انت تسال وجيمى يجيب

غمض عنيك وانت بتبص على الصورة


تحديث:- انا بعت سؤال وكنت متاكده انه مش هيرد او هيرد فى ناحيه تانيه وبالفعل اللقاء متكرر نف سالكلام بتاع ابوه الخالق الناطق ونفس الكلام اللى عاوز مترجم من وراه يشرحه للناس البسيطه ونفس هطل بتوع الحزب فى انهم يدافعوا ويساندوا
بس الميزه ان فعلا كان بيتصدم بالاسئله وده اللى كنت عاوزاه انه يعرف ان الناس مش مغيبه ويعرف هيتعامل مع عقليات عامله ازاى
وده الغرض النهائى بالنسبه ليه لما قولت لكم ابعتوا اسألوا

الظاهر بعد ما الوزاء والقيادات لقوا الشوبا ب يزنقوهم كل فتره فى الاسئله وبيحرجوهم فى كل مكان ققرراوا يعملوا عمليه انتحاريه ويخلوا الشباب يسال مباشر بس عن طريق مواقع بدل يعنى يعنى ما تتعبوهم وتحرجوهم فى التليفزيونات
الموضوع ببساطه ان جيمى عامل اللينك ده علشان اللى عاوز يسال وهو هيجاوب
http://www.sharek.eg/

بصوا بقى خلينا نتكلم جد الموضوع انا قريته فى المصرى اليوم
احنا ليه لا منسألوش ونرتب اسئله كويسه
بمعنى منكونش هجوميين لان الناس دى لما تهجم عليها تقولك شعب متخلف ملوش فى الديمقراطيه ولا الحوار وبتكون دى حجتهم ودايما يقولوا غوغاء زى جمعاء كده اللى كان بيقولها اسمه ايه ده فى فيلم خلى بالك من زوزو
طيب طالما الحج مقدم السبت نروح احنا له الاحد
بمعنى هو عاوز يعمل حوار وعامل موقع ليه لا ننتناقش ونبعت له الاسئله
بس يا ريت نبعت اسئله هادفه ومحدش يسالنى ازاى انا مش عارفه اصلان اصلان يعنى
بس فرصه من غير ما نشتم ولا نتكلم كلام مش لطيف نزنقهم فى الكلام والمناقشات
ولو الموضوع مش جد اوى وهما هيطنشوا حاجات يبقى على الاقل قريوها وعرفوا ان الناس بقى عندها وعى اكتر وعارفه البلد اكتر
مش عايشين فى البالوظه
الخبر هنا فى المصرى اليوم بس لينك الفتيس توك مش شغال التانى ده هو اللى شغال
كليك هنا


كان معكم ملازم اول بحار قسم اذاعه حره واهداف ساميه جمال ابى هانم بتنجانى


حكمه الامبراطورة

قليل العقل يلاقى المطبلاتيه كتير

55 اخبط وقول رايك:

الطائر الحزين said...

هما هيجاوبوا على الاسئلة؟
ولا هو استقراء لمعرفة الشباب بيفكر فى ايه؟

لقد خلقنا الله احرارا said...

بصى ياستى
اولا حلفتك بربنا ياشيخة لما تتكلمى عن جيمى مش تجيبى صورته
ماهو حوالينا فى كل حته ولسنين كتير جاية
الالوحصلت فى الأمور أمور

ثانيا هو بصفته ايه هنتكلم معاه
هو صدق نفسه انه سياسى وامين سياسات والكلام ده
هو ناسى ان ده كله مجرد حظ
وانه لو كان طلع ابن الحاج شتا كان انتحر علشان مالوش مكان فى الخارجية لانه غير لائق اجتماعيا
زى ربنا يرحمه ويغفر له عبد الحميد شتا

ثالثا
الحركة دى معموله تلميع ليه مش اكتر
نساعده احنا ليه؟
مش مكفيه كل الورنيش الاعلامى اللى غرقان فيه هو لو عايز يصلح كان صلح لوجه الله ومن زمان

Leonardo said...

