصيل
وبالرغم من كده انا حسيت بيكى اكيد كل منا عاوز ده
والاحلى بقى ان الطرف التانى لو هنمثل انا وانتى طرف اول وتانى
عاوز يساعد الاولانى وبيحبه وهى دى النقطه يا خوختى
الحب والحنيه
يعنى لو حسيتى انى بحبك وحنينه معاكى وعاوزه اخدك فى حضنى علشان انتى صحبتى او اختى اكيد لو مش بمثل هتحسى لان الاحساس الصادق بيوصل
لو حبيب وحبيبه اكيد هيحسوا ببعض
وده اللى قصدته مش لازم احكى تفاصيل تبقى ضدى بس على الاقل ابقى اتنفست من اللى جوايا
مدى ايدى خطى الحاجز ده اللى اقصده
الحواجز بين الناس القريبه من بعضها صعبه
يعنى لو عاوزاكى نخرج نلعب نتمشى نجرى وننسى الدنيا
متسبيش نفسك لحزنك مش لازم تحكى ليه بس استمتعى
بالوقت
ومع مرور الوقت هتعالجى الشرخ اللى جوواكى بدون ما تخرجى اسرار او لو خرجتيها بعد فتره هتبقى حسه انها فى مكانها
الخروج من التعب يا خوختى والالم مش كلام وبس ما انا ممكن اقعد اسجل كل اللى مضايقنى بس ايه الفايده رجعت زى ما انا
لازم خطوات انسى بيها وفى نفس الوقت اعالج نفسى طالما جنبى اللى بيحبنى
وبعدين والله ما اخدت البلوفر والله ما انا يا بيه
طيب دورى كويس يمكن عند حد من اخواتك او فى البيت واهو انتى هتروحى عند ماما فتره دورى براحه
ولو مش لاقتيه هتلاقى ذكرياته جوه قلبى افرحى بيها يا خوخه
عاوزكى تحسى كلامى مش تقريه بعنيكى علشان تفهميه
خلى بالك من خيخه خوخه

قوس قزح said...

انا مش التعليق الاول بس بحبها بيضا .. ماليش دعوة اشمعنى خيخة
و طبعا مش دايت حد ياكل الشيكولاتة دايت برضه

اما عن الدهاليز اللى انتى مدخلانا فيه فى البوست ده
اولا حتى لو حد دخل السرداب يبقى عبيط لو افتكر انه وصل لاخره
لان لازم يكون جوه كل واحد فينا مكان بتاعه لوحده
يكون له خصوصية
لان لو الجزء ده مش موجود مبقاش فى كلمة انا
يعنى لازم لو دخلنا السرداب نعرف ان لازم نحترم لحد فين مسموح لنا بالدخول

و ده نفس الشىء فى موضوع الاعتراض على الاغطاء اللى بنشوفها
نعترض اه بس مش لازم نتعدى حدودنا
و الا نبقى بنصلح الغلط بغلط
مش لازم الحق و الصح يتحقق بالعافية و الزعيق و الخناق ... ساعات الحسنة و البدء بالخير بيكون له نتيجة كويسة

و طبعا المكتئب يصاحب المجنون
يا اما يفك من اكتئابه يا اما يفك من الدنيا هههههههههه

يارب دايما سعيدة و مرتاحة البال
و كل يوم جديد لكى يكون حواليكى الناس اللى بيسعدوكى

و و النبى انا مزنوقة فى سلسلة مفاتيح السراديب اللى معاكى .. اخدها لفة افتح سرداب خيخة و ارجعها ههههههههههه

Appy said...

قوس قزح
===========
لا مفتايح خيخه دى سبيها ننتزعها منها بالعافيه غصما واقتدار

موضوع الزعيق لا طبعا مقصدش بس هى هزار بس بصراحه انا لما اتكلمت بالادب مره طنشوا لما زعقت اتلموا هههههههههههه
بس زى ما قولت لخيخه ان الموضوع اننا بنقلد بعض فمره بمره بجد هنعرف ناخد حقنا وهنبىق كلنا كويسين
موضوع الموظف انا من حقى انه يعمل ليه حاجاتى ومش من حقه ياخد رشوه خالص
يبقى انااعرف ايه حقوقى واعملها وبالتالى هاخد حقى
اما المجنون اللى مصاحب المكتئب على بال ما علجه هيكون انتحر ههههههههههه
وهجيب لكى شيوكلا دايت برضه

بت خيخة وأي كلام said...

