وجهان لعمله واحده المدب والصريح هو انا


منذ فتره طويله اوى كما طريق مصر الصعيد وكل اصدقائى فى بعض الاحيان بعد مناقشات طويله بينا جدا ينظرون لى شذرا وشيرازا وشيرزا

وفى نفس واحد كا من يدخنون الشيشه ويخرجون الدخان سويا كأنها مسابقه جمال الدخان
وفى نفس واحد يقولون بطلى تبقى مدب كده فى كلامك بلاش الصراحه اللى بتوجع دى

الحقيقه مكنتش عارفه ازاى الحقيقه او الصراحه توجع قعدت انا ونفسى اضرب فيها واشد شعرها واعض مناخيرها بما انى واخده بطوله الجمهوريه بلافخر ولا فشخره فى عض المناخير اى مناخير تقع تحت ايدى ان نفسى تعترف او تقول تحلف ميه طلاق بالتلاته انها اصلا مش فاهمه يعنى ايه الصراحه واكون مدب

يعنى موقف بينى وبين احدى الاصدقاء سالنى بخبث وبنص عين ونص لسان علشان هو الدغ فى حرف السين بس بينى وبينكم سكر قالى ممكن فى يوم من الايام متكلمنيش وتخصمينى او تزهقى فانا بدون تردد رديت قولت له اكيد ليه لا يعنى بس فيه حالتين انا لما بقول خلاص لحد الموضوع منتهى بيكون فعلا الموضوع انتهى ليه ومينفعش نكون اصدقاء او اى حاجه فى الدنيا والحاله التانيه انى بدلع علشان اللى قدامى يقولى طيب ايه حصل طيب انا زعلتك فى ايه

وفى كلتا الحالتين انا بيكون باين عليا انى بتكلم جد او بدلع
بص ليه بنص عين وقالى انتى دبشه ومدب وخفى كلامك بلاش الصراحه الزياده دى

طيب انتم بالله عليكم السيده فى ضهركم وصلاح سالم فى وشكم وطريق المطار يستر عليكم
انا مدب فى ايه غلطت فى ايه كان المفروض اذوق الكلام ازاى انا اتستالت سؤال وجاوبته خدوا بقى من ده طول الوقت كل حد اكلمه يقولى

دبشه هانم اتهد
يا قطر الصعيد امسكى لسانك يا مترليوس موجهه حاسبى على كلامك
لما شككونى فى صحه لسانى وفى عقلى وبقت حسه انى حد مش طبيعى خالص
وكله كوم

وربنا واعدنى بحد طول الوقت يقولى الملافظ سعد يا ام احمد
انا مش عارفه الكلام بيتوجهه لمين ومين ام احمد انا بجاوب اللى بيجيى فى بالى ليه اقعدافكر فى الكلام وفى تذويقه ليه مقولش الكلام زى ما هو ما هو
فيه مشكله بيجهلها ناس كتير اوى وهى ايه بقى
ان انا لما بسال برضه حد فى حاجه والاقيه حور فى الكلام وبقى شخص حاورتجى ( التصريف التالت للى بيحوروا يعنى ويعملوا حوارات ) بيبان عليه وبفهم على طول وبضايق وبيكون نفسى انقض على مناخيره اكلها طيب ليه انا اعمل كده ليه احنا منقولش الكلام زى ما هو فى قلبنا واللى قدمنا يفهم انه مش جرح بس يمكن دى حقيقه جوانا بنقولها مبكونش فعلا متعمده اضايق ولا بكون متعمده اجرح انا بقول اللى فى قلبى وعقلى وبس
وبعد مناقشات مع بعض الاصدقاء لمده يوم كامل وكل شويه يطلبوا عصير لا ميه لا شيشه
وفجأه حط ايده على قلبه وهو بيفرفر وقالى انتى يا بنتى يا حبيبتى اللى هيتجوزك هيمشى شايل دوا القلب والضغط فى جيبه ليل نهار بصيت له شذرا انا بقى اشمعنى انا يعنى وقولت له انا انا دا انا نسمه بس نسمه فى امشير نيهاهاهاها

بجد بجد لازم منزعلش من حقيقه الناس اللى لسانها فالت كده انا مش مدب انا مبعرفش اقول غير الصح وغير اللى جوايا وفيه زى كتير اوى الناس اللى بتجامل وتذوق دى بيبان وفيه ناس بتتقبل الذواق والمجامله وفيه ناس لا فيه فرق بين اللباقه والكدب والنفاق انا يمكن عندى شويه لباقه بس مش هعرف اكدب ولا انافق مع انى ساعات اصلا بشك فى اللباقه دى لان كله مصمم على انى مدب وانا فعلا بدأت اقتنع انى مدب ومدب صناعى كمان انا عن نفسى مبزعلش من الصراحه او الكلمه اللى بتطلع من القلب مره واحد وبس ومع الاروفورا عليكم

كان معكم من امام مصلحه العباسيه للاحوال المدنيه ابى هانم كعب الغزال

حكمه الامبراطوره

بكره تتخنق يا كتكوت لما تموت

61 اخبط وقول رايك:

Foxology said...

الصراحة مفيش احسن منها ولكن برضه ميمنعش ان الواحد يحاول يقول الكلام بصراحة متوجعش ولا تجرح شعور اللى قدامنا :)

تحياتى :)

Appy said...

