الميه قطعت


يومين والميه مقطوعه فى القاهره الجديده
مش فاهمه باى منطق مكان جديد وكل معداته جديده وكل حاجه فيه مستواها حلو تتقطع فيها الميه
محافظ حلوان من ساعه ما مسك والدنيا متنيله
علشان البوست القديم اللى كتبته عنه انه بيتنك وبكره نشوف بشايره هلت علينا
ميه تقطع مشاكل فى موضوع الخنازير من قبل كده
بلطجه وزفت يعنى هيبوظ المحافظه
مع انه المفروض التجمع كله والمعادى هى التورتايه بتاعت المكان هو ليه مش بيحافظ عليهم
بس شهاده لله يعنى الجهاز فى التجمع مش مقصر اى والله
فيه عربيتين زى بتوع الرش ماشيين فى كل مكان بيملوا للناس ميه

حظ اختكم بقى اللى هى سيادتى ان الحنفيه بتاعت الجنينه الخاصه بالعماره بتاعتنا
اصل كل عماره لها حنفيه للجنينه بتاعتها حظى اننا العماره الوحيده فى الشباب والمستقبل كله
ويمكن التجمع كله اللى حنفيتها فيها ميه ضعيفه بس ماشيه
انا عاوزه اعرف باقى الناس بتعمل ايه بجد اللى عندهم اطفال الرحاب كمان مفيهاش ميه
هو المحافظ ده بيعمل ايه
وماسورة ايه اللى بينيلوها على ينهم بقالهم يومين
طبعا الكومبوند بيدخله ميه على طول فى عربيات ده انا شوفته بصراحه
بس ده مش اسلوب كويس احنا مش منظقه عشوائيه ولا قرى فى محافظات
انا برضه عاوزه اعرف المحافظ ده وشه وحش علينا ليه
يالا ما علينا انا قررت انزل اقعد فى الجنينه واستغل الناس الجركن بربع جنيه اه الناس عندنا شيك بتشيل جراكن جديده وزجاج ميه مش اطباق وحركات كده اى والله ويتنكوا وهما شايلين الميه شكلهم مسخره نازلين من العربيات كل واحد بجركنه فى ايده

ادعوا لنا الميه تيجى ويخرب بيت المحافظ الفقر اللى وشه زى قفاه ده والنبى


كان معكم ابى هانم بتنجانى من امام حنفيه الميه
جنينه عمارتهم



حكمه الامبراطورة

لما يزعق غراب فى جنينه متستنوش منه انه يعمرها

51 اخبط وقول رايك:

micheal said...

يعني في القرن ال21 ولسه بنقول علي مشاكل المياه
مش عارف أقولك ربنا يصبرنا ولا أقولهم أهي المياه تروح أحسن ما نشربها ويجيلنا تيفود
:(

لاسع افندى said...

غالبا الميه والنور بيتقطعوا فى اوقات غبيه ....مع ان الاحتياج ليهم طول اليوم وطول السنه بس دايما القطع بيبقى بدون تخطيط


يارب الميه تيجى

فشكووول said...

ازيك يا بتاعة البتنجان

اصل المواضيع كلها بتنجان

يعنى فجأه نلاقى محافظه اسمها حلوان من غير اى بنيه اساسيه لمحافظه او ادارات او اى حاجه عشان كدا المحافظ لسه بيجهز الاطقم اللى تساعده لانه مسك محافظه من غير اى تجهيزات وكل التجهيزات فى محافظة القاهره وحتى يتم نقل الاطقم من محافظة القاهره او تجهيز اطقم جديده من محافظة حلوان تكونوا انتم تاخدوها كعابى وتجيبوا مياه من النيل مباشره بالزلع والقلل والجراكن

بلد بتنجان صحيح

تحياتى

فتاه من الصعيد said...

يا رب الميه تيجي يااااااااااااااااااا رب

على فكره انا لسه كاتبه عن محافظ المنيا في بوست فات ...... وكل اللي علق اشتكى من عمايل المحافظ بتاع بلده

يعني واضح أن أختيار المحافظين بيخضع لمقاييس جهنميه ...... بس يظهر المقاسات ضيقه علينا نحن الشعب

ربنا معاكم والميه تيجي بقا

هندسة وصفية said...