مش لازم احكى تفاصيل ضدى

حلوة الجملة دى


بس المشكلة يا ابى

لو كل واحد دعبس جوة نفسه هيلاقى ان سردابه مجموعة من التفاصيل اللى ضده


ساعات الواحد بيبقى عايز يحكى
لمجرد انه يتحرر من العبء نفسى


مش موضوع انه يتفاخر بجدعنة
او يجاهر بذنب

بيبقى عايز يدلق اللى جواه وخلاص





الثقة
اه من دى كلمة

كلمة بتاثر علينا بطريقة مباشرة وغير مباشرة

جرح ممكن تكونى مريتى بيه من سنين ومع ذلك غصب عنك بياثر عليكى دلوقتى

وتلاقى نفسك لسة بتكشى ولسة الكلام بيقف على طرف اللسان ومش عارفة هل هو ده الانسان الصح اللى ممكن افتح قدامه سردابى
ولا لأ




لو اتكلمنا من غير افتراضات

انا عارفة يا ابى انك جدعة
واه بحس انى ممكن اروح فى حضنك واقعد احكى

بس المشكلة مش عندك
المشكلة عندى انا


انا اللى مش عايزة التزم باى علاقة صداقة
وعايزة يكون فيه حدود

لان علاقة الصداقة هيترتب عليها انى اكون
انا كمان حضن ليكى وايدى بتطبطب وودن بتسمع

وانا عارفة انى هاكون مقصرة

وانتى لسانك طويل وهتفضحينى
وتقولى كنت ليها حضن وكانت ليا خيخة

وهتزعلى منى كتير

وانا مش بحب حد يزعل منى


فيكى ميزة عايزة اقولك عليها
انتى مش لحوحة
ومش بتضغطى
وممكن تكونى فاهمة كل حاجة حواليكى وعارفة سراديب ناس كتير

بس بتسيبيهم براحتهم يحكوا اللى عايزين يحكوه

انا فاكرة موقف يوم عيد ميلادك

معرفش كنا بنتكلم فى ايه
او عارفة وبستهبل
وانتى قلتيلى حاجة

وانا رديت عليكى بنظرة بانى مش عايزة اتكلم فى الحاجة دى
وانتى رديتى عليا بنظرة وقلتيلى طب خلاص مش هنتكلم فيها
براحتك يا خوخة

فاكرة يا ابى ولا مش فاكرة

بجد لسة فاكرة نظرة عنيكى لحد دلوقتى

كنت حاسة انك بتطبطبى عليا برموشك



المهم كفاية عليكى كدة
انا جالى صداع


انا رايحة احضر بؤجة الرحيل
واشرب مج كاكاو قبل ما انزل

سلام يا ابى
واشوفك على خير دايما

اختك خيخة

بت خيخة وأي كلام said...

قبل ما امشى بقى
قريت تعليق داليا

عجبنى الكوبليه ده


و ده نفس الشىء فى موضوع الاعتراض على الاغطاء اللى بنشوفها
نعترض اه بس مش لازم نتعدى حدودنا
و الا نبقى بنصلح الغلط بغلط
مش لازم الحق و الصح يتحقق بالعافية و الزعيق و الخناق ... ساعات الحسنة و البدء بالخير بيكون له نتيجة كويسة



الحاجة التانية
انا دخلت سردابى من شوية ونسيت المفاتيح فى الباب من برة والباب اتقفل
وانا دلوقتى محبوسة جوة السرداب

والنبى حد فيكم يفتح الباب من برة
انا ورايا مج كاكاو
عايزة اشربه قبل ما يبرد

Appy said...

خوخه خوخاتى
===============
عارفه وفاكره يا حبيبتى وفاهمه كلامك انك مش عاوزه ترتبطى بحاجه مع حد اولا انا قولت نمثل انا وانتى
انتى عارفه فعلا انا بسيب الناس براحتها لانى مؤمنه بان كل واحد ارتباطه بالتانى مجرد كيميا بينهم حب وود واحترام وحدود برضه
انا عارفه كلامك وفاهمه اللى عاوزه تقوليه وكتير بعذرك فى حاجات كتير
عارفه انتى عامله زى الحصان المتمرد فى حاجات كتير وعمال يجرى ويرفص شمال ويمين
وفى نفس الوقت مش عاوز حد يقرب منه
بس لو حد جاله من بعيد وقرب وبص فى عينه هتلاقى الحصان ده بقى هادى وبص نفس النظره اللى بصيناها لبعض وهيقف ياخد نفسه شويه
وبرضه هيرجع للشيطنه اللى هو فيها انتى كده
مش عاوزه حد يقرب منك خالص مش اقصد انا عموما فى الحياه
بس بتيجى لحظات بتقفى بتكونى محتاجه الهدوء اللى لثوانى ده علشان تكملى الرفص والجرى بتاعك
وكل ده علشان حطه حمل فوق كتافك اللجام بتاعك
شريف يا خوخه هو ده لجامك فى الحياه ومسئوليتك
بقولك ايه كده هسيح جامد
خلاص انا فاهمه اللى انتى عاوزاه
وانا وصلت لكى اللى عاوزه اقوله كله الموضوع مش علاقه بينى وبينك ولا بين اى حد ووحد
لازم تختارى بنفسك اللى ترتاحى له
خلى بالك من نفسك وبوسى شريف بوسه كبيررررررررررررره قد البحر وسمكاته وبوسى خوخه كمان

بت خيخة وأي كلام said...