باختلف معاكى يا آبى
الأسئله مهما كانت جريئه أو محرجه هيترد عليها بإجابات عايمه ومالهاش لازمه
ده أساسا لو سمحوا لكل الأسئله
واحنا شفنا قبل كده سواء جمال أو نظيف أو غيرهم فى لقاءات كتيره بيتوهوا ويقولوا كلام عام وفارغ بعيد عن موضوع السؤال إذا كان السؤال محرج
فمابالك بقى إذا كانت الأسئله هتتبعت لبتوع جمال نفسه اللى منظمين اللقاء ده ؟؟

بيتهيألى إن أى مشاركه فى الحوار ده هتتوظف كدعايه وأرقام فى حملات جمال اللى جايه
وكل اللى هيتقال إن جمال حاور الشباب والمدونين عبر وسيطهم "الإنترنت" وتم حوار ديمقراطى شفاف يدل على وعى الشباب وسعة صدر جمال مبارك وقدرته على الإطلاع على مستجدات العصر واحتواء مشاكل وهموم الشباب !
هذا وقد شارك فى الحوار كذا ألف شاب بإرسال الأسئله التى أجاب عنها السيد جمال مبارك بمنتهى الحريه !

ده اللى هيحصل يا آبى فمن رأيى بلاش نبقى جزء من المسخره دى !

Appy said...

الطائر الحزين
==========
هيجاوب يا ايهاب ادخل اقرى اللينك







لقد خلقنا الله احرار
=================
اولا يعنى ماله كميله عين امه وبعدين قولت محدش يبص على الصورة بتبصى ليه ها قولى بقى
ثانيا بصى صا قمر
هو بقى امر واقع تقريبا ومفيش محاله
الفكره اللى فى بالى يعنى حتى لو هو بيلمع نفسه ليه مندلوش اسئله وحاجات تفهمه لى الاقل اننا ناس بنفكر وفاهمين الحباه وان كل اللى بيعملوه احنا فاهمينه
على فكره وعن ثقه الناس دى بجد فاهمه اننا اغبياء ولا بنفهم
فهمتى القصد انما هو يتلمع يتقمع مش مشكله هو دلوقتى فى السياسات يبقى ليه منستغش فرصه
فهمتينى يا قمر

Appy said...

Leonardo
============
انا مقولتش نبقى جزء من المسخره انتم ليه مش فاهمين قصدى انا بتكلم ان الناس دى لازم تفهم
اننا بنفكر وبنفهم هما واخدين فكره تانيه عننا
ثم انت هتدخل تسيب سؤال ولا هتقول انت مدون ولا حتى زعبوط العفريت
يعنى الموضوع مش فيه يكسب على حساب ولا غيره
ولا هيتقال مدونين ولا بتاع خالص ادخل الموقع الاول وشوف واعرف

هندسة وصفية said...
This comment has been removed by the author.
Abdou Basha said...

هيبقى لقاء ظريف.. أنا متأكد
:)
بس بعيدا عن ده
الأغنية اللي على البلوج جميييلة جدا
شكرا

لاسع افندى said...

وكمان ها



تحياتى اللاسعه

adel said...

احمد (مواطن مصري) كان حاطط الاكونت بتاعه علي الفتيس بؤ
هههههههه
بس مردتش اعمله ادد

هي حركة صايعة منه قوي
يعمل اكونت باسمه
طبعا اكيد مش هو اللي بيدخل بس علي الاقل المكتب بتاعه و مساعدينه
وكمان الموقع ده

اعتقد خطوة كويسة بس اللمهم الاسئلة اللي نسالها

محمد فوزي said...