فوكس
=========
والله حاولت حاولت
انا مبقصدش اجرح هو لسانى فالت وبقول الكلام زى ما هو عارف فكرت اقف لمده ثوانى وارد حسيت انى مخنوقه قمت برضه قايله الكلام زى ما هو
المهم سيبك انت منور

راجى said...

بتعضى من المناخير ؟
متعرفيش فين بتتباع الخوذة اللى بيلبسوها بتوع الباسبول؟

adel said...

بصي الحق حق
والصدق صدق
والحقيقة حقيقة

وفي حد يعض من المناخير
ده انتي نفسك حلوة قوي

ههههههه

علي فكرة انتي كده مش غلط
كده كويس موززز
اصل المجاملة و التغطية مش كويسة

سبهللة said...

اهلا
تعالى يا حبيبتى انضمى لجمعية الل فى قلبى على لسانى
انا زيك كدة بالظبط ومش هاتغير ولا احب اتغير
لو زعلت من حد بيبان عليا فورا
لو بحب حد بيبان عليا برضه
ولما حد يسألنى اى سؤال
بجيب من الاخر واقول الحقية واقول اللى انا حاسة بيه
ودايما بسمع نفس الكلمة
الملافظ سعد يا ام احمد

Appy said...

راجى
========
ولو بعرف مش راح اقولك هع هع هع







عادل
=====
تفتكر هخف يا دكتور يعنى

Appy said...

سبهلله
=========
تعرفيش مين ام احمد دى يا اوختى الا انا زهقت من القصه دى اوى
وبعدين ليه الناس متتقبلش الحقيقه دى يعنى مش عارفه
ناس هم يا اوختى يبقوا ياخدوا لهم ساتر فى الكلام هعمل ايه يعنى

ليس فقيرا من يحب said...

ممكن برده يا حبيبتى تقولى الصراحه

بس باسلوب رقيق كده من غير

جرح للمشاعر

بس ايه حكايه عض المناخير دى

دى حاله متعثره ولازم لها دكتور هههههههه

تقبلى تحياتى

احمد سعيد said...

مش عارف ليه بتحطى الخبث والنفاق كبديل وحيد للصدق والصراحه ؟؟؟

ماهو يارحاب الدنيا مافيهاش ابيض واسود بس

فيه رمادى

والرمادى دة كتير قوى

يمكن اكتر بكتير من الابيض الصافى او الاسود الصافى

كون اننا بنحبه او بنكرهه فدا ميمنعش حقيقه انه موجود و بكثافه

دى حاجه

احمد سعيد said...

تانى حاجه

انتى ليه بتسمى الوضع دة صدق وصراحه ؟؟

الصدق والصراحه دول عاملين زى الدوا

ليهم معايير

انما لو زادوا عن حدودهم ممكن يتقلبوا سم

بمعنى
انا مثلا لو عندى مدير فى الشغل جاهل وغبى ومعتوة , ومعتقد انه عبقرى ومفيش منه اتنين والموظفين بياخدوة على قد عقله وبينافقوة , وجه فى يوم سالنى عن رايى فيه , لو قلتله انت راجل جاهل وغبى , فدى صراحه
ممكن البعض يسميها تهور

ممكن اقول نفس الكلمتين دول باسلوب تانى ودى هيبقى اسمها دبلوماسيه

انما مثلا لو عندك موظف زميلك زوقه فى اللبس وحش
وفى يوم وهو داخل قولتيله ايه البدله الزباله اللى انت لابسها دى ؟؟
دا كدة يبقى الموضوع اختلف
لان اللى يتعامل بالشكل دة يبقى انسان مدب
ودة يختلف تماما عن الانسان الصريح اللى قلته فى المثل الاول

شوفى بقى لو عندكم شحات مثلا فى الشارع
وانتى اصطادتيه وهو ماشى وقلتيله كتكوا القرف مليتو البلد , امشى غور فى داهيا تشيلك ولا روح شفلك صنعه كتك مصيبه
ولو مثلا خليتى واحدة جارتك معديه من جنبك وقولتيلها ايه القرف اللى انتى عاملاة فى شعرك دة , كتك نيله وانتى بيئه !!
دا كدة هيكون تخطى مرحله الانسان المدب
وهيخش فى المرحله التالته
اللى هى الانسان المتعالى

النموذج الاول صح , الا انه هيسبب للانسان مشاكل كتير فى حياته

النموزج التانى غلط , بس ممكن بعض الناس اللى مخها كبير تتفهمه وتشوف الجوهرة الكويسه اللى جواة وتتغاضى عن سلوكه المدباوى

اما بقى النوع التالت فدة مالوش حل ومحدش يستحمل يطيقه اساسا

انا بس حبيت افرق بين المسميات دى

_______________

احمد سعيد said...

الناس الاخرين هما مرايه الانسان اللى بيشوف فيهم نفسه

ممكن تكونى انتى مقتنعه باللى انتى بتعمليه ومش متصورة ان الاسلوب حاد قوى للدرجه دى ومستغربه من رد فعل اصحابك

بس عمر الانسان مبيقدر يحس او يشوف نفسه بشكل كامل

ولما الاخرين يجمعوا على شىء محدد فيه فغالبا بيكون صح , حتى ولو بنسبه كبيرة

هنا بقى تبقى المشكله

انتى بتحسبى كلامك على حسب نيتك وعلى على مدى تاثيرة على المتلقى ؟؟

لو حسب نيتك فانتى غلطانه لان الناس كلها مش مطالبه انها تفكر زيك ...