ايوة صح
انتى فهمتينى صح يا ابى
الموضوع مش بينى وبينك
الموضوع انى مش عايزة حد يقرب منى

عايزة اجرى وخلاص


عاجبنى اوى التشبيه بتاع الحصان ده



ماما دايما تشبهنى بالحصان الجامح برضه


ومرة قالتلى انتى تمرحنة

علشان كان فيه اغنية بتقول
يا تمرحنة يا تمرحنة
خليتى بينا وبعدتى عنا
الورد كله كسا الجناين
واشمعنى انتى اللى شاردة منا

بالليل بنسال وبالنهار
علشان نبلغ شوق الأحبة
وطال عليهم الانتظار
ومافيش فى قلبك ريحة المحبة



واضح كدة انى كنت خيخة من زمان وانا مش واخدة بالى

Rania said...

كلامك حلو اوى بجد
و فعلا ابدا بنفسك اما مووضع السراديب و الحاجات الضلمه دى فمش كل واحد عايز يدخل جواكى يبقى عايز يساعدك يمكن يكون عايز يشوف نقط ضعفك علشان يدمرك

تحياتى يا جميله

Ahmed Talk said...

انت كدة هتخلينا في مكان من اﻻثنين يا مستشفي المجانين أو السجن

ﻻ كدة أحسن خلينا في السرداب احسن

dalia said...

رائع أول مرة ازور المدونة بس عجبني روح التفاعل انت اكيد شخصية قيادية ولو في منك نسبة 15 من كل عشرين شخص مصر حتتغير للاحسن
اكيد حنكون متفقين لاني بحاول اكون كده برده
تحياتي ودمت بخير

karim said...

مش عارف اقوليك اية بس بجد انتى رائعة ولا خيخة هانم ياسلام عليكم لما تقسموا مع بعض زلا ابوتريكة و بركات فى عززهم واللة, تحياتى لكى و لى خيخة علشان كل ما ادخل عندك اكون عارف انى هاخرج وانا مبسوط, قشطة عليكم

سبهللة said...

وحشتييييييييييييينى اوى
بالنسبة للبوست
كلام عاقل جدا من واحدة مجنونة جدا
========
عندى ليكى طلب على مدونى ابقى اقريه
==========
سلام

مواطن مصري said...

ائما ما يوجد بداخلنا سرداب مرعب من الاحزان والانطواء على النفس
دائما وابدا فى ظل ما نعانى منه من وحده .... برغم وجود الكثير من الاصدقاء والاهل
كل منا بداخله هذا السرداب
ولكن العجيب انه على الطرف الاخر دائما لابد من وجود من يهوى فتح هذا السرداب ورؤيه ما بداخله من كوابيس واحلام محطمه وضياع هويه


هو البوست دة عن حالتي النفساوية الي بعاني منها


المشكل اني واقع في هذا السرداب او بحر الاحزان و مفيش طرف اخر يفتحة

و شكلي هفضل في قاع السرداب دة ع طول

مسدس صغير said...

اضحك الله سنك
هو سنك كام صحيح؟؟
ههههههههه
ربنا يبارك فيكى
اسلوب رائع لحل المشكلات ان تبدأ بنفسك ومن تعول والجيران واللى ايديك تطول.
احييكى على البوست
سلامى

Abo 7anf said...

السلام عليكم
عندك حق مينفعش نطالب حد يكون صح
واحنا غلط
لازم نصحح نفسنا

micheal said...

ههههههههه..حد يكره يضحك لما يصحي من النوم وينزل فايق
عجايب والله
:)
أيوة كل واحد مننا جواه سرداب وانا مثلا عندي نفق شبرا فاتح جوايا علي نفق الشهيد أحمد حمدي
بالنسبة للإيجابية في التغيير معاكي فيها وأنا عن نفسي مش برمي زبالة في الشارع ولما بكون خارج مع حد مبخليهوش يرمي أي حاجة في الشارع قدامي ع الأقل..اه بلطجة بقي
:)
وقبل كده رفضت أشتغل في شركة بتلعب من تحت الترابيزة عشان مبحبش مبدأ يعني هي جت عليا..ما كله بالرشاوي
بس لسه حاسس برضه أني مش إيجابي بالدرجة الكافية
بالنسبة للمجنون..متفق معاكي..ٍسيبيه يكمل وأهو لو منفعش الموضوع تبقي اتجننتي أنتي كمان ونرتاح بقي شوية من خرفانك
:)
بهرأ طبعا..هو انا أقدر
:)
اخر حاجة..كل ما بسمع أو أقرأ جملة لبرنارد شو بتأكد أنه عبقري بمعني الكلمة
تحياتي

tamer.sala7 said...

يا له من سرداب مخيف

ويل لمن يقترب

ebn roshd 777 said...

طبعا كلامك عن السرداب كلام صح بدرجه كبيره جدا جدا
لكن المصيبه اللي ممكن تحصل ان يكون فيه حد ميستحملش التجربه ساعتها ممكن نرجع تاني ونقول اوعي تفتح قلبك لحد
يعني عايز اقولك ان مش شخص مؤهل انه يخوض تجارب انسانيه تحتمل النجاح او الفشل
اما عن نفسي فقد استمتعت بتجاربي الانسانيه بدرجه جعلتني اغير معتقدات خاطئه في حياتي كانت من الممكن ان تهدم اعمده اساسيه بحياتي
اخيرا حلو اوي اوي حوار القلوب النضيفه اللي بينك وبين خيخه ده
ربنا يجمعكم دايما في الخير

فتاه من الصعيد said...