انا شايف اننا نناقشه ونسأله
مش بإعتباره الرئيس القادم ولا حاجه
إنما بإعتباره أمين عام السياسات بالحزب الوطني ودي حقيقه واقعه
وبعدين ما هو احنا مش هنكدب يعني
جمال مبارك هو أقوى المرشحين للرئاسه ده إذا كان هيكون فيه مرشحين تاني أصلاً

واللي عاوز يشارك سياسياً او على الأقل يقول رأيه لازم يبقى حريص إن رأيه ده يوصل لمن ينتقدهم أو بيقول رأيه فيهم
واللي احنا عاوزين نتكلم طول الوقت في الهوا كده

بس تبقى اسئله منطقيه ومبنيه على معلومات ووقائع محدده ومش هجوميه زي ما قالت آبي عشان محدش يقدر يعيمها ويهرب منها واهي إن مجابتش رد مقنع فهي فعلاً هتعرفه هو أو غيره إن الناس بتفهم وبتحلل وتنتقد بعقل وممكن تخليهم يعملوا حسابهم فيما هو قادم

Founoon said...

مين دا ؟
يعني بصفته مين نسأله وهو جاوب

Appy said...

هندسه وصفيه
============
امين حزب الزفت الحاكم فى بلدك حضرتك يبقى لازم نواجهه الامر الواقع ومنتنكش سعادتك
اقعد باعافيه








عبدو باشا
==========
عجبنى فهمك للاغنيه يا فندم اعتقد فهمت الغرض مع البوست بتوسم فيك الخير دايما

Appy said...

لاسع افندى
==========
سلامتك من الها








عادل
=======
هى شم هتجيب اى نتيجه غير حاجه واحده بس انه يفهم اننا مش بالوظه زيه زى غيره لانه معتقد اننا اغبياء

Appy said...

فنون
=======
عاوز شعارات ولا كلام حق
بصفته رضيتى ام لا
هو رئيس حزب الساسات اقرى اصلا الغارض هو هيتكلم فى نقط معينه هو محدد على فكره
ثانيا بصفته اكبر حد حواليه جدل وباصص لاننا كمصرين او الشعب جهله ومتخلفين
يبقى ليه لا منفهموش اننا كويس
اه نسيت برضه رضينا ام ابينا وهو ده الواقع
ده الريس الجاى
بجد انا خلاص قبلت الامر الواكع وهتعامل معاه
مش هو عاوز يبقى كده قشطه يبقى استفيد فهمتى الفكره
هى مش نعره وخلاص اننا نقول هو مين وبصفته ايه
هو احنا عارفين مين هو كويس
زائد بقى يا ست البنات
انك مقرتيش اللينك وفهمتى هو عاوز يتكلم فى ايه
نورتى يا قمر










محمد فوزى
==========
هو مش هيتناقش بمعنى انك هتبعت سؤال وهو يجاوب الفكره اللى فى بالى اننا نفهم ان احنا بنفهم وعارفين البلد دى ماشيه ازاى مش كلام وبس
ومش شعارات زى ما هما واخدين عننا

Rannon said...

ما قلتلك احنا موكلينك تسألي وتتحبسي قصدي وتعبري عننا :))

وماله نسأله منسالوش ليه واحجنا يعني صغيرين :)

الأغنية جامدة :D

Appy said...

هندسه وصفيه
==============
ههههههههههههييييييييييييي
ايه الريحه الوحشه دى
اسف على ايه يا عم العن وانا مالى هى فوكيره ورديه فى دماغى يمكن تجيب نتيجه ما احنا بنخبط دماغنا فى الصخر




رنون
=======
انتى هنا وهناك تصدقى هقول ان انتى السبب وانتى المساعد بتاعى

لورنس العرب said...

هو بس سؤال واحد
بأي صفه يجمع سئله من الناس؟
يعني الاستاذ صنعته ايه عشان يعمل كده اصلا؟
وبما اني مقتنع تماما ان مفيش فائده من الحوار- فمن الصعب ان اوجه له اي سؤال لأن مفيش فايده

Che said...