اينعم احنا مش مطالبين نغير نفسنا علشان خاطر حد او نتنازل لحد

بس مطالبين نغير نفسنا علشان نفسنا على الاقل

او علشان الناس اللى بنحبها

وزى ما احنا عاوزين غيرنا يراعينا فلازم احنا بالمقابل نراعى غيرنا

ولازم نحسب الكلام هيكون وقعه ايه على السامع , مش مجرد احنا قصدنا ايه لما قولناة



لازم نتغير ( للاحسن )طبعا

وعلى ما نقدر نتغير وننجح فى دة لازم اول خطوة نتعلم ازاى نبطل عصبيه ونؤمن انه مش عيب التراجع عن موقف ما اكتشفنا مؤخرا انه كان غلط

وبكدة هنقدر نمسك العصايه من النص لغايه ما ننجح فعلا فى التغيير الاحسن والكبير

واسف على الاطاله فى التعليق
بس الموضوع كان محتاج رغى كتير وانتى عارفانى
رغااااااااااااااااااااى

تحياتى ليكى

karim said...

انك تكونى صريحة دة شىء جميل و مطلوب لكن انك تكسفى حد وتحرجية دة شىء مش جميل ولا حتى دينيا دة من الاشياء اللى ممكن مش تكونى صريحة فيها علشان متكسفيش حد دة دينيا على فكرة, تحياتى

Appy said...

ليس فقيرا من يحب
===============
والله حاولت ابقى رقيقه معرفتش بس انا برضه بختار الفاظ مهذبه عادى يعنى
نورت يا فندم








احمد سعيد
===========
بديل الصدق النفاق والخبث والكدب
وانا مطلبتش من حد يفكر زى
وانا مبحبش اللون الرمادى
وانا زى ما مطلوب منى انى اتقبل الناس فتتقبلنى
مينفعش واحد بايظ فى حياته ومتنيل واوقله لا معلشا انت كويس بس شد حيلك
ده اسمه تضليل عن الحقيقه وده مليش فيه صراحه يعنى
ثم انا مبشتمش ولا بقول الفاظ جارحه انا بتكلم بطريقه مؤدبه
بس الصح صح والغلط غلط
على فكره انا مش قليله ذوق انا مدب
مش هتريق على حد انا فيه ناس كتير بشوف لبسها نيله ومعايا فى الشغل ومبقولش
او لما بوقله لو اتسالت يعنى بقولها ان لا ده شم لايق عليك مبقولش زباله والالفاظ دى
ولا هقول للزبال كده
مع انى ممكن اقولها فى سرى مش علشان هو زبال علشان ممكن يكون بيسيب شغله وبيشحت بس
على فكره اناعارفه انى مدب وصريحه
بس مش هتغير ولا هعرف ولا بعرف اجمل كلامى
بس فيه فرق بين انى مدب وبقول الحق
وبين انى قليله الذوق انامش قليله الذوق خالص
بس انا بوجع بالكلام سواء كان حلو او وحش

وارغى براحتك يا احمد خرج عفاريتك علينا ما هى نقصاك
تحياتك مقبوله
دومتى بالزيتون يا احمس افندى

Appy said...

كريم
=======
هو كلامى معناه احراج فين
ودينا قال ايه اذكر بس انت تقصد ايه اللهى يكرمك علشان مش فاهمه

بت خيخة وأي كلام said...

هذا التعليق للنشر
اكرر هذا التعليق للنشر


هل انتى مدب وصريحة؟
اه انتى مدب وصريحة


هل وحش انك مدب وصريحة؟
مش عارفة

لان ناس ممكن تحب ده فيكى وناس ممكن صراحتك فيهم تحرجهم فيزعلوا منك


يعنى مش وحش انك تكونى صريحة
بس خليكى صريحة ومدب بينك وبين الشخص اللى بتتكلمى معاه

يعنى مثلا ماتجيش وسط الناس وتقومى تقوليلى يا خيخة انتى كدابة

خدينى على جنب وقوليلى يا خيخة انتى كدابة

ماتحرجنيش قدام الناس
ماتخليش الناس تعرف حقيقتى الوسخة
وانى كدابة


وفى نفس الوقت بلاش صارحتك تكسر مجاديفي

يعنى بلاش تحبطينى برايك فى اى حاجة
من منطلق انك صريحة

خليكى براحة مع الناس

يعنى مثلا لو واحدة صاحبتك
عندها شعر فى دقنها
ماتجيش تقوليلها انتى عندك شعر فى دقنك

خديها معاكى عند الكوافير وقوليلها تعالى نظبط نفسنا



حاجة تانية بقى عايزة اقولك عليها


انا قريت تعليقك عند داليا قوس قزح على موضوع التسامح
كنتى كاتبة كلمتين لا ثالث لهما

مقدرش ومعرفش


متقدريش تسامحى ومتعرفيش تسامحى


يمكن ده مش موضوعنا دلوقتى

بس عايزة اقولك يا ابى انك لازم تتعلمى ازاى تسامحى
عارفة ليه؟
علشان اللى حواليكى المقربين منك
مايخافوش منك

لو غلطوا فى حقك ماتحسسهمش ان دى نهاية الكون

اديهم دايما امل انك هتسامحيهم

بلاش تعليقلهم حبل المشنقة

الانسان غصب عنه بيغلط

وممكن سوء تفاهم يحصل يخليكى تزعلى من حد وهو مش قاصد يجرحك

انا مش بقول ان كل الجروح تسامحى فيها
انتى اكيد ادرى منى بالجروح اللى تسامحى فيها وتعديها والجروح الى ماينفعش فيها تسامح

لكن لازم يكون عندك مرونة التسامح



ويمكن دى حاجة بتخلينى

لا استنى انا هاكمل باقى التعليق فى تعليق غير قابل للنشر

انشرى التعليق ده على بال ما ينشف اكون جهزت التعليق التانى

GeHaD-----(male) said...