كلامك جميل....بالنسبه للايجابيه انا معاكى....البلد موش هتتغير من غير ما نحاول احنا
بالنسبه لاللى يدخل حياتك علشان يساعدك....طيب ممكن نوارب بلاش نفتح على البحرى....بصراحه انا من انصار حرص ولا تخون
دمى بخير....تقبلى مرورى

بدراوى said...

انا مش عارف اقولك ايه على التدوينة ديه

ديه اجمل تدوينة قريتها
لأنها شبهى انا

للدرجة اللى خلتنى نفسى اعيط من كلامها
مش بس لأن كلامها مؤثر لأ الأهم ان كلامها بيفكرنى بنفسى

يمكن اكثر كلام حسيته هو ده
---------------
فيا من تهوى ومن تحب الحياه وترغب فى التغيير
اترك العنان لاحلامك
اعطى المفتاح لمن هواك واراد الدخول للسرداب
الحياه لن تستمر بدون تجارب
الكثير من المخترعين لم ينجحوا الا بعد الفشل
فى النهايه من يريد التقدم فى حياته لابد له ان يجرب كل المعانى وكل الاختراعات وكل الصدمات لكى يتعلم
---------------------
و ده اكثر
-----------
لما تكون من جواك حزين وحاسس انك وحيد وقرفان من العالم كله وعندك اكتئاااااااااااب ولقيت حد مجنون يدخل حياتك بليز متقفلش الباب وساعده انه يكمل معاك ساعده انه يخرجك من اللى انت فيه
يمكن هو هوايته وحبه فى حياته انه يخرجك من ده
متقولش انا لوحدى متقولش مفيش حد هيعمل ليه حاجه متقولش انا زهقت
دايما فى وسط الضلمه والسماء الضلمه كمان نجوم او نجمه صغيره بتنور وبتفتح طريق
العالم مبينتهيش وانت لوحدك لازم يبقى معاك حد
---
مش عارف اشكرك على التدوينة ديه
و لا ايه لأنها على قد ما عجبتنى على قد ما ضايقتنى

بس أنا عارف انتى متقصديش تضايقى حد
---
مع تحياتى

ساره said...

بوست يحرض على الرغي :)

طيب واللي قفل السرداب ورمى المفتاح فى البحر
ايش يعمل؟؟

تصدقي صاحبتي تقول عني
اني البابا حق الكنيسه
عشان البنات فى الشغل يجوا عندي المكتب يحكون لي مشاكلهم ... وانا اصلا ما اسئلهم عن شئ ولا احب حتى اسئل ... هما من انفسهم يجوا ويفضفضوا ويمشوا وكلهم ثقه انه سرهم في بير
والحمدلله ثقتهم فى محلها

اما انا صعب اثق فى احد عشان عطيه مفتاح السرداب
واذا بيجي يوم وافتح السرداب بيضل المفتاح معاي مستحيل اعطيه احد
دائما عندي خوف وعدم امان


معقده بأه
:)

أحمـــــــــــــد أبو العلا said...

كلامك جميل ياابي

نبدأ بنفسنا
والله ممكن
فيه حاجات كتير ممكت نبدأ بيها
وربنا يستر بأه علينا
هههههههه

في النقطة التانيه للأسف معاكي حق

بوجه عام احنا بنستسلم للحزن ونخليه يسيطر علينا
زي مانكون بنتمتع بالعذاب والاكتئاب
مش عارف ليه بنعمل كده
بس متهأيلي لو وقفنا مع نفسنا بصدق وقت الحزن, هنرجع للصح

كلامك جميل ياابي هانم

انسان وبس ! said...

خلى بالك يا رحاب ليكون حد بيحطلك حاجه فى الأكل او فى الشاى

انسان وبس ! said...

!السرداب ده اتوجد عشان يفضل سرداب
يعنى مينفعش اخلىحد يدخله
ممكن البدروم بتاع النفس ادخل فيه حد ههههه
اوريه زوايا مظلمه منها لكن افتحتله لسرداب .... ابدا

انسان وبس ! said...

كلامك فى كتير من اللى المفروض يحصل

طب اعملى استفتاء عندك كده وشوفى كام واحد شاف طفل او طفله من اطفال الشوارع مرميين فى الشارع نايميين ع الارض فى عز النهار واتصل ب 160000 اظن قليل ده لو حد اتصل اصلا

والله ساعات بيبقى فيه رجال ونساء الشوارع مش اطفال بس

أم أحمد المصرية said...

حبيبتي أبي
ربنا يسعدك بس ده جد و لا بتضحكي علينا و قاعدة جوه السردا ب اوعي تعملي كده انا بهزر
بس بجد بقي تحياتي لروحك الايجابية ياقمر في موضوع الاعلان ده الله ينور بجد جديدة
تحياتي لوحك المتوهجة و نفسك الايجابية
حلوين الكلمتين الاخرنين دول انا بردوا قلت حيعجبوك :))))

احمد سعيد said...