ايه الموضوع .... كل ما اجى ابص على مدونه الاقى جيمى .. هو ده الموسم بتاعه و لسه طالع طازه فيه ولا ايه
المهم يا آبى انا فكرت لسؤال اسأله لجيمى بس لسوء الحظ مش هقدر اكتبه عشان انتى كاتبه بلاش الفاظ مش كويسه ... بس يالا .. ربنا عالم اللى فى القلوب

Founoon said...

قريت اللينك والله

بس انا من حيث المبدأ رافضة الفكرة
هو رئيس لجنة السياسات والانسب للقيام بموضوع يالا نشوف رأيي الشباب بس الموضوع مش بالبساطة دي
هو تهيئة الرأي العام للي جاي
وفرضه كأمر واقع لا بديل له
حتى لو فعليا لا بديل له
أنا مش قادرة اشارك في التمثيلية دي
مش قادرة
فوق طاقتي على التحمل فعلا

مي said...

ازيك يا ابى يارب تكونى بخير كل سنة وانتى طيبة يا قمر
مين اللى يجاوب؟ هههههههههه
ولا هما اللى هيجبوا بداله الحاشية يعنى
دى ناس شغلتهم الكلام بس بس ليه لاء نجرب لاخر نفس
تحياتى ليكى يا قمر

لا تـــشـــتــــاق said...

ازيك ياقمر
اوك احنا في المواجهه وهنسال وهيجاوبوا بس ابقي بقي شوفي الردود في اسئله مش هيتجاوب عليها اصلا وانا عارف عموما احنا بس هنثبت ان هما ضيعوا الدنيا وعاوزين ايه تانى
ربنا يستر

شوكولاتة said...

بصي ياآبي أنا متأكدة من إن اللينك ده اشتغالة من اشتغالات الحكومة وهتكون الإجابات زي إجابات أخينا في أسبوع شباب الجامعات بس أنا عن نفسي هادخل وأسال سؤال واقعي جدا علشان زي ماأنتي بتقولي يبطلو يعاملونا إننا مابنفهنش حاجة
كل سنة وأنتي طيبة
سلاااام

Leonardo said...

المشكله إنك بتتعاملى على أساس إن جمال وأبوه واللى معاهم يهمهم فعلا التواصل مع الشباب أو الحوار أو أى حاجه من كلام البروباجندا ده

لو الناس دول فاكريننا أغبياء زى مابتقولى , تفتكرى سؤال ذكى أو مواجهه حقيقيه ممكن تغير أى حاجه فيهم ؟
هيبطلوا يسرقونا ؟
هيحكمونا بالعدل ؟
هيشوفوا مصلحة شعب مصر مش مصلحة أمريكا واسرائيل ؟

يا آبى المعادله بسيطه
احنا أو هم !
وبالمناسبه
مبارك والشله اللى حواليه عارفين الشعب المصرى كويس وعارفين إنه شعب ذكى وفاهم , بس طيب وعاطفى
وحتى شوية المثقفين اللى ممكن يتلامضوا عارفين علاجهم كويس
بدليل إن جمال نفسه لو عايز يعمل حوار حقيقى مع أى فئه من فئات المجتمع هيعمله بعيد عن ترتيبات الأمن المعتاده
هينزل أى جامعه أو مصلحه أو سوق أو مؤسسه ويكلم الناس الحقيقيه
ومش هيعمل ده قدام كاميرات الصحافة أو التليفزيون

أما الحوار ده وباقى الحوارات فتلميع زى ماقال
لقد خلقنا الله أحرارا

فتاه من الصعيد said...

طبعا لازم الكل يشارك ...... علشان نعرفه البلد حالها ازاي ..... بدل ما يتحول اللقاء لمظاهره تأييد

المهم انا مستغربه انه هيجاوب على طول كده من غير استعداد ...... ده ما يعرفش يقول كلمتين على بعض

يمكن هيحطوله سماعه في ودانه ويغششوه الاجابات بالموبيل

مواطن مصري said...