طيب انا هدعي ان ربنا يخرب بيته
بس المية تيجي لاء
هو كدة غباوة

Me7'o said...

وهنا نتذكر أغنية خالد الذكر الريس متقال الكبير قوووووووووووى

يا حلوة يا شايلة البلاص صبيلى منه واسقينى

وتحياتى

الجواز و سنينه said...

ضحكتينى جدا يا ابى
و الله يا بنتى انا الميه قطعت عندى يوم واحد كنت هاطق
و تقريبا قضيته كله بره البيت
مش عارفه ايه حكايه الميه
اظاهر انها ظاهره عامه
بس سيبك انتى انا هاجى اقعد جنبك تحت العماره
و لازم نستغل الازمه بضمير
يعنى كبايه الميه ب 50 قرش
و لو مش معاه فكه ياخد بالباقى لبان

adel said...

ههههههههههه
ربنا معاكي
ان اشاسا صعب الماية تنقطع اليومين دول
انا بستحما كل ساعة من كتر الرطوبة
ربنا معاكي في ازمتك
و يفك حبسك
قصدي يفك كربك

وبعدين ادي اخرة اللي يمشي ورا حلوان

قوس قزح said...

هههههههههههههههههههههههههههههههههههههههههههههههههههههههههههههههههههههههههههههههههههههههههه

يا مجرررررمة
الصورة دى اكيد انا و انتى
من ساعة ما شوفتها و انا بضحك

الغريب ان النادى فيه ميه متعرفيش منين
المهم انا برمى الولاد فى البيسين يستحموا
و بشترى ميه و اكل جاهز
بس بفكر فى الناس اللى بتتقطع عنهم الميه بالايام و ماديا مقدروش يشتروا ميه ..زى ما حصل كده فى منشية ناصر من مدة و الناس كانت هتموت
على راى حد بيقول
مصر هبة النيل عطشاااانة

لا تـــشـــتــــاق said...

والله انا مش عارف اقولك ايه بس عندك حق والله ربنا يستر عليكو في الايام الجايه
وانا هتطوع واحاول اغيرلكو المحافظ ده
هههههههههههههههههههه
تقبلي مروري

همس الاحباب said...

ده موضوع المياه ده بقى موضة فى كل مكان
عندنا فى الجيزة والهرم يوميا بتقطع بالساعات
بس سيبك انتى منظرك تحفة وانتى واقفة على الحنفية ويا سلام لو معاكى بلاص
تبقى روعة المنظر
ههههههههههههه
تحياتى

ويكا said...

ههههههههههههه

بدراوى said...

شىء جميل
فلتحيا البنية التحتية
اتفوووووه

معلش اصلى مخنوق من البلد
اتفوووو ديه موجهة للسيد المحافظ
و اللى مشغلينه

ماما أمولة said...

عملت معانة نفس العملة المنيلة دي واقطعت 3 ايام متواصلة في عز الحر
وربنا مايوريكي طعم المية اللي في الحنفيات اللي في المناور ولا الجوامع

منهم لله يابنتي

وحشاني يا حبيبة قلبي

ـ-ـ- أحمد عبد العدل-ـ-ـ said...

heya elqahera elgededa ba2at tab3a le7elwan? tayeb 3ain shams eh akhbarha delwa2ty? tameneny allah yekremek ?
:))) welcome 2 egypt anywhere.

micheal said...

أنا أول كومنت..ثانية واحدة بقي
هييييييييييييييييييييييييييييييييييييييه

Love-Guru said...

طبعا المحافظ مسئول و كذلك رئيس مرفق المياه و لكن ماذا عن مسئولية الافراد؟
في ايام الحر يتطوع اي صاحب محل او قهوة او ورشة يتطوع برش الشارع كله و كمان سقاية الاشجار بل و غسل ورق الشجر يوميا من مياه الشرب المحرم قانونا استخدامها في غير اغراض الشرب.