يعني انتي معتقده ان الناس اللي هما مدبات زي حضرتك دي عيبه
لا طبعا انتي كدا بتقولي ميزه فيكي مش عيب
اول مره اشوف حد بيمدح في نفسه
علي فكره ليا واحد زميلي معروف بين زمايلنا انه مدب وبيحدف طوب بس كلنا بنحبه سبحان الله يعني
بس اكيد في مواقف مبينفعش يبقي فيها طمبوشه زي لو اول مقابله بينه وبين شخص يعني لازم يكون فيه لباقه وكياسه

انتي اكيد فاهمه يعني مش انتي من الكاهره وبتتريأي علي الزقازيق والقوميه يعني بتحدفي طوب اهوه
ولا انتي في اي حته بتحدفي كلام ماسخ؟؟؟

فتاه من الصعيد said...

انا بقا الناس الذوق بيقولوا عليا ذوق ..... والناس قليله الذوق بيقولوا عليا مدب

وده لأني بعامل الناس على حسب طبيعتهم ....... وتقبلهم لكلامي ..... وتقبلي ليهم

يعني لو حد بيحور في الكلام ويتذاكى .... بتغاظ منه وادب الكلام

لو حد ذوق معايا بكون حونينه عليه
فتكري ده نفاق :)

اصلي ساعات بحس نفسي كده

Hossam said...

heyyyyyyyyyyyyyyyyyyy
وحشتينى يا بنت الاية
موضوع جامد جدا وشكلى بعد كده اول مشوفك هخاف على منخيرى لروح من غيرها
وشحتينى اوى بجد وفعلا انتى وجهان لعملة وحدة يا مدب يا صريحة
هههههههههههههههههههه
وحشتينى بجد
تحياتى وانشالله تكونى بخير
رمضان كريم

هندسة وصفية said...

ربنا سبحانه و تعالي قال
و لو كنت فظا غليظ القلب لانفضوا من حولك
مقالشي
لو كنت كذاب لانفضوا من حولك

لاسع افندى said...

لو اللى فى قلبك على لسانك

كتر الف خير خلانك

ياللى تحب النفاق

ما اكتر الوانك

أحمـــــــــــــد أبو العلا said...

بعيدا عن المنخير الله يكرمك

الصدق بيوجع اللي مش صادق والحقيقه بتعور اللي مستخبي في الضلمه

بس أحيانا مقتضايات الحياه بتلزمنا اننا نزوق الحقيقه عشان اتعودنا على انها تكون صادمه

ماما أمولة said...

ازيك يا حبيبة قلبي عاملة ايه

اتكلمي زي ما انت عايزة ولايهمك

ههههههههههههههه

بس خلي بالك على نفسك

لاحسن تضربي

ومتعرفيش تعضي تاني يا روبي

سلام يا حبيبة ماما

Pink said...

اتفق مع احمد سعيد و ردك عليه يثبت انك تتمتعين بصفات اخري بجانب الصراحة و في طريقتين ممكن ان اصف هذه الصفات فعلي طريقة آبي العناد و المكابرة و علي طريقة الناس الاعتزاز بالرأي و التمسك بوجهة النظر.
اي طريقة منهم تفضلي ان الناس يقولوها لكي؟
اجابتك سوف تحدد ما سوف تأخذي به كأسلوب حياتك

و رأي الشخصي ان الصراحة صفة عظيمة و نادرة و لكن لا تبرر جرح مشاعر الآخرين حتي لو كنت صح 100 % و في الدين امثلة عديدة تؤكد هذا منها

عندما اراد سيدنا ابراهيم ان يدعو ابوه الكافر الي الايمان قال له
مريم (آية:43): يا ابت اني قد جاءني من العلم ما لم ياتك فاتبعني اهدك صراطا سويا
فابراهيم لم يرد ان يصدم اباه بالحقيقة الصادقة انه كافر و يجب عليه الايمان برب ابراهيم و لكن كان دبلوماسيا من غير نفاق في دعوته لابيه للايمان.

و في قصة سيدنا هود عندما اراد ان يضم زوجة اخيه الي زوجانه ال 99 فجائه اثنان يستفتيانه في مثل مجازي دون احراجه ففهم هود
ص (آية:23): ان هذا اخي له تسع وتسعون نعجه ولي نعجه واحده فقال اكفلنيها وعزني في الخطاب

و هناك العديد من الامثلة المشابهة و هناك ايضا التوجه النبوي بمخاطبة الناس علي قدر عقولهم و النهي عن ان تكون فظا غليظ القلب

تقولين انك لا تمانعي لو الناس عاملوكي بنفس الطريقة و انا اقول لكي لا توجد امرأة واحدة في العالم سوف تتحمل الصدق الكامل من زوجها في حياتهما و لولا الكثير من الكذب الابيض و المجاملة و الكثير من اللف و الدوران لتغليف النقد حتي لا يوجع رغم انه حقيقي لولا هذا و ذلك ما استمرت حياة زوجية يوما واحدا. فاذا كان هو الحال بين الزوجين المفروض انهما يتحملات بعضهما البعض فما بالك بالاصدقاء و زملاء العمل
و اؤكد ان الصدق صفة عظيمة لمن يمتلكها و في الحديث الشريف
إن الصدق يهدي إلى البر ، وإن البر يهدي إلى الجنة ، وإن الرجل ليصدق حتى يكون صديقا ، وإن الكذب يهدي إلى الفجور ، وإن الفجور يهدي إلى النار ، وإن الرجل ليكذب ، حتى يكتب عند الله كذابا .