مممم انا الي خانقني المزيع بتاع حالة حوار

بس شىء كويس ان يبقى في الرأي و الرأي لالاخر ان احنا نسمع صوت المعارضة و صوت الحكومة


بس عقبال ما يبقى فية مناظرة على الهواء برعاية كولا


دي نقطة

اما نقطة التوريث و الكلام دة

بصي

من حق اي مواطن مصري في مصري ابوة غفير او وزير انة يتقدم للترشيح في الانتخبات

يعني ببساطة اي حزب يعلن عن مرشحة و يرشح

الحكم فين هنا

الحكم هو اصوتنا و احنا الي بنحدد

مين يكسب و مين لا

بس انما فكرة ان جمال ميترشحش و الكلام دة انا ضد الفكر دة لان الاحزاب
كلها من حقها انها تختار واحد او تتفق على واحد

بس خلاص
تحياتي

Appy said...

لورانس العرب
===========
يا معتز بصفته ايه نقول تانى ده امر واااقع يا شوباب ولازم نستغل الفرصه بص اقرى رد فتاه من الصعيد هى برضه جابت الخلاصه






che
=========
شكلك هتحبسنا يا نصه ارحمنى يا ريس
عموما هو موسمه اليومين دول بس فاكهه بايظه

Appy said...

فنون
======
يبقى بندفن راسنا فى الرمل ومش عاوزين نواجهه اسمعى احنا مقدمناش غير ده دلوقتى اننا نعافر ونحاول هى محاوله مش اكتر على فكره مش هتخسرنا حاجه
وزى ما قالت فتاه من الصعيد
علشان الموضوع ميتحولش لمظاهره حب ووداعه حتى لو مجاوبش بس اسمنا سمممنا حياته
بس يا قمر






مى
=====
هنشوف مش هنخسر علشان يبطلوا يقولوا علينا مش عارفين نبقى معارضه نكتم نفسهم

Appy said...

لا تشتاق
========
يبقى حاولنا ايه المشكله مش هتخسرنا حاجه









شوكولاته
===========
هى دى الفوكيره ان ليه لا نتفرج زى ما بنعمل مناظرات مع الاجانب ايه المشكله نحرق دمه يعنى

Appy said...

Leonardo
========
لا على فكره هما بيقولوا علينا اغبياء ومش فاهمين وبهايم سورى فى اللفظ ومش ورانا حاجه غير المعارضه والاكل ومن غير اى هدف صدقنى دى وجهه نظر ناس كتير
ايه المشكله مثلا اننا نواجهه
هقولك حاجه تانيه
مثلا الزمالك بيلعب قدام الاهلى او اى فريق بيكون عارف انه هيطحن بس بيحاول مبيياس
ما هو لو هربنا مش هتتغير حاجه يمكن مره فى مره تتغير فهمت قصدى
بس

Appy said...

فتاه من الصعيد
==============
الله يفتح عليكى يا بنوته
ايوه علشان متتحولش لده لازم على الاقل لو هما قالوا العكس وان محدش عارض يبقى احنا عارفين ونواجههم انهم كدابين هى البلد هتتغير ازاى بس غير بكده
ممكن على فكره يغششوه يا قمر المهم انه يوصل له اننا مش هفا ولا اى كلام








مواطن مصرى
=============
المشكله يا عمرو ان الموضوع هيقلب بكوسه بجد ده اللى مضايقنى ما يترشح ولا يتنيل انما تتكوس لا فهمت

Foxology said...

لا حد هيجاوب ولا أى حاجة خصوصا بأة لو الأسئلة طلعت جد الجد ولقو ان الناس بتفهم وعندها وعى ومش عاجبها اللى بيحصل وهيبقى مجرد قارءة للعقول علشان ترتيب الخطوات القادمة مش أكتر :)

تحياتى على الموضوع المهم :)

Leonardo said...