و لان الحياة اصبحت صعبة و ماهية البوابين لا تكفي بدأ الكثير منهم في مهنة اضافية و هي غسل سيارات السكان يوميا مقابل اجر شهري من كل صاحب سيارة و طبعا مياه الشرب هي المستخدمة

اما عن سوء الاستخدام المنزلي لمياه الشرب فحدث و لا حرج.

دائما ما نلوم الحكومة و المسئولين بينما الافراد جزء من المشكلة و ربما اذا اصلحنا من سلوكياتنا امكننا ايصال مياه الشرب الي المناطق العشوائية و ضمان تدفقها الي باقي المناطق. اما حكاية التمييز الطبقي بين الاحياء فهدا حي راق لا يصح ان تنقطع عنه المياه و ذلك حي نصف كم تنقطع عنه المياه بالاسبوع و اكثر فهذا ما لم اره في اي بلد آخر غير مصر

assafo anaroze said...

مساء السعاده
ده انتو حظكو كويس ده احنا تقريبا كل يومين او ثلاثة تلاقي المية مقطوعة
لا انت حقيقة بترفسي النعمة و مش بتعرفي ادي ايه المحافظ بتاعكم احسن من غيره
هههههههههه
ربنا يرجع لكم الميه و ياخد عنكم المحافظ قادر يا كريم
مودتي

مي said...

ازيييييك يا ابى بتنجانى
وحشانى جدا
بتتتاخرى علينا ليه؟
يارب تجيلكوا الميه يا ابى ده المحافظ ده غلس يعنى الجو حر والواحد مش طايق نفسه كمان الميه تنقطع!معلش يا بنتى
متتاخريش تانى بقى
وطمنينا لو الماية جت
تحياتى ليكى ياقمر

مواطن مصري said...

انا اقولك على حل حلو حلينا بخصوص مسئلة المية اساسا المية بتاعت المدن الجديدة غير صالحة ل الاستعمال الادمي بتفى معمولة لرش الجناين و البسينات و كدة


لذالك حلينا الموضوع بخزان مياة


ركبي خزان مية بدل المية الحكومية

أحمد الحيدر said...

عندكم النيل ما شاء الله وتنقطع الميا .. معقولة ؟

دنتو بأيتو زينا .. فلوس الدولة عندنا تغطي الكرة الأرضية ما شاء الله وبانيين مليون محطة مية وكهربا في دول العالم الفقيرة وعندنا أزمة كهربا !


والله إحنا الدول العربية حكوماتنا بتستهبل :)

تحياتي ..

dr.lecter said...

اقطعوا عني اي حاجه

ماعدا التكييف والميه

ماقدرش اقعد في مكان مافيهوش هوا بارد او مياه ممكن اتحول ويبان وشي الوحش

GeHaD-----(male) said...

هعهعهعهعهعهعهعهع

دا احنا عندنا في الزقازيق الميه عمرها ما قطعت

بس بجد انا فرحان فيكوا انكوا بتتطلعوا تملو الجراكن وراح عربيه الميه
انتي عارفه عربيه الميه دي شبه عربيه حاجه تانيه بتمشي قبل ما الناس تدخل المجاري

ههعهعهعهعهع

Appy said...

ميشو
==========

ليه تروح فين وبعيدن تيفود ده علشان ميه الشرب انا بخد شاور بس منقدرش نعيش من غير بدل دى ودى قول ربناي اخدهم هما الاغبياء









لاسع افندى
=============
الغريبه ان المفروض ده ميحصلش فى بلد السد العالى

Appy said...

فشكول
========
والله يا عمى انا معنديش مشكله اجيب بالزلعه بس على شرط يعملوها بينك وبنيه تحتيه اي ولمين محافظ حلوان ده طلع حد قريب حد فبيجاملوه على قفانا وخلاص







فتاه من الصعيد
==============
ايوة واضح انهم مجهزين لشعب غيرنا مش احنا بجد اكيد هما افضل واحنا مش شايفين مبنقدرش النعمه ابدا

Appy said...