طب اقولكوا انا على حاجه احلى

تعالوا نلغوص فى نفساويتنا اكتر من كدة

واكتر مما قالت خيخه

دى حاجات احنا بنحطها فى البدروم بتاع الذاكرة علشان منشوفهاش تانى

وبنحاول ننساها

الا اننا ساعات بنفتكرها برضه


طب ايه رايكم بقى فيه جوانا حاجات اسوأ من كدة بكتييييييييييير

حاجات احنا عملناها من كتر ما هيا سيئه ومخزيه نسيناها لا اراديا

نسيناها تماماااااااااا

زى ما تكون محصلتش خالص

حتى ان لو حد حاول يفكرنا بيها مش بنفتكرها

يعنى فقدان جزئى للذاكرة

دا شىء طبيعى بيحصل لنا كلنا وهو عبارة عن تصرف لا ارادى مننا بل من العقل الباطن اللى بيتعمد يلغى الذكريات دى علشان متعملش جوانا صراع نفسى

اينعم اللى قولتوا عليه بيعمل صراع

بس صراع حنين نسبيا

يعنى بنتعلم شويه ونقول ياريت شويتين

كدة يعنى

انما بقى التانى دة

فعلا ممكن يدمرنا لاننا هننهار قدام نفسنا

اقل حاجه هنتجنن

مش فاكر قريت الموضوع دة فين

تقريبا الدكتور احمد خالد توفيق كان كاتب عنه قصه

بس هو خلاة بشكل ماضى شويه

يعنى على قد منا فاكر كدة كان بيتكلم عن فئه من الناس عندها القدرة انها تخترق عقول الاخرين

وبتبقى قدامهم عبارة عن بيوت بالمعنى الحرفى

بيفتحوا الباب ويدخلو

ممكن يلاقوة بيت واسع

وممكن ضيق

ممكن منور وشرح وحلو وفيه ورد وعصافير

وممكن كئيب ومكتوم وضلمه ومليان وطاويط

بس فى النهايه فى سمه واحدة مشتركه

دايما بيكون فيه اوضه صغيرة فى الاخر مخفيه ومقفوله كويس جدا وعليها عينكبوت كبيييير

دليل انها عمرها ما اتفتحت

يقوم الشخص دة يقتحم الغرفه دى

دايما بتكون مليانه قاذورات وقرف وزباله وكل حاجه وحشه

ودا عند كل الناس

بيبدأ يطلع الارف دة برة الاوضه ويرميه فى كل حته فى البيت وينشرة جواة

البيت اللى هو العقل يعنى

وساعتها بيبدا الانسان يفتكر الحاجات دى

وسرعان ما بينهار وبينتهى اما بازمه قلبيه او انه ينتحر لما يكتشف كم الوساخه اللى كان موجود جواة وهو مش حاسس بيه

او على اقل الاحتمالات بيتجنن

انا مش فاكر القصه بالظبط

بس دة الاطار العريض بتاعها

.................

بالنسبه لمفتاح السرداب اللى خيخه قالت عليه

هى قالت احتفظى بيه ومش تديه لحد خاااالث

نصيحتى انا ليكوا

اتخلصوا من المفتاح كمان

ارموة فى البلاعه

او احدفوة من فوق المقطم

mayada said...

مسائك تهيس
عارفه حكايه ان احنا منستناش من الحكومه خير ونعتمد علي نفسنا
دي فكرتني بيبيرم وهو بيقول
يامصري انت اللي هممني من بين الكل
هزيل ويحسبك الجاهل عيان بالسل
من دي الكيوف اللي تصبر علي كتر الذل
ونمت والعالم فايق قوم بص وطل
شوف الشعوب واتغص ودوب وارجع انسان
احنا جوانا قدره كبيره بس احنا بنستسهل ولا ايه لما بقينا شبه السحلفه كل واحد بقي شبه الحجاره اللي بتتكلم

والحاجه التانيه لما حد يقرب منك متمنعوش عشان وسيبه وعادي لما تتصدم علي اساس ان الحياه تجاربمع ان انا من الناس اللي بتفترض حسن نيت اي حد الي انا يثبت العكس بس شايفه انك لو مضايق ومخنوق وشايف الدنيا ضيقه اعرف ان عمر ال دنيا ما هتوسع في عينك غير لما انت تكون عاوزك كده حاول تلاقي نفسك ومتستناش حد يلاقيهالك او يدور لك عليها وزع نفسك في حتت كتير وانت تحس بالونس احسن ماتعتدم علي فرض وكمان مبحبش ان انا اتعشم حاجه جامده من حد معرفش ممكن اكون غلط بس انا شايفه ان كده اسلم واحسنه لان صدمه علي صدمه ممكن تعمل كلكيعه وعقده وشنيطه فالحرص واجب يااوختي

عاشق مصر said...