أنا فاهمك والله يا آبى بس أان مختلف معاكى فى نقطه جوهرية

إنتى فى رأيك إن الناس دول ممكن التفاهم معاهم يجيب نتيجه أو يعمل تغيير ولو بسيط
فى رأيك إنهم لو لقوا ناس فاهمه بجد أو واعيه لحقوقها بجد ومحترمين بجد أسلوب حكمهم ومعاملتهم للشعب هيتغير

وفى رأيى أنا إن ده مش هيحصل
إن الأسلوب الوحيد لتغييرهم هو طردهم
عارفه كده بالظبط زى اسرائيل
مش فارقه عند الاسرائيليين إذا كان الفلسطينيين همج وللا حيوانات وللا مخلوقات ساميه
هيسرقوهم ويطردوهم من أرضهم ويقتلوهم
بس بيخلوا الموضوع ده بشكل مخادع شويه
ويدوا الفلسطينيين شوية حقوق
ويتحاوروا ويتناقشوا ويظهر فيهم من ينادى بتحكيم العقل ...إلخ
لكن الفعل واحد وثابت
وده نفس اللى بيحصل معانا
كلام فى كلام فى كلام والسرقة واحده وثابته

رأيى الشخصى إن التغيير فى مصر -سواء السياسات أو الأشخاص مش هييجى أبدا بالحوار
رأيى الشخصى إن مهما أوضحنا عدالة القضايا اللى بندافع عنها أو الظلم الواقع علينا ومهما كانت فصاحتنا فالنتيجة واحده لأن مش ده الأسلوب اللى يناسب عصابة مافيا زى اللى حاكمانا

وخلى بالك أنا مش باقول نبقى سلبيين أو نسكت بقى طالما مافيش فايده
أنا باقول نوجه مجهودنا لحاجه فيها فايدة
وجمال مبارك ومن وراه الحكومه كلها والحزب الوطنى كله دى ناحية ميتة
مجهودنا فيها ضايع

وطبعا ده رأيى أنا الشخصى وباحترم أى رأى مخالف وباحترم أى حد بيحاول يعمل حاجه بيعتقد إنها مفيده

Love-Guru said...

جاي علي نفسك ليه ؟
-----------------------------------
طبعا الاغنية دي ليس لها علاقة بموضوع اسئلة جيمي. صح؟
امال لها علاقة بايه؟ واضح انها رسالة الي شخص من الماضي بيحاول يوصل شئ ما انقطع و لكن بعد فوات الاوان. تكونش رد علي الانونيموس اللي بعتلك علي البلوج التاني؟
سيبك من جيمي و قوليلنا حكاية الاغنية
:D

أحمـــــــــــــد أبو العلا said...

آبي هانم
ازيك
يارب تكوني دايما بخير

الموضوع غريب شويه
وانا نفسي فعلا اننا نسأل بدون هجوم ولا غوغاء
بس انا اهوه واقف قدام المرايه وبسأل, تحب تسأل جمال ايه؟
معلش بأه أصل مرايتي لسانها طويل شويه ومش هعرف اقولك قالتلي ايه بس ببساطه سألتني سؤال, هسأل جمال؟ بصفته ايه؟

رئيس لجنة السياسات؟
طيب ايه السياسه اللي اتحطت ومسببتش لينا قهر وذل؟

بصفته الرئيس الوريث؟
طيب عمرك شفتي بضاعه بتسأل صاحبها ليه بتورثني؟

بصفته راجل عنده خبره؟
لمؤأخذه يعني خبره ايه في ايه؟ الراجل ده اصلا بتاع اقصاد وملوش اي علاقه بالسياسه وتاريخه انه اشتغل في بنك شغلانه اقتصاديه, يعني لما احب اسأله ليه سعر الجنيه وصل للحاله ديه؟ هيقولي السبب ولا هيقولي مانتوا اللي وصلتوه لكده؟ خبرته تسمح تجاوبني

صدقيني والله انا مش متشائم, بالعكس انا متفائل جدا بس الفكره ان مش ده اللي المفروض يجاوب على أسئلتي

السؤال الوحيد اللي ممكن يجاوبني عليه اني اسأله
اخبار خديجه ايه؟

سومه...مجنونه فى بلد عاقل said...