هندسه وصفيه
==============
هع هع جت بالعند فيك بقى اقعد بغيظك







ميخو
========
دا احنا عندنا الناس اللى كانت بتملى الميه هكونا الاطه على الاخر ههههههههههه مينفعش معاهم الاغنيه دى خالص انا نفسى متاكلش معايا مع انها جامده

Appy said...

الجواز وسنينه
==============
تصدقى انك حد وحش تستغل المواطن اخوكى لاااااااا حرام عليكى
على فكره انتى خايبه انا قولت هتقولى جنيه تقولى خمسين قرش خايبه انتى انا عارفه








عادل
=========
انا مش مشيت وراها هى اللى انا صحيت الصبح لقيت نفسى فيها مع انى كنت نايمه بالليل فى القاهرة

Appy said...

قوس قزح
==========
انتى قفشتينى مرضتش اكتب تحتها انا وقوس قزح علشان البرستيج بس هههههههههههههه

النادى فيه ميه هتلاقى له خزانات لوحده بس عارفه ساعات بحس الناس التانيه اخدت على كده خلاص
المشكله عندنا ان كل اللى بيملى ميه او الاغلبيه العيال الصغننه وليه بقى علشان يلعبوا فى الميه وهما بيملوا قرود






لا تشتاق
===========
يبقى كتر خيرك بجد دى جميله نشلها لك العمر كله بجد تقدر غيره وانا امسكك بداله

Appy said...

همس الاحباب
===========
عندى قله صغننه بملاها ايه رايك تنفع ولا اخبطك بيها








بدراوى
==========
بنيه تحتيه ايوه لهلكه الشعب لما نبقى بلد النيل والسد العالى ويحصل ده يبقى اسفوخس مش اتفو

Appy said...

ماما اموله
==========
ايون عرفت يا عينى صحيح عندكم بس الغريبه ان عندنا ماسورة يعنى مفيش امكانيات تتصلح بسرعه حاجه قرف على دماغهم بجد
وانتى كمان وحشانى يا ست الكل وانا عارفه انى مقصرة معاكى






احمد عبد العدل
================
اعتقد عين شمس بقت دلوقتى تبع اسيوط هتأكد لك ههههههههههههه

Appy said...

Love-Guru
===============
يا استاذى اولا اغلبيه الناس من ساعه موضوع الغرامه علشان الميه اللى بتستخدم فى الرش والكلام ده كله مبقاش يعمل ده
البوابين بيغسلوا العربيات بجردل ميه وده فى اى مكان هتشوفه فعلا
موضوع رش الجناين الجهاز اللى عامل حنفيه برشاش لكل جنينه
ومش هنكر ان فيه استخدام غلط بس قل عن الاول
المشكله فى عدد السكان
وتخاذل الحكومه فى انها تظبط مواسير وانها تهلب وتدى مقاولات لناس مينفعوش ومعندهمش ضمير
ده الموضوع ببساطه جدا










assafo anaroze
==============
لو النعمه شبه المحافظ بتاعنا يبقى هرفسها واديها بالشالوت مش عاوزاها

Appy said...

مى
=
شغل يا مى كتيررررررررررر اختك مزنوقه معلش والحمد لله الميه جت














مواطن مصرى
===========
منين جبت المعلومه دى احنا عندنا محطه ميه تجنن والميه طعمها تحفه اصلا
مفيش القصه دى خالص
هى المشكله فى ان ماسورة تتكسر ويقعدوا يتلكعوا فى تصليحا وبس
وكل يوم والتانى يحفروا ويعملوا نفس العمله علشان مفيش مخطط ولا مهندس واقف

Appy said...

احمد الحيدر
=============
اهلا اهلا نورت يا نفدم
لا والغريبه احنا بلد السد العالى مش النيل وبس
هى حكوماتنا ما شاء الله عندهم ذكاء فزيع بس الحمد لله اهى الميه جت









dr.lecter
=============
اه اه انت بتقول فيها انا بفرفر موت من الاتنين دول ربنا يدمها نعمه بجد بس زمان مكنش الجو كده كان الواحد بيستغنى عنهم عادى

Appy said...