آبي
الانسان هو كل تجاربه، السيئة والجيدة، الحزينة والمفرحة، الايجابية والسلبية.
هو كل البيت بطوابقه العليا وسردابه
والسرداب بالذات يجب ان يكون انظف الغرف على الاطلاق واكثرها جمالاً وراحة
السرداب هو المكان الذي نحتمي فيه عند الخوف
ونتسلل اليه للقاء الحبيب
ونرتاح اليه فراراً من حرارة في غير ميعادها وبرودة فاجئت استعداد ملابسنا
واختلف مع العزيز احمد سعيد حول رمي مفتاح الغرفة آياها
وجهة نظري ان نمسك بحبل الله المتين ونفتحها على مصراعيها ونتفقد عناصرها
هذا ذنب يكويني اطفئه بالاستغفار ونية عدم العودة
هذه صديقة اسئت الى صداقتها استجمع قوتي لاعتذر منها واطلب مسامحتها
هذا مال جمعته من غير حل اقاوم شح نفسي واعيده الى اصحابه الشرعيين
وهكذا دواليك
في المثال الكامل كل بناء الانسان يجب ان يوحي بالبهجة من سردابه الى اعلاه ، وفي الطريق الى المثال الكامل لا يوجد ماهو احق من السرداب بالتوضيب والترتيب لانه الاساس ومنه الانطلاق الى الاعلى

bos bos said...

موضوعك حلو قووووووووووى وعجبنى جدااااااااااااااا وخصوصا أننا نبدأ نغير من نفسنا وعندى كلام كتير عنه بس تقريبا هيست خلاص لاننا بعد الفجر بساعة هنام وهبقى ارجعلك تانى

سومه...مجنونه فى بلد عاقل said...

ههههههههههههههه مبروك مبرك انتى اتعديتى منى دخلتى عش المجانين ايبايه
ومدام الموضوع فيه سرداب يبقى انتى كيد فى الروم الى جنبى
اسكتى مش انا كان ابويا بيقولى يا فوزيه بقيت الحمد لله حاليا تشكر :) بتاعه مبروك

سومه...مجنونه فى بلد عاقل said...

موضوع الجيران دا متقلقيش طنطك ام سومه مسكت جيرانا غسلت بيهم لارض وجابتلهم قائد الحرس بتاع المدينه :)

سومه...مجنونه فى بلد عاقل said...

انا بقى حاله الفرح والزهزهه دى بصحى من النوم عندى بالاضافه الى نوع من اللامبالاه والبرود التام والبطء الشديد فى حركاتى وبقيت فرس مع مزيد من العصبيه الفجائيه
لو الحاله اتطورت معاكى زى معايا متسكتيش عى نفسك زيى

سومه...مجنونه فى بلد عاقل said...

نسيت قولك انا سردابى منفد على الشارع الناس عاره اللى فيه ومبعرفش محكيش واكبت فى نفسى بحكى لاى حد ولو ملقيتش بنى ادمين بكلم نفسى
ياله سلام عشان اقوم اذاكر طرز

Foxology said...

والله يا أبى عندك حق فى موضوع ان الواحد يبدأ بنفسه فعلا لو كل واحد غير اللى مش عاجبه او حاول حتى يغير الدنيا مش هتبقى بالمنظر ده ومنتسناش حاجة من حد نعمل بنفسنا ولنفسنا

وحلو موضوع سراديب الظلمات النفسية ده لأن فعلا فى ناس ماسوشية هوايتها انها تفضل قاعدة فى السرداب .. وانا شكلى بقيت منهم :))))

شكرا على البوست والأفكار اللى فيه

تحياتى :)

يا مراكبي said...

مع إحترامي للبوست الطويل العريض الشلولخ ده بس أخر "سطرين" هما اللي عدلوا الدماغ بصراحة


إبدأ بنفسك ولا تيأس أبدا .. هي دي الخلاصة

ده حتى الرسول (ص) أوصى إنه لو قامت القيامة وفي إيدين واحد شجرة .. يزرعها .. فيه أكتر من كده؟

esraa said...

ايه ياعم الكلام الجامد ده
بس كلامك صح اوي يابطوطه

لازم نبقي اجابين بقي
ونضحك للدنيا كل يوم الصبح
(k)

ريمان said...

والله بوست جميل يا باى ومحتاجينه كلنا

فيه معانى جميله ونصايح كويسه جدا منعا للاكتئاب والاحزان


تحياتى ليكى يا قمر

جنّي said...

السلام عليكم

كلام معقول ومفهوم .. ولكن ليس من الحكمة ان نجرب كل شئ جربه الآخرون بمعنى انه يجب ان نبدأ بما انتهى اليه الآخرون ونتعلم من تجارب غيرنا حتى لا تصبح نفوسنا مستباحة لكل من هب ودب يلج سراديب قلوبنا ..فاختيار الرفيق والصديق يحتاج بعد النظر ..

واوافقك الرأي تماما في موضوع ان نبدأ بأنفسنا في احداث التغيير وان كان التعب والمشاكل في انتظار من يحاول ان يغير بنفسه ما استطاع .. ولي تجربة في استخراج رخصة من مجلس المدينة وقررت الا ادفع رشوة ولا قرش واحد ودخلت في معركة مع المرتشين ولكن باصراري انتصرت عليهم رغم العراقيل التي وضعوها وتخالف القوانين ..
نحتاج الصبر والنفس الطويل

ملاحظة : عرفتي زهرة البيتونيا سهلة قوي والله ولو فاكرة درسناها في العلوم او الاحياء كزهرة نموذجية ..

thunder said...