جعلنا الله ممن يستمعون القول فيتبعون احسنه

قلم رصاص said...

الصراحة مفيش احسن منها

وده حتى على رأي الناشطة السياسية والحقوقية مروة هانم حين قالت :

الصراحة راحة وانت مبتعرفش

ههههههههههههههههه

لكن يا أبي الانسان الذكي اللي يعرف ميجرحش حد لمجرد انه عاوز يقوله الحقيقة او الصراحة

المسألة نسبية وبتختلف من شخص لأخر

فيه حد يقدر يتكم في اعهصابه ويقول الصراحة بطريقة لطيفة متزعلش الاخر وميطلعش من الموقف بعداوة جديد ان جاز التعبير هههههههههههههه

وفيه حد مبيقدرش يمسك لسانه وبالتالي
يعض في المناخيرات بتاعة البني أدمين زي ناس ههههههههههههههههههه

موضوع متميز كالعادة يا أبي

وفقك الله الى مايحب ويرضى

في حفظ الله

مي said...

ازيك يارحاب وازى خرفانك ؟
انتى يا حبيبتى صريحة بس مينفعش نقول صراحتنا اوىىى بحيث ممكن اللى قدامنا ياخدها بمعنى احراج يعنى نحاول نجمل الصراحة كده شوية
بصى احنا بنحبك سواء مدب او لا
تحياتى ليكى ياقمر

لقد خلقنا الله احرارا said...

عجبنى جدا جدا تعليق خيخة القابل للنشر طبعا
ومعلش هكررتانى كلامها اللى كان نفسى اقوله
قولى اللى نفسك فيه للى حواليك بس فعلا مش لازم يكون على الملاء ومن غير مايجيلى مثلا احباط
قولى وانت بتشجعينى وبتخططى معايامثلا احاول اتغير ازاى
انا عن نفسى احترم جدا الشخصية المدب دى حتى لو وجعتنى احيانا لكن بصدق كلامها واحاول افكر فيه لكن العقد اللى عندى بتوترنى جدا من الدبلوماسية وخصوصا لو موضوع انا عايزة اعرفه بدقة بحس ان البنى الدبلوماسى ده ناوى على موتى من كتر ما باكل فى نفسى من الكلام المايع

وعلى فكرة بفضل البنى ادم اللى يقولى انا كده حتى لو هخبط راسى فى الحيطة منه عن اللى مش عارفة امسك عليه كلمة

خليك مدب يابنتى بس مدب مش بيجرح اوى

بدراوى said...

الصراحة بتوجع
ممكن نقولها بشكل اكثر تهذيباً
انا قريت تعليقك على فوكس

انتى متقصديش تجرحى حد
بس برده الكلمة الطيبة صدقة
و الجرح صعب

انا كشخص لطبيعتى الحساسة
بحاول مجرحش اى حد
حتى لو ليا انطباعات معينة عليه
طالما المعاملة بينا فيها كل خير
و هو مأذانيش و لا انا اذيته
يبقى انطباعاتى ديه مالهاش لازمة
لاننا كلنا بشر و فينا عيوب
خلينا افضل نسمو بنفسنا عن العيوب
و منعاملش بعض بعدسة مكبرة و نتفحص الأخرين

الصراحة بتجرح اه اوووى
بس لو حتضر يبقى بلاش منها
و ديه بالنسبة للشخص العزيز عليا و اللى مش عايز اخسره

بس انا بحاول اكون مش مجامل على اد بكون بعامل الناس كويس
و ده برده لطبيعة شخصيتى شوية

وومن said...

شوفي يا بتنجاني قصدي يابرعي يووووووووووه يا آبي

العيب مش فيكي انتي صريحة ودي حاجة كلنا عارفينها
العيب في اللي بيسمعلك يعني المفروض يبقي متوقع منك اقصي الصراحة

يعني انا مش بزعل منك علشان دي طريقتك اصلا لو غيرتيها مش هاتبقي آبي اللي انا بحبها

انا اتعودت عليكي كدة والمفروض الناس برضة تعرف كدة
خد صاحبك علي عيبة :P

Pink said...

آسف المثل الثاني كان لسيدنا داود و ليس سيدنا هود. جل من لا يسهو

المعلم محمد صاحب المطعم - طعمية سخنة said...

بيتهيالي ان المفروض الواحد يحاسب علي كلامه !!! و يجامل ده
و يصالح ده و ينافق ده

درس لسه واخده من ساعة بالظبط ! الناس معاملات و خواطر

فكر في الكلام قبل ما تقوله

ما علينا افتكري ان الكلمة الطيبة صدقة

لورنس العرب said...