ههههههههههههه السؤال لغير الله مزله يا بنتى صلى ع النبى هى ديتها سنه وجيمى يبقى رئيسك ورئيسى بعدين مش حنجرا نقول جيمى تانى
اما اروح اشوف اللينك اوعى يطلع مقلب:)))))))

ابو على said...

الموقع دا توفيرا لجهدامن الدوله وظباطها ف تحديد مكانك بالظبط
دا لما تعلقى ف موقعهم طبعا
وتشتميهم او حتى توجهيلهم اساءه تلاقى هوب نفسك كلابوش
هو اصلا فيه ديموقراطيه وفساد سياسى واخلاقى ودينى منتشر وواضح اوى والشباب اصلا هاتتناقش ف ايه
الناس زهقت من كتر الكلام البلد محتاجه ولد
سلام يا ولا

جبهة التهييس الشعبية said...

انا جيت اقرا البوست (انت عارفة معزته ماء ماء عندي) بس الورد زغلل لي عينيا ما عرفتش اقرا البوست
ممكن تعملي خلفية البوست اي حاجة تانية؟

يــوم جــديد said...

أنا هسأله على موضوع الاستخدام العادل للانترنت
شايف ايه تأثير على الناس والشركات

تفتكري السؤال دا ممكن يضايقه ولا حاجة ؟

مواطن مصري said...

طب ما نجرب و نروح نسألهم

من غير غوغاء و هجوم؟

مسدس صغير said...

والله فكرة جميلة جدا
ياريت كلنا نشارك بس بتعقل وبموضوعية وكلنا يدخل يسأل بكل ادب عن مشاكل حقيقية
نتمنى تفعيل الموضوع ده فعلا ويرد فعلا على الناس هتبقى حاجة جميلة
احييكى على البوست يا سباقة

الشعب لابد له من حكومه تشكمه said...

ياخلاااثى هو بعينه بشوفه كتييير بعدى عليه وانا راحه بيتنا منور فى صوره المنتخب:)
انا هسأله بس هو بيعمل ايه فى صوره المنتخب مش اكتر ولا اقل..
بس على فكره هو داخل على الفيس بوك وهيعمل حلقه نقاشيه:)) اى والنعمه شفتى الحلاوه اومال دحنا حكومه اليكترونيه

A.SAMIR said...

من ساعة ما الخبر دة ظهر ع النت
و الكمبيوتر مش مصدق نفسه
لدرجة انه هنج

Hossam said...

صديقتى الجميلة
انا سمعت عن المووضع فى الفيس بوك بس صراحة فكرتة اشاعة بس واضح انه بجد
اعتقد انها خطروة كويسة بيقرب بيها من الناس
اتمنى تكون خطروة مؤثرة
تحياتى
رمضان كريم

قلم رصاص said...

والله كويس انه فكر في انه فيه شباب

وعواز يعمنل معاهم حوار

دي خطوة كويسة اوي انه عارف انهم

موجودين واللي دايما بيدعوا انه ممثل لهم

او من جيلهم

انا بأيد الخطوة دي

واما نشوف

شكرا ابي على البوست

micheal said...

أنا مخاصمه ومش عاوز اسأله
بس أنا عجبني تفكيرك وشايفه إيجابي بس توقعاتي أن الموضوع حيحصل فيه فبركة كبييرة
تحياتي يا برنسيسة

ـ-ـ- أحمد عبد العدل-ـ-ـ said...