جهاد
========
امشى يا كداب يا فشار انت
دول اصحابى فى الزقازيق بيقولوا الميه بتقطع على ططول وخاصه القرى
طيب يا جهاد لو قفشتك تحت ايدى هعملك تمثال واحطك عند المديريه عندكم او فى الشارع الصغنن اللى انتم بتقعدوا تلفوا فيه كده وفاكرين نفسكوا فى جامعه الدوله
:PPPP

واحدة مفروسة said...

هههههههههههههههه
اموت و اعرف بيجيبي الحكم ديه منين يا بتنجاني
ان شاء الله المية تيجي
و تشربي و تستحمي
ماهو مش معقول حتستحمى بحنفية الجنينة
هههههههههههههههههههههههههههههه

لورنس العرب said...

الحقيقه المياه مش بتنقطع عندنا في المعادي إلا نادرا بس ده عشان المكان قديم
لكن لي صديق ساكن في مساكن - اميريكان بيتشو- المياه مقطوعه باستمرار، وجركن المياه بيتباع ب 10 جنيه
ومن النوادر اللي ممكن تشوفيها
فيه شارع في منطقه فايده كامل- عارفه فضلوا يصلحوا فيها المجاري اد ايه؟؟؟
انا كنت في الاعداديه سنة 93
واتخرجت من الجامعه سنة 2000
ومشروع اصلاح المجاري انتهى عام 2002
يعني تقريبا 10 سنين بيصلحوا هناك في المجاري
اللي بتشوفيه عندنا ده هو المعجزات بعينها
بس لو كلمتي المحافظ هايقول ولله المسئول مرفق المياه بالقاهره
ومرفق المياه هايقول ان مفيش فلوس
وكله هايرمي الامور على كله
بس لعلمك الواحد بردو في نعمه
انا شغال في أكتوبر
اقسم بالله العظيم المياه بتنزل من الحنفيه فيها حصى وتراب

سبهللة said...

يعنى ايه التجمع والمعادى هم التورتاية بتاعة المحافظة؟؟
انتى رحتى وادى حوف؟؟
تعرفيها؟؟
طبعا لأ
اهى وادى حوف دى حته كده شبه المعادى القديمه وهادية ورايقه وجميلة جدا
لان زمان كان ساكنها وزير فأهتموا بيها وبقت جنة ومازالت
أصل انا حلوانية قديمة
دة اولا

ثانيا
صحيح حلوان نفسها اتبهدلت دلوقتى
بس الراجل صراحة بيحاول يظبط
يمكن يكون مهتم بحلوان نفسها
لان التجمع والمعادى زى ما انتى قلتى تورتاية
مش محتاجين زواق

ثالثا
يمكن المية قاطعة عشان بيظيطوا مواسير او ممكن تكون ماسورة ضربت
هى سخيفة اوى فى الصيف ان المية تقطع
لكن احتمال يكون ليه عذره
خاصة وان علية القوم ساكنيين هناك ومش هايسكتوا

ربنا يفكها عليكوا ان شاء الله

akeed said...

انا مش فاهم الناس ديه مش عارفة اننا فى صيف وبنتحتاج الميه باستمرار اتحدى لو هذا الشخص الميه بتقطع فى بيته

شوكولاتة said...

ربنا يفك زنقتكم ياأبي
بس بقولك ايه البزنس مافيهوش ياما ارحميني من الأخر كده أنا الميه مابنقطعش عندي خالص عشان كده أنا هابيعلك جركن الميه بتمناشر جنية والمكسب كله ليا. هاه إيه رأيك قسمة العدل؟
ههههههههه

كلام فارغ اوى said...

احنا قعدنا في بورسهيد 4 ايام من غير ميه خااااااااااااااالص ولا كانت بتيجي اصلا عشان الناس تلحق تملا ميه وتحوشها
بجد زمن جاب لى الضغط انا كمان

GeHaD-----(male) said...