لالالالالالالالالالا

الصراحه حلوه بس فيه دبلوماسيه
بس هي مش بتنطبق على كل الناس
انا مثلا معايا واحد في الشغل بقوله في وشه "يا اخي ولله انت اغلس خلق الله" وهو عارف انه كده فعلا وبيقعد يضحك
اصله بسلامته يبقى المدير الاداري
وتخيلي بيهزر معايا ازاي؟ بييجي وانا على الكمبيوتر ويحط صباعه في وداني، او يمسك لبيسه القلم ويرميها عليا على اعتبار انه بيهرج
واحد زي كده مثلا انا لا اتردد على الاطلاق في اني اواجهه واقوله انت كذا وكذا

فيه ناس تانيه ماينفعش

صحيح هما يستاهلوا

بس بردو ماينفعش!

Appy said...

خوخه خيخاتى
=============
قعدت انشر فى تعليقك ربع ساعه مش نتعصريه يا بنتى قبل ما تبعتيه
المهم يا ست الستات انتى
انا عمرى ما هحرج حد واقوله انت كداب قدام حد ولا هقولها فى وشه بينى وبينه الا لما اكون جبت اخرى منه
انا برضه باخد بالى من الحاجات وعلى الرغم من كده بيتقالى انتى مدب اسكتى مش اخيرا اتقالى دا انتى دلوعه والله الناس دى هتجننى هماعاوزين ايه
بصى موضوع المجاديف
عمرى ما قصدت اكسرها لحد بس انا دايما بقول انى لما اكون شايفه واحد مثلا مستهتر ومفخد على كده فى حياته يبقى لازم اخبطه قله فى دماغه تفوقه
علشان يتحرك لان ده بيكون وصل لمرحله الطناش وتكبير الدماغ وتربيه حاجات وحشه يعنى بينى وبينك
فمينفعش ده تطبطبى عليه
لازم تفوقيه من وقت للتانى لان اكيد فيه غيرى بيطبطب يا خوخه وده لمصلحته
انا ممكن اشجع حد بس مش هنافقه يعنى
التعليقات التانيه
بقى انا بسامح بس فى حدود بس لو قفشت خلصت خلاص
مبزعلش لو قولتى عيب فيه بالعكس هناقشك وممكن اخد بالى واصلحه بالعكس انا كده
ومش بضايق لما اصحابى القريبين يقولوا ليه حاجه
انما ميجيش حد غريب ميعرفنيش يعنى ينتقد ساعتها بقى انتى عارفه المترليوس اللى هيتفتحت فى وش اهله
نورتى يا خوخه

Appy said...

جهاد
========
انا مبتريقش على حد لو انت مش قابل الهزار متدخلش تهزر
انا يابنى مشوفتش المكان ده غير مره كنت بشترى حاجه ومبقتش فاهمه ده ايه الا لا قالوا ليه دا اكبر شارع
اعتقد لو راجعت كلامك هتعرف مين اللى كلامه ماسخ وملوش لازمه
غير كده بقى متتعصبش اوى كده ده شارع لا طلع ولا نزل يعنى ولا هو يقرب لك حاجه
نورت









فتاه من الصعيد
=================
شوفتى الاحساس اللى بتحسيه ده هو نفس احساسى لما اقول عكس اللى جوايا
انا بقوله بطريقه كويسه بس لو قولته متذوق اوى بحس نفس الاحساس القاتل ده

Appy said...

حسام
=========
ايه النور ده يا حسام معلش بقى ما انت اللى مشغول نورت تانى







هندسه وصفيه
================
ليه فسرتها انى غليظ القلب انا ولا غليظه قلب ولا حاجه بس بحب اقول الحاجه زى ما هى جوايا
ولو غليظه القلب مش هيكون حوليه كل اصحابى دول

Appy said...

لاسع افندى
==========
ربنا يكرمك صح ربنا يبعدنا عن النفاق يا رب








احمد ابو العلا
================
بعيد عن المناخير ولو انى مضمنهاش
انا مش محتاجه اذوق انا بقول زى ما انا عارفه بس مش معنى كده انى بكون رخمه يعنى
هحاول اعدل الكلام شويه لو فشلت هعض اى حد بقى

Appy said...

ماما اموله
===============
اضرب يا خبر تفتكرى اصل انتى تانى حد يقول كده فعلا فعلا يعنى
لا تكلكى بنوتك بميه راجل
منوره الدنيا كلها يا حبيبة قلبى انا بجد









PINK
=========
بصراحه الطريقتين بيؤدوا نفس المعنى ومش مضايقنى يعنى
خالص مش فاهمه ليه اختار انا شايفهم زى بعض
ما دى مشكلتى بقى انى مبقفش عند حدود الكلمه نفسها انا بيوصلنى الغرض منها وبس
انما المترادفات مبتهمنيش يمكن ده اللى مسبب ليه ازمه مع بعض الناس
على فكره انا مبحبش اجرح حد
بس الفكره انى مينفعش اغش حد مينفعش حد يقولى انتى ممكن فى يوم تمشى ومتكلمنيش واقوله لا هفضل العمر اصحاب
مقدرش لانى لسه مش عارفاه مثلا او انا معرفش الظروف بس بيكون جوايا انه لا او اتمنى انه لا
يا رب تكون فهمت قصدى

اللف والدوران انا مبحبوش بيضايقنى بحس فيه بنقص اللى قدامى فمقدرش اعمله بقول زى ما انا
انا مؤمنه بوجع ساعه ولا كل ساعه
بالعكس انا بتحمل نقد كتير كمن ناس ومبزعلش
بس مش هتحمل نقد من شخص ميعرفنيش
هى المشكله فى الطرف الاخر ليه مبيتقبلش الكلام زى ما هو من غير لف ولا دوران
وعلى فكره المقصود ان انا مش قليله ذوق بس ساعات بتفلت منى كلمات بدون ما ادور على التذويق
ميرسى لرايك وتشريفك

Appy said...