والله أنا شايف ( بصفتى منتمى للغوغاء جمعاء) اننا المفروض نقاطع الناس دى و نبطل تمثيل بقى ، كل شوية يطلعوا بتمثيلية ديمقراطية جديدة والموضوع فعلا بقى ممل
بغض النظر عن كونه هيبقى الريس من عدمه (وإن كنت أعتقد عدمه ) أنا شايف انهم ناس حاكمين بالتزوير اللى الكل شاهد عليه يبقى ليه نديهم الشرعية دى .
تحياتى
وكل سنة وحضرتك طيبة

مهندس حر said...

لو الحكاية هى إننا نعرفه إن فيه ناس فقساه و فاهماه .. فمفيش داعى تتعبى نفسك لأن البعيد عارف .. و عارف برضه إنهم قلة (بالكسرة أو الضمة) مندسة فى وسط غالبية من الناس اللى دادى بقاله 30 سنة بيرزع فى نافوخهم شواكيش لما مبقتش تنفع فى أى حاجة..

لكن طبعا اللى ليه شوق أو نفسه حلوة و عايز يشارك فدى حرية شخصية و الأمر لا هاينفع و لا هيضر بالمناسبة .. يعنى حجم الزفة مقرر سلفا و الكلمتين اللى هينزلوا فى الجرايد وصلوا و متحضرين للطباعة.. و تقدروا كده تعتبروا اللقاء تم و نتائجه المبهرة اللى تزغلل حصلت وآخر أليصطة الدانص..

أنا شكلى طولت .. قصره ماتعملوش حسابى فى الساندوتشات فى الطلعة دى لأنى بنام وخرى و أصحى متأخر ..

بدراوى said...

انا ممتنع عن التعليق على هذا البوست
عشان حابب اقول كلمة من ثلاث حروف اول حرف زى اخر حرف

اصل لسة شايف الخبر ده
ربنا يعينك و تقريه بهدوء

http://www.youm7.com/News.asp?NewsID=126532&SecID=89&IssueID=0

GeHaD-----(male) said...

بغض النظر عن الاعيب جيمي

الخلفيه مليانه ورد وانا مشغل عندي الفيرفوكس فياريت تغيري شكل المدونه بالكامل

GeHaD-----(male) said...

كدا اجمل

بت خيخة وأي كلام said...

يا نهارك ابيض مقلم في فوشيا

ايه يا بتنجانة اللى انتي هببتيه ده

ازاى يا بت تعملى عملة سودا ومهببة كدة؟
!!!!!!!!!!!!!!!!

ازاى يا بت تعيدى صياغة اسمى وتخليه خيخة خوخة من غير ام لسان طويل

انا عايزة ام لسان طويل ترجع تانى
انا قعدت ادور على ام لسان طويل مالقتهاش افتكرتك حذفتينى من القائمة
مخدتش بالى غير بعد ماقعدت ابص فى الاسامى تانى

انا كنت معلمة نفسى بام لسان طويل


انا عايزة ام لسان طويل ترجعلى تانى

عاااااااااااااااااااااا

يا مراكبي said...

نزلي بوست كده قولي فيه ايه الأسئلة اللي في بالك ونفسك تسأليها .. وساعتها الناس تتطوع وترد بالنيابة عن جيمي (في التعليقات) ونشوف اذا كان فعلا الناس هارشاه كويس والا لأ .. وعارفين ردوده هتكون ازاي والا لأ

ســـــاره said...

داخله بس عشان اقولك
القالب تحفه اوووووي
بجد يا آبي ماتغيرهوش
مبروك عليكي حبيبتي :)

ســـــاره said...

صحيح المعذرة :)

كل عام وانتي بخير يارب :)

بت خيخة وأي كلام said...

خيخة خوخة ام لسان سحلية وطويل

نيهاهاهاهاهاهاهاهاهاهاهاهاهاهاع

وش واحدة بتضحك وبتكركر
و وقعت على قفاها من كتر الضحك


امشى يا بت من هنا
ربنا يحظك يارب ويكتبلك الفرحة
زى ما ضحكتينى