قولت ياستو هانم ارخم وبما انى كنت تعبان وجيت ام الاقى كلام كبيرررر
كبيرررررررر يعجز امثالى من البسطاء والعامة على فهمه
فحضريتك هتنزلى مج كابتشيتنو من بتاع ابو شنب على حسابك طبعا لان العلاوة على مايتيجى هنبيع هدومنا
المهم فعلا كل واحد فينا جواه سرداب لايعلم مده الا اللى خالقنا فيه لحظات اعتقد اغلبها او اللى احنا بنخاطر نقفل عليها هو لحظات الحزن واشدها فعلا معاكى ان فى بعض الاوقات بتخونك اوى قدراتك وتحطى ثقتك فى ناس ميكونش اهل لكدا وتبوحى ببعض اسرار السرداب دا لكن فى المجمل برضوا بنحتفظ بخبايا جوانا مبنحبش حد غيرنا يعرفها حتى لو كان اللى قدمنا دا هيشكل حزء من روحنا
لكن اصعب نقطة عندى انا فى السرداب دا هى اول امبارح زكرى وفاة والدى الله يرحمه فعلا دى اصعب نقطة فى حياتى لانها على قسوة واحساسى انى ظاهرى انكسر الا انها هى اللى بتشكلنى دلوقتى
ممممممممممممممم دور اكتئاب بقولك سيبى السردايب وكل بوست وانتى طيبة
دمت بكل ود وحب وفى رعاية الله ياااارب والنسكافية وصل مع كتاب يوسف معاطى

Mohamed Hamdy said...

والله وبجد كلام زى الفل

وانا فعلا من فتره عملت موضوع انى اقول على اللى مش عاجبنى واوصل صوتى لكل الناس

تحياتى

ماما أمولة said...

يارب يجعل كل ايامك افراح يا آبي يا غالية

أشكرك يا حبيبتي من كل قلبي ربنا يبارك فيك يارب

اللهم امين

الطائر الحزين said...

يختلف عمق السرداب بعمق التجربة
استأذنك أشير الى هذه التدوينة عندى

shabfa2re said...

بوست هايل
وعجبنى موضوع رأيك فى الاعلان
بس ياريت يتغيروا

son's egypt said...

السلام عليكم
فعلا التغير بيدا من الشخص نفسه
اذا كان فعلا عاوز يغير ويتغير
واكيد بردوا كل واحد جواة سرداب في منا اللي يحي يطلع لواحد تاني وفي منا اللي بيحب يكون السرداب له وحده بس

Ruhul Qalam said...

البوست جميل للغاية وفقك الله إلى ما فيه خير الدنيا والاخرة

تحياتي أشرف

شمس النهار said...

يامساء التهيييس اللي بجد
بس لطيف اهي حاله من التغيير برضه
تهديد
هتيجي تقابليني تاخدي البؤجه اللي عندي والا لأ:)
كل اللي يدخل الصالون يقول لي ايه الاكياس دي
اقول بؤجة الخير
يعني ايه واقعد اشرح الموضوع:)

قلب ينبض بالحب said...

ربنا يسعدك يابنتي انتي ويزيد حياتك تفائل يارب يارب ، وبوست في الجون يابنت انتي

ابو اعصار said...

اسوا عيوبنا البحث عن عيوب الاخرين

بس ايه دور الفلسفه اللي داخلة فيه اليومين دول
تحياتي

wanna b a physician said...

فتح البيبان والسراديب يحتاج الى مفاتيح فلو اخذها احدهم وهرب لن نستطيع فتحها


اهم حاجة انى مبسوط انك متفائله ومبسوطه ومرتاحه

ربنا يسعدك دايما

وسورى عالتقصير

ويكا said...

ابى
انا كاتبلك التعليق ده واتمنى انك تلحقى تقريه لان عارف انك اكتر واحده مننا بتابعى المدونه بتاعتك .لان الموضوع خطير جداً
فيه واحد حيوان نصرانى دخل على اخر بوست لسبهلله وكتب كلام وحش جدا فى حق ربنا والرسول والقرآن لان سبهلله للاسف سايبه التعليقات مفتوحه لاى حد .
وانا للاسف ما اعرفشى اوصل لسبهلله ازاى علشان اقلها
ياريت انتى تبلغيها فى اسرع وقت ممكن .

ياريت

ويكا

الست فرويد said...

:)
بصحى من النوم فايقة
وبنزل ضحك


ماشاء الله
ربنا يدميها نعمة عليكى يا قمر
ويكون خير ان شاء الله


دمك خفيف
:)
تحياتى لكى

زقطـوطـة said...

عجبتني جدا مقدمة البوست
اللي باللغة العربية الفصحى
مليانة أحاسيس جميلة
يمكن عشان أنا مكتئبة اليومين دول
احتمال
بس بجد بشكرك على البوست ده
صحيح أنا مفيش حد معايا يقف جنبي
بس لو جه
هبقى أواربله الباب
حاضر
: )

تحياتي

فاتيما said...