قلم رصاص
=========
هى مروة بقت مناضله بقت الرفيقه مروة هههههههههههههههههههه
بجد موتنى من الضحك لانى قعدت شويه افكر هو يقصد مين
ربنا يكرمك ويبارك فيك







مى
========
ربنا يخليكى يا مى يا رب
ايوه كده دى الناس اللى تشجع

Appy said...

لقد خلقنا الله احرارا
==================
اقرى بقى ردى على خوخه وانتى تعرفى وجهه نظرى يا حبيبتى
عموما والله مبكونش قصدى اصلا اجرح حد خالص اكيد






بدراوى
===========
مفيش صراحه تضر يا بدراوى خالص اكيد لما بكون صريحه مع حد لو هى هتضايقه فى وقتها هتكون بعدها فى مصلحته وده شئ معروف ممكن توجع شويه بس بعدين لا هتفوقه وده علشان هو عزيز عليك

Appy said...

وومن
=========
حبيبتى القرعه
اهو شوفتى انتى بقولك يا قرعه ومبتزعليش مع انك مش قرعه ههههههههههههههههه

برعى ايه اسكتى مش بقيت مش برعى اللقب اتنشل منى يا اوختى ونفسى اعرف اللى نشله مين







المعلم
========
لاااااااااا انا مقدرش نفذ انت الدرس والباقى على ربنا انا افضل السكوت عن اللى انت بتقوله يا معلم بجد

Appy said...

لورانس
==========
لا المدير الادارى ده انت كده تقوله تعالى اوريك حاجه ومن الشباك وهوووووووب ترميه انا مقبلش ده غتت اوى يا معتز اقولك سمه وانا اجيب لك محامى

GeHaD-----(male) said...

سبتي الموزايه ومسكتي في القشره
هههههههه

Appy said...

جهاد
=========
امشى من هنا مخصماك واقولك انا هولع لك فى الشارع اللى مضايقك ده
انا افتكرتك زعلت اصلى وانت عارف انا بعتز بيك قد ايه

ويكا said...

على فكره
انا هحتفظ بحقى الحصرى فى آبى هانم كعب الغزال دى
ههههههههههه
عموما انتى ممكن تكونى مدب بس عثل ، عثل والله عثل

Me7'o said...

آبى
أنا قريت ردك على خيخة وموافقك فيه وموافق كمان على رأى هندسة وصفية

يعنى على حسب اللى قدامى وعلى حسب ما أنا فاهم أحاسيسه ومشاعره
يعنى لو واحد بعزه قوى هاحاول أتجمل شوية لو واحد بعزه خالص وهو مش واخد لباله من اللى بيعمله قلة فى الدماغ على طول علشان أفوقه
أما بقى لو واحد مش بطيقه فده علاجه عندى الطنااااااااااااش لإنى مش هاكون طايق أنصحه أصلاً

بس لو إنتى مدب
تبقى الأمور عندك وتفكيرك كده على التوالى

قلبك
لسانك
عقلك

وده ترتيب غلط الترتيب الصح هو

عقلك
قلبك
لسانك

بس تعرفى يا آبى إن التعامل مع الانسان المدب ده بيكوون مريح خالص لإنى هابقى عارف إن اللى فى قلبه على لسانه ومش هاقعد بقى أفكر وأقول هو يقصد إيه بكل كلمة يقولها

تحياتى

مـحـمـد مـفـيـد said...

جميل جداً أن الانسان يشوف جوانب التقصير في حياته ويعمل علي تلافيها

زهرة الكاميليا said...

هههههههههههههههه

كما أنت يا سيدة الفيكونات

آآآآآبى ..

كيف حالك حبيبتى؟

مش قادرة ابطل ضحك

هههههههههههههه


رائعة الوصف وكأنى أرى ما تقصينه صوراً ومشاهد متتابعة.


آآبى

جيت أقولك كل سنة وأنت طيبة بمناسبة رمضان .. أعاده الله عليك بالخير والسعادة.


كونى جميلة دوماً كـ أنت.

شوكولاتة said...

المشكلة ياآبي إن انتي مش قادرة تحددي إذا كان ده عيب ولاميزة فيكي أنا بعد ماعانيت من مشكلتك دي كتير عرفت إن الموضوع ده باطنه الحق والصواب وظاهره الجرح والألم فالحقيقية مثل النحلة تحمل في جوفها العسل وفي ذنبها الإبرة
أنا مرة كنت باخد كورس تنمية بشرية والمدرب بتاعي قالي انتي (Aggressive)واتفظت منه جدا لما قالي الكلمة دي بس بعد كده عرفت ان جميل أن يكون المرء صريحا ولكن الاجمل أن لايجرح أحدا بصراحته بس في النهاية احب اقولك انه لايصح الا الصحيح يعني اجمل شئ في الدنيا انك تبقي صريحة ومش عاوزاكي تحسي ان ده عيب في شخصيتك بالعكس انك تقولي الحقيقة وممكن تجرحي اللي قدامك احسن ماتنافقيه
تقبلي مروري

لا تـــشـــتــــاق said...