ههههههههههههههه
ياساتر علي الحقد

نفسي اعرف فين الشارع الصغنن اللي بنلف فيه حوالين نفسنا فاكرينه جامعه الدول دا
قوليلي فين؟

ابو على said...

عقبال النور يا ولا

عاشقه الاقصى said...

آبى

وحشنى كلامك
ووحشتينى
قلت آجى آطل

معلش يا آبى وبعدين ربع جنيه آيه يابنتى

قوليى 1ونص احلى

ونقسم سوا

قلم رصاص said...

والله فعلا حاجة تغيظ

انتوا عندكوا الميه تقطع دايما

واحنا الكهربا

بس الفرق بقى ان اما الكهربا بتقدع عندنا بتبقى مش غصب عن الشركة المسئولة لأ دا بيبقى بممزاجهم والله

والدليل انهم اما ببقوا فاكرين الموضوع بيقدعوا يقطعوا فيها يومينا بمدة اسبوع او 10 ايام

لكن لما بينسوا اهم بيبقوا ناسيين
ههههههههههههههههه

حاجات عجيبة والله مالها مثيل غير في مصر

مسكوف اوي لبلدنا من رأي اخونا الأستاذ أحمد الحيدر

فعلا الراجل عنده حق يستغرب ازاي يبقى عندنا النيل في مصر وده يحصل

لنا الله من قبل ومن بعد

شكرا يا ابي على البوست

ويارب تكون اخر مرة الميه تقطع فيها
هههههههههههههه

في حفظ الله

ويبقى الأمل said...

والله الموضوع اصلاً حاجه سلبيه من ضمن مجموعة السلبيات الي في مصر
===========
تعرفي هنا في الكويت مش ممكن حاجه زي دي تحصل اصلا
لأنه صاحب العمارة نفسه هو المسئول عن الحاجه دي وما بالك لو السكان اشتكوى عليه
=======
فمن غير ما حد يتكلم بتصرف في غضون ساعة بالكثير والله

ahmed_k said...

ههههههه تحبي أبعتلكم شوية ميه من عندنا
وأيه ذنب المحافظ بس يا آبي هو الراجل لحق مش لما يتظبط هو يبقى يظبط الناس
متقلقيش هانت كلها كام شهر وحتلاقي الميه زي البحر عندكم

BoBo said...

دول كانوا يومين نكد خالص اللي من غير الميه دول.. انا لحد دلوقت مالية البانيو ميه وسيباه احتياطي.. ما هو الواحد خايف الميه تعملها تاني وتتقطع.. منهم لله

اقصوصه said...

اممم

ازمة مياهَ

بصراحه

كان الله فالعون

خاصه بعز الصيف

يلا بكره تفرج

بسبكره متى عاد

الله اعلم :)

coraline said...

معلش يابنتى بكره الميه تيجى ان شاء الله والحياه تبقى زى الفل
ول الحنفيه اللى فى الجنينه باظت لاقدر الله
تعالى عندى فى المدونه عندى ميه كتير واحنا برده جيران يعنى والجيران لبعضيها

Appy said...

الميه جت
ومفيش تصليحات او صيانات ماسورة اتكسرت علشان الحفر بتاع الغاز
طيب بالعقل تأخد تلات ايام طيب ليه ومش اول مره تحصل ويعملوا ده







سبهله
اه الحقيقه رحت بس انا بتكلم عن التورتاه علشان الموقع والمكان جديد جدا يعنى كل الخدمات فيه المفروض تبقى فله القله
والحقيقه فعلا انتى لو شوفتى القاهره الجديده قبل ما ده يمسك هتفهمى الفرق فعلا انا اللى احس الفرق وانها طلعت من احسن ولا نزلت يا حبيبتى




ميرسى يا شوباب منجلكوش فى ميه مقطوعه ابدا وربنا يهد المحافظ وسنينه

Appy said...

جهاد
=========
شارع شارع القومجيه حاجه كده شارع مكسر ومنيل والكافيهات لازقه فى بعض وفرحانين بيه اوى مش عارفه على ايه
(وش بيطلع لسانه)