اولا
ميرسى ع التورتة و المعايدة
و لو إن الشياكة دى مش مستغربة
و لا بعيدة عنك يعنى
أنا قولت هاجى الاقى التورتة إتنسفت إنما الحمدلله الخرفان قامت بالواجب
و حرستها تمام
طب شغلى التكييف بتاع المدونة
عشان التورتة تفضل سليمة
لحد يوم خمأشر
متحرمشى منك يا حبيبتى أبداً
ثانيا بقى
البوست تحفة و فيه حبة روقان ربنا يديمه عليكى يا رب
بس سرداب واحد بس يا بيبى ؟؟
متاكدة ؟
يكفى يعنى البلاوى اللى الواحد عاشها و بيعيشها و هيعيشها ؟
دنا محتاجة ييجى خمس ست عشر سراديب
اما حكاية ندخل حد فيهم دى
انا سخصيا لحد سنة فاتت كنت مقررة
لا ينكن
بس بعد ما عرفتكم
مبقتش اخاف
و لا يهمنى
و قررت أعملكم رحلة جماعية لهناك كمان و خليت السرداب مفتوح للزوار
و ميهمنيش
بس خدى بالك دا برضو سرداب واحد
من جملة السراديب ...
و لكن أدخل حد كل السراديب ؟؟؟
مظنش
بصراحة مبقتش متصورة إن ممكن
الاقى حد اثق فيه الثقة الرهيبة تانى
مش لأنه هيبقى وحش
لأ...لأنه إنسان ضعيف زيى
و ممكن يأذينى دون قصد ...
فعلى إيه ملوش لازمة من أساسه
أحطه فى الاختبار دا
و نخسر بعض
ثالثاً بقى بقى
أنا عاجبنى قوى الديو اللى إنتى
عملاه مع خوخة دا
حلو بجد و فيه دفء
و حنين غريب من نوران
و طبطبة منك عليها
البت خيخة دى من أجمل الشخصيات
اللى الواحد صادفها
و إنتى كمان يا بيبى
فيه تعليق عندك بيقول لو فيه منك مش عارفة 15 واحد ف كل 20
دا لو فيه منك إتنين بس
يا ستى
كانت الدنيا بقت شكل تانى
و رابعا
أنا مختلفة مع خوخة فى حاجة
إنك يوم البؤجة كنتى منورة
مش صح الكلام دا
انتى كل يوم بنشوفك فيه بتبقى منورة
و قمر ملالى
خامساً
أنا جبت الحصالة خلاص و حطيت فيها جنيه عشان أبقى اول نفر
سادسا
بحبك يا قمر التدوين كله
سابعا
و بوسة و حضونة يا حبيبة قلبى

نهر الحب said...

خير اللهم اجعله خير

طائرٌ حر said...

أجمل بوست و أروع بوست قريته..بجد مش هزار..هوا ده الحل.. و الله أنا باعمل كده يا آبي بس في البيت بيتهموني إني إنسان حشري (بكسر الحاء) و و واقف للناس على الواحدة.. و الله أبدا ..انا بحاول أكون إيجابي و أعمل حاجة إيجابية..
مرة اتصلت بالوسيط علشان كانو حاطين الإعلانات بتاعة مراكز التجميل و الأجهزة بتاعة الستات و كدة و كان فيها صور عريانة (ربما من منظوري باعتبار أن ظهور أجزاء كبيرة من الصدر و البطن و الرجلين هو عري من منظوري لكن في ناس تانية مش شايفة كده) المهم اتصلت بيهم و قلتلهم عيب كده و ان الصور دي بتدخل بيوت كتير و بيشوفها شباب و مراهقين و ان ده ممكن يأثر على توزيعكم لو الأهالي اتنبهت إن مجلتكم بتعرض صور إباحية..

مرة نزلت من العربية علشان الناس اللي بتدخل من أقصى اليمين و تكسر شمال ..نزلت و قعدت أكلمهم عن إن كده غلط و شوف انت عطلت كام واحد وراك ممكن يكونو بيدعو عليك و ان ممكن يكون في حالة خطيرة و تموت بسبب الزحمة دي اللي انت سبب فيها.. و هكذا.

بس سعيد إنك كتبتي ده في بوست و ننشره للناس..كده صح..متضايق من وضع..إتكلم و عير..هوا ده إزالة المنكر باللسان..و ده واجب على كل واحد فينا.. و بالمناسبة المنكر مش بس صورة عريانة أو واحد و واحدة ف وضع مش صح..

المنكر رشوة ف مصلحة حكومية
المنكر رشوة علشان تزوير الانتخابات
المنكر سكوت عن حق و شهادة زور
المنكر سلوك سئ في الطريق حتى لو تفة على الأرض.
المنكر كلاكس مقصود منه شتيمة
المنكر بنت مش محترمة لابسة لبس مش كويس أو ولد سافل بيعاكس أو بيتحرش

لو كنا وقفنا للمنكر..ما كانش ده حالنا..
شكرا ليكي على البوست الجميل.