اولا الصراحه مش عيب ولا غلط ونصيحه خليكى كده صارحى الناس كلها بأى اخطاء تصدر منهم او اى شئ بس عندى ليكى نصيحه تكونى حنونه وقت العتاب او اللوم او النصيحه او حتى النهايه
استخدمى مفردات للالفاظ يعنى مش هقولك جملى الكلام لكن هتفرق ركتير مفردات الالفاظ اوك
وربنا يوفقك ياقمر
سلام

nor said...

حلوة ومميزة كعادتك
بس بلاش المناخير شوفي لك اي حته تاني لحسن العواقب وخيمه

Sherif said...

بعض من التجميل لابأس به

والا .. ليه بنحط ميك آب .. وبالاخص البنات الجميلة زيك؟ مع انهم جمال

شوية رتوش لاتفسد للود قضية

ساره said...

والله مافي احسن من الصراحه
وانا اللي يحبني لازم يكون صريح معاي عشان اعرف عيوبي
بس في نفس الوقت مهم جدا تعرف كيف تقول الصراحه هذي

انا مع صاحباتي واهلي مدب لاني بجد احسن اني امون عليهم لدرجه كبيره .. اقولهم الحقيقه بكل مافيها ومعظم الاحيان اكون مدب ودبش لاني مؤمنه اني مرايت الناس هذي .. ولازم اكون صادقه معاهم ... طبعا يزعلوا مني بس نرجع ونتصالح .. وطبعا في بعض الاصدقاء فقدتهم بسبب اني قلت الحقيقه .. بس عادي لاني احبهم واخاف عليهم .. وفي ناس منهم ما يكلموني لهم يجي 3 سنوات .. مش مهم مدام انا حاسه اني ما غلطت عليهم

لكن الناس اللي ماتعني لي شئ بصراحه
I don't care at all
ولا حتى افتكر اقولهم اي شئ من عيوبهم لانهم لا احد بالنسبه لي

وعلى فكره انا اتقبل الحقيقه والصراحه .. واحب دائما اسمع عيوبي عشان اقوم نفسي .. بس مش من اي حد .. لازم يكونوا ناس اثق فيهم واعرف انهم يحبوني

أحــوال الهـوي said...

انت في مشكله
ما تزعليش لاني هاتكلم بطريقتك
لان هناك فرق بين الصراحه و الاباحه
الموضوع ليس تذويق الحقيقه و لكن قول الحقيقة بصراحه و لكن بكلمات اخف مافيش داعي نجرح اللي قدمنا لتوصيل فكرةو اختيار الكلمات مش صاعبه لكن توصيل الفكرة بطرح منظم هي الصعبه
انا بنتي من نوعك الصريح اللي بتحدف طوب و ده عامل لها مشاكل

سامحيني لو كنت صريح ومدب

تحياتي

أحــوال الهـوي said...

رغم اعجابي بما تكتبين كنت مش متعود علي ردودك و ده عمل لخبطه في بدايه متابعتك

و انا مع شريف بك في كلماته الرصينه

و كملي صورتك الجميلة بالورود مش بالدبش

معكم الواءالجنايني

أحــوال الهـوي said...

بس تعرفي انت بنت جدعه

للي يفهم طريقتك

تحياتي

اعشق فى الليل ضوء القمر said...

السلام عليكم

اول مره امر من هنا وربنا يا ستير على مناخيرى
الصراحه شئ حلو و جميل
وكمان قولها بيكون متميز صاحبها
لكن كلمه عن كلمه تفرق
فيه كلمه تفلق الحجر وكلمه تنسفه لكن فيها زوق
بتكون اعمق واوضح
انا بحيكى على صراحتك

واتمنى اكون زيك وبمجرد معرف ايه المشكله خلاص اتحلت يبقى مفيش مشكله مدب تانى

Appy said...

ويكا
========
لا عيب عليك ده لقبى من بدرى اقرى البوستات القديمه





ميخا
======
بالعكس انا عقلى اللى بيدى اشارات سريعه تقولش صاروخ

Appy said...

محمد مفيد
============
ايون والاجمل اصحابه اللى بينبهوه ساعات بجد






كامى فوندامى
===============

وانتى طيبه يا قمر وبخير يا رب

Appy said...

شوكلاته
========

ربنا يكرمك يا رب يا قمر
بس قوليلى انتى شيكولا بلاك ولا وايت بقى لانك لو وايت خدى لكى جساتر لانى هاكلك





لا تشتاق
=========
انا لما ببعاتب حد بعتبه من جوه قلىب وانا قلبى حنين اكيد مش اسيا انا نورت

Appy said...

نور
========
لا مقدرش اعمل ايه هى دى اللى بتغرينى








شريف
=====
الميك اب بندارى بيه عيوب مش بنجمل الحلو حلو يا شريف ربانى

Appy said...

سارة
=======
هو ده قصدي انى ممكن اقول الحقيقه علشان انبهه الناس
يا رب تفضلى كده يا قمر انتى






احوال الهوا
===========
انا مبقولش كلام ابيح خالص فى حياتى بس بقول كلام بيوجع

Appy said...

احوال الهوا
============
ربنا يكرمك يا رب ويبارك فيك






اعشق فى الليل ضوء القمر
================
ايوه كل الى يدخل يسيب مناخيره على الباب نورت يا فندم